دخولتسجيل الدخول

٩- كتاب كسر الشهوتين: شهوة البطن، وشهوة الفرج

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. أشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذرياته وأهل بيته، كما صليت على آل إبراهيم، إنك حميد مجيد. أما بعد.

نبدأ إن شاء الله اليوم في كتاب كسر الشهوتين: شهوات البطن وشهوات الفرج. قال: فصل في القول في شهوة البطن. شهوة البطن من أعظم المهلكات. لو تفتكروا، كنا قلنا إن أرباب الطريق أقاموا طريقهم على أربعة أصول؛ اللي كان بيحضر يقدر يقول لنا الأربعة إيه؟ قلة الطعام، والمنام، والكلام، والأنام. أربع حاجات: قلة المنام، وقلة الطعام، وقلة الأنام يعني الخلوة، وقلة الكلام. فاللي عاوز يهذب خلقه ويراعي أحوال قلبه، فلا بد له في سلوكه إلى الله عز وجل من هذه الأربعة، وكل واحدة منها لها أصولها ولها أدلتها.

فهو بدأ بشهوة البطن، فقال: شهوات البطن من أعظم المهلكات. ليه من أعظم المهلكات؟ لأن هذه الشهوة يتبعها عدة شهوات، ولذلك الشرع حض على الصوم، وحض على الجوع، الجوع المخرج من الحالة التي يستطيع الإنسان فيها أن يعبد ربه سبحانه وتعالى، ودول معنيان غير بعض. معنى الصوم، تلاقي إن الشرع حض على الصوم لدرجة إنك لو حسبت الأيام التي حض الشرع على صومها، تلاقي أكثر تقريباً من نصف السنة. أنت عندك رمضان، وعندك شعبان كاملاً إلا يوم أو اثنين، ادي شهرين، وعندك المحرم ادي ثلاث شهور، وعندك من كل شهر اثنين وخميس، في أربعة أسابيع يعني يبقوا ثماني أيام، وثلاث أيام في النصف يبقوا ١١ يوم، قول ١٠، يبقى ثلث الشهر في الباقي، وعندك الست من شوال، وأيام ذي الحجة تكثر فيها من الصوم، أقعد احسب كده غير بقى مطلق النفل، واحد عاوز يصوم، فتلاقي الشرع حض على ذلك.

طيب مش هنصوم؟ ماذا قال صلى الله عليه وسلم: «ما ملأ ابن آدم وعاءً شراً من بطنه، بحسب ابن آدم لقيمات يقمن صلبه». يبقى هتصوم، مش هتصوم، أكلك قليل؛ أكلك قليل ليه؟ لأن امتلاء المعدة يتبعها عدة آفات، منها الآفة التي الشباب كلهم بيشتكوا منها: آفة إطلاق البصر، آفة شدة الشهوة والشبق نحو النساء، آفة إدمان الإباحية. هذه الآفات تبع أو تابعة لآفة الشبع أصلاً. النبي اللي قال كده عليه الصلاة والسلام مش أنا: «يا معشر الشباب، من استطاع منكم الباءة فليتزوج، ومن لم يستطع فعليه بالصوم؛ فإنه له وجاء» حماية ووقاية.

فيجي الشاب يقول بصوم ومافيش لا حماية ولا وقاية، أقول له صدق رسول الله وكذب فرجك. المشكلة إننا مش فاهمين الصوم؛ إنك تصوم وبعدين تيجي تدبها على الفطار، وبعد الفطار بساعة تدبها تاني، وبعد العشاء تدب طول الليل، أنت ما صمتش، فما تجيش تقول أنا ليه الشهوة لا تهذب؛ دي لأن مش ده الصوم اللي عناه النبي عليه الصلاة والسلام. فلذلك يقول هنا: شهوة البطن من أعظم المهلكات. يبقى ليه؟ أولاً هيتبعها آفات أخرى، ثانياً الدم كله يروح للمعده فتتخدر، تبقى ما أنت صح، وبعدين شوية تدخل تنام مش قادر، خلاص ما فيش دم بيروح للمخ، فتخسر عمرك يا مسكين. تخسر عمرك بقى بين السرير وبين الحمام، من السرير للحمام ومن الحمام للسرير، وده كله كان ممكن ما يحصلش لو مقلل أكلك.

ثلاثٌ هن مهلكة الأنام، وداعية الصحاح إلى السقام: دوام مدامة، ودوام وطء، وإدخال الطعام على الطعام. مين اللي قال كده؟ الإمام الشافعي. سيبكم الاثنين الأولانيين، و«إدخال الطعام على الطعام»، عمال ياكل وماش دريان باللي بياكله، وما كانتش دي حالة النبي المشرفة عليه الصلاة والسلام. سيدنا النبي عليه الصلاة والسلام ما كانش ياكل أكل كتير كده، ولا الصحابة كانوا ياكلوا الأكل الكثير اللي إحنا بناكله دلوقتي واعتدناه، للأسف معظم الناس باختلاف الطبقات، سيبك أنت بتاكل تفاصيل أكلك إيه، إحنا بنتكلم على كمية الأكل شكلها إيه.

قال: شهوة البطن من أعظم المهلكات، وبها أخرج آدم عليه السلام من الجنة. والحقيقة فيها نظر؛ هذه المسألة طبعاً هنا الشيخ يتبع ابن الجوزي في المنهاج، وابن الجوزي في المنهاج يتبع الغزالي في الإحياء، لكن يظهر إن في نظر في مسألة إن هل آدم أخرج من الجنة لشهوات البطن؟ يعني سيدنا آدم عليه السلام ما هياش شهوة البطن اللي حركته نحو الأكل من الشجرة، هذا الذي يظهر والله أعلم، وإنما حركه نحو الشجرة الحرص على الخلود. قال: ﴿يَا آدَمُ هَلْ أَدُلُّكَ عَلَىٰ شَجَرَةِ الْخُلْدِ وَمُلْكٍ لَّا يَبْلَىٰ﴾ [طه: 120] فأكل منها، فالحرص على الخلود هو الذي حرك آدم نحو ذلك.

إيه رأيكم الخلود دي حاجة حلوة ولا حاجة وحشة؟ يعني لو حد قال لك تخلد في الدنيا، إيه رأيك؟ الخلود في نفسه يا جماعة مش حاجة كويسة، الخلود سياق؛ يعني أنت تخيل كده إنك تخلد، مش هنقول لك تخلد يا عم هتعيش بس ألف سنة، عارف ألف سنة دي يعني إيه؟ يعني هتشوف فواجع قد إيه، تفجع في أحباب قد إيه وأقران قد إيه، وبعد كام سنة هتلاقي نفسك غريب وسط الناس، ما تعرفش ولا واحد. فحاجة من اثنين، يا تنزوي يا تبتدي تكون صداقات، هيبقوا بقى أنت عندك مثلاً ٩٠٠ سنة وتكون صداقات مع عيال صغيرة ٦٠ سنة و٧٠ سنة، وبعدين تفجع فيهم مرة أخرى؛ فالخلود في نفسه، الحرص على البقاء ده مش حاجة، حتى بقواعد الدنيا مش حاجة، لأنك بتفقد السياق اللي أنت عايش فيه.

قال: وبها أخرج آدم من الجنة، ومن شهوة البطن تحدث شهوة الفرج والرغبة في المال. دي آفة أخرى تتبع شهوة البطن؛ الإنسان اللي اتعود على أكل معين ما يعرفش ينزل عنه في المستوى أو كمية معينة ما يعرفش ينزل عنها، طيب ده هيتطلب منه إيه؟ إنه يبقى حريص على مزيد من المال عشان ينفقه في هذا الطعام. إنما الإنسان اللي لقى بياكل، ما لقاش بياكل، نحن قوم إذا وجدنا أكلنا أكل الرجال، وإذا فقدنا صبرنا صبر الرجال. أكل الرجال دي الأولى، مش يعني ناكل ندب، لا أكل الرجال مش دب ولا حاجة، يقتصدون في الأكل، وإذا فقدنا صبرنا صبر الرجال. فتلاقي عادي، الدنيا تميل بيك عادي، أنا اتعودت إن ممكن بكسرة خبز وحتة جبنة والدنيا تعدي، أو بتمرة ولا بتاع والدنيا تمشي، معود نفسي من قبل كده، ما أنت مش هتتعود فجأة، وإلا هتلاقي نفسك بتستلف، طيب ليه؟ يقول لك ما أنا عاوز أكل، هتقول له إيه ما هو لازم ياكل، بس هي القصة أنت عودت نفسك على نمط معين من الأكل، نوع معين من الأكل، مقدار معين من الأكل، وكان ممكن أنا وأنتم نعود نفسنا من قبل كده على إننا بننزل شوية ونقدر نصبر شوية، ونقدر نيجي على نفسنا شوية ونعمل ده.

ويتبع ذلك آفات كثيرة كلها من بطر الشبع. وفي حديث النبي صلى الله عليه وسلم قال: «المؤمن يأكل في معاء واحد، والكافر يأكل في سبعة أمعاء»، يعني المؤمن يأكل أكلاً قليلاً يكفيه القليل من الطعام مع تسمية الله عز وجل فيبارك له في طعامه، ثم مع حمد الله سبحانه وتعالى. وفي حديث آخر: «ما ملأ ابن آدم وعاء شراً من بطنه، بحسب ابن آدم لقيمات يقمن صلبه، فإن كان لا محالة فثلث لطعامه، وثلث لشرابه، وثلث لنفسه».

وهذا الحديث دائماً نعلق عليه عشان نبقى فاهمين، فبنقول: يبقى السنة إننا ناكل إيه؟ مش الثلث، مش الثلث، سيدنا النبي عليه الصلاة والسلام ما قالش بحسب ابن آدم الثلث، ما قالش كده، قال: «بحسب ابن آدم لقيمات يقمن صلبه»، فإن كان لا محالة؛ ما فيش فايدة فيك، ما بتسمعش الكلام، ما بتسمعش النصيحة النبوية، فإن كان لا محالة فثلث لطعامه، فيبقى الثلث هو الغاية، اللي هو آخر حاجة تاكلها هي الثلث، يعني طول حياتي ما عنديش الثلث؟ لا، لو شبعت مرة مرتين في حياتك عادي يعني نسامحك في المرة، عشان الشباب يروحوا قافشين في حديث أبي هريرة: والذي بعثك بالحق لا أجد له مسلكاً، يقول لك أهو ما أبو هريرة، أيوه أبو هريرة كان يصرع إلى جوار منبر رسول الله من الجوع، دي الحالة الدائمة لسيدنا أبي هريرة؛ فقير معدم مش لاقي ياكل، من شدة الجوع يغمى عليه. فلما يجي مرة يشبع، ويشبع من إيه يا أبو هريرة؟ لبن، مرة أثرت عن أبي هريرة، ما تقفش بقى في المرة التي سيدنا أبو هريرة لم يجد له مسلكاً وتقول أهو يبقى مفهوم، يبقى إحنا الأصل: بحسب ابن آدم لقيمات.

إحنا يا جماعة دلوقتي بنتكلم الشباب اللي بيشتكي من الشهوة ومش عارف يبطل العادة السرية ومدمن إباحية، العلاج أهو، اللي هو إيه نترجمها لغة عصرية؟ "لقيمات يقمن صلبه"، يعني لو أنت محتاج مثلاً ٤٠٠٠ كالوري في اليوم عشان تقوم بوظائفك؛ هو بيقولوا الراجل يحتاج ٢٠٠٠ كالوري تقريباً، الراجل والست أقل شوية، ماشي، المهم شوف أنت تحتاج كم كالوري في اليوم، وبعدين تاخد الكالوريز التي تحتاجها، بحيث يجي على آخر اليوم ما فيش كالوري زيادة تبص بيه لحاجة ولا أنت تعمل بيه حاجة، خلاص، هو ده معنى كلام النبي عليه الصلاة والسلام. بحسب ابن آدم لقيمات يقمن صلبه، يعني إيه يقمن صلبه؟ يعني أكلات أو لقيمات، لما ياكلها يدوب يقدر يعمل اللي عليه، وظائفه الضرورية في الدين والدنيا، إحنا عندنا دنيا برضه، يعني الطالب بيروح مدرسته بيروح جامعته يرجع يذاكر، دي وظائف محتاجها ضرورية، فمحتاجة غذاء معين، فكل واحد بيحسبه بقى، اللي بيلعب رياضة غير اللي ما بيلعبش، وهكذا، بس في الآخر هي أكولات أو لقيمات. لو محتاج كالوري زيادة عشان تعمل بيه حاجة زيادة، تقول ما عنديش الكالوري ده، طبعاً ما بتتحسبش بالكالوري قوي كده، بس ده المعنى اللي عاوزين نبقى فاهمينه والنبي بيتكلم عليه الصلاة والسلام.

فهذا أول العلاج؛ لأن ده العلاج النبوي عليه الصلاة والسلام، قال في الحديث اللي قلناه لكم: «فمن لم يستطع فعليه بالصوم؛ فإنه له وجاء». أنهي صوم بقى؟ هو الصوم ده، الصوم اللي هيمنعك الأكل والشرب في النهار، ويجي الليل عليك فتأكل أكولات يقمن صلبك، بس.

قال: وقال عقبة الراسبي: دخلت على الحسن وهو يتغدى، الحسن البصري، فقال هلم تعال كل، فقلت أكلت حتى لا أستطيع، لا مش قادر يعني كبستها ما فيش مكان، فقال الحسن البصري: سبحان الله، أو يأكل المسلم حتى لا يستطيع أن يأكل؟ الحسن مش متخيل إن في مسلم بيه، لو عايش بينا بقى دلوقتي طبعاً.

وقد بالغ جماعة من الزهاد في التقلل من الأكل والصبر على الجوع، وقد بينا عيب ما سلكوا في غير هذا الكتاب، هذا الكلام من كلام ابن الجوزي، وهذه المسألة من المسائل التي أنكرها ابن الجوزي على صاحب الإحياء، طبعاً اللي مش فاهم القصة دي يسمع بقى أول درس نزل عشان يفهم الكتاب ده أصله إيه، مختصر منهاج القاصدين ده أصله إيه، عشان يفهم الكلام اللي إحنا بنقوله ده. والفكرة هنا إيه؟ إن بعض الناس تقلل جداً من طعامها، وإحنا مش محتاجين الكلام ده، طبعاً لغاية ما يأتي ذلك على الفرائض وعلى الواجبات الشرعية، فيبقى مش قادر يقوم يصلي من كتر ما هو مقلل من طعامه، مع وجدان يعني هو يقدر يلاقي الأكل اللي يقيم صلبه لكن ما ياكلش، ويظن إن ده فيه خير، فهنا ابن الجوزي ينكر هذا، ومن بعدها أحمد بن قدامة طبعاً.

قال: ومقام العدل في الأكل رفع اليدين مع بقاء شيء من الشهوة. وقلنا لكم قبل كده الأطباء وبتوع التغذية بيقولوا إن مستقبلات الإحساس بالشبع بتأخر شوية في الشعور، يعني بعضهم يوصلها لتقريباً ثلث ساعة، يعني إيه؟ يعني أنت ممكن تبقى شبعان من ثلث ساعة، بطنك اتملت وأنت عمال تاكل، ليه؟ لأن مستقبلات الشعور بالشبع ما بتحسش، ما تديلكش إنذار وقت الشبع على طول، وده اللي بيفسر إنك ممكن الإنسان بعد أكلة معينة يبقى فعلاً مش قادر يتنفس، طب وهو بياكل ما حسش بده؟ عشان كده بيقولوا إنك تأكل وتسيب لنفسك مهلة كده، هتلاقي نفسك شبعت، ماشي، ده أنا سمعته من أطباء، الله صح غلط راجعوا بقى الأطباء، مش أنا اللي بقول الكلام ده، بس أنا مرة قلتها برضه في درس كان طبيب قاعد بتاع تغذية قال لي كلامك صح، ممكن يبقى بيجملني برضه مش عارف، فأنتم راجعوها ماشي.

على كل حال، ترفع يديك مع بقاء شيء من الشهوة، شهوة الطعام يعني، ونهاية المقام الحسن قوله صلى الله عليه وسلم: «ثلث لطعامه، وثلث لشرابه، وثلث لنفسه». فالأكل في مقام العدل يصح البدن وينفي المرض، قالوا: المعدة بيت الداء، كثير من الأمراض علاجها في إنك تضبط أكلك، كثير من الأمراض كده، المعدة بيت الداء، وذلك ألا يتناول الطعام حتى يشتهيه، ثم يرفع يده وهو يشتهيه.

تبقى خد بقى قواعد اهو نتعامل ازاي مع الاكل؟ يا جماعه الكلام ده كلام مهم وهو بدايه العلاج لكثير من مشاكلكم. اللي يقول لك أنا عندي كسل وما بعرفش اعمل حاجات كتير، اللي يقول لك أنا شهوة النساء مبهدلاني، اللي يقول لك بنام كتير، اللي يقول لك الحمام، اللي يقول حاجات كتير، وزي ما قلت لكم بعض الأدواء كمان علاجها إيه في الكلام اللي احنا بنقوله ده.

أول حاجة ما تروحش تاكل عشان زهقان قاعد فاضي فهروح أكل، ما تروحش تاكل عشان معاد الغدا جه. إيه معاد الغدا دي؟ طب ما أنت لسه واكل من ربع ساعة بس كان لسه الميعاد ما جاخش، فهو الميعاد جه بقى دلوقتي فأنا أروح أكل. ما فيش حاجة اسمها كده، كل لما تجوع.

كل لما تجوع ومش بس كده، عود نفسك انك تصبر على الجوع قليلاً. يعني مش أول ما تحس بالجوع تروح تاكل، لا هتجوع وتقعد شوية جعان كده يقوم تدرب نفسك على الجوع. ماشي، وبعدين تاكل.

طيب ابتديت تاكل، ما تاكلش لغايه ما تشبع وتبقى رافض، لا تقوم وأنت لسه مشتهي الأكل. خلاص، ومقام الاعتدال قلنا، أو يعني النصيحة النبوية في ذلك، أنك تأكل أكلات يقمن صلبك. دي مش كل الناس تعرف تعملها بس أعودوا عليها، قللوا من أكلكم واحدة واحدة كده لغايه ما ربنا يفتح علينا أنا وأنتم ونبقى كده ماشي.

قال: فالأكل في مقام العدل يصح البدن وينفي المرض، وذلك ألا يتناول الطعام حتى يشتهي، ثم يرفع يده وهو يشتهيه. والدوام على التقليل من الطعام يضعف القوى، أنك تقلل من الطعام على هيئة.

لو هنتكلم بال يعني الكلام بقى الحديث اللي ما كانش معروف: أن لو جسمك محتاج عدد كالوريز معين فانت بتاكل أقل من الكالوريز دي. طب في الأول هيحصل ايه؟ جسمك هيبقى فيه دهون زيادة، هيحرقها، مش كده؟ كدة إن شاء الله اللي مش عارف هو كده يعني ماشي.

طيب حرق الدهون الزيادة، جسمك وما بقاش عندك دهون، هيخش على العضلات، يبتدي ياكل من عضلاتك، فتبتدي تضعف قواك. هو ده بقى اللي بيقوله هنا الشيخ اللي هو العلم حديث يقوله بالطريقه اللي احنا بنقولها دي. ما هو ضعف القوة ده يعني عضلاتك بتخس، عضلاتك عندك مقدار من العضلات معين بيقل.

ده كله ليه الجسم بيعمله؟ عشان تحافظ على وظائفك الحيوية، لأن دي عند الجسم أخطر، أخطر من العضلات والقوة اللي بيها بتعمل نشاطاتك اليومية. في الوظائف الحيوية بقى عندك الكبد والطحال والكلى والقلب، وظائفك الحيوية أو هذه الأعضاء أهم وأخطر، فيقوم يجي على عضلاتك. فاحنا مش عاوزين نبقى بناكل برده يعني إنه نأثر إلا لو عندك مخزون من الدهون ما شاء الله فايه عاوز تحرقه دي مسألة تانية.

قال: وقد قلل أقوام مطاعمهم حتى قصروا عن الفرائض، وظنوا بجهلهم أن ذلك فضيلة وليس كذلك. والحته دي بنعديها دايما لأن احنا ما أظنش حد بيبقى قاعد بيوصل للمرحله دي، لأن احنا دايما في الناحية التانية. ومن مدح الجوع فانما أشار إلى الحالة المتوسطة التي ذكرناها.

قال: وطريق الرياضة في كسر شهوات البطن، الرياضة يعني إيه؟ المجاهده خلاص. وطريق الرياضة يعني المجاهدة في كسر شهوة البطن، أن من تعود استدامة الشبع فينبغي له أن يقلل من مطعمه يسيراً مع الزمان. يبقى ما تسخنش بالذات لو راجل في بيته عنده زوجه وأولاد، تسخن سمعت الدرس تروح رايح فرمان في البيت وأنت عيالك متعودين على الشبع ومراتك متعودة على الشبع، من بكره ما فيش مش عارف إيه أكلات يقمن الصلب أو المرأة تروح البيت جوزها يفاجأ تاني يوم فين الغدا؟ لا أكلات نبقى نعمل لها بقى وفد إيه يروح يزورها في المستشفى.

ده لو بقى فيها حاجة, يعني أو نصلي عليها بقى وخلاص. فلا ده يبقى نتفق مع بعض ونقعد نقول عاوزين نقلل أكلنا ها تدريجياً، مش النهارده بناكل ١٠ ترغفة بكره يبقوا رغيف. مش هتعرف تعملها، ولو عملتها يوم اتنين هتمل وهترجع تاني للـ ٢٠ رغيف بقى تنتقم، يبقى واحدة واحدة.

خلاص، يبقى ده واجب عملي الناس تعمله، اللي عاوز يسير إلى الله سبحانه وتعالى. احنا قلنا لكم هي دي طريق القوم اللي عليها أدلة كتير، كل واحدة من الأربعة اللي قلناهم دول يا جماعة عليها أدلة كتير قلته عشان نحفظهم. قلة الطعام أهي معانا، وقلة الكلام، وقلة الأنام، وقلة المنام.

فبدول تهذب الأخلاق وتستفيد بوقتك اللي أنت قاعده في الدنيا دي لغايه ما تموت، هي الدنيا كلها إيه يعني ولا حاجة؟ فما تقولش أنت جاي تعذبنا ولا إيه؟ لا مش جاي أعدبكم ولا حاجة، بالعكس احنا جايين نتفق مع بعض على أننا نشتري نعيماً سرميادياً بشوية أيام هنقلل فيهم الأكل والشرب والنوم. ربحانة ولا مش ربحانة كده؟ ربحانة والله، فكروا فيها ربحانة.

قال: وطريق الرياضة في كسر شهوة البطن أن من تعود استدامة الشبع فينبغي له أن يقلل من مطعمه يسيراً مع الزمان إلى أن يقف على حد التوسط الذي أشارنا إليه، وخير الأمور أوساطها. فالأولى تناول ما لا يمنع من العبادات، هذا أولى شيء اللي هو الأكلات اللي يقمن الصلب ويكون سبباً لبقاء القوة.

ما ناكلش من عضلات الجسم عشان الكالوريز أقل، في عجز في الكالوريز اللي الجسم محتاجها فلا يحس المتناول بجوع ولا شبع، فحينئذ يصح البدن وتجتمع الهمة ويصفو الفكر. ومتى زاد في الأكل أورثه كثرة النوم. طب إيه يعني كثرة النوم؟ بتضيع عمرك. ما هو الناس اللي بينام كتير ده يعني، طبعا نوم الظالم عبادة دي احنا متفقين عليها، احنا ما بنتكلمش على الظالم، بنتكلم على اللي صحي يستفيد بووقته.

ما هو في واحد يرازي في الخلق، يعني لو صحي ما هو ما لوش غير الميرازية، فده ينام يتخمد، ما مش عاوزينه. إنما اللي لا، اللي حريص على وقته وبيضن بوقته وعارف أن وقته ده هو رأس ماله وعمره، ده اللي هو ما الوقت اللي يحصل فيه الحسنات والدرجات والرفعة عند رب الأرض والسماوات. فمحتاج الوقت، محتاج الوقت.

من مشايخنا أو مشايخ مشايخنا اللي كان ظل مدة في حياته الشيخ محمد محمد أمين الهري رحمه الله عليه وكان كان مجاوراً في مكة في دار الحديث يدرس في دار الحديث. حد يعرفه؟ طيب، فكان شيخي ده شيخ شيخي. طبعا محمد أمين الهري ده محمد علي آدم الأثيوبي الحبشي، الاثنين دول تش دول علماء كبار يعني يعني من ال هم طبعا ممكن يبقى ناس كتير ما يعرفهمش، بس دول من العلماء، علماء حقيقيون بقى يعني حاجة كده إيه محمد بيقول لي أنا أروح دار الحديث عشان بس يعني إيه آخد بركة أن أنا جلست مجلساً للشيخ.

فالشيخ لو شفته في الشارع تروح تدي له حاجة في إيده كده تفتكره فقير مسكين يعني من الآية، هو حبشي فيعني أسمر قوي رحمه الله. وبعدين جلابيته يعني إيه حاجة متواضعة جداً ويدخل حظت الحذاء تحت باطه كده، ولا بقى حواليه ناس ولا هيصة ولا بتاع، حاجة كده عجيبة جداً.

فكان شيخنا يقول لنا أن هو كان يحدثهم (يعني) أنه ظل مدة ما بينامش غير ساعة واحدة في اليوم بس. الساعة في مكة اللي راح منكم، في أذانين للفجر بينهم ساعة بالضبط، اللي راح منكم مكة يعرف كده، الحرم تلاقي فيه أذان، أذان أول وأذان ثاني، بالضبط ساعة بين الاثنين. هو كان ينام الساعة دي في اليوم كله. مش طول عمره، بس ظل مدة كده. ليه؟ يضن بوقته، يضن بوقته. هو عاوز عمر يعمل فيه حاجات.

وطبعا يعني الإرث العلمي الذي خلفه الشيخ كبير جداً. ففي ناس كده يا جماعة، وأنا بجيب لكم مثال كان عايش بينا، مننا اللي شافه بعينيه. أنا بقول لك نام ساعة، ما بقولكش نام ساعة والجسم يتلف، معظم الناس ما يستحملش ده، بس بقول لك أن في ناس كانت عاملة ازاي يعني. وما بجيبكش حواديت من السلف، بقول لك ناس من الإمام النووي. ظل عامين في أول أمره في بداية طلب العلم لم يضع جنبه على الأرض، ما نامش، كان نومه سقطات. قاعد بيذاكر والكتب حواليه، يقوم إيه يغفل كده فيقع وهو قاعد كده، وبعدين يصحى يكمل علم ومذاكرة و.

طب بقول لك اعمل كده؟ مش بقول لك اعمل كده برده، مش بقول لك اعمل ده، بس بقول لك إن ده كان حاصل. إنما هنفضل يا جماعة لا مركزين مع أكلنا ولا مركزين مع شربنا ولا مركزين مع نومنا ولا طب مستنيين إيه يوم القيامة؟ احنا مستنيين إيه يعني؟ متصورين إيه؟ ما هو في غيرنا بينافس في الدرجات.

غيرنا دول بقى مش لازم يبقى قدامه مايك وإضاءات وكاميرات، لا، وكم في الزوايا خبايا، وكم في الناس بقايا، الناس لا يؤبه لهم. الناس كده تبقى ماشية زي ما بقول لك الشيخ محمد الامين ده والله العظيم لو ما كنتش شفته في المجلس وماشي في شارع كنت رحت اديته حاجة في إيديه.

ففي ناس كده تنافس على تلك الدرجات، هم أجدع مننا في إيه بقى؟ زي ما أنت بتبقى حريص على الدنيا والحماسة بتاخدك لو واحد زميلك في الشغل سبقك في ترقية، لما تسمع عن دول أن معانا في الدنيا ناس شبه دي برده الدنيا إيه، يبقى في الحماسة دي جواك. ليه ليه يكسبك أبو مسلم الخولاني سيد التابعين؟ كان يبقى غيران من مين؟ من الصحابه، ويضرب رجله يقوم بالليل ويجي بقى يفطر مش قادر، يقوم ضارب رجله يقول لها قومي، أيظن أصحاب محمد أن يستأثروا به على الحوض دوننا؟ صلوا على النبي عليه الصلاة والسلام. كلا والله لنزاحمنهم عليه حتى يعلموا أنما خلفوا رجالاً.

فاحنا محتاجين النفسية دي في التعامل مع الآخرة مع ومع أهل الآخرة. خلوا تنافسكم وجهوه صح، الدنيا: من نافسك في آخرتك فنافسه، ومن نافسك في دنياها فألقها في نحره، ما تشغلش دماغك بالدنيا. إنما الآخرة لا، وفي ذلك فليتنافس المتنافسون.

خلاص يا شباب، فبيقول فالأخرى تناول ما لا يمنع من العبادات ويكون سبباً لبقاء القوة فلا يحس المتناول بجوع ولا شبع، فحينئذ يصح البدن وتجتمع الهمة ويصفو الفكر ومتى زاد في الأكل أورثه كثرة النوم وبلادة الذهن. إنتباع في الدرس، مبلم، مش عارف تنزل صلاة التراويح، يقول لك أنا شفت رؤية امبارح في السجدة، إنما إيه في صلاة التراويح هو مش دريان الراجل بيقرا إيه؟ يبقى ليه ده كله؟ عشان ده بيبها على الفطار، ده بيبها على الفطار.

وبلادة الذهن، وذلك بتكثير البخار في الدماغ حتى يغطي مكان الفكر وموضع الذكر ويجلب أمراضاً أخر. قال: وليحذر من ترك شيئاً من الشهوات. شوفوا يا جماعة العالم المربي بقى: أن تتطرق إليه آفة الرياء الله! اه، أنت ممكن تسيب شهوة وتدخل النار برده، مش كده؟ ازاي؟

واحد قال خلاص أنا طالع من الدرس ده بقى كل حماس، هقلل أكل وأقلل شربي وأقلل نومي وأتواضع في لباسي، وبعدين يعمل ده يقوم قوم يلاقي قلبه كده انتشى أن أنت الواد اللي ما فيش بعدك، وكل دول ضلال وفي النار، وأنت الوحيد اللي ناجي وأنت بقى بقيت السلف والكلام ده. عارفين اللي هو واقف بيصلي واللي جنبه قعد يقول له إيه الصلاة الجميلة دي؟ راح قال له لا وصايم. عارفينهم؟ أهو ده اللي هو يعمل الخير صحيح، لكن نيته إيه بقى؟ أنه يشتهر بين الناس، ويتضايق بقى أنه لو قعد كده شهرين أنه إيه لم تظهر عليه، لم يلق في قلوب الناس محبته ولم يعظم ولم يبجل ولم يقدم في المجالس، يبقى متضايق. آفات الرياء مهلكة.

وقد كان بعضهم يشتري الشهوة. هنا الشهوة يعني لو هو مثلاً ما بياكلش أكل كتير أو ما أو مثلاً مانع نفسه من طعام معين مدة مش محرمة عليه، لا، يعني قال أنا عاوز أربي نفسي مثلاً، فانا واحد مثلاً كنت إيه متعود آكل اللحوم كل يوم فانا هقعد مثلاً شهر مش آكل لحوم. هنا مش بيحرم المباح، وإلا فيبقى غلط، إنما بيربي نفسي أن أنا عادي أقدر أعيش من غير هذا النوع من الطعام اللي أنا متعود عليه، فعاوز أربي نفسي.

زي سيدنا عمر كده لما ضرب أبنه لما لقاه اشترى لحم، قال له: إيه ده؟ قال له: لحم اشتهيته فاشتريته. ضربه، هو سيدنا عمر كان يحرم اللحمة؟ لا، قال: وكلما اشتهيت اشتريت؟ هتربي نفسك إمتى؟

فالمهم، واحد قال كده يقوم يعمل إيه بقى؟ هو بيقول لك كان بعضهم يشتري الشهوة ويعلقها في بيته وهو زاهد فيها. طب ليه اشتراها؟ عشان الناس تشوفه، راح السوق وجاب لحمة، فعاوز يدفع عن نفسه الرياء، فاهمين دي؟ طيب، واحد مثلاً هو عنده نظامه المعين وبعدين هيتقفش بقى، هيبتدي يتعرف أنه كذا وما بياكلش ومقلل طعام وبتاع، ما فيش مشكلة أنه لما يتعزم ياكل عادي، يدفع بذلك الرياء عن قلبه.

وكان بعض السلف يعمل كده، ماشي. قال: يستر بها زهده، يعني شراءه لتلك الشهوة يستر بها زهده. وهذا هو نهاية الزهد، الزهد في الزهد بإظهار ضده، يعني إيه؟ أنه يزهد في أن يعرف عنه الزهد، مش عاوز يتعرف عنه أنه زاهد، ومش عاوز يتعرف عنه أنه له حال مع الله. والأولياء كده، هو الولي بيقف يقول أنا ولي؟ ما بيقولش كده أولاً. الولي ما بيشوفش نفسه ولي أولاً، ثانياً لو بينه وبين ربنا حال ما يحبش أنه يطلع عليها، ما يحبش ده. ليه؟ عشان تظل بينه وبين محبوبه.

قال: وهو عمل الصديقين؛ لأنه يجرع نفسه كأس الصبر مرتين. اللي هيعمل كده أولاً: صبر على الشهوة، يعني: قلل أكل وقلل شرب وقلل نوم، ودي كلها شهوات فصبر على ذلك. ثم صبر على أنه لا يمدح على ذلك التقليل؛ مش عاوز يتعرف عنه إنه مقلل أكل وشارب ونايم وحريص على وقته ويضنه.

طبعا حضرني -طبعاً الدرس ده أنا بحب الدروس اللي بتبقى مش متحضرة دي اللي بتطلع كده يعني إيه فالدرس ده منهم- فاللي بيجي في دماغنا بنقوله يعني، حضرني دلوقتي برضه قصة للشيخ محمد الأمين الشنقيطي، صاحب أضواء البيان. حد عارفه؟ تسمعوا عنه؟ طيب.

طبعاً الشنقيطي دي نسبة إلى إيه؟ شنقيط، شنقيط اللي هي موريتانيا. الشناقطة يعني منهم علماء كبار؛ لأن شنقيط لغاية عهد قريب كان لها باع في المحاضر، هناك بيسموها محظرة، المحظرة دي يروح فيها طلاب علم، وطبعا ما فيش أي نوع من انواع الرفاهيات، مؤخرا دخلوا لهم النت والعيال باظت اللي في المحاضر -مش كلهم يعني- يعني واحد من إخواننا هناك من طلاب العلم وكان بيراسلني وبيقول لي دخل النت وبقى يحصل مهازل وبقى طلاب بتشرب سجاير. المهم شنقيط دي كانت محظرة علمي قوي جدا في الإسلامي لغاية قريب.

يعني من الطرائف، حد من المشايخ المشهورين من بلد أخرى مش من مصر، وكان في المطار وهو بيحكي، بيقول: فلقيت عامل النظافه عمال يغني بيكنس ويغني. فقال يعني إيه أنصحه؟ فجبته قلت له: أنت منين؟ قال له: من شنقيط. قال له: يعني شنقيطي وبتغني؟ اتقي الله وكذا، وقعد يدي له يبكته. فالراجل خلاه يخلص، قال له: يا شيخ، أنا أدندن بألفية ابن مالك! ده عامل نظافة، ده مش العالم بتاعهم، إن واحد شغال عامل نظافه بيدندن بألفية ابن مالك في النحو.

فالشيخ محمد الأمين الشنقيطي -احنا بقى في موضوع الحرص على الوقت- الشيخ محمد الأمين كان إذا دعي إلى وليمة عرس ولا كده، يجيب عشان السنة إنه يجيب الوليمه، يدخل معاه الكتاب بتاعه، يدخل يدي وشه للحيطة ويقعد يقرا لغاية ما يتحط الطعام، فيقعد يشارك الناس في الأكل وياخد بعضه ويمشي، ما يضيعش، يضنه بالوقت ده. وبعض الناس اللي كانوا بيخدموا الشيخ يعني بيقولوا: كان لا يعرف فئات النقود! ما كانش يباشر بيع وشراء، هو شيخ خالص، ليه منكب على العلم والتحصيل وكذا، عنده بقى ابنه، عنده حد خادم ولا بتاع هو اللي يروح يجيب له الأكل بتاع. تدي له 10 ريال -هو كان قاعد في السعودية مده يعني- تدي له 10 ريال زي ما تدي له 100 ريال، هو مش عارف دي إيه ودي إيه، بيعملوا إيه دول؟ ما يعرفش إيه الفرق بين العملات أو الفئات، فئات النقود. يا جماعة، احنا بنتكلم على ناس كانت عايشة شفناها.

الشيخ محمد الأمين كان مجننهم، الشيخ محمد الأمين كان هو مدرس في الجامعة، وبعدين يجي في الامتحانات يقف يراقب على الشباب، فيجي الطالب في اللجنة يسأله، يعني يقول له: السؤال ده؟ يجاوبه في الامتحان، يجي واحد تاني يجاوبه. الشيخ ابن باز جابه، قال له: ما يصحش كده، يعني الناس. قال له: لا، ده كتمان علم، احنا ده علم شرعي، أنا لا أكتم علماً! والشيخ عالم، خلي بالكوا يعني. فالشيخ ابن باز عرف إن ده اجتهاد الشيخ، فنحاه عن أنه يقف في اللجنة، خلاص هو اجتهاد الشيخ، بيقول: أنا امتحان إيه وبتاع إيه؟ أنا ما يخصنيش الحركات بتاعتكم دي، أنا الراجل بيسألني عن علم شرعي، لو ما جاوبتش أبقى كاتماً للعلم.

كان نفسنا طبعا في الشيخ محمد، عاوزين كدة البلد كلها تبقى الشيخ محمد.

قال: لأنه يجرع نفسه كأس الصبر مرتين، والثانية أمر. إيه الثانية؟ إنه يصبر على أنه لا يمدح بما يفعل، وأنه لا يتعرف عنه.

قال فصل في القول في شهوة الفرج. وأما شهوة الفرج فاعلم -شهوة الفرج يعني شهوة النساء يعني ماشي- فاعلم أن شهوة الوقاع سلطت على الآدمي لفائدتين. قلنا لكم قبل كده، أو يعني كان بيحضر، قلنا لكم يا جماعه: إن أي شهوة خلقها الله عز وجل لحكمة، ولذلك احنا ما بنبقاش بنقول عاوزين نقضي على الشهوة، احنا عاوزين نححسن إدارة الشهوة بس. إنما أي شهوة في الدنيا خلقت لفائدة، حتى الغضب! الغضب خلق لفائدة، لولا الغضب ما كانش قام سوق الجهاد، هو احنا بنجهد ليه الكفار؟ غضباً أن تنتهك حريم الله، غضباً أن يُسب الله، غضباً أن يشرك بالله، مش كده؟ فهذا الذي أقام سوق الجهاد. ليه بتدافع عن عرضك؟ بشهوة الغضب! فحتى الغضب له فائدة. شهوة الجماع، شهوة النساء، ليها فائدة؟ آه طبعا ليها فائدة، احنا عاوزين نحسن إدارة هذه الشهوة مش نقضي على الشهوة.

فمن فوائدها، قال: أيهما بقاء النسل، يعني لو ما فيش شهوة الجماع النسل هينقطع، خلاص ما فيش دنيا. انتم عارفين العلماء يقولوا حاجة عجيبة جدا، يقولوا إن كلمة عورة معناها في اللغة ما يستقبح، ده معنى كلمة عورة، والعلماء قالوا إن العورة مستقبحة، ولولا الشهوة الإنسان لا يطيق أنه ينظر لعورة غيره، هي الشهوة اللي بتحرك تلك الغريزة. فبقاء النسل، والثانية -عشان كده سيدنا عمر كان بيقول إيه: أني لأكره نفسي على الجماع، رجاء أن يخرج الله من صلب نسمة توحده- ممكن الإنسان يصل لهذه المرحلة، مرحلة إنه مش عاوز الشهوة دي، مش موجودة خالص، وبيكره نفسه عليها ليه بقى؟ ممكن معنى شرعي، أن هو منقطع لله عز وجل، مشغول بحاجة أي حاجة زي كده، مشغول بحاجة شرعية، معاني شرعية، أو لأي سبب دنيوي برضه.

والثانية من فوائد الشهوة: ليدرك لذة يقيس عليها لذات الآخرة. لما نجيء نقول لك: ده في الجنة في حور عين، لو واحد ما مش ما فيش شهوة يقول لك: حور، يا عم، هتعمل بهم إيه دول؟ مش كده؟ تجيب العيل الصغير، العيال اللي في حضانة، تجيب الواد يقول لك: ما بحبش البنات، مش كده؟ هو صادق، هو هو في إعدادي بقى. طيب ليه؟ لأن هو ما عندوش حاجة، يعني طيب.

كذلك بقى لما نجيء نقول لك: تخيل أنت كده ما عندناش شهوة، إن أنت تذوق إنك تذوق حاجة، فيقول لك: ده في الجنة في إيه؟ لحم طير وفاكهة و... نفسك مش هتتحرك؛ لأن أنت تدخل تدخل الجنة يعني ما أنت ما عندكش التذوق، أنت عندك كل حاجة واحدة. فأنت بتقيس على تلك الشهوة وعلى هذه الشهوة، تلك الشهوة التي في الآخرة. قال: فإن ما لم يدرك جنسه بالذوق لم يعظم إليه الشوق، يبقى أنت بنذوقك هنا في الدنيا عشان تشتاق لما أعدد لك في الآخرة، مفهومه.

إلا أنه إذا لم ترد هذه الشهوة إلى الاعتدال جلبت آفات كثيرة ومحناً، ولولا ذلك ما كان النساء حبائل الشيطان. وشهوة النساء من اعظم الشهوات على الرجال، وذكرها الله عز وجل في القرآن: ﴿زُيِّنَ لِلنَّاسِ حُبُّ الشَّهَوَاتِ﴾ [آل عمران: 14] من أول حاجة، أول حاجة؛ فهي شهوة عظيمة، وأول فتنة بني إسرائيل كانت في النساء، ماشي.

ولذلك احنا بنقول: زي ما بنوجه خطاب للشباب يغضوا أبصارهم ويتقوا الله عز وجل، بنوجه خطاب للنساء كذلك يتقين الله عز وجل في الشباب. يبقى المرأة تفهم أن بيتها أولى بيها، طب هتضطر تخرج لضرورة ولا لحاجة؟ هتخرج لابسة إيه وماشية إزاي وطريقة كلامها إزاي وكل التفاصيل دي. طب بنخنقك؟ آه معلش، مش بنخنقك، آه بنخنق، هو فعلاً. هو يا جماعة الشرع كله قائم على إيه؟ على حدود بتتحط، هو أنك تمشي كده من غير ما حد يقول لك افعل ولا تفعل؟ ده أريح لك نفسياً ولا أن يتقal لك: لا، هنا اقف، لا، هنا امشي، لا، هنا؟

ولذلك اتسمت إيه الأحكام بتاعة الشرع؟ أحكام إيه؟ تكليفية، فيها كلفة، فيها مشقة. فاي هو الشرع جاء ليضبط تلك المسائل، فيبقى فيها شوية تضييق؟ آه، فيها شوية تضييق، استحملي! وربنا سبحانه وتعالى لما فعل ذلك ما خلاهوش بلا ثواب، يبقى خلاكي لو التزمتي الزي الشرعي تثابي، ولو التزمتي طريقة الكلام المنضبطة التي لا تثير شهوة الرجال تثابي، تثابين على ذلك، وكل بقى الحاجات التانية دي خلاص.

يعني نساء أمهات المؤمنين ونساء الصحابيات كانوا يجوا يمشوا، يمشوا لازقين في الجدر، الجلابة الجلباب بتاعها ولا العباية تعلق بالجدار، لازقة في الجدار، ما تزاحمش الرجال كده في نصف الطريق. طب دول اللي هم مين؟ اللي هم أطهر قلوب بينهم النبي عليه الصلاة والسلام، طب دول لابسين إيه؟ أستر الثياب، ومع ذلك شوفوا الحرص على هذه المسألة. البنت ما تحطش صورتها على الفيسبوك ولا على إنستغرام، ما تعملش كده. طب ده أنا لابسة زي شرعي؟ برضه ما تحطيش، أنت وأنت ماشية في الشارع ما فيش حد هيعرف يعمل زوم على وشك ويقعد يبص في وشك أو زوم على عينيكي ويبص لعينيكي، إنما صورتك اللي أنت حاطاها لا، بيتعمل عليها زوم عادي، فما تعمليش. فضلا عن بقى فيديوهات وفلوجات، ما يصحش، وأنا ما أظنش يعني يكون في حد من النساء هنا بيعمل ده، يعني ما أظنش، زي ما أظنش أن في رجاله بتبص، احنا هنا قاعدين مش كده، فما أظنش ده، يعني بنقول لغيركم يعني اللي هيسمعوا بعد كده الدرس، مش أنتم خالص.

وفي الحديث أن النبي صلى الله عليه وسلم قال: «ما تركت في الناس بعدي فتنة أضر على الرجال من النساء». فيبقى الإنسان ما يقربش من الفتنة، مش كده؟ مش تروح تتجوز تجيب الفتنة معاك في البيت. مالكش دعوة أنت يا شيخ، أنت خليك أنت على جنب دلوقتي.

وقال بعض الصالحين: لو ائتمنني رجل على بيت مال لظننت أن أؤدي إليه الأمانة، ولو ائتمني على زنجية أخلو بها ساعة واحدة ما أمنت نفسي عليها. وهذا من صدقه مع نفسه، الواحد يبقى عارف ضعفه بيبقى قدام إيه، ما يقولش بقى أنا جدع. ﴿وَمَن يَسْتَشْرِفْ لَهَا﴾ [البخاري: 6495] -ها؟ هي إيه دي اللي أنا بتكلم عن إيه دلوقتي؟ الفتن- يستشرف لها. اللي هيقول بس عاوز أبص كده، هيضيع، هيتدمر. ﴿إِذَا ظَهَر وَأَنَا فِيكُمْ فَأَنَا حَجِيجُهُ، وَإِلَّا فَكُلُّ امْرِئٍ حَجِيجُ نَفْسِهِ﴾ [مسلم: 2937]، هو مين ده؟ مسيح الدجال فتنة عظيمة، فإن الرجل ياتيه ويظن أنه مؤمن فيفتن به. فما تقولش أجرب، ما تقولش هدي حلقة للنساء، ما تقولش هدي درس للنساء مباشر والستات تبقى قاعدة قدامي، ما تقولش هفتح الباب لمراسلات النساء، ما تعملش كده، ما تعملش، اقفل كل باب سيؤدي إلى فتنة، خلاص.

قال: وعن النبي صلى الله عليه وسلم قال: «لا يخلو رجل بمراة فإن ثالثهما الشيطان». الخلوة الافتراضية خطيرة جداً يا شباب، الخلوة العادية معروفة أن واحد وواحد يبقوا في مكان لوحدهم، الخلوة الافتراضية أخطر من من حيثين، إيه الخلوة الافتراضية؟ الأول بشات على الواتساب، على الإنستغرام، على على الماسنجر، على الحاجات دي بشات مع واحدة، فدي خلوة برضه بس افتراضية. إيه الخطورة بتاعتها؟ أول حاجة أنها عابرة للمكان، يعني إيه؟ يعني مش مهم هي فين وأنت فين، فهي مش لازم بقى إيه تكلف أن أنزل ونتقابل ونروح ونيجي ويبقى في خطر أن خالص، فهي أخطر من هذه الحيثية، وتاني حاجة -وطبعا أبعد عن الشبهة- تاني حاجة السهولة وطول الوقت، يعني ما فيش عمر ما الخلوة العادية تعرف تخلو بمراة، الخلوة العادية وقت قد الخلوة الافتراضية، فاقفلوا الأبواب دي، اقفلوها تماما، هنروح النار. فخلي بالكم.

قال: لا يخلو رجل بمراة فإن ثالثهما الشيطان. وقد ينتهي الإفراط في هذه الشهوة حتى تصرف همة الرجل إلى كثرة التمتع بالنساء فيشغله عن ذكر الآخرة وربما الواحش. وقد تنتهي بصاحبها إلى العشق، وهو أقبح الشهوات وأجدرها أن يستحيا منه، أن الإنسان يبقى ضعيف قدام امرأة بعينيها ها ضعفا شديداً لدرجة أنه يضيع بقى دينه ويضيع دنيته، ولو بعدت عنه يصيبه وممكن يصل إلى الموت، وأخبار العشاق معروفة وأشعار العشاق معروفة. مين امرؤ القيس قال إيه؟ فاطم مهلاً بعد هـذا التدللِ وإن كنت قد أزمعتِ صرمي فأجملِي أغركِ مني أن حبكِ قاتلي وأنك مهما تأمري القلب يفعلي أغركِ مني أن حبكِ قاتلي وأنك مهما تأمري القلب يفعلي؟ هو طبعا كان هجاص يعني، امرؤ القيس كان شاعر جاهلي إيه؟ يقابل دي يقول لها شعر، ويقابل دي يقول لها شعر، والست تحب تسمع ده، أنا هموت! ماشي، نسمعك اللي تحبيه. بس ده موجود؟ آه، موجود، يعني سيبك من امرؤ القيس بقى كان كده ولا إنما كان موجود.

ماشي. طيب. قال: وأجدرها أن يستحى منه العشق، وقد يقع عند كثير من الناس عشق المال والجاه واللعب بالنرد والشطرنج والطنبور، إلخ من أدوات اللهو ونحو ذلك، فتستولي هذه الأشياء على القلوب فلا يصبرون عنها.

القاعدة اللي جاية قاعدة مهمة جدا يا شباب في التعامل مع هذه الشهوات، قال: ويسهل الاحتراز عن ذلك في بدايات الأمور، فإن آخرها يفتقر إلى علاج شديد. فتبقى ترى الفتنة وهي مقبله -دي بس هي عاوزه تسالني عشان أنا الشيخ، لا- ليه؟ يرى الفتنة وهي مقبله، أصل هي متأثرة بصوتي، فبعتت قالت: جزاك الله خيراً. ما فيش ترى الفتنة وهي مقبله، أصل زميلتي في الكلية، أصل بنت خالتم، أصل بنت عمتي! اقفل الأبواب دي تماما، ليه؟ بعد شوية هتتبقى ممكن عاوز ترجع وندمت.

مش هتعرف ترجع. وقد لا ينجح هذا العلاج، ومثاله من يصرف عنان الدابة عند توجهها إلى باب تريد دخوله، لو تخيلت كده معاك دابة؛ حمار -أعزكم الله- حصان، وعاوز يدخل في حارة ضيقة يا دوبك على قده، أسهل شيء إنه قبل ما يخش الحارة تعمل إيه؟ اللي جام يمين سنة، شمال سنة، ويتحود، سبته يخش ما بيرجعش هو، مرشدير الحمار! ما تقعد بقى تشده من ديله عاوز تطلعه مش عارف تطلعه، وهو مش عارف يلف، هو كده!

مثاله من يصرف عنان الدابة عند توجهها إلى باب تريد دخوله، فما أهون منعها بصرف عنانها! ومثال من يعالجه بعد استحكامه، مثال من يتركها -يعني يترك الدابة- حتى تدخل الباب وتجاوزه، ثم يأخذ بذنبها يجرها إلى وراء، وما أعظم التفاوت بين الأمرين، والله أعلم. أقول قولي هذا وأستغفر الله العظيم لي ولكم.

سؤال من فضل حضرتك: قلت في حلقة من الحلقات يجوز قيام الليل بعد المغرب، وأنه أثوب -أثوب يعني ما فيش الف بس يعني- هل معنى ذلك أثوب من القيام في الثلث الأخير؟ هو أنا قلت فين إنه أثوب؟ أنا قلت اللي بيضيع عليه قيام الليل، هديكم نصيحة، ده اللي أنا قلته: صلوا بين المغرب والعشاء في النص. قلت مش هو القيام اللي أثوب من حيث كونه قياماً، قلت إن ده عبادة في زمان غفلة، ده اللي أنا قلته، فتكون أثوب من هذه الحيثية؛ يعني من حيث أنها عبادة في زمان الغفلة بس. إنما أي ليل آخر هتراه أثوب أنت بنصوص الشرع برده هتلاقيه عبادة في زمان غفلة، يعني تيجي تقول إيه ثلث الليل الآخر أو نصف الليل، هتلاقيها برده وقت غفلة برده فاهمين. إنما قيام الليل بين المغرب والعشاء، ده ثابت عن الصحابه وعن السلف، يعني ما فيهوش مشكلة خالص إن شاء الله.

يا شيخ، حضرتك سألت مسألة الخلود، ذكرت مسألة الخلود، يعني أمال إيه بقى قول ربنا: ﴿خَالِدِينَ فِيهَا مَا دَامَتِ السَّمَاوَاتُ وَالْأَرْضُ﴾؟ لا، أنا قلت الخلود سياق في الجنة السياق دائم؛ يعني أنت في الأرض الخلود يعني إيه؟ يعني ناس هتموت كنت معاشرها وبتحبها، في الجنة ما فيش ده، اللي عايشين معاك عايشين على طول. يعني هتبتدي تكبر في السن ويصيبك أمراض الشيخوخة، في الجنة ما فيش ده، شباب على طول. يعني هتزهق من التكرار؟ في ناس، مين اللي قال؟ زهير قال إيه: سئمت تكاليف الحياة، ومن يعش ثمانين حولاً، لا أبا لك يسأم! بقاله 80 سنة بقاله كتير عايش، فبيقول لك إيه: سئمت تكاليف الحياة، ومن يعش ثمانين حولاً لا أبا لك يسأم! بقاله 80 سنة عايش، فزهقت بقى الأيام شبه بعض: وأعلم ما في اليوم والآمْس قبله، ولكنني عن علم ما في غد عمي.

فالجنة ما فيهاش ده، ما فيهاش زهق، وما فيهاش حاجة أصلاً شبه الثانية، عارفين كده ولا لا؟ يعني أنت لو أكلت تفاحاية في الجنة، وبعدين اشتهيت تفاح، فجت لك تفاحاية تانية تبقى طعم الأولى لا، أحلى! طب اشتهيت تفاح فجت لك التالتة تبقى أحلى من الاتنين، إلى ما لا نهاية. ﴿وَأُتُوا بِهِ مُتَشَابِهًا﴾ [البقرة: 25]، متشابهاً في الشكل مختلفاً في الطعم، أحد التفاسير اللي أنا بقوله ده، طبعا في تفسير إنه إيه متشابه، شبه بتاعة الدنيا في الشكل لكن طعم مختلف، لكن في تفسير إنه متشابهاً ثمار الجنة؛ يعني شجرة التفاح دي كل تفاحاية بطعم، ما فيش تفاح طعم التانية. فانت هنا ممكن تيجي تقول إيه: أنا زهقت بقى من أكل الكباب والكفته مثلاً، ليه؟ ما اصل كل الكباب والكفته طعم واحد، فاه لو عشت كده شويه تزهق متهيالي يعني، أنا حد جرب؟ في الجنة ما فيش كده، كل حاجة ليها طعم مختلف ماشي. الخلود خلاص، الورق ده برشام ده مش ورق.

واحد بيقول: يا شيخ، أنا كلما دعوت بشيء حدث عكسه. تدعي وأنت قاعد عكس القبلة مثلاً ولا إيه؟ هل يوجد تفسير لذلك؟ ربنا يمكن يكون بيحبك، مش كده؟ أنت عمال تحرجم على هلاك وربنا يمنعك، يبقى تحب ربنا ولا ما تحبوش؟ يبقى إيه: إن من عبادي من لا يصلحه إلا الفقر ولو أغنيته لفسد حاله! تبقى أنت عمال تدعي بالغنى، تدعي بالشغلانة، تدعي بال... وبعدين ربنا يمنعها عنك ليه؟ لأنه عارف انك هتفسد لو بقى معاك فلوس، واحنا بنشوف ده، بنشوف واحد يقول لك إيه: يا شيخ، طول ما أنا معيش فلوس أمسك قرش أبقى شيطان، مش في ناس بتقول كده يا جماعه؟ فربنا يمنعك يصرفها عنك، فانت ما تضايقش قوي، ويظهر إن اللي أنت بتقوله ده من اليأس بس، إنما أنت هتلاقي في دعوات بتتحقق بس أنت ما انتاش شايفها برده ماشي. أو بتدعي بواحدة بعينها ودي لو اتجوزتها هتدمر لك حياتك وأخرتك وهتجننك، فربنا يصرفها عنك مثلاً.

طيب، إيه رأيك في العمل في شرم الشيخ كفن معدات غوص أو مرشد غوص؟ شرم الشيخ، طب الشيخ اللي هناك ده يعني شيخ كويس ولا لا؟ ما تشتغلش في الحاجات دي، ما تشتغلش هناك لا. طبعا الأماكن دي بيبقى فيها كتير مخالفات شرعية من حيث النساء، ومن حيث الخمور، ومن حيث حاجات كتير، يعني كلها أماكن فالواحد يبعد عنها.

ده واحد يعني إيه: بحبك في الله يا شيخ. أحبك الله. طب قعدت لك السؤال أهو عشان ما تقولش الخط ومش عارف إيه، مالكش حجة، بس هو الحقيقه الخط صغير وعينيا مش... طبعا هو تعب وطبع، ويعني بقى لي حوالي سنة ونص وأكثر ملتزم بالصلاة والحمد لله. انت كمان بقى شايف نفسك مش مجاوب، لكن عندي مشكلة إني نفسي أحفظ قرآن ومش عارف أبدا إزاي ولا منين، جربت أحفظ مع نفسي وفشلت. هتفشل، خليك أولاً تروح مكان هو بيقولك، وحطيت نفسي في وسط مقرأة، رحت مرة وشكرا، وكل مرة نفسي نفسي تطلع بحجه مختلفة تمنعني من الحضور، عندي 21 سنة وما حفظتش غير جزئين. أحبك في الله. أحبك الله. أصدق الله يصدقك، دي أول نصيحة. تاني حاجة، كن في صحبة صالحة غير المقرأة، يعني خلي واحد كده يبقى صديق ليك يشدك، ولو لقيت شيخ يبقى شيخ للقران وفي نفس الوقت مربي، يبقى كويس، يعني شيخ مش بس هو هدفه إنه يحفظك قرآن، لا، يهتم بأحوالك، ويهتم بقلبك، ويهتم بتفاصيل حياتك، لو لقيت ده فخليك معاه وما تسيبوش أبدا ماشي.

عايزين رسالة للي ما بيصليش صلاة الجماعة في المسجد تكاسلاً. بعدين بقى الرسالة دي، نبقى نعمل درس عن الصلاة إن شاء الله. أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.