بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وآل بيته، كما صليت على آل إبراهيم إنك حميد مجيد. أما بعد:
المجلس الأخير بحسب الخطة من مجالس سلسلة قدوتك، وزي ما قلنا، يعني بعد الاستخارة والاستشارة نرى إن احنا ممكن إيه نزود دروس أخرى في هذه السلسلة المباركة، لكن على الخطة ده آخر مجلس مع المرأة الرابعة من التي أخبر النبي صلى الله عليه وسلم عنهن أنهن كملن.
أولاً: هذا لفظ، واللفظ الثاني أنهن خير نساء العالمين، هذا لفظ آخر. فكنا بنشوف هذه السلسلة لماذا أكملنا هؤلاء الأربعة ليه؟ علشان نشوف موطن القدوة التي تقتدي بهن نساء المسلمين. خلصنا السيدة مريم، وخلصنا السيدة آسيا، وخلصنا السيدة خديجة، واليوم مع أم أبيها رضي الله عنها الزهراء فاطمة رضوان الله عليها. والسيدة فاطمة رضي الله عنها ابنة النبي صلى الله عليه وسلم وبضعته وحبيبته صلى الله عليه وسلم ورضي الله عن السيدة فاطمة. وكالعادة احنا مش جايين نحكي سيرة السيدة فاطمة، وإنما غرضنا موطن القدوة منها رضي الله عنها، فخلونا ندخل على طول في الموضوع كعادتنا.
تأملت سيرتها وما قيل فيها عشان نخرج بموضع القدوة، فتعالوا كده نبتدي على طول في حديث لأم المؤمنين عائشة رضي الله عنها ذكرت أمرين، لو تاملنا الأمرين هنكتشف شيئاً ما من موطن القدوة، تقول رضي الله عنها: ما رأيت أحداً أشبه سمتاً ودلاً وهدياً برسول الله صلى الله عليه وسلم في قيامها وقعودها من فاطمة بنت رسول الله صلى الله عليه وسلم. يبقى ده أول حاجة، أول حاجة أن السيدة فاطمة كانت أشبه الناس به صلى الله عليه وسلم سمتاً ودلاً وهدياً.
يبقى لماذا السيدة فاطمة رضي الله عنها قدوة؟ لأنها أشبه الناس بالنبي صلى الله عليه وسلم سمتاً ودلاً وهدياً. عاوزين نفهم يعني إيه سمت ودل وهدي؟ دي أول حاجة. تاني حاجة، ليه بقى تبقى قدوة لما تبقى هي أشبه الناس بالنبي سيدنا النبي عليه الصلاة والسلام سمتاً ودلاً وهدياً؟ قيل: السمت هو ما خلق عليه الإنسان من تناسب الأعضاء، والدل: حسن الشمائل والمنظر، والهدي: ما يتعلق بالديانة.
يبقى احنا قدام ثلاث ألفاظ: السمت والدل والهدي، وهي كانت أشبه الناس بالنبي صلى الله عليه وسلم في الثلاثة. والظاهر أن الموضوع ما هواش موضوع شبه الخلق فقط، يعني ما هياش شبه في الخلقه، وإن كانت كذلك رضي الله عنها وصلى الله على أبيها. تعالوا كده نشوف حديث آخر قيل في ابن مسعود عشان نفهم أن المقصود بالثلاثة دول حاجة زائدة عن الخلقة، في رواية حذيفة بن اليمان أنه قال: إن أشبه الناس دلاً وسمتاً وهدياً برسول الله صلى الله عليه وسلم لابن أم عبد، اللي هو ابن مسعود، أم عبد تبقى أمه.
فيبقى أشبه الناس بالنبي عليه الصلاة والسلام في الثلاثة أهو، وسمتاً وهدياً. طبعا ابن مسعود ما هواش شبه النبي عليه الصلاة والسلام، يعني في الخلقة هو ما هواش من قرابته صلى الله عليه وسلم. نكمل كلام حذيفة عشان نفهم، قال: إن أشبه الناس دلاً وسمتاً وهدياً برسول الله صلى الله عليه وسلم لابن أم عبد، من حين يخرج من بيته إلى أن يرجع إليه، لا ندري ما يصنع في أهله إذا خلا. يعني بيقول: من أول ما يخرج من البيت لغاية ما يرجع هو أشباه الناس بالنبي صلى الله عليه وسلم دلاً وسمتاً وهدياً، جوه البيت ما نعرفش.
فلو كان يقصد الخلقة، الخلقة هتبقى جوه البيت زي بره، ما فيش حاجة اسمها كده، مش هو أشبه الناس بالنبي خلقه صلى الله عليه وسلم بره البيت، دخل البيت ما بقاش شبهه خلقه، فيبقى الثلاث ألفاظ دول الذي، يعني عشان بقى نرجع لفاطمة للسيدة فاطمة، الثلاث ألفاظ دول لا يقصدون بهم الخلقة؛ السمت والدل والهدي.
طيب، هنا حذيفة بيقول سيدنا حذيفة بيقول إن سيدنا ابن مسعود هو أشبه الناس بالنبي عليه الصلاة والسلام، ستنا عائشة بتقول إن أشبه الناس به فاطمة السيدة فاطمة رضي الله عنها، فقد يكون سيدنا ابن مسعود من الرجال والسيدة فاطمة من النساء، وقد تكون السيدة فاطمة بإطلاق وياتي سيدنا ابن مسعود بعدها. طب ليه سيدنا حذيفة ما يعرفش ده عن السيدة فاطمة؟ بطبيعة أنه رجل وهي امرأة، لكن السيدة عائشة اطلعت على سيدنا ابن مسعود واطلعت على السيدة فاطمة، فرات أن السيدة فاطمة هي الأشباه فأثبتت لها ذلك الشبه، فهي أشبه الناس بالنبي عليه الصلاة والسلام، فاذا اتخذتها المرأة قدوة كانها تقتدي بمن؟ بسيدنا النبي عليه الصلاة والسلام.
ودي أول مسألة يا جماعة، يبقى أول مسألة قدوتك، ودي احنا ذكرناها في كل امرأة، وبالذات في السيدة خديجة في آخر مرة، قلنا إن موطن القدوة لنساء المسلمين المسلمة الصالحة وبقدر ما فيها من دين بقدر ما تكون قدوة، قلنا ده في السيدة خديجة، أن سيدنا النبي عليه الصلاة والسلام لما ذكر خديجة قال أول حاجة: آمن بي إذ كذبني الناس. وقلنا إن الناس لما بتيجي في سيرة سيدة خديجة بتعدي الجمله دي وعاوزين يدخلوا على اللي بعديها: واستئنت بمالها، لا هي قدوه أولا لأنها آمنة به لأنها مؤمنة، قل مثل ذلك في السيدة فاطمة رضي الله عنها، هي قدوتك لأنها أشبه الناس برسولك صلى الله عليه وسلم دلاً وسمتاً وهدياً، فاذا اتخذت السيدة فاطمة قدوة لك فكأنك اتخذت النبي قدوة صلى الله عليه وسلم.
خلاص، يبقى دي أول مسألة ودي مسألة طبعا مهمة جداً أن هي بتعدل بصله النساء الآن، بتعدل بصله النساء. يعني إيه بتعدل بصله النساء؟ احنا قلنا دول أربعة قدوات، اتخذي أي واحدة فيهم شئتي قدوة، وشوفي نهجها إيه، لأن كل واحدة فيها سمة كده مش في غيرها، احنا لسه هنيجي للسمة اللي في السيدة فاطمة، ما نعرفهاش، بس لو قلنا السيدة مريم هتلاقوا إيه؟ الانقطاع والعبادة واضحة جداً، امرأة قاعد في المحراب بتعبد ربنا سبحانه وتعالى، انقطاع وعبادة. السمة اللي واضحة جداً في سيدة آسيا: الوقوف في وجه الظالم وإيثار الآخرة على الدنيا واضحة جداً، زائد بقى العقل، هو على فكرة الأربعة فيهم عقل، واحنا هنيجي للمشترك، احنا بنقول المفترق دلوقتي، يعني إيه الفروق اللي بينهم أو إيه الميزة اللي ميز كل واحدة عن الثانية.
وهنيجي بقى للسمات المشتركة بينهم، دي سيدة، احنا بنجمع السلسلة ها، السيدة خديجة قلنا الحكمة لو تفتكروا، قلنا أنها حكيمة تعرف تعمل إيه امتى. خلاص، فدي السمة المميزة للسيدة خديجة. السمة المميزة للسيدة فاطمة وهنجي لها كمان شوية: العزوف عن الدنيا. ودي هنجي لها كمان شوية إن شاء الله، تقدري بقى أنت العزوف عن الدنيا، يعني أقصد الزهد في الدنيا، ده واضح جداً جداً في السيدة فاطمة وهنجيلها كمان شوية.
فتقدري أنت تقولي خلاص أنا قدوتي فلانه وهشتغل على السمة اللي في فلانه دي. طيب، إيه المشترك بينهم؟ كان المشترك بين الأربعة حاجتين: أول حاجة العقل، أول حاجة العقل، ولذلك كمل من النساء كثير، من الرجال كثير، ولم يكمل النساء الأربعة، فالعلماء قالوا إن كمال هؤلاء الأربعة بالعقل، فأول حاجة العقل.
وهنيجي للفظ ده في نفس الحديث، احنا قلنا السيدة فاطمة ليه قدوة؟ قلنا هناخد حديث السيدة عائشة رضي الله عنها علشان هي قالت حاجتين حيثيتين بهما صارت السيدة فاطمة قدوة: أول حاجة أشبه الناس برسول الله سمتاً ودلاً وهدياً. الثانية هنجي لها كمان شوية هلاقيها العقل. تاني حاجة والتي اتكلمنا عليها في أول مرة خالص، أن كل امرأة من هؤلاء كانت خلف رجل عظيم، وساعتها قلنا إن ده درس للنساء، أن من جليل وظائفك، من الجليل إن لم تكن أجل وظيفه ممكن تقوم بها المرأة، أن تقف خلف رجل ليخرج رجلاً عظيماً.
دي من أجل وظائف المرأة، أنت مخلوقة أصلاً بصفات وسمات تحتمل ده. هاتوا لي كده أب وخلي العيل يوق شوية في الأول، اه يا حبيبي ومش يا حبيبي وبتاع، ما فيش خمس دقايق يرميه، مش طايق، مش طايق الزن ومش طايق الوقوقة، تلاقي الأم طول الليل سهرانة عشان بس الواد مزمزق ولا البنت عندها مغص ولا بتاع، طب الأب برنس مالوش دعوة بالموضوع ده، ده ممكن يصحى يزعق، خديه واطلعي بره أنا مش عارف أنا.
مثلاً أنت فيك الصفات دي، فيك السمة، ربنا خلقك كده، معطاءة، تعرفي تقفي ورا حد لغاية ما تنجحيه. العجيب بقى يا جماعة لو تاملنا الأربعة دول، احنا قلنا فيهم حاجتين مشتركتين: العقل، وتاني حاجة أن كل واحدة واقفة ورا واحد ليخرج رجلاً عظيماً. لو تاملنا الأربعة دول، هلاقي أول حاجة طبعا قبل ما تأمل الأربعة، إنه أن الأربعة واقفين ورا واحد مش بس من الرسل، من أولي العزم من الرسل.
الأربعة كانوا واقفين ورا سيدنا النبي عليه الصلاة والسلام وسيدنا عيسى وسيدنا موسى، ثلاثة من أولي العزم من الرسل، اللي صنعهم نساء! بقوانين الدنيا طبعا الله عز وجل من صنع هؤلاء: ﴿وَلِتُصْنَعَ عَلَى عَيْنِي﴾ [طه: 39]، ﴿وَاصْطَنَعْتُكَ لِنَفْسِي﴾ [طه: 41]. لكن في قوانين الدنيا من الذي أجرى الله على يديه أن يكون سبباً في صناعة هؤلاء؟ نساء.
فدي أول معنى تتلمحيه، يعني إيه؟ يعني أنت ممكن تبقي وراجل يبقى عالم الأمة في يوم من الأيام، يبقى حاكم للأمة يحكم بالعدل ويسوس الناس بالدين في يوم من الأيام، تقفي وراجل يبقى في يوم من الأيام المجاهد الذي يفتح الله على يديه كذا وكذا في يوم من الأيام، من إدراكك ليه ما يكونش ابنك؟ ليه ما يكونش زوجك؟ ليه ما يكونش أي حد تقومين عليه؟ دي أول مسألة.
المسألة الثانية بقى، لعل من حكمة الله عز وجل أن خلى كل واحدة من دول واقفة وراجل القرابة جهة مختلفة، هتلاقوا اللي وقفت ورا ابنها السيدة مريم، وهتلاقوا اللي وقفت ورا جوزها سيدة خديجة، وهتلاقوا اللي وقفت ورا أبوها السيدة فاطمة. السيدة فاطمة كانت تكنى بأم أبيها وهنجلها كمان شوية، وهتلاقوا اللي وقفت ورا ربيبها اللي هو مش قريبها، لكن اتربى في حجرها السيدة آسيا، سيدنا موسى لا ابنها ولا هو أخوها ولا هو أبوها ولا ربيبها اتربى في حجرها.
يعني لدرجة أننا بنقول إيه: أهو مش لاقية حد لا زوج ولا ابن ولا بتاع، اكفوا لي طالب علم، اكفولي يا شيخ، مشيجي بيتك، مش لازم يجي بيتك، اكفلي طالب علم، طالب علم مجتهد تكفليه بالمال، تكفليه بالرعايه، تكفي أي حاجة. ليه؟ لأن المرأة عندها هذه الإمكانات، عندها هذه السمات خلقت بها البذل والعطاء، وأنها ممكن تبقى في الكواليس عادي جداً، الكواليس يعني واقفة في الكواليس وفرحانة باللي على الاستيج، على المسرح، فرحانة بيه، المرأة كده، خلقت كده يا جماعة.
لما نجي نقول إن المرأة في طبعها خلقت تابعة، ده مش عيب حتى لو سمعتوا الكلمة دي في يوم الأيام، طبعا من الرجال عالماً، يعني ما إنما إنما طبيعة الرجل، طبيعة الرجل في المجمل أنه خلق ليكون في الأمام، وطبيعة المرأة خلقت لتكون في الخلف. في الخلف يعني تابعة، يعني إيه تابعة؟ يعني يتقال يمين فتمشي يمين، يتقال شمال فتمشي شمال.
طب ده عيب فيها؟ لا، مش عيب، ده دور، ده دور في الدنيا في الحياة. نرجع نقول تاني، هل معنى كده المرأة ما تناقشش؟ هل لا مين قال كده؟ نساء الأنصار كانوا يناقشوا وبيرجعوا وبتاع، واستقر الأمر من النبي صلى الله عليه وسلم أنه بقى كده بيسمع لنسائه ويراجعوه، فالمرأة تراجع الزوجة عادي جداً.
طب هل معنى كده أن المرأة ماشي هتتكلم وبتاع بس في الآخر رأيها لازم يبقى أقل من رأي الرجل؟ مين قال كده؟ هو مين اللي أنقذ الموقف في صلح الحديبية؟ امرأة! سيدنا النبي عليه الصلاة والسلام يقول للصحابه: صلح الحديبية، طبعا صلح جائر وظالم، الصحابه شايفينه كده، وبعدين كانوا محرمين رايحين الكعبة، يمنعوا من الكعبة! وده كبير جداً عند العرب، إيه نمنع من الكعبة ليه؟ لا، نقاتل بقى لغاية ما نقتل ولا نموت ولا يحصل اللي يحصل.
فسيدنا النبي أمر عليه الصلاة والسلام أن هم يحلقوا ويحلوا، فكم صحابي امتثل؟ ولا صحابي، ولا واحد. أزمة دي، أزمة كبيرة، سيدنا النبي بيقول أمر، ولا واحد يمتثل الأمر من كتر الغل اللي جواهم وظنوا أن شوية النبي يرجع عن رأيه صلى الله عليه وسلم، وإيه نروح بقى ونقاتل؟ مين اللي أنقذ الموقف؟ رأي امرأة دخل على أم سلمة غضبان، إيه غضبان ليه؟ قال له: مالي لا أغضب وأنا أمر بالأمر فلا يمتثل؟ فقالت له: طب ولا يهمك، اطلع ما تكلمش حد خالص، وروح احلق، ما تكلمش حد، ما تقولش لحد حاجة.
سمع كلامها، طلع حلق، أول ما له حلق حلق، خلاص عرفوا أن ما فيش أمل خلاص، سيدنا النبي حلق عليه الصلاة والسلام، فما فيش أمل بقى خلاص أن إيه يرجع لرأيه، فممكن المرأة يكون لها رأي صحيح ورأي صائب وتنقذ به مواقف كبيرة؟ أه، ممكن جداً، ولذلك الرجل اللي بيسمعش لمراته هو المسكين بجد، ليه؟ لأنه ربما فقد معيناً صادقاً هو صادقاً دي قولا واحدا، رأيها بقى ممكن يرجح ولا ما يرجحش دي اللي فيها كلام، إنما هي امرأة، امراتك، زوجتك، هتصدقك، لأنها شايفه مصلحتكم واحدة، حتى لو مش
فأنت فقدت معينا ناصحا صادقا لك، ويمكن ربنا يضع البركة في رأيها في وقت من الأوقات، ويمكن تكون ذات عقل، ويمكن تكون دينة فتبقى مسددة؛ ما هو أنتم عارفين الإنسان الدين ممكن ربنا يسدده من غير ما يعني ممكن يبقى هو عقلها خفيف لكن عندها دين، فربنا يجري الحق على لسانها بركة منه سبحانه وتعالى؛ فالرجل يسمع لامرأته علشان ما يفقدش ذلك المعين الصادق الناصح.
نرجع تاني بقى: فالسيدة فاطمة كانت أشبه الناس برسول الله صلى الله عليه وسلم، يبقى قدوتك الدرس اللي نطلع بيه: هتاخدِي واحدة من الأربعة خير وبركة، ما أخدتيش وعاوزة أدوري على قدوة عايشة بينا دلوقتي علشان هي الأقرب لي وهي اللي هقدر أروح أستشيرها، وهي اللي لما أشوفها بتعمل إيه وبتاع، يبقى تاخدي امرأة دينة، تاخدي امرأة دينة، وامرأة حريصة على سنة النبي عليه الصلاة والسلام.
يلا نكمل: ما رأيت أحدا أشبه سمتا ودلا وهديا برسول الله صلى الله عليه وسلم في قيامها وقعودها من فاطمة بنت رسول الله صلى الله عليه وسلم، وكانت إذا دخلت على النبي صلى الله عليه وسلم قام إليها فقبلها وأجلسها في مجلسه.
ده معنى، يا جماعة، ومش ده المعنى الثاني اللي عاوزين نتكلم فيه في الحديث؛ لكن في معنى ثاني مهم جدا جدا في كونها قدوة أو في كونها خير نساء العالمين رضي الله عنها، أنها كانت حب رسول الله صلى الله عليه وسلم، ودي برضو لا نغفلها، لا نغفلها، أنها كانت أحب الناس للنبي عليه الصلاة والسلام، حتى إنه كان بيعمل معاها حاجات ما يعملهاش مع غيرها؛ منها أنها كما يعني هذا لم يؤثر عن أحد أنه النبي عليه الصلاة والسلام كلما رها قام إليه وقبله وأجلسه في مجلسه، ده كان يعمله مع السيدة فاطمة رضي الله عنها.
حاجة ثانية: أثر أن النبي عليه الصلاة والسلام كان إذا خرج من المدينة آخر بيت يدخله بيت السيدة فاطمة، يعني يسلم على الزوجات ويدخل بيت السيدة فاطمة ومنه ينطلق، فإذا رجع إلى المدينة أول بيت يدخله بيت السيدة فاطمة، يسلم عليها وبعدين بقى يشوفها يروح فين صلى الله عليه وسلم؛ فكان لا كان في علاقة بينه وبين السيدة فاطمة غريبة، علاقة محبة غريبة، طبعا هو صلى الله عليه وسلم كان بيحب كل أبنائه، أو كل بناتي بقى إن الذكور ماتوا، لكن علاقات بالسيدة فاطمة مختلفة، خلاص.
إذا دخل عليها قامت من مجلسها فقبلته أجلسته في مجلسه؛ فلما مرض النبي صلى الله عليه وسلم دخلت فاطمة فأكبت عليه فقبلته ثم رفعت رأسها فبكت، ثم أكبت عليه ثم رفعت رأسها فضحكت. فقلت السيدة عائشة بتتسلم وده موضع الشاهد الثاني، احنا قلنا هي ليه قدوة؟ حاجتين: كانت أشبه بالنبي صلى الله عليه وسلم سمتا ودلا وهديا، ثاني حاجة بقى تقول السيدة عائشة لما رأت المنظر ده إن هي بكت أظن كلنا عارفين القصة وليه بكت وليه واللي علينا بس، احنا مش جايين نحكي القصة، اللي علينا نشير إليها بس، ده لا يعنينا.
المهم في المره الأولى بكت، هو أسرها بشيء، يعني في المره الثانية ضحكت. تقول بقى السيدة عائشة: إن كنت لأظن أن هذه من أعقل نسائنا، فلما توفي النبي فإذا هي من النساء إيه اللي بتضحك وتعيط في نفس الوقت دي؟ هي بتقول إيه بقى؟ أنا كنت بشوف السيدة فاطمة من أعقل نسائنا، يبقى السيدة فاطمة كانت ذات عقل، امرأة عاقلة لدرجة أن السيدة عائشة تقول: كنت أظنها من أعقل نسائنا، فإذا هي من النساء.
طبعا السيدة عائشة عجلت في هذا، هي ما تعرفش هو قال لها إيه، هي بتقول إيه اللي نزلت تبوسه قامت بتعيط، نزلت تبوسه قامت بتضحك، إيه ده؟ في إيه؟ إيه العياط والضحك اللي ورا بعض دول؟ طبعا ده ليه سبب؛ سيدنا النبي عليه الصلاة والسلام أول مرة أسر أسر إليها بشيء، قال لها إن سيدنا جبريل كان يعارضه القرآن في كل عام مرة، وإنه عارضه هذا العام مرتين، وما أراه إلا أجلي، يعني أنا هموت خلاص؛ فبكت السيدة فاطمة.
فلما أكبت عليه مرة أخرى أخبرها أنها أول أهله لحوقا به، أنت أول واحدة هتيجي ورايا ما تقلقيش، وأخبرها أنها سيدة نساء أهل الجنة في المره الثانية فضحكت؛ فيبقى كان ليها سبب. طبعا السيدة عائشة مش عارفة إن يعني الشاهد بقى يا جماعة أنها كانت السيدة فاطمة من أعقل النساء، فبهذا كملت السيدة فاطمة، ولذا الرافعي ليه كلمة جميلة قوي، كان بيقول إيه؟ المرأة في كل امرأة، وليس العقل في كل امرأة.
يعني المرأة أو المفروض يعني يعني الأنوثة معاني الأنوثة موجودة في كل امرأة، بل البنت تخلق بهذه يعني تلاقي البنت الصغيرة، تلاقي قعدتها غير قعدة الولد من غير ما حد يعلمها لسه، لعبها غير لعب الولد، تحب تبص في المراية تحب الزينة وهي لسه لم تعقل، وتفرح لما مامتها تمسك إيديها تحط لها المانيكير ومش عارف إيه، هي مجبولة على ده، مجبولة على معاني الأنوثة؛ فده في النساء يعني المرأة في كل امرأة، طبعا بدرجات بتفاوت، وليس العقل في كل امرأة، فبهذا كملت فاطمة السيدة فاطمة، بل بهذا كمل الأربعة كلهم بالعقل.
طبعا السيدة فاطمة أنا الدرس ده من الدروس اللي مالهاش بناء في ذهني، يعني أنا جاي بدرس فيه، وأنا يعني في ببشر بهذه الدروس خيراً، يعني إيه بيبقى فيها بقى فتوحات، فاحنا هندردش مع بعض، واللي يجي يجي إن شاء الله، خلينا نبدا بالمعنى الكبير اللي عاوزين نقف عليه في درس السيدة فاطمة، وهو معنى الزهد في الدنيا، وخلونا نتأمل كده يا جماعة معنى مهم جدا.
السيدة فاطمة تزوجها سيدنا علي رضي الله عنه، لكن هو الموضوع ما جاش كده، الموضوع ليه قصة؛ القصة أن السيدة فاطمة خطبها أبو بكر رضي الله عنه، يمكن القصة دي الناس ما تعرفهاش، جه أبو بكر سيدنا أبو بكر يخطب السيدة فاطمة من النبي صلى الله عليه وسلم، في رواية أن النبي صلى الله عليه وسلم سكت ما ردش، في رواية أنه قال إنها صغيرة، فكان أبا بكر خلاص، سواء النبي سكت عليه الصلاة والسلام أو قال، الناس عرف إن هو إيه يعني مش عاوز يزوجها لأبي بكر ض سيدنا أبي بكر مشي.
فجالها سيدنا عمر يخطبها من النبي عليه الصلاة والسلام، ففعل معه مثلما فعل مع سيدنا أبي بكر رضي الله عنه، فمشي؛ فبعض الناس راحوا لسيدنا علي قالوا له يعني فاطمة تخطب ما تروح انت أولى بيها؟ فقال: أنا هروح، أنا معيش حاجة، أنا مفلس، معوش فلوس؛ فقالوا يعني النبي سيدنا النبي بيحبك عليه الصلاة والسلام وجرب هتخسر إيه؟ فبيقول سيدنا علي راح: أنا هحكي لكم القصة وبعدين نرجع نتأمل القصة.
راح دخل سلم على النبي عليه الصلاة والسلام وكان بيكسف، فقعد قال له: ها أنت جاي ليه؟ فما ردش مرتين ثلاثة، ففسيدنا النبي قال له إيه عليه الصلاة والسلام: جئت تخطب فاطمة؟ فقال: أجل يا رسول الله. قال: وما معك؟ اه جينا بقى للمشكلة، قال له: معيش حاجة خالص، معلوش حاجة، قال له: ليس معي شيء. قال له: أين الدرع التي كنت أنفلتكها في بدر؟ مش كان معاك درع باين؟ كنت مديك درع درع يا جماعة بتاع الحرب ده؟ مش كان معاك درع؟ قال له: أه. قال له: هاتها، هات الدرع ده مهر فاطمة.
باعوا الدرع جاب 480 درهم، فراح جاب بتلتين فلوس للسيدة فاطمة عطور، طيب وبالثلث الباقي هدوم، وده كان مهر السيدة فاطمة. طيب تعالوا نتأمل القصة دي: أول حاجة ليه سيدنا النبي، أولا بالإجماع، عشان بس بالإجماع وأكيد سيدنا النبي كان عارف ده في حال حياته، أن مين أدين؟ سيدنا أبو بكر ولا سيدنا علي؟ سيدنا أبو بكر ما فيهاش كلام، طب سيدنا عمر ولا سيدنا علي؟ سيدنا عمر دي ما فيهاش ما فيهاش كلام، ده إجماع بين الأمة، سيدنا أبو بكر وبعدين سيدنا عمر وبعدين سيدنا عثمان وبعدين سيدنا علي.
فمن حيث الدين سيدنا أبو بكر هو اللي ما فيش بعد كده، ده من حيث الدين؛ طيب ومع ذلك النبي عليه الصلاة والسلام لا جوزها أبا بكر ولا جوزها سيدنا ابو بكر ولا جوزها سيدنا وهم أدين، وسكت، وفي رؤية قال إنها صغيرة. أولا هي هي صغيرة؟ يعني تعالوا عاوزين بقى نفسياتنا بقى تهدى كده، ونفهم عرب، مش نفهم عرفنا، احنا نفهم عرب. لا، ما كانتش صغيرة.
سيدنا علي لما اتجوزها كانت بين الـ18 والـ20، دي كبيرة، دي مش صغيرة عند العرب، دي كبيرة في السن، كبيرة منين؟ سيدنا النبي عليه الصلاة والسلام عادي جداً تزوج عائشة سبع سنين وبنى وبنى بها تسع سنين، طب ده مستغرب في العرب؟ لا، لا، ده في العرب كان عادي، السيدة زينب بنت النبي عليه الصلاة والسلام جوزها مين؟ أبو العاص بن الربيع، ده يبقى ابن خالتها ابن اخت السيدة خديجة، اتجوز ستنا زينب وهي دون العشر، اتجوز ستنا زينب وهي دون العشر؛ لأن ستنا زينب ولدت قبل البعثة بـ10 سنين، احنا قلنا الكلام ده المرة اللي فاتت.
ستنا زينب ولدت قبل البعثة بـ10 سنين، وسيدنا أبو العاص بن الربيع هو بقى صحابي بعد كده تزوجها قبل البعثة، فهي اتجوزت وهي دون العشر. طيب ستنا رقية بنت بنت النبي عليه الصلاة والسلام، وستنا أم كلثوم بنت النبي عليه الصلاة والسلام الأول اتجوزهم عتبه وعتيبة ولاد أبو جهل، ماشي؟ فلما نزلت تبت يد أبي لهب وتب طلقوا البنتين، قصة طويلة.
طيب تبت يد أبي لهب وتب نزلت أمتى؟ نزلت في أوائل البعثة خالص، النبي وقف على الجبل وقال: لو قلت لكم إن قالوا: أنت الصادق، عارفين القصة؟ فقال: طب أنا رسول الله بين يدي عذاب شديد، فقال أبو لهب: ألهذا جمعتنا؟ تبا لك سائر اليوم، فنزلت تبت يد أبي لهب وتب؛ فده في أول سنين البعثة، في أول سنين البعثة.
طيب رقية وأم كلثوم كان عندهم كم سنة؟ ما هو رقية وأم كلثوم أصغر من مين؟ السيدة رقية والسيدة أم كلثوم أصغر من السيدة زينب، فجت البعثة عليهم يا سيدي اعتبرهم كانوا تسع سنين وثمان سنين، اعتبرهم كده يعني السيدة زينب 10 سنين السيدة ورا بعض كده، السيدة رقية تسع سنين، السيدة أم كلثوم ثمان سنين، نعتبرهم كده تسعة وثمان سنين، وبعد البعثة سنتين ثلاثة، فاحنا بنتكلم في واحدة عندها 11 سنة، فده كان عادي أن البنت تتجوز صغيرة؛ فهي السيدة فاطمة ما كانتش صغيرة.
لما تتجوز سيدة فاطمة اتولدت قبل البعثة بخمس سنين على قول المشهور، في قول إنها تولد بالبعثة بسنتين، في قول إنها تولد بعد البعثة بسنة، دي أقوال كلها، خلينا على إنه كان عندها خمس سنين و13 سنة في مكة 18 سنة وسنتين؛ لأن سيدنا علي اتجوزها في السنة الثانية من الهجرة، اتجوزت 20 سنة دي كبيرة مش صغيرة، فما كانتش صغيرة تقول لا لا لا انت مش فاهم هو يقصد أنها صغيرة.
خلي بالكم يا جماعة الكلام ده مهم جدا جدا عشان أنا هبني تصوراً على المسألة دي، فانا بقدم المقدمات دي كلها عشان نخرج بالشيء اللي تميزت فيه السيدة فاطمة؛ فمعلش استحملوني لأن هذا التصور لم أجده مكتوباً في مكان، فإن كان صواباً فمن الله، وإن كان خطأ فمني ومن الشيطان.
فلازم أبينه أبني التصور بقى بالراحة كده مع بعض، فما كانتش صغيرة. طيب لا أنت هي ما يقصدش صغيرة في السن، ويقصد أن سيدنا أبو بكر أكبر منها بكتير، سيدنا عمر أكبر منها بكتير، وده ما كانش معروف عند العرب، أقول لك لا، كان معروف عند العرب وكان عادي أن الراجل الكبير في السن يتجوز البنت الصغيرة، ده كان عادي في العرب. سيدنا النبي عليه الصلاة والسلام قلت لكم تزوج عائشة سيدة عائشة والفرق بينهم زي ما أنتم عارفين.
خدوا المفاجأة الكبيرة دي، عارفين أن من زوجات سيدنا عمر أم كلثوم بنت السيدة فاطمة؟ من زوجات سيدنا عمر سيدنا السيدة فاطمة خلفت الحسن والحسين في قول ومحسن وده مختلف فيه، وأم كلثوم وزينب وفي قول رقيه اللي هم الثلاث اخوات البنات بتوعها، سمات ولادها بناتها على أسمائهم، رقيه برضو مختلف فيها ذكرها ابن سعد في الطبقات.
نرجع تاني، فهي خلفت أم كلثوم، سيدنا عمر من زوجاته أم كلثوم بنت بنت سيدة فاطمة، احنا نسمع ده ممكن دلوقتي نستهجنه، أنت ما تاش عايش وقتهم، ده العرف عادي، ده موضوع عادي عندهم أن ده يحصل، ده كان عادي، خلاص فما بلاش قلنا لكم قبل كده من الجناية من الجناية أن احنا نسقط نصوصاً تراثية على واقعنا، دي جناية على العلم.
خلاص احنا يا جماعة في نفس العصر اللي عايشينه، يعني احنا في 26، لو رحنا منطقة مش هقول بره مصر، يعني احنا لو مصريين ورحنا جوه مصر لكن منطقة معزولة شوية، ممكن لاقي عندهم أعراف مختلفة تماماً عن أعرافنا تماماً، واللي أنت بقى قاعد كده بتبقى حاضر كف على كف، أنتم ازاي بتعملوا كده، وأنت مالك ازاي يعملوا؟ ده عرفهم، (ضحك) يعني عرفهم، احنا لغايه دلوقتي في مناطق في مصر عادي جداً البنت بتجوز وهي صغيرة وما بلغتش السن القانوني، ده موجود في مصر.
فما بالك بقى احنا عايشين اهو 20 26 في نفس بلدك، فأنت لا تحاكم أعرافهم إلى أعرافنا، وبعدين ترجع تقول إيه والاسلام ظلم مش عارف إنت يا ابني إنت إنت أولا ده كان العرب ما هواش إسلام. السيدة زينب لما اتجوزها زوجها أبو العاص بن الربيع، اتجوزها بعد البعثة ولا قبل البعثة؟ قبل البعثة. العرب كانوا كده، مش الإسلام اللي جه قال إيه اتجوزوا البنات صغيرين، ما مش كده، العرب كانوا كده عادي جدا يتجوزوا والأعمار كده.
ماشي، نرجع بقى تاني، يلا نرجع بقى، يبقى هي ما كانتش صغيرة. وفرق السن ده معروف، ليه النبي صلى الله عليه وسلم يجوزها لا يزوجها أبا بكر ولا يزوجها عمر؟ ليه؟ الذي يظهر لي بتتبع النصوص وسيرة السيدة فاطمة أن النبي والله أعلم لم يفعل ذلك؛ لأن النبي صلى الله عليه وسلم أراد من فاطمة رضي الله عنها شيئا آخر، أراد أن يحرزها عن الدنيا.
أراد أن يحرزها عن الدنيا، أن الدنيا لا تلوث السيدة فاطمة رضي الله عنها، ليه؟ لأن السيدة فاطمة هتكون صاحبة النسل الشريف. السيدة فاطمة يا جماعة الوحيدة التي لم ينقطع نسلها، أي حد من الأشراف دلوقتي، أي حد من نسل النبي عليه الصلاة والسلام دلوقتي هو من نسل الحسن والحسين، طبعا ولاد النبي الذكور عليه الصلاة والسلام كلهم ماتوا صغاراً، وبنات النبي عليه الصلاة والسلام انقطع نسلهم هن مافيش ومنهن التي لم تنجب أصلاً خلاص.
فالنسل الشريف الباقي إلى يوم القيامة نسل فاطمة نسل سيدة فاطمة رضي الله عنها، فأراد أن يحرزها عن الدنيا. طب سيدنا أبو بكر كان تاجر وكان ذا مال، دعكم من سيرته في نفسه، لكن تخيلوا كده واحد تاجر، سيرته في نفسه لا كان متواضعاً وكان زاهداً وكذا وكذا دي قصة تانية، لكن أنا هتجوز بنت النبي عليه الصلاة والسلام وأنا راجل ميسور هعملها إزاي؟ سيدنا عمر قل مثل ذلك عن سيدنا عمر. سيدنا علي ما كانش معاه حاجة خالص، ومع ذلك زوجها لسيدنا علي ولا مزوجها لابي بكر ولا لعمر.
طيب هل هذه سيرته في بناته لا؟ بل بالعكس، الثلاث بنات التانيين على غير هذه الصفة. السيدة زينب تزوجها أبو العاص ولكن ده كان في الجاهلية وأبو العاص كان ميسوراً. السيدة رقية والسيدة أم كلثوم مين اللي جوزه؟ سيدنا عثمان من أغنى أغنياء الصحابة، جواز سيدة رقية إلى أن ماتت ثم تزوج بعدها أم كلثوم، ولذلك سمي ذو النورين عشان اتجوز من بنتي النبي عليه الصلاة والسلام.
فسيدنا النبي عليه الصلاة والسلام ما عملش كده مع بناته إلا مع السيدة فاطمة، أبى أن يتزوجها رجل ميسور له مال. طب إيه دليلك على كده أن سيدنا النبي عليه الصلاة والسلام أراد أن يحرز السيدة فاطمة عن الدنيا؟ ده درس كبير ها، أنا عمال بص كل مقدمات عشان هاجي أقول لكم بعد كده دي قدوتكم. إيه دليلك؟ أول حاجة دليل من فعل النبي عليه الصلاة والسلام، ثانياً دليل من فعل الله سبحانه وتعالى.
دليل من فعل النبي عليه الصلاة والسلام أنه سيدنا النبي عليه الصلاة والسلام بعد ما جوزها سيدنا علي إزاي كان بيتعامل مع السيدة فاطمة في ملف الدنيا؟ مثالين حصلوا، أول مثال سيدة فاطمه... أنا الأول معلش عشان أرتب كلامي قبل ما هنيجي لده بس عاوزين نعرف حياة سيدة فاطمة كانت عاملة إزاي، أنا ما قلت لكم إيه أراد أن يحرز عن الدنيا، تعالوا بقى نشوف الأول كانت حياتها عاملة إزاي. إحنا قلنا درع جاب 480 درهم بثلثيه، طب بثلثه هدوم.
جهازها كان عامل إزاي؟ مخدة من جلد حشوها ليف، ومفرش يتفرش على الأرض مش سرير يعني مش مرتبة، مفرش يتفرش على الأرض عشان يناموا على الرمل، يعني فوق الرمل كده مفرش ومخدة، ده جهاز عروسة ومخدة من جلد حشوها ليف، ورحى تطحن به اللي هو الحجارتين اللي بيلفوهم عشان يطحنوا بيه الشعير ومش عارف إيه، وقربة ماء عشان تجيب فيها المية بس. ده جهاز السيدة فاطمة التي... اللي دخلت عليه. وفي رواية إيه؟ أن سيدنا النبي عليه الصلاة والسلام كان يدخل عليهم كان عندهم قطيفة بيتغطوا بيها لو غطوا وشهم تبان رجليهم، ولو غطوا رجليهم تبان وشهم. على فكرة شتاء أو ليل، شتاء المدينة برد قارص، يعني اللي راح منكم المدينة في الشتاء ساقعة، هم كان عندهم قطيفة، يا نغطي وشنا يا نغطي رجلينا.
فدي كانت حياة السيدة فاطمة. طيب الحياة دي عملت إيه في السيدة فاطمة؟ إديها كانت هي اللي بتطحن الرحى. سيدنا علي هو اللي بيحكي كده يا جماعة، سيدنا علي كان فقيراً، كان معدماً، وكان بيشتغل أي حاجة، كان بيشتغل أي حاجة ده عشان يولم، ودي هنبقى نجيب لها القصة دي في فعل الله عز وجل بهما، عشان يولم راح قال هلم شوية أذخر نبات كده في الأرض كده أبيعه عشان أعرف أعمل أي حاجة.
ده كان سيدنا علي، طب السيدة فاطمة كانت بتلف الرحى، عارفين لما إدينا تتفقأ من من هنا كده؟ إديها بقت كده سيدة فاطمة، وكانت تطلع تجيب المية فالحبل بتاع القربة بقى معلم في رقبتها، علام دائم، مش... يعني يعلم بقى معلم في نحر السيدة فاطمة، وكانت تكنس البيت فهدومها على طول مطربة، ده وصف سيدنا علي ليها.
فدي سيدة فاطمة، طيب تعالوا بقى نشوف بقى الدليل أن سيدنا النبي عليه الصلاة والسلام لا إنت مش كده، إنت محروزة عن الدنيا أو محرزة عن الدنيا. تعبت السيدة فاطمة، في روايات بقى هايلة، راحت، في رواية أن سيدنا علي راح، المهم طلبوا من سيدنا النبي خادم أو خادم، طلبوا من سيدنا النبي خادم عليه الصلاة والسلام يساعدنا في شغل البيت، كان النبي عليه الصلاة والسلام اتاه سبي فقالوا ادينا خادم، أنا إيديا قالت له اشتكت له إيديا كذا ورقبتي كذا.
فعمل إيه سيدنا النبي؟ ملف أهو، السيدة فاطمة أحب أحب الناس ليه. في رواية أن هو لما راحت ما لقيتش فقالت للسيدة عائشة وروحت، سيدنا النبي جه عليه الصلاة والسلام دخل عليها وقال لها: ألا أدلكما على خير لكم من خادم؟ وأنتم عارفين الحديث بقى، إذا أويتما إلى فراشكما فسبح الله 33، واحمد الله 33، وكبر الله 34، فهو خير لكما من خادم. طب والخادم؟ مافيش خادم.
ماشي، في رواية تانية بقى لسيدنا النبي عليه الصلاة والسلام قال: اتق الله يا فاطمة، اسمعوا الرواية دي لما جت تشتكيه وعاوزه خادم تشتكي له، اتق الله يا فاطمة، وأدي فريضة ربك، واعملي عمل أهلك، فاذا أخذت مضجعك معك فسبحي 33 واحمدي 33 وكبري 34 فتلك 100 فهي خير لك من خادم. فقالت: رضيت عن الله عز وجل وعن رسوله صلى الله عليه وسلم.
شوفوا يا جماعة هنا الشدة في هذا الملف مع السيدة فاطمة، اتق الله يا فاطمة، وأطيعي ربك، واعملي عمل أهلك، فإذا أخذت مرجعك... إلى آخر الحديث. في رواية أنه قال: لا أعطيك خادماً وأدع أهل الصفة تطوى بطونهم من الجوع. مش هديكي خادم وأسيب أهل الصفة جعانين، هبيعه وأجيب بفلوسه أكل لأهل الصفة.
يا جماعة إحنا مش بنتكلم مع عن واحدة أنا آسف يعني مدلعة وموسرة حياتها جاية لأبيها إديها مفقفقة، شايفين طاعات النبي عليه الصلاة والسلام مع الملف ده مع سيدة فاطمة؟ تعالوا بقى نتامل كده معلش بقى لو كانت السيدة فاطمة تزوجها أبو بكر كانت هتيجي لسيدنا النبي تقول له اديني خادم، كان يبقى عندها الخادم أصلاً، صح؟ وساعتها سيدنا النبي عليه الصلاة والسلام هيبقى بيحارب في حته لوحده، إنما لما يعطيها للفقير سيدنا علي هيبقى أصلاً ده الطبيعي، فتلاقوا مواجهات النبي معاها قليلة، يعني إحنا ما جالناش في سيرته إلا مواجهتين؛ المواجهة دي مواجهة تانية أن سيدنا علي غنم قلادة من ذهب في غزوة من الغزوات، جاله في الغنيمة بتاعته قلادة من ذهب وراح رايح مديها لمين؟ السيدة فاطمة، فمين يشوفها عليها؟ سيدنا النبي فيغضب.
إيه في إيه عادي امرأة لابسة ذهب صيغة؟ غضب النبي صلى الله عليه وسلم وقال كلاماً، تقوم عامل إيه يا سيدة فاطمة؟ تقوم قاع على القلادة وتشتري عبد وتعتقه، فيفرح النبي عليه الصلاة والسلام. أنا عاوزكم تتأملوا حاجة؛ حياة ستنا زينب مع أبي العاص شكلها إيه؟ حياة ستنا رقية كانت مع سيدنا عثمان شكلها إيه؟ ثم حياة سيدنا أم كلثوم مع سيدنا عثمان شكلها إيه؟
أكيد حياة أرفى، أكيد وحياة أيسر، وحياة أنعم، عشان برده إحنا ما بنقولش إيه للستات افتقروا، مش بنقول كده، بس بنقول السيدة فاطمة أريد لها شيء آخر. أريد لها شيء آخر، سيدة فاطمة لا تلوث بالدنيا، لا تدخل عليها الدنيا ولا سيدنا النبي يسمح إن الدنيا تخش عليها عليه الصلاة والسلام.
دليل آخر بقى من فعل الله سبحانه وتعالى، أهو ده كله من فعل النبي عليه الصلاة والسلام إن الدنيا مش هسمح لها تخش علي، حاجة عجيبة جدا جدا وهذه في الصحيح. الحكاية دي في صحيح البخاري حصلت لسيدنا علي. سيدنا علي كان معدماً زي ما قلنا، هو عنده الدرع اللي إه، وكان عنده جملين، الجملين دول كانوا من الغنيمة برده.
الجملين كانوا من الغنيمة، والجملين دول مش رفاهية، لما نقول عنده جملين دي مش حاجة من مما يترفه به العرب، لا ده كان الجمل دي وسيلة الانتقال في الصحراء، هو يخرج الصحرا يجيب النبات اللي هو الأذخر ده هيجيبه إزاي؟ وهيجيبه على إيه؟ وهيمشي؟ فالجمل ده ما هياش وسيلة إيه يعني مش هو كده مرفأ. يوم يقدر ربنا شيء عجيب جداً جداً قبل زواج سيدنا علي.
أولاً النبي عليه الصلاة والسلام أخبر أن لازم وليمة والصحابه ساعدوه في الوليمه، لكن هو برده يعني راجل لا يعني قال أنا اشتغل طب أعمل إيه؟ راح جايب واحد تاني قاله تعال نطلع على الجمارين نجيب الأذخر، الأذخر نبات، الأذخر ده نبيعه، اعمل أي حاجة في الوليمة يعني. يقوم واخد الجمالين بتوعه ينخهم بجوار حجرة من حجر الأنصار، راجل أنصاري راح منزل الجمالين، وراح يدور على الأذخر ويدور على حاجات للجمال وبتاع ومش عارف إيه، مين جوه الأوضة الحجرة؟ سيدنا حمزة.
سكران، ولم تحر الحمر... الخمر لم تحرم إلا بعد موت سيدنا حمزة، مات في أحد الخمر حرمت بعدها أحد أصلاً، فهو كان بيشرب خمر عادي يعني ما فيش مش حرام، لكنه ثمل خلاص غاب عقله. سيدنا حمزة يبقى إيه بالنسبة لسيدنا علي؟ عمه. ثمل، وكان عنده إيه مغنية قينة تغني لهم. ف شاف الجملين، سخنت سيدنا حمزة، راحت قايلة له شعر، قالت إيه: ألا يا حمزو... مش عارف مش عارف للشرف النووي أو حاجة زي كده يعني إيه بتسخنه على الجمال اللي بره دي.
راح سيدنا حمزة طالع مشرح الجملين، قطع السنام وبقر البطن وخد الكبد بتاع الجملين، كان منهم. دي ثروة مين؟ سيدنا علي، ثروتهم خلاص ما يعني هما الجملين والدرع اللي هو... سيدنا علي بيروي ده في صحيح البخاري الكلام ده. رجع شاف الجمارين كده قال: لم أملك عيني، عيط. لسه ما يعرفش القصة إيه، ما يعرفش إيه اللي حصل. قال: لم أملك عيني. ما أنتوا حطوا نفسكم مكان سيدنا علي كده قعد يعيط، إيه اللي حصل في ما خلاص هو بالنسبة لي أنا هعمل إيه تاني؟ حياتي هتبقى شكلها إيه؟
يأبى الله أن بيت سيدنا علي وسيدنا فاطمة يبدأ إلا بهذه الآية بهذه الطريقة، سيدنا علي دخل على سيدة فاطمة حتى الجملين اللي حيلته انتهوا. طبعا بقيت الحكاية طريفة يعني هو جري للنبي، عرف بقى القصة وأن سيدنا حمزة هو... فجري للنبي عليه الصلاة والسلام وقال له حصل كذا كذا، فسيدنا النبي على طول لبس الرداء ورايح بقى، طبعا سيدنا حمزة كان عم النبي عليه الصلاة والسلام وكان النبي يعظمه ويحبه.
دخل على سيدنا حمزة فبيلومه، فسيدنا حمزة صعد النظر، فضل قاعد كده ويبص للنبي من فوق لتحت هو ثمل أصلاً هو مش... وراح قال له إيه: وهل أنتم إلا عبيد؟ بيكلم النبي كده وسيدنا حمزة كان مسلماً يعني. فالنبي عرف أنه ثمل، بيقولوا رجع القهقرى، النبي حتى قال خلاص ما هو ده ما فيش عقل ممكن يقوم يموت الناس. ابتدى يرجع وبيدي له وشه عشان إيه مش عارف هيعمل فيه إيه سيدنا حمزة، صلى الله على النبي ورضي الله عن سيدنا حمزة.
الشاهد يا جماعة هذا فعل الله، هذا فعل الله. طبعا اختلف بعد كده بقى هل سيدنا حمزة ضمن تلك الجمال ولا، لكن ده كله كلام فقهاء، ما فيش رواية تقول حاجة، ما فيش رواية تقول إن سيدنا حمزة عمل إيه بعد كده. الفقهاء اتكلموا ده يعني من حيث الفقه، لكن الشاهد يأبى الله إلا أن البداية تبقى كده. إن سيدنا علي يدخل على السيدة فاطمة مخدة حشوها ليف، فرشة على الأرض، رحى، قربة، ده جهازها.
فهذا فعل الله بسيده فاطمة، وهذا فعل النبي صلى الله عليه وسلم في هذا الملف الشائك ملف الدنيا، ما يتفتحش على السيدة فاطمة رضي الله عنها. فهذه رسالة لينا كلنا أنا أولكم ولنسائنا جميعاً، ورسالة خاصة أوجهها لمن كان من نسل النبي عليه الصلاة والسلام بيننا يعني سادتنا وتيجان رؤوسنا الأشراف، هذه سيرة أمكم فاطمة السيدة فاطمة رضي الله عنها، فكونوا على تلك السيرة.
أنا أحب جداً أي حد من الناس للنبي عليه الصلاة والسلام، طبعا أحبه، حتى وإن كان بيني وبينه خلاف في بعض المسائل ولا شيء، لكنه هو هؤلاء تيجاننا أسيادنا.
هذه سيرَة أمكم، فكونوا على تلك السيرة، ازهدوا في الدنيا واتركوها لغيركم، ولو كانت خيراً لجمعت لنبيكم صلى الله عليه وسلم ولنهل منها صلى الله عليه وسلم، لكن لا خير فيها. ورسالة لينا بقى: تكالبنا على الدنيا وحرصنا عليها. شوفوا سيدنا النبي عليه الصلاة والسلام كان إزاي يحرز فاطمة عن الدنيا، رضي الله عن السيدة فاطمة وصلى الله على النبي محمد عليه الصلاة والسلام.
فهذا أيضاً من مواطن القدوة في سيرة السيدة فاطمة رضي الله عنها، من مواطن القدوة، وأن أنا أخرتها؛ لأن ده المعنى المشترك اللي اتكلمنا عنه كتير، هو أنها وقفت خلف أبيها صلى الله عليه وسلم حتى كانت تكنى بأم أبيها. والحقيقة السيدة فاطمة برده تحسوا أن الكلام ده مش لما كبرت.
السيدة فاطمة عندنا موقف في السيرة عجيب جداً، إنه في مكة سيدة فاطمة مولودة قبل الهجرة بخمس قبل البعثة بخمس سنين، يعني سيدنا النبي بعث عليه الصلاة والسلام وهي عندها خمس سنين، في رواية قبليها بسنتين، خلونا الخمس سنين ودي المشهورة. سيدنا النبي بعث وسيدنا فاطمة عندها خمس سنين. سيدنا ابن مسعود بيحكي حكاية عجيبة، بيقول أن سيدنا النبي عليه الصلاة والسلام كان ساجداً عند الكعبة، فراح جاي أبو جهل قاعد وكان في جزور جمل اتذبح قبليها بيوم، فقال: من يمين يجيب سل الجزور، الأمعاء والحاجات هذه القذورات بتاع بني فلان، ويرميه على ظهر النبي عليه الصلاة والسلام؟ فقام أشقى القوم ماشي، وراح جايب سل الجزور ورماه على ظهر النبي عليه الصلاة والسلام.
ابن مسعود بيقول: لو أن لي منعة، لو بس هيروح يشيله هيتبهدل، خاف. يلاقوا مين جاي جري؟ السيدة فاطمة، جارية صغيرة، بنت سبع سنين، ثامنة سنين بالكتير، جاية جري وتشيل سل الجزور من على ظهر النبي عليه الصلاة والسلام وتبكي وتسبهم. يا جماعة، ده فعل أم، ده مش فعل بنت؛ يعني البنت الصغيرة تخاف وتكش وتقعد في جنب. الأم عاطفة الأم هي أقوى عاطفة على وجه الأرض، عاطفة أم. عشان كده تلاقي عادي أن نسمع في حكاية أن أم لقت ابنها مش راحت لحقته وهي اللي ماتت، هي وقتها مش بتفكر بعقل؛ يعني ده لما نسمعه لا نستنكره، أن أم كذا وشايفه ابنها هيقع مش عارف إيه، راحت هي لحقته وهي اللي وقعت ماتت مثلاً، فما نحسش إنه فيلم هندي مثلاً لا خالص. آه الأم تعمل كده، آه الأم تعمل كده، لأن الأم عاطفتها تغلب أي عاطفة.
فالسيدة فاطمة هي وربوها صلى الله عليه وسلم من وهي صغيرة، وكان والله أعلم، والله أعلم، كان لذلك كانت رضي الله عنها هي جت الدنيا عشان كده، ولذلك كان من المناسب أن الوحيدة اللي تفضل عايشة لغايه ما يموت النبي عليه الصلاة والسلام من كل القرابه ومن كل البنات، هي الوحيدة اللي فضلت عايشة، كله مات قبل موت النبي عليه الصلاة والسلام. ولذلك كان والله أعلم من المناسب أن تكون أول واحدة تلحقه بعد الموت، مين هي؟ ليه؟ مهمتها خلصت في الدنيا، هي جت الدنيا عشان تكون أم أبيها، وقد مات الاب صلى الله عليه وسلم انتهت وظيفتها، فلذلك كانت أول أهله لحوقاً به صلى الله عليه وسلم.
موت سيدنا النبي عليه الصلاة والسلام كان شديداً على فاطمة، على السيدة فاطمة. ذكروا أنها هي طبعا ماتت بعده بست شهور، وكانت بنت صغيرة، السيدة فاطمة ماتت 28 سنة، ما كانتش كبيرة. يعني احنا قلنا هي اتجوزت 20 سنة تقريباً في السنة الثانية من الهجرة، وسيدنا النبي مات في السنة العاشرة، وهي ماتت بعد ست شهور، كانت 20 سنة، عفواً، كانت 28 سنة. الروايات بتقول إن بعد موت سيدنا النبي عليه الصلاة والسلام كانت تذوب، السيدة فاطمة بعد موت النبي عليه الصلاة والسلام كانت تذوب، كل يوم بتنقص حته. في بعض الروايات أن أهل المدينة بعد موت النبي عليه الصلاة والسلام ما كُنوش عارفين يعيشوا حياتهم من السيدة فاطمة، من أحوالها، لم يقف دمعها إلى أن ماتت. أكتر واحدة تأثرت بموت النبي عليه الصلاة والسلام السيدة فاطمة، دمعها ما وقفش وما ضحكت حتى ماتت رضي الله عنها.
فدي كانت وظيفتها أن يكون منها النسل الشريف إلى يوم القيامة، وأن تكون أم أبيها في هذه الدنيا. طيب احنا نستفيد إيه بقى من كل اللي حكيناه ده؟ أن هذه قدواتنا، فلنكن على سيرتهن. احنا طبعا احنا قلنا مش هندخل في سيرة السيدة فاطمة، احنا إن شاء الله إن شاء الله يعني من الخطبة أن احنا عندنا سلسلتين ممكن نتناول شيئاً من سير السيدة فاطمة بعد كده في سلسلة من الاثنين دول بشيء من التفصيل: سيرة أو سلسلة دعوية إن شاء الله هنعملها عن آل البيت إن شاء الله، وأخرى عن الزواج إن شاء الله، وهناتي بكل مواطن يعني في في خطة السلسلة بتاعة الزواج أن احنا هنتكلم عن كل المواطن اللي في السيرة اللي فيها زواج، خلاص.
طيب، بقي أمر واحد نقوله، زي ما قلنا كده على في درس السيدة خديجة أن في شبهة بتقال في عن السيدة خديجة، ففي شبهة تثار هنا، وهي أن النبي صلى الله عليه وسلم نهى علياً أن يتزوج على فاطمة، فيثيرها البعض أنه أهو ما فيش تعدد في دين الله عز وجل، وأنتم فاهمين الدين غلط، وكذا وكذا. طبعا أنا هنا لا جاي أقول في تعدد ولا أقول ما فيش تعدد، ولا أتكلم في القصة دي خالص، لكن هذا الأمر، ملف التعدد، الناس فيه بين طرفين ووسط.
طرف يتعامل مع التعدد ده أن هو يعني إيه السنة الغائبة واحنا غرباء، واللي هيعمل التعدد ده وكأن اللي مش هيعدد يبقى مش عارف إيه، وده طرف مغالي بلا شك، ونفس الفقهاء في الكلام عن التعدد نفس هادئ جداً. إذا كان في أصل الزواج، الزواج نفسه بيدوا له الأحكام التكليفية الخمسة، يعني من الجواز ما يكون واجباً، ومن الجواز الزواج الأول -مش الثاني والثالث والرابع- ما يكون مستحباً، وما يكون مباحاً، وما يكون مكروهاً، وما يكون حراماً، ده موجود في كتب الفقه مذكور، يعني فهم عادي بيتكلموا على مسألة التعدد دي مسألة بنفس هادئ جداً. والعكس، تلاقي طرف تاني إنه عاوز ينفي، يشطب على نصوص الآية التعدد من كتب الدين، وده برضه طرف يعني ما جنبه الصواب، هو الدنيا هو في وسط في النص.
وقصة أن سيدنا النبي عليه الصلاة والسلام منع سيدنا علي أنه يتزوج على السيدة فاطمة رضي الله عنها ما هيش بالصورة اللي الناس فاهاها. القصة يا جماعة إن سيدنا علي حب يتجوز بنت أبي جهل. طيب تعالوا بقى الأول، الأول إيه اللي حصل؟ فسيدنا النبي لما وصل له الكلام ده، طبعا سيدنا النبي وصله الكلام ده من ثلاثة، وثلاثة مرويات؛ أن السيدة فاطمة جت له وكمان إيه يعني قالت كلام اللي هو إيه: يزعم الناس أنك لا تنصر بناتك أو حاجة زي يعني اللي هو إيه أنت بقى يعني الناس بتقول عليك كذا، ما بتنصرش بناتك وما بتوقفش في ظهرهم وهو رايح يتجوز بنت أبي جهل. ووصلوه من سيدنا علي، وسيدنا علي كان جاي يستشيره، يعني يقول له فيقول له: أنت بتسالني عن حسبها؟ قال له: لا، يعني إيه رأيك؟ قال له: لا. ووصل له من مين تاني؟ من عائلة أبي جهل نفسهم، جم يستأذنوا النبي عليه الصلاة والسلام أن علي سيدنا علي هيتجوز بنتهم.
إيه اللي عمله النبي عليه الصلاة والسلام الأول؟ دي مسألة أسرية مسألة خاصة، صح؟ يعني مسألة خاصة، يعني هو سيدنا النبي عليه الصلاة والسلام وسيدنا علي ربيبه، ودي مسألة مسألة تانية أن السيدة فاطمة، كويس أن برضه ذكرنا ده، احنا قلنا لكم السيدة فاطمة النبي جوّز سيدنا علي عشان أول معنى: يحرز يحرز عن الدنيا. معنى تاني مهم جداً جداً، وهنرجع للقصة دي معلش أنا آسف. معنى تاني مهم جداً، أنه بزواجها من سيدنا علي سيدنا النبي عليه الصلاة والسلام هيعرف يدخل البيت في أي وقت ويخرج في أي وقت، ده ما كانش ممكن يعرف يعمله مع سيدنا أبو بكر وسيدنا عمر. سيدنا أبو بكر برضه رجل كبير في السن أولاً، وله خصوصياته وكذا وكذا، سيدنا عمر قل مثل ذلك. سيدنا عمر سيدنا علي هو أصلاً سيدنا النبي اللي مربيه في بيته.
سيدنا علي بقى ابن عم سيدنا النبي عليه الصلاة والسلام، وبعدين أبو طالب أصابه فاقة وكذا، راحوا كل واحد خد عيل. سيدنا حمزه جه قال إيه: كل واحد ياخد عيل من عيال مين؟ أبو طالب يربيه عنده، فراحوا قالوا لأبو طالب كده، قال لهم: ماشي بسيبوا لي عقيل، كان بيحبه، وخدوا بقى اللي أنتم عايزينه. فكل واحد اختار واحد ما عدا سيدنا النبي عليه الصلاة والسلام اللي ما اختارش، كل واحد خد واحد، فتبقى سيدنا علي. فراح سيدنا النبي قال لهم إيه: اخترتم لأنفسكم واختار الله لي تعالي! وراح واخد سيدنا علي، اتربى عنده في بيته. فاللي مربياه خديجة، السيدة خديجة، فهو ربيبه خلاص، فمربيه وفاهم تربيته كويس.
تاني حاجة، مش هو متعود أن سيدنا النبي داخل عليه خارج عليه، متعود على كده؟ فسيدنا النبي لما يخش على السيدة فاطمة، هو داخل على بنته وعلى ابن عمه وربيبه في نفس الوقت، وده كان بيحصل كتير في السيرة، يعني بنلاقي عادي جداً أن سيدنا النبي عليه الصلاة والسلام يدخل على زوجته ويدخل على السيدة فاطمة. بل بالعكس، أنتم لو شفتوا بيت السيدة فاطمة، حجرة السيدة فاطمة كانت فين؟ كان جدار السيدة عائشة؛ يعني يعني حجرة السيدة عائشة أهي، نفس الجدار على طول جنبه سيدة فاطمة. وكان مما روي أن في قوة فاتحة بين الحجرتين، يعني كان عليها ساتر ولا بتاع، فكان سيدنا ينادي ويفتح القوة على طول يتكلم، عايش معاهم كان يعني إيه بيت فيه حجرتين بالضبط كده. ده ما كانش ينفع يعمله مع حد تاني، فده ساعد على تربية السيدة فاطمة تربية مختلفة، ده معنى تاني.
المعنى الثالث بقى، من أجله ما وافقش لسيدنا أبو بكر وسيدنا عمر، وافق لسيدنا علي. الأربعة العظماء في الأمة مين؟ سيدنا أبو بكر، سيدنا عمر، سيدنا عثمان، سيدنا علي، الأربعة العظماء، والأربعة الخلفاء بعد موت النبي عليه الصلاة والسلام. قبل زواج سيدنا علي، كانت الثلاثة كانت ثلاثة بينهم وبين النبي صهر، وكان باقي سيدنا علي. سيدنا أبو بكر سيدنا النبي متجوز بنته، سيدنا عمر سيدنا النبي متجوز بنته، سيدنا عثمان كان متجوز ستنا رقيه في الوقت ده، وبعد كده في سنة الثالثة من الهجرة اتجوز ستنا أم كلثوم، وكان باقي سيدنا علي الوحيد اللي ما فيش مصاهرة. فصاهره النبي صلى الله عليه وسلم بالسيدة فاطمة رضوان الله عليه.
نرجع تاني بقى، كنا بنقول إيه؟ آه، الشبهة. فسيدنا علي عاوز يجوز بنت أبي جهل، يلا بقى فلاش باك كده مثلاً عشر سنين وأكثر لورا. فاكرين البنت الصغيرة اللي كان اسمها فاطمة اللي قاعدة وشايفه المنظر أن أبو جهل بيأمر بسل الجذور تترمي على ظهر سيدنا النبي، فتجي جري؟ عشان ستنا فاطمة عاشت التفاصيل دي كلها، شافت بعينيها أبا جهل وهو يظهر عداءه للنبي صلى الله عليه وسلم، وعاشت التفاصيل دي مع سيدنا النبي عليه الصلاة والسلام. النهارده مطلوب منها أن هي تبقى ضرة لبنت هذا الرجل، ونفسيتها تستحمل ده؟ لا يكون. ولذلك احنا قلنا دي مسألة شخصية، يعني تخلص فين؟ تخلص في البيت. سيدنا النبي عمل إيه؟ طلع المنبر، احنا مش مسألة شخصية، ده احنا هنا مش في مسألة شخصية خالص، طلع المنبر وقال أنهم جم يستأذنوني في كذا وكذا، أما إني لا آذن، أما إني لا آذن، أما إني لا آذن. ومما ده في الصحيح، خارج الصحيح قال صلى الله عليه وسلم: «أما إني لا أحل حراماً ولا أحرم حلالاً، ولكن لا تجتمع بنت رسول الله وبنت عدو الله تحت رجل واحد».
فهنا المسألة أخرجوا بيها برة، احنا مش بنتكلم في تعدد والتعدد صح، التعدد غلط، التعدد من الدين، التعدد مش من الدين، احنا مش بنتكلم في ده خالص، مسألة أخرى تماماً. بدليل سيدنا علي نفسه عدّد، مش على فاطمة، بعد موت فاطمة عدّد، وكان من أكثر الصحابه نساءً سيدنا علي؛ يعني سيدنا علي ما فهمش أنه ما فيش حاجة اسمها تعدد، ما فهمش كده. فدي من الشبه اللي بتقال.
إذا كان في كلمة أخيرة أختم بها والأسئله بقى تيجي نشوف الأسئلة: أن احنا محتاجين نرجع إلى تلك القدوات. وكلامي لو كان شديد شوية في هذه السلسلة، فاحنا عاوزين يعني نرجو بذلك السقف، نرجو بذلك أن نسائنا تصل إلى القمة. في الآخر هو ليكم ولدينكم ولحياتكم، وبلاش نستفز بكلام من يبعدنا عن دين الله عز وجل وعن تلك القدوات الحقيقية. ولو أنتِ رضيتي ربنا سبحانه وتعالى -يعني أنا مش بقول في زوج، احنا جايين مش بنتكلم على القدوة يعني للزوج، أنا ما بقولش كده، احنا في منهم من لم تتزوج أصلاً، السيدة مريم ماتجوزتش أصلاً عشان- ماشي، فاحنا مش بنقول أنك تبقي قدوة يعني مع جوزك، لا، ده ملف من الملفات.
جانب من جوانب حياتك، عشان دايما الحته دي بنحس إن احنا في حلبة صراع، والله أبدا ولا هذا المقصد أصلا من السلسلة، أو ليس المقصد الأوحد هو مقصد أن بيوت المسلمين تهدأ، إنما إحنا عاوزينك تبقي قدوة لنفسك، طب بقيتي قدوة لزوجك فهو لنفسك برضه.
وقلنا الكلام ده قبل كده، إن أنت أمة الله عز وجل، فبتاخدي الأوامر من ربنا سبحانه وتعالى، فلقينا أن في أوامر ربنا أن اتقي الله في الراجل اللي في البيت ده، فلو كان ربنا أمرني بغير كده، يعني قال إيه ربنا؟ نفترض كده إن ربنا أمره للمرأة أنها تعكنن على جوزها، كنا نقول لك تعبدي لله بأنك... هنقول كده يا جماعة، مش احنا بنقول ده في بعض المواطن: ﴿وَلَا يَطَؤُونَ مَوْطِئًا يَغِيظُ الْكُفَّارَ﴾ [التوبة: 120]، نتعبد لله إن إنا هنغيظ بعض الناس عادي جداً، مش كده؟ فلو كان أمر ربنا نزل ليكي كده كنا هنقول لك... كنا هنعمل درس كده نسميه التعبد لله بالنكد على الزوج، ليه؟ لأن أنا لا أنا عبد هوايا ولا أنت أمة هواكي، أنا جاي بقول لك ده دين ربنا، وأنت بتسمعي ده أن ده دين ربنا.
فلما هتعملي ده مع زوجك فانت بتعمليه لله مش لجوزك، ولما تعمليه لله هيحصل حاجتين، أول حاجة عقليتين يعني احتمالين عقليين ما لهمش ثالث، أول حاجة أن الحياة تنصلح، فتبقي تعيشي حياة هادية وتتبسطي وكل الناس تتبسط وخلاص، وما يبقاش في مشاكل، وفي احتمال ثاني أنك تعملي ده وما تلاقيش مقابل، وتلاقي الحياة زي ما هي وهو بيتعامل بنفس المعاملة وكذا وكذا، ساعتها لو قدامك معنى أنك أمة الله وأنك تعمل ده لله سبحانه وتعالى، عمرك ما هتبصي لورا وتقولي أنا ندمانة على السنين اللي مش عارف إيه، ندمانة ليه وسبت؟ هو أنت كنت بتعاملي جوزك ولا بتعاملي ربنا سبحانه وتعالى؟
زي بالضبط لو ابنك ربيتيه واجتهدتي وطلع ولد فلتان، مش هتقولي أنا عملت إيه يا رب، أنا لما ربيته يا رب ربيته عشانك، طب في الآخر طلع كده؟ الحمد لله خلاص هعمل إيه؟ أه تبقى زعلانة على ابنك، ممكن، انما ما تقوليش بقى ندمان على السنين ومش ليه؟ ندمان على السنين ليه وسبتي؟ خلاص، وطبعا ما أقصدش أقول انك تفضلي في... لا ممكن يبقى الطلاق... الطلاق ممكن يبقى حل في وقت من الأوقات، لكن سرعة الطلاق دي مش عاوز أدخل بقى في مسألة الجواز والكلام ده.
من مواطن القدوة في السيدة فاطمة؛ شدة حيائها، ودي كنا حاجة عاوزين نقولها؛ شدة حياء السيدة فاطمة رضي الله عنها، السيدة فاطمة يا جماعة كانت شديدة الحياء، ودي رسالة لبناتنا وزوجاتنا وأخواتنا البنات وأمهاتنا وكل حاجة، اللي ممكن واحدة تسهل في الحجاب وتلاقي عادي إيديها يبان منها، شعرها يبان منها قصة، لابسة النقاب يفتن الرجالة يبقوا ماشيين يبصوا عليها وفي نقاب يفتن برده.
السيدة فاطمة حياؤها كان عجيب جداً، هاكي لكم موقف عجيب جداً، السيدة فاطمة قعدت تتأمل كده وكان معاها السيدة أسماء بنت عميس، قالت لها: هو إيه ده؟ الست بتموت يقوموا يكفنوها، الكفن يبقى مبين تفاصيل جسمها؟ السيدة فاطمة كل شغلها لها: أنا لما أموت جسمي بيبان! فالسيدة أسماء بنت عميس كانت هجرت للحبشه، فقالت لها: طب بصي أنا في حاجة شفت الحبشة بيعملوها كده إيه؟ راحت جايبة جريد وشفاء وحاجات زي كده عملت بيه زي قبة على جسم الميت، ويتحط عليه قماشة، قالت أهو كانوا بيعملوا كده، فقالت لها: هذا جميل، هذا حسن، ووصت لما تموت يتعمل عليها كده، والسيدة فاطمة أول امرأة يتعمل عليها ده.
اللي منكم صلى جنازات قريبة في الحرم، هيلاقي يعرف المرأة من الرجل كده، الرجل تلاقيه في الكفن بتاعه، المرأة تلاقوا زي قبة عليها كده، حاجة نص دايرة كده، نص أسطوانة ومرمي عليها قماشة، أول من سن ذلك في أمتنا السيدة فاطمة، مش بس كده، السيدة فاطمة أمرت أسماء بنت عميس وسيدنا علي هم اللي يغسلوها وما حدش يدخل عليها أبدا، لدرجة السيدة عائشة جت تستأذن في الدخول لم تأذن السيدة أسماء، راحت رايحه جايبة أبوها، أبوها كان الخليفة، الخليفة داخل أبو بكر الصديق فبيقول للسيدة أسماء: دخلي السيدة عائشة، يعني قالت له: دي وصية السيدة فاطمة، قال: افعلي ما أمرت به.
فثاني حاجة أمرت أنها تدفن بالليل بعد ما... مش عاوزة هيصة والناس تيجي وتقف خالص، فدفنت بالليل بهدوء، وسيدنا علي صلى عليها وانتهى الموضوع، كل ده من حياة السيدة فاطمة رضي الله عنها، فهي برده قدوة لك، لغايه دلوقتي واحدة بتسمعني مش لابسة حجاب، دلوقتي على طول تنوي، تنوي الخير تنوي الحجاب وتقومي تجيبي حجاب وتلبسيه وما تقلعيهوش ثاني، واحدة حجابها أي كلام من دلوقتي تظبطي لبسك وتوسعيه وكذا، خلاص.
إيه حكم ضرب المرأة في الإسلام من جوزها؟ وماذا قال الرسول صلى الله عليه وسلم؟ تصلي على النبي بقى عن ضرب الزوجة، الضرب إيه حكمه؟ ضرب الزوجة طبعا إحنا عارفين ضرب الحبيب زي أكل الزبيب، فلو الراجل بيحب مراته خلاص أكلها زبيب، إيه المشكلة؟
الضرب ذكر في القرآن لمن؟ للمرأة الناشز، من المرأة الناشز؟ التي تعلو على زوجها ولا تطيعه. طيب فيروح يضرب على طول؟ ما يضربش على طول، هي الأول هيعظها، وده النادر من الرجال من يفعله؛ اتقي الله وأنت بتعملي حاجة حرام، والموضوع ده يغضب ربنا سبحانه وتعالى، ومن وعظها أنه ما يبقاش راميها في البيت ويبقى هو الأخ فلان والشيخ فلان وداير لي على المساجد هنا بيدي وهنا بياخد درس وهنا بيدي درس ومراته ضايبة في الدين ضايبة! ما هي شوية وهتنشز عليك، هو إيه اللي هيحجبها، إيه اللي هيمنعها غير دين ربنا سبحانه وتعالى؟
فيَبقى من قبل كده ما تبقاش أنت في دين وفي في دروس وبتاع ومراتك مرمية في البيت، طب هتعلمها دينها؟ وقلنا لكم الكلام ده قبل كده بالذات أن الست اللي هتقعد في البيت دي ما هياش قاعدة واقفه عليها الباب، لا دي قاعدة والدنيا كلها مفتوحة بين إيديها في التليفون، وهتخش على جروبات اللي بتسخن الستات على أزواجهم، وهتخش على الصفحات اللي شايفه البلوجرز فيها ازاي بيحضن مراته وبيحضن خطيبته وبيحضن حبيبته وأخدها فين ومفسحها فين، وتيجي تبص عليك مش لاقياك في حياتها، فما تجيش بقى تشتكي بعد كده أو لقيتك جاي ضاربها، ما فيش الكلام ده، يبقى الوعظ أولاً، ثم الهجر في المضجع.
طيب رجعت خلاص، ما رجعتش يبقى حينها أذن في الضرب، مش السنة، الضرب لا، أذن في الضرب لتقويم المرأة، دي أول مسألة.
ثاني مسألة؛ أن اللي يضرب ده ما هواش أفضل الناس، قاله النبي صلى الله عليه وسلم اللي على... اللي بيضربوا الزوجات، قال: «ليسوا بخياركم» دول مش أحسن ناس يعني اللي بيضربوا الزوجات، دي ثاني حاجة.
ثالث مسألة؛ أن سيدنا النبي عليه الصلاة والسلام كما تخبر عائشة ما ضرب بيده قط إلا أن تنتهك محارم الله، يبقى أنت لما بتيجي هتعمل هذا النص، هتعمله ليه؟ غيرة لدين الله، غيرة لدين الله أن المرأة أتت شيئا حراما، ماشي، ولذلك النبي عليه الصلاة والسلام ضرب السيدة عائشة مرة لهدها أو لهذها أو أوجعتها، فدي كانت ضربة على غير ما يصوروا البعض يقول لك ايه لا دي كانت يعني دي حاجه ما بين المحبين، لا، لأن ليه؟ لأنها ظنت بالنبي الظلم في هذا الموطن، افتكرت إنه رايح لوحده من النساء وفي ليلتها، فقال: «أتظنين أن يحيف الله عليك ورسوله؟»، ماشي، فقد يحتاج لمثل هذا الاعراف معتبرة دي حاجة، تاني حاجة أن لو إحنا فهمنا فقه الضرب في الإسلام أو لماذا رخص فيه، هنفهم أن ممكن يبقى في أعراف بعض الناس أو بعض البلدان أو كده، أن الضرب لن ياتي بتلك النتيجة بل ربما أتى بعكسها.
يبقي إحنا لو إحنا المرأة أذنه أو رخصة في الضرب علشان نعدل من طباعها، نعدل نمشي البيت على مش عارف إيه، وبعدين عرفنا أن من الأعراف أو من طبيعة المرأة دي أو كده أنه لا ده مش هيجيب نتيجة، بالعكس ممكن يعكس القضية، فانت بتضرب ليه دلوقتي؟ هتلاقيك بتضرب عشان أنت مغلول، مش الدين، عشان غضبان فهتنفذ، مش الدين بردو، ماشي.
لكن هل خطاب أننا ننفي بالكلية فكرة الضرب في الإسلام ده من الدين؟ لا برده مش من الدين، واللي اللي تنصلح به، اللي تفسد به امرأة تنصلح به أخرى، واللي تنصلح به أعراف تفسد به أخر... يعني الدين يا جماعه أشمل وأوسع من أن هو يبقى نازل لبتوع المنطقة الفلانية أو البلد الفلانية، وضربنا لكم مثال قبل كده، وده إن شاء الله في في دورة الزواج هنتكلم في ده بالتفصيل، هنتكلم في ده بالتفصيل، إنه ازاي القرشيون كانوا على عادات معينة، راحوا للانصار لقوهم على عادات تانية خالص فيما بين رجل وامرأته، يعني دول عادات ودول عادات تانية خالص ودول صحابة ودول صحابة ودول بنترضى عنهم ودول بنترضى عنهم، واضح؟
فده يعني ايه باختصار، فانا لا مع الخطاب اللي هو بينفي الضرب ويقعد يؤول النصوص لأنه منسحق أمام شبهات الملاحدة وشبهات النسوية وكذا منسحق أمامها وإن ادعى غير ذلك، يعني هو بيجي يقول لك إيه؟ ده أنا اللي بَرُدّ وأنا اللي بعمل، طب يلا رُدّ! تلاقيه يخفي كلام الفقهاء ويؤول النصوص على غير وجهها، يقول لك: ﴿وَالَّتِي تَخَافُونَ نُشُوزَهُنَّ﴾ الزنا! مين مين اللي قال ده من الفقهاء ومين ده وأنا هجيب لكم الدليل من القرآن والسنة يقول كده؟
وهو له بذل فعلا من يقول هذا الكلام، ربما كان له نوع بذل في رد شبهات الملاحدة، لكن مع كثرة الأخذ والرد هو بينسحق أمام هذه الشبهات، لا أنا مش مع الخطاب ده أبدا، ولا مع الخطاب العكسي الخطاب الذكوري اللي يجي يتكلم على الضرب باطلاق كده ويسخن الرجالة على الستات ولا لا، مع ده ولا مع ده ولا ده دين ولا ده دين.
طيب نقف هنا، قولي هذا وأستغفر الله العظيم ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.
الشيخ أمجد سمير