بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذرياته وأل بيته، كما صليت على آل إبراهيم إنك حميد مجيد.
أما بعد، الدرس الثالث من دروس أمة، وهو بعنوان قلب سليم. من أين جاء هذا العنوان؟ من القرآن، فقد وردت كلمة قلب سليم مرتين في القرآن. الموطن الأول: ﴿يَوْمَ لَا يَنفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ﴾ [الشعراء: 88-89]. الآية الثانية عجيبة؛ لأن دورتنا بعنوان أمة، وقد قال الله تعالى عن إبراهيم إنه كان أمة، ووصفه الله عز وجل في آية أخرى بالقلب السليم، قال سبحانه وتعالى: ﴿وَإِنَّ مِن شِيعَتِهِ لَإِبْرَاهِيمَ * إِذْ جَاءَ رَبَّهُ بِقَلْبٍ سَلِيمٍ﴾ [الصافات: 83-84]. فإذا أردت أن تكون رجلاً أمة، فلا بد أن يسلم قلبك. إذًا عنوان الدرس هو قلب سليم من هذين الموطنين في كتاب الله عز وجل.
قلب سليم من ماذا؟ أولاً من الشرك، ثم من البدع، ثم من آفات القلب. كذلك قلنا إن العلم هو أساس البناء، وهذا النوع من البناء هو الأخطر، وهو البناء التربوي التزكوي. نحن نتكلم اليوم عن البناء التربوي التزكوي.
أمامنا فئتان من الناس؛ فئة هي باذلة أو معطية لوحدها، أي أن قرارها من دماغها، كمن يفتح الكاميرا ويقدم محتوى. والفئة الثانية هي في كيان، سمِّه داراً أو أكاديمية أو كياناً دعوياً، وفي هذا الكيان معلم أو معلمة، وهناك مدير أو أصحاب قرار. فإذا كنت أنت رأس الكيان، صاحب الدار أو مدير المدرسة، فمهم جداً أن تضع للناس الذين تحت إدارتك خطة يسير عليها الفريق كله. مثلاً، يمكن أن تقيم لهم دورات داخل الدار، أو تشترك لهم في معهد معين، المهم أن نضع خطة ونستثمر في الناس.
أما إذا كنت واحداً داخل الكيان، فانظر؛ إن كان الكيان مهتماً بهذا الأمر، فادخل معهم. وإن لم يكن مهتماً، ولا توجد خطط، فتخاطب رأس الكيان؛ صاحب الدار أو المسؤول عن القسم الشرعي، وتقترح عليهم كذا وكذا. عملوا فبها ونعمت، لم يعملوا فاجعل لك مسارك الخاص؛ مساراً علمياً، وتربوياً، وتزكوياً، وتعبُدياً، ولا تترك نفسك هكذا. هذا الخطاب موجه لكل هذه الفئات.
العلم هو أساس البناء، والتربية هي أهم البناء؛ لأنها تخاطب أخطر أمور ستواجهها وأنت في الدعوة. فمثلاً، حديث النعمان بن بشير: «إن الحلال بين وإن الحرام بين، وبينهما أمور مشتبهات»، قال في آخره النبي صلى الله عليه وسلم: «ألا إن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب». فلو أصبحت مشهوراً، وعندك متابعات كثيرة، ثم فسد قلبك، فقد ضعت بفساد القلب.
البناء العلمي من جملة أدلته حديث عائشة: «من عمل ليس عليه أمرنا فهو رد»، فالبناء العلمي ضروري لتعرف هل عملك يوافق أمر النبي صلى الله عليه وسلم أم لا. نرجع للبناء التربوي التزكوي، وهو يحل الإشكالات الأربعة الكبرى: الشهوة، والشهرة، والرئاسة، والمال.
أيضاً مما يجعل التربية أهم البناء، أن نظر الله عز وجل إلى القلب؛ قال النبي صلى الله عليه وسلم: «إن الله لا ينظر إلى صوركم ولا إلى أجسامكم، ولكن ينظر إلى قلوبكم وأعمالكم». فإذا كنت وأنت تفتح الكاميرا لتقدم فيديو، تهتم بملابسك، والساعة التي تلبسها، والسيارة التي تركبها، لتبدو بشكل معين أمام الناس؛ فهذا كله لا ينظر الله إليه. وإذا لم تُصحح النية، فكل هذا العمل مع خراب القلب يضيع. فإذا كنت تنفق وقتاً لتضبط مظهرك لأن الناس تنظر إلى صورنا، فعليك أن تنفق وقتاً أكبر لتضبط قلبك لأن الله ينظر إلى قلوبنا. فكلما أردت فتح الكاميرا، راجع نيتك وقلبك، وحاسب نفسك.
نقف هنا ونرجع بعد الصلاة. سبحانك وبحمدك، نشهد أن لا إله إلا أنت، نستغفرك ونتوب إليك. بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذرياته وأل بيته، كما صليت على آل إبراهيم إنك حميد مجيد.
كنا نقول: إذا كان العلم هو أساس البناء، فالتربية هي أهم البناء. وأكدنا على ذلك بحديث النعمان بن بشير، وبأن القلب محل نظر الرب سبحانه وتعالى. لذا، إذا كنت داعية أو محفظ قرآن، عليك أن تضبط قلبك وأنت داخل الحلقة؛ هل أنت داخل لله وبفضل القران، أم من أجل المال أو الشهرة؟ فالتربية هي أهم البناء، لأن الطريق إلى الله عز وجل تُقطع بالقلوب لا بالأبدان. فبذلك القلب الذي به تُقطع الطريق، شارك أصحاب الأعذار الذين حُبسوا عن الغزو في أجر المجاهدين، لأنهم ساروا إلى الله بالقلب.
في الحديث: «إنما الدنيا لأربعة نفر»، فكان فيهم رجل آتاه الله علماً ولم يؤته مالاً، قال: «فهو بنيته فأجرهما سواء». فهذا قطع الطريق إلى الله بقلبه. وأثر عبد الله بن مسعود: «أنتم أكثروا صلاة وأكثروا صياما من أصحاب محمد صلى الله عليه وسلم»، يخاطب التابعين؛ يعني ظهر فيهم شدة في التنسك والتعبد، وهذا مطلوب، هذه حاجة كويسة مش حاجة وحشة. قال: «وهم كانوا خيرا منكم». أنتم خلوا بالكم هنا ابن مسعود مش بيتهم نواياهم، خلوا بالكم خالص، أنتم أكثر عبادة، إحنا طبعا النهارده الحمد لله إحنا أكثر عبادة، ولا طيب؟ ليه كانوا أزهد منكم في الدنيا وأرغب منكم في الآخرة؟ الزهد والرغبة ده عمل إيه؟ عمل قلبي، تخلية ولا تحلية؟ تحلية، لا يعني ده معنى، يعني لما نقول زهد ده معنى حلو ولا معنى وحش؟ حلو. رغبة في الآخرة معنى حلو ولا معنى وحش؟ يبقى إحنا بنحلي القلب، ممكن بقى عشان تحلي نقول لك بس هتخلي عشان تزهد في الدنيا، يبقى إيه؟ تخلي قلبك من حب الدنيا، آه مفهوم طبعا، إنما في الآخر الزهد والرغبة في الآخرة تحلية مش كده. فبذلك فضل الصحابة على من بعدهم.
وقال بكر المزني: ما سبقكم أبو بكر بكثرة صيام ولا صلاة، ولكن بشيء وقر في صدره. نفس المعنى برضو. وفاطمة بنت عبد الملك كانت امرأة عمر بن عبد العزيز، قالت بعد وفاته، سئلت بعد وفاته عن عمل عمر فقالت: والله ما كان بأكثر الناس صلاة ولا بأكثرهم صياما، ولكن والله ما رأيت أحدا أخوف لله من عمر. الخوف ده معنى إيه؟ تحلية. لقد كان يذكر الله في فراشه فينتفض انتفاض العصفور من شدة الخوف، حتى تقول ليصبحن الناس ولا خليفة لهم. هيموت من كتر فرقه وخوفه من الله سبحانه وتعالى، فبذلك ساد عمر.
ولما بنقول يا جماعة إن الطريق إلى الله يقطع بالقلب، ولذلك كان أهم البناء، يعني من الحاجات اللي خلت الاهتمام بالقلب اهتمام بالتزكية والتربية أهم البناء؛ فنقصد أنها تقطع بالقلب فعلا وتركا، ودي نقطة مهمة جدا جدا ومهمة للدعاة، مهمة لمحافظين القرآن، مهمة اللي هي إيه؟ إن الطريق إلى الله تقطع بالقلب فعلا وتركا. فعلا زي كل اللي شفناه؛ يعني الزهد حاجة هتعملها، يعني حاجة هتحصلها، الرغبة في الآخرة حاجة هتحصلها، الخوف حاجة هتحصلها.
لكن عندنا حديث عجيب الذي هو: «يطلع عليكم رجل من أهل الجنة»، يوم في الثاني في الثالث نفس الرجل يطلع، صحابي أنصاري. فعبد الله بن عمرو يقول لأهبّت معاه بقى وأشوف القصة دي، يبات معاه يلاقي عمله عادي زيه زي أي صحابي عادي، ده اللي هو عادي، اللي هو كتير يعني. يعني مفيش حاجة تشد يعني، فيسأله في الآخر: ده أنا جيت عشان اتقال واحد اتنين تلاتة، أنا عاوز أعرف إنت بتعمل إيه؟ فالعجيب بقى في الحديث إنه طلع ما بيعملش حاجة، طلع ما بيعملش. قال له: والله هو اللي إنت شفته ده، مش كده، غير إني لا أجد في نفسي لأحد من المسلمين غشا، ولا أحسد أحدا على خير أعطاه الله إياه. يعني أنا ما بغشش وما بحسدش. ده اللي إحنا نقدر نحطه تحت التخلية. أي حاجة ما بعملش، يبقى دي التخلية. حاجة بعمل في أعمال القلوب يبقى دي التحلية. فهمنا دي، فببساطة التخلية هي ما بعملش، ما برائيش، ما بحسدش، ما بغتبش، أو بلاش لا خليها في القلب، الغيبة جوارح، ما أي حاجة بقى، والتحلية بعمل بقى اللي هو بزهد، بخاف، بأرجو، بتوكل، كده أظن المسألة نورت شوية، إحنا محتاجين نشتغل على إيه في أنفسنا في قلوبنا، ماشي تخلية وتحلية.
إحنا ليه برضو قلنا إن هذا أهم البناء؟ طبعا إحنا قلنا كذا حاجة، حد يعرف يقولهم كلهم؟ قبل ما اللي هيرفع إيده هيقولهم كلهم ونعاقب بقى لو ما قالش كلهم، يعزمنا على هو هنا ما جابوش النهارده باتيهات وحاجات ليكم صح؟ جروا رجلكم أول مرة وماشي، قول. حديثنا بنشير ماشي يبقى إن القلب إذا صلح صلح الجسد كله، إذا فسد فسد الجسد كله، فكان أهم البناء إيه تاني؟ طريقة بالأبدان. ماشي طبعا إيه الآيتين بتوع سيدنا إبراهيم، من أكبر قلب سليم، ما قلناش دي هنا، لا قلناها في البداية، لا قلناها خلاص، عادي يعني مش هنخسر بعض عشان نظر الرب، إن القلب محله نظر الرب، ماشي. قلنا حاجة تانية ولا خلاص كده؟
ماشي، من الحاجات المهمة جدا بقى يا جماعة وتجعله أهم البناء أنه وأنتم على تلك الثغور، هذه الثغور آمنة ولا مخوفة؟ أنتم عارفين الثغر في الحرب، المرابطة لها ثواب كبير في الحرب، وأثوابها الرباط على ثغر مخوف، يقولوا كده في الفقه، اللي هو مثلا إحنا في مصر هنرابط مثلا على الحدود الشرقية ولا الحدود الغربية، فيقول لك الشرقية مثلا ملتهبة دلوقتي بقى وغزة والأحداث وبتاع، فيقول لك الثغر المخوف الرباط عليه. أثوب ثغورنا التي نحن عليها الآن اللي في الدعوة واللي في القرآن، هذه الثغور آمنة ولا مخوفة؟ هو اللي يجاوب لازم يفهم السؤال، ما بقول لك هي مخوفة، هو هي الظاهر كده تطلع مخوفة، ما أصل لو آمنة مش هيتسأل السؤال، مش كده؟ يعني إيه مخوف؟ أقصد وأنت على الثغر ده ممكن تلاقي نفسك في الآخرة رحت النار بسبب الحتة اللي أنت فيها.
ناخذ أمثلة عشان نبقى فاهمين، القرآن الناس اللي بتحفظ القرآن، فالقرآن قال صلى الله عليه وسلم فيه: «خيركم من تعلم القرآن وعلمه»، شايفين الثواب عامل إزاي؟ لكن في نفس الوقت: «أكثر منافقي أمتي قراؤها»، في نفس الوقت أول من تسعر به النار ثلاثة، أول واحد قارئ في رواية، يبقى ده ثغر مخوف. يعني إيه ثغر مخوف؟ يعني ممكن أبقى أنا باذل عمري هنا وفي الآخر النية ما كانتش مضبوطة، إن هي كانت إيه؟ الدولارات. دلوقتي خلاص القرآن بقى حد هنا فقير بيعلم قرآن بالجنيه المصري؟ كله دلوقتي شغال خلاص بالأخضر دلوقتي مصيبة كبيرة. من العلامات اللي تعرفك أصل إحنا عندنا مشكلة كبيرة في حتة الرياء، إنه الواحد ممكن ما يبقاش عارف قوي هو أنا مرائي، هو أنا ما يبقى يعني ما يبقاش، فبنحاول ندي شوية علامات كده وده مش درس في الرياء بس يعني هي جت كده فنقولها يعني. إنك اللي بيحفظ بقى بالفلوس، لو جالك واحد يحفظ مجانا، إيه واقع ده على قلبك؟ أول حاجة هتعمل ده ولا مش هتعمله؟ حاجة لو عملته هتبقى مرحب به ترحيبك بالتحفيظ نفس ترحيبك للي بيحفظ بالدولار، يعني من جواك كده مستبشر به خيرا ومبسوط إنه موجود وأنه كذا وكذا، ولا بتستثقل الوقت ده، فتلاقي نفسك متضايق لو مثلا اتأخر، عن بتاع الدولار طبعا بتفضل قاعد. فدي شوية علامات توريك إن أنت الأمر ده بالنسبة لك إيه.
طبعا ساداتنا، سادات القرآن يعني، قال إيه عنهم؟ مين معاه قراءات هنا حافظيه هنا بتاع قراءات؟ الشاطبي قال إيه؟ لما جه يتكلم عن اللي هيختارهم بقى عشان يتكلم عنهم السبعة وكل واحد ليه راويين، فقال إيه؟ وسوف تراهم واحدا بعد واحد، مع اثنين من أصحابه متمثلا، وبعدين تخيره نقادهم كل بارع، وليس على قرانه متأكلا. ماشي، مين اللي كان واحد منهم؟ يعني ما كانوش بياكلوا بالقرآن، يعني ده معنى البيتين يعني، حمزة حمزة الزيات أظن كان ما يقبلش أي حاجة من طالب حفظ عليه القرآن، لدرجة إن مرة واحد جابله مية، كوباية مية، قال له: قرأت علي هو أنت قرأت علي قبل كده؟ قال له: آه، فلم يقبل، فكان عندهم شدة في الحتة دي وبذلك سادوا. طب ده حرام؟ مش حرام، خلوا بالكم يعني مش حرام، إن يجيب لك كوباية مية فتأخذها ده مش حرام. ماشي طيب أخذ الأجر على القرآن خلاف معروف في الفقه، فلو أنت واخد بأنه جائز فخلاص، صار في حقك ليس حراما، إنما النية إيه؟
إحنا بنتكلم دلوقتي يعني، أنا باخد الأجر آه بس أنا لا، أنا نيتي لله سبحانه وتعالى، ولا لأ ده أنا عشان الفلوس، فلما لو جي مثلا إنه لو جه أداني الظرف في آخر، وبفتح الظرف لقيت فلوس غير اللي أنا متوقعها هغضب وهزعل، مثلا، أو لو أُعسِر فأحاول أزحلقه بالطريقة عشان أشوف غيره، البيزنس يشتغل إحنا فاضيين، إحنا الناس بتاعة ناخد عليها ثواب دي مش فاضيين لهم، فهذا هو الإشكال، ده الإشكال يا جماعة، إن لو دخلنا الأعمال الشرعية واحدة من الأربعة دول، دي أكبر أبواب، في أبواب تانية بس دول أكبر أبواب، لو دخلت واحدة من الأربعة دول الأعمال الشرعية بقينا أقرب لأنه نفقد فيها الإخلاص، سواء عمل هبقى مشهور فيه أو عمل هبقى الريس فيه، وقلنا لكم قبل كده الشهرة غير الرئاسة، يعني كل واحد يبقى ريس ومش مشهور، قلنا لكم قبل كده الكلام ده يعني إيه يبقى مثلا هو مش مشهور ولا ليه صفحة على مش عارف إيه، ده بس بتوع اللي ليهم صفحة يرجعوا له وياخدوا رأيه وبتاع، هو يحب دي تبقى جواه كده إنه مبسوط بيها كده إنه الريس، أو مال، أو نساء، يعلم نساء مثلا، أو يبقى خطابه الدعوي موجه للنساء، أول ما بتدخل واحدة من الأربعة دول فالأمر بيبقى في غاية الخطورة، إن إحنا نحرز الإخلاص فيه هتبقى حاجة خطيرة جدا، ومش عاوز أطول في الحتة دي علشان هنتكلم عنها إن شاء الله في مدد الدرس الرابع إن شاء الله هنتكلم إحنا ليه محتاجين ده، محتاجين للأعمال التعبدية، فساعتها هنقول في فرق أساسي بين الأعمال اللازمة والأعمال المتعدية، الأعمال اللازمة أقرب للإخلاص فهنتكلم فيها وقتها إن شاء الله فمش وقتها هنا.
يقولوا تسمى حمزة الزيات طبعا في روايتين إنه تسمى حمزة الزيات ليه؟ الرواية اللطيفة اللي فيهم طبعا الرواية العادية كان أبوه بيبيع زيت، في رواية تانية إنه كان وهو طفل صغير القرآن ما كانش منقوط، فكان بيقرأ قدام أبوه: {آلم * ذَلِكَ الْكِتَابُ لا زَيْتَ فِيهِ}، فقال: قم فتعلم على يد شيخ، فسمي بحمزة الزيات علشان كده. كنا بنقول إيه؟ دخلت حاجة، آه فإحنا محتاجين بقى يا جماعة الاهتمام بالقلب. طيب الاهتمام بالقلب نعمله إزاي؟ أوله العلم، يبقى أول حاجة العلم إن أنت تعرف الحاجات دي، عشان نلخص عليكم ده بقى، إحنا نقدر نوجه فيه توجيه، يعني لأن ده هنتفق فيه كلنا العلم الأولاني اللي هو مبحث العلم كان فيه اختلافات كتير وكده، فإحنا نقدر نبدأ بربع المهلكات وربع المنجيات من مختصر منهاج القاصدين بشرح أي حد بقى موجود، موجود هتلاقوه على التليجرام قراءة وتعليق بسيط كده، لو أنتم عارفين حد تثقوا فيه شرحهم ماشي، عاوزين تسمعوا القراءة السردية دي مع التعليقات البسيطة وإن شاء الله تبقى مفيدة برضو، فده نحرز بداية بداية التخلية والتحلية للقلب. خلوا بالكم يا جماعة إحنا كده أحرزنا العلم يبقى إيه بقى؟ العمل، إنك أنت عرفت الرياء، أنت جاهدت الرياء، ده موضوع تاني، إحنا مش جايين هنا نخليكم توسوسوا بعيد الكلام تاني فنوقف أعمالنا الشرعية، مش بقول كده بس نعملها صح، نعملها صح فإحنا اللي عاوزين نوقف أعمال شرعية قائمة ولا جايين نثبطكم، بس جايين نقول لكم الطريق أهو اشتغلوا صح.
إحنا فين؟ يعني إحنا ممكن نقف كده، لأن أنا أظن كلكم أو معظم الناس بيسمعني، فإنا بتكلم في الحتة دي كتير، فبتهيق لي هيبقى كلام مكرر لو قعدت أتكلم كتير في آفات القلوب والحاجات دي، يعني كان المفروض الخطة إن بنقعد نتكلم بقى عن آفات تلاتة هنا وحاجتين تلاتة هنا من الحاجات اللي المفروض نحل بها القلب، بس اليوم النهارده مضغوط شوية والحاجات دي الحمد لله يعني الناس اللي متابعة معايا بتسمعها كتير، بس خلي قدام عينيكم دايما الأربع حاجات دول، حاولوا تبقى قدام عينيكم دايما.
كيف أتأكد إن نيتي صالحة وأني لا أخدع نفسي؟ صعب جدا جدا، يعني ممكن الواحد يبقى فاكر نفسه مخلص ويطلع مش مخلص في الآخر، وده برضو ما هياش دعوة للوسوسة، لكن نبقى عارفين إن إحنا في جهاد إلى أن نموت. طب بعد ما تجاهد هتبقى؟ لأ، مش متأكدين من حاجة، مش متأكدين، فهي ما فيهاش السؤال ده ما فيهوش يعني مفيش حد يقدر يحط إيده كده على حاجة يقول لك أنا مخلص في دي. هيجي معانا إن شاء الله في مدد الدرس الجاي، هنقول أثر سفيان الثوري إنه أي عمل معروف أو منتشر أو كده لا أعده، يعني هو عشان يخلص من القصة دي هو في باب كده كامل من أعماله هو مش حاسبها معاه أصلا، أي عمل معروف أنا لا أعده، لا أعده شيئا، يبقى الجزء التاني أعده، مش عارفين يعني بس هو بيقول كده هو بيقول: أنا ده سفيان الثوري يقول أنا بقى قعدت مجلس تحديث، لأن سفيان الثوري محدث، أحدث، أحدث ده يعني بحدث نفسي ولا قدامي ناس؟ قدامي ناس، لا أعد خلاص، ده أنا هو.
بيحسب كده يوم القيامة أما أجي هذا المجلس. هيجي معانا بقى في مدد، ليه بيقول ده؟ هو عشان خاطر السؤال إنه صعب جداً، صعب جداً وشهوات القلب شهوات خفية، وعشان كده دائماً بنبقى عاوزين نقعد نستنبط علامات اللي بيها نعرف. يعني مثلاً اللي يقول لك: أنا لا أحب الرئاسة، فنقول له: طيب لو رحت مجلساً وأنت متصور في المجلس ده إنك هتقدم وأنت اللي هتصدر، فلقيتهم عادي عاملوك زيك زي أي واحد، وأنا دخلت ما حدش أهتم بي، فاقعد متلقح في أي كرسي أنت، فلو لقيت نفسك حصل جواك شيء وإن المجلس ده ثقيل على قلبك، يبقى أنت عندك حب الرئاسة.
خلي بالك أنت ممكن تكون وأنت بتقول: أنا ما عنديش حب رئاسة، صادق في ظنك، مش بتكذب، يعني مش جواك حب رئاسة وشايف حب الرئاسة وبتقول لا، أنت ما كنتش تعرف، لكن لما حصل الموقف ده، علامة بقى. ماشي، أنا لا شهرة إيه يا شيخ، لا مش بتاع الكلام ده، فلما تخش مكاناً متوقعاً إن الناس المفروض تكون عارفاك فتلاقي عادي خالص داخل، لو حسيت إنه يعني ما كنتش أتمنى أبقى كده، أتمنى إن الناس تيجي وتسلم وتعمل، فاعرف إن لا في عندك مشكلة وإنك عاوز الشهرة. بنحتاج إننا وده بقى موجود في ربع المهلكات هتلاقوه إن شاء الله اللي هيسمعه، يعني محتاج علامات تبقى باينة لك ده لأنه الموضوع خطير. فالإجابة المباشرة على السؤال: إزاي أعرف إن نيتي صالحة؟ مش هنعرف، هنعيش ونموت نرجو ذلك، إنما تقول ١٠٠٪ أنا نيتي صالحة ده مش هنوصل له، ما نعرفش.
طبعاً فيه آثار كثيرة عن السلف إنهم يتهمون نياتهم ويتهمون تقواهم، ومعروف ابن عمر: لو علمت إن الله تقبل لي ركعتين ما أحببت البقاء في دنياكم؛ ليه؟ لأن الله يقول: ﴿إِنَّمَا يَتَقَبَّلُ اللَّهُ مِنَ الْمُتَّقِينَ﴾ [المائدة: ٢٧]. فهو ما يقدرش يأكد إن الركعتين دول ربنا تقبلهم ليه؛ لأنه بيتهم تقواه، والتقوى أصلها في القلب، وهكذا. فإحنا عشان برضه ما يبقاش فيه يأس، بنجتهد، ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾ [العنكبوت: ٦٩]. بنجتهد ونفضل، خد قاعدة في طريقك إلى الله: دينك يصلح على الاتهام، دينك يصلح على الاتهام؛ يعني طول ما أنت ماشي في طريقك لربنا اتهم نفسك اتهاماً لا يقعدك، يعني ما يخرجكش للقنوط، إنما أنا راضي عن نفسي النهاردة الحمد لله، راضي عن نفسك دي اعرف إنك لا أنت عارف نفسك ولا أنت عارف ربك.
راضي عن نفسك يبقى أنت مش عارف نفسك ولا عارف ربك، ما هو أنت راضي عن نفسك، سيبك من نفسك دي اللي أنت مش عارفها، دي ربك اللي هو الملائكة الراكع اللي من أول ما اتخلق لغاية يوم القيامة واللي ساجد، هيقولوا إيه: «سبحانك ما عبدناك حق عبادتك». أنت عشان يوم واحد عدى عليك مثلاً قريت لك في جزئين ثلاثة أنا راضي عن نفسي، راضي عن نفسك فين؟ فإنت ما انتاش عارف ربنا ولا عارف نفسك، فإنت جاهد، وربنا لما يشوفنا يرانا بنجاهد أنفسنا، يعني نرجو المسامحة ونرجو المغفرة ونرجو العفو والصفح. خلاص، يعني كأني بلسان الحال: يا رب ده اللي في إيدي، يا رب يعني بجاهد نفسي، يا رب فلو حصل حاجة كده ولا كده نرجو منه المسامحة، إنما مش في دماغنا وماشيين زي ما إحنا، واللي بيحفظ عشان الدولارات بيحفظ عشان الدولارات، واللي بيدعو عشان الشهرة بيدعو عشان الشهرة، ولا حد بيجاهد نفسه، فيعفى عن أمثالنا إحنا.
هل النشأة في بيئة محافظة منزلياً والتعلم في الأزهر في المرحلة الإعدادية والثانوية العلوم الشرعية مع اتباع منهج أهل السنة، هل هذا كافي للعمل في الدعوة؟ هو سؤال عريض قوي، وكيفية التغلب على حظ النفس وحب التصدر والظهور. أحياناً كثيرة اقرؤوا بقى ربع المهلكات يعني في باب الرياء هتعرفوا ده إن شاء الله. بحيث بجد في نفسي أحياناً حب الظهور، اختفي، عامل نفسك بنقيض قصدها. حب الظهور يقصم الظهور، به تصير جاهلاً مغروراً، وتفقد الإخلاص والتجرد، وتألف الغرور والتمرد، فمش عاوزين نبقى ناس بتاعة شهرة وبتاعة أضواء وبتاعة مش عارف إيه. وأما بيجيلي حد من الأشكال دي دائماً أقول له: سيبك من الكاميرات واقعد كده شوية، ده بيبقى اختبار نشوف أنفسنا إحنا نقدر نعمل ده ولا ما نقدرش نعمل ده، أو بيحب يتنطط في الأرض من الجامعة دي للجامعة دي ومن المقرأة دي للمقرأة دي، فاقول له: لا اركن أنت بقى شهر كده، مش عاوزينك تتنطط، ده بيبقى اختبار ليه، ليه؟ عشان تنكشف أمام نفسك، اللي هو إيه؟ لا أنا عادي ممكن أسيب، طب سيب، مش أنت ممكن تسيب؟ يوم ما يسيبش، فيبقى أهي دي علامة إحنا بنقول إحنا عاوزين علامات.
فأنا حابب الظهور، خلاص أنا دلوقتي واحد بيقول أنا حابب الظهور، مش بيقول أنا مش عارف، أنا واحد بيقول كده أنا حابب الظهور، فأول العلاج إنك تعامل نفسك بنقيض قصدها، يعني أنت عاوزة تظهري طب هديكي بالصرمة، ما فيش ظهور، ما فيش ظهور يبقى إيه؟ تبقى بطال قاعد؟ لا، خدها بقى شوية في التعبد، خدها شوية في الذكر، خدها شوية في إنك تعمل أعمال تكسر بيها نفسك. يقول الشعراوي رحمه الله في يوم كان في مكان ولا حاجة شالوا عربيته بيه، مش شالوه هو يعني الناس تزاحمت من كتر حبها في الشيخ رحمه الله شالوا عربيته هو في العربية شالوه بالعربية، ففي الليلة دي نزل نظف حمامات المسجد، دخل بالليل ونظف، قعد ينظف الحمام بتاع المسجد، يعني كأنه إيه، أنس شيئاً في قلبي ولا شيء، فممكن تبقى ده.
طيب، حاجة وده مهم إننا افتكرناه يعني كان المفروض أقوله في الدرس بجاوب على إن أنا بحب الظهور، فنقول إيه؟ عامل نفسك بنقيض ما تريده منك تحدياً لنفسك. ثاني حاجة: ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: ٤٥] وده أصلاً ده بقى حاجة في بداية الدرس بتاع قلب سليم، إزاي القلب يبقى سليم؟ استعينوا بالصبر والصلاة، الصبر هنا الصوم على تأويل بعض العلماء، طبعاً فيه خلاف، يبقى معانا صوم كثير وصلاة كثيرة، ده يعينك على قلبك. قال ابن رسلان في الزبد: فكن من الإيمان في مزيد، وفي صفاء القلب ذات جديد، بكثرة الصلاة والطاعات، وترك ما للنفس من شهوات، فشهوة النفس مع الذنوب موجبتان قسوة القلوب، وإن أبعد قلوب الناس من ربنا الرحيم قلب قاسي. فيبقى عاوزين ننقي القلوب، ننظف قلوبنا دي، فكن من الإيمان في مزيد، القلب ذات جديد بكثرة الصلاة والطاعات، من جملتها الصوم وترك ما للنفس من شهوات اللي هو إنك تعاملها بنقيض قصدها، بنقيض ما تريده منك، فشهوة النفس مع الذنوب موجبتان قسوة القلوب، يبقى قلوبنا بتقسى ليه؟ إيه غرقانة في الشهوات وغرقانة في الذنوب، تلين إزاي؟ تيجي منين دي؟ فادي أهو الطريق: يبقى معاك كثرة صوم، كثرة صلاة، كثرة دي يعني إيه؟ زي بعض مشايخنا يقول لك إيه: روح هات ألف ركعة وبعدين تعال، يعني يجي واحد يشتكي له يقول له كذا، يقول له طب هات ألف ركعة وبعدين تعال، بقى نقعد نبتدي نتكلم، بس خلص ألف ركعة وتعال لي، فممكن يبقى واجب الأسبوع ده إن شاء الله، إيه رأيكم؟ هعمل عليك دلوقت تكليف، وهطردك لو ما عملتوش من كل حاجة جاية ما عدا قلبي، مش هعرف أعملها دي، مش هعرف أطردك من قلبي.
يبقى دي حاجة، الحاجة الثالثة ركزوا يا جماعة في ده اللي بنقوله ده، يبقى إحنا اللي عارف عنده مشاكل هيعامل نفسه بنقيض ما ترجوه منك النفس، ثاني حاجة كثره الصلاة وكثرة الصوم واستعين بصبر، ثالث حاجة بالاربع حاجات اللي دايما نقولهم اللي هم بيساعدونا في الطريق، أربع حاجات نقللها، مين يقولهم؟ قلة الكلام، وقله الطعام، وقله المنام، وقلة الأنام الخلوة، يبقى أربع حاجات تستعين بها في طريقك، ودول عليهم مدار كلام الناس اللي بتتكلم في القلوب والحاجات دي، الحتة بتاعة الصوفية والحتة دي، أربع حاجات: قلة المنام، قلة الكلام، قلة الطعام، قلة الأنام. يبقى دي حاجة تستعين بيها برضه على نفسك وعلى قلبك، ومش وقت نشرح كل واحدة من دول، فبس ممكن تلاقوا بقى في دروس كتير موجودة يعني رمضان الجوع اتكلمنا عن هتلاقوها، مش عاوز أتكلم، الخلوة إحنا أصلاً شارحين كتاب العزلة للخطابي، وشارحين العزلة بتاع منهاج القاصدين، فشارحين كلام كتير في العزلة اللي هو قلة الأنام.
فها ماشي، هتلاقوا كلام كتير فيها، يبقى أربع حاجات أهم كمان معاكم تساعدكم، ولما نقول قلة الأنام طبعاً سواء حقيقيين أو افتراضيين، ما تقولش الحمد لله الحمد لله ما خرجتش من البيت، بس ٢٤ ساعة ماسك الموبايل، فأنت بره، يعني مطلع على العالم كله، لا. كيفيه التغلب على حظ النفس وحب الظهور، هو ده خلاص ده اللي قلناه صح، ده خلصان ده. عند الإحساس بعدم خلوص النية في الدعوة، هل يجب التوقف حتى أتخلص من هذا الإحساس، أم أكمل؟ الجواب على هذا السؤال هو سؤال مهم جداً جداً، يعني ده من أهم الأسئلة اللي بتتسأل أصلاً في الباب ده، اللي هو من الآخر طب أنا حاسس بكذا، أكمل ولا أقف؟ ده أهم سؤال بيتسأل دائماً، والإجابة على السؤال ده العلماء منهم من يقول بهذا ومنهم من يقول بهذا، يقول لك أقف واضبط نيتك، والثاني يقول لك لا ده وسواس كمل وعالج نيتك.
طب يعني هنعمل إيه دلوقتي؟ يعني الاختيار والله أعلم إنك تكمل وتجاهد، إنك تكمل في طريقك وتجاهد نفسك. طب ليه ده الاختيار؟ لأن الآن المغريات كثيرة والدنيا يعني بنخاف نقول لك أقف فتروح خالص تنتكس، يعني أقف يعني إيه؟ يعني سيب الدعوة، سيب الدعوة يعني سيب إخوانك اللي معاك في الطريق وسيب مش عارف إيه، وتقول لي أنا عاوز أبني، لو هتعرف تعمل ده وعاوز تعمل ده، أعمل ده، يعني لا أنا عندي مثلاً الدورة الفلانية في مثلاً ربع المهلكات أو الدورة الفلانية في ربع المنقيات هخلصها، إنما ما توقفش، لا ما توقفش أعمالك، اشتغل وحسن نيتك. ده أنت يا يوسف كيف أكون تلميذك؟ طب أنا عاوزك تبقى أنت، ده أنا بحبك مش عاوز يبقى تلميذ يا يوسف، لا، عاوز ولا مش عاوز كلمة ورد غطاها، عايز؟ خلاص ماشي بعد الدرس نتفق، ما فيش تلاميذ ما عنديش يعني حاجة خاصة دلوقت بتتعمل، فموجود دلوقت دروس العصر والفجر دي أون لاين، فتقدروا تحضروها، والدرس العام، وأنتم عارفين فين وإمتى، والدرس الثاني عارفين فين وإمتى برضه.
الواحد يعمل إيه بشكل عملي قبل العمل عشان يظبط قلبه؟ يعمل إيه؟ يخلص ربع المهلكات وربع المنقيات. أجهز قلبي قبل العمل ولكن عندما أبدأ العمل يملأ ذهني الوسواس، فكيف أعلم إن كنت مخلصاً؟ ما فيش حاجة نعرف بيها، إنما ده بيحصل، ولذلك إحنا محتاجين دائماً نجدد نيتنا ودايماً نقف ونكلم، أنا مش عاوز أحول الدرس على الرياء وعلاج الرياء والحرب المهلكات، لأنه ده جزء، يعني الرياء أنا أظن خدناه قراءة سردية مع تعليقات باين في أربع مجالس، يعني لو فاكر صح يعني في الحدود دي ده قراءة سردية مع تعليقات ما بشرحش، فمش هينفع نقول ده هنا، فاسمعوه في ربع المهلكات.
إيه معنى فتنة النساء بالنسبة للداعية؟ فتنة النساء عموماً على أي رجل فتنة عظيمة، يعني عموماً: «ما تركت بعدي فتنة أضر على الرجال من النساء»، ده كلام النبي عليه الصلاة والسلام. عشان كده بنقول ما تتجوزوش، ما هو النساء فتنة، تجيب الفتنة معاك في البيت ليه؟ الإمام النووي استدل بهذا الحديث على مذهبه في إن طالب العلم ما يتجوزش، يعني من ضمن الأدلة راح جايب الحديث ده.
قال لك النساء فتنة، فأنت جايب فتنة تحطها! سامع يا أحمد؟ ما فيش جواز، أنت كتبت كتابك ولا لسه ما عزمتنيش؟ باطل، كاتب الكتاب ده باطل. هي معاك هنا؟ أنت تروح لواحدة كده تروح لوحدها؟ لا يجوز، أن تروحوا مع بعض.
ماشي، فكنا بنقول إيه بقى؟ ففتنة النساء عموماً فتنة صعبة على أي رجل. لما تكون فتنة امرأة واحدة على رجل تبقى أصعب ولا فتنة 10 نساء على رجل، ولا فتنة 100، ولا فتنة 1000؟ فمش عاوزين فلسفة، كل ما يكون التعرض لمثل هذا أكثر تبقى الفتنة أكبر. فالداعية بحكم أنه متعرض للناس عموماً اللي من جملتها النساء، فبيبقى متعرض للفتنة دي بشكل أكبر، غيري طبعاً عشان هم قاعدين، مش أنا مش متعرض لحاجة، مش هعرف أروح كده. فهو من هنا الفتنة بتبقى عظيمة شوية على أي داعية في الحتة دي.
طيب، لما قال: «إنه لا أحمل لأحد غشاً ولا حسداً»، ليه مش شايفاها صعبة قوي كده؟ ماشي خير، يبقى القلب كويس. هل لو تعاملنا مع تحفيظ القرآن بأجر أنه عمل وأنه أفضل من غيره من الأعمال التي فيها اختلاط أو غيرها من المشاكل، التعامل ده فيه إشكال؟ آه طبعاً فيه إشكال، فيه إشكال إدخال أي واحدة من الأربعة اللي على السبورة دي في العمل الشرعي. زي ما قلنا إشكاله فين؟ أنه لو ما ظبطناش نيتنا مش بينتقل من كفة الحسنات لأنه بره الميزان، مش كده؟ هو بينتقل من كفة الحسنات لكفة السيئات.
اسكتوا، اسكتوا ده إحنا بنجاوب على أسئلة النساء، اسكتوا. ففيه إشكال، فأول ما تلاقي حاجة من الأربعة اللي على السبورة دول في العمل، قف كده واظبط نيتك. الأولى طبعاً وده ما بنقوله، إن القرآن يكون بلا أجر ده الأولى، لكن ما نقدرش نحجر واسعاً، ما نقدرش نقول إن ما حدش ياخد فلوس، ما نقدرش نعمل كده، هو فيها خلاف فقهي، لكن لو أنت أخدت بالقول اللي بيجيز يبقى راقب قلبك.
في كتاب العزلة كيف نتعامل مع الآثار وبعضها صعب جداً في التطبيق في زماننا عدم الجزم بصحة أسانيدها؟ يعني لو جزمنا بصحة أسانيدها هتعملوها؟ ما بلاش الحداقة اللي هو عدم الجزم، فيعني عدوها. العزلة، خلاص بقى إحنا هنقعد كتير في العزلة، فازح هذا العارض بأن تعده على الحقيقة كلباً خلقه إلى نهاية الفقرة. ده في العزلة برضه.
ماشي عشان نخلص ونبتدي بقى مدد. عندما أملأ يومي بالأعمال الجيدة ظاهراً فأفرح لأني ملأت بعمل بدلاً من لا شيء أو ذنوب، دي جملة خبرية مافيش سؤال الحمد لله. نفرح لأمور، الأمر الأول أن نشهد في ذلك فعل الله سبحانه وتعالى، أن ربنا هو اللي استعملنا في هذه الطاعة أو هذا المكان، فنفرح أننا هنا علشان ده فعل ربنا بينا، فنرجو التمام، حق من تلمح هذا الإنعام أن يرجو التمام، كلمة ابن الجوزي ماشي، يبقى ده نرجوه، ونخاف أنه يكون استدراجاً، أنك تعجب بعملك وتعجب بحالك فتروح في داهية، فيبقى نجمع بين المقامين الخوف والرجاء.
ماشي، لماذا كان تكليف كتاب العزلة؟ هو أنا أديتكم العزلة عشان كده؟ لا عادي أنا مش فاكر أصلاً أديتكم العزلة. ماشي، أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك، عاوزين راحة ولا؟
الشيخ أمجد سمير