الشيخ أمجد سميرالمجلس الخامس من سلسلة قدوتك، والأول والأخير في خديجة رضي الله عنها.
طبعاً خديجة ممكن السيدة خديجة يعني نتكلم فيها مرات ومرات، لكن استخرت الله عز وجل واستريحت أن لا أذكر سيرة خديجة، وإنما نذكر موضع القدوة؛ لأن السلسلة الغرض منها أن ننظر إلى موضع القدوة من كل واحدة من الأربعة اللاتي ذكرهن النبي صلى الله عليه وسلم وأخبر أنهن أفضل نساء العالمين. فاحنا مش هنتكلم عن سيرة خديجة، ولا علاقة خديجة رضي الله عنها بالنبي عليه الصلاة والسلام، وإنما نتحدث عن موضع القدوة فقط في خديجة.
وعلشان نعمل ده عاوزين نبدأ بحديث مهم وهو العمدة في هذا الباب. طبعا الحديث ممكن نذكر موضع الشاهد على طول، لكن أنا حابب أذكر الحديث بطوله: تقول عائشة رضي الله عنها: «كان رسول الله صلى الله عليه وسلم إذا ذكر خديجة لم يكد يسأم من ثناء عليها واستغفار لها». يعني سيدنا النبي عليه الصلاة والسلام -الأول بس عشان نستوعب احنا هنتأامل كم موطن كده بس عشان نستوعب الموضوع- أن خديجة رضي الله عنها ماتت، ثم تزوج النبي صلى الله عليه وسلم بعدها عائشة بثلاث سنين، وبعدين لم يبني بها -يعني ما دخلش عليها زي ما نقول يعني، ما إلا بعد كده بسنوات-. فهنا سيدنا النبي عليه الصلاة والسلام عائشة بتحكي عنه، هي بتحكي عنه بعد موت خديجة بسنوات، فبتقول: كان إذا ذكر خديجة لم يكد يسأم من ثناء عليها واستغفار لها.
فذكرها يوم فحم- طبعا بردو النبي عليه الصلاة والسلام كانت أحواله مع خديجة بعد موت خديجة غريبة جدا، ووفاؤه لها بعد موتها عالي جدا صلى الله عليه وسلم ورضي الله عن خديجة-. وده شيء مهم؛ طبعا احنا هنا مش جايين كلم الرجال بردو كالعادة، وإلا لتكلمنا في وفاء الرجل لامرأته وحبه لها، ولكن ده الخطاب للنساء، فخطابنا موجه للنساء بالأساس، فما فيش داعي أن احنا نخرج عن هذا الغرض ونوجه خطابات للرجال. فكان النبي عليه الصلاة والسلام حبه لخديجة شديد جدا جدا حتى بعد موتها، لدرجة أن السيدة عائشة رضي الله عنها ما كانتش تغير من حد زي ما بتغير من خديجة. يعني شوفوا عائشة يا جماعة! الأصل أن المرأة تغار من ضرتها، يعني سيدنا النبي عليه الصلاة والسلام كان متجوز على عائشة نساء، طب عائشة كانت بتغير؟ آه، كانت بتغير منهم بردو، لكن أكتر واحدة تغير منها عائشة رضي الله عنها مين؟ خديجة الميته! لكثرة ما يذكرها النبي صلى الله عليه وسلم، والأمور تحدث. زي إيه؟ هالة بنت خويلد أخت خديجة. هالة بنت خويلد أخت خديجة تقوم تستاذن على النبي مرة عليه الصلاة والسلام، فيرتاع لذلك. طبعا خديجة ماتت، والنبي عليه الصلاة والسلام اللي بتروي ده عائشة رضي الله عنها، استاذنت هالة -طبعا اختها- فبقى نبرة الصوت قريبه أو شبهها، فأول ما استاذنت على النبي عليه الصلاة والسلام تذكر خديجة فارتاع لذلك وقال: اللهم هالة. يعني فلتكن هالة أو هي هالة، وفي رواية: فارتاح لذلك، لمجرد أنه يسمع صوت شبه صوت خديجة رضي الله عنها.
في موقف تاني مؤثر جدا جدا: زينب بنت النبي رضي الله عنها وصلى الله على نبينا محمد. وطبعا بنت خديجة؛ لأن كل أولاد النبي عليه الصلاة والسلام من خديجة إلا إبراهيم من ماريا، فكل أولاد النبي منها عليه الصلاة والسلام، وده هنجيله كمان شوية. فزينب كانت متجوزة أبا العاص، أو متجوزها أبو العاص بن الربيع، وبعدين بعث النبي عليه الصلاة والسلام فأمنت زينب رضي الله عنها، وظل أبو العاص على كفره، وكان لسه ما نزلش الآيات اللي تفرق بين الكافر والمسلمة. وبعدين هاجر النبي عليه الصلاة والسلام إلى المدينة، ولم تهاجر زينب، ليه؟ أبو العاص بن الربيع منعها، وكان يعني رجلا وفيا وشهما وكذا. طبعا هو اسلم بعد كده، لكن حتى وهو في الكفر كان راجل أخلاقه كويسة، فمنعها أنها تسافر. وبعدين تيجي غزوة بدر، فيطلع أبو العاص بن الربيع في الكفار عشان يحارب النبي عليه الصلاة والسلام. طبعا موقف صعب جدا، يعني زينب في موقف لا تحسد عليه، ولعلنا نعرج عليه لو في وقت عشان نشوف تربية خديجة لبنتها، فده بعدين يجي.
بس أنا عاوز أقول لكم ازاي يا جماعة النبي عليه الصلاة والسلام كان حبه لخديجة رضي الله عنها، وده مش عشان بنتكلم ما هواش خطاب للرجال مش هنتكلم عن وفائه وكذا وكذا، لكن عاوزين نعظم ده عشان نرجع نقول: الله! هي كانت السيدة خديجة بتعمل ايه عشان يحبها كل الحب ده؟ بتعمل ايه؟ خرج أبو العاص بن الربيع في مواجهة النبي عليه الصلاة والسلام، فأسر في بدر مع من أسر؛ كانوا أسروا كذا حد أسروا 70 كافرا في غزوة بدر. فابتتدى كل واحد ليه واحد أسر يبعت فداء له، يعني إيه يبعت فلوس عشان يفدي الأسير بتاعه. طب من لأبي العاص؟ زينب. تقوم تعمل ايه زينب؟ تبعت فداء لزوجها، فتبعت فلوس، ومع الفلوس قلادة من ضمن المال اللي هتفتدي بها زوجها، قلادة. القلادة دي كانت قلادة لخديجة كانت بتاعة خديجة، كانت خديجة أهدتها لبنتها زينب أدخلتها بها على أبي العاص -يعني ليله دخلتها لبستها القلادة دي عشان تدخل على جوزها بيها- فصارت من مال زينب، فأرسلت بالقلادة في ضمن الفلوس اللي هتفدي بيها أبا العاص.
فلما وصل المال إلى النبي عليه الصلاة والسلام خشع لذلك، أول ما شاف القلادة تأثر تأثرا شديدا وقال لأصحابه: لو رأيتم أن تردوا عليها أسيرها ومالها الذي أرسلت. طبعا هو ده حق للمسلمين، فهو النبي عليه الصلاة والسلام مش بيقول أمر، بيقول: لو شفتوا يعني أن تعملوا ده يبقى خير، يعني هو يحب ده أن ده يحصل. الشاهد: احنا ممكن نجي للقصة دي تاني بس من وجه آخر، الشاهد: مجرد ما سيدنا النبي عليه الصلاة والسلام كانت خديجة ميتة بقالها خمس سنين ساعتها؛ لأنها ماتت قبل الهجرة بثلاث سنين، وغزوة بدر السنة الثانية من الهجرة، فهي بقى لها خمس سنين ميتة خديجة. أول ما سيدنا النبي يشوف القلادة، وكان قد تزوج بعدها، أول ما يشوف القلادة اللي هي كانت بتاعة خديجة يخشع لذلك صلى الله عليه وسلم ويرق.
وبعدين من حبه لخديجة كان يكرم المرأة، امرأة عجوز تيجي تخبط مين فلانه، يقوم يكرمها. فعائشة -يعني ده سيدنا النبي عليه الصلاة والسلام يعني مقام وعاء- تقول له: يعني المرأة العجوز أنت بتعمل معاها كده ليه؟ قال: أنها كانت تأتينا زمان خديجة. مجرد بس أن يعني ايه في من ريحه خديجة رضي الله عنها. فكان حبه لها حبا غريبا، ووفاؤه لها وفاء عجيبا، وهيجي معانا قصة الوفاء دي. ولذلك خديجة هي أحب النساء إليه صلى الله عليه وسلم، مش عائشة على الراجح من أقوال أهل العلم. مش عائشة؛ عائشة هي أحب النساء إليه في وقتها، إنما لو بنتكلم على مدة حياته صلى الله عليه وسلم فخديجة رضي الله عن خديجة. ليه يعني ليه كل ده؟ تعالوا بقى نشوف هذا الحديث هو العمده في هذا، نقرا تاني: قالت عائشة: «كان رسول الله صلى الله عليه وسلم إذا ذكر خديجة لم يكد يسأم من ثناء عليها واستغفار لها فذكرها يوم فحملتني الغيرة فقلت: لقد عوضك الله من كبيرة السن».
طبعا عائشة كانت صغيرة، فبتدتقول له يعني خلاص بقى ربنا، وعائشة هي أول أزواجه بعد خديجة، فبتدتقول له: ربنا عوضك عن كبيرة السن دي اللي هي خديجة يعني. فرأيته غضب غضبا أسقطت في خلدي، وقلت في نفسي: اللهم إن أذهبت غضب رسولك عني لم أعد أذكرها بسوء. بتدعي بقى ربنا، خلاص الموضوع خرج من إيديها مش عارفة تعمل حاجة، توجهت لربنا: يا رب، لو أذهبت غضب نبيك عني مستحيل أذكر خديجة تاني خلاص. فلما رأى النبي صلى الله عليه وسلم ما لقيت خفف وقال: كيف قلتي؟ عيدي عليا تاني اللي أنت قلتيه كده. والله لقد آمنت بي إذ كذبني الناس، وآوتني إذ رفضني الناس، ورزقت منها الولد وحرمتموه مني. ومهم أن احنا نجمع روايات هذا الحديث بالذات عشان دي مواطن القدوة في خديجة.
يبقى سيدنا النبي عليه الصلاة والسلام لما رأى غيرة عائشة وكلامها ده هيبتدي يقول هو أنا بحبها ليه كده؟ هو أنا ليه متعلق بها كده؟ هو أنا ليه مش قادر أنساها كده؟ فابتتدى يتكلم قال: «والله لقد آمنت بي إذ كذبني الناس، وآوتني إذ رفضني الناس، ورزقت منها الولد وحرمتموه مني». وفي رواية قال: «فأشركتني في مالها حين حرماني الناس»، وفي رواية: «وتصدق الحديث»، وفي رواية: «وتؤدي الأمانة». دي كلها روايات لهذا الحديث، وهنقاب بقى نتأمل هذه المواطن إن شاء الله أو معظمها يعني. قالت عائشة: فغدا وراح علي بها شهرا، شهر سيدنا النبي عليه الصلاة والسلام وهو رايح وهو جاي يعيد الكلمتين دول على عائشة.
فهذا موطن القدوة من خديجة، يبقى خديجة خير نسائها كما أخبر النبي صلى الله عليه وسلم، ومن سيدات نساء العالمين، ليه؟ أول حاجة: آمنت به إذ كذبني الناس. ودي كثير من الناس بتعدي -يعني كتير من النساء عاوزه تشوف يعني فين القدوة في خديجة- بتعدي الكلمه دي، وهذه أهم كلمة، وهذه مبتدأ به النبي عليه الصلاة والسلام. يا جماعة، يا جماعة، اه جميل نقول موطن القدوة ازاي تتعامل مع زوجها، وده هنجيل بردو هنجيله، لكن هي عشان مؤمنة -يعني لو كانت خديجة فعلت كل ما بعد هذه الكلمه ولم تفعل هذه الكلمه ما كانش ده حصل- يعني لو كانت تخلف عنها وصف الإيمان فقط، لكن أوته ونصرته وأديته فلوسها وكل الكلام ده، لكانت فقدت أهم شرط وأهم وصف يؤهلها أن تكون كذلك: دينك دينك!
يبقى أنت قدوتك مين؟ أدينا من أول ما شفنا هل متصورين أن نقول: خير نسائها، فنلاقي واحدة من الأربعة كانت تبقى كافرة؟ مستحيل! مستحيل! ممكن نتصور أن واحدة مثلا من الأربعة -مش بقول أن هم دول الأربعة يعني، يعني متصور عقلا يعني العقل يسوغ ذلك- أن ممكن واحدة من الأربعة مثلا ما كانتش جميلة، واحدة من الأربعة ما كانتش -أنا ما بقولش أن واحدة كده، بقول يعني ده يتصور عقلا لو جينا قلنا لكم إيه مثلا: فلانه ما كانتش جميلة، عادي يعني تحسوا أنه مثلا، أو فلانه ما كانتش يعني لها بذل مثلا في المال- ممكن نتصور ده. إنما نقول لكم واحدة من الأربعة ما كانتش مؤمنة؟ ما حدش يتخيل أن واحدة من أفضل نساء هتبقى مش مؤمنة، فدينك شكله إيه؟
لو أنت عاوزه بقى قدوة: النساء الآن يبحثن عن قدوات. يمكن في هوجة حصلت الفترة اللي فاتت دي، وتدخلت فيها أنا بشكل ما على مواقع التواصل لبنت ظاهرها الحجاب وكذا وبعدين يعني تدخلت بشكل معين ما عجبش بعض الناس؛ بيقول لأن كده البنات هتاخدها قدوة وهي عندها مشاكل أخرى. ماشي بغض النظر، أنا عملت ده ليه أو كده، إنما الشاهد: البنات عمالة تبحث عن قدوات، طب البنت رايح تبحث عن قدوه ليه؟ أصل هي بتسافر، أصل هي بتعرف تتكلم لغة، أصل هي مش فين الدين؟ فين الدين؟ وكلما كان دين المرأة أقوى كانت أحق بوصف القدوة، آمنت به. فكلما كلما أو يعني كلما زاد شرط الإيمان هذا الشرط -يعني- يبقى هي دي القدوة بتاعتك، آمنت به.
بس لا، إذ كذبني الناس، وده بردو معنى تاني، ما هو ما هو النساء اللي آمنوا بالنبي كتير عليه الصلاة والسلام. الفكرة يا جماعة مش في أن هي بس آمنت، هي كانت سابقة إلى الإيمان، والسابق له قدره وله احترامه. وده معنى بردو للأسف فاحنا الجيل اللي طالع دلوقتي جيل يفقد كثيرا من معاني الخلق ومن معاني المروءة، رجال ونساء مش النساء بس، رجال ونساء. فعادي جدا تلاقي شاب صغير عادي جدا يغلط في حد أكبر منه في السن، عادي جدا واحد بقاله يومين في التدين يناطح واحد بقاله 10 سنين وبيطلب علم. فهي أول من آمن من النساء، ولذلك بعض العلماء تنبه لمعنى قال: أن خديجة هي أول من سنت الإسلام والإيمان في النساء. فكل امرأة آمنت بعد خديجة في ميزان خديجة؛ لأن النبي صلى الله عليه وسلم قال: «من سن في الإسلام سنة حسنة فله أجرها وأجر من عمل بها». فقالوا: أن دي أول امرأة أسلمت فكل امرأة تسلم بعد خديجة خديجة لها من اجر هذه المرأة. وقالوا إن أبو بكر كل راجل يسلم بعد أبو بكر أبو بكر له نصيب رضي الله عنه من إسلام ذلك الرجل؛ لأنه أول من أسلم من الرجال.
يبقى أول الشرط في القدوة أن تكون امرأة دينة، امرأة صالحة، وبقدر تدينها وصلاحها وقربها من ربها بقدر ما تصلح أن تكون قدوة لك، لا اللي بتسافر ولا اللي بتتنطط ولا اللي بتتعلم لغات ولا اللي صوتها حلو ولا اللي.
بتلبس حلو ولا اللي عندها كاريزما ولا اللي عندها حضور ولا دول خالص مش دول قدوتنا، مش دول قدوتنا ولا دول اللي نصدرهم على أنهم قدوات. القدوه المراه المؤمنة، يبقى آمنت بي إذ كذبني الناس وأوتني إذ رفضني الناس. سيدنا النبي عليه الصلاة والسلام أول ما تجي له الدعوة ويبعث يرفض ويؤذى وهي آوته صلى الله على النبي محمد عليه الصلاة والسلام. عاوزين نقف هنا شوية بقى، عاوزين نتأمل مشهد بيت النبوة وقت البعثة؛ سيدنا النبي عليه الصلاة والسلام بعث قبل الهجرة بـ 13 سنة، كان متجوز خديجة قبل البعثة بـ 10 سنين -عفواً- بـ 15 سنة، كان النبي عليه الصلاة والسلام عنده 25 سنة والسيدة خديجة عندها 40 سنة، أكبر منه بـ 15 سنة، خلاص احفظوا ده عشان هنحيي له مهم جداً جداً بعد شوية، الحاجات دي.
بعث النبي وهي عنده 40 سنة يعني بعد 15 سنة من زواجه من خديجة، فخديجة كان عندها 55 سنة. امرأة عندها 55 سنة مش بنت صغيرة، دي أول معلومة. المعلومة الثانية: سيدنا النبي عليه الصلاة والسلام خلف من خديجة كم حد؟ خمسة؛ ولد بكري اسمه القاسم وبه كان يكنى يقال أبو القاسم، وده مات وهو صغير عنده سنتين، وبعدين أربع بنات؛ بالترتيب: زينب، رقيه، أم كلثوم، فاطمة رضي الله عنهن. طيب الكبيرة زينب اتولدت أمتى؟ قبل البعثة بـ 10 سنين، والصغيرة فاطمة اتولدت أمتى؟ قبل البعثة بـ 5 سنين. تعال كل اللي فات ده خلوه كده في إيه؟ في الخلفية، في الخلفية هنرجع له كمان شوية. المعلومة دلوقتي اللي عاوزينها دلوقتي في الموقف ده: أن امرأة عندها 55 سنة ده وقت البعثة، وبعدين عندها أربع بنات؛ الكبيرة عندها 10 سنين، الصغيرة عندها 5 سنين. ده شكل بيت النبي عليه الصلاة والسلام لما بعث نبياً.
أنا ليه بقول الكلام ده؟ علشان لما يقول أوتني إذ رفضني الناس، فهي امرأة تؤوي زوجها وتحتضنه وتساعده. هنشوف ده إزاي حصل وهي امرأة عندها كام سنة؟ وعندها بنات شكلهم إيه صغيرين إزاي ومحتاجين رعاية ومحتاجين تربية؟ وعندها تجارتها اللي هنحيي لها بعد كده إن شاء الله وننتكلم عليها. ومع ذلك جوزها، واحنا اتكلمنا ده المرة اللي فاتت وقلنا هنفصل فيه في خديجة رضي الله عنها أن جوزها محور في حياتها؛ يعني إيه محور؟ يعني هو المحور الأعظم والأكبر في حياة المرأة. ليه؟ عشان هي حطاه محور؟ لا، ركزوا عشان ربنا سبحانه وتعالى أمر بذلك، عشان ربنا أمر بذلك.
أنا ليه بقول كده للنساء؟ علشان ممكن المرأة تعمل ذلك ثم تجد نكراناً للجميل، وده بيحصل ساعات. الرجالة مش كلها عندها رجولة ولا عندها مروءة، ما هو يا جماعة البيوت مش بس تبنى بالحب، في بيت يبنى بالحب وفي بيت يبنى بالمروءة. يعني إيه بالمروءة؟ يعني الراجل يقول: دي شالتني، دي عملت وسوت، ما ينفعش أظلمها، ما ينفعش تشوف مني حاجة وحشة. بيت يبنى بالمروءة للاسف برضو كتير من الرجالة ما عندهم مروءة، فده المرأة. احنا بقى مش جايين نتكلم على الرجالة، ممكن المرأة تقابله؟ ممكن جداً وارد: أنا عملت ده وتعبت وعملت له، وتقعد تحكي وفي الآخر نُكِرَ ذلك الجميل! لو أنتِ بتعملي ده علشان جوزك هيجيلك اكتئاب وهيجيلك سكر وهيجيلك ضغط وهتنتحري، لو بتعملي ده لله فما عند الله باق، يبقى ربنا يرى ذلك منك ويحاسبك عليه يوم القيامة. جوزك بقى رعى ده، ما رعاش ده؛ طبعا أنا متفهم جداً نفسية المرأة أن هي بتبقى عاوزه تشوف ده في الدنيا، يعني تشوف العرفان بصنيعها في الدنيا، لكن دي الدنيا مش دايماً بتمشى يعني إيه زي ما الواحد عايز، يعني ما فيش دنيا بتسلم لحد، فممكن يبقى ده بلاءك.
خلاص، فلو أنتِ بتعملي ده لله خلاص، أنا بعمله لربنا سبحانه وتعالى. طب هو راعى ذلك الرجل؟ جاء خير وبركة، لم يراعي ذلك؟ خير وبركة، أنا بعمله لله سبحانه وتعالى. فتبقى خديجة أوته إذ رفضه الناس، أوته من أمتى بقى رضي الله عنها؟ طبعا النبي عليه الصلاة والسلام اتجوز خديجة وهو 25 سنة شاب، وهي امرأة أربعينية عندها 40 سنة، بس لا، امرأة كانت متجوزة اثنين قبله، ده كله في الجاهلية طبعا هو لسه ما فيش إسلام، كانت متجوزة اثنين قبله وكان عندها أولاد منهم كمان. طيب ليه اتجوزها؟ هي اللي طلبته أن يتزوجها لأمور يعني لما رأت من أمور من أمانته ومن صدقه وكذا وكذا، لأنه كان يعمل في مالها الأول يعني.
اتجوزها صلى الله عليه وسلم وبعدين ركزوا بقى يا نساء؛ حصل حاجة غريبة جداً أول الأمر أن النبي عليه الصلاة والسلام قبل البعثة بـ 6 شهور أو قبل كده كمان يعني هو كان حبب إليه الخلا قبلها بـ 6 شهور، هنعرف إيه اللي حصل، بس الأول حب إليه الخلا، فكان يعمل إيه النبي عليه الصلاة والسلام؟ يطلع غار حراء، يعتزل الناس شهر كامل اللي هو شهر رمضان، لسه ما فيش بعثة. طب المراه جوزها سابها، وليه؟ هي مش فاهمة إيه اللي تطلع تقعد في غار حراء يعني ليه؟ هنا المرأة، شوف بقى المرأة الصالحة، مش ده مريحك؟ اطلع وتفرح! السيرة لم تذكر لنا أنها كانت تتبرم من ذلك، خلي بالكم المرأة دي اللي هي إيه؟ عندها بنات صغيرين، يعني إيه؟ يقول لك يعني أنا كوم لحمة على إيدي وأنت سايبني ورايح لي تقعد شهر كامل في... ما فيش الكلام ده خلاص، مش ده يريحك؟ رجل صالح. احنا دلوقتي بنجيب بقى بنسقط على، عشان برضو الرجالة ما تاخدش ده ذريعة، رجل صالح وهو يعني يقوم على مهام بيته، وده كان النبي عليه الصلاة والسلام، عائشة تقول إيه؟ صلوا على النبي. عائشة تقول إيه رضي الله عنها؟ أنه كان في مهنة أهله، فإذا نودي بالصلاة خرج كأنه لا يعرفنا صلى الله عليه وسلم، فكان يعني في بيته رجلاً يقوم على مهنة أهله وعلى خدمة أهله، فده كان النبي عليه الصلاة والسلام.
فلما يبقى زوجك كده، وبعدين يجي في وقت هو عاوز يختلي بنفسه، في وقت هو عاوز يخرج لمسألة معينة، في وقت وماله؟ إيه المشكلة؟ لا وتساعده كمان، الرواية بتقول أنه كان كل كم ليله ينزل يتزود، ما هو قاعد شهر فوق، وبعض الروايات بتقول أن هي ربما هي اللي أرسلت له كمان الآية عشان هو ما ينزلش. وغار حراء يا ريت تبقوا تدخلوا تشوفوه، يعني تشوف غار حراء ده مش حاجة بسيطة، أنت عشان تطلع له أنت أساساً تشوفه من تحت تخاف تطلع، تخاف تطلع يعني بعيد في الجبل فوق بعيد. فامرأة عاقلة، أنا الحقيقة لو عاوز أقول مفتاح لشخصية خديجة أنا مش عارف له كلمة، يعني مش لاقي كلمة مفتاحية للشخصية، لكن هو معنى كده في ذهني من تتبع السيرة أن خديجة ممكن نسميه العقل؟ ممكن، بس أنا هفهمكم إيه المعنى، إيه مفتاح شخصية خديجة؟ خديجة رضي الله عنها بتعرف تعمل إيه أمتى، حكيمة؛ يعني لو قلنا الحكمة وضع شيء في موضعه، فلو قلنا أن ده تعريف الحكمة فخديجة رضي الله عنها كانت امرأة حكيمة، يعني إيه؟ يعني هو دلوقتي محتاج إيه؟ هيشوفه مني، محتاج محتاج يشوف حنان؟ هيشوف الحنان، محتاج يلاقي عقل؟ هيشوف العقل، محتاج محتاج سند؟ هيلاقي السند. امرأة عارفة بتعمل إيه أمتى، امرأة حكيمة، ممكن نقول كده يعني مفتاح شخصية سيدة خديجة الحكمة، تضع الشيء في موضعه رضي الله عن خديجة. فكانت تسيبه يطلع شهر كامل في غار حراء ليه؟ ما الله أعلم، هو حاجة حبيبها جوزي وحاجة ما فيش حاجة غلط يعني فيها.
وشوف برضو يا جماعة فكرة، خلي بالكم من حاجة؛ النبي عليه الصلاة والسلام اتجوز خديجة، تعالوا نفهم حاجة كده مهمة جداً. سيدنا النبي عليه الصلاة والسلام اتجوز خديجة قبل البعثة بكام؟ بـ 15 سنة، من أول ما اتجوز خديجة إلى أن توفي صلى الله عليه وسلم المدة دي 38 سنة؛ 15 سنة قبل البعثة، وبعدين بعدين كم سنة في مكة؟ 13 يبقى كام؟ 28، و10 سنين في المدينة 38 سنة. يبقى المدة من أول ما اتجوز خديجة إلى وفاته صلى الله عليه وسلم 38 سنة، منهم منهم 25 سنة مع خديجة من 38، تقريباً ثلتين المدة. المفاجأة بقى: منهم 25 سنة ثلتين المدة مع خديجة بس، ما تجوزش عليها حد تاني. طيب أتبقى ثلت المدة؟ اتجوز فيهم كام؟ 17 واحدة. النبي عليه الصلاة والسلام اختلفوا في عدد زوجاته صلى الله عليه وسلم، هو طبعا اجتمع له تسع نسوان، إنما اتجوز كام واحدة؟ اختلفوا من 12 لـ 18، يعني منه 12، منهم 15، منهم قال 18، يعني أكبر رقم أنا وصلت له أن هو تزوج 18 واحدة، فلو خرجنا خديجة فهو اتجوز صلى الله عليه وسلم 17 واحدة في الثلث! هو بسم الله الرحمن الرحيم كده خديجة ماتت بعد ثلاث سنين، اتجوز اثنين مع بعض صلى الله عليه وسلم.
اللي أنا عاوز أقوله إيه؟ خديجة كانت امرأة، وبعدين خلي بالكم نرجع تاني؛ النبي عليه الصلاة والسلام تزوج خديجة وهو شاب، وهي امرأة تكبره بـ 15 سنة، ودي حيثية ممكن تخلي الراجل عاوز يعني محتاج تاني يتجوز تاني، لكن خديجة كفته من كل النواحي. الموضوع ده ماهوش بال، يعني النساء دلوقتي لما يجي سيرت التعدد تلاقي الست تقوم ما تقعدش! طب أنت شوفي جوزك إيه اللي محتاجه؟ لأن برده ما هو التعدد ده بالنسبة للراجل يعني هو حاجة سهلة؟ مش حاجة سهلة؛ إقامة بيت تاني وتكاليف ثانية في ظل الظروف اللي احنا عايشينها، وبتكلم بتكلم على الرجل اللي هو رجل يعني إيه رجل؟ يعني لو لو فتح بيتاً يقوم بمهام هذا البيت، مش اللي هو إيه البيت بالنسبة له لقندة، في رجالة كده! أنما لو واحد هيفتح بيت ويقوم بمهام هذا البيت في العصر اللي احنا عايشين فيه ده حاجة صعبة جداً، طب هو ليه يروح يعمل كده؟ ليه يروح يعمل كده؟ يبقى في حاجة هو محتاجها، وعشان الحاجة دي تتحقق يتحمل كل ده، طب ما تشوفيها أنت وتحققها له أنت! خديجة كانت هذه المرأة. خديجة كان لذلك النبي عليه الصلاة والسلام ما فكرش يتجوز عليها لا في جاهلية، والتعدد كان في الجاهليه ده المعروف أصلاً يا جماعة، أنا برده عشان تبقوا فاهمين، التعدد في الجاهلية كان مفتوح، يعني إيه؟ هتجوز الخمسة، اتجوز الستة، اتجوز الـ 100، الجاهلية كانوا كده، ولذلك لما رجل أسلم وكان تحته 10 نسوة، كان تحته 10 نسوة، فجاء للنبي عليه الصلاة والسلام قال له: أنا تحتي 10 عشرة نساء يعني، فقال له: لا، تطلق ستة وتبقي على أربعة. ده نديمه ليه؟ لأن كان الجاهلية كده. الجوزة ما يتجوزوا، سيدنا النبي عليه الصلاة والسلام خديجة مكفياه من كل حاجة، وهنشوف دلوقتي من كل حاجة يعني إيه؟ هنشوف بقى حيثيات، من هذه الحيثيات أن الراجل ممكن يبقى محتاج مساحته، مساحة شخصية ليه، خديجة فاهمة نفسية الرجل.
فطيب، ده مش مش هيبعد يوم أو اثنين، ده هيطلع يقعد في الغار شهر سايباه؟ بس لا، ركزوا بقى في دي؛ المرأة ممكن تسيب وده كويس، يعني مجرد أنها اللي عاوزة بريحه فيه، أو يعني بسيبه ده كويس. في امرأة أعلى من كده، لا، ده مش بس كده، ده أنا باعينه على هدفه، باعينه على ده، ده هيجي لنا فكروني لو نسيت لما أجي الحديث اللي هو إيه؟ أن الله بشرها ببيت من قَصَبٍ، لا صخب فيه ولا نصب، أشم معنى صخب ونصب؟ أشم معنى الكلمتين دول؟ هنعيد الجملتين دول ونفهمهم، ليه خديجة بالذات بشرت بهذا البيت؟ خلاص، ولا نقولها دلوقتي وخلاص؟ إيه رايكم؟ خليها وقتها، هنعيد في الكلمتين دول، هنعيد الكلمتين اللي احنا قلناهم من شويه دول.
يبقى ده احنا لسه لم يبعث النبي عليه الصلاة والسلام، حب حبب إليه الخلا ويطلع يقعد في الغار، غار حراء، يبقى دي أول حاجه. فخديجة تعاونها على ذلك، وبعدين ابتدت ارهاصات بقى قبليها بـ 6 شهور كان أول شيء أن هو إيه؟ تاتيه الرؤية الصالحة، فما يشوفش حاجة غير تاتي مثل فلق الصبح. خديجة، ركزوا بقى، احنا هيجي معانا موقف خديجة إن شاء الله رضي الله عنها في بداية البعثة، أول مرة يشوف فيها جبريل والقصة دي هتيجي معانا إن شاء الله وهنتأملها، لكن شوفوا المرأة العاقلة الحكيمة إزاي بتستعد من بعيد، وده في النساء قليل، في النساء قليل، موجود آه طبعا موجود، لكنه قليل، اللي هو إيه؟ المرأة اللي عامة خطة، بتستعد من بعيد.
إيه اللي حصل؟ خديجة خديجة لما أرسلت النبي عليه الصلاة والسلام قبل ما تجوزه عليه الصلاة والسلام في رحلة في مالها، أرسلت معه ميسرة غلام ليها وقالت له: روح معاه، كان أول مرة بقى يطلع هو بالنسبة للي ده محمد بن عبد الله بيقولوا عليه صادق أمين وشهرته في قريش يعني إيه زجين الذهب، فاحنا إيه نستحوذ عليه، ناخده لتجارتنا علشان نستفيد منه، بس أول مرة يطلع في التجارة، فبرده ما إيه الأمر ما يسلمش، تبعت معاه غلامها ميسرة بص كده هيعمل ايه وتعال احكي. ميسرة شاف حاجات غريبه بتحصل، منها أن يبقى الدنيا شمس، يلاقي فيه ظل مش مفقاه صلى الله عليه وسلم، يعني سيدنا النبي عليه الصلاة والسلام ما الشمس كل الناس في الشمس وهو في ظل يمشي تمشي معاه، يقف تقف معاه.
وبعدين قابل راهب هناك، ميسرة ويقعد النبي عليه الصلاة والسلام تحت شجرة معينة كده، فالراهب يقول: من ده؟ فميسره يحكي له، ده واحد. فيراهب يقول له: ما جلس تحت هذه الشجرة إلا نبي، الشجرة دي ما حدش يقعد تحتها، اللي يقعد تحت الشجرة دي يبقى نبي.
المهم في إرهاصات ابتدت تحصل، فتقوم خديجة العاقلة تروح لورقة بن نوفل ابن عمها وتحكي، تقول: ده حصل كذا وكذا. قال لها: لو كون اللي بتقوليه ده صحيح فده أوان ظهور نبي، فلو اللي بتحكيه ده صحيح يبقى هو ده النبي اللي هيظهر.
ماشي فخديجه طبعا تطلبه للزواج وكذا وكذا، وبعدين يحصل بقى شوفوا بتستعد من امتى، ونيجي بقى للقصة بعد شوية إن شاء الله.
أحوال النبي ابتدت تتغير عليه الصلاة والسلام، ابتدى الحاجات اللي بتحصل له دي، أكيد بقى مشغول بحاجات تانية وبقى دماغه مش فيه، طيب السيدة خديجة وهو المفروض مسؤول عن تجارتها ما جتش في السيرة خالص تشتكي مثلا ولا أنت قاعد معايا وسرحان، ما فيش ده خالص.
وحتى بعد البعثة أحواله اتغيرت عليه الصلاة والسلام والمهام زادت وأحواله النفسية حتى يا جماعة يعني في رواية حصلت إنه النبي عليه الصلاة والسلام لما رأى جبريل مرة أخرى رفع رأسه إلى السماء كان مشدوه يعني.
جبريل سيدنا النبي يقول: أبصر هنا ألاقيه، أبصر هنا ألاقيه، ملأ الأفق. فتأخر فخديجة أرسلت الغلمان شوفوه لي فين، راحوا ورجعوا وهو واقف باصص. من كتر يعني إيه ما هو مشدوه صلى الله عليه وسلم.
وخديجة تتحمل كل ذلك، أنا ده كل بفصل في كلمة وآوتني إذ رفضني الناس، دي كلمة مش سهلة في حق رجل عليه عبء أمة، رجل عليه أعباء النبوة، كلمة مش سهلة. ولذلك كفته خديجة، كفته خمس وعشرين سنة ما فكرش يتجوز عليها صلى الله عليه وسلم ورضي الله عن خديجة.
يبقى أنا هنا لا بتكلم في نعدد ولا ما نعددش، مش بتكلم في ده، أنا بتكلم في إن مفتاح ده فين؟ مع المرأة، الراجل بقى يعدي ما عدش، دي مش قضيتي ولا ولا ده درس عن التعدد خالص، إحن بنحكي تاريخ والتاريخ ما بيجاملش حد، التاريخ ما فيهوش مجاملات، التاريخ حقائق تروى.
حقائق تروى، دي حقيقة، خمس وعشرين سنة النبي ما عدش عليه الصلاة والسلام، لو هو قبل البعثة لأنه عربية، رجل عربي عادي جدا، التعدد عندهم عادي، هو ما احتاجش يعمل ده عليه الصلاة والسلام، ولو هو نبي عليه الصلاة والسلام مش محتاج يعمل ده عشر سنين، مش محتاج ليه؟ خديجة مكفياه، مكفياه في إيه؟ في كل حاجة، خلاص.
طيب، فيبقى المفتاح فين؟ في إيد المرأة، في إيد المرأة يعني إزاي؟ مش بالبلطجة ولا بالتهديد، ولا هسيب لك البيت ولا بربي عيالك، مش بده، مش ده. مفتاح في إيدك أنت، إزاي أنك تكوني له كخديجة؟ هنعرف، مستحيل. طيب يعني لازم يعد؟ لا، بس هو ده المفتاح، ده المقصود، ليه ليه مستحيل بقول؟ لأن خديجة كملت رضي الله عنها، فمش هنبقى، لكن هي دي القدوة، دي القدوة فبنحاول نكون زيها، فده المفتاح.
ماشي وزي ما قلت لكم يعني أنا معلش بعيد تاني الحته دي إنه هذه الـ يعني هذا الملف هو ملف شائك طبعا، والغريب إن أنا بتكلم فيه في وسط النساء يعني يعني فده بالنسبة لي شيء غريب شوي، لكن بنقل لكم بقى نفسيات الرجل إن هو الراجل اللي بيفكر في كده هو فاهم كويس إن في أعباء هتقابله، وإن في مشاكل، المشاكل اللي هي بتاعة إنشاء بيت، لو كان بيت أول حتى له مشاكل وله أعباءه، فتخيل بقى إنه كمان هيبقى عليه مشاكل الإيه؟ التعدد، اللي هو الغيرة اللي هتحصل والنفسيات اللي هتأثر، وإنه لازم يستوعب كل.
طيب ليه يروح يعمل ده؟ يبقى في احتياج قوي أو أكثر عند الرجل يحمله إنه يتحمل كل ده، أغنيه كفية من هذه الاحتياجات، ماشي.
فقال: وآوتني إذ رفضني الناس. قال: ورزقت منها الولد وحرمتموه مني، وهذا من قدر الله عز وجل أن النبي صلى الله عليه وسلم يرزق منها الولد، وبعدين ولا واحدة تانية تخلف للنبي عليه الصلاة والسلام إلا إراهيم اتاه بعد الـ بعد البعثة، ولذلك لقب بالطيب والطاهر إبراهيم، وهذا من مارية، ومات إبراهيم وهو صغير. وطبعا مما يزيد في معزة المرأة وحب المرأة عند الرجل الولد، أن يرزق منها الولد، وهو الخير في قول الله عز وجل: ﴿فَإِن كَرِهْتُمُوهُنَّ فَعَسَىٰ أَن تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا﴾ [النساء: 19]، مما قيل فيها: الولد.
يعني المرأة ممكن تكرهها وبعد شوية ترزق منها الولد، مع رزق الولد القلب بيحن للمراة وهذا من لطف الله عز وجل، خلاص. هذا طبعا في في الناس الطبيعية، ممكن المرأة تبقى شديده في سوء الأخلاق وشديدة، فمهما لو جابت له عشر عيال ممكن خلاص، وممكن يبقى العكس راجل هو اللي سيء الأخلاق هو اللي مش مهتم بيته، هو أصلا مش فارق معاه تجيب له عيل ولا ما تجيبلوش، مش فارق معاه عياله، فهتفرق معاه مراته اللي جابت له العيال ده؟ ممكن يبقى كارهها، أنت جايبة لي عيال؟ أقعد بقى أنا أصرف وأعمل وأدي مدارس وأجيب بمبرز فيكره، أنا بتكلم على الأسر السوية، النفسيات السوية، رجل وامرأة.
فده مما يزيد الـ الموضة اللي طالعا في الأجيال الصغيرين: مش عايزين خلفة، موضة جديدة طالعة لنا: مش عايزين خلفة. ليه؟ عشان عايزين يتنططوا، عايزين يتنططوا ويتفسحوا ويروحوا ويجوا، وكأننا ما احناش عارفين الغاية من الزواج. ربنا سبحانه وتعالى لما وضع الشهوة في الرجل والمرأة وضعها لحكمة، مش لعبث، مش عشان نتجوز ونقعد بقى إيه نقضي حياتنا بالطول والعرض وفي الآخر هيطلقك. ما هو فكرة ليه؟ لأن هو جزء من ربط الرجل بالمراة أن في أولاد، أن في أولاد، فمش عارف إيه الخبل، وده طبعا دخيل علينا أصلا.
بداية إن احنا يبقى عدد الأولاد قليل ده أمر دخيل. أنتم عارفين إسرائيل لسه قريب من أيام يعني بيقولوا الإيه: إن التحول الديموغرافي بدأ في المنطقة، لأن كان الأول ده هو من يعني من عقود يعني كان نسبة الزيادة أن المرأة العربية المتوسط يعني بتلد ثمانية، وبالنسبة لليهود كانت المرأة تلد اثنين ونص، مش ونص عيل يعني هو بيبقى إيه النسبة يعني نسبة أو يعني متوسط، يعني الموضوع اتقلب، دلوقتي بقوا هم اللي أكتر مننا، بقوا هم اللي أكتر مننا، فهم بقوا ثلاثة وكسر، ثلاثة وواحد باين، واحنا بقينا اثنين وكسر.
يعني لو بحثتوا عنها هتلاقوها، وده كان واحد في الكنيست قام بيقول الكلام ده على سبيل الإيه المفخرة أن خلاص التحول الديموغرافي بدأ في المنطقة. طيب احنا بنقول يعني روحي تخلفي ثمانية؟ ما بقولش خلفي ثمانية بس بقول برده ثقافة أن أنا مش عايزين نخلف دي لا هي ثقافتنا ولا هي ولا أنت كده فاهمة الغاية من الزواج إيه؟ إحنا عايزين نجيب نسمة توحد الله سبحانه وتعالى، نعبدها لله سبحانه وتعالى.
سيدنا عمر كان يقول: إني لأكره نفسي على الجماع رجاء أن يخرج الله من صلبي نسمة توحده. وكان في الأثر: ألا أدلك على خير من ألف ركعة تركعها؟ تخيل كده واحد بيصلي ألف ركعة، حاجة فخمة جدا، قال له إيه خير من ألف ركعة؟ قال: يخرج من صلبك نسمة تركع وتسجد، تجيب طفل يركع ويسجد، أنت هتصلي ألف ركعة؟ شوف الطفل ده هيصلي كم ركعة، وابنه هيصلي كم ركعة، وابن ابنه هيصلي كم ركعة، وهكذا.
ماشي فالأبناء مما يزيد من الإيه، ويأخر قرارات كان ممكن الراجل ياخده، ممكن ما يبقاش مستريح مع المرأة وده طبيعي، ممكن الراجل ما بقاش مستريح مع المرأة أو المرأة مش مستريحة مع الرجل، يعني ممكن كده وممكن كده، ولوجود الأبناء نؤخر القرار ده قليلاً ونحاول نصلح. أنا قلت حاجتين مش حاجة واحدة هاه عشان بس نأخر القرار قوة ونحاول نصلح لأن دايما الناس بتعمل الأولى، ويفضل الكل فاكرين المره فاتت قلت لكم قلت لكم يعني حاجة غريبة جدا أن يبقالك عشر سنين وعشرين سنة متجوزة ولسه بتتخنقي نفس الخناقات بتاعت أول يوم جواز.
إيه ده؟ وهذا يقال للرجل بس عشان إحنا قاعدين مع نساء يعني يعني درس للنساء، إيه ده؟ عشر سنين ما لقيتوش حلول سواء نحل المشكلة أو نعرف نتعايش إزاي؟ فيجي يقول لك: أديني صبرت أهو برده عاوز أطلق، ما هو أنت ما حاولتش تصلح وأنت ما حاولتيش تصلحي.
في رواية: أشركتني في مالها حين حرمني الناس. صلى الله على النبي محمد رضي الله عن خديجة، يبقى من الحاجات اللي عملتها خديجة وكانت بها قدوة أنها لم تبخل بمالها على النبي عليه الصلاة والسلام، وهنا في وقفة مهمة جدا كذا وقفة.
أول حاجة أن نسب إليها المال، يبقى ده فلوسها، ما فيش حاجة اسمها إيه؟ الراجل يقول لمراته ما فيش حاجة اسمها فلوسك وفلوسي. أنت بقى خليكي ناصحة، قولي طب كويس هات بقى الإيه الحساب بتاعك، والـ ما هو ما فيش حاجة اسمها فلوسي وفلوسك، يعني ما هو طبعا بيقول كده عشان منمر ياخد فلوس منها، لا هو في حاجة اسمها فلوسها وفلوسك، هي لها ذمتها المالية الخاصة. ادتك جميل، ما ادتكش ما ما يعبهاش. خلاص طيب.
يبقى دي أول حاجة، قال: أشركتني في مالها، أشركتني نسب إليها المال ورأى ذلك العرفان صلى الله عليه وسلم، يعني مش بعد ما تاخد دهبها وتاخد وبعدين إيه تقوم ترميها وتجحد كل ذلك. للأسف بيجي لنا حاجات زي كده بس برده الإيه الكلام مش للرجاله، خلينا مع الستات دلوقتي.
يبقى دي أول حاجة، تاني حاجة بقى للمراة، أيوه يعني أنا لما جوزي يطلب أديله؟ ما بقولش كده، أنا دلوقتي على حسب جوزك ده شكله إيه؟ على حسب جوزك ده شكله إيه؟ يعني أنت فلوسك وبعدين الراجل لا عنده دين ولا عنده خلق وسفيه ما عنده عقل وضيع فلوسه، تقوم أنت تيجي تدي له فلوسك يقوم مضيعها هي كمان؟ هنا الحكمة قد تقتضي أن لا، ما ياخدش فلوسك، ما يضيعش فلوسك.
العكس: رجل دين وصالح وشايلك، والاصل أن الراجل هو اللي بينفق في البيت فهو مش مقصر في بيته، وبعدين حصل ضائقة مالية عنده غصب عنه، الدنيا قفلت، فصل من شغله، تاجر والشحن وقف، آديكم شايفين المنطقة بيحصل فيها إيه دلوقتي، فاحتاج إنه مبلغ يسنده، فحينها طبعا تديله، هذا الرجل. ماهياش قاعدة، يعني مش عشان خديجة أدت فكل امرأة لازم تدي، لا، هي خديجة أدت مين؟ أدت سيدنا النبي عليه الصلاة والسلام.
وهنا يا جماعه نقطة مهمة جدا بقى يا نساء، خديجة كانت فيها قدوة، سواء في البيت أو خارج البيت أن الإيمان قول وعمل. يعني سيدنا النبي جه عليه الصلاة والسلام قال: أنا النبي وأنا المبعوث وكده، فآمنت: أشهد أن محمد رسول الله، في عمل بقى: الفلوس بتاعتها لله في خدمة دين الله عز وجل، لا تضن.
ولذلك قال صلى الله عليه وسلم: والصدقة برهان. برهان على إيه؟ على صدق الإيمان. الصدقة برهان على صدق، طب ليه برهان؟ لأن الناس كما أخبر الله: ﴿وَتُحِبُّونَ الْمَالَ حُبًّا جَمًّا﴾ [الفجر: 20]، النفس مجبولة على ذلك، وإنه لحب الخير اللي هو المال لشديد، النفس مجبولة على ذلك، فالنفس التي تخرج هذا المال مع حبه، الحب الجم بهذه الصورة، ده دليل على صدق الإيمان بقى.
ولذلك إحنا قلنا خديجة قدوة أول حاجة في إيمانها، امرأة مؤمنة صالحة، بس لا، أول المؤمنات، قدوة. طيب أنا بقى إزاي قدوة؟ تبقى قدوة أنها أول ما تسمعي عن الخير تعمليه، الحلقة تروحي، الحجاب تظبطيه، أول ما تعرفي أن لا، الحجاب اللي أنا لابساة أو أنت مش محجبة أصلا تجري تبقي الأولى. الأولى في إيه؟ في الامتثال، تسمعي تمتثلي على طول. فدي أولية نسبية صحيح، ماهياش أولية مطلقة، لكن هي دي قدوتك بقى خديجة رضي الله عنها أول من آمنت.
قال: يبقى في رواية قلنا: أشركتني في مالها حين حرمني الناس، وتكلمنا عن الموضوع ده. في رواية: وتصدق الحديث، وصفة الكذب أشد ما يكون في المرأة، طبعا في الرجل، لكن إحنا مش جايين نكلم الرجالة، أشد ما يكون. والرجل إذا آنس من امراته كذبا وتكرر، تكدر المعيشة.
ركزي، ركزي كويس جدا، أوئي، أوئي تكذبي على جوزك لا في قليل ولا في كتير، ليه؟ لأنه لو آثر الرجل كذبا، أنتوا في معاكم حد ثالث أنتوا مش واخدين بالكم منه: الشيطان. أنت فاهمة أن الشيطان ده ممكن يدخل بقى لجوزك في دماغه يوصل له أنك بتكذبي في إيه؟ في عرضه وشرفه. ما خلاص دلوقتي أنا آثرت من امراتي، مش أنا يعني، أي حد كذبة يعني إيه أنت عملتي كذا ليه؟ وأنت مثلا تكون أنت متاكد مليون في المية لا ده أنا ما عملتش، فابتديت إيه تحط كده علامة استفهام وأسكت، لأن مش كل الرجالة بتواجه، وده من الحكمة، يعني مش مش أنها تخاف تواجه، يعني خلاص يعني أكدر حياتي ليه؟ مرة تانية وأسكت، تالتا هبتدي بقى إيه ده أنا عايش مع مين؟ هي طب بتعمل إيه بقى من ورايا دي؟
فالكذب، أيكون المؤمن كذابا؟ قال: لا صلى الله عليه وسلم، لا، أوئي تكذبيه، هيتضايق، يتضايق ضيق قليل دلوقتي أحسن من بعد كده لو اكتشف الكذب، الحياة هتتعكر. وطبعا الأحسن من ده كله أنت ليه تعملي؟
اللي يضايقه يعني، يعني بالاول ما تضايقيهوش فلا يحوجك هذا إلى كذب. فين القصة بتاعة القطة واللحمة؟ الراجل جاب كيلو لحمة في البيت شقيان طول النهار وبتاع ووفر ثمن اللحمة وجابها لمراته. راجع بقى يقول لها: حطي لي اللحمة. هي كانت عاملة إيه؟ خدت اللحمة أديتها لأمها، فقالت له: لحمة إيه؟ القطة أكلت اللحمة! فالراجل راح جايب القطة حطها على الميزان لقاها كيلو. طب ما اللحمة كانت كيلو!
قال لها: طب لو دي القطة فين اللحمة؟ ولو دي اللحمة فين القطة؟ ما هو يعني القطة كانت اللحمة! فانت ما تكذبيش على جوزك خالص ماشي؛ أولاً: تأثمي بذلك، ثانياً: تتعكر الحياة، ثالثاً: الشيطان هيخش وهيبتدي يشككه في حاجات كتير جداً بقى. فهي كانت تصدق الحديث، ما هي سيدتنا السيدة خديجة ما كانت تكذب خلاص.
طيب، عاوزين ندخل في حديث بداية الوحي، لأنه حديث مهم. قبل ما ندخل فيه، نشوف بس فضيلة للسيدة خديجة رضي الله عنها: أن جبريل عليه السلام أتى النبي صلى الله عليه وسلم يوماً -والحديث متفق عليه- فقال: «هذه خديجة أتتك» -وفي رواية: «تأتيك»- معها إناء فيه إدام أو طعام أو شراب. فإذا هي أتتك فاقرأ عليها السلام من ربها ومني، وبشرها ببيت في الجنة من قصب، لا صخب فيه ولا نصب. عاوزين نقف مع الحديث: أول حاجة في أي الحالات أتت خديجة البشرى؟
ده أول معنى، يعني خديجة أتتها البشرى وهي في حالة إيه؟ خدمة النبي، خدمة جوزها. جبريل بيقول له: هذه خديجة تاتيك معها إناء فيه طعام أو شراب، جاية بتخدم جوزها. على تلك الحال بشرت! على تلك الحال بشرت رضي الله عنها! وده اللي دائماً بنقوله للمرأة: سيبك من اللي بيضحكوا عليكي والله ما عاوزين مصلحتك. ودائماً يا جماعة الحركات المتطرفة تظهر في مواجهة حركات أخرى متطرفة، خلاص.
وأحنا مجتمعنا يتحمل هذا التطرف؟ نعم، مجتمعنا ما هواش المجتمع مع اليوتيوب -اليوتيوب لا، اليوتوبيا يعني إيه؟ يبقى إيه اليوتوبي كده صح- المجتمع اليوتيوبي اللي هو الفاضل. وأحنا بعيد جداً عن الإسلام، اه بعيد جداً عن الإسلام، يعني ما باجملش يعني، لكن ما عندناش التطرف من الناحية دي عشان يواجه بتطرف من الناحية دي.
أنا عاوز أقول إيه دلوقتي؟ دلوقتي دلوقتي احنا المرة اللي فاتت قلنا إن جوزك يبقى محور من محاور حياتك، بل هو المحور، ولما قلنا هو المحور ده لأن ربنا هو الهدف، خلاص مش إنت متخلية. خلي بالك لما نقول جوزك هو المحور مش يعني مش هتقرفيه، مش يعني إيه ليل نهار بقى عاوز تعرف اصل إنت المحور ما ورايش غيرك، لا هو المحور يعني إيه؟ يعني ممكن أصلاً يبقى المحور ده الأريح ليه أنك ما يبقاش المحور، فإنت خليتيه مش المحور عشان هو المحور! يعني هو في الوقت ده مش عاوز منك أكثر من إيه؟ عاوز أبقى لوحدي بس.
ده الكلمة واضحة، لا تحتمل أنه بقى يكرهك، ولا تحتمل أنك ما بقتش تحبني زي الأول، ولا يحتمل خالص، أنا بس عاوز أبقى لوحدي بس. طيب، ده يضيرك وبتحبيه وتحبي الأنس معه وتحبي الما أعرف إيه، لكن خلاص هو محتاج ده، خلاص خد ده ماشي.
طيب، فخديجة المرأة التاجرة اللي انتوا بقى عارفين أنها تاجرة، وهاجي للكلام ده دلوقتي إن شاء الله. واللي عندها بنات وواحدة فوق الثانية والكبيرة في السن يعني من بعد البعثة المرأة من 55 لـ 65، فما هيش المرأة الشابة الصغيرة اللي لا هي اللي بتيجي تخدم جوزها وجايبة له الأكل وجايبة الشراب، واللي يعنينا بقى دلوقتي: على تلك الحال بشرت! فدي برده ليها دلالة، ليها دلالة خلاص. فكوني في خدمة زوجك إرضاء لربك سبحانه وتعالى، دي أول مسألة.
المسألة الثانية: بماذا بشرت؟ بشرت ببيت من قصب، لا صخب فيه ولا نصب. أولاً بشرت ببيت، القصب الأول اللي هو اللؤلؤ، ماشي، لؤلؤة مجوفة هي لؤلؤة واحدة كالببيت مجوفة. لكن العلماء تنبهوا لحاجة: لم تبشر بقصر مثلاً، وطبعا طبعا البيت اللي في الجنة ده هو قصر، بس لفظ الحديث: بشرت ببيت. ليه ليه ما تقالش بشرت بقصر؟ قالوا: للمشاكلة، للمناسبة. إيه مناسبة إيه؟ أن خديجة رضي الله عنها كانت ربة بيت، كانت سيدة بيت في الدنيا، اللي هو بيت النبوة بيت النبي عليه الصلاه والسلام قبل البعثة وبعد البعثة، فكان الجزاء من جنس العمل، لأنك كنت امرأة البيت بحق فبشرت ببيت.
فهمتوا دي؟ يبقى هي لماذا بشرت بهذا البيت؟ ركزوا بقى يا بنات ها، مش عشان التاجرة، عشان دلوقتي الخطاب النسوي يقول الكلام اللطيف ده: خديجة كانت تاجرة وكانت سيدة. يقولوا: مش تاجرة، يقول لك: سيدة أعمال! فايه يعني، فايه؟ هي خديجة كانت خير نسائها وكانت القدوة وكانت أفضل نساء العالمين عشان كانت سيدة أعمال؟! مين قال لحضرتك الكلام ده؟ جبته منين؟ جبته منين؟ احنا هنبص في الموضوع، تعالوا دلوقتي عشان بس إيه نخلص ونقفل الملف الشائك.
هم يقولوا كده، يقول لك إيه: خديجة أهي القدوة، آه جميل، صدقتم، هي قدوة خير نساء، مش جميل ها؟ كانت سيدة أعمال، فأنت عاوزه تقولي إيه بقى؟ يعني عشان تبقي خير نساء العالمين تبقي سيدة أعمال؟! انت فهمتي ده كده؟! طب تعالوا نتامل بقى شوية حاجات.
أولاً، خديجة رض... اصل هو اللي بيحصل إيه دلوقتي؟ هم هياخدوا دي ومش هيسقطوها على الواقع، ودلوقتي احنا عارفين الواقع، لو واحدة سيدة أعمال الواقع عامل ازاي وبتبقى ازاي سيدة أعمال وبتضطر تعمل إيه -أنا ما بقولش أنها واحدة فاسقة، لا- بتضطر تعمل إيه من مخالفات شرعية غصب عنها عشان تفضل في السوق!
فتعالوا بقى نتأمل شوية حاجات: أولاً خديجة رضي الله عنها كان عندها تجاره، ده من بعد الإسلام ولا هي كانت كده أصلاً؟ كانت كده. طيب، ثم جاء الإسلام امتى جه الإسلام وخديجة عندها كام سنة؟ 55 سنة! ده أول يوم النبي يشوف فيه جبريل عليه الصلاة والسلام خديجة عندها كم سنة؟ 55 سنة. احنا يعني كل ما قبل الاسلام احنا أصلاً ما نتكلمش فيه، ما فيش إسلام. فخديجة كان عندها كام سنة؟ 55 سنة، امرأة كبيرة في السن، بس كده؟ لا، مش بس كده.
خدوا المفاجأة: متى نزلت آيات الحجاب؟ هو الإسلام يا جماعة يعني جبريل جاء إلى النبي عليه الصلاة والسلام في الغار أول مرة قال له هذا هو الإسلام وراح مدي له منهج الإسلام؟ ولا شيئاً فشيئاً ينزل الإسلام شيئاً فشيئاً؟ انتوا عارفين أصلاً أن خديجة ماتت قبل الصلاة، قبل فرض الصلاة، ما هي الصلاة امتى فرضت؟ في الإسرائيل والمعراج. أصلاً الإسراء والمعراج ليه حصل؟ عشان ربنا يواسي نبيه عن موت خديجة وعمه، فأصلاً خديجة ما حضرتش فرض الصلاة.
طب امتى نزل الحجاب؟ الحجاب نازل في سورتين، سورة إيه وإيه؟ النور والأحزاب. السورتين دول إيه؟ مدنيتين؛ الأحزاب في غزوة الخندق والنور في حديثة الإفك. فايات الحجاب أصلاً ما كانتش نزلت! عشان بس تفهموا الناس اللي بتصدر لكم أفكار هي لا هي من دين الله عز...
أنت بتقول يعني أن شغل المرأة حرام؟ أنا ما بقولش شغل المرأة حرام، شغل المرأة نعرضه على الدين، نشوف إنت بتشتغلي إيه وشغلك شكله إيه، وإنما فكرة أن احنا كلام كده يعني حتى لو بالسرد التاريخي -ما بتكلمش في دين يا جماعة، ما بتكلمش في دين، أنا بتكلم في تاريخ- تاريخ.
أول حقيقة تاريخية: خديجة في أول يوم إسلام ست كبيرة عندها 55 سنة، فبفرض أن الإسلام نزل جملة واحدة كده -بفرض أن الإسلام نزل جملة واحدة كده- وفضلت في تجارتها، فدي امرأة عندها 55 سنة، ده بفرض ده.
يبقى دي أول حاجة. تاني حقيقة تاريخية: أن أصلاً آيات الحجاب ما نزلتش وخديجة عايشة أصلاً. طب ليه بنقول ده؟ لأن الحجاب مش معناه بس اللبس، الحجاب أن المرأة تحتجب، ماشي، ويدخل فيه مسائل في الاختلاط كذلك، والراجل يرى منك إيه ولا يرى منك إيه؟ وطب وإنت هتعرفي تحققي ده في شغلك أو مش هتعرفي؟ ومدى الاختلاط ده -أحنا لا نقول الاختلاط حرام بإطلاق كده، طبعا ما حدش يعني أنا مش بنقول أن الاختلاط حرام، لا، ما فيش حاجة اسمها كده، الاختلاط اللي هو شكله إيه ويؤدي إلى إيه و... ففيها مسائل يعني.
فدي مسألة ثانية يبقى الحجاب ما كانش نزل أصلاً. المسألة الثالثة: خديجة كانت سيدة أعمال، ده مين قال لحضرتك أن خديجة كانت سيدة أعمال بالنمط العصري اللي احنا عايشينه؟! لما نقول سيدة أعمال في النمط العصري اللي يجي في الذهن إيه؟ المرأة اللي بتلبس لبس معين الصبح وتنزّل ماسكة الكوفي بتاعها، ورايحة... مش عارف إيه كده عشان تدخل المكتب بتاعها وتعمل الميتنجز وتقابل الناس.
ده على فكرة يا جماعة أنا بقوله ده ممكن أكون بقوله بهزار، بس هو مهم جدا جدا أن احنا فكرة إسقاط النصوص التراثية أو التاريخية أو الشرعية على واقع معاصر دي جناية على النصوص، وهنطلع بدين مشوه!
خديجة كل كتب التاريخ بتذكر الآتي: أن خديجة كانت عندها فلوس وكانت تضارب في مالها، يعني إيه تضارب في مالها؟ هي عندها فلوس، تقوم تسمع أن في واحد شاطر في التجارة وأمين تجيبه -غير النبي عليه الصلاة والسلام- تجيبه، هأضاربك يعني إيه؟ أضاربك أنا بالفلوس وإنت بشغلك بمجهودك، فانت إنت يا رجل خد التجارة، سافر، بيع، ارجع، حاسبني. هي دي خديجة التاجرة كتب التاريخ بتقول كده، خلاص.
فدي الروايات، كل روايات في كتب التاريخ ما شفناش رواية -هاتوها لو في هاتوها ونحققها ونشوفها- أن خديجة كانت سيدة أعمال، يعني بتخرج الصبح وتروح السوق وتفتح الدكان وتقعد تخالط الرجال وده معاكس وده يبص وده يهزر وده يرمي جثته، ما شفناش ده ولا كتب التاريخ بتقول ده.
فلو حضرتك شايفه أن السيدة خديجة لو قدر لها أن تبعث وترى ما فيه النساء اليوم -نساء، مش هقول بقى النساء المتدينات- فخديجة هترضى بهذا النموذج، يبقى إنت مش فاهمة دين ولا فاهمة خديجة رضي الله عن خديجة.
وقلنا لكم مثال مش فاكر في مريم ولا في آسية، حديث عائشة رضي الله عنها: «لو راى رسول الله ما أحدث النساء بعده لمنعهن». قلت لكم: لمنعهن إيه؟ أن هم يروحوا المساجد؟ لا تمنعوا إماء الله بيوت الله. فالسيدة عائشة بتقول قول: لو كان النبي شاف عليه الصلاة والسلام ما أحدث النساء بعده، لا كان منعهم. ساعتها أنا قلت لكم: هأسألكم سؤال صغير، هو إيه اللي تتصوروه دلوقتي؟ عائشة عائشة بين صحابية وتابعية، دي اللي عين عائشة شافتهم صحابية وتابعية. فانتوا متخيلين إيه الحاجة اللي أحدثتها النساء بعد النبي عليه الصلاة والسلام اللي هم صحابيات باقيين أو تابعيان ولدنا، والنبي عليه الصلاة والسلام لو كان شافه كان منع إيه؟ بلاش، إيه قياسه بالنسبة لعصرنا دلوقتي؟ مهما كان بقى في الوقت ده حتى احنا مش عارفين إيه هو، لا، لكن تتخيلوا كده لو قسناه بما أحدثته النساء في هذا العصر، يبقى نقطة في بحر! يبقى نقطة في بحر!
فنيجي احنا بعد ده كله نرسم صورة للبنت اللي بتدور على دينها وبتدور على النموذج اللي تتبعه وبتدور على القدوة اللي تتبعها، نقول لها: تعالي الخطاب النسوي بقى تعالي، ما هو الخطاب النسوي لازم يبقى متشكل أو أي خطاب منحرف لازم يتشكل، خطاب شديد الانحراف والتطرف، ده اللي هم الأتباعنا اللي هم إيه ضامنينهم، وخطاب ملون كده ليه؟ عشان في ناس مش هيخيل عليها الخطاب ده أو مش هيستهويها الخطاب المتطرف ده. فانت عاوزه دين، تعالي يا حبيبتي عندنا الدين، تعالي هنديكي نموذج ديني مشرف، مين هو؟ في غيرها سيدة الأعمال؟!
خديجة رضي الله عنها كانت سيدة أعمال إيه؟ سيدة أعمال دي طبعا البنت يا عيني المسكينة الصغيرة تسمع أو المرأة حتى لو كبيرة بس ما عندهاش تصور تسمع سيدة الأعمال دي، تقوم على طول ذهنها يصور لها نمط معين اللي هو إيه؟ شافته في دنيتها. خديجة ما كانتش كده.
طيب، لا هبه كانت كذلك، إيه رايكم بقى؟ كانت كده. فكان ماذا؟ هي كانت كده في جاهلية وفي صدر إسلام لم ينزل فيه بعد آيات الإيه؟ آيات الحجاب! ما هو يا جماعة عائشة في حديث الإفك -عائشة في حديث الإفك اتهمت في من صفوان رضي الله عنه، صفوان بن معطل- عائشة بتحكي حديثة الإفك بتقول إيه؟ وكان فلما راني استرجع، رجع قال: أنا لله وإنا إليه راجعون. وكان يعرفني قبل الحجاب! هي كانت نايمة. فعادي، كانوا بيمشوا عادي وبيتشافوا عادي، وكان عارفني لأن ما كنتش ما كانش لسه إيه الحجاب نزلت، فكنت بمشي عادي قدام الناس. نزل الحجاب، خلاص.
فكان ماذا يعني؟ هَبْ أن خديجة كانت كده ولقينا الروايات مش أنها كانت تضارب مع الرجال وهي مصونة في بيتها، لأن خديجة كان لقبها في الجاهلية الطاهرة، في الجاهلية مش في الإسلام، كان لقبها الطاهرة في الجاهلية، لكن هبه ما كانتش بتعمل كده ولا كانت بتضارب. ودي دي الروايات اللي عندنا، أنها كانت تضارب والراجل هو اللي بيخرج ويسافر ويرجع ويحاسبها في الآخر، لا كانت بتخرج يا ستي.
فإيه يعني ما هي كانت في الجاهلية وفي صدر الإسلام، والاسلام كمل شيئاً فشيئاً، خلاص. تاني هعيد كلمة قلتها: يعني يا شيخ أنت بتقول قول الست ما تشتغلش؟ ما قلتش كده، لكن أنا بحط كل شيء في قدره. طب أشتغل؟ ما قلتش كده برده، دي كل حالة في حالتها تحكى.
خلاص، اه، يبقى بشرها ببيت. يبقى ليه بيت من قصب؟ القصب قلنا اللي هو إيه؟ اللؤلؤ. طيب ليه ما يقولش من لؤلؤ؟ يعني ليه نصعبها نقول من قصب وبعدين نسال هو إيه القصب فنقول اللؤلؤ من الأول؟ خلاص عرفنا ليه بيت. يبقى هي ربة بيت، والبشرى أتتها على تلك الحال أنها كانت ربة بيت. جوزي جايبه له أكل، حياة بسيطة جميلة، امرأة تخدم جوزها، حياة جميلة.
على تلك الحال أتتها البشرى ببيت، ليه بيت؟ لأنك ربة بيت. ليه من قصب؟ ليه مش من لؤلؤ؟ قالوا برده للمناسبة. إيه المناسبة؟ قالوا لأن خديجة حازت قصب السبق، ودي كلمة العرب يقولوها. كانوا يعملوا إيه العرب؟ أما ييجوا يعملوا سباق، يحطوا حتة خشبة كده، اللي يوصل الأول يمسكها، يقولوا إيه: حاز قصب السبق. ماشي.
فبشرها ببيت من قصب، هنا في مناسبة أن خديجة حازت قصب السبق. طب احنا نستفيد إيه من ده؟ إيه يعني سائل اللي قلناه لكم من شوية، انك تسمعي بحاجة تعمليها، مش من جوزك، أقصى في الدين، في دين الله عز وجل، سمعت إن شكل حجابك ده مش مضبوط ظبطيه، أو أنت مش محجبة وسمعتي إن الحجاب فرض اتحجبي، تطلعي من الدرس النهارده تتحجبي. لو أنت عاوزة تبقي قدوتك خديجة بحق، مش تبقي سيدة أعمال. خديجة ما دخلتش الجنة عشان هي سيدة أعمال، بلاش تخلي حد يضحك عليكم.
فحازت قصب السبق، فبشرت ببيت من قصب. طب ليه؟ لا نصب فيه ولا صخب. اللي قلنا لكم بقى هنعيدها هنا: الأول إيه النصب؟ التعب. وإيه الصخب؟ الصوت العالي، اللي في الغالب بيكون مع المنازعات. قالوا بشرت بهذا أيضاً للمشاكلة أو للمناسبة. يعني إيه المناسبة؟ قالوا إن خديجة عيشت النبي عليه الصلاة والسلام حياة لا صخب فيها ولا نصب. ويا لها من امرأة تحسن صنع هذا مع زوجها.
امتى الصخب ييجي؟ الصوت العالي والزعيق لو في منازعة. خديجة ما كانت تنازع، نعمل كذا ماشي، نعمل كذا لا، لازم يبقى لك شخصية ولازم تقولي مش عارف إيه ولازم تعيدي مش... مين اللي قال إن لازم؟ ومين قال إن ده يمحو شخصيتك؟ ما يمكن دي شخصيتك اللي هي إيه؟ شخصيتك لما أريحه هيريحني.
أنا تاني، أنا أسف أن بقول ده كتير، وأنا ما ينفعش يعني مش صح أن أقوله كتير بس مضطر أقوله كتير للتحفزات اللي بتحصل، مش منكم، بعد كده لما الفيديو ينزل أنا بكلم النساء، لو بكلم الرجالة في كلام كتير هيتعكس، وهيتقال زيه أكتر منه للراجل. أنما يعني عادي الراجل يتقال له إيه: لين مع مراتك، وإيه يعني أما مراتها يمشي؟ ما فيش مشكلة في بعض الأوقات نقول الكلام ده للراجل عادي جداً ونجيب له أدلة من السنة كمان.
لكن احنا بنخاطب النساء. فما كانش معيشة النبي عليه الصلاة والسلام في حياة فيها دوشة، فالדوشة دي بتيجي منين؟ أول حاجة الخناقات اللي بين الراجل والست، خديجة كانت: ده يريحك؟ يلا نعمله، ما فيش مشكلة خالص. طيب، أصل هو ممكن يحصل يا ستي، إيه يعني الدنيا تميل شوية عشان الراجل يختار اختيار خطأ، بس في الآخر شافك واقفة معه في صف وبتاع، ماشي ما فيش مشكلة هتعدي وهيشيلها لك وكده.
الصخب بيجي منين تاني؟ من دوشة العيال في البيت، وكان خديجة برده قادرة تسيطر على الموقف ده، عندنا أربع بنات صغيرين، لا بتعرف تربي وبتعرف تدادي وبتعرف تلاعب وبتعرف مش عارف إيه، فالنبي عليه الصلاة والسلام بيبقى بيته مكان الراحة ليه، مكان السكن. فلأنها عيشت النبي عليه الصلاة والسلام في بيت لا صخب فيه، فبشرت ببيت لا صخب فيه.
ولا نصب ولا تعب. لأنها نرجع بقى للكلمتين اللي قلناهم: قلنا لكم ممكن الست تبقى مطاوعة للزوج، يعني إيه مطاوعة؟ يعني اللي أنت عاوزه يلا، يلا إيه يلا أعمله. ودي امرأة كويسة يعني، المرأة الاحسن: اللي أنت عاوزه يلا نعمله، إيدي في إيدك. الأولى: اللي أنت عاوزه أعمله، ودي امرأة صالحة ما فيش مشكلة.
وعلى فكرة حتى لو احناقش برده امرأة صالحة، يعني مش بنقول اللي بتناقش امرأة غير صالحة، عشان برده نحط حديث في صحيح البخاري، سيدنا عمر قال: يا رسول الله، لو رأيتنا ونحن قوم يعني قريش نغلب نساءنا، في قريش الست ما بتكلمش الراجل، ده طبع القرشيين. فقدمنا على إخواننا من الأنصار، فإذا هم قوم تغلبهم نساؤهم. سيدنا عمر سمى أن المرأة تراجع الرجل، ده لوحده مش في ثقافة القرشيين أصلاً، يعني نمط الحياة في قريش مش كده، أنا أقول حاجة بتتعمل. الأنصار أهل ديانة برده الأنصار، لكن عندهم نمط تاني مختلف اللي هو إيه؟ عادي أن أقول ومراتي تراجعني، عادي جداً.
أنا بس بحط الحتة دي عشان ما تفتكرش المرأة أو راجل ياخد الفيديو يقول لك شفتي بقى، لازم والا تبقي امرأة مش صالحة. ما حدش قال كده، المرأة اللي تراجع زوجها مش معنى كده امرأة غير صالحة، ما حدش قال كده، سيدنا عمر بيقول: فتفق نساؤنا يتعلمن من نساء الأنصار. فسيدنا عمر مرة بيكلم مراته، فرجع عارفين راعيته قالت له: لا، يعني بيتهيأ لي كده حسن، قال لها: تراجع! أنت بتعملي إيه؟ أنت سيدنا عمر ما فيش الكلام ده خالص يعني، الثقافة دي مش عنده، أنت بتعملي إيه؟ أنا بقول لك، أنت هتناقشيني؟ قالت له: ما أناقشكش ليه؟ زوجات النبي بيناقشوه، بيراجعوه. عمر اترعب من الكلمة دي، ليه اترعب؟ لأن من زوجات النبي مين؟ بنته. اترعب والنبي قرشي، النبي مش أنصاري، قرشي، بيراجعوه! إيه ده؟ راح جاري على طول على حفصة: هو أنت بتعملوا كده؟ قالت: أه نعمل كده عادي جداً.
فلو بنوجه بقى رسالة للرجل هنا: كن كالنبي عليه الصلاة والسلام. وابن حجر في الفتح لما جه يعلق على الموقف ده، علق أن ده الأكمل في الرجل أنه يترك المرأة تراجعه، ليه؟ لأن ده هدي النبي عليه الصلاة والسلام. أنا كان لازم أخرج الخروجة دي علشان ما تفتكروش النساء، ما تفكرش إن أنا بقول إيه: المرأة الصالحة ما بتراجعش جوزها، أو ماشي أنت عاوز كذا يعمله يبقى المرأة اللي بتعمل كده غير صالحة؟ لا أبداً، بل بالعكس، زوجها هيبقى يرى ذلك من باب إثراء الحوار، عشان في الآخر احنا الاتنين هنخرج بأحسن نتيجة لما نتناقش.
المهم، يبقى خديجة كانت معيشة النبي عليه الصلاة والسلام في بيت لا صخب ما فيهوش دوشة، ولا نصب. يبقى المرأة نرجع بقى تاني ممكن إيه؟ ما فيش صخب، ما فيش صخب يعني إيه؟ ما فيش خناق، ما فيش نزاع، اللي أنت عاوزه أعمله. ممكن درجة أهلى: أنه لا صخب فيه ولا نصب، اللي أنت عاوزه إيدي في إيدك وهنعمله سوا، مش هتعبك، هساعدك، هتلاقيني في ضهرك. دي خديجة، خديجة كانت بتعمل الاتنين، لا صخب ولا نصب.
فاكرين بقى المثال اللي قلنا عليه؟ قلنا هنعيده، إيه كان المثال بتاع إيه؟ ما فيش طبعا كله قاعد طرزانات، ماشي فكاتبينه المرَّة دي يا ابني في أول الدرس يا ابني؟ كتبته كده صح، ما كتبتوش المثال؟ الفحين ابقى ارجعوا بقى لأول الدرس، اللي هيتفرج على الفيديو بعد كده يشوف قلناه فين.
من الروايات الجميلة اللي لازم نقف معها، رواية بدء الوحي وهي أيضاً في الصحيح من حديث عائشة. الجميل طبعا أن كتير مناقب خديجة اللي بيرويها عائشة، اللي هي أكتر امرأة كانت بتغيير منها. فبدء الوحي بتروي عائشة رضي الله عنها، تقول: أول ما بدء به رسول الله صلى الله عليه وسلم من الوحي الرؤيا الصالحة في النوم، فكان لا يرى رؤيا إلا جاءت مثل فلق الصبح. ثم حبب إليه الخلاء، وكان يخلو بغار حراء، فيتحنث فيه، وهو التعبد، الليالي ذوات العدد، قبل أن ينزع إلى أهله ويتزود لذلك، يعني يقعد ليالي ويرجع يجيب أكل ويرجع وهكذا، ثم يرجع إلى خديجة فيتزود لمثلها، حتى جاءه الحق وهو في غار حراء. أول مرة يشوف بقى جبريل وعارفين القصة، فجاءه الملك فقال كذا وكذا وكذا، ليس من حاجتنا هنا. قال: فرجع بها رسول الله صلى الله عليه وسلم يرجف فؤاده.
رجع فين؟ فدخل على خديجة. وده اللي قلنا لكم المره اللي فاتت عاوزين نقف معاه. العادة في الرجال في الأمور الصعبة والمهمة والخطيرة، يروح يستشير مين في العادة؟ اللي بيستشير أصحابه رجال، أو رجال أكبر منه سناً وبتاع وحكمة و... هنا النبي عليه الصلاة والسلام مش بيواجه أمر، عفواً، بيواجه أمر لم يواجهه أحد من البشر، يعني اللي واجهوا الأمر ده ناس معدودون، اللي هم الأنبياء. ملك وييجي ووحي، قصة كبيرة، وبعدين بعدين النبي خشي، قال صلى الله عليه وسلم: لقد خشيت على نفسي، قيل خشي أنه يموت. الأمر يا جماعه صعب، صعب، صعب تخيله أصلاً.
فسيدنا النبي عليه الصلاة والسلام في تلك الحال يروح فين؟ لخديجة. لا راح لعمه، عمه عايش وعمه راجل كبير ومخضرم ومحنك، وله مكانة في قلب النبي عليه الصلاة والسلام، كان ممكن ينزل جري من حراء على بيت عمه ويحكي له، ما عملش كده. ولا راح لأبي بكر، أبو بكر كان صديقه، وأبو بكر رجل كبير برده في يعني وقتها يعني، هو من عمر يعني قريب من عمر النبي عليه الصلاة والسلام، ما عملش كده. وجد ملاذه الآمن عند خديجة.
لو كانت خديجة تلك المرأة صغيرة العقل خفيفة النفس وال... ما كانش النبي راح لها عليه الصلاة والسلام. هو فاهم كويس جداً أن خديجة هتعرف تتصرف، هتعرف أولاً تحتويني في الموقف ده، دي أول حاجة. ثانياً هتعرف تتعامل، هتعرف تعمل إيه. وهنشوف دلوقتي أن خديجة عرفت تعمل إيه. أولاً عرفت تحل الرجل في تلك الظروف، وبعدين عرفت تتصرف. ده سيدنا النبي كان يعرفه من خديجة صلى الله عليه وسلم، عشان كده نزل بها يرجف فؤاده، فدخل على خديجة، لا جري على عمه ولا جري على أبي بكر الصديق، جري على خديجة.
الست اللي بتشتكي: ما بيقعدش في البيت، يخلص شغل ويروح يقعد على القهوة، يخلص شغل ويروح يلعب مش عارف بادل معه، يخلص شغل ويروح بلاي ستيشن، يخلص شغل ويروح... ده راجل ما صعب، طب يمكن أنت اللي مش عارفة تحتويني؟ يمكن هو محتاج حاجة مش لاقيها عندك؟ أنا كده بتحمل عليكم، ما بتحملناش؟ قلنا لكم: لو في خطاب للرجالة هنقول لهم حاجات تانية، هنقول لهم: بلاش بلاي ستيشن، خليكوا إلعبوا كورة مثلاً أفيد.
أنما الخطاب اللي ليكي دلوقتي إيه؟ أن فين المرأة اللي تخلي جوزها من أول ما يخرج من بيت ملهوف: أمتى أرجع ليه؟ أصل هو لاقي كل حاجة، ما فيش حاجة ناقصاه. ففين تلك المرأة؟ طب ليه المرأة دي بقت قليلة جداً؟ لأن للأسف أنتم مشغولين بحاجات تانية، للأسف منها حاجات تفاهات، مشغولة بالتليفون، عينك في التليفون ورقبتك موطية على التليفون بالساعتين والثلاثة والأربعة والعشرة. فلن أنت يعني أنت ممكن بعد 10 سنين بتتعرفي على جوزك، أنت معانا في البيت؟ أهلا وسهلا، أنت ليه؟ ما أنت مكفية على التليفون، لا عارفة احتياجاته إيه، ولا عارفة اهتماماته إيه، ولا عارفة هواياته إيه، ولا عارفة بيحب إيه ولا بيكره إيه، مش عارفة حاجة، يرجع لك ليه؟ أنت جاوبي نفسك: يرجع لك ليه؟
فلا، خديجة جوزها محور في حياتها، من أهم محاور حياتها، فَعارفة بيحب إيه وبيكره إيه، وبعدين مركزة في التفاصيل، قلنا لكم لو في مفتاح لشخصية خديجة: الحكمة. هو دلوقتي واحد جاي يرجف فؤاده، مش وقته إيه بقى؟ لا، أحكي لي بالتفصيل، وأنت هتسيبني كده؟ أنت ما فيش زملوني فزملتها. في ست مش كده: إيه اللي زملوني؟ أنت هتنام وتسيبني؟ أحكي لي بالتفصيل، هي دي حاجة تعدي؟ أنا طب أنا هقعد كده بقى على النار لغاية ما تصحى إن شاء الله؟ إيه يا ستي في إيه؟ أنت مش شايف جوزك عامل إزاي؟
في مش لازم بقى يكون الوحي، يعني ممكن إيه؟ الراجل جاي من الشغل تعبان، فطبيعي يرجع ينام، يعني طبيعي جداً، يعني أنت طول النهار في الشغل وكمان لما تدخل بيت تنام؟ أنا أقعد مع مين؟ طب أنا أعمل إيه؟ يعني أنا كراجل بقى أنا أعمل إيه دلوقتي؟ ما هو الطبيعي، اللي في الشغل طول النهار طبيعي، يعني بيرجع ينام، ده الطبيعي في البني آدم. خلاص، أنت بقى ممكن تعمل خطة كويسة، ما ده بالذات الست طبعا هتعمل كده إمتا؟ لو هي نايمة طول النهار، أنت تروح عامل إيه؟ ما تنيمهاش بقى، وأنت في الشغل كل شوية اتصل: وحشتيني، تفضل إيه؟ ما تسيبهاش تنام، أما ترجع أنت تلاقيها نايمة بقى فتنام أنت خد راحتك.
فنشوف بقى إيه خديجة عملت إيه رضي الله عنها. أول حاجة النبي يجري على خديجة، ففي إيديكي تاني المفتاح: أن الراجل يجري عليك، ده في إيديك أنت، ما تجيش تشتكي تقولي ما بيرجعش، ما لو دخل بيقفل على نفسه الأوضة ومش عق على الموبايل على طول، قاعد مع أصحابه على طول، مش عا...
تقول عائشة رضي الله عنها: فدخل على خديجة بنت خويلد فقال: زملوني زملوني، فزملوه على طول. يبقى هنا دلوقتي الراجل محتاج إيه دلوقتي؟ لا الراجل في حالة لازم يُحتوى، ولازم يتعمله اللي هو عاوزه، زملوني زملوه. قال: فزملوه حتى ذهب عنه الروع، فقال لخديجة وأخبرها الخبر: لقد خشيت على نفسي. فقالت خديجة: كلا والله!
قبل ما نكمل، هنروح لرواية خارج الصحيح؛ خديجة عملت إيه؟ زملت. هنا في رواية الصحيح: فزملوه حتى ذهب عنه الروع، صح كده؟ وبعدين بنبتدي فقرة جديدة: إنه النبي عليه الصلاة والسلام قام وهيبتدي يتكلم مع خديجة. في الشوية دول خديجة ما قعدتش ساكتة، لكن ده خارج الصحيح. يا جماعة امرأة عجيبة، امرأة مرتبة حكيمة، هي واحدة فاهمة بتعمل إيه. عملت إيه بقى خديجة في الشوية دول؟ خدت بعضها وجريت على ورقة بن نوفل.
أولاً: أشمعنى ورقة؟ ما هو ده أول سؤال، ما أنت عندك ناس قريش مليانة ناس، هي خديجة فاهمة يعني عندها زي ما سميه إيه؟ عندها النتورك بتاعتها، وفاهمة تروح لمين إمتى. الحالة دي بتاعه ورقة، دي أول حاجة. تاني حاجة: ما ضيعتش وقت، هو جه ما قالش حاجة، النبي عليه الصلاة والسلام يا جماعه خلي بالكوا هو لغايه هنا النبي ما قالش حاجة لسه، نزل من حراء جري: زملوني زملوني، لقط لسه حتى ما فيش لقط، خشيت على نفسي. فزملوه؛ غطيته وجريت على ورقة تحكي له اللي حصل. برده ورقة لسه ما يعرفش حاجة، هما لسه بيبقى بيتكهنوا بس في ارهاصات؛ لما كان ميسرة معاه قبل ما تتجوزه، وبعدين الرؤيا تأتي مثل فلق الصبح، وبعدين في ارهاص تاني كان حصل برده ما قلناهوش؛ إنه كان بيخاطبه الحجر والشجر، يروح للخلاء عشان يقضي حاجته صلى الله عليه وسلم فيسلم عليه الحجر والشجر، وقطعاً كان بيرجع يحكي لمين؟ لخديجة. ولسه دي كلها ارهاصات، وخديجة كانت زي ما عرفنا بتروح تقول لورقة كل حاجة ويقول لها ده شكله هو. لما حصل معاه اللي حصل في السفر قبل ما تتجوزه وحكت لورقة قال لها شكل ده نبي الزمان.
تقوم خديجة تزم للنبي عليه الصلاة والسلام تطمن إنه مش محتاج مني حاجة دلوقتي، دوري دلوقتي مش هنا، أنا دوري دلوقتي عند ورقة أحكي له اللي حصل. راحت حكت لورقة، ورقة كان راجل كبير في السن، كان طاعناً في السن، ولذلك بعد كده هتاخد النبي ليه يعني ورقة في حالة النبي كده مش هو اللي جاله، لا خدت النبي ليه؟ النبي شاب أربعين سنة عليه الصلاة والسلام، ورقة كان راجل كبير في السن. فهي راحت لورقة مرتين؛ مرة لوحدها قالت له حصل كذا كذا ورجع وزملوني وخايف، فقال لها: إنه للناموس الذي أتى موسى. بس لسه برده مش عارفين إيه اللي حصل، التفاصيل ما نعرفهاش. ورجعت للنبي عليه الصلاة والسلام ونبدا بقى فصل جديد من حكمة خديجة.
قال: لقد خشيت على نفسي. الراجل خايف، هنا ده محتاج إيه دلوقتي؟ محتاج تطمين، تطمين بإيه؟ مش بالحب، مش بالعاطفة، لأن الراجل في الغالب يا نساء، في الغالب وده اللي أنتم مش قادرين تفهموه ولا الرجال قادرين يفهموه على النساء، المرأة بتستقي الأمان من العاطفة، ده مصدر الأمان ليها، يعني لو أنت عاوز تحسس المرأة بأمان قول لها كلام: أنا بحبك، أنا ما اقدرش استغنى عنك، ده الكلام اللي يحسسها بالأمان. تبقى جاية تحكي لك مشكلة مجعلصة، الراجل الأول نفهم نفسية الراجل، الراجل أمانه مش كده، أمان الراجل بالعقل، يعني يعني مثلاً المرأة ممكن تيجي مشكلة كبيرة بتحكيها، الراجل دماغه متركبة إزاي؟ إنه يدور لها على حل، وأن هو ده الأمان، يعني يعني الأمان إننا نحل المشكلة فحياتنا تبقى ماشية. المرأة مش كده، الطبيعي في المرأة مش كده، المرأة ممكن تحكي مشكلة كبيرة بس علشان تقول لها في النهاية كلمة تطمنها من ناحيتك: ده أنا بحبك، ده أنا معاكي، ده أنا... زي حديث أم زرع من فوائده؛ عائشة تقعد تحكي كلام كتير قوي، في الآخر النبي يقول أرضى بجمله واحدة: كنت لك كأبي زرع لأم زرع إلا أني لا أطلقك. ده جواب رجل يفهم نفسية المرأة.
الراجل بقى لما يدخل يحكي مشكلة فالمرأة تقول له إيه: ده أنا بحبك! إيه بتحبني أنا عامل إيه بحبك دلوقتي؟ أنا عندي مشكلة عاوز أحل ماشي! فالست تزعل وتقمص: بحاول احتویه وبحاول... أنت مش فاهمة هو يُحتوى إزاي، الرجل في المشكلة محتاج يسمع كلام يطمن عقله مش قلبه، يطمن عقله. فدي مهم نفهمها، خديجة فاهمة ده، خديجة امرأة حكيمة، قال لها: لقد خشيت على نفسي، قالت له: لا ما تخافش أنا جنبي يا حبيبي، أنا ما عملتش كده خديجة.
خديجة قالت بقى إيه اسمعوا بقى، قالت: كلا والله لا يخزيك الله أبداً. ابتدت تخاطب عقل دلوقتي مش قلب خالص، أنت اللي زيك ما يتخافش عليه، بالعقل مش بالقلب، ما بكلمكش: إيه ده أنا بحبك، ده أنا معاك ما تقلقش أنا جنبك، مش كده، ما قالتش كده خديجة. خديجة قالت لما قال: لقد خشيت على نفسي، قالت خديجة: كلا والله لا يخزيك الله أبداً، إنك لتصل الرحم، وتحمل الكل، وتكسب المعدوم، وتقري الضيف، وتعين على نوائب الحق. كلام مرتب، متحضر، متحضر ما فيش مفاجات خلاص، هو جه كمان شوية هيصحى هيبقى محتاج إيه مني؟ هيبقى محتاج يسمع إيه وهو بيحكي لي؟ هيبقى ماشي. قالت: كلا والله لا يخزيك الله أبداً، وابتدت تحكي حاجات أنت بتعمل كذا وكذا وكذا وكذا، يبتدي الراجل يطمن، دي أول حاجة.
تاني حاجة: هو مين قال لخديجة إن اللي بيعمل الحاجات دي لا يخزيه الله أبداً؟ يعني ما فيش إسلام لسه، لكن خديجة امرأة لها تجارب، يعني كأن العلماء قالوا إيه؟ قالوا بالاستقراء، امرأة شافت كتير في الدنيا، فهي عارفة اللي بيعمل الحاجات دي لا يخزى. قالت عائشة: فانطلقت به خديجة حتى أتت به ورقة بن نوفل. امرأة مترتبة كده دماغها مترتبة، زملته سابته خالص إلى أن ذهب عنه الروع، وابتدى هو اللي يحكي، ده برده من ذكاء المرأة؛ جوزك شايفه حاجة هماه، الضغط عليه إنه يحكي مش صح، ممكن ترمي له كلمة كده: لو حابب تحكي أنا حابب أسمعه، وسيبيه، حب يحكي حب، ما حبش سيبيه لغايه ما هو يحب يحكي.
وهو بيحكي، هو هيبقى محتاج إيه وهو بيحكي؟ وما بلاش تخلي العاطفة تغلبك، العاطفة دي مش لازم عاطفة حلو، ممكن العكس، يعني ممكن يبقى بيحكي لك مشكلة في الشغل فيقول لك: إتخانقت مع زميلي وللأسف أول مرة في حياتي حد يتطاول عليا بال مش عارف إيه، وكان هيحدفني مش عارف إيه لولا أن عبير تدخلت ومنعته! أنت سايبة كل الحكاية؟ عبير دي مين بقى إن شاء الله يا ستي؟ مش وقت عبير مين دي هو الراجل، أنت أنت عاوزه تسمعي المشكلة، فهو بيحكي المشكلة، شوفي أنت بقى وديتيه فين! تخليه يضرب نفسه ميت صرخة إنه حكى لك حاجة. فهو محتاج إيه؟ هو راجل المهموم وشايفاه دماغه فيها، هو فاضي بقى دلوقتي يحكي لك مين عبير؟ حاجات هامشية دي يعني مش... كاتبين يقول لك: إتصل بيها أنا عملت حادثة ومش عارف كسر في العمود الفقري وارتجاج مش عارف إيه، وبرده إيه اسمه اسم واحدة خدتني واديتني مستشفى، فهي برده سابت كل اللي حصل في الراجل وتقول له مين فلانة؟
طبعاً تغيري، ده حقك، أنما بنكلم على أبداء ده إمتى وإزاي؟ أنما تبدي بقى الغيره دي لا تكظميها، لأن مش وقته، يعني أنما مثلاً أن تسمعي اسم واحدة في نص... هتغيري، الغيرة المحمودة، طبعا المحمودة اللي هي إيه؟ اللي هي ما فيهاش مبالغة، ده حقك يعني ما حدش يقدر يقول لك ما تغريش ماشي، وأنت ركز في اللي بتحكيه يعني عادي ممكن نفوت. هتقول: لولا أن ربنا ستر وحد لحق الموضوع، يعني مش لازم... طيب، فانطلقت به خديجة حتى أتت به ورقة بن نوفل وكان امراً قد تنصر إلى آخر الآية إلى آخر الحديث.
فده موقف ينبئك عن عقل خديجة وعن حكمة خديجة، يبقى احنا لو عاوزين يا جماعة نلخص عشان كده نستقبل الأسئلة بقى، نلخص؛ خديجة القدوة، خديجة الحكمة، بس نسميها كده يعني اسم الدرس طلع دلوقتي وأنا... اه خديجة الحكمة، هي الحكمة امرأة عاقلة حكيمة تضع كل شيء في مكانه. رضي الله عن خديجة وجعل خديجة وغيرها من ممن كملنا من النساء قدوات لنسائنا في هذه الأزمان. قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك، لو في أسئلة ممكن تيجي دلوقتي النساء بعد ما أخلص الأسئلة خليكم في القاعات بتاعتكم دقيقتين كده، أنزل أنا الأول يعني ما حدش يخرج.
طيب سؤال؛ الناس بتزعل لما بعلق على الكلام اللي أنتم بتكتبوه، أنا ببقى بهزر، ببقى عاوز تهتموا باللغة والخط، وبقولها بهزار مش المقصود التنمر على الخط. فبرده عشان ناس بتقول أنت يعني تتريق على الناس، أنا ما بتريقش على الناس ولا حاجة، بس ببقى عاوز يعني أديكم رسائل غير مباشرة أن تهتموا بخطكم وتهتموا باللغة العربية. يعني أنا السنة دي كنت ثانوية بالسين كاتباها بالسين ثانوية عامة، طب أنا دلوقتي عامة من غير ألف، طب أنا أصدق إزاي أن دي ثانوية عامة؟ وطبعاً ده مثال لما جنيناه من التعليم ده، حاجة من اثنين؛ يا التعليم هي مثلاً حد إنترناشيونال وما بيعرفش عربي ودي مصيبة، أو تعليم عادي يعني حكومي عربي وما بتتعلمش، ودي برده مصيبة للأسف الشديد، يعني بناتنا وأولادنا ضحايا، ضحايا.
السؤال بقى يعني بتقول: كنت في اللجنة وحد بيغش فانا قلت للمراقبة بس هو برده ما حصلوش حاجه، أنا كده يعني خلاص نهيت عن المنكر؟ آه كده خلاص عملت اللي علي. حكم عمل المرأة في مجال تجارة الملابس للمحجبات؛ مش عارف أنت ساعات بتبقي السؤال له تصور وأنا عندي يعني أما أسمع ملابس محجبات يبقى عندي تصور للملابس ده وأجيب عليه وأقول مثلاً يجوز، وأنت عندك تصور تاني بينزل أنا ما أعرفوش، فتروحي أنت تعملي تقولي ده الشيخ قال يجوز، ماشي فانا مش هعرف أجاوب على السؤال.
ما هي مواصفات رائدة الأعمال اليوم في عصرنا الحالي؟ يعني ده سؤال في الإدارة، إدارة الأعمال، ولا ده سؤال في الدين؟ مواصفات رائد الأعمال تعرفيها من بتوع بتوع رواد الأعمال، طب ده بقى موافق للشرع ولا مش موافق؟ ده السؤال اللي يُسأل هنا، وده أنا جاوبته أثناء الدرس.
سؤال طويل؛ اللي فهمته من السؤال باباها متجوز واحدة تانية مش مصرية، وبيصفرها بلدها اللي هي برة مصر عشان تزور أهلها اللي هي الزوجه الثانية، ومعاها أولادها اللي هما أخواتها بس مش اشقاء، يعني ولاد المرأة التانية، فالبنت بتقول: احنا كمان نفسنا نسافر برة مصر يعني ده السؤال، فهو الراجل بيقول يعني: أنا بوديها بلد أبوها وأمها وبوديكم بلد أبو زوجته الأولى وأمها هما من الصعيد، فهو بيودي دي للصعيد عشان دي بلدها وبيودي دي لبلدها اللي هي ما أعرفش فين يعني. هو أنا شايفه كده ما بيعملش حاجة غلط يعني، هو بيصفر دي لامها وأبوها وبيصفركم أنت لجدكم وستكم، يعني مش قضية كبيرة يعني.
مفهوم الدياثة السؤال ده مهم جداً، يدخل فيه تبرج الزوجه أم فقط قبول الزنا على الأهل؟ الديوث في كلام الفقهاء من يقبل الفاحشة في أهله، ولذلك إطلاق يقول لك: يلاقي واحدة ماشية في الشارع مثلاً حاسرة عن راسها من بين شعرها أو متبرجة أو كده يقول لك ما اصل ده جوزها، ده غلط، هذا غلط، الديوث من يقبل الفاحشة على أهله، ده في اصطلاح الفقهاء ماشي. طبعا هذا مش معناه أنك تسيب زوجتك متبرجة، يعني مش ده المعنى، أنما لا يققال واحدة عاوزة تتعلم الحاسب باين ولا مش عارف إيه علوم الحاسب بنظام أكاديمي بغرض العلم وليس العمل، وهي مخلصة دار علوم ودراسات عليا بعدها الحمد لله. لو مخلصة دار علوم ودراسات عليا ما تنتقليش بقى لحاجة في الدنيا تاني خلاص، دار علوم هي لغة عربية ودراسات إسلامية وكمان واخدة فيها دراسات عليا كمان، فاهتمي بهذا الثغر ولو احتجتي في يوم من الأيام أنك تعملي به ما تضيعيش بقى حياتك في إيه؟ في أمور دنيا تانية ماشي.
واحدة أم لأربع أولاد بتقول: بعد محاولات كتيرة للإصلاح بيني وبين جوزي وظلم شديد ليا وعدم التوافق، توصلنا للانفصال بدون طلاق لتربية الأولاد ولا أستطيع تركهم. ده حل أفضل من الطلاق عشان قد يحدث الله بعد ذلك أمراً إلا في حالة أنك مش قادره تعيشي كده، يعني خايفه تفتني، محتاجه الرجل في حياتك، ما تبقيش على ذمة راجل وتروحي بقى لأقصى -طبعاً السائلة يعني أنا سؤال عام يعني- تبقي على ذمة راجل وتروح تكلم راجل تاني! ما تطلقي وروحي اتجوزي، أنما لو في ستات ماشي في دماغها المواضيع عادي، بتربي عيالها ومنكبة على عيالها وخلاص. بتقول: لا أستطيع تركهم وإن أخذتهم آه لن يصرف عليهم، وهو الراجل الظاهر هم منفصلين يعني في نفس البيت أو حاجة يعني، فهي لو طول ما هما في بيت واحد هو...
بيصرف على عياله، لو طلقنا وأخدتهم أنا مش هيصرف عليهم. وبعد سنوات الآن أخشى الفتنة، فما العمل؟ تدعي ربنا كتير إن ربنا يلهمك رشدك وصوابك، دي حاجة. الحاجة التانية؛ تشوفي حد يكلم الراجل وأنه يتقي الله عز وجل، دي حاجة. الحاجة التالتة؛ لو خشية الفتنة دي يعني أمر شديد، يبقى لا، يبقى لازم تلحقي نفسك عشان ما تعمليش حاجة غلط، ماشي.
طيب هي واحدة كاتبة يعني، فهل يجوز لي دور الدعوة؟ يعني الأسئله شوية، هل علي واجب شرعي تجاه أبناء زوجي إذا كنت مرأة أب؟ لا. واجب شرعي اللي هو انك تخدميهم وأنك يعني ده ما هواش واجب شرعي، هو يجيب لأولاده اللي يخدمهم.
كلمة لمرأة الأب والزوجة الثانية وتعامل الزوج معها. كلمة لمرأة الأب، يعني أنت البنت ولا أنت مين؟ والزوجة الثانية هي هي اللي مرأة الأب برضه مش فاهم، وتعامل الزوج معها؟ يبقى كلمة للزوج: اتقوا الله، يعني تقوى الله هي دي الكلمه الجامعة، مش عارف بقى إيه اللي أنتم عاوزينه تفاصيل.
واحدة صيدلانية بتقول: أنا مش بشتغل ومش حابة تنزل الشغل، وأريد القرار في البيت. كل اللي هي مش متجوزه ولا مخطوبة، لكن كل اللي حواليها معترض إن هي تقعد في البيت وأهله وأهلها ميسورين الحال. وأنا شايفة إني استثمر الوقت ده في العلم أفضل، ثم لزوجي. وأنا معاكي في قرارك، وبالذات شغل الصيدلة بيعرضك لسخافات كتير، فده برضه مش مناسب قوي. فانا معاكي في اللي أنت بتقوليه، ماشي، بس اشغلي وقتك بقى بحاجات مفيدة، ما تشغليش وقتك بالتليفون والحاجات دي بما إن العمر قصير.
فاني شغل الراجل عباده عشان بيصرف على أهله، هل شغل الست كمان يكون عبادة وتاخد عليه أجر رغم أنها مش ملزمة؟ مش ملزمة تاخد أجر ولا مش ملزمة إيه؟ هو الراجل بيشتغل عشان يجيب فلوس ويصرف على نفسه وعلى من يعول. الست هتشتغل وتاخد فلوس علشان حاجة من اثنين -ده غالب الناس يعني بتكلم على واحدة متجوزة طبعا مش مطلقة ولا كده- يا أما علشان تحوش لنفسها يعني يبقى ليها ذمتها المالية الخاصة، يا أما علشان توسع في الرفاهيات على بيتها، وفي الحالتين ما فيش أجر، في الحالتين بغض النظر بقى شغلك اللي بتنزليه أصلا فيه وزر أو ما فيهوش وزر، يعني يتشاف الشغل بعد كده ماشي. إنما الراجل راجل خلاص، لو مكفي بيته أكل وشرب والكسوة اللي هو يعني العيال مش لاقيين هدوم، قاعدين في البيت لأنهم مش لاقيين هدوم يلبسوها يعني، وفي مكان يلمكم أوضة بقى استوديو أوضة أي كان يعني زي ما يكون.
فغالب النساء غالب النساء بيشتغلوا ليه؟ عشان يقول لك بنحسن من مستوانا الاجتماعي، إن شاء الله ما تحسن مستواك الاجتماعي، أرضوا بما أنتم فيه. وبيوت أجدادنا احنا شفنا دخلناها وشوفناها يعني معظم الناس كده كان بيتواضع جدا، معظم الناس يعني مش ممكن يبقى واحد برضه جده كان ميسور الحال كده، لكن في سكينة وفي هدوء وفي تدين، سبحان الله تجد راحة نفسية كده عجيبة. فلا الراحة ولا السكينة ولا بيجوا بتحسين المستوى، وفي المقابل شفنا اللي عنده قصر واللي عنده فيلا واللي عنده مش عارف إيه ومش عارف يرتاح في بيته، وشوفنا كده يعني، وشوفنا اللي عنده بيت صغير وكاره حياته، وشوفنا اللي عنده قصر ومرتاح، يعني عشان برضه ما نقولش إني أقصد أقول ده مش سبب، بس ده اللي عاوز أقوله يعني، ماشي.
ففي حاجات تانية تعمل لنا ده، تعمل لنا الراحة وتعمل لنا السكينة وتعمل لنا الألفة وتعمل لنا حاجات كتير، غير إن احنا بنحسن مستوانا الاجتماعي، خلاص؟
نعمل ايه لو الزوج شكاك ودايما يغيره، صعبة معانا بنات وبخاف لما يتكلم ويزعق يفهموا فيها يا حاجة غلط، أتكلمت معاه كتير وبرضه نرجع لنفس النقطة. استعيني عليه بالله أولا، ثم بحد عاقل يكلمه بقى. حد عاقل يكلمه، هو رجل صالح والله، وأنا بحبه وبعمل كل اللي هو عاوزه، بس هو موضوع الشك والغيره دي اللي منكده عليا حياتي. يعني استعيني عليه بالله أولا، دي حاجة، وتاني حاجة استعيني عليه بحد عاقل له رأي وحكمة يكلمه، ماشي.
وفي الغالب بيكون النوع ده من الرجالة ممكن يبقى فيه يعني أسباب ورده، أسباب شخصية منه، يمكن أسباب منك. الأسباب الشخصية منه ممكن يا أما يكون هو كان متقفل عليه تقفيل شديد زيادة عن اللزوم، أو العكس يكون هو شاف بلاوي، عاش بلاوي فمرعوب من البلاوي اللي هو عاشها ففاكر إن كل واحدة بقى ممكن تقع في البلاوي اللي هو شافها وعاشها، فده يفضل معيشه دايما في ضغط نفسي شديد من أي تصرف. فدي بيبقى يعني لازم يبقى فيها علاج، علاج سلوكي معاه، ماشي.
يلا كفاية كده عليكم، قولوا: سبحانك اللهم وبحمدك، نشهد أن لا إله إلا أنت، نستغفرك ونتوب إليك.