بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وآل بيته كما صليت على آل إبراهيم، إنك حميد مجيد.
أما بعد، كنا بدأنا في الكلام عن الغيبة التي هي واحدة من آفات اللسان، ووصلنا إلى قول المصنف: فصل في تحريم الغيبة بالقلب. قال: وقد تحصل الغيبة بالقلب. لو تتذكروا احنا عرفنا الغيبة وقلنا الغيبة إيه؟ ذكرك أخاك بما يكره في غيبته؛ هي دي الغيبة، أنك تذكر أخاك بما يكرهه إذا بلغه في غيبته وهو مش موجود. وقلنا أكبر حاجة الناس بتحتج بيها أن يقول لك: هو كده فعلاً، هو فعلاً فيه المشكلة دي. فنقول له: ما هي دي الغيبة، أن هو يكون كده فعلاً، مفهوم؟ ده احنا قلناه قبل كده.
بيقول: وقد تحصل الغيبة بالقلب، وذلك سوء الظن بالمسلمين. يبقى من الآفات التي ربما تصيب، وأحزن طبعاً وأنا أقول هذا، وآسف وأنا أقول هذا، التي تصيب أهل التدين أن يسيئوا الظن بإخوانهم. البعض للأسف إذا رأى من أخيه شيئاً، قولاً أو فعلاً، وله مائة محمل، تسعة وتسعين محمل خير ومحمل واحد شر، يحمله على أسوأ المحامل. وقديماً قالوا: كل إناء بما فيه ينضح. فإذا كنت أنت جواك إنسان طيب السريرة وإنسان على الفطرة، إنسان صافي، ترى من حولك على ذلك. لو كل ما تشوف حاجة من حد تسيء الظن بيه، ففي مشكلة تانية غير إساءة الظن دلوقتي؛ إساءة الظن دي مصيبة وهنتكلم عنها، إنما عندك مشكلة تانية أن معنى كده أن طويتك سيئة. قالوا: إنما يترشح سوء الظن من خبث الظان. فلو لقيت نفسك كده، روح ابحث عن آفات نفسك وعيوب نفسك وعالجها.
ماشي، طيب أنا أعمل إيه دلوقتي؟ تحمل الأمر على أحسن الظنون. طيب ده يمنع من أن أنا آخد حرصي؟ لا، ده ما يمنعش أنك تاخد حرصك، ده في الأفعال الخارجية، يعني تقول إيه: والله أنا لن أسيء الظن بأخي؛ ده في قلبك، واحتياطاً أنا مش هعمل كذا، أو احتياطاً هعمل كذا، ولا أسيء الظن فيه. طيب اللي أنت عملته ده ليه؟ الاحتياطات اللي حطيتها دي من باب الحرص، إذا كان فيه نية خبيثة أو شيء من اللي قدامك، يبقى أنت بتحرس ولا تخونش؛ يعني المثل ده صادق: احرس ولا تخونش، ما تسيئش الظن وخد حرصك. مفهومة؟
والظن ما تركن إليه النفس ويميل إليه القلب، فليس لك أن تظن بالمسلم شراً. وكنا اتكلمنا قبل كده، ما كانش في المسجد ده لكن في الكتاب ده، وقلنا إن سوء الظن بالمسلم حرام. فاحنا هنا مش بنتكلم في رفاهية، اللي هو أنت ممكن تتركها وممكن تعملها، لا، هو أنت لازم تجاهد نفسك في ألا تسيء الظن بإخوانك. بعضهم يا جماعة كان يبالغ جداً في تأديب نفسه في هذه المسألة، يعني حتى ورد عن بعض السلف أنه قال: لو رأيت أخي يقول «أنا ربكم الأعلى» لقلت: ﴿يَقْرَأُ الْآيَةَ﴾. هو بيقرأ الآية، يعني مش لازم «أنا ربكم الأعلى» يعني هو ربنا الأعلى ولا حاجة، وده من باب المبالغة، يعني هو هيلاقي واحد يقول «أنا ربكم الأعلى»؟ ما فيش كده، لكن هو من باب المبالغة، عاوز يربي اللي قدامه أن احنا نحسن الظن لأبعد الحدود، خلاص؟
قال: فليس لك أن تظن بالمسلم شراً إلا إذا انكشف من أمره ما لا يحتمل التأويل، وأثر عن الشافعي أنه قال: التمس لأخيك سبعين عذراً، فإن لم تجد فقل: لعل له عذراً.
فإن أخبرك بذلك عدل، واحد جه عدل فأخبرك أن فلاناً فيه كيت وكيت أو عمل كذا وكذا، فمال قلبك إلى تصديقه، كنت معذوراً. احنا عندنا دلوقتي مشكلة؛ واحد جه هيخبرك، وعلمت أنه هيخبرك قول له: لا تخبرني. يا جماعة فكرة أن فاكهة المجالس بقت حتى بين المتدينين، طبعاً بين النساء ده من زمان كده، إنما حتى الرجال للأسف، وده طبع النساء، فكونه يبقى في الرجالة وبعدين ينتقل من عموم الرجال إلى الناس اللي عندها دين، فتلاقي عادي جداً قاعدين يقطعوا في فروة بعض، وده يجيب في سيرة ده، وده يجيب في سيرة ده، عيب يعني؛ قبل ما يكون حرام عيب، أنت راجل، ده مش أخلاق الرجال ولا طباع الرجال. فإنت بتعمل إيه؟ طب هيبتدي اللي قدامك يجيب سيرة حد، قول له: اكفنا شرك، مش عاوزين نسمع حاجة عن حد. خلاص؟ طيب هتقعد تسمع وما تتكلمش، شريك له في غيبته عشان تبقى فاهم. فبرضه ما هياش رفاهية، يعني ما هواش مستحب أننا ما نجيبش في سيرة حد، لا، ده يجب عليك أنك تقطع الكلام.
جاء ففاجأك وقال لك: فلان عمل، أنت ما لحقتش بقى تقول له ما تجيبش في سيرة حد، يعني قال لك كده وهو الرجل عدل، يعني الراجل اللي بيخبرك ده عدل، فانت دلوقتي بين نارين؛ ما هو أنت لو صدقته هتسيء الظن في التاني، لو ما صدقتهوش يبقى أسأت الظن فيه هو أنه كذاب، وهو عدل. فاهمين دي؟ فهو بيقول بقى إيه: إن أخبرك بذلك عدل فمال قلبك إلى تصديقه كنت معذوراً؛ لأنك لو كذبته كنت قد أسأت الظن بالمخبر، فلا ينبغي أن تحسن الظن بواحد وتسيئه بآخر، بل ينبغي أن تبحث هل بينهما عداوة وحسد، فتتطرق التهمة حينئذ بسبب ذلك. ومتى خطر بينهم حاجة، بينهم أحن، بينهم مشاكل، ما بينهمش حاجة، لكن الاثنين كاروا واحد، فده غيران من ده، أكمنه أشهر منه، أكمنه أعلى منه في الحاجة اللي هم مشتركين فيها دي، فربما يدخله نوع غيرة. ده كلام معتبر؟ آه، حتى في المتدينين آه معتبر، واعتبره أهل الحديث حتى، مش كده؟ فعندهم المحدثون عندهم قاعدة كده في الجرح والتعديل، أن كلام الأقران ما يعتبروهوش قوي. يعني إيه؟ اتنين محدثين في نفس الطبقة ومشتركين بقى في حاجات كتير مثلاً، فيقوم ده يجرح ده، فبعض المحدثين يقول لك: لا، ما نعتبرش قوي الكلام بتاع الأقران ده، ليه؟ لأن ممكن يبقى الباعث عليه الغيرة، فلو هو بس مجرد أن قرينه هو الوحيد اللي بيقدح فيه أو بيجرحه وما فيش حد تاني بيقدح فيه ولا بيجرحه، هنا في قرينة قوية تخلينا ما نعتبرش كلامه. مفهوم الكلام ده؟
فممكن ده يحصل بين الناس المتدينة؟ ممكن. طب هو ده صح؟ لا، غلط، ولازم نجاهد نفسنا. يعني مش بقول ممكن يحصل يعني ده حاجة حلوة، لا، هي حاجة وحشة، وحاجة تدل على أني برضه ما زلنا معظمين للدنيا، هو أنت بتغير منه ليه؟ مش أكيد مش عشان الآخرة، لو الآخرة لو في دماغك الآخرة، هتلاقي صدرك رحب وواسع والآخرة اتسعنا كلنا. ولا لا؟ الآخرة يا أنا يا هو؟ ولا الآخرة تساعنا؟ الجنة تساعنا، الجنة هتساعنا كلنا. فالظاهر أن الغيرة ما هياش عشان الآخرة، الغيرة عشان حاجة في الدنيا مش هتساع أنا وهو؛ ما هو يا أنا الأشهر يا هو الأشهر، يا أنا الأعلى يا هو الأعلى، يا أنا الأغنى يا هو الأغنى، يا أنا الأفضل يا هو الأفضل. فبيبقى هنا بتحصل بقى الغيرة تقع في نفوس أهل التدين، سواء على شيء ديني أو شيء دنيوي. ممكن يبقى متدين ويغير ويحسد في الدنيا، ممكن يبقى متدين ويغير ويحسد في أمور الشرع. مفهومة؟ يعني بتاع قرآن صوتي أحلى ولا صوته أحلى، بتاع دعوة أنا الأشهر ولا هو الأشهر، بتاع وهكذا. فممكن يحصل الحسد والغيرة في أمور الدين، ما تجيش بقى ساعتها تقول: أنا بس غيران عشان عاوز أبقى أنا اللي في الآخرة مش، لا لا لا، هجاص. هتجاص، لو في دماغك الآخرة هتلاقي صدره سليم لإخوانك وبتدعي لهم وفرحان بنجاحهم وفرحان بانتشارهم وانتشار دعوتهم وانتشار قبولهم عند الناس، وهيبقى نفسك كل الناس تخش في الآخرة الجنة، ده لو أنت في دماغك الآخرة.
قال: ومتى خطر لك خاطر سوء على مسلم، فينبغي أن تزيد في مراعاته. ركزوا يا شباب جداً جداً في الجملة دي، وهذه الجملة من أنجع الدواء في ذهاب ما تجد في قلبك تجاه إخوانك، وأنا جربت ذلك بنفسي مراراً. لما تلاقي نفسك بتحسد حد، غيران من حد، تعمل إيه؟ تربي نفسك. إزاي؟ تزود وتبالغ في مراعاته وفي الدعاء له، يعني مثلاً لقيت نفسك غيران من فلان لأنه الأشطر في كذا، فغيران وبتحسده، تقوم تقعد تدعي له أن ربنا يزوده فهماً في كذا اللي هو أنت أصلاً مضايقك أن هو أعلى منك فيه، ده تقوم تقهر نفسك. ليه بقى؟ لأن الباعث على ده حاجتين، أول حاجة نفسك طبعاً، وتاني حاجة الشيطان. الشيطان يدخل لك من حظوظ نفسك، فانت نفسك ما تحت؛ يعني إيه؟ عاوزة تكون هي الأشرف وهي الأعلى، وهي نفسك كده، يقوم الشيطان يدخل ينفخ في الحتة دي في نفسك. فانت بالحاجة دي بتعمل حاجتين: أول حاجة بتكسر نفسك، تاني حاجة بقى ودي مهمة، أنك بتفهم الشيطان حاجة كده، بتقول له: هتوسوس في حاجة؟ هديك بالجزمة في الحاجة دي وهعاملك بنقيض قصدك. يعني أنت عاوز توسوس لي عشان أغتابه؟ طب هدعي له. يقوم الشيطان يعمل إيه؟ يبطل يوسوس لك، ما هو عارف أن كل ما يجي يوسوس لك هتقوم أنت تعمل إيه؟ تدعي للتاني، فتاخد حسنات على قفا الشيطان، يقوم يبطل يوسوس لك في الحتة دي، وتبقى معركتك بينك وبين نفسك بعد كده اللي أنت خلاص المفروض تكون متدرب أنك بتقهرها، كيف تقهرها وكيف يعني تقودها وتسوسها.
فأنت تعمل إيه بقى؟ تزود في مراعاة هذا الإنسان وتزود في الدعاء له وتزود في مدحه والثناء عليه، أنت طبعاً أنت بتتقطع، أنت وأنت بتعمل ده جواك كأن حد جايب سكينة تلمة وبيموتك بيها، ما هو أنت أصلاً متغاظ أن فلان، طب أنا بعمل كده إيه؟ أنا عاوز أنجو بنفسي. المرة اللي فاتت لو تفتكروا قلنا لكم إيه؟ قلنا لكم من العلاج لهذه المسألة وهذه الآفة أنك تخيل كده اللي أنت متغاظ منه ده، لو أطلق لك العنان لحسدت واغتبت ويمكن قتلت، تقوم تيجي له في الدنيا تدي له هدية، تقول له: مستحيل! أقول لك: أنت بتعمل كده في الآخرة. قلنا ده الكلام اللي المرة اللي فاتت، قلنا لك فلان ده اللي أنت متغاظ منه ده كل ما هتغتابه يزيد هو في الآخرة وأنت تنقص، كل ما تشتمه هيزيد هو في الآخرة وأنت تنقص، تيجي في الآخرة تلاقي أهديت له حسناتك وأخذت من سيئاته، عقل إيه اللي يقول؟ فإذا ما كانش فيه في أنك تقهر نفسك وشيطانك بأنك تدعو له وتثني عليه وكذا، إلا أنك بتعلو عليه في الآخرة لكفى، يعني خلِّ غلك اللي جواك ده وقود لك في أن تفعل الصالحات، تقول: أنا عاوز أبقى أعلى منه في الآخرة فمش هدي له من حسناتي. ماشي؟ وإن كان دي ما هيش أعلى المراتب، أعلى المراتب أن يسلم صدرك، أن يسلم صدرك للمسلم، تبقى حبه وتبقى تتمنى له البركة والخير، ده أعلى المراتب. ماشي؟
قال: فينبغي أن تزيد في مراعاته وتدعو له بالخير، فإن ذلك يغيظ الشيطان ويدفعه عنك، فلا يلقي إليك خاطر السوء خيفةً من اشتغالك بالدعاء والمراعاة. أنا بكرر تاني: هذا من أنجع الدواء، جربوه مش هتندموا. يبقى فلان ده اللي أنت نفسك تغتابه، فلانة اللي نفسك تغتابيها، خصصيلها كده وقت تدعيلها فيه بايه، مش تدعيلها بقى اللي إيه ربنا بقى يكرمها وتسافر بره -طبعاً هي مش عاوزاه تبقى جنبها لا- تدعيلها وتدعيله بالحاجة اللي أنت متغاظ فيها، يعني هو أشطر منك في الدراسة؟ يا رب يبقى أنجح واحد ويا رب يتفوق ويطلع الأول ويا رب يبارك له في كذا. طب هو عشان هو أخذ المنصب في الشغل اللي كنت أنت وهو بتتنافسوا عليه؟ يا رب يعلِّي راتبه كمان وكمان ويا رب يبارك له في منصبه الجديد ويا رب ينجحه ويوفقه ويا رب. سهلة ولا صعبة؟ صعبة جداً أنا عارف، بس في الآخر لو ما جاهدناش أنفسنا مش هنبقى رجالة من المؤمنين، رجال، مش كل المؤمنين رجالة، عاوزين نبقى رجالة، رجالة مع أنفسنا ورجالة مع ربنا سبحانه وتعالى ورجالة تتأهل لدخول الجنان، فمحتاجين ندرب أنفسنا على هذا الكلام.
قال: وإذا تحققت هفوة مسلم فانصح.
إذا ظننت فلا تحقق، يعني هل يقال كذا؟ أنا لا أعرف هو صح أم خطأ. إيش اللي تعمله هنا؟ العلاج نبوي، لا أنا ولا أنت، قال صلى الله عليه وسلم: «إذا ظننت فلا تحقق». يعني أتقال كذا، طب هو ده فعلاً معقول؟ فلان.. لا، ما تقولش معقول ولا تتحقق، ده كلام النبي عليه الصلاة والسلام مش كلام أمجد. إذا ظننت فلا تحقق، ما تروحش تتأكد فلان عمل ولا ما عملش، خلاص أنت كفيت ذلك.
طيب تحققت لكن من غير سعي منك، لأن أنت السعي بتاعك في التحقق مذموم شرعاً. أنت غير مطالب بالتحقق إلا لو في مواطن معينة، يعني واحد هو ضابط مباحث لازم يتحقق، ده هنقول له لا تحقق؟ الدنيا هتخرب، فده لازم يتحقق، أو القاضي لازم يتحقق قبل ما يقول الحكم، دي قضية تانية. إنما واحد زينا، واحد عادي، ما تتحققش من حاجة خلاص، إذا ظننت فلا تحقق. طب الموضوع هو وصل لك متحقق وأنت ما سعتش في التحقق ده، تعمل إيه بقى؟ إذا أردت النصح فانصح في السر.
يبقى أول حاجة يا شباب نتحقق، ونتحقق دي.. مقصود تروح تتحقق؟ لا، يعني أقصد أقول التحقق ده شيء الناس ممكن تظن أنها متحققة. هديكم مثال وده بشوفه كتير للأسف على مواقع التواصل، أن واحد مثلاً يقول حاجة، يكون له من الدعاة مثلاً ولا حد له انتشار ولا كذا، يقول حاجة، يقوم واحد تاني يطلع يقول شفت فلان قال كذا، ويقعد يشتم فيه ويعيد، وده فهمه لكلام هو مش كلام فلان كده. يعني كلام فلان يحتمل كذا وكذا، لو هدينا كده وبصينا في الكلام يحتمل، فالتاني يطلع يقعد يشتم ليه؟ لأنه حمل كلامه على فهمه هو، يعني هو مفهومه دي، فأنت لا أنت متحقق من كلامه ولا أنت فاهم هو قال إيه. ولا طيب فهمك فهم معصوم؟ دي مسألة تانية يا شباب.
الشباب المتحمس اللي تلاقيه أسهل حاجة يبدع ويفسق وربما يكفر، والأخيرة دي خطيرة بحديث النبي عليه الصلاة والسلام، ليه؟ لأنها إذا خرجت باء بها أحد الرجلين، إحنا ما بنهزرش هنا، ده كلام النبي عليه الصلاة والسلام: «إذا قلت لأخيك يا كافر، وليس هو لها أهلاً» يعني هذا الرجل ليس بكافر، «حارت عليك». فالسهولة في إطلاق هذه الإطلاقات: فلان مبتدع، فلان فاسق، فلان كافر، فلان زنديق، فلان.. مش بالسهولة دي، خصوصاً إذا كان ربنا سبحانه وتعالى كفاك ذلك. يعني إيه كفاك؟ لا أنت عالم لا مؤاخذة، ولا حتى طالب علم متقدم، فأنت ما حدش مستني كلمتك في فلان، ما حدش مستنيك أصلاً، يعني هم الثلاثة أربعة اللي عندك ومش طايقينك، فأنت ربنا كفاك، ليه بتقتحم المهالك ليه؟ بأي عقل؟ لا، ما أنا ده أصل فلان اللي أنا بثق فيه قال عليه كده، وأنت مالك؟ خلصت كل مهمات دينك وواقفة على أنك تكفر وتبدع وتفسق؟ أنت مالك؟ انشغل بنفسك.
طيب تحققت بقى هفوة المسلم، انصحه في السر بقا. مش كده؟ تعمدني بنصحك في انفرادي، وجنبني النصيحة في الجماعة، ما تفضح الناس وتفضحهم، هاته كده على جنب وانصحه سراً، خصوصاً إذا كان من أهل الفضل والصلاح، لأن أهل الفضل والصلاح إحنا نتبعهم أو نظن فيهم العصمة. في حد يا جماعة نظن فيه العصمة؟ ما حدش نظن فيه العصمة، لكن واحد من ذوي الهيئات ومن ذوي الديانة ومن ذوي المروءة، واطلعنا منه على هفوة، يبقى نقيل عثرته، «أقيلوا ذوي الهيئات عثراتهم». ليه؟ لأن أولاً ما إحناش بنقول على حد معصوم في الدنيا، فإحنا متوقعين أنه مهما كان دين، ومهما كان صالح، ومهما كان ذا مروءة وذا هيئة وكذا، متوقعين أنه يقع في زلة أو في هفوة، متوقعين ده، يعني مش متوقعين متيقنين ده.
إحنا اللي دلوقتي مختلفين فيه هو هتظهر ولا لا، ده إحنا كلنا في ستر الله عز وجل، يعني مين فينا هنا ما بيعصيش ربنا؟ هي المسألة فين؟ مين فينا ما زال في الستر، ومين فينا خرج عن ستر الله إلى الفضيحة؟ إنما كلنا بنعصي ربنا سبحانه وتعالى، نعصي ونتوب ونقع ونقوم، وكل الناس كده، مش كده؟ فما فيش حد في العصمة. طيب اطلعنا بقى منه على هفوة وهو من ذوي الهيئات ذوي المروءات ذوي الديانة، نقوم نحاول نحافظ على الصورة دي مش نهدها، ليه؟ لأن هد الصورة دي مش هد شخص، وقتها بيكون هد لرمز، وربما في نفوس الجماهير بيبقى هد لفكرة. اللي هو تلاقي ممكن الشاب، إيه يا عم إيه ده، الناس دي كلها.. والناس تميل بطباعها للتعميم، يعني سهل جداً إيه "كل اللي مش عارف إيه كذا"، أسهل كلمة الناس تقولها "كل دي"، كل دي أنت جبتها منين؟ يعني كلمة كل دي جبتها منين؟ ما تلاقيش جابها من حتة، هو تلاقيه اتصدم في واحد أو اثنين، أو هي اتصدمت في واحدة ولا اثنين، تقوم تعمل إيه؟ تعمم، كلهم كده. طيب لا، اتصدم في عشرة، ما هو "كلهم" دي اللي أنت بتقول عليها، أنت كلهم دول اللي هم ملايين، فأنت اتصدمت في عشرة، مش معناها أن الملايين كده أو الآلاف كده. فالناس بتميل بطبعها للتعميم.
خلاص، فده ما هواش مصلحة لا مصلحة شرعية ولا مصلحة حتى عرفية في أعراف الناس، أن إحنا نقعد نهد في الناس، من يبقى للناس لو كل واحد شايف الثاني مخالفه في حاجة ولا.. يقوم يهده، يقوم اللي الناحية الثانية مش هيسكت يقوم هدد الناحية، وتلاقي كله بيهد في بعضه، من يبقى للناس؟ من للشاب المسكين ولا البنت المسكينة اللي يقول خلاص أنا عاوزة لسه مش متدين ولا حاجة، جاي يا دوبك كان بيضرب بودرة وبيضرب حقن وجاي من الزنا والخمور والقرف، وقال لك عاوز أتدين يا جماعة، نفسي أتدين أعمل إيه؟ ويدخل بقى على الوسط بتاعنا الجميل اللطيف، فيقول خلاص هسمع فلان، يقوم يلاقي حد ثاني يقول على فلان ده كذا وكذا وكذا، يقول خلاص بلاش فلان أسمع فلان، يقوم يلاقي حد بيقول على فلان كذا وكذا، طب بلاش.. هيقوم عامل إيه؟ مدينا ظهره رايح ثاني للبودرة والخمور، كسبنا إحنا إيه بقى؟
واعلم أن من ثمرات سوء الظن التجسس، فإن القلب لا يقنع بالظن، بل يطلب التحقيق، فيشتغل بالتجسس، وذلك منهي عنه: ﴿وَلَا تَجَسَّسُوا﴾ [الحجرات: 12]، لأنه يوصل إلى هتك ستر المسلم. طيب إيه المشكلة لما أهتك ستره؟ لا ما فيش مشكلة ولا حاجة، هيهتك سترك، بسيطة يعني. وبعدين أنت هتكت ستره، أنت راجل بني آدم مخلوق يعني، فمهما كان وصلت لإيه من ستره ولا حاجة. يعني أن في بني آدم يقدر يوصل لآخر ستر بني آدم يعني يهتك كل الستر؟ صعبة جداً يعني. إنما أبشر بقى لو هتكت الستر، أنت من الذي تكفل بهتك سترك؟ ربنا. «يا معشر من آمن بلسانه ولم يدخل الإيمان قلبه، لا تغتابوا المسلمين، ولا تتبعوا عوراتهم، فإنه من تتبع عورة أخيه تتبع الله عورته». واخد بالك مين اللي بيتتبع عورتك؟ «ومن تتبع الله عورته يفضحه ولو في جوف بيته». فلم نفسك.
لأنه يوصله إلى هتك ستر المسلم، ولو لم ينكشف لك كان قلبك أسلم للمسلم، يعني لو ما انكشفش ستره ده ولا انهتك ستره، هيبقى قلبك سليم ليه؟ وخلاص العملية هتعدي. فصل في الأعذار المرخصة في الغيبة وكفارة الغيبة: طب يعني كده كل غيبة حرام؟ يعني كل ذكر لمسلم في غيبته بما يكره حرام؟ هذا هو السؤال. اعلم أن المرخصة في ذكر مساوئ الغير هو غرض صحيح في الشرع لا يمكن التوصل إليه إلا به. يبقى لو اغتبت أخاك لغرض شرعي صحيح، هذا فيه الرخصة. طيب الغرض الشرعي الصحيح مين اللي يقوله؟ يقوله عالم بالشرع مش أنا، يعني ما يجيش واحد يقول لك إيه: "يا فلان اتق الله ما تغشش"، فيقول لك: "لا أصل في غرض شرعي صحيح". مين اللي أفتى حضرتك؟ مين اللي أفتى أن ده غرض شرعي صحيح؟ ما هو مش بالهوى. يا جماعة كل واحد في الدنيا دي بيعمل حاجة عنده فلسفتها، كل واحد بيعمل حاجة عنده دماغه مريحاه كده، يعني عنده منطق اللي به عمل ده. صح ولا لا؟
ما فيش حد، أنتم عارفين علماء الاقتصاد لما بييجوا يتكلموا في اقتصاد الدول، هو في نوعين من الاقتصاد ماشي، المايكرو والماكرو. المايكرو اللي هو لما بييجوا يتكلموا على اقتصاد الفرد، والماكرو اللي هو لما بييجوا يتكلموا على اقتصاد الدولة. لما نيجي نتكلم على اقتصاد الدولة، بيبنوا الاقتصاد ده على افتراضات. واحد من الافتراضات دي -هم افتراضات قليلة يعني أربع افتراضات- واحد من الافتراضات اللي بيبنوا عليها اقتصاد الدول، أن أي فعل بيفعله الناس هو فعل عقلاني. أي حاجة واحد بيعملها هو عنده المبرر بتاعه، بيبنوا الاقتصاد على كده. هو إيه دخل ده في الاقتصاد؟ لا هو له دخل في الاقتصاد وله دخل في كل حاجة. يعني مثلاً اللي يمشي عكسي وما يلفش من اليوتيرن، تعال وقفه كده، قول: أنت مشيت عكسي ليه؟ هو عنده مبرره، يقول لك إيه: اليوتيرن بعيد. خلي بالك هو ده، أنت ممكن أنت ما تشوفش ده مبرر، هو ما عمل ده شايف ده مبرر، وأنت نفسك ممكن تتحط في وضع تروح عامل ده اللي أنت كنت بتنكره عليه.
أه، أننا لما نيجي نقول غرض شرعي صحيح يبيح الغيبة، يبقى ما تضحكش على نفسك، غرض شرعي صحيح يعني أباح لك واحد عالم بالشرع، لا يمكن التوصل إليه إلا به، وذلك يدفع إثم الغيبة، وهو أمور:
أحدها: التظلم، يعني واحد مظلوم فعاوز يرفع مظلمته. ركزوا في اللي هقوله: لمن يقدر على أن يرد عليه المظلمة. واحد مظلوم فعاوز يرجع حقه، فهيروح رايح مثلاً يعمل محضر في القسم، أو القاضي هيجيبه في المحكمة في القضية، فهيقف يتكلم قدام القاضي، فهيضطر يذكر أشياء اللي بها يرجع مظلمته. طيب نقول دي غيبة؟ وأنت رايح تعمل محضر، الضابط يقول لك: ها إيه اللي حصل؟ تقول: ماقدرش والله هغتاب الراجل يعني أقول عمل إيه؟ طب أنت جاي ليه؟ ما أنت جاي تعمل محضر. النقطة اللي عاوزين نتكلم فيها هنا يا شباب إيه بقى؟ الذي يدفع إثم الغيبة أنك متظلم في موطن أو مع إنسان هو قادر أنه يرد عليك المظلمة. يعني إيه؟ مش فكرة أنك مظلومة، لأن ده بيكثر في النساء، مش فكرة أنك شايفة نفسك مظلومة فيبيح لك أنك تغتابي قدام صاحباتك، هم صاحباتك هيعملوا لك إيه؟ ولا حاجة، يعني مالهمش سلطة. إنما آه، ممكن تبتدي تذكري مساوئ لو مثلاً أنت بتغتابي، أو يعني بتذكري زوجك مثلاً، ساعتها ممكن قدام مين بقى؟ قدام أبوه مثلاً اللي له كلمة عليه، فتقولي له: عمل كذا وكذا وكذا، بيعمل كذا وكذا. ماشي، لأن أبوه له سلطان هيرجعلك مظلمتك. مفهومة دي؟ يبقى التظلم، فإن للمظلوم أن يذكر الظالم إذا استعدى إلى من يستوفي حقه. يبقى للقاضي، للضابط، لزي ما أقول لكم حد كبير في العيلة مثلاً، فأيه هو هيقدر يشكمه، الناس البدوي العرب ولا عندهم إيه المجالس العرفية، فبيروح لواحد كبير في المنطقة، أو الصعايدة برضوا عندهم كده، ماشي. إنما مش يبيح أني أطلق لساني في من ظلمني قدام الناس.
الثاني: الاستعانة على تغيير المنكر، يعني إيه الاستعانة على تغيير المنكر؟ يعني أنا عارف أن فلان بيعمل المنكر الفلاني وعاوز أغير هذا المنكر، بالذات لو المنكر ده متعدي ومصيبته كبيرة. يعني إيه؟ ندي مثال: عارف أن دلوقتي في واحد خاطف واحدة ليفجر بها، أنا لوحدي ما أقدرش أعمل له حاجة لأن هم مثلاً مجموعة ومعاهم، ما أقدرش أعمل حاجة لو رحت هتقتل، فأنا ما أقدرش أعمل حاجة، فيقوم طب أنا عاوز أجيب حد يعني على إيه بسرعة نزيل المنكر ده، ما خلاص إحنا مفيش رفاهية دلوقتي أن أروح للايه للضابط في القسم، فعاوز بسرعة: يا جماعة الحقوا، ده أنا شايفهم خاطفينها في العربية، يعني حصل من يومين ثلاثة، فعاوزين بسرعة عشان نلحق المفسدة دي، واحدة هتموت ولا واحدة هينتهك عرضها ولا كذا ولا كذا، فساعتها أقول لهم إيه؟ تعالوا معايا، في مشكلة، إيه المشكلة لا مش هغتاب بس تعالوا معايا؟ لا ما فيش حاجة اسمها كده، قول لنا في إيه. يبقى أنا دلوقتي بقى إيه بستعين على إزالة منكر، فماشي الحال. يبقى الاستعانة على تغيير المنكر ورد الظالم إلى منهاج الصلاح. يبقى ساعتها ممكن أطلق لساني. شوفوا يا جماعة العلماء، يعني لأن مسألة الغيبة كبيرة، إحنا ممكن بعض الناس اللي قاعدة دلوقتي يقول لك: إيه أنتم مجعلصين الدنيا ليه؟ لا يا باشا هو إحنا مش مجعلصين، هو أنت اللي الدنيا مرحرحة عندك، يعني فكرة أنت إيه هو إيه أنتم مجعلصين الدنيا ليه في الغيبة؟ اللي إحنا أربع وعشرين ساعة فيها مش معنى أنك في الكبيرة أربع وعشرين ساعة أنها ما بقتش كبيرة، فإحنا مش مجعلصين الدنيا، هو أنت اللي الدنيا مرحرحة عندك، فهي الدنيا كبيرة، هي الغيبة كبيرة. فالعلماء يقعدوا بقى يدققوا يا ترى دي غيبة ولا مش غيبة، أنت فاهم إحنا واصلين لفين؟ لأن هو الفرق شعرة بين أنك بين أنك بتفعل واحد من الواجبات اللي هو.
إنك تزيل المنكر، مراء منكم منكر فليغيره، وبين أنك بتقع في كبيرة من الكبائر اللي هي الغيبة، فهو الموضوع كبير.
قال الثالث: الاستفتاء. الاستفتاء ده غير التظلم يا جماعة؛ التظلم ده بيبقى عند مين؟ عند الضابط، عند القاضي. الاستفتاء ده عند مين؟ عند المفتي. المفتي له سلطة إنه يأمر الآخر بأنه يرد أو ما يردش، المظالم ما لهوش سلطة، فاهمين الفرق دلوقتي؟ الضابط اللي عنده محضر ده، آه ده ليه سلطة إنه هيطلع قوة من القسم مثلاً يروح يجيب فلان ده اللي معمول فيه المحضر علشان يرد المظلمة ليك، عنده السلطة دي. القاضي آه عنده السلطة إنه يصدر حكم قضائي على الظالم، عنده السلطة دي. المفتي، هو غاية المفتي إيه؟ بتقول له دلوقتي أنا فلان عمل معايا كذا كذا، هل يجوز أن أعمل معاه كذا؟ فيقول لك آه يجوز أو لا يجوز، فده الفرق بين الاستفتاء وبين التظلم.
لكن يجوز في الاستفتاء، يجوز في الاستفتاء والأولى أننا ما نذكرش اسم اللي إحنا بنستفتي عليه. في التظلم ما ينفعش، ما ينفعش إيه تروح تعمل محضر تقول أنا في واحد ظلمني وعمل كذا وكذا، طيب اسمه إيه؟ لا ما مش هقول اسمه. طب إحنا نجيبه منين؟ تصرفوا بقى، مش إنتوا الشرطة؟ ما فيش كده. إنما في الاستفتاء لو ما فيش داعي لذكر الاسم لا تذكر الاسم. يبقى تروح للمفتي أو للشيخ أو من تثق في علمه ودينه تقول له دلوقتي حد عمل معايا واحد اتنين تلاتة، يجوز أن أنا أعمل كذا معاه؟ مش محتاجين الاسم في حاجة، ما تهتكش ستره، خلاص، فده الاستفتاء.
يبقى الاستفتاء مثل أن يقول للمفتي: ظلمني فلان أو أخذ حقي فكيف طريقي في الخلاص؟ فالتعيين مباح، إنك تقول فلان ده مباح، والأولى التعريض مش لازم تقول فلان. وهو أن يقول: ما تقول في رجل ظلمه أبوه أو أخوه ونحو ذلك؟ والدليل على إباحة التعيين حديث هند بنت عتبة حين قالت: إن أبا سفيان رجل شحيح. أبو سفيان كان مين؟ زوجها، فجت تستفتي أن أبا سفيان رجل شحيح، ولم ينكر عليها النبي صلى الله عليه وسلم.
الأمر الرابع مما يبيح الغيبة: تحذير المسلمين. مثل أن ترى متفقهاً يتردد إلى مبتدع أو فاسق، وتخاف أن يتعدى إليه ذلك، فلك أن تكشف له الحال. وكذلك إذا عرفت من عبدك السرقة أو الفسق فتذكر ذلك للمشتري. ركزوا بقى، واحد يتردد لمبتدع، وهنا لما بنقول مبتدع يعني ممن عُد أهل العلم بدعته، مما يُحذر منها ذلك التحذير الشديد، برضه ما هوش مبتدع يعني مبتدع عند حضرتك أو هو مبتدع أيوه، لكن بدعته بدعة قريبة. دي حاجة. تاني حاجة تكون تخاف أن تسري إليه بدعته، هو ده كلام الشيخ مش كلامي، هو بيقول إيه؟ يتردد لمبتدع أو فاسق وتخاف أن يتعدى إليه ذلك.
ماشي، طب ما فيش خوف أن يتعدى إليه بدعته؟ ليه؟ ممكن يبقى اللي بيتردد ده هو عنده العلم الكافي في هذا، أو بيتردد على ذلك المبتدع لكن لا في أخذ البدعة، وإنما يتردد إليه في أخذ ما يتمكنوا منه هو في غير البدعة، وده بيحصل كتير. يعني بيحصل كتير، بيحصل كتير وخلاص مش لازم بس بيحصل. يعني هدي مثال بعيد يعني بس مش عاوز أقول مثال قريب، إن واحد عنده بدعة وهو دكتور مشهور في القلب مثلاً، فأنا فإنسان بيتردد عليه في عيادته علشان يعالجه بالطب، نحذر منه عشان بيتردد على المبتدع؟ هي نفس القضية. فلو واحد بيتردد على واحد علشان بياخد عليه القرآن مثلاً، هو عنده بدعة معينة في مكان في حاجة أخرى، لكن هو بيتردد عليه عشان ياخد عليه القرآن، نحذر منه ونشنع عليه ونقول مش عارف إيه لا؟ طب هو مبتدع، عنده بدعة، واحد بيتردد عليها عشان ياخد عليه النحو أو ياخد عليه الفقه أو ياخد مش خالص مجلس البدعة ولا مجلس تحرير للبدعة ولا نشر للبدعة ولا، لكنه متمكن في هذه الأمور، فهو بيتردد عليه ياخد عليه ما تمكن منه.
فدي برضه مسألة محتاجة هدوء شوية، وده كله بعد أصلاً ما نشوف هي البدعة دي مما يحذر منها بهذه الطريقة أصلاً أو بهذه القوة، ما هي البدعة يا جماعة مش كلها حاجة واحدة، مش كلها درجة واحدة. البدع دركات، كل درجة أسوأ من الأخرى، عندنا بدع تصل إلى بدع مكفرة، ومنها ما نكفر فيه نوعاً، ومنها ما نكفر فيه عيناً، وعندنا بدع صاحبها من أهل السنة، وهو مبتدع في الحتة دي لكن ما لا يخرج ببدعته عن أهل السنة. فالبدع مش كلها نفس الدرجة، طب مين يفهم الكلام ده؟ أهل العلم يفهموا الكلام ده كويس جداً. ماشي؟ وإلا بقى يبقى إيه الفرق بين أنك بتتردد على إنسان حال حياته وأنك تتردد على كتبه بعد مماته؟ إيه الفرق؟ يعني اللي يقول ده بإطلاق، أنا بقول لكم ليه يا شباب أنا ليه بؤوس في بعض المواطن، عشان هي عاملة مشاكل للأسف عند الشباب.
فلما نيجي نقول إن لا أصل فلان ده يحذر منه لأنه بيروح لفلان مثلاً، نقول طب جميل، طب فلان الثاني ده بقى ما بيروحش لحد لكن بيقرأ كتب فلان، فإيه نقول عليه إيه ده؟ طب فلان ده بقى اللي هو بيقرأ كتبه، أنا بقى ما بحبش أقول أسماء في الحقيقة، إنما إحنا عندنا علماء كبار جداً، ولو شلناهم وشلنا تراثهم من الأمة الوضع العلمي يختل، يعني ما تلاقيش بدائل، ومع ذلك كان عندهم بعض البدع، وما زال من يحذرون الناس وهم مولعون بإساءة الظن في المسلمين، ومولعون بالشتم والسب والحاجات الوحشة دي يقرأون كتب هؤلاء، إيه الفرق بقى إن شاء الله؟ ما فيش فرق، هو الهوى أو الجهل.
قال: وكذلك المستشار في التزويج أو إيداع الأمانة. دي مهمة جداً برضه يا شباب، افهموها. يعني إيه؟ يعني واحد جه بيقول لك: بقول لك إيه، أنا رحت أتقدم لواحدة وقادراً لما زرت لقيتها إيه دي في منطقتك، فعاوز أسألك البيت الفلاني ده إيه رأيك فيه؟ وهو بيت ما يتداخلش، تقوم إنت تقول إيه، تفتكر بقى الشيخ قال دي غيبة وما ينفعش هروح النار، تقوم تقول له دول الناس كده تمام، ما فيش. لا يبقى هنا إيه؟ إنت تحذر منهم، طيب الأولى أنك تحذر إجمالاً، يعني إيه تحذر إجمالاً؟ يعني لو كان هو ممن يرتدع بمجرد أنك تقول له بلاش ممكن، يعني ممكن واحد هو يثق فيك جداً، فتقول له بلاش، بلاش البيت ده، لو كان يرتدع بهذا يبقى ما تزودش. قال لك لا، فصل لي، يعني أنا ما بالنسبة لي شايفهم مناسبين فإنا محتاج تفصيل، ساعتها بقى تحذره تفصيلاً. إنما لو كان الإجمال كافي يبقى ما تفصلش. نرجع تاني، إحنا مش بنحسك هو الموضوع كبير، هي الغيبة كبيرة فإحنا عمالين نحترز على قد ما نقدر أننا نقع في الغيبة.
قال: يبقى كذلك المستشار في التزويج أو إيداع الأمانة، أو هحط فلوس عند فلان أمانة، أو هشغل فلوسي مع فلان، وإنت عارف أن فلان ده نصاب، فلازم تبقى تقول. من الطرائف، واحد كان نصاب، كان ياخد فلوس الناس وبعدين يديهم أرباح شديدة جداً هم من فلوسهم برضه، ما بيشغلش حاجة، هو عمال ياخد الباقي. المهم اتقفش أو ماتقفشش يعني اتفضح يعني اتعرف، فواحد جايله، دي قصة حقيقية وقعت، يعني اللي حكى لي كان حاضر المشهد ده، جاله وده بيهرب، يعني هو نازل بيحط ما تبقى من الفلوس في شنطة العربية وهيدور العربية وهيهرب خلاص، وده واحد جاي له من بلد بايع أرضه وبيته وجاي يدي له القرشين اللي حيلته عشان يشغلهم له، خد شغل لي الفلوس، قال له يا عم الحاج أنا نصاب وبأهرب، والله لا تاخد الفلوس، تشغل يا عم الحاج؟ سيبني، أنا بقول لك أنا نصاب، أنا بأهرب دلوقتي، يعني خلي معاك فلوسك. والتاني قافش فيه ماسكه ومش راضي يسيبه، والتاني هيتقبض عليه يعني لو الشرطة وصلت هتفضح، فبيقول عشان يسيبه، التاني مش يسيبه أبداً، هتاخد الفلوس تشغلها لي، ما سابوش غير أما أخد الفلوس، قال له طب دي الفلوس حاضر، هات الفلوس، وراح مطلع منها كام رزبة كده قال له دي أول أرباح ليك، وحط فلوسه في الشنطة.
طيب قال له أن يذكر ما يعرفه على قصد النصح للمستشير لا على قصد الوقيعة، وإذا علم أنه لا ينزجر إلا بالتصريح بعيبه فله أن يصرح به. يبقى لو كان من غير ما نصرح ماشي، ما كانش يبقى نقول له. الخامس أن يكون معروفاً بلقب، يعني الأعمش سليمان بن مهران، لو قلنا سليمان بن مهران ممكن ناس كتير ما تعرفوش، لكن لو قلنا الأعمش برضه ناس كتير ما تعرفوش، الأعمش محدث معروف، فهو مشهور بلقبه الأعمش وكان أعمى، خلاص فهو لو مشهور بلقب فإحنا بنقول اللقب، لأنه بدون اللقب ما يتعرفش. مفهومة دي؟ فساعتها ما فيش مشكلة نقول اللقب الذي به يعرف، كالأعرج والأعمش، فلا إثم على من يذكره به، وإن عدل عن ذلك معدلاً كان أولى. السادس أن يكون مجاهراً بالفسق ولا يستنكف أن يُذكر به، وقد روي عن النبي صلى الله عليه وسلم أنه قال: «من ألقى جلباب الحياء فلا غيبة له». وقيل للحسن: الفاجر المعلن بفجوره ذكري له بما فيه غيبة؟ قال: لا، ولا كرامة.
وبعدين هيتكلم عن كفارة الغيبة، ناخد كم سؤال. السلام عليكم يا شيخ، بقول لحضرتك قول لي يا حبيبي إيه؟ بقول له ما تقول على طول، هل لمس المرأة الأجنبية بغير حائل ينقض الوضوء؟ يرجى الشرح وشكراً، بحبك. وأنا كمان بحبك. لمس المرأة الأجنبية حرام، يعني هتصافح امرأة أجنبية ده حرام، ماشي، ينقض الوضوء ولا لا ينقض؟ ينقض إن كان بشهوة، ينقض إن كان اللمس بشهوة، يبقى هو حرام سواء بشهوة، بدون شهوة هو حرام، لمس المرأة الأجنبية حرام. ينقض بقى الوضوء ولا ما ينقضش؟ ينقض إن كان بشهوة خلاص. وطبعاً في خلاف، في خلاف في نقض الوضوء، ماشي. طيب، الزوجة مش أجنبية، فـ لمسها مش حرام، ينقض ولا لا ينقض؟ ينقض إن كان بشهوة. يبقى لمس المرأة ينقض إن كان بشهوة سواء أجنبية، سواء زوجة، سواء من المحارم، وده حرام وحاجة وحشة يعني مش، لكن بنتكلم دلوقتي في مسألة الوضوء ينقض ولا لا ينقض، ماشي.
قبل كده اتكلمت عن المحارم ونشوف إيه من المحارم، وتاع والملح ده عملوا لنا هيصة ووجعوا لنا دماغنا، وكأنهم مش عايشين معانا ولا شايفين البلاوي اللي بتحصل ولا شايفين القرف اللي بيحصل كل يوم بالفتاوي اللي بتجيلنا، أو هم عاوزين ده مش عارف بقى الصراحة. صح، رسالة إلى شابة 24 سنة، والدها مش موجود، راحت اتعرفت على واحد واتجوزته من دماغها، عملت عقد عند مأذون بدون علم أهلها، هتضربي نفسك بالجزمة بعد كده مش بهزر، مش بهزر. هو ربنا لما جعل الولي جعل عقله ليه؟ علشان الشاب ممكن يبلع عقل البنت، والبنت عاطفتها تتحكم فيها، الراجل طبيعة الراجل عقله اللي بيتحكم فيه، البنت مش كده، البنت يضحك عليها بكلمتين، فربنا جعل الولي علشان يحافظ عليكي يا بنتي، ربنا جعل الولي عشان يحافظ عليكي.
طب الشاب ده اللي اتجوزك النهارده بالطريقة دي، أولاً إنه يقبل يعمل ده، أنا ماعرفش الله أعلم بالحادثة، إنما غالب الظن ده دليل على حاجتين؛ أولاً أن واحد -ماليش دعوة بده ماليش دعوة بالحالة دي- ده واحد ناقص رباية، ثاني حاجة إن واحد مالهوش أهل، أول ما أقرأ كده وماليش برضه في الحالة، ما هو أنا لما أروح أجوز واحدة أبويا هيوقفني يقول لي فين مين دي؟ وفين بيتها؟ وفين يعني؟ ما هو لازم ده يحصل، إنت هي مش واحدة داخلة عيلتنا، ففين دي؟ مين دي؟ تعالي وريني بيتها، وريني أبوها، وريني أخوالها، وريني أعمامها، مين دول اللي هناسبهم؟ فهيبقى عنده أهل يوقفوه، وأول حاجة إنه ناقص رباية، ليه ناقص رباية؟ لأن ما فيش راجل يعمل كده في واحدة، لا، يعني لو هي بقى اللي بقلة عقلها قالت له يلا نهرب ونتجوز، يقول لها لا ماعملش ده، أنا ماعملش ده. فغالب الظن وماليش دعوة برضه بالحالة دي، نتكلم عموماً غالب الظن أن ده مش هتشوفي منه حاجة عدلة، غالب الظن كده، أن ده إنسان مش هتشوفي منه حاجة عدلة في اللي جاي.
فحكم الزواج بقى عند جمهور أهل العلم هذا الزواج لا يصح عند الجمهور، المذهب في مصر ماشي على مذهب الأحناف ويصححون ذلك الزواج، وده اللي ماشي عند المأذون، يعني المأذون لو راحت له مش هيشترط للولي، ما يقولهاش فين وليك، هيعقد الزواج، فبرضه موقعة نفسك في مشكلة كبيرة تانية، ماشي. نعم، سامع، يشترط إيه اللي يشترط؟ عن لا ما يشترطش المأذون الولي، لا ده إمتى ده بقى جديدة حاجة جديدة، لا المأذون لا يشترط ولي، المأذون لو راح له واحد وواحدة واتنين شهود يجوزهم رسمي عادي، لا يشترط ولياً المأذون سواء بكر أو ثيب. أنت مأذون؟ ماشي ما إنت يا مأذون يا متجوز عشان بس قول ها، قول لي طيب إيه، ماشي، قول بقى المعلومة يلا إنه الوكيل غير الولي، أولاً ركزوا بقى في المعلومة دي عشان أنا ماعرفش، الوكيل دي برضه أنا يعني أنا اللي أعرفه.
لغاية دلوقتي المأذون في مصر ما بيشترطش وجود الولي، إنما كلمة وكيل دي معناها إني أنا أقدر أعمل ده بنفسي وأوكل غيري. الشرع عندنا ما بيقولش المرأة لها وكيل، بيقول المرأة لها ولي. المرأة لها ولي، الولي ده بدونه مافيش نكاح، بدونه مافيش نكاح. ماشي، على كل حال المأذون بيوافق ما بيوافقش، إنت ما تعمليش كده، إحنا بنلجأ إلى مذهب الأحناف في أحوال ضيقة، في أحوال ضيقة نلجأ إليه علشان نسهل على الناس في حتت هنضايق عليهم فيها، مش مهم دلوقتي.
إنما فإنت يا بنت الحلال صلحي اللي حاصل ده، صلحي اللي حاصل ودخلي أهلك بسرعة قبل ما الولد ده تشوفي منه، أنا برضه ما أعرفش هو إيه، يمكن في ملابسات أنا ما أعرفش حاجة، أنا ورقة جاية لي بقرأها معاكم.
أنا كنزي وعندي 14 سنة ممكن ترشح لي كتاب مناسب لسني أقرأه؟ إيه لازم كنزي يعني؟ كنزي ده اسمك ولا كنزة صغيرة مثلاً؟ ها، مش عارف. مش عارف، يعني حد عنده 14 سنة ولد أو بنت، ما أعرفش إيه الكلمة التانية دي كنزة ولا كنزي مش عارف، بعدين بقى نرشح لكم كتب إن شاء الله.
قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير