طال العهد فممكن يبقى الناس قاعدة مش عارفين احنا بنعمل إيه، احنا بنشرح كتاب مختصر منهاج القاصدين ربع المهلكات. الكتاب أربع أرباع، ربع المهلكات ده اللي هو بيتكلم عن عجائب القلوب أو أمراض القلوب أو آفات القلوب؛ زي الكبر، زي الرياء، زي العجب، زي الحسد، فده اللي احنا متوقعين نسمعه في هذا الربع.
احنا ما زلنا في مقدمات قبل ما ندخل في هذه الأمور، فوصلنا لقول المصنف: قد عرفت، يعني في النسخة اللي عندي حاط لها الفصل الثاني في بيان الطريق إلى تهذيب الأخلاق، العناوين دي ممكن ما تلاقوهاش واحدة في كل الطبعات. قال: «قد عرفت أن الاعتدال في الأخلاق هو صحة في النفس، والميل عن الاعتدال سقم ومرض، فاعلم أن مثال النفس في علاجها كالبدن في علاجه».
فكما أن البدن لا يخلق كاملاً وإنما يكمل بالتربية والغذاء، كذلك النفس تخلق ناقصة قابلة للكمال. هذه أول فائدة في هذا المجلس، أن النفس تكمل شيئاً فشيئاً. وصناعة الله عز وجل لموسى إنما كانت صناعة للنفس ولا للبدن، يعني كان بيقوي عضلات؟ ﴿وَلِتُصْنَعَ عَلَى عَيْنِي﴾ [طه: 39]، ﴿وَاصْطَنَعْتُكَ لِنَفْسِي﴾ [طه: 41]. دي صناعة لإيه؟ للنفس، مش كده؟
يعني سيدنا موسى أول لقاء مع ربنا مثلاً يرمي العصا فتتحول ثعبان، يعمل إيه سيدنا موسى؟ يجري، مش كده؟ وبعدين الله عز وجل يربيه شيئاً في يربي نفسه بقى مش بدن أهو، يربي نفسه شيئاً فشيئاً، وبعدين يجتمع مع السحرة، وكل السحرة ترمي العصي فيخيل إليه من سحرهم أنها تسعى، كان الأول عصاية واحدة بس جري، دلوقتي شوف كم عصاية تتحول لتعابين، إيه اللي يحصل له؟ ﴿فَأَوْجَسَ فِي نَفْسِهِ خِيفَةً مُّوسَى﴾ [طه: 67] ما جريش، ليه؟ بيكمل شيئاً فشيئاً، مش كده؟
وبعدين تمر الأحداث ويجي يهرب من فرعون والجند، ويوصلوا للبحر؛ البحر قدامه وفرعون خلفه، وبعدين قومه بقى يقولوا: ﴿إِنَّا لَمُدْرَكُونَ﴾ [الشعراء: 61]، إيه الأصعب؟ شوية تعابين ولا فرعون وجنوده؟ فرعون والجنود أصعب، فقالوا له: ﴿إِنَّا لَمُدْرَكُونَ * قَالَ كَلَّا إِنَّ مَعِيَ رَبِّي سَيَهْدِينِ﴾ [الشعراء: 61-62]، لا أوجس ولا جري ولا أي حاجة، هذا من إيه؟ من التربية.
فالنفس تكمل شيئاً فشيئاً، فلو لم ننتبه لتلك الأنفس، الجسم يكبر وتفضل النفس صغيرة، صغيرة دي يعني صغيرة الهمه، تهتم بسفاسف الأمور. يبقى هتلاقي عنده عشرين سنة، عشرين سنة ده كبير خلي بالكم ها مثلاً، افتكروا ده يعني لا عشرين سنة ده خلاص راجل، يعني قبل كده وكانوا يطلعوا يحاربوا مع النبي عليه الصلاة والسلام.
قبل كده اللي هو كام؟ ده في كمان أطفال ما بلغتش وكانت عاوزه تحارب مع النبي عليه الصلاة والسلام، وكان ساعات يرد أطفال فيعيطوا عاوزين يطلعوا يحاربوا، واللي قتل أبا جهل مين؟ طفلين، إحدى عشر سنة أو ثلاث عشر سنة قتلوا أبا جهل. فلما نقول عشرين سنة ده راجل كبير، كان ممكن الناس تقود الجيوش وهي ست عشرة سنة وسبع عشرة سنة.
فشوفوا بقى صغر الهمة عامله إزاي، يبقى أنت جسمك بيكبر وسنك بيكبر وهمتك في إيه؟ تعملوا إيه دلوقتي؟ إيه همتكم إيه؟ ما فيش همة خالص، فتلاقي بقى إحدى وعشرين سنة وثلاثين سنة وأربعين سنة وما عندهوش همة لحاجة، ما عندهوش هدف، عايش ليه؟ أو هدفه دنيا همم صغيرة. طيب ليه؟ لأننا ما ربيناش الأنفس، احنا ربينا الأبدان أهو.
ربينا الأبدان، بناكل ونشرب غذاء، بنهتم بصحتنا، نروح جيم ونعمل، لو تعبنا ولا حصل حاجة نروح لدكتور وناخد علاج، كل ده تربية للبدن. فين بقى تربية النفس؟ أين تربى النفس؟ في المجالس دي، في بيوت الله عز وجل، في حلق القرآن، في حلق الذكر تربى الأنفس.
قال: «فاعلم أن مثال النفس في علاجها كالبدن في علاجه، فكما أن البدن لا يخلق كاملاً وإنما يكمل بالتربية والغذاء، كذلك النفس تخلق ناقصة قابلة للكمال، وإنما تكمل بالتزكيه وتهذيب الأخلاق والتغذية بالعلم». يبقى احنا محتاجين تزكية وتهذيب أخلاق وعلم، ده غذاء النفس، العلم هو الغذاء، والتزكية وتهذيب الأخلاق ده العلاج.
احنا زي ما البدن محتاج غذاء عشان ينمو، وبعدين لما يمرض محتاج علاج، النفس كده برده محتاجة غذاء؛ الغذاء العلم ومن وراء العلم العمل، ما هو العمل برده غذاء للنفس أن تعمل بما تعلم، بل مجرد العلم ليس غذاء، لا تعلم عشان تعمل. وبعدين يصيب بقى النفس برده أمراض، تقوم تعالجها بالأيه بالتزكية وتهذيب الأخلاق، ماشي؟ وده اللي احنا هنعمله في الربع ده، اللي هو التزكية، هنزكي ذلك القلب.
وكما أن البدن إذا كان صحيحاً فشان الطبيب العمل على حفظ الصحة، وإن كان مريضا فشانه جلب الصحة إليه، فكذلك النفس؛ إذا كانت زكية طاهرة مهذبة الأخلاق فينبغي أن يسعى بحفظها وجلب مزيد القوة إليها. إيه ده؟ يعني أنا ممكن أخلق مهذب النفس؟ أه، ممكن، يعني تخلق في صفات كويسة، يعني مش كلنا اتخلقنا صفاتنا وحشة وبنقعد، لا، في واحد مجبول على الكرم، في واحد مجبول على الشجاعة، في واحد مجبول على الحلم، هو مخلوق كده، مش كده في وفد عبد القيس قال له إيه؟ الحمد لله الذي جبلني على ما يحب، يعني القصة بقى لو مش عارفينها دوروا عليها.
المهم الإنسان يجبل على ذلك، قد يعني يكون في بعض الصفات الكويسة، طيب نعمل إيه؟ ما نغفلش عنها بقى، ننميها ونزكيها ونعرفها ونشتغل عليها برده ويبقى دي طريقنا للجنة. أنتم عارفين الإدارة الحديثة؟ احنا عندنا الإدارة مدارس، ففي من المدارس ودي المدرسة القديمة في الإدارة في الحته اللي أنا بتكلم فيها؛ يعني أن هو يجيب الموظف اللي عنده أو الشخص المضار يعني المرؤوس، ويعمل له يجيب نقاط نقاط القوة ونقاط الضعف بتاعتيزاي مش مهم في كذا تكنيك نجيب بيها نقاط القوة ونقاط الضعف.
وبعد ما يجيب نقاط القوة ونقاط الضعف، يبتدي يقول الموظف عاوزين بقى نشتغل على الأيه أكبر وقت تنفقه في أنك تعمل إيه؟ يشتغل على دي ولا على دي؟ إيه رايكم؟ طب أنتم بتعملوا إيه؟ المدرسة القديمة يقول لك اشتغل على نقاط الضعف في الإدارة. المدرسة الحديثة في الإدارة يقول لك لا اشتغل على نقاط القوة لأن هي دي اللي أنت مميز فيها.
يعني هسيب، لا هو بيقسموها ثمانين عشرين كده على قاعدة ثانية مش مهمة برده دلوقتي مش جايين ندرس إدارة، المهم يعني إيه يقول لك ثمانين في المائة من وقتك ومواردك تنفقها علشان تنمي نقاط القوة، وعشرين في المائة من مواردك تنفقها علشان تحسن نقاط الضعف شيئاً ما، إنما ما تضيعش عمرك في تحسين نقاط الضعف، دي المدرسة الحديثة. مين اللي صح ومين غلط؟
طب خدوا بقى قاعدة ذهبية في الإدارة: الإدارة ما فيهاش صح وغلط، يعني أول ما نقول لك إيه صح تقول صح وغلط اعرف أن أنت ما درستش إدارة، صح وغلط ماشي. أمال نقول إيه؟ على حسب، ده الرد في أي حاجة تسألها في الإدارة، تقول على حسب، حسب إيه؟ ندور بعدين بس يعني هتلاقي في حته يعني.
ماشي، طيب، عندنا في التراث يعني عندنا شيئاً ما كده أن هو كانه يشير إلى المدرسة الحديثة في الإدارة، أن بعض السلف وبعض العلماء نبه على أن الإنسان إذا وجد من ذهنه نوع بلادة أو ما بيعرفش يحفظ أو ما بيعرفش يفهم، ما يصرفش وقته في العلم، يصرف وقته في العبادة، يسيب العلم ويروح إيه يعني خلاص خد القدر الواجب من العلم، ما تقعدش بقى إيه تتعب في الحته دي وهي مش بتاعتك، ذهنك مش جايب الأيه.
قال إيه بقى الناظم؟ ومن يكن في ذهنه بلادة فليصرف الوقت إلى العبادة، يلا قوموا بقى روحوا، طب طبعا احنا إلا احنا مش بنقول كده عشان أول ما الواحد يلاقي نفسه والنور أطفى وجو شعري ونام، لا هو يبقى مش كده، احنا نجتهد ونسعى وندعي ربنا، لكن في خلاص، ﴿لَا يُكَلِّفُ اللَّهُ نَفْسًا إِلَّا وُسْعَهَا﴾ [البقرة: 286]، وكل ميسر لما خلق له. فكان ده بيشير شوية إلى المدرسة الحديثة بقى في الإدارة اللي هو ما تتعبش نفسك وتنفق مواردك في حاجة هيبقى المردود عليك منها قليل في الآخر.
فهنا بيقول بقى: إذا كانت زكية طاهرة مهذبة الأخلاق، طب ده ازاي نعمله بقى اللي احنا حكيناه في الإدارة ده ازاي نعمله في مسألة النفس دي؟ أنك لو لقيت نفسك مجبول على صفة معينة، يعني سهل انك يعني تتفاعل مع تلك الصفه أو تتعاطى معها، شوف الأبواب والثغور اللي الصفه دي تنفعك فيها.
يعني واحد هو بتاع حركة وتنطيط ويروح ويجي وبتاع هو كده يعني نشيط في حركة وكده، يستغل نفسه في إيه؟ لا الدعوة مش عاوزة تنطيط، أنتم أنتم تتنططوا في الدعوة، أه يعني يمشي بقى في حوائج المساكين، في حوائج الأرامل، في كده. إنما الدعوة ليه عاوزة ولا تقصد يسافر يعني يدعو إلى الله وكده ماشي.
وهكذا، واحد لقي نفسه عنده صفة الشجاعة، يعمل إيه؟ يتجوز، يبقى نستغل صفاتنا الأيه الصفات اللي ربنا جبلنا عليها واللي هي سهلة أن احنا نتعاطى معها ونستغلها في أن احنا نكسب حسنات.
طيب قال: «فينبغي أن يسعى بحفظها وجلب مزيد القوة إليها، وإن كانت عديمة الكمال فينبغي أن يسعى بجلب ذلك إليها». الصفات بقى اللي هي ماهياش كاملة فيك، ما تسيبهاش برده، نجتهد في أن احنا يعني نصل فيها إلى شيء ما.
خلاص، النصيحة هنا أن أنت تنفق معظم مواردك، معظم الموارد تنفقها في الصفات اللي أصلاً موجودة فيك، الصفات الكويسة اللي موجودة فيك. الموارد اللي هو زي وقتك، زي فلوسك، زي جهدك.
خلاص، فانا مثلاً لقيت عندي قوة الحافظة قوية، قوة الحفظ عندي قوية جداً، فاعمل إيه؟ ما نروحش بقى أقعد إذاكر مواريث وأنا ما بفهمش، مش يعني الفهم عندي مش مش قوي ومصر إذاكر مواريث وإذاكر زكاة وأنصبة وأذاكر، ما أنت عندك قوة الحفظ عالية أهو، فانفق معظم الموارد في حته تنفع فيها قوة الحفظ زي القرآن، وبعد ما خلصنا القرآن ندخل في القراءات مثلاً، زي أي علوم الحفظ فيها هو المقدم أو اللي محتاجينه أكثر من الفهم، الفقه محتاج فهم، أصلاً الفقه يعني الفهم في اللغة يعني خلاص.
والعكس، واحد حفظه قليل بس فهمه عالي جداً، يعني ممكن لو شرحنا لو أُشرح قدام عشرة الحاجة هو يلقطها من أول كلمتين ويبقى مش عاوز بقية الكلام فهم، خلاص فهمه عالي جداً، فنقول له الفهم ده استغل مواردك في الفقه، يبقى وقتك ومجهودك ومذاكرتك، ده بالنسبة للعلم الشرعي يعني احنا بنسقط على العلم الشرعي، خلاص.
طب يعني أسيبك القرآن؟ بتاع الفهم بقى يقول، يعني أسيب القرآن؟ يقول: لا، ما تسيبش القرآن، ما تسيبوش، لكن لو هننسب يبقى معظم الموارد في الحته اللي أنت هتعرف تحصلها سريعاً، عشان تعرف تؤديها فيبقى تكسب حسنات أكثر. هو ده خلاصه الموضوع، احنا عاوزين نكسب أكبر قدر من الحسنات في مدة العمر اللي احنا عايشينه، خلاص.
قال: «وكما أن العلة الموجبة لمرض البدن لا تعالج إلا بضدها؛ إن كانت من حرارة فبروده»؛ يعني بيقول لك زي البدن كده بالضبط لما تيجي تعالج الحرارة يقول لك اعمل له كمادات، هو ده ما هواش علاج قوي للأيه للمرض، هو بيبقى علاج للعرض، يعني أنت في حرارة فبتوديها بالكمادات الباردة يعني، «وإن كانت من البروده فبالحرارة» مش عارف إزاي دي حاطه في الفرن مثلاً لو واحد برد، مش عارف.
«فكذلك الأخلاق الرذيلة التي هي من مرض القلب علاجها بضدها، فيعالج مرض الجهل بالعلم»؛ يعني أنت عفواً، واحد جاهل يعني يروح يتعلم يرفع الجهل عن نفسه، «ومرض البخل بالسخاء»؛ يعني يتعاطى فعل الكرماء يا جماعة، يعني إيه بالسخاء؟ يعني إزاي عالج البخل بالسخاء؟ أنك تجاهد نفسك أنك تخرج من مالك، هيبقى في الأول عليك طبعا كأنك طلوع بطلوع الروح أنك تنفق ولو حاجة بسيطة، هتحس صعب عليك لو أنت بخيل يعني.
حكينا لكم قبل كده قصة إمام البخلاء هنا، حد عارفاها؟ مش عارفينها! بيحكوا عن إمام البخلاء طالما ما حدش عارفاها يعني بقى نحكيها، حكيناها قبل كده. إمام البخلاء بيقولوا كان راجل بخيل جداً، وكان إذا أخذ الدرهم كلمه وناجاه وفداه، يقعد يكلم الدرهم ويفديه يقول له فداك أبي وأمي، وبعدين يفتح كيس الدراهم ويحط الدرهم يقول له إيه؟ أهن إلى جوار أخوتك، فوالله ما دخل هذا الكيس درهم وخرج منه، ما تخافش ما تقلقش مش هتخرج خلاص.
وبعدين عياله عمالين كل شوية يزنوا عليه عاوزين حلاوة يا بابا عاوزين حلاوة يا بابا، وهو مستحيل، لغاية ما في من كتر الضغط راح يشتري بدرهم حلاوة من السوق، حاجة حلوة يعني، وهو ماشي لقي حاوي أطلق الحية عليه، واحد حاوي واقف بيلم فلوس تعبان عليه يروح ويجي على رقبته وبتاع.
فراح باصص كده قال: أنفق شيئا تبذل الارواح فيه؛ يعني الراجل ده ساب الحية تمشي عليه ممكن تلدغه ولا تخنقه ولا بتاع عشان ياخد درهم، وأنا ببساطة كده أروح أنفق الدرهم كده! أنفق شيئا تبذل الارواح فيه، والله ما أرى هذا إلا واعظاً من الله ساقه إلي، أنشو.
وبعدين مر الزمن ومات الراجل ده فعياله فرحوا.
هيورثوا، كان لهم ابن كبير بكري، مسافر سب وطفش من ابوه، عرف أن أبوه مات؛ رجع وحط إيده على الورث على ميراث كله. فقالوا يعني هيبقى إيه يعني؟ أكيد مش هيبقى زي أبونا، يعني ما فيش زي أبوهم بقى. فقال لهم: أين إدام أبي؟ إنما يعرف الرجل من إيدامه. فين الغموس؟
الغموس يعني أنت بتاكل بالعيش أي حاجة اسمها إدام، غموس؛ لو أكلت الفول، الفول ده اسمه إدام، جبنة، الجبنة اسمها إدام، أي حاجة بتغمسها بالعيش اسمها إدام. قال: أين إدام أبي؟ إنما يعرف الرجل من إيدامه. فجاؤوه بقطعة جبن فيها مثل الأخاديد، حتة جبنة كلها خطوط كده، فقال: ما هذه الأخاديد؟ قالوا: إن أبَاك كان إذا أراد أن يأكل الجبن، مر باللقمة على الجبن ولم يقطع، عشان الجبنة ما تخلصش، فايه ما يقطعش حتة جبنة، يمر كده باللقمة فتعمل خطوط. فقال: أعوذ بالله من التبذير.
طبعا الجنة من تبذر. قالوا له: أنت ماذا تصنع؟ قال: أضع الجبن بعيدا وأشير إليها باللقمة.
فتخيلوا أنت بقى ده بتقول له طلع إيه؟ طلع درهم صعب جدا.
طيب، فرفشته، خلاص نعالج بقى المرض ده إزاي؟ بضده. يبقى أنا حسيت مني بخل شوية، أو يعني أجري على نفسي وأنفق لله عز وجل، طبعا مع الدعاء، مع الافتقار إلى الله، معاني دي كلها طبعا نستصحبها معنا. ومرض الكبر بالتواضع، يبقى أنا حسيت عندي كبر، طب إزاي أحس دي؟ هنعرف بقى إن شاء الله في باب الكبر إيه هي الأعراض اللي لو لقيناها فينا يبقى عندنا كبر، نقوم عرفنا أن عندنا كبر. طب إزاي نعالج الكبر؟ هنعرف في باب الكبر إن شاء الله إزاي نعالج الكبر، لكن خدوها كده يعني إيه دلوقتي كده يعني مجملة: أن مرض الكبر نعالجه بالتواضع، نتكلف التواضع، إزاي؟ هتقابلنا باب الكبر إن شاء الله. ومرض الشره، الأكل الكتير، بالكف عن المشتهى. يبقى بنعالج كل حاجة بضدها، ويأتي له مزيد بيان إن شاء الله في أبوابه.
قال: وكما أنه لابد من احتمال مرارة الدواء، وشدة الصبر على المشتهيات لصلاح الأبدان المريضة، فكذلك لابد من احتمال مرارة المجاهده، والصبر على مداواة مرض القلب.
يعني زي ما أنت بدنك مريض، تروح تاخد الدواء اللي هو غالب الدواء مر، نادرا لما تلاقي الدوا طعمه حلو، فغالب الدواء مر، وفي بعض الدواء مؤلم كمان وألمه شديد، ومع ذلك ترى المريض يذهب طواعية ليأخذ الدواء، مش كده؟ ويستحمل مرارة الدواء، ويستحمل ألم الدواء، لما يرجوه من العافية والصحة، أن شوية وهخف، بدل ما أفضل مريض. وبعدين دي أول حاجة أن أنت بتصبر على مرارة الدواء. ثاني حاجة بتصبر عن المشتهيات، يعني يجي دكتور القلب، يغير الدوا الصعب والشديد وكده، يقول لك إيه: ومش هتاكل بقى كذا ولا كذا ولا كذا، وأنت بتحب ده وده وده، تقوم تعمل إليه؟ تصبر عن تلك المشتهيات، برضه تقول: خلاص مش هاكلها. طب ليه؟ لما ترجوه من العافية والصحة عشان أخف.
قال لك: فكذلك لابد من احتمال مرارة المجاهدة والصبر على مداواة مرض القلب بل أولى. يعني يا جماعه نحن ليه بنعامل البدن كأننا نعيش أبدا؟ يعني تلاقي منا اللي يتوتر لو حصل له بدنه مرض معين ولا بتاع، وتلاقي ماشي على زي ما الدكتور بيقول بالضبط، بالذات لو مرض ضخم شوية ولا صعب ولا حاجة زي كده، ويصاب باكتئاب ويزعل، وهو يسلب منه كل يوم شيء من قلبه ولا دريان، ويسلب منه كمال نفسه ولا فارق معاه. طب يا عم جاهد نفسك في كذا، مش في دماغه، ليه؟ أصل المجاهدة صعبة. طب ما الدوا صعب واستحملته، ده أولى أنك تجاهد نفسك أنك تتحمل مرارة دواء القلب ودواء النفس أولى. ليه أولى يا شباب؟ هو البدن ده لو تلف آخره إيه يعني؟ هيحصل لك إيه آخر حاجة؟ هتموت صح، يعني فيه إيه؟ ذهاب الدنيا. إنما لو نفسك وقلبك راحوا في داهية، فيها إيه؟ ذهاب الآخرة، فأيهما أولى أن تجاهد نفسك فيه؟ دواء القلب ودواء النفس أولى أن تجاهد نفسك فيه.
قال: فإن مرض البدن يخلص منه بالموت، ومرض القلب عذاب يدوم بعد الموت أبدا. يعني المرض مش هو اللي عذاب، يعني هذا المرض يكون سبب العذاب الذي يدوم. وبعدين يا شباب مرض القلب فيه خطورة أكبر شوية من مرض البدن، أو يعني طبيعة المرض أنك إن أهملته ما بيفضلش زي ما هو، مش كده؟ يعني يسمع الاطباء يقول لك إيه: نلحقه في الأول قبل ما الموضوع يكبر وما نقدر، كأنه لو اتساب المرض يستفحل، ولو استفحل ممكن الدواء ما يجيبش فيه نتيجة. وكثير من الناس مثلا لو اكتشفوا السرطان متأخر، يروحوا للدكاتره يقول لك: خلاص، يعني فات الوقت أن احنا نعرف نعالج، كأنه لو كان في البدايه كنا نعرف نعالج. فالمرض، كما أن مرض البدن يكبر ويستفحل، وربما ركزوا في اللي بقوله ده، ربما المرض يؤول إلى عدة أمراض. يعني مثلا مثلا لو اتصاب بمرض معين، ممكن المرض ده عشان ما تلحقش يقوم يضرب لك حاجة تانية، مثلا، فتلاقي نفسك بعد ما كان حاجة واحدة، ضرب لك ثلاث أربع حاجات لمجرد أنك أهملت المرض. قل مثل ذلك في القلب. قل مثل ذلك في القلب. المرض الواحد يستفحل ويكبر، وربما المرض يؤدي إلى عدة أمراض. فمثلا حب الدنيا يؤدي إلى إيه؟ الحسد، مش كده؟ ولو ما كانش موجود حب الدنيا ما كنتش هتحسد غيرك، هتحسده على إيه؟ ويؤدي إلى غير الحسد، ربما يؤدي إلى الاعتداء، الاعتداء ممكن بالقتل، ممكن بالسرقة، ممكن بالنصب. شوف الحاجة الواحدة عمالة تضرب في كم حاجة، زي أمراض البدن.
ونفس الحاجة بقى تستفحل، يعني واحد عنده رياء بسيط كده يقدر يعالجه، أهمله، يقعد يستفحل يستفحل لغاية ما ممكن يوصل للشرك بالله عز وجل، خلاص يبقى رياؤه في أصل الإسلام. فمحتاجين ننتبه لده، ولذلك قالوا إيه في قول الله عز وجل: ذلك بما عصوا وكانوا... إيه بداية الآية؟ ﴿ذَلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ذَلِكَ بِمَا عَصَوْا وَكَانُوا يَعْتَدُونَ﴾ [البقرة: 61]. مما قيل في هذه الآية: ذلك بأنهم كانوا يكفرون بايات الله ويقتلون النبيين بغير الحق، ذلك الكفر وذلك القتل للأنبياء بغير الحق، بما عصوا وكانوا يعتدون. قالوا إن هم في البداية ما كانوش لا خطر على بالهم يكفروا ولا خطر على بالهم يقتلوا الأنبياء، لكن استمرأوا العصيان، فلما عصوا واعتدوا واستمرأوا ذلك واستمروا عليه، تجرؤوا على ما هو أعلى من ذلك، فقتلوا الأنبياء وكفروا. ﴿ذَلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ذَلِكَ بِمَا عَصَوْا وَكَانُوا يَعْتَدُونَ﴾ [البقرة: 61].
وفي الحديث: «لعن الله السارق، يسرق البيضة فتقطع يده، ويسرق الحبل فتقطع يده». طب هو البيضة جابت نصاب القطع؟ ما جابتش نصاب القطع. طب الحبل جاب نصاب القطع؟ ما جابش نصاب القطع. طب إزاي قطعت يده في البيضة والحبل؟ قالوا: لا، المعنى مش كده، أو يعني أحد التفاسير المعنى: أنه ابتدى السرقة بسرقة الأشياء عارف الأطفال من ممكن طفل يبتدي يسرق، هو يتعود، يبتدي يسرق إيه؟ ساندوتش، قلم من مقلمة، ده غير البرنس اللي بدل الشنطة بساندوتش لانشون، ده قصة تانية، ده ده معلم. احنا بنتكلم على الغلابة اللي زينا ده، دخل صفقة عالية قوي. فيحصل إيه؟ ابتدى يسرق الحاجات البسيطة زي البيضة والحبل والساندوتش والقلم ومش عارف إيه، فتجرأ واستمرأ، فدخل في حاجات أكبر، حتى دخل في أنه بيسرق حاجات لها قيمة، واتقبض عليه فقطعت يده، وكانت البداية أنه سرق بيضة وحبل. يبقى يسرق البيضة فيستمرئ السرقة فيسرق ما هو أعلى وأكبر وأعظم فتقطع يده. فهمتوا دي؟
وأصرح من ذلك قول النبي عليه الصلاة والسلام: «فمن وقع في الشبهات وقع في الحرام». من التفاسير اللي فيها أن اللي يجي يقع في الشبهة وهو عارف أنها شبهة، شوية وهيستمرئ الوقوع في الحرام اللي هو عارف أنه حرام، ولو كان منع نفسه من أول في أنه يقع في الشبهة اللي هو ما هواش عارف الشبهة اللي هي إيه، هي حلال ولا حرام، مش عارف؟ فهو عارف أنها شبهة، هو عارف أنها شبهة، يعني ما هياش معروفة حلال ولا حرام ووقع فيها عملها، شبهة ورا شبهة ورا شبهة، شوية يبقى عارف أن ده حرام ويروح يعمله. قال صلى الله عليه وسلم: «من وقع في الشبهات وقع في الحرام، كَالسَّاعِي يَرْعَى حَوْلَ الْحِمَى يُوشِكُ أَنْ يَرْتَعَ فِيهِ». شوية وهيخش، خلاص ماشي. فاحنا عاوزين نلحق نفسنا من الأول، سواء في آفات القلوب، آفات النفوس، الاستمراء على المعاصي، التكاسل عن الطاعات، أول ما تلاقي البدايات الحق نفسك، ماشي؟ علشان لو سبنا نفسنا، أدينا شايفين اهو.
قال: وينبغي وينبغي للذي يطب نفوس المريدين ألا يهجم عليهم بالرياضة في فن مخصوص حتى يعرف أخلاقهم وأمراضهم، إذ ليس علاج كل مريض واحدا. يعني إيه بقى دي أو هذا خطاب للداعية وخطاب لطالب العلم الذي يتصدر لدعوة لتعليم الناس. بيقول: لما يجي لك حد يعني عاوز يطلب العلم عليك، أو يطلب أو يقول لك: تعالى ربيني، أو يعني شوف آفاتي وحاول تعالجها، أو كده، هو ده فن أصلي ما هواش موجود دلوقتي، يعني احنا عمالين نحاول نجيب إيه الحاجات الأقرب إليه. زمان كان موجود كده، كان في حد اسمه المربي، ده غير العالم اللي بتروح تاخد منه علم، لا ده واحد يربيك، يربيك دي حتى لو أنت كبير، ماشي.
طيب، يعمل إليه بقى؟ هو بيقول لك إنه ما يهجمش على الطلاب أو المريدين (المريدين لفظ يستخدمه الصوفية) بالرياضة (اللي هو برضه لفظ بيستخدمه الصوفية، اللي هو زيه زي المجاهدة كده) في فن مخصوص حتى يعرف أخلاقهم وأمراضهم. ليه؟ علشان العلاجات مش واحدة يا جماعه، فممكن مثلا واحد يصلح معه خطاب الشدة، وخطاب اللين يفسده. وواحد تاني العكس، يصلح معه خطاب اللين وخطاب الشدة يفسده. يعني مثلا اللي قتل 99 نفس ده، خطاب الشدة عمل فيه إيه؟ افسده، مش كده؟ قال له: أنت لك توبة؟ قال له: لا مالكش توبة، قتله. ولم يصلح معه إلا خطاب اللين، قال: ومن يحجب عنك باب التوبة؟ كذا إلى آخر الحديث. فممكن واحد كده وواحد كده، أنت ما أنتاش عارف اللي جايلك ده إيه اللي يصلح وايه اللي يفسده.
يبقى هو مثلا جاي هو الخوف أصلا هو مرعوب لوحده، تقوم أنت مدي له جرعة خوف زيادة، يقنط من رحمة الله ويكفر، يبقى هو جايلك عشان يدخل الجنة، أنت دخلته النار خالدا مخلدا فيها أبدا، كفر على إيديك ما شاء الله! ليه؟ هو أصلا جاي لوحده مستوي. العكس هو واحد جاي ما... مش في الدماغ خالص، تقوله رحمة ربنا واسعة، هي فعلا رحمة ربنا واسعة اهو، احنا ما قلناش لا، بس هذا الخطاب بيخليه يعمل إيه؟ يطلع يكمل فجر، مش كده؟ فيبقى العلاج مش واحد.
كنت زمان بدي مجموعة درس، كانوا كلهم بتوع في السوق، يعني رجال أعمال كده بس حاجات صغيرة كده، وبعدين... كان لهم طرفة دول بقى حاجة غير اللي أنا هاكيها. كنت أقول لهم مثلا درس إيه؟ فجر... أنا كان كل دروسي زمان الفجر، ما كناش ندي دروس خالص غير في الفجر، عشان إيه؟ من باب فلترة الناس، اللي عاوز العلم بقى يجي الفجر. فكنت أقول لهم مثلا: فجر السبت الدرس، أروح مالاقيش ولا واحد، ولا واحد. وبعدين يومين ثلاثة أصل، بتصل، بقول: أنت ماجيتْش ليه؟ قوم، ماجيتْش ليه؟ انتوا اللي ماجيتوش؟ يقول لي: كلنا نجينا. فضلنا على كده أوضة وفار مدة، يعني أنا أروح وبعدين يقولوا لي: إن احنا جينا. أتاريهم هم إيه؟ هم تجار. عارفين بقى التاجر اللي يصحى الساعة 12 الظهر وكوباية شاي بلبن وبتاع، وبعدين إيه يصحى للفجر، فهو الفجر بتاعه يعني مثلا احنا فجر السبت اللي هو إيه السبت جاي اهو؟ لا، هم مش كده، هو فجر السبت ده اللي هو السبت فات، يعني يعني احنا صاحيين السبت، فده الفجر اهو نازلين بقى نصلي الفجر.
فكان فيهم واحد، كنا بندي كتاب قصر الأمل لابن أبي الدنيا، كتاب جميل جدا يعني، بيعالج طول الأمل، فكنت كل ما أجي أدي الكتاب ده... الدرس كان مقسوم يعني لكذا كتاب، أجي ابتدي الكتاب ده يروح واحد واخد بعضه وماشي! مرة، في التانية، في التالة، أنا اتضايقت جدا وايه يعني قلت: إيه بقى سوء الأخلاق دي؟ وواحد إيه حابب الدنيا قوي ومش عاوز يسمع. شوفوا بقى التسرع. فجبته بقى، قلت له: أنت ليه بتعمل كده؟ قال لي: أنا مستوي لوحدي! قال لي: أنا بطلع البيت، أنا دايما نفسي محدثاني أني هموت، لدرجة أن ساعات ما بنزلش الشغل. فبيقول لي: أنا مستوي لوحدي في الحتة دي، ما... يعني كلمة هسمعها حياتي هتقف. فهو ده اللي احنا بنقوله، يعني في واحد يعالج بشيء، زي البدن بالضبط، واحد ضغطه عالي، اديته دوا يعلي الضغط، موتته.
طب هو ده مش دوا هو دواء فعلاً! طب مش ده مريض ضغط؟ اه مريض ضغط، بس الدواء ده مش بتاع.. يعني الدواء ده عكس المرض ده! فدي مهمة جداً يا شباب بالذات في الدعوة الفردية. الدعوة بقى العامة هنجيلها كمان شوية، انما الدعوة الفردية مهمة جداً فيها الحكاية دي.
ماشي، قال: إذ ليس علاج كل مريض واحداً؛ فإذا رأى جاهلاً بالشرع علمه أولاً الطهارة والصلاة والعبادة. كتير يا شباب، احنا بنتصور حاجات هي مش موجودة. الكلام ده مهم جداً؛ يعني إيه؟ يعني شفت واحد بيعمل معصية معينة، فانت تصورك التصور الذهني عندك إنه عارف إنها معصية وبيعملها، فلو رحت أكلمه هبتدي منين؟ من العنف على طول! وقد يكون هو ما يعرفش إنها إيه، هو بس يعني.. هو ممكن يكون تعظيمه لله ولرسوله أكتر منك، بس هو ما يعرفش إنها معصية! بمجرد ما يعرف إنها معصية هينتهي عنها فوراً، هو مش محتاج محاضرة، مش محتاج خطبة، هو محتاج تقول له إيه: خلي بالك بتعمل ده حرام، بس كدة.
فاحنا محتاجين شوية نراجع تصوراتنا عن الناس، نهدي وناخد وقتنا في التفكير ونحط الاحتمالات العقلية الواردة في هذا الشخص أو هذه الفئة أو كذا. برضو من غير سذاجة، يعني من غير إيه أن نتوسع قوي في الاحتمالات العقلية وهو يعني مالهاش نسبة يعني في الواقع، يعني إيه؟ يبقى حاجة زي معروفة مثلاً ترك الصلاة حرام، مثلاً ما فيش حد ما يعرفش ترك الصلاة حرام، ما نحطش بقى احتمال يمكن ما يعرفش أن ترك الصلاة.. لا، ماشي.
فلو واحد جاهل علموه، وإذا رأى متكبراً حمله على ما يوجب التواضع، أو شديد الغضب ألزمَه الحلم؛ ده اللي هو طالب العلم أو الداعية لما بيكون بيدعو حد يعمل كده معه، وده برضو هيجي له أبوابه إن شاء الله. قال: وأشد حاجة الرائض لنفسه قوة العزم. طب أنت بقى يلي بتعالج نفسك، يلي بتجاهد نفسك، لابد لك من قوة عزم، وإلا شوية وهتيجي وهترجع عن الطريق؛ زي أي حاجة في الدنيا: سخنت شوية في الجيم وبعدين ولا بقيت تروح، سخنت شوية في الدايت وبعدين فتحتها على البحري، سخنت شوية في القرآن وبعدين سبت الحلقة، سخنت شوية للدرس وبعدين ما بقيتش تيجي. المشكلة فين؟ قوة العزم ما فيش عزم! فمتى كان متردداً فلاحُه، ومتى أحس من نفسه ضعف العزم تصبَّر. طب آه، أنا فعلاً عزمي بيقع، أعمل إيه؟ تصبَّر. طب ازاي أتصبر؟ يعني أعمل إيه؟ فكر نفسك أن الدنيا فانية والآخرة باقية وهي آتية لا محالة، وقد تكون ساعتك حانت، ممكن يبقى ملك الموت معانا دلوقتي وحضرتك هتطلع هتطلع من المسجد محمول على الأعناق! ذكر نفسك بقى كدة في كل موطن، فكل ما تلاقي نفسك مكسل في عمل الآخرة، تقوم تنشط بمثل هذه الأمور؛ ذكر نفسك بالجنة وما فيها من نعيم لو أنت حسيت نفسك يائسان، والعكس لقيت نفسك الرجاء غالب ومذكر نفسك بالنار وما فيها من عقاب الله عز وجل وسخطه، تقوم تعتدل هذه الأمور عندك الرجاء والخوف.
قال: فإذا انقضت عزيمتها -يعني نفسه- عاقبها لئلا تعاود. آه، يبقى تعامل نفسك.. مش احنا قلنا من شويه النفس تربى كما يربى البدن؟ عارف وأنت طفل صغير كدة لما محتاج تحفيز بالهدايا وبالمش عارف إيه والشوكولاتة والبونبوني والحاجات دي وفي نفس الوقت محتاج عقاب في أوقات، نفسك كذلك! نفسك كذلك أنت بتربيها، طب لقيتها كسلت عاقبها. تعاقبها بايه؟ انك مثلاً تزود عليها طاعة، مش طاعة بدعية، يعني يعني طاعة من الطاعات الواردة دي؛ فتقول لها مثلاً: أنت.. تعال نشوف زي قال لك ايه، كما قال رجل لنفسه: تتكلمين فيما لا يعنيك، لأعاقبنك بصوم سنة! كدة مش هنفطر خالص. آه، يعني هو أنس من نفسه إنه إيه قاعد مثلاً مع حد وايه قال كلمة كدة في حاجه ما تعنيهوش. طبعا احنا كل كلامنا فيما لا يعنينا تقريباً، الترندات اللي بتطلع دي تعنينا في حاجة ولا تعنينا في حاجة؟ ليل نهار فيما لا يعنينا! وهذا مما كرهه الله لنا، أن الله كره لكم قيل وقال. قيل وقال دي كرهها الله لنا، تلاقي إيه هذا من.. والله يا جماعه هذا من عقوبة الله التي حلت على مجموع الأمة؛ لأن احنا مش بنتكلم على فئة معينة، لا ده بلاء حل على مجموع الأمة أن الله كره لكم قيل وقال!
فاحنا بقى نعاقب نفسنا على.. يعني مثلاً تراقب تراقب نفسك حتى لو في شيء أصله مباح، ليك، لكن أنت خلاص طلعت درجة ومش عاوز تنزلها؛ ما هي درجات يا جماعه! هو دائرة المباح ليه واسعة؟ ربنا خلاها واسعة ليه؟ مش عشان نعمل كل مباح! ركزوا يا شباب بالله عليكم عشان نفهم نفهم دين بس. ربنا جعل دائرة المباح واسعة رحمة بنا ورافةً، مش عشان نعمل كل مباح في الدنيا، فاهمين الفرق؟ يعني دائرة المباح وسعت عشان لا نقع في الحرج، مش عشان كل واحد فينا يروح لكل مباح ويفعله، لا؛ أمال هترتقي إمتى؟ فيبقى أنا هدرب نفسي أن واحدة واحدة أقلل من المباحات. ليه أقلل من المباحات؟ عشان أقعد في الولا حاجة؟ لا، عشان استثمر وقتي في عمل الآخرة. ما هو أنت لو رحت جريت ورا المباحات هتلاقي وقت منين تعمل الطاعات؟ هتلاقي وقت منين ترتقي في الطاعات؟ هتلاقي وقت منين تزود في الطاعات؟ منين؟! ما أنت غرقان في المباح! عشان كده سيدنا عمر قال إيه: أو كلما اشتهيت اشتريت؟ هو كان بيعمل إيه؟ مباح! مش كده؟ مباح! سيدنا عمر الملهم لا ما عجبوش ده، ابنه يعمل كدة ليه؟ أو كلما اشتهيت اشتريت؟ هنقعد بقى غرقانين في المباحات؟
الفصل الثالث في علامات مرض القلب وعوده إلى الصحة وبيان.. طيب خلينا هو إن شاء الله ممكن تيجي بعد شوية، بس خلينا في حته هنا عاوزين نقفلها عشان إخواننا الدعاة الحاضرين أو اللي هيسمعوا. احنا هنا اتكلمنا عن الدعوة الفردية في انك هتعالج كل واحد بما يناسب.. يناسب مرضه، ولا تقدم على العلاج إلا بعد أن تشخص الداء وإلا ممكن تفسد؛ زي الطبيب بالضبط ما ينفعش أي حد داخل له يدي له أسبرين، ممكن يضيع الناس اللي عنده أصلاً سيولة في الدم ولا بتاع يوديه في داهية خالص، ما فيش كده؛ لا، نشخص الأول اللي عندك وبعدين نديك الدواء المناسب. كذلك المربي أو العالم أو طالب العلم أو الداعية ده في الدعوة الفردية. طب دلوقتي دعوة عامة؟ يعني أنا هفضل بقى أسالكم واحد وبعدين أقول بقى يجوا هنا والتانيين يجوا هنا ودي خطاب لدول وبعد ده يصعب، هذا يصعب؛ طب نعمل إيه في الدعوة العامة؟ نتصرف على غالب الناس، فلو لقينا أن غالب الناس في الغفلة، في التواني، في التجرؤ على المعاصي، يبقى غالب الخطاب الدعوي يبقى في حته الشدة.
لو لقينا العكس لا، يغلب على الناس الخوف والرعب وال.. يبقى غالب الخطاب الدعوي في حته الرجاء وكذا وكذا؛ ماشي، هذا الاتزان في الخطاب، الاتزان مش يعني 50% لا، يبقى الاتزان أن نشوف معظم الناس اللي يصلحهم ويبقى معظم الخطاب ما يصلح المعظم، يبقى أن الناس بقى تبقى واعية، لأنه لو واحد ما هو المعظم دي يعني مثلاً 90%، يعني عندنا 10% الخطاب ده ممكن يبقى مضر ليه، يبقى ال 10% دول فاهمين أن الخطاب ده مضر لينا مش هنسمعه! وده هيجي معانا في الكتاب، هيجي معانا إنه اللي ينبغي أن احنا نجنب.. نغلب جانب الخوف في الدعوة؛ ليه؟ لأن معظم الناس مايلين ناحية الكسل والتواني والجُراة، أو مش كده يا جماعه؟ طب هل معنى كده أن الخطاب ده يصلح لجميع الناس؟ لا طبعا، ممكن واحد يسمع الخطاب ده يقنط من رحمة الله، نقول له خلاص أنت اللي عليك انك ما تسمعش! ودي نصيحة دايما بقولها يعني ما باخدش ودي، واحد بيقول لي أنا بسمعك، بقول له أنت ما تسمعنيش! خطابي لا يصلح لك، خلاص روح شوف خطاب يصلح لك.
قال: الفصل الثالث في علامات مرض القلب وعوده إلى الصحة وبيان الطريق إلى معرفة الإنسان عيوب نفسه. اعلم أن كل عضو خلق لفعل خاص، فمعنى مرضَه أن يتعذر منه ذلك الفعل، أو يصدر منه مع نوع من الاضطراب. يعني إيه؟ بيقول كل عضو في جسمك مخلوق لحاجة، فالإيد مثلاً مخلوقة للبطش -البطش هنا مش يعني الضرب، يعني أن هي يعني تمدها تاخذ بيها حاجة- فالإيد مثلاً مخلوقة لكده؛ طيب، إيديك ما بقيتش عارف تمسك بيها ولا تسيب بيها، اتشلت يعني، مش عارف تحركها من مكانها، يبقى معنى كده أن فيها خلاص فيها مرض، أو بقيت تعرف تعمل ده بس بنوع اضطراب، يعني بقت ترعش، فبتعرف تاخد وتدي كلها بس إيديك عمالة ترعش، برضه فيها مرض مش كده؟ قال: فمرض اليد تعذر البطش، ومرض العين تعذر الابصار، ومرض القلب -وده بقى اللي هو عاوز يقوله- طب القلب بقى إمتى نعرف أن قلبي مريض؟ ما هو ربنا.. احنا عندنا القلوب ثلاثة: قلب سليم، وقلب مريض، وقلب ميت. مش كده؟ عارفين ده ولا مش عارفين ده؟ طيب، أنا دلوقتي عاوز أعرف أنا قلبي مريض ولا مش مريض؟ نقول لك ببساطة القاعدة بتاعتنا: مش ده عضو في جسمك مخلوق لفعل معين؟ هنقول إنه مريض إذا ما كانش بيعمل الحاجة دي أو بيعملها مع نوع اضطراب، بس كده. يجي السؤال: وأيه هو فعل القلب عشان أقيِس بقى وأشوف أنا قلبي بيعمل الحاجات دي ولا ما بيعملهاش؟ هو مش لازم فعل واحد، يعني ممكن العضو يعمل أكتر من حاجة. قال: ومرض القلب أن يتعذر عليه فعله الخاص به الذي خُلق لأجله.
طبعا احنا يا جماعة لما بنتكلم على القلب مش بنتكلم على عضله القلبها، فتقول القلب ما أسهل بيضخ الدم، ما احنا مش بنتكلم على العضله اللي هي دي، لا احنا بنتكلم على القلب اللي هو المعنى اللي هو معروف عند الناس، يعني من غير بقى ما ندخل في فلسفات ماشي. قال: وهو العلم والحكمة والمعرفة وحب الله تعالى وعبادتُه، (يعني وحب عبادته) وإيثار ذلك على كل شهوة. قلوبنا ميتة طبعا مش.. يعني بيقول الحاجات دي لو موجودة قلبك سليم، الحاجات دي بتعملها بس بنوع اضطراب قلبك مريض: العلم والحكمة والمعرفة وحب الله تعالى وعبادته وإيثار ذلك على كل شهوة.
يعني ندي مثال، مش هننفع بقى نشرح كل حاجة من دول، بس مثال على آخر واحدة: إيثار ذلك على كل شهوة، زي صلاة الفجر مثلاً! فأنت صلاة الفجر المؤذن بيأذن، أنت بقى إيه الأخبار؟ هنا برضه المرض ما هياش درجة واحدة؛ ممكن واحد يقول لك لا، أنا أؤثر النوم، وأما أبقى أصحي أصلي! في واحد يقول لك أنا ما بصليش أصلاً، يعني ما فيش صلاة! واحد تاني يقول لك: لما أبقى أصحى، وقت ما أصحى بقى الشمس أشرقت، الشمس ما الشمس غربت، وقت ما أصحى أصلي الصبح! واحد تاني يقول: لا، أنا هظبط المنبه وأصحى قبل الشروق بس بربع ساعة كدة أخطف الفجر! واحد تاني يقول: لا، أنا هصحى مع الأذان وهصلي جنب السرير! واحد تاني يقول: أنا هصحى مع الأذان وهنزل أصلي في المسجد! واحد تاني في الصف الأول، واحد تكبيرة الإحرام، واحد هو اللي بيأذن، واحد هو اللي بيفتح المسجد! وهكذا. خلاص، فانت قيس نفسك بقى على هذا عشان تشوف قلبك فين، قلبك مريض.. وده مثال واحد، يعني ده مثال احنا لسه ما صحيناش، احنا لسه بنصحى في اليوم، فانت بقى في كل يومك تقيس على ده ماشي.
فلو أن الإنسان عرف كل شيء ولم يعرف الله تعالى، كأنه لم يعرف شيئاً! الناس يا جماعة اللي الدنيا ساحلاها وفي وسط السحلة دي نسيت ربنا ونسيت الدين، تلاقيه خلص الجامعة ويخش ياخد دراسات عليا ماجستير في دكتوراه وبعدين يبقى خبير في المش عارف إيه وبعدين.. طب فين دينك؟ نسي يحفظ، نسي يتعلم دين، نسي يعرف ربنا في الرحلة بتاعته! ربنا قال إيه عجيبة جداً في القرآن؟ قال: ﴿وَلَكِنَّ أَكْثَرَ النَّاسِ لَا يَعْلَمُونَ * يَعْلَمُونَ ظَاهِرًا مِّنَ الْحَيَاةِ الدُّنْيَا﴾ [الروم: 6-7]. عجيبة جداً؛ لأن دي ﴿وَلَكِنَّ أَكْثَرَ النَّاسِ لَا يَعْلَمُونَ﴾، ربنا حكم على الناس دي إنها لا تعلم، واللي بعديها على طول: ﴿يَعْلَمُونَ ظَاهِرًا مِّنَ الْحَيَاةِ الدُّنْيَا﴾ ومع ذلك ربنا قال عليهم إيه؟ ﴿لَا يَعْلَمُونَ﴾! يبقى اللي وصل لأعلى شهادات في الدنيا -وهنا احنا مش بنزهد في أعلى شهادات في الدنيا، طالما هذه الشهادات نافعة لعموم المسلمين فخلاص، وإذا وضعت فيها نية حسنة تؤجر عليها- احنا بننكر على من في هذه الرحلة الطويلة نسي ربنا! نسي ربنا، ما يعرفش ربنا، ما يعرفش طريق المسجد، ما يتشافش في المسجد غير في الجمعة، نسي! فنقول لك أنت ما عرفتش حاجة، ربنا اللي بيقول كدة: ﴿وَلَكِنَّ أَكْثَرَ النَّاسِ لَا يَعْلَمُونَ * يَعْلَمُونَ ظَاهِرًا مِّنَ الدُّنْيَا﴾. فانت اللي أنت عرفته في الدنيا ده كله، أنت ربنا بيحكم عليك انك ما عرفتش حاجة!
واحد تاني يقول إيه: لا ده أنا في الشغل بقى، أنا شقيان في الشغل أهو! ربنا سماك بتلعب! مش أنا، ده ربنا قال إيه: ﴿أَفَأَمِنَ أَهْلُ الْقُرَى أَن يَأْتِيَهُم بَأْسُنَا بَيَاتًا وَهُمْ نَائِمُونَ * أَوَأَمِنَ أَهْلُ الْقُرَى أَن يَأْتِيَهُم بَأْسُنَا ضُحًى﴾، الضحى ده..
اللي هو إيه الوقت إيه؟ اللي هو من بعد الشروق بثلث ساعة كده، ومعاك لغاية قبل الظهر وقت الضحى. ده وقت إيه ده؟ مش بس الشغل ده الذروة، مش كده؟ قمة النشاط وقمة الإنتاجية والحاجات الحلوة اللي بتسمعوها دي ﴿أَوَأَمِنَ أَهْلُ الْقُرَىٰ أَن يَأْتِيَهُم بَأْسُنَا ضُحًى وَهُمْ يَلْعَبُونَ﴾ [الأعراف: 98]. ربنا اللي بيقول كده وقت الضحى ده قال: ﴿وَهُمْ يَلْعَبُونَ﴾، يعني ما أروحش الشغل؟ ما قلتش كده. ما أروحش الجامعة؟ ما قلتش كده، انوي فيها الخير تثاب عليها بإذن الله، وما يبقاش ده مبلغك بقى من العلم يبقى أنا مخلوق عشان أضيع عمري كله في الشغل والدراسه والبتاع وفي الآخر أموت، طب عرفت ربنا؟ عرفت دين ربنا؟ أديك شفت أهو: ﴿لَا يَعْلَمُونَ وَيَلْعَبُونَ﴾ [الروم: 7].
وعلامة المعرفة الحب. واحد يقول: طب أنا أنت بقى بتقول طب أنا أعرف ربنا، ما هي بقى أي حد كل يدعي وصلاً بليله، وليلة لا تقر لهم بذاك. لو كل واحد هياخد بدعواه ما كانش حد غلب، أنا عارف ربنا بقى. قال لك: علامة المحبة الحب، فمن عرف الله أحبه. سهلة أنا بحبه، عادي ولا قال أعرفه بحبه يعني عادي؟ قال لك: وعلامة المحبة ألا يؤثر عليه شيئاً من المحبوبات. أنا هنا مش بكلم اللي بيقاوح، أنا هنا بكلم الواحد اللي عاوز يعرف هو فين، فبنقول لك أنت عارف ربنا عشان نجيبها بقى من الأول من أولها، واحد عاوز يعرف أنا قلبي سليم ولا مريض ولا ميت ولا إيه؟ نقول له: والله وظيفة القلب أول حاجه كده معرفة الرب.
فتقول: طيب جميل، أنا أعرف ربنا، مش واحد بيقاوح، واحد فعلاً بيتكلم بصدق يعني، طب خلاص، علامة المعرفة الحب. تقول: جميل، أنا بحب ربنا، نقول لك: علامة المحبة ألا تؤثر شيئاً عليه. فانت بتعمل ده؟ يعني التفصيلة لسه قايلينها من شويه أنت بتحب النوم، هتؤثر النوم ولا هتؤثر أن تقف بين يديه؟ احنا هنا ما دخلناش في المستحبات، يعني ما دخلناش نقوم قبل الفجر بشويه عشان نصلي قيام ليل، إن كان على صلاة الفجر، طب وهتقف بين يديه فين؟ في بيوت أذن الله أن ترفع ويذكر فيها اسمه، ولا في بيتك للرجل يعني؟ طب لو حتى في بيوت أذن الله أن ترفع ففين؟ في أنهي صف؟ طب هتدرك تكبيرة الإحرام ولا مش هتدركها؟ طب صليت السنة القبلية ولا ما صليتش؟
علامة المحبة أن تؤثره على كل من سواك: ﴿قُلْ إِن كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٍ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّىٰ يَأْتِيَ اللَّهُ بِأَمْرِهِ ۗ وَاللَّهُ لَا يَهْدِي الْقَوْمَ الْفَاسِقِينَ﴾ [التوبة: 24]. فهدي الحاجات اللي جايبانا ورا: آباؤكم، أبناؤكم، إخوانكم، أزواجكم، عشيرتكم، أموال اقترفتموها، تجارة تخشون كسادها، مساكن ترضونها. لو الحاجات دي أحب إلينا من الله ومن الرسول ومن الجهاد عليه الصلاة والسلام، حكم الله عز وجل على هؤلاء في الآخر في آخر آية: ﴿وَاللَّهُ لَا يَهْدِي الْقَوْمَ الْفَاسِقِينَ﴾. فمحتاجين نعالج ده، ألا يؤثر عليه شيئاً من المحبوبات، فمن كان عنده شيء أحب إليه من تعالى فقلبه مريض ولا حول ولا قوة إلا بالله.
كما أن المعدة التي تؤثر أكل الطين على أكل الخبز وقد سقطت عنها شهوة الخبز مريضه. واحد يقول لك: أنا ما استمتعش غير وأنا باكل طين، تدي له عيش ولحمه وبتاع يقول لك القرف ده، فنقول له: أنت يا ابني أنت في حاجه غلط، أنت لو معدتك بتؤثر ده على ده معدتك مريضة، فنحن كذلك بل والله الفرق أعظم وأجل. يعني إيه الخبز من الطين؟ يعني في الآخر، إنما أن نؤثر شيئاً على الله قلوبنا مريضة، قلوبنا مريضة.
قال: ومرض القلب خفي قد لا يعرفه صاحبه فلذلك يغفل عنه، وإن عرفه صعب عليه الصبر على مراره دوائه. يبقى أول مشكلة في مرض القلب أنه خفي، يعني ممكن واحد يبقى عنده رياء وما يعرفش أن عنده رياء، واحد يبقى عنده كبر وما يعرفش أن عنده كبر. يعني بعض الشباب يجي يقول لي مثلاً يقول لي إيه، بالذات من اللي لهم نوع تصدر مثلاً ولا شيء، فيقول: لا، هو بيبقى صادق يعني هو جاي عاوز كان بجد يعني مش جاي بيقاوح، بيقول: أنا لا ما عنديش أنا حته الكبر دي، وبديكم مثال بس بسيط عشان نعرف نقيس عليه، وهو هو جاي فعلاً يعني بيبقى يظن ده. طب عرفت منين؟ فيقعد يحكي شوية حاجات كده فأقول له: لا، احنا عشان نعرف احنا جوانا كبر ولا ما جوانا كبر نعرف منين؟ إن موقف ظننا أننا فيه هنصدر وهنقدم وهنستقبل بشكل معين، فما يحصلش ده. لو حسيت إنه عادي ما فيش مشكلة ما حصلش ده، كداد أقول لك ما فيش كبر، حسيت جواك بزعل أنا المفروض كان استقبل استقبال بشكل معين المفروض كنت أصدر في المجلس، المفروض يحطوا قدامي طبق اللحمة مش طبق السلطة لما نقعد ناكل أنا الشيخ المشايخ بتاكل المفروض يعني.
فإذا وجدت ده، يعني وجدت في قلبك حتى لو ما تكلمتش أنه تثقيل عليك، المجلس بقى تقيل عليك، المكان بقيت مستوحش في المكان وعاوز تمشي، حاسس أن ما قدرونيش يبقى في مشكلة، أنت مين عشان تقدم أنت ده؟ أنت اللي كلك بلاوي وأخطاء ومعاصي وقرف. أنت ده اللي هو أنا يعني، مش أنا كلك بلاوي؟ أيوه عيب كده. قلي أيوه، أيوه أنت هو. فانت اللي كلك بلاوي وقرف ومعاصي، ما ده لو عرفوها هيدوك بالجزمة، ده كويس أنهم بس يعني ما حطوش طبق اللحمة قدام، اطفح وأنت ساكت وخلاص كل السلطة.
يبقى المرض مرض القلب خفي قد لا يعرفه صاحبه فلذلك يغفل عنه. الآية المرعبة في آخر سوره الكهف: قريت سورة الكهف النهارده؟ ما قريتهاش. ﴿قُلْ هَلْ نُنَبِّئُكُم بِالْأَخْسَرِينَ أَعْمَالًا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا﴾ [الكهف: 103-104]. يعني دعنا الآن من قضية أولئك الذين كفروا، لكن هذا المعنى موجود في المسلمين، اللي هو فاكر نفسه العمل ده اللي هيدخله جنة، يجي في الآخرة يلاقي ﴿وَقَدِمْنَا إِلَىٰ مَا عَمِلُوا من عَمَلٍ﴾، يبقى عملوا ولا ما عملوش؟ ﴿فَجَعَلْنَاهُ هَبَاءً مَّنثُورًا﴾ [الفرقان: 23]. الآية الثانية: ﴿هَلْ أَتَاكَ حَدِيثُ الْغَاشِيَةِ * وُجُوهٌ يَوْمَئِذٍ خَاشِعَةٌ * عَامِلَةٌ نَّاصِبَةٌ﴾، ما فيش كانت طبعا في الآية لكن ده وجه من التفسير، ﴿هَلْ أَتَاكَ حَدِيثُ الْغَاشِيَةِ * وُجُوهٌ يَوْمَئِذٍ خَاشِعَةٌ * عَامِلَةٌ نَّاصِبَةٌ﴾ كانت عامله ناصبة في الدنيا، ﴿تَصْلَى نَارًا حَامِيَةً﴾ [الغاشية: 1-4] في الآخرة.
فمحتاجين نجاهد أنفسنا ومحتاجين أول حاجه نعرف الأمراض، ما هو أنا دلوقتي يا جماعه لو جيت قلت لك الرياء مثلاً كلنا نعرف الرياء ده خطير جداً صح؟ ويبطل العمل في صور من صوره، أنا أغنى الشركاء عن الشرك، من عمل عملا أشرك معي فيه غيري تركته وشركه، وشيء حافظين الكلام ده كله. لو اديتك المايك كده قلت لك قول لي: إزاي تعرف عندك رياء ولا ما عندكش؟ ما انت لو ما عرفتش تجاوب على السؤال ده ببساطة، يبقى أنت ممكن يبقى عندك رياء، احنا لسه ما دخلناش على مرحلة طب إزاي أعالجه بقى؟ أنا بقول لك تعرف إزاي عندك رياء ولا ما عندكش.
الكبر اللي لسه قايله من شويه علامة يعني قلناها، الحديث فيه مرعب مش كده؟ لا يدخل الجنة من كان في قلبه مثقال ذرة من كبر. فلو قلت لك قول لي: إزاي تعرف عندك كبر غير بقى العلامة اللي أنا قلتها؟ يعني قول لي كم علامة كده نعرف بيهم أنت عندك كبر ولا لا؟ فانت لو ما عرفتش أو لو اتفاجئت بالسؤال ده دلوقتي، وأنت راجل عندك 15 سنة ولا 20 سنة ولا 50 سنة ولسه بتتفاجئ بالسؤال اللي هو أنا عمري ما قعدت أفكر أنا عندي رياء ولا لا؟ أنا عندي كبر؟ أنا عندي عجب ولا لا؟ أنا عندي حب ظهور ولا لا؟ مشكلة. هذه الأمراض خفيه فمحتاجة نركز معاها ونتعلمها.
قال فلذلك يغفل عنها، وإن عرفه، طب عرفنا خلاص علامات الكبر كذا علامات الرياء كذا، صعب عليه الصبر على مراره دوائه. لأن احنا الراجل اللي اتعود ده يبقى إيه على طول في ظاهر وعلى طول أعماله ما تدربش على أنه يعمل حاجه خفيه، ما تدربش أنه يعمل حاجه الناس مش شايفاها. لأن احنا بنيجي نقول علامة من علامات اللي تعرف بها الرياء إيه؟ أنه في مسألة إدار العباده يقول لك إيه، طب ما أنا لما أبقى معايا ناس بنشط للعبادة، ده غلط ولا صح؟ الله، شفت بقى شفت بتوع الإدارة. على حسب، مش مهم بقى على حسب إيه يعني.
بيقول واحد كان نفسه ابنه كده إيه واقع في عصر بقى الذهبي للعلم الشرعي وكده، فحب ابنه إيه يعني يبقى ليه صيت وباع وبتاع، فقال له: يا بني، إذا سئلت سؤالاً لم تعرف له جواباً فقل فيه قولان، تسلم. أنا سالت أي سؤال مش عارف جوابه قل إيه؟ فيها قولان، وهنلاقي فيها إيه أي قول بقى ويعني المهم دلوقتي فيها قولان. فالواد قعد أول مجلس ليه، طبعا الواد مش عارف أي حاجه، فكل واحد ساله يقول له إيه فيها قولان؟ فواحد حس بالأيه فهم اللعبة قال له: يا شيخ، أفي الله شك؟ فقال: فيها قولان. طبعا دي استمارة 6 على طول ده كفر، أبوه قاعد راح قال إيه؟ فيها قولان في إعرابها، أما الأول وابتدى يعك في الآية، يعك في النحو بقى مش مهم، إنما يعك في الله.
فهو هل بقى لو نشطت للعبادة عشان معايا ناس أبقى أنا كده مرائي؟ عبادة ما كنتش بعملها وأول ما بقى معايا ناس عملتها. من العلامات اللي قالوها قالوا إن هو العبد فعلا لما بيشوف غيره بيعبد ربنا بينشط، طب أعرف منين؟ قالوا: مثل نفسك حيث تراهم ولا يرونك. حد فاهم حاجه؟ يعني لو أنت في أوضة مثلاً زجاجها فامي وشفتهم بيصلوا بره وبيجتهدوا، فانت ساعتها نشطت انك تصلي وتجتهد هما مش شايفينك، لو لقيت ده الباعث ليك يبقى ده مش رياء، أنت مش بتصلي ليهم، إنما لو لقيت نفسك لو جوه الأوضة اللي أنت مش باين فيها وشايفهم زي ما أنت يعني قاعد مش هتقوم يبقى أنت قمت ليه مجرد أنهم شافوك؟ ده هيجي إن شاء الله معانا في إيه باب الرياء إن شاء الله، وأكثر من ذلك إن شاء الله.
طيب قال وإن ع وإن عرفه، يعني المرض، صعب عليه الصبر على مراره دوائه، لأن دوائه مخالفة الهوى وهو نزع الروح. نقول لك إيه: أنت كن ما تطلعش تعمل فيديوهات وتلاقي نفسك مش قادر تعمل ده، كأنك بتطلع في الروح. اللي متعود يخرج في سبيل الله ويدعو يقول لك إيه: اقعد اتعلم شويه، أنت نفسك مش قادر تعمل ده، وهكذا.
قال: وإن وجد الصبر لم يجد طبيباً حاذقاً يعالجه. قال: طب خلاص، أنا عندي الصبر، يلا حد يعالجني، نقول له: للاسف ما بقاش في أطباء دلوقتي يعالجوا ده، فإن الأطباء هم العلماء، والمرض قد استولى عليهم ولا حول ولا قوة إلا بالله، والطبيب المريض قلماً يلتفت إلى علاجه، فلهذا صار الداء عضالاً والمرض مزمناً، واندرس هذا العلم اختفى، وأنكر طب القلوب ومرضها بالكلية لدرجة لو قعدنا نقول فين أمراض؟ مين بيكلم في أمراض القلوب؟ لا تجد تجد إلا الواحد بعد الواحد، فين العلم ده؟
قال: واقبل الناس على أعمال ظاهرها عبادات وباطنها عادات. ده في زمن ابن الجوزي والغزالي، احنا دلوقتي ولا حتى دي بقول لك في زماننا الناس بتعبد بس بالظاهر كده، احنا ما فيش حتى العبادة اللي في الظاهر دي. فهذه أصل المرض نقف هنا ونكمل بقى المرة الجاية إن شاء الله. حد عاوز يسأل حاجه؟ ما فيش. سبحانك اللهم وبحمدك, نشهد أن لا إله إلا أنت, نستغفرك ونتوب إليك.
الشيخ أمجد سمير