الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد. أما بعد، أنا بس عاوز هدوء بقى خالص عشان الدرس الله يكرمكم، مش عاوزين الشياطين. مش أنت الشياطين.
طيب، قبل ما أبدا، كان في درس غض البصر المره اللي قبل اللي فاتت، جالي إن في بعض النساء فهمت حاجة أنا ما قلتهاش كالعاده. فدلوقتي، أنا قلت يعني مش فاكر قوي أنا قلت إيه، بس هم فهموا إن إيه إن المنتقبة تروح تشتري تشتري أي حاجة تخلع النقاب عشان تشتري، يعني راحت تشتري اللبانة تخلع النقاب عشان تشتري اللبانة، راحة تشتري كيس عيش تخلع النقاب عشان الراجل يشوف وشها. يعني أنا ما قلتش كده خالص، فده أنا ما قلتش كده، يعني لا الكلام قلت كده ولا أنا أقصد ده، ماشي.
طيب، الحقيقه احنا كنا خلاص ابتدينا الكلام بقى استعدادات رمضان، والمره اللي فاتت ادينا خريطة عامة للاستعداد لرمضان. من أعظم الآفات، بل إن شئت فقل هي آفات العصر التي تمنع الناس من استغلال مواسم الخيرات على الخصوص، ومن استغلال الأعمار على العموم، هي آفة الغفلة. آفة الغفلة، الغفلة من أخطر الآفات التي تمنع المتدينين من أنهم يستفيدوا بمواسم الخيرات. ولذلك حذرنا الله عز وجل الغفلة في كتابه سبحانه وتعالى: ﴿وَلَقَدْ ذَرَأْنَا لِجَهَنَّمَ كَثِيرًا مِّنَ الْجِنِّ وَالْإِنسِ ۖ لَهُمْ قُلُوبٌ لَّا يَفْقَهُونَ بِهَا وَلَهُمْ أَعْيُنٌ لَّا يُبْصِرُونَ بِهَا وَلَهُمْ آذَانٌ لَّا يَسْمَعُونَ بِهَا ۚ أُولَٰئِكَ كَالْأَنْعَامِ بَلْ هُمْ أَضَلُّ ۚ أُولَٰئِكَ هُمُ الْغَافِلُونَ﴾ [الأعراف: 179]. فالغفلة توصل لجهنم، عياذا بالله.
ولذلك، واحنا بنتكلم في الاستعداد لرمضان، كان لازم أن أول شيء نتكلم عنه هو أول منازل السائرين عند الإمام الهروي رحمه الله. شيخ الإسلام الإمام الهروي له كتاب منازل السائرين، اللي هو ليه شرح مشهور قوي لابن القيم مدارج السالكين، يعني يمكن الناس مش عارفة منازل السالكين، اللي هو أصل الشرح. الإمام الهروي رحمه الله أبدع في أنه جعل أول منزلة من منازل السائرين إلى الله منزلة اليقظة. دي أول المنازل عند الإمام الهروي. الإمام الهروي يا جماعة كتابه في مئة منزلة مقسمة على عشرة فصول. الفصل الأول فصل البدايات، الفصل الأخير فصل النهايات، وبينهم ثمانية فصول ثانيين. أول منزلة في فصل البدايات منزلة اليقظة.
ليه أول منزلة يجعلها الإمام الهروي الأول؟ يا جماعة ركزوا، الكتاب اسمه إيه؟ منازل السائرين. السائرين فين؟ رايحين فين؟ يعني السائرين دول رايحين فين؟ السائرين إلى الله جل وعلا. فأنت وأنت في دنيتك، أنت سائر إلى الله عز وجل، ﴿إِنِّي ذَاهِبٌ إِلَى رَبِّي﴾ [الصافات: 99]، فانت ذاهب إلى الله عز وجل، سائر إلى الله عز وجل، وأنت ماشي لربنا، في شوية منازل كده في طريقك لازم تبقى عارفهم كويس جداً. أول منزلة الإمام الهروي يقول لك لازم تبقى عارفها، ودي بداية المنازل: منزلة اليقظة. ليه؟
ليه منزلة اليقظة هي أول منازل السائرين؟ عشان لو حضرتك نايم وعاوز تسير، عاوز تمشي، أول حاجة بتعملها إيه؟ أنك تصحى. حد بيمشي وهو نايم؟ يبقى أنت نايم هتصحى، وبعد ما تصحى هتقوم، وبعد ما تقوم تمشي، مش ده الترتيب الطبيعي؟ ولذلك الإمام الهروي عمل حاجة عجيبة جداً، قال لك أول منزلة عندنا من منازل السائرين هي منزلة اليقظة. طيب فين دليلها في القرآن؟ جاء بقول الله عز وجل: ﴿أَن تَقُومُوا لِلَّه﴾ [سبأ: 46]. قالوا: طب الله، دي اليقظة ودي القومة؟ قال لك: آه، ما أنت عشان تقوم لازم إيه؟ لازم تستيقظ أولاً. وعشان تسير، لن تسير إلا بعد القومة. يبقى احنا بنصحى، وبعدين نقوم، وبعدين نمشي، نسير إلى الله. فطول ما احنا نايمين، ما فيش سير إلى الله عز وجل، خلاص.
طب الناس في الدنيا نايمة؟ ده حديث: الناس نيام. فالناس نايمة في الدنيا، الناس غافلة. ده اللي هو الناس الفسقة والفجره والكفره وكده؟ لا، للاسف أن زي ما قلنا دي آفة حتى المتدينين. بقت الغفلة سمة غالبة على الناس، غفلة عن مقصودك من هذه الحياة. يعني لو انت مخلوق ليه؟ سيبك من الكلام عشان احنا في مسجد ودرس وراجل بدقني بيسال، فلازم هنقول عشان ربنا والدين، وإنما حالنا ينبئ عن هذا. يعني حالنا حال ناس مخلوقة عشان الدين وعشان الآخرة وعشان ربنا وعشان كده؟ ولا كل الناس شبه بعض؟ بنقوم يصبح عشان نجري على لقمة عيشنا. وعاوزين اللي داخل له قرش عاوز يدخل له ثلاثة، واللي داخل له ثلاثة عاوز يدخل له خمسة، واللي داخل له خمسة عاوز يدخل له عشرة، واللي داخل له عشرة عاوز يسافر بره ويقبض بالدولار.
كلنا، فسيبك من الكلام اللي احنا بنقول قوله، أنت عايش ليه؟ فغفلة عن مقصودك أصلاً من هذه الدنيا، في غفلة. وغفلة عن مواقع الخيرات لتغتنمها. يعني إيه غفلة عن المواقع؟ ده هيجي معانا بقى كلام إن شاء الله، يعني احنا النهارده عاوزين نتكلم، عاوزين نصحصح، عاوزين النهارده نترك المسجد فايقين بس. استيقظنا ليه؟ علشان لما يجي رمضان نكون مش نبتدي السير، نكون صحينا وقمنا وابتدينا نسير إلى الله عز وجل، فيجي رمضان علينا واحنا خلاص احنا في وسط السير. فبنقول صور الغفلة: أول حاجة، غفلة عن مقصودك، مقصودك في هذه الدنيا إيه؟
ثاني غفلة احنا فيها: غفلة عن مواقع الخيرات. هنقول كلمة ونرجع نعيدها بقى في موطنها إن شاء الله من كلام الإمام الهروي. دايما نقول للشباب نقول لهم: قول بعض السلف: إني أعلم سبعين خصلة من خصال الخير، لا أعرف في نفسي واحدة منها. ونقول لكم: حد يعرف يقوم يقول لنا سبعين خصلة من خصال الخير مش فيه؟ فالتحدي ده غالباً ما حدش يعرف يعمله، ليه؟ عشان فينا خصال الخير؟ لا، عشان مش عارفين خصال الخير. ما احنا ما عندناش إحصاء بخصال الخير، فلما أجي أقول لك: يلا قول لي سبعين حاجة مش فيك، مش سبعين حاجة بتعملها، لا، سبعين حاجة مش فيك، سبعين خصلة من خصال الخير، سبعين باب من أبواب الخير أنت ما بتعملش فيهم حاجة. السلف كانوا عارفين سبعين باب ما بنعملش فيهم حاجة، عندهم العلم ده، طب احنا؟ لا، احنا غافلين حتى عن مواقع الخيرات مش عارفينها.
غافلين عن مواقع، يعني إذا كانت دي مواقع الرضا، فاحنا برضو غافلين عن مواقع الغضب والسخط، فيبقى ممكن نكون احنا متلبسين ليل نهار بحاجة تغضب ربنا واحنا في غفلة. غافلين عن مرور الأعمار، يعني عادي جداً، عادي انك تقعد تضيع بالساعتين والثلاثة والخرسة والعشرة في اليوم على ولا حاجة، عادي جداً غفلة. طب العشر ساعات اللي راحوا دول؟ ده انت كنت ممكن تعمل فيهم كذا وكذا وكذا، غفلة. سيبك بقى من السلف والي كان يحاسب نفسه على الأنفاس، مش احنا، ما بنتكلمش عن النفس، احنا بنقول لك يعني يا عم حاسب نفسك على الساعة، على الساعة.
كان واحد من السلف اللي يقول له إيه: أنت عاوز أكلمك، يقول له إيه: اوقف الشمس. هنقعد ندردش وبتاع، هو ما قالوش هندردش، هو قال له: ما جراش، يقول له: تعال ندردش، قال له: عاوز أكلمها، هقول لك حاجة يعني كلمتين يعني، قال له: اوقف الشمس. عاوز نقف نتكلم؟ وقف الشمس. وقف الوقت بيعدي، فانا مش فاضيلك. فاحنا في غفلة عن ذلك.
وأشد بقى من ده كله يا شباب، أشد من كل الغفلات دي، عارفين إيه؟ أن احنا غافلين عن الغفلة! مصيبة. يعني احنا في تلك الغفلات، وغافلين أن احنا في الغفلة. احنا النهارده بس عاوزين نطلع من هنا شايفين الغفلة، يعني احنا عاوزين نعالج أول خطوة اللي هو إيه؟ نشوف غفلتنا اللي احنا غافلين عنها دي، نشوف غفلتنا، عاوزين نستيقظ، نصحى، نفوق.
فتعالج نقرا كلام الإمام الهروي ونحاول نفهم، لأن الإمام الهروي طبعا كلامه جزل وصعب، ويختلف فيه العلماء: يا ترى يقصد دي ولا يقصد دي؟ كلام كبير، يعني ما بيبقاش كلام سهل. فهنحاول ما نفصصوه، يعني هناخدوه من بره كده ونستفيد منه. يقول في باب اليقظة، وهي أول الأبواب: قال الله عز وجل: ﴿قُلْ إِنَّمَا أَعِظُكُم بِلِوَاحِدَةٍ ۖ أَن تَقُومُوا لِلَّه﴾ [سبأ: 46]. وقلنا لكم: لأن اليقظة تسبق القومة. قال: القومة لله هي اليقظة من سنة الغفلة، والنهوض من ورطه الفترة. وهي أول ما يستنير قلب العبد بالحياة لرؤيه نور التنبيه.
يعني الإمام الهروي بيقول إيه؟ بيقول يا جماعة القومة دي: ﴿أَن تَقُومُوا لِلَّه﴾، مش هتقوم لربنا، خلي بالكم احنا لسه ما سرناش لربنا، يعني هنا إيه: ﴿أَن تَقُومُوا لِلَّه﴾، الآية الثانية: ﴿إِنِّي ذَاهِبٌ إِلَى رَبِّي﴾ [الصافات: 99]، فاحنا لسه بنقوم، بنقول إيه؟ عاوزين نقوم لربنا سبحانه وتعالى ليه؟ عشان نسير لربنا سبحانه وتعالى. فلازم نصحى من سنة الغفلة وأن ننهض من ورطة الفترة. إيه الفترة؟ الفترة اللي هي اللي حضر معانا درس المد بعد رمضان، آه تكلمنا عن الفترة وشرحناها على سبورة، ارجعوا له بقى. الفترة دي يا جماعة اللي هي إيه؟ اللي هو انت تبقى ماشي عندك همة، وفجاه إيه؟ المنحنى بتاعك ينزل لتحت كده، الحته اللي تحت دي بنسميها الفترة. دي الفترة اللي أنت فيها، خلاص.
طيب، واحد الفترة بتاعته الطبيعي في البشر، الطبيعي فينا أن احنا ماشيين كده، يعني ما فيش حد ماشي على خط مستقيم، كلنا بنطلع وننزل. ده كلام النبي عليه الصلاة والسلام: «إن لكل عمل شرة، ولكل شرة فترة». يعني كل عمل ليه همة ونشاط وأقبال وكذا، وبعدين يحصل الفترة. فده طبيعي، يعني ما تضايقش لو لقيت نفسك بتطلع شوية وتنزل شوية وتطلع شوية وتنزل شوية، طالما النزلة دي ما وقعتش في المحرمات. يعني النزلة دي عبارة عن إيه؟ شوية تهاون إيه في بعض المستحبات التي تاتي بها مثلاً.
طيب المشكلة فين بقى يا شباب؟ أن الفترة دي تطول. بدل ما احنا ماشيين في منحنى كده تنزل لتحت وتتبلط بقى في الخط، تطول، الفترة دي محتاجين نخرج من ورطة، نخرج من ورطة الفترة. طيب هو في إيه؟ في طب قول لها تقع مره واحدة، هنوقف الدرس كل شويه. في واحد بعت لي جواب غرامي، عاوز إيه بقى؟ نقرا عليه خطة، حلو، بس يعني الجواب طويل.
قال: واليقظة هي ثلاثة أشياء. الأول: لحظ القلب إلى النعمه. اه، يبقى يا جماعة احنا عاوزين نستيقظ. طب نستيقظ بايه؟ وإيه علامة الاستيقاظ؟ لأن الحاجات اللي هقولها من أول هنا بقى واحنا نازلين يا شباب دي ممكن تبقى سبب لليقظة، وممكن تبقى علامة على يقظتك. فاول حاجة: لحظ القلب إلى النعمة. يعني أنك تلحظ النعمة التي أنت فيها. هنا كأنك إيه؟ كأنك خرجت من الغفلة من واحدة من الغفلات اللي احنا قلناها، اللي هو إيه؟ الغفلة بمواطن الرضا. أنت دلوقتي في نعم من الله عز وجل، شايف النعم دي؟ علشان لما نقول لك: أنت شايف النعمة دي؟ هنقول لك: ارجع بقى اشكر النعمة دي.
فلو أنت مانتش شايف النعم، يعني مش شايف وجودك في المسجد دلوقتي، دي نعمة من الله سبحانه وتعالى عليك، دي مشكلة كبيرة. لو مش شايف أن الناس تبقى مثلا في العصيان وأنت مسحوب عن ده كله، ما هو انت مانتش مسحوب يا ابني بجدعنتك ولا بقوتك، خالص، بتوفيق الله لك وبنعمتك عليك سبحانه وتعالى، وإلا كان زمانك واحد منهم. فاول حاجة أن تلحظ النعمة، نعمة الآخرة، النعمة الأخرى، نعم الدين. وأن تلحظ نعم الدنيا. تقول: ما احنا كلنا بنلحظ. لا، مش كلنا بنلحظ. لحظ النعمة يا جماعة، احنا في بعضنا وده أنا مهم جداً نسمع درس الشكر مهم جداً عشان نفهم يعني إيه تلحظ النعمة.
فخلينا نقرا كلام بقى الهروي عشان نفهم هو يقصد إيه أنك تلحظ النعمة. قال: لحظ القلب إلى النعمة على القياس من عدها والوقوف على حدها. يعني تشوف النعمة وتياس أن تحيط علماً بتلك النعمة، أن تعد تلك النعم، أن تقف على حد تلك النعم. يعني تشوف أنك في نعم لا حد لها ولا أول ولا آخر. الصراحة يا شيخ أنا مش شايف ده. ما هي دي الغفلة. لأنك لو شفت ده، هتلاقي وقتك أول، احنا هنشوف بقى المفروض لما نصحى هنبقى بنعمل إيه، يعني اللي صاحي ده بيعمل.
فاللي شايف اللي أنا بقوله دلوقتي ده أنه في نعم لا أول لها ولا آخر ولا حد لها، ما يعرفش يقف يتكلم عنها من كثرتها ومن تنوعها وكذا وكذا. يبقى أول حاجة ده مشغول بإيه؟ يعني ده هتلاقيه آه، عارف النعم وشايفها وكده، وقاعد ساكت ولا لسانه مشغول بالشكر؟
خلي بالكم يا جماعة احنا هنقعد نعد حاجات، هتلاقي في الآخر تتزاحم عليك الأمور، وكأن اليوم لا يستوعب تلك الأعمال. وده هيخلينا نفهم الناس اللي صاحية ليه بيقولوا الكلمات اللي احنا بالنسبة لنا شايفينها يعني إيه ضرب من الخيال، اللي هو: اوقف، يا عم الحاج، إيه دول كلمتين، أنت هتافور ليه؟ لا، هو مش بيافور، هو لأنه مستيقظ، فشاف أن في حاجات كتير المفروض يعملها الـ 24 ساعة ما يكفوهاش. فانت جاي تاخد من 24 ساعة دقيقتين أصلاً هي مش مكفياني، مش مكفياني. وعشان كده، ده معنى آخر هنستوعبه في أن ليه السلف كان يهمهم قوي يدخلوا النوايا الصالحة في كل حاجة يا جماعة، ناس عشان كده.
نفهم ليه السلف كانوا يسألوا الصحابة رضي الله عنه يسألوا النبي عليه الصلاة والسلام ما أحب الأعمال إلى الله؟ ليه؟ علشان هم فاهمين اللعبة دي، فاهمين إن اليوم مش هيكفي، مش هيكفي نجيب كل الأعمال، طب إحنا عاوزين نطلع من اليوم بأكبر مكسب، يبقى ما أحب الأعمال إلى الله؟ وهنجي لها كمان شوية في حته العلم بقى إن شاء الله.
طيب، أنت دلوقتي حضرتك عرفت إن في نعم، إن في نعم ونعم لا حصر لها ولا حد لها، كما قال على القياس من عدها قد يئست من عد النعمة التي أنت فيها. يئست من كثرة النعم؛ أنت ما أنتش عارف عدها والوقوف على حدها، ما تعرفش حتى تتكلم عنها، ما تعرفش تقول يعني عرف لنا النعمة اللي أنت فيها؟ ما تعرفش يربط لسانك.
خلي بالكم يا جماعة اللي مش شايف ده هو في غفلة؛ إحنا في درس الشكر، اللي سمع درس الشكر أو حضره اتكلمنا عن نعمة واحدة، وقلنا الناس مش واخدة بالها منها ليه؟ لاشتراكهم فيها. حد فاكر نعمة إيه؟ الهواء. فأنا بعيد بقى للي ما سمعش الكلام ده نعمة، أنا ليه بعيد ده المثال؟ علشان أقول لك كونك ما أنتش واخد بالك فانت في غفلة، نعمة أن أنت قاعد دلوقتي وأنت قدامي بسهولة بتاخد شهيق وتطلع زفير بسهولة، مين فينا شاف النعمة دي قبل كده؟ ومين قعد أعطى تلك النعمة وقتاً من وقته ليشكرها؟ لو مش شايفها نعمة بقى روح شوف زور معهد الصدر ولا مستشفى الصدر.
ارجع كده بخيالك لورا شوية ولا بذاكرتك الناس الكبيرة شوية وقت جائحة كورونا كانت أنبوبة الأكسجين يعني ممكن واحد ينفق فيها كل ما يملك عشان عنده مريض هيموت، مع ازدحام المستشفيات وكده بقت أنابيب كانت بتتباع وتتاجر بره المستشفيات. الناس الكبيرة شوية حضرت ده واعية اللي أنا بقوله ده، اللي هو واحنا في الطبيعي إحنا مش حاسين بيها أصلاً، مش حاسين بالنعمة دي.
قال: وعلى القياس من عدها والوقوف على حدها، والتفرغ إلى معرفة المنة بها. يئست بقى إنك تعد النعمة وأنك تقف على تعريف للنعم دي، ولا تعرف تتكلم عنها، ترجع إلى إيه؟ مشاهدة المنة والتفرغ إلى معرفة المنة بها. ما هو يا جماعة لو إحنا خلاص اعترفنا النعم كبيرة جداً وكثيرة جداً، طب النعم دي أنت بجدعتك استجلبت تلك النعم؟ لا، ما هياش بجدعتك. طب أنت تستاهلها؟ لا ما تستاهلهاش، تستاهلها بإيه أصلاً؟ يعني أنت عملت إيه؟ أنت لسه مولود أهو طفل صغير، فايه اللي أنت عملته؟ إيه الإنجاز يعني اللي عملته في حياتك علشان تستاهل إن الرب سبحانه وتعالى يصرف قلب أبيك وأمك لك؟ ما هي دي نعمة، هو معلش يعني أنا هو فكرة إن أنت يجي المولود يا جماعة إحنا عشان اشتراك في النعم إحنا مش شايفينها.
إحنا عشان أي مولود بيجي فالطبيعي الاب والام بيحبوه، فشايفين ده عادي، هو ده مش عادي، هو ده قلب صرف لك، ده منين عادي يعني؟ منين جبتها أنها عادي دي؟ يعني منين الاب ده اللي ممكن يسهر طول الليل ويبقى جعان عشان بس يوفر لك اللي أنت محتاجه وأنت طفل لسه لا تعي شيئاً؟ فده مش عادي، ده قلب صرف لك. فصرف قلب الوالد والوالدة لك، أنت بقى إيه الإنجاز في حياتك عملته عشان تاخد النعمة دي؟
طيب نعمة أن تلهم أول ما تلهم وأنت صبي صغير التقام الثدي. ما هو الطفل الصغير ده يا جماعة اللي اتولد ده هو بيعمل إيه في حياته؟ ما بيعرفش يعمل أي حاجة إلا التقام الثدي، ما فيش أي حاجة بتتعمل، ما بيعرفش يعمل أي حاجة تانية بإرادته. الطفل الصغير ده اللي هو لسه ليه ساعة زمن مولود بيعمل إيه في حياته؟ ما بيعرفش يعمل حاجة، ما فيش أي حاجة بتتعمل بإرادة إلا حاجة واحدة التقام الثدي، ودي اللي فيها حياته، من ألهَمَهُ ذلك؟ طب أنت بجدعنتك يعني؟ أنت عملت إيه في إيه الإنجاز اللي عملته في أول ساعة من ولادتك فاستحققت بذلك أن تلهم التقام الثدي؟ إيه؟ ولا حاجة يا جماعة، أنتوا لو ركزتوا في الحاجات دي، دي نعم، يعني فكرة التقام الثدي وأنه إيه يبقى عنده حركة المص دي، سواء بقى الثدي ولا الببرونة ولا أي حاجة من الحاجات دي، منين؟ منين عرف ده؟ ودي الحاجة الوحيدة اللي بيعملها أصلاً، ما فيش أي حاجة تانية بيعملها. أي حركة تانية بيعملها الطفل هي لا إرادية، وعلى هذا فقس في حياتك كلها، أي نعمة أنت فيها فانت غير مستحق.
طب ليه؟ ما أنا لما كبرت عملت وعملت، هنجي بقى للي جاي إن شاء الله بعد ما نخلص النعمة، هنكتشف أن إحنا ما نستاهلش النعم دي خالص. طيب يبقى أنت ما تستاهلهاش، ونعم كيرة جداً لا تعد ولا تحصى، وده إحنا ما تكلمناش في تفاصيل نعم، وده ما هواش درس أن إحنا نتكلم في تفاصيل نعم أصلاً، اللي عاوز بقى يقرا عن النعم يقرا بقى في كتب في إيه؟ كتاب الشكر من أي كتاب، يعني كتب في الحته دي.
ترجع إلى إيه بقى؟ أن تشاهد المنة. يعني إيه تشاهد المنة؟ يعني تراها منة من الله، فضل إيه من ربنا كده: «يمنون عليك أن أسلموا قل لا تمنوا علي إسلامكم بل الله يمن عليكم أن هداكم»، حط بقى كذا وكذا دي أي حاجة في حياتك يعني بتمن على الله أنك عملت حاجة شرعية، أنك ختمت المصحف حفظته؟ لا تمن علي حفظ المصحف، بل الله يمن عليكم أن هداكم أن تجلسوا على المصاحف وتفتحوا المصاحف وتختموا المصاحف، فالمنة جل وعلا مش ليك. تمن على الله بصيام رمضان؟ لا تمن عليه، بل الله يمن عليك أن وفقك أن تصوم وغيرك ما صامش. أنت أجدع من غيرك في إيه؟ أنا مش فاهم، أجدع منه في إيه؟ غيرك ده، أنت أجدع منه في حاجة واحدة: أن الرحمة شملتك، بس.
فقال والتفرغ إلى معرفة المنة بها، ده كله محتاج أول حاجة يقظة، نصحصح كده ونشوف النعم، نراها نعمة، وده اللي كنت بقول لكم عليه في أول الدرس: أنتوا فاكرين أن إحنا شايفين النعمة؟ لا، إحنا مش شايفين النعم، مش شايفين النعم لأننا ممكن ما نكونش شايفين النعمة فعلاً، زي نعمة الهواء، وممكن نبقى شايفينها لكن مش منتبهين أنها منة من الله عز وجل. يعني لو شاء الله عز وجل: ﴿لَا يُسْأَل عَمَّا يَفْعَلُ وَهُمْ يُسْأَلُونَ﴾ [الأنبياء: 23]، لو أمسك الله عز وجل الهواء عن الأرض لمدة خمس دقائق بس، كله يموت. طب دي سهلة على ربنا ولا عسيرة؟ يعني إنما أمره إذا أراد شيئاً أن يقول له كن فيكون. امسك ارفع الأكسجين على الأرض لمدة عشر دقائق كله يموت.
ولو شاء الله عجل أراك آية في نفسك، دي هتبقى إيه؟ عامة. ممكن تلاقي الآية في نفسك، أو في أخيك، أو في أبيك، أو في أمك، أو في جارك، أو قريبك، اللي هو إيه بقى؟ يمسك الهواء عنه، الهواء حواليه أهو وهو مش عارف يعمل دي، بس شايفين دي؟ مش عارف يعملها. يا جماعة أنت لو شايفين ده عجيب فده عجيب، أن إحنا ما نشوفش العجب في هذا فده عجيب منا، يعني ده إحنا قلوبنا فين؟ الحركة البسيطة دي اللي أنا عملتها دلوقتي دي اللي من أول ما ابتديت كلام عملتها، ممكن يبقى فوق الـ 500 مرة، في واحد بيدفع فلوس فيها ما بيعرفش يعملها، فهي منة.
طب طالما هي منة من الله عز وجل يبقى أنت المفروض مشغول بإيه؟ بالشكر، ده أبسط شيء. إحنا ممكن نتكلم في الحته دي كتير، مشغول بالشكر صح؟ عارف ده معناه إيه؟ عشان اللي يقول لك: أنا عندي وقت فراغ، أنا فاضي. عارف ده معناه إيه؟ أن كلما تجددت لك نعمة لابد أن تجدد عليها شكراً، ده أبسط صح كده؟ عارف ده معناه إيه؟ أن مع كل نفس المفروض تعمل إيه؟ تشكر؛ لأن كل نفس نعمة جديدة، يعني النفس اللي أخدته دلوقتي ده نعمة، طب النفس اللي بعديه نعمة تانية غير النفس الأولاني، فانت مع كل نفس تشكر. حد يعرف يعمل ده؟ مستحيل، مستحيل.
خلي بالك، ده أنت بس لو مركز أنك تشكر كل نفس، مع كل نفس أنت مع كل نفس في كم نعمة في جسدك بس؟ في الجسد بس، ما بقولكش نعم جالك من بره لا، يعني تهيئة هذا الجسد وبناؤه على هذا النحو علشان تعرف تتعاطى مع الدنيا، علشان العمليات الوظائف الحيوية تشتغل، فانت مع كل نفس لو بس انشغلت بشكر النفس فانت فايتك شكر حاجات تانية، ولسه ما طلعناش للنعم اللي بره، أنا بقول لك وفي أنفسكم بس.
طيب حد يعرف يعمل ده؟ مستحيل. حد يعرف يعمل ده مستحيل. يبقى كل البشر مقصرين في الشكر، كل البشر، آه كل البشر بأولياء بصحابة كل البشر مقصرين في الشكر. طب خد المفاجأة، حضرتك شكرت على النفس، إيه رأيك في الشكر اللي أنت شكرته ده؟ إيه ده؟ نعمة، ولا أنت مش شايفه نعمة؟ أنك تُلهَم الشكر دي، إيه دي؟ نعمة أعظم من النفس نفسه، هب أن إحنا تخيلوا كده أن آه في بني آدم كل نفس بشكر، طول ما هو ماشي بيخد النفس الشهيق بيطلع بالحمد لله ومستحضر النفس وكده، طب الحمد لله اللي حضرتك ألهمتها دي، أهدي نعمة أعظم من نعمة النفس؛ لأنها نعمة دينية، يبقى محتاجة إيه؟ محتاجة شكر صح؟ طب الشكر التاني ده لو ألهمته، ده إيه؟ نعمة، فيبقى إيه محتاج شكر؟
المعنى اللي بقوله ده قاله داود أو موسى عليه السلام، قال له: يا رب كيف أشكرك وشكرك نعمة تستوجب الشكر؟ أشكرك إزاي؟ مش عارف أشكر، يعني كأنه قعدت أفكر في هذا المعنى: أنا مش عارف أشكر، مش مش عارف أشكر يعني قاعد ما بيشكرش، لا هو بيشكر، هو باذل وقته في الشكر، لكن بيجي في دماغه إيه؟ طب اللي أنا فيه ده ما هو ده نعمة، طب أنا عاوز أشكرها ما فيش أجيب منين وقت؟ ولو شكرتها هيبقى محتاج بقى شكر للثالثة، والثالثة محتاج شكر ليها، والرابعة والخامسة: كيف أشكرك؟ أشكرك إزاي؟ فقال الله عز وجل: إذا عرفت ذلك فقد شكرتني. عرفت إيه بقى؟ عرفت أن كل شيء مني.
كيف أشكرك وشكرك نعمة؟ كان هذا النبي تلمح معنى أن هذا الشكر منك يا رب ليس مني يا رب. أنا لما شكرتك ده مش مني، ده منك، كلمة الحمد لله دي اللي طلعت من بقك دي مش منك دي منة: ﴿ثُمَّ تَابَ عَلَيْهِمْ لِيَتُوبُوا﴾ [التوبة: 118]. وقل ذلك في كل شيء، ثم ألهمهم الشكر ليشكروا، وألهمهم الحمد ليحمدوا جل وعلا.
قال: إذا عرفت ذلك فقد شكرتني أن كل شيء مني. يبقى الأول نقرا الكلام على بعضه: لحظ القلب إلى النعمة على القياس من عدها والوقوف على حدها، خلاص يئست أنك تعرف، والتفرغ إلى معرفة المنة بها، والعلم بالتقصير في حقها. يبقى منة من الله عز وجل، وأنا مقصر يا رب في حق هذه المنة، في حق هذه النعمة.
اقعد بقى كده حضرتك عشان تصحى من غفلتك، فكر في كل نعمة، فكر في نعمة الوقت، نعمة الزمان، نعمة أنا اتكلمت عنها مش فاكر في إيه فين قبل كده: نعمة الإمهال، أنت قاعد وفاتح إباحيات، هو أنت إيه يعني؟ أنت جدع قوي أنك لا تقبض الآن؟ يعني منين جايبها دي؟ جايب الأمان ده منين؟ أنك لا تقبض في هذه اللحظة؟ أمهلك ونمت وصحيت، إيه الجبروت ده أنك ما توبش؟ أنت إيه يا ابني؟ إيه الجبروت؟ نعمة الإمهال.
أول ما تفتح عينك أول حاجة تقول إيه؟ «الحمد لله الذي أحيانا بعد ما أماتنا واليه النشور»، الحمد لله الذي أمهلنا. أنت نمت عادي جداً، ما تصحاش عادي، وبنشوفها وبنسمع عنها عادي. طب صحيت؟ الحمد لله الذي أحيانا بعد ما أماتنا. نعمة الإمهال.
قال: والعلم بالتقصير في حقها، فانت وأنا والبشر كلهم مقصرون في شكر النعم. الزمان بتاعنا ده، الوقت بتاعك، الدقيقة والثانية والساعه واليوم والشهر، شكرت ربنا إزاي عليهم؟ مضيعينهم ما فيش شكر، كلنا مقصرين. فهذا أول اليقظة، أول اليقظة أن ترى النعمة، أن يلحظ القلب النعمة منة جل وعلا مع التقصير في القيام بحق هذه النعمة، فابتديت إيه ده؟ ابتديت تركز كده، ابتديت إيه تصحى، تصحى أن إيه؟ أن عليك واجب كبير.
أنت عارف اللي هو هديكم مثال عشان بس نفهم القصة، عارفين الطالب كده وقت قبل كلنا واحنا في المدرسة ولا في الجامعه ولا تلاقي عمل إيه؟ مكبر دماغه، ممكن واحد من الرحرحة ينسى معاد الامتحان إمتى لغاية ما يجي واحد يقول له: إيه يا ابني الامتحان بعد شهر وأنت الحاجات اللي عندك دي تتلم في سنتين ونص أصلاً، فيبتدي إيه يفوق أنه عليه واجب كبير. واجب ده مش واجب أنه يعني يعني عليه واجب، عليه شيء لابد أن يعمل، والشيء ده هيستوعب الزمان وكمان يفيض عن الزمان.
يا جماعة إحنا لسه ما دخلناش في توبة، ما دخلناش في استغفار، ما دخلناش في حاجة، إحنا بنقول لك يا ابني لو بس بنكلمك في الشكر يستوعب عمرك، ما مش حاجة تانية.
قال: والثاني مطالعه الجناية. يبقى أول حاجة في اليقظة: أول حاجة تلحظ النعمة، تاني حاجة تطالع الجناية، الثاني مطالع الجناية. يعني إيه مطالع الجناية؟ أول حاجة مطالعه الجناية قبل المعنى العام.
يبقى أننا في جناية، وكلنا مطالع للجناية. أن تطالع جناية نفسك بغفلتك. الذي قلناه لكم في أول الدرس ما هو؟ نحن جايين هنا بس نعمل حاجة واحدة، نطلع من الغفلة عن الآية، عن الغفلة. احنا قلنا لكم في غفلة عن كذا، وغفلة عن كذا، وغفلة عن كذا. وأعظم هذه الغفلات؛ الغفلة عن الغفلة. يعني أنت غافل، ومش بس مش شايف نفسك غافل، لا، ده أنت غافل وشايف نفسك شيخ! شايفين المصيبة أنا يعني غافل وشايف نفسك رجل بتاع ربنا؟ مصيبة.
طب نخرج إزاي من الورطة دي؟ حاجة من الحاجات، وهتيجي معانا إن شاء الله بس يعني إيه هو بيبقى رزق كده فبنقوله يعني، بس ده جاي معانا: قيس نفسك على مين؟ اقرأ بقى سير السلف عشان تشوف يا عم الشيخ، شوف بقى المشايخ اللي بجد عاملين إزاي. قال: هتيجي معانا الكلام ده مش عاوز أفتحه دلوقتي. قال الثاني: مطالعة الجناية أو الجناية الغفلة. هذه أول جناية. لأن ممكن واحد يقرأ إيه مطالعة الجناية، يعني إيه المصائب والبلاوي اللي بنعملها، الحرام يعني؟ لا مش شرط الحرام.
مش شرط الحرام يا جماعة، أنا عاوز أديكم مثال عشان تفهموا بس، تفهموا الحته دي، يعني اللي هي بتاعة دلوقتي. لو حضرتك معاك مليون جنيه كفَّ الشر، وبعدين قدامك تجارة تتاجر بها في المليون وتجيب لك ربح سنوي مثلاً 20%، فهيجيلك كام في السنة بسرعة؟ 200 ألف جنيه على المليون، صح كده؟ جميل. ومشيت في التجارة دي سنة، عمال تكسب أنت من جواك حاسس بأيه؟ مبسوط ولا زعلان؟ مبسوط، تكسب مكسب حلو على المليون.
بعد السنة دي قاعد مع واحد صاحبك، صاحبك ده إنتيمك، قال لك: أنت عارف أنا فتحت تجارة من سنة والله، كان نفسي تكون معايا ومش عارف بس نسيت أقول لك سقطت أقول لك، المليون بيجيب 50%؟ في اللحظة دي، في اللحظة دي، هتحس بأيه؟ أنك كنت بتخسر في السنة 300 ألف جنيه! هتنسى خالص المكسب اللي هو 200 ألف، وهتفتكر أو هتحسبها إزاي: أنا كان في إيديا أكسب 500 ألف جنيه في السنة، كسبت 200 ألف! هتحس أنك كنت بتخسر. ليه ما بنتعاملش كده مع أوقاتنا مع زمننا، ليه؟
ما هو لو قلنا المال ده مورد من الموارد، شوفوا بنتعامل إزاي مع المورد ده. طب يا جماعة، نبص لأوقاتنا كده، أن ده مورد من الموارد. فمثلاً مثلاً لو أنا عندي العمل الفلاني هيجيب لي 1000 حسنة، والعمل الثاني هيجيب لي 5000 حسنة، فأنا لما أروح لعمل أبو 1000 حسنة أشوف نفسي خسران 4000 حسنة! عشان كده بقى اللي قلنا لكم هتيجي بعد شوية: الصحابة، ما أحب الأعمال إلى الله؟ آه، ليه السؤال ده؟
ما الصحابة عارفين كل الأعمال التي يحبها الله عز وجل، ما تمشوا في أي حته واعملوا أي حاجة؟ قال لك: لا. ليه لا؟ لأن هم بيحسبوها زي ما أنا قلت لكم من شوية كده: أنا ليه أخرس، ما أدوس في الحته التي هي أحب إلى الله جل وعلا؟ فقالوا يبقى ثاني حاجة: مطالعة الجناية من الجناية الغفلة. يبقى تطالع غفلتك، تشوف جنايتك مصيبتك أنك مضيع عمرك. يا شيخ أنا ما بعملش حرام! أقول لك دي مصيبة ثانية، أنك ما تعرفش الحرام، لأن ما فيش حد ما بيعملش الحرام! ما فيش حد ما يعملش حرام! فكأنك ما بتعملش حرام، أنت شايف نفسك ما بتعملش حرام، ما هو مين اللي ما بيعملش حرام يعني؟ مين؟ ما أنت كده معصوم! في ناس بتعمل كبائر وهي مش عارفة أنها بتعمل كبائر عادي جداً، في ناس تعمل كبائر من أكبر الكبائر! أنا ما بهزرش، في ناس تقع مش في كبيرة، في كبيرة من أكبر الكبائر.
ويمكن قبل ما يجي الدرس أمه بتقول: روح مشوح على صوته فيها، والأخ فلان وجزاك الله خيراً ورايح المسجد وقعد من المغرب للعشاء، وهو نازل من بيته عامل كبيرة من أكبر الكبائر! ويجي هنا يقول لك: إيه يا شيخ ما عملتش حاجة حرام؟ وقد يكون هذا خلاص يعني طرد من رحمة الله عز وجل يعني خلاص، ختم عليه بقى خلاص! ده إيه بزعقته في أمه دي، ولا بتشويحته لأبوك ولا أنت إيه اللي يأمنك؟ في واحد عادي جداً بيدخل ينام ويظبط المنبه 7 الصبح عشان عنده الشغل الساعة 8. مبروك، أنت قايم على كبيرة من أكبر الكبائر! اللي هي إيه؟ ضيع صلاة الفجر. وقت الفجر لغاية الشروق، ضيع صلاة الفجر عمداً مش مثلاً ظابط الميعاد وما صحيش، لا، ده ظابط بعد الشروق! ويجي في الدرس يقول لك: أنا ما عملتش، الحمد لله ما عملش حاجة حرام الحمد لله. أمال إيه الحرام يعني؟ لو ده مش حرام يبقى فين الحرام؟
يبقى نشوف جناياتنا يا جماعة، ده ثاني اليقظة. يبقى أول اليقظة أن يلحظ القلب النعمة. ثاني اليقظة أن تطالع جنايتك. قال الثاني: مطالعة الجناية والوقوف على الخطر فيها. لما تطالع جنايتك، اقعد بقى فكر فيها شوية كده، خلي بالكم أنتم واخدين بالكم احنا عملنا إيه دلوقتي؟ احنا ركنا الآية الشكر اللي هو أصلاً المفروض يبقى إيه مستغرق العمر! شايفين يا جماعة الزحمة اللي احنا فيها، احنا كله قرينا إيه سطرين؟ سطرين من اللي بتقول لي أنا فاضي، أنا عندي وقت فراغ مش عارف أعمل فيه إيه. احنا قرينا سطرين من الدين، أول سطر استغرق العمر والعمر ما كفاش في أول سطر. دخلنا لتاني سطر نسينا السطر الأول أصلاً، واكتشفنا ده احنا في مصيبة ثانية المفروض تستغرق العمر: مطالعة الجناية والوقوف على الخطر فيها.
يعني إيه بقى؟ يعني يا حبيبي طول ما احنا كده أنا وأنتم، طول ما الواحد في الحته دي هو على خطر، لو مات وهو كده مصيبة كبيرة. يبقى اقعد فكر في ده، يقوم ده يوديك لفين؟ قال: والتشمير لتداركها. أهي وظائف، شوفوا شوفوا وظيفة بتجيب وظيفة! يبقى شفت الجناية، ابتدت تصحى استيقظت، عشان كده نزلت اليقظة، عرفت أنك لو فضلت كده فانت على خطر، شمرت بقى للتدارك والتشمير لتداركها والتخلص من ربقها، ما تبقاش أسير لعادة سرية، ما تبقاش أسير لراحة راح ودَّعك، خليك ما تزدش تصلي في المسجد، التخلص من ربقها، أنت كأسر ليها. قال: وطلب النجاة بتمحيصها، طلب النجاة من الله بايه بأنك تمحص هذه الأمور، بأنك تنتهي عن تلك الآفات، عن تلك الجنايات.
كل ذلك في مطالعة الجناية. خلونا بقى نعمل حاجة كويسة جداً هنا، الهروي ما عملهاش بس احنا عاوزين نعملها، عملها غيره زي ابن القيم. ما تيجوا بقى نربط الاثنين ببعض كده يعني: أول حاجه قال لك إيه؟ لحظ القلب إلى النعمة، وده احنا شرحناه لوحده، وبعدين قال لك إيه؟ مطالعة الجناية وده شرحناه لوحده. ما تركبوا الاثنين على بعض كده عشان تفاجئوا بمشهد ثالث في غاية العجب! احنا أشرنا إليه يعني بس ما اللي هو إيه بقى؟ اللي هو مطالعة النعمة مع مطالعة الجناية.
آه، يعني عاوز تقول إيه؟ يعني عاوز أقول لك يا ابني أنت ليل نهار بتعصي، وليل نهار غافل، وليل نهار ونعمة تتجدد عليك. شايفين احنا فين يا جماعة؟ عرفتوا ليه كان بعض السلف ما بيعرفش يدعي أصلاً؟ ما بيعرفش يدعي. ليه؟ هو مسيطرة عليه الفكرة، إيه فكرة إيه؟ أنا كل حاجة منه، وبعد ما بقى كل حاجة منه أنا العبد الجاني، العاصي المفرط، مش بس كده، لا ده أنا العبد اللي ما استغلش النعمة اللي أنعم عليه بيها دي استغلال صحيح! فاكرين الدرس اللي فات لما قلت لكم ثاني ركعة في العصر أنت قريت بايه؟ مش الشيخ قرا بإيه بقى في صلاة جهرية، أنت شفايفك دي اتحركت؟ قال: فاكرين الكلام.
تعالوا بقى يلا بقى نسقطها على الكلام اللي هي إيه: هو أنت ما صليت العصر، صليت العصر ليه؟ يعني بقوتك وجدعنتك وحلاوتك وجمالك ولا منة منه سبحانه وتعالى؟ والله منة، نعمة، رحمة كده منه أن احنا نكون هنا في جموع المصلين. فهو وفقك سبحانه وتعالى، على طول أول ما تتلخبط ارجع للآية: ﴿يَمُنُّونَ عَلَيْكَ أَنْ أَسْلَمُوا قُلْ لَا تَمُنُّوا عَلَيَّ إِسْلَامَكُمْ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ﴾ [الحجرات: 17]. لا تمُنُّوا عليَّ صلاة العصر، بل الله يمن عليكم أن هداكم لصلاة العصر. سهلة!
طب جابك بقى ووقفك في صلاة العصر، أنت عملت إيه؟ سرحت، غفلت، بقيت واقف عملت إيه الأول يا جماعة؟ الله عز وجل ينظر إلى إيه؟ إلى قلوبنا، صح كده؟ تعالوا ناخد مثال عشان نفهم اللي احنا بنعمله مع ربنا وعشان نفهم الله عز وجل. يعني ممهلنا إمهال يفوق العقل والله والله، ربنا إمهال ربنا علينا ده إمهال احنا أنا بتكلم على مين ها؟ الناس اللي بتصلي، ما باكلمش على الفساق، أنا باكلم الناس اللي صلت العصر.
دلوقتي لو أنت رايح لملك، مش رايح بقى أنا آسف مالك منور الدنيا، مش أنت رايح له هو اللي جابك، ما هو أنت ربنا اللي جابك الجامع فملك هو اللي جابك عنده يعني إيه جابك عنده؟ بعت لك العربية واقفه تحت البيت وجباك لغاية عنده! ليه؟ علشان عاوز يتكلم معاك شوية، ما هو الصلاة صلة بينك وبين الله، والله عز وجل قد قسم الفاتحه بينه وبينك نصفين، في حوار، جابك عشان عاوز يدردش معاك شوية الملك ده. فدخلت عليه وابتدت الآية المحادثة، طبعا الملك نظره إلى إيه؟ إلى ظاهرك، صح كده؟ فوانت بتكلمه تبص في السقف وتطلع الموبايل من جيبك تيه تشات وبتتكلم، آه أنت بتتكلم آه بس بتعمل كده، الملك ده يعمل فيك إيه؟
أهو احنا ده بالضبط اللي بنعمله مع ربنا كل يوم خمس مرات يا جماعة، أنا باكلمكم في الصلاة، أنا ما باكلمكوش على الحرام اللي بنعمله، أنا باكلمكم في الصلاة اللي هي الحاجة اللي ما فيش في يومنا غيرها أصلاً ونرجو بها شيئاً ما في الآخرة. ربنا سبحانه وتعالى حملك إلى بيته فكنت من جموع المصلين ومن صفوفهم، ودي نعمة منه ومنة، اللي هو أول إيه بقى؟ لحظ القلب النعمة. فكانت منك الجناية أن التفت بقلبك، لأن الله لا ينظر إلى صوركم زي ما كان الملك ينظر إلى الصورة إلى ظاهرك وأنت بتبص يمين وشمال، الله ينظر إلى قلوبكم!
حملك إليه جل وعلا لتنشأ جاء تلك الصلة بينك وبينه، الصلاة صلة، فما كان منك إلا أن تلوثت بالجناية، إيه بقى الجناية؟ التفت عنهم. اربطوا المقامين ببعض بقى اللي هو إيه من القائمة لما قالهم قال إيه بقى؟ مشاهدة المنة ومطالعه عيب النفس والعمل. مشاهدة المنة ومطالعه عيب النفس والعمل.
أول ما تربط المقامين دول على بعض، هتسأل بقى فردوس؟ وهو خلي بالك السائل الفردوس بيبقى شايف نفسه مستحق! يعني تلاقيه بيسال فردوس امتى بقى؟ بعد ما أخلص العمرة! عمرة إيه يا حبيبي اللي ربنا حملك ليها دي؟ وبعد ما حملك ليها عملت أنت فيها إيه بقى؟ فاكر أنت قلت إيه في طوافك؟ عينيك راحت يمين وشمال وزاغت، استثقلت العبادة، نمت في الفندق وفاتك فرض! تشهد الجناية مشاهدة المنة ومطالعة عيب النفس والعمل.
ابن القيم بقى كان بيقول لك: أول ما المشهدين دول يتجمعوا عندك، اللي هم قالهم الهروي ورا بعض كده، تلاقي نفسك مش عارف تقول إيه! فتلاقي إيه اللي يحصل بقى؟ تلاقي مثلاً سيدنا أبو بكر يجي للنبي عليه الصلاة والسلام يقول له: علمني دعاء كده أدعو به في إيه؟ في نهاية الصلاة. أبو بكر صديق الأمة في بعد أبو بكر، فسيدنا النبي هيعلمه أهو عليه الصلاه والسلام دعاء بقى يدعو به في نهاية الصلاة، يقول له ايه: قل: اللهم إني ظلمت نفسي ظلماً كثيراً، وفي رواية: ظلماً كبيراً. بعض قال يقول لك اجمع بينهم: ظلماً كثيراً كبيراً. اللهم إني ظلمت نفسي ظلماً كثيراً ولا يغفر الذنوب إلا أنت، فاغفر لي مغفرة من عندك وارحمني إنك أنت الغفور الرحيم.
يلا نعيد دعاء ثاني: اللهم إني ظلمت نفسي ظلماً كثيراً. ده إيه؟ مطالعة عيب نفس وعمل. صح؟ ولا يغفر الذنوب إلا أنت. ده إيه؟ مشاهدة منة. أول ما المقامين دول يتجمعوا، ما بتعرفش تدعي بحاجة غير انك تسأل الآية العفو والمغفرة: فاغفر لي. ما ادعيش يقول: أنا شاهدت جنايتي أو طالعت جنايتي وشاهدت منتهى لي عن، فتلاقي الدعاء إيه: فاغفر لي.
سيدنا أبو بكر بيقول الدعاء ده إمتى؟ بعد المعصية! قال له يا أبا بكر: لو عصيت الله فقول كذا وكذا. آه، بيقولها إمتى يا جماعة؟ في نهاية صلاة أبو بكر، مش نهاية صلاتك أنت! النبي عليه الصلاة والسلام يعلم أبا بكر دعاء يقول في نهاية صلاته هو، شوف صلاة سيدنا أبي بكر عاملة إزاي، فيكون هذا الدعاء الذي يختم به صلاته.
مثال ثاني: عائشة رضي الله عنها هتيجي تسال النبي عليه الصلاة والسلام: أرأيت إن وافقت ليلة القدر ودينا على رمضان، فما أدعو؟ ليلة القدر دي بتيجي في أول رمضان ولا في آخره؟ آخر رمضان، يعني بقالنا معظم الشهر بنعمل إيه؟ السيدة عائشة بتعمل إيه معظم الشهر يا جماعة، شوفوا أنتم بقى يعني رمضان بتاع السيدة عائشة عامل إزاي، وتيجي تسال النبي عليه الصلاة والسلام جت ليلة القدر بقى اللي هو الدعاء فيها يعني أقرب للإجابة أدعي إيه؟
﴿اللَّهُمَّ إِنَّكَ عَفُوّْ كَرِيمٌ تُحِبُّ الْعَفْوَ فَاعْفُ عَنِّي﴾. إيه ده؟ يعني ما فيش فردوس أعلى وما فيش مرافقة؟ ﴿اللَّهُمَّ إِنَّكَ عَفُوّْ تُحِبُّ الْعَفْوَ فَاعْفُ عَنِّي﴾. ده دعاء إيه؟ دعاء واحدة شاهدت المنة وطالعت عيب النفس والعمل، فخلاص.
ولذلك كان سيد الاستغفار في المشهدين دول. مش كده سيد الاستغفار إيه؟ اللهم أنت ربي لا إله إلا أنت خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك عليّ. يلا من أول هنا بقى، أبوء لك بنعمتك عليّ ده إيه؟ مشاهدة منك، وأبوء بذنبي، ده إيه؟ فبعديه على طول يجي إيه؟ فاغفر لي. مشاهدة منا مطالت عيب نفس العمل.
طيب، الأمر الثالث في اليقظة، قال: والثالث: الانتباه لمعرفة الزيادة والنقصان في الأيام. إنك تنتبه لزيادة والنقصان في الأيام، يعني إيه زيادة ونقصان في الأيام؟ يعني أعمالك في اليوم والليلة، عمل اليوم والليلة، فلازم تبقى منتبه للزيادة والنقصان في الأيام، مش في الأيام يعني مش اليوم نفسه، لا في الوقت ده: أنت زدت ولا قليت؟ طب ولو زدت؟ كانت ممكن تزيد أكتر فما زدتش؛ فالحتة الزيادة دي ممكن نعتبرها خسارة خلي بالك! مش بنقول لك تأثم ولا حاجة، بس بنفس فكرة استغلال الموارد أفضل استغلال، الفلوس اللي كانت معاك اللي كنت فرحان بالمئتي ألف في السنة بكسب فيها، ولما عرفت انك كنت ممكن تبقى بكسب خمسمائة ألف زعلت، ده اللي بنقوله لك، بس بنقول لك يا عم عامل وقتك زي ما بتعامل قرشك.
يعني حاجة بسيطة جداً يا جماعة والله، عامل وقتك زي ما تعامل قرشك. قال: والثالث: الانتباه لمعرفة الزيادة والنقصان في الأيام، والتنصل من تضييعها. أول ما تعرف بقى الزيادة والنقصان في... طب إزاي نعرف الزيادة والنقصان في الأيام؟ هيجي معنا إن شاء الله وكده فات قد إيه؟ فعلاً. أيوه كده، مين اللي قال ساعة إلا خمسة؟ أنت كلية إيه؟ ثانوي؟ هتخش إيه؟ هندسة ولا شكلك هتطلع مهندس، بقول له فعلاً ساعة إلا خمسة يعني عشان... طب أنت فاهم اللي بقوله؟ بس ثانوي يعني ممكن يبقى صغير شويه.
قال: فأما معرفة النعمة... إحنا فين؟ والثالث: الانتباه لمعرفة الزيادة والنقصان في الأيام والتنصل من تضييعها، مش عاوزين بقى نضيع وقتنا، مش عاوزين نضيع أعمارنا، مش عاوزين نضيع أيامنا. هنا يا جماعة الإمام الهروي وهو بيكتب الكلام ده كان يجي في باله بس يمر كده خاطر أن نقول له: هيجي عصر من العصور المتدينون فيه هو إحنا؟ أشكالنا دي أنا وأنتم والله ما يجي في باله، نقول له الناس المتدينة بتاعة ربنا في حته حديدة كده بيقعدوا عليها خمس ست ساعات في اليوم، يعني بيعملوا إحنا؟ لا، ما بيعملوش حاجة، في اللا شيء كده. والله ما يجي في دماغه هنا، الناس المتدينة بتاعة ربنا! أه، ما هو دي مصيبة، تخيلوا المصيبة أن الزمن بتاعنا بقينا إحنا... والله العظيم حاجة!
مين من الصحابه قال لهم إيه؟ لو رأوا خياركم لقالوا إيه؟ ما لهؤلاء في الآخرة من خلاق. بيتكلم التابعين بيقولوا مع الصحابة بيقولوا: أدركتم أقواماً لو رأوا خياركم لقالوا مجانين. مجانين ليه؟ فاكرين نفسهم أنهم إيه حاجة! طب لو راونا يعني هيقولوا إيه؟ والتنصل عن تضييعها والنظر إلى الضن بها. تضن بوقتك، ده اللي زي ما قلنا لكم السلف بقى كانوا يضنون بالوقت، صاحبنا هذا قال إيه؟ أوْقِفِ الشمس والتاني كان يعمل إيه؟ الكلام ده قلناه قبل كده يعني، رجعوا للدروس كلها بس عشان بس نديكم أمثلة للضن بالوقت. النووي مثلاً كان في بداية طلبه للعلم فضل سنتين ما نامش، ما حطش جنبه على الأرض، كان ينام سقطات وهو قاعد بيذاكر، ينام كده وهو قاعد ليه؟ بيضن بالوقت.
أنتم عارفين أصلاً من آداب... يعني حاجة كده جت في ذهني، من آداب النوم اللي قالوها يذكرها الفقهاء في الكتب أو في كتب الآداب موجودة: أن أنت لا توطئ فراشك، يعني الفراش ما يبقاش لين، ليه؟ عشان ما تستغرقش في النوم. لين دي بقى يعني إيه؟ عشان بس ممكن واحد يقول لك لين يعني أنا الحمد لله ما عنديش ريش نعام في... سيدنا النبي عليه الصلاه والسلام يا جماعة كان عنده زي حته إيه فراش كده بتاع، كانوا يقلبوه يتنوه حتتين فينام عليه، فمرة جه نام فكانه استثقل في النوم وبتاع، قال لهم أنتم... قالوا له: إحنا بس طبقنا أربعة، مادام هوطبق حتتين طبقوا أربعة، قال لهم: ما تعملوش كده تاني، رجعوه تاني حتتين زي ما كان، لأنه إيه... يعني الواحد يحب النوم لما يلاقي، إحنا دلوقتي إيه؟ سوست وسفنج وفايبر وفي بقى حاجات بتجمع كل ده مع بعض، وبعدين يقول لك إه لا ده دي الفريم كل سوسته لوحدها، يعني كان الأول السوست تطلع، لا، أنت مثلاً نايم فكل إه... تاخد شكل جسمك لأن السوست منفصلة، شوفوا التفنن في إيه عشان تنام! إحنا مش عاوزين ننام، مش عاوزين ننام، فإحنا مش عاوزين نهيئ الدنيا للنوم.
كان في من السلف اللي كان يجي في الصيف ينام في البيت، ويجي في الشتاء ينام على السطح، ومنهم اللي كان يصلي في الصيف القيام في البيت، ويجي في الشتاء يصلي القيام على السطح ليه؟ عشان يمنعه النوم، تيجي في الصيف تنام في البيت الجو حار وبتاع وعرق أنت نفسك إه مش عارف تنام يقوم قام يصلي. طب يجي الشتاء ما ينامش في البيت يقول لك أنا على السطح، يقوم الجو الريح تيجي تضربه وبتاع مش عارف تنام يقوم يصلي، يعني بيتفننوا في دفع النوم، إزاي أدفع النوم عني؟ يبقى النظر إلى الضن بها. إحنا خلي بالك ده إحنا والله وأنا أعي ما أقول وهذا قاله الغزالي في كتبه زي في كتاب بداية الهداية وفي كتاب الإحياء، أن أنا بقول أه إحنا معظمنا أحسن له ينام، أه والله عارفين النوم الظالم عباده! أه كده إحنا معظمنا كده أحسن له ينام أصلاً، ليه؟ هيصحى هيفسد في الأرض، هو صاحي بلوة على نفسه وعلى غيره، فإحنا بنقول نضن حتى بوقت النوم مش عشان نبوظ الدنيا بقى، يعني لا أصحى استفيد بوقتك. قال: ليتدارك فائتها ويعمر باقيها.
فأما معرفة النعمة... طب عرفنا يبقى إحنا اليقظة ثلاث حاجات: نعمة، جناية، تضييع الأعمار. دول الثلاث حاجات اللي بهم هيحصل، تحصل اليقظة. إزاي بقى يحصلوا دول أصلاً؟ قال: فأما معرفة النعمة فإنها تصفو بثلاثة أشياء: بنور العقل، وشَمِّ برق المِنَّة، والاعتبار بأهل البلاء. يعني إيه؟ عشان تشوف نعمة ربنا عليك ثلاث حاجات: أول حاجة نعمة العقل، يعني نعمة العقل اللي إحنا عملناه من شوية كده قعدنا نفكر في النعم مسكنا نعمة فصناها ده كله بإيه؟ بالعقل. تاني حاجة، شَمِّ برق المِنَّة، شَمِّ برق المِنَّة يعني إيه يا جماعة؟ يعني أن تلمح معنى النعمة المِنَّة في النعمة، وهذا برضه اتكلمنا عليه. الثالثة بقى والمهمه وكنا اتكلمنا عليها في درس الشكر: والاعتبار بأهل البلاء.
إحنا قلنا في درس الشكر قبل كده وعرناها أن أعظم عائق من رؤية النعمة إيه؟ الاشتراك في النعمة. ليه مش شايفين النفس اللي بناخده والهواء؟ عشان كلنا في الهواء سوا، مش كده؟ كلنا في الهواء سوا، فعشان سوا في الهواء فمش شايفين الهواء، مش شايفين النعمة. أمتى ممكن تستشعر بنعمة الهواء دي فعلاً؟ لو أنت ليك قريبك في مستشفى الصدر، فمن أول ما دخلت أنت وسط ناس كلها مش عارفة تاخد النفس، ساعتها تطلع هتلاقي الحمد لله طالعة من قلبك دي مختلفة عن إيه؟ عن دي، الحمد لله! الاعتبار بأهل البلاء، الاعتبار بأهل الغفلة، ما هو أهل الغفلة في بلاء، فلما تلاقي نفسك مستيقظ ومنتبه وعاوز تستفيد بوقتك، عشان تشوف النعمة دي أنك في نعمة: شوف غيرك اللي مش في المسجد، شوف غيرك اللي ما فتحش المصحف في رمضان، شوف غيرك اللي بيعدي عليه شهور ما يفتحش المصحف، تقوم تستشعر معنى النعمة، تشوف النعمة بقى وقتها.
واما مطالعه الجنايه فانها تصح بثلاث اشياء بتعظيم الحق ومعرفه النفس وتصديق الوعيد اه مهمه جدا دي بقى يا شباب إحنا خلاص بنختم فركزوا معايا مطالعه الجنايه ازاي اطالع الجنايه لاث حاجات احفظوهم بقى تعظيم الحق الحق الذي هو الله جل وعلا انتوا عارفين يا جماعه احنا ليه مش شايفين الجنايه واحده من الحاجات المتخلينا مش شايفين الجنايه ان احنا ﴿وَمَا قَدَرُوا اللَّهَ حَقَّ قَدْرِهِ﴾ [الزمر: 67]. أنت ما بتتعاملش مع... أنت بتتعامل مع رب مع ملك الملوك جل وعلا. عيب عيب اللي هأقوله الكلمتين الجايين دول والله عيب يتقالوا. يعني لما أقول لك إيه تخيل كده أن أنت خالفت أمر رئيس جمهورية، أمر مباشر: يا فلان روح اعمل كذا، فما عملتش كذا، أو ملك من الملوك في الدنيا! شايفين الإحساس اللي جالك ده؟ الرهبة اللي جت لك دي؟ أهوو إحنا في اليوم والليلة بنخالف مئات الأوامر من ملك الملوك جل وعلا، فلما تستشعر هذا المعنى تشوف جنايتك بقى.
مطالعة الجناية تصح بثلاث حاجات: تعظيم الحق، إحنا ما بنهزرش، ما بنهزرش، أنت بتتعامل مع ملك الملوك جل وعلا، ﴿لِمَنِ الْمُلْكُ الْيَوْمَ لِلَّهِ الْوَاحِدِ الْقَهَّارِ﴾ [غافر: 16]. طب الملك في الدنيا لحد؟ والله ولا في الدنيا، لكن لما كان في ملك صوري في الدنيا قد يظن الظن أن هو ملك فعدل الله عز وجل عن ذلك: مالك يوم الدين، ومالك يوم الدنيا، وملك يوم الدين وملك مالك يوم الدين وملك الدنيا، الله مالك وملك يوم الدين والدنيا وكل حاجة إحنا فيها صورية.
تعظيم الحق ومعرفة النفس، يبقى الحق جل وعلا هو ملك المُلْك وأنت عبد ذليل، لأن في واحد كده بيشوف نفسه، فنقول لك: اعرف بقى نفسك على حقيقتها، تقوم تعرف عظيم الجناية ليه بقى؟ عارفين لما يجي ملك من ملوك الدنيا وبعدين إيه يناوش ملك تاني من ملوك الدنيا برضه، تحس أنها مقبولة شوية، يعني ملك وملك وعادي بيناوشوا بعض ملوك صح؟ تخيل نفس المناوشة دي ولا القلق ده عمله حتة عيل كده ما يساويش ثلاثة تعريفه مع الملك، تحس أن الجناية عظمت نفس الفعل خلاص! نفس الفعل بالضبط، ملك مع ملك وملك مع... أو عمل فيه نفس الفعل اللي عمله مع الملك ده، بس عيل كده ما يساويش حاجة من الرعية! أهو ده إحنا، عبد ذليل حقير لا يساوي شيئاً. أنا هأقول لكم مثال واحد بس يا جماعة عشان برضه نشوف إحنا إيه. معلش أنا عاوزكم بس يعني تتخيلوا معايا اللي أنا هأقوله محتاجه تخيل عشان في الآخر نشوف إحنا إيه.
تخيل حضرتك كده لوحدك، لوحدك يعني غمضوا كده، تخيلوا كده أنك لوحدك في الهرم، ما فيش مخلوق غيرك في الهرم، في منطقة الهرم دي أنت تساوي إيه في الهرم؟ طب تخيلك لوحدك في مصر، ما فيش مخلوق غيرك في مصر، أنت تساوي إيه بالنسبة لمصر دي؟ طب في إفريقيا؟ تخيلوا ده يا جماعة تخيلوه تخيلوه عشان تعرفوا بس إحنا إيه، إحنا ولا حاجة ولا حاجة! طب في العالم؟ طب في المجرة أو في المجموعة الشمسية الأول اللي منكم بقى يعني بيعرف يتخيل على الطبقة... طب في المجرة؟ طب في سماء الدنيا؟ طب في السماء الثانية اللي هي السما الدنيا أصلاً فيها حلقة في فلاة، حلقة كده حديد مرمية في صحراء، وأقعد بقى بقى اطلع كده للسما السابعة، فأنت إه أنت إه يا أبني؟ أنت في ملك الله لا شيء، ما تساويش ف... وبتخالف مين؟ بتخالف ملك الملوك جل وعلا اللي هو بقى خالق المُلْك ده كله.
معرفة النفس وتصديق الوعيد، ما هو ممكن اللي بيجني ده الجناية دي مش شايفها ليه؟ أه هو ملك أه وأنا عبد ذليل لكن يعني هيحصل إه؟ نقول لك لا هو هيحصل، ده الله عز وجل قد أوعدك أن في نار تلظى وتطلع على الأفئدة... إلى آخر بقى أوصاف النار، تصديق الوعيد، فهذا يعظم الجناية.
وأما معرفة الزيادة والنقصان في الأيام تستقيم بثلاثة أشياء. ده طب عشان تقف بقى على فكرة الزيادة والنقصان في الأيام أعرفها إزاي؟ أول حاجة بسماع العلم، فاكرين المثال اللي كنا دايما نقوله في الحته دي اللي هو أنا الأول قلت لكم في أول الدرس النهارده قلت لكم إه اللي هو سبعين خصلة ومين فيكم يعرف يقول سبعين خصلة؟ مش فيه، قلنا لكم ليه؟ لأن ما عندناش العلم.
طب إحنا عاوزين نعرف إحنا إحنا يعني جيت قلت لك دلوقتي سؤال: أمبارح، إحنا النهارده الجمعة، أمبارح الخميس، فوقفت كده وسالتك: أمبارح أنت طالع مليون كسبان ولا خسران؟ هتعرف ترد؟ طب لو قلت لي: كسبان، هأقول لك: طب أنت كسبان مكسب كنت ممكن تكسب ازيد منه وما كسبتش؟ أنا بتكلم دين ها مش فلوس حسنات وسيئات، هتعرف ترد؟ ليه؟ عشان إحنا في الغفلة، إحنا مش في اليقظة، إحنا مش مستيقظين أصلاً، إحنا نايمين.
واحدة من الحاجات بقى اللي نستيقظ بها ونعرف موضوع الزيادة والنقصان ده: العلم بالأحكام بالحلال والحرام، فأعرف اللي بعمله ده حلال ولا حرام وبمقدار كل حاجة، زي ما بقول لك تشويحتك لأمك دي ممكن يبقى ناس وقاعده اتصدمت من المعلومة مثلاً دي كبيرة؟ أيوه كبيرة، ده عقوق والدين من أكبر الكبائر، فممكن واحد سمعها ما كانش عارف أصلاً المعلومة فهو كان فاكر نفسه النهارده هو ولي من أولياء الصالحين، ليه؟ حضرت درس في المسجد. أه بس أنت عاق أبوك عاق أباك وأمك، حاسبها دي معاك في الجدول ولا أنت بتشوف اللي أنت عاوزه بس؟ أه بس أنت نائم عن صلاة الفجر، أنت واخد بالك؟ يبقى سماع العلم، فالمثال دائماً بنقوله هنا.
عشان نلخص مثال مين؟ عبد الله بن عمر رضي الله عنهما اللي هو كان إيه يتبع الجنازة لغاية ما يصلي عليها أو يصلي على الجنازة ويمشي ما يتبعهاش يعني، وبعدين سمع الحديث بقى أن في حديث عن النبي عليه الصلاة والسلام: «من صلى على الجنازة فله قيراط ومن اتبعه حتى يفرغ منها فله قيراط» يعني والقيراط مثل جبل أحد فقال: إنا لله وإنا إليه راجعون، كم ضيعنا من قراريط.
هنا مشكلته فين؟ في العلم، ما كانش عنده الحديث ده. فإنا بقى في كم حديث مش عندنا؟ يبقى العلم بسماع العلم، يبقى لازم نتععلم يا جماعة، لازمنا مجالس علم. يبقى دي هتعرفك الزيادة والنقصان في الأيام.
ثاني حاجة: إجابة دواعي الحرمة أو هتساعدك على فكرة الزيادة والنقصان. إجابة دواعي الحرمة اختلفوا فيها قوي يعني على كلام كتير، منها سرعة الاستجابة لأي داع يدعوك إلى الخير. يعني إيه يا جماعة؟ ودايما بنقول للشباب في التربية اللي هو إيه أنت قاعد مثلا بتتفرج مش جايلك نوم اقعد تسبح بسرعة يعني انطلق في حاجة في عمل خير جه في دماغك أن دلوقتي أنا إيه نفسي أقرأ قرآن افتح المصحف دلوقتي واقرأ ابتدي على طول ما تأجلش.
والحاجة الثالثة ونختم بيها: صحبة الصالحين. صحبة الصالحين ليه؟ علشان أنت هتبقى فاكر نفسك ولي من الصالحين تقوم تيجي تصاحب الصالحين اللي بجد هتكتشف أنك إيه ما وريش حاجة، أنا كنت فاكر لما كنت بجيب الخاتمة في الشهر أنا كده لقيت الناس.
واحد من إخواني يعني الله يرحمه يعني وكنت أحبه جداً يعني فج بيحكي لي عن موقف حصل له، واحد من الشباب اللي هو يعني ماسكهم في الدعوة وكده فج الولد متأثر جامد جداً وبيبكي قال له مالك شاب صغير يعني؟ قال له في إيه بس ومالك؟ قال له أنا متضايق من نفسي، أنا مش قادر خالص أجيب في قيامة الليل أكتر من ثلاث أجزاء كل ليلة. وبيعيط مش بيكلم في رمضان ده حياته العادية كده الشاب يعني كل ليلة بيجيب ثلاث أجزاء قيام ليل فمتضايق إنه مش عارف يزود عن كده، وده بيقوله لمين؟ للأخ اللي هو ماسكه في التربية وهو بيقول أنا قاعد إيه طب أقول له إه طب أنا يعني بقى؟
هنا يا جماعة ده بيحصل أمتى؟ لما ترافق الصالحين تشوف أحوالهم فتقوم تتكسف من نفسك، يبقى صحبة الصالحين. قال وملاك ذلك كله خلع العادات، ابقوا بقى اسمعوا البودكاست بتاع العادات عشان إيه عشان ما فيش وقت نقف هنا.
قولي هذا واستغفر الله العظيم لي ولكم، سبحانك وبحمدك أشهد أن لا إله إلا أنت نستغفرك.