منزلة المحاسبة (الدرس الثاني)

بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وأهل بيته كما صليت على آل إبراهيم إنك حميد مجيد. أما بعد:

المرة اللي فاتت بدأنا في منزلة المحاسبة. وقلنا إن منازل السائرين المنزلة الأولى هي منزلة اليقظة، ثم منزلة التوبة، ثم منزلة المحاسبة، وبدأناها المرة اللي فاتت وقلنا إن المحاسبة لها ثلاثة أركان. كان الركن الأول أن تقيس بين نعمته وجنايتك، وقلنا هذه لن تتم إلا بنور الحكمة وسوء الظن بالنفس وتمييز النعمة من الفتنة. المفروض إحنا خلصنا الكلام ده، لكن لي غرض الحقيقة إني أتكلم شوية في هذه الثلاثة بشيء من التفصيل، فالمرة اللي فاتت طبعاً كان الدرس طال شوية منا فكروتنا في الآخر.

دلوقتي إحنا علشان نعرف نقيس بين النعمة والجناية محتاجين نور الحكمة. ونور الحكمة هو العلم. فإزاي العلم محتاجينه عشان نقيس بين النعمة والجناية؟ أول حاجة يا شباب، ما معنى أن نقيس بين النعمة والجناية؟ أن نعم الله عز وجل نازلة لنا، وجناياتنا صاعدة له، فنقيس بين الاثنين دول لنعرف أنه لا أمل لنا في النجاة إلا برحمته سبحانه وتعالى.

أولاً: محتاجين العلم عشان ندرك النعمة. كنا أعطينا درس زمان عن الشكر، وقلنا إن من أعظم المعوقات عن رؤية النعمة الاشتراك فيها. وساعتها ضربنا مثال بالهواء والتنفس، فكم واحد قعد يتأمل في نعمة الله عليه إنه بيأخذ شهيق وزفير بسهولة؟ وأيام كورونا كان الأطباء يختارون من يعيش ومن يموت؛ لأن أسطوانات الأكسجين لا تكفي، فكانوا يختارون بناءً على السن؛ لأن النفس الذي تأخذه في الدقيقة الواحدة عشرات أو مئات المرات هو نعمة، لكننا لا نراها لأننا لا نملك نور الحكمة والعلم. معرفة الإنسان العادي بالنعمة ليست كمعرفة المتخصص الذي يرى تفاصيل الإشارات العصبية التي تنتقل في جزء من الثانية من المخ للأطراف، فهو يرى تفاصيل النعمة بشكل لا نعرفه، وبذلك يزداد إدراكاً لقوله تعالى: ﴿وَإِن تَعُدُّوا نِعْمَتَ اللَّهِ لَا تُحْصُوهَا﴾ [إبراهيم: 34]. وفي درس الشكر تكلمنا عن نعمة الريق، فلو لم يوجد لن يستطيع الإنسان أن يأكل، فمن تأمل في هذه النعم؟

ثانياً: نحتاج نور الحكمة لكي تعرف جنايتك. فكيف ستعرف جنايتك من غير علم؟ أولاً العلم بالحلال والحرام، فقد يعمل الإنسان حراماً وهو لا يعلم، وهذا ليس عذراً أمام الله؛ لأن التعلم متاح، والجهاز الذي في يدك تقضي عليه ساعات طويلة، وبدلاً من تضييع الوقت في تصفح المواقع الإباحية أو غيرها، كان يمكنك أن تتعلم دروس العلم. فليس عذراً أمام الله ألا تتعلم؛ فهناك من يتوضأ وضوءاً باطلاً، أو يجهل مفطرات الصيام، أو لا يعرف الكبائر، وقد قلنا المرة اللي فاتت مثالاً لمن يأتي للدرس وهو عاق لأمه، فيكون نازلاً على كبيرة من بيته وهو يظن أنه يأخذ ثواباً.

ثالثاً: بنور الحكمة تعرف مراتب الأعمال. إحنا في منزلة المحاسبة، وكأنك في شركة تأتي آخر اليوم وتحاسب نفسك؛ ليس فقط على ما كسبت، بل هل كان بإمكانك أن تكسب أكثر؟ ففي أعمال الآخرة، إذا كان أمامك عمل يثيبك ثواباً عظيماً وآخر يثيبك ثواباً قليلاً، فستشعر بالخسارة إذا اخترت القليل. فمراتب الأعمال تتطلب نور الحكمة، لأن العمل قد يكون فاضلاً في وقت، ومفضولاً في وقت آخر، أو فاضلاً في حال ومفضولاً في حال آخر. مثال ذلك: بين الأذان والإقامة، إذا انشغلت بقراءة القرآن فأنت تثاب، لكنه ليس أفضل الأعمال في هذا الوقت؛ لأن هذا وقت الدعاء وهو من مظان الإجابة. فبينما أنت تريد أن تضرب عصفورين بحجر وتنجز وردك، أنت في الحقيقة تعطل العمل الأفضل وهو الدعاء.

رابعاً: نور الحكمة يجعلك تعرف أصلاً الحق من الباطل. فقد يظن الإنسان أنه يحسن صنعاً وهو في الحقيقة على ضلال، كما قال تعالى: ﴿قُلْ هَلْ نُنَبِّئُكُم بِالْأَخْسَرِينَ أَعْمَالًا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا﴾ [الكهف: 103-104]. وتذكروا الثلاثة الذين أتوا إلى بيت النبي ﷺ وسألوا عن عبادته فكأنهم تقالوها، فتعاهدوا على الصوم الدائم، والقيام الدائم، وترك الزواج، ظانين أنهم يحسنون صنعاً، فأنكر عليهم النبي ﷺ ذلك؛ لأنهم لم يملكوا نور الحكمة حينها.

لذلك، يجب أن تسأل نفسك عن كل شيء في حياتك، كصفحتك على فيسبوك أو إنستجرام: هل هي نعمة لي في حقي أم فتنة؟ إذا لم تسأل نفسك هذا السؤال، فأنت في مشكلة كبيرة. والفتنة هي الأمر الذي يشتبه على الناس، فهل هي تقربك من الله أم تبعدك عنه؟ هل حالك مع الله ينضبط بها؟ إذا كنت مشغولاً بالتعليقات والإعجابات والمشاركات، وتكتب بوست أو تنزل فيديو في دقيقتين ثم تجلس ساعات تتابع التفاعل وتنشغل عن أعمال صالحة، فلو كنت تظن أن هذا هو طريق القرب، فتلك مصيبة.

لأ ده حل حرمان، ولا لأ؟ أنا مش مشغول بيها، أنا بعمل الحاجة وبمشي، طيب لقيت نفسي مشغول يبقى لازم أعمل حاجات اللي بيها مبقاش مشغول؛ لأني في الآخر ما أنا هتحاسب على الوقت ده، خصوصًا بقى إذا أخرجني ذلك إلى الغيبة أو إلى أن نرد إساءة أو إلى أن أحقر المسلمين اللي بيغلطوا فيا أو إلى أن أفقد قلوب تانية هتظهر.

وده كله إحنا بنتكلم في مين؟ مش في واحد فاسق، مش بنتكلم في واحد فاسق، بنتكلم في واحد متدين ومحتواه دين، حتى لو مش مشهور، بس هو راجل دين وبيكتب دين أو بينشر دين أو بينقل دين. اسأل نفسك دي نعمة ولا نقمة؟ طب ده كله عرفناه بإيه؟ بنور الحكمة. وكلنا عارفين قول ابن مسعود: وكم من مريد للخير لا يبلغه.

ده قاله لمين يا جماعة؟ قاله لناس قاعدين في المسجد بيفعلوا طاعة على صفة معينة، مش مهم دلوقتي ندخل في التفاصيل. دخل عليهم لقاهم بيفعلوا الطاعة دي على صفة معينة، راح قال الكلمة دي، قال: «لا أراكم إلا فاتحي باب فتنة» أو كما قال. فقالوا: ما أردنا إلا الخير. قال: «وكم من مريد للخير لا يبلغه».

طب يا جماعة إحنا هنعرف ده إزاي؟ يبقى لازم نتعلم، لازم. الدروس الوعظية جميلة، كل حاجة، بس ما ينفعش نقف عليها. إيه رصيدك من الفقه؟ إيه رصيدك من الاعتقاد؟ في غيرها من العلوم الشرعية، مش لازم نكون كلنا طلاب علم ولا علماء برضه، لكن خذ بحظك من هذا. بتعمل إيه يعني؟ إيه اللي شاغلك عن ربنا والدار الآخرة؟ إيه اللي شاغلك؟ انشغل بالله، وانشغل بالدار الآخرة، وانشغل بتحصيل نور الحكمة.

نور الحكمة كله بيكن في حاجة واحدة اللي هو العلم. نور الحكمة محتاجة علم ومحتاجة توفيق من الله عز وجل. محتاجة علم وتوفيق من الله، والتوفيق ده بقى باب تاني وده درسين ثلاثة، إزاي نحصل التوفيق عشان يبقى عندنا نور الحكمة. مش كل واحد عنده علم صار عنده نور حكمة، لكن خلينا في العلم دلوقتي؛ إن إحنا الدرس مش على العلم ونور الحكمة والكلام ده. فنور الحكمة مهم جدًا.

قال: وسوء الظن بالنفس. يبقى إحنا عندنا علشان نقيس بين النعمة والجناية، لازم ثلاث حاجات: نور الحكمة خلصناها، وسوء الظن بالنفس. ولن تسيء ظنك بنفسك إلا بنور الحكمة برضه، أن تعلم قدر نفسك وقدر ربك. ولن تقدر قدره سبحانه وتعالى، لكن آخرنا إن إحنا نعلم شيئًا من قدره جل وعلا.

أصل إحنا تلاقي نفسك عملت عبادة وطالع بقى إيه: أنا اللي ما فيش بعد كده. ما هو أنت ده معناه إن أنت مش عارف نفسك، ولو عرفت نفسك لما أعجبت بهذه العبادة، وده هيجيلنا كمان شوية مش عاوزين نسيب فيه. المهم إنك تسيء الظن بنفسك لن يكون إلا بنور الحكمة. وإساءة الظن بالنفس ليه مهمة وأنت بتقيس بين النعمة والجناية؟ لأن إحسان الظن بالنفس يمنع كمال التفتيش. لو أحسنت الظن بنفسك مش هتقعد تدور على المشاكل اللي فيك. اللي معجب بنفسه ده عمره ما بيتصلح، عمره. يفضل 10 سنين وكلنا عارفين ناس كده. على حطة إيدك نقولك إيه؟ فلان ده على حطة إيدك. لو غبت ورجعت إيه أخبار فلان؟ يقولك على حطة إيدك، زي ما هو.

صح يا جماعة؟ نعرف ناس كده ولا لأ؟ عجيبة جدًا. طب ليه ما بيتصلحش؟ هو معجب بنفسه، حسن الظن بنفسه فما بيفتش عن عيوب نفسه فبيتصلح إزاي؟ فلذلك كان سوء الظن مهمًا. وفي بقى دركة أسوأ من دي إنه يرى عيوبه ميزة. في ناس كده، يرى عيبه ميزة. يقولك إيه؟ أصل أنا بص أنا في الحق ما عنديش يا أبيض يا أسود. هو أصلًا قليل الأدب. بس هيقولك أنا قليل الأدب؟ هو ما يقولش كده، يقولك إيه: أنا يا أبيض يا أسود في الحق ما عنديش مش عارف إيه. يا حبيبي أنت قليل الأدب. حق إيه هو؟ يعني كل الناس دي اللي مثلًا مش عارفين الحق وأنت الوحيد اللي عارفه؟ لأ، أنت اللي ما بتعرفش تتصرف.

يرى عيبه ميزة، فده إساءة الظن بالنفس، وتمييز النعمة من الفتنة زي ما قلنا بأي مواقع تواصل. يلا نخش على الجديد بقى. قال والثاني، الثاني من أركان المحاسبة يا جماعة، ركزوا، أو الركن من أركان المحاسبة أن تقيس بين النعمة والجناية. يعني إيه؟ يعني الدرس اللي فات وأما ينزل بقى إن شاء الله ممكن ينزل كمان أسبوعين ثلاثة كده اللي ما حضروش يسمعوه.

الركن الثاني من أركان المحاسبة، قال: والثاني تمييز ما للحق عما لك أو منك. آه، تمييز ما للحق جل وعلا عما لك أو منك، إيه يعني إيه الكلام ده؟ يعني ما لله هو الواجب الذي عليك، يعني لله عليك إنك مثلًا تصلي الخمس فرائض، هذا لله، هذا ما للحق سبحانه وتعالى. طيب، ما لك هو المباح لك، هنا هنفصل شوية. تمييز ما للحق عما لك أو منك، ما للحق يعني الواجب عليك، وما لك يعني المباح، اللي هو مباح لك تعمله أو ما تعملوش براحتك، وما منك هو المستحب. يبقى عندنا ثلاث ألفاظ: تمييز ما للحق اللي هو الواجب عليك، مما لك اللي هو مباح ليك، أو منك اللي هو مستحب إنك تعمل مستحبات. يبقى لازم نميز بين الثلاثة دول. إيه الواجب وإيه المستحب وإيه المباح؟ ليه؟ علشان هاجي أفاجئك.

الأول يعني إيه مباح يا جماعة؟ أنا بقى، المباح اللي هو لو عملته لا تثاب ولا تعاقب، ما عملتوش لا تثاب ولا تعاقب. ده المباح. المستحب عملته تثاب، ما عملتوش مش هتتعاقب. الواجب عملته تثاب، ما عملتوش تعاقب، تاخد ذنب. ببساطة كده. فلازم تميز مالك، اللي هو المباح، وما منك، اللي هو المستحب، وما عليك اللي هو مال الحق، اللي هو الواجب.

ليه؟ عشان لما هاجي أقولك في آخر اليوم تعال اعمل إيه لنفسك؟ اشتغلوا معايا، حاسب نفسك، صح؟ إحنا أصلاً في المحاسبة. هتيجي تحاسب نفسك، هتيجي في الآخر تقول إيه: ما شاء الله، قمت الليل خمس ساعات قيام ليل، وخمسة صح جنبهم كده، وفي الوقت ده كانت أمك عاوزاك في مشوار وما نزلتش معاها، وجاي في آخر الليل فرحان إنك قايم الليل. نقول بقى، تسكنه فين؟ ده مال الحق ولا ما منك؟ ما منك، اللي هو المستحب. أيهما يقدم؟ واجب. طب وأمر أمك؟ واجب. أنت عملت إيه حضرتك؟ انشغلت بالمستحب عن الواجب، يعني عملت إيه؟ يعني عملت حاجة لو كنت سبتها ما كنتش هتأثم، وانشغلت بها عن شيء لما تركته أثمت.

المصيبة فين يا شباب؟ المصيبة مش هنا، المصيبة إنك جاي آخر الليل راضي عن نفسك. راضي عن نفسك، عجيبة جدًا. ليه؟ عشان ما عندكش دي، ما عندكش إنك تميز ما للحق عما لك ومنك، مش مميزة. طيب إزاي هيستقيم لك جدول المحاسبة كده؟ إزاي تستقيم لك المحاسبة؟ ما يا جماعة قواعد المحاسبة اللي هنا لو مش هي قواعد المحاسبة اللي هناك، إحنا هنضيع. أنت فاهم؟ يعني أنت هنا عمال تحاسب نفسك بقواعد مين اللي مخترعها؟ حضرتك، مخترع قواعد، وعمال تحاسب نفسك على القواعد اللي أنت مخترعها. هتيجي يوم القيامة تقول له يا رب أنا كان لي قواعدي الخاصة؟ ما فيش كده، مش هتلاقي، إحنا عندنا قواعدنا بقى.

طيب، مثال ثاني يقع فيه اللي مش هيعرف يميز دي، اللي هو يجي آخر الليل يقول إيه؟ اللي هو المحاسبة اللي كده باللوكس كده يقول الحمد لله النهار ده ما عملتش أي حاجة فيها عصيان أو فيها أي بغض النظر بقى عمل ولا ما عملش. وبعدين تيجي تبص على يومه تلاقي 10 ساعات بيسكرول على الفيسبوك ولا الإنستجرام. بافتراض إنه ما شافش حاجة حرام، بافتراض يعني خلاص يعني 10 ساعات نظيفة، ماشي؟ هذه في الأصل دي ما للحق ولا ما لك ولا ما منك؟ في الأصل ما لك اللي هو مباح. صح كده؟ وقلنا المباح ده اللي هو مافيهوش مكسب، ببساطة بلغة التجار. حضرتك ضيعت 10 ساعات من يومك في حاجة ما فيهاش مكسب. والأزمة فين؟ وإحنا بنتكلم هنا بنتكلم المتدينين، اللي هم مين؟ اللي في دماغهم حاجة اسمها آخرة وحاجة اسمها ربنا. المشكلة إن ضميرهم ما بيأنبهمش.

يعني إمتى؟ يعني أنا ما بلاقيش حد مثلًا نادرًا لما ألاقي شكوى جاية لي إني أنا مسحول في مواقع التواصل، أنا مضيع عمري في مش عارف إيه، بتيجي بس نادرًا. تلاقي الكثير شكوى في إيه بقى؟ في غض البصر، مدمن مش عارف إيه، بشرب إيه، بعمل إيه، الحاجات دي وهي حرام. إنما فكرة إنك مش شايف إن عمرك ضايع فيما لك اللي هو مباح، وطالما ضايع في ده يبقى فايت منك ربح مكسب، لأنك لو عمرت هذا الوقت فيما لله، فيما للحق أو ما منك اللي هو الواجب أو المستحب، هتطلع كسبان. مفهومة دي يا شباب؟

طب إحنا ليه دي واقعة مننا؟ حتى اللي بيحاسب نفسه عشان مش مميز بين تلك وبين هذه، يعني تمييز ما للحق عما لك أو منك. يبقى ده أول معنى. أو تمييز ما للحق عما لك أو منك يعني ما للحق يعني الله عز وجل ينسب له كل جميل، عما لك وأنت ينسب لك كل قبيح. ده معنى تاني قاله العلماء، إنك وأنت بتحاسب نفسك آخر اليوم لازم تميز ما للحق وما لك، اللي هو إزاي؟ اللي هو اتكلمنا عليه قبل كده في التوبة. يعني هندي مثال واللي حضر معانا أو سمع الدرس هيفتكر، إنك دلوقتي حضرتك قمت الليل، مافيش بقى أم عاوزاك ولا حاجة، قمت الليل، ففي هذا الفعل لو جيت بتحاسب نفسك تقول أنا النهاردة راضي عن نفسي الحمد لله، أنا قايم الليل، مخلص ورد القرآن، أذكاري، أورادي، أنا راضي عن نفسي. أول ما تقول الكلمة دي اعرف إنك ما أنت مش مميز ما للحق وما لك. يا ابني العبادة دي هي نفس العبادة، فيها نظران: نظر إنك بتشهد منة الله عز وجل، ونظر تاني إنك بتشهد عيب نفسك.

لأ مش فاهمين، يعني قيام الليل، قمت الليل، خلصت قيام الليل؟ آه. هتقعد في السحر تعمل إيه؟ تسأل الفردوس الأعلى؟ هتعملوا في السحر؟ ما تسمعوني يا جماعة. بنستغفر في السحر. إيه ده؟ ﴿كَانُوا قَلِيلًا مِّنَ اللَّيْلِ مَا يَهْجَعُونَ﴾ [الذاريات: 17]. قايم معظم الليل، وبالأسحار، ليه؟ يعني لو ما سألناش ربنا الفردوس الأعلى دلوقتي هنسأله إمتى؟ ده إحنا قايمين الليل. هنسأله إمتى؟ طب ليه بنستغفر؟ عشان اللي بقولهالك ده. تمييز ما للحق وما لك. في العبادة دي شاهدت منة الله علي، ولولا منته سبحانه وتعالى ما قمت. يعني أنت لما قمت الليل بمنته، بتوفيقه جل وعلا، هو الذي حملك، هو الذي بعث همتك لتقوم الليل، وإلا الليلة اللي وراها ما قمتش ليه؟ يا أبو راضي عن نفسك، ما قمتش ليه؟ مش أنت أنت؟ وأعضائك أعضائك؟ وروحك هي روحك؟ ما قمتش الليلة اللي بعديها؟ طالما أنت اللي قمت، لأ، أنت لما قمت قمت به سبحانه وتعالى، هو الذي أقامك. آية واضحة في القرآن: ﴿يَمُنُّونَ عَلَيْكَ أَنْ أَسْلَمُوا قُل لَّا تَمُنُّوا عَلَيَّ إِسْلَامَكُم بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِن كُنتُمْ صَادِقِينَ﴾ [الحجرات: 17]. محدش يمن على ربنا بحاجة.

يبقى تمييز ما للحق، قل هذا في كل طاعة، في كل طاعة. عشان كده يا جماعة، هتلاقوا الكلام ده قلناه لكم قبل كده، هتلاقوا الاستغفار ده عجيب. يعني قيام الليل بعديه إيه؟ استغفار. صلاة الفرض أول ما تسلم، السلام عليكم ورحمة الله، بتعمل إيه؟ ليه؟ عشان اللي بنقوله ده، كأنك شاهدت في هذه الصلاة منته عليك وتقصيرك، إحنا قلنا الأول المنة، نشرح عن التقصير، يبقى ما للحق إنه أقامك، إنه من عليك، إنه وفقك، وما لك لازم تميز، إنه لما أقامك في الصلاة وأتى بك إلى هذا المسجد تململت وسرحت، وما ركزتش الإمام قرأ إيه، ومتضايق من الزحمة، يبقى هو أتى بك وأقامك في الصف فكانت تلك جنايتك، فكانت تلك جنايتك. يبقى بعد ما تخلص الصلاة تقوم حاطط وشك في الأرض كده: أستغفر الله، أستغفر الله.

قيام الليل بعديه استغفار، صلاة الفرض بعديها استغفار، الحج، ﴿ثُمَّ أَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا اللَّهَ﴾ [البقرة: 199]. أنتوا عارفين الحج خلاص وقفنا في عرفة، يوم الحج الأكبر أعمال الحج كلها فيه، رميت الجمرة حلقت، رحت طفت الإفاضة، خلاص الحج خلص، ناقص إيه؟ رمي الجمرات. ثم أفيضوا من حيث أفاض الناس، الحج خلص، ها؟ فاستغفروا الله. مش خلصتوا الحج؟ استغفروا ربنا، ليه؟ أصل هو اللي جابكم، وأنتوا أطلقتوا البصر في الحرم، وأنتوا انشغلتم بالمولات وبرج الساعة ومش عارف إيه، وأنتوا قاعدين جوه الحرم بتسكرولوا، لا ده أنتوا قاعدين بتشيتوا مع الـ، كل ده بتشيت مع صاحبته ودي بتشيت مع صاحبها وهي جوه الحرم.

يبقى بعد ما تخلص الحج، تغطي رأسك كده وتستغفر، ثم أفيضوا من حيث أفاض الناس واستغفروا الله. سيدنا النبي عليه الصلاة والسلام يقضي عمره كله في الطاعات، وقبل ما يموت ربنا ينزل آيات تنبئه بقرب الأجل. إيه هي؟ ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا * فَسَبِّحْ بِحَمْدِ رَبِّكَ وَاسْتَغْفِرْ﴾ [النصر: 1-3]. ربنا يقول للنبي عليه الصلاة والسلام خلاص أجلك قرب. أعمل إيه يا رب؟ استغفر، أقعد استغفر. حياة النبي كانت عاملة إزاي عليه الصلاة والسلام؟ يختم حياته بالاستغفار، ﴿فَسَبِّحْ بِحَمْدِ رَبِّكَ وَاسْتَغْفِرْ﴾. أستك النبي، أستك الرسول، أستك حبيب الله، ﴿إِنَّهُ كَانَ تَوَّابًا﴾ [النصر: 3]. كأني واحد لا يرى لنفسه حالا يدعو الله عز وجل شيئا. مفهوم يا شباب؟

رمضان صمت وقمت وقرأت قرآن واللي منا اعتمر. تيجي ليلة القدر تدعي تقول إيه؟ قال الفردوس؟ اللهم إنك عفو تحب العفو فاعف عني، تستغفر برضه. ليه كل ده؟ عشان ميزت ما للحق عما لك أو منك. طيب تعالوا بقى نرجع، إيه علاقة ده بالمحاسبة؟ أنت قلتهولنا في التوبة وقلتهولنا في اليقظة، إنما إيه علاقته بالمحاسبة؟ شوفوا يا جماعة الإلحاح على المعنى ده في كل منزلة، إيه علاقته بالمحاسبة؟ ما أنت لما تيجي بقى تحاسب آخر اليوم كده وقعدت مجعوص كده وافتكرت، ما أنت مجعوص ليه؟ أصلك شايف اليوم النهاردة جميل. فأنا عملت، أول ما تفتكر وتميز ما له وما لك، ما للحق وما لك أو منك، تقوم موطي رأسك وتقعد تستغفر، طول ما أنت بتحاسب نفسك عمال تستغفر، ليه؟ لأنك ميزت ما للحق وما لك أو منك. يبقى دي ثاني ركن من أركان تمييز ما للحق عما لك أو منك، فتعلم أن الجناية عليك حجة، والطاعة عليك منا، والحكم عليك حجة ما هو لك معذرة. فتعلم أن الجناية عليك حجة. يعني إيه؟ يعني تعلم أن جنايتك حجة عليك.

إحنا إدينا أمثلة في الطاعات، تعال الناحية التانية بقى في المعاصي، تيجي آخر الليل كده تميز ما للحق عما لك أو منك في معصيتك. إيه اللي منك؟ كل قرف، كل شيء سيء، المعصية كلها لابساك أصلاً، وهنيجي للكلام ده كمان شوية. طب ما للحق؟ سترك. أنت لو قاعد بتعمل حاجة غلط في أوضة النوم بس والهوا هز باب الأوضة، قلبك يقع في رجلك، سترك. فده ما للحق في معصيتك. بس؟ لا والله ما بس، لم يسلبك النعمة. يعني إيه؟ يعني عينيك اللي بتبص بيها للحرام، ﴿إِنَّمَا أَمْرُهُ إِذَا أَرَادَ شَيْئًا أَنْ يَقُولَ لَهُ كُن فَيَكُونُ﴾ [يس: 82]، اتعمي، اتعمي. صدرك اللي مبوظه بالحشيش والمخدرات، في ثواني نفسك يقف. إيديك اللي بتمدها للحرام تتشل. فأنت بتبارز الله بأعضائك في المعاصي، وهو سبحانه وتعالى لم يمنعك نعمة، نعمه لسه ممدودة، سترك، نعمه لسه عليك، أمهلك. هو أنت يا ابني إيه اللي يمنع إنك تموت وأنت على المعصية دي؟ ما سمعتش عن حد مات على معصية يعني؟ أمهلك. فما للحق هذا، وما لك أو منك المصائب والقرف.

قال: فتعلم أن الجناية عليك حجة. ليه؟ لأنها لك أو منك، فهي حجة عليك يوم القيامة. أوعى تفتكر إنك هتعرف تكسب. الجناية عليك حجة، حجة في إيه؟ إنك عملتها واكتسبتها واقترفتها، وحجة عليك إنك قادر أهو، ما أنت حلو أهو وبتعرف تروح وتيجي وتمد إيدك وتعمل وتسعى. حجة عليك. أصل أنا مش قادر أصل أنا مش قادر أقوم الفجر أصلاً، أيوه ما أنت إمبارح كنت وقت الفجر بتعمل كذا وكذا، هتبقى حجة عليك. ما أنت قادر أهو، إشمعنى في الصلاة مش قادر؟ إشمعنى في نزول المسجد مش قادر؟ إشمعنى في فتح المصحف مش قادر؟ ما أنت إيديك اتمدت للموبايل وفتحت تطبيق تاني وقعدت تتفرج. إشمعنى القرآن اللي هو تطبيق في نفس الموبايل بقى ما عندكش وقت؟ جنايتك عليك حجة. أتعلم أن الجناية عليك حجة؟

طب ده أنا دائمًا مركز إني نربط كلام الهروي بالمنزلة، إحنا مش جايين ندي درس وعظ بس، إيه علاقة ده بالمحاسبة؟ إنك لما تيجي آخر الليل هتحاسب نفسك، فتقوم قايل لنفسك إيه؟ لا والله أنا بس النهار ده قصرت شوية في الأوراد عشان بس كان عندي الـ مش عارف إيه. فتقف كده مع نفسك يا صادق، يا اللي عاوز آخرة، يا اللي عارف إن كلامك ده كله مش هيخيل على ربنا. تقول بس اهدأ بس كده يا عم، اهدأ بس، أنت قعدت قد إيه على الفيسبوك؟ يا اللي مش لاقي وقت عشان بس كان عندك جامعة ولا عندك مشوار ولا الشغل ضغط عليك. وأنت في وقت الشغل كنت بتتحين الدقائق عشان تفتح تبص على الواتساب والرسائل اللي بتجيلك ولا لأ؟ وأنت في الجامعة وفي المحاضرة كان التليفون تحت شغال ولا لأ؟ فما تجيش في محاسبة آخر اليوم تقول معلش أنا بس النهار ده عشان بتريح ضميرك. الشماعات دي لن تخيل على الله، الشماعات دي علق عليها خيبتنا هنا في الدنيا، لن تخيل.

فتعرف على طول، فتعلم أن جنايتك عليك حجة. تقوم أنت قاعد مع نفسك تقول إيه؟ موبايلي اللي كنت فاتحه تحت البنش ده حجة علي ليه؟ كان ممكن يبقى الخاتم بتاع التسبيح في ايدي، المحاضرة تخلص، أنا كده كده مش فاهم، أكون جبتلي مثلاً 1000 صلاة على النبي عليه الصلاة والسلام، مثلاً، أو ببركة الصلاة على النبي يفهم عليه الصلاة والسلام. وأنا في هندسة كان ليا واحد صديقي يحضرلي المحاضرات وكده، وأنا كنت بقى ورايا حاجات تانية، كان عندي رياضة طبعاً كانت واخدة وقت مني، وعندي حاجات تانية المهم يعني، فكان ممكن المحاضرات تفوتني، فييجي هو يقولي ما تقلقش الموضوع بسيط وأنت موتر نفسك ولا حاجة، هو أنا راجل، فيقولي تعالى بس أنا هشرحلك. فأروحله هو في أمريكا دلوقتي، كان ساعتها طالب يعني في هندسة، فأروحله عشان يشرحلي، فيقعد يفتح المادة مش عارف يشرح، مش فاكر اللي هو، فيبتدي يتوتر، أقوله لا لا بس أنا هشرحلك تعالى، أقعد بقى أقرأ أهجس أي تهجيس، هو طبعاً مش فاهم حاجة، الحمد لله خلصنا، الحمد لله. فضلت بعد هندسة مثلاً سنتين ثلاثة بحلم إني في الكلية وبسقط وما بطلعش، الحمد لله ما سقطتش عمري يعني، بس يعني فضلت من رعب هندسة ده كابوس، حتى اللي عدى منها بيحلم إنه سقط.

قال: فتعلم أن الجناية عليك حجة. طب لما تعرف إن الجناية عليك يا جماعة أرجوكم، والله بحبكم كلكم، شيلوا بقى الحاجات دي من هنا، قوموا أنتم ككل، أنا عاوزها لوحدي يا فندم. فتعلم أن الجناية عليك حجة، يبقى لما تعرف إن الجناية عليك يوم القيامة حجة، فلتجعلها حجة عليك هنا لأني ولا هنرجع تاني؟ أنت بتحاسب نفسك بقوانينك، ما هو إيه اللي هيؤمنك إنك تيجي تقول لربنا أصل أنا يا رب بس اليوم الفلاني كانت محاضرات بقى وأنت عارف. محاضرات إيه؟ هيقولك أنت مقضي 10 ساعات على التطبيق الفلاني، محاضرات إيه؟ شغل إيه؟ ده أنت كنت بتقوم تدخل الحمام بالتليفون. ما بقولكش تعمل حاجة جوه تذكر ربنا يعني بس على الأقل ما تطولش جوه، يعني الوقت اللي قعدت جوه ده اطلع سبح بقى الشوية دول. بالمناسبة حتى بعد ما تطلع من الحمام بتقول إيه؟ غفرانك، إيه رأيكم؟ ليه هنا بيتقال غفرانك؟ قالوا ثلاث معاني منها في كلمة غفرانك، منها إنك عملية الإخراج نعمة، أدينا إحنا لسه بنقول إيه؟ أول حاجة تقيس بين النعمة والجناية، عملية الإخراج نعمة عظيمة، الأول حد مش دريان بمقدار النعمة؟ طب عشان ندرك مقدار النعمة، كلنا بلا استثناء حصلنا موقف في الشارع في سفر اتزنقت ما فيش حمام، إحساسكم إيه وقتها؟

عشان بس تعرف مقدار النعمة، أهو في ناس يا جماعة كده على طول، عملية الإخراج مش عندهم، فيركبوا لهم قسطرة، العملية اللي أنت بتدخل تعملها ببساطة دي نعمة كبيرة. بيحكوا إن مرة ملك من الملوك الغلام بتاعه جابله كوباية مية طلب مية، فقال له انتظر بس يا مولاي لو منعت هذا الكوب إلا بنصف ملك، يعني أنت قالك ما فيش مية إلا تدفع نصف ثروتك، فكان عاقلاً فكر كده قال له والله كنت أدفع فيه نصف مالي نصف ثروتي، قال له أشرب شرب، قال له إن حبس فيك إلا بمالك كله أو بملكك كله، يعني الكباية اللي دخلت جوه دي بقى جه الطبيب قالك مش هتطلع غير بملكك، فعاد يفكر كده شوية قال له والله كنت أدفع فيها ملكي كله، فقال لا خير في ملك لا يساوي بولة ماء. ملكك ده كله ما يساويش بولة المية دي اللي أنت، فنعمة كبيرة. دخلت وعملت عملية الإخراج دي طب أديت شكر النعمة دي؟ محدش بيدي شكر النعمة دي فأنت خارج بتقول غفرانك أستغفرك يا رب من تقصيري في شكر تلك النعمة. ده بالمناسبة يعني جت كده.

طيب يبقى تعلم أن الجناية عليك حجة فلتكن عليك حجة هنا، يا جماعة ما تدوش نفسكم مسكنات، ما هي مش هتنفع والله ما هتنفع، ما تخلقوش لنفسكم شماعات مش هتنفع، مش هتنفع، كن رجلاً، أسهل حاجة إنك تسكن ضميرك، أسهل حاجة إنما الراجل اللي بيقف يواجه نفسه. أنت مالكش عذر زي مين كده؟ كعب وصاحباه في قصة تبوك عارفينها ولا لأ، قعد بين إيدين النبي عليه الصلاة والسلام والله ما كان لي من عذر، أنا ماليش عذر، راجل، فإحنا عاوزين نبقى رجالة، تقعد فيها مع نفسك ماليش عذر، اليوم ماليش عذر، عملت كل حاجة إلا الدين، ماليش عذر.

قال: فتعلم أن الجناية عليك حجة، والطاعة عليك منا، اللي لسه قايلها فوق. يبقى جيت آخر اليوم، الجناية حجة، والطاعة منا. عرفت يعني إيه تميز ما للحق وما لك أو منك؟ يبقى المحاسبة دي هتؤدي لإيه يا جماعة؟ درس المرة اللي فاتت، أننا هلكى إلا برحمته سبحانه وتعالى، مفيش أمل إلا برحمته سبحانه وتعالى، وده أمل كبير يعني مش حاجة صغيرة، بس ساعات الناس تفتكر لأ، ده أنا كده مش بقنطك، ده أنا كده بفتحلك باب كبير، باب الرحمة ده باب واسع، لكن تيأس من نفسك، مش أنت، هو سبحانه وتعالى. قال: والطاعة عليك منا، والحكم عليك حجة، لا هو لك معذرة. عارفين اللي هو يقولك إيه؟ ما هو ربنا لو كان عاوز، بغض النظر عن كلمة عاوز دي يعني، بس هو أنا بنقولها بالعامية يعني زي ما الناس بتقول، ماشي؟ إن ربنا سبحانه وتعالى لو أراد شيئًا كان زماني ما عصيتش وكان زماني مش عارف إيه، عارفين الكلام ده؟ اللي هو نفس كلام مين؟ الكفار. نفس كلام الكفار. أنت مين قالك؟ أنت تعرف إيه عن القدر أصلًا؟ أنت بتقاوح في حاجة أنت ما تعرفهاش، كلام ده. برضه قلناه قبل كده، قلنا يا جماعة القدر سر الله في خلقه، يعني إيه؟ يعني القدر لم يطلع الله عز وجل عليه لا ملكاً مقرباً ولا نبياً مرسلاً، سيدنا النبي عليه الصلاة والسلام ما يعرفش سر القدر، إذا ذكر القدر فأمسكوا، الله عز وجل أثبت له إرادة ومشيئة، ﴿إِنَّمَا أَمْرُهُ إِذَا أَرَادَ شَيْئًا﴾، يبقى له إرادة؟ آه، ﴿وَمَا تَشَاءُونَ إِلَّا أَنْ يَشَاءَ اللَّهُ﴾، له مشيئة؟

آه، يبقى ربنا أثبت لنفسه إرادة ومشيئة، وأثبت للعبد إرادة ومشيئة، ﴿لِمَنْ شَاءَ مِنْكُمْ أَنْ يَسْتَقِيمَ﴾ [التكوير: 28]، مش كده؟ وأثبت أمراً آخر، أن مشيئتك تبعاً لمشيئة الرب عز وجل، ﴿وَمَا تَشَاءُونَ إِلَّا أَنْ يَشَاءَ اللَّهُ رَبُّ الْعَالَمِينَ﴾ [التكوير: 29]، إيه العلاقة بينهم؟ والله ما حد يعرفها. فبلاش تقاوح في حاجة مش بتاعتك. بصوا الآيات دي عجيبة جداً، اللي هو نفس الحجة بتاعة يا فلان بطل إباحية، يا فلان بطل زنا، يا فلان بطل مخدرات، يقولك إيه؟ ما ربنا لو عاوز مش عارف إيه. دي حجة الكفار. طب ربنا أثبتها حجة؟ تعالوا كده نقرأ، قال الله عز وجل ﴿سَيَقُولُ الَّذِينَ أَشْرَكُوا لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِنْ شَيْءٍ﴾ [الأنعام: 148]. نفس الكلام ولا لأ؟ لو شاء الله ما أشركنا، الأول يا جماعة الكلام ده صح ولا غلط؟ صح، لو شاء الله ما أشركنا، صح، طب هما صح ولا غلط؟ غلط. هتحتج بالقدر على مصايبك؟ تبقى غلطان، وربنا هيقول ده دلوقتي. بس قبل ما نقرأ بقى رد ربنا سبحانه وتعالى عليهم لأن الرد عجيب جدا والله، عجيب، بس قبل ما نقرأ، هل أنت يا حدق هتحتج بالقدر في كل حاجة؟ ما هو أنت قاعد مقضيها وتقولي ما أصل ربنا لو أراد، مش عارف إيه. طيب، هجيلك أنا بقى وأنت في الكوشة أقولك ما تتجوزش ولو ربنا أراد إنك تخلف هتخلف، ما هو إيه الفرهدة ودفع فلوس وقايمة وسجن، وليه؟ اقعد بقى في بيتك وربنا أرادلك خلفة هتخلف.

أنت ماشي على رجل واحدة ليه؟ لما تعطش وتروح تفتح باب الثلاجة، أقولك ليه يا حبيبي؟ قايم ليه يا حبيبي؟ خليك قاعد مكانك، ولو ربنا أراد إنك تشبع هتشبع، وتروى هتروى. مش محتاج خالص تروح للمية ولا تشرب مية. مش محتاج. إيه يا حمادة؟ محتاج مية؟ اسمك إيه؟ أمين؟ عمر؟ ماشي. هل بتفكر كده؟

لقيت واحد بيوزع برة 100 ألف، كله هيجري، 100 ألف جنيه على اللي يطلع دلوقتي من باب المسجد، أقولك اهدأ بس اهدأ؛ لو ربنا أراد الـ 100 ألف دي توصلك لغاية عندك هتوصل، ما تطلعش ولا تجري ولا هتعمل ده؟ إشمعنى جيت على المعاصي وتقول لو ربنا أراد؟ إشمعنى؟ عارف ليه؟ عشان ده مذهب إبليسي، هو الشيطان اللي بيوسوسلك. بس لو فكرت بالعقل هتلاقي هي هي. اقعد بقى في أوضتك، ما تتتعتعش من مكانك، ما تعملش أي حاجة، ولو ربنا أراد الحاجة دي تحصل هتحصل.

تعالوا بقى نشوف رد ربنا إيه؟ قال الله تعالى: ﴿سَيَقُولُ الَّذِينَ أَشْرَكُوا لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِن شَيْءٍ كَذَلِكَ كَذَّبَ الَّذِينَ مِن قَبْلِهِمْ حَتَّىٰ ذَاقُوا بَأْسَنَا قُلْ هَلْ عِندَكُم مِّنْ عِلْمٍ فَتُخْرِجُوهُ لَنَا﴾ [الأنعام: 148]. اللي لسه بقولهولكم شوية، أنتم فاهمين قدر؟ يعني أنتم عارفين القدر؟ فاهمين؟ يعني قولوا لنا إيه القدر ده؟ يلا هاتوا لنا بقى يلا. هل عندكم من علم فتخرجوه لنا؟ ما حدش يعرف إيه القدر. طب أنت بتحتج بحاجة ما تعرفهاش؟ ده أنت عجيب جدا يا أخي.

الحكم إحنا ليه بنقول الكلام ده؟ الحكم عليك حجة ما هو لك معذرة. إوعى تفتكر أن حكم الله القدري هيبقى عذر لك يوم القيامة. هنا يا جماعة الهروي بيديكم قواعد الحساب يوم القيامة، قواعد: الجناية عليك حجة زي ما شرحناها، والطاعة عليك منة، والحكم عليك حجة ما هو لك معذرة. فلما تيجي آخر الليل بتحاسب نفسك ما تقولش: لا ما أنا أصل الحتة دي عملتها أصل ربنا بقى اللي أراد ده. وأراد يا حبيبي، أنت فاهم أنت بتقول إيه؟ أنت فاهم يعني إيه قدر؟ أنت مش فاهم يعني إيه قدر. إوعى تحتج بالقدر على معصيتك، إوعى، وإلا تبقى شبيه الكفار.

قال الله عز وجل راداً عليهم: ﴿قُلْ هَلْ عِندَكُم مِّنْ عِلْمٍ فَتُخْرِجُوهُ لَنَا إِن تَتَّبِعُونَ إِلَّا الظَّنَّ وَإِنْ أَنتُمْ إِلَّا تَخْرُصُونَ * قُلْ فَلِلَّهِ الْحُجَّةُ الْبَالِغَةُ فَلَوْ شَاءَ لَهَدَاكُمْ أَجْمَعِينَ﴾ [الأنعام: 148-149]. إيه ده؟ ما هم قالوا كده. هم قالوا إيه غير كده أصلاً؟ عشان كده قلت لكم فوق هم كلامهم صح. أيوة كلامهم صح، هم صح، لا هم مش صح. ﴿فَلِلَّهِ الْحُجَّةُ الْبَالِغَةُ * فَلَوْ شَاءَ لَهَدَاكُمْ أَجْمَعِينَ﴾. أه ربنا لو شاء لهداكم أجمعين صح، ولو شاء ما أشركوا صح، طب نحتج بيه؟ غلط. ما نحتجش بالقدر في المعصية أبداً، ليه؟ لأنك مش فاهم قدر.

ببساطة يا جماعة، سؤال محتاج إجابة: هل ربنا حاشاه وجل وعلا وتقدس ظلام للعبيد؟ يعني لما يجيبنا يوم القيامة وفي ناس هتخش النار، وناس هتخلد في النار، ربنا ظلام لهؤلاء؟ قال الله تعالى: ﴿وَمَا رَبُّكَ بِظَلَّامٍ لِّلْعَبِيدِ﴾ [فصلت: 46]. يبقى في حتة إحنا مش فاهمينها هي اللي تحل الإشكال ده، اللي هي إيه؟ ما إحنا مش عارفينها، ما حدش يعرفها، ما حدش يعرفها. لكن اللي مطمنين له إن ربنا مش ظلام للعبيد، وإن اللي هنتحاسب عليه بتاعنا، هو بتاعنا. يبقى الحكم عليك حجة ما هو لك معذرة.

الثالث، ثالث أركان المحاسبة: كان أول ركن أن تقايس أو تقيس بين النعمة والجناية. وثاني ركن أن تميز ما للحق عما لك أو منك. وثالث ركن أن تعرف أن كل طاعة رضيتها منك فهي عليك، وكل معصية عيرت بها أخاك فهي إليك.

ثاني، أن تعلم أو أن تعرف أن كل طاعة رضيتها منك فهي عليك. وأنت بتحاسب نفسك كده في آخر الليل، أنا الحمد لله راضي عن نفسي في العبادة الفلانية، جميل، اشطب بقى العبادة دي، هي عليك. طب أنا ده أنا ختمت المصحف النهاردة حفظ، حفظ مش قراءة، فأنا راضي عن نفسي جداً. رضيت نفسك؟ اه. اشطب بقى على ختمة المصحف. يا شيخ بس أنت معقدنا ليه؟ هو أنت حفظت المصحف بإيه؟ به سبحانه وتعالى، هو اللي وفقك إنك تحفظ المصحف وخذل غيرك. مش أنت وصاحبك كنتوا قايمين مع بعض؟ وبعد شوية صاحبك مش بس ساب الحفظ، ده ما بقاش يركعها. هو أنت أجدع من صاحبك في إيه؟ طب مين اللي وفقك؟ هو سبحانه وتعالى، فما ترضاش طاعة لنفسك. كل طاعة رضيتها منك فهي عليك وبال عليك ودمار عليك، ليه؟ لأنك أول ما ترضى طاعة هتبلط، ولو ما كنتش رضيت كنت هتعمل طاعات تانية، فكنت هتزيد في الدرجات. مفهومة دي؟

وكل معصية عيرت بها أخاك فهي إليك. هنا الذي يطمئن قلبي إليه أن كل معصية عيرت بها أخاك فهي يعني تلك المعايرة، مش المعصية، الشراح اختلفوا في هذه اللفظة، لكن أنا يطمئن قلبي إلى هذا: كل معصية عيرت بها أخاك فهي المعايرة إليك، يعني أنت اللي في هذا الموقف تعاير مش هو. ليه؟ لأنك غفلت، أولاً غفلت عن نفسك. يرى أحدكم القذى في عين أخيه ولا يرى الجذع في عينه. فاهمين الحديث ده؟ عين المية، واحد أخوك ليه عين مية وأنت ليك عين مية، بركة مية، دي بتاعته ودي بتاعتك، فعين المية بتاعته فيها قذى، حاجة حقيرة كده صغيرة مرمية، وعينك أنت فيها جذع، أنت شايف القذى في عين أخيك ولا ترى الجذع في عينك. يا عم انشغل بنفسك يا عم، أنت مركز ليه مع الناس؟ انشغل بنفسك. يبقى أنت اللي تعاير، أنت رايح تعاير أخوك بالمعصية؟ أنت أصلاً شاغل نفسك بإيه؟ يبقى أنت اللي تعاير.

ثانياً، كأنك لم تلمح قدر الله في تلك المعصية اللي بتعايره بيها، ولو تلمحت قدر الله فيها ما عايرت. خلي بالك مش بقول إن هو يحتج، هاجي أقول له إيه؟ ما تبصش للقدر ولا حاجة، أنت اللي عامل المعصية. طب أنا؟ ما تعايرش أخوك، وترى في ذلك فعل الله عز وجل، فلا تعايروش. طب معصية إيه؟ معصيتك أنت؟ ترى فعل نفسك. مش هنخش الجنة غير كده يا جماعة، يعني من الآخر، مش هنخش الجنة غير لما نشوف نفسنا هي منبع كل سوء وكل شر، وأي خير بيحصل هو منه سبحانه وتعالى، ما لناش حيلة فيه، هو منه سبحانه وتعالى تفضل علينا ووفقنا وحملنا وصرف عنا الموانع والشواغل فكانت الطاعة.

يبقى كل معصية عايرت بها أخاك فهي إليك، يعني التعيير عائد إليك بالذات بقى لو كان أخوك ده تاب. طب بيعمل إيه يعني؟ ما هو تاب خلاص. ولذلك يا جماعة يحرم تعيير من يقام عليه الحد، وهذا منصوص عليه في كتب الفقه، يعني متخيل كده واحد زاني، واحدة زانية، جبناه ولا جبناها وجلدناهم، أقمنا عليه الحد، يحرم التعيير، تأثم لو قلت له يا زاني يا فاسق. طب بيعمل إيه؟ ما الراجل خلاص أقمنا عليه هنعمل له إيه تاني يعني؟ انتهت، صفحة واتقلبت، طب الراجل تاب، هيعمل إيه تاني؟ انتهت، صفحة واتقلبت، فلو عيرته كنت أنت الحقيق والأحق بذلك التعيير، كان التعيير عليك أنت، ماشي؟

ولو على المعنى الأول بقى اللي هو كل معصية عيرت بها أخاك فهي إليك يعني المعصية، قالوا إنه لو عيرت أخاك بمعصية هتقع فيها، وده معنى كل معصية عيرت بها أخاك فهي إليك، هتقع فيها، وذكروا في ذلك حديثاً: «من عير أخاه بذنب لم يمت حتى يعمله». فلقيت واحد بيعمل حاجة، هبتدي أعير، هبتدي أتنمر، هبتدي أتريق، لم نفسك، ما أنت مش معصوم، بكرة وبعده هتقع في المعصية دي، فلم نفسك.

وكل معصية عيرت بها أخاك فهي إليك، ويختم بنصيحة: ولا تضع ميزان وقتك من يديك. على طول شايل ميزان الوقت، اللي هو إيه الميزان؟ كل اللي قلناه فوق بقى، دي كلها قواعد تطبقها وأنت بتحاسب نفسك، وده الميزان. لو واحد واقف وشايل ميزان كده، ينفع ينام؟ لو نام إيه اللي هيحصل؟ هيقع الميزان. هو بيقولك: ولا تضع ميزان وقتك من يديك، يعني دايماً أنت مستيقظ، اللي هي منزلة اليقظة، دايماً مستيقظ، لأنك لو غفلت وقع الميزان.

طب العكس؟ لو لقيت الميزان واقع، يبقى أنت، يبقى دي علامة أهي تانية، أنا عاوز أعرف هو أنا صاحي؟ هو أنا صاحي أصلاً؟ مستيقظ؟ أنا فين من أول المنازل أصلاً؟ منزلة اليقظة، أقولك بسيطة، الميزان في إيدك؟ تقولي هو إيه الميزان؟ أقولك كل الكلام اللي فوق ده. في إيدك؟ يعني إيه في إيديا؟ أولاً حافظه، ثانياً مستحضره في كل عمل، ده معناه إن الميزان في إيدك، بتوزن بيه الأعمال، تيجي آخر الليل، توزن أعمالك، تحاسب نفسك على الأعمال. لا تضع ميزان وقتك من يديك. قولوا قولي هذا، وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.