دخولتسجيل الدخول

١٤- تابع كتاب آفات اللسان

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. وحده لا شريك له، وأشهد أن محمدًا عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذرياته، وآل بيته، كما صليت على آل إبراهيم إنك حميد مجيد. أما بعد.

كنا بدأنا نتكلم عن الغيبة، وذكرنا أن الغيبة ذكرك أخاك بما يكره في غيبته. ووقفنا عند قوله: وأما كفارة الغيبة فاعلم أن المغتاب قد جنى جنايتين. إحداهما على حق الله تعالى، إذ فعل ما نهاه عنه، فكفارة ذلك التوبة والندم. والجناية الثانية على عرض المخلوق. وقل مثل ذلك في أي معصية اقترفتها في حق إنسان، فإن المعصية التي بينك وبين الله أهون المعاصي من حيثية معينة، وهي أن الله عز وجل يغفرها ولا يبالي.

ركزوا يا شباب، نحن عندنا دلوقتي المعاصي أنواع؛ معصية بينك وبين ربنا سبحانه وتعالى، يعني لا دخل للمخلوق فيها، فدي لها حالتان: إما التوبة منها قبل ما تموت، فربنا سبحانه وتعالى يقبل التوبة. وإما أن ما تتبش وتموت وأنت مرتكب لتلك المعصية غير تائب منها، فحكمك في الآخرة أنك في مشيئة الله، إن شاء أخذك بها وإن شاء عفا عنك. لكن عندنا حديث فيه بشرى، حديث الدواوين الثلاثة، أن هذا الديوان الذي بينك وبين الله عز وجل لا يبالي به. فهل نتجرأ؟ إيه رأيكم؟ طالما ربنا لا يبالي به يبقى نتجرأ على المعاصي التي بيننا وبين ربنا؟ لا، مش كده، مش ده المعنى. المعنى أن أنت برضه تفضل خايف؛ لأن لو أخذك الله عز وجل بها في القيامة لم يكن ظالمًا لك، فأنت هتلعب قمار في حاجة مكسبها الجنة وخسارتها النار. ما هو أنت كده بتلعب قمار، يعني أنا هكسب ولا أخسر؟ حاجة مكسبها الجنة وخسارتها النار.

أما ما بينك وبين العباد، اللي منها الغيبة؛ اغتبت حدًا وذكرته بما يكره في غيبته، وهذا كثير، وقلنا إن الموضوع ده منتشر حتى بين المتدينين للأسف. فعلت ذلك، طيب لو في الدنيا توبت منها، والتوبة هنا مش كفاية، التوبة اللي هي زي التوبة التي بينك وبين ربنا؛ ده فيه شرط زائد هنا هنعرفه كمان شوية، إنما المهم تبت منها التوبة التي تصلح لمثلها، خلاص ربنا يتوب عليك. طيب مت وما تبتش، هنا بقى خطر كبير جدًا؛ لأن هذا الديوان لا يترك الله منه شيئًا. الديوان الذي بينك وبين العباد لا يترك الله عز وجل منه شيئًا. فالحاجة البسيطة اللي إحنا فاكرينها بسيطة دي مصيبة كبيرة جدًا. ليه؟ لأن إحنا هنا دخلنا في حقوق عباد، الأول كان حق ربنا، فربنا يأخذ أو لا يأخذ، يتوب أو لا يتوب، هو حقه سبحانه وتعالى. لما دخل حق عبد من عباده لا، هياخذ حق هذا العبد.

أنا عاوز بس أقول لكم يا جماعة الملف ده شائك قد إيه. طبعًا عندنا أحاديث، لكن قبل ما ندخل في الأحاديث التي بين العباد وبعضها، الملف ده خطورته في الآخرة أن الكائنات التي لا حساب عليها ولا جنة ولا نار لها، يبعثها الله عز وجل ليقتص، يحيلها ترابًا. شايفين خطورة الملف ده عاملة إزاي؟ يعني خروف له قرون نطح خروفًا ثانيًا ظلمه ونطحه، ربنا سبحانه وتعالى يقتص لهذا يوم القيامة، وبعدين الاثنين يبقوا ترابًا في الآخر. دي حيوانات لا هتحاسب ولا ليها جنة ولا ليها نار، فما بالكم بالبشر؟ فاتقوا الله عز وجل فيما يخرج من ألسنتكم، وفيما تكتبون بأيديكم على فيسبوك أو على غيره من المواقع. اتقوا الله عز وجل، الكلمة أنت مؤاخذ بها. ﴿ثَكِلَتْكَ أُمُّكَ يَا مُعَاذُ وَهَلْ يَكُبُّ النَّاسَ فِي النَّارِ عَلَى وُجُوهِهِمْ -أَوْ قَالَ: عَلَى مَنَاخِرِهِمْ- إِلَّا حَصَائِدُ أَلْسِنَتِهِمْ﴾. والقلم أحد اللسانين كما قدمنا وقلنا الكلام ده في دروس قبل كده.

يبقى الملف ده، اللفظ النبوي بقى، الديوان ده ديوان خطير. طيب ده في حق الحيوان البهيم الأعجم، في حق البشر بقى، عارفين الحديث: «أتدرون من المفلس؟» الحديث طبعًا صح، قالوا: المفلس فينا من لا درهم له ولا متاع، أو من لا درهم له ولا دينار. فأخبرهم صلى الله عليه وسلم أن المفلس مش الإنسان الفاسق اللي ما بيطيعش ربنا، قال: لا، ده المفلس ده واحد هيجي يوم القيامة معاه صلاة ومعاه صوم ومعاه صدقات، يعني واحد كان بيفعل الحسنات، لكن يأتي وقد شتم هذا، وأخذ مال هذا، وسفك دم هذا؛ فيأخذ هذا من حسناته، وهذا من حسناته، حتى إذا فنيت حسناته أخذ من سيئاتهم فطرحت عليه، ثم طرح في النار. فالموضوع خطير، والموضوع خطير، ورب كلمة من سخط الله لا يلقي المرء لها بالًا تهوي به في النار سبعين خريفًا، وفي رواية أبعد ما بين المشرق والمغرب.

الأحاديث دي يا جماعة المشكلة أننا ما بنقعدش نتأملها. النبي عليه الصلاة والسلام ما قالش رب ساعة كلام، ولا رب جملة، ولا رب مجلس أُنس، رب كلمة الواحد يتكلمها من سخط الله لا يلقي لها بالًا، يعني بعد ما تكلمها مش في دماغه، مش شغالاه، تهوي به في النار أبعد ما بين المشرق والمغرب. فالحل في إيه؟ لو تفتكروا في أول كتاب آفات اللسان، الحل في إيه؟ تسكت. فاكرين لما قسمنا الكلام أربع أقسام؟ تسكت، يبقى الأصل فيك أنك ساكت، مش الأصل أنك بتتكلم. سيدنا النبي عليه الصلاة والسلام الصحابة قالوا كانوا يعدّون له كلماته في المجلس صلى الله عليه وسلم، وهو المعصوم صلى الله عليه وسلم. فخلي كده الأصل فيك أنك ساكت، سواء لسان أو كيبورد أو قلم، ساكت؛ عشان تبتدي تتكلم يبقى فاهم بتقول إيه، ومآلات الكلام الذي تقوله ده إيه، وإلا المصيبة كبيرة.

خصوصًا، وطبعًا هقول ده قول شديد، لكن قول قال به بعض العلماء، أن التوبة العامة لا تجزئ في قول بعض أهل العلم. يعني إيه؟ يعني إحنا قاعدين دلوقتي، واحد قال: إيه ده؟ طب أنا خلاص نويت أتوب وهتوب دلوقتي يا رب توبة من كل اللي فات، هل التوبة دي تصح ولا لا تصح؟ خلاف بين العلماء، بعض العلماء قالوا تصح التوبة العامة، وبعض العلماء قال لك لا تصح التوبة العامة، لابد أنه يتوب من كل ذنب بخصوصه. دي مصيبة كبيرة؛ ليه؟ لأن لو قلت لك: قل لي كده ذنوبك بتاعة أول أمبارح -مش بتاعة السنة اللي فاتت بقى- هتقول لي: ولا فاكر ذنوب، أنا فاكر عملت إيه أول أمبارح؟ مش فاكر. تخيل على قول بعض أهل العلم أنك لو ما افتكرتش تلك الذنوب وتبت منها ذنبًا ذنبًا، التوبة بتاعتك لا تصح. ونحن لا نقول بهذا القول، لكن بقول لكم تخيلوا أن ده قول موجود، فده فيما نستقبله من أمرنا نحذر. طب في اللي فات مش هنيئس الناس بقى، نقول لهم خلاص توبوا التوبة العامة وربك غفور رحيم، لكن في اللي جاي احذر بقى. احذر، يعني إيه؟ أول حاجة تحترس من الذنوب، ثانيًا مجرد ما تقع في ذنب تب فورًا لأنك بعد ساعتين هتنساه، ﴿أَحْصَاهُ اللَّهُ وَنَسُوهُ﴾.

طبعًا أقول بعد ساعتين لأن أنا ملوث بطول الأمل، ما هو المفروض لو أنا واحد عنده قصر أمل في الدنيا ما يقولش الكلمة دي، لكن كلنا طبعًا ملوثون بهذا الداء. إحنا من قال إننا هنعيش ساعتين؟ ولا واحد من السلف بيقولوا له: ادخل صلِّ بينا -كانوا يفرون من الإمامة- فقال لهم: لو صليت بكم المرة دي مش هصلي بكم ثاني -يعني بيشترط عليهم-. فراح قال له: أو تحدث نفسك أنك تصلي غيرها؟ أعوذ بالله من طول الأمل، هو بيقول لي: أنا لو صليت بكم مثلًا المغرب مش هصلي بكم العشاء، خلي بالك، قال له: أنت بتحدث نفسك هتصلي العشاء! أعوذ بالله من طول الأمل، فلو قصر أملنا في الدنيا لصلحت أحوالنا.

قال: واما كفارة الغيبة فاعلم أن المغتاب قد جنى جنايتين؛ إحداهما على حق الله تعالى إذ فعل ما نهاه عنه، فكفارة ذلك التوبة والندم. التوبة بقى بشروط التوبة، اللي هو الندم والإقلاع والعزم على أنك لا تعود. الجناية الثانية على عرض المخلوق اللي اغتبته ده؛ فإن كانت الغيبة قد بلغت الرجل جاء إليه واستحل وأظهر له الندم على فعله، يعني خلاص هو عرف أنك اغتبته فما فيش مفسدة متصورة أنك تروح تقول له، ما هو عرف خلاص، ساعتها تعتذر منه وتطلب يسامحك. وقد روى أبو هريرة رضي الله عنه عن النبي صلى الله عليه وسلم أنه قال: «من كانت عنده مظلمة لأخيه من مال أو عرض فليأته فليستحلها منه قبل أن يؤخذ وليس عنده درهم ولا دينار؛ فإن كانت له حسنات أخذ من حسناته فأعطيها هذا، وإلا أخذ من سيئات هذا فألقي عليه»، عياذًا بالله. فالإنسان يستحل أخاه في هذه الدنيا.

وإن كانت الغيبة لم تبلغ الرجل -طب ما عرفش أنك اغتبته- جعل مكان استحلاله الاستغفار له. هنا أطلق هذا القول، وبعض العلماء فصل في هذا القول، قالوا: لو الغيبة ما بلغتوش ويغلب على ظنك أنك لو عرفته مش هتحصل مفسدة كبيرة -ما هو أنت ممكن واحد لو رحت قلت له: سامحني أنا اغتبتك، يقتلك، فيبقى المفسدة المتوقعة أعظم بكتير- وممكن واحد ثاني تقول له: سامحني أنا كنا قاعدين في قاعدة وبعدين جت سيرتك، فممكن أقول كلمة تزعل أو حاجة أو كده، فأرجوك سامحني، وأنت عارف أن غالب الظن أنه لو عرف ده مش هيحصل مفسدة كبيرة ولا حاجة، ساعتها تروح له برضه وتقول له كده. إنما لو غلب على ظنك أنه لو عرف هتحصل مفسدة كبيرة، ساعتها بقى نعمل اللي الشيخ بيقوله أنه جعل مكان استحلاله الاستغفار له؛ لئلا يخبره بما لا يعلمه فيوغر صدره. وقد ورد في الحديث: «كفارة من اغتبته أن تستغفر له».

يبقى اللي اغتبته ومش هتعرف توصل له -ما ممكن برضه مسألة ثانية أن اللي أنت اغتبته ده مش عارف توصل له أو هيحصل مفسدة كبيرة لو عرفته- ساعتها تكثر له من الاستغفار، دي حاجة. ثاني حاجة، تذكر محاسنه في المجالس التي اغتبته فيها، يبقى في نفس المجلس أو مع نفس الناس أو على نفس الصفحة أو على نفس الأكونت أو في تعليق على نفس الصفحة التي أنت اغتبت فلان فيها، تدخل تكتب محاسنه. يبقى في نفس المجلس تذكره بمحاسنه التي فيه، ما تكذبش بقى، ما تروحش تقول: ده فخر ومش عارف، وهو لا فخر ولا لا، يعني قول المحاسن التي فيه. ماشي، يبقى دي ثاني حاجة. ثالث حاجة قالها بعض أهل العلم أنك ممكن تهب له ثواب بعض الأعمال؛ يعني تتصدق عنه مثلًا، أو شيء من هذا القبيل على قول من يقول بأنك ممكن تهب الثواب للأحياء. ماشي، يبقى دي ثلاث حاجات معاك، اعمل إيه فيهم؟ اعمل الثلاثة حتى لو أنت مش واخد بالقول الثالث؛ اعمله، إحنا مش حمل أن يجي يوم القيامة يبقى كان في إيدينا حاجة في الدنيا نعملها وما عملناهاش ونيجي يوم القيامة نلاقي نفسنا مفلسين، اعمل أي حاجة يمكن أن تكون سببًا في أن تعتق رقبتك من النار.

قال: وقال مجاهد: كفارة أكلك لحم أخيك أن تثني عليه وتدعو له بخير، وكذلك إن كان قد مات. يبقى زي ما قلنا بقى تستغفر له، تدعي له، تهب ثواب بعض الأعمال، تذكره بمحاسنه في المجلس الذي اغتبته فيه. طيب وبهذا انتهى الكلام عن الغيبة وندخل في الآفات التاسعة؛ إحنا كنا أخذنا الكلام ده المرة اللي فاتت ولا ما أخذناهمش؟

الآفات التاسعة من آفات اللسان النميمة، وفي الحديث أن النبي صلى الله عليه وسلم قال: «لا يدخل الجنة قتات»، وهو النمام. واعلم أن النميمة تطلق في الغالب على نقل قول إنسان في إنسان، يبقى النميمة إيه هي؟ أنك تفسد ذات البين بين الناس، بعد ما واحد تقول له: يا أخي أنا مش عارف، سبحان الله، فلان كل ما يجي يسمك يركبه مائة عفريت ويقعد يشتم وليه بيعمل كده، تقوم تخليه يغلي. ويمكن كمان تروح للثاني تقول له نفس الكلام: يا أخي أمس كنت قاعد مع فلان وقعدت أشكر فيك، ده اللي هو كان بيقول عليه لقيته اتنرفز وقعد، يقوموا يقتلوا بعضيهم هما الاثنين. يبقى ده أنك تمشي بين الناس بالنميمة، مش لازم بالكذب، حتى لو قلت الذي حصل، حتى لو قلت الذي حصل، يعني مش لازم أقول أنك بتكذب، لكن ما فيش مصلحة، أنت ليه تنقل كلام فلان لفلان؟ عندنا مثل جميل جدًا في شعبي يقول لك: "ما شتمك إلا اللي بلغك"، فأنت خليك عاقل كده، الذي يجي يبلغك أن غيرك بيشتمك ولا غيرك بيعمل، يبقى تقاطعه، مش غيره، التقاطع الذي يبلغك ده، جاي يبلغك ليه؟

قال: واعلم أن النميمة تطلق في الغالب على نقل قول إنسان في إنسان مثل أن يقول: قال فيك فلان كذا وكذا، وليست مخصوصة بهذا بل حدها -يعني تعريف النميمة إيه؟- كشف ما يكره كشفه، سواء كان من الأقوال أو الأعمال، حتى لو.

يبقى حاجة الإنسان يكره أنها تتعرف عنه، فأنت أفشيتها، يبقى كده وقعت في النميمة.

فصل فيما يجب على من بلغته النميمة: أنت مش بتنم لكن بلغت هذه النميمة، وكل من نُقلت إليه النميمة مثل أن يقال له: قال فيك فلان كذا وكذا، أو فعل في حقك كذا، ونحو ذلك، فعليه ستة أشياء:

الأول: ألا يصدق الناقل؛ لأن النمام فاسق، والفاسق مردود الشهادة. فأنت هتصدق فاسق؟ يبقى أول حاجة قال لك لا يصدق الناقل لأن النمام فاسق مردود الشهادة.

الحقيقة أنا أهيب بإخواننا من طلاب العلم أو إخواننا من الدعاة ألا يتهاونوا في هذا الباب، ولا يسمحوا أبداً بغيبة أو نميمة في مجلسهم؛ لأن ذلك يفرز لنا أجيالاً تستمرئ هذا. بل يجب أن يرى في وجه طالب العلم أو في وجه الداعية أو الشيخ أو المربي الغضب، إذا اغتيب عنده إنسان أو نقل له كلام إنسان، ويبالغ جداً في إظهار ذلك، خصوصاً إذا كان فلان هذا من خصومه؛ ليربي طالب العلم أو ذلك الشاب الذي أتاه ليُربى على استعظام المعصية، وأنه لا مسوغ أبداً للسماح بالغيبة إلا ما ذكر من المصالح الشرعية.

لو أنت شايف أن فيه مصلحة شرعية، فالمصلحة الأكبر أنك تعظم ذلك في قلب مريدك، فممكن حتى لو أنت شايف أن فيه مصلحة شرعية لا تظهر الغضب وتظهر أنك مش موافق على أن ده يحصل، وتدفع عن المغتاب هذا في المجلس حتى لو من خصومك؛ لكي تخرج ناساً أسوياء وناساً نفسيتها سليمة تجاه المسلمين وناساً فاهمة حرمة الغيبة وحرمة النميمة، وتزجر ذلك الطالب عن هذا الفعل. يبقى أول حاجة لا تصدق الناقل لأن النمام فاسق مردود الشهادة.

الثاني: أن ينهاه عن ذلك وينصحه. الثالث: أن يبغضه في الله؛ فإنه بغيض عند الله. الرابع: ألا يظن بأخيه الغائب السوء. الخامس: ألا يحمله ما حكي له على التجسس والبحث لقوله تعالى: ﴿وَلَا تَجَسَّسُوا﴾ [الحجرات: 12]. السادس: ألا يرضى لنفسه ما نهى النمام عنه، فلا يحكي نميمته. مش بعد كده يروح بقى لواحد تاني يقول له: شفت بقى فلان قال لي إيه كذا وكذا، فلان قال لي كلاماً شيئاً غريباً.

ويروى أن سليمان بن عبد الملك قال لرجل: بلغني أنك وقعت فيَّ وقلت كذا وكذا. فقال الرجل: ما فعلت، لا ما وقعت فيك ولا حاجة. فقال سليمان: إن الذي أخبرني صادق. فقال الرجل: لا يكون النمام صادقاً. فقال سليمان: صدقت، اذهب بسلام. وقال يحيى بن أبي كثير: يفسد النمام في ساعة ما لا يفسد الساحر في شهر. النميمة يا جماعة تفسد ذات البين، وربما تؤدي إلى القتل، وربما تؤدي إلى الطلاق، وربما تؤدي إلى قطيعة الرحم، وربما تؤدي إلى الحروب بين الدول.

وقد حكي أن رجلاً ساوم بعبد، فقال مولاه: إني أبرأ منك من النميمة والكذب. فقال: نعم، أنت بريء منهما، فاشتراه. فجعل يقول لمولاه: إن امرأتك تبغي وتفعل، وأنها تريد أن تقتلك. ويقول للمرأة: إن زوجك يريد أن يتزوج عليك ويتسرى، فخذي الموس واحلقي شعره من حلقه إذا نام. فقال للزوج: إنها تريد أن تقتلك إذا نمت. فذهب الزوج فتناوم لها، فجاءت بموسى لتحلق شعره من حلقه فأخذ بيدها فقتلها، فجاء أهلها فاستعدوا عليه فقتلوه.

الآفة العاشرة: كلام ذي اللسانين، وهو الذي يتردد بين المتعاديين وينقل كلام كل واحد إلى الآخر ويكلم كل واحد بكلام يوافقه. النمام اللي فوق قلنا ممكن يكون بينقل الحقيقة، هو فعلاً فلان شتم فلان بس أنت راح تقول له ليه إن فلان شتمك؟ وفي واحد بقى مريح كده، يقعد مع أي حد يطبل له، فهم الاثنين متخانقين، يقعد مع الأول يقول له: شفت فلان ظلمني؟ يقول له: أيوه ظلمك. يروح يقعد مع الثاني يقول له: شفت فلان ابن اللذينة؟ يقول له: أيوه ابن اللذينة. ده ذو اللسانين.

من النصائح للي بيدخل يصلح بين اثنين، أي كان بقى اتنين أصحاب، زوج وزوجته، أي حاجة، فكرة أنك اللي تبقى قاعد معاه حتى لو شايفه صح تعوم على عومه، أنت كده بتفاقم المشكلة. حتى لو شايفه صح، قل له أنت غلطان، مش شرط تقول له أنت غلطان بس لا تعزز جواه معنى أنه هو اللي صح؛ لأن هو كده هيركب دماغه أكتر. هو ممكن يبقى صح لكن فيه حتة ناقصة، أنت بقى كلمه في الحتة دي.

أو يعده أن ينصره، أو يثني على الواحد في وجهه ويذمه عند الآخر، يبقى ده ذو اللسانين. وفي الحديث: «إن شر الناس ذو الوجهين، الذي يأتي هؤلاء بوجه، وهؤلاء بوجه». تقول: أنا دلوقتي يا شيخ أعمل إيه؟ أنا ببقى عاوز أبقى لطيف المعشر وحسن المجلس، هل ده عيب فيَّ؟ لو هيؤدي إلى تلك المفاسد يبقى عيب طبعاً، أو هيؤدي إلى أنك تداهن في الحق هيبقى عيب برضوا. واعلم أن هذا فيمن لم يضطر إلى ذلك، فأما إذا اضطر إلى مداراة الأمراء جاز. قال أبو الدرداء رضي الله عنه: "إنا لنكشر في وجوه أقوام وإن قلوبنا لتلعنهم". وسيدنا النبي صلى الله عليه وسلم فعل ذلك لما استأذن عليه رجل فقال: «بئس أخو العشيرة»، فلما خرج له النبي عليه الصلاة والسلام ألان له الكلام، فقالت عائشة: يا رسول الله، كنت تقول كذا ثم ألنته الكلام؟ فقال: «يا عائشة، إن شر الناس عند الله يوم القيامة من يُتَّقَى لفحشه».

الآفة الحادية عشرة: المدح، وله آفات منها ما يتعلق بالمادح ومنها ما يتعلق بالممدوح. فإما آفات المادح: فقد يقول ما لا يتحققه فيصير كذاباً، ولا سبيل للاطلاع عليه، مثل أن يقول: إنه ورع وزاهد، وقد يفرط في المدح فينتهي إلى الكذب، وقد يمدح من ينبغي أن يُذم.

وأما الممدوح: فإنه يحدث فيه كبراً أو إعجاباً؛ وهما مهلكان. ولهذا قال النبي صلى الله عليه وسلم لما سمع رجلاً يمدح رجلاً: «ويلك، قطعت عنق صاحبك». وقد روينا عن الحسن قال: كان عمر رضي الله عنه قاعداً ومعه الدرة والناس حوله، إذ أقبل الجارود فقال رجل: هذا سيد ربيعة، فسمعها عمر، فلما دنا منه خفقه بالدرة. فقال: مالي ولك يا أمير المؤمنين؟ قال: سمعتها، خشيت أن يخالط قلبك منها شيء فأحببت أن أطأك.

قال: ولأن الإنسان إذا أثني عليه بالخير، رضي عن نفسه وظن أنه قد بلغ المقصود، فيفتر عن العمل. ولهذا قال: «قطعت عنق صاحبك». فأما إذا سلم المدح من هذه الآفات، يعني فيها آفات في المادح ولا آفات في الممدوح، لم يكن به بأس، فقد أثنى النبي صلى الله عليه وسلم على أبي بكر وعمر رضي الله عنهما وغيرهما من الصحابة رضوان الله عليهم.

وعلى الممدوح أن يكون شديد الاحتراز من آفات الكبر والعجب والفتور عن العمل، لأن الممدوح مش في كل الأوقات يعرف يوقف المادح؛ واحد مدح وخلاص هيوقفه إزاي؟ فهو بقى يرجع لنفسه يقول لها: إيه سيبك من الهاكس اللي بيتقال ده، أنتِ أدرى بنفسك وأدرى بخلواتك وأدرى بحالك مع ربنا، وأدرى بعباداتك المدخولة. فأيه اللي هينفعك؟ يعني الناس كلها بتمدحك وأنت عند الله مذمومة أيتها النفس! يقوم يفكر نفسه بحقيقة نفسه.

قال: ولا ينجو من هذه الآفات إلا أن يعرف نفسه، ويتفكر في أن المادح لو عرف منه ما يعرف من نفسه ما مدحه. وقد روي أن رجلاً من الصالحين أثني عليه، فقال: اللهم إن هؤلاء لا يعرفوني وأنت تعرفني. يبقى معنى كده قالها بصوت عالي ولا لا؟ سمعونا قالوها لنا اهي، صح؟ إحنا نقولها بصوت عالي ولا لا؟

تقوم تفر من المدح بإظهار التخشع، وإظهار إنك بقى الواد المتواضع، لا خالص! بتمدح زلطة قاعدة لا تبين بقى تقطالي راسك، وتعملي الحركات النص كم دي ولا ما فيش أي حاجة. ولما تخلو بنفسك بقى تقولي الكلام ده لنفسك، هذا أسلم لقلبك.

نأخذ كم سؤال، والحمد لله رب العالمين.

في واحد بيقول ده سؤال مهم يا جماعة، هو بيقول: تقدمت لواحدة بنت حلال وبعدين عرفت أنها منتقبة، شعرت بريبة في نفسي وجاني تردد غريب؛ مش عارف عشان هي منتقبة يعني مش فاهم، ما هي خطوات التقدم والخطبة؟ وأنا الحق مش عايز أجاوب على السؤال ده، لكن عاوز أجاوب على السؤال اللي بعده في نفس الورقة: هل تنصح الشاب بالزواج أثناء الدراسة؟ ملحوظة أن أنا على بعد شعرة من الزنا.

فنسأل الله عز وجل أن يعصمه وأن يطهر قلبه، وأن يعصم الشباب أجمعين. ده أولاً، ثانياً أنصح إن شباب تتجوز في الدراسة ولا لا؟ السؤال ده في هذا العصر معقد، وإجابته ما هياش بالبساطة دي. لكن اللي أنا أنصحه للآباء أنك تعود ابنك من وهو صغير يشتغل ويجيب قرش وهو في الدراسة. فإذا قدر يعمل ده، وبعدين جه قال: أنا عاوز أتجوز، وبان إنه الراجل شايل مسؤولية وبيروح شغل وبيجيب قرش وملتزم في شغله وكده، يبقى يتجوز عادي وهو في الدراسة ما فيش مشكلة.

المنصوص عليه في كتب الفقهاء أن الولد إذا بلغ زوجه أبوه، ويجعلون ذلك من الواجب على الأب. لكن هل هذا يصح قوله في هذا الزمان؟ المسألة محتاجة أولاً نظر واقعي كبير، وبعدين محتاجة بقى فقيه يفتي، يعني مش أنا. لكن الواقع دلوقتي أكثر تعقيداً من الواقع بتاع زمان. يعني زمان يا جماعة الجواز كان سهل، كثير يا جماعة من الصحابة -إحنا إن شاء الله هنعمل دورة في الزواج- كثير من الصحابة هتلاقوا أن سيدنا النبي، أنتم عارفين، أول مدينة عليه الصلاة والسلام كانت يمكن أصغر من المسجد النبوي الحالي كمساحة، حاجة بسيطة خالص.

فيجي في السيرة هتلاقوا كتير أن ممكن صحابي يتجوز والنبي ما يعرفش أنه اتجوز، عادي يعني بالليل اتجوز، يجي النبي عليه الصلاة والسلام مثلاً في صلاة الفجر ولا يشوف ولا يحس أنه في حاجة جديدة، كده بقى فيقول له: أنا اتجوزت امبارح. الجواز كان سهل، كان سهل وبأبسط الإمكانات، ولسه درس السيدة فاطمة نازل النهارده؛ دخلت على إيه السيدة فاطمة؟ مخدة جلد حاشينها ليف وفرشة على الأرض ورايحة تطحن به الشعير وقربة مية، ده جهاز ستنا فاطمة. فكانت الدنيا سهلة.

فهل ينفع نجيب ده أصل؟ المشكلة فين دلوقتي لو أنا قلت آه ولازم ونحمس الناس أنها تتجوز، وبعدين سنة ونلاقي عيلة شايلة عيل على إيديها، والواد مطلقها، ما هو عيل لسه! هو كان بيلعب هو ما كانش متجوز ولا حاجة، يعني لسه ما ترباش أنه يبقى راجل. يعني زمان اللي عنده 16 سنة بيقود جيش، صح؟ محمد الفاتح فتح القسطنطينية هو قائد الجيش 16 أو 18 سنة، قائد جيش مش جندي في جيش، قائد جيش. فمش هنجيب ده لواحد عنده 16 سنة دلوقتي، يعني لسه قالع البامبرز من سنة، ما ينفعش ما ينفعش نقيس ده على ده ونقول جوز الواد. طب جوز الواد وبعدين؟

لكن أنت بقى بتقول على بعد شعرة من الزنا، تبطل إباحية ما أعرفش هو كده ولا لا بس بقول اللي هو المتفشي في الشباب، تبطلوا إباحيات وتبطلوا عادة سرية، وتسردوا الصوم. مش تصوم اثنين وخميس، مش تصوم يوم وتفطر يوم لا، اسرد الصوم، يعني الشهر كله تصومه تفطر لك يوم في الشهر ولا حاجة، ولما تفطر ما تدبش الأكل اللي هو كنت بتاكله طول اليوم تأكله في الفطار لا، تأكل أكل بسيط يا دوبك يقيم صلبك، وتكثر من الصلاة، تستعين بها، ﴿يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ﴾ [البقرة: 153]. الصوم والصلاة، فربنا يعصمك من الوقوع في الحرام.

ماشي، الحمد لله رب العالمين.