أما بعد. المرّة اللي فاتت، آخر حاجة خدناها الآية، الأربع طرق اللي بها نتعرف على آفات النفوس والقلوب. لو في أربع كلمات نقولهم إيه؟ شيخ، صديق، عدو، مخالطة، مش كده؟
طيب، فصل في طريق معالجة أمراض القلب. وقد ذكرنا أن شهوات النفوس لم توضع إلا لفائدة. ذكرنا ده ولا ما ذكرناهوش؟ قلنا لكم إن المطلوب في الشهوة الاعتدال، مش المطلوب القضاء على الشهوة بالكلية، لأن الله عز وجل لما خلق فينا الشهوات خلقها لحكمة، والمطلوب أن نجاهد شهواتنا لردها إلى الاعتدال مش لأننا نتخلص من الشهوة. فمثلاً الغضب، إيه رايكم؟ الغضب عاوزين نقضي على الغضب؟ لا، المرّة اللي فاتت قلنا: لولا الغضب لما قام سوق الجهاد. هتلاقي الدين يتشتم، والرب عز وجل يطعن فيه، وينال من رسولك صلى الله عليه وسلم، وأنت ما بتغضبش؟ فده مش مطلوب، يبقى الغضب مطلوب. والنبي عليه الصلاة والسلام قلنا لكم كان بيغضب ولا لا؟ السيدة عائشة نفت عنه الغضب، لم يغضب لنفسه قط إلا أن تنتهك محارم الله. فيبقى الغضب مطلوب، كذلك شهوة الرجل للمرأة وشهوة المرأة للرجل، لولاها لا خلاص كان زماننا انقرضنا، ما كانش زمان في درس دلوقتي، كان زمان ما جيناش أصلاً. أنتم عارفين بيقولوا إن العورة، لفظ عورة معناه في اللغة كل ما يستقبح، فبعض العلماء بيقول إن العورة تستقبح، ولولا الشهوة لنفر الإنسان منها، يعني العورة لولا وجود الشهوة كان الإنسان يقرف يبص لها لأنها مستقبحه، فدي مطلوبة برده. شهوة الطعام، لولاها لمات الإنسان، اللي بيخليك تروح تاكل إنك بتشتهي الأكل، بتجوع وتشتهي الأكل، لولا هذه الشهوة مش تاكل وهتموت، فالشهوة وضعت لفائدة، إذ لولا شهوة المطعم ما حصل تناول الغذاء، ولولا شهوة الجماع لانقطع النسل. وإنما المذموم فضول الشهوات وطغيانها، يبقى احنا حربنا مع النفس ومع الشهوة لنردها إلى الاعتدال فقط.
وثمه قوم لم يفهموا هذا القدر، فأخذوا يتركون كل ما تشتهيه النفس، وهذا ظلم لها بأسقاط حقها. يعني احنا مش مطلوب مننا إننا نترك كل ما نشتهي حاجة نتركها، المطلوب مننا إننا نرد الشهوة إلى الاعتدال. طب واحد عاوز يربي نفسه شوية، فبيجي على نفسه حبتين زيادة، ما فيهاش مشكلة لفترة من باب التربية، ما فيهاش مشكلة، إنما إنه يستمر إن كل ما يشتهي شيء يتركه، النفس هتتلف. وطبعا مش عاوزين نسب كده، ما فيش حد بيعمل هنا كده، ما حدش بيعمل كده ماشي، هو بيتكلم عن يعني أناس من المتعبدين المتزهدين ربما فعلوا شيئاً من ذلك. قال: فإن لها حق، بدليل قوله صلى الله عليه وسلم لها دي يعني للنفس، بدليل قوله صلى الله عليه وسلم: «إن لنفسك عليك حقاً». حتى إن قائلاً... طبعا إن لنفسك عليك حقاً قالها لمين؟ هو النبي عليه الصلاه والسلام أقر ذلك مش كده؟ صدق سلمان مش كده؟ كان بيقولها لمين سلمان؟ لا. مين؟ سلمان كان بيقولها لمين؟ أبو الدرداء، صح. لما مراته اشتكت يعني إنه يقوم طول الليل، وما بينامش، وما بيشوفش حاجة أهله وكده، فسلمان قال له: «إن لاهلك عليك حقاً، وإن لنفسك عليك حقاً، وإن لربك عليك حق، فأعط كل ذي حق حقه». فلما بلغ ذلك النبي صلى الله عليه وسلم قال: «صدق سلمان».
حتى إن قائلاً منهم يقول: لي كذا وكذا سنة أشتهي كذا فلا أتناوله. وهذا انحراف عن الحل وخلاف سنة رسول الله صلى الله عليه وسلم، والله إن فعل ذلك تأديباً لنفسه، لا يرى ذلك عبادة، وإنما تأديباً لنفسه عشان نفسه ما تروحش للحرام والمكروه، فيقوم مثلاً يمنع نفسه من حاجة بيشتهيها من باب التأديب ومن باب التربية، ما فيش مشكلة، بس هو مش شايفها عبادة، يعني مش شايف إن دي عبادة، إنما لو فعلها على وجه العبادة، ساعتها بقى نقول له لا، ما يناسبش انك تعمل ده. زي ما بيقول كده: هذا انحراف عن الحل وخلاف سنة رسول الله صلى الله عليه وسلم، فانه كان يتناول المشتهى من الحلو والعسل وغيرهما. فلا يلتفت إلى زاهد قل علمه فحرم نفسه حظها من المشتهى على الإطلاق. طبعا الشيخ ما شفناهوش، يعني هو كلامه ده على تصور معين في ذهنه ماشي، إنما لو شافنا هيضربنا بالنار. فاحنا لو واحد جه قال: لا، طب أنا إيه همنع نفسي المشتهيات شوية علشان أربي نفسي على الخشونة وأربي نفسي على تقليل المطعم والمشرب وكده، ما فيش مشكلة، بل دي معاني شرعية أن الإنسان يخشوشن، وأن الإنسان يقلل من طعامه، وأن الإنسان ما ياكلش أصاف كتير مع بعض، دي كلها معاني موجودة في الشرع.
طيب يعني حرام؟ ما بنقولش بقى حرام، احنا بنقول بتربي نفسك وتردها إلى معنى الزهد، معنى الترك، معنى التقلل، فده كله ما فيهوش مشكلة. الصورة الذهنية عند الشيخ وهو بيكتب الكلام ده، طبعا الغزالي مش هتلاقوه كاتب الكلام ده، جه بعد كده ابن الجوزي هتلاقوه هو اللي كتب الكلام ده لما اختصر الإحياء، غالب الظن طبعا ما رجعتش أنا للإحياء في الموطن ده، إنما هتلاقوا كده في الغالب لو رجعتوا للإحياء في الموطن مش هتلاقوا الغزالي كاتب كده، لأن هو له مذهب آخر. ابن الجوزي لما اختصر الإحياء فغالبا هو اللي كتب ده ومن بعده أحمد بن قدامة، لأن هو اللي مختصر الإحياء.
فهمتوا حاجة؟ ده مختصر منهاج القاصدين. منهاج القاصدين ده بتاع ابن الجوزي. فاحمد بن قدامة اختصر منهاج القاصدين في مختصر منهاج القاصدين. طب منهاج القاصدين ده بتاع ابن الجوزي اختصار إحياء علوم الدين للغزالي. فغالباً هتلاقوا الإحياء مش كاتب الكلمتين دول غالباً، يعني ممكن تراجعوه. وبعدين هتلاقوه ابن الجوزي هو اللي لما جه اختصر زود الكلام ده من عنده، لأن هو مذهبه كده، وده مخالف للغزالي. ومنه خد أحمد بن قدامة نفس الكلام واختصره. وعلى كل حال أياً كان، دي صورة ذهنية لأناس بيعملوا حاجات مش احنا، اللي بينكرهم ابن الجوزي مش احنا خالص ماشي.
قال: فلا يلتفت إلى زاهد قل علمه فحرم نفسه حظها من المشتهى على الإطلاق، يعني لو حرمها المشتهى لا على الإطلاق مش قضية، فإنه إلى الظلم أقرب منه إلى العدل. وإنما يترك المشتهى إذا صعبت الطريق إليه، أو خاف الركون إليه. برده يعني إذا صعبت الطريق في الحصول على المشتهى، يعني إيه؟ تلاقي الشاب النهارده يخلص لازم يبقى يجيب شقة بمواصفات كذا وكذا وكذا، مواصفات معينة أياً كان بقى وكل واحد والمستوى بتاعه. طيب يجي يجيب ما حوش فلوس، طريق صعب عليه إنه يجيب الشقة دي، فيا أما ياخر الجواز، وتأخير الجواز ممكن يبقى فيه مشاكل وأنه يقع في حرام وكذا، أو يبدر الجواز ويقع في حرام آخر أنه يدخل في الربا علشان يجيب الشقة اللي هو بيحلم بيها، والحل في ذلك إيه؟ إنه ينزل بسقف طموحاته، مش لازم الشقة تبقى بالمواصفات الفلانية، مش لازم تبقى في المنطقة الفلانية، مش قضية تبقى في البدايه تمليك، مش... كل واحد ومستواه برده يعني إحنا إيه. فده حل أنه يترك بعض المشتهى هنا، بعض المشتهى مش أنه هيترك الشقق، لا، هيترك بعض المواصفات. إذا هو عاوز في مكان معين، ما فيش مشكلة، يبقى مكان أبعد شوية، مكان أقل شوية، إذا عاوز الشقة عدد أوض معين، ما فيش مشكلة، عدد الأوض ده يقل، إذا عاوزها وهكذا، يعني ماشي.
طيب، ده كده صعبة الطريق إليه إلى المشتهى. ممكن الإنسان يترك المشتهى مع سهولة الطريق ليه، خوفاً من الركون إلى المشتهى، فيصعب بعد كده التخلي والتنازل عن هذا المشتهى. مفهوم يا جماعه؟ وده احنا كنا أسهبنا فيه في درس «قليلها يكفي»، فيمكن نرجع للدرس ده مهم، خلاص، وقرأنا أقوالاً للعلماء ومن كذا كتاب وكان هنا ماشي. فالمهم يعني هتلاقوه موجود على اليوتيوب وعلى التليجرام إن شاء الله. فالإنسان ممكن آه ينزل على المشتهى، وربما يترك بعض المشتهى رأساً عادي، يعني صنف معين من الطعام لكنه مثلاً غالي جداً، فهو يتركه لمعنى من المعاني اللي احنا بنقولها دي ويقول مش خلاص مش واكله تاني خالص، ما فيهاش مشكلة يعني، هو يا إما طريق صعب للوصول إليه لازم أحوش ولازم أعمل ولازم، أو أنه يخشى الركون وبعد كده ما يقدرش يبطل هذا المشتهى، أو لما يبطله يحس بضجر وضيق وأن الحياة ملّت بيّ وإني مش عارف يطمم الأول بلاها.
وأنتم عارفين الواحد لما يدوق غير اللي ما داقش، يعني اللي داق ده ومثلاً لقى طعم الحاجة كويس، أو لقى على الكراسي اللي بالشكل المعين مريح، أو لقى القعدة في الشقق اللي في الحته الفلانية مش عارف أكثر، مش عارف إيه، نيجي نقول له انزل عن اللي أنت فيه يبقى صعب، غير لو ما داقش الحاجات، بتحكى له مثلاً ولا شيء ما يبقاش صعب قوي ماشي.
وإنما يترك المشتهى إذا صعبت الطريق إليه، مثل ألا يحصل إلا بوجه مكروه، أو يخاف من تناوله. مثل ألا يحصل إلا بوجه مكروه، يعني لو هيحصله بوجه مكروه يبقى لا ما يروحش يجيبه، أو يخاف من تناوله انحلال عزمه فتطمع النفس في استدامته، أو يخاف من إذا تناول المشتهى ينحل عزمه، يضعف بعد أن كان ذا عزيمة وبيقدر يقول لا، ما يقدرش يقول لا ماشي، فتطمع النفس في استدامته، أو يحذر من ذلك زيادة شبع فيثقله عن عبادته. يعني دي برده حاجة تخلي الإنسان يسيب المشتهى، إنه مش عاوزين نشبع.
وأول بدعة أحدثت في الأمة الشبع، كما قالت عائشة، روي ذلك عن عائشة: أول بدعة أحدثت في هذه الأمة الشبع، يعني أنهم كانوا يشبعوا على الدوام، دي لا ما كانواش كده، لا النبي كان كده عليه الصلاة والسلام ولا الصحابه كانوا كده، ما كانواش ما فيش حاجة اسمها كل يوم بيشبعوا، الشبع على الدوام ده ما كانواش يعرفوه أصلاً ما، يعني خلينا نقولها بلفظ ما كانش نمط ما كانش لايف ستايل يعني عندهم أن إحنا بنقعد ناكل لغاية ما نشبع وكل يوم يحصل كده يعني ما كانواش بيشبعوا خالص؟ لا ما قلتش كده، ممكن يشبعوا أحياناً، وأحياناً دي يعني أحياناً قليلة، إنما كل يوم بنشبع الصحابة ما كانواش كده.
طيب، قال: أو يحذر من ذلك زيادة شبع، طبعا هنا ابن الجوزي بيقول زيادة شبع، حد معاه الإحياء كده نعمل مقارنة؟ كلمة زيادة دي ما أظن تلاقوها في الإحياء، كلمة زيادة دي، لأن الجوزي له مذهب في الشبع برده ماشي مخالف للغزالي، فكلمة زيادة دي بس لوحدها أظن يعني أظن ممكن ما تلاقوش الغزالي حاططها يعني. على كل حال، فيثقله عن عبادته، فإما تناوله في بعض الأوقات لتقوية النفس فذلك كالطب للمريض يمدح ولا يذم، ولا باس بالرفق بالنفس لتقوى على السلوك، يعني سلوك طريق الآخرة.
طيب إيه إيه المعنى بقى اللي نطلع بيه من الحته دي؟ أن احنا ما نشبعش، ودي قاعدة، دي قاعدة في طريقك إلى الله عز وجل: ما نشبعش. واللي هيقول نشبع، لأن ابن الجوزي مذهبه أن أنت تشبع، بس الشبع مش الشبع الكامل اللي هو بدايات الشبع، ما يعني لا يرى بذلك بأساً ماشي، فاحنا خلينا إليه نقول ما نشبعش عشان إحنا نقول ما نشبعش وهنروح برده برده إيه نشبع، فيعني نوصل لأول الشبع كده. بيقولوا، ما أعرفش الكلام ده صح ولا غلط بقى، يسأل فيه الأطباء بتوع التغذية وكده، بيقولوا المستقبلات مش عارف بيسموها إيه بقى في الطب، يعني عندنا في الهندسة نسميها السنسورز يعني الحساسات، يعني ما أعرفش يعني المراكز اللي تشعر بالشبع سمعت هذه المعلومة، ما أعرفش صح ولا غلط، الله أعلم، هي عندها كده إيه وقت، مش عارف اسمها إيه دي، ديلاي تايم يعني، يعني إيه بالعربي؟ يعني وقت إيه؟ يعني ما تشعرش على طول بالشبع. الله أعلم، ما حدش ياخد الكلمتين دول، بس سمعت كده من واحد يعني بتاع تغذيه، أو واحد يعني ليه في الريسبتورز. أيا كان بقى ما أعرفش يعني مكانها فين، احنا بناكل وخلاص.
هو بيقول ثلث ساعة تقريباً، الله أعلم. أنتم كده فعلاً ماشي؟ أنت ليك في المجال ده ولا دكتور؟ ماشي، هو معاه دكتور، أثبت المعلومة. بيقولوا إن المستقبلات دي وأنا ما أعرفش بيسموها إيه، تشعر بالشبع بعد وقت، يعني مش أول ما تمتلئ البطن هي تشعر بالشبع، طب الوقت ده بيوصل لثلث ساعة تقريباً، فحضرتك بتعد تاكل، أول ما تحس أنك شبعان اعرف أن أنت شبعان من ثلث ساعة. في بعض الثقافات في الأكل، بعض الدول يعني عندها ثقافة أنها ما تاكلش الوجبة مرة واحدة، إن تقعد تاكل وبعدين يقعدوا يدردشوا شوية ويتكلموا وبتاع.
وتحط لهم حاجة ثانية وهكذا بحيث إنهم يدوا فرصة للمستقبلات دي، أو زي ما سموها بقى، إن هي تشعر وقت ما تشبع تشعر إنك شبعت.
إحنا عاوزين نتكلم دلوقتي، الموضوع سخنان بتاع التغذية، فالواحد خايف.
فصل في علامات حسن الخلق، وتاني حاجة نستفيدها، يبقى أول حاجة ما نشبعش وده أصح للبدن، وثاني حاجة نستفيدها من الفقرة اللي فاتت إن إحنا مش عاوزين نقضي على الشهوة بالكلية، أي شهوة يا شباب؛ إنما خلقت الشهوة لفائدة، مش بنبقى عاوزين نقضي على الشهوة إنما عاوزين نتحكم في تلك الشهوة، ندير تلك الشهوة، نضبط تلك الشهوة، نرد تلك الشهوة إلى الاعتدال وهكذا.
فصل في علامات حسن الخلق، ربما جاهد المريد نفسه حتى ترك الفواحش والمعاصي، ثم ظن أنه قد نضج وحسن خلقه واستغنى عن المجاهدة، وليس كذلك، فإن حسن الخلق هو مجموع صفات المؤمنين. يعني إمتى نقول إنك حسن الخلق؟ طيب ليه أصلاً نقول إنك حسن الخلق؟ إيه فايدة إنك تبقى حسن الخلق؟ الثواب الكبير اللي النبي قاله عليه الصلاة والسلام، قلنا لكم قبل كده إحنا لو باستقراء تراجم السلف إحنا ما لناش باب ننافس فيه غير ده أصلاً. يعني لو جينا نتكلم العبادة وقعدنا نقرا تراجم السلف هنضرب نفسنا بالنار، عبادة إيه؟ هنعمل إيه إحنا بقى لما نقرا تراجم السلف في عباداتهم في صومهم وجهادهم وصلاتهم بالليل وحرصهم على تكبيرة الإحرام؟ فإحنا هننافس في إيه ده؟ اللي عاوز ينافس يعني اللي عاوز يبقى في أوائل من يدخل الجنة فمش هتلاقوا. طيب العلم الشرعي؟ هنعرف ننافس السلف في العلم الشرعي برضه مش هنعرف، أو يعني صعبة، يعني صعبة تقرب إلى المستحيل، مش من باب تحصيل شيء من العلم أو تحصيل شيء من العبادة، وقل مثل ذلك في كل أبواب الخير. عندنا باب بقى ده ممكن نتصور إن ممكن واحد من اللي موجودين دلوقتي ينافس فيه، اللي هو حسن الخلق. طيب حسن الخلق ده ثوابه إيه؟ ثوابه كبير، مش قال النبي صلى الله عليه وسلم: «أحبكم إلي وأقربكم مني مجلساً يوم القيامة أحاسنكم أخلاقاً»؟ فثوابه كبير فيبقى نجتهد في تحسين الخلق.
يبقى دي أول حاجة، تاني حاجة يبقى إيه حسن الخلق؟ يجي واحد يقول لك طب إيه حسن الخلق؟ إن أترك المعاصي والفواحش، يعني هو ده حسن الخلق؟ نقول له لا، إنك تترك المعاصي والفواحش أنت كده بقيت في المنتصف، يعني حسن الخلق بقى إنك تحرز أموراً، يعني إنت تخليت عن أمور، عشان يبقى اسمك حسن الخلق يبقى لازم تحرز أموراً، اللي هي إيه؟ قال لك مجموع صفات المؤمنين في كتاب الله عز وجل، قد وصفهم الله تعالى فقال: ﴿إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَانًا وَعَلَىٰ رَبِّهِمْ يَتَوَكَّلُونَ * الَّذِينَ يُقِيمُونَ الصَّلَاةَ وَمِمَّا رَزَقْنَاهُمْ يُنفِقُونَ * أُولَٰئِكَ هُمُ الْمُؤْمِنُونَ حَقًّا﴾ [الأنفال: 2-4]، وقال عز وجل: ﴿التَّائِبُونَ الْعَابِدُونَ الْحَامِدُونَ السَّائِحُونَ الرَّاكِعُونَ السَّاجِدُونَ الْآمِرُونَ بِالْمَعْرُوفِ وَالنَّاهُونَ عَنِ الْمُنكَرِ وَالْحَافِظُونَ لِحُدُودِ اللَّهِ ۗ وَبَشِّرِ الْمُؤْمِنِينَ﴾ [التوبة: 112]، وقال تعالى: ﴿قَدْ أَفْلَحَ الْمُؤْمِنُونَ﴾ [المؤمنون: 1] إلى قوله: ﴿أُولَٰئِكَ هُمُ الْوَارِثُونَ﴾ [المؤمنون: 10]، وقال: ﴿وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا﴾ [الفرقان: 63] إلى آخر السورة. فمن أشكل عليه حاله، يعني مش عارف أنا حسن الخلق ولا لا، فليعرض نفسه على هذه الآيات، فوجود جميع هذه الصفات علامة حسن الخلق، وفقد جميعها علامة سوء الخلق، ووجود بعضها دون البعض يدل على البعض دون البعض، فليشتغل بحفظ ما وجد وتحصيل ما فقد. أظن الكلام واضح مش محتاجين نسهب فيه.
وقد وصف رسول الله صلى الله عليه وسلم المؤمن بصفات كثيرة وأشار بها إلى محاسن الأخلاق، ففي الصحيحين من حديث أنس رضي الله عنه أن النبي صلى الله عليه وسلم قال: «والذي نفسي بيده لا يؤمن عبد حتى يحب لأخيه ما يحب لنفسه». سهلة؟ صعبة جداً! وكنا كنت في درس اتكلمت عنها، حديثان، مهم برضه يتسمع في الحتة دي، وساعتها قلنا لا يؤمن عبد حتى يحب لأخيه ما يحب لنفسه، يعني لا يكمل إيمانه، حتى دي علامة. الأول نشوفها صعبة ولا سهلة؟ دلوقتي إنت في مدرسة أو في جامعة، وكفل الشر يعني متفوق وتحب تطلع الأول، وعندك واحد صاحبك بينافسك على الأول ده، يلا نطبق الحديث بقى: لا يؤمن أحدكم حتى يحب لأخيه ما يحب لنفسه، يعني هو لو يحب يطلع الأول فيحب لأخيه إنه يطلع أول برضه! طبعاً مش يعني فاللي يطلع يطلع بقى، يعني صعبة جداً مش كده؟ وقل مثل ذلك في أي أمر من أمور الدنيا، بالذات عند التنافس؛ يعني ممكن واحد يحب لأخيه ما يحب لنفسه لو مش هياخد، يعني أنا مثلاً عاوز الشقة الفلانية وفي زيها تلاتة أربعة شبه بعض، فممكن واحد يحب لأخيه ما يحب لنفسه، يعني أنا آخد واحدة وهو واحدة، لكن لما تبقى شقة واحدة ويا أنا يا هو، مين بقى يحب لأخيه ما يحب لنفسه في الحالة دي؟
فهي صعبة، ولذلك لا يؤمن أحدكم حتى، لا يكمل إيمانك حتى، علامة على كمال الإيمان. ليه بقى؟ لأن من كمل إيمانه هيفضل نفسه في الدنيا كده، ما هو اللي كمل إيمانه ده يعني إيمانه بالآخرة إيمان كامل أو يقرب من الإيمان الكامل، فهو كأنه يرى الجنة والنار، ويرى ما أعد الله للمؤمنين في الجنة وما أعد للكافرين والعاصين في النار، وكأنه يرى رأي العين قصور الجنة وأنهار الجنة وزروع الجنة والحور العين في الجنة، واحد زي ده هيبقى متشبث قوي بالمركز الأول ومتشبث قوي بالشقة الفلانية بحيث لو ما أخدهاش يندم ويتنكد ويجيله ضغط ويجيله القلب؟ لا أبداً، هو أصلاً الدنيا ولا فارقة معاه، فساعتها عادي أنا آخدها، أخويا ياخدها، كلها دنيا، دنيا ما تساويش.
وقلت لكم قبل كده مثال اللي هو إيه؟ إنه لو جناح بعوضة، جناح ناموسة، ويا إنت يا هو، هتقول لا أنا ولا إنت ولا هتقرب من الجناح أصلاً، يروح ياخده، يعني مش هتروح تتنافس فيه أصلاً، مش كده؟ والدنيا كلها لا تعدل جناح البعوضة، لا تعدل أصلاً أقل واحد منزلة في الجنة. أقل واحد، لكام قدر الدنيا؟ عشرة أو أحد عشر لأنه اتقال: إذا فلك مثلها وعشر أمثالها، إحدى عشر مرة قد الدنيا. أنا ساكت عشان تتخيلوا، تخيلوا الدنيا دي عاملة إزاي، أقل واحد في الجنة منزلة له قد الدنيا، الدنيا إحدى عشر مرة مش قد الدنيا! فإحنا بنجري على إيه وبنتنافس على إيه؟ ده ده كان في النار على فكرة، ده أقل واحد في الجنة منزلة، ده ده كان واحد في النار، هو آخر الناس خروجاً من النار، وله قصة طويلة، بس في آخرها يقول له ربنا: يا عبدي ما يرضيك عني؟ لأنه هو هيقعد يطلب ويزود في طلبات كل شوية، فقال له فربنا هيقول له: يا عبدي ما يرضيك عني؟ أترضى أن تكون لك الدنيا أو يكون لك مثل الدنيا؟ فيقول: أتهزأ بي وأنت رب العالمين؟ فالنبي اتبسم عليه الصلاة والسلام قال لهم: «ألا تسألوني مما أضحك؟» قالوا: مما تضحك؟ قال: «من ضحك رب العالمين». هو بيقول له ربنا بيقول له: أنت ما يرضيك عني؟ ترضى أن يكون لك مثل الدنيا؟ فقال: أتهزأ وأنت رب العالمين؟ فقال: اذهب فلك مثلها ومثلها ومثلها ومثلها، ففي الخامسة يقول: ربي رضيت، مش عاوز تاني، فيقول: اذهب فلك مثلها وعشر أمثالها، وده أقل الناس منزلة عند الله عز وجل يوم القيامة. فإنت لما تعرف كده لسه قلبك بقى ماسك في المركز الأول وماسك في المنصب الفلاني وماسك في الشقة الفلانية وماسك في العروسة الفلانية؟ قال لا، خالص عادي.
ماشي، قال والذي نفسي بيده لا يؤمن عبد حتى يحب لأخيه ما يحب لنفسه، واسمعوا درس حديثان، مهم وفيهما أيضاً من حديث أبي هريرة رضي الله عنه عن النبي صلى الله عليه وسلم قال: «من كان يؤمن بالله واليوم الآخر فليكرم ضيفه، ومن كان يؤمن بالله واليوم الآخر فلا يؤذ جاره، ومن كان يؤمن بالله واليوم الآخر فليقل خيراً أو ليصمت». يبقى أدي أدب أهو كمان أو خلق حسن كمان نخرج بيه النهارده، ثلاثة هم: إكرام الضيف، وعدم إيذاء الجار، وقول الخير أو السكوت. وهنا قول الخير يا جماعة يعني باللسان أو بالكتابة، القلم أحد اللسانين، يبقى الكتابة على الفيسبوك قل خيراً أو اصمت، أو على الإنستغرام، في كتابة ولا بس صور؟ في كل دول عندهم إنستغرام أعوذ بالله، ما أعرفش إيه الإنستغرام ده بصراحة ما أعرفش وحش ولا لا، أنا أعرف الفيسبوك والتيك توك ده دخلته ثلاث أيام وقفلته، فما شفتش إنستغرام ده قبل كده يعني، وحش الإنستغرام ده ولا يعني نطلع فتوى بالحرمة ولا؟ أنا قلت في التيك توك قلت دخلته ثلاث أيام وطلعت، فبعدين كنت في بودكاست بقول له أنا مش عارف إزاي واحد يؤمن بالله واليوم الآخر عنده تيك توك، فالناس بقى اتضايقت يعني، ما هو اللي أنا شفته بلاوي، وبعدين بقى قالوا لا ده في مش عارف الجوريزمات وحاجات كده، بس لو طولت شوية يعني إنت بتدخل هم بيستقبلوك. فإنا ما طولتش، قفلت على طول.
يبقى إكرام الضيف ما نتضايقش بقى، يجيلنا الضيف نبقى شايلين هم الضيف وهيطفح إيه ده أما يجي، نكرمه، نكرمه ونرى أن ذلك دين، نرى أن ذلك دين، نبقى فرحانين إحنا نعمل ده، حتى لو إحنا على قدنا، ونرى أن ده دين وإن ربنا هيخلف. وروي عن بعض السلف إن مرة جاله ضيف، وبعدين ما عندوش أكل يكفي، فعمل حيلة كده قال لمراته خلاص حط لنا الأكل أنا وهو والعيال وبعدين هنعمل كأن الزيت خلص بتاع المصباح، فالمصباح انطفأ، كان زمان بزيت، وهو والعيال قاعدوا يخبطوا في الأطباق كأنهم بياكلوا، هم ما بياكلوش، ما فيش أكل أصلاً يعني، هو يا دوبك الأكل يكفي الراجل عشان الراجل يشبع ويبقوا أكرموه، فإحنا ما أظنش نوصل للحالة دي إن إحنا نوصل لحالة إن إحنا يا ناكل يا هو ياكل. فنكرم الضيف، والضيف ما يبقاش برضه ما عندوش دم، جبلة، ويروح يقعد ياكل كتير يعني، إحنا لو إحنا الضيفان برضه ناكل حاجة قبل ما نروح عشان نكسر قالوا ده في الآداب على فكرة، قالوا لو إنت ضيف قبل ما تروح للمكان اللي إنت رايحه كل أي حاجة تكسر نهمتك شوية ما تدخلش تلاقيه قاعد عينيه على المكان اللي تطلع منه الأكل مستني، راحوا وبعدين سامع بقى الخلاط شغال وبتاع، فرحان في الآخر طلع له كوباية شاي، فالخلاط بيعمل إيه ده اللي شغال طول اليوم؟
فيبقى إحنا لو ضيفان ما نتقلش على الناس، ولو إحنا اللي مستضيفين الناس نكرمهم، ولو ضيفان يا جماعة ما نخرجش بقى نحكي عن الإناء لو حاجة أقل من اللي إحنا متوقعينها، قلة أدب، ده بجد هذا من سوء الأدب، إنك تروح عند حد وبعدين تخرج تقول ما قدمليش غير مش عارف إيه، قعد عنده ساعتين، ما هذا سوء أدب! بل قل الخير، تقول الخير مش لازم تكذب يعني، أقدم لك إيه؟ والله ده بيت كرم وبيت خير، بلاش بيت كرم عشان لو بكرة ما تبقاش كذاب، بيت خير يعني وأي حاجة تقدمت لك هي خير من الله.
ولا يؤذي جاره، يبقى ما تقعدش بقى تتصنت على جيرانك، ما تقعدش، ما ترميش الزبالة وتبقى ريحتها، ما تعليش صوتك ولا صوت حاجة في البيت عندك وما يعرفوش يناموا، ما تركنش عربيتك بالعرض في مكان ياخد عربيتين ويجي جارك ما يعرفش يركن، يعني صور إيذاء الجار كثيرة، فالنبي عليه الصلاة والسلام دعا إلى ذلك، برضه علامة نقص إيمان، وكذلك فليقل خيراً أو ليصمت، يبقى قبل ما تكتب حاجة على الفيسبوك، قبل ما تكتب حاجة على أي موقع من المواقع، تشوف ده خير ولا مش خير، لو مش خير اسكت ما تكتبش، لو شاكك اسكت برضه، ليه؟ السلامة لا يعدلها شيء، لو كان خير وسكت عن خير أهي أبسط شوية من لو كان شر وتكلمت بشر، مفهوم؟
بعض إخواننا متحمسين لـ، أنا لا مع ولا ضد، أنا مش دكتور ولا بتاع تغذية يعني، نظام الطيبات فما يعنينيش في حاجة النظام، ولا معاه ولا ضده ولا أنا بفهم حاجة فيه، ولا أنا بتاع، لا دكتور ولا بتاع تغذية، لكن في ظاهرة بس هي اللي شوية محتاجة هدوء، إن بقيت لقيت ناس عادية خالص ناس على الله حكايتها زي كده مش فاهم حاجة وابتدوا يوصفوه للعيانين، يعني يجي واحد يقول له لا سيبك بقى من الأدوية دي وسيب، خد الحاجات دي، برضه أنا ما بقولش صح وغلط، أنا مش بتاع طب بس أنا هحكي لكم تجربة شخصية أنا بقى حصلت معايا، كنت هموت واحد، أنا زمان عملت كيتو دايت ونزلت حوالي 25 كيلو، وكنت وأنا طبيعتي ما أدخلش في حاجة غير لما أدرسها كويس يعني أجيبها من.
فكانت التجربة الحقيقة تعلمت منها أن هذا ليس خيرا، يعني ده غلط النظام، أنا ما أعرفش غلط ولا صح، بس فكرة إنك تتجرأ وتقول لحد سيب دواء وروح خد مش عارف إيه، وأنت ممكن يبقى واحد له عذر أمام الله عز وجل، وكان طبيب وفاهم بيقول إيه، حتى لو أخطأ يبقى قدام ربنا إيه؟ وأنا راجل دارس ده واجتهادي أدى إلى كذا، لو كان اجتهد فعلاً وصادق في اجتهاده وبذل الوسع وكده يعذره الله عز وجل. أنت عذرك إيه لو واحد مات؟ مالكش عذر، لا دي حتتك ولا أنت دكتور ولا أنت فاهم حاجة وتقول لحد سيب دواء وروح خد نظام معين في الأكل. فقل خيرا أو اصمت.
وفي حديث آخر: «أكمل المؤمنين إيمانا أحسنهم أخلاقا». ومن حسن الخلق احتمال الأذى، وده برضو يا شباب محتاجين نشتغل عليه شوية. يبقى من حسن الخلق أن تفعل الخير، ومن حسن الخلق أن تحتمل من غيرك الأذى. بعض الناس ما يستحملوش أن يداس لهم على طرف، وربما ما يستحملوش حتى من غير ما حد يدوس لهم على طرف؛ هم بيتخيلوا كده أنك دست لهم على طرف ويبتدوا يخلقوا المشكلة.
يقولوا أن عمر بن عبد العزيز مرة ماشي في المسجد، أمير المؤمنين وبعدين واحد نايم فاخبط في رجله كده كعب الرجل، فالراجل قام مفزوع قال له: أعمى أنت؟ مش واخد باله مين اللي ماشي، فقال: لا. فهم به الحرس، فقال: ما سألني أعمى أنت فقلت لا، الراجل بيسألني في الراجل ما عملش حاجة، بيسألني أنت أعمى قلت له لا مش أعمى.
زي سيدنا النبي كده عليه الصلاة والسلام، يقولوا إيه؟ أنظر كيف يصرف الله عني أذاهم. زمان العرب كانت تيجي تشتم حد واسمه حلو يقلبوا اسمه فكأنهم شتموه مرتين، فواحد اسمه كريم يقولوا إيه: قاتل الله بخيلا، فكأنهم شتموه مرتين، هو اسمه كريم مش بخيل. فاسم محمد جميل عليه الصلاة والسلام كان يقولوا إيه: قاتل الله مذمما، فكأنهم بيشتموه مرتين. طب سيدنا النبي عليه الصلاة والسلام فاهم ولا مش فاهم؟ فاهم، فكان يقول: «انظر كيف صرف الله عني أذاهم، يسبون مذمما ويشتمون مذمما، وأنا محمد».
فعاوزين نحتمل الأذى من غيرنا، والدرجة اللي أقل من دي إحنا بقى لازم نشتغل فيها على نفسنا، أن إحنا ما نتصورش أن كل شيء أذى. أنتوا عارفين يا جماعة، ركزوا في الكلمتين اللي جايين دول مهمين جدا وهيفرقوا في كل علاقاتكم، فركزوا بقى معايا ثلاث أربع دقائق. بيقولوا أن التصرف بتاعك في قبليه ثلاث حاجات بيحصلوا، لازم تنتبه ليهم والعلاقات بينهم. فبيقولوا أول حاجة بتحصل في حاجة اسمها حقيقة أو حقائق، ثاني حاجة بعد الحقائق قصة، وبعد القصة شعور، بعد الشعور فعل.
تعالى ندي مثال، دلوقتي مثلا جيت بتقول لحد: السلام عليكم، أي حاجة، إزيك يا فلان، ما ردش عليك. إيه الحقيقة؟ الحقيقة أن أنا قلت لواحد سلام عليكم ما ردش عليا، دي الحقيقة صح كده. طيب إحنا بنعمل إيه بقى؟ بنحول الحقائق لقصة في أذهاننا؛ أن فلان ما بيحترمنيش، أن فلان مستقيل بيا، أن فلان كذا، قصة بنحول الحقائق لقصة. ويبتدي بعد ما حولناها لقصة ينتابنا شعور، اللي هو في الحالة دي مثلا شعور غضب وزعل من فلان ده، وبعدين لما ينتابنا شعور ناخد إجراء، اللي هو مثلا في الحالة دي هقاطع فلان، عمري ما هسلم عليه تاني. الإشكال الكبير في تحويل الحقيقة إلى قصة، لأن ممكن ببساطة يكون فلان ما سمعكش احتمال، ممكن ببساطة يكون فلان مهموم بحاجات تانية، يعني سمعك بس من كتر همه وحزنه وزعله ما فيش طاقة يرد سلام، ممكن يعني في أكثر من احتمال. لكن أنت اللي بيحصل أنك بتحول الحقائق لقصة، القصة دي بقى هي اللي بتربي جواك شعور، والشعور ده هو اللي بتاخد عليه إجراء، والحقيقة مش كده.
فالأشخاص الناجحة في العلاقات بشكل كبير بيعرفوا يديروا الحتة دي كويس، اللي هو تحويل الحقيقة إلى قصة دي. يعني سيدنا النبي عليه الصلاة والسلام عمل ما هو أبعد، وسيدنا عمر بن عبد العزيز عمل إيه؟ يعني لو 100 واحد حكيت له الحقائق دي هيقول لك دول بيسخروا من فلان، هو حولها لقصة تانية خالص في ذهنه فخليته أهدى وأريح في التعامل، واضح يا جماعة؟ السيدة عائشة لما مسكت الآية بتاعته راحت كاسرة الطبق، الحقيقة إيه؟ أن الزوجة مسكت الطبق كسرته دي الحقيقة، وهو كان قاعد عنده الصحابة، يعني أنت متخيل واحد عندك ضيفان أصحابك ومراتك تعمل كده، فطبعا وقعها شديد مش كده، تخاف تبات في البيت الليلة دي لما قدامهم عملت كده، هتعمل إيه بقى لما خدوني معاكم؟ فالحقيقة إيه؟ مسكت الطبق رزعته، ممكن القصة تترجم في ذهننا أو مش ممكن، يعني غالب الظن أنها تترجم في ذهن أحدنا لو كان هو الموقف معاه: ما بتحترمنيش، ده قلة أدب الناس قاعدة جوه وتعمل كده. ده كله مش الحقيقة، الحقيقة أن هي رزعت الطبق كسرته دي الحقيقة، كل اللي بيحصل ده هو قصة أنت بتنسجها من وحي الحقيقة. سيدنا النبي عليه الصلاة والسلام قال كلمة تانية، قال: «غارت أمكم»، يعني حول الحقائق دي لقصة أخرى، قصة إيه؟ حب، ما هو اللي بيغير اللي بيحب، فهو حولها لقصة تانية.
فده مهم ومريح في العلاقات، وكتير من العلاقات بتبوظ بسبب حتة تحويل الحقائق لقصص، هي ما بتبقاش موجودة، فالشخص الآخر له فاهم أنت واخد جنب ليه وهو راخر هيبتدي يبني قصة؛ يعني أنت أخدت جنب يبقى هو متكبر، يبقى هو مش عارف إيه، طب يولع بقى ما يهمش، وكل واحد يبني قصته اللي هي مش موجودة في الأرض أصلا. طيب عشان نحل القصة دي نعمل إيه بقى؟ علشان موضوع الحقائق دي ما ننقلهاش لقصة وهمية غير واقعية؟ نعمل إيه؟ عندنا قاعدة ذهبية في التواصل، هي اسمها كده فعلا بيسموها القاعدة الذهبية في التواصل؛ اللي هي إيه؟ ما تفترضش، تواصل مع الشخص. يعني أنت شفت حقائق تيجي تقول له: يا فلان أنت عملت كذا، هو ده معناه أنت ليه عملت كذا؟ اسأله، أو هو ده معناه أن أنت مثلا بتقصد تهمشني، تقصد ما مش عارف إيه، واسمع منه، فأنت ما تفترضش حاجة وتبني عليها فعل.
خلاص، لا تواصل مع الشخص مباشرة واسمع منه. طيب إيه اللي جاب ده بقى؟ اللي هو تحمل الأذى ده؟ إحنا ليه إيه اللي جابه؟ أن في أشياء ما بتبقاش أذى أصلا، وإحنا بنفهمها أنها أذى لمجرد أن إحنا الصلة بين الحقيقة والقصة بنترجمها لقصة معانا في أذهاننا على طول تبقى أذى.
ففي الصحيحين أن أعرابيا جذب رداء النبي صلى الله عليه وسلم حتى أثرت حاشيته في عاتقه صلى الله عليه وسلم، ثم قال: يا محمد، مر لي من مال الله الذي عندك. فالتفت إليه رسول الله صلى الله عليه وسلم ثم ضحك ثم أمر له بعطاء. يبقى هنا تحمل الأذى النبي صلى الله عليه وسلم. هل معنى كده نعمل ده مع كل حد؟ لا، يعني إيه؟ يعني سيدنا النبي عليه الصلاة والسلام هنا تحمل الأذى وأمر له بعطاء، وفي رواية قال: «رحم الله أخي موسى أُوذي بأكثر من ذلك فصبر»، وفي رواية أن الراجل ده كان كافر ورجع وأسلم ورجع قال: يا قوم أسلموا، فإن محمدا يعطي عطاء من لا يخشى الفاقة أو يخشى الفقر. فإذا كانت هذه الحادثة أو غير هذه الحادثة على كل حال، هل بقى كل ما واحد يعمل معايا حاجة اسكت وأتحمل الأذى وكده؟ في بعض المواقف ده مش مطلوب، والانتصار لنفسي أحيانا يكون مقدما، ماشي خصوصا مع واحد هو بيستمر في ذلك، ولو سكت المرة دي مش هيفهم أنها تحمل أذى، هيفهم أنك ضعيف ويزود في الأذى، فحينها آه ممكن واحد يدور على حقه ويروح يشتكي ويروح يشوف مين يجيب له حقه ويقف للي بيظلم. لكن يعني دول عندنا معنيين أهم كبار، معنى تحمل الأذى قدامنا ومعنى الانتصار للنفس أحيانا، يعني هذا لا ينافي ذاك أو لا ينافي حسن الخلق.
﴿وَالَّذِينَ إِذَا أَصَابَهُمُ الْبَغْيُ هُمْ يَنتَصِرُونَ﴾ [الشورى: 39]، فممكن أحيانا الإنسان ينتصر ما فيهاش مشكلة. طيب، وكان أذاه قومه، قال: «اللهم اغفر لقومي فإنهم لا يعلمون». وكان أويس القرني إذا رماه الصبيان بالحجارة يقول: يا إخوتاه، إن كان ولا بد فارموني بالصغار لئلا تدموا ساقي فتمنعوني من الصلاة. سيدنا أويس القرني، العيال الصغيرة طبعا هم شايفينه لابس مقطع وماشي لوحده ما كان يستوحش من الناس، فبيعاملوه زي المجانين، يعني العيال الصغيرة يقعدوا يرموه بالطوب، سيدنا أويس القرني سيد التابعين، أفضل واحد في التابعين كلهم أويس القرني. مش بس كده، النبي عليه الصلاة والسلام يؤمر الصحابة لو لقيتوه مروه فليستغفر لكم، بيقول للصحابة كده: لو حد منكم شايف واحد اسمه كذا، سماه النبي عليه الصلاة والسلام أويس القرني، وقال علامة في جسمه، اللي يشوفه منكم يأمره أن هو يستغفر له. طبعا كان أويس القرني كانت هدومه مقطعة يلبس المرقع، وبعدين ما ياكل إلا العيش الناشف اللي بيبقى مرمي ده في الشوارع، يلمه كده يروح يسقطه في النهر يبوشه وينظفه ويأكله، ولما يتعرف يهرب. سيدنا عمر بن الخطاب لما لقاه وعرف أن هو أمره أن هو يستغفر له، زوج بعد ما استغفر له يعني وزوغ، تتخيل كده إيه؟ واحد ليه منصب بقى رئيس جمهورية ولا رئيس وزراء ولا ملك دولة، وجاي يسأل عليك لغاية ما أوصل لك هتفضل لابد له مش كده؟ هو كده راح مزوغ على طول مش عاوز حد يعرفه.
وخرج إبراهيم بن أدهم إلى بعض البراري، الصحراء يعني، فاستقبله جندي فقال: أين العمران؟ جندي إلا إبراهيم بن أدهم بيقول هو العمران فين؟ فأشار إلى المقبرة. طبعا إبراهيم بن أدهم في وادي والجندي في وادي، بيقولوا العمران فين فين البلد؟ المقابر زمان يا جماعة كانت في الصحراء، كانوا يدفنوا الموتى في الصحراء، البقيع ده كان بره المدينة عشان بس تبقوا مستوعبين. المدينة كان مسجد النبي عليه الصلاة والسلام كان حوالي 35 متر في 35 متر، تقريبا 70 ذراع في 70 ذراع، 35 متر في 35 متر وحجرات النبي عليه الصلاة والسلام مكان ما هو مدفون دلوقتي، دي كانت حجرة عائشة والحجرات جنبها كده خلاص، وحواليه وبعديه صف تاني من البيوت في المدينة، وشكرا دي المدينة. البقيع كان خارج المدينة، كانوا بيدفنوا الموتى في الصحراء، وكانوا لما يجي حد يعمل اعزكم الله عاوز يعمل حمام يخرج إلى الخلاء اللي هي الصحراء، فكانوا يطلعوا لناحية البقيع عشان يعملوا حمام، ما كانش في حمام في البيت، فهو بيقول له فين العمران يعني فين البلد، أمشي إزاي عشان أوصل البلد؟ فراح مشاور له على المقبرة. إبراهيم بن أدهم يقصد أن هو ده هو ده العمران يعني عاوزين نعمر هذا المكان المقابر.
فضرب رأسه فشج، راح الجندي ده راح ضربه عور دماغه، فلما أخبر أنه إبراهيم، ما يعرفش إبراهيم بن أدهم، طبعا نار على علم من الأولياء هو ما يعرفش إبراهيم بن أدهم، فلما ضربه قالوا ده إبراهيم بن أدهم اللي أنت ضربته ده إبراهيم بن أدهم، جعل يقبل يده ورجله له، فقال: إنه لما ضرب رأسي سألت الله له الجنة، لأني علمت أني أؤجر بضربه إياي، لما ضربني في رأسي سألت ربنا الجنة، ليه ليه؟ لأن ضربته ليا بأجر، فلم أحب أن يكون نصيبي منه الخير ونصيبه مني الشر، ما حبتش يبقى هو بيديني حسنات وأنا أدعي عليه، لا هو ضربني في رأسي دخلني يعني قربني إلى الجنة فدعوت الله له. طبعا النفوس، يعني سلام نفسي ما فيش بعد كده، مين يعرف يعمل دي؟ جرب بالمايك على طول. واجتاز بعضهم في سكة، فطرح عليه رماد من السطح، زمان كانوا يطبخوا في الفرن فيجيبوا الورق ويجيبوا الخشب ويجيبوا ما.
يولعوا فيه علشان ينضجوا، فخلصنا فيتبقى الرماد، فتروح الست طالعة من فوق السطح بتاع البيت وتروح رامية الرماد، فهو اجتاز بعضهم في سكة فطرح عليه رماد من السطح فجعل أصحابه يتكلمون، يقولون: اغضب، أنت هترمي عليك رماد كده وهتسيبهم؟
فقال: من استحق النار فصولح على الرماد لا ينبغي له أن يغضب. يعني يقول: أنا أستحق دخول النار فربنا صالحني على شوية رماد، يعني خذ شوية رماد فوق دماغك واحتسب فتثاب ويكفر عنك من سيئاتك باحتسابك ذلك، فتبعد عن النار شوية. من استحق النار فصولح على الرماد لا ينبغي له أن يغضب، أغضب ليه؟
هم يا جماعة كانوا المعنى اللي بندور حواليه في الخطب والدروس كانوا يرون كل شيء فعل الله سبحانه وتعالى. يعني اللي رمت الرماد دي، أنها سنترت يعني رميت الرماد في الوقت اللي هو معدي فيه عشان ينزل على نفوخه، احنا يا نفوخنا ما هي دي ما ينفعش تبقى تعدي كده، فاهمين يا جماعة؟ يعني أكيد واضح قوي فيها القدر.
يعني ما كان ممكن لو بس ثانيتين بدري ولا ثانيتين متأخر ولا كنت هشوف الرماد ده، فيعني ينزل على نفوخي ما هيش مسنطرة نفسها يعني ترميه على نفوخي، طب نرى فيه إيه؟ نرى فيه القدر، يبقى ده فعل ربنا بيا أن ينزل عليا الرماد ده فلا ينبغي له أن يغضب.
فهذه نفوس ذللت بالرياضة فاعتدلت أخلاقهم، ونقيت عن الغش بواطنها فأثمرت الرضا بالقضاء، ومن لم يجد من نفسه بعض هذه العلامات التي وجدها هؤلاء فينبغي أن يداوم الرياضة ليصل فإنه بعد ما وصل.
أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير