الشيخ أمجد سميربسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته كما صليت على آل إبراهيم إنك حميد مجيد. أما بعد:
درس الاستعداد لرمضان، قلنا إننا سنستعد لرمضان بثلاث حاجات؛ كانت أول حاجة التوبة والافتقار. وبعدين قلنا ندي التوبة، فآدينا التوبة، وناقص حتة من التوبة فهندي الحتة دي دلوقتي، فاللي ما حضرش درس التوبة -إن شاء الله هينزل بكرة- فاحنا هنبتدي الدرس من نصه. وأنتم أذكياء ما شاء الله، هتعرفوا وتربطوا الكلام ببعضه.
إحنا كنا قلنا هندي منزلة التوبة من منازل السائرين للإمام الهروي، ووصلنا -الإمام الهروي قال في بداية التوبة إن في ثلاث حاجات لازم ننظر إليها، وبعدين قال شرائط التوبة ثلاثة، وبعدين قال حقائق التوبة ثلاثة، وبعدين قال أسرار الحقائق، يعني أسرار حقائق التوبة ثلاثة وخلصنا ده كله، وبعدين قال لطائف أسرار الحقائق ثلاثة. أخدنا أول لطيفة هنعيدها تاني دلوقتي، فاللي حضر الدرس اللي فات يستحملنا عشر دقائق، واللي ما حضرش هنبتدي من أول لطائف وأسرار التوبة.
قال: «ولطائف سرائر التوبة ثلاثة أشياء». طبعًا يا شباب قبل ما نبدأ، إحنا قلنا إيه علاقة التوبة برمضان؟ يعني إحنا ليه عاوزين نستعد لرمضان بتوبة؟ علشان الذنب يمنع العبد الخير، وإحنا داخلين رمضان عاوزين ننال أعظم قدر من الخير، فأعظم أو أشد ما يمنع خيرًا عنك ذنبك. فيبقى لازم إذا أردت أن تحرز الخير في رمضان أن تقدم بين يديه توبة.
ما نزل بلاء إلا بذنب، وأعظم بلاء: بلاؤك في دينك. عشان أول ما نقول: «ما نزل بلاء إلا بذنب»، الناس على طول ذهنها يروح لإيه؟ فقد المال، أو سقوط في امتحان، أو مرض في الجسم، وهذا كله بلاء بلا شك، إنما أعظم من ذلك بلاؤك في دينك؛ فما نزل بلاء بدينك إلا بذنب أحدثته. تقوم تصلي في رمضان التراويح ما تخشعش، أو تصوم ثلاثين يومًا وتخرج بعد ثلاثين يوم صيام زي ما دخلت، تيجي عاوز تفتح المصحف تحرّج، ما نزل بلاء إلا بذنب وما رفع إلا بتوبة.
وما ورد عن ابن مسعود وكذلك عن الحسن لما اشتكوا لهم أنهم مش عارفين يقيموا الليل، فقال: «كبلتكم خطاياكم». فيبقى عشان ما ندخلش رمضان مفاجأة مش عارفين نفتح المصحف، مش عارفين نصلي تراويح، مش عارفين نعتكف، بنصلي تراويح ونيجي ننزل التهجد ما ننام، كل الشكاوي اللي بتحصل دي؛ يبقى نعمل إيه؟ لابد أن نقدم بين يدي رمضان توبة.
فكلمنا عن التوبة ونكمل حديثنا عنها إن شاء الله. قال الإمام الهروي رحمه الله: «ولطائف سرائر التوبة ثلاثة أشياء؛ أولها أن تنظر بين الجناية والقضاء». يعني إيه؟ خلي بالكم يا جماعة، أول لطائف وسرائر التوبة دي أدق شيء هنتكلم عنه في التوبة، يعني كلام عالي قوي.
يقول: «أولها أن تنظر بين الجناية والقضاء»، يعني أول حاجة أن تنظر إلى ذنبك، إلى جنايتك، فتشاهد قضاء الرب فيها. يعني لما فعلت الذنب، لما وقعت في الجناية، تراك وقعت في تلك الجناية خارجًا بذلك عن قدر الله وقضائه، أو هو قضاؤه وقدره. هو قضاؤه وقدره، فإنه لا يكون في الكون شيء إلا ما قضاه سبحانه وتعالى، فطاعتك قضاؤها، ومعصيتك قضاؤها سبحانه وتعالى.
والدرس اللي فات اللي أنتم ما حضرتوهوش اتكلمنا فيه عن معنى مهم جدًا، معنى إرادة العبد وإرادة الرب، ومشيئة العبد ومشيئة الرب، وعلاقة الرب وقصة كبيرة كده في آخر الدرس اللي فات، فعشان ما نعيدهاش تاني هنا ضروري جدًا تسمعوا الحتة دي لما ينزل الدرس بكرة إن شاء الله، هو ضروري تسمعوا الدرس كله.
طيب، بس دلوقتي اللي إحنا عاوزين نقف معاه أن جنايتك هي قضاؤه، هي أمره القدري، قال: «كن» فكانت تلك الجناية، طيب طبعًا كانت بإرادة منك أنت، محاسب عليها إزاي؟ لما نقف على أن جنايتنا هي قضاؤه، هي أمره القدري سبحانه وتعالى، نستفيد إيه؟ أول معنى نستفيده هو ما قاله الهروي في أول باب التوبة، هو أن تنظر: انظر انخلاعك عن العصمة.
يعني أول ما تسمع كده أن تلك المعصية هي بقضائه وقدره، يعني معنى كده إنك انخلعت عن عصمته، لأنه لو عصمك ما كنتش هتقع في الذنب. يبقى ده أول معنى تفكر فيه: أنا ليه انخلعت؟ لماذا رفعت عني العصمة؟ يبقى لأنك هنت على ربك، هانوا عليه فعصوه، ولو عزوا عليه لعصمهم.
لما نعرف أن الجناية هي قضاؤه سبحانه وتعالى، قال: «فتتعرف مراد الله فيها إذ خلاك وإتيانها». يعني لما يا رب خليت بيني وبين تلك المعصية حتى وقعت فيها، ما مرادك من ذلك؟ فإن الله عز وجل إنما يخلي العبد والذنب لأحد معنيين؛ أحدهما: أن تعرف عزته في قضائه، وبره في ستره، وحلمه في إمهاله، وكرمه في قبول العذر منه، وفضله في مغفرته.
يبقى من الحكم يا شباب التي من أجلها يقع العباد في المعصية أن تظهر آثار أسماء الله وصفاته، أن ترى تلك الآثار في هذا الفعل. أحدهما: أن تعرف عزته في قضائه جل وعلا، تعرف أنه سبحانه وتعالى عزيز لا يغالب، إذا قضى شيئًا كان. هو جل وعلا لا يغالب، فانظر إلى عزته؛ يعني إذا أراد شيئًا خارجًا فأنت مش هتعرف تمنعه، ولو أراد فيك أنت شيئًا لن تستطيع منعه. فلما قضى عليك المعصية كانت، وأعيد تاني، كانت بإرادة منك أنت مجزي عليها.
وما تدخل في الحتة دي، مين اللي دخل في الحتة دي؟ الكفار، الذين يقولون: ﴿لَوْ شَاءَ الرَّحْمَنُ مَا عَبَدْنَاهُمْ﴾ [الزخرف: 81]، ربنا رد عليهم ولا قال لهم إيه؟ قال لهم: أنتم جهلة، أنتم تعرفوا منين مشيئتي؟ تعرفوا منين علاقة مشيئتي بمشيئتكم؟ أنتم جهلة: ﴿لَوْ شَاءَ الرَّحْمَنُ مَا عَبَدْنَاهُمْ مَا لَهُم بِذَلِكَ مِنْ عِلْمٍ﴾ [الزخرف: 81].
﴿إِنْ هُمْ إِلَّا يَخْرُصُونَ﴾. ما لهم بذلك من علم، لكن لغيرهم علم. النبي ﷺ مثلاً عنده علم، وما عندوش علم بالحتة دي، جبريل عنده علم، وما عندوش علم بالحتة دي؛ فالقدر سر الله في خلقه، لم يطلع عليه ملكاً مقرباً ولا نبياً مرسلاً.
نرجع تاني، يبقى أن ترى عزته في قضائه؛ سبحانه وتعالى عزيز لا يغالب. فلما ترى ذلك، تستفيد أموراً. شوف يا جماعة ده كله إحنا بنتَدبر فيه.
وقوعك في المعصية، أول ما تقع في المعصية تقول إيه؟ المعصية دي اللي كنت السنة اللي فاتت بقول إزاي فلان يعمل كذا، ده أنا مستحيل أعمل كده! النهارده أنا بعملها. ده عجيب ولا مش عجيب يا جماعة؟ عجيب جداً. النهارده أنا بعملها، وبعملها بإيه؟ بمزاجي، وبعد ما أعملها بتبسط، ده أنا من سنة بس كنت بقول أنا مستحيل أقع في المعصية دي.
عزيز لا يغالب جل وعلا، أنت تقول اللي تقوله هو عزيز لا يغالب في قضائه. فلما تعرف ذلك وتراه، عياً أحياناً أهو فيك أنت، يقوم يفيدك إيه؟ أول حاجة تطمئن إن كنت في جناية؛ لأنه عزيز لا يغالب.
يبقى لما تبقى قلقان من حد تقول: لا، ده سبحانه وتعالى عزيز في قضائه، بدليل الذنب اللي أنا واقع فيه ده مش عارف أخرج منه، اللي كنت بقول مستحيل أعمله أديني عملته. فإيه في نفسي اللي هو أكثر شيء بتظن إنك ملكته؟ فيكون هو سبحانه وتعالى عزته من باب أولى على الأمور الخارجة.
ثاني حاجة، إذا رأيت عزته في قضائه، كالجناية سبحانه وتعالى، فهو كذلك عزيز في قضائه العصمة. ولا هو يعني عزيز في قضائه الجناية وما هو عزيز في قضائه العصمة؛ تقوم تسأله العصمة، سؤال من تيقن قلبه أن الأمر كله بيده.
إحنا مش محتاجين يا جماعة في الدعاء نتيقن ذلك، فخذ ذلك اليقين من تلك المعصية. يعني وأنت بتدعي ربنا كده، عاوزينك وأنت بتدعي ربنا: يا رب العصمة، يا رب أسألك مجانبة الهوى، مجانبة الشهوة، كذا وكذا. محتاجين يبقى في يقين أن الله عز وجل إذا قال لذلك كأن كان.
طب كيف نحصل ونحرز ذلك اليقين برؤيتك الجناية؟ أهي الجناية اللي أنت بتقول مش هعملها أديك عملتها، ليه؟ لأنه عزيز في قضائه، فكان ما أراد. فإن أراد لك العصمة كانت، وإن أراد إحرازك أحرزك؛ لأنه لا يغالب. فيوم دعائك يصير دعاء يقين.
أن ترى عزته في قضائه سبحانه وتعالى وبره في ستره. لما خلى بينك وبين تلك المعصية، ونظرت بين الجناية والقضاء - والمقصود بالقضاء أن ذلك قضاه الله عز وجل - لماذا قضاه؟ ثاني معنى أن ترى بره في ستره: ولولا ذلك القضاء، ما تلمحت ذلك البر في الستر.
عصيته مرة واثنين وعك، وأنت قاعد، يسترنا بلاش يسترنا، أديك قاعد بتدي الدرس وأنت مستور، ويتقال عليك الشيخ فلان، ويتقال عليك الأخ فلان، ويتقال لك ربنا يكتر من أمثالك، ولو كتر من أمثالي تخرب!
لكنه الستر، ستره سبحانه وتعالى جميل، ستره. فنرى في الجناية مع القضية مع قضائه، أنه إنما قضى ذلك لأمور، منها أن نرى بره في ستره سبحانه وتعالى، أن ترى بره في ستره وحلمه. والحلم شيء والستر شيء، فيسترك ويمهلك.
يعني إيه يمهلك؟ تبقى نائم على جنابة، إباحيات وعادة سرية، وتصحى ثاني يوم، ولو شاء لقبضك. إيه اللي يمنع، إيه اللي يمنع أنه يقبضك وأنت نائم على تلك الجنابة وتلك المعصية؟ تبقى نائم، آخر حاجة زي ما قلنا الدرس اللي فات، زعيق مع أمك ولا قفل السكة في وشها، وتصحى ثاني يوم إمهال؛ أن ترى حلمه في إمهالك.
يبقى قضى عليك الجناية، ثم أمهلك لترى حلمه سبحانه وتعالى وتعرف ذلك الحلم، ولو شاء لقبضك، ولو شاء لأخذك على المعصية، مش بس تنام، ده آخر نفس يكون وأنت بتقفل السكة في وش أمك، آخر نفس وأنت بتمد إيدك للرشوة، آخر نفس وأنت بتشاتئ معاه ولا مش عارف، لكنه حليم يمهل.
ولو لولا ذلك القضاء ما بان لك ذلك الحلم في ذلك الإمهال، فيعرف حلمه في إمهالك، وكرمه في قبول العذر منه. قلنا كرمه في قبول العذر، يعني إيه؟ يعني قضى فيما قضى سبحانه وتعالى وشرع فيما شرع أن في حاجة اسمها توبة، وأنك إذا أتيت معتذرًا قبلناك.
ولو شاء سبحانه وتعالى لكان الشرع على خلاف ذلك. يعني يا جماعة، لو قلنا إن الله عز وجل يشرع مثلا أن الذنب هتعمله يكتب، طب يا رب عاوزين نمسح، عاوزين نشطب على الذنب، ما فيش حاجة كده، ما فيش شرع يخلي الذنب ده يمحى، ما فيش شرع يخلي الذنب ده يتشطب عليه، مين هيراجعه؟ أهو مين هيقول له لا اعمل كذا؟ ﴿لَا يُسْأَلُ عَمَّا يَفْعَلُ وَهُمْ يُسْأَلُونَ﴾ [الأنبياء: 23]. طب وبعدين يا رب يعني الذنوب دي أعمل فيها إيه؟ روح بقى اجمّعها بحسنات، إنما الذنب يتكتب ما فيش محو عندي، طب توبة؟ ما فيش توبة، استغفار؟ ما فيش استغفار.
لو شاء جل وعلا لجاء الشرع على هذا النحو، والدرس اللي فات قلنا إن هذا يستسيغ العقل، يعني ده يا جماعة مش بعيد عن قواعد العقل. لو قلنا لك في إشارات المرور كسرت الإشارة، عليك 500 جنيه، ونزل القانون على كده، فتجي تقول طيب كسرت الإشارة عاوز أقدم تظلم، نقول لك لا ما فيش تظلم، هل هذا الأمر مستبشع عقلاً ولا مستساغ؟ لا ما فيش، إحنا عندناش تظلم، كسرت إشارة عليك 500 جنيه رسمي، طب تظلم؟ طب ينزلوا شوية؟ ما عندناش كده، إحنا آسفين، طب معيش الـ 500 جنيه؟ روح حصل الـ 500 جنيه، روح اشتغل.
وقتها لو شاء لكان الشرع على ذلك؛ عملت ذنب يكتب 1000 ذنب يكتبه، طب يا رب هدخل النار؟ روح اعمل 1000 حسنة، مش قضيتي روح اشتغل! الشرع ما جاش كده يا جماعة، الشرع مهما عملت أن تبت تاب وقبل وغفر، وبس كده، يعني يتشطب، بل الذنب ربما يبدل بإيه كمان؟ بحسنات، ده ليه ده؟
محض كرم منه سبحانه وتعالى؛ ليه محض كرم؟ لأنه لا عاوزك ولا هيعوزك بعدين، أصل اللي بيعمل ده يا إما بيقدم السبت عشان يلاقي السبت، يا إما محتاجك النهارده يا إما احتمال يحتاجك بكره، هو لا محتاجك النهارده ولا محتاجك بكره ولا محتاجك أبدًا. فبتلك القضية أن قضى عليك الجناية، عرفت ذلك؟ عرفت كرمه في قبول العذر.
جل وعلا، شاء ما قبل، ولو لم يقبل لن يسأل. قال: وفضله في مغفرته، يعني بقضائه الجناية عليك، عرفت فضله في المغفرة؟ يعني أنه إذا قبلك وغفر لك، ذلك شيء تستحقه أو هو فضل منه سبحانه وتعالى. عارف ليه ما تستحقوش؟ عارف ليه فضل؟ لأنه ببساطة غير اللي إحنا قلناه ده كله؛ ببساطة لو أخذك على تلك المعصية انتهى أمرك، لا أنت تبت ولا لحقت تستغفر، وإذا مت على شيء بعثت عليه وانتهى أمرك يا مسكين.
فكل ده فضل منه سبحانه وتعالى. كل هذه الأمور وغيرها من آثار الأسماء والصفات لم تكن لتظهر لك إلا بقضائه الجناية عليك سبحانه وتعالى، عرفت ذلك؟ فاحببته جل وعلا. إله بتلك الصفات لا يُحب؛ كريم، حليم، عزيز، بر؛ إله يحب، ومع الحب يهاب ويعظم ويخاف جل وعلا. فهذا كله استفدناه من النظر بين الجناية والقضية، أن قضى علينا تلك الجناية.
قال: والثاني، يعني ثاني حاجة، ليقيم على العبد حجة؛ عدله سبحانه وتعالى، فيعاقبه على ذنبه بعدله سبحانه وتعالى، وإلا فعلمه الأزلي يعلم أن هؤلاء في النار ولا أبالي، وهؤلاء في الجنة ولا أبالي، لكنه بعدله سبحانه وتعالى أقام علينا الحجة. ونسكت، ولا نخوض ولا نرسل العلانية للعقول، ومن فعل ذلك حارت عقولهم وضلت، ووجد بقى في هذه الملة الجبرية في ناحية، والقدرية في ناحية؛ دول قالوا إحنا مجبرون، ودول نفوا القدر.
وثبت أهل السنة بتثبيت الله لهم، فأثبتوا مشيئة العبد ومشيئة الرب، وجعلوا مشيئة العبد تبعًا لمشيئة الرب، ولم يخوضوا مع الخائضين، وقفوا هنا، عرفوا أن ده سر، لكنهم اطمأنوا لعدل الله عز وجل: ﴿وَمَا رَبُّكَ بِظَلَّامٍ لِّلْعَبِيدِ﴾ [فصلت: 46]. فلنطمئن.
قال: واللطيفة الثانية، ثاني لطيفة بقى من لطائف أسرار حقائق التوبة، أن تعلم أن طلب البصير الصادق لسيئته لم يبق له حسنة بحال. يعني إيه؟ يعني لطيفة يا جماعة نلحظها من لطائف سرائر التوبة: أن طلب البصير الصادق لسيئته لم يبق له حسنة بحال؛ لأنه يسير بين مشاهدة المنّة وتطلب عيب النفس والعمل.
وده مهم جداً وإحنا داخلين رمضان يا جماعة، وهذه قاعدة من القواعد المهمة وإحنا في رمضان، علشان رمضان موسم طاعات، وفي مواسم الطاعات بيزيد الإعجاب بالنفس. تطلع من رمضان كده إيه؟ خاتم لك كم خاتمة، وقايم لك كم ليلة، وصايم لك كم يوم، ويمكن عملت عمرة، فتطلع معجب بنفسك، نقول لك: لا، بقى إيه؟ ذل واخضع شوية. فرؤيته السيئة تمنعك رؤية الحسنة.
يعني إيه؟ يعني وأنت سائر إلى الله عز وجل تشاهد منته، ثم تطالع عيب نفسك وعملك. يعني هو سبحانه وتعالى منّ عليك فكنت هنا، ولو شاء لما كنت هنا، وهو سبحانه وتعالى من أمهلك حتى أدركت رمضان ولو شاء لأخذك قبل رمضان، وهو سبحانه وتعالى من فتح قلبك لكلمة غيرت حياتك ولو شاء لكنت من الغافلين. كل ده بإيه؟ بولا حاجة، أنت ما تستحقش حاجة، منه كرم وفضل.
مشاهدة المنّة، ثم بعد أن فعل بك كل ذلك، قابلت ده بإيه؟ يعني هو الذي حملك للصلاة فسرحت في الصلاة، وهو اللي أمهلك لرمضان فمقضيه إباحيات بالليل في رمضان، ومقضيه مع صاحبه في رمضان عادي، إيه الجبروت ده؟ وجاي بعد كده طالع وأنت شايف حسناتك، حسنات إيه اللي شايفها؟ يا ابني ده أنت يوم ما خلّى بينك وبين نفسك ضعت. فإذا كان في حسنة فهي بتوفيقه لك، فأنت معجب بإيه؟ أنت نسيت نفسك لما رفعت عنك العصمة.
فأنت معجب بإيه؟ بصلاة هو الذي حملك عليها، بصوم هو الذي وفقك له، بمصحف هو الذي بعث همتك نحوه. فأنت معجب بإيه؟ هو يا جماعة ما بيحصلش، ما بيحصلش يبقى المصحف قدام عينيك ولا الأب في الموبايل وعاوز تقرأ في المصحف ما تعرفش تفتح المصحف، بتحصل ولا ما بتحصلش؟ جاي يوم ما تختم تقول أنا! أنت إيه؟ وأنا مصدر كل شر ومصدر كل خبث، تمنّ على من بإيه؟ وهذا المعنى أوضحه الله صراحة: ﴿أَتَمُنُّونَ عَلَيْكُمْ أَنْ أَسْلَمْتُم ۖ قُل لَّا تَمُنُّوا عَلَيَّ إِسْلَامَكُم ۖ بَلِ اللَّهُ يَمُنُّ عَلَيْكُمْ﴾ [الحجرات: 17]. ربنا اللي هداك، ربنا اللي وفقك، فما تشوفش لنفسك بعد عبادة.
ثاني لطيفة من أسرار حقائق التوبة: أن الصادق في طلبه لسيئته لم يبق له حسنة بحال، هو مش شايف حسنة لنفسه. يعني مش شايف أن أنا الحسنة اللي اتعملت دي لا مش أنا خالص، بحوله وقوته جل وعلا. أمال أنا إيه؟ أنا اللي لما خلّى بيني وبين نفسي هقع في الذنب، هقع في السيئة، فأنا مش شايف حسنة أتكلم بيها، أصل هتكلم بإيه؟ ما هو اللي من جل وعلا. فبعد كده إحنا يجي الكلام كمان شوية، أقول له أنا مستحق بقى مستحق إيه وبايه؟
قال: اللطيفة الثانية، أن تعلم أن طلب البصير الصادق لسيئته لم يبق له حسنة بحال؛ ليه؟ لأنه يسير بين مشاهدة المنّة ومطالعة عيب النفس والعمل. يبقى وإحنا داخلين رمضان ماشيين بالقاعدة دي: مشاهدة المنّة ومطالعة عيب النفس والعمل. أول ما تلاقي نفسك بتعجب بعمل قول لها فوقي، فوقي واعرفي قدرك. أنتِ اللي لما تخلّى عنك زنيتِ، أنتِ اللي لما تخلّى عنك فطرتِ اغتبتِ، أخذتِ رشوة، أخذتِ قرضاً ربوياً، غرقانة في إباحيات وعادة سرية، أنتِ ده! فما تشوفيش نفسك.
اللي أنتِ فيه دلوقتي منته جل وعلا، بحوله وقوته جل وعلا، مش أنتِ عاوزة تشوفي نفسك؟ شوفي نفسك لما بتتسابي بتروحي فين. يوم ما يعصمك ويجتبيك ويقويك ويحملك على طاعته تعجبي. سيئة الصادق لم تُبقِ له حسنة بحال، مش شايف لنفسه حسنة.
قال: اللطيفة الثالثة من لطائف أسرار حقائق التوبة، أن مشاهدة العبد للحُكم لم تدع له استحسان حسنة ولا استقباح سيئة، لصعوده من جميع المعاني إلى معنى الحُكم. ودي برضو خطيرة جداً يا جماعة، يعني إيه الكلام ده؟ مشاهدة العبد للحُكم يعني مشاهدتك هنا في معنيين عاوزين نقولهم؛ أما يكون المعنى مشاهدة الحُكم الأزلي، لم تبقِ الحكم الأزلي يعني إيه؟ يعني حكم الله عليك في الأزل، أنك شقي أو سعيد، مين يعرف؟ فيش حد يعرف. في الأزل ربنا سبحانه وتعالى حكم هؤلاء في الجنة وهؤلاء في النار وخلصنا. طيب.
لو تلمحنا ذلك المعنى، معنى الحكم، الحكم الأزلي، لا نستحسن حسنة؛ ليه؟ لأن العبرة بالخواتيم. يعني إيه العبرة بالخواتيم؟ يعني مش هنستحسن حسنة لأن ممكن يكون بعدها سيئة، وأخرى، وثالثة، ويمكن بعدها كفر، فنخاف.
وفي نفس الوقت، مش هنستقبح سيئة استقباحًا يخرجنا إلى القنوط. إحنا بنوجه كلام الهروي لمعنى سني؛ يعني إيه؟ يعني هتيجي تعمل السيئة، فبعض الناس كده يقول لك: أنا مش فالح. قلنا لكم قبل كده، قاتل نفس النفس رقم مائة التي قتلت، متى قتلت؟ لما قنط؛ لم تتب، قتلت 99 نفسًا لم تتب، قال: لا، قتلت لما قنط. فأول ما تدعوك نفسك للقنوط من رحمة الله عز وجل من كثرة السيئات أو عظم السيئات، افتكر الحكم الأزلي؛ يقوم يهون عليك شيئًا، لعلك من الفائزين، والله أعلم.
الصحابي دخل الجنة ولم يسجد لله سجدة، في غزوة أحد، كان كافرًا. كافر، في بعد الكفر يا جماعة ما فيش بعد الكفر، وبعدين كفر إيه؟ كفر في عهد النبي عليه الصلاة والسلام ما فيش بعد كده. وبعدين داخل بيته لقى الناس طالعة من أحد، رايحين فين دول؟ ده رايحين يجاهدوا، قذف الله في قلبه الإيمان، أسلم، خرج مات، دخل الجنة. قال صلى الله عليه وسلم: «دخل الجنة ولم يسجد لله سجدة». فلا تقنط من رحمة الله عز وجل مهما كنت، لا تقنط من رحمته سبحانه وتعالى.
يبقى مشاهدة الحكم، الحكم الأزلي، تجعلك لا تستحسن حسنة ولا تستقبح سيئة استقباحًا مخرجًا إلى القنوط. وإلا فسيئة مستقبحة. أو يكون المعنى أن مشاهدة العبد الحكم، يعني حكم الله فيه، مش الحكم الأزلي اللي إحنا لسه قايلينه من شوية، اللي هو أنت لما فعلت الطاعة، فعلتها بإيه؟ بكن، مش كده؟ فكانت بارادة منك، لكنها تتبع إرادة الرب: ﴿وَمَا تَشَاءُونَ إِلَّا أَن يَشَاءَ اللَّهُ﴾ [الإنسان: 30]. العلاقة بينهم إيه؟ ما حدش يعرف، ولا نتطلع أن إحنا نعرف لأننا مش هنعرف، لكن في الآخر هي إرادته ومشيئته سبحانه وتعالى.
فجأة تستحسن الحسنة؛ تستحسن إيه؟ الاستحسان المخرج إلى العجب، إلى رؤية النفس. مفهوم يا جماعة؟ وإلا فالحسنة مستحسنة والسيئة مستقبحة، لكن هنا المنهي عنه أن تستحسن الحسنة استحسانًا يخرجك إلى العجب، إلى رؤية النفس؛ اللي هي زي كلمة قارون كده: "أنا على علم، أنا أستاهل، أنا اللي بعرف أحط جدول وأعمل عمل، مش عارف تايم مانجمنت وبدير الوقت كويس"، فبصحى بالليل... فإذا رأيت الحكم حكمه فيك، رأيت ذلك منه سبحانه وتعالى، فلم تستحسن الحسنة ذلك الاستحسان المؤدي أو المخرج إلى العجب ورؤية النفس.
وكذلك لم تستقبح السيئة، قالوا هنا يعني لم تستنكرها من نفسك، يبقى هنا الاستقباح أن تستنكرها من نفسك، تقول: لا، ده أنا نفسي هي موطن الشرور وموطن السيئات، فمستغربة ليه؟ مستغربة ليه إنك رحتي زنيتي؟ مستغربة ليه إنك بعد ما كنت بتقولي ما أسمع عن واحد بيتفرج على الإباحيات تقولي مستحيل أديك بتكحوله في الإباحيات؟ مستغربة ليه؟ أنت موطن الشر، وإنما منعك من الوقوع طول السنوات اللي فاتت العصمة المعية. فلما رفعت عنك، أيتها النفس، أهو، أديك أنت أهو. أخوك بيقول لكم إيه في الدعاء: «لا تكلني إلى نفسي طرفة عين»، إذا وكلك إلى نفسك طرفة عين هلكت، ضعت.
مشاهدة العبد الحكم لم تدع له استحسان حسنة ولا استقباح سيئة؛ ليه؟ لصعوده من جميع المعاني إلى معنى الحكم، خلاص هو هيرى أن ذلك فعله، ويتذكر قول النبي صلى الله عليه وسلم: «ماض في حكمك، عدل في قضائك».
قال: فتوبته العامة لاستكثار الطاعة. ابتدأ يا جماعة يتكلم عن شوية آفات تصيب التائب. آفات تصيب التائب، أول آفة تصيب التائب -إن كان من العامة، الناس العادية كده، هو قسم الناس لعامة وأوساط وخواص- فيقول لك العامة: توبة العامة لاستكثار الطاعة. يعني إيه؟ يعني العبد الواحد، الإنسان العادي بيعمل إيه؟ بيعمل ذنوب وبعدين يجي يتوب بعد سنين، يوم ما يتوب يروح يعمل إيه؟ يكثر من الطاعات، مش ده اللي الناس بتعمله؟ فيقول توبة العامة لاستكثار الطاعة، مش من استكثار الطاعة في بعض النسخ منه، لكن لعل الأقرب واستكثرها الشراح؛ يعني تؤول لاستكثار الطاعة.
مالها؟ تاب من الذنوب، يبتدي يشتغل في طاعات. ركزوا بقى يا شباب، رمضان داخل، ركزوا في اللي جاي، فإنه يدعو إلى ثلاثة أشياء؛ استكثار الطاعات يدعو إلى: جحود نعمة الستر والإمهال، ورؤية الحق على الله، والاستغناء الذي هو عين الجبروت والتوثب على الله. إحنا داخلين رمضان، هنكثر من الطاعات، هنحس أنها كتير، ده معنى الاستكثار. ده هيعمل إيه فيك أيها التائب؟ أنت كنت لسه ابن امبارح واقع في الذنوب الكبار، بس دخلت لي شهر رمضان، طالع من شهر رمضان نسيت نعمة الستر والإمهال. نسيت كنت إيه؟ دي من آفات توبة العامة؛ أنه بعد فترة من الطاعة جحد نعمة الستر والإمهال. فاكرين بره؟ في ستره وحلمه في إمهال عبده؛ دي لسه قايلينها. نسيت إنك كنت مبهدل الدنيا، وهو اللي حملك على هذه الطاعة، هو اللي منّ عليك. نسيت أنك مستور وأنك ممهل. هو ليه حضرتك سابك السنة دي أصلاً؟ اللي قعدت فيها تعبده سبحانه وتعالى عشان تيجي في آخر السنة وتنسى أنك مستور وممهل؟ فدي من آفات استكثار الطاعات، أوعى تنسى.
قال: ورؤية الحق على الله. عارفين رؤية الحق على الله يا جماعة؟ يعني إيه؟ يعني أنا أستحق. بعض السلف، قيل إنه ابن مسعود، كان قاعد في مجلس، قيل إن أحد الجلوس قال: "أنا لا أرضى أن أكون من أصحاب اليمين، لأن أكون من المقربين أحب إلي"، قال ابن مسعود: وها هنا رجل ود أنه لو مات لا يبعث! يقصد نفسه. هو لا يرى حقًا، هو مش شايف إنه مستحق شيء، يمين إيه ومقربين إيه؟ ها هنا رجل ود أنه لو مات لا يبعث، لأنه لا يرى لنفسه حقًا على الله عز وجل. أصلًا يا جماعة ببساطة كده، هو إحنا ليه نرى لأنفسنا حقًا عليه سبحانه؟
إذا استقام لنا ذلك المشهد، وهو مشاهدة المنة ومطالعة عيب النفس والعمل، نستحق ماذا؟ هو الذي خلق أعضاءك، وخلق إرادتك، وخلق همتك وانبعاثها، وحملك على الطاعة ووفقك لإتمامها، وبغيره ما كان لأي شيء من ذلك أن يحصل. وبعدما فعل كل هذا، دخلت أنت في الطاعة؛ فكل هذا ننسبه إليه سبحانه وتعالى، فالخير كله منه.
ثم تدخل في الصلاة فتسرح، وتقعد تفكر في المباراة وفي الإفطار والطبيخ الذي على النار، ومعاملة التجار وكذا وكذا؛ فيكون أول شيء هو مشاهدة المنة، والجزء الثاني هو مطالعة عيب النفس والعمل. وبعدما يصح هذان المشهدان، تقوم ترى لنفسك حقًا؟ أم تجد نفسك أول ما تقول: «السلام عليكم ورحمة الله»، تقوم تستغفر؟ تستغفر الله، تستغفر الله، تستغفر الله.
هل أنت كنت في معصية؟ لا، أصلك شاهدت المنة وطلعت عيب نفس والعمل، فوجدت نفسك تستغفر: «يا رب أستغفرك». لماذا؟ لأنك تقول: يا رب حملتني إلى هذا المكان، ووقفتني في هذا الصف، وأنعمت علي بانبعاث همتي، وأتممت علي صلاتي، ولو شئت لقبضتني فيها وأنا على تلك الحالة الرديئة من السهو والسرحان والتفكر في غيرك؛ كل هذا منك يا رب، وبعد ذلك أنا العبد السرحان المستثقل للصلاة، الذي لو وقفت لأشاهد شاشة كبيرة فيها مباراة، لوقفت ساعة وساعة ونصف، زائد الشوطين الاحتياطيين وضريات الجزاء ولن أتعب، ولكن بمجرد أن دخلت وقفت لك ركعتين ربع ساعة تململت، وأول ما سأسلم سأشتم الإمام وأزعق وأعلي صوتي وأعمل بلبلة في المسجد. فطالعت عيب النفس والعمل، فأول ما سلمت استغفرت الله.
قل مثل ذلك في كل طاعة؛ فإذا صحاك بالليل لتصلي وبعث همتك نحو الصلاة، لأن يمكن أن يصحك بالليل فتجد نفسك تتصفح الفيسبوك، أو يصحيك فتجد نفسك فتحت محرمات أو كليبات أو أفلامًا، لا؛ بل بعث همتك نحو الصلاة فقمت بين يديه مصليًا.
ثم إذا زهقت ورجلك وجعتك وسرحت وتمنيت متى أخلص ومتى أعمل، فتجد نفسك بعد قليل من الليل، والذين ﴿لا يَهْجَعُونَ مِنَ اللَّيْلِ﴾ يعملون ماذا؟ ﴿وَبِالْأَسْحَارِ هُمْ يَسْتَغْفِرُونَ﴾ [الذاريات: 17-18]. ناموا قليلًا جدًا من الليل، وفي بقية الليل قاموا لله، وعند السحر يكون المرء مفلسًا لا يرى نفسه شيئًا، فيقعد يستغفر ولا يسأل عن الفردوس الأعلى؛ لأنه شاهد المنة وطالع عيب النفس والعمل، فخلص صلاة الليل وقعد يستغفر.
ستجد هذه الحالة يا جماعة متكررة في الشرع: ﴿ثُمَّ أَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا اللَّهَ﴾ [البقرة: 199]. فمن آفات رؤية الحق على الله هو الاستكثار من الطاعة، بأن تقول: أنا مستحق، أنا أستاهل الجنة؛ وهذا من شأن صاحب الآية في سورة الكهف: ﴿وَلَن تَرِدَ مِنْ بَعْدِهِ يَوْمَئِذٍ ثُلَّةٌ﴾، وصاحب الجنة في سورة الكهف الذي قال: ﴿لِأَجِدَنَّ خَيْرًا مِّنْهَا مُقَلَّبًا﴾ [الكهف: 58]. هذا ما نفعله، أن نقول: لأجدن خيرًا بصلاتي، وهذا من رؤية الحق على الله.
والاستغناء الذي هو عين الجبروت، واستكثار الطاعة يدعو إلى الاستغناء، بأن تشعر أنك مستغنٍ عنه سبحانه وتعالى، فتقول: أنا أعبد، أنا أعرف كيف أفعل أي شيء. الاستغناء هو عين الجبروت، والتوثب على الله هو الجبروت بعينه؛ فارجع واخضع وضع لله عز وجل، لترى كل جميل منه سبحانه، وكل قبيح منك.
وتوبة الأوساط من استقلال المعصية؛ فكذلك توبة العامة آفاتها أنها يتبعها استكثار الطاعة، وفي استكثار الطاعة آفات. لا نستكثر من الطاعة، ولم يقل لك زود الطاعات واحذر الآفات بمشاهدة المنة ومطالعة عيب النفس، بل كما قال النبي ﷺ: «إنه لا حول ولا قوة إلا به سبحانه وتعالى».
وتوبة الأوساط هي من استقلال المعصية، ومعنى استقلال المعصية أنها يراها قليلة؛ وهذا حال الأوسط، وهو الذي هو أعلى من العوام. أما توبة العوام فهي من الذنب، وهذا ما نشعر به فعليًا؛ فالذي دخل الطريق جديدًا تجده يتوب من الذنوب التي كان يفعلها ويراها كبيرة، وتجده دائم الانكسار في بداية التوبة، كلنا مررنا بهذه المرحلة؛ منكسر، باكي، خائف مما عمل.
ولكن بعد عشر سنين من التدين، قد يكون الشخص قد عاد ليفعل نفس الأشياء التي كان يفعلها قبل التوبة الأولى، وتجد توبته ليست بنفس قوة التوبة الأولى؛ لماذا؟ لأنه استصغر المعصية. وكيف يستصغرها؟ هذا من أمرين: إما أنه استصغر المعصية إلى جناب عفو الله عز وجل، وهذه الجملة صحيحة، فكل معصية إلى جناب عفو الله صغيرة، لكنه أخرجه إلى «انبساط خارج عن الحد»، أي أنه يقارن المعصية بالعفو، لكنه لم يقارنها بالعظمة.
إذا قارنتها بالعظمة دعاك ذلك إلى الانقباض والخوف. لكي نفهم معنى مقارنة المعصية بالعظمة؛ لو أن صاحبك الذي يجلس بجانبك قال لك: «قم أغلق الشباك لأن الجو بارد»، فقلت له: «لا». ثم جاء شخص أكبر منك سناً، في الثلاثين أو الأربعين، وقال لك: «أغلق الشباك فإنه يجلب البرد»، فقلت له: «لا». ثم جاء شيخك الذي يلقي الدرس وقال لك: «أغلق الشباك»، فهل ستكون في داخلك نفس الرد الأول والثاني؟ مع أن الأمر واحد، ولكن كلما عظم في داخلك قدر الشخص، عظمت في داخلك المخالفة.
ولله المثل الأعلى؛ فإذا قارنت معصيتك -ولو كانت حقيرة- بالعظمة، لعظمت، فدعا ذلك إلى الانقباض. أما ما يحدث في منتصف الطريق هو أنك قد تقارن المعصية بالعفو، فيأخذك ذلك إلى انبساط زائد عن الحد. أنت الآن محتاج إلى توبة، ليس فقط من الفعل، بل من استقلال المعصية؛ أي من رؤيتها صغيرة. وبعضهم ربما استقل المعصية لأنها صغرت في عينه للمعنى الذي قلناه، لكن لأنه لا يزال في المنتصف ولم يتحقق لديه معنى أن الكل منه سبحانه وتعالى، فيقول: «خلاص هو الذي قضى على المعصية». أقول لك: لا يا حبيبي، إياك أن تظن أن لك حجة على الله، ولا تستنصح.
ما تكش لما تيجي تقول له: "يا رب". ما هو أنت مش إذا أراد شأنًا فإنما يقول له. يعني بقى إيش؟ الواد معاه أدلة، أنت فاكر كده لك حجة؟ بل لله الحجة البالغة. بعدها على طول إيش؟ أكثر مسألة مجننة البشر: الهداية والغواية. أكثر مسألة على طول بعد الكلمة دي، "لله الحجة البالغة"، فلو شاء لهداكم أجمعين.
الله، دي أكثر حاجة يعني الإنسان بيظن أن له حجة فيها. جت على طول بعد إيش؟ الحجة البالغة؛ مش هيبقى لك حجة. طب إزاي؟ ما أعرفش إزاي مالكش حجة، مش أنا ما أعرفش إزاي ما حدش يعرف إزاي، بس اللي متأكدين منه أنه عدل سبحانه وتعالى: ﴿وَمَا رَبُّكَ بِظَلَّامٍ لِّلْعَبِيدِ﴾ [فصلت: 46]. فما تفتكرش كده.
ولذلك توبة الأوساط، أنت محتاج تتوب من إيه بقى؟ يا بقالك خمس سنين متدين، عشر سنين، عشرين سنة متدين، مش بس من الذنب، من أنك شايفه غير، وربما استصغارك للذنب. من إيه؟ حاجة ثالثة، إحنا كده بنقول معاني اللي الأوساط بيشوفوا الذنوب سهلة؛ إنه بيقارن الذنب بتاريخه التديني. يعني إيش؟ مش مهم أنا بقالي عشر سنين بصلي وبصوم وبحفظ القرآن ختمته، فمش مهم الذنب بالمش عارف إيه.
ده مين قال كده؟ يا ابني ده ممكن تبقى حجة عليك أصلاً. يعني ما تلاقي واحد بعيد عن ربنا، ما عنده علم، وبيذنب، تقول هو أحسن مني ليه؟ لأني عرفت الله وعصيته، على الأقل ده جاهل بالله، أما أنا عرفته وعصيته. فبتستصغر الذنب ليه؟ أما أنا، فإذا ذاقني حلاوة الطاعة وتركتها، فبتستصغر الذنب ليه؟ ده ممكن ذنبك اللي هو الصغير ده يبقى منك كبير.
يبقى توبة الأوساط من استقلال المعصية، قال وهو عين الجرأة والمبارزة. إيش هو عينه؟ استقلال المعصية، المعصية مبارزة وجرأة، وإنما كمان شايفها صغيرة. ده أنت غريب! هو أنت نسيت ربنا للدرجة دي؟ ونسيت عظمة ربنا سبحانه وتعالى للدرجة دي؟ شوفوا يا جماعة لفظ الهروي: "عين الجرأة والمبارزة".
يا متدين، قال: "ومحض التزيين بالحمية". يعني إيش محض التزيين بالحمية؟ يعني التزين بالمحاماة عن النفس، يعني الدفاع عن النفس. يعني المعنى اللي قلناها دي، اللي هو: أنا متدين أصل أنا عملت كذا، أنا بقالي عشر سنين مش عارف إيه، عمال تحامي عن نفسك "محض التزيين بالحمية"، أو تحامي عن نفسك، ما هو اللي قدر عليك هو قضاؤه. محض التزيين بالحمية نفعك؟ والله ما هتنفعك، أوعى تضحك على نفسك، مش هتنفعك قدام ربنا سبحانه وتعالى.
قال: "والاسترسال للقطيعة"، صعبة جداً الكلمة دي. الواحد متدين يقول: استقلال المعصية عين الجرأة والمبارزة، فهمناها. محض التزيين بالحمية، فهمناها. استرسال للقطيعة؛ أنت ماشي في سكة، الله عوده، أنت عمال كل يوم عن اللي قبله في قطيعة عن الله سبحانه وتعالى، والشكل الآخر فلان، الأخت فلانة، أمام المسجد، شيخ الدرس، وأنت كل يوم في قطيعة زائدة بإيش؟ باستصغار الذنب، باستقلال المعصية.
فأول ما تلاقي في نفسك هذا المعنى، معنى أن الذنوب اللي لما تبت أول توبة منها كنت بناهنه وبتعيط وخايف، النهارده بعملها وبعمل قدها عشر مرات وأكثر منها وأعظم منها، وتاني يوم عادي جداً بضحك وبهزر وبزقط؛ ليه؟ لمعنى من المعاني اللي إحنا قلناها دي، اعرف أنك في استرسال للقطيعة، أنت منقطع عن الله عز وجل.
قال: "وتوبة الخاصة من تضييع الوقت". الخاصة، توبتهم مش من الذنب، توبتهم الخاصة من تضييع الوقت. يعني إيش تضيع الوقت؟ مش في الذنب، تضيع الوقت يعني إيش؟ يعني أنا ضيعت وقتي، أول حاجة في الولا، حاجة اللي هو بتعمل إيه ولا حاجة؟ ما بعملش حاجة، فأنت كده مضيع للوقت في درجة من تضييع الوقت، بس يعني حاشا أن إحنا نقول تضيع الوقت، لكن عدم استغلال الوقت الاستغلال الأمثل، وهي أنك تنشغل بمفضول عن فاضل. كده أنت مش ضيعت الوقت، يعني ما نقدرش نقول ضيعت وقت، لكن كنت ممكن تستثمر الوقت في شيء أولى فلم تفعل.
ودي اتكلمنا عنها بالتفصيل في منزلة اليقظة، اسمعوا بقى إيش شرح منزلة اليقظة، ودي علاجها في العلم والصحبة الصالحة، قلنا ثلاث حاجات، حاجات ساعتها إنك ضيعت أو يعني استغللت الوقت في المفضول عن الفاضل. لذلك يا جماعة كان نسمع كتير من الصحابة يسألوا سؤال: "ما أحب الأعمال إلى الله؟". طب ما ممكن يتجاوب: ما تعمل أي حاجة، مش كده؟ لا، دول ناس فهمت معنى الوقت، أنا وقتي ضيق، وقتي مورد قليل، فأنا عاوز استغله أحسن استغلال، فما أحب الأعمال إلى الله عشان أخرج ربحان، أعظم ربح أقدر أربحه.
يبقى توبته الخاصة من تضييع الوقت وإضاعة الوقت علامة المقد؛ أول ما تلاقي نفسك وقتك ضايع، يعني إيش وقتك ضايع؟ يعني عادي جداً أجي في آخر الأربع وعشرين ساعة عادي، عملت سكرولينج خمس ساعات، ده عادي، مش شايف أنك في مصيبة؟ ده بفرض أن ما فيش معصية، مش بقول لك بتعصي، يعني عملت سكرولينج خمس ساعات في اليوم، عشر ساعات في اليوم، ما اتفرجتش بقى على حاجة وحشة وما سمعتش حاجة غلط خالص، هنعتبر كده، فلو أنت جاي آخر اليوم شايف أنك مش في مصيبة، فأنت كده في مصيبة. تضييع الوقت علامة، وقت محتاجة توبة، محتاجة توبة.
شوف سيدنا النبي ﷺ، حاجة عجيبة جداً يا جماعة، النبي ﷺ الأربع وعشرين ساعة ما فيهمش لحظة ضايعة، لا ثانية واحدة. ده كان ينام، تنام عيناه ولا ينام قلبه، قالوا إنه ينام ويظل قلبه في ذكر حتى وهو نايم ﷺ. طب ده طبعاً مش لأحاد البشر طبعاً، إنما أنا أقصد أقول إيش، شوفوا لدرجة إيش؟ ولما علم الأكياس هذا، وطبعاً ده للخواص، يعني الحتة دي يا جماعة مش كل الناس يعرفوا يعملوها.
ولذلك من فضل ربنا علينا ومن رحمته بينا ما خلاش دي معصية، لكن خلاها.. هتعمل إيش؟ يعني هتخليك أقل من غيرك. يعني واحد في الأربع وعشرين ساعة مثلاً بيستغل عشر ساعات لله، واحداني، بيستغل خمس عشرة ساعة، خلي بالكم مش بنقول بيخرج إلى معصية في خمس ساعات، الثاني الأولاني إنما استغل عشر ساعات والثاني استغل خمس عشرة ساعة، هيجي يوم القيامة هنلاقي الجنة درجات، فاللي استغل خمس عشرة ساعة في درجة أعلى من اللي استغل عشر ساعات، كلهم في الجنة، أه كلهم في الجنة، لكنها درجات. فدي رحمة من ربنا وفضل منه سبحانه وتعالى، ما خطبناش كلنا الخطاب ده، إنما الخطاب ده في ناس بتعمله، أه في ناس بتعمله.
طب أنت جاي تقوله لنا النهارده لازم كلنا نعمل كده؟ لا، مش لازم كلنا نعمل كده، ما هو مش مستطاع لينا كلنا نعمل كده، ودي بقى درجات الجنة، نحاول طبعاً نحاول.
هو أنت ليه ما تزاحمش على الدرجة الأعلى؟ ليه لو في الدنيا هتسيبها برضه وتقول خلاص بقى هو ياخدها؟ مش هتعمل كده، لو في الدنيا هتزاحم طب ما تزاحم في الآخرة.
نحاول ما نضيعش وقت، نشوف إيه اللي بيضيع وقتنا. فرصة إحنا داخلين على رمضان، نشوف إيه أكتر حاجة بتضيع وقتنا وتخلينا نتخلى عنها، أرميها وراء ظهرك. ليه أنا مش عايز أضيع وقت؟ أنا داخل رمضان هتوب توبة الخواص، اللي هي من إيه؟ تضيع الوقت.
وقلنا لكم قبل كده إن كان منهم من يحاسب نفسه على الأنفاس. مش إني أقول أنا متضايق النهارده إن ثلاث ساعات ما عملتش حاجة، لا يا حبيبي، ده كان يحاسب نفسه على النفس. واللي منهم كان يعمل إيه؟ ما ياكلش، ما يقعدش يغمس كده زينا، لا، يفتوا له كده كعك ولا بتاع ويسفهم، يسألوه أنت ليه بتعمل كده؟ قال لهم: والله أنا حسبت لقيت ما بين المضغ وسف البتاع ده قراءة 70 آية أو حاجة زي كده، فقلت ليه أقعد آكل ليه وأمضغ ليه وأعمل ليه أنا فاضي أسف للبتاع ده؟ أقعد أقرأ شوية قرآن، أقعد أذاكر شوية علم، أقعد أسبح، أقعد أكبر.
طبعًا كلنا هنعرف إن مش كلنا، بس خلاص فهمنا المعنى، معنى إننا عاوزين نستغل وقتنا، معنى إن الوقت اللي بيفوتك حتى لو مش في معصية، فأنت مهدر للمورد في شيء لن يعود عليك بالنفع. وادينا لكم مثال قبل كده وقعدنا كلنا نضحك عليه، قلنا لكم ده اللي إحنا بنعمله بالظبط. لو تفتكروا قلنا بالضبط: كأني اديتك مليون جنيه، الفلوس مورد زيها زي العمر، العمر مورد، فأنا اديتك مليون جنيه رحت أنت واخد المليون جنيه رحت اشتريت بيهم بلالين وقعدت تنفخ في البلالين والطيارة.
ساعتها هاجي أنكر عليك تقول لي هو حرام؟ أقول لك مش حرام، أنت حر بقى انفخ بلالين وطيارة، ضيعت المليون جنيه وضيعت نفسك، قطعت نفسك وضيعت المليون جنيه. ساعتها أي واحد هيشوفك هيقول عليك سفيه، ما أنت ما عملتش حاجة حرام، سفيه ليه؟ خدت المورد اللي هو المليون جنيه ده رميته في ولا حاجة. وساعتها كلنا ضحكنا ورجعت قلت لكم أهو إحنا بنعمل كده؛ الـ 10 ساعات يوميًا اللي بتضيعها في ولا حاجة، أنت كأنك خدتهم واشتريت بيهم بلالين.
غيرك بقى خد المليون جنيه واستثمر، فبعد سنة لقى المليون 10. زي ما غيرك خد أنفاسه واستثمر، فهيجي في القيامة هيلاقي كل نفس جوهرة، وأنت أنفاسك خزائن فارغة. إحنا بنكلم مين؟ مش العاصي، ده خطاب للخواص. خطاب للخواص، اللي مش بنتكلم عن عصيان، دلوقتي بنتكلم عن ولا حاجة دي اللي إحنا بنقعد فيها كتير، نقللها بقى.
قال: «فإنه يدعو إلى درك النقيصة»، يعني تضييع الوقت يدعو إلى درك النقيصة، الدرك اللي هو الشيء النازل في الدرك الأسفل من النار، إلى درك النقيصة، ويطفئ نور المراقبة. يعني بعد شوية مش هتراقب ربنا سبحانه وتعالى، ما هو اللي بيراقب ربنا في الأنفاس وفي إنه مش عاوز وقت يضيع ولا حاجة، هتيجي يجي نفسه توسوس له روح اعمل معصية. طب يعني هو معصوم؟ مش معصوم، هيقع في المعصية بس المرة بعد الأخرى ويتوب على طول، إنما لو أنت سبت نفسك في مسألة تضييع الأوقات هتنسى المراقبة، ولو نسيت المراقبة هتقع في العصيان.
قال: «ويطفئ نور المراقبة ويكدر عين الصحبة»، العين يعني عين الماء، يعني يكدر عين الصحبة يعني صحبة الرب سبحانه وتعالى، والله عز وجل ثبتت له الصحبة: «اللهم أنت الصاحب في السفر». فتكدر عين الصحبة بتضييع الوقت، إزاي؟ إن بعد ما كانت الصحبة 24 ساعة صارت 10 ساعات، تكدرت عين الصحبة.
قال: «ولا يتم مقام التوبة إلا بالانتهاء إلى التوبة مما دون الحق»، يعني أن ترى الكل فعل الله سبحانه وتعالى، فلا ترى شيئًا في الوجود خارجًا عن إرادته وعن حكمته وعن سلطانه سبحانه وتعالى. قال: «ثم رؤية علة تلك التوبة»، ثم التوبة من رؤية تلك العلة مش مهمة دي قوي، قولوا هذا واستغفر الله العظيم لي ولكم: سبحانك اللهم وبحمدك، أشهد أن لا إله إلا أنت، نستغفرك ونتوب إليك. والسلام عليكم ورحمة الله.