دخولتسجيل الدخول

٥- تابع كتاب رياضة النفس

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم، إنك حميد مجيد. أما بعد؛ المرة الفتة كنا بدأنا نتكلم على مسألة أن كل عضو سلامة العضو ومرضه بحسب أن هذا العضو بيؤدي الوظيفة التي خلق من أجلها أو لا. الكلام ده اتكلمنا فيه المرة اللي فاتت. قال: وأما علامات عودها إلى الصحة بعد المعالجة، إحنا اتكلمنا طبعا عن أن العضو المريض يعالج، فهو علامة، فهي بقى ولا إيه؟ أن ينظر إلى العلة، فإن كان يعالج داء البخل فعلاجه بذل المال.

يبقى أشرنا إلى هذا المرة اللي فاتت قلنا: إن المرض الذي نعالجه نعالجه بضده، كما تعالج الحرارة بالبرودة، لو تفتكروا قلنا: لو واحد سخن نجيب كمادات نحطها عليه عشان الحرارة تنزل. وساعتها قلنا حاجة مهمة جدا ولازم نعيها في طريق اصلاح القلب، أن احنا نفرق بين المرض والعرض. يعني إيه؟ يعني كتير مثلا من الشباب يجوا يقولوا: مش عارفين نغض البصر بنطلق البصر، ده مرض ولا عرض؟ ده عرض، المرض في قلبك، ولو صلح القلب لغضضت البصر. ماشي يعني لو تمت لك المراقبة وعظم منك الخوف هتطلق البصر.

قلنا لكم قبل كده مثال لو تفتكروا لما اتكلمنا عن أنه لا يخرج الشهوات من القلب إلا خوف مزعج أو شوق مقلق، فاكرين وقلنا: اتحط على راسك كده مسدس، والراجل راح معمره كمان عمل التكة دي عشان إيه يبقى أبلغ في الإنذار يعني. وقال لك: الباب اللي ناحية الشمال ده هتخرج منه أجمل نساء الأرض، لو عينك رمشت مش بصيت المسدس هيتفرغ في نفوخك، هتفكر تبص؟ مستحيل، ادي أجمل واحدة أهو هتخرج، طب ليه؟ لأنه عظم الخوف هنا مش من الله بقى يعني، بس عظم الخوف من شيء، فمستحيل يبقى إطلاق البصر هو عرض وليس مرضاً. المرض فين بقى؟ ضعف المراقبة، ضعف الخوف.

ساعتها حتى قلنا لكم إيه: سيبك يا عم مش مسدس ومش هتموت وبتاع، واحد بعت لك على اللابتوب ولا على الموبايل قال لك بقى إيه واحد من أصدقاء السوق صورة ما فيش بعد كده ولا فيديو، ما جيت تدوس لقيت الأنتيفيروس مطلع لك رسالة كده أنه إيه الفايل ده فيه فيروس وهيدمر الجهاز بتاعك، هات تتجرأ أنك تفتح؟ مستحيل، ليه؟ ده بيقول لك صورة ما فيش بعد كده ولا فيديو ولا مستحيل، ليه؟ في خوف، فالخوف منعك من النظر.

يبقى عاوزين نفرق وإحنا في طريقنا إلى الله عز وجل وإحنا بنعالج تلك القلوب، لابد أن احنا نفرق بين العرض والمرض، زي الطبيب كده؛ الطبيب ممكن بسرعة يشتغل على العرض، لأن العرض ده ممكن يهلكك. قلنا لكم: اللي جاي وعنده سخونية، لو الحرارة عالية قوي الطبيب قبل ما يفكر يشخص يجري ينزل لك السخونية، هنا بيتعامل مع عرض، إحنا ما نعرفش لسه السخونية جاية من إيه، السخونية ممكن تيجي من مية حاجة. وبعدين يرجع بقى الطبيب بهدوء يتتبع الأمراض، شوف الأمراض اللي من أعراضها السخونية عشان يوصل المرض إيه ويعالج.

إنما تخيلوا كده كل ما يجي سخونية تحط كمادات، كل ما أنت ما بتعالجش، أنت عمال تعالج في العرض، فمهم جدا ننتبه لده، عشان كتير من الشباب تلاقيه عمال ماسك في العرض وعمال عصره، وفي الآخر يقول لك: يا شيخ ما أنا برضه مش عارف أغض البصر، مش عارف أبطل إباحية، مش عارف أبطل عادة سرية. ما هو أنت يا حبيبي مشكلتك مش في ده، هو ده عرض لمرض تاني، ولذلك يعني اللي يفهم ده بقى هيبتدي ينور في دماغه حاجات.

في واحد يقول لك إيه: أنا مثلا رحت أنا ما كنتش مثلا مواظب على الصلاة، أو أنا ما كنتش بلبس حجاب مظبوط بنات يعني، رحت درس لفلان أو سمعت حلقة للشيخة فلانة ولا المعلمة فلانة، طلعت من عندها ما قلعتش الحجاب، طب المعلمة دي جابت سيرة الحجاب؟ لا يعني الدرس كله ما فيهوش كلمة حجاب أصلاً، طب أنت لبستي الحجاب ليه ولا ظبطتي حجابك ليه؟ لأن قلع الحجاب مش مرض، قلع الحجاب عرض، مفهومة؟

فهو هنا بيقول بقى إيه: علاج البخل مثلا علاج داء البخل بذل المال، يبقى إحنا بنتكلف عكس الطبع، يبقى أنا بخيل نقول لك: تكلف الكرم، وأنت بتطلع الجنيه كده بتبقى حاسس أن روحك هتطلع، معلش تعال على نفسك وتكلف الكرم، يقوم شويه يعتدل طبعك. طيب هل ده بس؟ لا، ده ده علاج عملي، في علاج علمي، وإحنا إن شاء الله لما ندخل في الابواب يا جماعة هنيجي لباب الرياء، وباب الكبر، وباب العجب، وباب الحسد، وكل الأبواب دي هتيجي معانا إن شاء الله هنلاقي كده، هنلاقي في علاج علمي هنقعد نكلم نفسنا كده في حاجات، وعلاج عملي.

ماشي، قال: ولكنه لا يسرف ولا يصير إلى حد التبذير. طيب هو في نفسه ما يسرفش ولا يبذر، هل ممكن نوجه الخطاب إليه بالصرف والتبذير؟ آه، ممكن، ليعتدل طبعه، مفهومة دي؟ يعني إيه؟ يعني واحد بخيل أنت عارف أنه لو طلع من جيبه شلن، الشلن ده لسه موجود ولا خلاص؟ حد هنا ما شافش الشلن؟ ما شافش الشلن كتير، ها فين الشلن؟ حد عارف الشلن؟ مش عارفينه؟ خبر أبيض! عجزنا قوي إحنا، ده كان بيجيب حاجات كتير زمان، ماشيين، ده اللي هو الخمسة ساغ، عارفين الساغ بقى ولا؟ خمس قرش يعني، الجنيه مية قرش، عارفين الجنيه؟ آه.

فأهو الشلن زمان بقى كان حاجة فخمة كده، كان قد الجنيه يعني حاجة حلوة كده، كان في منه ورق، كنا متروقين زمان. مرة كنت في إسكندرية زمان وأنا ظاهر في الجامعة، وبعدين كنا ناحية المعمورة كده أنا وواحد تاني وعايزين نروح حتة بقى مش فاكر يعني، فبننسال واحد: نروح الحتة دي ازاي؟ فقال: هتطلع تلاقي مشروع اركبه. فإحنا لا فاهمين أمة ولا فاهمين، إحنا مش عارفين الجمله بالنسبة لنا غريبة جدا، إيه أمة وإيه مشروع؟ دي مطمانة يعني النصية عند الإسكندرانية، والمشروع اللي هو الميكروباص عندنا، فإحنا مش عارفين إيه أمة وإيه مشروع، قلنا نمشي شوية هنلاقي حاجة مش في القاهرة تبقى دي المشروع، ما كلمة مشروع أوحت لنا إنه إيه في طفرة حاصلة وحاجة جديدة هتعدي قدامنا.

فضلنا واقفين شوية ما فيش خالص حاجة جديدة، فسألنا قالوا لنا بقى: المشروع ده اللي هو الآية الميكرو، يعني بعدين ركبنا، نقول للراجل: الأجرة كام؟ قال: أربعة شلن. دي بقى عندهم الشلن كانوا يسموه شلن، أربعة شلن يعني إيه؟ ريال. فوقوا كده يا شباب، عاوزين ناس مصحصحة، إنتوا طبعا الطلاسم دي ها عملات تانية ما تعرفوش عنها حاجة، ماشي، الريال اللي هو العشرين قرش، من العشرين قرش دول بقى كانوا يدوك من أول إسكندرية لآخرها، من المعمورة للقلعة، تركب بعشرين قرش، ماشي.

طيب فانت عارف أن واحد يطلع الشلن بالعافيه تقوم تقول له: روح ادفع ألفين جنيه مثلا، ويكون ألفين جنيه ده رقم كبير جدا، أن هو لو دفعه يبقى مسرف أو مبذر أو كده، ممكن عادي لأن هو مش هيطلع الألفين جنيه، هو أنت لما تقول له كده هيروح يطلع عشرة جنيه، بس أنت كده بتعمل ايه؟ بتشده قوي علشان يعتدل.

فده ساعات نستخدمه في الخطاب الدعوي، ساعات في خطابنا الدعوي نخوف قوي، الخطاب ده لو خدته لوحده، يعني لو جيت لواحد معتدل واديته الخطاب ده نقول لا: الخطاب ده غلط، الخطاب ده كله تخويف كله تشديد كله، المفروض نقول صح، لما يكون الغالب على الناس الغفلة، أو الغالب على الناس التجرؤ على المعاصي، فتقوم تخوف بخطاب شديد يصلح هذا، يصلح ليه؟ عشان أنت تقعد تخاوف من هنا لبكره، في الآخر هما برضه مش هيوصلوا للاعتدال، يعني هيبتدوا يجوا واحدة واحدة معاك، وده احنا كنا ناقشناه قبل كده أو يعني أشرنا إليه المره السابقة.

طيب، قال فيحصل داء، قال: ولكنه لا يسرف ويصير إلى حد التبذير، فيحصل داء آخر اللي هو التبذير بقى والصرف، يعني ممكن واحد يبقى مشكلته في العكس، هو مسرف، وتلاقيه مع إسرَافِهِ ده بقى ضيع أهله وضيع بيته وضيع، ليه؟ مسرف، ما اللي في جيبه يتفرتك كله، طب ابنه بعد كده عاوز علاج، ما حوش فلوس علاج، طب بنته عاوزه حاجة مهمة لحياتها ولا ما فيش فلوس، ليه؟ عشان صرف فلوسه في أي حاجة بقى، أي سفاهة، في ناس كده، في رجال كده.

طيب فيكون داء أيضاً، بل المطلوب الاعتدال، وإذا أردت أن تعرف الوسط فانظر إلى نفسك؛ فان كان إمساك المال وجمعه ألذ عندك وأيسر عليك من بذله لمستحقه، فاعلم أن الغالب عليك خلق البخل، فعالج نفسك على البذل. وإن صار البذل للمستحق ألذ عندك وأخف عليك من الإمساك، فقد غلب عليك التبذير، فارجع إلى المواظبة على الإمساك، والله الثانية دي ممكن يبقى فيها نظر شويه، لو كان ألذ لتلمحك الثواب الشرعي فده محمود، تلمحت ثواب الإنفاق وثواب البذل، وعرفت أن ما تنفقه يخلفه الله سبحانه وتعالى، فصار البذل أحب، مش شرط يبقى تبذير، مش شرط.

لكن علماء السلوك تكلموا في معنى هنا الحقيقه جميل، قالوا: أن دي هي المرتبه الأعلى، ولا في مرتبة أعلى من كده؟ يعني واحد يقول لك: أنا بحب أو قلبي يميل إلى البذل أكتر، وقالوا: دي مرتبة عالية طبعا، لكن قالوا: في مرتبة أعلى منها، اللي هي إيه بقى؟ اللي هي يستوي عنده الإنفاق والإمساك، شرع معين في قيمة ليه لسقوط المال في عينه، فإحنا مش هنفهم الكلام ده غير لما نمثل بشيء حقير، تخيل كده مثلا فتلة كده على هدومك، فقلت لك: أيهما أحب إليك أن تمسك هذه الفتلة أو أن تبذلها؟

هتقول لي إيه؟ تقول لي: امشي من هنا، امسك إيه وأبذل إيه، هي أنا فارقة معايا أمسكها أبذلها، هي مش فارقة معايا حاجة أصلاً، شيء حقير يعني مش في دماغي خالص. قالوا: أن في بقى ناس بتوصل للمرتبه دي، هو المال بالنسبة له زي الفتلة اللي على هدومك دي، مش فارقة، إن أمسكه مش فارقة، بذله مش فارقة، حوشه كله مش فارقة، راح منه كله مش فارقة، المال ما بيساويش عنده حاجة أصلاً.

ماشي، فالمثال اللي ضربه النبي عليه الصلاة والسلام: لو أن الدنيا تعدل عند الله جناح بعوضة ما سقى منها كافراً، هي لا تعدل، مش مش تعدل هي لا تعدل، فجناح بعوضة، فتخيل بسألك السؤال ده على على جناح بعوضة تمسكه أحسن ولا تنفقه أحسن؟ تحس السؤال سؤال ما لا وجه له، ليه؟ شيء حقير، أمسك إيه وأبذل إيه، ورق بقى معايا.

فيوم ما تيجي تبذل هتلاقي نفسك بتبذل لأن الشرع أمرك هنا بالبذل، مش لأن البذل أحب، هو أنت من المال ما لا وزن له، عشان يبقى أحب؟ وإن أمسكت، أمسكت لأن الشرع هنا أمرك بالإمساك، بس، زي بالضبط لو جناح الناموسة دي فيها أحكام شرعية، فأجي أقول لك: أيهما أحب؟ تقول لي: هو ربنا، ربنا سبحانه وتعالى يحب إيه؟ لأن الجناح مش فارق معايا، فقول لي ربنا بيحب إيه هعمله في الجناح، بس.

قال: فيحصل داء آخر، آه لا خلاص، وإذا أردت أن تعرف الوسط فانظر إلى نفسك؛ فان كان إمساك المال وجمعه ألذ عندك وأيسر عليك من بذله لمستحقه، فاعلم أن الغالب عليك خلق البخل، فعالج نفسك على البذل، وإن صار البذل للمستحق ألذ عندك وأخف عليك من الإمساك، فقد غلب عليك التبذير، فارجع إلى المواظبة على الإمساك، دي خلصناها، ولا تزال تراقب نفسك وتستدل على خلقك بتيسير الأفعال وتعسيرها، حتى تنقطع علاقة قلبك عن المال، فلا تميل إلى بذله ولا إمساكه، بل يصير عندك كالماء، فلا تطلب فيه إمساكه لحاجة محتاج، أو بذله لحاجة محتاج، اللي إحنا لسه شارحينه من شوية على الفتلة وجناح البعوضة، مش فارقة معاك تمسك ولا تبذل.

فكل قلب صار كذلك، فقد أتى الله بقلب سليم في هذا المقام. خلاص لما تنقطع شهوة قلبك عن البذل للبذل أو الإمساك للإمساك سلم، فقد سلم قلبك في هذا المقام بقى خلاص، أمَالَ يبقى شهوتي في البذل ليه؟ مش للبذل، لأن الله أمر هنا بالبذل، وهنا شهوتي في الإمساك ليه؟ مش للإمساك، لأن الله أمر هنا بالإمساك.

ويجب أن يكون سليماً على سائر الأخلاق، وده يا جماعة في كل حاجة، يعني لو جيت قلت لك: الغضب حلو ولا وحش؟ على، أيوه، على حسب، يعني هو، آه، يعني النبي عليه الصلاة والسلام السيدة عائشة قالت: ما غضب قط، قالت كده إلا أن تنتهك محارم الله. والله عز وجل لما خلق الغضب فينا خلقه لحكمة، يبقى هو في يعني في اوقات إحنا محتاجين الغضب، وإلا لكسد سوق الجهاد، لو إحنا ما بنغضبش خالص، يبقى يسب الله ويسب دين الله وإحنا قاعدين كده ما فيش غضب ولا في حاجة مش.

ويجب أن يكون سليماً على سائر الأخلاق، حتى لا تكون له علاقة بشيء من الدنيا، حتى ترحل النفس عن الدنيا منقطعة العلائق منها، غير ملتفتة إليها، ولا متشوقة إلى أسبابها. يبقى وأنت بتموت كده ما أنتاش عاوز حاجة من الدنيا خالص؛ ليه؟ رحلت الدنيا عن قلبك زي ما اتكلمنا عن المال، ما بقاش ليه حظ في قلبك. قل مثل ذلك بقى على كل حاجة، على العقار، وعلى السيارة، وعلى النساء، وعلى الفورمة، وعلى وعلى كل حاجة، قلبي مش متعلق بشيء من الدنيا. يعني هسيب ده كله؟ مش نقول سيب ده كله، لكن ما فيش حاجة في قلبك من الحاجات دي. النبي عليه الصلاة والسلام لما يقول للناس: يلا هاتوا الفلوس عشان نجهز الجيش، يقوم يجيله أبو بكر بكل فلوسه، وده أعلى المقامات يعني هو من كأبي بكر، لكن هو ده المقام اللي بيتكلم عليه اللي هو.

هنا الله عز وجل يندبنا إلى الإنفاق، خد الفلوس. خلاص. قال: فحينئذ ترجع إلى ربها رجوع النفس المطمئنة. ولما كان الوسط الحقيقي بين الطرفين في غاية الغموض، بل هو أدق من الشعر وأحد من السيف؛ فلا جرم من استوى على هذا الصراط المستقيم في الدنيا، جاز على مثل هذا الصراط في الآخرة.

يعني دلوقتي الموضوع ده سهل نحسبه وسهل نقف في النص؟ قال لك: صعبة جداً انك تبقى أنت عارف دلوقتي أنا ناحية البخل؟ لا أنا رجعت ناحية التبذير؟ لا أنا هنا في النص؟ وده كله احنا بنتكلم على إيه؟ على حاجة واحدة، فأنت المفروض بتراقب نفسك في آلاف الأمور آلاف الأشياء. عشان كده يا جماعة احنا قلنا اللي يعرف فعلا مطلوبات الشرع منه ما عندوش وقت، لا عنده وقت يضيعه في تفاهات، ولا عنده وقت يضيعه على السوشيال ميديا بيقلب هنا، ويتلطع هنا، ويشات هنا، ويعمل هنا، ولا عنده وقت يخصم حد، ولا عنده وقت ما عندوش وقت. احنا عشان ما احناش متعودين ننشغل بأنفسنا وما يصلح تلك النفس، إنما تخيلوا احنا بنقول ده أنا قلت لك بس ربما راقب نفسك بس في المال بس، هتقعد تعمل إيه طول اليوم بقى؟ راقب نفسك في ألفاظك، وأنا بكلمك في في جارحة اللي هو اللسان، قال عنها النبي صلى الله عليه وسلم: «وهل يكب الناس في النار على وجوههم أو قال على مناخرهم إلا حصائد ألسنتهم».

يعني أكثر ما يكب الناس في النار الألسن، لسانك. فلو جيت قلت لك بس النهارده راقب نفسك في الكلام اللي بتقوله، والله ما يبقى عندك وقت ولا مجهود ولا ذهن تفكر في غيرك. قال لك إيه وغيرك عمل إيه وده نغزني ودي بصت لي وده عمل لي، ما عندكش وقت.

فبيقول لك بقى لو أنت استويت على هذا الصراط في الدنيا، أجزت ذلك الصراط في الآخرة. طب لو ما استويتش عليه في الدنيا، هنعمل إيه في الآخرة؟ يعني نسأل الله الرحمه، يعني مش معناها اللي مش هيستوي هنا وإلا يبقى كله هالك بقى. هو مين فينا اللي استوى على الصراط في الدنيا؟ يعني في كل الأمور؟ طب معنى كده نتكل على الرحمة؟ لا: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمَحْسِنِينَ﴾ [العنكبوت: 69]. ماشي، وبعدين النبي قال إيه عليه الصلاة والسلام: «ألا إن في أيام دهركم لنفحات، ألا فتعرضوا لها». فازاي نتعرض لنفحات الله عز وجل ورحماته؟ الله! إن ربنا سبحانه وتعالى إذا نظر إلينا رانا نجاهد. فلما نموت يبقى لنا العذر، حتى لو ما كناش في الوسط، نقول: والله يا رب جاهدنا وعملنا اللي نقدر عليه، وما سبناش نفسنا كده. إنما واحد سمع الكلمتين من هنا وخرج: والله قضينا يوم لطيف والجو جميل، فطب عملت إلا حاجة؟ ولا حاجة، ما عملتش حاجة.

فده ربنا هيعامله زي واحد سمع الكلمتين وخرج قال: لا أنا هجاهد نفسي، لا أنا لازم أشتغل على نفسي؟ العدل يأبى ذلك، العدل يأبى ذلك. الفضل ما حدش يتكلم فيه، ما نقدرش نتجرأ على ربنا ولا نتآلى عليه، إنما إنما العدل يأبى ذلك؛ أن يُعامل هذا كَهذا، ﴿أَفَمَن كَانَ مُؤْمِنًا كَمَن كَانَ فَاسِقًا ۚ لَّا يَسْتَوُونَ﴾ [السجدة: 18]، ﴿أَفَنَجْعَلُ الْمُسْلِمِينَ كَالْمُجْرِمِينَ * مَا لَكُمْ كَيْفَ تَحْكُمُونَ﴾ [القلم: 35-36].

ولأجل عسر الاستقامة، أمر العبد أن يقول في كل يوم مرات: اهدنا الصراط المستقيم. يبقى كأنك قد يئست وقد سمعت ما سمعت أن تستقيم. ما أنت عرفت أن الاستقامة يعني إيه؟ يعني في بند واحد اللي هو المال اللي أنت سمعته ده، دخل بقى كل حاجه في حياتك وكل شهوة، فقد يئست أن تستقيم بحولك وقوتك، يئست، فعملت إيه؟ فلجأت إلى من له الحول والقوة. فإذا به جل وعلا قد يسر الأمر عليك، عشان حتى لو غافل؛ اهو أوجب عليك كل يوم وليلة أوجب انك تقول كم مرة: اهدنا الصراط المستقيم؟ سبع عشرة مرة على الوجوب، وعدد غير محصور بقى على الندب. ليه سبت عشرة؟ اثنين فجر، أربعة ظهر، أربعة عصر، ادي عشرة، ثلاثة مغرب، أربعة عشاء، ادي سبت عشرة، كل ركعة تقول: اهدنا الصراط المستقيم، على الوجوب.

شوفوا يا جماعة، يبقى لو فهمنا شرع هنجد أن حتى الأمور التي أوجبها الله عليه وأثمنا بتركها، إنما أوجبها علينا رحمة بنا. فهمتوها دي؟ يبقى هو أوجب عليك سبع عشرة مرة تقرا الفاتحة أو تؤمن على قراءة الفاتحة، تقوم تقول: طب ليه يعني؟ ما كانت تبقى زي المهابيل بتوع القرانيون دول، يقول لك: الصلاة دي إيه علاقة بيني وبين ربنا؟ ما حدش له دعوة بيها. يعني إيه؟ يعني أنا النهارده هقوم هقول أستغفر الله مية مرة كده صليت، خلاص بكره الشوق جابني على الحمد لله هحمد ربنا بعده، كده، ما هو بيقولوا كده، بيقولوا ما فيش حاجه اسمها يعني الصلاة ما هو ما عندهمش سنة. كانوا الأول يتكسفوا، يعني يقول لهم: طب هتصلوا إزاي؟ يتكسفوا ما يعرفوش يردوا، اتجرؤوا بقى، قال لك: يعني أنتوا خلاص هتزنقونا؟ طب هنصلي زي ما نصلي، صلي بقى مالكوش دعوة بينا احنا إيه مجانين؟ اه، يبقى اهدنا الصراط المستقيم.

يبقى هنا الله عز وجل أمرك أن تدعوه بذلك الدعاء ليعينك عليه، ليه؟ لأنك بجدعنتك مش هعمل حاجه ولا بقوتك ولا بقوة إرادتك ولا الكلام ده خالص.

طيب، ومن لم يقدر على الاستقامة فليجتهد على القرب من الاستقامة، ما تيأس بقى وربنا رحيم يا جماعة، عشان بس ما إيه ما يقولش أنت قنطتنا من رحمه ربنا، احنا كده مين فينا هيبقى في الحته دي؟ لا ربنا رحيم سبحانه وتعالى، وزي ما قلنا لكم بس يرى منك المجاهدة بس. ماشي.

فإن النجاة بالعمل الصالح، ولا تصدر الأعمال الصالحة إلا عن الأخلاق الحسنة. فليتفقد كل عبد صفاته وأخلاقه، وليشتغل بعلاج واحد بعد واحد، وليصبر ذو العزم على مضاضه؛ سيحلو كما يحلو الفطام. يعني في الأول الموضوع صعب ومر، زي أي حاجة؛ العيل الصغير أول ما توقف له الرضعة يقعد يرفص ويعيط ويزعق ويزمُزِق وبتاع، تعال له بعد كده سنة وقول له ادي له الرضعة تاني، يقوم مش عاوز يرضع عاوز ياكل، خلاص فطم. وقول مثل بقى هي الدنيا كلها كده يا جماعة، الدنيا كلها كده. اللي بيروح جيم وعمل عضلات ده أول يوم تلاقيه راجع مكسح تاني، بعد كده أما يعتدي الأمر يبقى لذته في الساعة بتاعت الإيه أو أكتر يعني بتاعت الوقت ده، هو ده وقته اللي بيتبسط فيه. ما هو في الأول كان يبقى راجع عنده مزق، وعنده شد، وعنده مش عارف إيه: والله ما أنا رايح تاني، يعني.

فكذلك تلك المعالجة في الأول هتكون صعبة، لكن ربنا سبحانه وتعالى واحدة بواحدة تسهل بعون الله عز وجل، وربما تلذذت بها، فانه سيحلو كما يحلو الفطام للطفل بعد كراهته له، فلو رد إلى الثدي لكرهه. ومن عرف قصر العمر بالنسبة إلى مدة حياة الآخرة، تحمل مشقة سفر أيام لتنعم الأبد.

قلنا لكم قبل كده إيه النسبه؟ حد هنا شاطر في الرياضيات؟ دلوقتي عندنا كده قاعدة أن أي حاجه تتقسم على ما لا نهاية، أي رقم، حط أي رقم، مليار، أي رقم، أول ما تقسمه على ما لا نهاية الناتج يبقى إيه؟ صفر. مش كده أهو؟ احنا ده اللي احنا، الآخرة لا نهاية لها، ما لا نهاية. فلما طبعا أنت فاهمين أن احنا لما نجي ننسب شيء لشيء نقسمه عليه، ولا دي مش فاهمينها؟ يعني التلاتة بالنسبة للسته كام؟ عرفنا ازاي؟ قسمنا ثلاثة على ستة طلعت نص، فما تجي تنسب شيء لشيء اقسمه عليه تعرف هو نسبته قد ايه منه.

خلاص، فاحنا دلوقتي عاوزين نعرف مدة حياتك قد إيه بالنسبة للآخرة؟ صفر، ما أنت هتقسم على ما لا نهاية، مهما تعيش بقى هي صفر. فهو بيقول لك: أنت عمرك قصير جدا، عمرك صفر إذا نسبته للآخرة. فشوف، طب ليه بننسب للآخرة؟ لأن أنت بتبيع ده بده، فاحنا عاوزين نشوف اللي احنا هنشتريه ده ونسيب الآخرة في مقابلة يساوي قَد إيه من الآخرة.

وقلنا لكم قبل كده، أما أقول قلنا لكم دي يعني إيه قلنا في حتة بقى مش لازم هنا، يعني ماشي أنا مبسوط أن احنا ما بنكونش قلنا هنا حاجة بس الناس مبسوطه ومتفعلة ومستعتبرين أن احنا قلنا، آية جميلة جدا في القرآن: ﴿وَالْآخِرَةُ خَيْرٌ وَأَبْقَى﴾ [الأعلى: 17]. الآية دي جميلة جدا وهي يعني من السور المحفوظة للناس كلها: ﴿بَلْ تُؤْثِرُونَ الْحَيَاةَ الدُّنْيَا * وَالْآخِرَةُ خَيْرٌ وَأَبْقَى﴾ [الأعلى: 16-17].

تعال النهارده لو جيت قلت لك إيه؟ بقول لك إه تاخد الشقة دي أوضة وصالة، ولا القصر المشيد المنيف اللي هناك ده اللي بجناين واللي بمش عارف إيه و، فحضرتك هتقول إيه بدأة: هات القصر. فوانت رايح القصر قلت لك: آه، بس أنا في معلومة نسيت أقولها لك، فبصيت لي، قلت لك: القصر ده لو رحته هو القصر ده هيبقى لك لمده يوم، أنما لو خدت الشقة بتاعتك طول العمر. ساعتها هختار إيه؟ الشقة طبعا، هو اللي جنبي بيقول لك: الشقة طبعا، قصر إيه يوم وأطلع وتحسرني طول حياتي، أبقى متحسر على اللي سيبتها، هات القصر؟ اديني الشقة طول عمري.

طيب هو أيهما خير القصر ولا الشقة؟ القصر. طب أنت رحت الشقة ليه؟ عشان أبقى عشان أبقى. تخيل بقى أن جيت أنا قلت لك إيه: لو خدت الشقة لا هتاخدها يوم، ولو خدت القصر هتاخده العمر كله، رحت أنت رايح واخد الشقة. فإيه؟ هو ده الآية: ﴿بَلْ تُؤْثِرُونَ الْحَيَاةَ الدُّنْيَا * وَالْآخِرَةُ خَيْرٌ وَأَبْقَى﴾ [الأعلى: 16-17]. عجيبة جداً، اللي بتعملوه ده شيء عجيب. اللي بتعملوه ده اللي هو أنا، يعني مش أنا بقول لكم، أنت اللي بتعملوه: أيها الناس، أيها البشر، شيء عجيب.

قال: ومن عرف قصر العمر بالنسبة إلى مدة حياة الآخرة، تحمل مشقة سفر أيام لتنعم الأبد. فعند الصباح يحمد القوم السرى. ده مثل عند العرب، يقولوا: عند الصباح يحمد القوم السرى. حد فاهم المثل؟

طيب، المثل ده يعني إيه؟ العرب زمان كانوا يسيروا بالنهار ويناموا بالليل، بالذات لو الليالي المظلمة. أنت عارفين الليالي القمرية في الصحرا تبقى الدنيا منورة، الليالي المظلمة اللي في أول الشهر أو في آخر الشهر الدنيا كحل في الصحرا. فالعرب كانت تمشي بالنهار وتنام بالليل، يعني تجي بالليل تخيم وتصبح تاني يوم تكمل إيه الطريق بتاعها اللي هو بالجمال وكده.

طيب، فيجوا خلاص قربوا من الإيه من المدينة أو من القرية اللي هما رايحينها، فيجوا يخيموا بالليل، يقوم واحد يقول إيه: لا والله أنا أنا قربت همشي بالليل، الحتة اللي ناقصة دي همشيها بالليل وأبات فين؟ أصحح في بيتي. وقتها ممكن اللي معه في القافلة ما ما يعملوش زيه، ليه؟ تعبانين عاوزين ننام، ماشي. امتى هيحمدوا فعله؟ الصبح. لما يصحى الصبح، يصحى الصبح يلاقوا لسه قدامهم مشوار، وفلان دلوقتي وصل بيته، حينها يحمد القوم السرى، السرى اللي هما الناس اللي مشيوا بالليل دول السرى. بس أمتا ده هيحصل؟ مش بالليل، بالليل هيسيبوكوا يناموا، لما يصبحوا بقى، قالوا: عند الصباح يحمد القوم السرى.

ماشي، فانت هتترك الناس في ملذاتهم وشهواتهم في الدنيا يعني وتلجا إلى الله وتركن إليه، وتحبس نفسك عن الشهوات اللي الناس مستمتعة بها وغرقانة فيها. الناس مش هتقجي لك ماشي تقول لي: احنا جايين معاك بقى نسير إلى الله، ومش هعمل كده. الناس أمتا هتحمدك؟ في الآخرة، لما يلاقوا أن اللي عمل ده في الدنيا نال الشرف والحظوة والقرب والرفعة، وهم فاتهم -مش هقول ممكن مش كله يدخل النار، بس فاهم- فاتتهم الدرجات. يعني كنا ممكن نبقى في درجة أعلى بس ما رحناش الدرجة الأعلى، طب ليه فلان ده في الدرجة الأعلى؟ آه، لأنه مشي بالليل واحنا إيه نايمين. وفي الحديث الآخر: «وعليكم بالدلجة». إيه الدلجة؟ بالليل، يعني ماشي.

قال: فصل في الطريق الذي يعرف به الإنسان عيوب نفسه. تقول: طب إزاي أعرف عيوب نفسي؟ وقلنا قبل كده برده احنا قلنا لكم أن الذكاء العاطفي مبني على أربع عمدان، أول عمود والأهم منهم اللي هو إيه؟ اللي هو أنك تعرف نفسك، سموه السيلف أورنس، إدراك الذات، ماشي، سموه سيلف أورنس بالانجليزي، إدراك الذات. ماشي، إدراك الذات يعني عاوز أعرف نفسي، فأعرف نفسي إزاي؟ يدول بقى تروحوا أنتم تدفعوا فلات عشان تاخدوا الترينينج وبتاع، الغزالي هو حللها لكم من زمان، أربع طرق تعرف بها نفسك.

قال: اعلم أن الله تعالى إذا أراد بعبد خيراً بصره بعيوب نفسه، فمن كانت له بصيرة لم تخفَ عليه عيوبه.

فمن أراد به خيراً الله عز وجل بصر بعيوب نفسه وشغله بها، أول ما تلاقي نفسك مشغول بغيرك اعرف أن دي علامة الخذلان. غيرك ده ممكن يبقى صاحبك، شوف عامل إزاي، شوف جاي إزاي، لابس إيه، عاملة إيه في نفسها، طب وأنت؟ يعني أنت اللي خلاص جاي سليم مية في المية؟ ما فيك مشاكل وفيك عيوب! وفي الحديث: «يرى أحدكم القذى في عين أخيه ولا يرى الجذع في عينه». العين عين المية. يرى أحدكم القذى، اللي هو الشيء الحقير الذي لا يكاد يرى في عين أخيه، يقول له: شوف القرف، عين المية بتاعتك فيها إيه القذى! وهو عين المية بتاعته فيها جذع نخلة، جذع شجرة مرمي. يرى أحدكم القذى في عين أخيه ولا يرى الجذع في عينه.

فانشغل بنفسك، قال: فمن كانت له بصيرة لم تخفَ عليه عيوبه، وإذا عرف العيوب أمكنه العلاج، ولكن أكثر الناس جاهلون بعيوبهم. يرى أحدهم القذى في عين أخيه ولا يرى الجذع في عينه. فمن أراد الوقوف على عيب نفسه، فله في ذلك أربع طرق، أربع حاجات بقى يحفظوهم.

الطريقة الأولى: أن يجلس بين يدي شيخ بصير بعيوب النفس مطلع على خفايا الآفات، ويتبع إشاراته في مجاهدته، وهذا شأن المريد مع شيخه والتلميذ مع أستاذه، حيث يعرفه عيوب نفسه وطرق علاجها. أول طريق أنك تروح لحد فاهم في أمراض القلوب، أمراض القلوب مش انسداد الشريان، أمراض القلوب اللي هو الكبر، العجب، الحسد، الرياء، الحاجات دي، وآفات النفس. شيخ بصير بده وتقول له: أجلس بين يديك، تطلع على عيب مني تبلغني اشتغل على الحته الفلانية، أو تقوّمها بقى بطريقتك زي ما تحب. فدي أول طريق. قال: وهذا قد عز في هذا الزمان وجوده، فمن وقع به فقد وقع بالطبيب الحاذق فلا ينبغي أن يفارقه. ده في زمان الغزالي يقول لك ما فيش خلاص شيوخ، مين اللي عارفين عيوب النفس؟ ده خلاص كانوا زمان دلوقتي ما فيش.

الطريقة الثانية: أن يطلب صديقاً صدوقاً بصيراً متديناً. طب لو مش سهل أننا نلاقي الشيخ أو الشيخ اللي زي ده اللي بيبقى عاوزه ناس كتير فمش متوفر لكل الناس، أنا أدخل النار أنا بقى؟! لا، قال لك لا، شوف صديق صدوق دين بصير وينصبه رقيباً على نفسه لينبهه على المكروه من أخلاقه وأفعاله. بص يا فلان، أنا عاوزك طول ما أنت معايا كده لقت فيا مشكلة قول لي على مشكلتي إيه وأنا أحاول أصلح إن شاء الله، بس يكون بهذه الصفات: صديق صدوق بصير متدين. بصير ليه؟ لأن ممكن يبقى عادي، هو صدوق وكل حاجة متدين، بس هو ما يفهمش، ما يعجبنيش، يعني ما يعرفش يشوف الوحش اللي فيك، أو ما يعرفش يربط حاجات ببعض عشان يطلع بنتيجه، فمش هينفعك وهتخش النار، يبقى أنت عايش حياتك كلها مستني يقول لك حاجة وهو مش عارف، يعني هو لو عرف إن في مشكلة هيقول لك بس هو مش عارف يلقط أن عندك حاجة، ليه؟ ما عندوش البصيرة دي.

قال: وقد كان أمير المؤمنين عمر بن الخطاب رضي الله عنه يقول: رحم الله امرأً أهدى إلينا عيوبنا. وسأل سلمان (يعني عمر سأل سلمان لما قدم عليه) عن عيوبه. يعني سلمان قدم على عمر وكان أمير المؤمنين، أمير المؤمنين يا جماعة يعني إيه؟ مش يعني رئيس دوله ها؟ بيقولوا كان تحت إيديه تقريبا ٢٦ دولة، أنا سكت عشان تتخيلوا بس ها! ده أمير المؤمنين مش رئيس دوله، أنا اللي بقول كده هتعرفه دلوقتي. فقال سلمان بقى، هو بيقول له بلغك عني حاجة؟ يعني سمعت فيا عيب؟ قال: سمعت أنك جمعت بين إدامين على مائدة. قلنا لكم الإدام إيه المره اللي فاتت؟ الغموس، يعني مثلا لو أنت بتاكل فول وطعمية، دول إدامين، دول اسمهم إدامين. طيب جبنة ومربى، دول إدامين. فهو عمر أمير المؤمنين بيقول لسلمان: بلغك عني حاجة؟ قال له: أه، ده أنت عملت حاجات فظيعة! قال له: إيه؟ قال له: أول حاجة جمعت بين إدامين على مائدة، تقعد تاكل فول وطعمية مع بعض، إيه الإجرام ده؟! الله المستعان. وأن لك حُلتين؛ حُلة بالليل وحُلة بالنهار، عندك ثوبين بتغير فيهم، تلبس ثوب بالليل وثوب بالنهار فأنتم مسرف! إيه؟ إدامين وحلتين؟! فقال: هل بلغك غير هذا؟ طب سمعت حاجة تانية؟ قال: لا. قال: أما هذان فقد كفيتهما. سيدنا عمر بيقولوا كان في عام الرمادة جلده أسود، ما كانش ياكل وكان يجيب الزيت يشرب كده زيت فكانت بطنه تعمل أصوات فيضربها يقول لها: قرقري أو لا تقرقري، ليس عندنا غيره حتى يحيا الناس! هتقرقي بقى، هتعملي لي، ما فيش، ما فيش غيره، هو ده اللي هيتاكل، ده اللي هيتشرب، وخلصنا لغاية ما الناس كلها تحيا.

قال: أما هذان فقد كفيتهما، يعني اللي بلغ ده كذب، أنا ما بعملش الحاجة معاه، ما كلش أنا إدامين والبس حلتين والكلام ده. الشاهد، طبعا ده في زهد عمر، لكن الشاهد هنا أن إيه فكرة أن عمر يا جماعة شوف اللي شغله سلمان جاي، طيب ما أنا ممكن اللي حواليا يكونوا بيجملوني، مش هقول بينافقوا، اللي حواليا دول يا تابعين يا صحابه، أو يمكن عشان قريبين مني فيحبوني، أو يمكن اعتادوا يشوفوا مني حاجات فمش شايفينها. اللي جاي من بعيد يشوف حاجات، اللي قريب منك ما يشوفهاش لأنه اعتاد، عينيه اعتادت تشوفك فيها يعني. فأول ما سلمان يجي عليه، اللي شغله بلغك عني حاجة؟ قل لي. وكان عمر رضي الله عنه يسال حذيفة: هل أنا من المنافقين؟ وهذا لأن كل من علت مرتبته في اليقظة زاد اتهامه لنفسه.

إلا أنه عز في هذا الزمان وجود صديق على هذه الصفة، برضه ركزوا، الكلام ده مهم جدا اللي جاي ده بالتحديد؛ لأنه قل في الأصدقاء من يترك المداهنة فيخبير بالعيب، أو يترك الحسد فلا يزيد على قدر الواجب. طيب خلينا، ده في من حيث الصديق، يا إما يداهن، يعني بيجاملك، أو يحسدك، يلاقيك كل ما يقول لك فيك المشكلة الفلانية تروح تحسن، مرة في تلاقيك عمال أنت إيه بتعلو فيقوم يحسدك، يقول أنا كل بقى أقول له فيك الحاجة الفلانية يقوم يتحسن فيها، يبقى أحسن مني، فيحسدك ويترك النصيحة.

لكن عاوز أنبه على حاجة هنا يا شباب، أن في مشكلة بتصل كتير من المنصوح مش من الناصح، فعاوزين نتركها، اللي هي إيه؟ الجدال. لما يجي حد بيحبك، أبوك، أمك، صاحبك، شيخك، حد بيحبك، زوجتك لو بتحبك يعني، ويجي ينصحك، لو وجد منك، كل ما أجي أنصحك هتقاوح وتجادل وتوجع دماغي ويبقى الحاجة تخلص في دقيقة تاخد مننا أربع ساعات بنتناقش عشان بس أقنعك أنك فيك مشكلة، مرة في تانية مش هينصحك. لو أنت مرهق في قبول النصح أنت اللي بتفقد النصحاء، أنت الخسران! فخليك سهل في قبول النصح، بالذات زي ما بقول لك كده لو إيه، لو حد بيحبك، ما ترهقوش، شوية وهيترك النصح إما عشان يشيل دماغه هو وصحته هو، واما عشان من كتر حبه ليك مش عاوز يزعلك، فهو شايف كل ما يجي ينصحك تزعل وتتهبد وتترزع وتعمل وتقمس هو مش عاوز يزعلك، فخلاص من طبته هيقول إيه؟ يولع! فانت خليك سهل في قبول النصح.

قال: وقد كان السلف يحبون من ينبههم على عيوبهم، ونحن الآن في الغالب أبغض الناس إلينا من يعرفنا عيوبنا. أنتوا عارفين يا جماعة اللي احنا قاعدين نقول ده، يجوا بقى بتوع الإدارة؟ الإدارة، احنا لسه بنتكلم عن الإيموشنال إنتلجنس والسلف أويرنس والحاجات دي، يجي يقول لك إيه بقى؟ يقعدوا يخترعوا اختراعات عشان بس نطلع بنقاط الضعف بتاعة كل واحد، ولا بالحِتت اللي محتاجة تحسين، ولا يقعدوا يعملوا ابتكارات واختراعات كويسة مش حاجات وحشة يعني، أقصى ما أقول: احنا بقى في ديننا الدنيا بسيطة جدا، هنقول للصديق انصح، وهنقول للآخر اقبل النصح. ديننا دين لله، فتلاقي اللي جاي بينصحك يرجو بذلك ثواب الله، وهتلاقي أنت بتقبل النصح بصدر رحب ترجو بذلك ثواب الله. احنا والله يا جماعة لو الدين ده طبقناه في حياتنا مشاكل كتير هتختفي، وحاجات كتير صعبة ومجعلصة وبيخترعوا لها حاجات مش محتاجين ده كله، محتاجه دين بس.

قال: وهذا دليل -اللي هو أننا مش بنقبل النصح وبنزعل من اللي بينصح- على ضعف الإيمان، فإن الأخلاق السيئة كالعقارب، ولو أن منبهاً نبهنا على أن تحت ثوب أحدنا عقرباً لتقلدنا له منه، يعني واحد جه قال لك: حاسب في عقرب في هدومك وقعد ينفضك لغاية ما نزل العقرب، العقرب ده لو بس لدغ هتموت، هتموت فبتفضل شايل له الجميل ده لغاية ما تموت، أنت تقول له: أنت جميلك ده في رقبتي، تقلدنا له منا، يعني لبسناه زي القلادة كده يعني بلغتنا العامية: أنت جميلك ده في رقبتي مطوقني ليوم القيامة، مش بنقول كده؟ قال: واشتغلنا بقتلها، يعني قتل العقرب. والأخلاق الرديئة أعظم ضرراً من العقرب على ما لا يخفى.

طيب يجي واحد يقول لك: خلي بالك يا فلان، أنا بحس أن عندك كبر، تقوم تكرهه! طب بتكرهه ليه؟ ده اللي قال لك خلي بالك من العقرب آخره عمل إيه؟ أنقذ حياتك، يعني أنقذ الدنيا. واللي جه قال لك خلي بالك من الكبر بينقذ لك الآخرة! فانت متضايق ليه؟ ده كله بنتكلم لو بيه بيحبك، أصل تقول لي أصله بيكرهني، بيكرهني ده بقى جاية كمان شوية إن شاء الله، خلي بالك بيكرهك ده واحد من أربع حاجات هتعرف بيها عيوبك برضه، بس جاي لها كمان شوية، بس احنا بنتكلم في واحد بيحبك، واحد عاوز لك الخير.

الطريقة الثالثة: أن يستفيد معرفة عيوب نفسه من ألسنة أعدائه، فإن عين السخط تبدي المساوئ. قالوا: عين الرضا عن كل عيب كليلة، وعين السخط تبدي المساوئ. وفي المثل بتاعنا نقول إيه؟ حبيبك يبلع لك الزلط، وعدوك يتمنى لك الغلط، مثل صادق. والقرد في عين غزال، برضه مثل صادق، يعني مش شايف فيه عيب، ده حاجة ده قرد غزال.

فناخد عيوبنا من ألسنة الأعداء. تقول: أيوه، بس دول أعداء، فيأكيد يكذبوا؟ نقول: غالباً، غالباً اللي هيكذب بيبقى في جزء صادق يبني عليه الكذبة، يعني مش هيجي واحد مثلا هو معروف بالكرم يقول إيه ده؟ فلان ده بخيل بخل! ما يعملش كده، لأن هتبقى مفقوسة أوي، هتبقى يعني هو ما يعملش كده، ده ممكن يجي يعمل إيه؟ يقول لك ده سفيه، ده بيصرف فلوسه في كذا، يعني ما يروحش للحته اللي مش فيك. فالعدو بالذات لو عدو عاقل وحب بس يعني يشنع عليك هيجي في حته أنت فيك منها ولو نقطة، ويعمل منها بحر! شطرتك بقى تدور على النقطة اللي فيك، ده اللي هو عاوز يقوله. يبقى سمعت واحد بيكرهك بيقول عليك كذا وكذا وكذا، بدل ما تنشغل بالرد واهد وفك هو قال كده ليه؟ طب إيه اللي أنا عملته ممكن يوصل أن الواحد يفهم من تصرفاتي كذا؟ أنت بتيجي تفكر في اللي يصلح نفسك.

قال: أن يستفيد معرفة عيوب نفسه من ألسنة أعدائه، فإن عين السخط تبدي المساوئ، ولعل انتفاع الإنسان بعدو مساحن يذكر عيوبه أكثر من انتفاعه بصديق مداهن يخفي عنه عيوبه. واضح الكلام؟ إلا أن الطبع مجبول على تكذيب العدو. هنا يا جماعة شوفوا الغزالي وعبقرية الغزالي، طب الغزالي من بعديه ابن الجوزي، من بعديه ابن قدامة، لأن احنا بناخد مختصر المنهاج، يعني ده مختصر مختصر الإحياء، فكرة أنه بيديك الطرق، احنا بقى من كانوا على إدراك الذات اللي بيقولوها، احنا بنديك طرق تدرك بها ذاتك وبننبهك على آفة كل طريق.

فاحنا بنقول لك خدها من ألسنة الأصدقاء، بس خلي بالك ليكون بي多么داهن أو يحسد، وأنا زودت لكم حاجة ثالثة، اللي هي خلي بالك أنك ما تجادلش فتفقد الصديق أو المحب اللي بينصح. ودلوقتي بيقول لك العدو، خدها من ألسنة الأعداء، بيقول لك بس خلي بالك أن طبعك هيبقى عكس كده، لأن طبع الإنسان ما يحبش ياخد كلام أعدائه، بالذات لو بيشتموه. إلا أن الطبع مجبول على تكذيب العدو وحمل ما يقوله على الحسد، ولكن البصير لا يخلو عن الانتفاع بقول أعدائه.

وأنا لغاية النهارده نقرا آية الكرسي قبل ما ننام لتكون لنا حرزاً من الشيطان بقول من الشيطان؟ طبعا بإقرار النبي صلى الله عليه وسلم، لكن بقول الشيطان مش كده؟ قال له: طب سيبني وأقول، أبو هريرة كان واقف على الصدقة يجي له راجل يسرق تمر يمسكه، أنا غلبان، يسيبه، يروح يحكي للنبي عليه الصلاة والسلام يقول له: كذبك وسيعود. يجي تاني يوم يلاقي نفس الراجل ويعمل نفس، برضه: أنا فقير، يسيبه، يروح يحكي للنبي صلوا على النبي عليه الصلاة والسلام يقول له: كذبك وسيعود. يجي ثالث يوم يمسكه يقول له: مش هسيبك بقى، يقول له: طب سيبني وأقول لك نصيحة: إذا أويت إلى فراشك فاقرا آية الكرسي فلا تزال حرزاً لك من الشيطان حتى تصبح. فيقوم يسيبه، يروح للنبي صلى الله عليه وسلم فيقول له: صدقك وهو كذوب، تدري من صاحبك منذ ثلاث؟ إنه الشيطان!

فاحنا لو هنرد كل نصيحة بيقولها حد من أعدائنا، هيفوتنا برض خير، ماشي. يبقى دي الطريقة الثالثة.

الطريقة الرابعة: أن يخالط الناس، فكل ما يراه مذموماً فيما بينهم يجتنبه، فإن المؤمن مرآة المؤمن. يبقى تخالط الناس، يعني ده مش أمر بالمخالطة، ركزوا بقى ها هنا، أنت كده كده في قدر من المخالطة، هو بيقول لك أن تخالط الناس على القدر اللي أنت بتخالطه، يعني إنما احنا أصلاً بنقول لك قلل مخالطة الناس. كان في كده إيه كود كده: قلل ناس، كتر شاورما، مش كده؟ احنا عاوزين نقلل ناس ونقلل شاورما برض يعني، مش ما تكتروش أكل. فاحنا مش بنقول أكثر من المخالطة، لكن القدر اللي هتخالط بيه الناس، حاول تنظر كده في الناس، تقول: إيه والله، فلان عمل حركة كده، ممكن إيه بينت أنه عنده كبر مثلاً، مش شرط يبقى عنده كبر، بس احنا فهمنا كده، تقوم ترجع تقول: طب هو أنا فيا ده؟ هو أنا بعمل الحركة دي؟ ما يمكن تكون بتعملها. والله فلانه لما دخلت قعدت من غير ما تعمل، مش من غير ما تقول، طب هو أنا ساعات بدخل وماركز وبقولش السلام عليكم مثلاً؟ والله فلان دخل المسجد ريحة شراب وتقرف، فتقول: طب أنا ساعات بيحصل كده ولا مش واخد بالي؟ ريحة شرابي تبقى وحشة والناس تقرف مني، وريحة عرق مش عارف، وتقعد تبص في عيوب الناس، مش تحتقر الناس من عيوب، لا، أنت تنظر لتتعلم، ترجع بقى في نفسك تقول: أنا فيا الآفة دي؟ أنا فيا المشكلة دي؟

أن يخالط الناس فكل ما يراه مذموماً فيما بينهم يجتنبه، فإن المؤمن مرآة المؤمن. ومن النصائح الكويسة لكم يا شباب قبل الجواز، يعني الشباب الصغير اللي في بيوت لسه أبيه وأمه، أن أنتم تنظروا برضه للآباء والأمهات، يعني الولد بعد ما بتكبر وعنده سن معين، يعني خلاص بتبتدي تشوف والله بابا في الطبع الفلاني ده بيزعل ماما، والولد يعني يقول كده لنفسه، والبنت تقول ماما فيها الطبع الفلاني، والأحسن ما كانش يعمل كده ولما بيعمل كده يحزنها، أو العكس ماما بتعمل كده بابا بيتعصب. يقوم الولد يعمل بعد كده على أنه إيه؟ طب ما أنا أتخلى عن ذلك الطبع أو ذلك الفعل ربع في الجواز.

فده برضه من الحاجات اللي هتساعدكم على بناء بيت مستقر وهادئ، أن الحاجات اللي كانت بتعمل مشاكل في بيت الأب والأم تجتنبوها أنتم، فإن المؤمن مرآة المؤمن، فيرى من عيوب غيره عيوب نفسه.

كده يبقى احنا خدنا أربع طرق، حد يعرفهم بسرعة؟ لا، أنت بتغش مين؟ مش هيغش، قول طب يلا شيخ. ها؟ شيخ؟ بس شيخ ماشي، كلمة واحدة. صديق، ماشي. الثالث مين بعد الصديق اللي عكسه بقى؟ العدو. والرابعة؟ المخالطة. يبقى دول أربع كلمات تحفظوهم، مش نحفظ الجمل، بس خلاص فهمنا الأربعة دول، نقف هنا عشان ما نسهركوش، حد عنده أي سؤال؟ لا ماشي.

قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.