عوامل الثبات بعد رمضان

أما بعد، الدرس اليوم مناسب للأحوال التي نحن فيها، سيكون بعنوان -كما شفتم على القناة- عوامل الثبات بعد رمضان. لكن خلونا قبل ما نبدأ ونتكلم عن عوامل الثبات بعد رمضان، عاوزين نحرر مفهوم الثبات. يعني احنا بنقول عوامل الثبات بعد رمضان، والكلمة دي بنسمعها كتير، لكن قد يكون بعضنا مشوش في ذهنه شوية معنى الثبات. يعني هل المقصود لما لما نقرا العنوان ده "عوامل الثبات بعد رمضان"، هل مقصود بالثبات أن نكون على نفس الحال اللي كنا عليها في رمضان؟

وده يعني مفهوم الثبات في اللغة كده، أن واحد ثابت أو شيء ثابت يعني ما اتحركش من مكانه، هو زي ما هو. فهل ده اللي احنا نقصده، وهل ده اللي بينقدح في ذهْنك، أو هل ده اللي أنت عاوزه أصلاً؟ أن أنت تكون على نفس الحالة اللي كنت عليها في رمضان، وعلى نفس القدر من التعبد اللي كنت عليه في رمضان، وعلى نفس القدر من القرب من الله اللي كنت عليه في رمضان، وعلى نفس قدر عزوفك عن الدنيا كما كنت في رمضان؟ هو ده معنى الثبات عندك، أو ده المعنى اللي جه في دماغك لما قريت العنوان "عوامل الثبات"؟ أو كتير بنقرا أصلاً العنوان ده وكتير ناس بتتكلم عنه، هل ده مفهوم الثبات؟ طيب، لو ما كانش ده مفهوم الثبات، يبقى إيه مفهوم الثبات؟ وإلى أي حد تقدر تقول عن نفسك: آيوه أنا ثابت، أو لأ أنا مش ثابت، إذا كان ما هواش ده الثبات؟ فدي أسئلة محتاجة يتجاوب عليها الأول قبل ما نشوف إيه هي عوامل الثبات. إيه هو الثبات أصلاً؟

واضح يا جماعة ليه أنا بقول ده يا جماعة؟ لأن ناس كتير بتبقى فاهمة أو فاكرة أن مقصودنا من الثبات هو ثبات حالتك كما كانت في رمضان. طيب، فيجي يقيس حاله بعد رمضان بحاله أثناء رمضان، فيلاقي طبعا الفرق شاسع، فيقول: بس أنا مش ثابت، فيقنط أو ييأس. طيب، خلونا قبل ما ننط لحته يقنط وييأس وتعمل له مشاكل عنده، خلونا نبدأ بحديث، حديث هينور الدنيا شوية، علشان تفهم أن مش ده مفهوم الثبات اللي نقصده، وأن اللي أنت فيه ده شيء طبيعي. اللي هو إيه اللي أنت فيه؟ اللي هو أن تيجي فترة كده تلاقي نفسك الكيرف بتاع إيمانك والكيرف بتاع عبادتك والكيرف بتاع كل حاجة عالي جدا، وبعدين يرجع ينزل شوية، ده طبيعي، ده يعني ده ما يزعلكش. النبي عليه الصلاة والسلام في حديث مهم جدا في المسألة دي، ودي ممكن تبقى قاعدة من قواعد السير إلى الله، ويمكن نفردها بقى بدرس بعد كده ونضمها لسلسلة قواعد سير إلى الله، والقواعد دي يا جماعة مهمة جدا جدا أن أنتم تسمعوها بعد رمضان.

عشر قواعد أو عشر دروس احنا اديناهم، معظمهم مهم دلوقتي أن يتسمع، الحديث النبي صلى الله عليه وسلم يقول: «إن لكل عمل شرة، ولكل شرة فترة». تاني، «إن لكل عمل شرة، ولكل شرة فترة، فمن كانت فترته إلى سنتي فقد اهتدى، ومن كانت إلى غير ذلك فقد هلك». إيه معنى الحديث؟ أن لكل عمل شرة. يعني إيه شرة يا جماعة؟ يعني قوة وانطلاق، شرة. ده معنى كلمة شرة. يبقى أي عمل بتعمله بيكون له شرة، وبعدين ولكل شرة فترة. فترة العكس بقى من كلمة فتور، أن الدنيا ترجع تنزل تاني. فاهمين دي؟ يبقى «إن لكل عمل شرة، ولكل شرة فترة».

طيب، النبي عليه الصلاة والسلام فين نصيحته في الموضوع ده؟ «فمن كانت فترته إلى سنتي فقد اهتدى، ومن كانت إلى غير ذلك فقد هلك». طب إزاي الفترة النزول دي تكون إلى السنة؟ خلوا بالكم يا جماعة، في رواية تانية للحديث: «فمن كانت شرته إلى سنتي فقد اهتدى». يبقى احنا عاوزين الشرة تكون إلى السنة، والفترة تكون إلى السنة كذلك. طب إزاي سنة النبي صلى الله عليه وسلم هي الاعتدال والقصد؟ هي التوسط، والتوسط في كل شيء بحسبه. يعني الاعتدال والقصد والتوسط في رمضان كما كانت حال النبي المشرفة صلى الله عليه وسلم؛ العشرين الأولانيين يخلط نوم بصلاة، أدخل العشرة يشد المئزر ويوقظ أهله ويحيي ليله. يبقى دي السنة. هنا يخلص رمضان، أرجع السنة إلى التوسط بمفهوم آخر. واضح يا جماعة؟ يبقى فيه شرة، وفيه فترة، ومن كانت فترته إلى سنتي فقد اهتدى، وسنة نبينا التوسط والاعتدال.

طيب، يبقى احنا فهمنا كده أن احنا في رمضان بنكون فيه شرة، الشرة دي مش هتدوم وما تزعلش أنها ما دامتْش، ومش ده الثبات اللي احنا جايين نتكلم عنه النهارده عشان نقول عوامل الثبات واحد اتنين تلاتة، يعني خليك دايما في هذه الشرة، خليك دايما في يعني زي ما بيقولوا لو حد بقى بيرسم كيرفات وكده، خليك دايما في البيت. لأ، والا ما كانش هيبقى فيه بيِك، كان هيفضل دايما الكيرف طالع، مش هيبقى فيه حاجة اسمها بيِك بقى خلاص، يعني مش هيقلب. واضح يا جماعة؟ طيب، لأ، ده هو فيه شرة، وبعدين تيجي فترة، وبعدين ترجع شرة، وبعدين ترجع فترة، ودي هتفضل حياتك على طول. هتفضل كده في إيه؟ في حاجة زي الأمواج كده، بيسموها الوِيف دي اللي هي الآيْ؟ هي دي حياتك، فما تزعلش لما تلاقي نفسك في فترة، اعرف أن دي الآيْ الدورة الطبيعية لحياتك.

في رواية للحديث ده يا جماعة، رواية مهمة جدا، النبي قال: «إن لكل شيء شرا». الرواية الأولى: «إن لكل عمل شرا». الرواية التانية: «إن لكل شيء شرا». دي يا جماعة دورة طبيعية، لكل شيء شرا ولكل شرة فترة، شرة وفترة، شرة وفترة، لكل شيء. زيي زي الحب وزي البغض وزي الغضب، كل الحاجات دي هتلاقيها إيه؟ كده، وقف كده موج. بتحب أوي وترجع نفس الشخص اللي بتحبه أوي ده يرجع إيه؟ الحب ينزل شوية، فترة، وترجع يعمل مواقف تانية فترجع تحبه، شرة، ويرجع يفتر فترة. الغضب كذلك، ولذلك قالوا إيه؟ أحبب حبيبك هونا ما عسى أن يكون بغيضك يوما ما، وأبغض بغيضك هونا ما عسى أن يكون حبيبك يوما ما. فاعرفوا الطبيعة دي، دي طبيعة خلق الله عز وجل، شرة وفترة.

طيب، لو ما انتبهناش لده هيحصل ايه؟ هتيأس وهتقعد عن العمل. ليه؟ ما أنت مستحيل هتبقى بعد رمضان زي رمضان، وتقول: آه أنا سمعت أن كان فيه درس بيتقال "عوامل الثبات بعد رمضان"، فمعنى كده أن فيه ناس بتثبت. ما هو أنت لو ما كنتش حضرت الكلام ده وما عرفتش إيه الثبات اللي نقصده، بس قريت عنوان أو حتى قريت مقالة على النت "عوامل الثبات" والراجل اللي كتب أو أو الداعية أو الواعظ بالكلمه دي ما فهمكش قصده من فكرة الثبات، هتيأس. ما هو أنت هتفهم إيه؟ أن الشيخ ده بيقول عوامل الثبات، معنى كده أن الشيخ ده ثابت على حالته اللي كان عليها في رمضان، والشيخ ده بكلم ناس ثابتة وأنا مش ثابت، أنا ضايع! صح ولا لأ؟

الحالة دي حصلت لصخابي، تخيلوا بقى نفس الإشكال اللي عندك ده دلوقتي! حصل لصخابي اسمه حنظلة، أبو بكر رضي الله عنه يعدي، لقى حنظلة ده قاعد بيعيط. مالك بتعيط ليه؟ قال له: اسمع بقى، يقول: عند رسول الله صلى الله عليه وسلم، فيحدثنا الجنة والنار كأنها رأي العين، بنكون عند النبي يكلمنا عن الجنة والنار -عليه الصلاة والسلام- كأننا شايفينها قدامنا، فإذا خرجنا من عنده عافسنا الزوجات ولاعبنا الأولاد وعالجنا الضياعات، نافق حنظلة! إيه رأيكم؟ نفس الإحساس اللي عندك، بكون في رمضان بقوم ليل وبصوم نهار وبختم المصحف يمكن في يومين ولا في تلاتة وبتصدق، ومنا اللي بيعتمر، وبعيد عن المعاصي، ويخرج رمضان، العبادة بقل والقرب من الله بقل، والأحوال الإيمانية بتقل، نافق حنظلة! نافق فلان! نفق علان! نفس الكلام.

فأبو بكر يقول لحنظلة: والله إني لأجد ما تجد! ده أنا كمان زيك! بينا إلى رسول الله عليه الصلاة والسلام، ويأتي بقى التوضيح النبوي للحالة دي. إشكال حنظلة داخل بيعيط، إيه في إيه؟ قال: يا رسول الله، نكون عندك، عندك فتحدثنا الجنة والنار فكأنها رأي العين، فإذا خرجنا عافسنا الزوجات وعالجنا الضياعات ولعبنا الأولاد. عافسنا يعني يا جماعة من الآخر كده، من غير دخول في التفاصيل لأن مش ده الحديث، يعني اهتمينا بالدنيا، يعني انشغلنا بدنيتنا الطبيعية اللي هي أي بني آدم بينشغل بها. فحنظلة سمى ذلك نفاقا. فقال رسول الله صلى الله عليه وسلم بقى: «لو تدومون على ما تكونون عليه عندي لصافحتكم الملائكة في الطرقات وعلى فرشكم، ولكن ساعة وساعة». إيه ساعة وساعة؟ شرة وفترة، شرة وفترة، ساعة وساعة، خلاص؟

ومن حكمة الله عز وجل، عشان الشرة دي ما هو أنتم على فكرة يا جماعة لو احنا فضلنا الفترة وبعدين الدنيا ماشية زي ما هي، هتلاقي الفترة عمالة تزيد تزيد تزيد، ويمكن بقى ننزل خالص نغطس، فتلاقي ربنا في خلال العام وفي خلال الأسبوع كذلك يجيب لنا مواسم عشان الشرة دي تحصل، فتلاقي أن حتى في الأسبوع تلاقي أن فيه صوم اتنين وخميس مثلاً. آه أنا بسجل، اللي بيسأل، أنا بسجل، بس بسجل على يعني جهاز تاني وهينزل على اليوتيوب إن شاء الله، مش بسجل على الزوم، لكن هو ده إن شاء الله هيسجل وهينزل على اليوتيوب بعد ما يخلص بإذن الله. نرجع تاني، شرة وفترة، ساعة وساعة، شرة وفترة، اربطوا الأحداث ببعض يا جماعة، واربطوا الأحاديث ببعض وكلام النبي عليه الصلاة والسلام بيتربطوا ببعض عشان نفهم.

طيب، كنا بنقول إيه بقى؟ أنا عندي بس مشكلة كده لما بخرج عشان أرد على حد ممكن أفصل وأنسى الكلام. فتلاقوا في الأسبوع -جزاكم الله خيرا- فتلاقوا في الأسبوع اتنين وخميس صيام يحصل الشرة تاني، تلاقوا في صلاة جمعة ويوم الجمعة فيه عبادات لو انت انتبهت لها هتلاقي الشرة تحصل، يعني هتلاقي صلاة الجمعة التبكير لصلاة الجمعة والجلوس في المسجد من العصر للمغرب عشان تحصل ساعة الإجابة، فطبعا أنت مش قاعد بتلعب كوتشينة، ده أنت قاعد في عبادة وذكر واعتكاف، شرة!

واضح؟ تلاقي في أثناء الشهر تلاقي الصيام 13، 14، 15، شرة! تلاقي في أثناء العام مواسم، المواسم دي ولا النبي صلى الله عليه وسلم يرجع يقول لك إيه: «ألا إن لربكم في أيام دهركم لنفحات، ألا فتعرضوا لها». ليه تعرضوا لها؟ عشان تحصل الشرة وتستمر الدورة، دورة حياتك شرة وفترة، شرة وفترة.

طيب، في الفترة دي بقى: «فمن كانت فترته إلى سنتي» لفظ مجمل محتاج توضيح، يوضحه لك عمر رضي الله عنه. الملهم يقول عمر رضي الله عنه: إن لهذه القلوب إقبالاً وإدباراً. ركزوا يا جماعة في الكلام ده أوي: إن لهذه القلوب إقبالاً وإدباراً، إقبالاً شرة، إدباراً فترة. فإذا أقبلت فخذوها بالنوافل، وإذا أدبرت فالزموها الفرائض. يا سلام! كلام جميل، هو كلام محكم بقى من عمر، إقبالاً وإدباراً شرة وفترة، إذا أقبلت في الشرة أكثر من النوافل، دس دس على قد ما تقدر.

حصلت الفترة، أوعى الفترة دي تأخذ من الفرائض شيئا. ولما نقول الفرائض هنا يا جماعة يبقى نقصد إتيان الواجبات والانتهاء عن المحرمات، ودي بقى آخر الفترة. خلوا بالكم، أصل الفترة مش مش حاجة واحدة، لأ، أنتم عارفين الكيرف، مش النقطة فوق في ثانية بتبقى في الأرض، لأ، هو الكيرف بينزل، فبتلاقي نقطة في الكيرف وأنت نازل كده أو في المنحنى ده وأنت نازل عليه، فيه نقطة أنت تأتي الفرائض وكثير من النوافل، النقطة اللي بعديها تأتي الفرائض والنوافل بتقل، اللي بعديها النوافل بتقل. خلي آخر فترتك هي الفرائض، ما ينفعش تنزل عن كده. آخر فترتك الحرام، ما ينفعش تقتحم الحرام. ولذلك ابن القيم بيوضح المعنى ده بصورة أوضح في مدارج السالكين، بيقول إيه بقى ابن القيم؟

فتخلل الفترات للسالكين أمر لا بد منه. افهموا يا جماعة، افهموا النقطة دي، خلوا بالكم، احنا احنا الدرس ده ممكن ينتهي على كده ونقفل ونقوم شكرا، ويبقى له ممكن نخلي بقى جزء تاني إزاي نثبت. لكن لو ما خرجناش غير بالمعنى ده كفاية، عشان المعنى ده بيوقع ناس كتير، والشيطان بيدخل لك من المعنى ده كتير. ابن القيم يقول: فتخلل الفترات للسالكين أمر لا بد منه. السالكين يقصد السالك إلى الله، أنت يا جماعة أنت أنت سالك إلى الله، أنت وأنت في طريق لربنا سبحانه وتعالى لازم تاخذ بالك، في واحد اهو حط جاب النقل وحطه لكم جزاكم الله خيرا على الشات يقول: فتخلل الفترات للسالكين أمر لا بد منه. فلما تلاقي نفسك في فترة ما تزعلش، ده أمر لا بد منه. فمن كانت فترته إلى مقاربة وتسديد، ولم تخرجه من فرض ولم تدخله في محرم، رجي له أن يعود خيرا مما كان. يا سلام! ده يا جماعة فهم العلماء، وهذا فهم عمر رضي الله عنه. هقرا تاني نقل ابن القيم، قال: حاولوا بقى تقروه معي من الشات، فتخلل الفترات للسالكين أمر لا بد منه.

فمن كانت فترته إلى مقاربة وتسديد ولم تخرجه من فرض ولم تدخله في محرم، رجي له أن يعود خيراً مما كان. يعني إيه رؤيا له؟ يلا نرجع تاني. أنت في الفترة اهو، خلي بالك الشرة بتاعتك كانت مثلاً البيك عند رقم عشرة مثلاً، لو تخيلنا أن في هنا إيه الإحداثيات اللي بيسموها الآية؟ صاد بي أو واي يعني، ماشي؟ والبيك عند رقم عشرة وبعدين بتنزل في الفترة بتاعتك اهو.

لكن ما اقترفتش محرم وما سبتش فرض، خلاص؟ أيوا المحور الرأسي ده أيوه، وأنت نازل اهو الفترة بتاعتك فالبيك اللي تحت دي كانت نزلت من عشرة وصلت لخمسة، وبعدين هترجع تاني في شرة مش هتطلع لعشرة هتلاقي نفسك عديت العشرة كمان توصل لاتناشر، وبعدين تنزل وبعدين تعمل البيك التانية دي وتنزل الفترة فهتوصل مش لخمسة بقى ممكن توصل لستة وهكذا، هتفضل في الآخر لو بصيت بقى على الكيرف بتاعك من بعيد هتلاقيه إلى صعود.

صحيح هو عمال يطلع وينزل، لو دخلت في التفاصيل هتلاقي فيه طلوع ونزول، لكن لو عملت زوم أوت كده رجعت بضهرك لورا كده وبصيت على الكيرف بتاعك هتلاقي إيه في صعود؟ قادرين تستوعبوا دي؟ أنت في التفاصيل عمال تطلع وينزل صحيح، لكن في المجمل أنت بادئ من نقطة وصلت عند مماتك إلى نقطة كانت أعلى من دي. واضحة دي؟ هو ده اللي ابن القيم عاوز يقوله آخر جملة لابن القيم: «ولم تخرجه من فرض ولم تدخله في محرم رجي له أن يعود خيراً مما كان».

إيه معنى خيراً مما كان؟ يعني هيفضل طالع إلى الأبد؟ لأ هو هيطلع لكن هيوصل لرقم اتناشر وترجع يقلب الكيرف تاني، وهينزل مش هيوصل لخمسة اللي كان عليها لا يوصل لسبعة بس، وبعدين يطلع تاني فيوصل لخمستاشر وينزل بس مش هيوصل لسبعة، لأ هيوصل لتمانية ويطلع تاني هيوصل لعشرين، فهتلاقي الكيرف بتاعه إيه؟ على طول في صعود. واضح؟ لو عملنا الزوم أوت اللي احنا قلنا عليه ده.

طيب علي بن موسى بيقول: إن القلوب للقلوب إقبالاً وإدباراً ونشاطاً وفطوراً، فإذا أقبلت أبصرت وفهمت، وإذا انصرفت كلت وملت، فخذوها عند إقبالها ونشاطها، واتركوها عند إدبارها وفطورها. المعنى اللي عاوزين نخرج منه هنا: فخذوها عند إقبالها ونشاطها، إيه المعنى اللي عاوز أقوله الزيادة عن اللي أنا قلته؟ الإقبال والنشاط يا جماعة مش لازم يبقى في شهر، مش لازم يبقى في يوم، ده ممكن في لحظة.

لأ، إزاي يفهممني؟ هفهمك، عمرك جيت تنام لقيت نفسك عمال تفرك مش عارف تنام، مش جاي لك نوم كتير؟ كلنا كده ما فيش حد مش كده، أهي دي لحظة إقبال، اعتبرها كده يا أخي. يعني إيه؟ قوم وتوضأ وصلي ركعتين، خذوها عند إقبالها طالما فيك صحة مش عارف تنام. ببلاش؟ طب أنا صحيح مش جاي لي نوم بس مكسل أقوم أعد أذكر ربنا في السرير؟ خدها على طول.

يعني إيه؟ اغتنم اللحظات الثواني الدقائق، مش لازم يبقى عندي شهر اسمه شهر رمضان، ولا لازم يبقى عندي يوم اسمه يوم خميس عشان أصومه، ولا لازم يبقى عندي ساعة اسمها ساعة إجابة العصر والمغرب يوم الجمعة. لأ، ده أنا عندي عشر ثواني لقيت نفسي فاضي وعندي إقبال فهحرك لساني أستغفر، هحرك لساني أقول آيتين، هفتح المصحف أقرأ نص صفحة، مش لازم أعد نص ساعة عشان أخلص جزء، مش لازم.

فخذوها عند إقبالها ونشاطها، فيبقى اغتنم الثواني كده تاني من الدقائق، اغتنم اللحظة دي، فاهمين يا جماعة؟ ده اللي احنا عاوزين نقوله. طيب بسرعة بقى ننتقل عوامل الثبات، خلاص يبقى احنا ده مفهوم الثبات، عرفنا إيه مفهوم الثبات خلاص؟ مش تفضل في حالتك اللي كنت عليها يعني أنت آخر عشر ليالي دايس بنزين على الآخر ما بتنامش بالليل، فأن أنا هيخلص رمضان هبقى كده، مش هيحصل مش هيحصل، حنظلة أبو بكر نفسه لما شاف حنظلة قال له: أنا كمان زيك، أنا كمان زيك.

النبي نفسه يا جماعة عائشة بتقول عن النبي صلى الله عليه وسلم: كان يخلط يعني العشرين الأولانيين بنوم وصلاة، يعني العشرين الأولين في رمضان غير العشرة الأواخر عند النبي عليه الصلاة والسلام، وأهو الاتنين رمضان، فانت مش هتكون نفسك، مش هيحصل. طيب فهمنا ليه إيه العوامل بقى؟ أول عامل من عوامل الثبات أنك انسى أنك تثبت، وتثبت يعني إيه؟ فهمنا يعني إيه تثبت؟ انسى أنك تثبت بحولك وقوتك، انسى أنك تثبت بجدعنتك، انسى أنك تثبت لوحدك.

آه، لأ ما أنا مش لوحدي ده أنا هجيب بقى واحد صاحبي، دي هنيجي لها بعدين بس مش ده اللي أنا أقصد، لن تثبت إلا بتثبيت الله لك. تخيل إيه ده مفاجأة يا جماعة، إحنا كتير في المعمعة بننسى دي، بننسى أن ربنا اللي بيثبت. طب لأ خد المفاجأة بقى اللي بجد، النبي عليه الصلاة والسلام لولا ربنا ما كانش ثبت، ده فين ده؟ ده في القرآن: ﴿وَلَوْلَا أَن ثَبَّتْنَاكَ لَقَدْ كِدتَّ تَرْكَنُ إِلَيْهِمْ شَيْئًا قَلِيلًا﴾ [الإسراء: 74].

يا الله، ربنا بيخاطب مين؟ يخاطب النبي عليه الصلاة والسلام: ﴿وَلَوْلَا أَن ثَبَّتْنَاكَ لَقَدْ كِدتَّ تَرْكَنُ إِلَيْهِمْ شَيْئًا قَلِيلًا﴾. من الذي ثبت؟ الله سبحانه وتعالى. فلتيأس أنك تثبت إلا بتثبيت الله عز وجل لك. طيب إذا يأست من ذلك لهج لسانك دائماً بسؤال الله عز وجل التثبيت، وده كان حال النبي عليه الصلاة والسلام.

ألم يكن من دعائه صلى الله عليه وسلم: «يا مقلب القلوب ثبت قلبي على دينك، يا مصرف القلوب صرف قلبي إلى طاعتك» عليه الصلاة والسلام. ألم يكن صلى الله عليه وسلم يستعيذ بالله عز وجل من الحور بعد الكور؟ عارفين إيه الحور والكور يا جماعة؟ الكور ده كور العمامة، عارفين العمامة لما بتيجي تتلبس مش القَرْنُصوَة اللي أنا لابسها دي لأ، العمامة العمة بتاعت الصعايدة كده بتاعت صعايدة أو بتاعت الأزارة، العمامة دي كانت بتتلبس إزاي؟ بيلفوها كده، أهي كل لفة اسمها كور، دي اسمها أكوار.

فأنا كده بعمل إيه؟ أكور العمامة، خلاص لما أجي أفكها ده الحور، فكان النبي صلى الله عليه وسلم يستعيذ بالله من الحور بعد الكور. يعني إيه يستعيذ من أنه ينفرط أمره بعد أن إيه؟ اجتمع عليه الأمر واضح، أو من شتات الأمر بعد اجتماعه هكذا. فده كله دعاء النبي صلى الله عليه وسلم ده يدل على إيه؟ أنه فهم المعنى ده أن ربنا سبحانه وتعالى هو اللي بيلم عليه أمره، هو اللي بيثبت على الطريق فكان يسأل الله عز وجل الثبات: ثبت قلبي على دينك، صرف قلبي إلى طاعتك، أعوذ بك من الحور بعد الكور.

وكان من دعاء أهل الإيمان: ﴿وَثَبِّتْ أَقْدَامَنَا﴾ [البقرة: 250]، والله عز وجل ذكره لنا في القرآن. وكان من دعائهم: ﴿رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا﴾ [آل عمران: 8]. وكان لزاماً عليك وجوباً سبعتاشر مرة في اليوم والليلة تسأل ربنا الهداية: ﴿اهْدِنَا الصِّرَاطَ الْمُسْتَقِيمَ﴾ [الفاتحة: 6]. وقفه هنا شوية: ﴿اهْدِنَا الصِّرَاطَ الْمُسْتَقِيمَ﴾. طب ما ربنا هدينا ما إحنا كلنا مسلمين يا جماعة، وهو ده الصراط المستقيم، إيه معنى اهْدِنَا الصراط المستقيم؟ فيها عدة معاني، هاخد منها معنى واحد لأن اللي يعنينا هنا اللي هو إيه بقى؟

اهْدِنَا الصراط المستقيم، سؤال لدوام الهداية والثبات على الهداية، هو ده معنى الثبات اللي إحنا بنتكلم عليه، سبعتاشر مرة في اليوم والليلة وجوباً؛ مرتين في صلاة الصبح، أربعة في الظهر، وأربعة في العصر، وتلاتة في المغرب، وأربعة في العشاء وجوباً، تسأل ربنا: ﴿اهْدِنَا الصِّرَاطَ الْمُسْتَقِيمَ﴾ في الفاتحة؛ إما أنك تقولها أو تقول آمين خلف الإمام فانت مثلاً ربنا الهداية. إيه معنى الهداية هنا؟ عدة معاني منها دوام الهداية، الثبات على الهداية، مفهومة دي يا جماعة؟ ليه ده كله؟ لأن من غيره أنت ضايع.

والمعنى ده هيفضل ظاهر لأهل الإيمان لغاية ما يموتوا ويصحوا ويخشوا الجنة فيقولوا إيه؟ ﴿وَمَا كُنَّا لِنَهْتَدِي لَوْلَا أَنْ هَدَانَا اللَّهُ﴾ [الأعراف: 43]. واضح؟ هيرروح فين ده؟ في الجنة. واضح؟ طيب، ولذلك برضه يا جماعة في دعاء الاستفتاح صلاة الليل: اللهم رب جبرائيل وميكائيل وإسرافيل فاطر السماوات والأرض، عالم الغيب والشهادة، أنت تحكم بين عبادك فيما كانوا فيه يختلفون، اهدني لما اختلف فيه من الحق بإذنك.

هنا سؤال الهداية؛ لأن من غير ربنا مش هتهدى واضح؟ وهنا شوفوا هنا فيه برضه معنى جميل: رب جبرائيل وميكائيل وإسرافيل. أشمعنى التلاتة دول؟ أشمعنى التلات أنبياء دول؟ تلات ملائكة دول في سؤال الهداية والتي يحصل بها حياة القلب؟ ما هو الهداية يحصل بها حياة القلب، طب أشمعنى التلات ملايكة دول؟ جبرائيل وميكائيل وإسرافيل، لأن التلاتة دول المسؤولين عن الحياة، هم التلاتة دول؛ فجبرائيل موكل بالوحي وبه حياة القلوب، وميكائيل موكل بالقطر وبه حياة الأبدان، وإسرافيل موكل بالنفخ وبه الحياة الأخرى بداية أحداث يوم القيامة تناسب أن تفتتح بذكر هؤلاء الثلاثة: اللهم رب جبرائيل وميكائيل وإسرافيل، فاطر السماوات والأرض، عالم الغيب والشهادة، أنت تحكم بين عبادك فيما كانوا فيه يختلفون، اهدني لما اختلف فيه من الحق بإذنك، إنك تهدي من تشاء إلى صراط مستقيم.

طيب، يبقى أول سبب من أسباب الثبات الصدق ودوام اللجوء إلى الله. يبقى لو عاوز ورقة وقلم كده لو حد معاه بقى ورقة ورقة وقلم ويكتب، يبقى أول حاجة بس رؤوس أقلام كده: صدق ودوام اللجوء إلى الله.

طيب إيه الجزء العملي؟ الجزء العملي أنك تغتنم الأوقات الأوقات الفاضلة في سؤال الله عز وجل الثبات، يبقى وأنت ساجد ساعة الإجابة، صايم الستة من شوال عند الفطر، أوقات الإجابة عند نزول المطر، أوقات الإجابة دوروا عليها بقى سيرش على أوقات الإجابة، وعند أوقات الإجابة دي أو الأقرب أن الدعاء يستجاب، تسأل الله عز وجل الثبات وتكثر من الأدعية اللي احنا بنقولها: ربنا لا تزغ قلوبنا بعد إذ هديتنا وثبت أقدامنا، نعوذ بك من الحور بعد الكور، يا مقلب القلوب ثبت قلوبنا على دينك، يا مصرف القلوب صرف قلوبنا إلى طاعتك، وهكذا.

السبب الثاني من أسباب الثبات: القرآن يا جماعة، القرآن قراءة وحفظاً وتدبُّراً وفهماً وعملاً، تعيش مع القرآن، هو القرآن سبب للثبات؟ أه. مين اللي قال كده؟ ربنا سبحانه وتعالى، قال الله عز وجل: ﴿قُلْ نَزَّلَهُ رُوحُ الْقُدُسِ مِن رَّبِّكَ بِالْحَقِّ لِيُثَبِّتَ الَّذِينَ آمَنُوا﴾ [النحل: 102]. يبقى القرآن يثبت، ولما الكفار قالوا: ﴿وَقَالَ الَّذِينَ كَفَرُوا لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً﴾ [الفرقان: 32]. يعني الكفار بيقترحوا، هو ليه قرآن ما نزلش جملة واحدة على النبي؟ ما نزلش مرة واحدة كده على النبي عليه الصلاة والسلام؟

وقال الذين كفروا -طبعا اللي بيكتب جزاه الله خيراً والله يا جماعة على الشات يساعد الناس يعني جزاكم الله خيراً- وقال الذين كفروا: ﴿لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً﴾. طب ليه ربنا اختار أنه ينزل القرآن منجماً؟ يعني على يعني منجم يعني منجم يعني يعني مش مرة واحدة يعني مقطع كده يعني دلوقتي ينزل آيات بعد شوية ينزل آيات وهكذا: ﴿كَذَلِكَ لِنُثَبِّتَ بِهِ فُؤَادَكَ﴾ [الفرقان: 32]. فالقرآن من حكمة أنه ما نزلش مرة واحدة: ﴿كَذَلِكَ لِنُثَبِّتَ بِهِ فُؤَادَكَ﴾. فالقرآن عامل قوي جداً من عوامل الثبات.

طيب يعني أعمل إيه؟ العملي بقى إحنا دايماً عاوزين نخرج بحاجات عملية نعملها مش مش مش عمالين ننظر. أول حاجة، لو أنت مش مشترك في حاجة بتحفظ فيها اشترك واحفظ، ومن من حسنات كورونا يعني أو كوفيد اللي حصل ده الحاجات الأونلاين اللي اشتغلتي كتير دي وأنت في بيتك تقدر تشترك في مقرأة أونلاين، اشترك واحفظ، ولو بقدر يسير ورد القرآن اليومي، وأنا أنصحك أنك ما تقلش عن الجزء، جزء كتير؟ لا مش كتير يا جماعة، الجزء ده يعني تمن ترَبَع، عارف حضرتك لو بعد كل صلاة حتى لو هتفوت الفجر -يعني مش هتفوت الفجر الصلاة لأ، أنت هتصلي الفجر لكن أقصد مش هتقرا مع الفجر قرآن، هتقول فيها أذكار الصباح مثلاً- لكن مع صلاة الظهر هتقول ربعين، وصلاة العصر ربعين، وصلاة المغرب ربعين، وصلاة العشاء ربعين.

ربعين مش هياخدوا منك سبع دقائق، أنت متخيل؟ سبعة في أربعة ما كملناش تلاتين دقيقة، نص ساعة هتكون خلصت جزء في اليوم. طب أنا متعود أقرأ جزء، حاول تزود خلاص، لكن ما تقلش عن الجزء ده يومياً. يبقى ده القراءة، وأنت بتقرا حاول تقرا دايماً من مصحف يكون فيه معاني الكلمات، على الأقل الكلمات الغريبة، تبقى على الأقل فاهم أنت بتقرا إيه، يعني مش قل أعوذ برب الفلق مش عارف يعني إيه فلق، غاسق إذا وقب لن تعرف يعني إيه غاسق ولا وقب، ما أنتاش عارف أصلاً بتقرا إيه، هتعمل إزاي بقى؟ ده أنت مش عارف أنت بتقرأ إيه أصلاً! على الأقل بس معاني الكلمات الغريبة تبقى عارفها.

طب لأ أنا بقرا من الموبايل وما معيش ما بلحقش، خلِّي لك ولو عشر دقائق يومياً اقرأ في كتاب تفسير صغير زي تفسير السعدي مثلاً، أو مختصر تفسير ابن كثير مثلاً تفسير بسيط خلاص، أو التفسير الميسر، أنا بقول أسماء عشان إحنا عاوزين نخرج بحاجات عملية نعملها، هيبقى القرآن عامل من عوامل الثبات.

العامل الثالث من عوامل الثبات: الصحبة الصالحة، الصحبة الصالحة مهمة جداً يا جماعة، ربنا سبحانه وتعالى بيقول: ﴿وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا ۖ وَلَا تُطِعْ مَنْ أَغْفَلْنَا قَلْبَهُمْ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا﴾ [الكهف: 28].

والآيات دي تيجي بعد قصة أصحاب الكهف، اللي هم لو كانوا ما خدوش بعضهم كده وطلعوا للكهف وقعدوا مع اللي شبههم في المدينة، كان زمانهم فين دلوقتي؟ فتيجي الآية: ﴿وَاصْطَبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا﴾ [الكهف: 28]. فتفضل في الزخرف الدنيا وفي ملذات الدنيا، فتروح في داهية.

يبقى الصحبة الصالحة ليه بقى يا جماعة؟ لأن النبي صلى الله عليه وسلم ضرب مثلاً بالجليس الصالح وجليس السوء؛ إيه؟ كحامل المسك ونافخ الكير. حامل المسك إما أن يحذيك وإما أن تبتاع منه وإما أن تجد منه ريحا طيبة. حامل المسك ده يا إما هيديك يهديك، وإما أن إنت تشتري منه، وإما حتى لو ما أداكش ولا اشتريت منه، أهو يا عم شامم ريحة نضيفة. بتسمع كلام ربنا، بتسمع واحد بيقول لك: اتق الله، ما ينفعش اللي بتعمله ده.

ونافخ الكير إما أن يحرق ثيابك وإما أن تجد منه ريحا منتنة، فإنت عاوز تكون مع مين؟ ما تضحكش على نفسك، الصحبة الصالحة والمرء على دين خليله، وهذا كلام النبي عليه الصلاة والسلام. إنت حاطط نفسك وسط، يعني أنا آسف يعني، بس وسط مستنقع، قاعد في بلاعة؛ هتبقى إيه؟ هتبقى ريحتك شكلها إيه؟ الصحبة الصالحة، دور على صحبة صالحة تعينك على الطاعة، لما تلاقيك بتعمل حاجة صح بيقول لك: أحسنت، جزاك الله خيرا، ويشدوا على إيدك، لما تلاقيك بتعمل حاجة غلط ما يشجعكش.

يا جماعة دي مصيبة، دي من أكبر المصائب، وربنا نص عليها في القرآن، قال الله عز وجل: ﴿وَقَيَّضْنَا لَهُمْ قُرَنَاءَ فَزَيَّنُوا لَهُمْ مَا بَيْنَ أَيْدِيهِمْ وَمَا خَلْفَهُمْ وَحَقَّ عَلَيْهِمُ الْقَوْلُ﴾ [فصلت: 25]، هم دول صحبة النواصي؛ لما يلاقوك بتعمل حاجة غلط يسقفوا لك، حتى لو تلاقي الانبهار في عينيهم، فلان الشبح، ابعد عن دول خالص. الصحبة الصالحة تعينك، وأصحاب الكهف زي ما قلنا أهو صحبة صالحة.

طيب، يبقى تصاحب الصالحين وتفر من غيرهم، وده ياخدنا للسبب الرابع، إحنا بقى بنجري شوية معلش. ياخدنا للسبب الرابع هو إيه؟ الفرار من صحبة السوء ومن مواطن الفتن. في الحديث يا جماعة النبي لما قال: إن الصراط وعلى جنبتي الصراط أبواب وسطور مرخاة، مش هنقول الحديث، لكن في بقى الداعي على الصراط بيقول: لا تفتحه؛ يعني لا تفتح هذه الأبواب فإنك إن تفتح تلج. أوصاف حتى هتفرج، إنت عارف إن المكان الفلاني مكان فيه معاصي، ولو رحت ما بعرفش أمسك نفسي؛ ما تروحش، سر.

طيب، رايح مكان وما كنتش تعرف، لقيت نفسك هتقع؛ اجري، اجري على فين؟ على الباب، زي مين كده؟ يوسف جابته ودعته. اه، الفرار من مواطن الفتن، قلنا: لو رحت مكان لقيت المكان ده فيه معصية، فر سر، فر للباب كده، الصوت كويس؟ الصوت مسموع كده يا جماعة؟ طيب تمام، جزاكم الله خيرا. سر الباب زي ما يوسف عمل؛ لأ، في معصية وخاف يقع في المعصية، استبق الباب، خلاص جري على الباب.

آه، في الحديث وفي المعنى ده؛ قال صلى الله عليه وسلم: «يوشك أن يكون خير مال المسلم غنم يتبع بها شغف الجبال ومواقع القطر يفر بدينه من الفتن». وده يا جماعة معنى مهم عايزين نقف عليه، إن ليه دايما يا جماعة، ليه دايما أول ما بتيجي الدنيا قدام دين بنروح لدنيا؟ يعني إحنا عاوزين برضه ده إشكال كبير جدا، يعني هنا النبي صلى الله عليه وسلم بيقول إيه: يوشك أن يكون خير مال المسلم غنم يتبع بها شغف الجبال ومواقع القطر، ويطلع كده.

بلاش أصحاب الكهف يا جماعة، أصحاب الكهف دول كانوا أبناء ملوك، كانوا أمراء، فمتخيلين حياتهم كانت عاملة إزاي؟ ولذلك حتى لما هيصحوا بعد ما يناموا هيقولوا إيه؟ فلينظر أيها إيه؟ ما كانوا بياكلوا أي أكل، أزكى طعاما، يجيب لنا أحلى أكل في السوق، ما هو ده أكلهم، ده كان أكلهم أصلا، مفهوم؟ فكانوا أبناء ملوك، كانوا أمراء، لكن أول ما اتحط ده قدام دين، خلي بالكوا دول مش سابوا المدينة اللي هم فيها وراحوا مدينة تانية، لا لا لا، دول راحوا كهف، عارفين يعني إيه كهف؟ سابوا القصور وراحوا كهف، افر بدينك من الفتن.

المصيبة الكبيرة اللي إحنا فيها بقى إن الفتن ما بقتش مكان بنروحه، لا، يعني مش إحنا اللي بنروح للفتن، ده الفتن هي اللي بتيجي لنا دلوقتي، الفتن في موبايلك، يعني حضرتك ممكن تكون واقع في الفتنة وإنت في الأوضة، في أوضتك، وإنت في سريرك، الفتن بقت في الموبايلات اللي في إيدينا. وده، يعني إحنا في عصر ما الحقيقة غريب، أنا كان زمان وأنا صغير وأنا شاب، كان أبيا يقول لي إيه؟ كان يبقى قلقان علي، وأنا كنت لسة قاعد مع والدي قريب وبحكي له، يعني بقول له التحدي الكبير اللي بنقابله حتى في تربية ولادنا دلوقتي، كنت بقول له، بقول له: يا بابا، إنت كنت زمان تبقى قلقان علي وأنا في الشارع، يعني إنت واقف مع مين؟ طب عاوز أشوف أصحابك دول شكلهم إيه؟

أنا النهاردة ابني قلقان عليه وهو قاعد قدامي وهو ماسك الموبايل، أنا مرعوب وهو قاعد قدامي، يعني الفرق بيني وبينه متر أنا مرعوب، ليه؟ هو بيعمل ايه؟ هو دماغه بتتحشي إيه دلوقتي؟ يا ترى دماغه وهو قاعد ماسك الموبايل بتتحشي إلحاد، ولا بتتحشي شهوات، ولا بتتحشي شبهات ولا أفكار منحرفة؟ أنا مش عارف، ده وهو بيني وبينه متر، وهو بيني وبينه حيطة، أنا في أوضة وهو في أوضة.

خلي بالك بقى مش ابني، لأ، ده أنا بتكلم عن نفسي بقى، ما هو أنا مش بعيد عن الفتنة برضه، وإنت مش بعيد عن الفتنة، الموبايل اللي في إيديك ده فتنة، الفيسبوك فتنة، يعني قد تكون مش دايما فتنة لا أقصد هذا، لكن يعني أنظر له بهذا المنظور، الفيسبوك ده لو بتفتح فتلاقي نفسك بتسكرول بالساعات وبتضيع عمرك، بلا شك دي فتنة. خلي بالك ما بقولكش تعمل حاجة حرام، أنا بقول لك بقى بتسمع أغاني ولا بتقرا الملحدين ولا بتتفرج على نساء متبرجات ولا بتعمل حاجة حرام، إنت بس بتسكرول في المباح، تضيع حياتك في مباح فتنة، لأن عمرك هتسأل عنهم، فدي فتنة، يفر بدينه من الفتن.

آه، يعني تفر منين؟ تفر من الفيسبوك، مش لازم بقى زمان كان خطابنا زمان كان غير كده، يعني خطابنا كان نقول ايه؟ ما تروحش ما تروحش المكان الفلاني اللي فيه معاصي. لأ، ده إحنا النهاردة الخطاب بقى لازم يبقى كده؛ ما تدخلش على الفيسبوك إذا إنت بالمنظور ده، إذا بيضيع عمرك كده خلاص، دي اكتيفيشن وخلاص، انسى الفيسبوك ده خالص وهكذا. يعني ده منظور بقى الفتنة.

واضح يبقى الفرار من الفتن والفرار من صديق السوء، لأن الصاحب زي ما بنقول حتى في العامية المصرية: الصاحب ساحب، فلينظر أحدكم من يخالل والمرء على دين خليله. وشوفوا يا جماعة المشهد ده، المشهد ده رهيب، مشهد لإنسان ربنا سبحانه وتعالى من عليه في اللحظات الأخيرة كده زي ما بيقولوا فدخل الجنة، فكان له صاحب كان خلاص شوية وهيسحبه معه في النار، فلما يقعد كده ويستريح بقى في الجنة هيقول إيه؟ ﴿إِنِّي كَانَ لِي قَرِينٌ * يَقُولُ أَإِنَّكَ لَمِنَ الْمُصَدِّقِينَ﴾ [الصصافات: 51-52]. أنا كان لي واحد صاحبي عمال يسحبني لحته تانية خالص، وبعدين مش لاقيه، فين ده؟ فبيكلم أصحابه اللي في الجنة: هل أنتم مطلعون؟ طب ما تيجوا نبص عليه. فاطلع رآه في سواء الجحيم، قال: ﴿تَاللَّهِ إِنْ كِدْتَ لَتُرْدِينِ﴾ [الصصافات: 56].

ده أنا خلاص كنت هسمع كلامك، أنت صاحبك شكله ايه؟ صاحبتك شكلها ايه؟ صاحبتك دي اللي لما لو فكرتي تاخدي قرار انك تلبسي حجاب لو مش محجبة، أو تختمري لو لابسة حجاب وعاوزه تروحي لدرجة أعلى، أو تنتقبي لو لابسة خمار وحجاب وقلت هلبس نقاب، صاحبتك اللي معاكي دي شكلها هتقول لك إيه وقتها؟ ما هو الحياة قرار يا جماعة، حياتنا دي عبارة عن شوية قرارات، إنت ماشي لقيت طريقين وهديناه النجدين، هتمشي يمين ولا شمال؟ قرار. جيت تمشي يمين لقيت اللي بيشدك ناحية الشمال أو العكس، حياتك قراراتك، فصاحبتك اللي إنت اخترتيها دي شكلها إيه؟ صاحبك اللي إنت اخترته شكله إيه؟

صاحبك ده اللي هو لما رمضان خلص وعيد الفطر فقال لك: ده السينما منزلة الفيلم الفلاني والفلاني يلا شوف هندخل إيه؟ ولا صاحبك اللي اخترته اللي هيجي يقول لك: ما ينفعش بعد ثلاثين ليلة عبادة ربنا يبص لنا ليلة العيد يلاقينا بنعصي، ما ينفعش. انهي صاحب اللي إنت اخترته؟ صحبة الخير والفرار من مواطن الفتن.

السبب الخامس من أسباب الثبات بعد رمضان: العلم يا جماعة، الاستماع إلى دروس العلم، وهنا هنقسم دروس العلم نوعين يا جماعة؛ نوع دروس وعظية، يعني إيه وعظية؟ حاجة بتخاطب قلبك كده، اللي هو زي ما حنظلة قال كده: تحدثنا الجنة والنار. آخر مرة قعدت وشغلت درس بيتكلم عن الجنة إمتى؟ آخر مرة قعدت وشغلت درس بيتكلم عن النار إمتى؟ عن الموت، عن الآخرة إمتى وبتركيز؟

يعني دلوقتي يا جماعة أنا دايمًا بقول ده، ويمكن أنا نسيت أقوله في أول الدرس المرة دي؛ خلّي لك مكان في بيتك دلوقتي حالا أهو، لو إنت قاعد مشغل الزوم في الخلفية وعمال تسكرول على فيسبوك ولا بتقرا رسايل الواتساب، لو سمحت اقفل ده حالا وركز في الدرس حالا، مش عشان أمجد اللي بيدي درس، لأ، عشان إنت ما تعرفش قلبك هيفتح لاني كلمة وأني كلمة هتكون سبب في إنقاذك من النار. كلمة واحدة ممكن تغير حياتك، الكلمة دي ممكن تكون فاتت عليك لأنك كنت ساعتها بتسكرول على الفيسبوك، كنت ساعتها بتقرا شات على الواتساب، ففاتت الكلمة اللي كانت سبب في تحول حياتك.

نرجع تاني بقى؛ آخر مرة سمعت درس، ودي وده تحدٍ على فكرة من تحديات الأونلاين أن التركيز تقريبا بيقِل للنص عن دروس المساجد، آخر مرة حضرتك سمعت درس بيتكلم عن الآخرة إمتى؟ عن الجنة، عن النار وبتركيز؟ دروس الوعظ مهمة جدا، ودروس العلم ده الجزء التاني، إحنا قلنا أول حاجة دروس وعظية تخاطب قلبك، ودروس إيمانية علمية تزود إيمانك وتزود معرفتك بربك سبحانه وتعالى، الاتنين مهمين جدا. خلاص الدروس الوعظية فين؟ يعني فين هي في إنها تثبت وفين هي إنها تقرب؟ حديث حنظلة: يحدثنا الجنة والنار فكأنها رأي العين، فبنزهد في الدنيا وعاوزين آخرة، وخلاص دنيا إيه دي اللي مشغولين بها؟ نخرج من عندك يحصل واحد اتنين تلاتة.

طب العلم بقى؟ العلم يثبت؟ آه يثبت. هو إنت عاوز تثبت إيه؟ تثبت على طاعة وتثبت عند حلول الفتن، صح؟ تعالوا نشوف الاتنين؛ أعظم طاعة أو الطاعة المختلفة اللي كنا بنعملها في رمضان إيه؟ قيام الليل، مش كده؟ شوف كده ربنا سبحانه وتعالى لما ذكر قيام الليل في القرآن، لما ذكر قيام الليل في القرآن قال إيه: ﴿أَمَّنْ هُوَ قَانِتٌ آنَاءَ اللَّيْلِ سَاجِدًا وَقَائِمًا يَحْذَرُ الْآخِرَةَ وَيَرْجُو رَحْمَةَ رَبِّهِ ۗ قُلْ هَلْ يَسْتَوِي الَّذِينَ...﴾ [الزمر: 9].

أقف هنا دلوقتي، لو أنا قلت لك كمل الآية بدماغك، الآية بتتكلم عن قيام الليل عمل اهو عبادة؛ قل هل يستوي الذين يعبدون والذين لا يعبدون؟ قل هل يستوي الذين يعملون والذين لا يعملون؟ صح؟ ربنا ختم الآية إيه؟ ﴿قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ﴾ [الزمر: 9]. ختام الآية بعد القيام، مين اللي بيقوم؟ الذين يعلمون. يبقى الثبات على الطاعة بالعلم، الثبات عند حلول الفتن بالعلم.

فخرج على قومه في زينته؛ مين ده؟ قارون؛ ﴿وَخَرَجَ عَلَى قَوْمِهِ فِي زِينَتِهِ﴾ [القصص: 79] فتنة، فتنة محمد رمضان فتنة؛ ﴿قَالَ الَّذِينَ يُرِيدُونَ الْحَيَاةَ الدُّنْيَا﴾ [القصص: 79]. شوف كم مليون على صفحة واحد زي محمد رمضان ده! وللأسف تدخل تلاقي ممكن تلاقي ناس سمتهم سمت ناس متدينة، ما هي دي الفتنة يا جماعة، هي دي الفتنة. فخرج على قومه في زينته، في عربيته، في فلوسه، في قصره، في طيارته؛ ﴿قَالَ الَّذِينَ﴾ مين؟ ﴿يُرِيدُونَ الْحَيَاةَ الدُّنْيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ﴾ [القصص: 79]. يا ريتني زي محمد رمضان!

مين اللي ثبت في الوقت ده؟ ﴿وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ﴾ [القصص: 80]. يبقى العلماء هم العباد؛ أمن هو قانت آناء الليل إلى آخر الآية، يقول: هل يستوي الذين يعلمون والذين لا يعلمون؟ العلم يثبتك، يعني يثبتك في طريق الطاعة، والعلم يثبتك عند حلول الفتن. وقال الذين أوتوا العلم: ويلكم ثواب الله خير. يبقى العلم الشرعي يا جماعة، المواعظ، دروس الوعظية، وكذلك دروس العلم، دروس الاعتقاد، دروس الفقه، دروس العلم الشرعي.

طيب السبب السادس من أسباب الثبات بعد رمضان، وفهمنا يعني إيه الثبات، الثبات المقصود يعني مطالعة سير الصالحين؛ خليني أزود لك إدمان مطالعة سير الصالحين الإدمان، خلّي دايما كده عندك ورد، زي ما فيه ورد قرآن فيه ورد تقرا في سير السلف، وكانت عبادتهم شكلها إيه؟ وكان زهدهم شكله إيه؟ وكان إقبالهم على الآخرة إزاي وعزوفهم عن الدنيا إزاي؟ دايما، وأنا طبعا دايمًا بيكون قدامي بالذات بقى في الحاجات الأونلاين دي المستويات مختلفة، أنا دايما.

بقول الأقل والذي أكبر بقى هو بيبقى عارف طريقه يعني فطب أقرأ إيه؟ أنا أنصحك بكتابين تبتدي بهم: كتاب بسيط في السيرة النبوية عشان تعرف حياة النبي كانت شكلها إيه يا جماعة؟ عشان الدنيا اللي احنا عمالين نجري وراها دي وتشوف النبي كان بيربط على بطنه الحجرين وتشوف النبي كان بينام على الرمل وتشوف النبي كان بيلبس إزار ولا رداء.

تلاقي نفسك إيه اللي أنا فيه ده! دنيا إيه اللي أنا بفكر فيها دي؟ فكتاب بسيط في السيرة وليكن مثلا هذا الحبيب لأبي بكر الجزائري بسيط في السيرة، وكتاب بسيط تبتدي مثلا بقصص الصحابة وليكن كتاب عبد الرحمن رأفت الباشا صور من حياة الصحابة.

أشمعنى الكتاب ده بالذات؟ لأن هو بيذكر بعض القصص بأسلوب أدبي يخاطب القلوب تدمن مطالعة سير الصالحين ومنها بقى خش بقى على أي كتاب ترتقي ترتقي بعد كده وتقرا بس ما تبطلش.

ما تبطلش تقرا في سير الأولين. طب هو ده يثبت؟ آه، مين اللي قال كده؟ ربنا. قال كده لمين؟ للنبي عليه الصلاة والسلام. في ختام سورة هود ربنا يقول للنبي عليه الصلاة والسلام: ﴿وَكُلًّا نَّقُصُّ عَلَيْكَ مِنْ أَنبَاءِ الرُّسُلِ مَا نُثَبِّتُ بِهِ فُؤَادَكَ﴾ [هود: 120]، يبقى قصص الرسل وقصص الصحابة وقصص التابعين وقصص الصالحين يثبت الفؤاد، ويثبت الفؤاد.

وفي واحد اتحط على الشات اهو جزاه الله خيرا نازل لكم لينكات للكتب الحقوا بقى نزلوها دلوقتي عشان بانتهاء الزوم أظن مش هيكون اللينك موجود يعني، يبقى تدمن مطالعة سير الصالحين، النبي عليه الصلاة والسلام طبعا رأسهم الصحابة بعد كده وهكذا إلى أن تفضل كده دايماً.

زي ما القرآن معك صاحبك في الدنيا إلى أن تدخل القبر كذلك الصالحون هم دول اللي عايش وسطهم. واضح؟ بسرعة نراجع كده نلخص في خمس دقائق اللي قلناه، اتكلمنا عن ست عوامل من عوامل الثبات بعد رمضان، قبلهم اتكلمنا عن معنى -وده اللي هنبتدي به يعني في التلخيص- إيه معنى الثبات أصلاً؟ فاتكلمنا عن معنى الثبات ومش معناه أنك تفضل على نفس الحالة في رمضان، لأ.

طيب وبعدين دخلنا على ست عوامل من عوامل الثبات بعد رمضان، كان أول عامل صدق ودوام اللجأ إلى الله عز وجل، وكان العامل الثاني القرآن حفظاً وقراءةً وفهماً وتدبراً ومراجعةً وعملاً.

السبب الثالث كان الصحبة الصالحة، السبب الرابع كان الفرار من مواطن الفتن وكذلك من صحبة السوء، الخامس كان العلم بشقيه الدروس الوعظية والعلم الشرعي، السادس والأخير كان مطالعة سير الصالحين، وقلنا إدمن مطالعة سير الصالحين. لو في أي سؤال ممكن نجاوبه لو ما كانش فيه بقى يعني هنسيب دقيقة كده اللي عنده أي سؤال، ولو ما فيش ننهي إن شاء الله الدرس.

هو كتاب الرحيق المختوم لازم نسمع شرح ولا ممكن نقراه لوحده؟ ممكن تقراه لوحده، لكن الرحيق المختوم أنا ليه مش بنصح به؟ لأنه هو راجل مخطوط أصلاً بحس بحس واتعمل كتاب، يعني أنا دايماً بحب اللي بيبتدي حاجة زي كده يقرا شيء يمس القلب أكثر منه شيء بحثي، يعني بيتكلم عن أحداث ووقائع بالترتيب بالأحداث بكده يعني، لكن ممكن يتنقره لوحده قطع، وممكن يتقري لوحده.

السيرة الرحيق المختوم كويس؟ آه كويس، وأه وقلنا أه طيب خلاص، جزاك الله خيراً، واياك، يا رب أمين، أحبك الله. ضيعتني فيه! آه امتى الواحد بيقرا في التفسير ويوفق ما بين كل ده؟ احنا ادينا وقت يا جماعة، يعني اللي سأل السؤال وغير اللي سأل السؤال، شوف أنت بتقعد قد إظهار على الفيسبوك وأنا وأنت -يعني أنا مش بشير إلى أحد يعني- لا تشوف بتقعد قد إيه على الفيسبوك؟ أنا بقول لك الجزء هتقراه في نص ساعة في اليوم، ولو وزعتهم على الصلوات فسبع دقائق مع كل صلاة، ادي القراءة. التفسير لو اديته من وقتك عشر دقائق ربع ساعة بس في اليوم احنا مش عاوزين أكثر من كده، ففيه وقت، فيه وقت وربنا سبحانه وتعالى يبارك في الوقت، وده معنى تاني، يعني سل الله عز وجل البركة.

ماشي، طب ممكن حضرتك ترشح كتاب لسيرة أسلوبه بسيط ويمس القلب؟ قلنا هذا الحبيب للشيخ أبو بكر الجزائري. لو حد خلص صور من حياة الصحابة يقرأ بعده إيه؟ هو احنا طبعا الدرس مش هدفه أننا نقعد نرتقي، لكن ممكن صفة الصفوة لابن الجوزي، ممكن تبدأ به بعد صور من حياة الصحابة، ادخل على صفة الصفوة لابن الجوزي، هيكون مناسب إن شاء الله.

كيف نتعامل مع الشباب الذين يعكفون على التليفون ويكون هناك معاصي؟ أنا بنصح وده اللي أنا بعمله مع ولادي، طبعا أنا ولادي مش كلهم على درجة واحدة، يعني أنا من ولادي اللي شايل منه التليفون تماماً ما فيش حاجة اسمها سمارت فون خلاص، ومن ولادي اللي بنبتدي نقنن الأوقات، وفي كل الأحوال الراوتر بيتشال، يعني أنا ما ينفعش أدخل أنام والراوتر في البيت، ده ما بيحصلش عندي في البيت، ودي تجربة عملية أنا شخصياً أخوضها وأنصحكم بها.

يعني الولاد مش كلهم على درجة واحدة، منهم اللي بيعرف ينضبط لقدر، ومنهم لأ اللي بيقع كتير ويبقى فاهم ده أن بإيديه فيه كده عشان ما يبقاش كارهك ولا كاره أخوه، أو كاره أخته، أو هي كارهة أخوها أو كارهة أختها، يعني أنت وأنت اللي عملتي كده في نفسك؛ لأن احنا مرة في الثانية في الثالثة وبنكتشف مشاكل. طيب دي أول حاجة: الراوتر ما يتسابش بأي حال من الأحوال طالما الاب والام مش موجودين، الاب والام برة البيت الراوتر مش موجود، الراوتر ده هو مع الاب والام، يعني هو الثالث بتاعهم، الاب داخل ينام الراوتر بيتشال، الاب والام والأولاد في البيت فالراوتر مش في البيت أو مخبيينه أو كدة.

طيب، في برامج بتنزل كمان على التليفون بنقدر نعمل حاجتين: أننا نبقى شايفين الطفل بيعمل ايه أو الابن بيعمل ايه، والكنترول يعني نتحكم كمان في اللي يعرف يدخل عليه واللي ما يعرفش في الأوقات اللي يدخل فيها والأوقات اللي ما يدخلش، ففي برامج بتعمل ده مش في دماغي أسماء دلوقتي، لو حد في دماغه حاجة يحطها على الشات يبقى جزاك الله خيراً.

أظن ده طبعا وقبل كل ده الدعاء أنك تدعي لابنك كتير. سلسلة صور من حياة الصحابة موجودة صوتي على اليوتيوب، مش عارف -يعني مش عارف لمين- ممكن صور من حياة التابعين، ممكن مش بنفس قوة صور من حياة الصحابة طبعا، لكن ممكن صفة الصفوة لابن الجوزي جميل، عبد الرحمن رأفت الباشا هو عبد الرحمن رأفت الباشا، أنا أقصد -أنا مش عارف أنا قلت لمين يمكن أنا أخطأت- هو ده اللي أقصده، صور من حياة الصحابة لعبد الرحمن رأفت الباشا، أنا مش عارف قلت اسم خطأ أو حاجة، ده اللي أقصده. يعني كل حاجة من دول نديها وقت بسيط جداً من اليوم بس الفكرة أننا نعدي عليها يومياً تقريبا. أحسنت، جميل كده.

وتخلي لك صحبة تعينك، يعني حتى لو خليته حاجة أونلاين على زوم مع حد، يا جماعة نقعد مع بعض ربع ساعة، فكرة ناجحة جداً مع أصحابك، مش باقول لك تدور على شيخ، أصحابك عاديين، ثلاثة أربعة أصحاب هنقعد نقرا مع بعض ربع ساعة من غير هزار، هنخش ربع ساعة: السلام عليكم، وعليكم السلام، ونخلص. تطبيق فاميلي لينك: فيه واحد بيقول فيه تطبيق اسمه فاميلي لينك ده كويس جداً عشان نتابع نشاط الأولاد على التليفون. آه فاميلي لينك أدخلوا بقى دوروا على App Store ونزلوه.

هم شباب ولا يستجيبون للنصح؟ لا، ما فيش حد ما يستجيبش للنصح، لكن كل سن بيحتاج طريقة معينة وكل شخصية بتحتاج طريقة معينة، إنما كل الناس تستجيب للنصح، خلاص؟

ممكن يا شيخنا المقصود بالثبات اللي حضرتك قلته تاني؟ لأ ده كبير بقى، يعني هننزل فيديو على اليوتيوب إن شاء الله فانت ممكن تشارك على قناة اليوتيوب وأول ما الفيديو ينزل اسمعه من الأول، هتلاقيه.

يا ريت تعيد فكرة قراءة كتاب ومناقشة؟ نسأل الله الوقت بقى ويعني إن شاء الله إن شاء الله موضوع درس الشباب ده أنا مفتقده فعلاً فلعلنا نرجع إن شاء الله قريباً. طيب وجزاكم الله خيراً، السلام عليكم.