الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله.
اللهم صل على سيدنا محمد النبي وأزواجه أمهات المؤمنين وذرياته وآل بيته، كما صليت على آل إبراهيم إنك حميد مجيد. أما بعد:
الصوت كده كويس ولا محتاجين نعلي صوتنا؟ صح. في درس الاستعداد لرمضان، مش عاوزين بقى همهمة، خلاص يلا نسمع الدرس بقى. الهمة يا جماعة، أرجوكوا اللي بيتكلم مع اللي جنبه يبقى فاكر صوته مش باين بس هو بيبقى واضح.
في درس الاستعداد لرمضان، كنا قلنا هنستعد بكم حاجة؟ بكم سهم؟ كم سهم كام دي جوابها رقم، صح كده؟ ثلاثة. أول سهم كان إيه؟ توبة وافتقار. فاحنا النهارده إن شاء الله عاوزين نتكلم عن التوبة.
وليه محتاجين نتكلم عن التوبة؟ لأن التوبة قبل رمضان، يعني إيه علاقة التوبة برمضان؟ لأن الذنب يمنع التوفيق ويمنع العمل الصالح. تاني، يبقى احنا ليه محتاجين استعداداً لرمضان نبدأ بتوبة؟ لأن ذنوبك هتمنعك العبادات، هتمنعك الصالحات، هتمنعك أن تجد أثار ذلك في رمضان. وكلنا حافظين الأثر منسوب لابن مسعود ومنسوب للحسن، لما اشتكى له ناس أن هم إيه؟ مش عارفين يقيموا الليل، فقال إيه؟ كبلتهم خطاياهم.
يبقى احنا يجي رمضان مش عارفين نقيم الليل، نصلي ركعتين ونخلع، نصلي التراويح، نشوف أصغر أقل مسجد بيصلي ونروح نصلي وراه، نيجي بقى في العشر الأواخر ما نستحملش نقف وما نستحملش ليه؟ كبلتهم خطاياهم. طيب، عاوزين نفك تلك الأحبال التي كبلتنا، وإلا هنعمل إيه؟ نتوب من تلك الخطايا قبل رمضان. فيبقى محتاجين نبدأ بتوبة.
كالعاده، احنا بنحب إيه يعني نجيب لكم كلام جديد، فخلونا نأخذ منزلة التوبة من منازل السائرين للإمام الهروي رحمه الله. يقول رحمه الله: باب التوبة. والتوبة يا جماعة هي ثاني منزلة من منازل السائرين عند الهروي، الأولى كانت إيه؟ اليقظة، ودي خدناها قبل كده. قال رحمه الله: قال الله عز وجل: ﴿وَمَن لَّفِعْلِ ...﴾ -عفواً- ﴿وَمَن لَّمْ يَتُبْ فَأُوْلَٰئِكَ هُمُ الظَّالِمُونَ﴾ [الحجرات: 11]، قال: فاسقط اسم الظلم عن التائب. اه، يبقى كل الناس كلهم ظالمون إلا التائب، ومن لم يتب فأولئك هم الظالمون. فإذا أردت أن ترفع عن نفسك اسم الظلم، فلا بد أن تتوب. طب يعني تتوب مرة؟ هيجي كلام بعد شويه إننا في توبة أبداً، الكلام ده جاي إن شاء الله بعد شويه. يعني إيه؟ يعني أنت تائب من أول ما تبلغ لغايه ما تموت أنت في توبة.
طب توبة من إيه؟ هنشوف بقى كمان شوية إن شاء الله إيه اللي محتاجين نتوب منه. قال: والتوبة لا تصح إلا بعد معرفة الذنب، وهي أن تنظر في الذنب إلى ثلاثة أشياء. ركزوا بقى عشان الكلام الخطير جاي: أن تنظر في الذنب إلى ثلاثة أشياء؛ إلى انخلاعك من العصمة حين أتيانه. يعني إيه؟ يعني بعد ما تعمل الذنب كده تقعد تتفكر في أمور؛ الأمر الأول: أنك إذ فعلت ذلك الذنب، قد تخلفت عنك العصمة، ولو عصمك سبحانه وتعالى ما وقعت في الذنب، صح ولا لا؟ يبقى بعد ما تعمل الذنب تقعد تتفكر في حاجات، أول حاجة: أنك طالما وقعت في ذنب الله عز وجل، لم يعصمك، ولو عصمك لآراد لقضائه سبحانه وتعالى، مش هتقع في الذنب.
طب وده معناه إيه؟ أنه خلى بينك وبين نفسك، وانه رفع عنك العصمة، أنك عزيز عليه. قال الحسن: هانوا عليه فعصوه، ولو عزوا عليه لعصموهم. يبقى كونك وقعت في الذنب، أول حاجة تشهد معنى رفع العصمة. ومعنى رفع العصمة عصمة أنك هنت عليه سبحانه وتعالى، ولو عززت عليه لعصمك، وما خلى بينك وبين الذنب أبداً. يبقى هذا أول المشاهد؛ أن تنظر في الذنب إلى ثلاثة أشياء: إلى انخلاعك عن العصمة حين أتيانه.
قال: وفرحك عند الظفر به. أن تنظر لمعنى آخر، وهو أنك لما وقعت الذنب فرحت. فرحان بايه؟ فرحان بتخلف العصمة، فرحان أن خلى بينك وبين الذنب، فرحان بايه؟ ما هي دي أحوالنا، إذا أردت أن تفعل ذنباً ثم حيل بينك وبينه، اغتممت ومتضايق وعاوز أحصل ذلك الذنب. ولو شاهدت معنى العصمة، لطار قلبك فرحاً: أنا يا رب عزيز عليك كده؟! أني عاوز أأشاهد الاباحية أدخل أشاهد الاباحية ألاقي الباقة خلصت، ألاقي النت فصل، ألاقي النور قطع، أنا عزيز عليك قوي كده يا رب؟ ولا بيبقى حالك الحال الثاني: متضايق ومتعكنن وعاوز الذنب وتحتال وتنزل تشحن؟ وحتى إذا ظافرت بالذنب فرحت. فرحان بايه؟ قد تخلفت عنك العصمة، قد خلى الله بينك وبين نفسك، إيه اللي أنت فرحان بيه؟! هذا ثاني المشاهد، أن تنظر أولاً إلى انخلاعك عن العصمة حين إتيان الذنب، ثم أن تنظر إلى فرحك عند الظفر به، فرحان بأنك على الذنب.
ومعنى ذلك أنك خرجت عن المعية الخاصة؛ معية سبحانه وتعالى الخاصة التي يعني من آثارها أن يحفظك. مش احنا كلنا حافظين وستار في العقيدة وبناخد الدرجة النهائية في في الامتحانات؟ تعمل امتحان العقيدة تقول آه، معية عامة ومعية خاصة، ومن المعية الخاصة هي معية الآية؟ أول كلمة، معية الحفظ، مش كده؟ معية الحفظ والتأييد. حافظين الكلام ده ولا لا؟ إيه معنى معية الحفظ؟ أنه معك يحفظك، يحفظك من إيه؟ يحفظك أولاً من أن تقارف الذنب. هذا أوله الحفظ، أصل كل الناس في دماغها إيه؟ يحفظك يبقى يحفظك من الشرور، يحفظك من الناس، يا رجل! أول الحفظ أن تحفظ من أن تقارف ذنباً. فانت فرحان بايه يا ابني بعد الذنب؟ يا ابني فرحان بايه ولا فرحان بايه حالة ذنب ده وأنت بتعمل الذنب كده يجيلك هذا الهاجس: أنا هنت عليك للدرجة دي أن تخلي بيني وبين نفسي؟ فتتعكنن، فرحك دليل جهلك.
وأما النظر الثالث، قال: وقعودك على الإصرار عن تداركه مع يقينك بنظر الحق إليك. يبقى النظر الثالث بعد أن تقارف الذنب أن تنظر في حالك تلك، تلك الحال الرديئة الخبيثة، وهي قعودك على الإصرار عن تداركه. وقعت في الذنب، طب هتتدارك؟ لا، قاعد زي ما أنت؛ أمبارح إباحية والنهارده إباحية وبكره إباحية والسنة الجاية إباحية، وأمبارح عادة سرية والنهارده عادة سرية وبكره عادة سرية والسنة الجاية عادة سرية. طب زحمت ذلك بالطاعات؟ ما زلت في الكسل، جبت كم خاتمة في شعبان؟ صمت كم يوم في شعبان؟ قيام الليل أخباره إيه في شعبان؟ ما زلنا في الكسل، فلما بنتدارك تلك المعاصي وتلك الذنوب بتوبه شرطها الإقلاع؟ ولما بنزاحم تلك المعاصي بالطاعات؟ فذلك هو النظر الثالث؛ أن قعدت على الإصرار عن تدارك ذلك الذنب. ولو كنت صادقاً في توبتك، لتخلصت من كل شيء يدفعك لذلك الذنب، أي ذنب، أي ذنب.
قال: مع يقينك بنظر الحق إليك. يعني هو أنت يا ابني وأنت بتعمل الذنب وفرحان بالذنب ومزقطط بالذنب ومتعكنن لما فاتك الذنب، ثم بعد الذنب عمال تخطط للذنب اللي بعده هيبقى ازاي وأمتى، أو كلما لاح لك ذنب فعلت؟ هو أنت يا ابني يعني متيقن من رؤية الله لك؟ يعني أنت على يقين أن الله مطلع عليك، ناظر إليك، عليم بفعلك، سميع لقولك؟ ما هو أنت لو مش متيقن، أشركت، والمشرك بقى مالوش توبة من الصغائر والحاجات دي. روح أول توب من الشرك، يلا، روح روح وحد، روح اشهد أن لا إله إلا الله، وبعدين تعال بقى نشوف البلاوي الثانية اللي بتعملها، السامع والمتكلم، أنا وأنتم.
أما أن تكون متيقناً ذلك؛ متيقناً اطلاع الله عليك ورؤيته لك وسماعه لقولك، وبعدين فرحان بالذنب، يعني فرحان وأنت تعصيه على مرأى ومسمع منه سبحانه وتعالى. وهذا معنى بعضهم: إذا أردت أن تعصي الله فاعصه حيث لا يراك. وهذا حال الخلق مع المعظم المهاب أو المحبوب. يعني إيه؟ يعني لو انك تهاب والدك وتعظمه، ثم نهاك عن فعل شيء، أتجترئ أن تاتي أمامه لتفعل ذلك الأمر الذي نهاك عنه؟ طيب، عاوز أعمله، تقوم تزوق من أبوك وتستخبى عشان تعمل الحاجة اللي هو قال لك ما تعملهاش، صح؟ ذلك إنه معظم مهاب.
وهو فعلنا مع المحبوب، يعني مش أبوك، حد أنت بتحبه حب شديد جداً جداً وتخاف على زعله جداً، مش لأنك بتهابه، بتحبه. ففكرة أن أنت تكون سبب بإيذائه، يعني ده لعل الأقرب ليه مثلاً الأم، مثال الأم هنا يعني ممكن كتير مننا إيه؟ ما يبقاش يخاف من أمه قوي، يخاف من أبوه آه، إنما تلاقيه ما يعصيش أمه. طب إيه اللي بيحمله على كده؟ الحب، ما استنحملش أشوف إن هي مأذية بسببي، ما استنحملش أشوف إن هي قالت لي ما تعملش فأعمل. فألمح في عينيها بس نظرة أنه يعني كسرتني، فيمنعه حبه.
طيب، أنا عاوز أعمل ده الحاجة دي، يقوم يعمل إيه برضه؟ يزوق، يعملها من ورا أمه. طيب، ليه هو هنا مش معظم ولا مثلاً إيه هايب أمه أو خايف منه؟ لا، محب لأمه، فيقوم يعملها حيث لا تراه. فلله المثل الأعلى: عصيانك وأنت مستحضر لمعنى الرؤية، لمعنى السمع، لمعنى الاطلاع، ومتيقن ذلك، ده معناه إيه؟ ﴿وَمَا قَدَرُوا اللَّهَ حَقَّ قَدْرِهِ﴾ [الزمر: 67]. قيل في تأويلها: ما لكم لا ترجون لله وقاراً؟ قيل في تأويلها: ما لكم لا تخافون لله تعالى عظماً؟ أنت متيقن اطلاعه ورؤيته وسمعه ثم تعصيه، ويا ريت بعد ما تعصيه تهرول إلى التوبة والندم والانكسار، لا ده أنا فرحان، وبعدين ده أنا بخطط للذنب اللي بعد كده، أو عادي جداً حتى لو ما بخططش فانا مش فارقة معايا، أزنب مرة واتنين وتلاتة وأربعة، ومافيش توبة، ومافيش رجوع، ومافيش مزاحمة طاعات. وبعدين تيجي تقول لي معظم لربنا، خايف من ربنا، محب لربنا، فين ده؟! حالنا تكذب دعوانا.
قال: وقعودك، يعني أن تنظر إلى قعودك على الإصرار عن التدارك، مع يقينك بنظر الحق إليك. وشوفوا يا جماعة هنا استخدام الهروي لفظ الحق سبحانه وتعالى، هو حق. فإذنب، هو حق سبحانه وتعالى، ولو عاملك بمقتضى اسمه الحق هلكت. يقول لك فلان ده حقاني، مش كده؟ حقاني يعني إيه؟ أول حاجة أنه ما يعجبوش الحال المايل، وتاني معنى أن اللي ليك هتاخده واللي عليك هيتاخد منك، فلان حقاني. ولو عاملنا سبحانه وتعالى باسمه الحق واسمه العدل، ما ترك على ظهرها من دابّة، كنا هلكنا من زمان. فانت متيقن من اطلاع الحق عليك سبحانه وتعالى، فتخاف أن يعاملك سبحانه وتعالى بمقتضى اسمه الحق، بمقتضى اسمه العدل.
قال: طبعا هو باب التوبة من الباب من الأبواب الكبيرة عند الهروي، وكل واحدة من هذه يعني تحتاج إلى تأمل، ويمكن الدرس لوحده، لكن خلينا نشير إشارات سريعة. قال: وشرائط التوبة ثلاثة أشياء: الندم والاعتذار والإقلاع. شرائط التوبة: يبقى أول حاجة يا جماعة عشان نرتب دماغنا، أول ما تقع في الذنب تنظر إلى ثلاث حاجات؛ أول حاجة بسرعة، ها؟ ما قلناش ندم خالص، الانخلاع عن العصمة، دي أول حاجة تنظر إليها لما تقع في الذنب، الانخلاع عن العصمة. وتاني حاجة: اه تنظر إلى فرحك بذلك الذنب، مصيبة. وتالت حاجة ها؟ اه تنظر إلى قعودك على الإصرار عن التدارك. دول الثلاثة، وذلك كله مع يقينك بنظر الحق إليك.
طيب، فكان بذلك المذنب، السامع والمتكلم، إذا نظر في الذنب إلى هذه الأمور، قال: طب أنا عاوز أتوب بقى، فقال لك الهروي: عاوز تتوب في ثلاث شروط، فقال قال: وشرائط التوبة ثلاثة أشياء: الندم والاعتذار والإقلاع. قبل ما نخش في الثلاث حاجات بالتفصيل؛ الندم يكون بإيه؟ بالقلب أساساً، والاعتذار أساساً باللسان، والإقلاع بالجوارح. فكانت تلك الشروط الثلاثة قد شملت العبد كله؛ قلبك ولسانك وجوارحك. فقال: شرائط التوبة ثلاثة أشياء: الندم، والندم هو أصل التوبة، لأنك لما تندم هتتوب، ولذلك قيل: الندم توبة.
طيب، فكان السؤال الآن الملحي والحقيقي يا جماعة، هو ده المعضلة الكبيرة أصلاً، هو ده المعضلة الكبيرة: هو أنا أندم ازاي؟ يعني أنا الشخص اللي أنت بتتحكي عنه ده، آه، أنا اللي لما بيقع في الذنب بيفرح، واللي لما بيقوته ذنب يحزن وبيتعكنن وبيروح يدور على طرق ثانية يحصل بيها الذنب، فأنا كيف أأحصل الندم؟ عاوز أندم.
فالأول يا جماعة عاوزين نفهم هو الحكاية دي ماشية ازاي؟ احنا عندنا جند اسمه جند العقل، وعندنا جند اسمه جند النفس. والمعركة دائرة بين جند العقل وجند النفس؛ نفسك تريد الشهوة، وعقلك ينظر في العواقب. هي دي المعركة اللي دايرة دايما دايما في أي شيء في الدنيا، حتى بعيد عن الذنب، بعيد عن الذنب خالص، ما كانش في ذنوب ومعاصي، أنت في حياتك بتتحرك في جندين، في جنود أو جندي اسمه عقل وجندي اسمه نفس، عندك نفسك تميل إلى الشهوة، الشهوة هنا مش لازم شهوة محرمة، شهوة الكسل، شهوة الدعة والسكون وما تحركش وأفضل نايم وأفضل منتخ وبعمل اللي أنا عاوزه، شهوة.. دي نفسك، وعقل ينظر في العواقب.
يعني إيه بقى؟ يعني صاحبنا ده اللي بينزل يروح الجيم ويصحى الصبح قبل ما يروح شغله عشان ينزل يروح الجيم، ولا ينزل يمشي شوية ولا يتريض ولا بتاع، نفسه تدعوه إلى الكسل، نام والجو برد، نام والجو حر، نام أنت سهران، تلاقيه فجأة راح قايم إيه فاز كده ونازل ولابس، إيه اللي حركه؟ عقل ينظر في العواقب؛ لو نمت، على حسب كل واحد بيروح الآية عشان يستفيد إيه من اللي هو بيعمله ده، لو نمت مش هأحصل هدفي.
ده شغل العقل، لو عاوز أقيم كذا، لازم قوم، فيقوم. قل مثل ذلك بقى في كل حاجة؛ الدراسة، كم في المية بيقدرسوا بيحبوا الدراسة؟ معظم الناس ما تحبش الدراسة، ومع ذلك يقوم وينزل الصبح بدري عشان يروح المدرسة، ولا يروح الجامعة، ولا يروح يعمل ماجستير ودكتوراه بعد المشقة، ليه كل ده؟ والنفس لا تحب ذلك في معظم الأحوال، يعني ممكن الواحد يبقى شهوته نهمة في علم، إنما معظم الأحوال مش كده.
أمال إيه اللي دفعك لده؟ العقل، عقل، آه، احفظوها، ينظر في العواقب، فيقول عشان أترقى أنا محتاج آخد الماجستير، ودكتوراه عشان أبدأ مش عارف إيه، محتاج إذاكر عشان، ويقعد يصبر نفسه على كده بالنظري في العواقب، في المآلات. ده جُند العقل، ده مش النفس أبدًا، النفس ما بتعملش كده أبدًا، خلاص؟ طيب، عليك أن تسلط جُند العقل على جُند النفس.
يعني إذا دعتك نفسك، يلا ادخل اعمل، بص، شوح في أمك، زعق في أبوك، غش عشان تنجح، خد رشوة عشان تغتني، روح خد قرض من البنك، أي معصية، تقوم تقعد كده تسلط على تلك الشهوة جُند العقل، ثم ماذا؟ هيحصل إيه؟ هو أنت فاكر نفسك مخلد؟ ده أنت شوية أنفاس، وشوية الأنفاس دول أول ما يخلصوا هتموت، ومش هتاخد نفس زيادة، يرضيك أن يبقى آخر نفس ليك على عادة سرية، على مقطع إباحي، على إيد بتتمد لرشوة، على زنا؟ يرضيك يبقى آخر نفس ليك في نهار رمضان فتراه؟ يرضيك يبقى آخر نفس ليك وأنت سامع أذان الفجر ورايح تنام؟ أنت شوية أنفاس.
وبعدين؟ لما تموت؟ فاكر الموضوع انتهى، ناس تقول لك: مات وارتاح! إيه "مات وارتاح" دي؟ هذا قول من لا يؤمن بالله ولا باليوم الآخر، إيه "مات وارتاح"؟ بل الموت بعده بعث، وفي البعث جنة أو نار! يرضيك عشان شهوة عاجلة مكدرة، يعني يا ريت الشهوة حتى بتصفو في الدنيا يا جماعة، كله شهوات الدنيا مكدرة، أي شهوة، فيها كدر، ما فيش شهوة صافيه في الدنيا، تبيع بدهب جنة عرضها السماوات والأرض؟ فوقي، فوقي أيتها النفس! تسلط جُند العقل على هوى النفس، على جُند النفس، على الشهوة، حينها يحصل الندم، تلاقي نفسك إيه اللي أنا بعمله ده، إيه التهريج اللي أنا فيه ده؟
طيب، ومما يعينك على ذلك أن تحصل أو تسلط جُند العقل على جُند النفس، على شهوتك، أن تعرف بعض مآلات آثار تلك الذنوب، ما هو أنت دلوقتي تقول: جميل، سلط جُند العقل، احنا عرفنا على طول جُند العقل اللي هو إيه؟ النظر في العواقب، فانت مش عارف إيه العواقب، ما أنتش عارف إيه العواقب! فلما أجي مثلاً أقول لك: يا ابني، ما هو الجنة، ما هو الآخرة ميزان وكفتين، وبعدين كل حاجة بتتحط، كل حاجة، الكبير بيتحط والصغير بيتحط، قال سبحانه وتعالى في سورة يحفظها الصغير والكبير: ﴿فَمَن يَعْمَلْ مِثْقَالَ ذَرَّةٍ خَيْرًا يَرَهُ * وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ [الزلزلة: 7-8]. رعب والله!
فدي لوحدها تثبتك، يعني يا جماعة استحضروا كده مشهد الميزان يوم القيامة وقلبك، يعني لولا قدر الله السابق، ألا موت لمت. أنت عارفين يا جماعة الواحد لما بيخاف خوف شديد يقول لك إيه؟ أنا قلبي كان هيقف، وفعلا في ناس قلبها بيقف وبتموت من هول أي موقف، مش كده؟ يموت سكتة قلبية من خوف شديد حصل له مرة واحدة فجأة قلبه يققف، وده في أمور دنيا. أنت فاهم يعني إيه واقف قدام ميزان ترجح تلك الكفة مرة وتلك الكفة مرة وما أنتش عارف أخرتها إيه، أنهي كفة اللي هترجح؟ حسنات ولا سيئات؟ وبعدين المصيبة الكبيرة أنك هتفاجأ يوم القيامة بحاجة كنت أنت فاكرها ولا حاجة، مش هقول لك بقى: ﴿أَحْصَاهُ اللَّه وَنَسُوهُ﴾ [المجادلة: 6]، لا لا لا لا لا، حاجة فاكرها بس كنت فاكرها حاجة صغيرة، فإذا بك تفاجأ يوم القيامة أنها مش صغيرة، فين ده؟ في كلام ربنا: ﴿وَتَحْسَبُونَهُ هَيِّنًا وَهُوَ عِندَ اللَّه عَظِيمٌ﴾ [النور: 15]. أنت فاكره بسيط؟ ما هو مش أنت اللي هحاسب نفسك، هو عند الله عظيم، يبقى عظيم.
وأنا سائلكم بالله، كم في المية فينا اللي فاكر التشويحة دي، ما هو نزل وبيشوح لأمه كده بس تشويحة، يعني كان كم في المية فينا يحسب تلك الفعلة عظيمة وهي عظيمة عند الله عز وجل؟ كم مرة كنت سببا في أن تبكي أمك، تقعد تعيط بسببك؟ وبعدين رأيت تلك الدموع التي تنزل من أمك سهلة عادي، ويمكن خرجت ورزعت الباب وراك سارقة معاك أمك اللي قاعدة بتعيط في البيت بسببك دي! وهذا للرجال والنساء، بيجي لنا شكاوى من البنات؛ جحود وجبروت وقلة أدب مع الاب والام، ﴿وَتَحْسَبُونَهُ هَيِّنًا وَهُوَ عِندَ اللَّه عَظِيمٌ﴾. تتعرف على مآلات الذنوب في الدنيا والآخرة.
طيب، هبة هينا يا سيدي، فنعمل إيه؟ نستمر. ضرب النبي صلى الله عليه وسلم مثلاً لمحقرات الذنوب، محقرات الذنوب خلاص هبة هينا تقوم تستمرئه، فتعمله مرة والتانية والتالتة والعاشرة والمية، وفي كل مرة مستهونة. لا يا حبيبي، ده راح جاب عود وده راح جاب عود وده راح جاب عود، عود واحد كان هيشوي الشاه دي ولا الـ، ده المثل اللي ضربه النبي عليه الصلاة والسلام، لكن لما جبنا عود والثاني والثالث والمية والألف ولعناهم نار، شوا الـ أنضجوا تلك الشاة، هي دي محقرات الذنوب، ذنب بذنب بذنب هيشويك.
فده مال واحد من مآلات الذنوب، دعك، يعني ده حاجة واحدة، احنا ممكن لو قعدنا نتكلم في مآلات الذنوب في الدنيا والآخرة، ده درس لوحده، يعني يا جماعة، مين منا يستحمل مشهد، مش الجنة والنار، مشهد رد الرب سبحانه وتعالى وهو يعاتبه يوم القيامة، أنت فاهم المشهد ده؟ يدنيك الرب عز وجل ويسالك عن ذنوبك: «عبدي، فعلت ذلك يوم كذا وكذا؟ ألا حير مني؟ أنت عملت كده ليه؟» المشهد ده لوحده لو اعطيناه حقه لم نتجرا على ذنب، ولو فعلنا ذنب -ما احنا مش هنعصم طول حياتنا- إنما أول ما هنعمل ذنب وتغلبنا الشهوة نعود حينها على طول في ساعتها؛ ليه؟ أنا مش حمل معاتبة، أنا مش حمل تلك المعاتبة.
فالندم عشان نحصله، أنصح بقراءة كتاب الداء والدواء أو السماعة للكتاب، وهتلاقوه احنا كنا قرينا الكتاب كله في حاجة و30 درس، أظن موجود على التليجرام، موجود على الساوند كلاود وكل الحاجات دي. يبقى شرائط التوبة ثلاثة: نندم، واعتذار. اعتذار عن إيه؟ اعتذار عن أمرين: أول حاجة، اعتذار عن الذنب، اللي هو: أستغفر الله، الاستغفار اعتذار، يبقى ندم، ندم قلبك، واعتذر لسانك: أستغفر الله يا رب، توب علي يا رب، أتوب إليك، اعتذار. ندم واعتذار.
وسمى اعتذار آخر وهو أعلى رتبه، وده لا يلحظه إلا الخواص، وهو اعتذار عن التوبة. إيه يعني إيه أعتذر عن التوبة؟ اعتذار عن التوبة لأنك شايف توبتك دي لا تليق بالله عز وجل، لأنك دايما متهم لتوبتك، فانت تعتذر عن التوبة، ولذلك هيجي في كلام في آخر كلام الهروي أنك هتتوب من التوبة، وهتظل كذلك تائباً أبداً، على طول تايب، على طول بتوب. نفس المعنى ده احنا اتكلمنا فيه تفتكروا في إيه؟ الشكر، أحسنتم، اللي هو هتفضل طول عمرك في شكر، وخدنا مثال واحد وقعدنا نتأمله اللي هو إيه بالتسلسل كده، كذلك هنا تفضل طول عمرك بتتوب بس هناجل الكلام ده إن شاء الله لما يجي وقته.
الندم والاعتذار والإقلاع. الإقلاع يعني أنك تقلع عن الذنب حالاً، يعني حالاً يعني في هذا الوقت، وبعد كده فانت مقلع عنه الآن وعازم على ألا تعود إليه بعد ذلك، هو الإقلاع. قال: وحقائق التوبة ثلاثة أشياء، احنا اتكلمنا في الذنب، هتنظر إلى ثلاث حاجات، شروط التوبة ثلاث حاجات، حقائق التوبة ثلاثة أشياء: تعظيم الجناية، واتهام التوبة، وطلب أعذار الخليقة. حقيقة التوبة ثلاث حاجات: تعظيم الجناية.
يعني إيه تعظيم الجناية؟ يعني أن ترى كل ذنب فعلته عظيماً. حتى لو صغير؟ آه، حتى لو صغير. طيب، حتى لو هو في حكم الشرع أنه صغيرة؟ آه، حتى لو هو في حكم الشرع أنه صغيرة تراه أنت كبيراً. ليه؟ يستقيم ذلك بثلاث حاجات، عاوز تعظم الجناية؟ ثلاث حاجات: أول حاجة، أن تشهد عظم أو عظمة الله عز وجل واستغنائه، دي أول حاجة. ثاني حاجة، أن تشهد حقارة نفسك ووقرها -أو وافتقارها كده أو كده ماشي-. وثالث حاجة، أن تشهد منته عليك.
اللي هو إيه بقى اللي احنا بنقوله ده يا جماعة، تعالوا كده نتأمل ده؟ الثلاث حاجات دول هيخلوك تعظم الجناية جداً، أي ذنب ولو قد كده. أول حاجة أن يمكن ده احنا قلناه لكم قبل كده دلوقتي، لو مثلاً واحد قاعد جنبك سقعان مثلاً من التكييف، واللي جنبك ده صاحبك فقال لك إيه: بقول لك إيه يا فلان، قوم اقفل التكييف ده عشان إيه سقعان، فانت ما استجبتش بكلامه، يعني يقول لي ما عملتش كده. فشويه راح راجل كبير مثلاً قاعد قال لك: يا فلان، أنا كمان ساع التكييف ده، بس كبير في السن أو يعني له قدر عندك أو شيء، ماشي. شويه راح الشيخ -مش أنا يعني، شيخ تاني يعني- برضو أنت معظم ولا بتاع، قال لك: يا فهار والله التكييف ده مسقعنا، قوم اقفله. هل لو أنت في الثلاث مرات ما قفلتش التكييف، هتترى فعلك في الثلاث مرات واحد؟ خلي بالك، هو هو أنت في الثلاث مرات أمرت بحاجة وما عملتهاش، صح؟ أمال إيه اللي حصل؟ لما عظم قدر الآمر، عظمت عندك جنايتك!
فهمتوا؟ وهو ده معنى: لا تنظر إلى صغر المعصية، ولكن انظر إلى عظم من عصيت. أنت ما بتعصيش صاحبك، ما بتعصيش شيخك، ما بتعصيش رئيس دولة ولا ملك دولة، أنت تعصي الله جل وعلا! حينها تعظم الجناية. احنا قلنا أول حاجة: تنظر إلى عظم الله أو عظمة الله واستغنائه، مش بس أنه عظيم، أصل هو ممكن يبقى عظيم لكنه ممكن يبقى محتاج لك، فده يسهل عليك شوية أنك تخالفه؛ ليه؟ أصل هو مش هيعمل فيا حاجة، ليه؟ أصله محتاج، فاهمين دي؟
يعني ممكن يبقى رئيس دولة، ملك دولة، رئيسك في الشركه، وأنت بالنسبة له اللي بتعرف تجيب له مبيعات، أنت بالنسبة له اللي بتعرف تمشي الشركة، أنت بالنسبة له اللي من غيرك الدنيا بتقف، وأنت معظمه فعلاً، هو عظيم عندك، لكن تلاقي نفسك إيه: آه، ممكن أخالفه، ليه؟ مش هعمل لي، ليه؟ أصله محتاج لي، ما يقدرش يرفدني. لا يا حبيبي، هو عظيم وغني عنك وعني وعن العالمين، مش محتاج لك في حاجة هو، فأيه الجرأة اللي أنت فيها دي؟
ثم أن تنظر لحقارة نفسك، يعني مش هو عظيم وأنت عظيم، أصل ممكن برضه: آه، فلان عظيم وكل حاجة، بس أنا كمان عظيم، هو شيخ وأنا شيخ عادي جداً، هو وزير وأنا وزير، هو رئيس وأنا رئيس، فانا، آه، أنا معظمه، هو أنا شايفه عظيم بس أنا كمان عظيم، فراس برأس، فانت شايف نفسك كده، يعني هو إله وأنت إله، خالق هو، رازق وأنت رازق، محيي مميت وأنت محيي مميت؟! يا ابني، أنت أنت ما تساويش، لا أنا ولا أنت، ما نساويش، احنا فعلاً ما نساويش، يعني بعيداً عن ربنا سبحانه وتعالى احنا ما نساويش، أنت إيه في الكون؟
احنا يمكن هنا مش فاكر هنا ولا في مجلس آخر، عشان نفهم دي قعدنا نضرب مثال ونكبر، قلنا لك يعني تخيل أنت أهو، أنت أهو، لحظة كده عملنا كده، كل حاجة حواليك اختفت، كل البشر دي اختفت، فانت إيه في المنطقة؟ أنت إيه في، مش في المسجد، في المنطقة، يعني نسب نفسك، نسب نفسك للمنطقه اللي احنا فيها، تساوي ايه؟ احنا من البدايه كده أصلًا نسبتك تؤول إلى الصفر، ده لسه، احنا نقول: بسم الله الرحمن الرحيم، بنقول: يا هادي، ده المنطقة.
طب تخيل كده المشهد أن كده اختفى كل الناس من مصر، وأنت الوحيد اللي في مصر، نسبتك إيه إلى بلدك؟ طب واحدة كمان كده، العالم اللي احنا فيه، معلش يا جماعة يعني، أرهقوا أذهانكم شوية وتأملوا ده، تأملوه فعلاً، أن أنت البني آدم الوحيد في العالم، فانت نسبتك إيه للعالم ده؟ يعني هنقيس دلوقتي أنت للعالم، أنت إيه؟ أنت صفر! أنت صفر! طب العالم اللي احنا فيه ده، اللي هو الكون، اللي هو الأرض يعني، ده كوكب من عدد من كواكب في مجموعة شمسية، من ملايين المجموعات في مجرة، من ملايين المجرات، أنت فين؟
وفوق ده كله، السماء الدنيا اللي هي ولا حاجة في السماء الثانية، اللي هي ولا حاجة في الثالثة، اللي هي ولا حاجة في الرابعة، اللي هي ولا حاجة في الخامسة، اللي هي ولا حاجة في السادسة، اللي هي ولا حاجة في السابعة، اللي هي ولا حاجة في الكرسي، اللي هو ولا حاجة في العرش. شفت أنت قد إيه؟ شفت أن أنت مش قد إيه أصلا؟ احنا احنا مش حاجة، مش حاجة! تنظر لحقارة نفسك.
طيب، تنظر لحقارة نفسك وفتقرها، ما أنتش يعني حقير، حقير يعني لا تساوي شيئاً، ومع ذلك إيه؟ مستغني، يعني إيه مستغني؟ يعني لا محتاج، يعني حقير، آه، قليل، بس لا باكل ولا بشرب ولا بتنفس ولا بمرض فمحتاج أتعالج ولا، لا، ده أنت في كل نفس أنت محتاج، أنت فقير، أنت أصلا النفس نفسه أنت محتاجه.
هذه الحاجات كلها في يد من؟ في يد العظيم الغني الذي أنت تعصيه. لما تتحقق بهذين المشهدين، فضل الذنب الذي تراه صغيراً بوجود عظيم غني وأنت حقير فقير محتاج. ويبقى المشهد الثالث وهو مشهد الإحسان، أنت تعرف لما يجيء مديرك في العمل الذي أنت تعظمه، وكل حاجة، وشايف أنك محتاج له وهو غني عنك، طبعا هذا تجوزاً وإلا فكلنا فقراء لله، بس خلينا نتجوز هذه الحتة عشان نوصل للي عاوزين نقوله.
كلما احتجت منه حاجة لا يعطيك، فتلاقي نفسك عمال تبلع له مرة والثانية والثالثة، وبعدين تخرب الدنيا، أليس كذلك؟ فأوقفك وأقول لك: تعال، أنت معظم له؟ تقول: بصراحة معظم له. هو عظيم؟ طب مش شايفه غني عنك؟ لا شايفه غني عني. طيب يا ابني مش شايف نفسك قليل قدامه؟ آه شايف نفسي قليل قدامه. طيب شايف نفسك محتاج له؟ آه شايف نفسي محتاج لله. طب إزاي عملت كذا ودخلت وضربته وقلبت عليه المكتب؟ تقوم تقول: ما أنا مش مستنفع منه بحاجة، كل ما أطلب حاجة ما بيديهانيش.
الرب سبحانه وتعالى حينما ترى مشهد الإحسان، وأنه يعطيك ابتداءً، يعني يعطيك ابتداءً من غير استحقاق منك، وأنت في بطن أمك جنين، أو رضيع. أنا عاوزك تأخذ مشهداً واحداً، وأنت جنين وأنت رضيع أول ما تتولد، فيخلق حباً وعطفاً في قلب الأم، هل تأمل أحد هذا من قبل؟ هي الحاجة التي نراها عادية خالص، يعني الأم تجد حباً وعطفاً لدرجة أنها ممكن تموت عشانك، وهذا حقيقة مش مجازاً، تموت عشانك. هذه جاءت من أين؟ ألم يكن ممكناً أن تحمل وتلد والسلام؟ ألم يكن ممكناً أن تموت أنت؟ من سيرعاك؟ لا، نجد حباً خُلق فجأة، هو لسه ما فيش خلطة، ما فيش معاملة، مش مع الوقت حبتك، لا لا لا، ده لأول وهلة، يخلق داخل الأم حباً يجعلها لو حصل مثلاً حريق فجأة، يبقى الذي في دماغها أنت مش هي، هي لسه يا دوبك ما تعرفكش.
أعطاك بلا استحقاق ابتداءً. العلماء تدبروا موضوع أنه هداك لثدي الأم، ولاول حركة تفعلها، خلي بالكم الطفل وهو رضيع صغير تلاقي كل حركاته لا إرادية، يعني حتى تحريك يديه، هو مش بيحرك عشان يأخذ، لسه ما يعرفش يعمل أي حاجة إرادية، إلا حاجة واحدة: المص. هداك لذلك من أول دقيقة لك في الدنيا، الحاجة الوحيدة التي تعملها بإرادتك أنك تعرف تمص، لماذا؟ لأن بتلك الحركة بقاؤك. من هداك لهذا؟ وأنت ما عملت حاجة لسه، أنت ما تستحق حاجة. فيا جماعة هو نعمة، نعمة عليك مبتدئ بها جل وعلا، مش أنت عملت فتستحق. وبعدين كبرت ورجلك شالتك، فعصيته، ففضل يحسن إليك، فعصيته ثاني، ففضل يحسن إليك.
أين يحسن إليك؟ بص يا ابني في جسمك، في أعضائك وسلامتها، بص في النفس الذي تأخذه بسهولة، فضل يحسن إليك سبحانه وتعالى. بص لستره الجميل، وهذا سيأتي معنا، أنك قاعد هنا الآن وما حد يعرف من الذي حولك بلاويك، هو محسن إليك. وبعد ذلك تقوم تروح تعصيه ثاني، حينها ترى أحقر ذنب تراه أكبر من أكبر كبيرة، إذا تحققت بتلك المشاهد.
شرائط التوبة الندم والاعتذار والإقلاع، وحقائق التوبة ثلاثة أشياء: تعظيم الجناية، وقد عرفت بما تعظم الجناية، واتهام التوبة. وهذا الذي تكلمنا عليه، فلما تتهم التوبة، تتوب من التوبة، يعني إيه تتهم التوبة؟ يعني يا ترى هي التوبة هذه تصلح لمثله سبحانه وتعالى أن تُقدم؟ لما تلاقيها لا تصلح، توبتي هذه مش توبة تصلح أن تُقدم له، تقوم تتهم توبتك وتلاقي نفسك عاوز تتوب من التوبة. والمعنى الثاني: يا ترى توبتي هذه لله أصلاً ولا أريد بها دنيا؟ أنا خايف، أنا عارف أن فيه ربنا، وربنا هو الذي يسير الكون، وربنا هو الذي ممكن يفضحني، فأنا خايف أُفضح، فأتوب لربنا عشان خايف أن تسقط منزلتي عند الخلق. وهذا معنى سيذكره صراحة، وهو أن تميز بين التقية والعزة. تقوم تتهم توبتك، تقول: أنا فعلاً بتوب عشان خايف أُفضح، خايف على منظري، فبقول: آخذها من قصيرها وأتوب. تتهم توبتك، فلما تتهم توبتك تبقى محتاج توبة من التوبة.
ولذلك قال تعالى: ﴿وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ﴾ [النور: 31]. هل المؤمنون ليسوا تائبين؟ طيب هو استثنى التائبين؟ يعني قال وتوبوا إلى الله جميعاً أيها المؤمنون إلا التائبين فخلاص ما تابوا؟ لا، يبقى الخطاب يشمل التائبين. يبقى الخطاب يشملهم، طيب هؤلاء سيتوبون من ماذا؟ قالوا: يتوبوا من التوبة. فهمتم اتهام التوبة؟
وطلب أعذار الخليقة، ركزوا معايا شويتين في الحتة دي. من حقائق التوبة طلب أعذار الخليقة، يعني إيه؟ معنيان، أول معنى: أنك لما تشوف واحد واقع في ذنب، صغير أو كبير، أي حاجة، تطلب له العذر بأنك تشاهد ذنبك، وأنك وقعت في ذنب كنت تقول لنفسك: أنا مستحيل أعمله، وعملته، ومش بس عملته ده أنت بقيت مستمرئه ما تعرف تعيش من غيره، ومش بس كده، ده أنت رحت للي بعده، للأكبر منه، وكنت أصلاً في يوم من الأيام تقول: أنا أعمل كذا؟ مستحيل. فلما تشوف غيرك في ذنب لا تنظر له بعين التعالي، شوف فلان الفاسق، شوف فلان الفاجر، وكأنك أنت المعصوم، لا، تطلب أعذار الخليقة.
المعنى الثاني: طلب أعذار الخليقة للذي جاء وآذاك فشتمك، فاتهم نيتك، فضربك، فحبسك، فجرحك، عمل أي حاجة، فأكل مالك. من حقيقة التوبة أن تطلب أعذار الخليقة، يعني تقول: ما هو عمل هذا عشان البلاوي التي عندي. هنا يا جماعة أنا ماليش دعوة بالخليقة، خلي بالكم، علماء السلوك دائماً يغفلون عن الناس، يعني يكلمك أنت، مالهوش دعوة بغيرك، فكل واحد يخاطب نفسه. تقول: هو ابن حلال، ماليش دعوة به، ليه؟ أصله يوم القيامة سيتحاسب على فعله، هو سيشيل مشاريبه، وأنت ستتحاسب على فعلك.
فمن المعاني المهمة جداً، وسيشير إليها، هي فكرة أن تشهد فعل الرب سبحانه وتعالى، فلما تشهد فعل الرب، لا تنشغل بالخلق أصلاً. يعني فلان هذا الذي جاء شتمك، أو ضربك، أو حبسك، أو عمل أو سوى، مش هو الذي عمل هذا، أمال من؟ ربنا، ربنا الذي عمل فيك كده. أليس ربنا قدر ألا تُشتم وقدر ألا تُضرب وقدر ألا تُسجن؟ فربنا سبحانه وتعالى هو الذي قدر هذا وقضاه، ولا يخرج شيء في كونه عن قدره سبحانه وتعالى. حينها تطلب أعذار الخليقة، فلان هذا ما يساوي، مش هو الذي عمل، ده ربنا سبحانه وتعالى، فتنشغل بنفسك ولا ترى إلا ربك، ويفنى في نظرك كل مخلوق، مش شايفهم أصلاً، أمال شايف مين؟ شايف فعل الرب سبحانه وتعالى. هذا أعذار الخليقة.
طبعاً نحن قبل أن نعديها، دروسنا مليئة بالكلام في هذه الحتة، وهذا لا يعني أنك لا تطالب بحقك أو لا تسعى في فكاك، لا، دائماً نقول حاجتين: أن تسلم للأمر القدري، وتنظر في الأمر الشرعي. يعني يا رب سلمنا لقدرك، وبعدين يا رب ماذا تريد مني في هذا الأمر القدري؟ ماذا المفروض أن أفعل الآن؟ مش تقعد تشغل نفسك بفلان عمل وفلان شتم، كل هذا فعل الله بك بذنوبك.
وسرائر حقيقة التوبة ثلاثة أشياء: تمييز التقية من العزة، قلناها، وهي: هل تبت تقوى لله عز وجل، ولا تبت أريد بها العزة والمكانة عند الخلق؟ وهذا معنى دقيق. ونسيان الجناية، وهنا خلاف بين أهل السلوك: هل من سرائر حقائق التوبة نسيان الجناية، أو أن تظل الجناية أمام عينك؟ بعض العلماء يقول: من تمام التوبة أن يظل ذنبك أمام عينك على طول. وبعضهم يقول: لا، من تمام التوبة أن تنسى جنايتك. قالوا: لأنك كنت في الجفاء في البعد، ثم اجتباك سبحانه وتعالى فجعلك في الصفاء، وذكر الجفاء حال الصفاء جفاء.
والتوبة من التوبة، أبداً تفضل على طول تتوب من التوبة، لأن التائب داخل في عموم قوله تعالى: ﴿وَتُوبُوا إِلَى اللَّهِ جَمِيعًا﴾، فيأمر التائب بالتوبة.
ولطائف سرائر التوبة ثلاثة أشياء، وهذا من أخطر المواطن، ركزوا فيها، وهذا أدق شيء في التوبة: أولها أن تنظر بين الجناية والقضية، يعني جنايتك وقضاء الله فيك، تتأمل هذا، أنك جنيت، هي بالنسبة لك جناية، وهي كذلك، وهي قضاء الله فيك. أنت لما رحت عصيت، خرجت بعصيانك عن القدر؟ لا، قضاه وقدره سبحانه وتعالى. وأنت لما عصيت عملت هذا بإرادتك ولا لا؟ بإرادتك. ربنا سبحانه وتعالى أثبت للبشر إرادة، قال: ﴿مِنكُم مَّن يُرِيدُ الدُّنْيَا وَمِنكُم مَّن يُرِيدُ الآخِرَةَ﴾، وأثبت لنفسه إرادة: ﴿وَاللَّهُ يُرِيدُ أَن يَتُوبَ عَلَيْكُمْ﴾، فلك إرادة ولله إرادة.
ربنا أثبت لك إرادة، هو له إرادة. والإرادة الأشمل من هذه أيضًا هي قولنا: ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. فيبقى كل ما يحدث في الكون بإرادته.
وقد أثبت لك مشيئة: ﴿لِمَن شَاءَ مِنكُمْ أَن يَسْتَقِيمَ﴾، وأثبت لنفسه مشيئة: ﴿إِلَّا أَن يَشَاءَ اللَّهُ رَبُّ الْعَالَمِينَ﴾. يبقى أنت لك إرادة، ولك مشيئة، وربنا له مشيئة. يوم القيامة ربنا سبحانه وتعالى، وهو العدل، سيحاسبك على إرادتك التي أردتها ومشيئتك التي شئتها. فليس أحد أبدًا وهو ذاهب ليذنب يقول: "ما كنت أريد الذنب، ما كنت أشاء الذنب"؛ فليس أحد يفعل ذلك، وليست يداك تتحركان لوحدهما، أنت مريد.
ربنا أثبت شيئًا ثانيًا مهمًا جدًا، لا يمكن أن نفهمه؛ ليس لأننا لا نفهم، بل لأن هذه الحكاية لا يعرفها أحد؛ لا الأولياء ولا الصحابة ولا النبي ﷺ ولا جبريل عليه السلام. الحكاية هي أن إرادتك ومشيئتك تتبع لإرادته ومشيئته سبحانه وتعالى، ونقف هنا. لماذا نقول هذا؟ لأن الله قال: ﴿لِمَن شَاءَ مِنكُمْ أَن يَسْتَقِيمَ﴾، وقال: ﴿وَمَا تَشَاءُونَ إِلَّا أَن يَشَاءَ اللَّهُ رَبُّ الْعَالَمِينَ﴾ [الإنسان: 30]. العلاقة بينهما لا يعرفها مخلوق، لكن الذي يطمئننا هو أن الله عز وجل حكم عدل، سيحاسبك يوم القيامة على إرادتك ومشيئتك، وكأنك بتلك الإرادة وتلك المشيئة: ﴿فَرِيقٌ فِي الْجَنَّةِ وَفَرِيقٌ فِي السَّعِيرِ﴾ [الرعد: 7].
نقف هنا ولا نزداد، قال: "أن تنظر بين الجناية والقضية، أنك جنيت، وأن تلك الجناية قضاؤه". سبحانه وتعالى، ماضٍ في حكمه، عدل في قضاؤه؛ هي قضاؤه وهي حكمه، ففتعرف مراد الله فيها. طالما هي قضاؤه وقدره، فماذا أستفيد من هذه الحكاية؟ قال: "فتتعرف مراد الله فيها إذ خلاك وإتيانها". لماذا رفع عنك العصمة وجعلك تقع في الذنب؟ أولًا لأنك تستحق ذلك، وثانيًا لأن الله عز وجل إنما يخلي العبد والذنب لأحد معنيين: أحدهما أن تعرف عزته في قضائه، أنه لا راد لقضائه سبحانه وتعالى؛ تتأمل ذلك، أنه لما أراد شيئًا كان ذلك الشيء، لا راد لقضائه، عزيز سبحانه وتعالى لا يغالبه أحد.
خلي بالك، لا يغالبه أحد في الخارج، ولا تغالبه أنت في الداخل؛ فكل ما أراده كان بلا إرادة منك بل بإرادته. اطمئن أنه حكم عدل سبحانه وتعالى، وهذه الحكاية لا يدخل فيها أحد، وظل القدر سر الله في خلقه، «إذا ذكر القدر فامسكه». ماذا قال ﷺ؟ «إذا ذكر القدر فامسكه»؛ لا أحد يتكلم، لأنه لم يطلع عليه ملك مقرب ولا نبي مرسل. ولذلك الذين أوحوا في هذه الحكاية هم الكفار، بما رد الله عز وجل عليهم بجهلهم حين قالوا: ﴿لَوْ شَاءَ الرَّحْمَنُ مَا عَبَدْنَاهُم﴾ [الزمر: 32].
رد الله عليهم: ﴿قُل لَّمْ تَكُونُوا تَعْمَلُونَ ۗ قُلْ مَا لَهُم بِذَٰلِكَ مِنْ عِلْمٍ ۖ إِنْ هُمۡ إِلَّا يَخۡرُصُونَ﴾ [الزمر: 32]. ربنا رد عليهم بأنهم يتكلمون عن شيء لا يعرفونه أصلاً. الكلمة في ظاهرها حق، لكن إنما أنت تجادل بها؛ تجادل وتقول: "أنا أذنبت لأن الله أراد ذلك". البعض يقول بالعامية: "ما ربنا لو عاوز يهدينا كان هدينا". نقول له: "ما لك بذلك من علم؟". إياك أن تحاجج بالقدر في المعائب، فهذا فعل الكفار. إذا أذنبت، فطأطئ رأسك وقل: "يا رب، أنا العبد المذنب، أنا العبد العاصي". لا تقاوح مع الله في شيء لا تفهمه، وإلا ستذهب في داهية. قل: "يا رب، أنا فعلت بإرادتي". والذي يجادل في هذا مجنون.
قال: "أن تشهد أن تعرف عزته في قضائه، وبره في ستره". لماذا قضى عليك بالذنب مرة واثنتين وألف؟ لكي ترى بر الله بك في أنه سترك. تعصيه ألف مرة وسترك، ولو شاء لفضحك، لكنه سترك. تذهب للمسجد فترى العبد التقي أو الإمام الخطيب الذي يعطينا الدرس، وأنت بينك وبينه عصيان، ومع ذلك سترك سبحانه وتعالى. فإذا شهدت قضاءه فيك، فاشهد بره في ستره.
قال: «وحلمه في إمهال راكبه»، أن تشهد حلمه في إمهالك. والإمهال غير الستر؛ الإمهال أنك نمت فاستيقظت، وكان من الممكن أن تنام ولا تستيقظ. لذلك أول ما تفتح عينك تقول: «الحمد لله الذي أحيانا بعدما أماتنا». كان من الممكن ألا تستيقظ، فأنت في حالة من الجبروت والتمرد، ومع ذلك الله يمهلك.
قال: «وكرمه في قبول العذر منه». لو لم يقبل أعذارنا، فمن سيسأله؟ "لماذا لم تقبل عذر فلان؟". ﴿لَا يُسْأَلُ عَمَّا يَفْعَلُ وَهُم يُسْأَلُونَ﴾ [الأنبياء: 23]. ومع ذلك، إن عدت إليه واعتذرت قبل. وكان من الممكن ألا يكون هناك شيء اسمه توبة أصلاً؛ يخلقك ويقول إن الذنب الذي ستفعله سيكتب ولن يُمحى، لكنه جعل التوبة ممكنة. هذا كرم منه جل وعلا. نحن حين يأتي القانون ويقول لك إن المخالفة ستكلفك مبلغًا، وتطلب أنت التظلم...
القانون ما فيش حاجة اسمها تظلم؛ إشارة كسر بـ 500 جنيه، يعني ده عقلاً متوقع ولا لا؟ يعني إيه مستساغ ولا لا؟ بلاش متوقع، مستساغ ولا لا؟ مستساغ؟ كسرت إشارة بـ 500 جنيه، طب اعتذار ما فيش اعتذار، طب تظلم ما فيش تظلم، طب نزلها لي ما فيش تنزيل.
عقلك مستسيغه ده ولا لا؟ مستسيغه مش كده؟ طب أنا معيش الـ 500 جنيه؟ روح اشتغل وهات الـ 500 جنيه. اللي هي فين؟ في الشرع، اعمل حسنات، إنما ما فيش توبة ما فيش، مش هنستطيب، خلصت. طب يا رب أنا ما أعمل حسنات؟ بقى مش كان ممكن الشرع يجي كده يا جماعة ويبقى مستساغ عقلاً؟ خلي بالك من كرمه، قال لك لا؛ اعتذر وهقبل العذر، فلتشهد كرمه سبحانه وتعالى.
قال وكرمه في قبول العذر منه، وفضله في مغفرته؛ لما غفر لك ده من فضله سبحانه وتعالى، أنت مش مستحق حاجة خالص، ذلك فضل منه. واصل يا جماعة، أصل المغفرة عارفين يعني إيه في اللغة؟ الستر، الغفر الستر، فإنه سترك وتاب عليك ومحى سيئتك، كل ده فضله سبحانه وتعالى.
طب كل ده شهدناه في إيه بقى؟ لما نظرنا بين الجناية والقضية، إنه قضى عليك بذلك. والثاني يبقى ربنا سبحانه وتعالى لا يخلي بين العبد والذنب إلا لأحد معنيين: أول حاجة أن تشهد أسماء الله وصفاته سبحانه وتعالى، ثاني حاجة ليقيم على العبد حجة عدله فيعاقبه على ذنبه بحجته سبحانه وتعالى.
قال واللطيفة الثانية... زهقتوا صح؟ ما لسه برضه كتير، طب خلاص عشان نلحق آية المغرب، مش عارف أعمل، لا هقف هنا خلاص، كفاية لطيفة واحدة. ماشي، قولي هذا واستغفر الله العظيم، وسبحانك اللهم وبحمدك، نشهد أن لا إله إلا أنت، نستغفرك ونتوب إليك.