دخولتسجيل الدخول

٨- تابع كتاب رياضة النفس

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذرياته وآل بيته كما صليت على آل إبراهيم إنك حميد مجيد.

أما بعد، قال: "ويعود الطفل التواضع والإكرام لمن يعاشره". طبعاً الطفل يربى ويعود على كريم الأخلاق منذ الصغر، وبعض الناس يغفل هذا فيطلع الطفل عنده مشكلة كبيرة جداً؛ عنده استحقاقية، هو شايف أنه محور الكون لأنه متربي على كده. فلازم نكسر الحتة دي في أولادنا بانه يعود أنه يبقى في الخدمة. الخدمة يعني إيه؟ يعني قاعدين في مجلس وهو طفل صغير خمس سنين سبع سنين، هو متعود أنه هو اللي بيتشال وهو اللي بتجيله الحاجة لغاية بقه، لا؛ قوم وزع على الناس، قوم يلا لم، قوم يلا مش عارف يعمل إيه، فلازم يتعود على ده.

ويمنع أن يأخذ شيئاً من صبي مثله، ويعلم أن الأخذ دناءة وأن الرفعة في الإعطاء، وده يعلمه نظرياً وعملياً. النظري بس ما لا ينجع، سواء في الصغار ولا في الكبار، ما ينفعش المربي سواء لصبيه أو حتى لناس كبيرة يقعد يقول لهم كلام نظري وبعدين يجدوا أفعاله غير كده، فلازم يبقى هو أول حد بيطبق هذا الكلام على نفسه. قالوا: "لا تنهَ عن خُلُقٍ وتأتي مثله، عارٌ عليك إذا فعلت عظيمُ".

قال: "ويقبح عنده حب الذهب والفضة"، واضحة دي. ويعود ألا يبصق في مجلسه ولا يتمخط ولا يتثاءب بحضرة غيره؛ الحاجات اللي ممكن تقرف الناس يتعود أنه يتنزه عنها. طبعاً يا شباب، ونحن بنقول الكلام ده فبنقوله طبعاً للي هيربي أطفال وبنقوله لأنفسنا، للأسف أنا بلاقي حاجات تقرف من بعض الكبار؛ عادي جداً قاعد يلعب في مناخيره ويكور ويرمي في الأرض، يا عم أنت قاعد مع ناس، إيه القرف اللي بتعمله؟ بالذات بقى لو ظاهر عليه سَمْت التدين مثلاً ولا حاجة؛ فاللي بيبقى ظاهر عليه سَمْت التدين بيبقى الناس متصورة أنه عنده شوية معاني مش عند غيره، يعني منها مثلاً أنه بيستخدم السواك. طيب حتى لو مش بتستخدم السواك، ليه أسنانك صفراء؟ وليه الأكل بين أسنانك؟ وليه ما تغسل أسنانك؟ إيه القرف ده؟ السواك طبعاً هيذهب ذلك كله، طيب لا ما بستخدمش السواك وأي حاجة، طيب فين فرشة الأسنان والمعجون؟ فبنلاقي حاجات الصراحة زي دي وتزعل؛ ريحة عرقك، أنا بقول لكم الحاجات اللي بشوفها مش بقول أنها فيكم، يعني بقول عشان ننتبه واحنا مش منتبهين، ريحة عرقك، نظافة الثياب، مش بقول لك غلو الثياب، لا خالص، نظافة الثياب؛ لابس حاجة نظيفة. ما أنت لو الزاهد اللي ما عندوش غير هدبة واحدة لو كده ماشي، نستحمل قرفك ونقول ده راجل زاهد وراجل سايب الدنيا، إنما لا، ما أنتاش كده، فمالهاش حل غير أنك مقرف. اللي بيعمل كده يعني مش يبقى أنت مقرف، فليه تعمل كده؟ فده نعود أولادنا على ده، أن هم ما يبقوش بالشكل ده، ولا يأتوا الأفعال التي تقذر على الناس عيشتها ومجلسها.

ولا يضع رجلاً على رجل، وكذلك يحترم الأب؛ ده معنى برضه بشوفه كتير الحقيقة في البيوت، أنه تلاقي العيل الصغير متربي أنه عادي نايم أبوه دخل يفضل نايم عادي جداً، أمه دخلت عادي قاعد مدد رجله، هو مدد رجله، ما فيش حاجة اسمها كده، الأب دخل اعتدل في الجلسة احتراماً للكبير، ما تصدر لناش عيل مش متربي. هو لو كان في البيت لما أبوه يدخل عليه يلاقيه مثلاً فيعلمه يقول له: اعتدل واحترم الكبير، لما هيطلع يتعامل مع الكبير هيحترم الكبير، أنه ما اتعلمش ده في بيته. طبعاً للاسف بعض المدارس بتعلم القيم التعبانة دي زي المدارس الإنترناشونال، ما أعرفش في مصر كده ولا لا بس كانت جايلي شكوى من مدارس بره مصر، دول خليجية يعني عالية جداً، فبيقول لك عادي جداً المدرس يدخل فيلاقي العيل حاطط رجله على الديسك قدامه، فالمدرس دخل بيتكلم العيل قاعد كده حاطط رجله على البنش اللي قدامه ولا الديسك اللي قدامه وعادي، فالمدرس يدخل وهو دي حرية شخصية فيبتدي الحصة والواد قاعد كده؛ لا، ده لا ينبغي طبعاً.

طب نقوم العيال في الحصة ولا ما نقومهمش في التحية؟ إيه رأيكم؟ أنا بقول ده عشان مشهور في وسط المتدينين أنه ده مخالف للشريعة، ويظهر أنه مش كده. وفي كلام لابن الجوزي وابن تيمية، أولاً إحنا عاوزين نفهم الحديث: «مَنْ سَرَّهُ أَنْ يَتَمَثَّلَ لَهُ الرِّجَالُ قِيَامًا، فَلْيَتَبَوَّأْ مَقْعَدَهُ مِنَ النَّارِ». هنا اللي يسر ذلك، وهل المعنى المقصود اللي هو إذا اللي يقام له عند الدخول ولا اللي يكون جالس والناس قيام حوله؟ فاهمين الفرق؟ أنا داخل من بره فالناس كلها قامت عشان فلان داخل، ولا ده أنا أول ما دخلت فانا هاجي أقعد فكله هيفضل واقف ما فيش حد يقعد بقى خلاص، زي ما يكون في مجلس الملوك أو العظماء الكبار تلاقيه هو قاعد على الكرسي ولا العرش ولا بتاع والناس واقفة ما فيش حد يقعد في مجلسه، فده مما قيل برضه أن دي هي دي الصورة المنهية عنها. طيب إذا قلنا لا حتى القيام عند الدخول، فبعض العلماء زي ابن تيمية وزي ابن الجوزي، وهذا أراه الأوفق لوضعنا دلوقتي، قالوا أنه إذا صار العرف في الناس أنه الواحد لو دخل بيقام له بحيث أنه لو ترك القيام لرأى ذلك من الإزراء به فساعتها يقام ما فيش مشكلة. فالمسألة ما هياش بتضيق اللي عند بعض الناس، طب واحد بيقول لا ما يتعملش، هو موجود، قول موجود يعني برضه مش هنقول أنت مش فاهم، لا قول موجود بس الظاهر لما ننظر في الواقع بتاعنا يظهر أن قول شيخ الإسلام ابن تيمية وقول ابن الجوزي ده الأوفق لينا دلوقتي. الناس الكبيرة في السن لو جيت أنت لو داخل وشاب قاعد ولا عيل صغير قاعد وما قامش ليه عشان يسلم عليه ولا سلم عليه وهو قاعد كده، تبقى مشكلة كبيرة جداً.

من هذه الحيثية لو المدرس عود الطلاب على القيام أول الحصة من هذه الحيثية ماشي ترك ذلك ماشي، لكن لو هيترك ذلك يظهر والله أعلم بس ينبه، ينبه الأطفال أني فاهم كذا، أو أن إحنا هنا في المدرسة لا نتبنى كذا، لكن يا أولاد لو في مجلس في ناس كبيرة لو هنسلم على حد كبير نقوم نقف واحنا بنسلم عليه، يعني ما يربيش الولاد على المعنى ده ويطلعوا بيه يلوشوا في المجتمع أو يزعلوا الناس منهم. يبقى إحنا ما نزعلش يعني لو دخلت الناس ما قامتلكش وأنت متصور أنك في المجلس ده أنت المفروض المصدر والمقدم وكذا، ما تزعلش، تزعل ليه؟ أنت ممكن تزعل أنك تصورت ذلك في نفسك فتقول: هو أنا إيه القلب الخربان ده أني وأنا كوني زعلت لما دخلت بقى أنا كنت شايف نفسي إيه؟ فده اللي تزعل عليه مش تزعل أن هم ما قاموش.

بعض مشايخنا لما يدخل المجلس بتاعه لازم كله يقف، ولما يدخل يبص يمين وشمال يعني مش مثلاً يدخل واللي يلمحه يهزقه، لا يدخل يبص يجيب المجلس لأخره يتأكد أن كله وقف، ودي تربية للشباب، يعني هذا ما نظنه فيه أن هو بيربي الناس، يعني مش حاجة اسمها كده كبير زي صغير حتى لو هو جواه ما فيش معنى أنه يزعل، إنما بيربيك عشان أنت هتطلع تقابل مجتمع، وده معنى لازم المربي ينتبه ليه. في فرق يا جماعة بين العالم أو طالب العلم والمربي، المربي بينتبه لمعاني كبيرة تانية، الفقه كلمة ورد غطاها حلال وحرام وخلصنا، التربية لا معاني زائدة بقى، الحلال ده ممكن نترك منه كثيراً ليه؟ عشان هيعمل مشاكل، فالتربية بيكون لها شوية حيثيات أخرى.

قال: "ويمنع من كثرة الكلام"، يعني الطفل يعود ألا يتكلم إلا جواباً، يقلل كلامه، ويبقى دائماً ما يتصدرش المجلس؛ لأن اللي بيتكلم كتير أول حاجة ممكن يبقى عنده حب ظهور فعاوز هو اللي يتكلم، فيتعلم أنه لا ما ينفعش نبقى كده، تاني حاجة أنه هيغلط كتير، اللي بيتكلم كتير ده غلطه كتير برضه ويزعل الناس منه، فيبقى يتعلم أنه يقلل كلامه ويبقى كلامه جواب، وأن يحسن الاستماع إذا تكلم غيره ممن هو أكبر منه؛ عشان هيستفيد، حسن الاستماع ده معناه خبرات بتنتقل ليك أو نصيحة بتسدى ليك فتنتبه ليها، طب افرض هو متغاظ مني وحسود، هيبقى فيه نقطة صغيرة بيبني عليها الكذبة أو الغل بتاعه، فاهمين مش إحنا قلنا هتاخد عيوبك من كام حد، أربعة منهم الحسود، طب الحسود ليه؟ ما هو ده كذاب وبيضخم المواضيع، يبقى في مواضيع هو بيضخمها، أنت روح ابحث بقى عن النقطة اللي بنى عليها القصة، مفهوم.

قال: "وأن يحسن الاستماع إذا تكلم غيره ممن هو أكبر منه، وأن يقوم لمن هو فوقه"، ماشي ممكن تحتمل معنيين: أنه يقوم يعني لو اللي فوق ده ما فيش مجلس ليه فيقوم عشان يقعدوه مكانه، أو يقوم له لاستقباله ويجلس بين يديه. "ويمنع من فحش الكلام"، فحش الكلام الفاحش هو الكلام اللي فيه إما يكون في سب أو كده أو يكون في تصريح بالأمور التي تُعاب. العرب كانت يمنعوا من فحش الكلام، قلنا لكم من فحش الكلام التصريح بالكلام الذي يستحي منه، والعرب كانت تكني في أمور الجماع ولذلك تجدون عندهم كنايات كثيرة جداً في الحتة دي، يعني يقول لك يسموه جماع، يسموه نكاح، يسموه وطء، يسموه أسماء كتير، وما يتعلق بذلك فيقول لك الذكر، الفرج، والحاجات دي كلها لها ألفاظ صريحة عند العرب، لكن يكنون تجنباً لفحش الكلام. طيب هل في أوقات ممكن نصرح؟ آه، لو مثلاً اللي قدامك هيقام عليه الحد وهو ما يفهمش، ما يفهمش إيه وطء وإيه إنكاح، فهو هيقام عليه الحد فساعتها ممكن تصرح بالألفاظ، تقول له أنت عملت كذا باللفظ اللي هو يفهمه لأن في حد هيقام إحنا ما مفهوم، ففي يبقى ساعتها ممكن نصرح، خلوا بالكم من الكلام اللي أقوله ده عشان الكلام ده بيحل شبهات، ماشي. طيب فهو يتعود طبعاً إحنا ممكن يكون في بيئتنا ما فيش كتير إنما في بعض البيئات وبعض البيوت تلاقي الراجل الألفاظ دي ببقه على طول في البيت، فالواد يطلع زي أبوه بيقول الألفاظ اللي بيسمعها.

قال: "ويمنع من فحش الكلام ومن مخالطة من يفعل ذلك"، فإن أصل حفظ الصبيان حفظهم من قرناء السوء، يبقى دي قاعدة اهي قاعدة في التربية، أصل حفظ الصبيان حفظهم من قرناء السوء. طب إزاي هنحفظهم من قرناء السوء؟ ما نحطهمش في الموطن اللي يغلب فيه قرناء السوء ونحطهم في المواطن اللي يظن فيها قرناء الخير، زي إيه هندخله مدرسة شكلها إيه؟ فالمدرسة الفلانية دي ممكن تبقى عالية صحيح لكن العيال اللي هيبقوا فيها هيبقوا قرناء سوء، هيقولوا تعال نروح الحفلة الفلانية وتعال ندخل السينما وتعال نطلع المكان الفلاني في الساحل وتعال، والعيل نازل من بيت أبوه معاه كريديت كارد في جيبه فمعاه ميزانية مفتوحة يعمل اللي هو عاوزه، فقرناء سوء غالباً يعني، فلا هنحطه في المدرسة اللي الغالب فيها يبقى هيسمع الحاجات اللي إحنا عاوزينه يسمعها، ما تجيش أنت تروح تحطه في المدرسة دي وتقول له أوعى تعمل زيهم يا حبيبي، أنت اللي حطتني في وسط فلان وعلان، هتعقد ابنك، يبقى ده مهم ماشي. وقول مثال بقى في كل حتة بتحط الولد فيها يعني، يبقى أصل حفظ الصبيان حفظهم من قرناء السوء.

ويحسن أن يُفسح للولد بعد خروجه من المكتب في لعب جميل ليستريح به من تعب التأديب. يبقى بعد ما يخرج من الكتاب من حفظ القرآن، يُفسح له أنه يلعب؛ أولاً كما قال لك: ليستريح من تعب التأديب، ويفعل شيئاً آخر، وهو أنه يعمل ارتباطاً شرطياً في ذهن الولد بين القرآن والكتاب وبين الشيء الحلو الذي يحدث، فتلاقيه يحب أن يذهب لأنه عارف أن هذا يؤدي إلى الشيء الحلو؛ فهذا مهم جداً في التربية. عندما تكافئ بعد شيء، يبتدي يرتبط في ذهن الولد أنني عندما فعلت الشيء الكويس كوفئت، فيحب فعل الشيء الكويس.

أمس أنس حضر الخطبة والدرسين، وأنا راجع نكشته فلقيته أعطاني فوائد من الدرس. فأنا عندما أكون مروحاً يكون يوماً صعباً جداً يوم الجمعة هذا، قلت له: يلا ننزل، عاوز تروح فين؟ وقلت له: عشان أنت عملت كذا وكذا، ولقيتك مركزاً واستفدت. جعلني أجيب له أكلاً، أنا قلت الولد سينزل يشرب عصير ولا شيء، فده مهم.

سيدنا الإمام النووي، العيال تلعب، هو عيل صغير، يقعد يعيط؛ لا يريد أن يلعب بل يريد أن يقرأ القرآن. عاوز أعمل فيديو عن ميسي والنووي، وفكرة أننا كيف نرى المواهب عندنا. أنتم عارفين قصة ميسي طبعاً كلكم صح؟ عيل صغير عنده تأخر في النمو، والنادي رأى فيه موهبة، فأخذه وتكفل به. الإمام النووي هذا حصل معه حين كان واحد من الشيوخ ماراً ووجد هذا المنظر، فقال: أين أبو الولد؟ وراح له، قال له: اهتم بهذا الولد، سيكون له شأن. حتى أبوه قال له: يعني أنت منجم؟ قال له: لا، بس اسمع كلامي واهتم بالولد، فصار الإمام النووي.

فنحن محتاجون لهذا على الأقل في أطفالنا والأطفال الذين حولنا، فهي ليست "بزنس"؛ تعال أدّ العيال بكام؟ بكذا. يقف يدرّس العيال، المميّز غير غير المميّز. طيب هذا، هذا حسيت فيه أنه ممكن يجي منه، فأخذه لله، ليس ضرورياً بفلوس، "تأخذ كام في الحصة؟"، يا راجل! "مرتب شهري"، أصل هو يأخذ بالشهر ليس بالحصة. كما قيل: رَوِّحوا القلوب تعي الذكرى. وينبغي أن نعلم، نقف هنا عشان الصلاة ونكمل.

الحمد لله رب العالمين، بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي، وزواجه أمهات المؤمنين، وذريته وآل بيته، كما صليت على آل إبراهيم إنك حميد مجيد.

جئنا بكلام شيخ الإسلام ابن تيمية يقول: وإذا كان من عادة الناس إكرام الجائي بالقيام، ولو تُرك لاعتقد أن ذلك لترك حقه أو قصد خفضه، ولم يعلم العادة الموافقة للسنة، فالأصلح أن يُقام له. مفهوم الكلام؟ فالأصلح أن يُقام له؛ لأن ذلك أصلح لذات البين، وإزالة للتباغض والشحناء. وأما من عرف عادة القوم الموافقة للسنة، فليس في ترك ذلك إيذاء له، واضح الكلام؟ ماشي. وفي كلام ثانٍ لابن الجوزي، ستجدون كلاماً ثانياً في هذه الحتة.

طيب يقول: وينبغي أن يعلّم الولد طاعة والديه ومعلمه وتعظيمهم. يبقى الولد يعلّم طاعة الوالدين والمعلم، وتعظيم هؤلاء. من المشاكل التي تحصل في البيوت أحياناً أن الولد يأتي ويقول: المدرسة ضربتني، المدرس ضربني، فألاقي أمه أو أبوه راح عمل "زعرنة" في المدرسة؛ ابني ما يُضربش ليه؟ ابنك ما يضربش ليه؟ يعني لست فاهماً، حتى لو أنت شايف أن في حاجة مثل كذا، الولد لا يعرف أن هذا حصل. لو شايف أن فعلاً في بَغي زائد من المعلم، أن المعلم يضرب الولد، هذا ما فيه مشكلة شرعية، المشكلة إذا بغى وهو يضرب، ضرب فيه بغي وعدوان. إنما الطفل أحياناً يحتاج أنه يُضرب تأديباً وتعليماً.

فأول حاجة، الوالد يقيّم المسألة، وفي الغالب الست هي التي تُسخن الأب، فلا يُسخن على كلام الست، يقيّم المسألة. ممكن يلاقي أن لا، الولد كان فعلاً عمل ما يحتاج عليه التأديب، والمعلم لما ضرب ما بغى في الضرب وما تعدّى. فساعتها الولد هو الذي أحق أن يقعد يتكلم معه وكذا. طيب، جاء ليقيّم فوجد أن الولد عمل فعلاً الذي يستحق عليه التأديب، لكن المعلم بغى وتعدّى، هنا الحقيقة فيها نظران؛ النظر الأول: أننا لا نريد أن نهدم صورة المعلم عند الولد، وأنه "منين ما ستأتي إليّ ستجدني في ظهرك"، وهذا نظر يستدعي أننا حتى لو سنتخذ إجراءً مع المدرسة فالولد لا يعرف به. وفي نظر ثانٍ: أن الولد ممكن يُكسر، يعني يحس أنه ظُلم ظلماً كبيراً، وعندما جئت لأبي لم يأتِ لي بحقي، فيُكسر، فده يستدعي أنه يعرف الإجراء الذي يتخذه الوالد. فدي محتاجة أن يُنظر أي مصلحة أولى في هذا الوقت. فاهمين يا إخوة؟

استهداء، تسأل ربنا أنه يهديك، تعمل إيه في موقف مثل هذا؟ ومحتاجة استخارة. الحاجات التي أنت ممكن تشوفها بسيطة، هي على نفسية الولد قد تكون كبيرة جداً وضخمة. فمحتاجة موازنات كثيرة، وأنه بغى أنه ضرب مثلاً ضربة زيادة فعلّمت في كتفه، غير أنه بغى، الولد جاء لك ورأسه مفتوحة، أصل الأستاذ مسك رأسي وخبطها، مثلاً يعني، فلا يوجد جواب واحد في هذه المسألة.

أحياناً يبقى لا، الولد لازم يعرف أن هو لما ظُلم ظلماً شديداً الأب كان في ظهره والأب كان مسانداً له، وفي وقت لا، الظلم خفيف، هو صحيح مظلوم، أو ليس مظلوماً، هو يستاهل أنه يُعاقب لكن العقاب فيه بغي وعدوان، لكن ليس خطيراً، والولد نفسيته قوية، أو هو واخذ من الحنان والعطف القدر الكافي الذي يجعله لو أُتي عليه هذه المرة لا ينهدم؛ فساعتها ممكن لا، نربيه، نعظم قدر المعلم عنده ونعلمه معنى أنك عندما أخطأت فهو ده اللي أدى لكذا، فحتى يا ابني لو فيه شوية بغي، فده برضه أنت الذي عملت كذا في نفسك.

أنا أفعل شيئاً ويجيب نتيجة كويسة، أنني أقعد أكلم ابني كثيراً، وبعدين أذهب به هدية للمعلم، ولا أذهب أنا خالص؛ يعني أقعد أكلمه كثيراً إلى أن يبتدي الولد يقتنع أنه فعلاً لا، أنا ما كان صح، ده حد كبير وده حد له قدر، فبعدين أذهب وأشتري له حاجات من البيت، أو يعني ما صدفت هنا اشتريت شيئاً، الصراحة بيبقى عندي دائماً حاجات تصلح كهدايا، وأقول له: تروح تعطيه إياها غداً، وتقول له: أنا آسف، وبابا تكلم معي ولقيت كذا وكذا، وتجيب نتيجة كويسة جداً، وتجيب نتيجة ثانية، أن الولد يبتدي يشيل مسؤولية أنني عملت حاجة فأنا الذي أصلح الحجة؛ يعني مش هنخرب الدنيا، وتعال يا بابا، لا، أنت عملت شيئاً فتعالج الذي فعلته، فدي برضه طريقة كويسة تجيب نتيجة إن شاء الله.

تقديم، بس ممكن مثلاً ما عملش الواجب، ما هو ما عملش الواجب ومقصّر في التعليم، فيها نوع تأديب برضه، هو يكون لأن شخصيته عاوزة تقويم في الغالب، فده برضه نوع تأديب. شيخ، هو كان فيه حكم تقريباً في الموضوع أن يعني حين... للمعلم؟ ما الحكم؟ ذاكر أن كان فيه أن هو ده المعلم بتاعه، حشية له، بيعمل بعد كده زي "مزيح" كده... لا يقبل هدية؟ أيوه، هو لا يقبل وما يقبلش دي بتاعته، إنما أن الولد يقدم هدية دي إيه المشكلة فيها؟ هو يأخذ، آه يأخذ، ما يأخذش ليه؟ سيأخذ سيأخذ ما تقلقش.

على طول مصطلح مثلاً أنك لا ينفع تقدم حاجة لرئيس، يعني ما فيش مشكلة، رئيس بالقوس، إنما أنت لا تقدمها، بس ما يكونش ده "كونفلكت إنترست" (تعارض مصالح) حاجة تانية، إنما ما يبقاش "بايص" (منحازاً) لك أو كذا. الشركات برضه بيبقى "بوليسي" يعني ممكن تعطيه حاجة لحد قدر معين، إذا تجاوزت القدر هذا هو المفروض ما يأخذهاش. طبعاً النية التي تربي عليها ابنك مش أنه سيضبطك بعد كذا، "يا ابني هو ممكن أب يعمل كذا يقول: بص يا لا، أنا سأعطيك الزيتونة، أنت ستروح للم...، ففي الجلسة أعطه هدية، ستشوف لآخر السنة سيكون عاملاً إزاي، فانت كذا يبقى أنت بتدمر ابنك". إنما لا، نحن نعلم الأولاد أنك أخطأت، وده رجل له قدر، ورجل يعلمك، ورجل واقف ينبح صوته عشان تطلع فاهماً، وكلام مثل كذا، فمن حقه عليك أن طالما زعل أن تطيب خاطره، لا دي حاجة ودي حاجة.

قال: وإذا بلغ سبع سنين أُمِر بالصلاة، ولم يُسامح في ترك الطهارة ليتعود، ويُخوّف من الكذب والخيانة. واضح الكلام كله، وإذا قارب البلوغ أُلقيت إليه الأمور؛ تبقى تربية أنه يبقى رجلاً سواء في الأحكام التكليفية أو في أمور الدنيا. نحن عندنا العيل يوصل للـ 20 سنة وهو لسه ابن أمه وابن أبوه، وما يعرفش يشيل مسؤولية وما يعرفش يعمل، صعب، صعبة جداً التربية دي يا جماعة والله، وصعب أن الرجل يسلم هذه الحتة، يعني قيادة الأمور للمرأة؛ المرأة العاطفة تغلبها، فهو في حاجات محتاجة قلب، محتاجة قوة الرجل، محتاجة قلب الرجل. يعني أنتم ستجدون عندما أولادكم يكبرون قليلاً، حاجات لن تحصل غير بالخناق أصلاً.

يعني أنا عاوز أربي ابني أنه يعرف نزل وركب مواصلة، وأنت فاكر دي مثلاً تعدي على الأم كذا، أن يبقى الولد عنده ثماني سنين وتقول له: يلا انزل وتعال أعلمك، في هنا حاجة اسمها ميكروباص وحاجة اسمها أتوبيس، وده الموقف ودي المحطة، الأم لا تستحمل كذا، طب تعال أعلمك كيف تعدي الطريق، الأم لا تستحمل كذا. فلازم يبقى فيه قوة، الرجل محتاج قوة. الذي أقوله هذا كله أنا فعلته وعديت به، فرأيت أن هذا كان يحتاج مني وقفات ساعات.

والابن محتاج هذا، مهند وهو صغير، أظن أول ما ابتدى يعرف ينطق، حفظته رقم تليفوني بلحن كذا بحيث أنه يحفظه، مش سأقوله طبعاً، وكان لسه خمس سنين، قلت له: بص بقى، لو ماشيين مع بعض، هو طبعاً في العادة نحن مع بعض، فجأة ما لقيتناش، فهتروح توقف أحداً وتقول له: كلم لي الرقم ده، وفهمته أن هذا الحد يكون ستّاً مش رجلاً، إلا لو أنت في مكان فيه أمن ولا حاجة فبتروح للأمن، فهمته أيضاً هذه الحيثية. طيب هو الولد، أنا متأكد أنه عندما يتعامل معه كذا، فبدأت أعمل إيه؟ ماشيين مرة مع بعض في حتة وأروح مستخفياً أنا وأمه، ونستخبى عشان هو من أول مرة لن يفعل هذا، وقد كان؛ يقعد يبص ويروح، ما عيّطوش، عموماً حتى الكبير عندما تحصل الأزمة ممكن تبقى أنت عارف الإجراءات التي المفروض تتخذها، لكن وقت الأزمة تنسى، مرة في الثانية لغاية ما يتعود أنه لا، خلاص، المفروض أعمل كذا.

قال: ويعلّم أن الأطعمة أدوية، والمقصود منها تقوية البدن على طاعة الله تعالى. نحن لا نأكل عشان "حلاليف"، لا، نحن نأكل يا ابني عشان يتقوى البدن على الطاعة، يتقوى على مهامه الدنيوية. وأن الدنيا لا بقاء لها، وأن الموت يقطع نعيمها، وهو منتظر الموت في كل ساعة، وأن العاقل من تزود لآخرته. خلوا بالكم، هذا واحد، هذا البلوغ خلاص قرب يبلغ، يعني نحن نتكلم في واحد 11 أو 12 سنة، يبتدي يتعلم هذه المعاني. فإن كان نشوءه صالحاً، ثبت هذا في قلبه كما يثبت النقش في الحجر.

قال سهل بن عبد الله التستري: كنت ابن ثلاث سنين، الحكاية دي كويسة، وأنا أقوم بالليل أنظر إلى صلاة خالي محمد بن سوار، ولد عمره ثلاث سنين، كل ما يقوم بالليل خاله بيصلي، فقال لي خالي يوماً: ألا تذكر الله الذي خلقك؟ قلت: كيف أذكره؟ قال: قل بقلبك ثلاث مرات من غير أن تحرك لسانك: الله معي، الله ناظر إليّ، الله شاهدي. فقلت ذلك ليالي، ثم أعلمته، فقال: قلها في كل ليلة 11 مرة، زود الجرعة، من غير ما تحرك لسانك، اقعد قل هذا في سرك. ولد عمره ثلاث سنين أو أربع، يعني يا دوبك لسه، فقلت ذلك فوقع في قلبي حلاوته. فلما كان بعد سنة قال لي خالي: احفظ ما علمتك ودم عليه إلى أن تدخل القبر. قال: فلم أزل على ذلك سنين، فوجدت له حلاوة في سري، ثم قال لي خالي: يا سهل، من كان الله معه وهو ناظر إليه وشاهد عليه هل يعصيه؟

إياك والمعاصي. قال: ومضيت إلى المكتب والكتاب وحفظت القرآن وأنا ابن ست سنين أو سبع، ثم كنت أصوم الدهر. يبقى عنده ست، سبع سنين، ختم المصحف وبيصوم السنة وقوتي من خبز الشعير، ثم بعد ذلك كنت أقوم الليل كله. طبعاً سهل بن عبد الله التستري أحد الأولياء، أحد الصالحين. شوف بقى بدايته إيه؟ خاله رباه على كده.

قال: فصل في شروط الرياضة يعني المجاهدة: واعلم أن من شاهد الآخرة بقلبه مشاهدة يقين، أصبح بالضرورة مريداً لها، زاهداً في الدنيا. عارفين المشاهد اللي بتتعمل دلوقتي بالـ AI لمكان كله أشجار وأنهار؟ حد شاف حاجات زي كده وتلاقي نفسك قلبك كده أتاخد أول ما تشوفها، وتسرحت معاها، تأخذ يعني حاجة حلوة يعني الجنة، أي حاجة خطرت على قلب بشر، مش في الجنة أصلاً، فيها ما لا عين رأت، ولا أذن سمعت، ولا خطر على قلب بشر. فالـ AI مهما عمل، حتى لو كتبت له أوصاف الجنة قلت له بقى اعملهالي يلا حولها، طالما حولها لك وشفتها، الجنة مش كده.

فتخيل دي المناظر اللي أنت لما شفتها أخذت بلبك، طيب تخيل بقى أن المنظر اللي أنت شفته ده هو ده اللي مستنيك وأنت على يقين: خلاص ده اللي مستنيني. هتعمل إيه؟ هتصبح مريداً له وزاهداً بلاش. تخيل أن أنت جاتلك رحلة مجانية للمالديفز، وما تعرفش إيه المالديفز، دخلت بحثت عليها وشفت بقى إيه الجمال اللي هناك، والأبحر، البحر عامل إزاي، ونقاء المية عاملة إزاي، ماشي، هتلاقي من قبل الرحلة أو من ساعة ما عرفت، حتى لو رحلة كمان أسبوعين ولا ثلاثة، ما فيش حاجة شاغلة دماغك غير اليوم اللي هتسافر فيه المالديفز، وأي حاجة ثانية بتعملها لأنها من ضروريات الحياة لازم تتعمل، إنما أنت شايف كل حاجة بتتعمل هي عوق عن الذهاب إلى، فاهمين عايز أقول إيه؟ يعني أنا مستني اليوم ده، فرق الصبر، فأي حاجة بتتعمل أنا قرفان منها مهما كانت حلوة، لأنك شايفها معوق عن الذهاب للمالديفز. مشكلتنا فين؟ في أن إحنا ما إحناش مشاهدين للآخرة بيقين. من شاهد الآخرة بقلبه مشاهدة يقين، أصبح بالضرورة مريداً لها زاهداً في الدنيا.

فإن من كان معه خرزة فرأى جوهرة نفيسة، لم يبق له رغبة في الخرزة. واضح الكلام؟ فإذا قيل له بعها بالجوهره، أسرع في ذلك. واعلم أن من رزقه الله تعالى الانتباه لذلك، فإن عليه لسلوك الرياضة شرطاً لابد من تقديمه، ومعتصماً لابد من التمسك به، وحصناً لابد من التحصن به. ودول حاجات مهمة جداً جداً الثلاثة دول، اللي عاوز يسلك الطريق لابد له من شرط ومعتصم وحصن.

فأما الشرط فهو رفع الحجاب بترك الذنوب. عاوز تسلك الطريق ارفع عنك الحجاب، ولن يرتفع الحجاب عن قلبك إلا بترك الذنب. يبقى الحجب ﴿كَلَّا بَلْ رَانَ عَلَىٰ قُلُوبِهِم مَّا كَانُوا يَكْسِبُونَ﴾ [المطففين: 14]. يبقى الران اللي بيحصل ده بما كسبت أيدينا، فارفع الحجب عشان تشاهد الآخرة.

وأما المعتصم فشيخ يدله على الطريق، لئلا تتخطفه الشياطين في السبل. وأما الحصن فالخلوة. وعليه من الوظائف، فالخلوة طبعاً، وإحنا دايماً لما نتكلم على الخلوة دلوقتي نقول الخلوة يعني لازم تسيب تليفونك، ما فيش خلوة ومعاك تليفون، التليفون بينك، الدنيا كلها بين إيديك أصلاً، فمحتاجين وقت للخلوة.

حد راح شارع المعز ودخلتم بيت السحيمي وهتدخل الحاجات دي؟ روحوا شوفوا كده الحاجات دي، هتلاقوا في أوض صغيرة، مش فاكر فين كانت في سحيمي ولا في حتة تانية، الأوضة ممكن تبقى متر في متر، حاجة شبه كده في الدور الأرضي. حد شافها؟ حد عارف دي بتاعت إيه؟ دي بتاع، دي بتاعت خلوة الصوفية. المريد كان إذا أتى شيخه يدخله الأوضة دي، يبقى روحوا شوفوها. دخل الأوضة دي ويقعد هنا بقى، يفضل مدة كده في الذكر، قاعد مش مشغول بحاجة بره خالص، هو قاعد في أوضة متر في متر، روح شوف الأوضة قد إيه، أنا يعني، يدخلوه الأوضة ويقفل عليه، وما يبان له أصحاب، كل يوم بقى يشبرق عليه بتمراية كده ولا حاجة، مش عارف بقى كانوا بيأكلوهم إيه، ولا المقدار، بس أظن يعني كان بقى المقدار قليل طبعاً، ويقعد يذكر، يذكر ربنا ويختلي به.

بدعة ولا سنة؟ هو مين قال ما يطلعش الجماعة؟ بس أنت تفترض حاجات ليه ما حدش قالها؟ بقول مين قال أنه بيترك الجماعة؟ أنت افترضت افتراض ذهني ما حدش قاله. يعني يحبسه دي، يعني لو عاوز يعمل حمام هيفضل حابسه في الأوضة؟ ولا مش ماستر، هي مش ماستر، بقول لك الأوضة كلها متر في متر. الخلوة، إحنا قرينا كتاب كامل في العزلة للخطابي، والخلوة فيها لا طبعاً فيها آثار، وفيها كلام عن الأئمة يعني مش عاوز أتكلم دلوقتي عنه بس كتير يعني موجود، الخلوة يعني مش حاجة، ما هياش بدعة يعني، ماشي؟ ولا أنتم عاوزينها بدعة عشان ما تختلوش بربنا؟ ما هو ممكن يبقى كده، يقولك بدعة عشان هو مش عاوز يعملها.

فأنتم تعودوا في وقت كده يبقى لكم خلوة مع ربنا سبحانه وتعالى في المصحف الورقي وأي جهاز يدخلك على النت بره الأوضة خالص، الوقت ده حتى لو أنت بتبدأ وقت قليل ومع الوقت تزودوه، ده وقتك مع ربنا سبحانه وتعالى، أو في ذكر بقى، يعني ورد عالي من الاستغفار، ورد عالي من الصلاة على النبي عليه الصلاة والسلام، قراءة للفاتحة كذا مرة، ولا بدعة؟ عشان بس بنشرح الفاتحة دلوقتي، فالفاتحة ابن تيمية كان بيقعد يقرأ الفاتحة من بعد الفجر لغاية ما ترتفع الشمس.

قال: وأما الحصن فالخلوة، وعليه من الوظائف مخالفة الهوى، وكثرة الذكر، والاقتصاد في الأوراد. كنت عملت بحث على كلمة والاقتصاد في الأوراد دي وجبناها من الكتب الأكبر، وأنا فاكر هنا كان في اضطراب شوية، وبعدين طلعنا لكتاب ابن الجوزي وطلعنا للإحياء عشان نجيبها صح. حد كاتب حاجة بإيده، كنت معاكم أنتم أظن في الدرس بتاع تحت لما كنا بناخذ الكتاب ده، عملناها بس أنا مش كاتب في النسخة دي.

قال: ومنتهى الرياضة أن يجد قلبه مع الله أبداً، ولا يمكن ذلك إلا بأن يخلو عن غيره. بيقولوا ده مقام المشاهدة، ده عندنا من يعبد الله على مقام المشاهدة ومن يعبد الله على مقام المراقبة، يقصد به حديث النبي عليه الصلاة والسلام: «الإحسان أن تعبد الله كأنك تراه، فإن لم تكن تراه فإنه يراك». أن تعبد الله كأنك تراه ده مقام المشاهدة، فإن لم تكن تراه فاعلم أنه يراك ده مقام المراقبة، فمقام المشاهدة أعلى من مقام المراقبة. ليه؟ مقام ده أعلى حاجة أنك دايماً شايف ربنا سبحانه وتعالى في كل شيء، في كل وقت، ده أعلى بكتير، ماشي؟ أو يسموه الشهود.

قال: ولا يمكن ذلك إلا بأن يخلو عن غيره، وده يسميه بعضهم يسميه الفناء، ماشي؟ وبعضهم يقول إنه يسموه نفي الأغيار. ركزوا في الكلام ده، مهم نفي الأغيار، يعني إيه نفي الأغيار؟ ما يبقاش في حد في قلبك غير ربنا سبحانه وتعالى. فما يبقاش في حد في قلبك غير ربنا قصداً، يعني لا تقصد غيره بأي شيء في الدنيا، وما يبقاش في حد في قلبك غير ربنا فعلاً، يعني مهما يحصل في الكون تراه من الله سبحانه وتعالى، هو ده نفي الأغيار.

فاهمين الفرق بين الاثنين؟ مش فاهمين؟ يعني ماشي بالعربية، راح جاي واحد راكب كارو، وراح حك لك جنب العربية كله، فنقول لك مين اللي حك جنب العربية؟ الله، أنت مش شايف لا العربية الكارو، ولا اللي ساق العربية، ولا شايف دول خالص، الله سبحانه وتعالى. خلي بالكم ده مش معناه أن في كل موقف أنا هترك، اللي ب، هتقعد تقول خلاص ربنا، طب إيه حكم ربنا في الموقف ده؟ ممكن يبقى في حكم لربنا في الموقف ده أنك ترفع شكايتك للحاكم، هو ربنا أباح لك ده، وممكن على الوجوب في موطن أن ده لازم يؤدب وكذا وكذا وكذا، ده حكم ربنا، بس أنت ما عملتوش علشان هو عمل فيك كده، لا دي خدت لفة، أنت أولاً رأيت أن هذا فعل الله أجراه على يد فلان، وبعدين تقول طب إيه حكم ربنا في فلان ده أنه يتعمل فيه كذا، فأنا هعمل ده، لأن ده حكم ربنا في فلان، مش ده إنفاذ لغضبي وغيظي، دي حاجة، وبقى اللفة دي هتثمر في قلبك معنى آخر وهو: طب هو أنا ليه؟ ده خلاص ده في الشهود، ده في عالم الشهود، اللي هو حد حك حاجة فكده، إنما ليه أنا؟ ليه عربيتي أنا بالذات؟ يعني ما الشارع مليان عربيات، فأشمعنى أنا؟

فكنا بنقول أن يخلو عن غيره، أنه لا يمكن ذلك إلا بأن يخلو عن غيره، وسميناه نفي الأغيار. فنفي الأغيار أنك تنفي الأغيار قصداً في قلبك قصداً، لا نقصد إلا الله، وتنفي الأغيار فعلاً وإيجاداً، يعني لا يوجد شيء في الكون إلا من الله، ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. وده هيخليك تبص للموضوع بمنظور آخر، أشمعنى أنا اللي يحصل فيا ده؟ مش إشمعنى يعني اعتراض، يعني إيه الحكمة؟ في عربية قبلي وعربية بعدي ليه أنا اللي اتخبطت؟ ليه؟ ما هو ما فيش حاجة في الكون بتحصل عبثاً، متفقين على دي ولا الكون ماشي بالعبث؟ كل شيء ليه حكمة، قل بقى مثل ذلك في كل شيء.

هنا في معنى دايماً بيعمل إشكال لأن أنا بركز على حاجة وبسيب حاجة عمداً، بقول أنه بذنبك فروح استغفر، فتلاقي بعض الناس يعمل لها إشكال ده، وتلاقيه معلقين يقولك يعني هو لما الصحابة حصل فيهم، لما النبي حصل له مش عارف إيه عليه الصلاة والسلام، هو ممكن يبقى اللي بيحصل رفع في الدرجات ولا لإشكالنا؟ يعني إحنا أمثلنا، إحنا بقى الأولياء اللي لما بيحصل لهم كده بيبقى رفع في درجاتهم؟ ولا إحنا الأقرب لينا الحالة الثانية اللي أنا بتكلم فيها؟ ما هو أنا مش، أنا أبقى مجنون لو قعدت كلمت واحد غائب، فاهمين أقول إيه؟ الأولياء فين دلوقتي؟ مين هنا ولي عشان أكلمه وأقول له ده رفعه في درجاتك؟ أنا بكلم أمثلنا من الملوثين بالمعاصي، فبقول له روح استغفر، فيقول ممكن يبقى رفعة في درجاتي، أنت حر، أنت شايف كده، ده بقى ده معنى ثاني بقى هقوله دلوقتي، اللي هو من رأى ذلك، ده أحرى به أنه من ذنبه أصلاً، أنتم فاكرين يا جماعة الولي اللي هو ولي بيبقى شايف نفسه حاجة؟ الولي ده مش شايف نفسه حاجة أصلاً، فطب أنا، لا اللي يقعد يجادلك بيقول لك هي ممكن يبقى رفعة في درجاتي، أقول له خلاص أنت حر، رفع في درجاتك أنت حر، أنا بالنسبة لي أنا بشوف رسالة ربنا ليا روح استغفر، أنت مذنب، أنت عاصي، لكن لا يخرجك إلى القنوط طبعاً، ماشي تبقى يائس، اللي بيبقى كده هو ده اللي أقرب أنه يبقى رفع في درجاته أصلاً، أنه أنا شايف نفسه كامل، وأنا بتاع ذنوب، وأنا عملت إيه يعني عشان يحصل فيا كذا، فاهمين حاجة؟ وده اللي بعضهم يشير إليه في قوله: ﴿قُلِ اللَّهُ ۖ ثُمَّ ذَرْهُمْ فِي خَوْضِهِمْ يَلْعَبُونَ﴾ [الأنعام: 91]. أي حاجة تحصل قل الله، ثم ذرهم في خوضهم يلعبون، اللي يقول بقى أصل دي أمريكا وأصل ده فلان وأصل ده مكر كذا، قل الله، ثم ذرهم في خوضهم يلعبون.

عاوز بقى يشوف الأسباب ويعيش مع الأسباب وهو حر، إنما أنت قل الله. طب إحنا كده مغفلين يعني ما ناخدش بالنا؟ ما حدش قال كده، هتلاقي أمر ربنا، شوفوا اللفة بقى، أمر ربنا أنك تبقى شايف الأسباب وبتعرف تتعاطى مع الأسباب، بس ما أنت شايف أن الأسباب هي المؤثرة يعني في الكون وهي اللي عملت ده من غير ربنا، لا.

يبقى أول حاجة تجد قلبك مع الله أبداً، ده عند القوم منتهى الرياضة أصلاً، منتهى المجاهدة، اللي هو دايماً يبقى في حال الشهود، ده يعني ده مش اللي حد بيعرف يوصل له، يعني ده الواحد بقى يعني واحد في كل كم 100 سنة يعني نلاقي واحد كده في حالة الشهود دائماً، ده حاجة عالية جداً، يعني ما أقصدش كل كم 100 سنة، يعني بس ده نادر ده كالكبريت الأحمر. وده مش هيحصل غير بنفي الأغيار، أن القلب يخلو عن غيره ولا يخلو إلا بطول المجاهدة. يبقى عاوزين ندرب نفسنا على ده المعنى اللي دايماً بنسمعه كتير، اللي هو معنى إيه نفي الأغيار قصداً؟ اللي هو يقول لك إيه الإخلاص ودفع الرياء، ده بنسمعه كتير ومش ده المعنى اللي هم عاوزينه، يعني هم دايماً يروا أن المعنى الأسمى هو المعنى الثاني، وأن المعنى الثاني لو تحقق، الأول ده بيتحقق تبعاً. أنت أصلاً واحد مش شايف غير ربنا، هتقصد غيره إزاي؟ هو إيه يا جماعة اللي بيخلينا نقصد غير الله؟ رجاء ما عند غير الله، صح؟ فإذا أنت واحد انتفى عندك رؤية غير الله أصلاً، أنت مش شايف غير ربنا، هتروح تقصد حاجة منه؟ فهتلاقي لوحدك ما فيش إخلاص إيه ورياء إيه.

فهذا منهاج رياضة المريد وتربيته لو هي معطوفة على الرياضة في التجريد، فأما تفصيل الرياضة في كل صفة فسيأتي إن شاء الله تعالى.

ما هو التربية برضه نوع من رفعة الدرجات؛ يعني أنت في الآخر بتتربى ﴿وَلِتُصْنَعَ عَلَىٰ عَيْنِي﴾ و ﴿وَاصْطَنَعْتُكَ لِنَفْسِي﴾ بحاجات شبه كده، فبترتقي. يعني دول معنيين حاضريني دلوقتي.

كنت عايز أقول حاجة ونسيتها، ماشي. حد عنده سؤال تاني في اللي إحنا قلناه؟

قول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك. السلام عليكم ورحمة الله.