منزلة الإنابة

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم، إنك حميد مجيد. أما بعد.

المنزلة الرابعة من منازل السائرين عند الإمام الهروي رحمه الله تعالى هي منزلة الإنابة. كنا قبل ذلك وفي أماكن ثانية تكلمنا عن أول ثلاث منازل؛ كانت أول منزلة اليقظة، ثم التوبة، ثم المحاسبة، والمنزلة الرابعة هي الإنابة. هذا ترتيب بديع من الإمام رحمه الله، وتكلمنا عن مناسبة ترتيب المنازل الثلاث الأولى، فكأنك لما استيقظت ووقفت على جنايتك فتبت، ثم احتجت نوعًا من المحاسبة، وده كله اتكلمنا عليه قبل كده.

فوجدت أنك ربما في طريقك نكبت عن الطريق، فتحتاج إلى إنابة. الإنابة هي الرجوع، والتوبة أيضًا رجوع، فما الفرق بين التوبة والإنابة؟ قالوا إن التوبة هي الرجوع من المعصية إلى الطاعة، والإنابة هي الرجوع إلى الله سبحانه وتعالى. ولذلك قالوا إن الإنابة أعلى من التوبة؛ أول الطريق التوبة، وأوسطه الإنابة، وآخره الأوبة. ولذلك قالوا إن التوبة مقام العاصين والمذنبين، والإنابة مقام المؤمنين والصالحين، والأوبة مقام الأنبياء والمرسلين.

الإنابة تعني الرجوع، وهنتكلم شوية نتأمل معنى الإنابة النهارده إن شاء الله. لكن السؤال: لماذا ننيب؟ لماذا ننيب إلى الله عز وجل؟ ننيب لأن ربنا سبحانه وتعالى رتب أمورًا على الإنابة، وهذه الأمور كلنا في احتياج ليها. مثلًا قال الله عز وجل: ﴿قُلْ إِنَّ اللَّهَ يُضِلُّ مَن يَشَاءُ وَيَهْدِي إِلَيْهِ مَنْ أَنَابَ﴾ [الرعد: 27]؛ فكلنا محتاجين الهداية، فالإنابة طريقك للهداية. كذلك قال الله عز وجل: ﴿وَالَّذِينَ اجْتَنَبُوا الطَّاغُوتَ أَن يَعْبُدُوهَا وَأَنَابُوا إِلَى اللَّهِ لَهُمُ الْبُشْرَىٰ﴾ [الزمر: 17]، وكلنا نريد البشرى، فالإنابة طريق البشرى.

تعالوا نقرأ كلام الإمام الهروي كعادتنا ونحاول نفهم هذا الكلام. قال الإمام الهروي رحمه الله: ﴿وَأَنِيبُوا إِلَىٰ رَبِّكُمْ﴾ [الزمر: 54]. وكان هذا أيضًا معنى آخر يدعونا إلى الإنابة، أنه أمر الله سبحانه وتعالى، ربنا أمرنا بالإنابة. قال الهروي: الإنابة ثلاثة أشياء: الرجوع إلى الحق إصلاحًا كما رجع إليه اعتذارًا، والرجوع إليه وفاءً كما رجع إليه عهدًا، والرجوع إليه حالًا كما رجع إليه إجابة.

طبعًا أنتم عارفين كلام الهروي كلام فخم كالعادة، وبنحاول نبسطه جدًا علشان نفهم تلك المنازل التي هي منازلنا في طريقنا إلى الله عز وجل. الإمام الهروي بيقول إن الإنابة أن ترجع إلى الحق سبحانه وتعالى إصلاحًا، كما رجعت إليه اعتذارًا. بيعقد مقارنة بين الإنابة والتوبة؛ فبيقول زي ما أنت في التوبة رجعت إليه سبحانه وتعالى اعتذارًا، فلترجع إليه إصلاحًا. التوبة ما هي إلا اعتذار لربنا؛ عملت حاجة غلط فبتقول يا رب اعتذر إليك مما صنعت.

لكن لازم بعد التوبة إصلاح، كما قال الله عز وجل: ﴿إِلَّا الَّذِينَ تَابُوا وَأَصْلَحُوا وَبَيَّنُوا﴾ [البقرة: 160]. فالتوبة اعتذار وعهد وإجابة، والإنابة إصلاح ووفاء وحال. التوبة عهد؛ يعني يا رب اعتذر إليك وأعاهدك ألا أعود، فالإنابة أن ترجع إليه وفاءً بذلك العهد. والإجابة هي أنك لما استيقظت وعرفت أنك كنت في وحل المعصية والغفلة، قلت هتوب، فأجبت داعي الله بلسانك. لكن هل يكفيك ذلك؟ قال لك لا، فالإنابة الرجوع إليه حالًا، يعني أن يصدق حالك قولك، فلا تقول يا رب تبت إليك وأنت ما زلت فرحان بالمعصية وتفتخر بها.

وإنما يستقيم الرجوع إليه إصلاحًا بثلاثة أشياء: بالخروج من التبعات، والتوجع للعثرات، واستدراك الفائتات. أول حاجة عشان يبقى اسمك رجعت إليه إصلاحًا أنك تخرج من التبعات، يعني حضرتك أفسدت ما بينك وبين الله، وأفسدت ما بينك وبين عباد الله. ما يكفيش أنك تعتذر، لازم تصلح اللي أفسدته. فان لم تصلح، كانت توبتك خداجًا، ولن تحرز مقام الإنابة.

التبعات أول حاجة أن ما بينك وبين الخلق تخرج منه، فإذا أفسدت شيئًا للخلق فلتصلح. لا تفتكر أن المسألة سهلة، ربنا سبحانه وتعالى يوم القيامة ينشر لكل عبد ديوان ما بينه وبين العباد، وما فيه شيء سيترك. أنت في الدنيا كنت بتتحايل وتخبي وما بتعرفش تتقفش، لكن يوم القيامة سيفضحك الله: هذه غدرة فلان.

والأمر ليس بيدك أن تصلح في الآخرة؛ ففي الآخرة سيؤخذ من حسناتك. لو اغتبت أو أكلت حق أحد، سيؤخذ من حسناتك حتى ترضى، حتى إذا فنيت حسناتك، يؤخذ من سيئاتهم فتطرح عليك، ثم تطرح في النار. فليتقِ الله من لا يزال لم يفسد، وليهتم من أفسد بالخروج من تبعات الخلق، فحقوق العباد ليست سهلة.

يؤخذ من سيئاتهم فتطرح عليه، وهذا الذي سماه النبي صلى الله عليه وسلم المفلس. أتدرون من المفلس؟ قالوا: المفلس فينا من لا درهم له ولا دينار. قال: لا، مش ده المفلس، ده عندكم أنتم في الدنيا بتاعتكم، إنما المفلس اللي أنا قلت لكم وصفه ده، مش عاوزين نعيده تاني. هذه رسالة لمن لم يفسد ما بينه وبين الناس بعد، لمن لم يتعدَّ على حقوق الناس.

طيب، اللي تعدى خلاص، اللي عمل نقول له: لابد أن تصلح، لازم، ﴿إِلَّا الَّذِينَ تَابُوا وَأَصْلَحُوا﴾. عشان أصلح أول حاجة في الإصلاح الخروج من التبعات، يبقى التبعة التي بينك وبين الخلق تخرج منها، إزاي؟ كل واحد بقى بحسبه، أكلت مال فلان؟ رجع له الفلوس. طب أنت كنت واكل عليه عشرة آلاف من عشر سنين، هتراجع عشرة آلاف؟ أنت لو ده اتعامل معاك هترضى؟ روح استحله بقى. عشان برضه، أصل في ناس كده حقه ويجي يستلف فلوس ويقعد يماطل سنة في الثانية في الثالثة، ويحصل تضخم في الثاني في الثالث، ويجي يرجعها له يقول له: خلاص بقى أنا تبت! لا، استرضيه، شوف بقى الـ 10000 دول كانوا بيعملوا إيه ساعتها وادِ له قدهم، زي ما تحب يتعمل معاك اعمل مع الناس. ماشي، احنا ده مش بنقول بشرط سابق، لا ده أنت استحليت فلوس الناس وأكلت فلوس الناس وضربت على فلوس الناس، حتى لو في نيتك تسم في يوم من الأيام لكن بتماطل وأنت معاك الفلوس ومشغلها ومدورها؛ الناس بتعمل كده للأسف، فاسترضِ دول بقى.

طيب، اغتبت حد؟ والله لو تقدر تروح تقول له: أنا اغتبتك وسامحني، وغلب على ظنك أن ده مش هيؤدي إلى مفسدة أكبر، ما هو ممكن أنت مثلاً اغتبت واحد بلطجي فتروح رحت يقوم مديك واحدة يجيب أجلك، فهنا ده هيؤدي إلى مفسدة أكبر، فلو غالب الظن كده خلاص ما تقولوش، بس تستغفر له كتير، تهدي له ثواب بعض الأعمال الصالحة، تثني عليه -مش بالبلطجة يعني- لو حد تثني عليه في المجلس اللي أنت اغتبته فيه، يبقى ده أنت كده بتعمل إيه؟ بتصلح ما أفسدت، إلى غير ذلك مما يدخل في الذنوب التي بينك وبين العباد. يبقى الخروج من التبعات، وكذلك أن تخرج من التبعات فيما بينك وبين ربك سبحانه وتعالى، ودي نأجلها شوية لثالث كلمة اللي هي استدراك الفائتات، لكن لها تعلق بالخروج من التبعات.

الخروج من التبعات، قال: والتوجع للعثرات. من صدق إنابتك، من صدق رجوعك إلى ربك سبحانه وتعالى، من صدق رجوعك إلى الله عز وجل، أنك تتوجع للعثرات. عثرات مين؟ عثراتك، ولا عثرات غيرك؟ ولا الاثنين؟ الاثنين. من صدق إنابتك؛ مقام الإنابة يا جماعة أعلى من مقام التوبة، احنا مش بنكلم ناس لسه في بداية الطريق، التوبة خلصناها ودخلنا بعديها على المحاسبة، وداخلين في المنزلة الرابعة اسمها الإنابة، كأنك بترتقي أهو، فالمنيب قلبه غير، قلبه غير، يتوجع للعثرات، لأن فرحك بالعثرة قدح في توبتك، أصلاً مش إنابتك بقى، أعلى من التوبة؛ فرحك بالعثرة قدح في التوبة. ليه قدح في التوبة؟ أهم شرط من الثلاث شروط بتوع التوبة اللي هو إيه؟ الندم. هو في حد ندمان وبيرقص؟ ندمان ومزقطط؟ ندمان وفرحان؟ يعني تيجي إزاي دي؟ فكونك فرحان بالعثرة، بعثرتك خلينا في عثرتك أنت الأول، ده قدح في توبتك.

طيب، ما أنا مش عارف أتوجع للعثرة الحقيقة، وده السؤال اللي كتير بنتسأله وأسهبنا في جوابه في درس التوبة، اللي هو أنا مش عارف أندم، أنا نفسي أندم، ومش عارف، أنا بـ التذ بالمعصية. فاللي عاوز جواب السؤال ده بالتفصيل يراجع درس التوبة هيلاقي الجواب، لكن حسبنا أن نقول مما يعينك على أن تتوجع للعثرة أن تتفكر في أمور -ثاني اللي أنا هقوله ده مش كفاية، راجعوا بس درس التوبة- أن تتفكر في أمور، أولاً أن تتفكر في سرعة انقضاء الدنيا وإقبال الآخرة ولا بد. يبقى أنت العثرة ولا الذنب ولا الشهوة اللي أنت فرحان بيها دي، لما تتفكر كده إن يا سيدي من يوم ما اتولدت لغاية ما مت ما بتعملش حاجة غير الشهوة اللي هي مضيعاك أو الذنب اللي أنت بتحبه ده، ثم ماذا؟ بعد كده إيه يعني؟ ﴿أَفَرَأَيْتَ إِن مَّتَّعْنَاهُمْ سِنِينَ * ثُمَّ جَاءَهُم مَّا كَانُوا يُوعَدُونَ * مَا أَغْنَىٰ عَنْهُم مَّا كَانُوا يُمَتَّعُونَ﴾ [الشعراء: 205-207]. فالدنيا كده كده ماشية، والآخرة كده جاية. أول ما تتفكر فيه فده يعكر عليك صفو الشهوة.

طب الدنيا ماشية إمتى يعني؟ ماشية بعد 60 ولا بعد الـ 70؟ ما حدش يعرف، يمكن تبقى ماشية دلوقتي، يمكن تبقى ماشية وأنت على حال المعصية، يمكن المعصية اللي أنت عمال بتحجم عليها دي وبتيسر كل سبيل لها و بتهيئ الأجواء لها، يمكن ما تلحقش تشعر لذتها أصلاً، ليه؟ هتقبض قبل ما تشعر لذتها، تخيل! طيب خلصت الشهوة وشعرت باللذة والمتعة، وأي شهوة وأي لذة؛ نساء بقى، مال، منصب، شهرة، كل الشهوات لها لذة. تقول: لا خلاص الشهوة خلصت واللذة أنا فيها الحمد لله وكله زي الفل. نقول لك: كانت إن كانت محرمة، فنقول لك: طب هي أبعدتك عن ربك سبحانه وتعالى، وأبعدتك عن الجنة، وقربتك من النار، فشهوة إيه دي بقى اللي أنت فرحان بيها إن شاء الله؟ شهوة إيه؟ فتقوم برضو لما تفكر في كده تبتدي لا مش فرحان بيها، ليه؟ لأنها أبعدتك عن ما هو أفضل، إلى غير ذلك من المعاني؛ ساعتها الكلمة بتُوبَة بقى عن حبك لربك وعن تعظيمك له وإجلالك له، معاني كتير قوي تحصل بها الندم، وده درس مهم إزاي أحصل الندم في التوبة، ده مهم جداً يتسمع.

طيب، يبقى التوجع للعثرات، أن تتوجع لعثرات نفسك، هذا أول الإصلاح، احنا بنقول إن ترجع إليه إصلاحاً، هتصلح إزاي إذا كنت أنت كل ما تفتكر عثرة تبقى فرحان بيها؟ هتفكر تصلح إزاي؟ وكذلك أن تتوجع لعثرات غيرك، الحقيقة بعض الناس مش عارف ليه ده بيحصل، يعني ماعرفش فين المشكلة لما بتيجي يتدين، ماعرفش قلوبهم هي أصلاً كان قلوبهم حجر ولا قلوبهم بقت مش عارف، بس تلاقيه كده إيه يفرح أما يلاقي ناس بتعصب، يعني إيه؟ كأنه جواه شماتة أو جواه مش عارف، يعني ليه ليه كده ليه؟

أولاً يا ابني المفروض أنك بتتوجع للعثرات أولاً لأن ربنا يكره أن يرى ذلك في كونه، قبل ما نبص للعبد ده، هسيبك من مين اللي بيعمل إيه، أول توجع أنك رأيت بعينك ما يبغض سيدك، ما يكرهه ربك سبحانه وتعالى، فإن لم تتوجع للعثرة لكونها عثرة بغض -احنا لسه ما بصيناش في مين اللي تعثر- ده احنا بس بنبص للمشهد من بعيد كده إن إيه في عثرة بتفعل، في ذنب بيرتكب، بغض النظر عن الفاعل، مش في دماغنا الفاعل دلوقتي هنجي له كمان شوية، أهذا يرضاه الله ربك؟ أهذا يحبه الله ربك؟ فكونك لا تتوجع لعثرة غيرك في مشكلة عندك، في مشكلة في كمال حبك له سبحانه وتعالى، وفي كمال؛ لأن أنت ممكن واحد يتوجع للعثرة لأنه محب لربنا، فأنا لا أحب أن أرى ما يكرهه حبيبي سبحانه وتعالى، وفي واحد ثاني يتوجع للعثرة مش لأنه محب لربنا، لأنه مُجِلّ لربنا، اللي هو الله يُعصى، فاهمين المعنى ده؟ الله يُعصى، ربنا يعصى، هنا الغالب عليه مش هو مش مش معنى كده أن هو مش محب، الغالب عليه في تلك الحال معنى الإجلال، الله لا يعصى، فإذا رأيته يعصى توجعت، لأنه جل وعلا وتقدس وتنزه لا يعصى، مثله لا يعصى.

التوجع للعثرات، لسه كنا بنكلم بعض إخوانكم في درس في مسألة الأمر والنهي، الأمر والنهي عن المنكر هو ده يا جماعة وقود الأمر والنهي، اللي ماشي ومش في دماغه يأمر وينهى ليه؟ لأنه لم يكمل عنده الحب ولم يكمل عنده التعظيم والإجلال لله عز وجل، ولو كمل حبه وكمل تعظيمه وإجلاله لأمر ونهى، أقل شيء أنه ينهى بقلبه. الصف أهو دخل، ومنكم اللي بيروح يقعد على الشط، وقلنا لكم المثال ده قبل كده عشان ننبه على معنى الإنكار بالقلب، احنا مش بنقول إنك تروح تقعد على الشط حلال يعني، احنا بنقول ده الواقع إن في ناس بتروح تقعد على الشواطئ وبعدين لقيت المناظر بقى اللي على الشاطئ، فلقيت عادي، مش هقول لك عادي إنك حتى لو مش فرحان بس عادي اللي شايفه ده عادي، ما أنت مش منكره بقلبك، يعني ما أنت شايف حاجة تشمئز لها، لغاية ما يجي واحد لابس بنتاكور طويل شوية ولابس إيه فانلة حمالات ونازل البحر مثلاً ليه؟ عشان هو مغطي العورة، بغض النظر بيبجيب الحاجة الأيضا، فتبتدي تقرف من المنظر ده مثلاً ولا... طب أنت قرفت ليه من ده ومش قارفان من المناظر الثانية؟ عارفين ليه؟ النبي عليه الصلاة والسلام قال: «تعرض الفتن على القلوب كعرض الحصير عوداً عوداً»، إلى آخر الحديث، آخر الحديث قال النبي عليه الصلاة والسلام لما قال بقى القلب المجخّى كالكوز مجخياً، قلب أسود مرباداً كالكوز مجخياً، هي الكوز المقلوب يعني، لا ينتفع به، لا يعرف معروفاً ولا ينكر منكراً إلا ما أُشرب من هواه.

فهو تقييمه للواقع مش تقييم شرعي ديني، هو المنظر ده انشرح له صدره والمنظر ده انقبض منه صدره، ليه؟ ليه ده حصل؟ لو بيحصل لك ده أو شبيه ده اعرف أنك في الحتة دي، قلب أسود مرباداً كالكوز مجخياً، وشرحنا لكم قبل كده الكوز المجخي الكوز المقلوب، الكوز المقلوب ده عشان تنتفع به ينفع؟ يعني قلب لا ينتفع به صاحبه كالكوز مجخياً، قلب لا ينتفع، لا يعرف معروفاً ولا ينكر منكراً إلا ما أُشرب من هواه. أمال المفروض إيه؟ المفروض لما أرى تلك المناظر، أولاً أتوجع لتلك العثرات -احنا لسه ما جيناش للفاعلين، احنا ده كله في الفعل بس- أتوجع لتلك العثرات ليه؟ لأن أصحابها يبارزون بها ربنا سبحانه وتعالى، وتقعد كده تبص، الله عز وجل يعصى بكل تلك المعاصي، والناس تتفنن في عصيان الله عز وجل في هذه الأماكن، مش بس لبس ده في بعضها خمور وزنا وفواحش وقرف، وتلاقي بعض الشباب يعني بيلهث عشان يدخل الأماكن دي، وأنا عمال أقول ويحاول يجيب الكيو آر كود ومش عارف يعمل إيه، أنت رايح فين يا ابني؟ أنت رايح فين؟ أنت للدرجاتي قلبك أسود مربد؟ أنت مش شايف أنت رايح فين؟ مش شايف أنت عمال تحرجم تخش فين عشان تشوف إيه وتقعد مع مين؟ لا إله إلا الله، أين حبك لربك؟

أنا عاوز مثلاً أتخيل الآتي، أن في مكان من هذه الأماكن وبعدين عرفت أن كل اللي جوه المكان ده أو معظمهم غالبهم بعضهم بلاش يعني، يجتمعون كل يوم علشان يشتموا أبوك وأمك، المكان ده كل يوم معظم اللي فيه أو بعض اللي فيه بيجتمعوا كل يوم في مكان كده يقعدوا يشتموا في أبوك وأمك، هتبقى عاوز تروح تاخد الكيو آر كود وتدخل تتفرج وتقعد وتفرح؟ أصل أنا لما بنقعد نقول ربنا وحب ربنا الناس يعني إيه ما بتبقاش مستوعبة المعنى قوي، فلازم ندي أمثلة شبه دي، هتسعى لده أنك تقعد وسطهم وهم بيشتموا أبوك وأمك؟ طب هم يبارزون ربك بالمعصية، يفعلون ما يكرهه ربك سبحانه وتعالى. الغريب بقى الغريب أنك أصلاً ممكن تبقى رايح عشان تتفرج على ده، اللي في الحتة دي يا جماعة هو في حتة خطيرة، ليه؟ هو لا يتوجع للعثرات، لا يتوجع للعثرات، وقول مثل ذلك في كل مكان في معصية. ولذلك نصيحة النبي عليه الصلاة والسلام نصيحة غالية: «وليسعك بيتك».

قال بالخروج من التبعات، والتوجه للعثرات، آه التوجه للعثرات، يبقى تتوجع لعثرات نفسك، وتتوجع لعثرات غيرك. عثرات غيرك قلنا أول التوجع للعثرة لذات العثرة، لنفس العثرة، ثم أن تتوجع إذا نظرت إلى ذلك المتعثر، يبقى يدخل قلبك معنى ثاني، المعنى الأول هو تعظيم ربنا وحب ربنا، وأن ربنا لا يعصى، وكذا المعاني اللي اتكلمنا فيها. المعنى الثاني رأفتك بذلك العاصي، ذلك المسكين، يبقى في قلبك رأفة به ورحمة به وشفقة به، وكأنك لما نظرت إلى عثرة هذا العاثر تذكرت عثرتك أنت، ما هو إلا أنت الملاك اللي ما بتعثرش؟ فرأيت نفسك فيه، فرايت نفسك فيه، فكأن ملامحه اتغيرت قدامك وشفت نفسك وأنا ذلك العاصي برضه ولو ما كانتش المعصية دي فأنا بعمل غيرها، ورحمته وأشفقت عليه، والمعنى ده نجده كثيراً عند السلف يا جماعة، بل عند سيدنا النبي عليه الصلاة والسلام، ومش مع المسلمين، مع الكفار، مع الكفار؛ يعني يدخل على واحد شاب يهودي بيموت، عارفين القصة مش كده؟ ويأمره: قل لا إله إلا الله، أشفع لك بها غداً عند ربي، الولد يبص لأبوه، يقوم أبوه يقول له إيه؟ أطع أبا القاسم. أبا القاسم على طول نعرف أن أبوه يهودي لسه عارف أن هو، فقالها، النبي يعمل إيه عليه الصلاة والسلام؟ يخرج فرحان: الحمد لله الذي أنقذ به نسمة من النار. فين المعاني دي يا شباب؟ أيها المتدينون، كل واحد في دنيته، وكل واحد بيجري وراء لقمة عيشه، أنت عملت إيه دين ربنا سبحانه وتعالى؟

هي الناس دي مش موجعة قلبك ليه؟ يا اللي سهرانين تتفرجوا على كاس العالم، وأنتم بتبصوا على المدرجات، قلبك ما توجعش؟ كل دول كفرة، كل دول، قلبك ما توجعش؟ كل دول مخلدون في النار يوم القيامة. أنا ما بقولكش اتحركت عملت حاجة يا سيدي، قلبك يتوجع.

التوجع للعثرات، لماذا كان التوجع للعثرات من استقامة الإصلاح؟ هو يا جماعة اللي مش هيتوجع للعصر هيصلح؟ يعني اللي قاعد من 12 بالليل لـ 7 الصبح بيتفرج على ماتش واثنين وثلاثة في كاس العالم، وعادي، اللي كافر كافر، واللي ملحد ملحد، واللي شاذ شاذ، والزاني زاني ويجهرون، واللي قاعد ماسك الخمرة، أنت فاكر إنك أنت هتبقى في يوم من الأيام بتلك الحال سامع المتكلم جندياً من جنود الله؟ منين دي؟ هتجيبها إزاي؟ يعني هتجيبها إزاي؟ أنت لا تغار على محارم الله، لا تغار على دين الله، لا تغار على التوحيد. أنت عادي ولا في دماغك المعاني دي.

خلي بالك، عشان إيه هتقول لي ما تفورش بس يا شيخ، إحنا بس في الماتش وبنفرح وبتاع، ثاني وهعد لك، لو في وسط الماتش والكاميرا بتتحرك على المدرجات ولقيت ناس رافعة لافتة بيسبوا أمك كده على اللافتة، ساعتها تقول ما تفورش يا شيخ؟ أنا المفروض عادي أضايق ولا ما أضايقش؟ مش فارقة يعني؟ إحنا جايين نتفرج على الماتش هنتبسط، هتعمل ده مش هتعمل ده. فالتوجع للعثرات من الأمور التي بها يستقيم لك الإنابة إلى الله عز وجل إصلاحاً، أن ترجع إليه إصلاحاً. لأنك لما تتوجع للعثرات، سواء عثرة نفسك أو عثرة غيرك، هتبتدي تسعى في إصلاح ذلك الواقع. سواء كان واقعك أنت، لأنك متوجع لعثراتك، هو أنا هفضل لغاية إمتى هفضل ما فيش فايدة مني كده؟ هفضل لغاية إمتى واقع في الزفت اللي أنا واقع فيه ده؟ متوجع لعثرات نفسك، ساعتها تتغير، تغير يعني إيه تصلح من نفسك. متوجع لعثرة غيرك، إزاي ربنا يكفر به سبحانه وتعالى؟ إزاي ربنا يجهر بالمعاصي في كونه سبحانه وتعالى وأنا أعمل إيه؟ دوري إيه؟ التوجع للعثرات قال واستدراك الفائتات. يبقى أول الإصلاح أو ما يستقيم به الإصلاح: الخروج من التبعات، والتوجع للعثرات، واستدراك الفائتات.

يعني إيه استدراك الفائتات؟ السؤال اللي بييجي كتير: أنا تبت وأنا أهو عندي 20، 30، 50، 70 سنة، الصلاة الفائتة أعمل فيها إيه؟ أصليها يا شيخ؟ يعني 50 سنة؟ آه صلي الـ 50 سنة، أو يجيلك تأتي منيتك ولسه ما خلصتش، ربنا بقى يعفو عنك في الباقي. آه هتصلي الصلاة الفائتة، وهذا قول جمهور أهل العلم. ليه؟ لأن هذا استدراك للفائتات. هو أنا اللي سبت ولا أنت اللي سبت؟ أنت اللي سايب، فأنت اللي تجيب اللي عليك. استدراك الفائتات، ما فاتك استدركته، ده من استقامة الإنابة، من استقامة الرجوع إليه إصلاحاً، ما أنت بتصلح بقى عاوز تصلح؟ أصلح. يبقى صلي اللي عليك هتجيبها، الزكاة اللي ما زكيتهاش طول السنين دي هتطلعها، استدراك الفائتات.

فتستدرك ما فاتك من الخير، طب ده في الواجبات، طب في المستحبات تجيبها برده بس مش وجوباً، هنا بقى مش كده، يبقى متعود بتصوم الاثنين والخميس أو الثلاث أيام في نص الشهر ما صمتش، أقضي اليوم استدراكاً للفائتات، أقضي اليوم. فاتتك بعض السنن، زود من النوافل، زود في قيام الليل استدراكاً للفائت. فاتك وردك من الليل ائت به في النهار استدراكاً للفائت. وكل اللي أنا بقوله ده في نصوص شرعية، فاستدراكاً للفائتات، هذا أيضاً من الإصلاح. واضح جداً أن هذه المعاني كلها تدور في فلك الإصلاح: خروج من التبعات، توجع للعثرات، استدراك للفائتات.

قال: "وإنما يستقيم الرجوع إليه وفاء بثلاثة أشياء". إيه وفاء؟ ده إحنا سرحنا، إحنا قلنا هو في الأول عقد مقارنة بين الإنابة والتوبة، فقال لك التوبة رجوع إليه اعتذاراً وعهداً وإجابة، والإنابة رجوع إليه إصلاحاً، ده في مقابل الاعتذار، ووفاءً مقابل العهد. فإحنا دلوقتي بقى في الوفاء، خلصنا الإصلاح، أن ترجع إليه وفاءً كما رجعت إليه عهداً. أنت إمتى رجعت إليه عهداً؟ فكروني كده في التوبة، في أنهي ركن؟ الركن الثالث مش كده، اللي هو العزم على عدم العود، فكأنك عاهدت ربك ألا أعود يا رب، أعاهدك ألا أعود. طيب، فبقي أن تفي بوعدك مع ربك سبحانه وتعالى، وهذا من الإنابة أن ترجع إليه وفاءً كما رجعت إليه عهداً.

قال لك: وإنما يستقيم الرجوع إليه وفاءً بثلاثة أشياء: بالخلاص من لذة الذنب، وبترك استهانة أهل الغفلة تخوفاً عليهم مع الرجاء لنفسك، وبالاستقصاء في رؤية علل الخدمة. سهلة مش كده؟ طيب بيقول لك يستقيم الرجوع إليه وفاءً بثلاث حاجات: إذا أردت أن تفي بعهدك مع ربك في ثلاث حاجات لازم تعرفهم. أول حاجة بالخلاص من لذة الذنب، هو إيه اللي بيخليني يا جماعة لا نفي بالعهد؟ لذة الذنب، مش كده؟ وإلا كم مرة قلت يا رب آخر مرة وتاني يوم تعمل؟ طيب، تاني يوم عملت عشان بس ما نيأس الناس، عشان هو المفروض درس التوبة يتسمع يا جماعة، لأن هي الإنابة يعني هي درجة بعد التوبة، فلازم نبقى مستحضرين كل معنى قلناه في التوبة، لكن بس عشان الناس ما تيأس إحنا بنقول كده، يعني توب توبة صادقة في وقتها، غلبتك نفسك فوقعت في الذنب، توب ثاني، وربنا سبحانه وتعالى يعفو ويغفر، خلاص مش هنيأس في دي توبة، وإحنا تكلمنا في توبة.

لكن السؤال الآن، لماذا كلما عاهدت ربك وقعت في الذنب مرة أخرى أو نقضت عهدك مع ربك سبحانه وتعالى؟ واحدة من أهم الأمور هي لذة الذنب، لذة الشهوة. وهذا مقصود لله عز وجل أصلاً، لولا المشقة ساد الناس كلهم، الجود يفقر والإقدام قتالة، لولا المشقة كان زمان كلنا في الفردوس الأعلى، مش كده؟ طب ليه مش كلنا هندخل الفردوس الأعلى؟ وليه مش كل البشر تدخل الجنة؟ ليه؟ عشان حفت النار بالشهوات، وحفت الجنة بالمكاره. بس فهو ده بلاؤنا في الدنيا، إحنا في امتحان، إيه هو ده الامتحان؟ الشهوة والمكاره، ده بلاؤك في الدنيا، شهوات محببة إلى نفسك آخرها جهنم، ومكاره مبغضة ومكروهة إلى نفسك آخرها الجنة. وإلا مين فينا يحب يبقى رامي الساعة 12 يلاقي اللي بيقوم الساعة 2 يقول له قوم كده صلي ركعتين قبل الفجر؟ مين نفسه تحب ذلك؟ أشياء ثقيلة، عشان كده اتسمت أحكام تكليفية، قالوا من الكلفة والمشقة. طب ليه؟ عشان هو ده، هو احنا هنا عشان كده بس.

فيبقى واحدة من الحاجات اللي بتخلينا ما نعرفش نفي بالعهد نستمر على العهد: لذة الذنب. طيب عاوزين نفي بالعهد يبقى لازم تتخلص من لذة الذنب، طب إزاي أتخلص من لذة الذنب؟ هو نفس الكلام بتاع إزاي يندم على الذنب، ماشي يبقى نراجع كلام في التوبة، إزاي أندم على الذنب اللي بعمله؟ تقوم تتخلص من لذة الذنب، ممكن نزود عليه أن طبعاً إحنا ساعتها قلنا الافتقار لربنا برده والحاجات دي فمش هنعدها، إن ربنا، ما هو في الآخر يا جماعة مين اللي بيحبب إلينا الإيمان ويزينه في قلوبنا، ومين اللي بيكره إلينا الكفر والفسوق والعصيان ويجعلنا من الراشدين؟ هو ربنا سبحانه وتعالى، ﴿وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُولَٰئِكَ هُمُ الرَّاشِدُونَ﴾ [الحجرات: 7]. فربنا اللي بيحبب إليك الخير ويبغض إليك الشر، فاسأله سبحانه وتعالى.

ممكن بقى تزود أنك تنشغل بلذة تنسيك لذة ذلك الذنب، ودي بقى كل واحد، يعني ممكن لذة تبقى لذة شرعية، ممكن واحد يبقى عنده لذة مثلاً في العلم الشرعي، حد هنا كده؟ السلف كان عندهم كده، يقول لك عنده لذة في العلم بتنسيه مراته. مين من السلف؟ مراته قالت إيه؟ جوزها ما كان متجوزها هي بس، وفي الوقت ده كان التعدد موجود يعني بيكثروا، فكانوا يقولوا لها يا بختك جوزك متجوزك لوحدك، فتقول لهم إيه؟ هذه الكتب أشد علي من ثلاث ضرائر، جوزني لوحدي إيه، الكتب اللي عندي دي أشد علي، يعني يتجوز ثلاثة غيري بس يشيل الكتب دي.

فكانت لذتهم فين؟ في العلم، الإمام الشافعي يقول إيه: سَهَرِي لِتَنْقِيحِ العُلُومِ أَلَذُّ لِي ... مِنْ وَصْلِ غَانِيَةٍ وَطِيبِ عِنَاقِ وَصَرِيرُ أَقْلَامِي عَلَى صَفَحَاتِهَا ... أَحْلَى مِنَ الدَّوْكَاءِ وَالعُشَّاقِ وَتَمَايُلِي طَرَبًا لِحَلِّ عَوِيصَةٍ ... فِي الدَّرْسِ أَحْلَى مِنْ مُدَامَةِ سَاقِي وَأَلَذُّ مِنْ نَقْرِ الفَتَاةِ لِدَفِّهَا ... نَقْرِي لِأُلْقِيَ الرَّمْلَ عَنْ أَوْرَاقِي وَأَبِيتُ سَهْرَانَ الدُّجَى وَتَبِيتُهُ ... نَوْمًا وَتَبْغِي بَعْدَ ذَاكَ لِحَاقِي

فده الإمام الشافعي لذته فين؟ في العلم الشرعي. فإنت ممكن تدور على عبادة يكون لك فيها لذة تستمتع بها، ممكن الواحد يلاقي أن مثلاً لذته في أنه يجري ورا حاجات المساكين والمحتاجين والمعوزين، يحس ويشعر بأنه مبسوط، خلي بالكم مش يحس أنها عبادة لا، مبسوط، عنده لذة. فنقول له خلاص استغل ده، طالما أنت بتحب ده عندك لذة في ده، أهي دي تنسيك شوية لذة المعاصي، أو حتى لو ما فيش دور على لذة دنيوية، ما فيش مشكلة يعني، واحد يحب الجري مثلاً بيبسطه، الجيم بيبسطه، أي حاجة، فماشي الحال برده، يبقى روح لما تحس بأن لذة معصية معينة بتلح عليك اعمل اللذة المباحة اللي لو عملتها تخليك تنسى شوية لذة الحرام ده.

طيب يبقى يستقيم الرجوع إليه وفاءً بثلاث أشياء، بالخلاص من لذات الذنب، وبترك استهانة أهل الغفلة تخوفاً عليهم مع الرجاء لنفسك، يعني إيه الكلام ده بقى؟ واحدة يا جماعة ركزوا في الكلام ده من اللي بتخلينا ننقض العهود مع الله عز وجل، رؤية نفسك، الإعجاب بنفسك، فكده بقيت سهل للشيطان، خلاص أول ما أقول أنا التائب أنا الشيخ أنا الأخ فلان أنا الأخت فلانة أنا حافظة القرآن أنا المنتقبة أنا الملتحي، شوية تلاقي نفسك نازل على جذور رقبتك، بيحصل ولا ما بيحصلش؟ بيحصل مش كده؟ فواحدة من الحاجات اللي بتخلينا مش عارفين نواظب على عهدنا ووعدنا مع ربنا سبحانه وتعالى رؤية الإعجاب بالنفس ده، اللي بيقوله هنا اللي هو إيه بقى؟ بترك استهانة أهل الغفلة، اللي هو احتقار أهل الغفلة، تخوفاً عليهم مع الرجاء لنفسك.

يعني سيبك بقى من الشغل ده، إحنا حافظينه، اللي هو إيه؟ إنك بترك الاستهانة بأهل الغفلة تخوفاً عليهم مع الرجاء لنفسك، يبقى ما تحتقرش غيرك ويبقى جواك معنى أن خايف عليهم. طب وأنت يا حبيبي؟ لا أنا الشيخ ما يتخافش عليا. تخوفاً عليهم مع الرجاء لنفسك، أنت شايف نفسك إيه يعني؟ لو مش في الفردوس فإنا في الدرجة اللي بعديها، وبقيت الناس خايف عليهم يا مساكين يا عيني، مساكين ده أنت اللي مسكين! أمال المفروض يبقى إيه؟ العكس، أن ترجو لهم وتخاف على نفسك.

وإنما يستقيم الرجوع إليه وفاءً بثلاثة أشياء: بالخلاص من لذة الذنب، وبترك استهانة أهل الغفلة تخوفاً عليهم مع الرجاء لنفسك، يبقى ما أنت اللي مغسل وضامن جنة، وما أنت صاحب الأعمال التي لا يأتيها الرياء والعجب من بين يديها ولا من خلفها، فيبقى لازم نخرج من تلك الحال الغبراء، وإلا شوية وهتقع.

سنعرف بعد قليل في مسألة الحال إن شاء الله، فعدوها الآن.

قال: «وبالاستقصاء في رؤية علل الخدمة». ركزوا يا جماعة، نحن نتكلم عن الرجوع إليه. هاء، وفاءً بعد أن رجعت إليه عهدًا، وقلنا من آفات أو من المشاكل التي تجعلك تنقض العهد، هل زهقتم؟ الناس التي تمشي هذه زهقت؟ يعني الدرس يزهق؟

قلنا من الأشياء التي تجعلك تنقض العهد، أول شيء كان لذة الذنب، لهذا تنقض العهد. ثاني شيء كان رؤية النفس، أليس كذلك؟ ثالث شيء رؤية العمل. رؤية العمل تجعلك تنقض العهد؛ الأولى أنت كنت ترى نفسك: أنا الشيخ، وأنا كذا. الثانية: أن ترى عملك، "لا ده أنا اللي خاتم"، "ده أنا اللي بدي الدروس"، "ده أنا الناس دي كلها تابت على إيدي"؛ أنت شايف عملك قوي. هذا يجعلك تركن إلى عملك، وطالما ركنت إلى عملك، فشويه وستقع على جذور رقبتك، فتنقض عهدك مع ربك سبحانه وتعالى؛ ما أنت راكن إلى العمل.

طيب نعالجها كيف هذه؟ قال لك: بالاستقصاء في رؤية علل الخدمة. يعني وأنت في خدمتك لربك سبحانه وتعالى، هل تلك الخدمة هي الخدمة الخالصة التي لا علة فيها؟ أم هي الخدمة المشوبة التي فيها رياء، وفيها حب ظهور، وفيها حب مدح الناس، وفيها عجب، وفيها بدعة، وفيها ترك للسنة؟ وربما كان فيها جهل فوقعت في أشياء أبطلت العبادة. أن تستقصي في رؤية علل الخدمة، فلما تقعد تستقصي في رؤية علل الخدمة، هل ترجع وتقول: أنا الخدام؟ أنا اللي في الخدمة بقالي عشرين سنة، ثلاثين سنة؟ لن تفعل ذلك، لماذا؟ لأنك سترجع لحال عبد الله بن عمر رضي الله عنهما، قال كلمة عجيبة جداً: «لو علمت أن الله تقبل لي ركعتين، ما أحببت البقاء في دنياكم». لو عرفت فقط أن ربنا تقبل لي ركعتين، أنا أريد أن أموت الآن. هو يبالغ أم فعلاً هذه حالته؟ هي هذه حالته. لماذا؟ لأني لا أدري، هل الركعتان اللتان أؤملهما، لا أجيء يوم القيامة ألاقي فيهما رياء؟ ألاقي فيهما سهواً شديداً في الركعتين فربنا غضب علي؟ فأثناء الركعتين تكون بين يديه وتلتفت إلى غيره، وتلتفت إلى دنيا، فيكونان سبباً لغضب ربنا علي، لا قربي منه.

هنا يا جماعة، لا أقنط أحداً من رحمة الله عز وجل أبداً، بس نحن الآن نتكلم في مسألة معينة هو الذي ذكرها الشيخ، فهذا وقت هذا الكلام: أن تستقصي في رؤية علل الخدمة. فإذا فعلت ذلك، هل سيظل عندك عجب بعملك؟ هل تركن إليه أبداً؟ أنت ستكون خائفاً من هذه الأعمال؛ خائفاً من أعمال الخدمة. وهذا سيدنا النبي قاله عليه الصلاة والسلام لما عائشة استشكل عليها قول الله عز وجل: ﴿وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ﴾ [المؤمنون: 60]، خائفين. فهي تسأل النبي عليه الصلاة والسلام: "أهذا الزاني والسارق؟" قال لها: «لا، ليس هؤلاء». أمال من؟ ﴿وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ﴾، هو الذي يصوم ويصلي ويتصدق وهم يخافون ألا يتقبل منهم. يبقى ربنا ذكر تلك الحال في القرآن، الذي يستقصي في رؤية علل الخدمة سيصل لتلك الحال: يؤتي ما أتى وقلبه وجل، خائف: ربنا تقبل مني الدرس هذا؟ ربنا تقبل مني الكلمة التي قلتها؟ ما يمكن ما تقبلش، ما يمكن هو ده حظي منها أصلاً، ثناء الناس والشهرة. لن تكون فاضياً تقعد تمن على ربك بعملك؛ بالعكس، أنت مشغول بتجويد العمل لأنك شايف علل الخدمة، فعاوز تجود وتسد تلك العلل.

ناقصة حاجة واحدة الآن؛ نحن قلنا الرجوع إليه: أول شيء كان الرجوع إليه إصلاحاً كما رجع إليه اعتذاراً، والرجوع إليه وفاءً كما رجع إليه عهداً، والرجوع إليه حالاً كما رجع إليه إجابة. زي ما في التوبة قلت: يا رب تب علي، وهذا إجابة لسؤال ربك منك التوبة، قلتها بلسانك: يا رب تب علي، فلا بد أن ترجع إليه حالاً؛ حالاً يعني أن يكون حالك هو حال الرجوع، أن ترجع إليه حالاً كما رجعت إليه إجابة. وإنما يستقيم الرجوع إليه حالاً بثلاثة أشياء: باليأس من عملك، وباليأس من عملك، بمعنى من اثنين يا جماعة؛ إما أنك يائس من عملك أن يدخلك عملك الجنة وإن كان عملك جيداً أصلاً. يعني في معنيين في اليأس من العمل؛ المعنى الأول أنه حتى وإن صح لك عمل، فهو لا يستقل بدخولك الجنة، هل أحد عنده إشكال في هذه؟ إنما يستقل في حالة من؟ واحد زي أبي بكر مثلاً، صح. طب واحد زي النبي صلى الله عليه وسلم؟ أيضاً، لا ولا النبي عليه الصلاة والسلام؛ هذا كلام ليس كلامي أنا، بل كلام النبي عليه الصلاة والسلام: «لن يدخل أحداً منكم الجنة عمله»، قالوا: ولا أنت؟ قال: «ولا أنا، إلا أن يتغمدني الله برحمة منه». لا، ولا أنا، عملي لا يدخلني الجنة، هذا النبي عليه الصلاة والسلام. فيبقى هذا أول معنى من أن تيأس من عملك.

المعنى الثاني بقى من الإياس من العمل، نحن قلنا في المعنى الأول أنه وإن صح لك عمل فلن يدخلك الجنة، المعنى الثاني هو: هل أصلاً صح لك عمل؟ هنا الشيخ يقول لك: ائس من عملك، يعني اعبد ربنا على قدر ما تستطيع، وبعد ما تعبد ربنا تقول: «اللهم إني ظلمت نفسي ظلماً كثيراً كبيراً ولا يغفر الذنوب إلا أنت». بعد ما تخلص العمل خالص، من الذي كان يقول الدعاء هذا؟ أبو بكر، يقوله متى؟ في نهاية صلاة أبي بكر؛ يعني سيدنا أبو بكر ليس جالساً جنبك بعد ما تخلص صلاة فيقوله لك أنت، هذا أبو بكر رضي الله عنه يقوله في نهاية صلاته هو، التي عامله مثل صلاة أبي بكر هذه التي بعد ما يخلص يسأل النبي عليه الصلاة والسلام: ماذا أقول؟ يقول له: بسيطة، قل: «اللهم إني ظلمت نفسي ظلماً كثيراً ولا يغفر الذنوب إلا أنت، فاغفر لي مغفرة من عندك وارحمني إنك أنت الغفور الرحيم». هذا أبو بكر، يبقى تيأس من عملك بأن تيأس من أن ترى عملك أصلاً. يعني لا أشتغل؟ لا، اشتغل واجتهد، وبعدين تقول: عملي هذا لا يعمل أي شيء. أمال بشتغل ليه؟ أنا أتعرض لنفحات الله عز وجل، أليس النبي قال: «إلا أن يتغمدني الله برحمة منه»؟ صح يا جماعة، عشان نفهم نحن بنعمل ليه. طيب طالما هو هكذا نحن نعمل عشان نكون في محل الرحمة، بس ما أصل الرحمة ليست لكل الناس ﴿إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ﴾ [الأعراف: 56]. فيبقى نحن ندخل الجنة بالرحمة، آه، فنعمل ماذا؟ نكون من الفساق والفجرة؟ لا، نكون من المحسنين، فلما نكون من المحسنين ربنا يرحمنا فيدخلنا الجنة، فعشان كذا نحن نعمل. فهمتم هذه؟ بس يبقى تيأس من عملك، أنه أصلاً هل صح لك عمل أصلاً؟

هذا معنى تيأس من عملك، يعني وإن صح لك عمل، هل يستقل ذلك العمل بدخولك الجنة؟ يبقى أنت يئست من عملك خالص، أليس كذلك؟ طيب، لما تيأس من عملك، هذا سيعمل ماذا؟ خلاص أنت يئست من عملك، سيعمل ماذا؟ سيقوي العلاقة بينك وبين ربك، ما أنت فهمت كذا أنه ما فيش فائدة، فيبقى لك حال مع ربنا. فهمتم هذه؟ يبقى لك حال مع ربنا، لماذا؟ ما هو أنا لا أساوي شيئاً من غيره، أنا من غيره سأضيع، لماذا؟ أصل عملي ضائع، ولو مش ضائع لن يدخلني جنة، فأنا به سبحانه وتعالى، فتبدأ تنشأ بينك وبينه حال؛ أهي هذه الحال التي نريد أن نصل إليها مع ربنا سبحانه وتعالى. ولذلك هنا سيقول: كيف أصل للحال؟ أن ترجع إليه حالاً، أول شيء باليأس من عملك، ثاني شيء ومعاينة اضطرارك؛ أنت مضطر إليه في كل شيء، في كل شيء، مثل ما أنت مضطر إليه في أن تترك المعصية التي بقالك سنين لا تعرف تبطلها هذه، ومضطر إليه في أن تستقيم على الطاعة التي بقالك سنين تمشي على سطر وتترك سطراً فيها، والله العظيم أنت مضطر إليه في حركة يدك التي تحركت الآن هذه، مضطر إليه، فمن غيره لن ترفع يدك، لن تعرف؛ مضطر إليه في قعدتك وفي وقفتك، مضطر إليه في كل شيء. هو من منا يعرف يحرك إصبعاً إلا أن أذن الله لهذا الإصبع بالتحرك؟ ما في أحد، رمش عينك هذا ما في أحد. ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]، فربنا قائل لكل شيء يحدث في الدنيا هذه: كن. أن تعاين اضطرارك لربك سبحانه وتعالى.

ثم وشيم برق لطفه بك سبحانه وتعالى، شيم البرق، يعني ما هو يا جماعة حين يحدث البرق بين السحب فتبدأ أنت تتلمس لمس البرق هذا أن تراه من بين السحب لكي تراه، فهذا الشيء الخفي الذي ممكن يكون محجوباً بأشياء، فلطف الله عز وجل خفي، "شيم" يعني تلمس، واللطف أصلاً معنى اللطف هو الشيء الخفي، شيء لطيف يعني شيء خفي، فلطف الله عز وجل بك، ليس أي أحد يعرف يا جماعة يراه، والله والله ما أي أحد يعرف يراه. وأنا ضربت لكم سأقوله لكم الآن، هو عندما كنت أنت تمارس العادة السرية وخلصتها ويمكن فعلتها عشرات المرات، مئات المرات، ولا مرة أحد يفتح عليك الباب فيراك؛ من تلمح لطف الله به في هذه الحال؟ هو إيه الذي يمنع يعني؟ إيه الذي يمنع؟ لطفه، لطيف. بلاش، ما الذي منعك أن تقبض على تلك الحال؟ لطفه، لكن نحن لا نرى هذا، لا نرى اللطف. وقل مثل ذلك بقى في أي معصية، وفي الطاعات، وفي، قلنا لكم قبل ذلك أيضاً: تبقى نائماً على جنابة، نائماً آخر حاجة قافل السكة في وجه أمك، آخر حاجة أنك مزعل أباك، أنك ظالم زوجتك ويمكن ضاربها، أنك أغضبت زوجك الذي هو جنتك ونارك، الذي لو أغضبته ونمت وأنت ظالمة له الملائكة تلعنك حتى تصبحين، آخر حاجة نائمة على هذا أو نائم على هذه، وتصحو؛ هو لماذا صحوت يعني؟ يعني أنت أخذت صكاً من ربنا أنك غداً ستصحو؟ أمهلك بلطفه سبحانه وتعالى، لطف. وكم حاجة حدثت وأنت لا تعرفها لغاية وستعيش وتموت لا تعرفها، وكانت المفروض تصيبك ولم تصبكَ، لأنك ما تعرف وعشان كذا ما تعرفها، وكان الفرق بين أنها تصيبك وأنها ما أصابتك مثلاً أن أحداً توسّط من خلفك وقال يا جماعة لا نؤذيه، وأنت لا تعرف، ونجوت بلطفه سبحانه وتعالى، شيم برق اللطف. فنحن كذا كلنا عايشون باللطف، كلنا.

طيب لما نجمع الثلاث حالات هذه أو الثلاث أشياء هذه، تصير بينك وبين الله حال من الاستقامة، حال من الاعتماد عليه، حال من رؤية فقرك وغناه، وحاجتك واستغنائه سبحانه وتعالى، فكانت تلك الحال التي بعد الإجابة، فرجعت إليه حالاً كما رجعت إليه إجابة. أقول قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.