الشيخ أمجد سميربسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم، إنك حميد مجيد.
أما بعد، المجلس الرابع من مجالس شرح حديث أم زرع، وكنا وصلنا للخامسة: قالت: «زوجي إذا دخل فهد، وإن خرج أسد، ولا يسأل عما عهد» وفي رواية خارج الصحيح: «ولا يرفع ليوم لغد». واتكلمنا عن ثلاث معاني في هذا الجزء يعني على المدح، وقلنا يبقى معنى واحد على الذم في قولها؛ يعني احنا قلنا المرأة دي اختلف العلماء فيها، لو تفتكروا، هي مدحت الزوج ولا ذمت الزوج؟ لو قلنا إنها مدحت الزوج، فتكلمنا عن معاني، حد فاكر حاجة؟ طيب، ها، «إذا دخل فهد»، إيه المعنى؟ ها، التغافل، احسنتم، وده كان معنى اتكلمنا فيه كتير، يعني التغافل. المعنى التاني؟ إيه؟ كسيب، آه، إنه كسيب. المعنى التالت؟ إوه، الجماع، على معنى الجماع على المدح بقى، وده اتكلمنا فيه خلاص.
يبقى المعنى الواحد لو كانت تذم الزوج، وهو أيضاً على الجماع، لكن على وجه الذم بقى: «زوجي إذا دخل فهد» يعني إنه إما إنه يكون مع تعنيفه لها يجامعها، أو إنه لا يعطيها حقها في الجماع، ماشي؟ وهذا على الذم، والحقيقه المعنى ده هو معنى أيضاً يهدم بيوتاً، وأشكاله في أنه من المعاني التي ربما تحيي منها، يعني ممكن المرأة لا تستطيع أن تتكلم في هذا المعنى أو الرجل، يعني هذا المعنى قد يضر بالرجل وقد يضر بالمراه. حسبنا هنا إن احنا نشير إلى موطن واحد من كتاب المغني لابن قدامه رحمه الله، يقول: ويستحب أن يلالاعب امراته قبل الجماع لتنهض شهوتها، فننال من لذة الجماع مثل ما ناله، يعني الرجل.
وقد روي عن عمر بن عبد العزيز عن النبي صلى الله عليه وسلم أنه قال: «لا تواقعها إلا وقد أتاها من الشهوة مثل ما أتاك، لكي لا تسبقها بالفراغ»، قلت: وذلك لي؟ أو وذلك إلي؟ يعني هو دي بتاعتي يعني؟ قال: يعني النبي صلى الله عليه وسلم: «نعم، انك تقبلها وتغمز وتلمز، فإذا رأيت أنه قد جاءها مثل ما جاءك واقعتها». ابن قدامه بيعلق بيقول: فإن فرغ قبلها كره له النزع حتى تفرغ، لما روي أو لما روى أنس بن مالك قال: قال رسول الله صلى الله عليه وسلم: «إذا جمع الرجل أهله فليصدقها، ثم إذا قضى -ثم إذا قضى- حاجته فلا يعجلها حتى تقضي حاجتها». ولأن ابن قدامه بيعلق: ولأن في ذلك ضرراً عليها، ومنعاً لها من قضاء شهوتها، فهذا الموطن مما ينبغي أن يتفطن له الرجال، الرجال خاصة، وكذلك النساء يتفطن لهذا الموطن أن تعطي الزوجة حقها في هذا الأمر.
لأن، كما أسلفت في مواطن يا شباب، قد يستحي، هيجيلنا كمان شوية موطن آخر في قول إحداهن: «زوجي المس مس أرنب، والريح ريح زرنب». مواطن ممكن المرأة تستحي أن تتكلم فيها، وتكون هي مما يهدم البيت فعلاً، ماشي؟ ممكن المرأة تقعد بعد كده تلاقيها بتتلكك على أبسط حاجات، والإشكال مش هنا خالص، وتبقى أنت ما أنتش مستوعب، يعني دي حاجة بسيطة، يعني هي ليه، هي ليه بتطلب طلاق على حاجة هايفة زي دي؟ ويكون المعاني معاني أخرى، سواء ده أو غيره، يعني احنا هنتكلم بعد شوية على النظافة الشخصية، يعني في في قوله: «المس مس أرنب، والريح ريح زرنب» إن شاء الله معاني المرأة بالذات لو خارجة من بيت ومؤدبة ممكن ما تعرفش تتكلم في الحاجات دي، وتبقى إياها ومش عارف، أو الرجل العكس، يعني احنا ما بنتكلمش على المرأة خصوصاً، الرجل كمان ممكن يبقى حاجة زي كده أنه ما يعرفش يتكلم، ولذلك في الحديث: «لا يسال الرجل فيما ضرب امراته» من المعاني التي ذكرت في هذا الحديث أنه ربما ضربها لامر يتعلق بالجماع، وإذا سئل لن يقول، وهيحرج، أنت يعني تضربها كده بمزاجك؟ وهو مش عارف يتكلم، يعني بيصون سر امراته سر بيته، لأن المفروض الراجل يبقى كده.
أنتم عارفين من فوائد هذا الحديث ابن حجر ذكرها بعد يعني نهاية الحديث، قال: إن معظم مجالس النساء عن الرجال، الرجال مش كده، واحنا قلنا الكلام ده قبل كده، الراجل ما تلاقوهوش كده، يعني الرجال بيبقوا مع بعض، مش الطبيعي في الرجال أنه بيتكلموا عن نسائهم، ده مش الطبيعي في الرجاله أبداً، بخلاف النساء، آه، النساء ممكن عادي جداً يقعدوا يتكلموا عن أزواجهم سواء بقى بالحق أو بالباطل، دي قضية تانية، إنما ما يتورعوا، يعني النساء، أنهم يتكلموا عن الأزواج. رجل في العادة مش كده، يعني معظم مجالس الرجال يتكلموا عن عن المعاش، عن الدنيا، عن الأحوال، كده، ما يجيبوش سيرة النساء، نسائهم يعني، فهذا مما يعني يقبح بالرجل، والرجل يعني لا يفعله، لا يفعله، حتى رؤي عن أحد السلف أنه حصلت مشكلة مع امراته، وبعدين، طيب مالها؟ فقال لهم إيه: أفيش سر امراتي؟ أتكلم عن امراتي؟ وبعد شوية طلقها، فقالوا له: ديك طلقتها بقى، كان في إيه؟ قال لهم: مالي ومراتي غيري؟ خلاص، هي مش مراتي، تبقى امرات واحد تاني، أنا مالي بيها؟ خلاص خلصت.
فالرجل ذو المروءة كده، يعني ممكن يبقى في الطلاق ويركب هو الغلط لمجرد أنه مش عاوز يفشي أسرار، ولا يرى ضرراً في ذلك أن الناس تغلطه، يقول: ما أنا غلطان، أنا هطلق وأنا غلطان، ما فيش مشكلة هذا الرجل، ماشي؟ بخلاف الست، يعني الست في الطلاق، في مجلس الطلاق، هتقول اللي حصل واللي ما حصلش، هتقول اللي حصل واللي ما حصلش، يعني وتفتري، وكده، ده طبيعة الست، يعني طبيعة الست كده، خلاص، ممكن طبعا ده يتخلف في بعض؟ آه، ممكن، يعني الست تبقى أعقل من الرجل، ممكن، يعني مش قضية، إنما ده الطبيعي، الرجل يقعد ساكت وما يتكلمش كتير، زي ما بقول لكم، حتى لو طلع هو اللي غلطان في القعدة، يتحمل ده على أنه يفضح المرأة أو يذكر شيئاً فيها يشينها، المفروض يعني بقى الرجاله كده، المفروض.
المهم قالت: «زوجي إذا دخل فهد» يعني على هذه بقى الصفة المذمومة، أنه لا يراعي المرأة في الجماع، خلاص، هو يقضي وطره ويقضي شهوته، وده اللي يهمه، وكثير من الرجال على هذه الصفة. قالت: «وإن خرج أسد» على بقى وجه الذم، يبقى إيه؟ إنه إذا خرج فهو أشد بطشاً وأشد إجراماً وأشد ظلماً، وهو في البيت كده، ولما يخرج برضه كده. وطبعا المعنى الأول اللي قلناه برضه على الذم، أن إيه؟ يكون بقى بيضربها ويهينها، وبعدين إيه؟ يطلبها للجماع، وهنا في حديث في المسألة دي بعينها: «لا يجلد أحدكم امراته جلد البعير، ثم هو يجامعها». طيب، ما بالنهار بتشتم وتهزيق، وبالليل عاوز حقك الشرعي؟ طيب، أين نفسية المرأة؟ لا، ما فيش نفسية ولا حاجة، ودي ودي أسئلة بتيجي كتير برضه من النساء، للاسف، أن الزوج صعب جداً في طباعه وشتيمه وتهزيق، وتصل إلى الضرب، وبعدين يسال حقه الشرعي. طبعا احنا للأسف بنقول إيه؟ المرأة أما أن بقى ترفع المظلمه دي لوليها أبوها ولا أخوها، ويجي يقعد يحل الموضوع ده، أو تطلب الطلاق، تطلب الطلاق، إنما لا هينفع هي تعيش معاك كده.
طبعاً أنا جالي يعني سؤال والله يا جماعه هذا حدث، واحد بيسال، احنا طبعا لو احنا في مسألة كده في باب الجنايات، أنه لو واحد جنى على عقل انسان، يدفع ديه كاملة، ماشي، ضربه لغاية ما ذهب عقله، أجن ولا حصل؟ يدفع الدية كاملة. السؤال بقى جاي إيه؟ أن رجل جنن مراته! جنن فعلاً! يعني الأطباء، خلاص دي اتجننت، بس مش بضرب، على مدار السنين، حبس وشتيمه وتهزيق وظلم ومنع من زيارة، إلا كل حاجة عملها، فعلى مدار السنين اتجننت! دعكم بقى، إلا قال من المسألة الفقهية، بس شوفوا الموضوع بيوصل لفين! فليه، طيب ليه؟ ما انت سبحان الله في ربنا سبحانه وتعالى في يوم القيامة كثير من الرجال للأسف لا يتورع، هو خلاص شايف أن معاه القوة، معاه السلطة، ما فيش، بالذات لو البنت ما لهاش اللي يقف له، يتمادى ويظلم، في في إيه؟ ﴿إِنَّ اللَّهَ كَانَ عَلِيًّا كَبِيرًا﴾ [النساء: 34]. إيه، إيه، إيه الآية؟ آه، ﴿فَلَا تَبْغُوا عَلَيْهِنَّ سَبِيلًا إِنَّ اللَّهَ كَانَ عَلِيًّا كَبِيرًا﴾. شوفوا الختم ده، ماشي؟ ﴿إِنَّ اللَّهَ كَانَ عَلِيًّا كَبِيرًا﴾. ربنا سبحانه وتعالى أعلى منك وأكبر منك وأعظم منك، فما تظلمش.
«وإن خرج أسد» يعني هو أشد ظلماً وتجبر وتجبر خارج البيت، ولا يسأل عما عهد. كنتم فاكرين احنا قلنا دي ممكن تيجي على المدح؟ لا يسأل عما عهد، يعني إيه؟ لو كان قال حاجة في البيت تتعمل، ما تعملش، بيكبر دماغه، يعني ما بيدققش قوي، أو لو جاب حاجة في البيت للأكل للشرب برضه بيكبر دماغه، ما بيدققش قوي، الحاجة دي راحت فين؟ لأن ممكن الست تبقى عاوزة تهدي أهلها منها مثلاً ولا شيء، فلا يسأل عما عهد. لو على الذم بقى، ولا يسأل عما عهد، يعني يبقى عارف أن في مشكلة في البيت، أو عارف أن أنا تعبانة، أو عارف أن في مشكلة بيني وبين مش عارف مين، ولا أكنه معانا! وهذا أيضاً لا ينبغي أن يفعله الرجل، بل الرجل مسؤول عن هذه المشاكل، بالذات لو في بيته.
أنا في واحد من من أصدقائي يعني فكان بيتكلم عن التعدد، فانا بقول له يعني العصر اللي احنا عايشين فيه ده يعني الواحد فاتح بيته وشايل مسؤولية بيته، صعب جداً أن هو يعرف يعمل ده في بيتين ولا ثلاثة، فهو رد عليا رد جميل جداً، قال لي: لا، أنا البيت عندي لوكندا، وادخل أنام وأصحى أنزل، قال كده، يعني هذا اللفظ الذي قاله لي! طيب، مشاكل ولادك؟ طيب، مشاكل زوجتك؟ طيب، مشاكل؟ ما فيش، هو البيت لوكندا، يدخل ينام ويصحى ينزل من البيت، وشكرا على كده! هو ده البيت بالنسبه له، لا يسأل عما عهد! فهذا أيضاً مما يذم في الرجال، بل من تمام قوامتك أنك تبقى بتلحل مشاكل بيتك، تبقى عارف مشاكل ولادك، تبقى عارف مشاكل زوجتك، مش حاجة عارف أن هي موجودة ومكبر دماغك، لا يسأل عما عهد.
قالت السادسة، طبعا احنا السادسة احنا قلناها: زوجي إذا أكل لف، وإذا شرب اشتف، وإذا اضجع التف، ولا يولج الكف ليعلم البث. دي قلناها قبل كده، لكن «ولا يولج الكف ليعلم البث» فيه معنى احنا ما قلناهوش، لان ده بقى مكانه، نفس المعنى لسه قايلينه، «ولا يولج الكف ليعلم البث». عارفين لما تقول إيه: فلان إيده في الموضوع؟ إيده في الموضوع، يعني إيه؟ يعني مركز في الموضوع، مش كده؟ فلان شايل إيده خالص من الموضوع، هو ده على على هذا المعنى. احنا طبعا قلنا له معنى تاني قبل كده، إنما من المعاني التي ذكرت هنا، طبعا ده كان على الذم، أنه لا يولج الكف ليعلم البث، يعني شايل إيده من الموضوع، فمش حاطط إيده في البيت، فلا عارف مشاكلي ولا عارف مشاكل عياله، لا يولج الكف ليعلم البث.
قالت السابعة: «زوجي عياياء» أو «غياياء»، طبقاً، كل داء له داء، «شج أو فلك أو جمع كلاً لك»، دي رواية الصحيح. خارج عيا، في روايات هنقولها بقى بعد شوية، زوجي عياياء، يعني من العي، والمقصود به هنا العي أن هو لا يستطيع وقاع المرأة، يعني من مسألة العجز الجنسي، عياياء من العي، وهذا أيضاً مما يذم به الرجل، واحنا يمكن قلنا معنى هنا قبل كده، وده نعيده لأنه مهم جداً يا شباب، بالذات الشباب الصغير بقى كمان، يعني ده مش للمتجوزين ولا اللي قربوا يتجوزوا، لا، الشباب الصغير البالغ. كنا قلنا في درس الاباحية قبل كده، واحنا هنذكر هنا دلوقتي، لأنه معنى منتشر للأسف الشديد، الشباب ببتدي يتفرج على الاباحية، ويظن أن المسألة دي تنتهي بمجرد الزواج، والامر مش كده، على خلاف ما تظنون يا شباب، وهيواجهك مشكلة أكبر، وهي اللي معانا دلوقتي. كتير من مشاكل إتيان الرجل للمرأة بسبب هذه الاباحية المنتشرة، الأطباء بيقولوا أن كتير من الحالات اللي بتجيلهم أن الرجل اصلا لا يشتهي المرأة، ليه؟
هو بقى له 10 سنين، 15 سنة، زي ما تقول بقى قول، في دايرة أنه لا يصار إلا وهو في وضع المتفرج، هو لا يصار إلا بهذا، وفي أجواء خاصة، وكذا وكذا، فيفاجأ أنه لا، ده مطلوب منه شيء آخر، فيجد نفسه حينها لا يطيق ذلك، ومشاكل كتير بتروح. الكلام ده مش كلام أنا، ده كلام أطباء، يعني أطباء بيجيلهم الحالات دي في العيادات، العلاج مش موضوع جسدي، مش موضوع، لا، هو موضوع نفسي، هو موضوع أن هو نفسه لا تهيأ لهذا إلا على النحو الذي درب نفسه عليه بقى له سنين، هو كده، وفاكر أنه وقت لما يتزوج هيلاقي الموضوع سهل أو بسيط، الموضوع ما بيبقاش كده، بيبقاش بالعكس تماماً، خلاص. زوجي عياياء، أو غياياء، طبقاً، يعني من الغي، والغيياء طبقاً الذي انطبق عليه أمره. عارفين كده لما نقول احنا في العامية إيه: ده راجل قفل، راجل قفل! فدي فيها معنيين طبعا.
واضح المرأة دي إيه يعني بتذم يعني مش محتاجين نقول فيها معاني، المعنى الأول إنه راجل ما بيتفهمش، راجل قفل ما بيتفهمش، ويدل على هذا المعنى ما يأتي بعد. قالت إيه؟ شجك، أو فلك، أو جمع كلا لك، شجك يعني ضربك في رأسك فيفتحها، أو فلك يعني يضربك في جسمك فيفتح جسمك. في رواية خارج الصحيح أو بجكي، بجكي يعني يبقى في جراحة قديمة هو عارف إن عندك جراحة في الحته دي منه يقوم يتعمد يضربك فيها تاني عشان تتفتح تاني. في رواية أيضاً خارج الصحيح: إذا حدثته سبك، وإذا مازحتك فلك.
يعني مجرد ما تكلميه يشتم، طب اتجرات بقى وقلت نهزر يعور، فلك يعني يضربك في جسمك يعور. والا طب سكت، جمع كلا لك يعني إيه؟ طب سكت، هتتشتم وتضربي في رأسك وفي جسمك وفي جراحاتك، كله هيحصل. أنت ساكتة ليه؟ طب تتكلمي تشتمي، طب تهزري تضربي، راجل طبقة قفل.
واضح وطبعاً هذا من أسوأ الرجال عشرة، المرأة تحيا ليه مع واحد زي ده؟ بعض النساء تقول عشان الأولاد، هيروحوا فين وهيجوا منين؟ ودي بيئة ما يطلعش فيها أولاد أسوياء أصلاً واضح. وبعدين الخطاب الآن للرجال، أنت ليه توصل إن تبقى زوجتك اللي هي أقرب الناس ليك عايشة معاك بالأكل ليه يعني؟ يعني أنت كده استفدت إيه يعني؟ استفدت إيه من كده؟
وببعض النساء عشان عارفة طبع جوزها إنه لو طلقني طلق العيال معايا، وده أكثر المشاكل بين اللي بتيجي بعد الطلاق إن الراجل طلق الست وطلق عياله مع الست، ماشي. وتيجي للراجل بقى الفلسفة العوجاء يقولك إيه ما هي اللي عملت، ما هي خليها بقى تشيلهم، خليها تصرف، ده فين الكلام ده؟ أنت ستسأل عن ذلك أمام الله عز وجل، فتفضل عايشة بهذا ليه؟ لمجرد أن عيالها حياتهم تستقيم؟ طيب أنت مسؤول عن ذلك، كلكم راع وكلكم مسؤول عن رعيته، فأنت ستسأل عن ذلك ولن تمر بها من بين يدي الله عز وجل يوم القيامة، ليه؟ لأنها إيه مش حق ربنا؟ مش ديه حقوق العباد؟ هذا الديوان الذي لا يغفر الله عز وجل منه شيئاً، لا يترك منه شيئاً، الدواوين ثلاثة منها ديوان كده يوم القيامة ما فيش حاجة هتتساب فيه، اللي هو ديوان إيه بقى؟ اللي بينك وبين العباد.
فأنت ظالم لزوجتك، ظالم لأولادك اللي هم أقرب الناس إليك، فضلاً أو يعني حتى لو ظلمت البعيد لكن دول الأقرب، يعني دول الأهم كمان، في مش هيحصل إنك هتمر بيها كده، مش هيحصل، واضح.
إذا أحد أو طبقة يعني انطبق عليه أمره، يعني لا تكاد تجد يجد له قولاً سديداً رشيداً في أمر. وبرضو هذا مما يذم به الرجل، لأن الرجل المفروض هو إيه اللي قائد أو تلك السفينة أو تلك المركبة يعني، فلما يبقى الراجل سفيه ما بيعرفش ياخد قرارات صائبة، وللاسف أن هذه القرارات مش بتعود عليه هو لوحده بالمشكلة، لأنه خلا هو القرار اللي باخده النهارده هيعود عليه وعلى زوجته وعلى أولاده والست تبقى شايفه ده وعماله تهري وتنكد في نفسها وهو ولا هو هنا.
عشان كده كنا كل مرة يا شباب نجي نتكلم على المسألة دي دائماً نعدل كفة الميزان، نقولك إيه يعني بينفق، بيقولك، وبعدين أرجع أقولك إيه بس مش انك تنفق بسفه وتيجي بعد كده طب مصاريف المدارس؟ ما فيش مصاريف مدارس؟ في رجال كده ممكن ياخد عياله وينزل يفسح فسحة يصرف قد كده، وبعد يومين عليه قسط مش عارف المدرسة، محوش فلوس مثلاً. طب يا ابن الحلال ما كنت شيل المصاريف دي في مدرسة، يمد إيده بقى، فهذا من قصر نظر الرجل الحقيقة.
في هنا أثر لعمر جميل جداً في هذه المساله، قال عمر رضي الله عنه: الرجال ثلاثة: رجل عفيف مسلم عاقل يأتمر في الأمور إذا أقبلت وتشبهت، والأمور جاية عليه هو شايفها من بعيد فيأخذ حذره لها ويأخذ أهبتها، فاذا وقعت خرج منها برأيه، هو رأيه سديد.
فاكرين كده لما قلنا على مين؟ قريب البيت من النادي، فاكرين؟ حد فاكر؟ زوجي رفيع العماد، طويل النجاد، عظيم الرماد، قريب البيت من النادي، قلنا لكم إيه النادي اللي هو إيه؟ الناس اللي تجتمع نهاراً. طب ليه قريب البيت من النادي؟ عشان ما يعرفوش ياخدوا قرار غير إيه في وجوده؟ ليه؟ لأن رأيه سديد. فهو عمر رضي الله عنه بيقول: الرجال ثلاثة: رجل عفيف مسلم عاقل يأتمر في الأمور إذا أقبلت، إذا أقبلت وتشبهت، فاذا وقعت خرج منها برأيه.
ورجل عفيف مسلم ليس له راي، ما بيعرفش بقى إيه يعمل الكلام ده، طب يسكت؟ يسيب نفسه؟ لا، قال: فاذا وقع الأمر أتى ذا الراي والمشورة، فشاور واستأمره، ثم نزل عند أمره. كويس يعني واحد خلاص عرف من نفسه إن أنا كل ما بفكر بغرق الدنيا، خلاص أنا ما هو يا جماعه إيه اللي هيغير الموضوع؟ ما هو هتلاقي الواحد عمال يقع في الغلط مرة واتنين وعشرين وفاكر في المرة المئتين بقى لا هي المرة دي اللي هتصيب، إيه اللي إيه اللي اتغير؟ أنت جربت نفسك ما تتكسفش، ما تتكسفش خد بقى النصيحة واقعد اسمع لغيرك، فين المشكلة؟ بالذات يا جماعه يعني بعض الناس بياأنف إنه يسمع للي أقل منه أو أصغر أو اللي تحت يده.
طبعاً احنا في واحد لا بيسمع على ده ولا ده، ولا اللي فوق ولا اللي تحته، وعشان كده أنا دائماً بنصح نصيحة قبل الجواز، سواء الرجل أو المرأة والمرأة البنت الصغيرة بالذات يسمعوا النصيحة دي، وأنت بتجوز ولا وأنت بتجوزي لازم تبقى عارف وعارفة مين الكبير بتاع الطرف الآخر، يعني إيه الكبير؟ مين يا ابن الحلال اللي لو اختلفنا وجا قال لك ارمي نفسك في البحر هتروح ترمي نفسك في البحر؟ مين؟ لازم تبقى عارفة مين ده، لأن هو لو مالوش كبير هتضيعي.
أو العكس على فكرة، في نساء، الأصل في المرأة الأصل في المرأة أن هي إيه بتكون طوع من هي تحتها، سواء أبوها جوزها كده، الأصل كده. في نساء لا متمردات، أنت إذا دخلت البيت ولقيت البنت لا بتسمع كلام أبوها ولا بتسمع كلام أمها واللي يقولوه يقولوه، هي بتعمل اللي هي، خاف، خاف من ولا خاف أنها هتعاملك بالمعاملة دي، يعني أنت تطلع مين أنت في الكوتشينة ولا حاجة؟ يعني أبوها اللي مربيها لغاية ما وصلت 20 سنة و22 و25 بتعمل معاه كده، فانت تطلع مين؟ هذه أول حاجة، تاني حاجة طيب هي الحياة هتستقر؟ حياته تستقيم 100%، بيحصل شوية مشاكل، ممكن مشاكل صغيرة بتعدي، مشاكل كبيرة بنحتاج نتحاكم. طب مين يا بنت الحلال اللي لما يقعد لأن ساعتها مش هتسمعك وأنت مش هتسمعها، أنتم الطرفين بتوع النزاع، طب مين اللي هيقعد ويقول هتعملي واحد اتنين تلاة؟ يقولي حاضر هعمل واحد اتنين تلاتة ببساطة، ببساطة جداً، يجي أبوها يقعد، خلاص بنتي هتعمل، تقوم قايمة محرجة أبوها قدام الناس، مش عامله وداخله وقافلة، يعني يمكن الرجاله ما تعملش كده أو أبعد عن أن هم يعملوا ده، ممكن الراجل يبقى متغاض ويبقى أصلاً ما بيطيع أبوه بينه وبينه، لكن ما يصغرش أبوه، يعني الرجل برضه بيبقى شوية عنده عقل في هذه المسائل، المرأة مش كده، عادي جداً تقوم قايمة وقلبة الترابيزة وداخله جوة وخلاص.
هتعمل إيه أنت وقتها؟ وزي ما بقول، في نساء بتعيش عشان الولاد، في العكس، يعني في رجل يبقى هو الرجل هو اللي عاقل والحكيم والكذا ومراته صعبة جداً، وتلاقيه بابتدي يتنازل عن حاجات كتير لمجرد إن البيت يستقر، طب ما من الأول فين كبيرك يا بنتي اللي هتنزل على رأيه؟ وأنت فين كبيرك؟ مين كبيرك؟ مين كبيرك اللي تنزل على رأيه من الأول؟ واضح.
أه، قال: ورجل يبقى ده الراجل الثاني بقى اللي هو إيه؟ خلاص عارف من نفسه زي ما قلنا إنه آه لا، احنا كنا نقول حاجة بقى تانية، ممكن واحد ما يسمع، ممكن واحد يسمع للناس عادي لكن يأنف إنه يسمع للي أقل منه منزلة أو من هو تحته زي مراته كده، وبرضو ده ماهواش من تمام العقل يا شباب. عادي جداً لما حد يكلمك ويديك النصيحة، اسمع حتى لو ده حد أقل منك، بالعكس ده يكبرك ما يصغركش، والنبي عليه الصلاة والسلام كان على تلك الصفة، مش كده؟ عادي جداً يدخل على أم سلمة في صلح الحديبية زعلان من حاجة، تشير عليه بحاجة، يطلع يعملها، الأمر يتحل عادي جداً.
ما أنفش بقى يقول لها إيه، وأنت مالك أنت؟ زي عمر، فاكرين عمر لما إيه بيتكلم في مراته بتقول له أنا رأي لها رأيك، رأيك إيه يا امرأة؟ أنت مين أنت عشان تقول؟ ما هو دول دول قريش هم متربيين على كده، مش كده؟ النبي عليه الصلاة والسلام لا، يدخل على أم سلمة غضبان: في إيه؟ ومالي لا أغضب وأنا أمر الأمر فلا يمتثل؟ قالت له: طيب اطلع وما تكلمش حد وروح احلق أنت رأسك، وما تكلمش حد. طلع ندى الحلاق، حلق له، كل الصحابة إيه؟ حلقوا في صلح الحديبية. فكان سماع النبي عليه الصلاة والسلام لنصيحة زوجة كان فيها الخير، مش كده؟ وكذلك في غزوة بدر لما الصحابي النبي عليه الصلاة والسلام يختار موطن، صلوا على النبي، يختار موطن ينزل فيه في غزوة بدر ويجي الصحابي يقول له يعني ده من ربنا ولا هي الحرب والمكيدة؟ قال له لا مش أمر من ربنا ولا حاجة ده الحرب والمكيدة وكذا. قال له: فإن هذا ليس بمنزل، شوفوا كمان الكلام شديد، غلط، المكان ده غلط. طيب إيه؟ لا نروح الحته الفلانية فيحصل كذا وكذا، والكلام ده احنا قلناه قبل هنا شرحنا احنا سورة الأنفال أو غزوة بدر.
فالنبي عليه الصلاة والسلام يسمع كلام الصحابي ويكون فعلاً سبب من أسباب النصر ما أشار به هذا الصحابي. فأنت اسمع، اسمع لكل الناس، قيم كلام الناس، أنت اللي بتستفيد، كل ما تسمع العدد أكبر أنت اللي بتستفيد، وأنت اللي يوم عن يوم إيه يعني عقلك ينضج، ما هو أنت يا جماعة اللي ما يسمعش غير نفسه ده يبعد أصلاً إنه يتصلح، ولو اتصلح هيتصلح بعدها، ما هو أنت ما تسمعش حد، إنما لو عودت نفسك حتى لو ده خلاف طبعك إنك تسمع الناس، هتلاقي عقلك بينضج أسرع وهتلاقي شخصيتك بتتحسن ويعني تجود وكذا أسرع، واضح. سواء رجل أو امرأة، لأن أنا عارف برضه إن في نساء عندها مشاكل في الحته دي، هي عنيدة ما تحبش تسمع لحد، أو مش عنيدة، وبرضه رجال.
وللاسف برضه مهم جداً يا شباب نفهم الحاجات دي، البعد النفسي للتصرف ممكن يبقى نفس التصرف لكن واحد بيعمله ببعد نفسي، وواحد بيعمله ببعد نفسي تاني خالص. طيب ليه مهم؟ عشان وأنت بتعالج تعرف، مش تعارلج يعني تاخد عند دكتور نفسي لا، يعني ممكن واحد أو واحدة هو ما بيسمعش النقد الموجه ليه مش عشان هو عنده كبر وشايف نفسه، العكس تماماً هو مهزوز لدرجة بعيدة، فمن كتر هزته في نفسه هو مش مستحمل يسمع كلام تاني يقوله أنت فيك مشكلة ثانية، هو مش مستحمل ده، فبيبلب مفهوم. فمهم جداً بالذات مع اللي هتطول معاه العشرة بتاعتك، ابنك، بنتك، أبوك، أمك، زوجتك، أخوك، الناس اللي بتعاشر كتير، ليه ينكر؟ مهم إن احنا نفهم ده.
قال: ورجل، الراجل الثالث بقى، يبقى أول واحد هو ذو رأي وعاقل وكذا، واحد تاني خلاص عرف بقى من نفسه إنه إيه على طول بيلبس في الحيط، فلما يجي حاجة هروح أسال الناس وانزل على رأي الناس وكده. قال: ورجل حائر بائر لا يأتمر رشداً ولا يطيع مرشداً، لا منه عنده عقل ولا منه بيروح للي عنده عقل يقول له اعمل إيه؟ فينتصر على رأيه.
فهنقول الأثر تاني بقى على بعضه من غير ما نشرح، قال عمر: الرجال ثلاثة: رجل عفيف مسلم عاقل يأتمر في الأمور إذا أقبلت وتشبهت، فاذا وقعت خرج منها برأيه. ورجل عفيف مسلم ليس له رأي، فاذا وقع الأمر اتى ذا الراي والمشورة، فشاور واستماره، ثم نزل عند أمره. ورجل حائر بائر لا يأتمر رشداً ولا يطيع مرشداً.
الراجل الثاني ده بس عاوز أوضح فيه برضه مسألة مهمة، بعض الناس بالذات الرجال لأن الرجل هو المفروض إنه هو الأعقد وهو الأجدر على تقييم الأمور صح، بيكون هو فعلاً كده، ورجل ذو رأي فعلاً وذو عقل فعلاً ويقدر ينصح كل الناس، لكن إذا نزل الأمر به هو، يشوش عقله. برضه لازم ندرك ده فينا، يعني دي في طبيعة البشر، يعني أنت ممكن تلاقي نفسك بتنصح عشرة في مسألة، المسالة دي لو وقعت بك أنت، أنت محتاج إنك إيه؟ تسمع عشان ما تقفش وقتها، يعني أنا اللي بنصح الناس، أنا اللي بقول لهم يعملوا إيه، أجي أنا أسمع دلوقتي؟ آه أنت محتاج ده، واضح؟
طيب، قالت زوجي عياياء غياياء طبقاً، كل داء له داء، أما يكون المعنى كل داء له داء يعني إيه؟ يعني كل داء داء له، يعني بص كده في الناس أي مصيبة تلاقيها في حد اعرف إن هي في جوزي. فهمتوا دي؟ فايه يعني عاوزة تقول إن في مصايب الدنيا كلها، ما أنا أقعد أعد لكم، أنتم شوفوا أي مشكلة كده هي.
في جوزي كل داء له داء، أو كل داء له داء. فهمتم؟ يعني كل مشكلة فيه مشكلة، مش حاجة صغيرة. كل داء له داء. أي مشكلة فيه فهي مشكلة فعلا، مشكلة كبيرة، مش حاجة بسيطة. شدك أو فلك، أو جمع كلا لك في الرواية بقا خارج الصحيح: «إذا حدثته سبك، وإذا مزحته فلك، وإلا مع كلا لك».
ماشي، وفي رواية: «أوبك»؛ يعني فتح جراحاته القديمة يعني. طيب، قالت الثامنة: «زوجي المس مس أرنب والريح ريح زرنب». هذه رواية الصحيح، خارج الصحيح وأنا أغلبه والناس يغلب: «زوجي المس مس أرنب والريح ريح زرنب». دي بتمدح ولا بتزم؟ الأرنب مس الأرنب ده وحش؟ لا، بتمدح. مس الأرنب يا جماعة فرو أرنب، دي من أجمل ما أنت، يعني إيه؟ لامس مش كده؟ المس مس أرنب والريح رنب؛ يعني مسه مس، طيب لين، والريح ريح زرنب، الزرنب نبات طيب الرائحة، فهي بتمدح زوجها: المس مس أرنب والريح ريح زرنب.
وهذا أيضاً من المواطن التي ربما يستحيا من ذكرها؛ مسألة النظافة الشخصية يا شباب ويا بنات، طبعا مسألة الـ يعني ممكن الست تفضل عايشة كارهة جوزها أو العكس، الرجل يحيا مع المرأة وهو كارهها، لكن من أدبه أو من أدبها أو من حيائه من من امرأته أو من حيائها منه، مش قادر أو مش قادرة يقول المشكلة، يعني ماشي رفع إلي مرة مشكلة في طلاق، يعني من اللي الكلام اتكال في النص: الست قالت ما يعرفش حاجة اسمها فرشة سنان، يعني يعني ما يعرفهاش، مش مثلاً مرة كل شهر، بتقول ما يعرفهاش فرشة السنان دي، ماشي، فخلاص إلى أن إيه بقا؟ يطفح الكيل زي ما بيقولوا.
فمسائل النظافة الشخصية مهمة جداً جداً جداً، مسألة التهيؤ؛ تهيؤ سواء الرجل أو لأن بعض الرجال عندهم برض ثقافة عجيبة جداً؛ إنه لا، عاوز المرأة هي تتهيا، وهو الفانيلة الحمالات ليل نهار. في مين قال ده؟ مين قال ده؟ علي رضي الله عنه كان يقول إيه؟ إني أحب أن أتزين لامرأتي كما أحب أن تتزين هي لي. طب ده بمزاجك يعني؟ قال: لأن الله عز وجل يقول: ﴿وَلَهُنَّ مِثْلُ الَّذِي عَلَيْهِنَّ بِالْمَعْرُوفِ﴾ [البقرة: 228]. فهذا استنباط علي لهذا المعنى من كتاب الله، مش هي عليها أنها تتزين فيبقى لها أن تتزين؟ أنت، ﴿وَلَهُنَّ مِثْلُ عَلَيْهِنَّ﴾، فكما تحب أن تتزين هي لك، فلتتزين أنت لها.
طبعا مصيبة بقا لو المرأة ما بتعملش ده، دي مصيبة كبيرة جداً، لأن برض بعض النساء للأسف، وهذا خلاف طبعا إحنا طبعا إحنا دايما بنعدل الكفة، لأن في حاجات هي طباع المرأة بتميل ليها، وحاجات طباع الرجل بتميل ليه. يعني لما جينا نقول في حتة إيه الرطط، نقول الراجل ما يعملش كده، ما يفضح مراته يعني، الراجل مش كده، الست عادي جداً تقعد مع واحدة، خلاص، يعني حتى يقول لك: لو عاوز تقول يعني عاوز تفضح سر، قوله لست، مش كده؟ وعاوز تتاكد بقا إنه هينتشر، قول لها: اوعي تقولي لحد، يعني كده خلاص، اعرف ما تستحملش. طب مين اللي غلطان؟ الست؟ مش الست، أنا مش بهزر دلوقتي، مش الست فعلاً اللي غلطان؟ أنت لما صدرك أنت ضاق بسرك، عاوز صدر امرأة تتحمل هذا السر؟ أنت لا، طبعا.
وطبعا هي هي الست برض يعني بتعمل اللي عليها، ما بتروح للتانية بتقول لها إيه؟ بس اوعي تقولي، خلاص، هي كده بتريح ضميرها: أنا قلت آه. فهنا الطبع في المرأة المفروض يعني؛ طبع المرأة أصلاً هي تحب إيه؟ تميل للزينة وتميل، هي بتميل للحاجة دي. هل ده مضطرد؟ لا، في نساء مش كده وفي نساء عندها مشاكل في النظافة، فهذا الكلام أيضاً موجه للرجل وموجه للمرأة. ابن كثير في قول الله عز وجل: ﴿وَعَاشِرُوهُنَّ بِالْمَعْرُوفِ﴾ [النساء: 19] قال إيه بقا ابن كثير؟ قال: حسنوا أفعالكم وهيئاتكم بحسب قدرتكم. يبقى أيضاً ابن كثير يرى في قوله تعالى: ﴿وَعَاشِرُوهُنَّ بِالْمَعْرُوفِ﴾ أن من المعروف أن تحسن هيئتك لامرأتك، خلاص. وهذا مما ربما يغفل عنه الرجال، إحنا قلنا في المسألة دي كفة النساء تكسب، لأن ده طبيعة المرأة أو من ينشأ في الحلية، ده طبيعتها كده، الرجل ممكن ما يبقاش مهتم قوي بالحتة دي، فنقول: لا، يبقى من حقوقها عليك أن تهتم بهذا الأمر، خلاص.
النبي عليه الصلاة والسلام كان إيه بقا حاله إيه؟ يعني بيقول إيه؟ المس مس أرنب والريح ريح زرنب. المسألتين دول أنس يلخصه، مش كده؟ يقول: ما مسست ديباجاً ولا حريراً ألين من كف رسول الله صلى الله عليه وسلم، ولا شممت طيباً أفضل من ريح النبي صلى الله عليه وسلم أو كما قال، ماشي. وكان صلى الله عليه وسلم أيضاً من من من خصاله المشرفة، كان إذا دخل بيته يبدأ بإيه؟ شوفوا يا جماعة، نتعلم نتعلم هذا الأمر، مش خارج من بيته لأن الراجل إيه؟ ليه هو خارج من بيته على سنجة عشرة، مش كده؟ طيب داخل بيته بقا؟ يعني أولى من يرى منك الجميل ويشم منك الطيب وكذا وكذا هي امرأتك، أولى الناس.
فالنبي عليه الصلاة والسلام مش وهو خارج، وهو داخل، كان إذا دخل بيته يبدأ بالسواك، ماشي. طيب قالت: «زوجي المس مس أرنب والريح ريح زرنب» في رواية الصحيح: «وأنا أغلبه والناس يغلب». المعنى ده اتكلمنا عليه قبل كده ولا آه؟ معنى إيه يعني بقا؟ هنشيل كلم عليه كده فكرة انك تنزل عن رايك أحياناً للمرأة، وتبين لها أن إيه أن يعني هي قالت رأي يا هنا يا هناك، وممكن ما يبقاش كده رأيها، لكن أنت بتقيس بعقلك وأن المواضيع قريبة وبتاع، فان أديها ثقة في نفسي أني أؤلف بيني وبينها، أن العشرة تطيب بهذه المسألة. ما تخصني أصلاً، لأن بعض الرجالة متعب، متعب؛ يعني لازم مناخيره في كل صغيرة وكبيرة في البيت، حتى فيما يخص المرأة، في أدق تفاصيل المرأة؛ يعني المطبخ ده اللي أنت ممكن ما تكونش بتدخله غير كل فين وفين، طب أنا محتاجة كذا في المطبخ، لا ما ينفعش كذا عشان مش عارف إيه، طب يا ست يا سيدي الست هترتاح بكده، ما تجيب لها الحاجة في يعني إيه اللي هيحصل؟ يعني حتى دي بيتدخل فيها بعض الرجال.
يعني بعض الرجال مش بقول كل الرجال كده، بس بعض الرجال كده متعب جداً، ومش بقول بخلاً منه؛ يعني هو مش بخل، يعني يعني ممكن يدفع أضعاف أضعاف بس في حاجة هو اللي إيه؟ على مزاجه هو، ما تبقاش على مزاج المرأة. طب في الآخر مين هيستخدم المرأة؟ هو مش بتاعته الحلة الفلانية، يا عم أنت مش هتشوف الحلة دي أصلاً، أنت الأكل بيتحط لك في الطبق، يعني اللي هيوقف على الحلة وهيطبخ في الحلة هي الست، ما تسيب أريحية شوية للمرأة أنها تعرف تتعامل، أنها تعرف تاخد قرار. فهنا بتقول إيه؟ وأنا أغلبه، أنا بغلبه، اوعوا فكرة لأنه ضعيف الشخصية لا، والناس يغلب؛ يعني لو خرج وسط الرجالة هو رجل له كلمة وله عقل يفكر وله كذا وله كذا. أنا بغلبه مش عشان هو ضعيف الشخصية، عشان هو بيسيبني أغلبه، ولذلك كان معاويه رضي الله عنه يقول: «يغلبهن اللئيم، ويغلبني الكريم». فهمتم دي؟ يعني المرأة تغلب الرجل الكريم، كريم الطباع.
لو لقيت بقا واحد قاعد على الواحدة، والست مش عارفة تاخد منه حق ولا باطل، اعرف إن هو طباعه مش، دي مش حاجة حلوة وتطلع أنت فاكر نفسك بقا المنتصر، لا. قال إيه؟ بعض المعارك في خسرانها شرفة، مش كده؟ يعني في بعض المعارك انك تخسر هو ده الشرف، هي المعارك دي المعارك اللي بينك وبين زوجتك، لما تخسر في المعركه دي هذا شرف لك أنك تبقى طالع خسران بمزاجي، أنا طالع خسران بمزاجي، ماشي، «وأنا أغلبه والناس يغلب». دي كانت الكلمة الثامنة، مش كده؟
قالت التاسعة: «زوجي رفيع العماد، طويل النجاد، عظيم الرماد، قريب البيت من الناد». ده إحنا قلناها كله ما فيش حاجة جديدة يعني تقال فيها. قالت العاشرة: «زوجي مالك، وما مالك؟ مالك خير من ذلك، له إبل كثيرات المبارك، قليلات المسارح، وإذا سمعنا صوت المزهر أيقن أنهن هوالك». ده إحنا قلناه برض، لكن في رواية خارج الصحيح دي اللي عاوزين نقف معها: وهو أمام قومه في المهالك. هذه رواية خارج الصحيح.
فهو أمام هو أمام القوم في المهالك، يعني إيه؟ يعني وقت الخطر هو فين؟ في الأول، ودي كانت حاله النبي المشرفة صلى الله عليه وسلم، شوفوا يا جماعة، النبي عليه الصلاة والسلام تلاقيه عكس القادة اليوم، النبي عليه الصلاة والسلام وهو في حالة شدة الوطأة وشدة الحرب فين؟ النبي أول واحد، صلى الله عليه وسلم، مش قاعد بقا في مش عارف إيه وحواليه دائرتين ثلاثة حراس عشان خالص. علي رضي الله عنه يقول: كنا إذا أحمر البأس ولقي القوم اتقينا برسول الله صلى الله عليه وسلم، نتقي العدو بالنبي عليه الصلاة والسلام، هو أول واحد صلى الله عليه وسلم، فما يكون أحد أقرب إلى العدو منه، فين النبي؟ في الأول.
طيب خلص الحرب وراجعين بقا، والجيش راجع وطبعاً دلوقتي اللي في القائد بقا اللي هو كان أصلاً في الحرب فين؟ مش في الحرب، بس هو الجاي في الأول عشان ياخد، النبي فين بقا عليه الصلاة والسلام؟ في أخريات الجيش، النبي عليه الصلاة والسلام في أخريات، في الآخر خالص، ليه؟ بيعمل إيه النبي عليه الصلاة والسلام؟ علشان لو في حد ضعيف انقطع به الطريق، ولا الجمل بتاعه لا يحمله، يساعد الناس.
قلنا لكم قبل كده من أنماط القيادة، وهو نمط حديث، يعني مش يعني اللي خد إدارة قبل كده أو من زمان ممكن ما يكونش سمع عنه: القيادة الخدمية، ده نمط حديث، يعني بيتكلموا عنه في الإدارة الحديثة، القيادة الخدمية، يعني إيه القيادة الخدمية؟ اللي هو ده؛ اللي هو أن القائد يكون بيخدم الناس، ماشي، وقلنا لكم البلاد اللي عندها ثقافة القيادة إحنا طبعا لو قلنا لكم لو جبنا مية واحد دلوقتي قلنا له: ارسم مجموعة وفيهم قائد، وأول ما أبص أعرف أن ده القائد، المية هيرسموا القائد فين؟ قدام. ما فيش ولا واحد هيجي في دماغه أن يرسم القائد ورا، مش كده؟ في بعض البلاد التي تنتشر فيها ثقافة القيادة الخدمية بيرسموا القائد ورا، يعني لو قلت له جبت طفل صغير قول له: ارسم لي عشرة كده فيهم قائد، يرسم القائد في الآخر، مش في الأول، خلاص.
فكان النبي عليه الصلاة والسلام في الموطن الذي يحتاج أن يعني يستعمل هذا النوع من القيادة، تلاقيه لأن طبعا برض ده درس في الإدارة، ودرس في التربية، حتى في أن الإدارة يا جماعة ما فيش حاجة اسمها صح وغلط في الإدارة، ما فيش حاجة اسمها كده. أمال اللي منكم بقا دارس إدارة أو حاجه، يعرف المصطلح ده، أن هي على حسب الموقف، الإدارة على حسب الموقف، ماشي، بيسموها إيه حد يعرف؟ بيسموها سيوتيشنال، مش كده؟ سيوتيشنل، يعني إيه؟ حسب الموقف اللي أنت فيه، هتستخدم أني نوع من أنواع الإدارة؟ أنت ممكن تستخدم نوع إدارة معين مع شخص، نوع إدارة تاني خالص مع شخص تاني، أو مع نفس الشخص لكن في موقف، هتستخدم نوع إدارة، وهو هو نفس الشخص موقف تاني، تستخدم نوع إدارة تاني خالص. ده مهم في الإدارة، ومهم في التربية، ومهم في تعاملك مع امرأتك، لأن إدارة البيت ما هي إلا إدارة.
فحسب هنا هستخدم إيه؟ واضح؟ فما فيش حاجة اسمها صح وغلط، حتى أسوء نوع إدارة ممكن تسمع عنه في الدنيا ليه وقته، يعني أسوء نوع إدارة إيه؟ اللي هو كل ما يتذكر الناس تشتم فيه، حد يعرفها؟ الدكتاتور، حد ليه رأي تاني؟ صح كده، أسوء نوع إدارة كل ما نسمع عنه: المايكرو مانجمنت، يعني إيه مايكرو مانجمنت؟ اللي هو حاطط مناخيره، يدخل في تفاصيل التفاصيل، ومش بس في التفصيلة تتعمل إزاي وبأنه طريقة، فده مدير متعب، ده مدير متعب.
طب المايكرو مانجمنت دي ليها وقتها؟ آه، ليها وقتها، مين بقا شاطر يقول ونديله جايزة؟ ليها وقت بقا المايكرو دي، يعني أسوء نوع إدارة في وقت هو ما ينفعش غير. قول. ماشي، جميل هو يعني ماشي بس هو بنحتاجها، بس هو ده نوع تحت مظلة أكبر. لا، مش وقت المخاطر، وقت المخاطر ممكن تبوظ الدنيا. خلاص بقا مش درس إدارة، هو بيقولوا في وقت التغيير، في وقت التغيير، ماشي.
وفي حتة كده في الإدارة بيسموها تشانج مانجمنت، يعني إزاي تدير تغيير بيحصل في المؤسسة، فالتغيير ده أنت مضطر في وقت تدخل في التفاصيل علشان تضمن أن التغيير ماشي، لأن أقل حيود هيسبب مشكلة. طبعا الستارت أب بيخش فيها؛ لأن ده تغيير أصلاً، حياة كاملة، أنت من ما فيش ستارت أب. فالشاهد يعني، ارجعوا بقا تاني من الإدارة، لكن في كل موقف ممكن تحتاج شكل نمط معين من التعامل، فتبقى ذكي كفاية أنك عارف أنك عندك شنطة عدة كده تمد إيدك تخرج العدة المطلوبة في الموقف ده، مفهوم؟ إيه اللي جاب بقا الإدارة؟ آه. قالت إيه العاشرة؟ وهو أمام القوم في المهالك. يبقى في وقت في وقت المشاكل أنا ظاهر، مش بستخبى.
طيب، قالت الحادية عشرة، ودي بقا.
أناسة من حلي أذني وملا من شحم عضديه. واضح المعنى يعني كلت عنده لغاية ما عظم بدنها وبجحت إلي نفسي. كان بيقول لها كلام جميل فصدقت نفسها أن هي يعني إيه؟ الكلام ده خلصناه، كل الكلام ده شرحناه قبل كده ماشي.
وجدني في أهل غُنيمة بشق فجعلني في أهل صهيل ودايء ومَنق. كل ده برضه شرحناه، كانت في حالة يعني ما يعلم بها إلا ربنا في أهلها فقيرة وكذا ومعدم، فبقى عندها إبل وعندها غنم وعندها خيول وعندها زرع وعندها كلّ حاجة ماشي.
فعنده أقول فلا أُقبح، وأرقد فأصبح ما الصبح يطلع والشمس تطلع، طبعا زمان كانوا بيصحوا من بدري. طب ده معناه إيه؟ إن المرأة دي عندها إيه من يخدمها، مش كده؟ ما هي المرأة ما كانش زمان فيلا البوتاجاز ولا الميكروويف ولا الفريزر ولا فكل حاجة كل يوم على الله كده بايه بيومه، فعشان تبتدئ تعمل فطار ده حتى العيش مش موجود، يعني هتقوم تخبز! طب تخبز دي يعني إيه؟ ما هي لازم تعجن. طب تعجن دي يعني إيه؟ يعني الأول هتنقل القمح، أنتم فاهمين الموضوع يعني بادئ منين؟ من بدري قوي فهي لا هي المرأة مش كده.
وأرقد فأصبح، ما أصحى فده دليل إن هو عندها الخدم اللي بيشيلوا عنها تلك الأعباء. وأشرب فأتقنه، وأشرب فأتقنه يعني إيه؟ يعني أما أشرب على الري، وهذا دليل على كثرة الشراب يعني أشرب مش بقى هنا أشرب مش لازم مية، أي شيء اللبن أو غيره. فأتقنه يعني أشرب لغاية ما أشبَه ولسه هشرب تاني، هذا دليل على إن الموضوع متوفر. ولا تسأل، يعني هي بتشرب ليه تفاص عادي عاوزة تشرب بتشرب، يعني أو أشربه فأتقنه يعني على مهل يعني بشرب بمزاج، وهذا برضه دليل على أنها إيه؟ مش خايفة إن الحاجة دي تخلص، أنتم عارفين لما يبقى في حاجة يا أنا أنت أنا مش كده؟ الحق أخد بتاع وأشرب على طول مش كده؟ فهي لا مش كده، هي من كتر الخير اللي في بيتها فهي مش خايفة إن الحاجة تخلص فأشرب فأتقنه يعني بشرب على مهلي ماشي.
فعندما أقول فلا أُقبح، وأشرب فأتقنه. في الرواية بقى خارج الصحيح وأكل فأُمني، خارج الصحيح وأكل فأُمني يعني إيه؟ أكل فأُمني يعني أكل وباكل غيري أُم نحو غيري. فاكرين لما هي وأم زرع لما هتطلق وهيرجع واحد تاني يتجوزها وهيبقى واحد كويس برضه فهو هي بتوصفه قالت إيه: «وأعطاني من كل رائحة زوجاً، وقال: كلي أم زرع وأميري أهلك». كلي ودي لأهلك. هنا أبو زرع عمل حاجة تانية بقى هو الثاني قال لها كلي وادي لأهلك، لا أبو زرع سايب لها الحبل على الغارب، أهلك بقى مش أهلك تصرفي زي ما أنت عاوزة عاوزه، فهنا حتى شالت المفعول يعني وأكل فأمني إدي اللي أنا عاوزاه اللي أنا عاوزاه واضح؟
طيب دي صفة تمدح في الرجل مش دايماً عشان برضه نعدل، يعني المرأة عندها العقل تدي إيه وما تديش إيه وتطلع إيه وما تطلعش إيه، ماشي الحال ممكن يبقى المرأة مش كده فلو سيبتلها الدنيا تغرق الدنيا، فلا هنا الرجل لابد أن يكونه إيه؟ يضع الحدود، يعني ما فيش مشكلة الجزء ده إدي منه زي ما أنت عاوزة، أطر من كده لا مش بخلاً وإنما أنت مسئول عن مش عن المرأة بس، أنت مسئول لك بيت وأولاد فمسئولية البيت والأولاد تقتضي ده.
طيب أم زرع ما سكتتش لحد كده ولا إيه؟ لا، جاء عليها الدور خلصت الموضوع، فيا إجابته الأرض بالضربة القاضية يا إما رفعته السما بكلمتين وخلص مش كده؟ أم أم زرع ما عملتش كده، أم أم زرع أبو زرع، تعالوا بقى أقول لكم أبو زرع واحد، أم أبو زرع واحد اتنين تلاتة، ابن أبو زرع ده مش ابنها ها ابنه وبنته من واحدة تانية كذا وكذا وبنته وجارية أبو زرع كذا، أبي زرع كذا وكذا. في روايات خارج الصحيح بقى ذكر الضيف أبي زرع وطهاة أبي زرع، قالت عائشة: حتى ذكرت كلب أبي ذرع. المرأة المحبة أو عموماً يعني الذي يحب يكثر من ذكر يعني يحب دائماً يا إما يذكر يا إما يذكر محبوبه أمامه علشان إيه؟ يستمتع بذكر محبوبه.
أجد الملامة في هواك لذيذة حباً لذكرك فليلمني اللوم، مش كده مش كده ولا ايه؟ آه يا من يعز علينا أن نفارقهم وجداننا كل شيء بعدكم عدم. إن كان سركم ما قال حاسدنا فما لجرح يرضيكم. أجد الملامة في هواك أو في هوا في هواك لذيذة حباً لذكرك فليلمني اللوم، يعني اللي يلوم يلوم ليه ما هم هم بيلوموا بيقولوا يعني ما لقيتش غير فلانة؟ فيقولوا الاسم فانا اتصلت أجد الملامة في هواك لذيذة ليه؟ حباً لذكرك مجرد أن اسمك يجي في النص مع إني بتشتم وبتهز بس مجرد أن أسمع الاسم خلاص أنا فل لومن اللوام واللي يلوم يلوم بقى طالما اسمها بيتقال في النص واضح؟ فيحب إيه ذكرى الايه محبوبه ويسهب في ذكر إيه يحب ذكر محبوبه ويسهب في ذكر المحبوب فهذا فعلته أم زرع.
طبعا ده مجلس جاهلية، عشان الناس عندها إشكالات، هو ده مش مجلس غيبة؟ ده جالي كذا مرة يا سيدي ده مجلس جاهلية، هم النساء دول عايشين في الجاهلية ماشي. مجلس غيبة؟ آه مجلس غيبة، فالنساء ما تعملوهوش يعني، إنما ده هي عائشة بتحكي مجلس حصل في الجاهلية ماشي. ليه بقول الكلام ده؟ عشان ممكن يحصل إشكال، الست دي أطلقت وتجوزت واحد تاني تقعد تشعر في الأولاني؟ ده مجلس جاهلية، خلاص سيبك بقى من الأحكام الشرعية ما بيتكلمش على حكم شرعي دلوقتي لكن ده معنى موجود خلاص.
المعنى التاني بقى واللي عاوز أتكلم عنه ده المهم، فكرة أنه القلب إذا كان بكراً يعني ما حبش قبل كده، الحبيب الأول ده ليه معزة خاصة في القلب، فانتبهوا يا شباب وانتبهوا يا بنات لهذا الأمر بلاش الاختلاط، بلاش نقع في هذا الأمر، ليه؟ لأنك هتعيش بالمسالك دي خصوصاً أن غالباً اللي يقعد يحب بقى في الجامعة ولا في الثانوية ولا في كذا في الغالب يعني لو الموضوع ده ما استمرّ أنت لا شفتها وقت المشاكل ولا شافتك وقت، أنتم إيه أنتم بتحبوا بعض وبتاخد المصروف من بابا وهي بتاخد المصروف من ماما ويعني دماغكم في ما فيش حاجة في دماغكم خالص ما فيش حاجة وراكم شغلاكم، الحياة مش كده. الحياة مش بالسهولة دي واضح؟
طيب تكبر سواء بقى هي تبعد تتجوز أنت تبعد والمهم يحصل أي حاجة من اللي بتصل في دنيا الناس، يعني نسبة اللي بيفضل لغايه ما يتجوز اللي كان بيحبها في ثانوية ولا في جامعة، نسبة قد إيه؟ ما تجيبش الواحد في المية، ما تجيبش الواحد في المية، فتفضل بقى أنت إيه تقيس وهي تقيس، طيب على إيه على إيه وجع القلب ده من الأول؟ ابعد، طبعا هو حرام يعني احنا ده حرام لكن أنا بكلمك حتى عشان قلبك عشان قلبك.
شوف أم أم زرع أطلقت من أبي زرع وتجوزت واحد تاني والتاني كان كويس، مش هنقول لكم واحد وحش، نسبة اللي ذكرته عن التاني اللي هو جوزها خلي بالك هي هما تعاهدنا وتعاقدنا ما يكتبنا من أخبار اللي أطلقوا منهم شيئاً، يعني أصلاً أم أم زرع لو ما ذكرتش أبا زرع ما يضرناش حاجة ما هي مش متجوزاه دلوقتي، احنا عايزين نعرف جوزك اللي دلوقتي، لكن هي شوف قلبها فين! وذكرت أبا زرع بكلام قد إيه؟ ولما جت للتاني اللي هو هو كويس معاها ذكرته برضه بكلام كويس، لكن نسبة الكلام ده لده قد إيه؟ وبعدين غصب عنها تعقد المقارنة في الآخر، فلو جمعت كل شيء أعطاني التاني ما بلغ أصغر آنية أبي زرع. إيه اللي جاب أبو زرع أصلاً في الحكاية؟ أنت مالك بابو زرع دلوقتي؟ لا هم طلبوا منك تتكلمي عن اللي طلقك ولا دي القاعدة بتاعة كده أصلاً؟ فالكلام ده بيعمل مشاكل، خلاص فاتقوا الله في قلوبكم، اتقوا الله في أول ما تلاقي حاجة زي كده بتحصل على لذتها وعلى يعني ما تجدونه من نشوة ومن كذا ومن كذا ابعدوا علشان الموضوع مش مش بسيط بخلاف أنه حرام، فهتيجي في مسألة صعبة جداً بعد كده، فليه ليه تعمل كده في نفسك وليه البنت تعمل كده في نفسها؟ والله يا والله هذا الكلام بياتي، هذا الكلام بياتي أنا يعني بس يعني لا نحب ذكر ماشي والمراه تبقى اتجوزت أو الرجل اتجوز وعقلها في حد تاني خالص.
طيب ليه ليه نعمل كده؟ فمن الأول كده نتقي الله عز وجل خلاص. نقل فؤادك حيث شئت من الهوى ما الحب إلا للحبيب الأول. ماشي هو طبعا الكلام ده ما هواش صح برضه على إطلاقه، لكن يبقى شيء من الآية بالذات بقى زي ما قلنا اللي ابتدينا بيه يمكن ما إن هي ما شافتهوش في المها هو في الآخر هو إيه مشاكله؟ يعني مشاكله كل مشاكله في الحياة الراجل ده وقتها اللي في جامعة ولا في ثانوية إنه بيذاكر عشان يجيب مجموع، هي دي مشاكل؟
فتتزوج واحد بقى عليه أعباء الدنيا كلها فتفتكر الكلام الحلو اللي كان، طب ما هو التاني مطحون ليل نهار برّه علشان أنت تعيش الحياة الكريمة اللي أنت عايشاها دلوقتي، تبتدي هي دماغها في حاجات تانية خالص أو العكس هو البنت اللي كان يعرفها في ثانوية ولا في جامعة كانت إيه مشاكلها؟ ولا حاجة خالص. أتزوج واحدة بقى سنتين تلاتة معاها عيلين وتلاتة ومش عارف إيه والواد تعب والبنت سخنت وعنده مشكلة في الحضانة وعندها مشكلة في المدرسة والأكل والشرب والغسيل وانت دماغك في إيه؟ التانية كانت بتقول لي بحبك والتانية كانت ما بنشجعش أن الأزواج ما يقولوش كده لبعض ما بنقولش ده، لكن فرق كبير جداً بين حد عنده مشاكل وواحد دماغه صافية وذهنه صافي وقلبه صافي، فرق كبير جداً فحتى حتى المقارنة ظالمة، فاهمين عاوز أقول إيه؟ حتى المقارنة دي مقارنة ظالمة.
مين اللي بيعيش بقى بالكرب والغم؟ أنت وأنت عقدت المقارنة الظالمة اللي هي أصلاً يعني ممكن لو كنت أتزوجت التانية دي كنت طلّقتها من أول شهر أول ما تشوفها في المشاكل ما أنت ما تعرفش طبعها إيه في المشاكل، أو العكس لو كنت أتزوجتيه كنت طلبت الطلاق من أول شهر ما تعرفيش ويمكن زوجتك اللي معاك دي هي اللي يعني تحملت ما لو كنت تزوجت اللي في دماغك ما كانش تتحمل العشر معشار أو العكس الله أعلم، فحتى مقارنتك ولا مقارنتك ظالمة لأنك ما شفشتش في نفس المواقف بنفس التحديات بنفس المشاكل ما شفتش.
أم أبي زرع فما أم أبي زرع عكومها رداح وبيتها فساح، أتكلمنا عليه قبل كده. ابن أبي زرع فما ابن أبي زرع شوف يا جماعة عمالة تسهب في ذكر حتى ابنه اللي مش ابنها ضعه كمسل شطبة ويشبعه ذراع الجفرة. الولاد عند العرب يمدحوا بقلة الأكل وقلة النوم، يعني كده يبقى اللي هو إيه عوده كده ممشوق ماشي زيك كده قوم وريهم نفسك ماشي عوده ممشوق كده.
فهو بتقول كده ابن أبي زرع فما ابن أبي زرع مضجعه كمسل شطبة، عارفين الخوص اللي كان بيتعمل منه الحصير؟ الخوص ده لما يتقطع كده من النص ده بيسموه إيه؟ الشطبة. فلما الخوص بقى يدخل بعضه في بعض كده عشان يتعمل الحصير ولا يجي يعملوه بالخيط ولا بتاع لو سليت شطبة منهم بتسيب مكان قد إيه ولا حاجة، اللي هي الحته الفجوة دي اللي هي سنة اتنين سنتي، هي بتُبالغ يعني طول مضجعه كمسل شطبة يعني عارفين لو شلتوا حته العود دي هو ينام في الحتة، هي طبعا بتبالغ يعني بتول أن هو جسمه ولد رفيع كده وده يمدح عند العرب أو كان نومه قليل كمثل شطبة، اللي هو السيف لما بتسله من الغمض فبياخد وقت قد إيه ولا حاجة، مش كده كما سل شطبة يعني إيه ينام وقت قليل لدرجة كأنك إيه بالظبط الوقت اللي تسل فيه السيف بتاعك مرة واحدة. هذا كله من المبالغة لكن هو رفيع في الجسم ونومه قليل ويشبعه ذراع الجفرة، الجفرة أنثى الماعز الصغيرة اللي هي أربع شهور كده فالذراع بتاعها ولا حاجة ما يشبعش يعني لا هو يشبع من ذراع الجفرة فاهمين دي؟
فهي بتمدح الولد ماشي وكأنها بتقول برضه إن هو ماهوش ثقيل عليّ، لأن الولاد أكثر حركة، يعني ممكن البنت تبقى قاعدة في بيت أبوها لكن ابنه من امرأة تانية ممكن عادي جداً يجي يخبط على إيه على بيته اللي هو زوج أبيه يعني ويدخل ينام جوه ولا ياكل جوه ولا كذا، فهي بتقول هي بقى بتقول إيه؟ ما بيتعبنيش يعني لما يجيلي البيت أبنه بينام في أي حته وينام وقت قليل لما ياكل ما بيجيش على الأكل اللي في البيت خالص يعني مريح ولد مريح.
بنت أبي زرع فما بنت أبي زرع طوع أبيها وطوع أمها وملء كسائها وغيظ
جارتها طوع أبيها وطوع أمها، يعني بتسمع الكلام، وهذا مما يمدحه في البنات طبعاً. وملء كسائها يعني بدينة، وهذا مما يمدحه عند العرب طبعاً. إحنا المقاييس دلوقتي متشقلبة شوية عند الناس ممكن، لكن العرب كانت تمدح بهذا؛ أن تمدح المرأة البدينة كانت تمدح عند العرب أو يعني مواصفات خاصة يعني. المهم، المرأة مش عاوزين إيه ماشي، فهي بتقول كده: وملء كسائها، وغيظ جارتها.
درتها يعني طبعاً زمان كان عادي أجوز واحدة واثنين وثلاثة وأربعة وعشرة في الجاهلية يعني، وجاء الإسلام فقلن ذلك: أن للرجل لغاية الأربعة. فبتول إيه بقى: وغيظ جارتها، يعني تغيز إيه؟ ضرتها، ليه؟ لأنها امرأة فيها صفات جميلة وطباع حسنة فبغي الضرة، وغيظ جارتها جاريه أبي زرع. فما جارية أبي زرع؟ لا تبث حديثنا تبثيثاً، ولا تنقص ميرتنا تنقيصاً.
لا تبث حديثنا تبثه، ما بتمشيش سرنا، اللي بيحصل في البيت ما يطلعش بره. ولا تنقص ميرتنا تنقيصاً، يعني ما بتسرقش من أكل البيت. يا جماعة الكلام ده ليه لازمه إحنا عمالين نحكي فيه ده كله في الجلسة؟ مالوش لازمة؟ مش كده مش مالوش لازمة للدرس؛ الدرس بنستفيد منه طبعاً حاجات، لكن أقصد مالوش لازمة في إيه؟ غير أن المرأة محبة، عاوزه تقول أبو زرع كتير، بس يعني عاوزه تقعد تتكلم، حتى لما خلصت أبو زرع وبدات في التاني تسكت؟ تسيب أبو زرع في حاله؟ لا. فلو جمعت كل شيء أعطاني ما بلغ أصغر آنية أبي زرع. برضه ترجع لأبو زرع تاني واضح.
لكن في هنا بقى فائدة كبيرة جداً لينا إحنا كآباء أو كرجال يعني، وهي أن أبو زرع مش بس رجل يمدح في معاملته لامرأته، لا ده راجل لما جينا نتكلم عن ولاده؛ لأنهم متربيين أحسن تربية، وبعدين اكتشفنا حاجة عجيبة جداً أنه راجل بيفرق في التربية بين الولد والبنت، يعني لقينا ابنه اتربى رجلاً، وبنته اتربت أنثى، فطلع الولد مضيعة كمسل الشطبة، ويشبعه ذراع الجفرة، وطلعت البنت طوع أبيها وطوع أمها وملء كسائها وغيظ جارتها؛ لأن بعض الآباء لا يحسنون ذلك، هو عنده إيه هي إسطمبة واحدة للتربية، أنت بتربي عيالك زي ما أبويا رباني، طب يعني أنت أبوك معلش ما هو طلعك في الآخر أنت زي الفل وكل حاجة يعني، بس يعني في أحسن يعني.
لا، يعني التربية برضه ما هياش يعني مش كده يعني مش زي ما تربينا هنربي، لا، في أُسس للتربية، والولد ما يترباش زي البنت، والأولاد حتى الأولاد يعني لو عندك ولدين أو ثلاثة مش كل واحد يتربى زي التاني، في واحد عنده طبع معين لازم أتعامل معه بشكل معين، والتاني عنده طبع مختلف تماماً فبتعامل معه بشكل مختلف عن وهكذا، فلازم تجهد ذهنك في ده. إحنا للأسف لأننا متعودناش على ده ولا تربينا على ده، ولا حتى لما كبرنا لقينا ده حتى في أعمالنا ولا في الشركات ولا في المصانع، إحنا دايماً لما نجي نقول كده نجي نتكلم في الإدارة نقول إيه؟ الفكرة اللي عندنا السائدة في مصر أنك إيه وأنت ماشي تشوف دماغ مديرك إيه وتمشي على دماغه، مش كده؟
مع أن المفروض العكس، أنت كموظف أنت جاي مش هنجهدك تشوف أنك تفصص مديرك، أمال دي وظيفة مين؟ وظيفة المدير؛ وظيفة المدير أنه بيدير، وواحدة من الحاجات اللي بيديرها الأشخاص، فالمفروض المدير جاي الصبح جزء كبير من طاقته يصرفها هتعامل فلان ازاي وهتعامل فلان ازاي، مش العكس، مش أنا هشوف مديرى ازاي فهعمله زي ما بيحب واضح؟ فكذلك أنت في بيتك: ابني ده يتعامل ازاي؟ تجهد ذهنك في ده وتتعلم ده وتتدرب على ده، وتشوف الدكاترة اللي بيتكلموا في ده وتشوف بتوع الكوتشينج اللي بيتكلموا في ده، البنت طب أتعامل معها ازاي؟ وهكذا واضح؟
فهو الظاهر أن أبو زرع كان فعلاً شخصية مش عادية، لدرجة أن امرأته هي أو يعني طريقته حتى بعد ما طلقها شوف مدى الحب والشغف بيه، وادي بنته وادي ابنه، حتى الجارية أحسن اختيار الجارية، وبعدين زمان كانوا عبيد يعني مش جارية بالأجرة ولا فهو أحسن الاختيار وأحسن التربية لتلك الجارية، فهي لا تبث حديثنا تبثيثاً ولا تنقص ميرتنا تنقيصاً ولا تملأ بيتنا تعشيشاً يعني نظيفة وبتنظف البيت كويس وكذا وكذا، فهو الظاهر أنه إيه يعني شخصية مع كل اللي حواليه، وده في الرجال مش كتير الحقيقه.
ماشي، أطلقي ما هنعرف بقى دلوقتي أنا مشتاق زيك والله أعرف تطلع.
طيب، قالت: خرج أبو زرع والأوطاب تمخض، الأوطاب يعني الأواني اللي بيتحط فيها اللبن، تمخض يعني بيهزوه كده عملوا حاجات عشان يطلعوا الزبد اللي على اللبن، يعني الصناعة دي أما والأوطاب تمخض يعني هو بيصحى بيطلع من بدري من البيت يكون الخدم قاموا وابتدوا يعملوا شغلهم يعني مع بداية صحيان الخدم بتوعه هو بيصحى برضه ويطلع بره البيت، رجل نشيط يعني أوطاب تمخض يعني وقت الربيع، فلقي امرأة معها ولدان لها كالفهد يلعبان، أو كالصقر في رواية خارج الصحيح، يلعبان من تحت خصرها برمانتين فطلقني ونكحها.
ادينا عرفناه يعني شاف واحدة تانية عجبته وبعدين معها ولدان لها كالفهد أو كالصقر. العرب زمان يا شباب كان من حيثيات الزواج أن يتجوزوا المرأة اللي بتجيب أطفال نجباء، فهو لما لقي الولدين هو بعض شراح الحديث قالوا إن أم زرع ذكرت حيثيات أن أبو زرع يتزوج من هذه المرأة لما لقي ولديها نجباء كالفهد أو كالصقر فأراد أن يكون له منها الولد، وده كان من الحاجات اللي العرب تعمله مفهوم.
فطلقني ونكحها. طيب ليه طلقها برضه ما يتجوز دي ويخلي أم زرع؟ ليه طلقها؟ في رواية خارج الصحيح بقى تبين لنا هو ليه طلقها، في رواية قالت: فخطبها أبو زرع فتزوجها فلم تزل به حتى طلق أم زرع. يعني هو في الأول ما كانش ناوي يطلق أم زرع ولا حاجة، لكن المرأة الأخرى ما زالت به حتى طلق أم زرع. طبعاً في الحديث في حديث عام، لكن معنى هنا وفي حديث خاص بقى في المساله دي ماشي، والنساء بالذات يسمعوا بقى الكلام ده؛ الحديث العام أن ثم لعن في هذه المساله: لعن الله من خبب امرأة على زوجها، ومن خبب رجلاً على امرأته، ففي لعن ماشي.
طيب، سواء بقى اللي خبب ده ما هي ممكن تبقى اللي خببت زوجة تانية فتقعد تزن على دماغ الراجل لغاية ما يطلق الزوجة الأولى، أو العكس زوجة أولى لغاية ما يطلق الزوجة التانية فتدخل في اللعن، فالمسألة. فده حديث خاص في المسألة دي ماشي، فالنساء ينتبهن بقى لهذه المساله. خلاص، لو حصل حاجة شبه كده المرأة تحاول طبعاً إحنا عندنا مشكلة كبيرة، أنا الواحد يجي يتكلم في الحته دي يقدم رجل ويأخر عشرة ماشي، ليه؟ عندنا إشكالات كبيرة الحقيقة، ومعظم الإشكالات من المجتمع اللي بنحيا فيه. زمان أديكم شايفين أهو المسألة في الجاهلية سهلة: يتجوز، يعدد، يطلق، اللي طلقها يعني المرأة الأولى ما هي معها عيال، اللي بتطلق عادي، ماشي المجتمع في الحته دي سهل.
النهارده المجتمع مش كده كلياً ماشي، والنساء فعلاً في الحته دي مظلومة من الضغط المجتمعي الرهيب، ضغط مجتمعي رهيب في المسائل دي. فالشاهد إحنا بقى مش ماهوش درس عن التعدد يعني، لكن المسألة دي بعينها بقى خلاص مسألة أنه المرأة تخبب زوجها على امرأة أخرى أو تسأل طلاقها، فهذا لا ينبغي أن يحدث ماشي.
يلعبان من تحت خصرها برمانتين، فطلقني ونكحها. فنكحها رجلاً سرياً، يعني من أشراف الناس، ركب سرياً يعني فرساً حسناً، واخذ خطياً، أو أخذ خطياً يعني رمح برضه مصنوع في حته كويسة وكده يعني، يعني بتوصف الراجل ماهوش راجل عادي، يعني ده برضه حاجة كبيرة يعني ماشي.
وأراح علي نعماً سرياً، يعني برضه عنده من الإبل والغنم والحاجات دي حاجات كتير جداً، وأعطاني من كل رائحة زوجة، وقال: كلي أم زرع وميري أهلك، يعني كلي وأكلي أهلك. فلو جمعت كل شيء أعطانيه ما بلغ أصغر آنية أبي زرع.
فقال النبي صلى الله عليه وسلم لعائشة: «كنت لك كأبي زرع لأم زرع، غير أني» في رواية خارج الصحيح: «غير أني لا أطلقك». وبكده نكون كروتنا حديث أم زرع عشان الناس قالت إيه زهقوا الشباب بيقولوا إحنا مالنا إحنا باللي متجوزين ومالنا بالمش عارف إيه، فاحنا كروتنا الحديث.
قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.