بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذرياته وآل بيته، كما صليت على آل إبراهيم، إنك حميد مجيد. أما بعد:
فصل في رياضة الصبيان في أول النشوء، وقلنا إنه فصل مهم وفيه الاهتمام بالنشء وبالطفل منذ الصغر. ولو نحن نتكلم عن الأخلاق والآداب وآفات القلوب، ففيه إشارة إلى أن هذا الأمر نبدؤه مع الطفل منذ الصغر؛ لأن بعض الآباء لا ينتبهون لهذه الأمور مع الصبيان. تلاقيه يدفع أموالاً كثيرة ليدخله مدرسة إنترناشونال أو مدرسة خاصة، وبعدين أموالاً في الدروس، وفي التمارين، وفي المشاوير، لكن لا ينتبه أنه يربي ولده على الأدب أو على حسن الخلق، أو يبتدي يراقب ابنه علشان لو ظهرت فيه آفة قلبية يعالجها.
قال: اعلم أن الصبي أمانة عند والديه، وقلبه جوهرة ساذجة وهي قابلة لكل نقش. فإن عود الخير نشأ عليه، وشاركه أبواه ومؤدبه في ثوابه. إذا عودت أيها الولي، أو أيها الأب، أو أيتها الأم، ولدك الخير وحملته عليه، نال لك من ثوابه شيء، وسيبقى هذا كله في ميزان حسناتك. وأعرف من الآباء من كان حريصاً على أن الفاتحة هو الذي يعلمها لولده، وبعد ذلك نأتي بمن يحفظه القرآن، لكن الفاتحة هو الذي يعلمها له لكي يأخذ ثوابه في كل صلاة؛ لأن الولد سيقرأ بالفاتحة في كل صلاة. فهذا ملمح جيد، أن كل شيء تعلمه لابنك، كلما عمله أو كلما علمه غيره بعد ذلك في أحفادك وذريته من بعده، كله في موازينك أنت. وقل مثل ذلك في الأم وفي المؤدب، وكان موجوداً زمان شيء اسمه المؤدب، نأخذ الابن نوديه عند واحد يؤدبه ويعلمه الأدب، حتى أبناء الأمراء والملوك كانوا يذهبون بهم إلى المؤدبين أو يأتون بالمؤدبين إليهم في القصر.
كان بعض الأمراء والملوك لا يحب أن يجلب المؤدب للقصر، بل ابنه هو الذي يذهب للمؤدب، ليربي في ولده أن العلم يؤتى ولا يأتي، وكان يعظم المؤدب جداً أمام ولده وهو الأمير أو الملك. وبعض الأمراء والملوك كان ربما أرسل ولده إلى الصحراء، يوديه الصحراء يتعلم هناك وسط البدو والعرب؛ ليتعلم الخشونة. فقال: وإن عود الشر نشأ عليه، وكان الوزر في عنق وليه. فينبغي أن يصونه ويؤدبه ويهذبه، ويعلمه محاسن الأخلاق، ويحفظه من قرناء السوء.
ينبغي أن يصان الولد عما يشينه، المكان الفلاني مكان خبيث وما ينفعش الولد يبقى فيه، ما يروحش. سيعيط ويدبدب؟ لن يروح، طبعاً ليس بهذه الكيفية، لأن بعض إخواني نبهني أن في ناس بتسمع دروسك وبتطبق الألفاظ كما هي. لا ينبغي أن أتكلم في كل نقطة بحيثياتها؛ فأنا عندما أقول يعيط ويدبدب لا يعني أن هذا هو الحل الأوحد، لا؛ صبي صغير قد لا تذهب به للمكان الفلاني، لكن قل له: ما رأيك يوم كذا نذهب للحته الفلانية؟ ماشي. فلا تأتي الأم تفعل ذلك والاب يقول لها: لا الشيخ قال يعيط ويدبدب، ففي ناس يفعلون ذلك حرفياً. أنا أقصد أنه حتى لو وصل الأمر لذلك، فيصان عن مثل ذلك.
الهواتف المحمولة الذكية هذه، الصبي يصان عنها؛ ما في شيء اسمه ولد عنده خمس أو ست أو سبع أو ثماني سنين وماسك لي سمارت فون، ما ينفعش الكلام ده. والولد سيعيط ويقرفنا في البيت؟ ما هو أنت عشان تريح دماغك بتدمر ابنك، ما تشغله بالنافع والصالح. النافع ده مش لازم يبقى شيئاً شرعياً، فيه أمور كثيرة تشغل بها ولدك ينتفع بها عقله وينتفع بها بدنه. أما أنك بتدمر خلايا مخه التي لم تكتمل بعد، فالمشكلة أن مخ الولد لم يكتمل وهذه الأجهزة تؤخر ذلك النمو -هذا كلام أطباء وليس كلامي- وربما توقفه.
فالتعرض لمثل هذه الشاشات غلط في الصغر، وفي بعض الدول قوانين صارمة لسن التعرض للشاشات. نحن الولد عنده سبع أو ثماني أو تسع سنين وعنده تليفون وتابلت ويقعد أمام الكمبيوتر، هذا يصان الولد عنه. وتلاقي الأم عشان تسكت الولد أو البنت ترمي له التليفون؛ أسهل حاجة. تقول لك: طب أنا أعمل إيه؟ أقطع نفسي في المطبخ؟ واللي قبلك قطعوا أنفسهم؟ هو كان في تليفونات زمان؟ كل الأجيال اللي فاتت ربت أجيال وطلعت ولا حد قطع نفسه، ولا إحنا اللي مش مستحملين. فالولد يصان عن مثل ذلك، وإن لم نقدر فليكن هناك وقت محدد للشاشة، الشاشة دي مش متاحة كده على طول معه.
وكذلك يصان عن رفقاء السوء. طب في السن ده هنعرف منين رفقاء السوء؟ يبقى لازم يكون في لغة حوار بيننا وبين الابن؛ الكلام ده مهم للآباء والأمهات والشباب اللي لسه هيتجوزوا. لا بد من لغة حوار بيننا وبين أبنائنا، وإلا لن نعرف أصحابه بيعلموه إيه أو بيتكلموا في إيه، ونصبح على مصيبة كبيرة. فيبقى في لغة حوار، الولد في مأمن أنه عادي يتكلم ومش خايف من حاجة، لا بجاحة، بل لأن الأب والأم حكماء سيعرفون يتصرفون بحكمة.
يصان الولد أيضاً عن المجتمعات التي ممكن تقضي على دينه. تشوف هتدخله مدرسة شكلها إيه؛ مش أهم حاجة التعليم، التعليم مهم، اللغة مهمة، لا ننكر ذلك إنما ليست في المرتبة الأولى. فلو عرفنا نجمع في مكان واحد بين الدين والأخلاق وهذه الأمور وأنت قادر على ذلك ماشي، ما قدرناش؟ لا، هيقدم الدين وتقدم الأخلاق، حتى لو العلم اللي هيحصّله مش قد كده واللغة اللي هيحصلها مش قد كده، لكن الولد يطلع عنده دين وعنده أخلاق. هذا كله الولد يصان عنه، طيب ما صنتوش؟ هتحاسب، ليست المسألة هيناً. النبي ﷺ يقول: «الرجل راع في بيته وهو مسؤول عن رعيته». مسؤول دي يعني ستسأل عن رعيتك، عملت فيهم إيه؟
فما تيجي تقول يا رب، خلي بالك إحنا بعد ده كله الولد هيطلع صالح ولا فاسد؟ الله أعلم، يعني أنت ممكن تعمل كل حاجة والولد يطلع إيه... لا نشك للحظة أن نوحاً عليه السلام بذل وسعه في تربية ولده، هل حد يشك في كده؟ مستحيل. الولد بقى يطلع إيه بتاع ربنا مش بتاعتي ولا بتاعتك. إنما ليكون لك عذر أمام الله، لما يطلع الولد فاسد ولا حتى يكفر، وتيجي قدام ربنا تقول يا رب بذلت الوسع وعملت كل حاجة، تطلع ولد صالح، هو بقى طالع إيه خلاص. فإنت مسؤول ستسأل، فيبقى ليك جواب، إنما بإيديك رحت رميته في مدرسة المجتمع فيها سيء، وبعدين في نادي المجتمع فيه سيء، وبعدين في سنتر المجتمع فيه سيء، وبعدين فالولد باظ، إيه بقى حجتك أمام الله؟ ما أنت اللي عملت كده، خلي بالك أنت ما رميتوش عشان بخلان، لا ده أنت المجتمعات دي دفعت فيها عشرة أضعاف مال اللي كنت هتدفعه في المكان الثاني أو الأماكن الأخرى التي فيها دين.
أنت فاكر نفسك كده عملت اللي عليك؟ وأديت رسالتي في الحياة؟ أنا ميت وأنا راضي عن نفسي؟ راضي عن نفسك وأولادك ما بيركعوهاش؟ أولادك زنوا؟ أولادك بيشربوا مخدرات؟ راضي عن نفسك فين؟ أصل دخلتهم المدرسة اللي بالرقم الفلاني؟ المدرسة والجامعة اللي بتاخد المصاريف بالدولار؟ فإنا كده مرضي؟ لا، أنا عملت أنا أديت رسالتي، هي دي رسالتك؟ دي مش رسالتك. رسالتك أنك تخرج ذرية. يعقوب وهو بيموت، إيه اللي همه؟ ما قالش أنا قضيت رسالتي وأولادي دخلوا مدارس إنترناشونال وجامعات من ثلاث حروف، ما قالش كده، يعقوب جمع ولاده وقال لهم: ﴿مَا تَعْبُدُونَ مِن بَعْدِي قَالُوا نَعْبُدُ إِلَٰهَكَ﴾ [البقرة: 133]. هو ده اللي شاغل يعقوب عليه السلام. فهي دي القضية التي نحيا لها، قضية تعبيد أنفسنا أولاً ثم تعبيد الذرية. ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاريات: 56]. فدي القضية التي نحيا من أجلها، والقضية التي نربي عليها أولادنا.
بهذه العقلية ستجد بقى نفسك تفكيرك يختلف تماماً، سواء في مدرسة سواء في جامعة سواء في أي مكان سيكون فيه ابنك، هيبقى الهدف الأول الدين والأخلاق. طيب هل ده معناه أنني أدعو إلى ألا نهتم بالتعليم؟ ما حدش قال كده. ما نهتم باللغة؟ ما حدش قال كده. لا قلت ده ولا قلت ده، عشان بس الكلام ما نحملوش فوق ما يحتمل، لكن إيه الأولويات؟ أنت لما بتيجي تقول: أنا عاوز في المدرسة أربع أو خمس حاجات أتمنى يكونوا في مدرسة ابني، بتضع أولويات. بحيث إنك لقيت رقم واحد واثنين وثلاثة ممكن تتغاضى عن أربعة وخمسة، طب لو لقيت أربعة وخمسة بس واحد واثنين وثلاثة مش موجودين، مش هتروح المدرسة دي؛ ليه؟ لأنك حاطط واحد واثنين وثلاثة أولوية. فالدين فين بقى في هذا الترتيب؟ الأصدقاء بيوتهم شكلها إيه؟ أنت تدخل مدرسة بالشكل الفلاني، فمتوقع غالب الظن أن أصدقاءه اللي معه في الفصل بيوتهم لها شكل معين، لهم تنشئة معينة، لهم دماغ معينة، لهم ألفاظ معينة، لهم مساحة من السماح أنهم يعملوا شوية حاجات، وهكذا.
يصان ويؤدب ويهذب، أنت دورك مش تاكل وتشرب وتعلّف، إحنا هنا مش بنربي -أعزكم الله- أشياء، إحنا بنربي بني آدم، ومش بس بني آدم، إحنا نريد أن نربي رجلاً من المؤمنين: ﴿رِجَالٌ صَدَقُوا مَا عَاهَدُوا اللَّهَ عَلَيْهِ﴾ [الأحزاب: 23]. فيبقى عاوزين نؤدب ونذذب ونربي، مش بنعلّف. الأب ما هو مكنة إيه تي إم، الفلوس اللي عاوزينها تحت أمركم وكده هو شايف أنه أدى اللي عليه، ما يصحش. والأم ما هياش واحدة بتعمل الغداء والفطار وشكراً على كده، فيطلع الولد خاوي، ما فيش معاني جواه، ما عندوش معاني عايش عشانها.
قال: ويعلمه محاسن الأخلاق، وده اللي إحنا المفروض نعمله في الكتاب ده، ويحفظه من قرناء السوء -اتكلمنا عنها من شوية- ولا يعوده التنعم. ودي مهمة، ألا تعود ابنك الدلع والترف، لا يعوده التنعم؛ ليه؟ علشان أول حاجة لو تعود الولد ده، وبعد كدة لو ضاقت به الحياة هيعمل إيه؟ يا إما هيمد إيده للحرام لأنه مش متعود يعيش في مستوى أقل، يا إما يسخط نعم الله عز وجل ويخرج إلى ما لا يرضي الله عز وجل من التسخط والتضجر والاعتراض على مقادير الله، يا إما يصاب باكتئاب. وده كله ليه؟ عشان أنت من صغره معوده الدلع، وبرضه شايف أن دي رسالتك؟ لا يا لا، دي مش رسالتنا يا جماعة كآباء. يعني أبقى معايا وأبخل، أنت مش بتبخل، ده مش بخل، ده تربية. زي سيدنا عمر كده وقلنا المثال، أو كلما اشتهيت اشتريت؟ ما هو ده كان بيقوله لمين؟ لابنه، لا ابنه شاري حتة لحمة، قال له: إيه ده؟ قال له: لحمة اشتريت لحمة، فرحت اشتريت حتة لحمة. ما قالوش بقى أنت مضيع فلوسي، لا، يعني مش بيفكر في فلوسه، أو برضه ما قالوش بالهنا.
عمر ضربه بالدرة، قال له: كلما اشتريت، اشتريت إيه الدلع ده؟ أنت كل ما تشتري حاجة يبقى لا يعوده التنعم. وهنا بعض العلماء تكلم في هذه المسألة ببعض التفاصيل، يعني لا يعوده التنعم؛ قال لك مثلاً ما يعوده إنه ينام على السرير أو على مرتبة، لا يعوده إنه ينام على الأرض أحياناً، بحيث إنه يعرف لما يجي وقت يضطر إنه ينام على الأرض، جسمه يعرف ينام على الأرض. إيه ده؟ هو في حد ممكن ما يعرفش ينام على الأرض؟ آه، في ناس ما تعرفش تنام على الأرض، ليه؟ ما تعودتش. فقالوا إن الطفل يعود أحياناً ينام على الأرض.
وقالوا من الأمور التي ذكروا بعض تفاصيلها، ممكن الناس تشوفها جديدة شوية، إنما هم ذكروا ده في الكتب: قالوا إنه لا يعوده الإيدام. إيه الإيدام؟ قلنا الغموس، أي حاجة بتتاكل بعيش اسمها إيدام، وضربنا أمثلة عشان بس ما تفتكرش الحاجات اللي لا، حتة جبنة دي اسمها إيدام، شوية فول اسمهم إيدام، أي حاجة بتاكلها بعيش اسمها إيدام. فقالوا إنه لا يعوده الإيدام، أمال هياكل إيه يعني؟ أحياناً عادي جداً، إيه جعان؟ عندك حتة عيش اهي، روح كل حتة العيش اللي في المطبخ دي وخلاص. يبقى الولد، طب إحنا بنقول على طول بناكله ده؟ لا، بس يبقى عنده قابلية إننا ممكن عادي جداً ناكل ده، ما فيهاش مشكلة، إن أحياناً ممكن ناكل كده.
ماشي، أو مش لازم بقى حتة عيش، يعني ممكن اللي متعودين كل يوم بياكلوا نمط أكل معين، فلا هنكسر ده، يبقى إحنا عندنا يومين في الأسبوع، ثلاث أيام، أي كان بقى، كل واحد برضه بالتدرج. يعني ما تسمعش كلمتين تروح تسخن وتطلق، واحدة واحدة بهدوء، يبقى بس المعنى في دماغنا، يبقى نوصل ليومين ثلاثة، هناكل شوية رز مثلاً. للي متعود أكثر من كده ممكن يقول لك إحنا كل يوم بناكل، بس هو شوية رز، ما هو الناس برضه درجات، يعني ممكن يبقى في حد هو شوية الرز ده حلم بالنسبة له، أنا بتكلم على اللي متعود على أكثر من كده، اللي بقى متعود على الرز يشرب مية.
قال: ولا يعوده التنعم، ولا يحبب إليه، طبعاً ده كله عشان معطوف على "أن يصونه"، فكله مفتوح؛ قال: ولا يحبب إليه أسباب الرفاهية. هو في فرق بين دي ودي؟ آه، أنا ممكن لا أعود ولدي التنعم، لكن أحببه في أسباب الرفاهية. أنا مش معوده على التنعم، لكن كل ما أجي أتكلم على الدنيا يلاقي عينيا بتلمع، يحس بحبي للدنيا وأسباب الرفاهية في شكلي وفي عيني، وحتى لو أنا مش معيشه الحياة دي، أو كل ما يجي يقعد جنبي يلاقيني بسكرول على الفيسبوك ولا على الإنستغرام ولا غيره، فعمال أقلب في بتوع الأثاث ولا بتاع الموضة العربيات، فالولد هينشأ على إيه؟ "وينشأ ناشئ الفتيان منا على ما كان عوده أبوه". بيشوفك بتسكرول على الحاجات دي، هيروح هو يسكرول على الحاجات دي، فإنت كده حببته في أسباب الرفاهية.
أو كل ما تيجي تتكلم عن حد بإعجاب وانبهار يكون نموذج دنيوي، يبقى فلان اللي معاه فلوس قد مش عارف إيه، فلان اللي ساكن في الحتة اللي عاملة إزاي، فلان وفلان، فإنت كده بتعمل إيه في الولد؟ بتربي جواه إن هم دول القدوات. خلي بالك، مش بقول إن هم دول مش قدوات، يعني ممكن يبقى واحد غني وقدوة، راجل دين، بس إنت ما ربيتش جواه إنه قدوة عشان الدين، ده إنت حتى لو حد كده متدين تقول له إيه ما شاء الله، شفت بقى معاه إيه وإيه وإيه وإيه وإيه، وفي نفس الوقت متدين، بتيجي كده متدين اللي هو يعني، فالولد هو خلاص شاف إن هو الأساس هي الحاجات دي، فلو معاها دين يبقى خير وبركة.
يبقى لا يحبب أسباب الرفاهية. من الحاجات برضه اللي ما تحببوش، يبقى إحنا نمنع الحاجات دي من الولد، ما نعملهاش قدامه، وإحنا برضه ما نحبش، يعني ما نعملهاش قدامه ولا من ورائه، إحنا المفروض ما نحبش إحنا كمان أسباب الرفاهية، بل نبغض له ذلك. طيب ليه نبغض؟ لأن الغالب في البشر ما ذكره رب البشر اللي هو أعلم بالبشر: ﴿كَلَّا إِنَّ الْإِنسَانَ لَيَطْغَى * أَن رَّآهُ اسْتَغْنَىٰ﴾ [العلق: 6-7]. أول ما الإنسان يحس إنه استغنى، ومعاه فلوس، ومعاه الكريديت كارد، ومعاه العربية تحت البيت، ومعاه الحساب في البنك، ومعاه، كلا إن الإنسان ليطغى، يصيب الطغيان كل البشر، لا مش كل البشر طبعاً، لكن معظم البشر كده، الاستغناء يأتي بالطغيان. فيبقى إحنا لا نحب أسباب الرفاهية، ولا نحببها لأبنائنا، ونعلمهم كده.
قال: ولا يحبب إليه أسباب الرفاهية فيضيع عمره في طلبها إذا كبر. حببت له بقى أسباب الرفاهية، الولد يكبر يضيع عمره في إيه؟ في تحصيل الفلوس علشان يجيب الشقة، جاب الشقة واتجوز، يضيع عمره في تحصيل فلوس عشان يكبر الشقة، كبر الشقة يضيع عمره في تحصيل فلوس علشان يجيب مش عارف إيه في الحتة الفلانية جنب الشقة، ويفضل كده عمره ضايع في تحصيل فلوس علشان يحقق أسباب رفاهية، أو جاب الشقة يقوم يضيع عمره في تحصيل الفلوس عشان محتاج نمط أو مستوى تشطيب معين للشقة مش عاوز ينزل عنه، مع إن الدنيا تمشي بأسهل من كده وأبسط من كده، إنما لا أنا متعود على ده، أو حببت ده، حببوني في ده ما كرهوش لي ده، ويفضل عمره ضايع في إنه ينط من أسباب رفاهية لأسباب رفاهية، فيضيع عمره في طلبها إذا كبر.
بل ينبغي أن يراقبه من أول عمره، فلا يستعمل في حضانته إلا امرأة صالحة متدينة تأكل الحلال. الأول إنه يراقبه من أول العمر، يعني هنا يحضرني الموقف اللي بين يعقوب وأولاده، ده في آخر العمر أهو، وفي الأول أول عمر يوسف؛ كان عنده سبع سنين في بعض الإسرائيليات. وبعدين يعقوب، ركزوا بس يا شباب ويا رجالة يا كبار يا اللي بتشتكوا ما عندناش وقت، أولاً يعقوب نبي الزمان، فاهمين يعني نبي الزمان يعني المشاكل اللي على دماغه عاملة إزاي؟ المشاكل بتاعة إيه؟ مش بتاعته الشخصية، مشاكل الأمة، يعني عنده أولاً أتباع وكل واحد من الأتباع له مشكلته الخاصة اللي بيجي يحكيها لنبي الزمان، وعنده أعداء، فإحنا هنا في مناوشات ومكائد، يعني إنت اللي بره باب بيتك يا إما تابع له حق عليك، يا إما كاره مبغض، فأخذ شوية من ذهنك في التفكير هيعمل إيه، طب وهقابله إزاي، طب هدعوه إزاي، ده بره البيت. طب جوه البيت؟ نبي الزمان ده عبادته كده عادية، يعني ركعتين كده ويكروت ولا حاله إزاي مع ربنا؟ فده عاوز وقت برضه مش كده، وبعدين عنده زوجه، عنده كم عيل بقى؟ 12 عيل، مش كده؟ 12 أو 13 كمان، ما هو يوسف واحد، ورأى 11 كوكباً والشمس والقمر مش كده؟ كده 12، وبعضهم قال 13 لأن الـ 11 دول ما كانش ضمنهم أخوه، فـ 12 عيل، أب لـ 12 عيل، دي لوحدها يعني من غير بقى لا يكون نبي زمان ولا القصة اللي حكيناها دي، ومع ذلك مركز لابنه الصغير اللي عنده سبع سنين، وبعدين الولد في أمان إنه يجي يحكي لأبوه لما شاف الرؤية، وبعدين الأب قاعد مركز بدليل إنه بعد الرؤية هيبتدي يقول له نصائح، مش اللي هو الولد قاعد يحكي والأب مش في دماغه، لا ده بعد ما هيسمع الرؤية هيقول له نصائح بعد سماع الرؤية. فإحنا محتاجين يبقى في العلاقة دي بينا وبين أبنائنا.
يبقى يراقبه من أول عمره، فلا يستعمل في حضانته إلا امرأة صالحة متدينة تأكل الحلال، فإن اللبن الحاصل من الحرام لا بركة فيه. فإذا بدت فيه، يعني في الولد، مخايل التمييز، ابتدى يميز، التمييز بيبقى سبع سنين كده، وأولها الحياء، وذلك علامة النجابة، وهي مبشرة بكمال العقل عند البلوغ، فهذا يستعان على تأديبه بحيائه. أول ما الولد يبتدي يميز ويبتدي يتكسف، نستعين على تأديبه بالكسوف؛ إزاي؟ نقول له هو بيتكسف خلاص، فنقول له أنت مكسوف إن الناس تشوفك في الحالة الفلانية، طب وربنا سبحانه وتعالى مش أولى إنه نتكسف منه، فنقوم نربيه.
وأول ما يغلب عليه من الصفات شره الطعام، فينبغي أن يعلمه آداب الأكل، يبقى هو عاوز ياكل كتير، نقول له لا ما فيش حاجة اسمها كده، ما فيش حاجة اسمها تاكل لغاية ما مش قادر، تاكل يا حبيبي تعالى، سيبك من بابا وماما اللي تشوفه ده، ما هو شايف أبوه بياكل لغاية ما، كان في ثقافة كده يقول لك إيه الرجيم يبقى جبنة وبطيخ، ياكلوا جبنة وبطيخ، فكان يقعد يدب الغداء، وبعدين يقول لمراته هات لنا بقى الجبنة والبطيخ، وهو فاكر كده فعلاً، هو فاكر إن هو أما تاكل جبنة وبطيخ هو بيسمع كده كل جبنة وبطيخ تخس، فكان يخلص غداء وبعدين ياكل جبنة وبطيخ وما يخسش، تفتكروا ليه؟
فالولد نعلمه بقى آداب الأكل، آداب الأكل يعني إيه؟ أول حاجة مش هتاكل لغاية ما تشبع غلط، ونعلمه ثلث وثلث وثلث، ونمدح عنده الجسم المتناسق، يعني يبقى شايف إن الجسم المتناسق ده حتى لو مش رياضي بس جسمه متناسق، دائماً نمدح عنده هذا الجسم، بالذات الولاد، البنات ممكن يسمح لها بشيء من البدانة غير المفرطة، إنما الولد لا يسمح له بذلك، ويبقى فاهم إن ده مما يعاب في الرجال. غير بقى بقية آداب الأكل، يعني كل مما يليك، يا غلام سم الله وكل بيمينك وكل مما يليك، فكان الحديث كانت النصائح لغلام صبي.
ماشي، يبقى يعلم آداب الأكل ويعوده أكل الخبز وحده في بعض الأوقات، لئلا يألف الإيدام فيراه كالحتم، عشان ما يتعودش إن دائماً في حاجة جنب العيش، وإن العيش ده مش أكل، هو العيش أكل، إحنا بس انغماسنا الشديد في الرفاهية فإحنا مش شايفين إن العيش أكل، إنما انظروا حولكم إلى إخواننا الذين ابتلوا في بلدانهم وأوطانهم، إحنا دلوقتي لسه شايف من كام يوم صورة لواحد في بلد مجاورة، واقف على صندوق الزبالة وبيشوف أي حاجة تتاكل في صندوق الزبالة، ده مش حد مجنون ولا اللي هم المشردين اللي مالهمش بيوت ولا بتاع، ما فيش أكل في البلد، فواقف على صندوق الزبالة بيشوف أي لقمة عيش مرمية عشان تتاكل.
فمش معنى يا جماعة إننا مغموسين في الرفاهية إن ده العادي، ده مش العادي ولا كانت دي حياة النبي ﷺ اللي هو أكرم واحد على ربنا. طب يعني إحنا بنقول للناس كلوا عيش، مش بنقول، بنقول فهمنا، إحنا بنربي عقلية دلوقتي، يبقى عندنا المعنى ده موجود، إزاي بقى نوصل بشويش خالص على أقل من مهلك، بس المعنى موجود، يبقى عندنا بس هدف إن نوصل لحتة إننا لو ما لقيناش غير عيش هناكل ومبسوطين وراضيين ومتعودين، اتعودنا على ده خلاص، الثقافة دي عندنا. مش عارف حكيت لكم ولا لا قبل كده، أحد المشايخ بيحكي لنا بيقول لنا راحوا رحلة الكلام ده في الثمانينات، بيحكي لنا عن رحلة قديمة طلعوا رحلة وكان معاهم زي شيخ ثاني زيه أو أكبر منه هو اللي كان مسؤول عن الرحلة دي، فكان الشيخ ده بيديهم على الغداء شوية مربى وطماطماية، بس ما فيش عيش، يقول له طب إحنا نحط إيه على إيه، طماطماية وشوية مربى يعني إيه اللي يتحط على إيه؟ يقول له هو ده كلوه بقى كده وما فيش غيره. فـطبعاً ده دلع، إحنا بنقول عيش وطماطم إيه ومربى إيه، اللي عاوز أقوله يا جماعة بس عشان ما نطلعش نصطدم، إحنا بنربي عقلية، عقلية شافت أهداف مختلفة شوية، شافت نمط جديد مختلف في التربية، سواء تربية نفسك قبل تربية ولادك لأننا ما تربيناش كده معظم الناس ما تربتش على كده، فإنت المفروض بقى تبتدي تربي نفسك مع أبنائك على مثل ذلك، إزاي كل واحد أدرى ببيته وأحواله وإزاي ياخد الخطوة دي.
ويبشع عند الولد كثرة الأكل بأن يشبه كثير الأكل بالبهائم، أعزكم الله، فيبشع عند الولد كثرة الأكل. يقولون: اللي بياكل كتير ده مش بني آدم، وقلنا لكم قبل ذلك حين قالوا: الرجل يأكل أكلة واحدة طعام المتقين، يأكل أكلتين طعام المؤمنين، يأكل ثلاث أكلات، قال: قولوا لأهله يبن له معلفًا، ده مش بني آدم اللي بياكل ثلاث مرات في اليوم. من بني آدم هنا بقى؟ فيبقى يبشع عنده اللي بياكل كتير، واللي جسمه مش متناسق، تاني مش لازم تبقى رياضي بس متناسق.
في حديث أم زرع لما جاءت المرأة الأخيرة تمدح ابن أبي زرع مدحته بأنه رفيع، مش كده؟ ولما جاءت تمدح ابنته مدحتها أنها ملء كسائها، والولد قالت: مضجعه كمثل شطبة، المكان اللي بينام فيه. عارفين الحصير؟ لما تشد حصيرة كده تسيب حتة قد إيه، فهي بتقول مضجعه كمثل شطبة، وطبعًا ده مبالغة، يعني مفيش حد بينام في الحتة دي، هي تقصد تقول إنه رفيع جسمه كويس، ويشبعه ذراع الجفرة، يشبع من أقل أكل. ولما جاءت توصف البنت قالت: وملء كسائها، يعني فيها نوع بدانة محمودة مش البدانة المذمومة، وهذا تمتدح به العرب. العرب تمدح المرأة اللي فيها بدانة محمودة، مش اللي تبقى رفيعة، العرب يمدحون ذلك. نرجع تاني للعيال الصغيرة، قال: وبأن يشبه كثير الأكل بالبهائم، فالولد يزعل من ده، ما يبقاش ما يحبش يبقى زي البهائم.
قال: ويحبب إليه الثياب البيض دون الملونة. طبعًا أنا جايب أبيض كده يعني، إنما لو عادت البلد أنها بتلبس الملون عادي يعني، هذا مما يرجع فيه إلى العرف، أحب الثياب إلى النبي صلى الله عليه وسلم القمص، اللي هو ده الجلابية اللي إحنا نسميه الجلابية، أو القفطان في بعض الأماكن، وكان يحب البياض صلى الله عليه وسلم. لكن هل معنى كده أن بقية الحاجات حرام أو مكروهة؟ لا، ماشي إلا ما استثني.
قال: ويحبب إليه الثياب البيض دون الملونة والأبريسيم اللي هو الحرير، ويقرر عنده أن ذلك من شأن النساء والمخنثين، يعني الراجل ما يلبسش حرير، ويمنعه من مخالطة الصبيان الذين عودوا التنعم. يعني أنت هتقول له ما تتنعمش، وإحنا الرفاهية مش عاوزين نتعود عليها، وبعدين تسيبه يا عيني مع العيال يلاقيهم بيتكلموا في حاجات تانية خالص، فيقوم الولد يتعقد، فإنت ما يختلطش هؤلاء.
فيبقى إحنا عندنا مسؤولية تانية يا رجال، وهي مسؤولية إنشاء ذلك المجتمع اللي يبقى فيه الولاد دول. ما هو أنت دلوقتي أنا بربي ابني كده، طب عاوز بقى حد غيري بيربي ابنه كده ما تلاقيش، حتى المتدينين ما تلاقيش حد بيعمل كده ولا في دماغه المعاني دي، يقوم الولد يا عيني يتعقد، شايف نفسه لوحده، أو الأب يضعف، يقول هعمل إيه؟ وممكن الضعف ده يكون في أحيان في مصلحة الولد، ما هو أنت الولد لو اتعقد نفسيًا هيكرهك، وهيكره الدين، وهيكره اليوم اللي جاي، مش كده؟ فمحتاجين الناس تبقى شايلة الهم ده شوية علشان نوجد ذلك المجتمع، يبقى الولاد نعرف نلاقي ناس بتفكر زينا، وناس ولادهم يطلعوا شبه ولادنا، زي ما أي حد بيبقى عاوز كده، عاوز ابنه يبقى في وسط شبهنا، مش كده؟ شبهنا دي في إيه؟ أنا ما بتكلمش في التدين، أنا بتكلم حتى في ثقافة التعامل مع الدنيا بعيدًا عن الدين، ما اتكلمش في دين دلوقتي، يعني إن الدنيا حلوة خضرة، وإن الله مستخلفكم فيها لينظر كيف تعملون، هتعملوا إيه في الدنيا؟ هتتسحلوا فيها ولا هتاخدوا منها قدر ما يوصلكم للآخرة؟
قال: ثم يشغله في المكتب بتعليم القرآن، بتعلم بقى، يظهر القرآن والحديث وأحاديث الأخبار ليغرس في قلبه حب الصالحين. يبقى ابنك بتعلمه قرآن من هو صغير، بتوديه دار تحفظه شوية أحاديث، هتدخله مدرسة، هتروح تدخل مدرسة بتعلمه الحاجات دي، ما يبقاش الدين هامشي في المدرسة. وهذا أول ما تسأل عنه يا جماعة، أنا عاوز واحد يقوم كده يقول لي: آه والله ده أنا كنت فاكر إن أنا لما أموت أقف بين إيد ربنا هيسألني أنت علمت ابنك لغات ولا ما علمتوش لغات؟ ولما دخلته مدرسة دخلته المدرسة اللي بتعلمه الأكسنت الأمريكي ولا البريطاني؟ يعني حد متصور أن دي أسئلة يوم القيامة؟ حد متصور ده يا جماعة أن يوم القيامة هتسأل ده؟ هتسأل عن ده؟ دي مش عينة أسئلة يوم القيامة خالص، تعلمته بأي أكسنت؟ أنت علمت تعليم حكومي ولا إيه جي ولا أمريكان؟ دي مش أسئلة يوم قيامة.
في درسين للمحاسبة هينزلوا إن شاء الله الأسبوع الجاي واللي بعده إن شاء الله، مهمين جدا يتسمعوا. ليه؟ في أول درس كنت بقول لازم نعرف قواعد الحساب يوم القيامة، علشان إحنا خالقين لنفسنا قواعد حساب هنا وفاكرين أن دي اللي هنتحاسب بيها يوم القيامة، وهنفاجأ بقى يوم القيامة بأن في قواعد تانية للحساب. فإنت تبقى مسحول يا عيني، وفعلا مسحول، ويمكن بتتدين عشان تدخل ابنك المدرسة الفلانية، والغريب أنك تبقى شايف نفسك عملت اللي عليك. فأنا لو وقفت كده قلت لك: أنت هي دي أسئلة يوم القيامة؟ يعني أنت لو مت دلوقتي ربنا هيسألك أنت علمته إنجليزي أنهي ليفل وبأنهي أكسنت؟ هي دي أسئلة يوم القيامة؟ يعني أنت متوقع كده؟ طب أنا بهون من ده؟ ما بهونش حاجة عشان ما حدش برضه ياخد الكلام، مش بهون حاجة، بس دي مش أسئلة يوم القيامة خالص.
إنما ابنك اللي ما بيركعهاش، آه هتتسأل عن صلاته، ابنك اللي ما يعرفش حاجة عن التوحيد هتتسأل عن توحيده، هتتسأل. فإنت بإيديك في بقى ناس بتروح تودي مدارس بتدمر الدين، يعني جزء من كيان المدرسة أنها بتدمر دين العيل، والأب تلاقيه فخور بابنه أن هو بيرطن زي الأجانب، اللي هو أي عيل اتولد في البلد بره حتى لو مش لاقي ياكل حتى لو شحات هيتكلم أحسن منه أصلا، يعني هي فكرة أنه حصل اللغة دي أنا مش فاهم يعني إيه الفخر اللي في كده؟ روح للشحاتين اللي في البلد اللي أنت معلم ابنك لغتها، بيتكلموا أحسن منه! إيه القضية؟ يعني أنت شاغل نفسك بحاجة غريبة جدا.
قال: يبقى فيه قرآن، فيه حديث، فيه دين، ليغرس في قلبه حب الصالحين. آه يبقى ده معنى تاني برضه، إحنا هنربي عيالنا على أن هم يحبوا مين؟ يحبوا الفسقة، رموز الضلال في المجتمع، وتلاقي أنت بإيديك تروح رايح مودي الواد يقف جنب فلان الفلاني عشان يتصور معاه، اللي هو رمز من رموز الفسق، أنت بتحبب مين لابنك؟ ولدك يخرج محب للصالحين للناس الدينة بتاع ربنا.
قال: ولا يحفظ من الأشعار التي فيها ذكر العشق. طبعًا مهرجانات دلوقتي وبيدسوا.. ومتى ظهر من الصبي خلق جميل وفعل محمود، وفيه حفلات تكنو، مين بيحضر تكنو هنا؟ مين؟ ما تتكسفوش يا جماعة، عادي، مش عادي طبعًا. إحنا شباب جم قعدوا معايا، وأنا فاكر بقى نفسي إيه، إحنا شباب وفاهم، قالوا لي: أنت إحنا مشفقين عليك والله، قلت لهم: ليه؟ قال: بتقعد تتكلم وتتحمق في حاجات وإحنا ولا في دماغنا الحاجات دي، إحنا معديينها، ده أنت بتقعد تتشال وتتهبد وتقول إباحية إباحية، إحنا الناس بتذني في.. أنت قديم أوي!
فقالوا لي حفلات تكنو، فأنا أول مرة كنت أسمع الاسم، وقعدوا يشرحوا لي إيه حفلات التكنو دي، فقلت لهم معقولة؟ آه والله موجودة. فأنا رحت بحكي لواحد بقول: ده في حفلات جديدة اسمها التكنو، قال لي: آه ما دي أنا بقالي تسع سنين شغال فيها، هو شغال فيها مش بيحضر، وبعدين بقاله تسع سنين، أنا فاكرها حاجة جديدة! فبعدين قعدت مع واحد أكبر مني بـ10 سنين، متدين يعني في الخمسينات، فبقول له تخيل كذا، وكنت فاكرها طلعت إيه من تسع سنين، قال لي: ده وأنا في الثانوي كنت بحضرها، فاتنا كتير!
طيب، يبقى لا يحفظ من الأشعار التي فيها ذكر العشق، إحنا طبعًا نتمنى العيل يحفظ أي أشعار وخلاص، يعني عشق بقى كفر، أو يحفظ له كلمتين لغة وخلاص. ومتى ظهر من الصبي خلق جميل وفعل محمود، فينبغي أن يكرم عليه ويجازى بما يفرح به، يقوم يعظم عنده الخلق ده، ويمدح بين أظهور الناس على هذا الخلق الجميل الذي ظهر فيه، فإن خالف ذلك في بعض الأحوال تغوفل عنه.
يبقى يا جماعة من الأخلاق الجميلة خلق التغافل، اللي هو أنت عرفت أن ابنك عمل كذا مش هين له إني عرفت، هتغافل، ده مطلوب أحيانًا؟ آه مطلوب، لما يكون ابنك أو بنتك حد محترم، بنت دينه، وبعدين شفت منه حاجة، لو هو عرف باطلاعك عليه فيها هيتكسر قدامك، وهو الولد محترم، مش حد وحش، فأنا ما أبينلوش إني عرفت وأعالج بقى من بعيد لبعيد كده. فده يتعمل ده تغافل عنه، وتكلمنا عن خلق التغافل بين الزوج والزوجة بقى في شرح حديث أم زرع، فاللي عاوز يرجع لخلق، خلق مهم، سئل الأعرابي من العاقل؟ قال: الفطن المتغافل، وتسعة أعشار حسن الخلق في التغافل. فارجعوا بقى لحديث أم زرع بين الزوج والزوجة، إنما إحنا بنتكلم مع الأبناء برضه، يتغافل أحيانا عن تقصيرهم أو وقوعهم في الزلل.
تغوفل عنه ولا يكاشف، ما تروحش تصارحه: أنا شفتك، أنا عرفت أنك عملت كذا، ده مش كويس. ليه مش كويس؟ أولًا بيكسر حتة الرهبة عند الولد منك، يعني هو كان الأول يتكسف أنك تطلع، طب أنت قاعد له بقى على الساقطة واللقطة وعامل له فيها مخبر في البيت، فكل ما يعمل حاجة أنا شفتك، أنا شفتك، خلاص بقى أنت شوف اللي تشوفه بقى واعمل اللي تعمله، فده مش صح. لا، يفضل الولد برضه هايبك، وعارف أن أنا لو المعلومة دي اتعرفت عني أو أبويا عارف أني بعمل الحجة الفلانية هيزعل مني، هسقط من نظره، فيفضل الشيء ده بيعمله على استحياء ولا يستمر وما يزودش منه.
قال: فإن عاد، طب رجع تاني، عوتب سرًا، ما تفضحوش بقى، يقعدوا استخالات تعال يا اللي عملت مش عارف، ما ينفعش كده، عوتب سرًا وخوف من اطلاع الناس عليه، ولا يكثر عليه العتاب لأن ذلك يهون عليه سماع الملامة، خلاص ودنه اتعودت يسمع التوبيخ ويسمع اللوم ما يأثرش فيه، وليكن حافظًا هيبة الكلام معه. بعض الآباء يفتكر أنه لما يصاحب ابنه المصاحبة التي تسقط الحد الفاصل بين الأب والصديق فاكر أنه كده بيربي صح، غلط، ده خطأ وللأسف ابتدى دلوقتي هذا ينتشر في صناع المحتوى، أن تلاقي الراجل مطلع ابنه معاه الشاب وبيعامله كأنهم أصحابه أصدقاؤه، فيقوم يربي المعنى ده في جيل الآباء ويخلي الأبناء اللي آباؤهم مش كده يسخطوا على آبائهم، وده مش الصح. الأب أب، دور الأب مش أنه يبقى صديق، دور الأب أنه يبقى مستمع جيد، وتجد عنده حلول لمشاكلك، إنما يظل له هيبته، والهيبة دي مانعة لك أيها الولد أيها الشاب في بعض الأوقات من أنك تقع في زلل كبير، فده مش صح. وينبغي للأم أن تخوفه بالأب، والله أما يجي أبوك، وينبغي أن يمنع النوم نهارًا فإنه يورث الكسل.
فيبقى العيال ما تنامش بالنهار، عاوز ينام بالنهار يبقى هي ساعة القيلولة قبل الظهر كده بشوية وخلاص على كده، إنما ما ينامش طول النهار نايم، ولا يمنع النوم ليلًا، ولكنه يمنع الفرش الوطيئة لتتصلب أعضاؤه، ينشف. واضح الكلام؟ قال: ويتعود الخشونة في المفرش والملبس والمطعم، يبقى نعود الخشونة، «اخشوشنوا فإن النعمة لا تدوم». يعود الخشونة في هذه الأمور، في الفرش في المكان اللي هينام فيه، في الملبس، أنت قادر تجيب من البراندات الفلانية، لا هننزل شوية في البراندات، وبعد شوية ننزل شوية عادي جدا، ما فيش مشكلة، فنعرف نلبس من هنا ونلبس من هنا، ونأكل من هنا ونأكل من هنا، متعودين على ده. ويعود المشي والحركة والرياضة لئلا يغلب عليه الكسل.
واضح الكلام؟ ويمنع أن يفتخر على أقرانه بشيء مما يملكه أبوه أو أبواه، يعني أنا أبويا عنده، أنا أمي عندها، أنا أبويا فلان، أنا أمي فلانة، أنا جدي فلان، عمي فلان، أنت مين؟ يبقى الولد يربى على أن يكون هو، تفخر ليه باللي أبوك عمله؟ اللي أبوك عمله أبوك اللي عامله، أنت مين؟ أنت، كن أنت، مش ابن فلان.
ويمنعه أن يفتخر على أقرانه بشيء مما يملكه أبواه أو بمطعمه أو ملبسه، يمنع من ذلك. يعني جايب الساندوتش الفلاني يغيظ العيال بيه. أمي زمان كانت تعمل لي مسقعة، كان اللي يحبوها برضو يجوا ياخدوها مني، أزلهم بقى في اللانش بوكس يعني. اللانش بوكس بتاعنا طبعا كان كيس كده شفاف، تبقى أنت رايح المدرسة ومعاك ساندوتش، المفروض إنه مثلا ثلاث ساندوتشات كل ساندوتش نوع، توصل المدرسة تلاقيه ساندوتش واحد، خلاص الثلاثة بقوا ساندوتش واحد، فحلّوه برضو طعم مختلف.
قال: ويعود التواضع والإكرام لمن يعاشره.
سؤال مهم عبارة عن شقين، يعني سؤال ودعوة، والاثنين مهمين الحقيقة. هو بيقول: هل زواجي من غير المحجبة خطوة تقود إلى قرار خاطئ؟ هو لسه ما اتجوز، ولو غلط ادعُ لها هتتحجب وادعُ لها تجوزها. زواجي من غير المحجبة خطوة تقود إلى قرار خاطئ، طبعاً غير المحجبة على دركات، الدركة دي الحاجة الوحشة، يعني غير المحجبة ممكن يبقى في تصور ذهني معين وتبقى هي حاجة ثانية، فالغير محجبة دي ممكن تبقى كاشفة شعرها لكن لابسة واسع وفضفاض واسمها غير محجبة، وممكن تنزل لمستويات صعبة، فمش كلهم واحد طبعاً.
أنا ليه بقول ده؟ لأني أكيد في ناس من اللي قاعدة ممكن تبقى متجوزة فعلاً من غير محجبة، طب ده معناه إيه؟ معناه إن هي عاصية بعدم حجابها، وبعض المحجبات عاصيات بالحجاب اللي لابسينه برضو، يعني حجاب سيء جداً، وممكن تلاقي واحدة غير محجبة ولبسها أفضل من واحدة محجبة، فده كله غلط وكل ده هتتحاسب عليه قدام ربنا سبحانه وتعالى، فهي عاصية. طيب عاصية دي يعني إيه أطلقها؟ ما حدش قال كده، كلنا عصاة، يبقى ندعي لها، ده لو واحد متجوز واحدة يعني كده هندعي لها وندعوها إلى الخير، ولو أنت بتيجي مجالس خير تجيبها معاك، ولو أنت بتعصي ربنا تتوب لربنا فربنا يصلح لك امراتك، ما أنت ممكن يبقى أنتوا كده مناسبين لبعض حتى لو أنت ظاهرك الصالح لكن خاربها بينك وبين ربنا، فإنت برضو تصلح حالك مع ربنا ربنا يصلح لك الزوجة والأولاد.
طيب واحد ما تجوزش لسه وبيقول أتزوج من واحدة غير محجبة، إيه رأيكم؟ هو بيحبها شكله، طبعاً ده آثار الاختلاط، وقلوبكم تحب وتتعلق، وشيء متعب الحب، شيء متعب. يعني حافظوا على قلوبكم ده كذا مرة نقوله، حافظوا على قلوبكم، علشان لو حبيتوا بعدين ما ينفعش تتجوز اللي بتحبها هتبقى مشكلة كبيرة وهتفضل تعبان في حياتك وهي تعبانة في حياتها، وكان حل ده من الأول إنك ما تفتحش السكة دي لقلبك. لو وقع الحب يبقى الأول ده حرام، يعني مش الحب اللي حرام، الاختلاط اللي هو الشديد ده المفضي إلى الحب أكيد كان فيه تجاوزات.
طيب وقع الحب، فعلاجه إيه؟ الزواج، علاج الحب الزواج. طيب لو هي ما هياش مناسبة بقى ديناً وخلقاً؟ لا يبقى تتركها لله سبحانه وتعالى، يعني لو حد بيحب حد والزواج متاح ومناسبة يسرع بالزواج، ده العلاج، ليه العلاج الزواج؟ عشان بعد شوية هيكرهها وهيأذي نفسه، يبقى خلاص عالج الحب اللي جواه والحمد لله الموضوع اتحل ببساطة شديدة. إنما لو هي مش مناسبة ليه ديناً أو هو مش مناسب ليكي ديناً وخلقاً، نترك ذلك لله ونستعين بالله على قلوبنا ونقفل أي باب مفتوح ممكن يخلينا نرجع تاني لله سبحانه وتعالى. الأمر سهل؟ لا مش سهل، الأمر صعب جداً ولن يكون إلا بالله سبحانه وتعالى، وأن يكون الله مقدماً في قلبك على غيره سبحانه وتعالى.
يبقى أول حاجة إنك تقدم ربنا على غيره في قلبك، ثاني حاجة تستعين به إنه يعينك على البلاء اللي أنت فيه، الحب أو العشق بلاء، وده كويس إننا الموضوع يتفتح عشان برضو الآباء يفهموا ده. ماشي الآباء يفهموا ده، يبقى الولد جاي بيحب، البنت جاية بتحب، هو فيه بلاء ومحتاج اللي يعرف يتعامل معاه في هذا البلاء، وما هواش بكلمة "ابعد عنها دي مش مناسبة" ففاكرها هتبعد، أو "ابعدي عنه ده مش مناسب" ففاكرها هتبعد، لا هو محتاج دعاء شديد ومحتاج صبر شديد ومحتاج مساندة ومساعدة لأنه في ابتلاء.
ماشي، فأنا ما بحبش بقى الدعاء بتاعي "ادع لي تتجوزها"، ده بيجي كتير على فكرة، الدعاء ده بيجي كده كتير، ادعُ ربنا سبحانه وتعالى بالخير لك، أنت ما تعرفش الخير فين، فادعُ ربنا بالخير، يعني ما تخليش دعاءك "أنا عاوز فلانة يا رب، يسر لي الخير ورضني به". يبقى أنت مشكلتك فين؟ أنت مشكلتك مش في فلانة، أنت مشكلتك إن قلبك متعلق بفلانة، فلو صبحت الصبح لقيت التعلق ده زال انتهت المشكلة، صح؟ طب قلبك في إيد مين؟ في إيد ربنا، وقلبها في إيد مين؟ في إيد ربنا، فتصبح الصبح التعلق زال وخلاص والعملية انتهت، وإحنا لو جينا قلنا لك "أتجوز" يقول لك "لا ما اتجوزهاش"، فبلاش تبقى أنت اللي عاوز تمشي الكون على مزاجك أو تمشي حياتك على مزاجك، سيبها لربنا سبحانه وتعالى، "يا رب قدر لي الخير ورضني به".
ماشي، قول قولي هذا واستغفر الله العظيم لي ولكم، سبحانك وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير