دخولتسجيل الدخول

٣- كتاب رياضة النفس

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله.

اللهم صل على سيدنا محمد النبي وأزواجه أمهات المؤمنين وذرياته وآل بيته كما صليت على آل إبراهيم إنك حميد مجيد. أما بعد، وصلنا إلى قول المصنف: وقد ورد في الحديث أن النبي صلى الله عليه وسلم كان كثيراً ما يدعو ويقول: «يا مقلب القلوب ثبت قلوبنا على دينك، يا مصرف القلوب اصرف قلوبنا إلى طاعتك». فالإنسان لابد أن يستحضر ذلك المعنى؛ معنى أن قلبك سريع التقلب وشديد التقلب، وما سمي القلب قلباً إلا لهذا. تبقى صاحي حابب الطاعة وعندك همة وعندك نشاط، ساعة زمن وتلاقي قلبك اتحول مئة وثمانين درجة، مش كدة؟

طيب، إيه العلاج؟ ما هو هو ده القلب، القلب لسرعة تقلبه على طول متقلب. طب عاوزين نثبت؟ الثبات من عند الله عز وجل، فتقوم تكثر من هذا الدعاء: «يا مقلب القلوب ثبت قلوبنا على دينك». وقلوب العباد بين أصبعين من أصابع الرحمن يقلبها كيف شاء، يبقى إذا التقليب فعله والتثبيت فعله جل وعلا.

فإذا كان القلب ديدنه وما جبل عليه أن يتقلب فلا مثبت له إلا الله جل وعلا. فتكثر من هذا الدعاء: «يا مصرف القلوب اصرف قلوبنا إلى طاعتك». وفي الحديث الآخر: «مثل القلب كمثل ريشة بأرض فلا تقلبها الرياح». الفلاة اللي هي الصحراء، عارفين الريשה أصلاً، يعني هي لوحدها تتقلب تقلب شديد وبتطير، لو بين المباني وفي المدن ده بيحصل في الريش، تخيل بقى جبت ريشة وحطيتها في صحراء، فهذا قلبك، مثل القلب كمثل ريشة بأرض فلا تقلبها الرياح. طب أنت متخيل أن الريشة دي ممكن تثبت ولا تتقلب ولا تتحرك؟ مستحيل.

عشان تعرفوا يا جماعة خطورة الأمر وصعوبة الأمر، اللي داخل على قلبه بجدعنته وبحوله وقوته مش هتفلح. مش هتفلح، إنما هو الله جل جلاله، فتلجا إليه وتفتقر إليه سبحانه وتعالى.

ثم تكلم عن أقسام القلوب، اللي في النسخة اللي معاكم بقى صفحة كام اللي اتوزعت؟ مئة وواحد وخمسون، صفحة مئة وواحد وخمسون في الورق اللي توزع. فذكر أن القلوب ثلاثة، ملخص هذا الفصل مش هنقراه، إنما القلب الأول هو قلب عمر بالتقوى وزكي بالرياضة، يعني قلب الأصل فيه التقوى والصلاح. والقلب الثاني قلب مخذول مشحون بالهوى، واضح الكلام؟ القلب الثالث بقى، ده مهم معانا شوية، لأنه القلب الثالث ده هو غالباً قلوب معظم الناس؛ قلب يبتدئ فيه خاطر الهوى فيدعوه إلى الشر، فيلحقه خاطر الإيمان فيدعوه إلى الخير، اللي هو بين بين، خاطر الهوى وخاطر الخير.

مثاله أن يحمل الشيطان حمله على العقل ويقوي داعي الهوى، يبقى إحنا يا جماعة عقل وهوى. العقل اتسمى عقل ليه؟ مادة عقل في اللغة العين والقاف واللام بتدل على إيه معنى إيه؟ الربط، المنع والحجز، ماشي. فيقولوا إيه العقال؟ العقال بتاع الناقة اللي هو الحبل اللي بتربط بيه الناقة، مش كدة؟ عشان بيمنعها، فده العقال. والعقال بتاع الخليجيين ليه تسمى عقال؟ عشان يمنع الغترة أنها تتزحلق فيمسكها يحكمها كدة، مش كدة؟ أي حاجة فيها العين والقاف واللام هتلاقوها في المعنى بتاع مع المنع والحجب والحجز وكدة.

كذلك العقل، عقل الإنسان ليه تسمى عقل؟ علشان بيمنع الإنسان من اقتراف ما يلام عليه، سواء كان الحرام أو سواء كان المرذولات أو تضييع الأوقات، اللي بيمنعك من كل ده العقل. فلما تلاقي معظم الناس في الدنيا دلوقتي يومها ضايع على التليفونات، فاعرف أن عقول الناس خفت، مش كدة؟ وما إحنا شايفين ده؛ لأن كلنا عقولنا خفت فشايفين أن إحنا كلنا عقلاء. عارفين اللي قال له إحنا العاقلين اللي في مستشفى المجانين، قال له: إحنا اللي عاقلين، إحنا جايبينها هنا عشان ما نختلطش بالمجانين اللي برة، إحنا بقى المجانين اللي برة.

فالشيطان يحمل حمله على العقل ويقوي داعي... يبقى يا جماعة من الأمور التي... ركزوا بقى، أنا ليه ابتديت المقدمة دي كلها؟ ولذلك العقل يسمى حجر، برضه المادة دي الحجر فيها برضه المنع والإحاطة، الحجر فيه برضه معنى كدة، ماشي.

طيب أنا ليه قلت الكلام ده؟ علشان واحد من أهم الحاجات اللي بتمنعنا عن اقتراف المرذولات، عن اقتراف الحرام، إعمال العقل. إعمال العقل أنك تفكر في مالك وتفكر في مآل ما تفعل، تقعد تكلم نفسك كدة: تسلط جند العقل على جند الهوى، فتكلم نفسك، وبعدين أيتها النفس، طب أنت كدة رايحة لفين؟ طب هبك نلت ما نلت من الشهوات ومن ملذات الدنيا، ثم ماذا؟ ﴿أَفَرَأَيْتَ إِن مَّتَّعْنَاهُمْ سِنِينَ * ثُمَّ جَاءَهُم مَّا كَانُوا يُوعَدُونَ * مَا أَغْنَى عَنْهُم مَّا كَانُوا يُمَتَّعُونَ﴾ [الشعراء: 205-207]، هذا خطاب للعقل. هبك أيتها النفس نلت ما نلت من الشهوات وأخذت حظك وافراً من ملذات الدنيا واقتحمت الحرام ولا رادع، ثم ماذا؟ هتموتي، طيب هتيجي يوم القيامة يعني خلاص اللي حصل؟ لا أبدا، ﴿أَحْصَاهُ اللَّهُ وَنَسُوهُ﴾ [المجادلة: 6]. فارعوي أيتها النفس وامتنعي عما تفعلين، فقليلاً وستندمين. تقعد تكلم نفسك كدة، يبقى أنت بتسلط جند العقل على جند الهوى.

والشيطان شيطان عشان يوقعك في المعصية لابد أن يهجم على عقلك؛ لأنك لو فايق مش هتقتحم المعصية، ولذلك ذكر الله عز وجل وصف أولئك الذين يقعون في واحدة من أفحش الكبائر: ﴿لَعَمْرُكَ إِنَّهُمْ لَفِي سَكْرَتِهِمْ يَعْمَهُونَ﴾ [الحجر: 72]، لأن الشيطان لابد أن يضعف جند العقل، ولو العقل كان فايق مش هتقع في المعصية. قال: أن يحمل الشيطان حمله على... وهذا يا جماعة نفعله حتى في الدنيا، يعني إذا كنا بنقول الاحتجاب عن المعاصي صعب ولا سهل، إيه رأيكم؟ صعب، مش كدة؟

ولذلك لما خلق الله عز وجل الجنة والنار، نظر جبريل إلى الجنة فقال: وعزتك وجلالك، لا يسمع بها أحد إلا دخلها، ونظر إلى النار فقال: وعزتك وجلالك، لا يسمع بها أحد إلا دخلها. فأمر الله عز وجل فحفت الجنة بالمكاره، وحفت النار بالشهوات. فنظر جبريل إلى الجنة فقال: وعزتك وجلالك، لقد خفت أن لا يدخلها أحد، ونظر إلى النار فقال: وعزتك وجلالك، لقد خفت أن لا يخرج منها أحد. فالنار محفوفه بالشهوات. تخيلوا المشهد ده كدة أن أنت وأنت تقتحم الشهوة، أنت تقتحم النار؛ يعني أنت النار وحواليها الشهوات، أنت رايح الشهوة سايقاك، شايف الشهوة قدامك سايقاك كدة وأنت رايح للشهوة يا ابني النار ورا، النار ورا. فهذا أيضاً خطاب للعقل.

فأنا ليه قدمت هذه المقدمة أيضاً؟ قلنا أن هذا نفعله حتى في أمور الدنيا، يعني إيه؟ يعني واحد قال لك بس أنا هعمل حمية أو يعني دايت أو رجيم أو كدة وأروح الجيم عشان عاوز جسمي يظبط.

دي صعبة. إيه اللي بيخليه يكمل؟ العقل. العقل حتى لو ما كلمش نفسه بصوت عالي، لكن هو ده خطاب العقل، اللي هو إيه: اصبر علشان جسمك يتضبط، استحمل النهارده علشان بكره تفوز بجسم مثالي أو جسم رياضي، أو جسم حتى مش لازم رياضي صحيح ما فيهوش علل. ده خطاب بإيه؟ بعقل، وده اللي بيخلينا نصبر. حكيت لكم -مش عارف هنا ولا في مسجد تاني- قصة صاحبي، واحد كان من بتوع الجيم اللي بيبلق بقى وحاجات كده، فكان ياكل بيض مسلوق كتير، وكان يقول لي: أكتر أكلة بكرهها في حياتي البيض. مش عشان بيأكله كتير يعني، من قبل ما يبتدي ياكل البيض، هو أصلاً ما بيحبش البيض.

فاستغربت، بقول له: أمَال بتاكل الكميات دي ليه؟ قال لي: علشان أكلها، أفضل أكلم نفسي في فوائد البيض والبروتين اللي جسمي محتاجه. بيقول لي: بفضل أكلم نفسي كده علشان أعرف أكل البيض اللي باكله ده. وقل مثل ذلك بقى في كل شيء، اللي بيقعد يذاكر ده علشان يجيب درجة كويسة -يعني هو بيحب المذاكرة؟ ما حدش بيحب المذاكرة ويصبر على ذلك- ما الذي صبره؟ العقل. لأن يا جماعة من وظيفة العقل أن هو يقارن بين المصالح والمفاسد، ويرجح إحدى الكفتين.

فأول ما تلاقي نفسك بترجح الكفة اللي هتوديك نار، اعرف أن العقل راكن. فالشيطان يحمل حملته على العقل، ويقوي داعي الهوى، ويقول: أما ترى فلاناً وفلاناً كيف يطلقون أنفسهم في هواها؟ أنت معقد ليه كده أيها الشاب؟ أنت... يقعد يكلمك بقى كده الشيطان: أنت معقد ليه كده؟ ما تشوف أصحابك، شوف زمايلك. وخلي بالك، الشيطان ده ممكن ما يجيلكش أنت بقى، لو يئس منك، يجي يوسوس لأمك مثلاً: ما تشوف الشباب عاملة إزاي، ما تروح تتنحر، واعمل زي شباب ما بتعمل، ما في أمهات كده.

مرة كنت رايح فرح بنت خالتي، وكان في مكان ممنوع دخول الملتحين فيه يعني وكده. كده أنا ما بدخلش أفراح، بس هو كان نادي، والنادي ممنوع يعني يدخل فرح في قاعة. فأنادخلت على الباب: السلام عليكم، وعليكم السلام، رحت داخل، ما حدش وقفني أصلاً ما... فسلمت عليهم من برة قاعة كده، وقعدت في النادي لغاية ما إيه ما أروح يعني. وبعدين ست كبيرة كده قاعدة عمالة تبص عليا، طبعاً مين ده وبيعمل إيه هنا؟ وبعدين بشوية راحت قالت لي: ممكن بس دقيقة؟ رحت لها، فقالت لي: أنا دخلت هنا ازاي؟ قلت لها: والله، مش قلت لهم: سلام عليكم، وعليكم السلام، ودخلت؟ ده خد... وده حقيقي يعني، ما حدش عمل حاجة يعني.

فالمهم، فابتديت بقى تحكي لي على ابنها: أصل ابني ملتحي كده، وبيسمع للناس دي اللي هي مش عارف اسمها إق إيه، واللي هم ب... إيه؟ الواحد بيسمع... فأنَا قاعد مش عارف أقول لها إيه بقى: يرضيك نروح المصيف، نقول له: انزل البحر مع بنات خالاتك؟ يرفض. هي بقى ارتاحت لي، فيعني تقول لي: أنت... شوف أنت وشك سمح إزاي! طب أنا هرد عليها هنا؟

فالمهم، طب أنتوا مستنيين بقية الحوار، صح؟ الممكن الإيه يعني؟ الشيطان يسلط عليك الاب أو الأم، أو أي حد بقى يعني، يبقى في ضغط مجتمعي عليك: أنت عايز تتنسك، عايز تت... تعبد، عايز تتدين؟ فما تشوف الناس عامله إزاي، ما... يعني أنت اللي هتبقى فيها مش عارف إيه، أنت يا عم الشيخ... الكلام بقى الإيه اللي الشباب عارفينه ده. أما ترى فلاناً وفلاناً كيف يطلقون أنفسهم في هواها؟ وممكن كمان يعمل حيلة ثانية بقى، قال: حتى يعد جماعة من العلماء، يعني يجي يقول لك إيه: تبقى أنت عرفت -مثلاً مثلاً- أن اللهث خلف الدنيا آخره وحش، وهتلبس في الحيط، وهتبقى بتاعت دنيا، والآخرة هتروح من قلبك، وشوية وهتلاقي أعمال الآخرة تدخل فيها الدنيا، وتضيع يا مسكين.

قوم يجي يقول لك: يعني أنت أجدر من فلان وفلان؟ قوم يجيب لك إيه؟ أسامي ناس أنت بتعظمهم في الدين، يلبس عليك أمرك، خلاص! الأمر بان لك، مالك ولفلان وفلان؟ أنت هتتحاسب عن نفسك، ولا لك دعوة لا بفلان ولا بعلان. ولا تحتقر أحداً، يعني مش بقول كده يعني إيه، لا خالص. ابن عمر ليه كلمة جميلة جداً لما سئل عن التقوى قال: التقوى ألا ترى أحداً ألا ترى نفسك خيراً من أحد. دي التقوى، أنك ماشي، أي حد تشوفه هو أحسن مني. ماشي، لقيت واحد كبير في السن عنك، تقول: آه، شوف، صلى صلاة أكتر مني، وصام صيام أكتر مني، ده أحسن مني. شفت واحد أصغر منك، تقول: آه، أنا أذنب... أذنب... أذنبت أكتر منه بكتير، هو لسه صغير 20 سنة، أنا 40 سنة بقى أذنب، هو خير مني. وهكذا.

قال: حتى يعد جماعة من العلماء، قال: فتميل النفس إلى الشيطان، يقول له: شوف فلان وفلان، شوف أقرانك، شوف أصحابك، شوف أطلقوا لأنفسهم العنان ومبسوطين في حياتهم إزاي والدنيا جميلة، وأنت اللي قاعد ومقفل على نفسك، ولا بتروح ولا بتجي. قال: فيحمل الملك حمله على الشيطان، ويقول: هل هلك إلا من نسي العاقبة؟ فوق، إيه فلان وفلان في آخره؟ وكل دول هيقفوا ويسألوا قدام ربنا سبحانه وتعالى، ففوق واذكر عاقبتك. قال: وهل هلك إلا من نسي العاقبة؟ فلا تغتر بغفلة الناس عن أنفسهم. أرايت لو وقفوا في الصيف في الشمس ولك بيت بارد، أكنت توافقهم أم تطلب المصلحة؟

ده كله يا جماعة خطاب إيه؟ عقل، عقل. يجي الملك يقول لك: يعني أنت واقف دلوقتي والناس كلها واقفة في الحر في الشمس في الصحرا، وأنت ليك بيت، تروح تقف معاه في الشمس في الصحرا لأن هم واقفين؟ لا طبعاً، هروح تقعد في بيتك في في الضل. قال: أفتخالفهم في حر الشمس، ولا تخالفهم فيما يؤول إلى النار؟ يعني من أطلق لنفسه العنان في الشهوات يخشى عليه يوم القيامة، احنا طبعا لا يعني... لا نحكم لأحد بجنة ولا نار من أهل القبلة، ولكن نرجو للمحسن ونخافه على المسيء، لكن ما نقولش فلان في النار عشان بيعمل معاصي، ما حد... الله أعلم. لكن نخاف عليه، والمحسن نرجو له.

قال: فتميل النفس إلى قول الملك، ويقع التردد بين الجندين، إلى أن يغلب على القلب ما هو أولى به، فمن خلق للخير يسر له، ومن خلق للشر يسر له، فمن يرد الله أن يهديه يشرح صدره للإسلام، ومن يرد أن يضله يجعل صدره ضيقاً حرجاً كأنما يصعد في السماء. قال: اللهم وفقنا لما تحبه وترضاه.

ثم افتتاح باباً جديداً فقال: كتاب رياضات النفس وتهذيب الأخلاق. لفظ الرياضة نقدر احنا نسميه المجاهدة، يعني ده اللفظ الإيه الوارد. والرياضة مصطلح عند الصوفية وهو قريب من المجاهدة، يعني مجاهدة النفس.

خلاص.

قال: اعلم أن الخلق الحسن صفة من صفات الأنبياء والصديقين، وأن الأخلاق السيئة سموم قاتلة تنخرط بصاحبها في سلك الشيطان، وأمراد تفوت حياة الأبد. واحنا قلنا لكم قبل كده يا شباب؛ لو عاوزين مشروع تقابلوا به ربنا هيبقى تحسين الأخلاق، لأن احنا بعيد جدا في كل المجالات. يعني احنا دلوقتي ما تقيس نفسك على العصر اللي انت فيه، يوم القيامة يبعث الناس كلها من لدن آدم إلى قيام الساعة. ففي جيل هيبقى اسمه الصحابة، وفي جيل هيبقى اسمه التابعين، وفي جيل اسمه تابع التابعين، وفي أجيال أخرى اللي هم كانوا صح أصحاب الأنبياء برضه ما كانوا هيطلعوا أوحش منا، يعني لا طبعا. فاحنا لو قسنا نفسنا على دول هنروح فين؟

يعني تعالوا كده مثلا نمسك أبواب الخير، العبادة مثلا. لو قسنا نفسنا في التعبد على دول هنبقى احنا فين؟ مالناش وزن، مش كده، لا في قيام ليل، ولا في صيام نهار، ولا ما فيش، مش هنلاقي يعني ما بالقياس معدول، ما فيش، ما فيش أمل في حاجة. طب لو قسنا نفسنا على طهارة القلب هنبقى فين برضه؟ ما فيش. يعني قلوبنا وقلوبهم مين يكسب؟ ما في يعني، طب هنقيس نفسنا مثلا عليهم في إيه؟ في العلم، برضه مش هنلاقي. طب في الجهاد؟ فما تلاقيش حاجة كده كبيرة أن اللي ممكن لو قست نفسك على هؤلاء والمفروض نكون بنقيس نفسنا على هؤلاء، أنا ليه بقول كده يا جماعة؟ عالي الهمة، عالي الهمة ما بيبصش للي في السبنسا. عارفين السبنسا ولا مش عارفين السبنسا؟ السبنسا اللي هو إيه؟ اللي في آخر القطر ورا يسموه سبنسة، ماشي، فما عالي الهمة ما يبصش على السبنسا، ما يبصش على الناس اللي في الآخر، دايما عينه على أنه عاوز يبقى أول واحد.

أبو مسلم الخولاني كان يعمل إيه؟ يضرب نفسه ويضرب رجله، كان من التابعين، سادات التابعين، ويقول: قومي أيزن أصحاب محمد أن يستأثروا به على الحوض دوننا؟ يعني نبعت يوم القيامة يجي سيدنا النبي عليه الصلاة والسلام واقف على الحوض يبص يلاقي الصحابة واحنا مالناش مكان؟ كلا والله لنزاحمنهم عليه حتى يعلموا أنما خلفوا رجالا. فاحنا عاوزين نقيس نفسنا على هؤلاء، فلو احنا قسنا نفسنا عليهم في كل الأبواب هنلاقي ما احناش فيها، وصعب يعني أن احنا نصل في هذه الأبواب لشيء يخلينا ننافس، صح ولا إيه؟

يعني لو قلنا ماشي، احنا في العبادة مش كده، طب يلا بقى يلا نشد في العبادة؟ فهنلاقي الموضوع يعني يسير على من يسره الله عليه، لكن هو برضه مش بالسهوله، وقل مثل ذلك في تنقيه القلب وصفائه، وقل مثل ذلك في العلم، وقل بقى مثل ذلك في كل حاجة. هنلاقي الباب الوحيد اللي ممكن ننافس فيه وفيه فضل كبير هو باب حسن الخلق، ده احنا قلناه قبل كده. أما أقول ما لازم يبقى هنا خلاص يعني عارفين في أي حته، يعني أنتوا دوروا هقول لها فين، ماشي، فهتلاقي مثلا إيه أن ازاي ده بالاجتهدت في هذا الباب هتروح فين؟ حد يقول لنا حديث يلا: «أن أحبكم إلي وأقربكم مني منزلة يوم القيامة...» أحسنكم أخلاقا.

احنا احنا بنتكلم في، احنا مش بنتكلم في الجنة، احنا بنتكلم في إيه؟ أقربكم مني منزلة. فاحنا بنتكلم في درجات عالية: «وإن الرجل لينال بححسن الخلق ما يناله...» آية أو درجة آية الصائم القائم. فاحنا هنا بنتكلم برضه مش في أن واحد بيتزق عشان يدخل جنة، احنا هنا بنتكلم في درجة عالية من الجنة. فده باب ممكن ننافس فيه، يعني أنت تقصد الباب ده سهل؟ لا، مش سهل، هو صعب برضه، صعب، لكنه لو قسنا ممكن يكون أسهل من أبواب أخرى. قال: فينبغي أن تعرف العلل التي بها تسوء الأخلاق، ثم التشمير في معالجتها، ونحن نشير إلى جمل من الأمراض.

الحقيقة عاوز أقول حاجة عشان موضوع إيه الأطفال، لما يحصل زي ما قلنا بقى في بداية الدرس، خلاص مش هنعيد الكلام اللي قلنا، بس لما يحصل حاجة زي كده يا نساء ويا شباب ويا كل حاجة بيبقى في علينا واجبات، علينا واجبات، يعني ده بيكون استدعاء أمور من الله عز وجل يستدعيها منا بفعله فينا. فلو نظرنا للكون هكذا لتبدلت الأحوال، يعني إيه كل حاجة؟ لما حاجة تحصل تقول: هذا خطاب الله لي، أني أعمل حاجة، إيه يا رب الذي تريده مني؟

فنقول يعني مثلا لو قلنا مثال الأطفال ده، فلو إحنا طفل بيعيط ولا طفل مش عارف مضايق اللي حواليه، فاللي حواليه يقولوا إيه؟ ما يمكن بذنبي، كل واحدة تقول: يمكن ده بذنب أنا حرمت الناس الخير، ولو أنا قعدت استغفرت شوية كده يمكن الطفل ده يسكت. فيبقى ده استدعاء التوبة والاستغفار ومعاهدة الرب سبحانه وتعالى بتحصيل التقوى عشان ننال الخير وننال العلم، ما هو ما أُحرم إنسان خيرا إلا بذنب، ما نزل بلاء إلا بذنب، فإذا كان هنحرم علم ولا هنحرم مجلس خير، هذا أعظم البلاء وأشد البلاء، للناس فاكرة البلاء مرض، فلوس تروح، لا البلاء الأشد بلاء الدين، بلاء الدين خلاص.

يبقى ده استدعاء التوبة، توبة جماعية، يبقى الكل كل المتضرر أو كل إيه يستغفروا ربنا، يتوبوا لربنا سبحانه وتعالى. والأمر الثاني أنه برضه استدعاء، استدعاء فعلا من ولي بقى الطفل نفسه. يعني إيه؟ يعني دلوقتي أم الطفل ده زمان الستات بيدعوا عليها مش كده؟ فتقول: طب أنا يعني أعمل إيه دلوقتي؟ اهو اتفضل، ما دي حاجة تانية برضه قالوا إن إن ده برضه تنبيه على فعل لا ينبغي فعله من ناحية الكبار. يعني أنتوا بتتكلموا، طيب أنا بقى هسلط عليكم اللي ما تعرفوش توقفوه، فيبقى برضه ولي الطفل يفكر في إيه؟ في أنه لو وفر البيئة لغيره عشان يتعلم صح، وعشان يركز وعشان كده مش بنقول أنها تمشي، واحنا لا نشجع أبدا أن أي أم تمشي حتى لو معاها طفل، لكن ما فيش مشكلة أن هي إيه تاخده تطلع بيه بره شوية، تفرفشه، تدي له حاجة يلعب بيها كده يعني، لأن في أمهات بيجوا يطلقوا العيال في المسجد وإيه ما لهمش دعوة، المهم الدرس، وبقية الناس بيبقى في نوع من الإيه الفردانية أو الأنانية، وممكن تروح رمياها في أول المسجد، تروح تقعد في آخر المسجد عشان الواد ما إيه ما يعطلهاش وما يركزش، يشتت غيرها، فاحنا عاوزين كلنا يبقى يعني نرى ذلك، نرى ذلك، نراه أولا فعل الله عز وجل، وبعدين شوف بقى ربنا يستدعي منا إيه بهذه الأفعال ماشي.

طيب قال: ونحن نشير إلى جمل من الأمراض وكيفية معالجتها في الجملة من غير تفصيل، فإن ذلك يأتي مبينا إن شاء الله تعالى. قال: الفصل الأول في فضيلة حسن الخلق وذم سوء الخلق، وقد ذكر شيء من ذلك في آداب الصحبة. ماشي، مش عاوزين يعني قوي حاجة من الباب ده، الباب اللي بعده مهم، أو الفصل، فصل في قبول الأخلاق للتغيير. مهم جدا جدا الفصل ده يا شباب، وهو كالمقدمة لما يأتي، لأنه هيجاوب على شبهة بنسمعها كتير.

قال: وقد زعم بعض من غلبت عليه البطالة فاستثقل الرياضة أن الأخلاق لا يتصور تغييرها. يعني بعض الناس البطالة زعم أن الأخلاق لا يمكن تغييرها، عارف لما تيجي تقول لواحد إيه يا فلان طب اهدى؟ يقول لك إيه: بص، هو أنا كده، ده طبعي. عارفين الكلمة دي؟ أيوه، يعني إيه طبعك؟ يعني طبعك تروح النار؟ ما طبعك غيره واشتغل عليه، إيه طبعك؟ تقول: لا، ما هو اصل ده طبعي، الطبع ما بيتغيرش. مين قال لك كده إن شاء الله؟ هو ده اللي الشيخ عاوز يقوله بقى، قال لك: لا، الخلق يتغير.

قال: إن الأخلاق لا يتصور تغييرها، زعم ذلك كما لا يتصور تغيير صورة الظاهر. قال لك: زي ما شكلي كده ما ينفعش أغيره، خلقي ما ينفعش أغيره. الجواب: أنه لو كانت الأخلاق لا تقبل التغيير لم يكن للمواعظ والوصايا معنى. يعني لو هي الأخلاق لن تتغير والطباع لن تتغير، احنا قاعدين هنا بنعمل إيه؟ يعني لو كنا مثلا النهارده بنتكلم عن السخاء والكرم، بس البخيل هيفضل بخيل. وبكرة هنتكلم عن مثلا إيه الإيثار، بس الأناني هيفضل أناني. وبعده هنتكلم عن إيه الشغلانة دي؟ يبقى إيه فايدة المواعظ وايه فايدة الوصايا؟ بل ما فايدة الدين؟ ما هو خلاص، يبقى معظم الدين بقى هنشطب عليه، مش في المنهج، ليه؟ ما انت هتقراه مالوش مالوش لازمة، اقرا زي ما تقرا في الآخر أنت، هو أنت مين قال كده يا جماعة؟

شوف هنا يا جماعة يعني هذه الشبهة قال الشيخ من يقولها؟ رجل بطال أو امرأة، يعني رجل بطال هو مستثقل أنه يجاهد نفسه، فبيريح ضميره، ما هو في ناس كده، يعني هيتعب نفسه، هيتعب ضميره، هينام ضميره بقى منبه لا، يقول لك إيه: هو أنا خلاص بقى، ده طبعي بقى، فيدخل نام مستريح أن خلاص طبعي ما يتغيرش. قال: وكيف ينكر تغيير الأخلاق ونحن نرى الصيد الوحشي يستانس؟ ده احنا بنجيب الأسد في السرك، الأسد اهو ونشقلبه وننططه ونعمله ونعديه من الطوق، يعني وطبعه التوحش، الأسد طبعه التوحش، فيروض ويستانس. والكلب يعلم ترك أكل الصيد، يروح يجيب لك الفريسة أو البتاع اللي أنت صدتها زي ما هي، ويبقى جعان ما ياكلش منها حاجة. والفرس تعلم حسن المشي وجودة الانقياد، إلا أن بعض الطباع سريعة القبول للصلاح، وبعضها مستصعبة.

يعني ممكن بعض الطباع تبقى سهلة، سهلة التغيير، وفي بعض الطباع صعبة التغيير، ممكن نفس الشخص يبقى في طبع سهل يغيره وطبع صعب يغيره، لكن في الآخر كله يتغير بإذن الله عز وجل، وبتوفيقه ومدده سبحانه وتعالى، فالباقي أن نشتغل على أنفسنا. قال: وأما خيال من اعتقد أن ما في الجِبِلَّة لا يتغير، فاعلم أنه ليس المقصود قمع هذه الصفات بالكلية، وإنما المطلوب من الرياضة رد الشهوة إلى الاعتدال.

ودي نقطة مهمة جدا يا شباب برضه، خطيرة، وهي: لما بنيجي نقعد نذم الشهوة، أي شهوة بقى، هل معنى كده أن المقصود يبقى أنت صفر شهوة؟ ده مش مقصود، وإلا لمها الله عز وجل. الشهوة خلقت فينا لفائدة، أي شهوة مش شرط شهوة النساء، أي شهوة خلقت فيك خلقت لفائدة. فمثلا شهوة الطعام والشراب تخيل واحد كده لا يشتهي الأكل والشرب، يعني ما بيجوعش وما بيعطشش، شوية وهيحصل له إيه؟ هيموت. يبقى ربنا سبحانه وتعالى يخلق فينا الجوع والعطش علشان تفضل عايش، ولو ما كانش كده هتموت.

طيب شهوة الجماع علشان النسل يستمر وإلا لن يستمر النسل، وهكذا. احنا المطلوب إيه؟ الاعتدال، اعتدال الشهوة. حتى الغضب، يعني الغضب في فايدة ولا ما فيهوش؟ لو ما فيش غضب هتلاقي الحرمات تنتهك وأنت عادي، وهتلاقي الكفار يعملوا اللي يعملوه وأنت تقول لا نجاهد ليه وما عندكش حمية على الدين، ما فيش غضب، مش كده؟ سيدنا النبي عليه الصلاة والسلام كان بيغضب ولا ما كانش بيغضب؟ كان يغضب، لكنه لم يغضب لنفسه قط صلى الله عليه وسلم، يبقى كان بيغضب. يبقى حتى الغضب أي شيء هتلاقيه لا هو ليه مكان لو وظف فيه كان حسنا.

قال: وإنما المطلوب من الرياضة رد الشهوة إلى الاعتدال الذي هو وسط بين الإفراط والتفريط، وأما قمعها بالكلية فلا. كيف والشهوة إنما خلقت لفائدة ضرورية في الجِبِلَّة؟ ولو انقطعت شهوة الطعام لهلك الإنسان، أو شهوة الوقاع لانقطع النسل، ولو انعدم الغضب بالكلية لم يدفع الإنسان عن نفسه ما يهلكه. وقد قال الله تعالى: ﴿أَشِدَّاءُ عَلَى الْكُفَّارِ﴾ [الفتح: 29]، قال: ولا تصدر الشدة إلا عن الغضب، ولو بطل الغضب لامتنع جهاد الكفار. وقال تعالى: ﴿وَالْكَاظِمِينَ الْغَيْظَ﴾ [آل عمران: 134] ولم يقل الفاقدين الغيظ، كاظمين إيه؟ بيتغاظوا ولا لا؟ بيتغاظوا، لكن بيمنعوا الغيظ.

قال: وكذلك المطلوب في شهوات الطعام الاعتدال دون الشره والتقلل. الاعتدال اللي هو إيه في الطعام؟ ها، ثلث، الثلث ده آخره، حد الاعتدال. إنما الحد الذي وصى به النبي صلى الله عليه وسلم مش الثلث، قلناه لكم قبل كده صح؟ قلنا لكم كده الدرس اللي فات، بين قلنا لكم الذي وصى به النبي صلى الله عليه وسلم في الطعام: لقيمات يقيمن صلبك. يعني إيه؟ قلنا لكم يعني بعد ما تخلص الوظائف اللي عليك، وظائف الدين والدنيا، ما تلاقيش كالوري زيادة تعمل بيه حاجة، ده معنى لقيمات يقمن صلبك. فإن كان لا محالة ما فيش فايدة فيك بقى وهتاكل، نقول لك: لا، ثلث، ده معنى كلام النبي عليه الصلاة والسلام.

يبقى عندنا حد الاعتدال له إيه؟ يعني له أول وآخر، له أول وآخر. قال الله تعالى: ﴿وَكُلُوا وَاشْرَبُوا وَلَا تُسْرِفُوا﴾ [الأعراف: 31]. إلا أن الشيخ المرشد، إلا أن شيخ المرشد للمريد إذا رأى له ميلا إلى الغضب أو الشهوة، حسن أن يبالغ في ذمها على الإطلاق ليرده إلى التوسط. وده درس للشباب اللي شغالة في الدعوة، أنه احنا ممكن نبالغ في ذم شيء واحنا ما نقصدش أن الناس تتركه بالكلية، لكن واحنا بندي الدرس أو الكلمه نعمل ده، يعني نتكلم أو نخاطب الناس خطابا يدعوهم إلى الترك بالكلية، ليه؟ لأن ما فيش حد هيترك بالكلية، لكن لو قلت له خليك في النص هو مش هيجي في النص، لكن لما تقول له: لا لا، ده أنت بتعمل إيه؟ أنت رايح في داهية كده، أنت ما تاكلش خالص.

فيقوم يحس أنه فعلا في مصيبة، فيقوم يبتدي يقلل من أكله، لو وصل للثلث يبقى خير. فده زي إيه؟ يعني زي تكنيك ممكن يستخدم في الدعوة.

هنا بيقول إيه؟ نعيد تاني الجملة دي لأنها جملة مهمة؛ قال: إلا أن الشيخ المرشد للمريد -المريد يعني من آتاه يريد، هو طبعا المريد عند الصوفية برضه له معنى آخر، لكن عندهم مريد ومراد، لكن احنا هنا نقصد طالب العلم، نقصد اللي جاي عشان يزكي نفسه- إذا رأى له ميلا إلى الغضب أو الشهوة، حسن أن يبالغ في ذمهما على الإطلاق؛ ما لسه قايلين الشهوة ليها إيه فايدة؟ ليرده إلى التوسط. ومما يدل على أن المراد من الرياضة الاعتدال، أن السخاء خلق مطلوب شرعا، وهو وسط بين طرفي التقتير والتبذير، وقد أثنى الله عليه بقوله: ﴿وَالَّذِينَ إِذَا أَنفَقُوا لَمْ يُسْرِفُوا وَلَمْ يَقْتُرُوا وَكَانَ بَيْنَ ذَلِكَ قَوَامًا﴾ [الفرقان: 67].

قال: فصل في السبب الذي به ينال حسن الخلق على الجملة. طبعا احنا ده كله يا جماعة مقدمة عشان ندخل بقى على آفات القلوب، بس لازم نقدم تلك المقدمات، يعني لازم تبقى عارف أن في أصل عندنا أن الطباع تتغير ماشي، ده أصل عندنا. فلو ما عرفتوش ممكن تبقى، لأنك جواك معنى أن الطبع ما بيتغيرش، ما تروحش تجاهد نفسك، تقول: ما أنا هفضل كده، أو مثلا حاولت شوية ولقيت ما تغيرش، فتقول: خلاص، يبقى الطبع ده مش هيتغير. نقول لك: لا، ما هو في طبع ممكن يستصعب عليك شوية.

قد عرفت أن حسن الخلق يرجع إلى اعتدال قوة العقل، واعتدال قوة الغضب والشهوة. واعلم أن هذا الاعتدال تارة يحصل بكمال الفطرة منحة من الخالق، يعني قال له ملك متربي، قال: ده من عند ربي. مش كده المثل يقول كده؟ طب ده له شاهد في السنة ولا مالوش؟ وفد عبد القيس عارفين الحديث؟ جاء الوفد إلى النبي عليه الصلاة والسلام، ما كانوش لسه شافوا النبي خالص عليه الصلاة والسلام. طبعا كل الوفد جايين يشوفوا النبي عليه الصلاة والسلام، راحوا نازلين من على النوق وايه؟ جريوا لسيدنا النبي عليه الصلاة والسلام عشان يعني تتكحل أعينهم بلقياه صلى الله عليه وسلم، إلا واحد!

نزل جاب كل النوق بتاعة القوم وربطها ما هتجري، وبعدين نزل الرحل وراح اغتسل ولبس ثياب نظيفة، وجا لسيدنا النبي عليه الصلاة والسلام. فقال: من هذا؟ فقالوا: هذا سيدنا. يعني ده الأمير بتاعهم اللي قاعد يربط النوق ما عنفهمش مثلا: تعالى، أنتوا أنتوا رايحين فين؟ طب ولما تجري النوق؟ ما عملش كده، وبعدين عشان يقعد بين إيدين النبي، كأنك تلمح معنى أنه: أنا رايح أقابل النبي عليه الصلاة والسلام، فأروح له معفر وأروح له مطرب وجاي من سفر؟ لا، أغتسل وألبس أحسن الثياب، وعشان أدخل عليه دخولا يليق به صلى الله عليه وسلم.

الشيخ أسامة عبد العظيم رحمه الله لما كان يروح المدينة، كان لا يبدأ بالزيارة، ما يروحش يزور على طول، وإنما يقدم بين يدي ذلك ختمات، يقعد في المسجد النبوي يجيب له كم ختمة! دي حاجة. تاني حاجة؛ يستحضروا، ده كله قبل ما يخش يزور، أما كان منه من تفريط في السنة، يعني يقعد يستحضر: أنا مثلا اليوم الفلاني مثلا يعني فتني الخشوع في ركعتين السنة، بتوع سيدنا الشيخ أسامة هيفوتوا السنة رحمه الله. فالمهم يستحضر ذلك ما فاته من سنة، سنن، ثم يعني يخاطب نفسه أنه: طيب، هتعمل إيه دلوقتي في اللي فاتك ده؟ ما أنت دلوقتي داخل للنبي عليه الصلاة والسلام. طب فتستحضر معنى أنك إيه؟ أنه غضبان عليك أنك مفوت سنته، يعني واحد مأصر في سنته صلى الله عليه وسلم، هيرروح بقى يقف بين يديه وهو غضبان عليه!

طب هعمل إيه في اللي فات؟ ما خلاص اللي فات مات بقى، فيرى أنه ما فيش حاجة في إيديه في اللي فات إلا أنه إيه؟ يعاهد ربه أنه يستقيم في اللي جاي، ويررى أن ده يعني أقل العذر الذي يدخل به على النبي صلى الله عليه وسلم. فده كله من الإيه؟ من الأناة. وبعدين ما يدخلش يزور في أي ثياب، يعني عشان يدخل يزور، يدخل في ثياب تليق بجنابه صلى الله عليه وسلم، يتعمم، ما يروحش حتى بالطاقية العادية دي، يلبس عمامة، يعني كان ليه أحوال كده. وما كانش يعني من تعظيمه للنبي عليه الصلاة والسلام ما كانش حتى يسند ظهره في المسجد النبوي، يعني شوف يقعد جلسة كده فيها تذلل وفيها أدب.

المهم جاء هذا السيد، ففعل ذلك من وفد عبد القيس. ولما جه قعد عند النبي بقى عليه الصلاة والسلام، قال: «إن فيك خصلتين يحبهما الله ورسوله: الحلم والأناة». في خصلتين ربنا يحبهم، فسأله: هل جبلني الله عليهما؟ قال: «أجل». قال: الحمد لله الذي جبلني على ما يحب. يبقى ممكن الواحد يولد بهذه الصفة.

هنا عندنا خطابين بقى؛ أول خطاب للرجل نفسه: لما تكبر وتلاقي فيك الصفة دي، فاحمد الله عز وجل أن جبلك على ما يحب سبحانه وتعالى، واشكر تلك النعمة، وشكرها أن تستعمل تلك الصفة أو ذلك الطبع فيما يحبه الله عز وجل. وفي خطاب تاني للأولياء؛ خطاباني: ما تضيعوا ولادكم، يعني انتبه لابنائك! فوالله الولد ده مثلا عنده حافظة قوية، ليه؟ أصل هو بيسمع الكلام يحفظه من أول مرة مثلا، فتقوم رامي ابنك ومدي له تليفون في إيديه، الواد يدخل على اليوتيوب ولا على التيك توك، ولا يقعد يسمع في أغاني ومهرجانات ومش عارف، وأسباب اللعيبة اللي عايشة واللي ماتت، وأسباب النوادي اللي كانوا فيها واللي اتنقلوا منها، ضيعت الأمانة! ضيعت الأمانة!

طب لقيت ابنك في قوة حافظة؟ احفظه كتاب ربنا ودوس عليه في الحته دي. طب لقيت في لا الحفظ قليل، لكن عنده قوة فهم؟ علمه الشرع، علمه أحكام الشريعة، علمه الفقه. لقيت في طبع الكرم والجود؟ نميه فيه، يجي الواد من المدرسة: الأم: ساندويتشك فين؟ أصحابي واديتها. أنت هتفضل عبيط كده؟ ما تديش حد سندويتشاتك أنت وأخوك عشان أنت اللي تاكلها. أنت بتربي بهيمة؟ إيه اللي عشان أنت اللي تاكلها؟ يعني الواد جاي بيقول لك بذلت للأصحاب ولاصحابي، بدل ما تقولي له: جدع، شاطر، وتنمي فيه بقى المعنى ده شرعا أنك تثاب عليه، ما أنت مش جايبه واحد تقلفيه، ما هو راجع اهو، ما ماتش يعني عادي، راجع على رجله عايش ما ماتش، بل ممكن تنمي فيه الخلق ده: طب أنا بعد كده هأزود لك عشان توزع على الناس، ويبقى برضه معاك حاجة ليك تاكلها مثلا، أو تكافئك.

المهم يقوم الولد يطلع، شوف احنا يا جماعة احنا بنضيع عيالنا والله، بنضيع عيالنا، يعني الولد ممكن يبقى فيه بذره خير اهي نموتها؟ احنا هنسيبك كده؟

قال: وتاره -يبقى أول حاجه ممكن بالفطرة منحة من الله عز وجل- وتاره يحصل بالاكتساب. طيب واحد لم يجبل على تلك الصفة أو على هذا الطبع، خلاص يعني يروح في داهية؟ قلنا بقى الطباع تتغير، بس محتاجة شوية مجاهدة، وهي حمل النفس على الأعمال الجالبة للخلق المطلوب، فمن أراد تحصيل خلق الجود، فليتكلف فعل الجود من البذل، مش عارف ليه أنا فاكر أن هي فعل الجواد، عندكم إيه في النسخ؟ الجواد صح، ماشي. فليتكلف فعل، أصل النسخة دي فعل الجود بس أنا فاكر أنها الجواد، يعني فعل الجواد من البذل.

يعني دلوقتي واحد بقى لا هو عنده حرص، بخيل، هتسيب نفسك كده؟ ما ينفعش تسيب نفسك كده. قال صلى الله عليه وسلم: «وهل داء أدوى من البخل؟» أسوأ شيء في الدنيا أنك تبقى بخيل، أسوأ شيء، والجود يغطي على كل عيب، والبخل يغطي على كل خلق حسن، فده شيء سيء جدا البخل يا جماعة، وسيدنا النبي عليه الصلاة والسلام كان أجود الناس. والبخل معناه أنك حريص على الدنيا، وده معناه أن الدنيا ذات قدر عندك، والله بقى لحيتك واصلة لغاية سرتك، نقابك مش باين منه عينك، أنت بتاع دنيا! حرصك وبخلك ده، أنت بتاع دنيا! والا لو ما كانش ذات قدر عندك، كنت هتبذل.

النبي عليه الصلاة والسلام يأتيه أموال قد كده، يوزع يمين وشمال ويبيت طاويا، يعني إيه طاوي؟ ما عندوش أكل، يوزع الفلوس دي كلها وفي الآخر يروح ينام ما عندوش تمراية في بيته. خلوا بالكم يا جماعة، ما عندوش أكل دي أصل احنا برضه المفهوم ده لازم يتصلح عندنا ها، أصل أنت لما أقول لك إيه: أنت عندك أكل؟ والله ما عنديش أكل في البيت. ما عندكش أكل ده اللي هو فتحت الثلاجة هتلاقي جبنة مش عارف بيضاء وجبنة رومي؟ لا، هو ما عندوش أكل، يعني ما عندوش أكل، لأن هو لو عنده تمرتين ثلاثة، هو ده عنده أكل، أكل ده اللي هو إيه؟ اللي هو غداء، ما هي دي حالته صلى الله عليه وسلم! كان يمر هلاله ولم يوقد في في بيوت النبي عليه الصلاة والسلام نار. طب كنتوا بتاكلوا إيه؟ قالت: الأسودان، التمر والماء.

طب تمر وماء ده يعني يملى بطنه يعني من التمر؟ لا، ما كانش يملى بطنه، احنا قلنا لكم واحنا بنشرح في الصالحين قلنا وهو بيجهز الجيش وطالع، يقوم يديهم الإيه؟ الأكل بقى بتاعهم بتاع الجيش، التعيين، الجيش مسافر في حرب، يقوم يطلع نصيب كل واحد من الجنود إيه؟ تمراية في اليوم! تمراية في اليوم! ده التعيين بتاع الجيش اللي طالع يحارب، لدرجة أنهم كانوا يعملوا إيه؟ التمرة تخلص، كانو يقعدوا يمصوا في التمرة عشان ما تخلصش.

وساعتها إحنا إيه؟ ثورنا العقول بسؤال قلنا: نتخيل كده يا جماعة جيش جيش المسلمين طالع يحارب ويطلع نصيب كل واحد من الجنود تمراية في اليوم، هل تتصوروا أن بيوت المدينة يعني كل واحد مدكن أكل زيادة وسايبين الجيش يطلع وهو جعان؟ ولا كان المعنى هنا أن هو ده اللي عندنا؟ هو ده اللي موجود؟ يا جماعة حياتهم كانت غيرنا خالص خالص خالص. وتقول عائشة: إن أول بدعة أحدثت في هذا الدين بدعة الشبع! اللي هو الحاجة اللي احنا عادي بنعملها دي، اللي هو عادي أنا كل يوم بشبع، دي بدعة! ما كانوش يعرفوها أصلا، الصحابة ما كانوا يعرفوا الشبع ده، ما كانوا يعرفوه.

يعني إيه ما كانوا يعرفوه؟ يعني فين وفين كده أما نسمع أنه إيه: «والذي بعثك بالحق، لا أجد له مسلكا». عشان كلنا بقى إيه؟ حفيظة أول ما يتكلم يقول لك يا: لا أجد له مسلكا، اهو كلنا حافظين، مش كده؟ مين اللي قال ده؟ أبو هريرة قالها مره كده، شرب لبن وقال، ما حالته أصلا إيه بقى أبو هريرة؟ جعان، جوع كده كان يسرع إلى جوار المنبر، يظن به الجنون، يغمى عليه، قال: وما بي إلا الجوع. يا جماعة، أنا مش هقول لكم حد عمره وصل للدرجة دي أنه يغمى عليه من الجوع، حد عمره شاف ده حصل في حد؟ يعني احنا بنحكي عن حتت كده لا حصلت لنا ولا يمكن شفناها أصلا أن واحد يغمى عليه من الجوع! ده أبو هريرة اللي مرة في حياته قال له إيه: لا أجد له مسلكا، بصينا له بقى في المره اللي لا أجد له مسلكا فيها دي، ما كانتش حالتهم!

بل حالته المشرفة صلى الله عليه وسلم أنه ما ملأ بطنه من رديء الدقل، ما، حتى رديء التمر ولا رديء ولا ولا حتى رديء القمح أو الشعير. القمح ده كان بالنسبة لهم يعني ده حلم، الأصل كان عندهم الشعير، وبعدين المدينة ما كانش فيها مناخل، ما كانوا يعرفوا المنخل ده، ما كانوا يعرفوه، يعني ما فيش ولا بيت في المدينة فيه المنخل ده، فكانوا يعملوا إيه؟ يطيروا كده البتاع في الجو، فاللي يطير يطير من الفضل، أنتوا عارفين القشر بيبقى أخف أخف من، فيقوموا مطيرينه كده في الجو، اللي يطير يطير واللي يقع يقع، ويعجنوا بيه بالزلط بقى اللي فيه بالبتاع بتاع اللي فيه، يتعجن كده وخلاص وياكلوا، ما كانوا يعرفوا المنخل في المدينة.

فدي كانت، ده بقى اللي احنا بس اللايف ستايل بتاعهم، يعني عشان يجي يقول لك: كانوا مليونيرات، وستة من العشر المبشرين كانوا مش عارف إيه، فبنقول: فرق كبير بين أنك معاك فلوس، وأنك نمط حياتك عامل ازاي، فرق كبير! مش كل ما يبقى معانا فلوس نتوسع في الدنيا، ده ما كانش، أنا مش جاي أقول إيه؟ مش جاي أقول أن ده حرام، ﴿قُلْ مَنْ حَرَّمَ زِينَةَ اللَّهِ﴾ [الأعراف: 32]، إنما تضييع للأوقات والأعمار واهدار للطاقات بلا شك، فاللي حريص على آخرته، بتلاقيه بيضن بموارده أنه ينفقها في مثل هذا، يضن.

فعادي جدا تلاقي منهم أبو بكر، سيدنا أبو بكر ده كان واحد من المليونيرات ولا ما بيقولوش كده؟ بيقولوا كده، واحد ماشي. سيدنا أبو بكر يقعد قدام النبي عليه الصلاة والسلام بالجلابية بتاعتها مقطعة، مش لاقي حاجة يلمها بيها، يقوم جاب إيه؟ حته خشبة كده يدخلها عشان إيه يلم الجلابية. اهو دي اللايف ستايل بتاعة أبو بكر.

وفي في قصة أبو ذر الغفاري، اظن لما جه للنبي بقى يسلم صلى الله على النبي محمد، وبعدين جاي بقى من سفر، فأبو بكر قال له: طب أنا اللي هضيفه بقى ده ضيف رسول رسول الله، وأنا اللي هضيفه، فاقفوا قدام الحته دي شوية ها؟ واحد كده جه لسيدنا النبي عليه الصلاة والسلام وبعدين.

جيت أنت قلت له: إيه ده بقا واجبه عندي! هتروح تعمل معاه إيه؟ أحسن حاجة تعرف تعملها، مش كده؟ خده أُداله إيه؟ زبيب. خده دخل بيته أُداله شوية زبيب. ده أفضل شيء ممكن أبو بكر عمله.

بل الأعجب من ده؛ عارفين قصة خروج الثلاثة العظماء بقا؟ سيدنا النبي عليه الصلاة والسلام خارج من بيته جعان، مافيش حاجة في بيته ياكلها، يقوم يلاقي مين معدي؟ سيدنا أبو بكر. مالك؟ جعان. المليونير أهو.

أصل احنا بنمسك، أنتم عارفين الهواء دخل في الخطاب الشرعي؛ احنا عاوزين دلوقتي نكيف كل شيء شرعاً، فعاوزين الدرس في التجمع، أهي في حتة أهي، ممكن إيه ستة من العشرة مليونيرات كانوا عايشين إزاي المليونيرات دول؟ أنا لا أنكر أن هم كانوا معاهم المال، لكن وظفوا المال إزاي؟ المال ده مورد، هتوظفه إزاي بقا؟ دي قصة تانية خالص. مين أشر واحد في الموضوع الغنى ده؟ عثمان. يوظف المال إزاي؟ كلنا عارفين بقا القصة؛ وأنه جهز الجيش، وأنه اشترى البئر. مين تاني؟ عبد الرحمن بن عوف. يوظف المال إزاي؟ قلنا لكم قبل كده -مش عارف بقا قلنا ولا ما قلناش- عبد الرحمن بن عوف كان يا جماعة عجيب، عجيب والله! كان بيعمل حاجة لا تتصور، يعني عبد الرحمن بن عوف كانت تيجي القافلة جاية من بره، ما وصلت المدينة لسه، يتصدق بها وبالإبل. الإبل دي اللي هي دلوقتي زي اللواري، اللوري اللي شايل البضاعة، يعني الإبل دي مش مش من البضاعة، دي مش تجارته، دي أصل من الأصول، يعني عارف زي اللوري بتاعك، واحد مثلا تجارته ألعاب الأطفال فجاية في لواري، اللوري ده بالنسبة له ده أصل من أصول الشركة.

س سيدنا عبد الرحمن بن عوف كانت قبل ما القافلة تدخل يتصدق بها كلها، وبالإبل اللي عليها، اللي عليها البضاعة! عجيب! وبعدين عنده أزمة هو؟ السيدة عائشة تقول له: آخر واحد من العشرة هيدخل الجنة أنت! يزعل بقا، وممش اخر واحد في المسلمين، أخذه في عشرة، ما هو من العشرة. طب ليه يعني؟ قالت له: ما أنت غني، هتقعد بقا تتحاسب على.. فشوفوا بقا الرد، قال: وما أصنع يا أمه؟ طب أنا أعمل إيه إذا كنت أنفق مالي كله أول النهار، فيأبى الله إلا أن يرده علي أضعافاً مضاعفة قبل أن أنام! أنا أعمل إيه طيب؟ أنا يعني.. سيدنا عبد الرحمن النبي دعاله. فده نمط حياة بتاع المليونيرات.

وأنا قلت لكم برضه قبل كده: روحوا ادخلوا على اليوتيوب أو على الجوجل، يعني ابحثوا عن الماكيت بتاع المدينة، وشوفوا بيوت الناس دي؛ يعني بيت أبو بكر كان شكله إيه؟ روحوا اتفرجوا! بيت عثمان الوحيد اللي تحس إنه إيه، يعني أو في حتة زياده، يعني ممكن.. فاحنا محتاجين نوظف مواردنا في الآخرة، وناخذ من الدنيا بقدر ما يعيننا على الآخرة. طب أي توسع بعد كده حرام؟ ما بقولش حرام، ما بقولش حرام، لكن موارد بتنفقها في حتة لا هتعود عليك بنفع، وممكن تعطلك كمان عن خير كنت هتحصله!

ودائماً بضرب المثال اللي يوضح ده، اللي هو إيه؟ أديتك مليون جنيه، وقلت لك خد المليون جنيه دي اعمل بيها اللي أنت عاوزه، رحت رايح شارب المليون جنيه بلالين! جيت أقول لك: يا ابني، المليون جنيه شريت بيه إيه؟ تقول لي: هو حرام أشتري بلالين؟ يا عم، مش حرام تشتري بلالين، بس أنت ضيعت المليون جنيه، وضيعت نفسك! هتقعد تنفخ في البلالين؟ يعني هات بومبة حتى، يعني بلالين كمان! فانت ضيعت مواردك.

ماشي، فما يجيش واحد يقول إيه: هو حرام؟ السؤال غريب صح؟ يعني بالله عليكم يا جماعة لو شفتوا البني آدم ده اللي هو جاب مليون جنيه بلالين وجيت تكلمه يقول لك: يعني هو حرام؟ هتحس إنه يعني سفيه، هترد عليه تقول له إيه؟ أهو احنا كده بالنسبة للسلف؛ السلف لو بعث واحد من هو يا جماعة، تخيلوا اللي أنا بتكلم عنهم دول دي حياتهم، بعث فينا دلوقتي، ومعلش بقا استحملوني، بعث فينا يعني إيه؟ يعني في أفقر بيت من بيوت الناس اللي قاعدة، مش أغنى واحد، أفخر واحد، هيدخلوا بيته هيتعجبوا! أنتم إيه ده؟ أنا ما بتكلمش على الأغنى، بتكلم على الأفقر.

طيب، يعني حرام؟ لا، ما قلناش بقى حرام، بس أدينا شفنا أهو ماشي، ولذلك سبحان الله يعني هي لأن همنا مش واحد، يعني بعد ما هقول الكلام ده هنخرج برضه لامجد برضه لسه عنده حته حب الدنيا، فممكن يتوسع وممكن.. فالله عز وجل من رحمته بنا ورافته بنا ما حرمش علينا ده، ما حرمش علينا ده، لكن واحد تاني أنصحه، فقال لها: خلاص أنا هي الآخرة همي، والدنيا هاخد منها بقدر ما يبلغني الآخرة، وما زاد لله.

ما نجيش بقى يوم القيامة أمجد بيعافر وبيزق إنه يبقى عاوز يبقى زي فلان؛ ليه تبقى زي فلان ليه؟ أنت في الوقت اللي توسعت فيه في دنياك، هو جاله نفس الرزق وأثر به الآخرة، فليه تبقى زيه في الحتة دي؟ يعني ممكن إيه واحد يسبق في حتة تانية ممكن، بس إنما في الآخر الاثنين عند ربنا سبحانه وتعالى مرضيين ولا لا؟ آه، والاثنين ممكن يدخلوا الجنة؟ آه، بس واحد يخش في درجة، واحد في درجة أعلى، ده من رحمة ربنا أن الجنة مش درجة واحدة، ممكن تبقى درجة واحدة ولازم كلنا نبقى زهاد، وكلنا نبقى ما فيش فضول دنيا، وكل.. ربنا ما عملش كده، وهذا من رحمة الله بعباده سبحانه وتعالى.

لكن مش هنفضل الخطاب اللي دايما يجي على أسماعنا هو الخطاب اللي إيه في الحتة دي شوية فيه.. في إيه؟ مش عارف، مش عاوز أقول ألفاظ الناس أصل تروح مقطعة، يبقى الدرس ساعة ونص يروح جايين مقطعين ومنزلين إيه: الشيخ بيخبط في الشيخ، مش.. فليتعلم الواحد بقا.

طيب، قال: وتاره يحصل بالاكتساب، وهي حمل النفس على الأعمال الجالبة للخلق المطلوب، فمن اراد تحصيل خلق الجود فليتكلف فعل الجواد من البذل، هتبقى صعب عليك، هتبقى صعب عليك، تعالي على نفسك بقا، لأن البخيل ده إنه يطلع يعني القرش بالضلين، فتعال على نفسك شوية، ابتدي بحاجة بسيطة، وبعدين كتر، وبعدين كتر، ولغاية ما تلتقي وخاطب نفسك بقا بالخطاب اللي أنا قلته من شوية: أنت إيه يا ابني؟ أنت حريص على الدنيا كده ليه يا ابني؟ أنت ما الدنيا دي إيه ولا تساوي حاجة، وبعدين ما أنت.. أنت مكلبش فيها في الآخر أنت اللي هتسيبها، يعني لو هي ما سابتكش أنت عمال حريص عليها عشان هي ما تسيبكش؟ أنت اللي هتسيبها، ما هو قالوا: مال الكنز للنزهي، يعني إيه؟ تقعد تكنس وفي الآخر تموت، يجي ابنك يفرتك كل اللي أنت بنيته في السنين ده في سنتين تلاتة، يخلص الفلوس كلها، واتبعت المال على مين؟ عليك أنت، تروح بقا أنت تتحاسب على المال، وهو يستمتع بالمال.

قال: ليصير ذلك طبعاً له، وكذلك من اراد التواضع تكلف أفعال المتواضعين، واحد حس كبر عنده حته إيجو كده عالية شوية، يتكلف أفعال المتواضعين. وكذلك جميع الأخلاق المحمودة، فإن للعادة أثراً في ذلك، يعني كل ما تكرر تلتقي الأثر إن شاء الله، كما أن من أراد أن يكون كاتباً تعاطى فعل الكتابة، ولا بنتولد بنعرف نكتب؟ لا أبدا، يجيبوا لنا الحرف منقط ونمشي عليه، وبعدين طب اكتب الحرف لوحدك، طب وبعدين بين السطرين، وبعدين نشيل سطور خالص، لغاية ما تلتقي خطك بقا كويس، فقل مثل ذلك في الطباعة، أو فقيهاً تعاطى فعل الفقهاء من التكرار حتى ينعطف على قلبه صفة الفقه، إلا أنه لا ينبغي أن يطلب تأثير ذلك في يومين أو ثلاثة! آه، مشكلة تانية خطيرة وهي العجلة، واحنا أصلًا قلنا إن ده من أبواب الشيطان، اللي هو: طب أنا فيها الطباع الوحشة، طب تعال يا ابني ويلا نغير الطباع الوحشة سوا، وهنقعد في الكلام ده إن شاء الله بالتفصيل، فنقول لك: اعمل واحد اتنين تلاتة، يومين تلاتة شهر اتنين سبته!

طب سبت الكلمة اللي مسكوه فيها في داهية مش هنقولها بقا المرة دي، سبت مين اللي خسران؟ أنت! يعني يا جماعة دلوقتي رحت لربنا سبحانه وتعالى عمال تحاول وما فيش فايدة، ما فيش بديل، يعني هو إيه البديل؟ أنك تديه ظهرك وتمشي؟ امشي! أنت الخسران، يعني يعني: ﴿وَإِن تَتَوَلَّوْا يَسْتَبْدِلْ﴾ [محمد: 38]. امشي! طب الناس كلنا امشي! مش هقول الكلمة، امشي!

فانت قول لنفسك كده، فما فيش بديل غير أنك تفضل بتحاول، طيب عمال أحاول وما فيش فايدة تاتيك منيتك وأنت على ذلك معذرة إلى الله عز وجل. معذرة إلى الله، يبقى يا رب أنا عملت اللي أقدر عليه يا رب، فتح بقى ليا، لم يفتح ليا، أنا عملت اللي عليا، معذرة إلى الله عز وجل. إنما مرة الثانية خلاص اتفضل، يبقى لا ينبغي أن يطلب تأثير ذلك في يومين أو ثلاثة، وإنما يؤثر مع الدوام، كما لا يطلب في النمو علو القامة في يومين أو ثلاثة، يعني الطفل صغير واحدة واحدة بيكبر، مش يومين تلاتة بقا ديناصور، ما فيش كده، فقل مثل ذلك في طباعك وأخلاقك.

قال: وللدوام تأثير عظيم عظيم، وكما لا ينبغي أن يستهان بقليل الطاعات فإن دوامها يؤثر كذلك، لا يستهان بقليل الذنوب! يبقى دي من القواعد يا جماعة، لا نستهين لا بقليل الطاعة ولا بقليل الذنب. بقليل الطاعة حديث النبي صلى الله عليه وسلم: «لا تحقرن من المعروف شيئاً». يبقى لا تستهين بقليل الطاعة، لا تحقرن من المعروف شيئاً. أول حاجة بكتب ده بداية إنه أكتب لك حسنة، فبتحتقر للحسنة دي ميزان الله عز وجل يوم القيامة ميزان العدل، يعني إيه ميزان العدل؟ يعني ميزان الذر. قال الله عز وجل في سورة كلنا حافظينها من قصار السور: ﴿فَمَن يَعْمَلْ مِثْقَالَ ذَرَّةٍ خَيْرًا يَرَهُ * وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ [الزلزلة: 7-8]. أتينا بها وكفى بنا حاسبين.

فده معناه إيه؟ معناه أن الميزان أهو، وبعدين كيتت، يعني خلاص تساوت الحسنات، تيجي الحسنة بقا اللي هي الصغيرة خالص دي ترجح الكفة، أو العكس، تيجي السيئة اللي أنت استهنت بيها دي ترجح الكفة! يبقى لا، يبقى من قواعد السير إلى الله دي قاعدة اكتبوها برضه، ضيفوها قاعدة قبل كده، من قواعد السير إلى الله: لا تحقرن من المعروف شيئاً. دي من قواعد السير. يعني إيه دي تخلينا نعمل إيه يا جماعة؟ تخلينا نعرف نستغل مثلا الدقيقتين اللي مستنيين فيهم الأسانسير ينزل، مثلا أول ما تيجي دي في دماغك: لا، سبحان الله، الحمد لله، استغفر الله، اللهم صل على النبي، تلتقي على طول، ليه؟ لا تحقرن من المعروف شيئاً، فتلاقي على طول عاوز تستغل اللحظة، عاوز تستغل الدقيقة، عاوز تستغل على طول، لا تحقرن من المعروف شيئاً.

وكذلك الذنب لا يستهان به، في الحديث بقا بتاع إيه؟ إياكم ومحقرات الذنوب، وضرب لها النبي مثلاً صلى الله عليه وسلم.

وكما أن تعاطي أسباب الفضائل يؤثر في النفس ويغير طبعها، فكذلك مساكنة الكسل أيضاً يصير عاتدة عياذاً بالله، ودي من أعظم المساوئ التي انتشرت فينا الآن؛ مساكنة الكسل. أنا مش عاوز صوت، مساكنة الكسل، يعني تلاقي نفسك قاعد بالساعتين والتلاتة في اللاشيء، نايم على ضهرك وفاتح موبايلك وعمال إيه بتقلب، كسل! وكان صلى الله عليه وسلم يستعيذ من أمور منها إيه؟ إيه الحديث؟ إيه الدعاء؟ من العجز والكسل. العجز والكسل الاثنين يمنعوا العمل، ولذلك قارن بينهما النبي عليه الصلاة والسلام.

فلازم يا جماعة نشوف حل في الكسل بتاعنا ده، لازم. احنا عندنا كسل بدني وكسل حتى ذهني، يعني أنا عارف أن درس زي ده لا يروق للبعض، فكر أن احنا بنقرا شوية في كتاب، ليه؟ هو عاوز الحاجة السهلة اللي هو إيه: قولي الكلمتين يدخلوا في الدماغ. ما تخلي ده نوع من أنواع التحدي في الدرس أنه لا، أنا أركز، أنا أركز، مش لازم كل حاجة تيجي سهلة، لا، أنا أركز في الصعب، إيه المشكلة؟

قال: فكذلك مساكنة الكسل أيضاً يصير عاددة، فيحرم بسببه كل.. فيحرم بسببه كل خير، وقد تكتسب الأخلاق الحسنة بمصاحبة أهل الخير، وده برضه من قواعد السير، احنا قلنا قاعدة النهارده في الأول، أول قاعدة قلناها إيه؟ الطباع تتغير، صح؟ خدوا قاعدة تانية في الطباع: الطباع سراقة! هذه قاعدة من قواعد السير إلى الله؛ الطباع سراقة. يعني إيه طباع سراقة؟ يعني الصاحب ساحب: المرء على دين خليله، فلينظر أحدكم من يخالل. ليه؟ الصاحب ساحب. ولذلك: ﴿وَاصْبِرْ نَفْسكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا﴾ [الكهف: 28].

فشوف الصحبه بتاعتك، ولذلك الإمام الهروي في أول منازل السائرين، اللي منزلة اليقظة، جعل من الأمور المعينة على اليقظة الصحبة الصالحة. الصحبة الصالحة ليه؟ الصحبة الصالحة هتعرفك مقدار المكسب والخسارة في الزمان. يعني إيه يا جماعة؟ احنا ده قلناه في درس اليقظة. يعني إيه؟ يعني دلوقتي النهارده يوم الجمعة خلص وهنروح كلنا ننام، يا ترى أنا كسبت ولا خسرت في اليوم ده؟ هنعرفها إزاي؟ هنعرفها بأمور منها الصحبة الصالحة، يعني لما تكون صحبتك الصالحة تيجي تكلمه فتلاقي تليفونه مقفول، وبعد شوية يفتح تليفونه فيجي لك النوتيفتكيشن فتكلمه.

أنت كنت يقول لك لا أصل دي ساعة الإجابة. أنا كنت في المسجد، فأنا في المسجد ما فيش حاجة تشغلني، ساعة إجابة إيه ده ده أنا ما كنتش في المسجد، ده أنا ما أصلا ما ولا عمري جت في دماغي ساعة الإجابة دي، فبتدي خلي بالك أنت الأول كنت فاكر نفسك كسبان.

المثال اللي ضربناه في درس اليقظة قلنا إيه: أنك لو شغلت معاك المليون جنيه اللي محيرنا دول من أول الدرس ورحت شغلتهم في شغلانة بتجيب لك مئتي ألف جنيه، فأنت طيران من الفرح أن مكسبك عشرون بالمئة، بعد سنة فوجئت أنك كنت ممكن تشغلها في شغلانة ثانية تجيب لك خمسمائة ألف جنيه، ساعتها مش هتفكر أنك كنت بتكسب مئتين، هتفكر أنك كنت إيه؟ بتخسر ثلاثمائة.

فأنت بعد اليوم ما خلص يوم الجمعة ما خلص، فأنت جاي إيه تقول: أنا الحمد لله راضي عن نفسي النهارده، ليه؟ أصل صليت الجمعة، أصل قلت آه قرأت سورة الكهف، وده جميل على فكرة أنا مش بياس الناس، إنما لما تصاحب بقى صحبة صالحة فتلازم يقول لك كده قافل تليفون الجمعة كلها يوم الجمعة كله مثلا، فلا أنت ليه قفلت؟ لا أصل أنا اليوم ده بتاع ربنا سبحانه وتعالى، فأنا أنا مثلا بروح من الفجر قاعد للمغرب ما بطلعش، وده احنا كنا بنعملها يعني كان الشيخ الدبيسي مثلا أنت كنت تروح صلاة الجمعة بتطلع المغرب زمان ما أعرفش بقى يعني زمان ده من عشرين سنة حاجة وعشرين سنة كنا نروح الجمعة نطلع بعد المغرب من المسجد.

فتلاقي إيه ده ده في ناس في حته تانية خالص، فبتدي تفكر فيها كده ده أنا آه شايف نفسي كسبان لا ده أنا طلعت خسران حاجات كنت ممكن أعملها، ناهيك بقى عن وظائف اليوم كمان، يعني أذكار المساء قلتها ولا ما قلتهاش ولو قلتها قلتها إزاي، يعني السنن الرواتب سنة الجمعة البعدية صليتها ولا ما صليتهاش، كثير من الناس حتى المتدينة بيفوتها ولا في دماغه.

فيبقى الصحبه الصالحة مهمة جداً ليه؟ هتعرف منهم حاجات تعملها ما كنتش هتعملها لو ما كنتش معاهم. قال: فان الطبع لص يسرق الخير والشر. قلت: ويؤيد ذلك قوله صلى الله عليه وسلم: «المرء على دين خليله فلينظر أحدكم من يخالل».

كده فات قد ايه ها؟ ساعة وثلث وربع، ماشي نقف هنا عاوزين حد يقول لنا معلش القواعد اللي قلناها النهارده: الطباع تتغير وطباع سراقة، لا تحقرن من المعروف شيئاً، وإياكم ومحقرات الذنوب دي مهمة دي ما أنا نسيت أقول لكم أن بس يعني دي واحدة الثانية دي إياكم ومحقرات الذنوب الناس اللي قايمة دي حافظة القواعد هتعمل بها اعملوا بها.

المهم في حاجة تانية غير دول؟ الطباع سراقة هي دي خلاص، قول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.