الشيخ أمجد سميربسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذرياته وأهل بيته، كما صليت على آل إبراهيم إنك حميد مجيد. أما بعد، نبدأ دورة جديدة إن شاء الله نشرح فيها حديث أم زرع.
الأول نسرد بقى الحديث بطوله، هو حديث صعب شوية، ألفاظه صعبة، فنهنجع له بقى نمسكه واحدة واحدة إن شاء الله ونفهم ألفاظه مع بعض. الحديث في الصحيح، صحيح البخاري، من حديث عائشة رضي الله عنها قالت: جلس إحدى عشرة امرأة فتعاهدن وتعاقدن ألا يكتمن من أخبار أزواجهن شيئاً. قالت الأولى: زوجي لحم جمل غث على رأس جبل، لا سهل فيرتقى ولا سمين فينتقل.
نحن نلتزم بألفاظ الصحيح في سرد الحديث، وبعدين إن شاء الله واحنا بنشرح الحديث ناتي بغيرها من الألفاظ التي وردت خارج صحيح البخاري، خلاص. قالت الأولى: زوجي لحم جمل غث على رأس جبل، لا سهل فيرتقى ولا سمين فينتقل. قالت الثانية: زوجي لا أبث خبره، إني أخاف ألا أذر أن أذكره، أذكر عجره وبجره.
قالت الثالثة: زوجي العشنق، إن أنطق أطلق، وإن اسكت أعلق. قالت الرابعة: زوجي كليل تهامة لا حر ولا قر ولا مخافة ولا سآمة. قالت الخامسة: زوجي إن دخل فهد، وإن خرج أسد، ولا يسأل عما عهد. قالت السادسة: زوجي إن أكل لف، وإن شرب اشتف، وإن اضجع التف، ولا يولج الكف ليعلم البث.
قالت السابعة: زوجي غياياء أو عياياء طباقاء، كل داء له داء، شجك أو فلك أو جمع كلا لك. قالت الثامنة: زوجي المس مس أرنب، والريح ريح زرنب. قالت التاسعة: زوجي رفيع العماد، طويل النجاد، كثير الرماد، أو عظيم الرماد، قريب البيت من الناد. قالت العاشرة: زوجي مالك وما مالك، مالك خير من ذلك، له إبل كثيرات المبارك، قليلات المسارح، إذا سمعن صوت المزهر أيقن أنهن هوالك.
قالت الحادية عشرة: زوجي أبو زرع فما أبو زرع! أناس من حلي أذني، وملا من شحم عضدي وبجني، فبجحت إلي نفسي، وجدني في أهل غنيمة بشق، فجعلني في أهل صهيل وأطيط ودائس ومنق، فعنده أقول فلا أقبح، وأرقد فأتصبح، وأشرب فأتقمح.
أم أبي زرع فما أم أبي زرع! عكومها رداح، وبيتها فساح. ابن أبي زرع فما ابن أبي زرع! مضجعه كمسل شطبة، ويشبعه ذراع جفرة. بنت أبي زرع فما بنت أبي زرع! طوع أبيها، وطوع أمها، وملء كسائها، وغيظ جارتها. جارَية أبي زرع فما جارَية أبي زرع! لا تبث حديثنا تبثيثاً، ولا تنقص ميرتنا تنقيصاً، ولا تملا بيتنا تعشيشاً.
قالت: خرج أبو زرع والوطان تمخض، فلقي امرأة معها ولدان كالفهد يلعبان من تحت خصرها برمانتين، فطلقني ونكحها، فنكحها رجلاً سرياً، ركب شرياً، وأخذ خطياً، وأراح علي نعماء ثرياً، وأعطاني من كل رائحة زوجاً، وقال: كلي أم زرع وميري أهلك. قالت: فلو جمعت كل شيء أعطانيه ما بلغ أصغر آنية أبي زرع.
قالت عائشة رضي الله عنها: قال رسول الله صلى الله عليه وسلم: «كنت لك كأبي زرع لأم زرع».
حد يسمع بقى؟ طيب الحديث طبعا هو حديث عائشة، أصلاً كانت ألفاظها جزلة يعني، والحديث واضح جداً أن ألفاظه إيه يعني فيها حاجات بسيطة يعني صعبة، الباقي طبعا كله فاهمه، فنشرح واحدة واحدة كده مع بعض إن شاء الله. طبعا هذا الحديث حديث عظيم، والكلام فيما يبدو هيبقى موجه بالأساس للأزواج أو الشباب يعني الرجال، لكن لن يخلو أو لن نعدم فائدة توجه للنساء، وهنحاول نخرج من مما سيق الحديث من أجله لعموم التواصل بين الناس.
واحدة واحدة مع بعض بقى، قبل ما ندخل في الحديث عاوزين نطوف حول الحديث كعادتنا بقى ماشي. فأول الفوائد اللي هنبتدي بيها هو أن مين اللي بيتكلم في الحديث؟ السيدة عائشة رضي الله عنها، والمستمع هو النبي صلى الله عليه وسلم، وهذه أول الفوائد.
أول الفوائد يا شباب أن يكون في حوار في بيوتنا، أن يكون هناك حوار في البيوت، الرجل مع امرأته، الوالد مع ابنه، الأم مع البنت، الأم مع الابن، في حوار، في لغة حوار في البيوت. دلوقتي يا جماعة السيدة عائشة رضي الله عنها على صغر سنها وبتكلم النبي عليه الصلاة والسلام، وهو نبي الزمان صلى الله عليه وسلم، والمشغول بقى بأعباء أولاً أعباء الأمة، عنده دعوة إلى الله، وعنده إذاء بيقع عليه، وعنده منافقين، الكلام ده كان في المدينة، عنده منافقين بيكيدون به، ويهود حوالين المدينة، وعرب عاوزين يجوا يستأصلوه، وقصة كبيرة مش كده؟ وبعدين عنده بقى صحابة بيربيهم، وعنده بيت ولا اثنين، يعني هو عنده زوجة ولا اثنين، كام؟ تسعة! مشاكل ضخمة جداً في حياة النبي عليه الصلاة والسلام، وبعدين عنده بقى علاقته بربه سبحانه وتعالى، يعني ده كل كوم، ما هو مأمور في القرآن بايه؟ ﴿فَإِذَا فَرَغْتَ﴾ ارتاح بقى ونام ولا ربنا قاله: ﴿فَإِذَا فَرَغْتَ﴾ خلصت بقى كل ده أنت رايح فين؟ ﴿فَإِذَا فَرَغْتَ فَانصَب﴾ مش كده؟ يعني إذا فرغت من مشاغل الدنيا على أحد التأويلات، أو أحد التأويلات في الآية، إذا فرغت من مشاغيل الدنيا فانصب في أعمال الآخرة.
خلاص فده كله ورا النبي عليه الصلاة والسلام، فتاتي له هذه الجارية حديثة السن زوجة عائشة رضي الله عنها، وتقعد تحكي له حدوتة كبيرة، حدوتة كبيرة. بعد ما خلصناها كده ممكن حد دلوقتي يقول: وحشاها ده هذا الكلام! مش إسقاط على عائشة رضي الله عنها، لكن إسقاط على واقعنا احنا، يجي الراجل يقول إيه: ده كلام فارغ وأنا فاضي الكلام ده؟ عائشة رضي الله عنها قاعدة بتحكي للنبي حكاية صلى الله عليه وسلم، تقول له: جلس إحدى عشرة واحدة، وقعدوا إيه كل واحدة تجيب في سير جوزها، فالنبي عليه الصلاة والسلام يسكت خالص ويستمع لعائشة رضي الله عنها. وبعد ما تخلص عائشة الكلام نكتشف حاجة أعجب من أنه قاعد بيستمع، أنه مركز! ما هو ممكن دلوقتي الراجل إيه داخل من بره الست إيه مسكته من على الباب، يعني هو يعني اصلي حصل كذا... جميل، وبعد ما تخلص بقى تقول له: ها إيه رايك؟ طبعا ده الفخ بقى، مش مركز في حاجه يعني هو مديها ودنه أو مش يعني هو خلى يعني هي بتتكلم جنبه، فتتقول له إيه رايك؟ فهو يقولها: بس آخر حته بس عيديه لي تاني بس عشان يلقط أي حاجة ويقولها، لا ده هو مركز النبي عليه الصلاة والسلام في كل حرف، ومش بس مركز، حاجة بقى أعجب من الاثنين أنه بيستمع، مركز، فهم رسالة المرأة!
هو مركز، هو الأول سمع أول حاجة، ودي في عصرنا عجيبة لوحدها، يعني إيه راجل بيسمع لمراته؟ دي عجيبة، وبعد ما سمع اكتشفنا أنه مركز، ومش بس مركز، ده فهم من الحدوتة الكبيرة قوي دي هي أصلاً عائشة عاوزة يعني إيه الرسالة اللي بتوصلها لي؟ إيه دليل اللي أنا بقوله ده؟ رد النبي عليه الصلاة والسلام في الآخر، رواية الصحيح أن عائشة بعد ما خلصت الحكاية الطويلة دي قوي، طبعا الحكاية اللي هي مش مفهومة لينا، لكن الخلاصة أن أبو زرع آخر واحد ده كان احسن واحد في الإيه في الـ 11 يعني، خلاص، لكن هو في مشكلة أنه طلق مراته، دي مشكلة، هو احسن واحد ليها طلقها، وهي اتجوزت بعده، واللي بعده ده طلع واحد زي الفل برضه يعني ما فيهوش مشاكل خالص، لكن بتقارن بتقول لا يعني بعد كل اللي عمله لي الثاني ده ما بلغ أصغر آنية أبي زرع، يعني أبو زرع برضه في حته لوحده كده كان معاها يعني.
فالنبي عليه الصلاة والسلام يعمل إيه؟ يرد رد في جملة واحدة، نفهم منها كل اللي أنا حكيته ده بقى، أنه سمع وانه كان مركز، وانه فهم مراته عاوزة تقول له إيه أو عاوزة تستخرج منه إيه. قال لها في رواية الصحيح: «كنت لك كأبي زرع لأم زرع»، وخارج الصحيح: «غير أني لا أطلقك». لما أقول خارج الصحيح يا جماعة مش مش يعني مش ضعيف، مش معناها أنها زيادة ضعيفة، لكن هذه زيادة ليست في البخاري بس عشان أنا يعني التزمت لفظة صحيح البخاري فقط يعني. فهو قال لها إيه: «كنت لك كأبي زرع لأم زرع غير أني لا أطلقك»، اطمني.
فهذه أول مسألة، مسألة أننا محتاجين لهذا الحوار في بيوتنا، محتاجين لهذا الحوار عموماً يا جماعة، عموماً في حياتنا، نحتاج لآداب الحوار، نعرف إزاي نتحاور. خلونا يعني ندي شوية أمثلة وندخل شوية في مسألة الحوار مسألة التواصل، لأن دي مسألة كبيرة وعاملة أزمة الحوار في البيوت وفي غير البيوت، يعني حتى الأصدقاء مع بعضهم أو الصديقات مع بعضها أو كذا بيحصل مشاكل كتير ومن لا شيء، مجرد احنا مش فاهمين يعني إيه حوار، مش فاهمين يعني إيه تواصل.
أنا وانا بتكلم قلت جملة تبدو سهلة، لكن هي الحقيقة صعبة جداً، لما قلت أن النبي عليه الصلاة والسلام فهم رسالة عائشة رضي الله عنها، الجمله البسيطة دي اللي هي تبدو بسيطة، الجملة دي معقدة جداً جداً. تعالوا نفهم كده واحدة واحدة يا جماعة، التواصل أي عملية تواصل في الدنيا بتحصل إزاي؟ علشان نفهم الطشة بتيجي منين. لطشة إيه بقى؟ اللي هو أنا كل ما بتكلم معها لازم يحصل خناق، أنا بس أفتح بقي هي بقى، أنا بس أفتح بقي الدنيا تولع، هو ده بيحصل ليه؟ أو عموماً في حياتنا يعني أنت مع صاحبك أو بتحبه وكل حاجة، وتيجي تقول: مش فاهممني، بكلمه وهو مش فاهممني، الكلمة بنسمعها كتير دلوقتي يا جماعة.
أي عملية تواصل بتتم في الدنيا في الدنيا ليها مكونات أساسية كده، مش هندخل احنا إيه مش جايين ندي يعني كورس عن التواصل، لكن هنمسك بس مكونين منهم، اثنين اثنين بس. فأي عملية تواصل في الدنيا هي بتتم بين واحد وعاوز يوصل رسالة وواحد بيستقبل الرسالة. الرسالة دي ممكن تبقى كلمة، يعني يا فلان قوم افتح الباب مثلاً، دي رسالة أنا عاوز أوصلها لواحد، وواحد بيستقبل مني، فدول هم إيه عنصرين أهم في عملية التواصل.
وفي قناة أنا بختارها، أنا بختارها، اللي هو المرسل ده، مرسل الرسالة، بختار عشان أرسل الرسالة فيها قناة معينة بختارها. القناة دي ممكن تبقى إيه؟ كلام، زي قوم افتح الباب، اتكلمت، دي قناة ماشي. ممكن أختار قناة تانية أن أعمل إيه؟ أبعتله رسالة على الواتساب، هذه قناة أخرى، يعني بدل ما أكلم في التليفون أنا اخترت قناة أخرى. الكلام ده مهم جداً يا جماعة، وهنررجع، الكلام ده هيحل مشاكل كبيرة. هختار قناة أخرى أن أنا أبعتله رسالة على الواتساب، ممكن تبقى القناة إشارة مش كلام خالص، ماشي يعني عاوز أوقف، أعمله لله كده، قوم، معناها قوم، ما أقولش قوم، أعمله إشارة. المهم، بختار قناة من خلالها بوصل الرسالة اللي أنا عاوز أوصلها.
تعالوا بقى الأخطر عنصرين ودول اللي أنا عاوز أتكلم عليهم، يعني مش النهارده درس مش فيهم، لكن عشان بس نفهم الطشة بتيجي منين، لما أجي أوصل رسالة أنا بعمل حاجة اسمها تشفير للرسالة، وبعدين بتوصل، الراجل بيعمل حاجة اسمها فك التشفير، ده في أي تواصل، أنت عرفته ما عرفتوش، ده ده بيحصل، ده كده إيه احنا مخلوقين كده، أنا بشفر الرسالة عشان أبعتها له توصل له الرسالة، هو يفك التشفير، هنا الأزمة بتصل، اختياري للشكل اللي هشفر بيه رسالتي، وهو فك التشفير إزاي، ففهم الرسالة إزاي، بتحصل أزمة كبيرة جداً.
ماشي كده؟ ناخد المثال الحديث اللي معانا ده، سيدة عائشة رضي الله عنها عاوزة توصل رسالة للنبي عليه الصلاة والسلام، إيه الرسالة؟ أن أنا بحبك وشايفه كل اللي بتعمله من أجلي، لكن خايفة أن أطلق، هي دي الرسالة بتاعت عائشة باختصار من كل الإيه الكلام الكتير اللي اتحكى ده، دي رسالة عائشة للنبي عليه الصلاة والسلام. اختارت توصلها بشكل، شفرت رسالتها بشكل، خلي بالكم عائشة ما قالتش كده، ما قالتش الكلام كده، يعني ما قالتلوش يا رسول الله أنا خايفة أطلق، أنا شايفه كل حاجة بتعملها لي بس أنا خايفة، ما قالتش كده عائشة، عائشة شفرت رسالتها لشكل معين. خلاص، هو الحكاية الطويلة دي اللي احنا قعدنا إيه نحكيها دي.
تخيلوا بقى هذا المثال، أسقطوه الآن عشان إيه ما نبقاش بنكلم على النبي عليه الصلاة والسلام بس، أسقطوه الآن، ممكن المرأة تكون عاوزة تعمل ده، اختار الطريق عشان تشفر رسالتها وترسلها للرجل. الراجل بقى فاهم الرسالة إزاي بقى؟ ها أنت بتضيعي لي وقتي، أنت أصلك مش حاسة بيا، أنت مضايقاني، بدخل عميان مش شايف قدامي... ما هو الكلام ده كله، جماعة أنا ليه بقول الكلام ده؟ لأن النبي عليه الصلاة والسلام، يعني لو واحد هنا بيدعي أن هو كان أكثر شغلاً منه، خلاص هو يعني هو حر يعني، فيقدر بقى يقول الكلمتين دول، لو بيدعي هذا أنه أكثر شغلاً من النبي عليه الصلاة والسلام، لا، النبي عليه الصلاة والسلام ما كانش عنده لحظة فاضية صلى الله عليه وسلم، ومع ذلك يجلس ويستمع ويفهم، يفك تشفير الرسالة صح، فيختار الطريقة للتشفير.
طبعا أنا يعني هحاول أركز جداً أن كل ما أجي أتكلم في حته أتكلم عن الطرفين، خلاص، فلما أجي بقول هنا أن المرأة بطبيعتها، هي طبيعة المرأة، ده مهم جداً احنا نفهم الفرق بين الرجل والمرأة، لأن العلاقة الزواج بيكون
بين رجل وامرأة بديهة، ديفلو انت ما انتش فاهم طبائع نفسك كرجل، قبل أن تكون طبائع شخصية. خلي بالكم يا جماعة، في طبائع بيشترك فيها صنف من الجنس ده؛ جنس الرجاله أو جنس الستات. وبعدين طباع تختلف باختلاف البيئات بقى، ولسه ده كله ما دخلش في السمت الشخصي، فاهمين يا جماعة؟
مثال، مثال من السنة عشان نفهم ده: لما النبي عليه الصلاة والسلام غضب يوما من نسائه واعتزلهن، فسيدنا عمر دخل على النبي عليه الصلاة والسلام، قال كلام في منتهى العمق. قال له: يا رسول الله، صلوا على النبي يا جماعة، صلوا على النبي، الدرس يوم الجمعة في ساعة الإجابة عشان نكثر من الصلاة على النبي عليه الصلاة والسلام. قال له: يا رسول الله، لو رأيتنا ونحن قوم نغلب نساءنا. لو رأيتنا دي يقصد مين؟ المهاجرين. المهاجرين، لو رأيتنا ونحن قوم نغلب نساءنا، يعني الست عندنا في قريش مالهاش كلمة، الراجل يقول يمين يبقى يمين، شمال يبقى شمال، انتهت دي دلوقتي طبيعة إيه؟ بيئة. فقدمنا على الأنصار، فإذا هم قوم تغلبهم نساؤهم. خلي بالكم، احنا مش بنقول مين صح ومين غلط هنا، ده اختلاف طبائع. يعني الأنصار بيئة عادي جدا، الراجل يسمع لامرأته وينزل على رأيها عادي، ماهياش حاجة كبيرة عند الأنصار.
يعني فطفق نساؤنا يأخذن من نساء الأنصار. ابتدى بقى تلاقح الثقافة. الست جاية من قريش ما عندهاش ثقافة إن الراجل يناقش، ما عندهاش الثقافة دي، ما تربتش كده، البيئة بتاعتها مش كده، جم المدينة لقوا لا، ده الراجل بيتكلم فيراجع، يعني الست تقول له ما كذا أحسن، ماشي، فدي طبائع. فأخذ نساؤنا يأخذن من نساء الأنصار. وابتدى عمر بقى يحكي عن موقف حصل مع مراته، قصة بقى كبيرة.
المهم يا جماعة، احنا دلوقتي بنتكلم في إيه؟ يبقى في طبائع هي بتاعة النساء. مثال، أنا طبعا أنا بحاول أربط الكلام بالشرع، يعني نأتي بأدلة من الشرع تعضد ما نقوله، والكلام اللي بقوله ده هو كلام يعني العلم الحديث والطب. إن مثال قول النبي عليه الصلاة والسلام: «يا معشر النساء، تصدّقن، فإني رأيتكن أكثر أهل النار». فقامت امرأة من صف آخر حديث يعني، فقال: «لأنكن تكثرن اللعنة وتكفرن». قالت: نكفر بالله؟ قال: «تكفرن العشير، ولو أحسن الرجل إليكن الدهر كله، ثم رأيتن منه شيئا، قلتن ما رأينا منك خيرا قط». فيبقى دي سمة في المرأة. هل لما نقول سمة في المرأة، يعني كل الستات لازم يبقوا كده؟ مش لازم، بس غالب كده إن هم يكفرن العشير، ده غالب النساء.
يعني إيه؟ يعني مع أول أزمة تبتدي تقول كلام يزعل، ده بالاختصار يعني، ماشي، تبتدي تقول كلام يزعل. طيب، لما أنا أفاهم إن دي طبيعة في المرأة، لما أفاهم إن دي طبيعة في المرأة كرجل، يبقى أنا أول ما أفهم ده ما واجبي بقى؟ إن ما أخدش على الكلام ده قوي وقت الآية، ما خلاص أنا فهمت طبيعة في المرأة. طيب، ولما المرأة تفهم إن دي طبيعة فيها، يبقى تجتهد على قدر الإمكان أنها تغالب تلك الطبيعة، أو أحفظوا بقى اللفظ ده اللي هو إيه لفظ حديث يعني: تدير تلك الطبيعة اللي فيها يعني. إزاي أتعامل مع؟ خلاص، أنا عرفت إن دي طبيعة في النساء، وأنا خلاص الله غالب من النساء، طب دير الطبيعة دي إزاي؟ ماشي، ده كله إن شاء الله هيجي له كلام يعني بالتفصيل.
عندنا أزمة كبيرة جدا في تشفير الرسالة وفي فك الشفرة. أزمة كبيرة جدا في الاثنين في الناحيتين، لما تيجي تشفر رسالة، إزاي أجهد ذهني، إزاي أوصل رسالتي؟ عائشة رضي الله عنها شفرت الرسالة في حدوتة كبيرة، هي في الآخر عاوزه تقول إيه: أحبك، وأرى ما تفعله من أجلي، وأخاف فراقك. دي الرسالة تخلص في جملتين. من طبيعة بقى المرأة، ده اللي بدأ فتحنا في حتة الثانية، إن هي بتحب الكلام. دي طبيعة في المرأة، بتحب تتكلم كتير.
خلاص، فعائشة الست ما بتعرفش تعمل ده، ما بتعرفش تعمل ده. وأخبر الله عز وجل عنها كده إنها لا تستطيع الإبانة عما في نفسها بصوره واضحة كده قوي صح. قلنا لكم الآية في المرة اللي فاتت إيه؟ ﴿وَهُوَ فِي الْخِصَامِ غَيْرُ مُبِينٍ﴾ [الزخرف: 18]، مش كده؟ أو من ينشأ في الحلية؟ الله عز وجل يتكلم عن النساء: ﴿وَهُوَ فِي الْخِصَامِ غَيْرُ مُبِينٍ﴾. ما تعرفش تعبر عما في داخلها، فتحتاج تتكلم كتير قوي عشان رسالة صغيرة.
فهنا اختيار في التشفير اللي بنقوله بقى: يبقى المرأة ممكن تبقى واعية لده، خلاص عرفت إن جوزي مثلا ما عندوش طاقة دلوقتي لهذا، طب أنا هقعد أحكي حدوتة كبيرة؟ يبقى أختار الوقت اللي أحكي فيه الحدوته مثلا طالما أنا اخترت ده، أو أعمل إيه بقى؟ أختار طريقة تانية يعني أشفر الرسالة بشكل آخر. خلي بالكم، إن أشفر الرسالة بشكل آخر دي مسألة، واني أختار قناة مختلفة دي مسألة. يعني إيه؟ المرأة الذكية لازم يكون عندها هذا الذكاء، خصوصا مع طول العشرة مع الزوج، وكذلك الرجل، بس هو عشان المرأة هنا اللي بتتكلم في المثال اللي معانا.
يعني إيه مثلا؟ هي خلاص فهمت إن جوزها لما بتيجي تكلمه هو هو ربنا خلقه كده، دماغه مترتبه على إنه لازم يقعد يحسب حسابات كتير جدا عشان ياخد قرار. قراراته مش سريعة، خلي بالكم، ده غالب الرجال برضه كده. غالب الرجال كده، يعني ده نمط هو الغالب على الرجال على كل حال. خلاص، المرأة فهمت ده، تخليها ذكية بقى، ما تجهدش في وقت مزنوق. يعني إيه؟ حالا لازم تقول لي. طب ليه ليه زنقة ده؟ لا، ممكن ده اللي احنا عاوزين بقى ننبه الناس عليه. ممكن بذكاء نختار قناة تانية خالص أصلا غير الحوار، أنها تبعت له رسالة كده.
هي بتعمل إيه؟ بتختار قناة أخرى، تبعت له رسالة علشان لما يبص على الرسالة هو يبقى فاهم إنه مش مضطر يرد دلوقتي، يعني ماهوش حوار وجه لوجه فلازم أرد لا. خلاص، هو شاف الرسالة، خلاص بقى سيبيه شهر، اتنين، ستة، يعني مش لازم زنانين. يعني إيه؟ يعني إيه رأي في اللغة الفارسية؟ حد راح الحرم قبل كده تلاقوا إيه مكتوب إيه؟ ودخانة إيه؟ أنا ما قلتش حاجة ماشي.
فخلاص يبقى تختار قناة تانية، أو الرجل كذلك يختار قناة أخرى يرسل فيها الرسالة اللي هو عاوزها ويجهد ذهنه في تشفير الرسالة برضه. يعني أنا لما أشفر الرسالة هشفرها، أقولها إيه؟ ممكن يبقى في وقت، الصراحة مطلوبة جدا ليه؟ لأن التنويه عن شيء مش هيتفعل ده خلاص، يبقى أنت عندك مهاره ناقصة، روح اتعلمها، لازم تعرف إزاي تختار القناة المناسبة وإزاي تختار التشفير المناسب لرسالتك ماشي يا جماعة؟
هديكم مثال من سيرات النبي عليه الصلاة والسلام عشان نفهم القصة دي. النبي عليه الصلاة والسلام، ويمكن أنا قلت المثال ده هنا قبل كده، لما كان قاعد وسط أصحابه، الصحابه معاه، وبعدين زينب رضي الله عنها، وبعدين زينب دي مش صفية، عفوا، صفية رضي الله عنها كانت بتطبخ كويس، كان نفسها حلو في الأكل يعني. والنبي عليه الصلاة والسلام كان في بيت عائشة، فصفية رضي الله عنها ترسل إليه طعاما في بيت عائشة.
طبعا هنا في إيه حاجة برضه يعني إيه يعني الدنيا مش سلكة برضه قوي، فعائشة رضي الله عنها فتحت الباب. طب ليه يعني تبعت له أكل هو في البيت عندي؟ أنت يا جماعة للمشهد ده أصل هو المشهد متشابك شوية، معقد، يعني كبير قوم، تعالى نجرد المسألة. كبير قوم ومعاه أصحاب، وبعدين المرأة بقى زوجته، وهو عربي قبل ما يكون بقى كبير، هو عربي، يعني في صفات اللي في العرب؛ النخوة والرجولة وما يحبش، وهكذا. وبعدين النبي عليه الصلاة والسلام قرشي ولا أنصاري؟ طب استحضروا بقى حديث عمر لسه قايلينه من شويّة.
فعائشة تمسك البتاع ده، الطاجن ده ولا الطبق، وتروح كاسرة قدام الصحابة، فهنا موقف، موقف كبير مش بسيط يعني. أنت لو فكرت فيه، لو حصل لك أنت ده، موقف ما يعديش، ممكن يحصل فيه طلاق. فالنبي عليه الصلاة والسلام إزاي يستقبل هنا؟ عائشة رضي الله عنها لما لما كسرت الطبق هي دي رسالة، هي دي رسالة، والنبي فهمها عليه الصلاة والسلام. يا جماعة يا جماعة، الموضوع ده مش بسيط إنك تفهم رسالة اللي قدامك. المرأة ممكن تيجي تقول لك: طلقني، وهي بتقول لك: ما تطلقنيش. يعني هي طلقني دي يعني ما تطلقنيش، أنا ما اقدرش استغنى عنك، مين يفهم ده؟
فالنبي عليه الصلاة والسلام مسكت عائشة الطبق وكسرته، فيعمل إيه النبي؟ طبعا هو الموقف ده يدرس من كذا وجه، لكن اللي يعنينا هنا في فكرة أنها شفرت رسالة، أنا ما بقولش إن التشفير هنا هو أنسب تشفير، لا خالص يعني المرأة أخطات، طبعا أخطات، لكن فك التشفير كان إزاي؟ إن النبي عليه الصلاة والسلام يفهم الفعل على وجهه. قال: «غارت أمكم، غارت أمكم».
فهم الرسالة، النبي عليه الصلاة والسلام هنا الرسالة دي بقى ممكن تتفهم بـ100 شكل، مش كده؟ أنت مش محترمني، ما أصل أنت لو اتربيتي ما كنتش عملتي كده، وأنت شايف أصحابي قاعدين جوه، ما أصل أنت لو شايفاني راجل، بص كـ.. وهو في أواخر وهي تكسر الطبق، هي فعلا ما كانش شايف، أنت مش في الآية، يعني أنت مش في الحساب خالص اللي بتحكيه ده، خالص خالص. هو شعور غلب على الفكر، فنتج عنه الفعل ده فقط، نقطة ومن أول السطر، كل اللي أنت فهمته غيره مراد.
وبعدين بقى شوف أنت بتعمل إيه؟ بتشيلها الليلة، بتحسبها على إيه؟ على إيه حد يقول؟ على فكك لتشفير الرسالة، أنت بتحسبها على فعلك. أنتوا فاهمين يا جماعة دي؟ خلي بالكم، هرجع تاني أقول: ممكن بعد كده نقول إيه بس ما كانش ينبغي تعملي كذا كفعل، آه، ده ما فيهوش يعني، احنا مش بنصلح الفعل، لكن هو الفعل أنت اللي عظّمته جواك، مش الفعل، مش كده؟ لما أجي أقول لك: هو أنت غضبت ليه؟ هتقول لي: عشان الطبق اتكسر. لا، يعني مش إن الطبق اتكسر هو اللي اللي يضق، اللي يضق في الوقت ده إيه؟ إن هي قلّت مني قدام الناس، بدليل لو شلنا عنصر واحد من المشهد ده كله، غضبك مش هقول مش هتغضب، بس غضبك هيقل قوي. عنصر إن معاك أصحابك مثلا، لو شلنا العنصر ده من القصة وحصل لك نفس اللي حصل، هتغضب، مش هقول مش هتغضب، لكن نفس غضبك إن أصحابك قاعدين جوه وشايفين سامعين مرتك بتزعق. طب ليه ده حصل؟ لأنك فكيت الرسالة غلط.
النبي عليه الصلاة والسلام حل الموضوع ببساطة شديدة، ماشي يرحمك الله، تبسم صلى الله عليه وسلم وقال: «غارت أمكم». يبقى هنا فك التشفير صح بيحل لنا إشكالات كبيرة جدا، وكذلك اختيار التشفير الصح. اختيار التشفير الصح، يعني إيه اختيار التشفير الصح؟ يعني أنا خلاص عرفت إن زوجتي هي مالهاش في الكلام الدغري، هي إيه مثلا يعني؟ فخلاص أنا أحكي لها حدوتة، وهو على فكرة في ناس كتير كده، في ناس هي تحكيلها حدوتة أبرك من وعشان كده دي مهارة حتى بيعلموها للناس اللي بتحكي: إزاي تعرف تحكي حدوتة؟ إزاي توصل معلومات في شكل حدوتة؟ خلاص، محتاجين نشتغل على ده، محتاجين ليه؟ لأنه ده هيفيدك جدا في التواصل في حياتك عموما، مش بس مع زوجتك أو مع زوجك عموما.
ماشي، هقول لكم مثال كده، يعني حصل، طبيب أسنان صديقي، وكان شغال عنده عيادة في في في مكان يعني في بدو، فجاله الراجل بدوي، فتح فتح بقه، فايه لقى درس مسوس خربان خالص، فهو بيقول له: درس واجعني وتعبان، فالراجل شاور على الدرس فقال له: هو ده الدرس اللي موجع. عمل له كده، فصاحبي بيحكي لي، بيقول لي: قعدت أبص عاوز بقى أشوف الدرس اللي وجعه إيه؟ فبيقول: ما فيش غير ده، ف يعني ما فيش حاجة تانية، فراح مشاوره على نفس الدرس، قال له: أنت متاكد مش ده اللي موجع؟ بيقول لي: أفتش يمين ما فيش، وكل ما يعمل لي كده، أتاري دي عند البدوي يعني آه، الحركة دي عند البدو معناها آه، هو ده الدرس اللي واجعني.
طبعا عندنا لا، أنتوا فاهمين يا جماعة، هنا الإشكال جاي منين؟ من إن هو أرسل لك رسالة بشفرة. المشكلة حصلت في فك الشفره، ليه بقى بيحصل فك شفرة غلط؟ دي بقى دي قصة تانية، ده يعني عنصر تاني في التواصل بيسموه إيه؟ بيسموه إيه؟ هو اسمها نويز بس مش عارف بالعربي بقى إيه؟ لا مش اسمها المشتتات مثلا، مش عارف يعني، بعدين المهم يعني ليه بنفك الشفرة غلط؟ دي قصة تانية.
اللي عاوزين عاوزين نفهمه هنا يا جماعة في حديث أم زرع: عائشة أرسلت رسالة مشفرة، والنبي عليه الصلاة والسلام نجح في فك الشفرة، فدار حوار صحي، وخلصت الحدوته، وخلص الحديث، وأدينا قاعدين دلوقتي بنتعلم من هذا الحديث ومن فعل النبي صلى الله عليه وسلم. فدي أول مسألة عاوزين نخرج بيها: إن الحوار الصحي في واحد بيستمع. خلونا نعدل الكلمه يستمع دي للفظ الحديث اللي الناس بتقوله، إنه إيه؟ استماع إيه؟ الصحي، وللاسف يعني في حاجات بتبقى إيه يعني ما بتجيش غير آه بالعربي إيه بفعال؟ أيوه، إنك تستمع استماع فعال. ماشي، استماع فعال، يعني إيه استماع فعال؟
بقى يعني صاحبنا اللي من شوية ده قعدت تحكي له حق أنت رأيك إيه؟ طلع إيه الباشا في حته تانية؟ هو مش مستمع استماع فعال.
يعني إيه إنك تبدي أو أول حاجة أول حاجة في إنك الاستماع الفعال، إنك تبدي إيه؟ اهتماماً. أنا مهتم باللي أنت بتقوله ده. الاستماع الفعال وبعدين تفهم الرسالة صح، يعني تفهم الرسالة صح.
هديكم مثال يا شباب، لو اتنين رجالة قاعدين كلموا في مشكلة، ماشي؟ أنا بسألكم ردوا عليا يعني، أجي دورت يقول لك أنا عندي مشكلة، أنا طلعت فلقيت العربية العجله نايمة، أنت هتفهم من اللي أنا بقوله ده إن أنا بقول لك ده ليه؟ صح كده؟ يعني إيه؟ تسعى يعني يعني تديني إيه؟ حل، مش كده؟ دماغ الراجل فعلاً كده، هو السيستم بتاع دماغ الراجل كده لما نجي نتكلم في مشكلة، فأن أنا بحكي لك المشكلة علشان عاوز أحلل المشكلة.
سهلة دي، طبعا أنتوا مش مستغرب يعني أنتوا كأني بقول بداية، وهي فعلاً بداية للرجال. الست مش كده، الأصل في النساء الأصل إن المرأة لما بتحكي مش بتبقى عاوزه أحل المشكلة خالص، في أكثر الأوقات المرأة بتحكي علشان عاوزه اهتمام، عاوزه دعم نفسي، يعني يعني إيه ده؟ أنا النهارده كنت مع صاحبتي، وبعدين قالت لي وبصت لي وعملت لي بلوك بعد ما مشيت. هي مش عاوزه تسمع إيه؟ طب ما أنت ممكن لو رحت لها بهدية؟ هي مش عاوزه ده خالص ولا عاوزه تسمع ده خالص ولا ولا محتاجة ده منك. الأصل كده، ممكن تبقى محتاجة، لكن الأصل فيها إن هي مش عاوزه، هي عاوزه تحكي بس، عاوزه تفضفض عشان تلاقي نوع اهتمام، نوع احتواء وخلاص وخلصنا على كده والباب اتقفل، وهتقوم مرتاحة.
يعني أنت ممكن إيه يعني لو عكسنا بقى الموضوع، يعني أنا بقول لك العربية والعجله نايمة وبتاع، فرحت أنت إيه؟ تأثرت قوي كده، وقلت لي يا ده معلش وربنا يكف أن إيه؟ معلش وربنا، يعني أنا هيب معلش إيه؟ وربنا يكرمك يعني بحكيلك ليه يعني حل؟ يعني أديني حل. لا، المرأة مش كده، يعني تقول لك العجله معلش، وإن شاء الله المرة الجاية مش هتنام وهتاخد بالها. انبسطت كده والموضوع خلص وزقطط؟ ده دايماً لا، مش دايماً مش بقول إن ده دايماً بيحصل، لكن ده اختلاف موجود بين الرجال والنساء، ربنا خالقنا كده يا جماعة، في فروق ربنا اللي قال كده: ﴿وَلَيْسَ الذَّكَرُ كَالْأُنثَىٰ﴾ [آل عمران: 36]، فهو في فروق حتى في المخ، يعني الطب يعني الطب يقول إن حتى المخ تشريحياً مخ الراجل غير غير مخ المرأة تشريحياً حتى، يعني القشرة عند المرأة أسمك، مش عارف يقول لك الفص اليمين والفص الشمال في هنا إيه وهنا قصص كده يعني الأطباء هم أقدر بها يعني، لكن حتى تشريحياً المخ مختلف، مخ الرجل عن مخ المرأة.
وده لطبيعة التكامل، ركزوا يا شباب وركزوا يا بنات بالذات بقى في الحته دي، لطبيعة التكامل، إحنا ليه دايماً شايفين إن هو الموضوع إيه؟ يعني الاختلاف واختلاف تضاد؟ الموضوع مش كده، هو ممكن يكون الاختلاف اختلاف تنوع علشان نتكامل، علشان نتكامل، لأن الحياة مش هتمشي غير بده، وده ما تمشيش بإيه؟ بنوع واحد من التفكير أو نمط واحد من التفكير أو نمط واحد من العاطفة، فإحنا جايين نتكامل مش جايين إيه عارفين الفيمينيست أو النسوي أو أنتم عارفين مشكلتهم فين؟ المشكلة الأساسية عارفين فين؟ هو المشكلة الأساسية إن ربنا خلقنا وخاطبنا رجال ونساء أن يكون هو سبحانه وتعالى أن يكون هو وجهتنا، وأنت في الدنيا كده أنت قدامك ربنا سبحانه وتعالى.
النسوية خلت وجهتها الرجل، ده اصل المشكلة على فكرة، هو هم دايماً يعملوا ايه؟ يقولوا لا يعني ده إحنا بنقول إن إحنا جدعان قوي، هو الموضوع مش كده، هو الموضوع اللي جواهم إن هم خلوا خلوا وجهتهم الرجل، وبقى أي حاجة بيعملها الراجل وهم ما بيعملوهاش، هدفهم في الدنيا إن هم إزاي يعرفوا يعملوها ده، يعني التحليل البسيط لهذه المسألة.
خلي بالكم يا جماعة، كتير جداً من أفعالنا بتعكس نفسية مغايرة للي بيحصل، يعني زي ما بقول لك كده، هي تقول لك إَّا الرجل مش من اهتماماتي أصلاً، لا ده هو اللي شغلها، هو خليته وجهتها أصلاً، فعلى طول شايفاه قدامها وبتجري إنها تبقى زيه، هو ربنا ما طلبش منك كده، ربنا ما طلبش كده ولا ده معناه إن هو ازيد منك في الحته دي في حاجة لا، بالعكس، يعني إحنا هنيجي يوم القيامة يا جماعة، مافيش نساء هتسبق الرجال في درجات الجنان، يعني الجنة مثلاً الفردوس الأعلى محجوز للرجاله ولا يبقى في رجاله في الدرجة التانية والدرجة التالتة، وفي نساء في الفردوس؟ هنلاقي ده ولا مش هنلاقي ده يا جماعة؟ يعني هو ده المضمار اللي إحنا بنبق فيه أصلاً مضمار القرب من الله سبحانه وتعالى، هنيجي يوم القيامة نكتشف إن في نساء أقرب إلى الله من رجال، فهو ده هو ده فوزك أيتها المرأة، مكسبك الحقيقي هو ده مش انك تشبهي الرجل خالص ولا ربنا طلب منك ده أصلاً، إن على قدر ما هتشبهي مستقلة استقلال الرجل، على قدر ما هتكوني بتفكري زي الراجل تبقي كسبانة؟ جبنا فين ده؟ فين؟ فين؟ مش موجود.
فالنبي عليه الصلاة والسلام جلس واستمع لعائشة رضي الله عنها وفك الشفرة صح، محتاجين ده بقى في بيوتنا مع النساء، مع حتى مع الأطفال، إحنا إحنا هنا ادينا درس قبل كده، درس كامل في سورة يوسف كان بعنوان إيه؟ ولد يحكي وأب يستمع، فاكرين الدرس ده كان على المشهد اللي بتبتدي بيه السورة، المشهد عجيب جداً، يوسف طفل صغير، في بعض الروايات سبع سنين، جاي الأبوة يعقوب نبي الزمان برضو اللي هو علي من الأعباء ما عليه، علاقته بربنا أولاً، يعقوب عليه السلام مشغول بإيه؟ علاقته بربنا، علاقته بأهله، الدعوة، الكفار المحاربين، كل ده، وبعدين عنده كام عيل؟ ١٢ عيل، مش كده؟ يوسف و١١، اللي عنده عيلين دلوقتي ماشي بيكلم نفسه، عنده ١٢ عيل، والعلاقة بين ال١٢ عيل مش علاقة لا فيها توتر، مش كده؟ لأن في ١٠ من أم واتنين من أم، والعلاقة بينهم فيها توتر، وده بان في أحداث القصة، الدماغ عاملة إزاي؟ مشغولة إزاي؟
يجي له بقى إيه؟ أصغر واحد في العيال: أنا شفت إمبارح حلم، لو واحد فينا، طب يا حبيبي روح كلم ماما مثلاً مش كده، اشرب يا حبيبي كده وكل حاجة وادخل كمل نومك ما جراش حاجة، يعقوب ما عملش كده، ولد يحكي وأب يستمع، من حق الولد عليك أن تفعل ذلك: ﴿يَا أَبَتِ إِنِّي رَأَيْتُ﴾ [يوسف: 4]، قعد واستمع، طب هو سمع وبقى مشغول؟ دماغه مشغولة في الدعوة وفي الذكر وفي ولا تاني؟ استمع وهو إيه؟ مهتم لما يقال، بدليل إنه فهم الرؤية وأول الرؤية في داخل نفسه، وابتدى يدي نصائح للولد يتعامل بيه مع الإيه؟ الواقع الجديد اللي هيحصل.
يا جماعة، كتير من أبنائنا وشبابنا اللي قاعدين أبنائنا سواء صغيرين أو الشباب عندهم مشاكل كبيرة ومحتاجين اللي يسمعها، ولو ما كانش الاب هو اللي هيسمع هيروح يدور على حد بره يسمع وهيقع بقى فريسه لمين يسمع؟ الله أعلم غير كده، الولد ابنك ده اللي بيجي يحكي حدوتة حصلت له في المدرسه، هو عاوز ممكن ممكن يا جماعة اللي أنا بقوله ده ده يعني ده من واقع خبرات حياة، يعني مشاكل بتيجي وبنلاقيها كده أو بنسمعها من أطباء نفسيين، إن الولد حصل له مشكلة في المدرسة وخايف يقولها، عارف هيجي يعمل ايه؟ هيحكيك حدوتة علشان في حاجة حصلت له هو مش عارف يقولها مباشرة، فيجي يحكي لك حدوتة، وقد تكون الحدوته من نسيج خياله أصلاً، وحضرتك اللي عليك تعمل إيه بقى؟ قولوا الكلمة، تفك الشفرة، تفهم إن الولد في مشكلة حصلت معاه خايف يحكيها.
ولو فشلت انك تفك الشفرة الولد ده ممكن يضيع ويبقى عنده عقده يكبر بها، طب هتعمل ده ازاي؟ وأنت الولد بيحكي وأنت ماسك التليفون بتشات بتسكرول على الفيسبوك، أنا بتكلم بقى على حياتنا دلوقتي، هو ده الشكل، ده النمط السائد في حياتنا، يعني الاب المحترم اللي اللي قرر يدي لابنه ولا بنته وقت، هو في الغالب قاعد بيسكرول على الفيسبوك: آه أنت اتكلم يعني إيه هبهب كده زي ما بيقولوا وأنا إيه يعني قاعد أهو، مش أنت مش عاوز الجسد؟ الجسد قدامك أهوي، أو حتى مع زوجتك.
فده مهم، إزاي يعقوب عليه السلام اهو مع ابنه يعمل ده برضه؟ يقعد يستمع للولد بتركيز، وبعدين يعمل إيه بقى؟ يعمل إيه؟ يغرز قيم في الولد في فين يا جماعة ده دلوقتي؟ خلي بالك إحنا إحنا الأصل بنتكلم عن الأزواج والزوجات صح، حتى زوجتك محتاج منك ده، هو أنت قايم عليها بايه؟ هو أنت قايم عليها بايه يعني؟ ﴿الرِّجَالُ قَوَّامُونَ عَلَى النِّسَاءِ﴾ [النساء: 34]، ما هو أنت أنت في وقت من الأوقات هي محتاجة تقويم فعلاً، محتاجة تقويم منك، ماشي والنبي عليه الصلاة والسلام بين ذلك صلوا على النبي، إن المرأة محتاجة منك تقويم وإن هي خلقنا من ضلع، وإن أعوج الضلع أعلاه، فإن أنت ذهبت تقيمه، فإن أنت ذهبت تقيمه كسرته، وإن تركتها ظلت على عوج.
بعض العلماء فهموا إن هو طبعا الناس بتسمع الحديث بتقول إيه؟ يبقى سيبها يعني يعني سيبها على العوج، لا بعض العلماء فهموا انك لا تعمل ده ولا أنت فاهمين عاوز أقول إيه؟ إن أنت ذهبت تقيمه كسرته يعني لو تعاملت معاه بغشومية هكسر الضلع؛ لأن الضلع ناشف هو خلاص معوج وناشف خلاص هسيبه، وإن أنت تركته ظل على عوج هيفضل معوج نفس العوج بتاعه ده، فقال صلى الله عليه وسلم: «فاقبلوهن على عوج».
بعض العلماء قالوا سيبها على العوج اللي فيه وأقبل أنت العوج، بعض العلماء قالوا لا هو المعنى لا تكسره ولا تسيبه على العوج، لكن وأنت بتقوم أوعى تفتكر إن التقويم هيوصل ل١٠٠% تقويم، في الآخر هتضطر تقبل نوع عوج، مش معناه سيب العوج زي ما هو، لا قوم باسلوب يحسن لتقويم مثلها وبقى واعي في الآخر إن التقويم مش هيحصل ١٠٠% تقويم مش هيحصل، فهتضطر في الآخر بقى للنصيحة النبوية: «فاقبلوهن على عوج». النصيحة الأخرى في رواية أخرى في الصحيح: «فدارها تعش به»، جميلها ولطيفه وكده هتعيشه، فدارها تعش به ماشي.
فالراجل بيسمع لامرأته، محتاجة تقوّم إزاي والطريقة، ودي بعدين مش ده درس النهارده، كل درسنا النهارده إزاي نخلق لغة حوار وأزاي نتغلب على مشاكل الحوار في البيوت.
هنا يعقوب يسمع يوسف عليهما السلام، وبعدين يبتدي يديله نصائح، وإزاي النصائح دي بتكون شخصية الولد ده في الصورة؟ كل ده في الصورة. قال يا بني لا تقصص رؤياك ع أول حاجة عملها يعقوب في الولد إيه؟ ما قالوش وكذلك يجتبيك ربك، ما عملش كده صح؟ ابتدى يدي حاجات مهمه قبل إيه؟ ما يقوله تأويل الرؤية، صح يا جماعة؟ الولد قال له: ﴿إِنِّي رَأَيْتُ أَحَدَ عَشَرَ كَوْكَبًا وَالشَّمْسَ وَالْقَمَرَ رَأَيْتُهُمْ لِي سَاجِدِينَ﴾ [يوسف: 4]، قال: ﴿قَالَ يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا ۖ إِنَّ الشَّيْطَانَ لِلْإِنسَانِ عَدُوٌّ مُّبِينٌ * وَكَذَلِكَ يَجْتَبِيكَ رَبُّكَ﴾ [يوسف: 5-6]، قال كده؟ قال: ﴿يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا﴾، يبقى أدله نصيحة في الأول قبل ما يقوله، قبل ما يقوه الرؤية.
أول درس يعمله يعقوب، يوسف يتعلمه ولا ما يتعلموش؟ يدخل السجن ويجي له الاتنين ويقولوا له: ﴿نَبِّئْنَا بِتَأْوِيلِهِ إِنَّا نَرَاكَ مِنَ الْمُحْسِنِينَ﴾ [يوسف: 36]، عمل كده يوسف ولا قاعد يتكلم في حاجات تانية خالص؟ قبل ما يقولو لهم الرؤية يكلمهم في إيه؟ في التوحيد اللي هو أهم حاجه، مش كده؟ أول درس خده من أبوه إزاي يكون شخصيته، ونلاقيه بعد كده بيعملوه فين؟ في السجن لما كبر.
وبعدين قال: ﴿يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا﴾، طبعا إحنا الكلام ده كله قلناه قبل كده، إحنا بنقف على رؤوس أقلام وإلا بقى اللي عاوز شرح ده يرجع لدرس ولد يحكي وأب يستمع، وقال إيه؟ ﴿يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا﴾.
لو كان سابه ولد صغير، هم ليدوني أنا عملت لهم ايه ولد الذينة دول؟ يقوم يعمل ايه؟ يحول تفكيره كله لمين؟ للشيطان، مش كده؟ أن لو ده حصل أن الشيطان للإنسان عدو مبين، ما تزعلش من اخواتك ده كيد شيطان. يوسف يتعلم الدرس، تمر القصة كلها ويجي يوسف يحكي اللي حصل يلخصه في جملة إيه؟ ﴿وَقَدْ أَحْسَنَ بِي إِذْ أَخْرَجَنِي مِنَ السِّجْنِ وَجَاءَ بِكُم مِّنَ الْبَدْوِ مِنْ بَعْدِ أَن نَّزَغَ الشَّيْطَانُ﴾ [يوسف: 100]، ويقدم نفسه مش بين إخوتي وبيني كمان: ﴿مِن بَعْدِ أَن نَّزَغَ الشَّيْطَانُ بَيْنِي وَبَيْنَ إِخْوَتِي﴾ [يوسف: 100].
حوار راقي اللي هو إيه؟ أنتو أنتو يا جماعة فاهمين نفسية أخوات هم واقفين في الموقف ده أصلاً عاملة إزاي، وأزاي يذيب كل ده بالكلمة دي؟ مساله تانية بقى في فن التواصل، إزاي يذيب كل اللي هم بيسموه إيه دلوقتي ها؟ الآيس بريكينج، مش كده؟ أنت في بينك وبيني حدود كتير، أنا هدوبه في إيه؟ ودي مهارة تانية الناس المفروض تتعلمها. يوسف عليه السلام بكلمة واحدة دوب الأيه كل حرج ممكن يبقى في نفسية أخواته، لكن مش ده اللي يعني دلوقتي، يعني دلوقتي إيه فكرة أن إزاي يعقوب ربى ولد صغير في موقف، إزاي التربية دي تلاقيها ممتدة معانا ظاهرة في القصة؟ حتى لما يعقوب يختم الموقف باسمين من أسماء الله الحسنى، من أسماء الله الحسنى قال إيه؟ ها الآية إيه؟ إن الشيطان الإنسان عدو.
مبين، وكذلك يجتبيك ربك ويعلمك من تأويل الأحاديث ويتم نعمته عليك وعلى آل يعقوب كما أتمها على أبويك من قبل. إبراهيم وإسحاق، ختام الآية: ﴿إِنَّ رَبَّ علِيمٌ حَكِيمٌ﴾ [يوسف: 6]. عليم حكيم، اسمين أهم.
وتمر أحداث القصة، ويجيء آخر موقف تختم به قصة يوسف فيقول: ﴿إِنَّ رَبِّي لَطِيفٌ لِمَا يَشَاءُ ۚ إِنَّهُ هُوَ الْعَلِيمُ الْحَكِيمُ﴾ [يوسف: 100]. الاسمين اللي خدهم من أبوه في القعدة اللي في أول القصة. فكل حاجة بتكبر في ابنك بتطلع معاه وبتبكبر معاه، الموقف بيكبر مش وقت التربية. احنا بنتكلم في حوار عشان بس ما نخرجش بره إحنا مركزين يا جماعة إن إحنا بنخلق حوار، وإلا فتفاصيل كتير قوي في القصص دي.
ربنا سبحانه وتعالى يورينا نوع تاني أيضاً من الحوار بين أب وابنه، وبرضوا الاتنين أنبياء؛ إبراهيم وإسماعيل. ادينا الدرس ده هنا ولا ما اديناهوش ولا مش فاكرين؟ مش فاكرين كالعاده، ماشي.
إبراهيم وإسماعيل برضه حوار عجيب جداً جداً. شوفوا يا جماعة لغة الحوار، لغة الحوار بين الابن والأب؛ إبراهيم عليه السلام يجي لابنه الذبيح ويقول له إيه؟ كما قص الله عز وجل علينا في سورة الصافات.
يقوله إيه بقى؟ يقوله: ﴿يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾ [الصافات: 102]. فانظر ماذا ترى، قراءتين. تعالوا إحنا برضه نتكلم على الحوار، مش تفاصيل القصة ولا فوائد القصة.
كثير من الآباء دلوقتي هو شخصيته مسيطرة، هو كده مسيطر، عارفين يعني يوصل يدخل في أي أدق تفاصيل، وده راجل متعب. الراجل اللي كده راجل متعب، وهنجي له في واحدة من اللي اتكلموا في الـ 11 اللي اتكلموا دول.
فالراجل اللي هو ما بيتغلي التفاصيل، متعب، ماشي. عارفين كده اللي هو إيه؟ اللي جاب القطة ووزنها، قالت له اللحمه، قال لها فين اللحمه؟ قالت له القطة. راح جاب القطة حطيتها على الميزان؛ لا، القطة كيلو، طب اللحمه كيلو؟ طب لو هي كلت، اللحمه فين القطة؟
يعني مش مثلاً كلت اللحمه خلاص، حصل خير والف هنا للقطة، لا. راح جاب القطة ووزنها فقال لها: فين القطة بقى؟ ادي اللحمه، فين القطة؟ فده راجل متعب، اللي هو يدخل في تفاصيل التفاصيل. فتلاقي الراجل ده دايماً إيه؟ دايماً تلاقي الراجل اللي صفته كده اللي حواليه كلهم شخصياتهم مضطربه، ما يعرفوش ياخدوا قرارات، هما متعودوش ياخدوا قرار.
خلي بالك، أنا أقول بقى رسالة للرجال: من الظلم للمرأة أن تجعلها تذوب فيك، مش تحبك يعني، تذوب فيك. لا، تذوب فيك يعني تذوب في شخصيتك؛ ده ظلم للمرأة، وشوية وهتكتشف إنه ظلم ليك أنت كمان. أنا هنا بكلم الرجاله على فكرة، الكويسة اللي هي طباعها كويسة، مش المسيطر ولا المهيمن، هنجي له كمان شوية، ده ممكن واحد من كتر ما هو رجل فعلاً فعلاً رجل، المرأة شخصيتها تذوب في شخصيته.
لازم تبقى منتبه هنا إنه لا، إنك تخرج شوية علشان المرأة يبقى لها شخصيتها، أنت مش باقيلها، دي ممكن تموت، ممكن يجيلك سفر، ممكن الأقدار تفرق بينكم بأي شكل، وفجأة تلاقي نفسها واقفة في وسط الطريق، هي متعودة كل حاجة بتجري عليك وتلاقيك نعمة السند. أنا مش بقول إنك وحش، تلاقيك نعمة السند لا، هنا بقى أنت لازم تنتبه إنك تعمل إيه؟
عارف كده ابنك وأنت بتعلمه السباحة بتعمل إيه؟ شوية بتسيب إيديه، لو فضل كل ما يجيلك تحضنه مش هيتعلم سباحة، مش كده؟ لا، بتسيبه ينزل ويكحكح شوية ويشرب شوية ميه وبتاع، وتبقى عارف إمتى هتخش تلحق ده.
ظلم للمرأة يعني دي مش حاجة كويسة، هي بتتبان في الأول كده، لكن إمتى يبان بقى اللي أنت عملته فيها؟ لما تبتدي زي ما بقول لكم كده إيه؟ الحياة تفرق بينكم بأي شكل من الأشكال، أو أنت تتعب وعاوز بقى اللي يشيل معاك، مش هتلاقي حد يشيل معاك.
طب هو ذنبها؟ ذنبك، ذنبك أنت اللي ما انتبهت انك تديها مساحة تتصرف فيها وتغلط وتبقى عارفة أنها لو غلطت هيقابل ده بتقدير؛ مش مهم، المرة الجايه إن شاء الله تتعمل صح، ما هي ما كانتش بتعمل حاجة. واضح؟
نرجع بقى للشخص ده تاني، اللي هو بيكون شخصيات حواليه مش عارفين ياخدوا قرارات في حياتهم. تعالوا نرجع لإبراهيم وإسماعيل عشان ما نروحش برة القصة. إبراهيم يا جماعة عليه السلام جاله أمر من الله سبحانه وتعالى: اذبح ولدك.
في رؤيا، مش مهم ليه رؤيا دلوقتي، المهم أمر من الله، أمر، أمر من الله، وعارف إنه أمر من الله، وحي، ما ينفعش ما يتعملش، خلاص زيه زي كثير من المتدينين دلوقتي، أنا آسف بقى يعني، يعني الاببقى إيه متدين فيعمل ايه؟
يدخل خبط لازق كده: لازم تقوم تعمل، وأنت أصلاً مش عارف إيه. شوف إبراهيم عمل ايه يا جماعة، حاجة عجيبة جداً. إبراهيم جه لإسماعيل قال له: ﴿يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾ [الصافات: 102]. إيه ده؟ إيه اللي إبراهيم بيعمله دلوقتي يا جماعة؟
إبراهيم بيربي شخصية. شوفوا الكلمه اللي جايه دي، هتذبح بعد شوية يعني، يعني شخصية مش هتعيش، هو إبراهيم ما كانش عارف إيه اللي هيحصل؟ ﴿إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾، براحتك بقى، شوف يعني إيه رايك نعمل إيه؟ دي شخصية سوية، دي شخصية من وهي صغيرة اتربت تاخد قرار.
إحنا عندنا شباب بيوصل لـ 20 و25 وما بيعرفش ياخد قرار في حياته، أصل كل القرارات الكبيرة أبوه اللي بيخدها. يعني مين الاببقى دلوقتي هيعزل مثلاً؟ فيعمل إيه؟ يلا يا أولاد، تعالوا نروح نشوف الشقة اللي احنا هنروحها، وياخد ولاده معاه ويدخل الشقة، إيه رايكم؟
فتلاقي بقى حاجات ظريفه يعني إيه ابنك؟ لا أصل لون الحيطة ده مش حلو، لا يا حبيبي ما هي الحيطة بتدهن، أنت بتكون شخصية، ما هو خده بقى من الأول، مش كده ولا ايه؟ ما الحيطان دي حاجة بسيطة، لا بتدهن ما تقلقش.
ويجي ابنك التاني، ها إيه رايكم؟ لا زي الفل عجبانا، لا غلط، كان لازم نستخير قبل ما نقول زي الفل وعجبانا، نستخير الأول مثلاً، أو لا لا، أنتم أنت في حاجة فاتتكم؛ هو المسجد فين في البيت ده؟ يعني احنا ما احنا هننزل نصلي خمس مرات، فنا تصدقوا غلطنا قبل ما نطلع الشقة، كان لازم الأول قبل ما نطلع.
وده أنا أقوله للشباب على فكرة المقبل على الزواج، أي شاب بيجي، أول نصيحة في اختيار السكن: قبل ما تطلع العماره، فين المسجد؟ لأنك شوية وأنت نفسك ممكن تكسل عن صلاه المسجد، وشوية وهتقابلك مشكلة أخرى؛ ولادك: أنا في الشغل وابني عنده ثمان سنين، تسع سنين، أنا قلقان أصل المسجد بيني وبينه طريق بيت.
طب أنت ليه من الأول اشتريت الشقة دي؟ ليه ما أنت عارف انك بعد شويه هتربي ابنك إنه ينزل يصلي في المسجد؟ وهكذا، يعني فده اللي إبراهيم عمله. حوار داير بين أب وابن، حوار مش: خد هنا نام هتبعك، طب يا يابا ده أمر من ربنا، أنت كمان هنكفر بقى؟ اللي بيحصل بقى.
إبراهيم ما عملش كده، ﴿إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾، إيه رايك؟ وقطعا قطعا يا شباب لو إسماعيل قال لإبراهيم لا ما تذبحنيش، كان هيقول لا، خلاص قال لا ولا كان هيبتدي يربي؟
شوفوا الآية القراءة التانية عجيبة جداً جداً: إني أرى في المنام أني أذبحك، فانظر ماذا ترى الله منك؟ فانظر ماذا ترى. هنا إبراهيم بيستخرج الطاعة من إسماعيل.
إني أرى في المنام أني أذبحك فانظر ماذا ترى، ربنا هيشوف منك إيه؟ قال: ﴿يَا أَبَتِ افْعَلْ مَا تُؤْمَرُ ۖ سَتَجِدُنِي إِن شَاءَ اللَّهُ مِنَ الصَّابِرِينَ﴾ [الصافات: 102].
حوار يا جماعة هو ربنا لما قص علينا الحوارات دي في القرآن، يعني مثلاً قصة يوسف يا شباب، كفوا بقى، القصة من نفس القصة كانت تمشي من غير الحوار اللي في الأول، المهم يعني إيه، يعني كانت ممكن تيجي إيه؛ أن يوسف رأى رؤيا وخلاص.
لا، ربنا قص علينا حوار دار بين الاب والأبن ليه؟ عشان نجيء إحنا دلوقتي عادي نقراه كده، بنحب سورة يوسف قوي. طب بتحب إيه في سورة يوسف؟ هو إيه القصة عاجباه كده في، لا في تفاصيل لازم تقف معاها، والله عز وجل لم يتكلم بهذا الكلام عبثاً، حاشاه سبحانه وتعالى.
فمحتاج لخلق هذه اللغة من الحوار، واحنا بنخلق بقى لغة الحوار متفهمين دماغ بعض. يعني حضرتك ما شاء الله دكتوراه في الذرة، مرآتك ست بيت زي الفل يعني، فهي إيه تكلمها في البشاميل تكلمها في، يعني هتيجي كلم مين؟
اللي من السلف كان محدث، مش فاكر مين، وبعدين كان عنده جاريه، خادمه، فيأخد مجلس التحديث هو لسه بقى يعني بيتلقى الحديث، ويروح راجع البيت يصححها من عز النوم، يقول لها: حدثنا فلان قال حدثنا فلان، فتقول له: مالي ولهذا يا سيدي؟ طب سيبني أنام أنا مالي أنا بحدثه في، يقول إيه: اعلم ألا حاجة لك بهذا، ولكن يثبتها، أنا بس عاوز إيه؟ قعدي كده قدامي بس، هقول الكلمتين عشان أدليه أنا يعني، ماشي؟
فده عمله ماشي مع، بس مش راضي يقول لك لا، اعملوا معايا بلاش ذرية، خليك معايا يعني. فالمهم يا جماعة هنا في حته برضه يعني كويس إن أنا إيه جت في بالي دلوقتي هقولها لكم، من النجاح أنك توصل لحته انك تخلي اللي قدامك هو محور الحديث، وهذا لا يحسنه إلا أقل القليل.
يعني إيه؟ يعني أنا قاعد بتكلم مع مراتي، أخلي محور حديثنا هي باهتماماتها لو قدرت، أو العكس، أو العكس؛ المرأة قعدة تتكلم مع الرجل تخلي محور الحديث هو باهتماماته. لأن غالب اللي بيتكلم بيبقى عاوز يتكلم عن اهتماماته هو، أو جاعه هو، مشاعره هو، أحاسيسه هو، مع تكرار ده حوارك بيبقى ممل، بيبقى ممل، خلاص.
شوفوا يا جماعة كده إيه، مش عارف بنط كلمة كده في دماغي ما ترجمتهاش بتبقى، ما بتجيش على طول، يعني المهم يعني إيه، يعني إيه هيحصل كده.
النبي عليه الصلاة والسلام، وبعدين إيه، عنده صداع، فيقول إيه: ورأساه، وقاعد مع عائشة، فتقول: بل أنا والله ورأساه. هنا الأول النبي عليه الصلاة والسلام الحوار داير في اهتمامات مين؟ اهتماماته هو، اهو بيتكلم عن نفسه.
راحت عائشة واخدة الحديث عند مين؟ عندها. هنا ممكن الراجل يزعل بقى، مش كده؟ يعني أنا جاي بقول لك تعبان، تقولي وأنا كمان تعبانة، يعني أنت يعني ما فيش، البعيدة ما عندهاش دم، ما تقولي لي كلمة كويسة. هو ده الحوار اللي حصل يا جماعة، أنا يعني أنا بقول بصيغة بس، ده اللي بيحصل في بيوتنا، مش ده اللي بيحصل؟ ويتقمص ويخش قوي، والعكس.
فهنا النبي عليه الصلاة والسلام بيتكلم بكلام جعل نفسه محور الحديث، ردت عائشة رضي الله عنها بكلام أخذت محور الحديث اتجاهها، بقت هي المحور، النبي كمل فين عليه الصلاة والسلام مع إنه تعبان؟ خلاها هي المحور، خلاص.
ورأساه، قالت: بل أنا والله ورأساه. قال: وما يضيرك أنك مت قبلي فغسلتك وكفنتك وصليت عليك؟ يعني لو حصل، هو طبعا ده كان في مرض الموت خلاص، فبيقول لها: ده أنت لو حصل إن انت متي قبلي، أنا اللي هصلي عليكي، ماشي. هو مش بيفول عليه عشان يقول لك ده بيفول، لا، هو هو في الاخر يا جماعة الحته اللي عاوزين نخرج بيها بس عشان ما نسرحش؛ لما كان وهو محور الحديث، فهي خدت بقت هي محور الحديث، راح معاها وخلاها محور الحديث. فاهمين؟
ده محتاجين نعرف نعمل ده، أن إزاي لما اللي قدامي أحس إنه محتاج يكون شوية محور الحديث، أعمل ده. والعكس بقى يا شباب ويا بنات، مش داينا أنا المحور، مش كل ما أقابله بتكلم عن مغامراتي وحكاياتي واليوم وحصل إزاي، ما ينفعش، ما ينفعش، لأن كده الحوار ده خلاص، بعد شوية هيقف، هو هيبطل يتكلم، أو هي، على حسب مين اللي بيعمل ده.
ابن ناس تعرف تاخد قرارات، ﴿إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾ [الصافات: 102]. إنما فكرة أنا متدخل في كل صغيرة وكبيرة، حتى ما يخص المرأة، أخص خصائص المرأة، يعني المطبخ، هيبقى المطبخ ده بتاعها، ما تسيبها هي تقول المطبخ يبقى ازاي؟
يعني أنت لا البوتجاز هيبقى في الحته دي ومش هيبقى غير في الحته دي، يا عم طب أنت هي مريحاها كده، وتفضل عايشة بالعقدة دي طول عمرك، طب وأنت يمكن إيه تمر سنين ما تدخلش المطبخ، ولو نقلت البوتجاز راجعته المكان اللي هي عاوزاه مش هتعرف، أنت ما تدخلش أصلاً المطبخ، يعني محتاجين ده.
إيه بقى أهم أهم عائق لده؟ أنا مش هتكلم عن كل العوائق، لكن هو العائق الأهم والاشهر؛ الجهاز الخبيث اللي في إيدينا ده. ده أهم عائق، أنا ليه بقول الكلام ده يا جماعة؟ لأن كله طبعا دلوقتي الحياة وردية، أنا هرجع وهقعد وهعمل حوار، فقال لك حوار؟ هتعمل إيه؟ هتروح قفل تليفونك وقافلة تليفونها، هتقعدوا قدام بعض مش عارفين تقولوا حاجة، خرص.
على فكرة، دي الصورة الأقل مشاكل، دي المشكلة هتظهر لما تبتدوا تتكلموا بقى، ليه؟ مش متعودين، مش متعودين يا جماعة. الواقع الافتراضي ده فيه مشكلة كبيرة جداً، هو واقع إيه اسمه؟ واقع إيه؟ افتراضي، أنت اللي خالقه لنفسك، يعني عارفين الفقاعة اللي أنت عاملها على نفسك في الفيسبوك دي مثلاً؟ هي الفقاعة دي مش العالم.
دي مش العالم، دي عالمك أنت، أنت اللي خالق العالم ده، مش خالقه يعني خالقه، يعني أنت اللي إيه مكونه بهذا المكون. طب إيه المشكلة؟ لا، دي مشكلة كبيرة جداً. عارفين ليه؟ ركزوا في اللي هأقوله ده بقى. دلوقتي الفقاعة اللي أنت عملتها لنفسك دي، أنت بكليك بتدخل فيها اللي أنت عاوزه، وبكليك بتحجب عنك اللي بيضايقك؛ يعني فلان ده أخباره ولا طريقته ولا بتاع مش عاجباني بلوك، شفتوا السهولة؟ طب فلان المشهور ده، ده أنا بحبه وبحب سفريات وبحب الأكلات، بسدعاء واحد فولو دخلته جوه الفقاعة بتاعتك.
هل عالمنا اللي احنا بنحيا به بهذه البساطة؟ ولا عندك في العالم حقيقي تحديات لازم تعرف تواجهها؟ يعني أنت مراتك ينفع تعمل لها بلوك على الفيسبوك؟ ينفع؟ مين هنا عامل مراته بلوك؟ مش هتعرف تعمل لها بلوك في حياتك، مش هتعرف تعمل ده. طب برده إيه المشكلة يعني؟ المشكلة أن أنت خلقت لنفسك واقع افتراضي مريح ليك، مريح ما فيهوش تحديات، ما فيهوش مغص، وأول ما بتلاقي منغص على طول بتعرف تشيل المنغصات الافتراضية. إيه اللي يخليك تخرج بره الفقاعة؟ قل لي أنت كده.
عرفتوا ليه احنا بنجري على الفقاعة دي؟ لأن الفقاعة دي من اختراعنا احنا، فبنجري على ركن الراحة بتاعك. بتجري ليه؟ أنت بتعقد ليه؟ خلاص، خليه ركن الراحة بتاعك اللي هو إيه؟ اللي هو أنت أصلاً من الأول مبسوط بيه وخالقه لنفسك، أو أنت فالب ألف باء عشان تعرف تتواصل مع بشر، أنك تقفل البتاع ده، وأنت بتقفله بقى أنت شايف المشاكل اللي هحصل.
لا، ده في تحديات أنا كنت مؤجلها. مش معنى أن مؤجلها أنها مش موجودة، أنت هتكتشف أنك مش عارف تتواصل مع ابنك وبنتك، هتكتشف كده فجأة، هتكتشف أن ده جيل وأنت جيل، يعني ممكن تكون آخر مرة قعدت فهمت دماغ ابنك أو بنتك من خمس ست سنين، تفهم دماغه مش بتدي له أوامر لا، بتفهم هو بيفكر إزاي، اهتماماته إيه، هتكتشف ده. طب ده هيعمل إه؟ شئنا أم أبَينا، هيعمل صدامات، ده عشان بس تبقى الصورة واضحة.
أنت بالخيار، قدامك الحل السهل: أول ما تلاقي ده، هتروح ساحب تليفونك من على الترابيزة ورزع باب الأوضة وداخل الفقاعة بتاعتك، أنت بالخيار، أو هتبقى راجل وأنت هتبقي ست قد المسؤولية، ونقعد مع بعض ونقول يا جماعة احنا عارفين هيحصل لنا صدمات وعارفين أن احنا بقنا كتير ما بيحصلش تواصل فعال بينا، واحدة واحدة نستعين بالله عز وجل ونقحم نفسنا في ده بقى، سواء واحد مع مراته، واحد مع ابنه، واحدة مع بنتها، نقحم نفسنا في ده ونقفل بقى تليفوناتنا دي خالص، دي-أكتيفيشن بقى للفيسبوك ولا اعملوا شوفوا أنت هتعملوا إه، ويبقى في مساحة من التواصل اللي هيبقى فيه لطش وفي زعيق وعارفين ده هيحصل، بس هنستحمل بعض عشان نوصل في الآخر لإيه؟ للحياة الصحية.
هي دي الحياة الصحية يا جماعه، الحياة الصحية اللي فيها شوية مشاكل كده، هذي الحياة الصحية، ما فيش حياة أبداً تخلو من المشاكل. إزاي تتعامل مع المشاكل؟ ده دورك أنت بقى خلاص؛ فدي كانت أول فائدة، واحنا لسه ما دخلناش في الحديث، فائدة التواصل، والمفروض النهارده ناخد فائدة تانية يعني، اللي هو عشان برده هتطول معانا خلينا نقف هنا.
يلا بسرعة بقى، ثلاثة حد يرفع إيده، حاجة استفدتها هتطلع تشتغل بيها لمست قلبك ولو كلمة، ولو بره الموضوع خالص، حد يفيدنا؟ أفيدونا، اتفضل.
ها، مش معنى المرة يعني أنت شفت دماغه بقى، الشيخ أسامة كان بيقولنا إيه؟ بيسر لنا يعني القرآن، فبيقول إيه: ﴿وَفُرُشٍ مَّرْفُوعَةٍ * إِنَّا أَنشَأْنَاهُنَّ إِنشَاءً * فَجَعَلْنَاهُنَّ أَبْكَارًا﴾ [الواقعة: 34-36]. هو إيه دول؟ هو فين ذكر الحور العين؟ فالشيخ أسامة كان بحكي لنا بـ وفرش مرفوعة، فأول ما سمعتوا فرش فكرتوا في إيه؟ اهو دول بقى أنا أنشأناهن إنشاء فجعلناهن أبكاراً، فهمتوا حاجة؟ ماشي، مش شفيق.
طبعاً بيقول إيه؟ بيقول الشفرة يعني، يعني إيه؟ أن ممكن اللي قدامك بيعمل فعل، نعوم بقى يعني سواء بقى امرأة، رجل، أي حد بيعمل حاجة، هو مش قصده يحرجك، يا جماعة هادي مثال تاني عشان بلاش امرأة ولا حاجة، كتير جداً بنشوف ده: ابنك الصغير اللي عنده خمس سنين ونلاقي الراجل ماسكه رنه علقة، عيل عنده ليه؟ أصله نام في الأرض ورفص وأحرجني وسط، كنا في كنا مش عارف في البتاع، وإيه وسط أصحابي وراح مرفس في الأرض وعرَّني، عَرَّك إيه وعم هو ده عيل تلات سنين، عَرَّك إيه؟ هو يعني هو خلاص يعني إيه هو متسلط عليك يعرك هو؟ لا لا في دماغه يعرك ولا أنت اللي فكيت الشفرة غلط، هو لما قعد رزع وعيط وعمل على نفسه، في ناس بتوصل لكده يا جماعة، تلاقي الاب ضربه، يا عم ده تلات سنين ولا أربع سنين، هو ما يقصد يعمل ده خالص ولا يقصد اللي جه في دماغك، أنت فكيت الشفرة غلط، ماشي.
ف ماشي اتفضل، عاوزين وجوه جديدة، حد فيه وجه، وجه جديد أنت جديد، أنت جديد، ما فيش حد جديد خالص، كله قديم، عاوزين وجه جديد، حد يقول حاجه حاسسها وناوي يشتغل عليها، اتفضل.
اه، يعني تبدي اهتماماً للي قدامك عشان تخرج منه بفوائد.
جميل، آخر واحدة، اتفضل.
ها إيه الفائدة؟ ما أنا عارف أن فائدة، ما أنا بسال عاوزين فائدة، قولها بقى اللي هو الموبايل بنعمل فولو للناس اللي احنا عايزينها، احنا مثلا ل الواقع الموبايل عايزين حد مهتمين، هو كل واحد عنده م ده درس مش فائدة، أنت كده يعني هات الكاميرا كده بقى وبسرعة من مهارات من مهارات التواصل هقول لكم مهارة، ماشي ما تقولش بقى بالعربي سماها تو ذا بوينت تو ذا بوينت يعني يعني تعرف معرفش بقى ترجم بس هو انك حاجة في ساعة تعرف تقولها في ايه في كلمتين فخليك بقى تو ذا بوينت يلا عاوز في 10 ثواني، ثماني ثواني.
قول طيب الخلاصه، هو كنا هنفهم لو رأي الع كنا هنشوف هنفهم أن هو الشخص غير سوي أو الشخصيات تجاوب مع بعض، احنا عندنا أهداف دينية، هو مثلاً ممكن يب مثلاً ده عمنا تمام هو كده خلص.
مين فهم بقى كلامه عشان نشوفه تو ذا بوينت ولا مش تو ذا بوينت؟ قول.
هو يعني الواقع اللي اختار ده هو مش حقيقتك أنت، يعني ده عالم أنت اخترته كمان.
عاوز تقول كده أن الواقع الافتراضي ده مش حقيقة، الشخص بيبقى هو هو نفسه عارض الشخصية اللي هو عاوز يظهر فيها به بشكل قوي جداً.
ماشي جميل، حد عايز يقول حاجة تانية ولا خلاص؟ عاوز مين عاوزين؟ ما فيش، عاوز تقول حاجة ولا متردد؟ قول.
ختامها مسك، جميل جداً والله، لو خرجنا بالمهارة دي بس من الدرس جميل، أن أن حاول توصل أن مش كل حاجة أنا أنا أنا أنا عاوز أشارك مشاكلي عاوز يهتم بي، لا خلي اللي قدامك برده ليه نصيب من الحوار.
آخر واحدة ماشي، ختام مسكين قول يلا بسرعة، ماشي يلا في 10 ثواني استفدنا إيه؟ حاجة جميل جداً والله، يعني والله بجد أنا مبسوط، دي بقى آخر رسالة، شاب اهو زي الفل اهو، اسمك إيه بقى؟ سيف، سيف اهو ما عندوش سوشيال ميديا وعايش معانا اهو لسه في الكوكب ما انقرض، قول قول.
هذا واستغفر الله العظيم لكم سبحانك وبحمدك نشهد أن لا إله إلا أنت نستغفرك ونتوب إليك.