بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وآل بيته كما صليت على آل إبراهيم إنك حميد مجيد. أما بعد:
النهارده إن شاء الله هناخد المنزلة الخامسة من منازل السائرين، وهي منزلة التفكر. يقول الإمام الهروي: قال الله عز وجل: ﴿وَأَنزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ وَلَعَلَّهُمْ يَتَفَكَّرُونَ﴾ [النحل: 44]. وقبل ما نقرأ كلام الهروي ونعلق عليه، منزلة التفكر منزلة مهمة يا شباب، ولذلك تكلم عنها العلماء قديماً وحديثاً.
وقبل أن يتكلم عنها العلماء، فالقرآن مليء بآيات تدعونا إلى التفكر، كقول الله عز وجل: ﴿وَيَتَفَكَّرُونَ فِي خَلْقِ السَّمَاوَاتِ وَالْأَرْضِ﴾ [آل عمران: 191]، وقوله تعالى: ﴿أَوَلَمْ يَتَفَكَّرُوا فِي أَنفُسِهِم﴾ [الروم: 8]، وقوله تعالى: ﴿مَثْنَىٰ وَفُرَادَىٰ ثُمَّ تَتَفَكَّرُوا﴾ [سبأ: 46]، وقوله: ﴿إِنَّ فِي ذَٰلِكَ لَآيَةً لِّقَوْمٍ يَتَفَكَّرُونَ﴾ [النحل: 11].
فقطعاً أن كل هذه الآيات وغيرها من آيات القرآن لم تأتِ عبثاً، فحاشاه سبحانه وتعالى أن يكرر الأمر والندب إلى التفكر وتكون مسألة ثانوية هامشية. يعني إحنا نقدر نقول إن دي مسألة من مسائل الدين المركزية، أن نتفكر، وهنفهم النهارده يعني إيه نتفكر، وفي إيه نتفكر، وفي إيه ما نتفكرش، ده كل ده درس النهارده.
لكن إحنا عاوزين نفهم إن التفكر مهم جداً في ديننا، حتى قال أبو الدرداء رضي الله عنه: تفكر ساعة خير من قيام ليلة. وأثر عن ابن عباس رضي الله عنهما قال: ركعتان مقتصدتان في تفكر خير من قيام ليلة والقلب ساهٍ. وقال: لأن أقرأ البقرة في ليلة وأتفكر فيها أحب إليَّ من أن أقرأ القرآن هذرمة، يعني بسرعة بلا تفكر.
والسلف روي عنهم من أحوالهم أنهم كانوا كثيري التفكر. قال بات هرم بن حيان عند حممة -رجل يسمى كذلك حممة-، فبات حممة يبكي إلى الصباح، فقال له هرم: ما أبكاك؟ فقال: ذكرت ليلة صبيحتها تناثر نجوم السماء، يعني تذكر يوم القيامة، فبكى ما استطاع أن ينام، بكى حتى الصباح، فده نوع تفكر. ووقف مالك بن دينار ليلة في صحن داره إلى الفجر وقال: ما زال أهل النار يعرضون عليَّ بسلاسلهم وأغلالهم إلى الصباح، يعني واقف بره في الحوش كده، ما دخلش البيت، قعد يتفكر في بعض أحوال القيامة فذهل عن حاله وعن نفسه حتى أصبح.
وإلى غير ذلك، وده ما هواش درس النهارده، إحنا مش جايين النهارده نحكي هذه الآثار، وإنما بس عاوزين نحمس الناس إننا محتاجين هذا النوع، خصوصاً في هذا الزمان، فالزمان وتيرته سريعة جداً، فما بقاش عند الناس وقت إنها تقعد تتفكر. ولذلك قالوا إن بداية التفكر العزلة أصلاً، إنك تخلو بربك سبحانه وتعالى وتخلو بآيات ربك علشان تعرف تتفكر، ده فين دلوقتي بيحصل؟ ما حدش يعرف يعتزل دلوقتي، حتى لو قفلت عليك بابك وقفلته عليك أوضة نومك، التليفون في إيديك، الدنيا كلها مفتوحة عليك. طب إزاي هنتفكر؟ ولذلك حرمنا تلك العبادة، عبادة التفكر حرمناها.
تعالوا بقى نقرأ كلام الهروي رحمه الله عشان نفهم التفكر، قال: اعلم أن التفكر تلمس البصيرة لاستدراك البغية. يعني إيه تفكر؟ لو جيت قلت لك يعني إيه تقعد تتفكر؟ فهو بيقول لك التفكر هو تلمس البصيرة لاستدراك البغية. البصيرة المقصود بها عند القوم العقل، قالوا إن العقل للقلب بمثابة البصر للجسد، يعني أن قلبك يرى بنور عقلك كما أن جسدك يرى بنور بصرك. مفهومة دي؟ فيبقى التفكر إيه هو؟ إنك تستعمل عقلك علشان توصل لبغيتك، توصل لغايتك. طب هي إيه غايتك اللي عاوز توصل لها لما تستخدم عقلك؟
عشان نفهم يا جماعة إيه الغاية لازم نفكك الأول مسألة إن التفكر استعمال العقل. قالوا إن معنى التفكر إنك تأتي بمعلومين لتنتج معلوماً ثالثاً. يعني إيه؟ واحد دلوقتي مؤثر للدنيا، وحركاته كلها للدنيا، وقلبه غافل عن الآخرة ولا يكاد يؤثر الآخرة في شيء، ومهما لاحت له الدنيا طار إليها، من حلال، من حرام، من شبهة، مش فارق، وربما علل لنفسه اقتحام الحرام، يبقى عارف إن كذا حرام وكذا من الكبائر وكذا ربا، ويقول لك: لا، ما هو فلان قال وفلان عاد، ولبستها في رقبتي عالم، وأخرج. أنا هنا مش بقول مش بكلم اللي هو فعلاً مقتنع بفلان عالماً، لا، واحد عارف إنه بيقتحم الحرام لكن بيدور على أي حجة يخرج بها ليه؛ لأنه مريد للدنيا راغب فيها.
طيب هو دلوقتي عاوز ما يبقاش كده، يعمل إيه؟ ومش عارف يؤثر الآخرة. قالوا إنه يقعد يفكر في معنى في أكثر من معنى، لما يجتمعوا ينتجوا له معنى إيثار الآخرة، فقالوا مثلاً إنه يقعد يفكر في معنى إن الباقي يؤثر على الفاني. خلي بالك إحنا ممكن نقول جملة بسيطة يعني تحسها: آه، الباقي يؤثر على الفاني، لكن ما تبقاش متلبس بها أو ما يبقاش قلبك متشبع بهذا المعنى. روح بقى شبع قلبك بالمعنى ده إن الباقي يؤثر على الفاني. وبعدين تحدث نفسك إن الآخرة باقية والدنيا فانية. طب دول ينتجوا لك إيه؟ إن الآخرة تؤثر على الدنيا. الكلام يظهر إنه بسيط، مش كده؟ لكن علشان نتلبس بده محتاجين بقى إيه؟ نقرأ كثير، إحنا هنعرف دلوقتي إن المعارف هي رأس مالك، هيجي معانا الكلام ده إن شاء الله. فتنتج لك المعنى ده، وخلونا بقى في المثال ده عشان المثال ده هيمشي معانا لآخر منزلة التفكر يا شباب.
فيبقى هنا بغيتنا إيه هي في المثال ده؟ يبقى بغيتك إنك توصل إنك تؤثر الآخرة على الدنيا. طب عشان تؤثر الآخرة على الدنيا استخدمت إيه؟ استخدمت عقلك. بإيه؟ بمقدمات، المقدمات أنتجت لك نتيجة، النتيجة دي هي نتاجها أن تؤثر الآخرة على الدنيا. طبعاً الدرس ما هواش درس زهد ولا درس إيثار الآخرة على الدنيا عشان أسهب، أصل الجملة دي كل جملة من دول إحنا ممكن نقعد فيها درس، إن الباقي يؤثر على الفاني، وأن الآخرة باقية والدنيا فانية، يبقى نؤثر الآخرة على الدنيا. الكلام كان ممكن القلوب ما تحسوش وهي قاعدة؛ لأننا ما إحناش فاهمين الجمل، وما إحنا عاوزين أمثلة نضربها على الجمل وكلام وعظي في هذه الجمل عشان في الآخر ننتج ده، لكن ده مش الدرس. إحنا بنفهم يعني إيه نتفكر وليه محتاجين إننا نتفكر. يبقى عشان نصل إلى بغيتنا.
طيب، قال: وهو ثلاثة أنواع، يعني التفكر ثلاث أنواع، وهنعرف إن منهم نوع نحن ممنوعون منه، يعني ثلاث أنواع منهم نوع مش عاوزينه: فكرة في عين التوحيد، وفكرة في لطائف الصنعة، وفكرة في معاني الأعمال والأحوال. عشان نفهم يعني إيه أعمال والأحوال، تعالوا نأخذ المثال اللي معانا برضه. قالوا إن الفكر ينتج علماً، والعلم ينتج حالاً، والحال ينتج عملاً. يعني إيه الكلام ده؟ يعني دلوقت لما نيجي نقول إن الحرام يلوح لك فتطير ليه، ده إيه؟ ده عمل ولا حال ولا علم ولا إيه؟ عمل، مش كده؟ ده عمل، يعني أول ما تلاقي الحرام تجري للحرام وتأخده عادي جداً، ده عمل. العمل ده أنت بتعمله ليه؟ عشان في حال عندك، الحال اللي هو إيه؟ أنك تؤثر الدنيا على الآخرة. دي حال في قلبك، إن قلبك بيؤثر الدنيا على الآخرة، فمش فارق حصلت الدنيا من حلال ولا حرام، فهذا الحال أنتج عملاً إنك بتجري للحرام ومش فارقة معاك.
طب الحال ده إيه اللي أنتجه؟ غياب العلم. وهنا لما نقول غياب العلم يعني غياب التحقق بالعلم، لأن الجملتين اللي أنا قلتهم سهلين وأي حد يعرف يقولهم. أي حد، حتى اللي بياكل الحرام، يعرف يقول الجملتين اللي أنا قلتهم، مش كده؟ لكن هو غير متحقق بهذا العلم، غير متلبس بهذا العلم. واحد يجي يشتكي، يقول: أنا مش عارف أبطل حرام. فالخطاب الذي يوجه له نقول له: إن اقتحامك الحرام ده ما هواش مرضك، الكلام ده إحنا قلناه لكم قبل كده. اقتحامك الحرام ده عرض مش مرض.
تاني، اقتحامك الحرام عرض مش مرض، عارفين الفرق بين العرض والمرض؟ عارف لما يجي لك سخونية وتروح للدكتور تقول له أنا سخن، هل في عندنا مرض اسمه مرض السخونية؟ ما فيش حاجة كده، السخونية ممكن تيجي من ألف مرض. السخونية عرض، جسمك بيديك إنذار إنك عندك مرض، فهتروح للدكتور تقول له عندي سخونية يديك مخفض ويقول لك امشي، مستحيل. يقعد يكشف عليك ويستبعد أمراض معينة ويقول يسمع بقية أعراضك إيه عشان يقدر يحدد مرضك أنهي نوع من ثلاث أمراض، وبعدين لما يحدد الثلاثة يبتدي يستبعد واحد في الثاني، يقول لك بس أنت شكلك عندك كذا، طب خذ الدواء الفلاني، الدواء ده بتاع إيه بقى؟ بتاع المرض عشان يختفي العرض اللي هي السخونية. فالسخونية عرض مش مرض، يعني خلينا نقولها بلفظ آخر: السخونية علامة على وجود مرض عندك، موافقين على ده؟
فأما تيجي تقول أنا بقتحم الحرام، مش عارف أبطل الحرام، مش عارف أبطل فواحش، مش عارف أبطل عقوق، مش عارف أبطل تقطيع في الصلاة، أي حاجة، نقول لك كل هذه أعراض علامة على وجود حال غير مرضية. أنت عندك حال في قلبك مش مرضي، يعني حالة لازم تغيرها لحالة أخرى. فممكن يكون الحال اللي في قلبك غير مرضية دي مثلاً اللي هي إيه؟ الكبر. فالكبر دائماً يدفعك على إنك تغتاب الناس وتحتقر الناس، فأنت تقول: مش عارف أبطل غيبة، مش عارف أبطل أتريق على الناس، فنقول لك ده مش مرضك، دي علامة على وجود حال غير مرضية، تعال بقى نفتش على الحال غير المرضية اللي عندك دي إيه، أنت عندك كبر، عندك رؤية نفس، عندك عجب بالنفس، وهكذا، فروح يا ابني صلح حالك دي، ولما تصلح حالك دي إيه اللي هيحصل في السخونية؟ هتختفي، مش كده؟ أول ما تصلح الحالة اللي في قلبك التعبانة دي، هتلاقي نفسك لا بتغتاب ولا بتتريق على مخاليق ربنا ولا الحاجات دي خالص.
تقول لي: طيب جميل فهمتك، عاوز أصلح الحال. نقول لك: عشان تصلح الحال لا بد لك من علم. يبقى عشان تصلح الحال لازم علم تصلح به تلك الحال. فمثلاً لو المثال اللي أجراه الله على لساني مسألة الكبر والغيبة والحاجات دي، فتجي تقول طب خلاص، أنا عرفت إن عندي الكبر، فأقول لك فروح اتعلم جزاء المتكبرين إيه، وإنه لا يدخل الجنة من كان في قلبه مثقال ذرة من كبر، ويحشر المتكبرون يوم القيامة كأمثال الذر، زي النمل الصغير ده، يطؤهم الناس بأقدامهم، عاملهم الله بنقيض قصدهم، ليه؟ لأنك نازعت الله الكبرياء: «العظمة ردائي والكبرياء إزاري، فمن نازعني واحداً منهما عذبته». فأنت تنازع الله عز وجل في كبريائه دلوقتي، لأن الله هو المتكبر، فروح شوف أنت بتنازع مين عشان تعرف مين اللي هيخاصمك، أنا دلوقتي بنازعك في شيء، فأنت كده خصمي، مش كده؟ حاجة بتاعتك وخدتها منك أو بنازعك فيها، فأنت دلوقتي خصمي. فأنت عارف أيها المتكبر من خصمك؟ الله. مش عايزين نخرج عن موضوع الدرس برضه، ده اسمه إيه اللي أنا عمال أحكي فيه ده؟ علم، مش كده؟
لما تتعلم الحاجات دي وحاجات غيرها، يقوم حال قلبك ينصلح، مع مجاهدة وحاجات تانية طبعاً، يقوم حال قلبك ينصلح، لما حال قلبك ينصلح، أعمالك تنصلح. طيب شوية الدقيقتين تلاتة اللي فاتوا دول وأنا عمال أتكلم كده، أنا بخاطب إيه؟ عقلك، مش كده؟ عمال أقول لك تعال نشوف جزاء المتكبرين، جزاء المتكبرين واحد، اتنين، تلاتة، أربعة، وأنت عندك كبر، دول أهم مقدمتين ينتجوا إن جزاءك أنت لو مت على كده -ما هو أنت عندك كبر وده جزاء المتكبرين- ينتجوا إيه دول؟ إنك لو أنت مت على الحالة دي جزاؤك أهو إلا أن يعفو الله طبعاً، فده كله اسمه تفكر. فهمتوا الترتيب؟ يبقى أنت بتتفكر، والتفكر ينتج لك علماً ما كان موجود عندك بمقدمتين، المقدمتين كانوا عندك أو مش عندك فتروح تحصلهم، وبعدين تركبهم على بعض فينتجوا لك نتيجة، وبعدين النتيجة دي تثمر لك حالاً، فالحال ده يثمر عملاً. فهمتوا بقى يا شباب؟
مشكلتنا فين؟ كل شكاوى معظم شكاوى الناس دلوقتي، هم مش شايفين غير الأعراض. يعني نادراً أما تلاقي واحد جاي بيشتكي من قلبه، ده نادر، يعني إن حالتي قلبي مش عارف إيه، مش عارف أحب ربنا، مش عارف أعمل، نادر أما تلاقي كده، كله بيشتكي من إيه؟ من أعمال الجوارح، أنا مش عارف أغض البصر، مش عارف أبطل العادة السرية، مش عارف أبطل فواحش، مش عارف أبطل أمد إيدي على الفلوس، مش عارف أبطل رشوة، مش عارف أبطل ربا، كلها ودي كلها في الآخر أعراض، لو سلم قلبك خلاص، القلب ملك والجوارح جنود، خلاص، طيب.
فهمتوا فكرة الأحوال والأعمال عشان بعد كدة لما نشرحها نبقى خلاص فاهمين الدنيا ماشية إزاي. يبقى عندنا التفكر ثلاث حاجات: فكرة في عين التوحيد، وفكرة في لطائف الصنعة -وهنفهم كل واحدة إن شاء الله- وفكرة في معاني الأعمال والأحوال. فأما الفكرة في عين التوحيد فهي اقتحام بحر الجحود. يبقى عاوزينها ولا مش عاوزينها؟
فالفكرة في ذات الله عز وجل هي اقتحام لبحر الجحود. ولذلك جاء في الحديث: «تفكروا في آلاء الله ولا تفكروا في ذات الله»، وفي رواية: «تفكروا في الخلق ولا تفكروا في الخالق». وهذه الأحاديث مرفوعة ضعيفة، لكن بمجموعها تدل على أن لها أصلاً، وهذا كلام الحفاظ مثل السخاوي وغيره، وصحت موقوفة، والمعنى متفق عليه عند أهل السنة. نحن لا نتفكر في ذات الله، وهناك حديث في هذا الموضوع صحيح سنؤخره قليلاً حتى نفهم لماذا لا نتفكر في ذات الله.
هذا الدرس قد يكون ثقيلاً قليلاً ولكنه مهم، وسيحل لنا إشكالات ومسائل. لماذا ضل من ضل في باب الأسماء والصفات؟ لأنه اقتحم بعقله ما لا يدرك بالعقل أصلاً. فالله سبحانه وتعالى خلق أجناساً من المخلوقات وهي مدركات تُدرك، وخلق فيك مدركات تدرك بها بعض تلك الأجناس، فنحن لا ندرك كل أجناس المخلوقات بل ندرك بعضها فقط، فكل مدرك فيك اختصه الله بأنواع من المدركات يدركها.
لنتخيل طفلاً لا يملك إلا حاسة اللمس، فهو يدرك الحرارة والبرودة والخشونة والنعومة، لكن هل يمكن أن نجعله يدرك الفرق بين اللون الأسود والأحمر؟ هو لن يفهم؛ لأنه فاقد للحاسة المدركة لهذا النوع من المدركات. وكذلك لو كان إنسان يملك حاسة اللمس والبصر ولكنه فاقد لحاسة السمع، فإنه لن يدرك جمال الصوت أو قبحه. وهكذا بقية الحواس؛ فالمدرك لا يدرك ما هو خارج عن قدرة أدواته.
وحين يكبر الطفل وتنمو بداية العقل عنده، يبدأ بإدراك أمور أخرى، لكن عقله لا يزال غير مكتمل. فلو أعطيت طفلاً ورقة نقدية واحدة قيمتها مائتان، وأعطيت آخر عشر ورقات قيمتها عشرة، سيظن صاحب العشر ورقات أنه الأغنى لأنه يدرك الكثرة العددية، لكنه لا يدرك قيمة المجموع. هو يرفض الاقتناع لأن عقله لم ينمُ بعد ليصل إلى مدرك الحساب والقيمة.
وعندما يكتمل العقل، يبدأ الإنسان بإدراك أمور بالعقل. وهنا وقع الملاحدة وغيرهم في خطأ محاولة محاكمة كل ما في الكون إلى العقل، متجاهلين أن العقل ليس هو الأداة الوحيدة لإدراك كل شيء. فالله عز وجل جعل من المخلوقات ما يُدرك بالعقل، ومنها ما لا يُدرك به أصلاً، كالمادة السوداء والطاقة السوداء التي لا يعرف العلماء كنهها. حتى الجنة، وهي مخلوق من المخلوقات، أخبرنا الله أنها فيها ما لا عين رأت ولا أذن سمعت ولا خطر على قلب بشر، فعقولنا أعجز من أن تدرك حقيقتها.
ولله المثل الأعلى، فذات الله عز وجل لا تُدرك بالعقل أصلاً. العقل له مجال محدود، وغاية العقل أن يدرك أن لهذا الكون إلهاً، لكن صفات هذا الإله وما يحبه وما يكرهه لا يستقل العقل بمعرفته، فكان لا بد من الوحي. فلو حاول الإنسان أن يقتحم بعقله ما لا يُدرك بالعقل، فإنه سيضل. ولذا، حين يأتيك الشيطان ويسألك: "من خلق كذا؟ ومن خلق كذا؟" حتى يصل بك إلى "من خلق الله؟"، فقد علمنا النبي ﷺ أن نستعيذ بالله وأن نكف عن هذا التفكير.
إن ما ينجينا من هذه الورطات هو أمران: الاعتصام بضياء الكشف والتمسك بالعلم الظاهر. العلم الظاهر هو الرجوع إلى ما قاله الله عن نفسه في القرآن، وما قاله عنه نبيه ﷺ، فنثبت ما أثبته وننفي ما نفاه. أما الأمر الآخر فهو المنحة الإلهية، وهي يقين يقذفه الله في قلبك، أو توفيق وتسديد إلهي، وهذا من فضل الله على عباده.
لا درس زيك ولا عرف زيك ولا عمل حاجة، وتلاقي ربنا تلاقيه هو كده إيه مع ربنا كده لوحده، وعنده يقين في الله أشد من الله، يبقى أنت بتدرس عقيدة للناس، ويجي الموقف يحصل لك ويحصل له، قلبه كيضطرب. وهو يقول لك يا عم توكل على الله اللي خلقنا هيرزقنا. إيه ده؟ ده درسك اللي لسه مديه. لكن لما حصل الموقف، الثبات من عند الله سبحانه وتعالى؛ هو ربنا قذف له بقى يقينا في قلبه إلهاما أي حاجة من الحاجات دي.
يبقى لا ينجي من هذا إلا الاعتصام بضياء الكشف والتمسك بالعلم الظاهر. وأما الفكرة في لطائف الصنائع فهي ماء يسقي زرع الحكمة، ده النوع التاني يا جماعة من أنواع التفكر، وده اللي إحنا عاوزين نتفكر فيه؛ يعني النوع الأول مش عاوزينه أصلا يعني مش عاوزين نقتحم، وعرفنا ليه مش عاوزين نقتحم.
النوع التاني أن تتفكر في لطائف الصنائع. يعني إيه تتفكر في لطائف الصنائع؟ يعني أنك تتفكر في نفسك؛ ما أنت صنع الله، مش كده؟ ولسه قارين الآية وفيه ﴿وَفِي أَنفُسِكُمْ أَفَلَا تُبْصِرُونَ﴾ [الذاريات: 21]، فلازم تتفكر في نفسك، ده يبقى التفكر في بدائع الصنائع. وتتفكر في نفسك دي هنجيلها كمان شوية؛ عشان إحنا بنقول برضه كلام الناس كلام شكله حلو بس لا إحنا بنفكر في أنفسنا، وهنقول لكم دلوقتي هنديكوا أمثلة عشان تفهموا.
وتتفكر في الكون من حولك، وفي تدبيره، وفي إجرائه على نظام لو اختل لاختلت حياتنا، ومن أجراه على ذلك النظام؟ نقعد نتفكر في الحاجات دي وهندي أمثلة ليها بعد شوية إن شاء الله. الأول يعني إيه بس يجري على نظام ولولاه والكلام ده عشان برضه نبقى فاهمين لما أقول كلام ممكن يبقى إيه؛ أظن مفهومه سهل ويبقى عند البعض مش كده. الله لما خلق الدنيا خلق الدنيا بقوانين للدنيا، والدنيا بتجري على هذه القوانين، وبها ينصلح حال الدنيا وحال البشر اللي في الدنيا، ولو اختلت القوانين هيختل النظام كله.
هديكم مثال واحد من القوانين مثلا ربنا خالقها، أن المائع ينساب. حد هنا في علوم أو في هندسة؟ المائع زي المايه كده، كوباية المايه اللي وقعت على الترابيزة دلوقتي دي، أول ما المايه تقع يحصل لها إيه؟ تنساب مش كده؟ نحطها في حيز اللي هو الكوباية تأخذ شكل الكوباية، ده قانون ربنا خالقه أن المائع ينساب. وفكرة الأواني المستطرقة أن لو المايه متصلة ببعض كلها تبقى في مستوى واحد، عارفينها؟ ده قانون ربنا خالقه. يقوم ربنا سبحانه وتعالى -عشان نفهم عنه، اللي بيفهم، الملحدون دول والله حاجة طمس على عقولهم- يقوم يجري شيئا خلاف القانون؛ بس إحنا ما عندناش وقت نقعد نفكر.
سيدنا موسى لما ضرب البحر، البحر لما انفلق وكان كل فرق كالطود العظيم، أنت ماشي بين جبلين مياه مش جبلين ثلج، مياه واقفة، فدي في قوانين الدنيا القانون المائع ينساب، فربنا قادر يعطل القوانين أهو عطل القانون، وفي غيره من القوانين؛ النار تحرق قانون، عطله الله عز وجل لإبراهيم عليه السلام. فالدنيا ماشية بقوانين، فأنا ليه بس قلت الجملة دي؟ عشان لما أقول إن ربنا خلق اللي مش عارف عاوزين نتفكر يبقى فاهمين عاوزين نتفكر في إيه.
فكرة لطائف الصنائع هي ماء يسقي زرع الحكمة؛ إذا أردت أن تعرف حكمة الله عز وجل في خلقه لا بد تقعد كده تفصص في بدائع الصنائع عشان تفهم، فتسقي زرع الحكمة فيزداد يقينك، ويزداد حبك لربك، ويزداد تعظيمك له سبحانه وتعالى، ويزداد يقينك في قدرته سبحانه وتعالى.
زي إيه مثلا؟ عشان برضه الكلام يبقى مفهوم بدل ما نجيء لها بعد شوية؛ أصل إحنا بعد شوية هنرجع نقول من الحاجات التي تحجبك عن التفكر الشهوة. ليه؟ لأن الشهوة من الحاجات اللي بتعملها أنها بتخليك كل تفكيرك في جنس المشتهى؛ ندي مثال، أنت بتعز الأكل وجعان فبتروح داخل مقتحم الأكل، ليه؟ عشان شهوتك، أما أجي أقول لك أقعد بقى تفكر كده وأنت تقول يا عم اتفكر إيه؟ سيبنا ناكل وبعدين.
فهل مثلا حد عمره قعد يفكر في خلق الريق؟ يعني لو منع منك الريق، هو الريق ده هو اللي بيخليك تبلع أصلا، أنا بكلمك في مخلوق واحد في جسدك مسؤول عن أنه يأخذ الحاجة دي وينزلها بسهولة في جوفك. فتخيل كده أنت المجرى بتاع الطعام ده جاف ما فيهوش مادة تزحلق الأكل عشان أنت فاهم إحنا بنتكلم في إيه؟ إيه اللي هيحصل؟ ما كان زماننا كلنا ميتين أصلا ما حدش يعرف يأكل، وده حاجة واحدة مخلوقة فيك. طب إيه اللي حجبك أنك تقعد تفكر في الريق؟ شهوتك، أنت لما بيتحط قدامك الأكل هنقعد أفكر في الريق وريق إيه يا عم؟ خلينا بس ناكل وبعدين يبقى ربنا يسهل ونفكر في الريق، فده حجاب من حجب الله.
تعالوا نديكم مثال ثاني، تلك النطفة التي يخلق منها البشر، النطفة دي بعد شوية هتصور، الكلام ده عشان بنشوف اعتدناه إحنا مش متخيلين؛ النطفة دي هتصور بعد شوية هتبقى لحم وجلد وعصب وعروق وعضلات وعظام وأوتار وأعضاء داخلية كبد وطحال وقلب ورئة وكلى، كل ده من النطفة دي. اللي أنا بقوله ده عادي؟ يا جماعة ده شيء غريب جدا. وبعدين لو جيت قلت لك العمود ده مثلا إحنا قاعدين كده لقينا العمود ده بيتبني كده ومش شايفين حد بيتولى بناءه، عادي يعني هنفضل قاعدين عادي كده؟ ولا كلنا هنستغرب وإزاي عمود يتبني وما فيش حد بيبنيه صح؟ هذا يحدث، النطفة اللي في الرحم دي إحنا بنشوف تصويرها ودلوقتي بقى بالسونار ولا مصور يباشرها، يعني مش شايفين حد قاعد عمال يعمل في النطفة كده ويكبرها ويمطها مش شايفين حاجة، ده إزاي شايفينه عادي؟ العمود اللي هو شوية طوبة ومونة اللي هو أسهل ما يكون لو لقيناه بيتبني لوحده مش هنقعد على بعضنا مين اللي بيبنيه؟ حتة بتاع ميه كدة النطفة تتحول لكل الحاجات اللي قلتها دي ولا مصور نراه عادي! عشان كده قلنا لكم ﴿وَفِي أَنفُسِكُمْ﴾ دي مش عادية، مش عادية.
وخش في التفاصيل، لو خدنا تفصيلة واحدة العظم، فتلاقي عظمك مش زي بعضه، تلاقي عظم قصير وعظم طويل، وبعدين يخلق لك في أثناء هذا الهيكل في تركيب الهيكل حاجة بعد كده هنسميها مفاصل؛ ليه؟ لأن المفاصل دي اللي هتسهل حياتك وعملياتك اللي أنت عاوز تعملها في الدنيا. طب ده عادي يعني تلاقي هذا الخلق بهذه الدقة علشان الحاجة اللي أنت مخلوق لها تعرف تعملها ده عادي؟ إيه رأيك أن اللي أنت شايفه عادي ده هتيجي يوم القيامة وهتكتشف أنه مش عادي؟ ﴿يَوْمَ يُكْشَفُ عَن سَاقٍ وَيُدْعَوْنَ إِلَى السُّجُودِ فَلَا يَسْتَطِيعُونَ﴾ [القلم: 42]. يجي الكافر يسجد ولا المنافق فيستحيل ظهره طبقا واحدا، شوف أنت عندك العمود الفقري وتعرف تنزل، ليه بتنزل علشان العمود الفقري فقرات وبعدين مربوط بالحوض، فإنت بتعرف تتني، مش يستحيل ظهره طبقا واحدا، ما فيش بقى فقرات خلاص، أو الله أعلم بالكيفية بس هيستحيل طبقا واحدا، فهو مش عادي. والمفصل إزاي الحتة مقعرة وحتة محدبة عشان دي تخش في دي، فإما تيجي تحرك تبقى الحركة سهلة.
إشمعنا أنا اخترت الهيكل العظمي؟ عشان الحديث: «كل واحد فينا بيصبح وفي 360 سلامة مفصل، لازم تتصدق عن كل سلامة»، ده كلام النبي ﷺ، يا جماعة هو سيدنا النبي ﷺ أما يقول كده وبعدين يقول لك بقى إماطة الأذى مش عارف ويجزي عن كل ذلك ركعتي الضحى، هو سيدنا النبي ﷺ أما يقول الحديث ده، هل المقصود منه أنك بس تروح تصلي الضحى؟ ما هو أنت عشان تصلي الضحى ممكن نحفزك لصلاة الضحى بحاجات ثانية، يقول لك الثواب وكل سجدة واسجد واقترب ونقعد نحفزك، إنما نقعد نحكي لك حكاية وأنك فيك 360 سلامة وأن كل سلامة عليها صدقة وروح صلي عشان تقعد تفكر في ده.
فالتفكر في لطائف الصنائع فهي ماء يسقي زرع الحكمة؛ أولا حكمة ربنا تظهر لك، يبقى ليه بقى ربنا خلقك على هذه الصفة؟ وليه العظم مش زي بعضه؟ وتلاقي عظمة في حتة أقوى من العظمة الثانية، وتلاقي المرونة اللي في العظمة الثانية أنت محتاجها هنا تبقى مرنة أصلا، وهكذا إلى آخر الكلام، فتفهم شيئا من حكمة الله عز وجل، طيب أما تفهم بقى شيئا من حكمة الله تقوم تزداد حكمتك أنت.
وأما الفكرة في معاني الأعمال والأحوال فهي تسهل سلوك طريق الحقيقة، إيه بقى التفكر في معاني الأعمال والأحوال؟ أنك تتفكر في معاني الأعمال، مما يقال فيها، معنى العمل، يعني دلوقتي لو إحنا بنتكلم عن الناس المتدينة فنقول مين بيصلي؟ فتلاقي المسجد كله رافع إيده كله بيصلي، نقول مين فاهم صلاة؟ يعني إيه مين فاهم صلاة؟ يعني ليه لما بتيجي تصلي بيبقى مفتاح الصلاة الله أكبر؟ ليه مش سبحان الله؟ إشمعنا الله أكبر؟ طيب وليه مع الله أكبر بتعمل كده؟ ليه مش بتخش على طول كده؟ وليه مش بتعمل أي حركة ثانية إشمعنا دي؟ فإشمعنا إحنا لسه بنفتح الصلاة فليه الله أكبر؟ وليه الحركة دي بإيديك؟ مين فاهم صلاة؟ ليه الركعة فيها ركوع وسجدتين ليه مش ركوعين وسجود؟ ليه في الركوع سبحان ربي العظيم وفي السجود سبحان ربي الأعلى مش العكس؟ وليه أصلا التسبيح؟ مين فاهم صلاة؟ التفكر في معاني الأعمال. وقل مثل ذلك بقى في كل شيء، مين فاهم صوم؟
يبقى تتفكر في معاني الأعمال، ده نوع تفكر مهم؟ آه مهم، وتكلم فيه العلماء وصنفوا فيه كتبا؛ من الكتب اللي قرأناها سوا في التليجرام كتاب أسرار الصلاة لابن القيم، بيتكلم في بعض حكم الصلاة، أفعال الصلاة؛ ليه هنا بنقول كذا؟ ليه الحركة دي؟ وليه الركوع؟ وليه السجود؟ ونستحضر إيه واحنا راكعين؟ ونستحضر إيه واحنا ساجدين؟ التفكر في معاني الأعمال. وبالنسبة للصوم برضه في درس فلسفة الصوم اتكلمنا شوية عن حكمة الصوم.
يبقى ده نوع تاني من الفكر، يبقى عندنا نوع فكر أنك تتفكر في بدائع أو في لطائف الصنائع، ونوع ثاني أنك تتفكر في معاني الأعمال والأحوال، في معاني الأحوال، الأحوال القلبية أو أصلا عجيبة يعني. بس معنى الحال بقى إيه؟ يعني إيه معاني القلبية يا جماعة؟ يعني فجأة كده وأنت قاعد تلاقي قلبك اقتحمه حال مغاير للحال اللي من قبليها بشوية، يعني حب الصلاة فقمت تصلي ملتاذا بالصلاة، أو وأنت قاعد كده فجأة تلاقي قلبك بعد ما كان بيحب حاجة بقى يكرهها مثلا، أو الزهد في الدنيا بقت حال قلبك كده، أو أي حاجة بقى من الأحوال دي؛ طب ليه؟ وليه ده بيحصل؟ وتغير الأحوال ده اللي بيحصل، والحال دي اقتحمت ليه دلوقتي؟ وليه اتغيرت بعد شوية؟ نقعد نتفكر في هذا، يبقى معاني الأحوال.
لما تتفكر في معاني الأحوال قال إيه بقى الهروي؟ فهي تسهل سلوك طريق الحقيقة، هي إيه الحقيقة يا جماعة؟ عارفين إيه الحقيقة؟ الحقيقة أنه لا فاعل إلا الله سبحانه وتعالى، لا فاعل إلا الله، فعلك ينسب لك؟ آه ينسب لك وتُعاقب عليه؟ آه تُعاقب عليه، لكن من خلق فعلك؟ الله سبحانه وتعالى ﴿وَاللَّهُ خَلَقَكُمْ وَمَا تَعْمَلُونَ﴾ [الصافات: 96]، ولذلك عقيدة أهل السنة يا جماعة أن أفعال العباد مخلوقة لله سبحانه وتعالى؛ فترى الله في كل شيء.
وينتفي عندك رؤية الأغيار، مش شايف غير ربنا، في كل حاجة حواليك بقى. ترى الله في فعل نفسك وفي فعل غيرك؛ ترى الله سبحانه وتعالى. الكلام ده من عندي من كيسي؟ لا ده من القرآن، مش من عندي خالص. ففي فعل غيرك ماذا قال الله؟ ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]، ﴿وَلَوْ شَاءَ اللَّهُ لَسَلَّطَهُمْ عَلَيْكُمْ﴾ [النساء: 90]. ده في فعل غيرك، طب وفي فعل نفسك؟ ﴿وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ﴾ [الأنفال: 17]، ﴿فَلَمْ تَقْتُلُوهُمْ وَلَٰكِنَّ اللَّهَ قَتَلَهُمْ﴾ [الأنفال: 17]. تراه، هي دي الحقيقة.
امتى تصل للحقيقة؟ لما تقعد تتفكر في معاني الأعمال والأحوال، فترى كل شيء فعله سبحانه وتعالى. تقول: الله يعني أنا أرى المعصية اللي أنا عملتها فعله؟ آه فعله فيك، ليه؟ عشان تستاهل، عشان تستاهل ده، فخلّى بينك وبينها. ولا هو لو أراد أن يحجزك عنها مش هيقدر؟ ما تردوا، حاشاه. لو أراد أن يحول بينك وبين المعصية يقدر ولا ما يقدرش؟ فلما فعلتها رأيت فعله في فعلك للمعصية، أن خلّى بينك وبينها، فتراه في فعلك. طب ليه؟ عشان أنت تستاهل، ولا عشان هو حاشاه وتقدس وتنزه ظالم؟ مستحيل، أنت تستاهل.
طيب، ولما أعمل طاعة ترى ذلك فعله، ولو شاء لخذلك، صح؟ المعنى ده في القرآن ولا لا؟ ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً وَلَٰكِن كَرِهَ اللَّهُ انبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]، فترى ذلك فعله. طب ليه؟ فضل منه، مش عشان أنت تستاهل بقى، ده فضل منه؛ تفضل عليك فوفقك للطاعة. هي دي الحقيقة اللي لو وصلنا لها خلاص مش عاوزين حاجة تاني في الدنيا. أنت عايش مع ربنا في كل حاجة، أي حاجة بتحصل حواليك ترى الله فيها، تراها فعله سبحانه وتعالى؛ ﴿أَلَا لَهُ الْخَلْقُ وَالْأَمْرُ﴾ [الأعراف: 54]، فكل ما في الكون بأمره، ولا في حاجة بره أمره؟ وهو له الخلق والأمر.
امتى نصل لو قعدنا نتفكر في معاني الأعمال ومعاني الأحوال؟ تخيل كده بس حاجة واحدة في معاني الأحوال اللي إحنا ذكرناها، اللي هو تغير الحال ده. إزاي؟ حد يقنعني كده، تبقى قاعد عندك همة لكذا وفي بعديها بلحظة الهمة في الأرض، إزاي تحصل؟ إلا أن تشهد فيها فعل الرب سبحانه وتعالى، هو الذي صرفك وصرف قلبك. ما هو بالعقل مستحيل، إزاي؟ ده لحظة ده ما فيش. وقالوا إن القلب سُمي قلباً ليه؟ لكثرة التقلب.
وفيها حديث برضه: «قلوب العباد بين إصبعين من أصابع الرحمن يقلبها كيف شاء»، في لحظة. طب لما تعرف ده، ده استطراد ما لوش دعوة بالكتاب، تعمل إيه؟ تبقى دائم اللجوء إليه سبحانه وتعالى، يبقى أنت عاوز قلبك يستمر على تلك الحال. ما فيش بقى حاجة اسمها وأنا بإرادتي وأنا هعمل، مش عارف لسه بإيه ومنبهات، لي مش أعمل، يا عم كل حاجة بس في الآخر أنت قلبك في إيديه. وأراك آية في نفسك، أن قلبك يبقى في قمة الحب أو قمة الهمة لحاجة وفجأة مهبوط به للأرض، مش عاوزها وكارهها؛ ليه؟ عشان تدعيه وتعرف أنك من غيره ولا حاجة، وأنك لما تبعد عنه هتضيع، فتسأله سبحانه وتعالى أنه يديم عليك ذلك الحال.
أما التفكر في معاني الأعمال والأحوال فهي تسهل سلوك طريق الحقيقة. أنا ما كنتش متخيل أن الوقت الحلو بيمر معاكم كده، لو كملت هكروت، أو ما نكملش ونبقى نديها في درس تاني، إيه رأيكم؟ طيب لا، أصل يعني كده هناخد ساعة كمان، لا صعب. ماشي نقف هنا، أقول قولي هذا وأستغفر الله العظيم لي ولكم.
الشيخ أمجد سمير