د. أحمد عبد المنعمبسم الله والصلاة والسلام على رسول الله صلى الله عليه وسلم. بإذن الله عز وجل، مجلس النهاردة مش هنستكمل سورة الأعراف، هنخرج بس كده النهاردة نتكلم بخصوص مسألة معرض الكتاب، وناس كتير بتسأل في الفترة ديت مع حلول الوقت ده سنوياً: ماذا نقرأ أو كيف نقرأ؟ وبنجد إن كتير من الاقتراحات لمسألة الكتب وده بيستثير بداخل بعض الناس: هو أنا لازم أقرأ؟ طب افرض أنا مش متعود على القراءة؟ طب بيستثير بعض الأسئلة والشكاليات.
فإحنا النهاردة هنحاول نتكلم على محاضرة بعنوان إشكاليات البناء المعرفي؛ إشكاليات بتواجه الإنسان أثناء وهو بيحاول يبني القصر المعرفي بداخله. هو محتاج يتعلم يقرأ؟ لا سيما طبعا كما هو معلوم، أول آية نزلت في كتاب الله سبحانه وتعالى: ﴿اقْرَأْ﴾ [العلق: 1]، وأن هذه القراءة أدت في آخر السورة كما جاء في سورة العلق، آخر سورة العلق: ﴿اقْرَأْ﴾، وآخرها: ﴿وَاسْجُدْ وَاقْتَرِبْ﴾ [العلق: 19]. أي أن هذه القراءة لابد أن تؤدي إلى الخضوع والاقتراب من الله سبحانه وتعالى والقرب منه سبحانه وتعالى؛ اسجد واقترب.
بعض القراءات تؤدي إلى ضلال وبعد عن الله سبحانه وتعالى، لذلك جاء أيضا في نفس السورة: ﴿كَلَّا إِنَّ الْإِنسَانَ لَيَطْغَى﴾ [العلق: 6]. فالقراءة قد تؤدي إلى طغيان الإنسان بسبب أنه يشعر أنه يعلم كل شيء، وأنه لا يحتاج إلى الله أو لا يحتاج إلى غيب، كما قال ربنا سبحانه وتعالى: ﴿وَظَنَّ أَهْلُهَا أَنَّهُمْ قَادِرُونَ عَلَيْهَا﴾ [يونس: 24]، وهُم طبعا، إحساس التمكن وإساس الطغيان قد ينشأ من القراءة. فإذا أكمل الإنسان القراءة وصل إلى آخر سورة العلق يجد قوله سبحانه وتعالى: ﴿وَاسْجُدْ وَاقْتَرِبْ﴾ [العلق: 19]، فإذاً القراءة المرتبطة والمستمدة من الوحي ويكون الوحي حاكماً على هذه القراءة. ليس معنى ذلك أنك أنت لا تقرأ أي شيء خارج الوحي أو أي حكمة خارج الوحي لا تقبلها أبداً، فالحكمة ضالة المؤمن، لكن أن تخضع هذه الحكم أو هذه القراءات لمعايير من الوحي، سواء بالقبول أو بالرد.
لكن إحنا عشان نتكلم عن الإشكاليات بحب دايماً إن إحنا نجيب الموضوع من أوله؛ ده ممكن تبقى إشكالية عندي غير إشكاليات البيان المعرفي، دي إشكالية أنا عندي أساساً، الموضوع ما بحبش نتكلم في الموضوع من النص، محتاجين نبدأ من الأول. دايماً بحب أبدأ من لحظة الخلق، يعني بس المرة دي مش هنبدأ من أول قل كده عشان وقت الدرس. إيه هي الإشكاليات اللي بتتقابلنا في القراءة؟ قبل ما نتكلم عن الإشكاليات، في إشكالية مجتمعية عامة كبيرة كمجتمع عربي، طبعا أنا بخاطب عامة الناس اللي عايشين هنا؛ المجتمع العربي للأسف بيعيش حالة من التخلف المعرفي، الاقتصادي، السياسي، العلمي اللي هيبقى تحت المعرفي، حالة عامة. هذه الحالة من التخلف الاقتصادي والتأخر الاقتصادي وبيتبعها طبعا تخلف معرفي، ومعها طبعا أو من أسبابها الأساسية تخلف سياسي وانتشار الظلم وعدم وجود يعني فرص جيدة للناس وبيئات جيدة للتعلم، كل ده بيعمل نوع من للأسف تقليل مستوى عقول الناس. ده طبيعي إن انتشار هذه الحالة بيخلي مستوى التفكير ومستوى العقول بسيط شوية، فبتجد إشكالية إن دي حالة عامة جداً؛ تبقى أول إشكالية الإشكالية المجتمعية العربية كلها على فكرة، حتى مش مش معنى إن في دول متقدمة اقتصادياً في العرب إن هي تخطت ده.
ومش معنى أنا بقول إن ده إشكالية مجتمعية إن ما فيش أفراد خرجوا من هذا القفص وكسروا هذه السلسلة مثلاً من التخلف، لو خرجوا وبنوا نفسهم لأ موجود برضه. فأن التعميم لا يعني شمول كل الأفراد، مش معنى أنا بقول إن حالة عامة إن كل الأفراد العرب هكذا أبدا، ولا يعني أيضاً إن العقل العربي ضعيف، لكن أنا بتكلم إن المستوى اللي بيتحط فيه مستوى البيئة قد تؤدي غالباً لو الإنسان لو الإنسان لم يقاوم ذلك وما عندوش جهد ذاتي للبناء والخروج من هذه الدائرة المغلقة، غالباً بيظل بداخل هذه الحالة. يبقى الإشكالية أن بتجد مثلاً نموذج زي توفيق عكاشة ممكن يعني يسيطر على كثير من العقول، النموذج ده اللي هو بيسموه في علم الاجتماع مثلاً النموذج الحاوي، ده موجود في كل الدول على فكرة مش بس عندنا في مصر، لكن هو ما بيحتاجش أنه يبقى فنان قوي زي كده توفيق يعني، ما بيحتاجش عشان يضحك على على بعض العقول لأن المستوى العربي أصلاً فيه ضعف، فصناعة هذا الحاوي ما بيكلفش كتير.
فالشاهد؛ إزاي الناس بالرغم من الظروف دي الظروف الرهيبة اللي إحنا عايشينها ديت وادت إلى حالة عامة في المجتمع العربي إزاي أن هي تبني نفسها معرفياً؟ اتضاف إلى ده إشكالية تانية؛ يبقى أول إشكالية عموم التخلف الاقتصادي السياسي العلمي، اه في إشكالية تانية أن الشعوب العربية غالباً بيتم -ودي نقطة مهمة قوي- بيتم قولبتها، يصبحوا إيه؟ قوالب، عن طريق إيه؟ عن طريق حاجتين مهمين جداً؛ يعني إزاي المجتمع كله يبقى نفس القالب؟ كأنك قطع حاجة نفس الشكل. كان الدكتور حسام ربنا يفك كربه كان بيسميه قالب البسطرمة، يقول لك شوية قوالب بسطرمة شبه بعض بالظبط. فده إزاي بيتم قولبة العقول؟ غالب العقول كلها تلاقيها بتفكر بنفس صناعة العقل الجمعي ده، إزاي الناس كلها تختار نفس الشخص وتحب بنفس الحاجة وتكره نفس الحاجة؟ إزاي يتم إن العقول كلها تبقى نفس، عارفين أنتم كأن علب مثلاً أي علب شبه بعضها، قالب البسطرمة وأنا لسه قايلها قال لها أنا ما عنديش مثال تاني، علب الجبنة الشيدر مثلاً أي حاجة متكررة شبه بعضها. فازاي يحصل هذا الشبه بالرغم من اختلاف درجات التعليم الكثيرة؟ يعني ده ممكن مستوى تعليمه عالي وده مستوى، ولكن بالرغم من ذلك تجد يعني اللي كانوا متأثرين ومقتنعين -ودي مشكلة أكبر- مش بس مقتنعين بخطاب توفيق عكاشة، كانوا من كل الفئات التعليمية، مش مثلاً طائفة معينة اللي بتسمعه لأ، يعني عندنا في الجامعة كان ممكن دكاترة جامعة بيسمعوا توفيق عكاشة، ودي كانت ظاهرة غريبة جداً، وإذا جت لحد تجد أن توفيق عكاشة اختفى، ليه؟ لأن هو بيبقى الحاوي ده له دور معين وخلاص بيأديه وبيخلص.
فالشاهد إزاي بيتم القولبة عن طريق حاجتين؟ أنا عايزكم تركزوا معي معلش، الكلام النهاردة دسم كده وفي دهون اه بسطرمة بقى كده اهو اه في السقعة كمان، فالموضوع مش نشرح سورة الأعراف. حاسس إن الناس فاصلة كده من الأول، أمَالَ لما نخش؟ أيوه كده أقلع الجاكيت وقوم.
طيب إحنا كنا بنقول إيه؟ لأ بس طول ما أنتم مش حافزين غير في السماء، أنتم جعانين ولا ايه؟ في عاملين بتستعملهم هم غالب الدول لقولبة العقول دي عن طريق حاجتين؛ الإعلام والتعليم. فالإنسان لو ساب نفسه مع الحياة كده، يدخل من أول كي جي وان كده وهو يدخل بيبدأ يدخل في مرحلة التعليم ديت، ينتتقل بقى من أول كي جي وان لغاية مرحلة الصوان اللي بيتعمل له بعد ما يموت، غالب الأجزاء دي مع إنه بيتلقف في النص، يعني هو الصبح بيروح يتعلم، وفي خلال اليوم بيتلقى الإعلام، فبتجد الناس مراحلها غالباً شبه بعضها، ما بيطلعش من ما فيش مصادر للتلقي تانية في حياته لو ساب نفسه -لو ما راحش لأي مصادر أخرى وهنتكلم عن المصادر الأخرى دلوقتي- لو هو ما عندوش جهد ذاتي، وساب نفسه مع السياق المجتمعي كده سايب نفسه عادي كده، إيه اللي هيحصل؟ هو يدخل مثلاً لازم تذاكر، لازم تنجح، لازم تشتغل، لازم تتجوز، لازم تخلف، لازم ممكن تسافر وترجع مش عارف تبني بيت، لازم لازم، بعد ما تموت تعمل صوان، ما ينفعش وأنت ميت وما تعملش صوان، أُمَّال هيتقال عليك ايه؟ فلازم هو هو نفس السيناريو، ما فيش فرصة أنه يتطيب بالليل، هو خلاص خلص شغله راجع تعبان بيقعد يشرب شاي وهو بيتفرج على توفيق عكاشة بقى، عمرو أديب، أحمد موسى، أياً كان هو بيتلقى. فخلاص فبيبدأ عقليته بتتكون نفس طريقة التفكير اللي في التعليم اللي بيتلقاها، إحنا قلنا أصلاً إن في انهيار أصلاً في مجتمعي في تخلف، فالتعليم يعني ما بيزودوش قوي ولا حاجة، وللاسف إحنا لما بنتلقى الحاجات الغربية بناخد صورها، الصورة يعني مثلاً ظهرت فكرة الجودة وإزاي الناس تاخد الجودة، إنا بناخد الصورة الورق بتاعهم، نعرف نملى ورق، فإحنا ممكن نعرف نملى ورق كويس في التعليم وترتيب ومش عارف وتربوياته، لكن القيمة نفسها التغيير فيها ضعيف قوي.
فتخيل لو واحد ساب نفسه كده للإعلام وللتعليم تجد نفس استنباط كده في التفكير. إزاي الإنسان يكسر ده؟ اللي هو أنصح ممكن يستعير مصطلح قرآني، ربنا سبحانه وتعالى قال في سورة آل عمران لما كانت أم مريم: ﴿رَبِّ إِنِّي نَذَرْتُ لَكَ مَا فِي بَطْنِي مُحَرَّرًا﴾ [آل عمران: 35]، إزاي الإنسان يبقى حر مش مستعبد للأفكار اللي عمال بيتلقاها من الإعلام والتعليم؟ إزاي يخرج من القولبة دي؟ لأن القولبة زي ما قلنا مش بس قولبة فكر أن هم نفس الأفكار، لأ ده قولبة حياة، صعب ودي من مشاكل -بس ده طبعا مش هندخل في القصة دي- من مشاكل مسألة الدولة الحديثة أن أنت شغل وظيفة خلاص اتعينت لازم مش عارف ايه، أن أنت بقيت حياتك نمطية ما تعرفش تغيرها.
حياة الإسلام أول ما بدأ؛ الإسلام دين متحرك، كان في مقال جميل قوي مش فاكراه مش متذكر الكاتب اسمه ديناميكية القرآن الكريم. الديناميكية القرآن الكريم حركة اعتمدت على آية جميلة جداً في قوله سبحانه وتعالى: ﴿أَوَمَن كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ﴾ [الأنعام: 122]. نور الإسلام نور بيمشي بيتحرك بين الناس، يعني عزلة أن وهي دي بقى فكرة العلمانية وعايز يدخل النور في دار عبادة ويقفله لأ، نور الإسلام نور متحرك، لذلك حصل الفتُوحات الإسلامية، الإسلام لا يتوقف، إسلام دين بينتشر، بيشع النور، كان في مكة حاولوا يقيدوه لأ، راح المدينة وانطلق من المدينة للعالم كله؛ ﴿تَبَارَكَ الَّذِي نَزَّلَ الْفُرْقَانَ عَلَىٰ عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]. فكان الإسلام بيتحرك، ففكرة أن أنت في قولبة لحياتك حياتك ثابتة، طب وإيه رأيك مثلاً تفكر تعمل كذا للدين؟ مش هينفع والله لأن أنا ظروفي حياتي كذا كذا كذا كذا. اه طب إيه رأيك مثلاً تتعلم أو تعمل؟ مش هينفع والله لأن أنا لي ظروف حياتي كذا كذا كذا، فبقيت حياة كل شخص وطبعا حصل الإشكالية الأكبر في التعليم مسألة فصل العلوم التجريبية عن العلوم الشرعية ودفع الناس كلها أن أولادهم وهم عايزين أولادهم يخشوا العلوم التجريبية طب هندسة، تجارة، حقوق، آداب، عايزين يخشوا ده ودي منزوع منها الشرع، فاصبح كل الناس عايزة تزق الأولاد في الاتجاه ده، والناس الأولاد بيخشوا الاتجاه ده في التعليم ما فيش شرع في حياتهم، فتقول له طب أنت هتنصر الدين إزاي؟ يقول لك هننصر الدين بالدنيا. حبيب قلبي أنت في دولة متخلفة دنيوياً أساساً، أنا مش ضد أنا مش ضد الفكرة، لكن كيفية تطبيقها إزاي؟ وتجد أن حياته في الآخر تحولت إن هو عايش لدنيته وفقط.
خلاص إن هو واحد اتخرج، اتجوز، اشتغل أو لازم يشتغل طبعا قبل ما يتجوز حتى لو اشتغل ما عادش يعرف يتجوز بس عامة يعني أن هو اتخرج، اشتغل، اتجوز، بقي خلاص وظيفة معينة، ما فيش أي فرص تيجي تقول له طب ما تطلب العلم؟ ما فيش وقت. أجيب وقت منين؟ طب ما تعمل كذا للدين؟ ما فيش وقت، ليه؟ لأن خلاص حياته بقى فيها جدران ثابتة. هو الدرس محبط بصراحة نسيت أقول لكم ده في الأول معلش. إحنا يعني بنحاول بس نفهم الإشكاليات الأول وبعد كده ربنا ييسر بقى تبقوا أنتم تحلوها.
يبقى قلنا الإشكالية الأولى عموم التخلف، بعد كده الإشكالية التانية مسألة القولبة؛ مش بس قولبة الدماغ، قولبة حياتك، تجد أن حياتك حتى أنت كنت في أي كلية هات صاحبك في كلية تانية تجد أن حياتكم شبه بعضها، حياتكم بقت شبه بعضها، أنت نفسك تنطلق في حاجة في الدين أنت خلاص حياتك بقت شبهه حتى لو كلية تانية زي ما قلتلكو نفس الفكرة لغاية فكرة الصوان في الآخر بعد ما بيموت.
طيب إزاي بقى نخرج من القولبة دي؟ إزاي؟ عشان نعرف إزاي نخرج من القولبة ديت لازم نعرف إزاي تمت؛ تمت عن طريق الإعلام والتعليم، يبقى لازم يكون لك مصدر تلقي تاني غير الإعلام والتعليم، اللي هو المفروض الشرع عمله فين؟ في المسجد، هي دي بقى فكرة المسجد وأن لازم المسجد ما يكونش تحت حد لأ وأن المساجد لله فلا تدعوا مع الله أحداً، فإنسان يأتي إلى المسجد ليتلقى دين الله، يسمع للقرآن والسنة وكلام الصحابة وكلام السلف بيسمعهم في المسجد، وده طبعا هيتعارض مع اللي بيسمعه برة فيحاول يخرج بالمعاني اللي بيسمعها في المسجد للحياة، فإذا قضيت الصلاة في صلاة الجمعة نعمل إيه؟ ﴿فَإِذَا قُضِيَتِ الصَّلَاةُ فَانْتَشِرُوا فِي الْأَرْضِ﴾ وبس كده؟ لأ وأيه؟ ﴿وَاذْكُرُوا اللَّهَ كَثِيرًا﴾ [الجمعة: 10] فانتشروا في الأرض وابتغي من فضل الله وبعد كده نعمل إيه؟ واذكروا الله، يعني ما ننساش المعاني اللي سمعناها في المسجد، ذكر ربنا اللي سمعناه نصطحبه معنا في الحياة، ودي فكرة وإن كان مش وقتها دي فكرة يوم الجمعة وسورة الجمعة عشان كده جابت اليهود اللي فصلوا ده عن ده، لأن إحنا عندنا يوم الجمعة مش كله يوم ممنوع فيه العبادة لأ.
تصور إزاي تجمع بين الدين والدنيا، أنك أنت بتمارس حياتك وبعد كده بتتوقف فترة للدين تتلقى تسمع وعظ وذكر وعلم وتصلي ركعتين، وبعدين ترجع تمارس دنيتك. اليهود والنصارى لا؛ لازم يوم كامل فصل تام. لكن التداخل ده؛ أن يبقى عندك مسجد جوه الشغل أو جنب الشغل وبتصلي وترجع، التداخل ده موجود في الإسلام.
تخيل ذلك، وذكرنا قبل كده في سورة البقرة تداخل المعاملات مع العبادات، التداخل ده؛ لأن هذا الدين عصي على العلمنة، ما ينفعش أنه ينفصل عن بعض، الآيات متداخلة متشابكة مع بعضها؛ الصلاة مع الطلاق، الصيام مع الأموال، الحج مع الجهاد. هذا التداخل مقصود، يبقى المسجد قيمته الأساسية أن الناس تسمع فيه الدين، تسمع فيه المعاني الصافية بعيدة عن تدخل البشر، أسمع في كلام الله سبحانه وتعالى.
لذلك زي ما قلنا من الآية المحورية في المساجد: ﴿وَأَنَّ الْمَسَاجِدَ لِلَّهِ فَلَا تَدْعُوا مَعَ اللَّهِ أَحَدًا﴾ [الجن: 18]. طيب، عشان ما نفصلش من بعض، احنا قلنا الإشكالية الأولى اللي بتقابلنا الحالة العامة. احنا بنتكلم النهارده عن إشكاليات البناء المعرفي، اللي عايز يقرأ. كل ده قبل ما يجاوب على سؤال: أقرأ إيه؟ لأن زي ما قلت لكم احنا في أيام المعرض ناس بتسأل: أقرأ إيه؟ فالأول بنشخص بس الوضع الحالي، عشان نعرف الإشكاليات اللي بتقابلنا وبعد كده نايه نحاول قدر المستطاع ندي... أنا مش الغرض النهارده أن أنا أقول لك أسماء كتب، وهنعرف أن اللي بينشغل بمجرد تجميع أسماء الكتب هو لسه مشخص نفسه، دي إشكالية برضه.
فالأول، أول إشكالية بتقابلنا الحالة العامة للمجتمع اللي بتخليه أصلاً مش يعني ما لوش نفس يقرأ؛ يعني كتير من الشباب يقول لك: أنا مش بعرف أقرأ، قلت له: يعني أنت أمي؟ يقول لك: لا لا، أنا بعرف أقرأ، أنا في كلية كذا، بس أنا ما لوش نفس أقرأ، ليه؟ لأن هو ما فيش يعني زهقان من هو يعني كفاية عليه دراسته، مخنوق في الدراسة، تقول له: إيه رأيك تقرأ؟ يقول لك: اصل أنا عندي مذاكرة، هو ما بيذاكرش ولا حاجة، بس هو يعني ايه عنده عنده أهم المذاكرة، مشغول ذهنياً مش مشغول حقيقة.
في الإجازة، الإجازة بقى ما هو هنقرأ في الإجازة كمان؟ ما هو ده اللي ناقص. طيب، فالإياة إيه؟ دراسة وإجازة، طب أنت خلصت واشتغلت. فزي ما قلت لكم هو إيه فكرة القراءة بتبقى بالنسبة له عبء نفسي. فبني إنسان يحبب إليه القراءة؛ فهنيه إزاي هتبني نفسك؟ إزاي هتزداد؟ وطبعا ممكن نضم نضم للقراءة السماع، ما هو ممكن دلوقتي شخص يسهل عليك كتاب معين معاني معينة يهضمها ويديها لك سهلة في السمع أيضاً مهم. الكثير أصلاً من الدروس السمعية فرغت واتعملت كتب.
فالإشكالية التانية أنك أنت لازم تخرج من الحالة العامة اللي فيها إيه؟ إحباط ونوع من العقلية المتأخرة شوية، أنت لازم تخرج من ده، أنت لازم يبقى عندك قدرة انك تخرج من ده. الحاجة التانية اللي هتقابلك أول لما تيجي تخرج من ده أنك أنت هتقابل أن الناس عقول واحدة، فانت بتتلقى الإعلام والتعليم لازم تبحث عن مصادر تانية للتلقي، المفروض بقى المسجد يؤدي ده، فالإشكالية بتحصل أن المسجد كمان يدخل يعني بيتوجه من ضمن المسجد الرسايل زي الإعلام والتعليم، يدخل ضمنهم هو كمان، وتبقى أيضاً رسايل موجهة في داخل المسجد، ودي بتبقى إشكالية كبيرة.
طيب، برضو من الحاجات في الإشكاليات اللي حصلت للمجتمع العربي الصدمة الحضارية اللي خدها. يعني إيه الصدمة الحضارية؟ يعني أنت فجأة لقيت الغرب تقدم تقدم رهيب سبقك، فانت عدت حاسس حالة، واتكلمنا عن ده في سورة الأعراف، حالة من الهزيمة النفسية. فالحل بدل ما نقعد نتكلم كتير أننا نقلدهم في كل حاجة وخلاص، فانا أقول لك: ارتباط بالوحي أو أقرأ، شوف اهل العلم المتقدمين قالوا إيه؟ أنت مش مش عايز تقرأ في المجال ده خالص، أنت عايز تشوف هم بيقولوا إيه؟ بيعظموا إيه؟ ونقرأ فيه.
فقط زي ما قلنا أنا مش الغرض أن كل اللي قادم خطأ، وهذا أمر قلته أكتر من مرة، لأ، لازم يفلتر فقط. فهما مثلاً بتمنوا تنمية بشرية يبقى احنا نقرأ تنمية بشرية، هم بيقرأوا روايات يبقى احنا نقرأ روايات، هم بيقرؤوا... احنا بنقلد وفقط، مقلدين حتى لما نجي نقرأ في العلوم اللي بتدينا أدوات للنقد مثلاً بناخدها بنفس نقده. فالصدمة دي عملت ليه؟ عملت نوع من زي ما قلت لكم الآيه؟ الهزيمة النفسية، بقى طموح الشخص اللي ما تلقاش طبعا معاني إيمانية طموحه أن هو يبقى زيهم أو يروح عندهم، ده طموحه أنه يروح يشتغل هناك أو يبقى زيهم، وده كده بيحس بحالة من الانتصار ليه؟ وكأنه خلع كده بدلة الهزيمة بتاعة العرب وراح لبس بدلة الانتصار بتاع الغرب وبقى واحد منهم، فبيشعر بنشوة الانتصار وتلاقيه بيتكلم إيه؟ أنه بقى واحد منهم، لما يروح هناك فترة يقول لك: احنا عندنا كذا، فخلاص هو إيه زيهم.
فالصدمة دي خلت في حالة من اليأس عند الناس، في حين أن المجتمع ده منهار جداً إنسانياً، اتكلمنا عن ده قبل كده في مسألة تدهور المجتمعات في قوله سبحانه وتعالى: ﴿ثُمَّ بَعَثْنَا مِن بَعْدِهِم مُّوسَى﴾ [الأعراف: 103] سورة الأعراف، مسألة المجتمع ده منهار إنسانياً، منهار على مستوى القيم الإنسانية، منهار فعلاً، ما فيش قيم أصلاً، اتكلم في مسألة ما بعد الحداثة، المجتمع ده منهار. ففكرة انك عايز تقلد وخلاص والعياذ بالله، هم يعيشون كالبهايم كالأنعام، يتمتعون، ربنا قال: يتمتعون، يعني ربنا ما نفزش أن هم يتمتعون ويأكلون كما تأكل الأنعام والنار مثوى لهم سورة محمد صلى الله عليه وسلم.
ففكرة أن انت طموحك تبقى زيهم أنت بتسير في نفس الطريق، في هذا الطريق السيء ده، مش لاقي وصف يعني يبذل لمرتبة الأنعام، هذه العزة يكسبها الإنسان من الوحي. فدي العزة عزة بالوحي، ماشي، أنا مش معنى أن أنا بعترف أن أنا مهزوم في مرحلة أن أنا أتخلى عن مبادئي، يعني هو الصحابة لما حصلت الهزيمة في أحد يبقى الصح أننا نتخلى عن الإسلام؟ فخلاص، معركة ومرحلة هزمنا فيها ننتصر في التي تليها.
طيب، يبقى زي ما قلنا من الإشكاليات اللي قابلتنا كمان الصدمة الحضارية اللي بتخلي حتى أما بيجي يقرأ عايز يقرأ كلامهم وفقط، أي حاجة تقترب منه وتشبه بكلامه. طيب، قلنا من أهم المصادر اللي المفروض تتلقى فيها وده دور المسجد أن الطفل، تخيلي الطفل، كتير من الأطفال لو سبته من أول ما يدخل كي جي وان يدخل الحضانة لغاية لما يتخرج ممكن ما ياخدش لو هو مثلاً ما فيش مدارس دي حاجات الشرعية ودي قلة، ممكن ما ياخدش فقه الصلاة على بعضه، ممكن لا يحسن الصلاة، تخيل، ممكن ما يبقاش فاهم أن في حاجة مهمة في حياتي اسمها الصلاة تعظيم قدر الصلاة وقتاً ومضموناً ويقيم الصلاة، فممكن ما ياخدش ده أصلاً، ممكن ما يسمعش عن معاني الدين ما يسمعهاش، ما يعرفش عن أسس العقيدة، ما يعرفش، يمكن ما يحفظش قرآن، مش ما يعرفش يقرأ القرآن، ولو أنت سبت الطفل بدون أن تدخل منك، توديه مثلاً مسجد يعلمه، توديه لحد يعلمه، تجيب له حاجات يسمعها، لو أنت سبت الطفل كده ممكن ما ما يقلش لغاية لما يتخرج ممكن ما يقابلش ده.
وده ما بيتقابل شباب كتير، ما سمعش حاجة عن الدين، وده أحياناً بابلقه بعض النقاشات مع الشباب اللي مثلاً بيقول يعني أن هو أياً كان ملحد أو عنده شكوك، أو تكتشف أن هو ما سمعش حاجة، يعني عنده تصورات عن الدين الإسلامي واخدها من الغرب من تشويه الغرب، يعني بيسمع عن الدين هم بيقولوا عن الدين فيه كذا وهم أعلم في كل حاجة يبقى الدين بتاعنا فعلاً فيه كذا، فدي إشكالية رهيبة من الإشكاليات.
طيب، أنا خلاص قررت أن أنا مش هسيب نفسي أبقى قالب إيه؟ أبقى قالب بسطرمة ولا قالب شيدر ولا أي حاجة، أنا قررت أن أنا أكسر ده أفتح القفص، وقررت أن أنا أخرج من الدايرة المغلقة دي، أنا مش هسيب نفسي مش هاسلم دماغي لأحمد موسى مستحيل مش مش هدي له دماغه يقعد يعبي فيها الحاجات الغريبة اللي بيقولها دي مستحيل، وفي الأول بيبقى طعمها وحش لكن بعد كده الناس بتستسغها وعادي جداً وبتقلدها.
أنا قررت أن انا أه يعني أتخلص من ده، الإشكالية اللي هتقابلك إيه بعد كده؟ أنت خلاص اقتنعت بانك لازم تتحرر من ده، سواء بقى عايز تسميه مش مهم المصطلحات على فكرة يعني سيبك من المصطلحات الكبيرة يعني، عايز تتخلص مثلاً من العقل الجمعي ده أنت عايز تبقى انت عندك يعني فهمي للدين بعيداً عن ده. الطبيعي أن كان يتم توفير ودي أكبر إشكالية بقى بتقابل المقبل، يعني خلاص في واحد مش عايز اللي عايز يتعلم دين ولا عايز يقرأ حاجة عن الدين، كفاية ظروف حياتي، بقول لك إيه أنا عايز أتخرج، عايز أتجوز أو عايز اشتغل وأتجوز، خلاص عايز أملى السي في بتاعي ومش فاضي أي حاجة بقى عن الدين، عقيدة بقى، فقه، تاريخ، علم، فكر، أي مش عايز.
في واحد مش عايز أصلاً هو يعني دايس بنزين في الطريق الدنيوي. طب اللي قرر أنه يمشي بقى من الإشكالات اللي بتقابله أنه عايز في الدين، ركزوا معايا في الحتة دي. أنتم نمتوا صح؟ ننزل حاجة ساقعة أو عصير أو كده؟ طيب ماشي، تأخريها ماشي.
طيب، احنا كنا بنقول إيه؟ جميل، واحد بس اه أول حاجة بتقابله أن هو عايز أول ما بيسألك يقول لك: خلاص أنا قررت أقرأ بس بشرط، لو قررت أتعلم الدين بس بشرط. أقول له: قل. يقول لك: أنا عايز طريق منظم تماماً زي الدنيا. أنا في الدنيا دخلت كي جي وان بعد كده دخلت ابتدائي، اعدادي، ثانوي، جامعة، أولى، تانية، تالته، رابعة، ارسم لي طريق ممهد مرتب منظم فيه واحد اتنين تلاتة، سلمة بتسلم لسلمة خطوة بتسلم لخطوة، أبقى عارف أنا رايح فين وجاي منين، ويبقى في مؤسسة بتابعني وبتعمل لي امتحانات، هو عايز المنظومة اللي بقى لها دنيوياً سنين بتتعمل عايزها تتعمل في الدين بالضبط. ما لاقهاش خلاص، هعمل إيه؟
غياب المؤسسات اللي بتنبني المعرفة والعلم، غيابها وعدم الحرص على... مش معنى الغياب الكلي، في بعض الحاجات يعني لسه فيه حاجات جيدة في الأزهر، في دار علوم، في بعض المعاهد الدعوية موجودة، لكن اللي هي تغطي احتياجات الشباب المسلم نادرة تعتبر نادراً، مع العدد الرهيب ده واتساع مصر نادرة قليلة، حتى داخل كل اسم اللي انا قلته تجد فيه بعض الإشكاليات، لكن ما فيش مشكلة ما فيش غير كده، مع بعض المساجد مع بعض الدروس.
طبعا في بقى دلوقتي ربنا كرمنا بقضية الإنترنت، وفيها حاجات كتير، ودي ميزة يعني زي ما بيبقى في إشكاليات وبتتقفل من ناحية ربنا بييسرها من ناحية تانية، أنت دلوقتي كتير من العلماء اللي ماتوا بتسمع شريطهم وبتحضر دروسهم وأنت في بيتك، كتير من أهل العلم اللي في يعني أنحاء العالم أنت بتسمع دروسهم ممكن تسمع دروسهم وأنت في بيتك. وهنتكلم في النقطة دي إن شاء الله.
فبيضاف إلى الإشكاليات غياب المؤسسات وطريقة تفكير الشاب أنه مصمم أنه مش هيمشي غير لما يلاقي المؤسسة، تقول له: ما طلبتش علم ليه؟ يقول لك: ما فيش مؤسسة بتقول لي واحد اتنين تلاتة أو كذا، وأنا مش همشي عشوائي، طب بيفضل قاعد ينتظر المؤسسة، ما بيلاقيش حاجة، ولا سيما، خد بالك، خد بالك من النقطة دي، هو منتظر مؤسسة تتبناه وتتناسب مع خطه الدنيوي اللي هو عمال يتزق فيه.
كان في درس اسمه: لماذا لا يغيرنا الموت؟ كان على تعقيب على وفاة بشمهندس أحمد زكي الله يرحمه مسألة أن الدنيا بتدفعنا لسير في طريق فريق واحد، الآن قلما ليستطيع أن هو ايه يكبح هذا السيل، أن هو يدوس فرامل. فكمان هو عايز مؤسسة تتبنى تعلمه علم شرعي وتعلمه دينه وهو بتتناسب مع حياته مش عايز يغير أي حاجة مش عايز يضحي بأي حاجة، فتزود الإشكاليات، فأصبح أن البناء المعرفي ده اللي احنا بنتكلم عنه أو البناء العلمي للأسف بنسبة كبيرة هو جهد ذاتي للأسف، وبنسبة كبيرة هو عبارة عن ايه؟ جهد ذاتي. لازم يبقى أنت عندك ذاتية أنك أنت تقوي العزيمة بتاعتك، أنك أنت اللي تقعد وتقرأ وتدور تسأل، أنت اللي تروح إنما مش... يعني تخيل كده لو واحد ما دخلش مدرسة، شوف أهلها هيعاملوه إزاي؟ شوف المجتمع هيعامله إزاي، فبيدفع دفعاً بالضغط ده أنه يخش المدرسة، لكن الواحد ما طلبش علم عادي، أنت كم من واحد من صحابك ما دخلش مدرسة؟ وكم واحد من صحابك ما طلبش علم؟ لأن ما فيش ضغط من المجتمع بيضغط الناس أنت إزاي ما تعرفش أحكام الصلاة؟ أنت إزاي ما قرأتش عن كذا؟ إزاي في غزو بيحصل للمسلمين في عقائدهم؟ إزاي الغزو الرهيب للشكوك اللي بيحصل ده وانت إزاي ما حصنتش نفسك معرفياً؟ إيه هنعمل إي يا مشاة؟ هتلاقي بيضبطها.
في حين بقى عكس ذلك، جهد منظم لنشر الشكوك، مشكلة على فكرة أن الشبهات زمان كانت بتبقى عايش شبهة، يعني لما كان واحد لما كان واحد ليبرالي، علماني، حداثي أياً كان اسمه إيه.
عايز يصرف الناس عن الدين، عايز يصرفهم عن دين ربنا، فيقوم كاتب كتاب أن عدم -يعني إيه؟- عدم حجية السنة، لأن السنة مش حجة وما لهاش قيمة، فتلاقي الكتاب أصلاً الشباب مش فاهمينه دلوقتي، يعني كتاب الشبهات ده الناس مش فاهمينه.
فدلوقتي يعملوا إيه؟ لا، تبسيط الشبهات ويعبوها في فيلم يحطها في ناس بتحب الأفلام، هنحط له مشروبات، والولاد والبنات دلوقتي بيحبوا الروايات نعبيها لهم في روايات، بيحبوا إيه تاني؟ بيحبوا بيتفرجوا، شباب كتير -مش عايز أقول أسماء عشان على الهوا- بيتفرجوا على الكارتون كتير جداً معروف شباب أقول نعمل لهم أفلام كارتون. شفت حاجات كتير معمولة في صيغة أفلام دي، أفلام الكارتون ازاي تقذف الشبهات الإلحاد، مش بس الشبهات العادية، وإيه؟ وبتناسب كل الأعمار. واللي عايز يقرأ كتاب ميليشيا الإلحاد للبمهندس المهندس عبدالله العجيري كتاب جيد جداً يعرفك إزاي في يعني هجمة رهيبة وترتيب إزاي بينشروا الشبهات حتى يعملوا كتيبات للأطفال.
يعني يخاطب كل المراحل، فأصبح أن حتى العلوم أو مش حتى الشبهات بتتبسط، والرد ما فيش بقى ناس شباب يتعلم من أهل العلم وبعدين يهضم العلم ده ويبسطه عشان ينقله لبقية الشباب عشان يحصن ضد الشبهات. لأن المشكلة دلوقتي واحد بيجي يسألك على شبهة فأنت بترد له يقول لك مش فاهم، ما هو انت مش فاهم، ما احنا محتاجين الأول يعني يعني دماغك تترتب صح الأول. ودي من الإشكالات اللي يعني موجودة بنسبة كبيرة يعني بين الملحد الغربي والملحد العربي. الملحد العربي غالباً هو مش باني الإلحاد على أي أساس أصلاً، يعني أما بتيجي تقرا كلامه، تيجي تقرا كلام الملحد ده العربي غالبهم يعني برضه مش كلهم، تجد أن كلامه متناقض وما حدش قال المنظومة دي على بعضها منهم من برة، يعني لو أنت بتستند لكلامهم كلامه أصلاً مش راكب على بعضه. لكن آه والناس بتصدق يقول لك أنا مش ممكن ده شبهات رهيبة.
يعني زي مثلاً فيلم مولانا، الشبهات اللي في فيلم مولانا ضعيفة جداً جداً فعلاً يعني، لكن أنت تستغرب إزاي الكلام الفارغ ده ممكن يأسر في بعض الناس، لأن هي ناس ما عندهاش أصلاً أي مناعة. زي ما بالضبط كده في مريض معروف يقول لك المريض ده مناعته ضعيفة، مناعته ضعيفة ده يعني ممكن أي أي ميكروب بسيط خالص يأسر فيه، ضعيف جداً، يعني ممكن الميكروب ده ما يأسرش في الأطفال، مناعة الأطفال البسيطة تقضي عليه، اللي عنده مرض في المناعة الميكروب ده يأسر فيه. فكذلك كده ما فيش أصلاً تحصين بس الناس ما تعرفش يعني إيه السنة، الناس لما بيجي لها شبهات في صحيح البخاري يقول لك صحيح، هو إزاي ييجي البخاري بعد مش عارف ميتين وشوية سنة ولا تلتماية سنة ويحطوا لنا أحاديس، إزاي يعني يعني اللي فاتوا دول ما كوش عارفين الأحاديس دي؟ وبعدين إزاي البخاري غير المسار الفقهي، ضحك على الناس وغير المسار الفقهي؟ ده إحنا عندنا المذاهب الأربعة قبل البخاري أصلاً، يعني لو إحنا شلنا البخاري المذاهب أربعة أصلاً قبل البخاري. فانت يعني هو بيقول أي حاجة.
لكن آه البخاري حط الأحاديس دي عشان يرضي الحاكم سياسياً فعشان يمشي الفقه في في اتجاه أنه يرضي الحاكم قام حاطط بقى الأحاديس دي، فانت بتستغرب هو إيه علاقة ده باللي حصل؟ إيه علاقة اللي هم بيقولوا ده باللي حصل؟ فالشبهة أصلاً هو إحنا مش عارفين يعني إيه السنة والأسانيد وعلم الجرح والتعديل وجت إزاي، إحنا ما نعرفش ده، في حين دي بديهيات ما نعرفهاش. إحنا ما نعرفش، طب أنا هقول لكم على حاجة عجيبة جداً، شاب ساكن جنبنا كان دخل على كان دخل على منتديات الشيعة داخل يرد عليهم وهو ما بيعرفش حاجة أصلاً، دي مصيبة بتحصل.
فلقيته نازل لي الفجر بيرتعش: في إيه؟ أنا عايزك دلوقتي حالاً في شبهة فظيعة عايزك ترد، قلت له خير قعدت الأول أزعق له: أنت إيه اللي دخلك يا ابني مش أنا قلت لك ما تخش؟ قال لي: بس مش وقته، في حديث في البخاري أن النبي صلى الله عليه وسلم قال له من عائشة ناوليني الخمرة من المسجد. الخمرة والمسجد؟ أقول لي: أياميها ما كانش اسمهم خمرة بالتاء دي. قال لي: كلمة خمرة موجودة، قلت له: إيه؟ خمرة؟ خمرة اللي هي زي القياس اللي بتتفرج خمرة خمرة إيه أنت يعني؟ وهو التاني عارف اللي بيرمي الشبهة، هو عارف إنه أي كلام، بس عارف أن اللي قدامه ما بيقراش أصلاً.
عادي خالص وعارف إنه ما بيقراش أساساً، هو عارف إنه هو وأي حاجة، ودائماً زي ما كان أخونا الدكتور محمد علي جزاه الله خيراً أشار في المقطع اللي نشره على الفيسبوك عن فيلم مولانا أن هو تافه، مسألة أن هو بيعتمد على فتح ملفات كتير وخلاص، اللي كان سماها الدكتور محمد أو يعني سميت الأرض المحروقة، أن هو عايز يفتح شبهات كتير فواحدة ما خبطتش التانية تصيبه خلاص، هو معتمد على قلة قراءتنا، على قلة علمنا. زي ما كتير مثلاً الغرب وأهل الباطل لما يحبوا يضربوا أهل الدين بيستعملوا نفس الخطط، ليه؟ هو واثق في جهلنا، هو يعني من أحد الأسلحة اللي بيستعملها بقوة جهلنا.
طيب، يبقى إحنا وقفنا عند نقطة أهمية الجهد الذاتي، يبقى أنا قبل ما أسأل أقرأ إيه؟ أو كيف أقرأ؟ أنا محتاج يبقى عندي عزيمة وهدف أن أنا عارف أن أنا عندي نقص معين حاد لازم أبينيه، إزاي ما أبقاش عارف عقيدتي؟ إزاي ما أبقاش عارف ديني؟ إزاي ما يبقاش محصن ضد الشبهات؟ إزاي ما أنشرش الدين؟ إزاي لا أبلغ ولو آية؟ إزاي ما أخدش مقام «نَضَّرَ اللَّهُ امْرَأً» -وجه امرئ سمع مقالته فوعاها فأداها كما سمعها- إزاي ما أخدش هذه الدعوة من النبي صلى الله عليه وسلم؟ إزاي ما أنشرش حديث النبي صلى الله عليه وسلم؟ إزاي ما أعملش ده؟ يبقى أنا لازم أزرع الوازع ده بداخلي، زي ما كان الدكتور مجدي الهلالي دائماً في كتبه مسألة الإيمان أولاً وغيره بيتكلم على أهمية زرع الوازع ده أولاً، الوازع ده لما يبقى جواك هيدفعك.
إنما فكرة أقرأ إيه؟ فاديك لستة كده ورقة زي ما حاجات كتير موجودة فيمسك مم أنا أقرأ كل ده جميل، سيف يا ابني البوست حطه في.. بس خلاص، يحس بانتشاء كده إنه عمل لايك. طيب، عشان الوقت نكمل في بقية الإشكاليات، يبقى آخر إشكاليات اتكلمنا فيها إشكالية الجهد الذاتي اللي بيتطلب من الإنسان للأسف أن هو يبقى عنده طاقة وبذل ومجهود، وده في أي شيء في الدنيا هو ينفع إنسان يقول لك أنا نفسي اشتغل شغلانة كويسة تقول له طب ده محتاج انك انت يكون معك مؤهل أو أو فخلاص يحبط؟ ما هو لو خلاص قول له أنت مش هتشتغل.
ينفع إنسان يبقى عنده همة حتى لايش؟ لدخول الجنة؟ ﴿أَلَا إنَّ سِلْعَةَ اللَّهِ غَالِيَةٌ﴾، كل شيء له ثمن، فكرة أنك تكون جند من جنود الله سبحانه وتعالى تنصر دينه بدون ما تبذل! إزاي قال النبي صلى الله عليه وسلم: «حُفَّتِ الجَنَّةُ بالمَكَارِهِ»، فلابد من السير في طريق المكاره، نعم يقذف الله عز وجل في قلب العبد الرضا أثناء السير والطمأنينة، لكن لابد من السير فيها. قالوا: لا تنفروا في الحر. في ناس مش عايزة تبذل، لو كان عرضاً قريباً وسفراً قاصداً لاتبعوك ولكن بعدت عليهم الشقة. في ناس مش عايزة تبذل أي مجهود وتودون أن غير ذات الشوكة تكون لكم، هو مش عايز أي شوك في الطريق، مش عايز يبذل، فتقول له أنت لازم هتخرج من المنظومة دي، لازم أنت تتعلم يبقى عندك جهد ذاتي.
يقول لك خلاص، اصل خلاص بلاش.. ده اللي صغَّر قضية العلم أو وفيه حاجات هي حتى لو مش الثغر بتاعك، كيف تتعلم دينك؟ أساسيات الدين بدل ما كل شوية الإنسان عمال يسأل على شبهة على شبهة على شبهة، طب ما البناء أولى، الغذاء أهم من المضاد الحيوي، طفل بيتربى بالمضادات الحيوية فقط ما بيتغذاش، يعني طفل لا يتلقى اللبن من أمه اللي هو بيغذيه وبيبنيه، واحنا هنعمل معه مضادات حيوية مضادات حيوية فقط، ده بالضبط اللي ما بيتبناش في الدين وكل شبهة هنحاول نشوف لها رد وخلاص متلصم، ما ينفعش.
أيضاً من الإشكاليات اللي بتحصل في قضية المعرفة، وده بيحصل في معرض الكتاب، عندنا مشكلتين خطورة الجمود -إنه مش عايز يقرأ ولا ينفتح- وتيه الانفتاح -يعني واحد مش عايز يسمع أي حاجة فتلاقيه عقله فيه نوع من الجمود شوية- فينزح المعرض فيفاجأ -غير الأسعار طبعا- يفاجأ بانفتاح رهيب في إيه ده! إيه كل الكتب دي؟ ومين دول؟ هو أنا إيه اللي جابني هنا؟ وحتى من غير ما يروحوا المعرض، أما بيدخل على الفيسبوك أو تويتر بيشوف كوادر كتير في اتجاهات مختلفة وقوائم كتير للكتب، بيحصل الانفتاح المفاجئ ده. وده اتكلم عنه أكثر من حد في أن هو بيؤدي لأثر عكسي، ده بيعمل أثر عكسي، خلاص هي بيبص لها كده حالة من التيه، بايزة بايزة، يقوم سايب كل حاجة، أو يدخل تايه، فكل حاجة فيها ميزة وفيها عيب.
ممكن الواحد لما يسمع كلامي ده يقول: يعني ما فيش أمل؟ أمَالَ فين الاعتصام بالله سبحانه وتعالى؟ لو أنت معتقد أنك بتمشي بطاقتك أو شيخك أو توجيهك أو الكلام ده مستحيل. ﴿وَكَيْفَ تَكْفُرُونَ وَأَنتُمْ تُتْلَى عَلَيْكُمْ آيَاتُ اللَّهِ وَفِيكُمْ رَسُولُهُ﴾، معكم منهج وفيكم والرسول معكم القدوة، يعني ربنا بيقول كيف يكفر إنسان مع منهجه قدوة؟ طيب، فكان متوقع تكملة الآية: ومن يتبع المنهج ويتبع القدوة فقد نجا، تكملة الآية إيه؟ ﴿وَمَن يَعْتَصِم بِاللَّهِ﴾.
طب ما فيش ناس كانت موجودة أيام نزول الآيات ووجود النبي صلى الله عليه وسلم وكفرت؟ قضية الاعتصام بالله أن تلجأ إليه سبحانه وتعالى وتتعزم وتبذل وتقدم أول شبر، والله عز وجل معك في الطريق. وذلك كان من الكلمات الجميلة اللي بيقولها الدكتور فريد الأنصاري في سورة الفرقان بيقول كذلك لماذا نزل القرآن مفرَّقاً؟ ليه القرآن نزل منجَّماً مفرقاً على مدار سنوات؟ فقال ربنا سبحانه وتعالى كذلك أي نزل مفرّقاً لنثبت به فؤادك. فكان في لفتة جميلة أن ربنا ما قالش في القرآن لم يقل كذلك ليثبت القرآن فؤادك تاني، ربنا قال مين اللي هيثبت؟ هو سبحانه وتعالى بالقرآن لنثبت به فؤادك.
فأنت حتى علاقتك بالقرآن فيها معية الله، أنت في طلب العلم بتنتظر المعية، في السير في الدعوة إلى الله بتنتظر المعية. ودي الإشكالية اللي بتحصل بعد كده، مسألة أن المعرفة غير الإيمان، لأن اللي بيسير في الطريق وبيقرأ ممكن يقرأ وما يحصلش الإيمان، لأن في بقى جانب بيغفل عنه الناس لما بيجي بقى بيحصل نوع من أنواع المعرفة وبيعرف -سواء بقى علم شرعي أو العلوم الفكرية المعاصرة- أن هو يحس بنوع من الاستغناء عن الإيمان، مش محتاج يسمع وعظ، يحتقر الوعظ، دي من الإشكاليات، تحس أنه مش محتاج، وممكن بعد فترة يحس أنه مش محتاج يقرأ قرآن، يعني مش محتاج إلا يعلم من خلق؟ الله عز وجل يعلم احتياج الروح والقلب في هذا الوحي، وحاجة الناس كما قال شيخ الإسلام ابن تيمية: حاجة الناس إلى الوحي أشد من احتياجهم للطعام والشراب.
فممكن واحد يعتقد أنه طالما قرأ أن إيمانه زاد، لأ، أنت محتاج دروس الوعظ، محتاج تحضر درس من دروس الوعظ الذي قد لا أحسنه، محتاج تحضر درس من دروسه، محتاج تسمع عن الجنة عن النار، تقرأ القرآن، تقوم الليل، تدعو الله عز وجل أن ينفعك بهذا العلم عشان العلم ده ما يوصلش، ﴿كَلَّا إنَّ الإنسَانَ لَيَطْغَىٰ أَن رَّآهُ اسْتَغْنَىٰ﴾، العلم ده والقراءة ما توصلش لكلا إن الإنسان يطغى المصدر أن هو مش نابع من الوحي أو الوحي لا يدل عليه، وأن غياب الإيمان تعلمنا الإيمان كما قال الصحابة ثم تعلمنا القرآن فازددنا إيمانًا. القرآن هنا العلم، تخيل أن الإيمان ثم القرآن، لذلك كان الدكتور مجدي عمل كتاب الإيمان أولاً، مهم جداً أنك تبدأ صح، أو يبقى معك طريق موازي للقراءة أياً كانت هي إيه، أنك أنت احتياجك إلى الإيمان، إلى بناء الإيمان.
أنت تشوف كده احتياجك، تحضر جنازة، تحضر غسل، تروح مكان خلوي، تسمع قرآن، تزور المقابر، تقرأ القرآن، تقوم الليل، صحبة صالحة، آه، تحضر درس وعظي، شوف أنت مداخل الإيمان إلى قلبك، محتاج دايماً بصفة مستمرة، نكون عندك يا رسول الله صلى الله عليه وسلم فتذكرنا بالجنة والنار فكأن رأي عين، فإذا ذهبنا عافسنا الأزواج وانشغلنا بالضيعات فنسينا كثيراً، قال يا حنظلة ساعة وساعة، أي لابد من ساعة الإيمان هذه في حياتك عشان تحافظ على قلبك في مشاغل الدنيا لازم يكون فيه ساعة إيمان.
طيب، إشكالية الجهد الذاتي، إشكالية الجمود والانفتاح، ودي مشكلة فعلا طبعا يصعب حلها في درس زي ده، لكن أنك أنت ما تقلدش أي حد، ومش أي حد يقترح أي حاجة تروح وراه ولا سيما أن الحياة لا تؤمن عليه الفتنة، إحنا عندنا القرآن والسنة وعندنا الصحابة والسلف ابدأ دائماً بدول، يعني اتعلم اقرأ عن الصحابة، شوف كيف كان الدين الصحابة كيف كانوا يعظمون القرآن؟ يعظمون النبي صلى الله عليه وسلم؟ لذلك يفضل في بنائك في الأول الارتباط بالقرآن وبالسنة، تفسير مثلاً لجزء عم، كتاب إشراقات قرآنية للدكتور سلمان العودة كتاب جيد، أو تسمع تفسير لجزء عم، المفصل، تبدأ بالقرآن بالمفصل.
وحاجة في شرح السنة؛ أي شرح الأربعين النووية، أي حد من علماء الثقة، شرح الشيخ ابن عثيمين، أي شرح سهل ميسر دكتور محمد يسري، أي حد، أو عندك همة شرح رياض الصالحين.
دول، ده الديدن بتاعك الأول وما يتسبش، يفضل معك، يزيد. قبل بقى ما تحط أي بناء تاني، دول القرآن والسنة قبل ما تنشغل بأي حاجة تانية، ويزداد معك؛ لأن دي الأصول والأسس اللي لو اتبنت صح تعرف يبقى عندك، تتلقى، أه لأ ده غلط ده صح، يبقى عندك إيمان ثابت وراسخ.
فانت لما بتيجي تبني نفسك، أنت محتاج تبني نفسك في هذه الأصول أولاً. لذلك اللي بيحصل أن واحد لسه بادئ مثلاً عنده عزيمة الدين والالتزام والقراية، يقوم نازل معرض الكتاب فيقابل حد من المتقدمين -يعني الإخوة الأفاضل اللي ربنا فتح عليهم من سنين- فيقول له: أجيب إيه؟ وأدي له لستة كتب، يقوم رايح جايب الكتب دي كلها، هي مش مرحلته.
فبرضو أيضاً من الإشكاليات أن سؤال ماذا أقرأ ما ينفعش يبقى إجابة عامة ليه؟ لان أنا محتاج أفهم ثغري. أمال امتى ينفع يبقى إجابة عامة؟ في الحاجات اللي ربنا قال إن هي فيها عموم زي القرآن والسنة كده، في عمومات تنفع لكل الناس.
زي المفصل من القرآن. المفصل اللي هو منين لفين؟ من ق إلى الناس. طبعا وفي خلاف ما بين أهل العلم، من ق ولا من الحجرات ولا، لكن الغالب من ق إلى الناس اللي هي فيها كثيرة الآيات والتفصيل والجنة والنار والدار الآخرة. مهم جداً، وللأسف كتير من الناس عنده نوع من العزوف، يعني يقول لك أنا لسه أسمع عن الجنة والنار، يعني حاسس أن هي حاجة.
وتقرأ مثلاً كتاب زي رياض الصالحين أو أي شرح مبسط لرياض الصالحين اللي كان يعني ده في فضائل وآاداب. طب ما هو أنت محتاج هذه الفضائل، ما تقدرش تدخل الجنة، هو أنت هدفك ليه من القراية؟
وبعد كده، بعد ما يحط الأسس دي، في بقى حاجة اسمها البناء الشرعي، وبعد كده البناء المعرفي. مش لازم بعد كده ما بيخلصش الشرع يدخل في معرفة، لأ، بيتمشوا بالتوازي، ممكن يمشي بالتوازي.
لذلك مثلاً لما كنت كتبت حاجة عن النهارده عن إيه الكتب اللي ممكن الإنسان يقرأها لا أقصد منها اللي هو الفقه والعقيدة، ده البناء الشرعي. ده أنت بتسمع سلسلة مبسطة في العقيدة أو تقرأ كتاب زي كتاب الأشقر في العقيدة.
كتاب يعني هو كبير شوية بالنسبة للمبتدئ، لكن مبسط، العقيدة في الله، اليوم الآخر، القيامة الصغرى، القيامة الكبرى، الملائكة، الجن، الجنة، النار. تقرأ حاجة نظرة عامة، هي دي العقيدة، عقيدة مبسطة. أو تسمع أي سلسلة في ضوابط العقيدة.
أي حد من أهل العلم بتثق فيه، وبتسمع أي شرح لكتاب مثلاً زي الفقه الميسر، أنت كده بتبني نفسك في العلم الشرعي، العقيدة والفقه. وبعد كده بتقرأ حاجات تبقى أنت فاهم إيه اللي بيحصل حواليك.
هل كل واحد فينا مشترط أنه يعمل كده؟ أبداً، كل واحد بيكتفي بالأصول، بيحضر لحد، بيثق في حد، بيسأله. ما فيش مشكلة؛ لأن هو له ثغر تاني في الأعمال الخيرية.
هو يتحرك في الدعوة إلى الله، يقابل الشباب، يكلمهم عن ربنا. ما فيش مشكلة. لكن في حد معين اللي بعض أهل العلم حاول يصيغها بمصطلح ما لا يسع المسلم جهله.
بحيث ده الحد. حقق محاولات أكتر من محاولة عملها أكتر من حد؛ أن يجيب حاجة كده كتاب أن ده تبصرة المؤمن، أو ده كتاب منهاج المسلم، أو ده كتاب ما لا يسع المسلم جهله، أن في حد معين ما ينفعش ينزل الإنسان عنه.
ما ينفعش في غياب التعليم، في غياب الإعلام اللي بيدعم ده، أو في قلته ومحاربته، فانت لازم أما تيجي تبني نفسك ما ينفعش تنتقل من الصفر فجأة تقوم قارئ كتاب في الفلسفة مباشرة، وتقوم ادي شبهة في علم الحديث، وجاي كتاب متقدم في الرد على الشبهة دي، أنت أصلاً ما فيش حتى الأصول.
يقول لك: أصل أنا لازم أقتنع الأول! طب ما هو ما فيش مشكلة أنك تقتنع، ما هو يعني واحد في أولى طب وبينتقد عملية معينة جراحية، طب ما هو أنت أصلاً المصطلحات اللي هشرح لك بيها أنت ما خدتهاش.
فدي إشكالية بتصل. يبقى مسألة أنك قبل ما تختار الطريق ده عشان ما تقعدش تحبط، عشان لما تروح تتفرج على الكتب أنت كده كده مش هتشتري -احنا قلنا الكتب غالية عامة- بس عشان لما تروح أو عايز عشان ما تحبطش، أنت ممكن ده ما يكونش ثغرك البناء المعرفي القوي ده، ممكن ده ما يكونش ثغرك، أنت بتستشير الخبرة، أهل الخبرة من حواليك.
وما تخليش برضو أن ده يقول لك: آه، أصل ده مش ثغري، فكل الناس تقول خلاص أنا مش هبني نفسي، وهو يكون كسل. احنا قلنا في حد معين لازم تبني نفسك فيه.
أيضاً بعد فترة من السير بتجتاج تعرف تخصصك أو هتركز في حاجة عشان تبني نفسك فيها، أنت مثلاً تركز في قضايا فكرية، في الفقه، في العقيدة، التفسير، بحيث أنك أنت تبقى ماشي منظم، بحيث أنك بعد فترة لو أنت عندك الإيمان والعزيمة يبقى أنت سديت علينا حاجة، سديت ثغر من كل الثغور المفتوحة.
خلاص، بقينا فلان بنحيل على فلان في الرد على شبهة كذا، فلان في تحفيز الأطفال، فلان في تعليم الناس الدين، فلان في مسائل الفقه البيوع، في فقه المواريث، فلان في ضبط عقائد الناس، فلان... لكن للاسف الناس كإبل مائة لا تكاد أو لا تجد فيها راحلة.
ما فيش حد عايز يشيل. حتى يصبح الإنسان راحلة. طريق الإنسان يسير فيه، طريق مليء بالبذل والتضحيات، يحتاج الإنسان أن يعرف قيمة هذا الطريق وأن يضحي ليبذل نصر دين الله عز وجل.
فلما يجي واحد يتمنى أماني مش عايز يبذل لها، خلاص، أنت مش، أماني فقط، عنده أمنيات لنصرة الدين دون أن يبذل. طب إزاي هتبذل؟ إزاي هترد مع سيل الشبهات الرهيب وتعرّض شباب بصدورهم عارية، فبيصاب، تأتي الشبهة في قلبه نسأل الله السلامة، بأن هو مش عايز يبذل.
ممكن يكون الحماس والعاطفة أعلى عنده من البذل؛ لأن المشكلة أن أحياناً الإنسان ما بيبقاش لم يكن ليتصور طبيعة الطريق، هو عنده حماس أنه ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ﴾ [النساء: 77].
كفوا أيديكم يعني جم في مرحلة في مكة نفسهم يجاهدوا، لكن كان ممنوع: كفوا أيديكم. شف الحماس في الطلب في مكة، حماس وعاطفة، فلما كتب عليهم القتال لما انتقل بقى إلى المدينة حصل لها من الاستقرار، رفض ده ﴿فَإِذَا فَرِيقٌ مِّنْهُم يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً﴾ [النساء: 77].
قال له ربنا: لما كتب علينا القتال؟ أحياناً الإنسان آل سورة آل عمران آية آي... اللي هي أولها ولقد كنت آي... خير، ﴿لَقَدْ كُنتُمْ تَمَنَّوْنَ الْمَوْتَ مِن قَبْلِ أَن تَلْقَوْهُ﴾ [آل عمران: 143]. فانت تخيل، في ناس تمنت الموت، لكن لما رأيت الموت، لأنه ما كانش متصور طبيعة الطريق، هي عاطفة.
يقول لك: إزاي يطعنوا في السنة؟ إزاي كذا؟ لازم ندافع عن سنة النبي صلى الله عليه وسلم. طيب، ما هو أنت عشان الدفاع يكون قوي أنت لازم تكون مؤهل. طب خد الطريق ده! لا لا، السنة أكيد ربنا هيقيض لها رجال، مش ده مش ثغري!
فأيه ثغرك حضرتك؟ أنا هشوف أهو! وبعدين بيخفي، الدين يحتاج، أو نحن نحتاج لنصرة الدين، الكلمة المشهورة: ياله من دين لو أن له رجال.
الوقت للأسف يعني انتهى، كنت عايز أتكلم على تصورات عامة ممكن درس آخر إن شاء الله، إيه الأصول العامة اللي ممكن الإنسان يبني نفسه فيها؟ زي قضية الكليات العامة.
اتكلمنا سريعا مسألة القرآن والسنة، العلم الشرعي الفقه والعقيدة كبدايات، وبعد فترة بقى ياخد اللغة، والمصطلح واللغة مهمة جداً، وبعد حاجات في الواقع. نحاول إن شاء الله لله عز وجل نعمل درس في حاجة زي كده، أو ممكن نكتب حاجات اقتراحات إيه اللي الإنسان ممكن يبدأ فيه.
لكن أهم من ده كله الوازع اللي هيخليك بإذن الله عز وجل، العزيمة والصدق والبحث. هتوصل. كتير من الناس اللي أنت شايفهم على فكرة ما كانش معهم ورقة بمنهج وماشيين بها.
كتير من اللي أنت شايفهم وبتخبطهم وتتمنى أن تكون مثلهم، راح أسأل كتير منهم -مش هقول الكل يعني- لكن راح أسأل كتير منهم، قل له: هات لي كده المنهج اللي الناس اللي ادوه لك ومشيت عليه، يقول لك: إيه؟!
طب إزاي؟ لقذف الله في قلبي حب ذلك، بحث كذا ثم كذا. أنت بتستشعر وهو بيحكي معية الله! استشعر معية الله! إزاي ينتقل من هنا لهنا؟ وإزاي فتح عليه الباب ده؟ وإزاي ربنا جاب له الثغر ده؟ وإزاي أنه كان صادق وبذل في نصرة هذا الدين وأعطى وقت ومجهود؟
وقت ومجهود، دي إجابة أسئلة كتير. إزاي نتدبر القرآن؟ طب أنت هتدي وقت ومجهود؟ يعني هتديني وقت فاضي وعندك ساعتين تبذل مجهود؟ إزاي ندافع عن السنة؟ إزاي؟ وقت ومجهود لازم بيضاف زي ما قلنا بقى، استعبر كل الإشكاليات اللي فاتت.
طب أنت هتجيب وقت منين؟ ما هو أنت لازم تضحي، لازم تبذل. أسأل الله عز وجل أن يستعملنا لنصرة دينه، وأن يجعلنا من جنده الذين يدافعون عن دينه، وأن يرفعنا في جنة الفردوس، وأن يرزقنا حسن الخاتمة.
أقول قولي هذا، واستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك.