منزلة المحاسبة (الدرس الأول)

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على محمد النبي، وأزواجه أمهات المؤمنين، وذرياته وأهل بيته، كما صليت على آل إبراهيم إنك حميد مجيد. أما بعد:

قلنا إن صاحب "منازل السائرين" بدأ بمنزلة اليقظة، ثم منزلة التوبة، وانتهينا من المنزلتين، والمنزلة الثالثة عند صاحب المنازل هي منزلة المحاسبة، وسنعرف بعد قليل -إن شاء الله- لماذا هي ثالث المنازل.

قال الله عز وجل: ﴿يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ﴾ [الحشر: 18]. هذه الآية هي الأصل في محاسبة الإنسان لنفسه. وقلنا إن هذه الآية فيها إشارة إلى معنى مهم وهو: لماذا نحاسب أنفسنا؟ الجواب: نحاسب أنفسنا لأننا سنحاسب. فأنت إن حاسبت نفسك هنا، أو لم تحاسب نفسك هنا، فكده كده ستتحاسب هناك.

أشار الله عز وجل إلى هذا المعنى فقال: ﴿وَلْتَنظُرْ نَفْسٌ مَّا قَدَّمَتْ لِغَدٍ﴾، فأشار الله عز وجل إلى معنى أنك ستحاسب، أو نبهك على أن ثم حساباً هناك بقوله: "لغد"، ففي غد ستحاسب فيه. فأنت إن حاسبت نفسك هنا ستسهل عليك الحساب هناك، وإن أغفلت الحساب هنا ستعسر عليك الحساب هناك. فلذلك كان لزاماً علينا أن نحاسب أنفسنا. هذا المعنى كان عمر رضي الله عنه منتبهاً له، فقال: معنى أن في حسابين، حساب ستتحاسبه، وحساب أنت بالخيار، عاوز تحاسب نفسك هنا حاسب، مش عاوز أنت حر واستحمل. فقال: «حاسبوا أنفسكم قبل أن تحاسبوا، وزنوا أعمالكم قبل أن توزنوا» -وفي رواية: «قبل أن توزن عليكم»- فإن اليوم عمل ولا حساب، وغداً حساب ولا عمل. ففي حسابين، أحدهما بيدك الآن بقرارك أنت أن تحاسب نفسك أو ألا تحاسب نفسك.

وقال: ﴿يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾ [الحشر: 18]. ختام الآية خطير جداً ومرعب جداً. نحن الآن نتكلم عن المحاسبة يا شباب، ونقول لك حاسب نفسك، وفي يوم أشار إليه الآية -غد- سيكون فيه حساب ثاني. ثم ختم الآية سبحانه وتعالى بقوله: ﴿إِنَّ اللَّهَ خَبِيرٌ بِمَا تَعْمَلُونَ﴾.

من الجمل الخطيرة التي نريدكم أن تحفظوها: أنه أخطر ما في الأمر أن الذي سيحاسبك هو الذي كان يراك. أنتم عارفين لما يجي الابن -أو المرؤوس في العمل، أو أي أحد، خليها ابن عشان نوحد المثال- ويعمل مصيبة، وبعدين يجي الأب يحاسب الابن بقى يقول له: أنت عملت كذا وكذا، أول حاجة الابن بيعملها -ولادنا يعني، مش الناس اللي متربية، ولادنا- أول حاجة بيعمل إيه؟ بينكر، مش كده؟ ما عملتش. فالأب بيقول له إيه: ما عملتش إيه؟ ده أنا كنت شايفك! ساعتها الابن هيعمل إيه؟ هيطأطئ رأسه ويسكت، خلاص؛ ليه؟ لأن اللي بيحاسبه هو اللي كان شايفه، وهتنكر تقول إيه؟

﴿إِنَّ اللَّهَ خَبِيرٌ بِمَا تَعْمَلُونَ﴾، وهنا حتى لم يقل "عليم"؛ أنتم عارفين من يعلم الشيء غير من خَبُر الشيء، من خَبُر الشيء من وصل إلى غور الشيء، يعني وصل لنهاية الموضوع. يقول لك فلان عالم بالحته الفلانية، حتى في أمور الدنيا، فلان خبير؛ يقول لك: إحنا جبنا الخبير بقى، اللي هو ما فيش حاجة بعد كده خلاص، ده عارف تفاصيل التفاصيل. ﴿إِنَّ اللَّهَ خَبِيرٌ بِمَا تَعْمَلُونَ﴾، فالله عز وجل خبير بعملك، بظاهر عملك وباطن أمرك جل وعلا.

طيب، ده يقتضي إيه؟ يقتضي أموراً؛ أول حاجة أنك تبقى عارف أن هو الذي سيحاسبك يوم القيامة من كان خبيراً بعملك، فيقتضي تجويد العمل ظاهراً وباطناً. فانت في المحاسبة -وهنيجي للكلام ده إن شاء الله- ينبغي أن تنتبه لظاهر العمل وباطنه، مش بس الظاهر. ولو قلنا إن تحاسب نفسك على الظاهر والباطن، فكأننا نشير إلى شرطي قبول العمل، ستلاقي فيه شرط ظاهر وشرط باطن. إيه الشرطين؟ إخلاص واتباع، صح كده؟ إخلاص شرط باطن، واتباع شرط ظاهر، فكأنك ستحاسب نفسك على الأمرين جميعاً؛ ليه؟ لأن الله خبير بما تعملون.

قال: ﴿وَلْتَنظُرْ نَفْسٌ مَّا قَدَّمَتْ لِغَدٍ﴾، والله عز وجل أشار أيضاً في كتابه في عدة مواطن إلى مسألة الحساب دي. وكأننا عندنا قواعد تعيننا بعض الشيء على تصور الحساب؛ مش هنحيط به علماً ولا هنتوهم شيئاً منه أصلاً، لكن عندنا قواعد، مثل من القواعد: ﴿أَحْصَاهُ اللَّهُ وَنَسُوهُ﴾. قاعدة تخليك تتصور شيئاً ما عن حساب يوم القيامة. ﴿أَحْصَاهُ اللَّهُ وَنَسُوهُ﴾، يعني لو جئت -كل واحد كده ياخد له 10 ثواني، 20 ثانية- وسألتك النهارده مثلاً، إيه النهارده؟ الاثنين مثلاً، الاثنين اللي قبل اللي فات، مش الأسبوع اللي فات، لا اللي قبله، الاثنين اللي قبل اللي فات، ماشي؟ قل لي كده أنت عملت إيه الساعة 3 وربع الظهر أو العصر؟ يا ترى كنت في الوقت ده على طاعة ولا على معصية؟ ولو على معصية، على كبيرة ولا على صغيرة؟ مين أتحدى بقى؟ مين يعرف يجاوب؟ النسبة تقريباً تؤول للصفر، ده مش فينا، ده في البشر. لو اخترت لك أي يوم عشوائي في تاريخك وقلت لك الساعة الفلانية في الدقيقة الفلانية أنت كنت بتعمل إيه؟ تقريباً النسبة تؤول للصفر، ولو نجحت في واحدة هتسقط في غيرها، خلي بالك؛ يعني ده كله ما دخلناش في التفاصيل، لو كنت في طاعة فالطاعة دي مقبولة ولا مش مقبولة، والميزان الباطن موجود والميزان، خالص خالص ما كناش في التفاصيل دي أول القواعد: ﴿أَحْصَاهُ اللَّهُ وَنَسُوهُ﴾.

طيب ده يستدعي إيه بقى؟ يستدعي منا لما نعرف القاعدة دي، وأن القاعدة دي قاعدة من قواعد حساب يوم القيامة، عاوزين نعمل لها بقى إسقاط على حساب الدنيا؛ يعني أيوه نستفيد إيه دلوقتي واحنا داخلين في منزلة المحاسبة؟ إحنا لسه ما ابتديناش في المنزلة، بس أول القواعد أهيه: حساب يوم القيامة ﴿أَحْصَاهُ اللَّهُ وَنَسُوهُ﴾. أنك تلحق نفسك قبل ما تنسى. يعني إيه؟ يعني ما تجيش أقول لك يلا إحنا هنعمل محاسبة، ولازم تحاسب نفسك، تقول: جميل جداً، أنا طول الأسبوع شغال، فبإذن الله هيبقى ليا جلسة محاسبة يوم الجمعة. أقول لك لما تيجي الجمعة كده أقول لك أنت عملت إيه يوم السبت؟ هتفتكر حاجة؟ مش هتفتكر. طب اللي أنت نسيته، نسيه الله؟ لا، ما نسيه، ﴿أَحْصَاهُ اللَّهُ وَنَسُوهُ﴾. طب يعني أنت تظن أن نسيانك له عذر لك يوم القيامة أمام الله؟ لا والله، هو مش عذر؛ مش لما عملته كنت عاقلاً؟ والعقل مناط التكليف، كنت رجلاً عاقلاً وأنت بتعمل الفعل ده؟ آه كنت عاقلاً. خلاص، الحاجة الوحيدة اللي هتجب عنك وتصرف عنك، أن تكون قد تبت -لو كانت معصية- صح كده؟

طيب إزاي تتوب من حاجة يوم الجمعة عملتها يوم السبت وأنت مش فاكرها أصلاً؟ هتتوب منها إزاي؟ وهنيجي لكلام التوبة إن شاء الله، وليه المحاسبة بعد التوبة، لأننا هنفاجأ هنا بكلمة عجيبة جداً هيقولها صاحب المنازل بعد قليل. يبقى دي قاعدة من قواعد حساب يوم القيامة: ﴿أَحْصَاهُ اللَّهُ وَنَسُوهُ﴾.

من قواعد حساب يوم القيامة: ﴿وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا وَكَفَى بِنَا حَاسِبِينَ﴾ [الأنبياء: 47]. دي قاعدة: ﴿وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا وَكَفَى بِنَا حَاسِبِينَ﴾. يبقى ستحاسب على الصغيرة كما تحاسب على الكبيرة، لأن بعض الشباب تلاقي إيه هو عادي، اللمم ده بالنسبة له عادي، وبعدين يبتدي يتأزم أو يحس أنه في مشكلة لما يقع في كبيرة. أنا مش عاوز أصدكم، أقول لكم إن بعض الشباب بيقع في الكبائر برضه عادي، آه يا شيخ؟ دول الفساق، إحنا ما فيش حد منهم. لا لا، أنا أتحدث عن المتدينين، أتحدث عن المتدينين اللي في المساجد واللي في الدروس، وياما صرخت بأن عقوق الوالدين من أكبر الكبائر، فعادي جداً ممكن يبقى شباب من اللي موجودين دلوقتي عادي جداً، هو قبل ما ينزل من البيت عشان يجي درس في المسجد هو نازل على كبيرة، زعق في أبوه! أبوه طلبه في مشوار، نفض لأبوه.

قلت لكم قبل كده -مش فاكر هنا ولا فين، أو اتسمعت أو كده- كنا عند واحد من مشايخنا الكبار، وبعدين في الدرس عام -مش درس خاص، يعني محدود العدد، لا درس عام يعني المسجد مليان- والناس دعوة بقى إلى الله، وإحنا قاعدين، وكان حينها يعني تقريباً في الخمسينات من عمره، وإحنا ده وإحنا قاعدين أبوه دخل المسجد وهو شيخ كبير، قال له: يا فلان -باسمه، ما قالوش يا شيخ ولا بتاع- يا فلان تعال عاوزك، فهو راح قايم وطلع لأبوه، وإحنا قاعدين في الدرس، خمس دقائق، 10 دقائق، ربع ساعة، الشيخ ما جيش! أبوه طالع عاوزه في مشوار، الشيخ قام وساب الدرس وما رجعش، يعني مش رجع إيه، أنا رايح خالص أبوي عاوزهني، ساب الدرس. فعشان ما نتفرعش، يبقى ﴿وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا﴾، تراه ينسى، يخطئ، حشاه، ﴿وَكَفَى بِنَا حَاسِبِينَ﴾. يبقى دي قاعدة ثانية من قواعد حساب يوم القيامة، أن كل صغيرة وكبيرة موجودة، ﴿مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا﴾ [الكهف: 49]. فدي قاعدة ثانية.

طيب القاعدة دي قبل ما ندخل على -إحنا لسه ما دخلناش في كلام صاحب المنازل- إنما القاعدة دي لما تعرف أنها قاعدة من قواعد يوم الحساب، أضف عليها قاعدة ثالثة عشان هو الإسقاط واحد؛ إيه القاعدة الثالثة؟ ﴿فَمَن يَعْمَلْ مِثْقَالَ ذَرَّةٍ خَيْرًا يَرَهُ * وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ [الزلزلة: 7-8]. يبقى القاعدة الثالثة آه إحنا هنجيب الصغيرة والكبيرة، وهتتحاسب على الصغيرة، أصل ممكن إيه، هنجيبه ونوريه لك وخلاص، لا، هتشوف الصغيرة والكبيرة، وهتتحاسب على الصغيرة والكبيرة خلاص، فدي القواعد.

طيب، إسقاطها على الحساب بقى وأنا لما أجيب هقول لك هنبتدي بقى أقول لك ده إحنا في حاجة اسمها محاسبة، يلا حاسب نفسك، تبقى عارف أن وأنت بتحاسب نفسك أنت مش بتحاسب نفسك على الأحداث العظام. عارفين في الإدارة لما بييجوا يقيموا الموظفين آخر السنة في طرق كتيرة لتقييم الموظفين، يعني مش تقييمه يعني ممتاز وجيد، لا لا، ما أقصدش، أقصد طرق أثناء السنة إزاي هنتعامل مع الموظفين عشان يجي آخر السنة نقيم الموظفين، واحدة من الطرق دي بيسموها "الكريتيكال إنسيدنس"، يعني بالعربي الأحداث الكبيرة التي حصلت أثناء السنة؛ ماشي، اللي هو إيه؟ يعني مثلاً موظف ضرب زميله، مثلاً ده مش حدث بسيط، ده حدث كبير، يقوم كاتبه في النوتة بتاعته، أن فلان الفلاني من الموظفين اللي تحتي، أو شوح لزميله أو زعق أو كده، موظف تاني ابتكر شيء فوفر على الشركة فلوس، ده حدث كبير، فتلاقي المدير ده لو هو بيتبع هذا النظام ما بيدخلش بقى من 8 لـ 4 ماسك النوتة وعمال، رفع إيده، هرش، ضحك، ما بيعملش كده، هو بيكتب الأحداث الكبيرة سواء سلبية أو إيجابية عشان يجي آخر السنة هيحاسبك على الأحداث الكبيرة، الله ليس ذلك، وأخبرك بذلك عشان ما تجيش يوم القيامة تقول إيه: ما أعرفش يا رب! إيه اللي ما تعرفش؟ في سورة من قصار السور يحفظها الأطفال، قطعت الحجة عنك: ﴿مِثْقَالَ ذَرَّةٍ﴾ هتشوفه.

طيب، فأنا بعد شوية هقول لك حاسب نفسك يا ابني في الدنيا، تقوم دلوقتي تبقى عندك نوع وعي إيه اللي هتحاسب نفسك عليه في الدنيا؟ إيه اللي هتحاسب نفسك عليه في الدنيا؟ ببساطة إيه اللي هتتحاسب عليه في الآخرة، فما أجئ أقول لك حاسب نفسك هنا في الدنيا على مثقال الذرة، من يستطيع ذلك؟ صفر برضه، خلي بالك، إحنا المثال الأول أنا بقول لك عملت إيه في اليوم الفلاني؟ لا، أنا بقول لك بقى في اللي جاي أهو يعني أنت راجل منتبه ومركز أنك هتحاسب نفسك، مركز، ها، طب أحاسب نفسي على إيه بقى يا شيخ؟ أقول لك بسيطة، شوف أنت هتتحاسب عليه في الآخرة وحاسب نفسك عليه في الدنيا عشان يسهل عليك الحساب في الآخرة، تقول جميل، اللي هو إيه؟ أقول لك بسيطة: مثقال الذرة، يلا روح حاسب نفسك، من يستطيعها؟ صفر. احفظوا الكلام ده عشان بعد شوية هيجي يقول لك إيه: إن من أركان المحاسبة أن تسيء الظن في نفسك، فساعتها نقول لك إيه، هنستدعي بقى الكلام ده عشان تبقى عارف أنت هتحاسب على إيه خلاص.

طيب، قبل ما نعدي دي عشان ده مش درس في الرحمة والرجاء وكده بس لازم أقول الكلمتين دول، إنه معنى كده أن كلنا في النار! ما هو إحنا لو هنتحاسب على مثقال الذرة كلنا في النار، صح اللي أنا بقوله ده؟ أيوه يا جماعة صح، لو تحاسبنا هذا الحساب فكلنا هلكى، أيوه صح، طب إحنا كلنا هلكى؟ لا، ليه؟ لأن الله عز وجل سيعاملنا بفضله، ولو عاملنا بالعدل لهلكنا، ده إحنا، لا مش إحنا ده الأولياء بس، لا مش بس ده الصحابة بس، لا ده النبي عليه الصلاة والسلام: «لن يدخل أحد منكم الجنة بعمله». قال: ولا أنت؟ قال: «ولا أنا، إلا أن يتغمدني الله برحمة منه».

خلاص، بس ده مش درس رحمة ولا درس رجاء، دلوقتي إحنا بنتكلم في المحاسبة، يبقى دي قواعد حساب يوم القيامة هتعينك وأنت بتحط خطة محاسبتك لنفسك في الدنيا. يلا نقولهم بسرعة:

أول قاعدة: ﴿أَحْصَاهُ اللَّهُ وَنَسُوهُ﴾ [المجادلة: 6]؛ أسقطها على الدنيا، إنك تخلي المده اللي بتحاسب نفسك فيها مده صغيرة، ما تجيش تقول لنفسك أنا هحاسب نفسي يوم الجمعة على الأسبوع. ﴿أَحْصَاهُ اللَّهُ وَنَسُوهُ﴾؛ المده اللي حطها بعض العلماء كالغزالي مثلاً في الإحياء قال المده 24 ساعة، وهنيجي ليها بعد شوية إن شاء الله، لأننا هنقول عشان المحاسبة دي لازم يسبقها حاجات؛ هيسبقها حاجة اسمها مشارطة، ثم مراقبة، ثم محاسبة، ثم معاتبة ومعاقبة. فعاوزين نفصل في الحتة دي فهنيجي نقول لك وقتها بعد شوية: المشارطة أول النهار، صحيت الصبح كده بتدعك عينك هتشارط نفسك، والمحاسبة آخر اليوم قبل ما تنام. خلاص هنجيلها بعد شوية إن شاء الله. طيب، يبقى ﴿أَحْصَاهُ اللَّهُ وَنَسُوهُ﴾ لازم لها إسقاط على محاسبتك لنفسك في الدنيا، هنقلل مده المحاسبة.

ثم: ﴿وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا﴾ [الأنبياء: 47]، ومعاها: ﴿فَمَن يَعْمَلْ مِثْقَالَ ذَرَّةٍ خَيْرًا يَرَهُ * وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ [الزلزلة: 7-8]، دول إسقاطهم إيه في الدنيا؟ إنك هتحاول تحاسب نفسك على الصغير والكبير. مش هتعرف توصل لمثقال الذرة مستحيل، لكن هاجي أقول لك مش هتحاسب نفسك على العادة السرية ولا على الموقع الإباحي، لا لا لا، هتحاسب نفسك على النظرة اللي نظرتها لوجه امرأة محجبة لابسة لبس واسع، وأطلت النظر إلى وجهها. إيه ده؟ هو أنا لما أبص لوشها؟ آه، أنت تبص لوشها ليه؟ بتاع إيه؟ اشتهيت حرام قولاً واحداً، طب ما اشتهيتش وأطلت النظرة بلا داعي، ما فيش مصلحة ولا حاجة ولا ضرورة أن تنظر لوجه هذه المرأة، تأثم في قول كثير من أهل العلم. فأنا هاجي أقول لك هتحاسب نفسك على النظرة دي، مش على اللابسة ضيق، مش على اللي في موقع إباحي، مش على عادة سرية، أنا هقول لك هتحاسب نفسك على النظرة دي، ليه؟ أصلك هتتحاسب عليها، فما حاسبتش نفسك هنا هتحاسب عليها هناك.

مش هاجي أقول لك هتحاسب نفسك على الزقة اللي زقتها لأمك، لا ده أنت هتحاسب نفسك على أن لما أمك نادت لك وأنت جوه في الأوضة قلت: "يوه"، وهي ما سمعتش، بس قلت كده، فهتحاسب نفسك على دي. ما أصل القرآن في المسألة دي ما سابهاش كده، قال لك: ﴿فَلَا تَقُل لَّهُمَا أُفٍّ﴾ [الإسراء: 23]. أوعى من وش يا ولية أنت، القرآن قال ما تقولش كده، ﴿فَلَا تَقُل لَّهُمَا أُفٍّ﴾، حرفين. فهقول لك لما بنقول لك بقى أنت هتحاسب نفسك، منزلة المحاسبة ابتديت تتصور دلوقتي أنا المفروض أحاسب نفسي على إيه، خلاص ده في باب المعاصي.

قل مثل ذلك في باب الطاعات، يعني إيه؟ يعني هتيجي في آخر اليوم مش هقول لك حاسب نفسك على الفرائض؛ آه أنت هتحاسب نفسك على الفرائض، بس هقول لك طب ما تحط في محاسبتك طالما بقى مثقال الذر، ما هو يا جماعة الآية ما قالتش: ﴿وَمَن يَعْمَلْ مِثْقَالَ ذَرَّةٍ شَرًّا يَرَهُ﴾ بس، لا في حاجة تانية: ﴿وَمَن يَعْمَلْ مِثْقَالَ ذَرَّةٍ خَيْرًا يَرَهُ﴾. فزي ما بقول لك بخوفك إنك تبعد عن الحرام وإن دق وإن قل، فبرضه بحمسك وبرجيك إنك تفعل ما تستطيعه من الخير. فتجي تحاسب نفسك كده آخر اليوم على مثلاً النفس اللي ما ذكرتش فيه ربنا، ده مش من باب التيئيس لا من باب ده أنا كنت أقدر آخد دي وما أخدتهاش، طب ما أنا عادي، ما كده أنا رايح المشوار، كده كده أنا نازل في الأسانسير أو نازل على السلم، كده كده طالع في الأسانسير أو طالع على السلم، كده كده بعمل ده، فايه المشكلة يبقى في إيدي السبحة في إيدي العداد وأنا نازل وأنا طالع وأنا رايح وأنا جاي؟ ذكر شغال، ذكر مش مركز في حاجة، ما طلبتش منك تركز في كل يومك في الذكر، بس: «لا يزال لسانك رطباً من ذكر الله». ده كلام مين ده؟ كلام سيدنا النبي عليه الصلاة والسلام، قالوا إمتى؟ لما قال له: إن شرائع الإسلام تكاثرت علي، فدلني على عمل أتشبث به، أمسك فيه بإيديا وأسناني. فقال له: «لا يزال لسانك رطباً من ذكر الله».

طيب، أنت ليه بتعمل كده؟ أصل أنا آخر اليوم هاجي أحاسب نفسي على الدقيقتين والثلاثة والربع ساعة اللي ما ذكرتش فيهم، ليه مش من باب التيئيس تاني، مش من باب إني بقى أقنط نفسي إن أنا مش فالح خالص، ما بقولش كده أنت مش فالح، كمان كلنا مش فالحين إلا برحمته سبحانه وتعالى. مين هنا فالح يرفع إيده؟ اللي شايف نفسه فالح يطلع بره، يعني مش محتاج الدرس أقصد يعني يطلع بره خلاص ماشي.

فيبقى ده الإسقاط بتاع المحاسبة. نبدأ الدرس بقى شوف المحاسبة، قال صاحب المنازل: "وإنما يسلك طريق المحاسبة بعد العزيمة على عقد التوبة". إيه ده؟ نرجع تاني بقى، إحنا قلنا المحاسبة المنزلة الثالثة بعد منزلة إيه؟ التوبة. ليه؟ لقينا حاجة عجيبة جداً إن المحاسبة قبل التوبة وبعد العزم على التوبة، ركزوا بقى يا شباب عشان المسألة دي دقيقة، وبعض شراح المنازل.. بلاش المسألة دي دقيقة ماشي. هنا ماذا قال صاحب المنازل عشان نفهم كلام صاحب المنازل كما أراد صاحب المنازل، هنا صاحب المنازل ما قالش وإنما يسلك طريق المحاسبة بعد التوبة، ما قالش كده، قال: "وإنما يسلك طريق المحاسبة بعد العزيمة على عقد التوبة". يبقى كأننا لو عاوزين نفصص المسألة عندنا حاجة اسمها عزيمة على عقد توبة بعدها محاسبة بعدها توبة. تعالوا بقى نفهم الحتة دي كده ونفصصها عشان نقتنع بالكلام؛ أوله المنازل كانت إيه؟ اليقظة فاكرين، ليه اليقظة أول المنازل؟ عشان إحنا الأول هو الكتاب اسمه منازل السائرين، مش كده؟ يعني حضرتك هتمشي، هتمشي تروح لمين؟ لربنا، ﴿إِنِّي ذَاهِبٌ إِلَىٰ رَبِّي﴾ [الصافات: 99]. طيب حضرتك نايم في العسل، النوم في العسل ده اللي هو الغفلة، واحد عنده 20 سنة، 30 سنة طول الـ30 سنة نايم في العسل، اللي نايم ده عشان يمشي أول حاجة بيعملها إيه؟ بيصحى مش كده؟ ولا بيمشي وهو نايم؟ بيصحى. كذلك من في الغفلة يريد أن يسير إلى الله أول حاجة بيعملها يستيقظ، ولذلك كانت أول المنازل اليقظة.

طب اليقظة دي أول ما استيقظ، فقلنا له يا حبيبي أنت كنت نايم 30 سنة في العسل، وقعدنا نخوفه من ربنا ونقول له هتتحاسب والكلام بقى اللي أنتوا شطار فيه ده، فهيُقوم من جواه كده هيقول طب أعمل إيه؟ نقول له توب لربنا، فهيبتدي يبقى جواه العزيمة على أنه يتوب، صح كده؟ يجي السؤال البديهي: ليه ده واحد مش عارف أي حاجة لسه صاحي، يقول أتوب من إيه؟ إيه اللي محتاج أتوب منه؟ فنقول له آه، هنا هو كده عقد العزم على التوبة بس محتاج يعرف يتوب من إيه، فنقول له تعال بقى حاسب نفسك على اللي فات عشان تعرف تتوب من إيه، فتظهر هنا المحاسبة، وبعد ما حاسب نفسه تظهر بعدها التوبة. فهمتوا الترتيب ده؟ قال صاحب المنازل: "وإنما يسلك طريق المحاسبة بعد العزيمة على عقد التوبة". وعشان هنا عشان كده جابها الثالثة، وإن كانت هي مش التانية برضه، هي كانت المنزلة التانية اللي هي التوبة دي مقسومة كده حتتين: هتعقد العزم على التوبة، ثم تحاسب نفسك، ثم تتوب إلى الله عز وجل.

قال: "والمحاسبة لها ثلاثة أركان"، في بعض نسخ المنازل "والعزيمة لها ثلاثة أركان"، خلينا ماشيين على القول بأن المحاسبة لأننا في منزلة المحاسبة، وطبعاً التوبة إحنا أخدناها في درسين فيعني أسهبنا فيها بقى بعزيمتها بكل شيء. قال: "والمحاسبة لها ثلاثة أركان، أحدها: أن تقيس بين نعمته وجنايتك". أيوه تعالوا بقى نركز عشان نبتدي محاسبة صح. قال لك عاوز تحاسب نفسك في ثلاث أركان لازم تحرزهم عشان تعرف تحاسب نفسك، إيه هم؟ قال لك أول هذه الأركان أن تقيس بين النعمة والجناية، عشان تعرف تحاسب نفسك صح، تقيس بين النعمة والجناية يعني إيه؟ يعني حضرتك هتقعد تحاسب نفسك، فأول حاجة ترى نعم الله عز وجل عليك، ثم ترى جنايتك في حق الله عز وجل، ومن هنا نبدأ المحاسبة. يعني إيه؟ يعني حضرتك هتقعد دلوقتي تحاسب تقول إيه؟ هو سبحانه وتعالى مَنَّ علي بكذا وكذا وكذا، وبعدين قابلت تلك النعم بكذا وكذا وكذا بالمصايب بتاعتك، فانت كده بتعمل إيه؟ بتحاسب نفسك، ابتديت تحاسب نفسك أهو.

طيب ناخد مثال عشان نفهم، يعني أنا أعمل إيه يعني؟ أديني تطبيقات عملية، يعني هتيجي في آخر اليوم لأن هنقول لك المحاسبة آخر اليوم. خلينا نبتدي دلوقتي، قبل ما نخش في المحاسبة يا جماعة عشان نعرف نحاسب أنفسنا صح، فإحنا عندنا حاجة اسمها النفس وحاجة اسمها العقل، نفس وعقل، النفس تدعوك لشهواتها، والعقل يمنع من ذلك. أنتوا عارفين العقل تسمى عقل ليه؟ عشان بيعقلك، بيعقلك يعني بيربطك، ده معنى العقل. عارفين العقال بتاع الخلايجة؟ العقال ليه تسمى عقال؟ علشان بيربط بيحكم الغترة دي ما تقعش فتسمى عقال. وفي الحديث: «اعقلها»، يعني إيه اعقلها؟ اربطها، يعني الناقة ما تبقى معاك ناقة ولا بتاع اربطها، خد بالأسباب وتوكل على الله بس خد بالأسباب، اعقلها اربطها وتوكل. فلماذا سمي العقل عقلاً؟ عشان كده. يبقى عندك تاني نرجع بقى عندك نفس تدعوك إلى الشهوات، نفسك عاوزة منك كده، عاوزة منك تاكل ليه؟ عشان ليها شهوة في الأكل، تفجر وتزني ليه؟ عشان ليها شهوة في ده، تنفذ غضبك ليه؟ عشان ليها شهوة في حب الرفعة والانتصار وكل دي شهوة، فاللي بتدعوك ليه النفس يجي العقل يقول لك إيه: اعقل، شوف، اعقل أنت رايح فين؟ ده العقل، لو عملت كده يا ابني في نار، لو عملت كده الناس هتكرهك، لو عملت كده صحتك هتدمر، كل ده العقل اللي بيعمله مش النفس.

خلاص، طيب إحنا بقى محتاجين نقعد كده النفس والعقل يعملوا إيه؟ يكتبوا اتفاق بينهم، إمتى؟ كل يوم الصبح، على الله كده صحيت فرجت عينيك أول ما تصحى، هات العقل وهات النفس ويعملوا حاجة اسمها المشارطة. إيه المشارطة؟ دلوقتي إحنا هنيجي آخر اليوم هنتحاسب على إيه؟ على إيه هنتحاسب على إيه آخر اليوم؟ خدوا بقى قاعدة نبوية، إحنا خدنا قواعد في حساب يوم القيامة وعملنا لها إسقاطات على محاسبتك لنفسك في الدنيا، خدوا قاعدة نبوية مهمة جداً هنا في المشارطة، اللي هو وأنت قاعد تكتب العقد دلوقتي بين العقل والنفس عشان نعرف هحاسبك على إيه آخر اليوم، عندك قاعدة نبوية خطيرة جداً قال صلى الله عليه وسلم: «ما أمرتكم به فأتوا منه ما استطعتم، وما نهيتكم عنه فاجتنبوه». آه، دي نعملها إزاي يعني في المشارطة؟ يعني العقل كده على الله كل يوم الصبح: بص يا بنت الحلال مافيش معصية هتحصل طول اليوم، مافيش. طب هو حد؟ ما هو إحنا لو عملنا ده كل يوم يبقى إحنا هنقعد طول حياتنا ما بنقعش، حد هيعرف يعمل ده؟ برضه صفر. طب يبقى ما نشترطوش؟ لا ما ينفعش، لازم كل يوم الصبح عقلك يقول لنفسك مافيش النهاردة معصية. طب ما أنا هقع في معصية، تتوبي فورا فورا، ما ينفعش أجل التوبة، ليه ما ينفعش أجل التوبة؟

مش هبقى هنا، بس في درسين توبة اسمعوهم مهمين جداً جداً جداً. في 30 ثانية ما ينفعش تأخر التوبة يا ابن الحلال، لأنك ما تضمنش إنك يمهلك الرب عز وجل إلى أن تتوب، ما تضمنش دي أول حاجة، تاني حاجة هتنسى. طب ما أنسى وبعد كده هبقى أتوب بعدين بقى توبة عامة؟ الخطورة فين؟ مين شاطر؟ أيوه، إن بعض العلماء، شوفوا الخطورة اللي إحنا فيها يا جماعة، والله العظيم أمر خطير جداً، بعض العلماء يقول بعدم إجزاء التوبة العامة أصلاً، يعني واحد قال إيه: أنا بتوب لربنا من كل حاجة، بعض العلماء يقول لك التوبة دي ما تنفعش، لازم تتذكر الذنب وتتوب منه توبة خاصة. فانت ليه تحط، ليه تزنقنا؟ يعني اللي صحي من النوم ده بعد 30 سنة و40 سنة نقول له رحمة ربنا واسعة توب التوبة العامة، لأنه مستحيل يفتكر كل حاجة، ونقول له لو افتكرت وأنت قاعد ذنب معين تب منه برضه في ساعتها. إنما في اللي جاي زانق نفسك ليه؟ تنسى وترجع تتوب توبة عامة، ليه زانق نفسك؟ واسمعوا درس التوبة بقى.

طيب، يبقى على الله كده كل يوم الصبح، العقل تقول للنفس: أيتها النفس مش هتقع في معصية طول اليوم، ليه؟ أصل ده كلام النبي عليه الصلاة والسلام، "وما نهيتكم عنه فاجتنبوه" كله. خلاص. طيب، وفي الطاعة؟ الواجبات هتعمليها كلها، ليه؟ لأن في نهي إنك تترك الواجبات، فيبقى نفس القضية فاجتنبوا ترك الواجبات. والنوافل أيتها النفس هتأتي منها ما استطعتي، يبقى ده الشرط أو المشارطة أول النهار. طيب، النوافل اللي هتأتي منها ما استطعت دي في المطلق، أنا بقول لكم لو عملتوا كده ما فيش حد هينجح في المحاسبة، لازم تحط لنفسك إيه حاجات تتحاسب عليها، يعني إيه؟ يعني الفرائض خلاص هنجيب الفرائض، والنوافل هنجيب النوافل اللي هي النوافل.

الذكر مثلاً؛ فأنت ستضع مثلاً واحداً سيقول: «أنا سأجيب 300 مرة صلاة على النبي في اليوم -عليه الصلاة والسلام-». اكتب هذا، اشترط، اكتب هذه المشارطة، اكتبها؛ هذا عقد. هل يعرف أحد منكم جدول المحاسبة؟ هل رأى أحد بعينه شيئاً اسمه جدول المحاسبة من قبل في الدين؟ ليس جدول المحاسبة في البيزنس، بل في الدين. لا أحد؟ طيب، أصل هذا معناه أن لا أحد يحاسب نفسه، فعشان كده؛ طيب، جدول المحاسبة مهم جداً، لازم تراه وتفهم ما هو جدول المحاسبة. الموقع الذي على السايت -ليس الفيسبوك ولا يوتيوب، السايت- فيه جدول محاسبة، فادخلوا على السايت وسيساعدكم إن شاء الله في ضبط يومكم.

وفي إن شاء الله بعد كده نحن سنعمل جدول المحاسبة هذا ثلاث مراحل: المرحلة الموجودة الآن، وهي المرحلة التي المفروض كل المسلمين يعملوها؛ ادخلوه وستشوفوه إن شاء الله. وبعدين سيكون هناك مرحلة متقدمة، ومرحلة للناس المنتهية؛ سنزود لهم الأوراد، وسنزود لهم قراءة القرآن، كل شيء تزيد فيه إن شاء الله. فلازم تشوف بعينك جدول المحاسبة، وتعمل «صح» أمام كل شيء تفعله. فمثلاً تكون كاتباً فيه صلاة الفجر، مثلاً واحد كاتب هكذا «صح»، يعني أنا صليت الفجر. طب واحد لا، ليس كاتباً هكذا، هو كاتب صلاة الفجر في المسجد. أنا سآخذ تفصيلة واحدة يا جماعة عشان نفهم نحن ممكن نوصل لفين في المحاسبة في شيء واحد؛ فلو لم يصلِّ في المسجد ستكون خطأ.

واحد ثاني قال: لا لا، أنا صلاة الفجر في الصف الأول. خذوا بالكم نحن هكذا دخلنا في: «فاتقوا الله ما استطعتم»؛ يعني لو واحد وقف في الصف الثاني هل هو حرام؟ لا، ليس حراماً، لا نقول إنه حرام في الصف الثاني، ولو واحد جاء في الركعة الثانية في الفجر، هل هو حرام؟ لا، ليس حراماً. لكن هو الآن ابتدأ في محاسبته لنفسه والقاعدة النبوية أمامه: «فاتقوا الله ما استطعتم». فصاحبنا الذي في الأول قال: «أنا سأصلي الفجر في وقته، لن أؤجله للشروق»، وواحد قال: «لا لا، أنا سأصلي في المسجد»، وواحد ثاني: «لا، أنا سأصلي في الصف الأول»، ورابع قال: «لا، المؤذن لن يؤذن إلا وأنا في بيت الله؛ الراجل لن يقول الله أكبر الله أكبر إلا وأنا في الجامع أصلاً». شوفوا يا جماعة الدرجات، هذا كله ونحن نتكلم في صلاة الفجر، التي هي وأنت لسه صاحٍ من النوم.

ممكن بقى واحد رابع يقول لك: «صلاة فجر إيه؟ لا، أنا بصحى الساعة 3»، دخلنا في بند جديد غير صلاة الفجر، سنسميه قيام الليل. وقيام الليل بقى نحن دخلنا فيه، سنلاقي تفاصيل أكثر؛ نحن في صلاة الفجر شوفوا كم تفصيلة، مفهوم يا شباب؟ واحد نرجع لصلاة الفجر ثاني، قال لك: «لا، أنا سأضع بنداً جديداً في صلاة الفجر اسمه الخشوع في الصلاة»، الذي هو التحدي الذي الناس زهقت من كثر ما أعمله مع الشباب؛ أقول لهم: نحن صلينا العشاء، مش هقول لكم الإمام قرأ إيه، لا لا، سأقول لك: أنت لسانك وفمك هذا تحرك في السجدة الثانية في الركعة الثالثة؟ دعيت بإيه؟ أنت هذا فمك، أنت الذي تحركت، فنسبة كم التي ستعرف ترد على هذا السؤال؟ نسبة قليلة جداً؛ السجدة الثانية في الركعة الثالثة دعيت بإيه حضرتك؟ هذا معناه أن عندنا إشكال في الخشوع، عندنا إشكال في الخشوع. ولو كنا في صلاة سرية كنت سأتحداك في قراءتك أنت، أقول لك: أنت قرأت بإيه الركعة الثانية؟ والله يا جماعة الناس لا تعرف، نبقى لسه مخلصين صلاة عصر ولا صلاة ظهر أقول له: أنت فمك تحرك قال إيه في الركعة الثانية؟ ما يكون عارف.

طيب صلاة مثل هذه لو عاملنا الله بعدله، تبقى في أي كفة؛ حسنات ولا سيئات؟ سيئات، قولاً واحداً سيئات. أنت واقف قدام ملك من ملوك الدنيا ومش مركز معه، هل سيجيب وزير المالية يقول له: أعطه جائزة؟ ولا سيجيب مسرور؟ عارفين مسرور ولا صغيرين أنتم؟ ما لحقتوش ألف ليلة وليلة أنتم صح؟ مسرور هذا السياف، سيجيب مسرور يقطع.. طبعاً هو اسمه حلو، أنت تفتكر بقى مسرور سيجيء يبسطنا ويعمل لنا أشياء حلوة، هو سيبسطنا نحن؟ أنت ستموت، هو سيبسطنا نحن أنك تموت! فهذه في ميزان سيئاتك، هذا لو عملنا بالعدل، ونرجو فضله سبحانه وتعالى، ونرجو رحمته، ونسأله رحمته سبحانه وتعالى، قولوا آمين.

فأنت بقى ستقول: لا، ما أنا مش هينفع، أنا سأفضل هكذا، سأفضل لا أعرف أنا بسجد بقول إيه وبصلي بقول إيه، وأجيء يوم القيامة ألعب قمار رهان، دي هتنفع ولا مش هتنفع؟ لا، ده أنا سأدخل بنداً ثاني -نحن لسه في الفجر- اسمه الخشوع. طب يا جماعة هو أنا أقول للناس كلها تعمل كذا؟ أنا لا أقول للناس كلها تعمل كذا، أنا أعطيكم فكرة عن يعني إيه محاسبة، وأعطيكم فكرة أن هناك أناساً يحاسبون أنفسهم على إيه. طب أنا أعمل هذا؟ أنت عقدتني! لا أقول لك اعمل هذا، بس أقول لك ابتدِ محاسبة؛ مش هتنفع غير لما تبتدي محاسبة. طب أساعدك إزاي؟ أقول لك في شيء اسمه جدول محاسبة، نزله من على النت ماشي، جدول محاسبة للمبتدئين؛ ادخل على السايت الخاص بي على النت ستجده، وستجده سهلاً عليك؛ ليه؟ لأنك تضغط وتسيب السايت يعمل لك إيه، يجيب لك نسبتك أوتوماتيك آخر اليوم وآخر الأسبوع، ووقت الذكر يطلع لك الذكر قدامك تقرأه، فسيُسهّل عليك الدنيا.

طيب، يبقى مشارطة، أوله الأمر مشارطة؛ مشارطة التي هي العقد الذي سيأتي لك في الآخر يقول لك حاسب نفسك عليه، شوف أنت عملت منه إيه. مشارطة، العقد هذا بين من ومن؟ عقل ونفس. حطينا شروطنا؟ آه حطينا شروطنا، تأتي مرحلة ثانية اسمها المراقبة. المراقبة يعني إيه المراقبة؟ حطينا الشروط وأنت أثناء اليوم عقلك عمال يراقب نفسك؛ هي ماشية على الشروط ولا مش ماشية على الشروط؟ ليه؟ عشان لو حصل أي حيود يلحقها، ارجع للشروط ثاني. يعني الفجر أذن، وأنت الذي واضع لنفسك -مش أنا- أنك ستحاسب نفسك على إني سأصلي الفجر في المسجد، ما مش حاطط نفسك في صف أول خالص، بس في المسجد مثلاً، فانت واضع شرطاً لنفسك هذا اهو، وستحاسب نفسك عليه. فجاء الفجر يؤذن وأنت نائم قبل الفجر بساعة عشان سهران مش عارف بتعمل إيه، فالمنبه ضرب فرحت المنبه ونفسك، ها الشهوة أهي، شهوة الكسل والراحة والدعة، نفس: «نام نام نام نام». يقوم عقلك يذكرها بالعقد: «نحن ماضين عقداً، قم صلي الفجر». هذا اسمه إيه؟ مراقبة طول ما أنت ماشي بقى في اليوم.

طيب وأنت ماشي سمعت بنت وراء بتضحك ولا صوتها بتتكلم في التليفون -مش لازم تضحك يعني مايص، لا بتتكلم في التليفون- فنفسك تدعوك إلى أنك تنظر، فعقلك يذكر نفسك بالشرط: «نحن شرطين مش أنا، نحن متفقين أيتها النفس هتروحي النار، نحن متفقين، قعدت وأقنعتك أنك لو لم تفعلي كذا ستدخلي النار، واللي مش هتحاسبي نفسك عليه دلوقتي ستحاسبي عليه يوم القيامة، فأنت اتفقتي معي أيتها النفس أن ما فيش معاصي، ففوقي». مراقبة. طب المرة هذه العقل نجح أنه يصد النفس، المرة الثانية لا، نظرت؛ فبرضه مراقبة حقيقية: «أيتها النفس توبي بسرعة». هذا بنعمله ليه؟ عشان هنيجي في آخر اليوم هنعمل المحاسبة.

أنت يومك بقى كان شكله إيه؟ ليه بنقول هذا، اللي هو إيه المحاسبة، الذي هو في الآخر ورقة جدول المحاسبة الخاصة بك اليوم؟ ليه ليه؟ لأن الورقة هذه هي ورقة من صحيفتك يوم القيامة. هو يا جماعة يوم القيامة والصحائف ستطير، «فَأَمَّا مَنْ أُوتِيَ كِتَابَهُ بِيَمِينِهِ»، و«أَمَّا مَنْ أُوتِيَ كِتَابَهُ بِشِمَالِهِ»، والقصة والحدوتة هذه كلها، تلك الصحائف من كتبها؟ أنت، من أملاها؟ أنت، صح ولا لا؟ يعني يوم القيامة الصحائف هذه لما تمسك الصحيفة وتفتحها ستلاقي إيه؟ ستلاقي أعمالك التي هي عبارة عن إيه؟ عبارة عن ورق، كل ورقة هي خلاصة اليوم. يعني ورقة اليوم ستلاقيها في صحيفتك، ورقة بكرة ستلاقيها في صحيفتك. يعني جدول المحاسبة الذي حضرتك عملته هذا ستلاقيه في صحيفتك يوم القيامة. بس هو لا مش بس هو، ليه؟ لأن حساب يوم القيامة على مثقال الذرة، فمن يستطيع في الدنيا؟ ما حدش سيستطيع يقيسنا خلاص.

أمال نحن بنعمل إيه بالذي بنعمله هذا كله؟ نحن بنتعرض لرحمات الله عز وجل أن ربنا ينظر إلينا فيرانا نجاهد أنفسنا فيرحمنا. «يا رب والله أنا عملت الذي أستطيع عليه»، فيرحمنا بقى خلاص. بالضبط يا جماعة عشان نفهم نحن بنعمل إيه، عشان نفهم نحن بنعمل إيه لما نحس أو أي شيء في الدنيا أنت بتعمله مع ربنا، هو بالضبط أن ملكاً عنده اثنان من العبيد، أعطى الاثنين نفس الأمر، أعطى الاثنين نفس الأمر، الذي هو إيه؟ تعالوا نتخيل -وهذا المثال الذي سأقوله خطأ، الله «لَا يُكَلِّفُ اللَّهُ نَفْسًا إِلَّا وُسْعَهَا» بس أنا سأعطي مثالاً بعيداً جداً عشان نفهم- الملك هذا قال للاثنين العبيد هذين: أنت روح على العمود هذا زقه لي، وأنت روح على العمود هذا زقه لي.

بدايةً هكذا قبل ما الاثنين، أول ما أخذوا الأمر الاثنين وقع في ذهنهم أن هذا مستحيل، صح ولا لا؟ راح العبد الأول قعد يقاوح أو قعد على جنب كده وما راحش أصلاً العمود لأنه شايف أنه مستحيل يُزق، والعبد الثاني راح للعمود وقعد يزق في العمود ويعرق وبظهره وبجنبه وهو من الأول عارف أنه لن يزق، ونظر الملك إلى العبدين، هيعامل هذا مثل هذا؟ المثال هذا خطأ، الله عز وجل لا يكلف نفساً إلا وسعها، لكن أنا أقول لك إيه: أنت جاءك إحساس باليأس، جاءك هذا، قول: «أنا سأفعل إيه؟ أنا سأزق العمود»، طب يا ابني ما أنت عارف أنه لن يزق؟ «ماليش دعوة، أنا سأزق العمود، وسأعرق وسأتعب وسأنهج في زق العمود»، ليه؟ عشان لما ربنا ينظر إلي فيراني أجاهد في زق العمود يرحمني. بس هذا الذي نحن عاوزينه يا جماعة، «ألا إن لربكم في أيام دهركم نفحات ألا فتعرضوا لها»، تعرض للرحمة بأنك تكون في زمرة المرحومين. هم المرحومون هؤلاء الذين قعدوا ولا الذين راحوا زقوا العمدان؟ الذين راحوا زقوا العمدان، فكن في زمرتهم.

يبقى مشارطة، مراقبة، محاسبة. محاسبة على إيه؟ هات بقى جدول اليوم كده بتاعك؛ عملت إيه؟ تضغط على كم صلاة أنك عملتها صح، وعملت «صح» على كم نافلة، وعملت «صح» على كم ورد؟ ولا ده في مربعات فاضية ما عملتش عليها «صح» اليوم؟ طب ليه ما عملتش عليها «صح»؟ طب أعمل إيه آخر اليوم عشان أتدارك هذا؟ ما أنا لن أنام وأنا غير متدارك، ففي أشياء ستتداركها بالتوبة لو معاصي، وفي أشياء ستتداركها بأني أُكثر من النوافل، وهكذا. خلاص، هذه اسمها إيه التي في آخر اليوم؟ هذه محاسبة. ثم يأتي بعد المحاسبة معاتبة ومعاقبة، مش هنتكلم، نحن كل هذا كنا بنشرح المشارطة والمراقبة عشان تصل للمحاسبة. لكن قالوا بعد ذلك في إيه؟ معاتبة، تقعد بقى تعاتب نفسك وتُفوقها، يعني إيه: «أيتها النفس، إيه رايحة فين؟ رايحة فين بينا؟ لو هذه ورقة من صحيفتك، هتدخلك فين هذه؟ فوقي، أفيقي نفسك، أنت في المهلة». معاتبة.

وقد نذهب للمعاقبة، زي واحد من السلف قال إيه؟ قال لنفسه هكذا: «تتكلمين فيما لا يعنيكِ؟ لأعاقبنكِ بصوم سنة». إيه رأيكم في العقاب؟ هو يتكلم كلمة لا تعنيه قوي، يعني الجو اليوم حر، أنت مالك؟ كلمة ما تعنيك في شيء، هذه ما تعنيك، الفريق الفلاني كسب الفريق الفلاني، أنت مالك؟ ما تعنيك في شيء، هذا ليس حراماً، مشغلش ده، حرام، ها. فهو بس بيراقب نفسه بقى ويحاسب نفسه على إيه، هذه درجة عالية، أولياء بقى هؤلاء، «تتكلمين فيما لا يعنيكِ لأعاقبنكِ بصوم سنة»، صيام ليه؟ عشان تحرمي تتكلمي في شيء لا يعنيكِ.

قال: المحاسبة لها ثلاثة أركان، أحدها أن تقيس بين نعمته وجنايتك. نحن لسه في أول ركن، يبقى تقعد هكذا تقول لنفسك: أعطاني نعمة البصر، اهي نعمة اهي، فرطت، باصص بها للمواقع الإباحية، رحت باصص بها للأغاني والأفلام والمسلسلات، رحت باصص بها للفيس والإنستغرام، ساعتين ثلاثة خمسة عشر في اليوم، بلا حرام يعني؛ نحن خلاص خلصنا الحرام بس هو أعطاني نعمة فأخذتها استخدمتها في ولا شيء. هنا نحن بنعمل إيه بقى؟ بنقيس بين النعمة والجناية؛ يبقى نعمة عليك نازلة، وجنايتك إليه صاعدة، وقل مثل ذلك في كل نعمة. ولما نقول نعمة يا شباب ركزوا معي، مش بس النعم الدنيوية، ستقعد تحاسب نفسك على النعم الدينية، يعني إيه؟ يعني من الذي أتى بك إلى المسجد للصلاة ولا أنت الذي جدع؟ ما لو أنت الذي جدع، ما تفوّت فرداً في الجدع، لو أنت الذي جدع ولا هو الذي يجيبك؟ هو الذي يجيبك، طقطق رأسك يا ابني، هو الذي يجيبك. أي شيء جميل تراه منه وأي شيء زفت من حضرتك وحضرتي؛ فهنقيس بين النعمة والجناية. يبقى أتى بي إلى المسجد عشان أصلي العشاء، وبعدين وقفت أتململ ليه من الزحمة، من الحر؟ أصل الشيخ طوّل.

وقفت سرحت، وقفت ما خشعتش؛ يبقى نعمة منه أن أتى بك إلى المسجد، وبعدين جناية منك أنك لم تعظم الصلاة حق عظمتها، فسرحت وما خشعتش. تقعد بقى تقايس كده بين النعمة والجناية.

دي مش هينفع نطول فيها؛ ارجعوا لها في التوبة، اتكلمنا عنها كتير جدا جدا، بس بنفهمها هنا. طيب دي مفيدة في المحاسبة؟ آه، ليه مفيدة في المحاسبة؟ عشان ما تيجي كده آخر اليوم أو بعد الصلاة -أو شوف هتعمل فترات محاسبتك قد إيه- تبقى فاهم أنت فين. أصل يا جماعة إحنا نيجي بعد شوية المصيبة، أنت بتبقى فاكر إنك هنا، وأنت لما تحاسب نفسك بقى بجد وتشوف الأركان، تلاقي نفسك لا، ده أنت تحت قوي.

طيب، يبقى أن تقيس بين النعمة والجناية، وهذا يشق على من ليس له ثلاثة أشياء. هنقول لك: يلا قيس بالنعمة والجناية، تقول: اللي هو إزاي يعني؟ عامل إيه؟ نقول لك: ما أنت مش هتعرف تقيس إلا بثلاث حاجات؛ أول حاجة نور الحكمة. نور الحكمة، هذا النور الذي يقذفه الله عز وجل في قلوب أتباع الأنبياء. طيب نور الحكمة ده اللي هو العلم، هيعرفك إيه؟ هيعرفك مثلاً الكلمتين اللي قايلهم من شوية، اللي هو قبل ما تسمعهم كنت ممكن ما تبقاش عارفهم. قلت لك إن إتيانك للمسجد يا ابني منه مش منك، أمال إيه اللي منك؟ اللي منك المصايب اللي عملتها لما جيت المسجد؛ إنك سرحت في الصلاة، إنك زهقت من الصلاة، إنك كان نفسك الإمام يخلص، ده اللي منك؛ فده نور الحكمة.

نرجع ورا شوية، إنك أصلاً ما كنتش عارف إن المفروض أحاسب نفسي على وقوف الصف الأول -ده على سبيل الاستحباب يعني- ما كنتش عارف إني المفروض أحاسب نفسي على تكبيرة الإحرام، إن المفروض أحاسب نفسي على إن الراجل ما يأذنش غير هنا في الجامع. عرفت؛ فابتديت تنور عندي أحاسب نفسي على إيه، عرفتوه منين؟ من نور الحكمة من العلم.

ولو دخلنا في تفاصيل يومنا مش هنخلص، مش هيبقى درس واحد. بالمناسبة يا جماعة أنا جاي النهاردة الدرس وعامل حسابي -متفاهم جداً إن كنت متخيل الدرس هيخلص في نص ساعة- أنا مدي له الوقت ده، فاللي بيحصل ده كله ده رزقكم ببركة حد فينا صالح قاعد، مش عشان عملت كده لا، يعني حد قاعد، أنا ضهري بيوجعني، حد صالح قاعد فهي بقى بركة بقى الكلام بيطلع. إحنا أخذنا مثال صلاة الفجر بس ما دخلناش في الذكر اللي بعد الصلاة، وهتقوله إزاي وأنت فين، وفي ذكر معين بعد الصلاة ليه هيئة معينة؛ تفاصيل هنعرفها منين دي؟ نور الحكمة علم، اتعلم دين.

والثاني: سوء الظن بالنفس. يبقى إحنا عشان نعمل أول ركن من أركان المحاسبة اللي هي المقايسة بين النعمة والجناية: أول حاجة تعلم، ثاني حاجة تسيء الظن بنفسك؛ أن تسيء الظن بنفسك، أن نفسك هي مستقر كل شر. لأنك لو أحسنت الظن بنفسك يا ابن الحلال، هتيجي ترجع بقى يلا نشوف الركن اللي هو المقايسة بين النعمة والجناية، أنت أصلاً شايف نفسك إنك اللي ما حصلتش؛ ليه؟ عشان أنا حاضر درس. لما أجي أقول لك: لا لا أنت فاهم غلط، هو أنت أتي بك إلى الدرس ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]. أنت اللي جيت الدرس؟ أمال أنت إيه بقى؟ لا، أنت مش اللي جيت درس، أنت اللي زهقت لما الدرس طول، أنت اللي جيت وقفت جنب الشيخ فلخبطته وخليته ما يبطل درس. عاوز حاجة؟ اقعد طيب، واقف كده ليه؟

فتقول لنفسك كده؛ أنا تسيء الظن بنفسك ليه؟ علشان أول ما تحسن الظن بنفسك ده بداية الهلاك وده بداية الجهل بالنفس، ما أنت لو تظلم نفسك يبقى أنت مش عارف نفسك. طيب، أنا مش عايز أطول في حاجات أنا قلتها كتير قبل كده؛ يعني الكلام ده كله في تفاصيل فيه في التوبة وغيره من الدروس، فحاولوا ترجعوا للدروس دي اللي أنا مش فاكرها أصلاً. طيب يبقى تسيء الظن بنفسك، والثالث: تمييز النعمة من الفتنة. الله أكبر، الثلاث حاجات دول لما تحرزهم هتعرف تقايس بين النعمة والجناية.

إيه الثالثة؟ تمييز النعمة من الفتنة. يعني إيه؟ أصل أنت ممكن تبقى فاكر نفسك في نعمة وتطلع فتنة، متخيل؟ يعني تبقى فاكر نفسك الحاجة دي هتوديك جنة وتوديك نار. إزاي؟ ناخد مثال دنيوي ومثال ديني شرعي. المثال الدنيوي الحاجات اللي الناس بتفرح بيها في الدنيا: الفلوس، العربيات، الأولاد؛ دي إيه؟ أول ما أقول كده تقولوا إيه؟ نعمة، مش كده؟ وربنا سبحانه وتعالى نبهنا على معنى أنها قد تكون فتنة؛ قال إيه؟ ﴿إِنَّمَا أَمْوَالُكُمْ وَأَوْلَادُكُمْ فِتْنَةٌ﴾ [التغابن: 15]. قول الله طب إيه بقى نعمة وفتنة؟ طيب خلوا دي على جنب دلوقتي.

ناخد مثال ديني شرعي: العلم، الجهاد، مثلاً الإنفاق. دي أمور شرعية ولا لا؟ دي نعمة ولا فتنة؟ قد تكون نعمة وقد تكون فتنة. لو اتعلمت فتكبرت بعلمك؛ بقى العلم في حقك فتنة. صح ولا لا؟ مش في واحد هيجي يوم القيامة ويبقى من أول من تسعر بهم النار ويكون عالماً ويكون مجاهداً ويكون منفقاً؟ فبقى لازم نميز بين النعمة وبين الفتنة. طب إزاي نميز؟ خدوا قاعدة سريعة نعرف نميز بين النعمة والفتنة: أي حاجة هتقربك من ربنا، هتحسن حالك مع ربنا نعمة؛ أي حاجة هتبعدك عن ربنا فتنة.

خلاص، يبقى بالنسبة لي أنا، الدرس ده بالناس اللي قدامي دي بالعدد ده، نعمة ولا فتنة؟ لو طلعت من هنا مطأطئ رأسي وشايف إني ما أستحقش، وإني لو بذنوبي الناس دي تيجي تضربني كلها باللي في رجليها، وأن ده منه، فازداد في إخباتي له؛ لأن شفته أداني نعمة أنا ما أستحقهاش. أنا ما أستحقش أكون هنا، فرأيتها نعمة منه، فروحت البيت قلت: عيب عليك! هتدخل تنام بعد اللي كنت فيه ده؟ قوم صلي ركعتين، عيب عليك أنت ما صليتش سنة العشاء بعد النعمة اللي ربنا أداها لك دي، تصلي العشاء كده وتقوم تصلي السنة، عيب عليك أنت ما جبتش ورد الصلاة على النبي، عيب عيب عليك أنت فاتك ورد القرآن النهاردة، هتنام من غير ما تفتح المصحف بعد اللي كنت فيه وعامل فيها شيخ؟ قوم اقرأ في المصحف، كده الدرس ده في حق إيه؟ نعمة.

ولا هخرج من الدرس ده جوايا زهو وكبر، وأنا عملت اللي ما حدش عمله، فهروح أقول: هم يقيموا الليل بس أنا الشيخ أنا ما أقيمش ليل، هم يقرؤوا في المصحف طب بس أنا الشيخ أنا ما أقرأش في مصحف أنا كفاية قوي عليا الدرس اللي أديته؛ الدرس ده في حق إيه؟ في حقي فتنة.

فأنت لازم تميز، ليه بقى؟ ممكن تبقى فاكر إيه بقى دلوقتي؟ يا جماعة إحنا مش بنشوف كده إن إيه ده أنا ربنا أكرمني من وسع، وهو ما بيصليش وبيسب الدين؟ مش بنشوف ده؟ وشايف إن دي إيه؟ نعمة وهي فتنة، استدراج من الله عز وجل لك.

بلاش، هديك حيلة شيطانية بتحصل وأنا لم أنتبه إليها إلا في موقف عجيب جداً هحكيه لكم. كنت قاعد عند شيخ من المشايخ الكبار من شيوخنا يعني، وحاضر المجلس شيخ آخر، وهذا الشيخ الآخر رقيق القلب جداً، فلته بيقول حاجة عجيبة جداً أنا والله لم أنتبه إليها إلا في هذا الموقف. قال له: لما أعصي، هو بيحكي عن نفسه بيقول: لما أعصي تجيء لي رؤى كتير حلوة؛ يجي واحد يقول لي: إيه ده أنا شفتك امبارح في رؤية لابس أبيض في أبيض ووشك منور، وشوية تلاقي واحد ثاني جاي لي: أنا شفتك في رؤية امبارح حلوة. وراح قعد يعيط هذا الشيخ ده، قاعد ينهنه يقول: أنا ببقى عارف استدراج، أنا أعصي، أنا رايح داهية، هذه الرؤى استدراج. أصل يا جماعة أنت دلوقتي شفت واحد لابس أبيض، فإنت مين حضرتك؟ يعني مين حضرتك؟ ما هو عاصٍ، الشيطان يجي ويوريك فلان لابس أبيض في أبيض، فممكن تبقى الرؤى دي اللي عمالة تجي لك فتنة. أنت حالك يا ابني مع ربنا ما حد... اللي جاية يقول لك ده ما يعرفش حالتك إيه مع ربنا، أنت اللي عارف.

الغريب يا جماعة إن إحنا بنفتن، الغريب إن إيه يا سلام أنا اتشفت النهاردة بس أبيض في أبيض، يا حبيبي أنت لسه قايم من على الإباحية، أبيض في أبيض إيه؟ أن تميز النعمة من الفتنة. إمتى تبقى نعمة؟ إمتى الرؤى دي تبقى نعمة؟ إنك أول ما سمعت الرؤى دي رحت موطي رأسك كده وافتكرت الذنوب بقى اللي أنا عمال أحكي فيها دي، يعني أنا اتشاف كده والناس فاكريني كده وأنا كده أخص؟ رحت ماسك التليفون كاسره رميته، ليه؟ مش هبقى ده، مش هبقى اللي بتشاف كده وربنا سبحانه وتعالى... ما هو ده بقى إنك تشوفها نعمة؛ ما هو أنت بقى تفكر كده اللي هو إيه؟ ما هو كان ممكن ربنا يرِ حالتي تلك، مش عارف أبيض في أبيض ووش منور دي، مش ممكن يا جماعة اللي نام ده الاقيه جاي يقول لي: إيه ده أنا شفتك النهاردة في حلم وحش جداً، إنك فاتح إباحيات، إنك بتعمل عادة سرية، إنك بتغش، إنك بتأكل ربا؟ صح من سترتك الله، تقوم أنت تقول إيه: يا رب خلاص توبة، سترتني يا رب ونشرت الجميل وخليت الناس تشوفني في رؤى كويسة، عهد يا رب خلاص ما فيش ده تاني. صارت الرؤى في حقك نعمة.

ثالث حاجة اللي بها الثلاثة دول هتعمل أول ركن من أركان المحاسبة؛ أن تميز بين النعمة والفتنة. لما نخلص الثلاثة دول هنعرف نعمل أول ركن من أركان المحاسبة. الأول إيه الثلاثة دول؟ إيه؟ نور الحكمة، سوء الظن بالنفس، تمييز النعم من الفتنة. لو جمعنا الثلاثة دول هنعرف نعمل إيه؟ أول ركن أركان المحاسبة اللي هو إيه؟ المقايسة بين النعمة والجناية.

كده خلصنا ركن، هم كم ركن؟ ثلاثة، هنخليهم بقى مرة ثانية إن شاء الله الركن الثانية. ماشي، شيخنا الساعة 11 كل حاجة بتقفل، آه شيخنا الساعة 11 كل حاجة بتقفل، دي معلومة يعني جزاكم الله خيراً، أنت اللي بعدت. قول قولي هذا وأستغفر الله العظيم، سبحانك اللهم وبحمدك، أشهد أن لا إله إلا أنت نستغفرك ونتوب إليك.