الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وأهل بيته، كما صليت على آل إبراهيم، إنك حميد مجيد. أما بعد:
النهارده المجلس الثاني من مجالس شرح حديث أم زرع. العدد قل طبعا، كان متوقع يعني، اللي بيحضر طبعا في شباب صغيرة بتحضر فمش عارف الدرس مش مهم ليه ولا إيه؟ مش عارف. المهم، احنا كده كده هنكمل الحديث؛ لأنه مهم الحقيقة، وبيجي لنا أسئلة كتير في موضوع المشاكل الزوجية، وكمان لأن الموضوع ده إيه مدى وزنه عند الشيطان؟ حد يعرف يعني؟ فكرة إن في بيت مسلم قائم، أو هدم البيت ده يزن شيء، ولا حاجة ثقيلة، ولا حاجة خفيفة؟ أه، يعني شوفوا الموضوع اللي احنا ممكن نبقى مستخفين بيه أو مستهونين بيه إيه؟ الحديث بيقول إيه؟ إن الشيطان يجلس على عرشه، ينصب عرشه على الماء، ثم يبعث سراياه، فأدناهم منه منزلة أعظمهم فتنة، يبعت الشياطين الصغيرين يروحوا إيه يفتنوا الناس، فياتيه أحدهم يقول: ما زلت به حتى فعل كذا وكذا، فيقول: ما صنعت شيئا، ما عملتش حاجة! لغاية ما يجي واحد يقول له إيه: ما زلت به حتى فرقت بينه وبين أهله، فضلت أزن عليه لغاية ما طلق، فيقول الشيطان: أنت أنت! نعم أنت! ويدنيه منه، قال الأعمش -أحد رواه الحديث، سلسلة الحديث- قال: وأراه قال: ويلتزمه؛ يعني يحضنه. فالموضوع ده مش بسيط، موضوع إن يعني إن احنا نتكلم في موضوع نشأة البيت المسلم وإزاي نحافظ على بيوتنا وكده، موضوع مهم الحقيقة؛ لأن هو البيت هو اللبنة اللي بيتبنى عليها المجتمع، فإذا صلحت تلك اللبنة صلح المجتمع، ماشي؟ فعشان كده يعني ادينا الوقت.
طيب، المره دي نقول حديث تاني ولا إيه رايكم؟ اللي عاوز الحديث تاني طب يرفع إيده؟ طيب، نقول الحديث تاني. هنقول الحديث، هو الحديث يعني ماشي، هو طبعا ألفاظه صعبة فمش مفهومة، لكن خلينا نقوله عشان لما نرجع بقى نشرح نبقى فاهمين احنا بنقول إيه. الحديث في صحيح البخاري وهنتقل رواية الصحيح، عن عائشة رضي الله عنها قالت: جلس إحدى عشرة امرأة، فتعاهدن وتعاقدن ألا يكتمن من أخبار أزواجهن شيئا. قالت الأولى: زوجي لحم جمل غث على رأس جبل، لا سهل فيرتقى، ولا سمين فينتقل. قالت الثانية: زوجي لا أبث خبره، إني أخاف ألا أذره، إن أذكره أذكر عجره وبجره. قالت الثالثة: زوجي العشنق، إن أنطق أطلق، وإن اسكت أعلق. قالت الرابعة: زوجي كليل تهامة، لا حر ولا قر، ولا مخافة ولا سامة. قالت الخامسة: زوجي إن دخل فهد، وإن خرج أسد، ولا يسأل عما عهد. قالت السادسة: زوجي إن أكل لف، وإن شرب اشتف، وإن اضجع التف، ولا يولج الكف ليعلم البث. قالت السابعة: زوجي عياياء -أو غياياء- طباقا، كل داء له داء، شجك أو فلك أو جمع كلا لك. قالت الثامنة: زوجي المس مس أرنب، والريح ريح زرنب. قالت التاسعة: زوجي رفيع العماد، طويل النجاد، عظيم الرماد، قريب البيت من الناد.
قالت العاشرة: زوجي مالك، وما مالك؟ مالك خير من ذلك، له إبل كثيرات المبارك، قليلات المسارح، وإذا سمعن صوت المزهر أيقن أنهن هوالك. قالت الحادية عشرة: زوجي أبو زرع، فما أبو زرع؟ أناسي من حلي أذني، وملا من شحم عضدي، وبجحني فبجحت إلي نفسي، وجدني في أهل غنيمة بشق، فجعلني في أهل صهيل وطيط ودايس ومنق، فعنده أقول فلا أقبح، وأرقد فأصبح، أم أبي زرع، فما أم أبي زرع؟ عكومها رداح، وبيتها فساح، ابن أبي زرع، فما ابن أبي زرع؟ مضجعه كمسل شطبة، ويشبهه ذراع الجفرة، بنت أبي زرع، فما بنت أبي زرع؟ طوع أبيها، وطيع أمها، وملء كسائها، وغيظ جارتها، جارية أبي زرع، فما جارية أبي زرع؟ لا تبث حديثنا تبثي، ولا تنقص ميرتنا تنقيصا، ولا تملا بيتنا تعشيشا. قالت: خرج أبو زرع والأنطان يمتخض، فلقي امرأة معها ولدان لها كالفهد، يلعبان من تحت خصرها برمانتين، فطلقني ونكحها، فنكحها رجلا سريا، ركب شريا، وأخذ خطيا، وأراح علي نعما ثريا، وأعطاني من كل رائحة زوجا، وقال: كلي أم زرع، وميري أهلك! فلو جمعت كل شيء أعطانيه ما بلغ أصغر آنية أبي زرع. قالت عائشة: قال رسول الله صلى الله عليه وسلم: «كنت لك كأبي زرع لأم زرع».
المرة اللي فاتت ما دخلناش في الحديث، إحنا اتكلمنا على مسألة الإيه؟ حد فاكر؟ أهمية ثقافة الحوار بين الزوج والزوجه، فاكرين؟ وقلنا إن الحديث ده بطولهم، اللي بيقوله مش النبي عليه الصلاة والسلام، ده اللي بتقوله عائشة رضي الله عن عائشة، والنبي عليه الصلاة والسلام على أشغاله، أشغل بنفسه وبحاله مع ربه سبحانه وتعالى، شغله بالأمة، شغله بالدعوة، شغله بأصحابه والكفار، شغلي يعني أشغال كثيرة جدا، ومع ذلك إزاي يفرغ وقت لامرأته! واتكلمنا عن مسألة أهمية الحوار. عاوزين نكمل شوية موضوع الحوار يا جماعة. موضوع الحوار هو موضوع مهم، وهو أساسي، ويدور يعني عليه مشاكل كثير، إصلاحها في إصلاح الحوار.
أول ذلك، عشان إحنا المره اللي فاتت كلمنا وقلنا هنحاول نزن دائما الخطاب يبقى موجه للرجال والنساء معا، فالمرة اللي فاتت قلنا: اللي شايف نفسه أكثر شغلا من النبي عليه الصلاة والسلام، خلاص هو حر، ما يسمعش لزوجته؛ عشان دي الحجج اللي الرجالة بتقولها: هو أنا فاضي للكلام الفاضي ده؟ ما هو الكلام يعني اللي إحنا بنقول عليه كلام فاضي، ممكن يقال مثله على كلام عائشة، وحشاها يعني، بس بقول: لو واحدة جت قالت لجوزها النهارده: تعال عاوز أحكيلك، ده في ١١ واحدة، والأولى قالت، والتانية عادت... بعد ما هتخلص، الراجل: أنا فاضيلك؟! أنا مشغول وعندي مش عارف إيه! النبي عليه الصلاة والسلام ما عملش كده، بل زي ما قلنا بقى المرة اللي فاتت: استمع ومركز وفاهم الرسالة اللي عائشة رضي الله عنها عاوزة توصلها ليه، صلى الله على النبي محمد صلى الله عليه وسلم.
الخطابة الموجهة للمراه؛ لأن إحنا عندنا بيبقى في ناحية فيها إفراط، وناحية فيها تفريط: ناحية أن الرجل لا يستمع، لا يستمع، ودي حاجة أساسية للمراه. هنيجي بعد شوية، إحنا هنتكلم عن الحوار ونخش في الحديث في مسألة الحوار يعني هاخد ثلاث أمثلة في الحديث، الثلاثة يا بيشتكوا من الحوار، يا بيمدحوا الرجل إنه بيسمع؛ عشان نعرف إزاي الموضوع ده مهم عند المراه موضوع الحوار ده، إزاي مهم عند المراه. لكن في المقابل في امرأة تبقى عاوزة تستحوذ على الرجل، ودي برضه مشكلة كبيرة، يعني إيه؟ يعني هي مش سيباه، هي عاوزة 24 ساعة في الـ24 ساعة بتتكلم وهو بيسمع، فإذا في وقت قال: لا، مش قادر، لا، مش مستحمل، يبقى هو وحش وما بيسمعش، طب أنا أكلم مين؟ فهنا يبقى لا، لازم يبقى في اعتدال، الاعتدال في كل شيء يعني. زي ما هنقول دلوقتي: النبي عليه الصلاة والسلام قعد سمع لعائشة، هي أصلا عائشة ليها قد إيه من حياة النبي الزوجية؟ مش هقول حياته عامة، ليها قد إيه؟ تسع، مش كده؟ ليها تسع حياته الزوجية، ده مش حياته بقى، هي واحدة من تسعة، فإذا كان بيقعد مع واحدة كل يوم وليلة، يبقى هي بيجيلها يومها كل إيه؟ تسع، ليه؟ مش كده؟ أم سلمة لما كبرت تنازلت عن ليلتها، لكن على كل حال يعني ما فيش استحواذ هنا، ما عندناش استحواذ على الرجل هنا، مش بتكلم عن مسألة التعدد يعني في حد ذاتها، لأن واحدة من المشاكل اللي بتوقع عند النساء مسألة التعدد هو ده، إن ممكن المرأة تكون هي عاوزة تستحوذ على الرجل. لكن أنا ما بتكلمش على المسألة دي، الرجل له حياة، له حياة فمهم إن إحنا ندي لبعض المساحة دي.
المعاني الجميلة سمعتها من طبيب نفسي في مسألة المساحة الشخصية دي، إن وجود المساحة الشخصية للرجل والمرأة بيثري الحوار، إزاي بقى؟ وهو طبعا الراجل يعني بحسن ظنه إن لما كل واحد فينا هياخد مساحة شخصية، هيروح يستزيد من إيه من الثقافة والعلم وكده يعني. فهو بيقول: المساحة الشخصية بتديك فرصة إنك تطلع على إيه على أمور أخرى من ثقافات، من علوم، من كذا، والمرأة كذلك، فهنلاقي مواضيع أخرى نتحدث فيها. إنما تخيلوا كده إن كل إحنا 24 ساعة في 24 ساعة وشنا في وش بعض، بعد شوية ما فيش مواضيع نتكلم فيها أصلا، ما إحنا إيه يعني منفتحين على بعض لدرجة إن ما فيش حد عنده وقت يحصل شيء زي زائد، عشان يجي يبقى عنده ماده للإيه للحوار! فإحنا لا عاوزين غلو ولا تقصير أو تفريط، فالرجل يعطي المرأة احتياجها من الحوار، والطبيعة في الستات إنهم يحبوا يتكلموا كتير، أنتم عارفين الحديث: «إن أعوج» قال صلى الله عليه وسلم: «خلقت المرأة من ضلع، وإن أعوج الضلع أعلاه» إلى آخره، «فإن أنت ذهبت تقيم وكسرت إلى آخره». وإن أعوج الضلع أعلاه إيه؟ أعلى المرأة رأسها، مش كده؟ قالوا بعض العلماء: قال عوجها في لسانها. وإن أعوج الضلع أعلاه فقالوا عوج المرأة في لسانها.
طيب ليه واحدة من دول إنها بتتكلم كتير، واللي بيتكلم كتير سقطاته كتير؟ الواحد لو كلامه قليل في الـ سقطته؛ لأنه إيه ما بيتكلمش كتير، عارفين القاعدة دي؟ اشتغل قليل، مش كده؟ اتكلم قليل، تغلط قليل، برضه مش كده؟ نفس الكلام. فالمراه لكثرة كلامها، لكثرة كلامها -أنت هات راجل كده وقول له اتكلم زي يعني بمقدار ما المرأة بتتكلم وما تغلطش، صعب جدا!- اللي بيخلي الراجل كلامه يطلع لحد ما صائب إنه كلامه قليل، ففي فرصة إنه يفكر في كلامه، فعوجها في لسانها. المراه فهي محتاجة الحوار ده، وعشان كده بقى يا جماعة لو دخلنا في تفاصيل الحديث هتلاقوا هو طبعا أكثر من ثلاثة، بس إحنا عاوزين اللي اتكلموا بشكل مباشر على الحوار يعني اتكلموا في المسالة دي. أول واحدة المرأة الثالثة قالت إيه؟ زوجي العشنق، إن أنطق أطلق، وإن اسكت أعلق! في رواية خارج الصحيح: وهو على حد السنان المذلقة.
الجمهور بقى انقسموا هنا في وصف المرأة لزوجها: هي بتمدح ولا بتزم؟ فاللي ذهبوا إن هي بتزم في الوصف ده قالوا: هو قالوا هو طويل بلا منفعه؛ يعني طول مذموم؛ يعني زائد عن الحد لدرجه أنه مش حاجة كويسة، خلاص؟ واللي مدح في الوصف ده خاصة، مش في اللي جاي، قالوا: لا، هي تقصد إن هو طويل طولا يهاب، اللي هو الطويل مالي إيه ملوي هدومه يعني، ماشي؟ مش قضيتنا بقى العشنق دي. اللي جاي بقى: زوجي العشنق، إن أنطق أطلق، وإن اسكت أعلق. طب تعمل إيه؟ إن أنطق؛ يعني لو كلمته، لو قعدت أتكلمت معاه يطلقني، ما بيتفهمش غلط، ما ينفعش حد يقول له: أنت غلطت، ما في حاجة أحسن من اللي هيعملها، ما ينفعش حد يقول له: في حاجة أحسن من اللي أنت هتعملها: إن أنطق أطلق! طيب، وإن اسكت، هيراجع نفسه ويرجع؟ لا: وإن اسكت أعلق! الحال يبقى كما هو عليه، أنا زي زي الإيه الكنبه اللي في البيت، زي زي أعلق معلقة، لا أنا متجوزة ولا أنا مطلقة، فأتفرغ لغيره، أتجوز واحد تاني بقى وأخلص! ومنها قول الله عز وجل إيه: ﴿فَتَذَرُوهَا كَالْمُعَلَّقَةِ﴾ [النساء: 129]، فهي بتشتكي من إن ما فيش لغة حوار بيني وبين زوجي: إن أنطق أطلق يطلقني، وإن اسكت أعلق، وهو على حد السنان المذلقة، وساقط مش عارف يعمل إيه! فهي ذمت زوجها بأن هو ما فيش حوار بينها وبينه.
أو إحنا دلوقتي إحنا مش هنمشي النساء بالترتيب؛ يعني إحنا كده هنيجي نقول لكم فجأة إحنا خلصنا المرأة دي، مش هنعيدها تاني، أو يبقى المعنى: زوجي العشنق، إن أنطق أطلق؛ يعني لو اتكلمت -أنتم فاكرين قاعدة الأنس، هم 11 واحدة قاعدين بيجيبوا في سيرة إيه أزواجهم- فقالت لهم: زوجي العشنق، إن أنطق أطلق، لو اتكلمت عليه دلوقتي ووصل له الخبر هيطلقني، فأنآ مش هعرف أتكلم عليه دلوقتي، واضح؟ فدي ذمت زوجها بأن ما فيش لغة حوار.
المرة اللي فاتت قلنا لكم إن في سمات شخصية أو سمات عامة عفوا للنساء، وسمات عامة للرجال، وتكلمني يعني عن حاجة زي كده. لكن رجعت قلت لكم إن بقى في سمات لكل يعني فئة، يعني زي ما دينا المثال: نساء الأنصار ونساء الإيه المهاجرين، فاكرين إن قريش المراه في قريش كانت إيه قوية ولها كلمة، مش كده؟ خالص، خالص، قريش المراه ما تتكلمش، يمين يمين، شمال شمال! في المدينة، نساء الأنصار مش كده، لا، يتكلموا ويراجعوا أزواجهم: وأنت غلطان، وكان الأفضل كذا وكذا! وجاء في أحاديث عمر قلناه لكم، النبي عليه الصلاة والسلام لما هجر نساءه شهرا ومتضايق، ودخل عليه عمر رضي الله عنه قال له إيه: لو رأيتنا ونحن قوم نغلب نسائنا، فقدمنا على الأنصار، فإذا هم قوم تغلبهم نساؤهم، فطفق نساؤنا يأخذن عن نساء الأنصار! وقفنا على كده المرة اللي فاتت. سيدنا عمر بقى ليه تكمله، إن سيدنا عمر بيحكي للنبي الحكاية -صلى الله على النبي محمد- فبيقول له إن بقى عمر بيحكي عن يقول له: جيت مرة بكلم مراتي فراجعتني! طبعا سيبكم بقى من إن قريش... ده عمر رضي الله عنه يعني.
قرشي؟ أنتوا عارفين يا جماعة الحديث ده؟ عشان تعرفوا يعني إيه يا عمر بس، الحديث ده في البخاري. بداية الحديث أصلاً، لا حديث غيره، مش الحديث ده بس حديث تاني، يعني في صحيح البخاري برضُ بداية الحديث أن ابن عباس بيقول إيه بقى: «أردت أن أسأل عمر عن المراتين اللتين أنزل الله عز وجل فيهما: ﴿إِن تَتُوبَا إِلَى اللَّهِ فَقَدْ صَغَتْ قُلُوبُكُمَا﴾ [التحريم: 4]».
طيب، فضل عاوز يسأل عمر، قد إيه؟ سنة! عاوز يسأل عمر ومش قادر يسأل عمر. ليه؟ قال: مهابةً له. أنتوا فاهمين سيدنا عمر ده عامل إزاي؟ يعني ابن عباس بيقول: قعدت سنة عاوز أسأل عمر رضي الله عنه: هما مين دول؟ مين الاتنين الستات دول؟ مش عارف أسأله. فبعيداً عن أن عمر أصلاً قرشي، ده بقى سيدنا عمر يعني، هو أصلاً يعني، فتخيلوا بقى مراته! مرأة عمر بتراجعه، فقال: تراجعين أنتِ؟! أنتِ بتردي؟! عارفين يا جماعة تراجعوا دي؟ في رواية بقى أنا عايز بقى أقول لكم الرواية بتقول إيه، عمر رضي الله عنه في رواية: «فبينما أنا في أمر أتأمر»، يعني عمال أنا قاعد بفكر في حاجة –عشان تعرفوا بس يعني إيه المراجعة اللي عمر أنكرها؟– قاعد بفكر في حاجة، قالت امرأتي: «لو صنعت كذا وكذا»، بس هي دي الكلمة! قاعد بفكر في حاجة، مراته جت قالت له إيه: «لو عملت كذا». دي الكلمة اللي عمر رضي الله عنه قوم الدنيا عليها، في قريش ما فيش، ده ما فيش الكلام ده؛ إيه أنتِ مالك أنتِ؟ أنا أعمل إيه ولا مش موضوعك!
ده كان الحال فيه قريش. في روايات بقى خرج الصحيح للحديث ده، بس عشان يا جماعة توقفنا على الحال كان عامل إزاي في قريش، إحنا ما بنقولش ده أفضل شيء، إحنا هنرجع بقى نتكلم على الموضوع ده. في رواية خارج الصحيح أن عمر قال: «كنا ونحن بمكة –ركزوا يا جماعة في الألفاظ– لا يكلم أحد امرأته إلا إذا كانت له حاجة قضى منها حاجته»، يعني الرجل لا يكلم المرأة أصلاً إلا إذا أرادها للفراش بس، غير كدة ما فيش حوار. وفي رواية: «ما نعد للنساء أمراً»، ده الحال في قريش. وفي رواية: «كنا لا نعتد بالنساء ولا ندخلهن في أمورنا»، دي روايات الحديث خارج الصحيح.
ابن حجر في هذا الحديث، اللي هو مش حديث أم زرع، الحديث التاني اللي إحنا أتكلمنا عنه المرة اللي فاتت لما خلص الحديث –طبعا تكمله الحكاية بقى، عمر رضي الله عنه بيقول إيه؟– بكلم مراتي فراجعتني، فقلت: تراجعين؟! قالت: ومالي لا أراجع، وزوجات النبي صلى الله أو ونساء النبي صلى الله عليه وسلم يراجعنه! اه، رجعك، ما أراجعك ليه يعني؟ ده ده النبي صلى الله عليه وسلم زوجته بتراجعه وبتتكلم معاه وبتناقش وكده. طبعا عمر على طول أول ما سمع الكلمة دي جت في دماغه مين؟ بنته! ساب مراته خالص وراح جري على حفصة: أنتِ بتعملي كذا وكذا؟ قالت: أه بعمل كذا.
طيب، النبي عليه الصلاة والسلام قرشي ولا يثربي؟ إيه رايكم؟ قرشي مش كده؟ يعني المفروض يبقى طبعه طبع القرشيين، طب هنا في إشكال دلوقتي: النبي عليه الصلاة والسلام قرشي لكن هو ما يعملش كده! فلما خلص ابن حجر في الفتح شرح الحديث، جعل من فوائد الحديث هذا الحديث أن تلك الحال حال مذمومة، حال القرشيين، واستدل على ذلك بأن النبي صلى الله عليه وسلم تحول عنها إلى حال الأنصار. فهمتوا الفائدة دي؟
يبقى النبي عليه الصلاة والسلام، اللي هو قرشي، اللي هو اتربى على الحال اللي قال عليها عمر –يعني هو عمر رضي الله عنه لما قال كده للنبي، النبي اتفاجأ عليه الصلاة والسلام؟ لا، هو قرشي أصلاً، النبي عليه الصلاة والسلام اتربى في قريش، ولغايه ما كبر هو في قريش، فهو عارف كويس جداً قريش بيعملوا النساء إزاي، والغالب أن الصغار ياخذون عن الكبار، يعني أنا طلعت لقيت كل رجاله القبيلة بيتعاملوا كده، أنا ما أعرفش غيره أصلاً، ده الغالب يعني– فالنبي عليه الصلاة والسلام كبر على وشب على هذه المشاهد، شافها ومع ذلك تحول عنها صلى الله عليه وسلم، لأن هذا ليس من كريم الخلق، ليس من كريم الخلق مع أي حد فضلاً عن أن يكون إيه بقى؟ مع زوجك، مع مراتك.
فما فيش إشكال يعني، يبقى في لغة حوار. طيب، أنا ما بعرفش، أنا مش كده، أنا ده كله ما ليس أعذاراً ليه، لأن هي لها حق، والعكس هو ما بيعرفش يقعد يسمعني أكتر من خمس ساعات متصلة، وأنا نفسي أتكلم أكتر، ما هو ما فيش بني آدم يعرف.
جايبين بوست على الفيسبوك، واحد لسه متجوز الظاهر وما يعرفش، فكاتب: يا جماعة أنا اتجوزت راديو! فـطبعا الناس القديمة يعني فاهمين الليلة، فلا، يبقى عاوزين نصل لحل، نصل لحل وسط، يبقى أه المرأة تتكلم وتحاور والزوج يسمع، بس بما لا يعطل الحياة بقى، يعني أنا في حياتنا أكتر من حاجة.
طيب، المرأة السادسة قالت إيه؟ قالت: «زوجي إن أكل لف، وإن شرب اشتف، وإن اضجع التف، ولا يولج الكف ليعلم البث». إيه معنى «زوج إن أكل لف»؟ يعني لما يجي ياكل إيده تلف في كل الأكل، بياكل من كل الأصناف. «وإن شرب اشتف» يعني يشرب لآخر نقطة في الكوباية ما يسيبش حاجة، ده دليل على إيه غير إنه طفس؟ دليل على أن أكل المرأة وشراب المرأة حلو ولا وحش؟ حلو! امرأة بتطبخ طبيخ كويس لدرجة أنه ما بيعرفش يمسك نفسه، بياكل من كل الأصناف وكذا وكذا، غير أن عنده نَهَمة.
طبعا وهذا قيل أنا يعني مش بهزر، هو فعلاً أُقال أن هذا الرجل عنده نَهَمة، ودي من الحاجات تُذم عند العرب؛ الرجل العربي ما ياكلش كتير. من البدع التي أُحدثت في أمة النبي محمد صلى الله عليه وسلم: الشبع، خلي بالكم، ما كانوا يعرفوا حاجة اسمها شبع، يعني ياكلوا إيه؟ تلاقوا لما نراجع السيرة، النبي عليه الصلاة والسلام ممكن يجهز سرية ويبعثهم وبعدين إيه؟ يديهم جراب تمر، «قضوا به حالكم لغاية ما ترجعوا»، فهم ما كانوا يعرفوا الشبع، يعني الشبع ده آه، مرة كده أبو هريرة يقول له إيه: «والذي بعثك بالحق، لأجدن مسلكا»، إنما العرب ما كانش، سيبكم برضُ من الإسلام، إحنا بنتكلم على العرب كعرب، ما كانش تاكل كتير الرجالة، وعشان كده المجلس ده يا جماعة مجلس جاهلية مش بتاعنا، مجلس النساء مجلس جاهلية ولا مجلس إسلام؟ مجلس جاهلية.
جلس إحدى عشرة امرأة في الجاهلية لما جت، بصوا بقى، لما جت أم... اللي هي زوجة أبي زرع، اللي هي يسموها أم زرع، تمدح ابن أبي زرع وبنت أبي زرع. في الولد قالت إيه: «مُضْغُ كمسلِّ شطبة»، مش مهم دلوقتي هعرفها يعني، ينام في حته قد إيه؟ خط كده، أرسم له خط ينام عليه، يبقى الولد رفيع. لما جت في البنت قالت إيه: «طوع أبيها وطوع أمها، وملء كسائها، وغيظ جارتها»، يعني ايه ملء كسائها؟ بدينة! فالعرب كانت عند العرب كدة تمدح المرأة البدينة ويمدح الرجل النحيف، ما عندهمش رجالة تاكل كتير.
عشان كده لما واحد من السلف قيل له: الرجل يأكل الأكلة؟ فقال: طعام المتقين. واحد بياكل مرة في اليوم قال: طعام المتقين. قيل: يأكل أكلتين؟ قال: طعام المؤمنين. قيل: يأكل ثلاث أكلات؟ قال: قولوا لأهله أن يبنوا له مِعْلَفاً! ده مش بني آدم! إحنا طبعا إيه؟ ثلاث أكلات وفي النص كده إيه؟ يعني اللي ياكل ثلاث مرات ده ده مش بني آدم، الله المستعان! مين بني آدم هنا؟ ما فيش بني آدمين! فهو ده كان العرب، العرب زمان كان الرجال لا تاكل كثيراً.
بعيداً بقى عن النَّهَمة وأنه باكل كتير وكدة، لكن ده دليل على إيه؟ على أن المرأة أكلها كويس. «إن أكل لف، وإن شرب اشتف» يعني جزتها، «وإن اضجع التف»، وده بقى معنى الحوار: «وإن اضجع التف»، نجي وقت النوم بقى، يكور ودي وشه الناحية التانية وما يتكلمش وما يعرفش عني حاجة. أنتوا عارفين يا جماعة، هذا الوقت بالذات هو من أهم الأوقات للمراة في الحوار، وكأنه جائزة اليوم للمراة.
طبعا أنا ما بتكلم عشان بس كل ممكن الناس تسقط على البيوت عندها، مش لازم يعني الصفة دي بتبقى صفة غالبة، يعني مش لازم كل النساء كده، مش لازم، لكن غالب النساء كده؛ غالب النساء كده يحبوا يتكلموا ويحبوا الحوار، والوقت ده بالنسبة لها لا، هو مش زي أي وقت، اللي هو وقت قبل النوم ده كأنه المكافأة بقى، أن المرأة طول اليوم تعبانة وشقيانة، فتلاقي رجل يحاورها، يسمع لها، لأن كمان ده وقت البث، أن هي بقى إيه، جاية بقى إيه عاوزه تبث أموراً، سواء بقى حزن أو زعل من حاجة أو تبثه حبها أو كذا، هو ده ده الوقت بتاع ده.
وعشان كده المرأة دي قالت كده، قالت: «وإن اضجع التف، ولا يولج الكف ليعلم البث»، فإحنا مش بنشرح بقى غير اللي لنا هنا، فهنا برضُ بتتكلم عن إيه؟ عن الحوار، «وإن اضجع التف» ما بيتكلمش ولا يعرف عني حاجة ولا أعرف عنه حاجة. بمصطلح حديث بقى «التف دي» يعني إيه؟ فتح تليفونه وقعد يسكرول لغاية ما ينام على الفيسبوك ولا على رسايل الواتساب، طب والمراه اللي معاك ولا غله! «وإن اضجع التف» فدي كمان امرأة أهيه بتشتكي من الحوار.
إحنا ده كله عشان نفهم أهمية الحوار. آخر واحدة ناخدها هي أم زرع، وأم زرع بقى يا جماعة لما نتأمل، نتأمل أبا زرع، هنجد حاجة عجيبة جداً. الأول نفهم شوية كلام كده لأن هنرجع له تاني إن شاء الله، أبو زرع لأنه يعني قصة لوحده. أم زرع قالت إيه؟ قالت: «زوجي أبو زرع، فما أبو زرع! أناس من حلي أذني، ومَلأ من شحم عضدي، وبجَّحني فبجَّحت إلي نفسي».
يعني ايه بتمدح الراجل؟ بتقول: لبسني سيور من حلي أذني وأذنها بقت تتحرك بالحلقان والحاجات دي. «ومَلأ من شحم عضدي» يعني سمنت عنده، ماشي. «وبجَّحني فبجَّحت إلي نفسي»، في رواية الصحيح بالتخفيف، خارج الصحيح رواية النسائي: «وبجَّحني فبجَّحت إلى نفسي» يعني ايه بجحني فبجحت إلى نفسي؟ عظَّمني في نفسي فعظمت نفسي عندي، هذا معنى «وبجحني فبجحت إلي نفسي»، يعني طول ما هو قاعد: ده أنتِ ست الكل، ده أنتِ ما فيش زيُّك، ده أنتِ اللي ما شفتش... مش عارف إيه، هو ده معنى بجحني فبجحت إلي نفسي، يعني عظمت في نفسي.
أنتوا عارفين يا جماعة الكلمة تؤثر في المرأة أشد من تاثيرها في الرجل؟ مش معنى كده الرجل ما يحسش، لا، في رجل ممكن يموت كمداً من كلمة تتقال له، يموت، لكن الأشد والأسرع تأثراً بالكلام النساء، وعشان كده ما تلاقوش عمركم راجل يفقد عقله مثلاً من كلام واحدة مغنية، اه، ممكن بعيد عن الحلال والحرام دلوقتي، ما بتكلمش عن حلال والحرام، بتكلم على تأثر نفسي، إنما ممكن تلاقوا امرأة تعشق المغني من إيه؟ هي لا تعرفه، ولا تعرف أخلاقه، ولا تعرف طباعه، ولا بالكلام فقط! بالكلام. لما عبد الحليم حافظ مات، ستات انتحرت! مش كده؟ ممكن ده بكلام، هو ما حد... يعني مين اللي عشر عبد الحليم ولا عفواً أي حد، يعني مش عاوز أجمع اسم بعينه، تعرف طباعه إيه ولا اخلاقه إيه ولا هطق ولا مش ولا تعرف عنه حاجة، امال بايه؟ بالكلام.
هل ده ليه أثر في الشرع؟ أه موجود، النبي عليه الصلاة والسلام ماذا قال لأَنْجَشَةَ الأول؟ أَنْجَشَةَ ده كان بيعمل إيه أصلاً؟ كان يحدو الإبل، مش كده؟ عارفين يحدو الإبل؟ ماشي بالليل بيسوق الإبل، يقعد إيه يقول أشعار للإبل عشان إيه تمشي بالليل وتأنس لصوته، هو ده أَنْجَشَةَ. طيب الإبل دي شايلة الهودج اللي فيه المرأة، فاللي هيسمع، الإبل ولا الإبل والمرأة؟ فماذا قال له النبي؟ «رفقاً بالقوارير يا أنجشة».
شوفوا يا جماعة النبي عليه الصلاة والسلام وإزاي يعني حريص على أدق التفاصيل دي؛ رفقاً بالقوارير! الكلمة تؤثر في المرأة تأثير عجيب جداً، ده ميزة ولا لعيب؟ إيه رأيكم؟ ميزة وعيب، مش كده؟ ميزة لو عرفت تدير الأمر ده صح، يعني أنت ممكن بكلمه ترفعها السما، خلاص تبقى هي تعبانة وهلكانة وشقيانة، كلمة واحدة تنسى كل حاجة حصلت، مش كده؟ فبس نعرف ندير ده. وعيب بقى لو دبش، يعني إيه دبش؟ يعني تدخل المرأة عامله اللي ما يتعملش، وأنت تدخل مثلاً تشوف حاجة، أول ما تقوم عينك تقَع على حاجة غلط، تقول الغلط، فتحس إن إيه؟ كأنها ما عملتش أي حاجة! طب ما ده غلط، طب امتدح الأول وبعدين عندك عندك حاجة بقى، شوف الوقت المناسب انك تعرض الحاجة دي إمتى وإزاي، مش كده؟
عارفين تكنيك الساندوتش ولا مش عارفينُه؟ حد هنا شغال في الإدارة؟ ده تكنيك فعلاً يعني في الإدارة يعني أما ه... أه، أما تيجي تدي... يعني إيه تغذية رجعية لحد، فيدباك لحد، تستخدم التكنيك ده. عندك واحد ابنك –خلينا بقى ناخد بلاش إدارة وكده– ابنك، مرتك، فانت شفت حاجة عاوز تقول عليها يعني محتاجة تحسين، ما تدخلش تخبط كده على على طول، الأول تقول حاجه كويسه، ماشي، وتثني عليها وتقعد تتكلم في الحاجة، وبعدين في النص تروح قايل الحاجة اللي إيه اللي أنت عاوز تقولها، وما تسيبها للحالة النفسية دي، تختم بحاجة إيه؟ كويسة.
برضو ماشي، ده تكنيك معروف في الإدارة، بيسموه كده إن أنت بتقول حاجة كويسة، وبعدين الحاجة اللي فيها تعديل أو فيها تحسين، منطقة تحسين يعني، وبعدين تختم بحاجة برضه كويسة؛ عشان اللي قدامك ما يقومش بنفسية تعبانة.
فالشاهد، يبقى أبو زرع عمل إيه بقى في أم زرع؟ آنسني من حلي أذني، وملا من شحم عضدي، وبجحني. خليكم بقى ركزوا عشان المفاجأة جاية، ها، وبجحني فبجحت إلي نفسي، طول ما هو قاعد مطلعني السما كده، لدرجة إن أنا صدقت نفسي وبقيت إيه، أنا الهانم، أنا ست الكل.
شوف المفاجأة دي يا جماعة، وجدني في أهل غنيمة بشق، فجعلني في أهل صهيل وطيط، ودئاء ومنق، مفهومة؟ طيب، يعني إيه أبو زرع لما راح يتجوز أم زرع كانت هي حالتها عاملة إزاي؟ أهل غنيمة بشق، يعني بيتنا عندنا غنيمة، تصغير غنمة، مش غنمة كمان، أنتم عارفين يا جماعة العرب كانت لا تمدح الأغنام، يعني العربي عنده الغنم ده مش من المال اللي يمدح، وعشان كده كان عندهم مثل يقولوه، يعني لما يجي يدعو على واحد يقول له إيه، يقول له: إن كنت كاذبا فحلبت قاعدا، فهمتوا؟ يقول له لو كداب الهي تحلب وأنت قاعد، لأن اللي بيحلب وهو قاعد مين؟ اللي بيحلب إيه، غنيمة، يعني إن كنت كاذبا الهي يبقى مالك غنم، ماشي، فالغنم ما كانوا يمدحوه قوي العرب يعني، يعني غيره أنفس منه وأثمن وكده يعني.
طيب، هي بيتها كان عامل ازاي بقى قبل ما تتجوز أبا زرع؟ وجدني في أهل غنيمة، يعني بيتنا كان فيه، مش غنم بقى كمان، طب مش غنمة، غنيمة، يعني غنمة صغيرة، طب البيت شكله إي بقا، كم أوضة وبشق، شق في الجبل، يعني قاعدين في غار، مغارة في جبل، وعندنا غنيمة أو بشق، يعني نحيا بشق الأنفس، حياتهم كرب.
خلاص، فجعلني، خدني وأنا حالتي كده، في أهل صهيل، بقا عندي خيل، وطيط، إبل، ودئاء، زرع، ومنق، أما اللي هو المنخل، أومق، اللي هو الدجاج، والدجاج برضه ماهواش من المال اللي يمدح عند العرب، فقالوا لا، ده كان بيهش الدجاج عن الزرع، يعني ماشي.
المهم يعني نقلها نقلة ما تحلمش بيها، مش كدة؟ تعالوا بقى كده نتأمل الألفاظ دي، دلوقتي يا جماعة واحد الأول أبو زرع ده يعني كان الأول مثلا مش لاقي اللقمة، وبعدين بقى غني فجأة؟ فهو أصلا حياته كانت كرب وعاش الحياة دي؟ لا، ده باشا ابن باشا، فين الدليل؟ أم أبي زرع فما أم أبي زرع، عكومها رداح، وبيتها فساح.
العقوم زي الحاجات اللي بتشيل فيها الخزين وكده، رداح يعني واسعة جدا، يعني عندها خزين كتير، وبيتها فساح، فهو من سلالة أكابر أبو زرع. طيب، وراح اتجوز واحدة بالحالة دي، أهل غنيمة بشق، الفرق الاجتماعي ده يصحبه فروق كتير جدا، يعني أنتم متخيلين يا جماعة أبو زرع، أم زرع لاقاها بتتكلم نفس لغته ونفس حواراته ونفس دماغه؟ قطعا لا، من غير، قطعا لا، يعني دي ما فيهاش كلام، ده إاحنا ما بنتكلمش في الاتنين من طبقة متوسطة، لكن إيه مثلا هو عايش مثلا في حتة حش، يزعل بقى، وهي في حتة أقل شوية، لكن الاتنين طبقات متوسطة، لا، إحنا مش بنتكلم في كده، مش بنتكلم في ده، ده إحنا بنتكلم في واحد من الأثرياء وراح خد واحدة من عشة، من حتة، أنتم فاهمين الفرق عامل إزاي؟
هل أبو زرع ما شافش من أم زرع حاجات يبغضها أو ينكرها عليها أو تزعلوا أو ماهياش ثقفت ولا عشت ولا بئة؟ قطعا شاف. قطعا، تعمل إزاي؟ أنا مستغرب جدا على فكرة، يعني الموقف ده ما يعملوش أي حد، ده رجل نفسيته حديدية، لدرجة إن هي بتقول إيه بقا؟ آه، بتقول وبجحني كمان، يعني هو كانه برده يا جماعة هو كان أبا زرع فاهم قوي نفسية البنت اللي أنا واخدها دي، وأكيد هي شايفة أنا فين وهي فين، محتاجة إيه؟ يعني محتاجة تسمع كلام كتير يسد الحته دي، يعني لو أنا كنت واخد واحدة قريبه مني ممكن ما أقعدش أقول لها الكلام ده كله، هي أصلا شبعانة، شبعانة نفسيا، مش محتاجة قوي تسمع، إنما أكيد هي مهزوزة، وهي عايشة مع أبي زرع مهزوزة جدا، يعني من اللي شافته واللي دخلته فجأة، وإيه، واحدة كانت عندها غنيمة يعني إيه، يحلبوا ويكملوا عشاهم، نوم مش مكفي، مش بشق أروشين الأرض ونايمين كده في غار في الجبل، فجأة تتنقل النقلة دي، فنفسها طبعا مهزوزة جدا.
من كتر ما بيكرر على أذنيها كلام عظمها بيه وفخم بيه، هي بتقول ده بجحني فبجحت إلي نفسي، صدقت إني هانم، صدقت إني ما فيش، أنا ست الكل.
طيب، الكلمة بقى اللي تعنينا هنا في الحوار، وهي عجيبة برضه، فعنده أقول فلا أبح، الله أكبر، شايفين الجمال؟ فعنده أقول فلا أبح، بتكلم براحتي، في مأمن، بقول أنا عايزاه، رأيي ما بيتسفهش، ما يبصليش بصة من فوق لتحت كده، وكأن أنت مين أنت عشان تتكلمي ولا أنت بتقولي إيه، ولا، وأنا بقول لكم يا جماعة، يعني قطعا بهذا الفارق هو سمع منها كلام ما يساويش عنده ثلاثة نكلة، قطعا، لكن إزاي يتعامل مع المرأة؟ لأن في الآخر أنت لو المرأة نفسيتها تحسنت خلاص البيت كله هيعيش في هدوء وسكينة، المرأة نفسيتها دمرت البيت كله يدمر، كل البيت.
فأنت بتستثمر في زوجتك، يعني مش ليها بس، مش هي بس اللي، لا، هي لو نفسيتها حسنت أنت كمان هتعيش حياة طيبة، لأن ده في الآخر هيعود عليك. خلاص، أنا طبعا هنا يا جماعة عمال أكرر، أنا بتكلم في الغالب، ما بتكلمش في الحالات اللي بقا محتاجة واحد طبيب نفسي أصلا تروح له ولا خالص، أنا بتكلم في بيت مستقر، امرأة متزنة، رجل متزن، فده من احتياجات المرأة انها تتكلم، انها تتكلم، فقالت فعنده أقول فلا أبح إلى آخر ما قالته، هننجيله بقى بعدين إن شاء الله.
فشايفين الحوار واخد مساحة قد ايه في كلام النساء؟ خلوا بالكم، ده في نساء في النص اتكلمت في حاجات منها الحوار، لكن مش بألفاظ مباشرة، فما عرجنا، لم نعرج عليها الآن؛ لأن إحنا عايزين نتكلم في الحوار كحوار بقا، يعني.
فالحوار عند المرأة عظيم جدا، فيبقى دي حاجة من الحاجات اللي لازم ننتبه ليها، وقلنا المره اللي فاتت، معلش هي بس فايدة مهمة قلتها أعدها في دقيقة بسرعة، اللي هو لما تيجي تحاور المرأة أو الرجل، انتبه إن أنت طرفين، الحوار طرفين، يعني إيه؟ يعني زي ما أنت ليك احتياجات في الحوار، اللي قدامك ليه احتياجات في الحوار، يعني إيه؟ يعني مش طول القعدة أنا بتكلم عن نفسي وعن احتياجاتي.
الصوت عند النساء، الصوت عند النساء، إحنا في ساعة إجابة، ولو دعونا عليكم وهنا ناس كتير عاوزة تأمن، يعني هي مستنية الدعاء، فالصوت عشان ربنا يكرمنا كده، كنا بقول إيه بقا؟ إحنا في ساعة إجابة، مش كده؟ فالحوار طرفين، فبلاش تبقى أنت قاعد عايز الحوار كله بيدور في فلكك.
ادينا مثال المره اللي فاتت، خلينا ناخد مثالين، المثال بتاع المره اللي فاتت ومثال تاني عشان نفهم إيه بيدور في فلكك، مثال، يعني شبيه، يعني المثالين حصلوا للنبي عليه الصلاه والسلام مع اثنين من أزواجه.
الأول، النبي عليه الصلاه والسلام أكثر زوجة كان بيحبها مين؟ غلط، خديجة، أكثر واحدة النبي كان بيحبها خديجة، صلى الله على النبي محمد ورضي الله عن خديجة، لكن أكثر واحدة بقا عائشة بعد موت خديجة بقا خلاص، هو النبي بيتجوز عائشة بعد موت خديجة، عشان كده أكثر واحدة كانت عائشة بتغير منها مين؟ خديجة، مع أنها ملحقتهاش، يعني خديجة كانت ماتت خلاص، لكن عائشة كانت بتغير من خديجة جدا، ليه بقا؟ عشان العقل، أنتم عارفين يا جماعة المرأة بطبيعتها عندها عاطفة جياشة، إنما العقل مش عند كل امرأة، خديجة كانت امرأة عاقلة ولذلك هي كملت من النساء، رضي الله عن خديجة بعقلها.
فهاديك مثالين، منهم مثال قلنا المره اللي فاتت عشان نفهم يعني إيه اللي هم بيسموه بقا إيه، سيلف سنترد، عارفين اللي هو اللي هو واحد شخصية بيبقى أنا، هو أنا كل حاجة، فواحدة من علامات الشخصية دي إن هو طول القعدة بيتكلم عن نفسه، يتكلم عن إنجازاته، يتكلم عن مشاكله، يتكلم عن أحاسيسه، عن أحلامه، عن طموحاته، فتلاقي أنت لو قعدت معاه مئة سنة هو الحوار بيدور، هو ده شيء مرهق، مش كل واحد بيتكلم عن نفسه يبقى سيلف سنترد، لا مش لازم، لكن دي واحدة من علامات، يعني لو، يعني الناس اللي كده.
قلنا المثال بتاع المره اللي فاتت، إزاي النبي عليه الصلاه والسلام لما كان بيتكلم عن نفسه، فراحت عائشة ساحبة الكلام على نفسها، فالنبي عليه الصلاه والسلام راح معاها لنفسها، ما قالش أنا بتكلم عن نفسي، فاكرين قال إيه؟ وراساه! تعبان النبي عليه الصلاة والسلام بيقول وراساه عنده صداع، فرأت عائشة قالت بل أنا وراساه، طب هو وراساه يعني عاوز إيه اللي يسنده والطب معلش طب، قالت بل أنا وراساه!
فكان ممكن الحوار يمشي إزاى لو راجل ومراته دلوقتي؟ هو أنت البعيدة ما بتحسش؟ يعني أنا بقول لك دماغي وصداع، بدل ما تجيبي لي اتنين بنادول! كان ممكن يمشي كده، لا، النبي عليه الصلاه والسلام إزاي بذكاء وبحكمة وتلاقوا عارفين يا جماعة الآية يسموها إيه كده، يعني هو الفلو ماشي، يعني ما فيش حاجة وقفت، يعني ما تحسست إن في حاجة، لا، قالت بل أنا وراساه، فقال: «وما يضرك أن أنت مت قبلي»، خد الكلام عليها وخلاص، ابتدينا نتكلم عن عائشة، والنبي عليه الصلاه والسلام خرج من حيز نفسه صلى الله عليه وسلم.
شبه الموقف ده حصل مع خديجة، شبه الموقف ده لما النبي رجع عليه الصلاه والسلام وقال: زملوني زملوني، فخديجة على طول الكلام كله على مين بقا هنا؟ على النبي على طول، وتقعد بقا توسيب كلام جميل كده، قال: «كلا والله لا يخزيك الله أبدا، انك لكذا»، تحسوا كده، آه، لما أحتاجها لقاها، فاهمين ده؟
وبعدين ورقة بن نوفل يجي، هو جيل ورقة، بعتت له، يعني الموضوع يا جماعة إيه، لا، جوزي دلوقتي في حالة، طب هو هيبقى محتاج إيه دلوقتي؟ هعمله اللي هو محتاجه، فخديجة كانت يعني علامة في هذه المنطقة، عقل كبير خديجة رضي الله عنها، ده في النساء قليل.
أنا ليه برضه بقول ده يا جماعة؟ علشان برضه الراجل ما يطلعش هنا بتحلم انك تلاقي خديجة، ده النبي عليه الصلاه والسلام يقول: «كمل من الرجال كثير ولم يكمل في النساء إلا أربعة»، أربعة في عمر الأرض، فما تطلعش من هنا عاوز تتجوز واحدة زي خديجة، بس نبقى فاهمين، يعني لو لقيت شيئا من ذلك في امراتك فاحمد الله، وخطاب بقا للمراه إنها إذا عرفت ذلك اجتهدت أن تنال شيئا من ذلك، يعني مش هنقول يبقى عندها بقا عقل، لا، بس على الأقل يبقى عندها شيء من ده، يعني مش كل مره تط، لا، يعني ماشي، مرة اتنين، وتيجي مرة في النص كده غلطة تصلح الدنيا، وتشوف الراجل محتاج إيه دلوقتي وتعمله له وكذا وكذا.
قطعا زي ما قلنا أبو زرع شاف ده، ولكن تعامل معه إزاي؟ زي ما قلنا لكم إن هو ما كانش بيخليها تلاحظ أصلا إن في فرق كبير كده.
بالمناسبة بقى قبل ما نخد من الحته دي، أنسب الأمور يا شباب ويا بنات بلاش تاخدوا ناس فرقة عنكم في المستوى، طبعا هو بداية، الأسب، الانسب إن الراجل يكون هو اللي إيه، يعني الفرق في صالح الرجل، ده الأنسب، إحنا بنقول الأنسب، يعني إيه الأنسب؟ عكسه مش حرام، مش بنقول حرام، خلاص، وإن كان في الكفاءة، يعني عند الحنابله مثلا الكفاءة حاجتين وزودوا كمان ثلاث حاجات، منها مثلا الصناعة، ومنها اليسر أن يكون الرجل موسر، يعني بس مش وقت فقه دلوقتي، إحنا لأن فيها خلاف دي، كله فيها خلاف، فمش بنحمل حد على قول موجود في الفقه.
لكن الرجل لو كان هو الأقل من المرأة في الغالب بتحصل مشاكل، في الغالب، أنا بقول لكم كده عشان اللي لسه هيختار، اللي اختار ما يستهبلش، هو أصلا قرفان، بنقول لك لا، يبقى اللي لسه هيختار نقول له: اختار واحدة تكون أقل منك في المستوى الاجتماعي، أقل بحاجة بسيطة، مش كتير، ده اللي إحنا عاوزين نقوله بقا دلوقتي، إنه يبقى أقل بشيء بسيط، مش كتير.
ليه مش كتير؟ علشان لو هي أقل كتير، يعني أنت في مستوى معين وهي في مستوى تاني خالص، هتشوف حاجات ممكن ما تستحملهاش، وبعدين أنت مش رايح تتجوز واحدة وهتروح تعيش بيها في كوكب تاني، أنت هتتجوز واحدة وهيبقى أخوها خلان ولادك، وهتاخد وتروح تزور أبوك وأمك، فيحصل تفاصيل كتير وتداخل كتير، فالأفضل أن يكون، أن تكونوا شبه بعض، هذا هو الأفضل.
هل معنى كده أن كل واحد خد واحدة أغنى منه حياته لا؟ خديجة كانت رضي الله عنها هي الأغنى، ولا النبي أغنى؟ هي كانت تاجرة وهو أصلا بيتاجر في مالها صلى الله عليه وسلم، والحياة كانت زي الفل، مش كده؟
أحد الدعاة المعاصرين يحكي حكاية عجيبة.
كان الرجل مليونير وقتها، وكانت حاجة دلوقتي يعني غلبان يعني لا. يعني وقتها يعني هو كان بيحكي الحكاية دي مثلاً من إيه؟ 20 سنة، 25 سنة، فيقول يعني راجل مليونير وعنده بقى تجارات ومحلات وكده وعنده عامل بسيط جداً، لكن عجبته دينه وأخلاقه فضل متابعه كده راجل يعني إيه ما فيهوش غلطة. هذا الشاب راح عد مجوزه بنته.
الراجل بقى ما حتوش اللضا، عامل عنده في المحل، وجوزه بنته، اللي هي بنت الإيه؟ بنت الأكابر، بنت التاجر الكبير. وبعدين مرت السنين، وجاله أبوها بقى اللي هو التاجر ده، جه لجوز بنته ده قال له: يا ابني بقى بطل إيه؟ بطل طول ما يعني على طول جايب لحمة في البيت وبتاع وفراخ وديوك وبتاع، يعني إيه خف شوية.
فالراجل طخف، فراخ إيه ولحمة! الراجل ما يجيبش حاجة، ما هوش فلوس أصلاً. فقال له: هو إيه اللي حصل بس؟ قال له: بنتي كل ما تجينا زيارة، أقعدي يا بنتي كلي، تقول لهم: لا ده أنا جوزي مشبعني، والله ما طايقة اللحمة ولا الفراخ ولا مش عار.. كل ما تجيلهم، وهو جوزها لا بيجيب لحمة ولا فراخ ولا حيلته حاجة يجيبها أصلاً.
وقطعاً البنت يعني قول مثلاً جدعة لمدة شهر، إثنين، ثلاثة، وبعدين هتنخ بقى، يعني لا، فضلت كده يعني تشتهي هذا الأكل وما بتمد إيدها عليه، وتقول لهم: جوزي مش شبعني، مش مخليني نفسي في حاجة. ففي كده في النماذج دي موجودة يعني من النساء.
آه في النماذج دي موجودة، لكن ده الغالب حقيقهً؟ لا مش الغالب. طب ده عيب؟ لا مش عيب، عشان برضو يعني واحدة امرأة هي خلاص اعتادت على شيء. خلي بالك يا جماعة، أنتوا عارفين المشكلة فين يا جماعة؟ إن نزولها عن الشيء، هي مش بتشوف إن هي إن كانت في رفاهية زيادة ونازلة، هي مش هتشوفها كده، هي بتشوفها إن هي أنت بتنزلها عما اعتادته. فاهمين الفرق يا جماعة؟
يعني هي هي خلاص واحدة متعودة، كل ما بتنزل مثلاً هتروح مشوار هتطلب عربية أي تطبيق من التطبيقات، أنت راجل ما شاء الله الأتوبيس النقل العام، ونصك بره ونص جوه ماسك في الحديدة. يعني هي مش كده، هي ما عشتش العيشة دي، ماشي؟ فهتاخدها، طب وبعدين؟ وبعدين، فالأفضل يبقى أنت اللي أعلى، يبقى أنت اللي أعلى في المستوى الاجتماعي، في المستوى المادي، في المستوى حتى التعليمي الثقافي، وما يبقاش بكتير علشان ده بيعمل إشكال وده بيعمل إشكال. خلاص، فانتبهوا للحته دي.
طيب حضرتك بقى ما سمعتش لمراتك، هيحصل إيه؟ هيحصل قاعدة أنس زي اللي احنا شايفينها في الحديث كده، يعني حضرتك ما حورتهاش، هي هتسكت؟ هي مش هتسكت، يعني أو تفتكر أن أنت إيه ما قعدتش وسمعت فهي هتسكت؟ لا، هي هتتكلم، ماشي؟ تتكلم بقى فين ومع مين؟ دي القنبله الموقوتة اللي هتعرفها بعدين، إنما هي مش هتسكت، ماشي؟
فأنت ممكن تنام وتصحى تلاقيك متكلم على الفيسبوك، يعني يا ريت مثلاً في مجلس خاص بقى، لا. فيحصل بقى أعرض مجلس زي اللي حصل، جلس إحدى عشرة امرأة، فتعاهدن وتعاقدن ألا يكتبن من أخبار أزواجهن شيئاً، فتلاقي المرأة تروح إيه؟ تقعد مع بعض النساء صاحباتها بقى، زميلاتها. المصيبة الكبيرة الموجودة الآن الجروب اللي هي موجودة على الفيسبوك، ماشي؟ اللي بتشجع النساء على الطلاق وكده، وكثير من النساء بيوتها اتخربت بسبب المجموعات دي. خلاص أنا شفت حاجات والله العظيم يعني حاجات ترعب، ترعب! المرأة دخلة بتسال سؤال عادي، ممكن كله بيقولها: اطلقي! سؤال عادي جداً.
فيعني المهم هتتكلم مع مين وفين؟ ما تعرفش. وزي ما قلت لكم من شويه، الكلمة بتأثر جداً في المرأة غير الراجل، يعني ممكن الراجل، إذا كان الراجل يا جماعة ممكن أصحابه يقعدوا معاه يسخنوه، يرجع إيه؟ يجيب البيت عليه ويضرب الست، وده راجل، راجل يعني المفروض يعقل الكلام ويوزن ويشوف ده صح ولا غلط، ومع ذلك بيحصل كده، صح ولا لا يا شباب؟
ما بالكم بقى بالمراه؟ ما بالكم بالمراه اللي كلمة توديها وكلمه تجيبها؟ فده اللي حصل، هنقعد الستات تقعد مع بعض، وده اللي بيحصل يا جماعة، وده اللي بيحصل يا بنات ويا نساء، فانتبهوا! النساء مش كلهم طيبين، يعني مش كلهم إيه نفسهم صافيه وكده، لا ده ممكن واحده تقعد تحكي إن جوزها ده يعني مهننة وهي مش طايقاه أصلاً، ولا بيعمل معها حاجة، لمجرد أنها تخرب على مين؟ على الباقي، يعني ده هدفها، مش هدفها مكسوفه مثلاً، لا، ده هو ده هدف ليها، ده موجود؟ آه، موجود في النساء وموجود وبكثرة.
ولذلك مما نص عليه الفقهاء في كتب الفقه، وتناقلوها في كتب الفقه، أن للرجل أن يمنع زوجته مخالطة النساء. قالوا لأن هن يفسدن عليه، هذا نص الفقهاء. يعني من تمام تربية الرجل لأمراته ومن تمام القوامة عليها أنه يحسن أخلاقها. مما نص عليه الفقهاء، ده له أن يمنع امراته مخالطة النساء، ما تخالط النساء كتير، لأنهن يفسدن عليه.
معنى كده أن أحبسها في البيت؟ أنا ما بقولش ده عشان بس لوازم الكلام، أنا لا لا يعني ولا يلزمني، لكن ده أداة في إيد الرجل، لو لقى أن المرأة لما بتقعد زوجتك صاحبتها الفلانية، كل ما تروح لها ترجع مقلوبة ومخنوقة مني. وممكن برضو يا جماعة دي في حاجة مهمة جداً، أن مافيش حد كامل في الدنيا، مافيش حد كامل في الدنيا دي، فالرجل فيه مزايا وعيوب، المرأة بطيبتها مش شايفه عيوب الرجل، خلاص ربنا مقدر ده والحياة ماشية هادية وفي سكينة وكذا وكذا، تقوم راحة قاعدة مع صاحبتها تقولها: هو زي الفل وكل حاجة بس يعني هو إيه في الحته دي بس؟ أنت ما خدتيش بالك لما أبص لك؟ طب هي ما خدتيش بالها، أنت تخليها تاخد بالها ليه؟ يعني هي ما خدتيش بالها.
فترجع المرأة بنفسية غير النفسية التي ذهبت بها لهذه، طب أنت لاحظت أن كل مرة تروح لها ترجع حرنانة عليك ومتضايقه وشايلة مش عارف؟ هل لك أن تمنعها؟ آه، لك أن تمنعها، ما فيش مروح لفلانه دي تاني، ليه؟ لأنها تفسدها عليك. احنا ما بنتكلمش بقى عن إيه عشان برضو الكلام واحد ظالم وجبروت ومطلع عينها وكمان بقى ما تتقال رايح طه؟ مش ده المقصود، المقصود أن ده أداة من الأدوات اللي ممكن الرجل يستخدمه.
طب أشمعنى؟ عشان المرأة شديد التأثر بالكلام. خلاص، فيحصل بقى مثل هذه المجالس، أو تدخل في جروب بالجروب بتاع الفيسبوك وتدمر. أنا أنصح النساء اللي.. بصوا يا جماعة، الفيسبوك ده بالذات الفيسبوك، يعني هو زي ما يسموه واقع افتراضي، ماشي؟ يعني إيه؟ أنت واقع أنت اللي صنعته بنفسك، أنت صنعه لنفسك بنفسك، قلت لكم الكلام ده هنا قبل كده، مش كده؟ قلت لكم إن في الواقع الافتراضي أنت بتعمل إيه؟ فقاعة كده بتقفل على نفسك فيها، اللي مش عاجبك بتطرد بره الفقاعة بدوسة بلوك، مش كده؟ واللي عاجبك من بره الفقاعة بتدخله جوه الفقاعة بدوسة فولو، وصنعت لنفسك فقاعة قاعد فيها.
فالطبيعي جداً أنك مش هتلاقي حاجة تنغص عليك جوه الفقاعة، مش كده؟ يعني بعد سنة وثنين، خلاص هيأت الفقاعة بتاعتك بتاعة الفيسبوك دي، الطبيعي أن كل عمال تسكرول بالساعات كل اللي بتشوفه حاجة لا تنغص عليك، ليه؟ لأن المجتمع وردي. لا، أنت اللي جوه الفقاعة اللي أنت صنعتها لنفسك، بدليل أن واحد لو المنشورات بتاعتك بتضايقك منشور في الثاني في الثالث، بتروح عامل إيه؟ أنفولو، خلصنا، طلعته بره الفقاعة بتاعتك. ده مش الدنيا اللي احنا عايشين فيها، ده مش الدنيا.
طيب، أنا إيه ليه بقول بعيد الكلام ده دلوقتي؟ لأن كتير من النساء تقوم رايحة عامة إيه؟ متابعة للصفحات بتاعة النساء اللي بتتكلم بلسان نسوي. شئت أم أبيتي، هيصيبك شيء من ذلك، وتلاقي النساء دول يتكلموا على أن الست هي محور الكون، وأن الكواكب بتدور حوالين المرأة، وأن.. طبعا أنا أبالغ في الكلام، لكن أيوه هي بتخرج بالنفسية دي، هي بتخرج بالنفسية دي، ماشي؟
والعكس، أنا في ناس ذكورية في الرجال، العكس بقى نفس الكلام، بس أعكسه. والدين وسط، ديننا وسط، لا، كل واحد له حقوق وعليه واجبات، الموضوع بسيط ودغري: لك حقوق وعليك واجبات، وأنتِ ليكي حقوق وعليك واجبات. هتقعدي بقى ترمي ودنك للنساء اللي مخلاكي محور الكون، وأن الناس كلها تدور في فلكك، وأن أنت أهم حاجة في الدنيا، وأن من غيرك الدنيا تقع، وأن.. هيأثر على نفسيتك وهتدخل على بيتك بالنفسية دي، البيت هيدمر، ومش بعيد تلاقي جوزك بقى بيسمع للناحية الثانية ويبقى البيت إيه خلاص حلبة صراع.
الموضوع مش كده يا جماعة، الموضوع مش كده، أنا قلنا لكم قبل كده الرجل والمرأة احنا الاتنين في سباق نحو الله سبحانه وتعالى، نحو الله. قلنا لكم مشكلة النسويات، هم عملوا إليه؟ خلوا السباق نحو الرجل، هم بينكروا ده، هم بينكروا ده، لكن دائماً عقلهم الباطن اللي بيحركه هو الراجل، فتلاقي كل كلامها وهي بتكتب، هي بتققول لك: احنا محور الكون، وهو المحور عندها، الرجل عاوز أسبقه. طب أنت هو إيه اللي جابه في سكتك أصلاً؟ يعني هو مش في سكتك، فانت عاوزة ليه؟ تسبقي إيه؟ هو مش في سكتك، هو له مضمار وأنت لك مضمار، فشغلي نفسك بيه ليه؟
وقلنا لكم المره اللي فاتت، مش احنا هنيجي يوم القيامة ونلاقي نساء في الدرجات العالية من الجنان، في الفردوس الأعلى ولا الفردوس الأعلى محجوز للرجالة؟ في نساء في الفردوس الأعلى، وفي رجالة في درجات أقل في الجنة، مش كده أهو؟ يعني في نساء هتسبق رجالة، عاادي جداً جداً، بس في سكتها، ما تشغليش دماغك بالرجل في الحته دي خالص.
فاحنا رجل اتجوز امرأة ليه؟ علشان دي محطة في سباقنا لربنا سبحانه وتعالى. ما هو يا جماعة، لو احنا مش مش بنتجوز بالنية دي، فاحنا أصلاً بقى عاوزين نرجع نشوف احنا بنتجوز ليه. يعني احنا ربنا جابك الدنيا دي عشان تقعد فيها 60، 70 سنة، ولما قلنا في فيديو اسمه: يحسبها صح، مش كده؟ لما حسبناها، لأن هتلتقي أنت عايش 15 سنة مثلاً ولا حاجة زي كده، صح ولا إيه؟ يعني تقريبا أنت اللي عايشه مش 60 سنة، أنت اللي عايشه فعلا اللي تعرف تكتسب فيه حسنات أو سيئات هم 10 سنين 15 سنة. فاهمينها دي ولا يعني لو قلنا 60 سنة عندك، لو قلنا أن أنت بتنام لثلث لثمان ساعات في اليوم المتوسط، يعني في ناس تنام أقل أو أكثر، قول ثمان ساعات، الثمان ساعات دي قد ايه من اليوم؟ الثلث، مش كده؟ الثلث لـ 24 ولا إيه؟ فاهمينها دي ولا؟ الثلث لـ 24، مش كده؟
طيب، يعني ثلث عمرك رايح إيه؟ نوم. 20 سنة من 60 سنة نوم، 20 سنة نوم. طيب في مدرستك، وبعدين في جامعتك، وبعدين في وظيفتك، قول ثمان ساعات في اليوم، وأنا بقول لك إنه أكثر من كده، يعني أنا بقول لك أكثر من كده، لا يا عم، خليهم كمان ثمان ساعات ماشي في اليوم، ادي ثلث اليوم الثاني، يعني 20 سنة ثانيين، أنت ما بين دراسة وعمل، فبقى لك 20 سنة. شوف ال 20 سنة دول بقى منهم قد إيه أكل وشرب؟ منهم قد إيه هتقعد مش عارف مع مين؟ هتعمل؟
المهم يعني صفصفت على إيه؟ هي، قول يا عم حياتك ال 20 سنة دول، أنت عايش 20 سنة. ده غير أن في أصلاً ست سبع سنين في الأول أنت مش دريان بحاجة، يعني أنت من أول ما تتولد لغاية ما عندك سبع سنين، ثمان سنين أنت مش دريان بحاجة أصلاً. فانت عايش قد إيه؟ فتخيل بقى أنت في الشويه دول اللي عايشهم، ولا أنت الشويه اللي عايشهم شاغل نفسك بحاجات أنت مش مخلوق عشانها أصلاً! لا أنت مخلوقة عشان تثبتي أنك محور الكون، ولا أنت مخلوق عشان تكسر عين مرآتك، احنا مش عايشين.. يعني أنت يعني حاد بنا الشيطان.. شوف يا جماعة اللفظ النبوي: إن الشيطان آيس أن يعبد في جزيرة العرب، ولكن في إيه؟ في التحريش بينهم.
إن الشيطان آيس أن يعبد في جزيرة العرب، طب يسيب المسلمين؟ لا، في التحريش بينهم، يحرش بينك وبين صاحبك، وبينك وبين زميلك، وبينك وبين مرآتك. طب ما بقي من قلبك لربك اللي أنت أصلاً عايش عشانه سبحانه وتعالى؟ فانت ومرآتك في سباق إلى الله سبحانه وتعالى.
الأجمل من ده بقى، الأجمل من ده.. أصل في سباق ده يعني إيه؟ نحن نتنافس إلى الله، ده جميل، ده جميل، إنما الأجمل أنك أن كل واحد فيكم يأخذ الآخر وسيلة من وسائل الوصول إلى الله.
بيجي لنا شكاوى كتير الحقيقة من النساء، أن جوزها متدين وكل حاجة، طيب أنا عاوز أروح المعهد الفلاني أتعلم علم شرعي، ما فيش مروح. طب أدخل المقرأة الفلانية أونلاين؟ ما فيش دخول. طب مش عارف أعمل إيه؟ ما فيش، مش عارف إيه. طب إيه ده؟ طب أنت بتعمل كده ليه؟
سبحان الله، استثمر في مرآتك. يعني إيه استثمر في مرآتك؟ مرآتك دي لما تبقى خاتمة لكتاب الله عز وجل، وفي سبيل ده أكيد أكيد ممكن يحصل شويه تقصير في حق الزوج مثلاً بأي شكل وشكل، فتحتسب هذا التقصير أن لا، ما هو أنا ده عشان أنا مفرغة عشان تحفظ القرآن مثلاً، وهي ما تستهبلش، ما تعملش أي حاجة تقول: أنا بحفظ قرآن، لا مش كده، لكن لو فعلاً ده حصل يعني.
ماشي، طب مراتك بقت معلمة تعلم الناس قرآن، ولا تعلم الناس علم شرعي ولا كذا ولا كذا، فطبعا هيقطع من وقتها هذا الوقت، احتسب احتسب هذا الوقت. طب هتنزل فهتاخد فلوس عشان تركب وتروح المكان اللي بتعلم فيه، احتسب هذا المال، وخدها إن هي دي مشروعي في الدنيا اللي أوصل بيه ربنا أوصل بيه الجنة.
والعكس، زوجك مثلا لقيتيه بيحفظ القرآن، لقيتيه بيتعلم علم، لقيتيه يدعو إلى الله، فممكن يحصل تقصير شوية في حقك، تحتسبي هذا وتقولي هو ده اللي هوصل بيه للجنة، وهكذا. فيبقى النساء ياخدوا بالهم من الموضوع ده.
بقى موضوع الكلمة تؤثر؛ فأنتِ لو مش واخدة بالك ممكن كلمة إيه توديكِ وتجيبكِ، فنحاول نقلل من القعدة مع الناس التي تؤثر علينا سلباً، حتى لو كانت أمك، حتى لو كانت الست دي أمك؛ يعني أمك كل ما تقعدي معاها تقعد تنغص عليكِ وما بيعملش وما بيسويش، لا، ما فيش الكلام ده ماشي.
تمام، فضايح، هو بيقول عاوزين نقترح نعمل ده يعني ع من الستات فوق يقعدوا يقولوا يشتكوا بقى. طبعا هو في هنا برض حاجة، وهو غالب مثل هذه المجالس بتكون مجالس نساء؛ يعني في الغالب يا جماعة تلاقي الراجل في الغالب ما يعرفش يقعد مع صاحبه ويحكي عن أهل بيته، في الغالب كده يعني صعبة على الرجال إنه يقعد يجيب سيرة أهل بيته ماشي.
لا، الستات عادي، يعني هتلاقي الموضوع عادي جداً، ويدخلوا في تفاصيل، يعني أنا والله لما بيوصلني إن في كلام بيتقال أنا بتعجب؛ يعني أنتوا إزاي بتدخلوا في التفاصيل دي؟ حاجة عجيبة، وعندهم أريحية في ده، يعني شايفين إنهم بيعملوا حاجة غلط، هيجي معانا بقى الكلام ده، وعندنا فيها أحاديث، حته الكلام بالذات في أماكن في حتت معينة فيها أحاديث؛ يعني النبي صلى الله عليه وسلم نهى عنها، فبلاش أحسن، يعني مش من مصلحة الرجالة، أنت لو قعدت 10 دلوقتي الـ 10 هيسكتوا ولا واحد هيفتح بقه، أنا بقول لك، إنما الستات، اللهم سلم.
احنا يعني ايه هو بيجي مشاكل كتير طبعا، فانا بحاول اطلعها في وقت الدرس؛ يعني المشاكل اللي بتجي لنا برض في أسئلة أو كده، نحاول نقولها ونعالجها، فممكن ده يسد شوية من الموضوع ده. طيب، حد عاوز يقول لنا حاجة نستفيد بيها من اللي سمعه؟ المرة الجاية نبتدي إن شاء الله بأول واحدة، إن شاء الله.
ها، أي حد عنده أي فائدة هيشتغل عليها؟ اتفضل. كل واحد ياخد تاني وسيلة للوصول إلى الله سبحانه وتعالى، حتى لو ضحى ببعض حقوقه أو.. جميل، علي بيقول لنا إن فكرة أن أنا دلوقتي أنا بتجوز هشوف الجواز بشكل تاني؛ إن أنا ده مضمار جديد في السباق إلى الله سبحانه وتعالى، وإني ممكن أشوف زوجتي إن هي وسيلة للوصول إلى الله سبحانه وتعالى، تمام. اتفضل، والنساء برض كده. اتفضل.
في برض حاجة.. النفسية، واحنا موضوع إن أنت الصبر.. الصبر أصلاً موجود، الصبر، إحنا قلنا الصبر فين؟ ولا ده من عندك إنت برة؟ جميل، الصبر ماشي. إيه تاني؟ آخر حاجة، قول: الكلمة الكلمة الكلام بيفرق. اه، الكلام بيفرق بالذات عند النساء، يعني أنا الحقيقة الحتة دي هي فيها حواديت كتير، مش.. لكن خليني أقول لكم يعني حاجة واحدة بس حصلت قبل كده: رجل بيشتكي، بيقول دخل البيت فلقى علامة شفاه على التلفزيون، فراح هيضرب ابنه أو بنته حاجة زي كده، فالبنت صوتت قالت له: والله ده مش أنا، ماما أول ما شافت المغني الفلاني في التلفزيون راحت قايمة بايسة التلفزيون.
فالكلمة مؤثرة جداً في المرأة جداً، وأظن كان في كلام لواحدة يعني من السلف، لما سمعت الغناء قالت: لو كانت المرأة تحبل من غير رجل لحبلت من هذا الكلام. يعني لو قدر الله عز وجل أن امرأة من كتر ما هذا الكلام يؤثر في المرأة ماشي؛ فلا النساء ينتهبن لمثل هذا الكلام.
خلاص، قولي: سبحانك اللهم وبحمدك، أشهد أن لا إله إلا أنت، أستغفرك وأتوب إليك، والسلام عليكم ورحمة الله وبركاته.