بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم، إنك حميد مجيد. أما بعد:
فنبداً في كتاب آفات اللسان وفضيلة الصمت. يقول كتاب آفات اللسان وفضيلة الصمت: آفاته كثيرة ومتنوعة.
طبعا اللسان آفاته كثيرة ليه؟ لأن اللسان حركته أسهل الحركات. علشان كده تلاقي أنت عشان تعمل أي معصية من المعاصي التي تقترف بالجوارح مجهودها بيكون أكبر من معصية اللسان، مش كده؟ اللسان حركته سهلة بسيطة، فآفات اللسان كثيرة.
هل كل آفات اللسان في حركته؟ لا، ممكن تبقى آفة اللسان في عدم الحركة، مش كده؟ يعني موقف لابد أن تتكلم فيه بالحق فسكت، فدي آفة. إنما معظم آفات اللسان من حركته، ولها في القلب حلاوة.
ليه لها في القلب حلاوة؟ لأن في الغالب أنت لما بتحرك لسانك بآفة من آفاته، إنما تحركه لشهوة من شهوات نفسك. يعني إيه؟ يعني بتغتاب حد، فانت بتغتبه ليه؟ لأنه غيظك وعاوز تنتقص منه، أو ممكن آفة ثانية تبقى أنت مش عاوز تنتقص منه لذاته وإنما عاوز ترفع نفسك عليه.
فاهمين الفرق؟ يعني أنت مش غرضك انك تنتقص من فلان، إنما فلان ده اللي ليه باع في كذا، لو أنت قلت ده ما يفهمش في كذا، فالناس تقول بس ده أنت اللي الفهمان. مش كده؟ يعني واحد شغال شغْلانة معينة مثلاً، صنايعي، أي سباك مثلاً أو نجار أو حرفي، فيوم يجي يقول على شيخ الصنعة دي، يقول لك ده ما يفهمش حاجة في الصنعة. ممكن يبقى متغاظ منه، إنما هو عاوز يرفع نفسه، ودي غيبة محرمة، وهيجي معانا بقى الغيبة وشرح الغيبة وكده.
فشوفوا إيه الحلاوة التي في القلب لذلك. وبعدين بقى يوم يخرج الغيبة مخرجا النصح للمسلمين، وهو الباعث له على الغيبة بيكون إيه؟ التشام. طبعا مش كل الناس يعني كده، بس أنا بنبهكم لبعض الافات الخفية التي تفرق بين واحد بينصح لدين الله عز وجل، وواحد يأتي كبيرة من الكبائر.
يبقى هو جواة متغاظ إنه فلان ده ينال منه أو يعرض بيه أو مطلعه على المسرح زي ما بتقولوا، يقوم جاي هو إيه ماسكه سلخة، وفي النص كاتب لك إيه: وإنما ذلك غيرة لله ودين الله! يا حلاوة! ويعني الغيرة دي ما طلعتش غير لما اتشتمت؟ الغيرة لله دي ما شفناهاش غير لما نالك؟ فلابد أن نفتش في قلوبنا. الباعث ورا كل حاجة بنعملها مهم جداً يا شباب، لأن الغيبة هتوديك في داهية وعقابها شديد وهيجي معانا إن شاء الله.
فتجدون بقى في كل آفة من آفات اللسان كذلك. أي بقى آفة ثانية في حلاوة في القلب، في شهوة واهٍ معين هي التي حركتك علشان تتكلم. ولما نجي نتكلم يا جماعه على اللسان، عشان بس دلوقتي احنا في عصر السوشيال ميديا، فالقلم أحد اللسانين كما قيل، والكيبورد والحاجات دي كلها أحد الألسنة برضو يعني. اللي بتكتبه على الإنستغرام أو على الفيسبوك أو غيره من مواقع التواصل، ده يدخل معنا في كل شيء، خلاص؟
آفاته كثيرة ومتنوعة، ولها في القلب حلاوة، ولها بواعث من الطبع زي ما قلنا: واحد عاوز ينتقص الآخرين لأنه ما يحبش يشوف حد أحسن منه أو أعلى منه أو آتاه الله فضلاً من لدنه، وده خبث الحقيقة، خبث في النفس. ﴿أَمْ يَحْسُدُونَ النَّاسَ﴾ [النساء: 54]. الآية صعبة على فكرة. انت بتحسد اللي قدامك ده عشان ده قُسِم ربنا فيه، فكان حسدك في الآخر عائد على إيه؟ تسخط على مقادير الله.
يعني هو فلان ده اللي ربنا أداله علم ولا أداله صوت حلو في القرآن ولا أداله محبة في قلوب العباد فدعوته بقت منتشرة ولا أداله ذرية طيبة ولا أداله زوجه صالحة ولا أداله شويه فلوس ولا أداله منصب، ده منين ده؟ هو في حد غير ربنا يدبر الكون معاه يعني؟ ولا أي حاجة من الحاجات دي؟ ربنا سبحانه وتعالى هو الذي قدر أن يذهب لفلان ده، قضاؤه ده، قسمه سبحانه وتعالى.
فانت متغاظ ليه؟ بتحسده على إليه؟ على شيء آتاه الله إياه؟ يبقى أنت كده مشكلتك مش مع فلان بقى، أنت مشكلتك مع ربنا بقى، فروح حل مشكلتك مع ربنا! صح يا جماعة ولا لا؟ حل مشكلتك مع ربنا بقى أنت، لأن هو ربنا اللي أداله. اقول لكم المفاجأة؟ لو هو مش عاوز الشخص نفسه، وربنا أراد، إيه اللي هيحصل يعني؟ يعني الشخص نفسه مش عاوز الفلوس ولكن ربنا أراد ذلك، هتحصل؟ هيحصل مراد مين؟ مراد ربنا سبحانه وتعالى!
مش عبد الرحمن بن عوف رضي الله عنه كان يتصدق بفلوسه كلها؟ هو بيقول كده: يأبى الله أن أنام، يأبى الله إلا أن يردها علي أضعافاً مضاعفة قبل أن أنام. يصحى الصبح على الله كده كل فلوسه لله، ما ينامش غير وهي مردودة عليه أضعافاً مضاعفة، خلاص إرادة الله عز وجل. فانت مشكلتك مع ربنا مش مع الشخص، روح حل بقى مشكلتك مع ربنا، قول له: يا رب أنا اللي استاهل يا رب، يا رب وحاشاه وتعالى وتقدس قد جرت وقد ظلمت، روح حل بقى مشكلتك معاه.
قال: ولها في القلب حلاوة ولها بواعث من الطبع، ولا نجاة من خطرها إلا بالصمت. قالوا إن الكلام أربع أنواع، ركزوا في الكلام ده. قالوا: الكلام أربع أنواع: كلام خير محض كلام كله خير، وكلام شر محض كلام كله شر، وكلام فيه خير وشر، وكلام لا خير فيه ولا شر. دي الأقسام العقلية للكلام، مش كده؟
كلام خير محض: واحد قاعد بيقرا قرآن، واحد بيذكر ربنا، كلام خير. وكلام شر محض: واحد بيشتم، بيغتاب، بينم، ده شر محض ما فيهوش خير يعني. وكلام فيه خير وشر: يعني كلام من ده عادة بقى يعني إيه فيه شويه كده وشويه كده. وكلام لا خير فيه ولا شر، اللي هو المباح؛ اتنين قاعدين بيتسمروا، كلام مباح لا خير فيه ولا شر، يعني لا في ثواب ولا عقاب.
قالوا: الكلام دول الأربع أقسام بتوع كلام. خلاص، الكلام الشر المحض نتكلم بيه؟ ما نتكلمش، مش كده؟ طب الكلام اللي فيه خير وشر، نتكلم بيه؟ قالوا برضو ما يتكلمش، ما هو ما انت يعني خلاص هو الخير المحض يعني عدم، فقالوا: ادي قسمين طاروا من عندنا بدايه كده اهو، يبقى اتنين اتنين اهو يبقى عندنا قسمين ما نتكلمش بيهم ابتداء كده، كلام كله شر: اسكت، كلام فيه خير وشر: اسكت، ما تتكلموش.
يبقى الكلام الذي لا خير فيه ولا شر، اللي هو المباح، قالوا: العاقل الذي يعرف شرف زمانه يقتصر أو يعني يحجم عن كثير من هذا النوع أيضاً. ليه؟ هو حرام؟ مش بنحرمه، بس واحد عارف فضل الزمان وشرف الزمان مش هيضيع زمانه في أنه يفضل في المباحات ليل نهار، فهيبتدي يحجم عن كثير من هذا النوع، ويتبقى نوع واحد معانا اللي هو الكلام الخير المحض، ويعتريه ما يعتريه من الآفات كالرياء والعجب ورؤية النفس، مش كده؟ فتلاقي برضه القسم ده محتاجين نجاهد نفسنا فيه كتير.
فاذا عرفت ذلك، فييبقى معظم وقتك هتبقى ساكت. أولاً، قبل ما هتتكلم هتفكر هو الكلام اللي أنا هتكلمه ده أي نوع من الكلام؟ فلو لقيته من النوعين اللي هو الشر المحض أو الخير والشر: اسكت، ما تفكرش تاني خلاص، اسكت ما تقولوش.
طيب المباح؟ خلاص، لو هو مباح عاوز تتكلم شوية بترفه عن نفسك، فبتتسامر مع... بس ما يبقاش ده الأصل بتاعنا، يعني ما يبقاش أنت عشر ساعات في اليوم قاعد على الفيسبوك والإنستغرام والتيك توك، ده بفرض أن هو مباح يعني، بفرض أن احنا ما بنعملش حرام ولا بننظر لحرام ولا بنستمع لحرام، بفرض أن احنا ده كلامنا المباح اللي هو التواصل بتاعنا.
إنما عشر ساعات في اليوم، خليت إيه لربنا؟ مش لربنا ده، خليت إيه لنفسك؟ هو في الآخر اللي أنت بتصرفه لله هو لك، مش كده؟ هو ربنا محتاجنا في حاجه؟ محتاج عبادتنا في حاجه؟ هو الغني سبحانه سبحانه ونحن الفقراء. فعبادتك لنفسك، ذكرك لنفسك، أورادك لنفسك، خلاص.
وبعدين طب لقيت لا، الكلام هو بقى الايه؟ الخير المحض. اقف بقى واسال نفسك: ماذا أريد بهذا الكلام؟ هل أريد وجه الله؟ يعني الكلام المنشور اللي هكتبه دلوقتي ده، أنا فعلاً عاوز عاوز عاوز ربنا؟ عاوز الدار الآخرة؟ ولا لو كتبت المنشور ده وما لقيتش تفاعل عليه هزعل؟ ما اللي عاوز ربنا مش هيقعد بقى يشغل دماغه بجاب كام لايك وكم شير والتعليقات شكلها إيه، مش هيشغل دماغه بالحاجات دي، هو خلاص أراد وجه الله والله يحاسبه والله يجازيه.
مش كده يا جماعة؟ يأتي النبي يوم القيامة وليس معه... وليس معه أحد، عارفين الحديث؟ يأتي النبي ومعه الرهط، يأتي النبي ومعه الرجلان، وياتي النبي ومعه الرجل، وياتي النبي وليس معه أحد. يعني إيه ليس معه أحد؟ يعني صفحته على الفيسبوك ما عليهاش ولا فولو بمصطلح حديث، يعني مش هو ده الكلام، عمل صفحه على الفيسبوك ما فيش ولا فولور واحد على الصفحة.
هل هذا النبي هل هذا يقدح في دعوة ذلك النبي؟ يعني لما كان يكتب بوست ما يتحطلوش لايك واحدة على البوست وما يتعملوش شير واحدة على البوست على المنشور، هل هذا يقدح في دعوة ذلك النبي الذي يأتي يوم القيامة وليس معه أحد؟ خلاص، أداء ما عليه، دعا الناس إلى الله عز وجل، آمن من آمن وكفر من كفر. نبي هيأتي يوم القيامة وليس معه أحد، ودائماً بنقول الحديث ده بنتمل معنى زائد في هذا الحديث، افهموا يا شباب الكلام ده.
أن الله عز وجل الذي أرسل ذلك النبي، أرسل نبيه وهو يعلم سبحانه أن لن يتبعه أحد ولا لا؟ ولا بنجرب ونشوف اللي يعني؟ ربنا سبحانه وتعالى قبل ما يرسل ذلك النبي أصلاً، ألم يكن يعلم جل وعلا أن ما فيش حد هيتبعه؟ صح؟ كان عارف، كان يعلم سبحانه وتعالى وأرسله، طبعاً أولاً إقامة للحجة على العباد، وثانياً عشان نتعلم بقى نتربى، مش كده؟
يبقى من المعاني أنه أرسل نبياً وأتى يوم القيامة وليس معه أحد، لأني برضه هو ربنا، افهموا دي برضه ودي هتاكد لكم المعنى اللي أنا بقوله ده، أن هو من حكمة الله عز وجل في إرسال ذلك النبي الذي لن يتبعه أحد مع علم الله السابق، أننا نتعلم بعد ذلك. هو مش ده حصل وخلاص؟ ده حصل قبل سيدنا النبي ولا بعده عليه الصلاه والسلام؟ قبله، هو خاتم الأنبياء.
طيب ليه سيدنا النبي عليه الصلاه والسلام يقول لنا المعلومة دي؟ ما هو ما هو النبي عليه الصلاه والسلام عرف المعلومة دي من قبل نفسه ولا أوحاها الله، ربه؟ ربه سبحانه وتعالى أوحاها إليه أن ده حصل كذا وكذا وكذا وكذا، وبلغ أمتك المعلومة دي. ليه؟ ما اللي حصل حصل، عشان نتعلم يا جماعة، عشان نتعلم.
يبقى تسال نفسك: أنا غرضي إيه من المنشور الفلاني؟ أنا غرضي إيه من الكلام الفلاني؟ هل أنا فعلاً أرجو الله عز وجل؟ غيرة على دين الله عز وجل؟ عاوز النصح للمسلمين فعلاً؟ ولا لما حد غلط فيا فلازم أرد انتصاراً للنفس؟ ولا لأن أنا بقيت المشهور فلازم صفحتي ما تتيهش عشان الريتش ما يوقعش؟ ولا... اقعد اسال نفسك الأسئلة دي، ده خلي بالك، احنا ده كله بنتكلم فين؟ في الربع اللي من الكلام اللي هنتكلمه، اللي هو خير محض، هو في ذاته خير: بقرا قرآن، صوتي حلو فبقرا قرآن، بقول كلمتين ينفعوا الناس، بنزل حديث. نيتك إيه بقى؟
شوفوا كم الآفات التي تدخل على الواحد. قال: ولا نجاة من خطرها إلا بالصمت. فلنذكر أولاً فضيلة الصمت، ثم نتبعه بذكر الآفات مفصلة إن شاء الله تعالى.
اعلم أن الصمت يجمع الهمة متى، ويفرغ الفكرة. واحنا جزء كبير الشباب دائما يشتكي: مش عارفين ننتج حاجة، مش عارفين ننجز حاجة، بقالي خمس ست سنين مش عارف أختم المصحف، بقالي 10 سنين في طلب العلم، تجي تقول لي خلصت كتب إيه؟ ما فيش كتب اتخلصت، بقى لي... مشاكل، عندنا مشاكل كثيرة الحقيقة.
لكن مشكلة من المشكلات التي توقع الشباب في هذا التشتت وأكبر سبب من أسباب التشتت: كثرة الكلام! يشتت. والصمت يجمع الهمة.
تقول: أنا بكلم والله ده أنا قاعد في الأوضة، لا بكلم حد ولا حد بيكلمني. أقول لك: أيوة أنت بتتكلم كلاماً افتراضياً. مش احنا عندنا واقع افتراضي؟ فانت بتتكلم كلام افتراضي يعني قاعد بتشات، قاعد بتنشر منشورات، قاعد على الريلز والشورتس ومش عارف الحاجات اللي بتتفرجوا عليها، فانت معرض نفسك من أول ما عينيك تفتح لغاية ما عينيك تنام لهذا الكم الهائل من التشتت من الكلام. طب الكلام بيعمل إيه بقى؟ بيشتت الهمة.
خلاص، انت عارفين حتى بتوع... المفروض يعني حد هنا إتش آر بس هسال؟ نزلهم. طيب، لأني عارف يعني الإتش آر ما بيبقوش يعني إيه، المفروض المفروض الإتش آر يبقوا شطار في أنماط الشخصية، المفروض، لأن جزء من وظيفتهم أن هم يعرفوا كل حد ينفع يتسكن فين في المؤسسة اللي هم ماشيين، وفي الإتش آر المفروض بيدرسوا.
من أنماط الشخصية الشخصية المنطوية أو (الأنتروفيرت)، والشخصية التي عكسها (الإكستروفرت)، بس بالعربي مش هنلاقيه عكس المنطوي، يعني اللي هو يقعد في أي حته تلاقيه صاحب على كل الناس الموجودة، اجتماعي كده يعني، المهم سموه زي ما تسموه. عاوزين بقى نرجع تاني، فبيقولوا إن من أنسب الأماكن اللي يعين فيها الشخصية الانطوائية فين؟ المكان اللي بيحتاج تركيز عالي جدا جدا علشان ينتج، زي مكان حساس جدا، اللي هو لو الغلطة فيه بفورة.
فقال لك ده ما يتعينش واحد إكستروفرت؛ لأن دول ما تركيزهم مش عالي أصلاً نمط الشخصية كده ليه؟ من كتر الكلام هو كده يعني، وهو قاعد شغال مثلاً في المفاعل، إن هو يدخل على بتاع البوفيه يقعد يهزر، طب يا عم ده أنت لو دوست على زرار هتدمر الكوكب! هو مش في دماغه قوي الموضوع ده، يعني إيه هو أهم حاجه عنده يتكلم مع بتاع البوفيه اللي داخل، وينكش مديره اللي خارج، هو كده شخصية اجتماعية، ده حلو برده مش يعني إيه حلو في حتت، ماشي.
فلذلك أو بقى حاجة محتاجة نفس طويل زي تحليل البيانات وكده، فيقولوا ده أفضل نمط فيها في الاثنين دول، اللي هو الشخصية المنطوية، ده أكبر سمة ليه أو أهم سمة فيه اللي هو إيه قليل الكلام، قليلة الكلام، يبقى قاعد لو وسط مليون ممكن تتكلم كلمتين ثلاثة في القاعدة كلها، اللي هم ما تصدعوناش، هم دول الكلمتين.
طب احنا نعمل ايه؟ نقلل تعرضنا لهذا الكم الهائل من الكلام الافتراضي، أو لو واحد بقى منا بيتكلم كلام حقيقي، لا أهدى شوية؛ عشان تبتدي تجمع همتك، عشان يصفو ذهنك، تبقى مركز في اللي أنت عاوز تعمل فتنتج.
قال وفي الحديث أن النبي صلى الله عليه وسلم قال: «من يضمن لي ما بين لحييه وما بين رجليه أضمن له الجنة»، يعني أكبر مشكلتين اللسان والفرج، من يضمن لي ما بين لحييه اللي بين فكينك اللي هو لسانك، وما بين رجليه يعني الفرج، أضمن له الجنة، يعني اللي يعرف يغلب الشهوتين دول -مش معناها إنه أغلب دول وقع في بقية الشهوات، لا- هو عاوز يقول إيه النبي عليه الصلاة والسلام؟ اللي هيغلب الشهوتين دول ما فيش شهوة هتقف قدامه خلاص، أضمن له الجنة.
وفي حديث آخر: «لا يستقيم إيمان عبد حتى يستقيم قلبه، ولا يستقيم قلبه حتى يستقيم لسانه».
وفي حديث معاذ في آخره: «كف عليك هذا»، يعني اللسان. فقلت: يا رسول الله وإنا لمؤاخذون بما نتكلم به؟ قال: «ثكلتك أمك يا معاذ، وهل يكب الناس في النار على وجوههم -أو قال على مناخرهم- إلا حصائد ألسنتهم».
عارفين يا جماعة مصيبة العصر اللي احنا فيه أن احنا كنا عشان نطلق ألسنتنا كنا محتاجين مجهود، مش مجهود اللسان، اللسان سهل، إنما عشان تدخل تقعد وسط عشرة عشرين واحد هلبس وانزل وأروح على المكان الفلاني أقعد فيه وأستنى الناس تتجمع عشان أبتدي أمارس هوايتي اللي هتوديني النار دي، أن أنا أتكلم صح؟ من المصيبة اللي احنا عايشين فيها سهولة هذا الآن، لا أنت بتفتح عينك من النوم على طول، مش كده؟ مصيبة والله مصيبة، وبعدين المصيبة الثانية بقى، أيام زمان أنت مهما يعني كنت ابن باري مديله اللي هو مصاحب المنطقة كلها المجلس بتاعك هيبقى فيه كام واحد يعني؟ ولا حاجة، عشرة، عشرين، خمسة وعشرين، مئة واحد، النهارده أنت تفتح عينك ترمي الكلمة تفايرال يشوفها ملايين، طب الكلمة دي في أي الميزانين أو في أي الكفتين الكلمة اللي أنت كتبتها دي اللي فيرالت وأنت فرحان بيها، لدرجة لو واحد جه بهبك وقال لك يا فلان اتق الله ده كذا ده كذا تنازعك نفسك هتمسحها بعد ما بقت مش عارف عامله إزاي، بعد ما كل مش عارف إيه، بعد ما في أي الكفتين هذه الكلمة؟
خطير والله يا جماعة، والله خطير، إن العبد ليتكلم بالساعة ولا ليتكلم بالليلة، إن العبد ليتكلم بالكلمة من سخط الله لا يلقي لها بالاً، والله العظيم كلام مرعب، لا يتكلم بالكلمة -شوف الكلمة اللي جاية أصعب بقى- لا يلقي لها بالاً، عارفين يعني إيه؟ يعني كلمة مش واخد باله منها، مش الكلمه اللي ضميرك أنبك بعد ما كتبتها، لا لا لا، ده كلمة وأنت بتكتبها أنت أصلاً مش جريان، تهوي به في النار سبعين خريفا، وفي رواية: «أبعد ما بين المشرق والمغرب».
طب لما يكون ده ميزان يوم القيامة أنك تحاسب على الكلمة، يعني شوف المنشور فيه كام كلمة اللي أنت بتكتبه، شوف القعدة اللي قعدتها على القهوة فيها كام كلمة، ميزان يوم القيامة، إن العبد ليتكلم بالكلمة ومن قبل ذلك كلام ربي، ما يلفظ من قول إلا لديه رقيب عتيد، أي كلمة هتقولها هتتكتب، عارفين ابن عباس كان بيقول إيه في الآية دي؟ يكتب كل شيء، حتى أكلت وشربت ورحت وجئت، أي حاجة بتقولها بتتكتب، فان كان يوم الخميس أثبت ما كان فيه خير وشر، وطرح سائره، يعني الكلام المباح يترمي خلاص ما لكش فيه لا ثواب ولا عقاب، ويفضل اللي فيه خير وشر بقى تتحاسب عليه، فأنت أي كلمة بتقولها بتتكتب، رقيب وعتيد، الموضوع خطير يا جماعة.
عشان كده دايما أقول للشباب والله إن في أنفسنا لشغلاً، يعني لو كل واحد ركز في نفسه، لو كل واحد ركز في ورشته أغلب مشاكل الناس هتنصلح لوحدها كده، إحنا معظم مشاكلنا عشان كل واحد حاشر مناخيره في حياة غيره تحت أي مسمى بقى، يعني إحنا دلوقتي إيه ناس بتاع دين فهنسَمِّيها حسبة لله، غيرة لدين الله مش عارف إيه وكلام زي كده، ما احنا بتوعدين بقى هنطلع نقول إيه يعني.
طب أنا بقى كده بقدح في نوايا الناس؟ لا، ما بقولش كده، بس أنا بكلمك أنت، بكلمك وبكلمني، أنا محتاجين نهدى ونشوف فعلاً هي كده، عشان لو هي كده لو رجعت فتشت في نفسك هتلاقي في نفسك ما هو أعظمه عند الله مما ذهبت تنكره، فأقعد اشتغل على نفسك شويتين كده.
طب يعني نترك الأمر والنهي؟ ما حدش قال كده برده، عشان بس إيه أنا ابتديت إيه كنت الأول عادي بقول كلامي على يعني إيه كده يعني الناس طيبة وبتاع، يقطعوا بقى يقول لك أمجد سمير يبطل الأمر بالمعروف والنهي عن المنكر.
طبعاً اللي عاوز بقى يفهم أمر ونهي، ما هو هي ج... والله ما هي فتوى ولا ولا فرضة ولا عضلات، ولا الأمر والنهي عن المنكر، إحنا خدنا كم درس فيه لغايه دلوقتي؟ لا، أكتر ده احنا... إحنا نازلين الخمسة ستة يا ابني لا اللي نازلوا، إنما احنا واخدين فيه خمسة واخدين خمس دروس كل درس معدي الساعة تقريباً ولسه ما خلصناهوش، ده اللي عاوز يفهم أمر ونهي هي مش بلطجة، هي يعني مش إيه أمر إزاي وانهى إزاي وإيه اللي يتأمر به وإيه اللي يتنهى عنه، قصص، خمس دروس كل درس ساعة في الأمر بالمعروف والنهي عن المنكر ولسه ما خلصناش هذا الباب، فاللي عاوز يفهم يروح بقى يقرا، اللي مش عاوز يفهم خلاص، يقعد بقى يقول لك إيه ينهى عن المش عارف إيه ويبطل عبادة، هو حر يعمل اللي يعمله.
وقال ابن مسعود، عفواً، وفي حديث آخر: «من كف لسانه ستر الله عورته»، عشان اللي بيطلق لسانه يتتبعه بذلك عورات الناس، عاوز يتتبع سقطات الناس وأول وبالذات الستات بقى في الحتة دي، شفتي فلانة عملت إيه وراحت فين وجت منين؟ طب وبعدين أنتِ كده جدعة؟ عارفة كده أنتِ بتعملي إيه في نفسك؟ قال صلى الله عليه وسلم: «يا معشر من آمن بلسانه ولم يدخل الإيمان قلبه»، شوف بداية الوصف النبوي: «يا معشر من آمن بلسانه ولم يدخل الإيمان قلبه»، يا من يفعل ذلك، اللي هو إيه بقى؟ «لا تغتابوا المسلمين، ولا تتبعوا عوراتهم»، يبقى اللي ماشي يغتاب في مخاليق ربنا ويتتبع عورات الناس: آمن بلسانه ولم يدخل الإيمان قلبه، «لا تغتابوا المسلمين، ولا تتبعوا عوراتهم، فانه من تتبع عورة أخيه -الجزاء- تتبع الله عورته، ومن تتبع الله عورته يفضحه ولو في جوف بيته».
فاسكتوا الله يكرمكم، رجالاً ونساءً اسكتوا، ما لكوش دعوة بالناس.
وقال ابن مسعود: ما شيء أحوج إلى طول سجن من لساني.
وقال أبو الدرداء: أنصف أذنيك من فيك، يعني أنت ظالم ظالم ودانك، فأنصفهم إزاي بقى؟ قال: فانما جعلت لك أذنان وفم واحد؛ لتسمع أكثر مما تتكلم؛ يعني ربنا خلق لك ودنين وبق واحد عشان تتكلم قليل وتسمع كتير، فأنت إيه خليك كده كل ما تيجي تتكلم قول لي هو ربنا خلق لي بق واحد واثنين ليه؟ عشان أسمع كتير وأتكلم قليل.
وقال مخلد بن الحسين: ما تكلمت منذ خمسين سنة بكلمة أريد أن أعتذر منها، يجي شاب يقول لك: وأنا كمان! أيوه عشان أنت بجح مش عاوز تعتذر ده، هنا في معنيين أن مخلد بن الحسين أولاً أنه كان عالماً يعني عارف إيه الكلام الذي لابد أن يعتذر منه، أصل أنت ممكن تبقى مش عاوز تعتذر لأنك ما أنتش عارف اللي أنت بتعمله ده غلط، فاهمين؟ عارفين كده زي ما كذا مرة أقول الكلام ده إن كان واحد من السلف بيقول إيه: أعرف سبعين خصلة من الخير لا أجد في نفسي خصلة منها، فكنت أقول تحدي كده، أقول مين فيكم يقف يعد لنا سبعين خصلة من أبواب الخير ما بيعملهاش؟ ده تحدي فتلاقي الناس ما تعرفش، أقول لهم: معنى كده إن احنا ما بنعملش خصال الخير؟ لا، معنى كده إن احنا مش عارفين خصال الخير، اللي بيقول الكلام ده هو رجل عالم بخصال الخير، إنما أنت اه أنت ممكن تقول إيه: والله العظيم أنا بقى شوف هو سبعين خصلة أنا بقى ما فيش خصلتين ثلاثة مثلاً بالكتير اللي ما بعملهمش، ما هو أنت ما أنتش عارف خصال الخير.
يبقى مخلد بن الحسين أولاً عالم ففاهم كويس جداً إيه الكلام المفروض يعتذر منه، ثانياً: يراقِب أفعاله.
طيب طالما هو عالم إزاي بقى بقاله خمسين سنة عمره ما تكلم بكلمة يريد أن أعتذر منها؟ قبل ما بيتكلم يفكر، عشان كده قالوا: لسان المؤمن خلف قلبه، يعني إيه؟ يعني المؤمن التقي اللي عارف أن في آخرة وفي جنة ونار وفي موازين يوم القيامة بمثقال الذرة، فمن يعمل مثقال ذرة خيراً يره، فالمؤمن اللي عارف كده يجي يفتح بقه يفتكر ده فيسكت، وبتدي يفكر الأول، عشان كده اللسان خلف القلب، يفكر قبل ما يتكلم يا ترى دي أنهي قسم من الأربعة؟ لقى من الخير المحض يا ترى أنا نيتي فيه إيه؟ لقى الباعث نية صالحة ينطلق، ده بعضهم يا جماعة والله كان يفعل ذلك على وجل.
مين من المحدثين؟ مش فاكر مين دلوقتي، كان يقول إيه؟ كان لما يجي يتكلم في الجرح والتعديل -الجرح والتعديل لابد أن احنا نتكلم يعني علماء الحديث لازم يعملوا كده، يعني يقول لك إيه: فلان ضعيف الحفظ، مش عارف إيه، مش عارف كان يحدثه من كتبه، دي الألفاظ اللي بتتقال- فكلم طب ليه بيعمل كده؟ صيانة لحديث رسول الله صلى الله عليه وسلم، لازم يبين للناس عشان نعرف بقى الحديث ده صحيح ولا ضعيف وكده.
فكان لما يتكلم في الجرح والتعديل يبكي، يعيط، يعيط، يقول: أنا لنطلق ألسنتنا في أناس، أو أن لنكلم في أناس ولعلهم قد وضعوا رحالهم في الجنة، المحدثون اللي احنا عمالين نتكلم عليهم رجال السند، ما هم دول مش فسقة، دول ناس حملوا الشريعة، غصب عني أنا محدث -مش أمجد يعني الراجل- يعني أنا محدث غصب عني لازم أقعد أقول إيه: فلان ده سيء الحفظ، فلان خلط باخره، فلان كان يحدثه من كتبه واحترقت، فلان، كلام كده هو ده اللي بيتقال يعني، فيعيط، يقعد يبكي: أنا أقول على فلان كده؟ الإمام شعبة، ماشي، يقول: أنا أقول عنه كده ولعله قد وضع رحله في الجنة؟ فين بقى القلوب دي دلوقتي؟
وقال: فصل في ذكر آفات الكلام، الآفة الأولى الكلام فيما لا يعني.
اعلم أن من عرف قدر زمانه وأنه رأس ماله لم ينفقه إلا في فائدة. أولاً يا جماعة برده من الحاجات المهمة جداً جداً، وأرجو أرجو اللي ما سمعش البودكاست بتاع التحرر من الغفلة ده لازم يتسمع، يعني لازم، يعني ما لوش حل، لازم يتسمع واللي سمعه نسيه يسمعه تاني، خلاص؛ لأنه بيعالج أخطر آفة موجودة دلوقتي، إحنا مش عارفين قدر الزمان، إحنا عادي جداً بيفوت علينا يوم واثنين وثلاثة وبنضحك وبنهزر ومش حاسين بالمصيبة اللي إحنا فيها، فزمانك عمرك هو رأس مالك، فكل وقت بيمر عليك أنت بتخسر من رأس مالك، وقلنا قبل كده أن وحدة قياس الزمن في التراث الإسلامي عندنا إيه؟ النفس، يعني الزمن في كلام علمائنا في التراث الإسلامي ماكوش ما كانتش وحدة الساعة والدقيقة خالص، وحدة الزمان عندهم النفس، بيحاسبوا نفسهم على الأنفاس، وجبنا بقى كلام كتير لابن الجوزي وابن القيم والغزالي وغيرهم، ده كله هتلاقوه في البودكاست، فاسمعوا البودكاست ده، وطبعاً في سورة العصر.
﴿وَالْعَصْرِ * إِنَّ الْإِنسَانَ لَفِي خُسْرٍ﴾ [العصر: 1-2] إلى آخر السورة. وكان واحد قال إيه؟ قعدت عشرين سنة مانيش فاهم سورة العصر.
طبعا سورة العصر اللي ممكن أي طفل يجي يشرحها لنا دلوقتي لا هو مش فاهم، مش حاسس معناها يعني ماذا يريد الله عز وجل أن يقول لنا؟ يعني إيه معنى: ﴿وَالْعَصْرِ * إِنَّ الْإِنسَانَ لَفِي خُسْرٍ﴾؟ دي بيقول حتى رأيت بائع ثلج ينادي: ارحموا من يذوب رأس ماله هكذا. ارحموا من يذوب رأس ماله، قال: ففهمت سورة العصر. بياع الثلج ده وهو ماشي بيبيع الثلج كل ثانية بتعدي بيخسر جزء من إيه؟ من رأس ماله، من غير أي حاجة تانية، بس مجرد الزمن بيعدي. صح يا جماعة؟
فهعمل يقول: ارحموا من يذوب رأس ماله، الحقوا اشتروا مني الثلج قبل ما هيذوب خلاص. طب بيذوب بايه؟ بالزمن، أهو أنت ده عمرك، عمرك بتخسره بالأنفاس، كل نفس بيطلع أنت خسرت، لو لم تكن من الفائزين: ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 3].
طيب من عرف قدر زمانه وأنه رأس ماله يبقى أنتو اسمعوا البودكاست بتاع التحرر من الغفلة مهم جدا، وفي درس شرح سورة العصر مش عارف هو اسمه كده ولا لا يعني، إن شاء الله يبقى اسم والعصر والعصر اسم والعصر ماشي، اسمعوا ده برده مهم جدا. اعلم أن من عرف قدر زمانه وأنه رأس ماله لم ينفقه إلا في فائدة.
تقول لي ليه بقى؟ إن شاء الله أقول لك عشان غير كده جنون. وده اللي الناس مش قادرة تستوعبه في مورد الزمن، في مورد العمر للأسف. ولو نقلنا لمد آخر هتقولوا صح وهتلاقوا يعني ده المنطق. تعالوا أفهمكم القصة دي يا جماعة؛ دلوقتي احنا بنقول لك عمرك ده رأس مالك، فروح انفقه في فائدة، ما تقعدش كده إيه، فما تجيش ترد علي تقول لي إيه هو أنا بعمل حاجة حرام؟ يا حبيبي أنا ما بقولكش بتعمل حاجة حرام، بس أنت عمال تضيع رأس مالك. أنت فاهم أنت بتعمل إيه؟ هو مش هيبقى حاجة حرام عشان مش لازم، فهديكم مثال بقى اللي يبين.
حضرتك معاك مليون جنيه، رحت بالمليون جنيه اشتريت بلالين وقعدت تنفخها وتطيرها. لو أنت بقى معدي ولقيت واحد بيعمل كده هتقول عليه إيه؟ مجنون. طيب هتستشعر أن هو مستحق للنصح ولا لا؟ هتستشعر ده لازم يتنصح، مش كده؟ ولو لم ينصح ده لازم حد يحجر عليه، بيضيع فلوسه، ده سفيه، مش كده؟ تخيل بقى أنت رايح تنصحه تقول له يا أخي اتق الله، يقول لك هو أنا بعمل حاجة حرام؟ هي البلالين حرام يا عم الشيخ؟ هو نفخ البلالين في حاجة يعني في إيه يعني بتقول نفخ البلالين لا يجوز؟ مش دي يا جماعة الردود اللي بترد علينا بنتناقش؟
نيجي نقول له يا عم مضيع عمرك يا عم، في جنة ونار، يا عم في ليلة، عمل حاجة حرام. نفس الكلام، طب احنا ليه مش حاسين بالمشكله هنا وحسيناها في البلالين؟ عارفين ليه؟ لأن كلنا لو اتكلمنا على العمر والزمان كلنا بننفخ بلالين، فاحنا مش حاسين أن ده يجب أن ينصح، ولو ماتنصحش يحجر على، تعالى يا حبيبي اتحبس بقى في الجامع هنا ما تطلعش غير وانت خاتم المصحف، طالما عندك وقت كده ومش عارف تنفق وقتك في إེ་؟ تعالى هنحبسك وما تخرجش غير وانت خاتم كتاب ربنا سبحانه وتعالى، مثلا أو أي حاجة تانية يعني، المهم نحبسك.
فلأن كلنا في الهوا سوا زي ما بيقولوا، أنت لو رحت مستشفى المجانين حد من اللي جوه شايف نفسه مجنون؟ قال لك إيه ده؟ هما حابسنا هنا عشان اللي بره مجانين خايفين علينا منهم، مش كده؟ ما كلهم إيه خلاص ما حدش شايف نفسه مجنون، ما هو يبص يمين وشمال كلنا زي بعض.
قال: والله يا جماعة يعني أنا كثيرا يعني أقعد أتخيل كده أن واحد من جيل الصحابة ولا جيل التابعين ولا يعني أتخيل كده بعث الآن قدر الله عز وجل أن واحد يبعث في هذا الزمان وقعد يبص على أحوالنا، أحوالنا ده اللي هو مين؟ احنا بتوع ربنا، احنا اللي في الجامع اللي عشان بس ما تجيش فيك اللي على النواصي لا احنا، احنا بتوع ربنا اللي فاكرين على نفسنا بتاع ربنا قاعد يبص علينا كده هيقول إيه؟ يعني هو أنا متخيل كده أول ما يبعث يقول لك إيه يا جماعة ودوني للناس بتوع ربنا أنا مش عاوز، خلينا نقعد وسط الناس الصالحة. فجيء لها أشكالنا، يعني احنا بقى الناس الصالحة ح؟ ويجي كده يعني كل واحد يفكر في حاله ويومه، فايه؟ مين يستضفني عنده بقى؟ عشان كله هيهرب طبعا، هستفى، هيبقى منظرنا عرة. يجي يشوفنا بنعمل إيه في يومنا ماشي ازاي وليلتمنا ماشية ازاي، عرة خالص، نتكسف.
في أثر مش عارف مين من التابعين برده ممكن يكون الحسن أو غيره يعني بيقول: إن أنا يعني أدركت كذا وكذا من الصحابة، لو بعث أحدهم فيكم الآن لأنكر كل شيء. ده بيكلم مين؟ التابعين. بيقول لو الصحابة واحد بعث لأنكر كل شيء، الأذان! طب احنا بقى نقول ايه؟ طبعا لعل كلامه فيه شوية مبالغة بس عاوز يقول لهم يعني ايه أحدثتم كثيرا أو غيرتم كثيرا.
فالموضوع يعني كبير. اعلم أن من عرف قدر زمانه وأنه رأس ماله لم ينفقه إلا في فائدة، وهذه المعرفة توجب حبس اللسان عن الكلام فيما لا يعني، لأن الكلام فيما لا يعني هيضيع عمرك. يعني زي إيه الكلام فيما لا يعني؟ التريند، اللي بيصحى الصبح على الله كده النهارده الكلام على إيه؟ التريند. حد ندى ولا عفريت؟ فالتّرند من الكلام فيما لا يعني، التريند ده اللي احنا نسميه إيه في اللغة بتاعتِنا الماجريات، اسمه الماجريات، ماجر من كلمة ما جرى. الماجريات ذكرها ابن القيم في بعض كتبه، وأحد المعاصرين صنف كتابا فيها في الماجريات.
فأنت اللي صابح الصبح على الله كده يفتح الفيسبوك والانستغرام، يرش يرش مية ويبص الكلام على ايه؟ عشان على الظهر يكون مخمخ له في منشور ينزل بيه إيه؟ يكسر الدنيا. يا حبيبي أنت مضيع عمرك فيما لا يعني. تقول إزاي يا شيخ فيما لا يعني؟ أقول لك أهدى بس كده عليا واحدة واحدة، اتحدى، تحدي أهو، كل اللي في الجامع دول أهو تحدي أن واحد يقول لي التريند اللي كان مكسر الدنيا من أربع خمس شهور، هتلاقي ما حدش فاكر حاجة، صفحة واتقفلت وجا بعديها.
فده اللي أنت شاغل نفسك بيه. طب يعني نسيبه؟ عشان ده سؤال دايما بيتسأل، وبعدين نقف بقى عشان الأذان، يعني إيه نسيب الترند خالص؟ لا، احنا لا إفراط ولا تفريط، أنت راجل ماشي في طريقك إلى الله، لو أنا بكلم بالوقت الدعاة بعض الدعاة يعني، أنت راجل ماشي في طريقك إلى الله وعارف دعوتك كويس جدا، وعارف أنت بتعمل إيه، لو في حاجة ظهرت تخدم دعوتك وأنت فاهم دعوتك ماشية ازاي، لا باس أنك تعرج عليها من باب خدمات الدعوة، إنما كل يوم على الله أنا بتاع الترند، ما يصحش. اتفضل.
الله أكبر. في سؤال معه رشوة؟ أنا جايب السؤال وجايب تمر مغطى بالشوكولاتة أبيض حليب سبريسو محشي لوز، أجاوب ولا كان ناقص إيه؟ بستاشيو، بستاشيو.
طيب السؤال المحشي لوز بيقول: قول أحبك في الله يا شيخ أمجد. هل دلوقتي لو شخص قام بمتابعة شخص المحتوى ما، وبعد كده الشخص ده بقى ينزل محتوى فيه معصية، هل يأثم من يتابعه؟ طبعا يأثم من إيه، مش محتاجه تمر لوز. أيوة يأثم، واحد كان بينزل حاجة فيها طاعة وبعدين بقى ينزل حاجة فيها معصية، إيه بقى؟ يعني فين السؤال؟ ما ينفعش تتابعه طبعا.
طيب ممكن حضرتك تعمل لنا فيديوهات تشرح كيفية الصلاة والوضوء بشكل صحيح؟ احنا كنا ابتدينا شرح الفقه كتاب هداية الراغب هتلاقوه على التليجرام وصلنا لغاية أظن باب صفة الصلاة وانقطعنا لعلنا نرجع، فممكن تسمعها، أنت عاوز بقى مرئي ممكن بعدين إن شاء الله. ماشي.
واحدة بتقول: شغال في مكان والزملاء ما بيتقوش الله في العمل، وفي ناس، وفي ناس تدعي عليا. تدعي على اللي شغالين في المكان يعني؟ الناس بتدعي عليهم لأن هما ما بيتقوش الله في العمل، يعني فبيبدعوا عليهم. زي ما تروح مصلحة مثلا والمصلحة لا تقضى لك فبتعمل إيه؟ عشان احنا مش فاهمين، فاهمين دين، فبتعدي تدعي على اللي جوه. لو احنا فاهمين بقى دين، هنستغفر ربنا ونشوف أن احنا بنتعطل بذنوبنا احنا. يعني هو أنت لما دخلت واتعطلت مش في غيرك انقضت حاجته؟ فأشمعنى أنت اللي تتعطل؟ في حاجة في الدنيا دي عبث؟ من غير حكمه ومن غير تقدير؟ طب اللي جوه معنى كده أن مش غلطانين؟ لا، غلطانين وهيتحاسبوا، لكن أنت تفكر ازاي؟ فاهمين يا جماعة الفرق؟ يعني مش بنقول اللي جوه دول خلاص بقوا ملايكة كده لا، لو ما يتقوش الله في عملهم هيتحاسبوا برده، إنما لو أنت أحوالك مع ربنا سليمة ربنا سبحانه وتعالى يقوم يعطف قلب حد عليك أنه يخلص لك شغلك.
المهم احنا سبنا السؤال وعندنا ركنناه على جنب، وأنا أتقي الله! إيه العجب ورؤية النفس دي بقى؟ إيه يعني إيه أنا أتقي الله؟ مش عاجبني أنك تقولي كده عن نفسك بجد مش بهزر، أنا أتقي الله؟ لو عرفت الله عز وجل عرفتِ أنك لا تتقين الله ولا أنا ولا أي حد. الملائكة منهم اللي اتخلق راكع فهو كذلك إلى يوم القيامة، واللي ساجد فهو كذلك إلى يوم القيامة، أول ما يرفعوا راسهم يقولوا إيه؟ سبحانك ما عبدناك حق عبادتك. احنا بنسعى أن احنا نتقي الله عز وجل، وربنا يعفو ويغفر ويسامح، كلنا مقصرين. فكأنها مثلا عاوزة تقول إيه: يعني باجتهد أني أتقي الله في شغلي، يعني أحسبها أن هي عاوزة تقول كده يعني.
هل يصبني من هذا الدعوة؟ يعني لو أنت بتجتهدي أنك تعملي شغلك على أكمل وجه، خلاص هو اللي بيدعي أكيد بيدعي على اللي مقصر في شغله. هو الحقيقة الحق يقال النساء خطهم كويس، غير أن هما جايبين الأسئلة ببوكس، يعني برده حاجة تفتح النفس كده الواحد يقرأ الأسئلة، البوكس جه وأنا بفتحه فالناس كلها قاعدة مستنية تشوف إيه اللي في البوكس.
آفات القلوب، تقصد بها إيه؟ اللي هو العضو اللي في الدم ده اللي بيضخ الدم ولا العقل؟ ولا هو حاجة تانية؟ القلب الذي نعنيه هو المعنى اللطيف، ما هواش العضو الصنوبري اللي هو اللي هو القلب اللي احنا عارفين ده بيدخ الدم ده بيسموه كده، ما هواش العضو ده. طب هل له تعلق بهذا العضو؟ لا، والعقل برده هل العقل له تعلق بهذا العضو ولا لا؟ كلام كتير للعلماء، ماشي ده في خلاف وقصة كبيرة يعني مش وقتها يعني.
إنما لما نقول احنا آفات القلب مش بنقصد اللي هو يعني إيه البطين الأيمن مسدود فدي مشكلة في القلب، البطين، الشريان التاجي، مش كده، احنا بتكلم في الآفات التي تصيب القلب، يعني الرياء، العجب، الحسد، الكبر، الحاجات دي.
بفضل الله أنا انتقبت سبب بسبب درس من دروس حضرتك، الحمد لله، بس الصلاة ثقيلة عليا جدا، بس بقيت الطاعات الحمد لله كويسة جدا، وأنا خايفة، وأنا خاتمة كتاب الله حفظ مطن مثلاً. لسه بقول خطكم كويس، أرجو الدعاء لي بالثبات على الصلاة. ربنا يثبتك على الصلاة، ما أعرفش تقصدي صلاة الفرض ولا إيه، فلو صلاة الفرض يبقى لازم تلحقي نفسك بسرعة تشوفِ إيه المشكلة بتاعتك وتعالجيها، أنصحك بداية اسمعي كتاب أسرار الصلاة بتاع ابن القيم احنا قاريينه مقري كله يعني على قناة التليجرام هتلاقيه ده كبدايه يعني ماشي.
واحدة متدينة وأهلها أمها أجنبية وأهلها كلهم نصارى وأمها أسلمت سرا هي بتقول كده وحدوتة كبيرة. فين بقى السؤال؟ مشكلتي أن عندها بعض الشبهات عن الاسلام ومش هترضى تتكلم وتتناقش مع حد غيري وأنا بحاول أتعمق في علم العقيدة وأقرا عشان أعرف أساعدها، الأمر صعب جدا عليا فتعتملي إيه يعني؟
شوفي حد بيجاوب الشبهات دي وتسمعها هي تسمعها فيديو يعني مش لازم حد يقعد معاها، تشوفي حد بيجاوب الشبهات بتاعتها وده في كتير بيعمل كده وتسمعها ماشي يعني أنت لا، أنت ما تدخليش أصلا يعني احنا ما ننصحكيش أن أنت تدخلي في الشبهات، أنت مش متعلمة لسه تدخلي تسمعي شبهات ورد شبهات عشان والدتك، لا ما تعمليش كده، أنت شوفي حد ده مجاله الرد على شبهات النصارى وتسمعه ماشي.
طيب أسئلة الستات: هل يجوز الذهاب للعمره بدون محرم؟ يوجد أخ ولكن لا يريد الذهاب، هذا مع مجموعة من البنات طيبة، صحبة طيبة أو حاجة كده، وأنا عندي 40 سنة. يجوز. فتوى شيخ الإسلام ابن تيمية أن أي سفر طاعة لو في صحبة آمنة وفي أمن في الطريق وكده، ممكن.
نفسي ألبس النقاب جدا وحاولت كتير ربنا يرزقني لكن أبي رافض جدا، وهو موجود دلوقتي في الدرس معاكم. سيب بنتك تلبس النقاب، وما تخافش يعني أي معنى أنت خايف من أجله أن بنتك تنتقب، ده فيه سوء ظن في الله سبحانه وتعالى، يعني لو خايف أن بنتك مثلا تعنس وعاوزها تتجوز، فيعني هي هتقرب من ربنا وربنا هيضيعها؟ لا. طيب لو أنا ليه بقول الكلام ده لأن
طالما أنت هنا وحاضر الدرس فانت راجل فيك الخير. ساعات بيجي لنا أسئلة شبه كده، بس يبقى الأب إيه بيشرب خمر وبيسب الدين وما بيصليش، إنما ده أب جاي مسجد وبيحضر درس، هو فيه خير، فهتلاقي في معنى معين مسيطر على ذهن الأب عشانه بيمنع بنته من النقاب، فده أو غيره: سيب بنتك واحتسب ذلك، وبنتك عاوزة تقرب للاحتشام وللتدين، فما تكونش أنت اللي واقف في طريقها. أفرح بده وساعدها، وتجيب لها هدية، وأنت المرة الجاية تبعثي لي ورقة تقولي لي جاب لك هدية ولا لا. مش لبست، أنت كده كده هتلبسي النقاب، خلاص هو.
خلاص تأثر أثر من الكلمتين دول أنا عارف، هيجيب لك هدية على حسب مستواكم بقى، مش عاوز أقول حاجة معينة تطلعوا أنتم أغنى، يبقى أنا ضيعت عليك ال إيه اللي كده، كانجيب لها النقاب، إيه اللي مش هو اللي بيجيب لها الكسوة بتاعتها، لا تجيب لها، ثلاثة ثلاثة مثلاً، النهارده تروح بثلاثة وتجيب لها هدية برده وتفرح بها إن هي بتقرب لربنا سبحانه وتعالى ماشي.
فين السؤال يا بنتي؟ عارف بقى، فانا اتصدمت. أنا مالي؟ اتصدم؟ قوليلي سؤال. ماشي، واحدة دكتورة أسنان شغالة في عيادة إي كلاس جداً، إي كلاس جداً، فالأسعار عندهم غالية، وبعدين اكتشفت إن هم بياخدوا فلوس على حاجات ما بيعملوهاش. وبتحكي بقى: طربوش اتركب من غير حشوة، وحشوة اتركبت من غير طربوش، وتكلفة الحشوة هي اللي ما، يعني حاجات أنا أنا مقدر طبعا، بس ده احنا قلنا الكلام المباح نقلل منه عشان عمرك وعمرنا.
فأنا اتصدمت وحسبتهم على الحشوة والكراون. إيه ده؟ فانا كده عليا ذنب؟ يعني مش مش فاهم والله قوي، إيه اللي حصل؟ مش فاهم، بس هو اه، يعني في ناس بتعمل كده. أنا لسه حد بيقول لي في عيادة إي كلاس برده، راجل دكتور كبير برده أسنان سبحان الله ما أعرفش بقى أنتم عندكم مشكلة ولا وتقويم، التقويم دول اللي هم الناس بقى الإيه يعني الإليت بتوع يعني ده حته كده ما حدش أي حد يدخلها في الأسنان، اللي منكم أسنان عارف الكلام ده.
يعني المجال ده لغاية قريب الدكاترة بتورث ولادها في المجال ده لغاية ما بقى في شباب يروحوا ياخدوا الإيه التخصص ده برة مصر ويرجعوا، تخصص يعني مش أي حد بيشتغل فيه التقويم ده يعني، وراجل كبير جداً يفك السلك بتاع التقويم بتاع عيان ويحطه في علبة، يدخل العيان اللي بعده ويركب له السلك بتاع العيان اللي قبله، عشان تروحوا الإي كلاس بقى.
طيب، ناخد ثلاثة أربعة أسئلة من عند الشباب قبل ما نخلص. إيه يعني مطلعها ليه دي مش فاهم؟ قولي عاوز أجوز يا شيخ ومديني رقمه، بيطلعها لي يحطها لي فوق، قوم واقف وريهم نفسك يلا عشان. ما تحاولوا تسألوا أسئلة شوية مفيدة؟ كتير قوي بيبعت لي عاوزين درس عن طلب العلم، وأنا كنت ناوي يعني أن أدي درس قريب عن طلب العلم فابشروا يعني إن شاء الله. ليه ما ينفعش أجيب مب إيه؟ مش عارف.
طيب. بحبك يا شيخ، ادعي لي أبقى حارس مرمى كبير، ووزع علينا رز بلبن، أنا بحاول أربط السؤالين يعني، حارس مرمى كبير ووزع علينا رز بلبن، مش فاهم إيه علاقة ده بده مش عارف. طيب يعني الأسئلة مش شايف أسئلة الصراحة محتاجة إجابة.
طيب، نقف هنا، قولوا قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير