د. أحمد عبد المنعمالحلقة الرابعة والأخيرة في التهيئة الاستعداد لدخول رمضان، قرب، والحملة كلها بتكلمني إزاي إن احنا نتغير ونستعد قبل الدخول لرمضان. وطبعا مجموعة الحلقة دي تحديدا بتركز على معنى أساسي؛ القرآن في رمضان؛ لأن للأسف أغلبنا بيتعامل، إلا من رحم الله، بيفضل سايب القرآن يعلوه التراب، يعلوه التراب، وبعدين يبدأ كل شوية يبص على التراب، ويبص على الآية، النتيجة النهاردة كام؟ النهاردة أول شعبان، لا لسه شوية، النهاردة خمسة عشر شعبان، لا لسه شوية، النهاردة ثمانية وعشرين شعبان يبدأ يجيب المصحف ويبدأ يمسح التراب ويحط المصحف، ده ده أحسننا حالا اللي ناوي يرتبط بالقران، وبعدين واحد رمضان يلا نبدا! لا، طبعا ده مش هينفع، احنا لازم نستعد، لازم يبقى فيه تهيئة للقلب للدخول في رمضان والارتباط بالقران.
اتكلمنا في ثلاث حلقات؛ الحلقة الأولانية: أهمية القرآن وتصور عام أن القرآن هو السبب الأوحد للنجاة. اتكلمنا في الحلقة الثانية: واجبنا تجاه القرآن، التمسك بهذا الحبل، وخطورة ترك هذا الحبل، وإيه اللي هيحصل للي هيسيب الحبل؟ اللي هيسيب الحبل هيعيش في ظلمات، وهيعيش في تيه، وهيعيش حيران، وهيعيش والعياذ بالله ظمان. وتكلمنا في الحلقة الثانية، الحلقة الثالثة: اتكلمنا ليه رمضان؟ قلنا مش احنا اللي قلنا ليه رمضان، ربنا اللي قال: ﴿شهر رمضان الذي أنزل فيه القرآن﴾ [البقرة: 185]. النبي صلى الله عليه وسلم قال: من صام رمضان، وقال من قام رمضان؛ أي بالقران. يبقى إذن رمضان له دلالة خاصة في الارتباط بالقران. قلنا إن رمضان بيوفر بيئة معينة، بيوفر جو معين لهذا التلقي؛ يعني مثلاً المثل الأعلى لو دكتور كتب علاج، فالدكتور بيقول للمريض العلاج ده عشان يأثر فيك لازم تاخده قبل الأكل، والعلاج الثاني ده لازم تاخده قبل النوم، وده بيقول له إن العلاج ده عشان يشتغل عايز جو معين. فاحنا ولله المثل الأعلى، ربنا بيقول لنا الكلام الذي تكلم به الله سبحانه وتعالى عشان يأثر فيك، زي ما شرحنا: ﴿إِنَّ نَاشِئَةَ اللَّيْلِ هِيَ أَشَدُّ وَطْءًا وَأَقْوَمُ قِيلًا﴾ [المزمل: 6]، عشان يأثر فيك عايز جو معين، بذل معين. فاتكلمنا الجو اللي بيوفره رمضان، النهاردة بقى أنت هتوفر إيه؟ رمضان وفر لك إقبال جماعي، تقليل الشهوات، الكل رايح يصلي. رمضان عمل لك ده، غلقت أبواب النار، فتحت أبواب الجنان، صفدت الشياطين، النفس بتقبل. رمضان هيا لك الجو، تغيير كوني يحدث في رمضان حتى تتلقى القرآن، أنت هتعمل إيه؟
الحقيقة اللي لازم أواجهكم بيها إن مش هتتغير بالقران إلا ما هتبذل، يعني دي حقيقة أنا بعتذر أن أنا بقولها لكم، بس هو لازم تتقال، يعني مش عايز أقول لكم إيه: والله بص أنت حاول بس، ولا لا لا، أنت لازم تبذل، لازم تدي وقت، مش هينفع واحد داخل الامتحان أو داخل كلية معينة نقول له: بص الكلية دي عايزة مذاكرة، هتذاكر اخش الكلية دي، مش هتذاكر أنا بقول لك من الأول ما تخشهاش. كتير من الناس يقول لك: أنا نفسي أعيش مع القرآن، أنا نفسي أأثر، طيب يبقى لازم تبذل، لازم تدي وقت، لازم تدي وقت، لازم تسمع، لازم تقرا، لازم تبذل، أمال هو القرآن كتاب عزيز! لازم تدي وقت عشان القرآن يديلك. ده العلماء كانوا يقولوا: القرآن لن يعطيك بعضه حتى تعطيه كلك. ده تشوف التصور بتاعهم؛ لازم تدي أبسط حاجة الورد، أبسط حاجة تكرار القراءة، أبسط حاجة التكرار، أبسط حاجة القراءة المتأنية. وهنتكلم النهاردة على مسألة هل يعني نقرا كتير بسرعة ونكتر في الكم، ولا نكتفي بمسألة كم معين قليل ونتدبر فيه ونعيش مع القرآن؟ فنتكلم دي سريعا في الآخر؛ لأن الحلقات طبعا الوقت بتاعها قليل مش هينفع نطول في الفكرة، نطول في الفكرة دي، لكن النقطة الأساسية لازم تدي وقت للارتباط بالقران، مش هينفع إذا أردت أن تكون من أهل القرآن! ده أنت لما يبقى واحد صاحبك، واحد صاحبك وما بتديلوش وقت، يقول لك: يا عم احنا مش صحاب ما تضحك عليا، ده أنا احتجتك في يوم كذا ما لقيتكش، واتصلت بيك في يوم كذا ما ردتش عليا، ويوم ما كان عندي مشكلة كذا أنت ما عبرتنيش، احنا ما ينفعش نبقى أصحاب!
ماذا لو تكلم القرآن عن علاقتك به؟ هيقول إيه؟ هيقول: ده أنت وقعت في مشكلة وكان الحل بتاعك عندي في سورة مريم وما قريتنيش! ده أنت وقعت في أزمة والحل بتاعك كان في سورة يوسف وأنت ما رضيتش تقرا! ده أنت ما رضيتش تقرا سورة الكهف يوم الجمعة! ده أنت ما رضيتش تقرا سورة الإخلاص وتكررها! ده أنت ما رضيتش تقرا سورة الملك عشان تنجو من عذاب القبر! ماذا لو تكلم القرآن عن هذه العلاقة؟ ماذا لو اشتكى القرآن عن هذه العلاقة؟ يعني صاحبك لو سمحت لو اللي أنت أثرت معاة لو أنت سمحت له يشتكي هيقول كلام كتير، طب القرآن لو اشتكى هيقول إيه؟
ما احنا لازم نبذل، لازم ندي وقت لهذه العلاقة عشان تثمر. أي علاقة ما تديهاش وقت وبذل تيبس، بعد ما بتيبس تتكسر ثم تطمحل. أي علاقة، أي علاقة حتى الرحم، النبي صلى الله عليه وسلم بيقول: «إلا رحم أصلها ببلالها»، يعني لازم تبقى العلاقة دائماً فيها نداوة، مكالمة، اتصال، لازم يبقى في حاجة. طب أنت علاقتك بالقران إيه؟ فبنقول لازم وقت، ونستغل بقى الجو بتاع رمضان.
لازم تبذل، أول حاجة، أهم حاجة في العلاقة اللي هتستمر مع القرآن أنك أنت تقرا على مكث: ﴿وَقُرْآنًا فَرَقْنَاهُ لِتَقْرَأَهُ عَلَى النَّاسِ عَلَى مُكْثٍ وَنَزَّلْنَاهُ تَنْزِيلًا﴾ [الإسراء: 106]. ورتل القرآن ترتيلاً. الرتل الفصل، أنك أنت لازم تفصل بين الآيات، الآيات الصورة مش مش على بعضها لا، في آيات أنك أنت بتقف، مستحب الوقوف على رؤوس الآية، يبقى ليه؟ عشان أنت تدي لنفسك فرصة أنك أنت تتلقى، و﴿لَا تَعْجَلْ بِالْقُرْآنِ مِنْ قَبْلِ أَنْ يُقْضَى إِلَيْكَ وَحْيُهُ﴾ [طه: 114]. ما تستعجلش، ده التلقي العام للقران. ده ما يمنعش أنك أنت يبقى ليك مثلاً ورد بتقرا الحسنات، بتقرا كتير عايز تختم، لكن مش هينفع أن كل دورك ده، ده أنا بتكلم كمان عن المجتهد، للأسف، كل دورك في رمضان أنك أنت تستنى زي ما قلنا النتيجة ثمانية وعشرين شعبان، واحد رمضان تجيب المصحف وتمسح كده، كام؟ كده الختمة الأولى، الثانية، أنت عملت كام؟ أنا عملت أربعة، اه هجيبك، وبعدين؟ وبعدين هو كده بس! وبعدين عدى رمضان، اقفل بتاع وتجهز المنديل لأيه؟ لرمضان جه عشان نبقى نمسح التراب! هو ده علاقتنا برمضان؟ مش هينفع، لازم نتغير. القرآن نزل عشان يغير، القرآن سمي فرقان لأنه نزل ليفرق بين الحق والباطل، يغير أشد وطأ.
فأنت محتاج زي ما قلنا، رمضان وفر جو للتلقي، أنت محتاج توفر وقت للتلقي. رمضان عمل لك تهييئة للتلقي، أنت لازم أنت كمان تتهيا للتلقي، لازم تبذل. أول حاجة القراءة المتأنية، رقم واحد القراءة الصحيحة المتأنية بالراحة اقرا سورة الملك بالراحة، هتجد حاجات كتير ما كانش محتاجة شرح، كأنك أول مرة تسمعها. كتير جداً تبقى واقف في الصلاة والامام بيقرا وتقول: إيه ده؟ إيه ده؟ أنا أول مرة أسمع! كأني أول مرة أسمع دي! مع أنك سمعتها كتير بس لأن أنت للأسف يعني كنت مركز، كانت يعني حاجة صدفة كده قدرا كده، كنت مركز المرة دي ما كانش في حاجة شغلاك ولا حاجة ففوجئت سورة بتسمعها سمعتها مية مرة قبل كده، لكن كأنك أول مرة تسمع الآية دي لأنك مجرد ركزت، مجرد فرغت قلبك من الشواغل. بس ده أنا لسه ما قلتلكش اقرا معاني كلمات واقرا تفسير وحاول تقعد تدرس، أنا ما قلتلكش حاجة، ده أنا كل حاجة بقولها لك في الأول: ركز قراءة متأنية رقم واحد.
بعيداً بقى هنقرا بسرعة ولا مش هنقرا بسرعة، هنختم كتير ولا مش هنختم كتير؟ ده بيجيب حسنات ده كويس أنا موافق عليه، لكن ده لازم يبقى موجود، ده لما بيفقد عمود من أعمدة التدبر بيفقد ركن من أركان الارتباط، بيفقد، ده لازم يبقى موجود، القراءة على مكث، القراءة المرتلة المتأنية، لازم مش مستعجل.
ليكن هم أحدكم آخر السورة، وصفة كتيرة مشهورة للسلف وابن مسعود: اوعى يكون همك تخلص في أي عبادة على فكرة، يعني اللي بيروح يعمل عمرة، ربنا يرزقنا جميعاً الحج والعمرة، يروح مثلاً يعمل عمرة في رمضان أو يحج ويبدأ يطوف، لو الزحمة شغلته وكل تفكيره احنا في الشوط الأول ولا في الثاني، أنا تعبت، أنا مش هيستفاد، مش هيستفاد وهيبقى كل همه إنه عايز يخلص، لكن لو كان كل همه: يا رب أنت اصطفيني، يا رب أنت جبتني هنا، ويقعد يدعي ويستغل، هو ده بالضبط اللي بيقرا، السورة هتخلص امتى؟ اللي بيقف في الصلاة هيركع امتى؟ أول لما السؤال ده يجي لك اعرف أنك بدات تفصل خلاص، أول لما السؤال هيركع امتى؟ الصورة هتخلص امتى؟ اعرف أنك أنت التلقي بتاعك توقف، التلقي بتاعك توقف، يبقى أنت محتاج القراءة المتأنية، ما تنشغلش بأي شاغل أثناء التلقي، رقم واحد القراءة المتأنية على مكث.
رقم اثنين: لازم تدي وقت على الأقل لفهم المعنى البداية البسيطة. معاني الكلمات لازم مصحف معاني الكلمات، ما ينفعش حتى حد يسالك: مش ده كلام ربنا؟ اه كلام ربنا، أنت بتقراه؟ اه بقراه، طب عارف دي؟ لا والله مش عارف، طب ليه؟ مش هو مش مهم؟ لا مهم، أمال مش عارفها ليه؟ اصل ما ما يعني ما جاتش فرصة، يعني الظروف ما يعني إيه يعني إيه الظروف ما جاتش؟ ده أنا بقول لك معاني كلمات، ده أنا بقول لك معاني، طب أنت أشمعنى في الدنيا جبت وقريت وبذلت ونزلت واتحركت؟ ده أنا بقول لك معنى كلمة عشان حتى لما تيجي عايز تعيش مع الآية، معنى كلمة بس. يبقى رقم واحد القراءة المتأنية، رقم اثنين معنى الكلمة.
رقم ثلاثة: معنى الجمله، خد بالك معنى الجملة معنى الكلمة بيوفرها المصحف اللي يبقى فيه معاني كلمات، معنى الجملة ممكن تبدأ بيه بالمصحف اللي على هامش إيه؟ التفسير اللي على هامش المصحف، زي التفسير الميسر، أي تفسير معمول، في تفاسير كتير: تفسير مختصر، التفسير الميسر، المختصر في التفسير، أي تفسير مطبوع على هامش المصحف أنت هنا بتاخد معنى الجملة على بعضها. المصحف الأول بيقول لك إيه؟ عاديات الخيل مثلاً المسْرعة مثلاً بيديك معنى الكلمة. أنا بعد كده بيقول لك معنى الجملة على بعضها بحيث أن انت ممكن تبقى فاهم الكلمة بس أنا مش فاهم يعني اه الجملة دي مش فاهمها تركيبتها كده أنا مش فاهم، وده طبيعي لأن احنا للأسف في عُجمة في ألسنتنا ابتعدنا عن اللغة العربية للأسف وطبعا عن قصد من الأعداء. الشاهد أن أنت محتاج حد ييسر لك ده، فبتجيب، بعد يبقى الخطوة واحد القراءة المتأنية، خطوة اثنين معاني الكلمات، خطوة رقم ثلاثة معنى الجملة مش معنى الكلمة أنت بترتقي، معنى الجملة.
خطوة رقم أربعة: القراءة في تفسير بقى يعني ما الهوامش، يبقى الأول بتقرا في مصحف بس من غير حاجة بس قراءة متأنية، رقم اثنين مصحف ومعاه معاني الكلمات، رقم ثلاثة مصحف ومعاه جملة، رقم أربعة لا ده أنا هقرا بقى تفسير، ابدأ برضه بتفسير ولو مجلد واحد، أي تفسير بسيط مجلد واحد، المنتخب في التفسير، المختصر، أي كتاب بسيط يديني يفهمني بس. أيسر التفاسير لشيخ أبو بكر الجزائري، تفسير جميل ومبسط وسهل، طبعا أنا بدي هنا تقييم عام مش بدي تقييم تفصيلي. أيسر التفاسير، تفسير الشيخ السعدي، تيسير الكريم المنان، تفسير الشيخ السعدي تفسير جميل ممكن يبقى أصعب شوية من للمبتدئين من أيسر تفسير الشيخ أبو بكر الجزائري. أيسر تفاسير بسيط، اياك أن تتوقف.
سيدنا إبراهيم بينظر النمرود سورة البقرة بيقول له: ﴿رَبِّيَ الَّذِي يُحْيِي وَيُمِيتُ﴾ [البقرة: 258]، ﴿أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ﴾، بيقول لك شفت سيدنا إبراهيم وهو بيحاج النمرود قال: ربي الذي يحيي ويميت قال: أنا أحيي وأميت. قال إبراهيم: ﴿فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بها مِنَ الْمَغْرِبِ﴾. أول بداية التعريف عن الله بيقول له ربي الذي يحيي ويميت، بعدها بشويه بعدها بإيه يقول له: ﴿رَبِّ أَرِنِي كَيْفَ تُحْيِي الْمَوْتَى﴾ [البقرة: 260]، سيدنا إبراهيم عايز يترقى، ده أنت كنت بتناظر لكن هو لا يتوقف عند مرحلة معينة، هو يريد أن يصل من الإيمان إلى الطمانينة، ولكن: ﴿قَالَ بَلَى وَلَكِنْ لِيَطْمَئِنَّ قَلْبِي﴾. الإسلام يعني إيه؟ الإسلام يعني استسلام، يعني أنا ماشي مستسلم جوارحي منقادة، طب قلبي لسه الإيمان أنا مستسلم وآمنت، الإيمان في معنى الأمن يعني أنا استسلمت وقلبي آمن، الطمانينة أنا مش بس آمن ده أنا في قمة الأمن، فسيدنا إبراهيم عايز يرتقي، اياك أن تتوقف.
ما تقولش إيه أنا رمضان ده بقى هخليني في موضوع المصحف الأول من غير ما لا، في أنت ممكن تترقى مراحل، أنت ممكن تبدأ على طول بالتفسير الميسر، ممكن تبدأ على طول بالجملة؛ لأن هيوفر لك معاني كلمات، لكن أنا بقول لك أنت محتاج تترقى في علاقتك بالقران، لازم تبذل، لازم تدي وقت، هذا الحبل لابد أن تتمسك به، التمسك مش معناه أن أنا أعمل له جِلْد قطيفه وأن لا، ده مش تمسك لا، ده ده اهتمام بالظواهر، وزي ما مشهور عن الصحابة وبعضهم رفعوا النبي صلى الله عليه وسلم: إذا زخرفتم المصاحف وزينتم المساجد فالدمار الدمار؛ لأنك أنت بتهتم بالظاهر عن التغير الحقيقي.
فأنا مش عايزك تهتم بالظاهر، أنا عايزك تهتم بهذا الكلام الذي لما نزل على الصحابة حولهم من أناس كانوا يشربون الخمر ويؤدُّون البنات إلى ناس غيروا العالم، حصل تغيير نقلة حقيقية. أنا عايزك أنت تتغير، لازم تقيس نفسك هل مفاهيمك اتغيرت؟ على فكرة كتير أوي من المشاكل اللي موجودة والمناظرات والكلام اللي عمال يطلع ده، هيتحل أنك أنت تقرا القرآن بتدبر فعلاً، أنك أنت تقرا القرآن ختمة واحدة بتدبر تكفيك بعيداً وكثيراً عن كثير من المناظرات وكتر الكلام اللي موجود ده.
لكن احنا ما بناديش وقت، الدين عظيم، الدين محفوظ، الله تكلم بهذا الكلام لننجو ونرجع تاني الحالة الأولانية قصة قصة البداية. تكلم الله بهذا الكلام عشان احنا عايشين في غربة، احنا نزلنا الأرض مش في الجنة، ومحتاجين دليل، محتاجين إزاي نتحرك، فتكلم الله بهذا الكلام. لازم تفهم الرسالة، لازم تبذل وقت لفهم الرسالة، ما ينفعش تبقى أنت عايش وحواليك الأخطار وماسك الرسالة وعمال تقراها وبعدين بتقفلها وماشي بدماغك! أمال أنت بتقرا الرسالة دي ليه؟ أمال أنت بتقرا طريق النجاة ليه؟ يعني أنا عايش في مخاطر وحد بعث لي قال لي الكتاب ده هينجيك من المخاطر فتحته قريت شوية كلام مش فاهمه وقفلته، أعمل إيه بقى؟ أتصف إزاي؟ أيوه ما هو الكلام كان بيقول لك، بيقول لك الكلام اللي أنت مش فاهمه ده كان بيقول لك تعمل إيه؟
إذاً لابد من بذل وقت، لابد من بذل وقت. ده ما يعنيش أن اللي عايز يختم أكتر ده مش مانع انك أنت تبذل وقت، لكن المهم أن ده لازم تدي وقت بتأني، لازم اللي عايز يختم ختمات كتير، لكن أنا أرى أن في البداية عند التعارض يقدم التأني. عند التعارض في البداية يقدم التأني. كان الصحابة يتلقون القرآن عشر آيات بعشر آيات، فأصبح هناك تغيير غير تدريجي. ربنا خلق السماوات والأرض في ستة أيام، ما حدش يبقى في صدره حرج من التدرج، لازم تدرج الإنسان بيقعد تسع شهور مولود تسع شهور في بطن أمه وبعدين ينزل، أنت متوقع بقى يعني تسع شهور قاعد تسع شهور ينزل بقى يجري يتحرك! ده لسه برده جنين، فكذلك أنت في علاقتك بالقران تحتاج إلى تدرج، تحتاج إلى ترقي. اقرأ وارتق.
أسال الله عز وجل في ختام هذه الحلقات أن يجعلنا جميعاً من أهل القرآن، وأن يجمعنا جميعاً في الفردوس الأعلى في صحبة النبي صلى الله عليه وسلم. أقول قولي هذا واستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك، والسلام عليكم ورحمة الله وبركاته.