الشيخ أمجد سميربسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد.
أما بعد: ففي الصحيح من حديث جابر بن عبد الله رضي الله عنه قال: كان رسول الله صلى الله عليه وسلم يعلمنا الاستخارة في الأمور كلها كما يعلمنا السورة من القرآن، يقول: «إذا هم أحدكم بالأمر فليركع ركعتين من غير الفريضة، ثم ليقل: اللهم إني أستخيرك بععلمك، واستقدرك بقدرتك، وأسألك من فضلك العظيم؛ فإنك تقدر ولا أقدر، وتعلم ولا أعلم، وأنت علام الغيوب. اللهم إن كنت تعلم أن هذا الأمر -ويسمي حاجته- خير لي في ديني ومعاشي وعاقبة أمري -أو قال: عاجل أمري وآجله- فاقدره لي ويسره لي ثم بارك لي فيه، وإن كنت تعلم أن هذا الأمر شر لي في ديني ومعاشي وعاقبة أمري -أو قال: عاجل أمري وآجله- فاصرفه عني واصرفني عنه، واقدر لي الخير حيث كان ثم أرضني به».
الحقيقة موضوع الاستخارة موضوع مهم، وفوجئت أنه كثير من الشباب يعني ما بيدي الاستخارة قدرها الذي هو قدر عظيم. وفوجئت برضه أن -طبعا هو أنا فوجئت بحاجات كتير- يعني في ناس ما بتستخيرش خالص، يعني عادي يروح يتجوز وما يستخيرش، ويدخل جامعة وما يستخيرش، و يعني حتى في الأمور العظيمة اللي بيترتب عليها تبعات خطيرة ما يفكرش يستخير! وفي ناس ما تستخيرش في الحاجات اللي هي شايفاها بسيطة، وده برضه غلط. صحيح هما يعني أفضل من الفئة الأولى في هذه النقطة يعني تحديدا، لكن برضه غلط، حتى الأمور الصغيرة أو الحقيرة يستخار فيها. ابن حجر لما جه يشرح هذا الحديث في الفتح قال: فرب حقير ترتب عليه عظيم، يبقى أنت شايف الموضوع موضوع بسيط يعني مش محتاج استخاره، فما تستخيرش تروح تعمله يحصل لك مصيبة مش من نفس الموضوع الحقير ده، من حاجة تانية خالص. حقير يا جماعه يعني يعني بسيط ها في اللغة، عشان مش حقير يعني بالمعنى الدارج عند المصريين يعني.
فالاستخارة خطيرة جدا. وشوفوا حديث جابر رضي الله عنه قال إن النبي عليه الصلاة والسلام كان يعلمهم الاستخارة في الأمور كلها كما يعلمهم السورة من القرآن. يعني إيه كما يعلمهم السورة من القرآن؟ مما قيل كما يعلمنا السورة من القرآن: يعني يعظم عندنا أمر الاستخارة كما يعظم عندنا أمر القرآن أمر السورة. يعني النبي عليه الصلاة والسلام لما يجي يعلم الصحابة السورة من القرآن، يعلمهم السورة بنوع تعظيم لأن ده قرآن أعظم شيء. فبيقول سيدنا جابر رضي الله عنه إنه كان يعلمنا الاستخارة كده، يعني يعظم عندنا قدر الاستخارة كما يعظم عندنا قدر القرآن إذا علمنا إياه. وأو يقال إنه يعلمنا الاستخارة كما يعلمنا السورة من القرآن، يعني بألفاظها. أنتوا عارفين سورة القرآن ما ينفعش تبدل حرف مكان حرف ولا كلمة مكان كلمة، فكان صلى الله عليه وسلم يعلم الصحابة الاستخارة على هذا النحو، يعني ما فيش أريحية في دعاء الاستخارة انك إيه تبدل حاجة مكان حاجة، لا، كما يعلمنا السورة من القرآن.
فعاوزين يا شباب نهتم بموضوع الاستخارة. والاستخارة تحمل معانٍ قبل ما ندخل في الحديث ونحاول بقى نثور الحديث ونشوف بعض المعاني اللي في الحديث -ولكن قبل ما ندخل وهنكتشف اللي أنا بقوله ده في تضاعيف الحديث إن شاء الله- الاستخارة تحمل معانٍ: المعنى الأول: انك بتعترف بين يدي ربك سبحانه وتعالى أنك جاهل، وأنك محتاج لهذه الاستخارة. ده أول معنى، وأنا مش عاوز أرح في المعاني لأن هتيجي بقى بالتفصيل إن شاء الله. وتاني حاجة: الاستخارة تحمل معنى تعظيم الرب سبحانه وتعالى، وأنك تعلم أنه سبحانه وتعالى أنه العليم سبحانه وتعالى، وأنه الخبير سبحانه وتعالى، وأنه الرحيم بك سبحانه وتعالى؛ كل ده في الاستخارة. أنت تعترف ضمناً بين يدي الله عز وجل أنه هو العليم الخبير، وأنه الرحمن الرحيم سبحانه وتعالى، وأنه القدير سبحانه وتعالى. ليه؟ ليه بتحمل المعاني دي؟ العليم والقدير هتيجي معانا إن شاء الله ونشرحها، إنما ليه تحمل معنى أنه الرحيم؟ هو أنت لما تيجي تستشير حد من البشر، لو كان هو أعلم واحد بمآلات الأمور وأكتر واحد يفهم في الحاجة اللي أنت عاوز تستشيره فيها دي، لكنه عدو ليك، هتروح تستشيره في حاجة؟ ده هيبيبقى عارف المصلحة ويقول لك عكسها، مش كده؟ لأنه ما بيحبكش، عدو ليك. فمعنى العلم هيجي معانا ومعنى القدرة هيجي معانا وأيه علاقته بالاستخارة، إنما معنى أن ربنا سبحانه وتعالى بك رحيم، ده أنت تقوله ضمناً، تعترف به ضمناً: يا رب، كوني جيت ولجأت إليك واستشرتك وانطلقت من أمرك، وانطلق من زي ما هيجي معانا بقى إيه العلامات اللي بيها يعني ننطلق في الأمر، ده معناه أنك بتقوله: يا رب، أنت رحمن رحيم بي، وتريد لي الخير سبحانك. فده كله في الاستخارة، إلى جانب بقى انك بتعترف ضمناً برضه بجهلك وبضعفك وباحتياجك وبعوزك.
وقل بقى عكس ده في اللي ما بيستخيرش. يعني الواحد مين فينا ما يسمعش أن في حاجة اسمها استخارة في الدين؟ أظن كل اللي قاعد سمع أن في حاجة اسمها استخارة، طب اللي ما بيستخيرش ده ما بيستخيرش ليه؟ معجب بعقلك يعني؟ مش شايف نفسك محتاج لربنا أنك تقوله: يا رب اختر لي؟ فانت معجب بعقلك ومعجب بتفكيرك ومعجب بتداركك للأممور، ومعجب كبر وعجب ورؤية نفس، وجهل بحقيقة تلك النفس، وجهل بمولاك سبحانه وتعالى، وإلا ليه ما بتستخيرش؟ تقول لي: لا، بستخير بس في الحاجات الكبيرة. طب والحاجات الصغيرة ما بتستخيرش فيها ليه؟ إذا كان الملك جل جلاله فتح لك هذا الباب. والله عجيبة جدا جدا! يعني لو تخيلنا ملك من ملوك الدنيا وكل حاجة تحت إيده تحت سيطرته، وبعدين قال لك: قبل ما تعمل أي حاجة تعالي استشرني، إيه اللي يخليك ما تقدرش تستشيره في الصغيرة والكبيرة؟ حاجة واحدة اللي ممكن تخليك تعمل كده: انك خايف تيه؟ تزهقه، مش كده؟ هروح له مرة والتانية والتالتة، بقى هيقول هو كل شوية يقرفني ويجي لي و... دي الحاجة الوحيدة العقلية، المعنى العقلي الوحيد اللي يخليك ما تروحلوش في كل حاجة. تخيل بقى وهو بيقول لك كده، بيقول لك: خلي بالك بقى، لو ما جيتليش أغضب، ولو جيت لي أفرح بك، فرحت أنت كبرت دماغك وما رحتلوش!
الله يغضب أن تركت سؤاله، مش كده؟ وبني آدم حين يسأل يغضبه. ربنا لو تركت سؤاله يغضب، ليه يغضب؟ عشان المعاني الوحشة اللي قلناها من شوية، معنى كده انك شايف نفسك وأنك مش محتاج له وأنك مستغني عنه. وبعدين ليه ربنا ما يغضبش لما يسأل كثيراً ويلح عليه؟ بل بالعكس يحب الإلحاح سبحانه وتعالى، لأن خزائنه ملأى لا تنفد. هو ليه البني آدم يغضب؟ لأن موارده محدودة؛ النهاردة هتعسأله هيديك، بكره هتعسأله هيديك، بعده هيفلس، موارده محدودة! ومن موارده نفسيته؛ يعني ممكن ما يبقاش سؤالك للمال لكن استشارة، فيقعد يركز معاك ذهنه في إنه يجد لك الطريق الأمثل ولا كذا ولا كذا فيتعب. طب ربنا يتعب؟ فلذلك سبحانه وتعالى لا يغضب من السؤال ولا من الإلحاح في السؤال، بل بالعكس يحب ذلك. ليه يحب ذلك؟ لأن في ضمنه اعترافك بضعفك، واعترافك بعوزك، واعترافك بأنك عبد وهو رب سبحانه وتعالى.
فلما يقول لك: تعالي استخير في كل صغير وكبير. طب جبت منين أن صغير وكبير دي هو كلام عاطفي كده؟ لا، سيدنا جابر اللي قال كده: كان يعلمنا الاستخارة ها في الأمور كلها. إيه الأمور كلها دي؟ كل حاجة في الأمور كلها. والعلماء لما لما استثنوا من المسألة دي قالوا: مش معنى كده أنه هيستخير في الحرام، يعني إيه؟ واحد هيستخير: يروح يقتل فلان ولا ما يقتلوش؟ لا، ما فيش استخارة في الحرام ولا في المكروه. وقالوا برضه: لا يستخير في الواجب ولا المستحب من حيث كونه مستحباً. يعني ما يعني إيه؟ هقوم أقيم الليل، طب أما استخير: أقيم الليل ولا ما أقيمش الليل؟ ما فيش كده، لا، هو ممكن نستخير في المستحب بس من حيثية أخرى، اللي هي إيه؟ اللي هو هطلع صدقة كبيرة شوية مثلاً، فيا ترى اللي سالني ده محتاج لفعلاً ولا ده أنا هنا بحطها في محل أنا كده كده هطلعها؟ فاستخير: هدي لفلان ده ولا ما أديلوش؟ آه، ممكن، يبقى أنا مش بستخير في المستحب لكونه مستحباً، لا، بستخير من حيثية أخرى: فلان ده هدي له المبلغ الضخم ده ولا لا؟ فاستخير في حاجة زي كده علشان ممكن ما أديلوش وأدي لواحد تاني، فده ممكن. إنما مش بستخير في المستحب لأن ده باب طاعة فلا يستخار فيه.
طب المباح بقى؟ قالوا: يستخار في كل شيء. في المباحات يستخار في كل شيء. برضه ممكن نستخير في أمر شرعي من حيثية أخرى، زي مثلاً أبدأ مثلاً الـ الموضوع ده في الحتة الفلانية دي ولا لا؟ لأن ممكن يبقى في تبعات للمسألة، مثلاً مثلاً فاستخير لكده، مش استخير إنه: أعمل الطاعة ولا ما أعملش الطاعة؟
طيب، فيبقى كان النبي عليه الصلاة والسلام يعلم الصحابة الاستخارة الاستخارة في الأمور كلها. فده أول درس نخرج بيه النهارده: أن حضرتك هتخرج من المسجد من أول النهارده تستخير في كل شيء، في كل شيء، وتلتز بالاستخارة. تلتز يعني إيه؟ تبقى وأنت بتستخير مستمتع انك بتعمل إيه؟ انك بترمي الحمل بتاعك ده على العليم القدير سبحانه وتعالى. أُشمعنى الاسمين دول؟ هم دول اللي جم في الاستخارة وهنتكلم عنهم إن شاء الله. أنت فاهم يعني إيه قصة الملك بتاع الدنيا ده من ملوك الدنيا، أنه فاتح لك بابه، وأنت وأنت عارف بقى إيه رحمته بيك ورافته، خليه أبوك مثلاً، أبوك مثلاً هو ملك الآيه ملك الملوك، ملك الـ يعني ملك الدنيا يعني مش مش ملك الغابة أي حاجة، فده أبوك، فطبعا بيحبك وبيرحمك وبيرأف بيك وبتاع، وبعدين يقول لك: يا ابني ما تاخدش خطوة غير لما ترجع لي، تعالي اسألني، أنا فاتح لك بابي وأنا إيه فاهم بقى كواليس الدولة كويس، وفاهم دهاليزها و وعندي القدرة أني أعمل أي حاجة في الدولة اللي تحت إيدي دي، فتعالي تعالي لي في أي وقت، تعالي لي. وكمان لما ما تروحلوش بيغضب ويزعق: وأنت ليه ما جيتش؟ أنا قلت لك تعالي لي أنا هحزعل لو ما... كده.
فيتبقى أنت مرتاح لما داخل على أبوك الملك ده أو الرئيس ده أو اللي ماسك حاجة كبيرة دي، تبقى مرتاح، رميت الآيه الكلكيعة بتاعتك عليه، وهو يفكر لك وايه؟ يقول لك: امشي في الطريق الفلاني وما تقلقش. تبقى مطمن انك ماشي في الطريق اللي اختاره أبوك اللي هو بالمنصب ده أو بالمكانة دي، ولله المثل الأعلى، ولله المثل الأعلى. يبقى في كل صغير وفي كل كبير استخير، ماشي.
قال: كان صلى الله عليه وسلم يعلمنا الاستخارة في الأمور كلها -احفظوا الكلمة دي- كما يعلمنا السورة من القرآن. يبقى الاستخارة شيء عظيم جداً. يقول: «إذا هم أحدكم بالأمر» هنا بقى كلمة هم دي مهمة جداً. واردات القلب ستة، قالها العلماء بالترتيب اللي هقوله ده: أولها الهم، يبقى أول حاجة الهم، ثم اللم، ثم الخترة، ثم النية، ثم الإرادة، ثم العزيمة. دي واردات القلب الستة بالترتيب ده، يبقى أول وارد الهم، ماشي، أو الهم، وهذا أضعف الواردات يعني يعني هم. ثم تكون لم، ولما دي جت في إيه؟ في حديث، مش كده؟ لمة الشيطان ولم. ثم تكون اللمة، ثم تكون الخترة، ثم تكون النية، ثم تكون الإرادة، ثم تكون العزيمة. دي أقوى وارد على القلب. فأضعف وارد على القلب هو وارد الآيه؟ الهم.
هنا سيدنا النبي عليه الصلاة والسلام قال جابر سيدنا جابر يقول: إذا هم أحدكم بأمر. هل المقصود إذا هم يعني اللي هو بس أول ما يجي كده إيه اللي هي الهم دي اللي هي أول الوارد على القلب؟ هل ده المقصود؟ بعض العلماء قال كده، قال: أيوه، أول ما يجي الوارد على قلبك تقوم تستخير أول حاجة. طب اللي ذهب لهذا المذهب من العلماء ليه ذهب إليه؟ قالوا: علشان حضرتك -ودي هتحل إشكال للشباب بالذات في مسألة التعلق بالبنت أو البنت تعلقها بالولد أو المسألة دي بالذات، وغيرها طبعا مسائل زي تعلق بوظيفة معينة أو كذا- قالوا: انك لو لو سبت نفسك لما بعد الهم، هيتعلق قلبك بهذا الأمر، ويبقى صعب عليك أنك إيه تسيبه، فأول ما تيجي كده الآية يجي الوارد على قلبك في حاجة معينة قوم على طول استخير. فقالوا إن سيدنا النبي عليه الصلاة والسلام يقصد ذلك: إذا هم أحدكم، يعني أول ما تيجي الهم دي اللي هي أضعف الواردات وأول الواردات على القلب، قوم على طول استخير في أي أمر بقى من أمور الدنيا، قوم استخير على طول، خلاص. ليه؟ علشان اللي قلناه ده، أن هو قلبك ما يتعلقش، ما يلحقش يتعلق، فلو في شر خلاص يصرف عنك وتصرف عنه خلاص من البداية كده.
وبعض العلماء قالوا: لا، يعني الهم هنا مش المقصود به الهم اللي هو هم أول الواردات. وجابوا رواية تانية عن ابن مسعود: إذا أراد أحدكم أمراً، والإرادة هي الآيه الوارد قبل الأخير قبل العزيمة على طول. طب دول قالوا كده ليه؟ قالوا: والله اصل احنا لو قلنا للواحد كل ما تجيلك يجيلك وارد على قلبك قوم استخير
هيبقى طول حياته بيستخير، ما احنا طول ما احنا ماشيين قلوبنا بتتمنى، مش كده؟ هيبقى طول حياتك بتستخير. إيه رأيكم ناخد بأنهي قول؟ والله يعني لو حاجة من الأمور اللي فعلاً القلب بيتعلق مع الوقت، لا، استخير في الأول، ما تتعبش قلبك وقلب غيرك. المسائل اللي بتكون بين الولاد والبنات -ما باتكلم عن حاجة حرام، ما باتكلم عن هتروح تصاحب وتعمل، لا خالص، بس بنت معينة في عيلتك ولا بنت معينة معاك في الجامعة، وحسيت إن في حاجة معينة ممكن تكون بينكم- في وقتها تستخير على طول.
ما تسيبش قلبك، أنا برضه ما باقولكش تسيب قلبك ده اللي هو تروح تتكلم، لا، ما بنفترضش الحرام فيكم يعني. إنما هيفضل قلبك مشغول، والشيطان يوسوس ويقول: تبقى هي مثلاً ماشية وبصت عادي كده، عادي يعني بتبص على شفت، أهو بتبص لك إزاي؟ هي كمان معجبه بيك. الشيطان مش هيسيبك. هي لو بصت لك ولا شايفاك أصلاً، أنت يعني عادي يعني. والعكس برضه في البنات وكده.
الح الحاجات اللي ممكن قلبك مع الوقت يتعلق بها تعلق ما تبقاش قادر تسيبها، وكل واحد عارف بقى فتنته فين؛ اللي فتنته في المال يبقى يعمل ده في الأول لو جاية له تجارة معينة، ولا اللي فتنته في المنصب أول ما يلاقي إيه وارد جاء على قلبه في منصب معين، يقوم يستخير على طول: أسعى له ولا ما أسعاهوش؟ ماشي.
في الأمور الكبيرة دي اللي هي بتشغل القلب، إنما الأمور البسيطة مش كل بقى وأنت ماشي جاء لك إيه خاطر: أروح أشتري مثلاً حاجة من البقالة اللي بره، طب استخير الأول قبل ما أشتري؟ هيبقى صعب بقى جداً كده أن إيه مع كل حاجه خلاص الحياة هتتعطل كده. خلاص، فمهم جداً ناخد بالنا من لفظة همّ هذه.
يبقى في الحاجات الكبيرة واللي لها يعني محبه في القلب وكده، ابتدي من الأول خالص استخير ربنا سبحانه وتعالى. ﴿إِذَا هَمَّ أَحَدُكُمْ بِالْأَمْرِ فَلْيَرْكَعْ رَكْعَتَيْنِ مِنْ غَيْرِ الْفَرِيضَةِ﴾ ودي عجيبة جداً بقى، دعاء الاستخاره كلماتُه واضحة، وتعلقُك بكونِك تستخير الله عز وجل واضح المعنى.
لكن الغريب أن هنا يا جماعة سيدنا النبي عليه الصلاة والسلام ما قالكش: إذا هممت بالأمر فقل كذا كذا كذا كذا. قالك لا، روح صلي. روح صلي. وبعدين ما خلاكش على أحد قولي العلماء، وهو الأظهر من اللفظ، ما خلاكش تدعي بالاستخاره في الصلاة. قالك: صلي وخلص صلاتك ثم ليقل. ثم تفيد التراخي، ولذلك كثير من العلماء قال إن دعاء الاستخاره ما يكونش في صلب الصلاة، لا، بعد ما تسلم تستخير، وبعض العلماء قال: لا، ممكن قبل السلام تستخير برضه، فيها خلاف بين العلماء.
على كل حال، سواء قبل السلام أو بعد السلام، كأننا احنا بس بنتكلم في التسليم، يعني الصلاة كلها خلصت ما عدا التسليم، فأنت انتهيت من صلاتك. طب ليه؟ ليه؟ قالوا يعني مما ذكر في هذا الموطن، أن أنت هتسأل ربنا سبحانه وتعالى خيري الدنيا والآخرة دلوقتي، فتريد أولاً أن تقرع الباب ليفتح لك، أن تقرع الباب أولاً عشان يفتح لك وبعدين تتكلم بقى. ولا يقرع باب الملك جل جلاله بأفضل من الصلاة. يبقى الصلاة، دول الركعتين اللي بتصليهم دول، أنت بتخبط على الباب ليفتح لك.
يبقى تستشعر المعنى ده هو أنا ليه ما استخرش وما أدعيش على طول؟ وبعدين ما هو أي دعاء تاني ما جاش إن في دعاء تاني يتصلى له صلاة، ماشي؟ فكان المعنى كده أنك إقرا بتقرع الباب بتلك الصلاة.
وفي معنى آخر يعني لم أجد من ذكره هنا لكنه موجود، أن النبي عليه الصلاة والسلام كان هديه أنه إذا حزبه أمر فزع إلى الصلاة. ومعنى أنك رايح تستخير ربنا سبحانه وتعالى أن هذا الأمر قد حزباك، همّك، شغلك. فيبقى أنت جمعت بين الخيرين: دعاء الاستخارة، وأنك فعلت السنة أنك فزعت.
يبقى يا جماعة، المعنى اللي أنا عاوز أقوله إيه؟ أن الركعتين دول ما تفوتهمش كده، مش اللي هو: أنا بصرخ تاني عشان الحق أقول الدعاء، لا، الركعتين نفسهم فيهم معنى؛ معنى أنك تفزع إلى الصلاة إذا حزباك أمر، فلما شغلك أمر ومش عارف تاخد القرار فيه، والمفروض تبقى مش عارف تاخد القرار فيها، عشان ما يجيش يقول: طب أنا عارف أخد القرار. لا، أنت ما أنتش عارف تاخد القرار عشان أنت جاهل، وما انتاش عارف عواقب الأمور.
هو أنا هأسألكم سؤال كده عشان بس تفهموا يا جماعة، احنا جرأة اللي فينا دي أنا ما أعرفش جايبينها منين؟ تخيلوا كده الخضر مع موسى عليهما السلام، وتخيلوا بتوع السفينة دول اللي خدوا الخضر بغير نوال، اللي هم عرفوه فأخذوه كده، الخضر كان مشهور في المنطقة دي وسيدنا موسى ما حدش يِعرفه، فعرفوا الخضر، خدوهم كده من غير نوال، الخضر راح مساهيهم ونزل وايه، اقتلع لوحاً من السفينة.
تخيلوا المشهد ده أنه يعني إيه في حاجة اتغيرت كده أن هو بيعمل الحركة دي، واحد من أهل السفينة شافه، كان هيعمل إيه؟ هيمنعه، مش كده؟ والحقوه، وشفتوا اللي خدناه من غير نوال دي جزاتنا أن احنا عملنا فيك ومش عارف إيه، وهيكتفوه ويطلعوه، مش كده؟ وساعتها اللي شافوه ده هيبقى معجب برأيه ولا لا؟ هيبقى معجب، ده أنا شفت ال... ده الولا كان... احمدوا ربنا كان زمان السفينة غرقت.
والمسكين ما يعرفش أن بعد شوية السفينة كلها هتتاخد منهم. هو معجب برأيه ليه؟ لأنه جاهل. جاهل! فمعجب برأيه عشان كده، عشان جاهل. ما يعرفش أن البنت اللي حارب عليها الدنيا كلها دي هتبقى سبب شقائها في الدنيا وفي الآخرة. وهي ما تعرفش أن الولد اللي حاربت أبوها وعقت أمها عشان خاطره هتبقى سبب شقائها في الدنيا وفي الآخرة. ما يعرفش، جاهل. وفأكر أنه إيه، انتصر ومعجب بنفسه، واتجوزت في الآخر اللي مش عارف إيه. ما يعرفش أن الشغلانة دي هتبقى سبب دخوله النار، وأنه يختلس بعد شوية أو يرتشي بعد شوية أو يغتني منها والغنى ده هيخليه يسيب الصلاة، وهيبعد عن طريق ربنا. ﴿كَلَّا إِنَّ الْإِنْسَانَ لَيَطْغَى * أَنْ رَآهُ اسْتَغْنَى﴾ [العلق: 6-7]. جاهل.
ولا الغلام لما الخضر خد الغلام وأيه، قتله وقتله وقتله، قتله يعني صعبة جداً. تخيلوا المشهد برضه اتغير في حاجة كده، أن الاب والام لقطوا الخضر وهو واخد الغلام يقتله. أنتتو عارفين يا جماعة الغلام ده معنى الآيات إيه؟ ﴿فَخَشِينَا أَنْ يُرْهِقَهُمَا طُغْيَانًا وَكُفْرًا﴾ [الكهف: 80]. عارفين معناها إيه دي؟ الغلام ده لو كان كبر كان هيكفر بالله، بس لا، كان هيحمل والديه على الكفر. والداه مؤمنان. الغلام ده لو كان كبر كان هيحمل والديه على الكفر، كان الوالدين هيكفروا ويخلدوا في النار.
طب تخيلوا المشهد أن الاب وهو معدي لقى ابنه واحد ماسكه والواد عمال يرفص وراح رايح فكه منه، الاب هيبقى إيه ساعتها؟ معجب برأيه ومعجب باللي عمله، مش كده؟ وأنا لحقت ابني! والمسكين جاهل. جاهل دي مش كلمة وحشة، كلنا جاهلين، كلنا. ده لا ده أنا بقول كده، مش أنا اللي بقول، ده ربنا اللي بيقول: ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾ [البقرة: 216]. أنت برضه بتعلموا شوية؟ ربنا قال كده، قال: ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾.
فعشان كده بقول لك المفروض تبقى كده، تبقى مش عارف تاخد قرار غير باستخارة. ماشي، أما يجي واحد يقول لك إيه: ما شاء الله ده أنت في اتخاذ القرارات ما فيش بعد كده، ده أنت... مش كده ولا فرحوك بال... قول يا ابني احنا مستورين. احنا مستورين يا ابني والله، ده توفيق ربنا سبحانه وتعالى. ما هو تبقى زي قارون: ﴿إِنَّمَا أُوتِيتُهُ عَلَى عِلْمٍ عِنْدِي﴾ [القصص: 78].
طيب يلا نرجع تاني، فقال: فليَرْكَعْ رَكْعَتَيْنِ، يبقى وأنت بتركع الركعتين أنت بدأت الصلاة، مش ديباجة، اللي هو إيه: اخطف ركعتين بسرعة عشان الحق أدعي. الركعتان عند الله أعظم من الدعاء، الصلاة خير موضوع. فالركعتين دول مش أي كلام كده، يعني مش... مش إيه: أصل هو أنا لازم أصلي؟ وعارف لو ما كنش لازم ما كنتش هصلي وأدعي بسرعة، مش عارف ليه في صلاة؟ ما مش عارف ليه في صلاة، عشان كان صلى الله عليه وسلم إذا حزبه أمر فزع إلى الصلاة، عشان لازم تقرع باب الملك سبحانه وتعالى فيفتح لك، ثم تدعوه تسأله.
فمن أول تحريم التحريمة، وبرضه في معنى تاني والله أعلم يعني خطر لي، أن الصلاة يعني إيه؟ يعني هتتوضأ، مش كده؟ ويعني هتبقى وأنت بتدعي مستقبل القبلة، ما أنت هتسلم: السلام عليكم ورحمة الله، السلام عليكم ورحمة الله، تروح رافع إيديك ومش كده؟ وهتبقى قدمت بين يدي الدعاء عملاً صالحاً، بغض النظر أنه صلاة دلوقتي، قدمت بين يدي دعائك عملاً صالحاً، كل دي من شروط الإجابة الدعاء، مش كده؟
فكانك كل ده عملته قبل ما تدعي أصلاً، كنت متطهر ومستقبل القبلة وقدمت عملاً صالحاً بين يديه استخارتك، فحري أن توفق، ماشي؟
طيب: ﴿فَلْيَرْكَعْ رَكْعَتَيْنِ مِنْ غَيْرِ الْفَرِيضَةِ ثُمَّ لِيَقُلْ: اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ﴾. هنا بقى دعاء الاستخارة يا شباب، نلمح فيه العلم والقدر، نلمح فيه العلم والقدر. ﴿اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ﴾، قبل ما ندخل على ألفاظ الحديث: العلم والقدر. أنتم عارفين طبعا، أنتم شطار في العقيدة: أسماء الله كلها إيه؟ حسنى، مش كده؟ ويعني إيه حسنى؟ بالغة في الحسن الغاية.
فأنا بنقول من أسماء الله عز وجل العليم، فهو بالغ في العلم الغاية جل جلاله. ومن أسماءه القدير، فهو بالغ في القدرة الغاية سبحانه وتعالى. كلنا عارفين ده صح كده؟ في بقى معنى زيادة شوية، أن اقتران الأسماء يزيدها حسناً إلى حسنها. يعني إيه؟ يعني لما تيجي بقى تلاقي اسمين من أسماء ربنا، ربنا قرن بينهما في القرآن، هذا الاقتران ليس عبثاً حاشاه جل جلاله. يعني إشمعنا الاسمين دول يقترنوا في الموطن ده؟ يبقى في معاني عاوزين نفهمها، فاهمين؟ زي العليم الحكيم، مثلاً، زي أي بقى أسامي.
فهنلاقي أن العليم والقدير اقترنوا في القرآن ولا لا؟ اقترنوا في أربع مواطن في القرآن. في أربع مواطن في القرآن قرن الله عز وجل بين العلم والقدرة، ماشي؟ فنقولهم، قال سبحانه وتعالى: ﴿وَاللَّهُ خَلَقَكُمْ ثُمَّ يَتَوَفَّاكُمْ وَمِنْكُمْ مَنْ يُرَدُّ إِلَى أَرْذَلِ الْعُمُرِ لِكَيْ لَا يَعْلَمَ بَعْدَ عِلْمٍ شَيْئًا إِنَّ اللَّهَ عَلِيمٌ قَدِيرٌ﴾ [النحل: 70]. الموطن الثاني: ﴿اللَّهُ الَّذِي خَلَقَكُمْ مِنْ ضَعْفٍ ثُمَّ جَعَلَ مِنْ بَعْدِ ضَعْفٍ قُوَّةً ثُمَّ جَعَلَ مِنْ بَعْدِ قُوَّةٍ ضَعْفًا وَشَيْبَةً يَخْلُقُ مَا يَشَاءُ وَهُوَ الْعَلِيمُ الْقَدِيرُ﴾ [الروم: 54]. الموطن الثالث: ﴿أَوَلَمْ يَسِيرُوا فِي الْأَرْضِ فَيَنْظُرُوا كَيْفَ كَانَ عَاقِبَةُ الَّذِينَ مِنْ قَبْلِهِمْ وَكَانُوا أَشَدَّ مِنْهُمْ قُوَّةً وَمَا كَانَ اللَّهُ لِيُعْجِزَهُ مِنْ شَيْءٍ فِي السَّمَاوَاتِ وَلَا في الْأَرْضِ إِنَّهُ كَانَ عَلِيمًا قَدِيرًا﴾ [فاطر: 44]. الموطن الرابع: ﴿لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ * أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ﴾ [الشورى: 49-50].
دول الأربع مواطن اللي اقترن العلم فيها بالقدرة. طيب، احنا قلنا العليم يعني بالغ في حسن العلم الغاية، وكذلك القدير بالغ في حسن القدرة الغاية؛ لأنه من الأسماء الحسنى. طب إذا اقترن العلم بالقدرة يفيد إيه؟ يفيدنا إيه أن العلم يقترن بالقدرة؟
أنتو عارفين، دلوقتي أنت لما تيجي تستشير حد أو تلجأ إلى حد أو تفوض أمرك لحد، فالحد ده هو أخبر الناس وأعلم الناس وأعرف الناس بالامر اللي أنت رايح تستشيره في ده. بلاش كلمة تستشير خلينا، لأن هو معنى الاستخارة فيها معنى زائد، احنا بنقول: البشر يستشار، والله يستخار؛ لأن معنى الاستخارة فيها معنى زائد، أنت مش بس بتستشير، أنت بتستشير وبتفوض الأمر إليه أصلاً. وده معنى الاستخارة، مش فيها إيه يا رب بس عرفني وأنا هتعامل، الاستخارة مش كده، مش كده.
أنت هتطلب حاجات من ربنا غير بس أنه يعرفك الخير فين، المستشار في الدنيا آخره أنه يعرفك الخير فين، يعني يقول لك: ده أنا شايف ده المصلحة، روح أنت بقى تعامل. لكن أنت مع ربنا ما ما طلبتش ده في الاستخارة، هتقول إيه: وعاقبة أمري فاقدره لي ويسره لي ثم بارك لي فيه. أنت طالب حاجات زيادة من ربنا، مش بس عرفني يا رب، لا، أنت طالب حاجات زيادة، فأنت قد فوضت الأمر كله لله عز وجل.
طيب، فانت لو رايح بقى لواحد تفوض إليه الأمر، تعمل له توكيل من الآخر، خلاص، بتعمل له توكيل وأنا ما أعرفش حاجة فانت تعامل. تخيل هذا الرجل هو أنسب الناس وأعلا الناس وأشطر الناس وكل حاجة، لكن ما ما ما عندوش قدرة أنه يعمل حاجة، هو يعني هو فاهم كويس جداً أنك المفروض مثلاً مثلاً أنك إيه تخلص المصلحة الفلانية، وأنك لما تخلصها من الجهة الفلانية ده أحسن لك، وأنت ما كنتش عارف ده أحسن لي ولا مش أحسن لي، فهو لا عرف أن ده أحسن لك، وأنت وكلته بقى قلت له إيه: فوضتك أنت اعمل اللي شايفه، فهو اللي شايفه أنك لازم تخلص المصلحة بتاعتك من الجهة الفلانية، لكنه ما يعرفش يدخل الجهة الفلانية ولا له واسطة في الجهة الفلانية ولا يعرف يعمل لك حاجة، استفدت أنت منه إيه؟ ولا حاجة، يعني في الآخر الأمر ما تمش؛ ليه؟ لأنه مع علمه لا قدرة له، صح.
مع علمه هو، مع لا قدرة له. فالأمر في الآخر ما تمش على وجهه، لما فوضت إليه الأمر لم يتم الأمر، مع إنه شاطر وعنده العلم وعنده الخبرة، لكن ما عندوش القدرة. يعني ندي مثال نقرّبه زيادة شوية؛ إنك رحت لواحد كان وكيل وزارة في مصلحة معينة، لكنه طلع معاش، في المصلحة دي هو معاش بقى له خمس ست عشر سنين.
كان وكيل وزارة بقى؛ يعني كان يدخل يضرب له تعظيم سلام، وحاجة فخمة جداً. فرحت قلت له: بقول لك إية أنا والله ما أنا عارف الخير فين، أنا دلوقتي بفكر أقدم في المصلحة الفلانية، وبيقولوا إية الدنيا فيها كويسة والمرتبات كويسة وهتتظبط بعد كده فانا مش عارف الموضوع فانا مفوضك تعمل ال... وهو يا عيني الراجل فاكر إنه لسه له الشنة والرنة بتاعت زمان، فقال لك: لا إزää ده فعلاً دي المصلحة، سيبني أنا هخلص لك الموضوع.
وراح، لا، كل الناس اتغيرت هناك، العامل اللي على الباب مش هو اللي يعرفه، فيقول له يا عم الحاج ما تتكل على الله، يا ابني ده أنا كنت وكيل وزارة ومش عارف إيه. طب يا عم خلاص يعني أعمل لك إية اتكل على الله ممنوع تدخل، ده من على الباب، مش دخل بقى ولا... فابتدى طب يحاول يستخدم بقى الوسايط؛ طب هو فلان موجود؟ يقول له: أنا ما أعرفش مين فلان وما عندناش حد بالاسم ده، طب علان موجود؟ ولا ده ما أعرفش حد. أنت استفدت إيه أنت منه بقى؟ مع إنه خبرة، ده راجل وكيل وزارة كان في المصلحة دي يعني خبرة عالية جداً، ما استفدتش حاجة وما عمل لكش حاجة. ليه؟ لانعدام القدرة، ما عندوش قدرة.
وواحد تاني عنده القدرة بس غشيم يعني، هيلبسك في حيطة، يعني هو إيه العكس بقى؟ عنده الوسايط وعنده الفلوس وعنده مش عارف إيه بس ما عندوش عقل ولا عنده حكمة ولا عنده علم ولا... فانت قلت له: فوضت لك أمري، يقول لك: بس كده من عيني الاتنين! يقوم يلبسك في الحيط، بكره الصبح تلاقي نفسك متعين، وبعدين تكتشف التعيين ده كان أسوأ قرار اتخذ في حياتك، وهو فاكر كده إنه إيه ظبطك. طب ما ده قدير أهو، أو عفواً عنده القدرة يعني بس ما عنده علم.
فانت عشان تفوض أمرك لحد وتبقى مطمن من النتيجة، أنت محتاج إنه يبقى إيه؟ عليم قدير. وبعدين علم الله عز وجل لم يسبق بجهل، وده من معنى أن أسماء ربنا حسنى بالغة في الحسن الغاية. فآفة العلم إيه؟ حاجتين؛ شيء سابق وشيء لاحق؛ إنه يبقى قبليها في جهل أو بعديها في نسيان، مش كده؟ صح ولا إيه؟ فعلم الله عز وجل لم يسبق بجهل ولا يلحقه نسيان، وقل مثل ذلك في قدرته سبحانه وتعالى؛ أن قدرته لم تسبق بضعف ولا يلحقها ضعف وخور، مش كده؟
ولذلك شوف بقى العجيب في الاقتران في الآيات؛ أول آية إيه؟ ﴿وَاَللَّهُ خَلَقَكُمْ ثُمَّ يَتَوَفَّاكُمْ وَمِنْكُمْ مَنْ يُرَدُّ إِلَى أَرْذَلِ الْعُمُرِ لِكَيْ لَا يَعْلَمَ بَعْدَ عِلْمٍ شَيْئًا﴾ [النحل: 70]. هنا آفة العلم لحقته أهي، بعد ما كان شاطر وعالم وبتاع يجي له زهايمر، الذاكرة تضعف. هنا في مسألة العلم وتختم الآية بالعليم القدير.
الآية التانية في مسألة القدرة، يعني الآية دي في مسألة العلم أهو ﴿لِكَيْ لَا يَعْلَمَ بَعْدَ عِلْمٍ شَيْئًا﴾ علم ربنا مش كده، علم ربنا علم كامل وتام ولا يلحق بنسيان. الآية التانية: ﴿اللَّهُ الَّذِي خَلَقَكُمْ مِنْ ضَعْفٍ ثُمَّ جَعَلَ مِنْ بَعْدِ ضَعْفٍ قُوَّةً ثُمَّ جَعَلَ مِنْ بَعْدِ قُوَّةٍ ضَعْفًا وَشَيْبَةً يَخْلُقُ مَا يَشَاءُ وَهُوَ الْعَلِيمُ الْقَدِيرُ﴾ [الروم: 54] دي فين؟ في القدر. كنت طفل صغير ما عندكش قدرة وبقيت شاب رجليك شالتك، أقوى ما تكون في مرحلة عمرك يعني، وبعدين تعجز وتضعف، فدي توضح لك مسألة القدرة الكاملة لله عز وجل، ربنا مش كده، هو القدير أزلاً أبداً سبحانه وتعالى، مش كده؟
والآية التالتة في أكتر حاجة، أو في حاجة من أكتر الحاجات -مش لازم تكون هي الأكثر لكن من أكتر الحاجات اللي بتعمل مشاكل عند الناس- مسألة الإنجاب، مسألة الإنجاب. واحد عقيم أو امرأة عقيم يبقوا إيه؟ هيَموتوا ويجيبوا حتة عيل، وتلاقي واحد جاب بنت هيَموت ويجيب ولد، وتلاقي اللي جاب ولد هيَموت ويجيب بنت، مش كده؟
فتلاقي الآية التالتة اللي فيها اسم العليم القدير آية مخصوصة بالموضوع ده، قال سبحانه وتعالى: ﴿لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ * أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ﴾ [الشورى: 49-50]. تقوم أنت تطمن وتفرح. عقيم وما جالكش عيل وكبرت وما جالكش عيل، تقول: الذي قضى عليّ ذلك العليم القدير؛ هو قدير إنه يجيب بدل العيل عشرة. طب ليه ما جابليش؟ ما هو عليم. ولا يعجزه يعني إنك يجيلك عيل؟ ما يعجزوش ولا حاجة.
المسألة دي بالذات ربنا يعني وضح فيها توضيح ما فيش بعده توضيح، مش كده؟ إزاي؟ جاب لك العيل من العجوز العقيم، وقال لك في القرآن الكلام ده. وجاب لك العيل من أم بلا أب، وجاب لك في القرآن الكلام ده. وجاب لك المخلوق يعني أو البشر لا بأم ولا بأب، آدم عليه السلام مش كده؟ وجاب لك البشر من ذكر بس مش أب بقى دون أنثى وخلق منها زوجها من ضلع، مش كده؟ وجاب لك ده في... يعني المسألة بتاعة إيجاد الخلق دي وضحها توضيح ما فيش بعد كده.
فأنت بقى عقيم مراتك عقيم، أنت عجوز مراتك عجوز، أنت شيخ مراتك عجوز، ما فيش حاجة تعجزه، ليه؟ أصله قدير. الله! طب ليه ما خلفتش؟ أصله عليم. عشان كده عليم قدير، فما تزعلش. طب جالك الولد وما جاتلكش البنت؟ هو عليم فوض الأمر له. جاتلك البنت وما جالكش الولد؟ هو عليم فوض الأمر له. رزقي على قدي وجبت توأم راسين في البطن؟ هو عليم فوض الأمر له، عليم سبحانه وتعالى.
فدي الآية التالتة. والآية الرابعة لها تعلق بمن؟ بالعكس بقى، اللي هم شايفين نفسهم بقى في القوة والبطش والجبروت وكذا وكذا. فيقول الله عز وجل: ﴿أَوَلَمْ يَسِيرُوا فِي الْأَرْضِ فَيَنْظُرُوا كَيْفَ كَانَ عَاقِبَةُ الَّذِينَ مِنْ قَبْلِهِمْ وَكَانُوا أَشَدَّ مِنْهُمْ قُوَّةً وَمَا كَانَ اللَّهُ لِيُعْجِزَهُ مِنْ شَيْءٍ فِي السَّمَاوَاتِ وَلَا فِي الْأَرْضِ﴾ [فاطر: 44] ليه؟ أصله قدير. طب طالما قدير ما خدناش ليه؟ أصله عليم. أمتى بقى ياخدكم؟ دي في حكمته، ما هو العليم ده يبقى حكيم، ها؟ ده بحكمته سبحانه وتعالى؛ أمتى ياخدكم؟ أمتى يسيبكم؟ أمتى؟
سيدنا النبي عليه الصلاة والسلام في غزوة أحد يزعل قوي سيدنا النبي عليه الصلاة والسلام، شج رأسه الشريف وكسر رباعيته حاجة وبعدين قال: «كيف يفلح قوم أدموا أو شجوا وجه نبيهم» أو كما قال صلى الله عليه وسلم. فربنا يقول إية؟ ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾ [آل عمران: 128]. الآية دي صعبة جداً؛ ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾. ما هو ممكن واحد يقول إية؟ يعني اللي كان... لو كان الجيش اللي كسب، الكفار هم اللي كسبوا المسلمين في أحد وهم ماشيين كده تنزل عليهم صاعقة من السماء تاخدكم كلكم.
طب هو ربنا قدير ولا لا يا جماعة؟ بس عليم. مين قائد الجيش في أحد؟ قائد جيش الكفار؟ حصل له إيه؟ قتل. مين صاحب النصر؟ خالد بن الوليد حصل له إيه؟ أسلم مش كده؟ من قاتل حمزة؟ ها حصل له إيه؟ أسلم. ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾ قدير، قدير وهم ماشيين الجيش كله يخسف به، وأخبر النبي صلى الله عليه وسلم بنحو من ذلك الجيش في الأرض عادي جداً يعني. قدير، طب ليه ما عملش كده؟ عليم، عليم خالد هيبقى سيف من سيوف الله، فهو لا يعجل بعجلة أحدنا.
فهمتوا بقى عليم وقدير دي؟ نرجع بقى إحنا، ده كله بره دعاء الاستخاره بس عشان نفهم وأنت رايح تستخير بتستخير بنفسية من يلقي الأمر بين يدي العليم القدير، ليه؟ عشان ترتاح. الحاجه ما جاتش ترضى، وفي الآخر «رضّني» أو «أرضِني» في روايتين يعني به، ترضى، يستكين قلبك لقدر الله وقضائه وهنجيلها بقى في الآخر.
اللهم إني أستخيرك بعلمك؛ يعني يا رب أطلب الخيرة في أمري بعلمك. الباء دي يعني إية بعلمك؟ إما تكون الباء دي باء التعليل، ماشي، وباء التعليل يعني إية؟ اللهم إني أسألك الخير لأنك عليم، أسألك الخير لأنك عليم يبقى دي باء التعليل. أو الباء دي تبقى للاستعانه؛ أسألك الخير مستعيناً بعلمك يا رب. يبقى اللهم إني أستخيرك بعلمك، وتلذذ وافهم معنى كلمة بعلمك وأنت بتقولها دي عشان في الآخر نوصل لمسألة الرضا يا شباب، نوصل لمسألة الرضا.
خليني أقول لكم دلوقتي يعني نبذة كده عن موضوع الرضا ده، وهو يجي في الآخر: ثم أرضِني بها، ثم رضّني به. دايماً أقول للشباب كده، أقول لهم في... إحنا نعرف... طبعا إنك ترضى بالحاجة اللي أنت عاوزها وحاببها ما فيهوش إشكال، ما أنت هترضى، يعني هو المشكلة بتيجي بتجيلك إمتى؟ لو حصل اللي عكس هواك. فدايماً العلماء يتكلموا عن مقامين؛ مقام الصبر والرضا، ويقولوا: أنهي مقام أعلى؟ الصبر ولا الرضا؟ صحصحوا يا شباب في إية؟ الرضا أعلى.
مقام الرضا أعلى؛ إن حاجة خلاف هواك، خلاف شهوتك، خلاف عقلك، وترضى، ده أعلى من إنك إية تصبر. تصبر ده يعني أنت جواك وجع وبتصبر. لكن كتير من الشباب ما يبقاش فاهم قوي يعني إية أرضى؟ يعني إزاي أبقى فاهم إن أنا راضي؟ فدايماً أقول للشباب بقى إية؟ أقول لهم يعني حاجة تقول لك إنك راضي؛ معنى الرضا إن لو تخيلنا إن متاح لينا إن إحنا في آلة زمن مثلاً دلوقتي وإية ممكن تركبها ونرجعك عشر سنين لورا، وبعدين اديتك اللوح المحفوظ والقلم وقلت لك: اكتب اللي أنت عايزه العشر سنين اللي جايين، فتلاقي نفسك بتكتب إية؟ اللي حصل.
تلاقي نفسك بتكتب إن ما تتجوزش فلانة، وتكتب إن الصفرة الفلانية تخسر، وتكتب إن يفوتني القطر اليوم الفلاني، وتكتب إن الحادثة بتاعت العربية تحصل في اليوم الفلاني، وتكتب إني أصاب بالسرطان، وتكتب إن أبويا يموت في حادثة وهو بيعدي الطريق، تكتب اللي حصل. ليه؟ لان اللي حصل اختياره مين؟ اختيار الله، واللي كان نفسك يحصل اختياره مين؟ اختياره عقلك. فانت أبداً لا تقدم اختيار عقلك على اختيار ربك، ليه؟ في جملة: ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾ [البقرة: 216] أنت ما تعرفش حاجة.
قلت لكم إن القصة اللي الواد اللي مش مؤدب نزلها على الفيسبوك موجود هو ولا ولا نغتابه براحتنا؟ بيقولوا ال... يعني قصة رمزية بيحكوها عشان تفهموا المعنى ده، معنى اختيار ربنا ليك وما تقدمش اقتراح عقلك. أوعى تقدم اقتراح عقلك على اختيار ربك سبحانه وتعالى. وربنا يا جماعة لما قال: ﴿وَاللَّهُ يَعْلَمُ وَأَنْتُمْ لَا تَعْلَمُونَ﴾ قبل القصة... والله يعلم وأنتم لا تعلمون قالها إمتى؟ بعد آية بتقول إية؟ ﴿كُتِبَ عَلَيْكُمُ... وَهُوَ كُرْهٌ لَكُمْ وَعَسَى﴾ أحفظوا بقى الجملتين دول: ﴿وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ﴾ [البقرة: 216].
اللي حصل لك هو أحسن تقدير في الوقت ده، ليه؟ لأنه تقدير الرب، والله حكيم. أنت عارف يا جماعة معنى ال... لو قلت لك ارجع عشر سنين وخد اللوح المحفوظ والقلم واكتب، فكتبت حاجة تانية، وفاكر حضرتك إن بكتابتك للحاجة التانية دي إن ده الأحسن، عارف ده معناه إيه؟ إنك تبقي ربنا بقى! خد الكون سيره أنت، ما هو ده معناها، خد أنت الكون سيره، دبر أنت أمر الكون بقى، ما هو طالما في تدبير كان أحسن من تدبير الله، خلاص يبقى أنت الإله مش هو، والله يعلم وأنتم لا تعلمون.
فالقصة الرمزية بيحكوا إن إيه؟ في حكيم صيني، وبعدين، الحكيم ده كان عنده مجموعة كده من الحصان، وفي حصان كده بيحبه قوي يعني مميز يعني. ففي مرة الحصان غفلهم وطلع من السور بتاع القلعة اللي قاعدين فيها وهرب في الصحراء. فالناس جت تواسي هذا الحكيم: معلش والحصان يعني ضاع منك وأحسن حصان عندك وبتاع. قال لهم: ما حد... يعني أنتم جايين تواسوني ليه؟ يعني هو ده شر ما نعرفش، اصبروا لما نشوف إيه اللي هيحصل.
يوم اتنين تلاتة لقوا الحصان راجع ومعاه قطيع من الأحصنة البرية اللي بتبقى في الصحراء، يعني تصاحب عليهم ولا بتاع، فراح بيهم، فبدل ما هو خارج حصان رجع عشرين حصان. فالناس حست قد إية الحكيم ده حكيم يعني ده حكيم قوي. فراحوا له بيهنوه: شفت أنت طلعت صح، الحصان رجع ومعاه قطيع من ال... مش عارف إيه. قال لهم: مين قال ده الخير؟ اصبروا لما نشوف.
بعديها بيوم؛ أبنه ركب الحصان اللي رجع ده، الحصان نفر بيه، الواد وقع رجله اتكسرت. قالوا: لا ده حكيم قوي قوي بقى يعني ما فيش... فراحوا يواسوه إن الواد رجله اتكسرت، لو فعلاً الحصان ما كانش رجع ما كانتش رجل الواد هتتكسر، ففعلاً طلعت حكيم جداً. قال لهم: مين قال ده شر؟ اصبروا، إحنا ورانا حاجة؟ أنتم وراكم حاجة؟ اصبروا بس.
بعد فترة؛ قلعة تانية جت هجمت على القلعة دي كسبوهم، وإيه من قوانينهم إن ياخدوا كل شاب في القرية يصلح للقتال، فالواد رجله مكسورة ومتبهدل، سابوا إيه؟ سابوه لأبوه.
وبيتهيالي الحكيم مات بقى بعديها مش عارف إيه بقيت القصة. فانت قل ذلك. أي حاجة تحصل هو ده الخير. الله يعلم وأنتم لا تعلمون. طيب.
فانت تقول اللهم إني استخيرك بعلمك. يا رب أنت العليم، وطبعا دي فيها ضمنا اعتراف بجهلك. طب هنكتفي بده؟ لا، مش هنكتفي؛ هنيجي بعد شويه هتنفى عنك العلم في الاستخارة نفسها، فانك تعلم وأنا برضه اعرف؟ لا يا حبيبي أنت لا تعلم وأنا ما اعرفش حاجة.
اللهم إني استخيرك بعلمك واستقدرك بقدرتك. وهنا المعنى الذي ذكره العلماء يعني أسألك أن تقدرني -طبعا الألف والسين والتاء في اللغة تفيد الطلب، ما ماشي، استغفر الله يعني أطلب المغفرة، فالألف والسين والتاء في اللغة بتفيد الطلب- فأننا استقدرك بقدرتك؛ يعني أسألك أن تمدني بقدرة أستطيع بها أن أمشي في هذا الأمر وكذا وكذا.
بقدرتك، وده المعنى اللي بيذكره العلماء، ووقع معنى في روعي والله أعلم آخر، وهو بقى العكس. وده المعنى اللي بيبقى صعب شوية على حد هواه في حاجة معينة؛ انك بيبقى محتاج قدرة على الترك. يعني لما ربنا سبحانه وتعالى بعد الاستخارة تلاقي الموضوع اتكعبل وما مشيش، فممكن تبقى أنت مش قادر تسيب الحاجة اللي أنت بتحبها دي ولا الحاجة اللي أنت متعلق بيها دي.
وأنت بتقول الكلمة دي يعني أنوي ذلك أيضاً؛ واستقدرك بقدرتك يا رب، يعني يا رب لو ما فيش خير قدر نصيب ما قلبي ما يتعبنيش. فأننا استقدرك بقدرتك، اللهم إني استخيرك بعلمك واستقدرك بقدرتك وأسألك من فضلك العظيم. ودي واضحة عشان بقى الوقت، أنا كنت سبحان الله جاي على إني هقعد ربع ساعة كده نخلص الحديث، بس بقى رزقكم.
فانك تقدره؛ آه، احنا فوق قلنا بعلمك وبقدرتك، ممكن يبقى له علم وليا علم، وله قدرة وليا قدرة. تحت بقى دخلت عليه دخول اللي شاطر وبحضر كتير، دخول المفلس. وده أوسع باب تدخل منه على ربنا سبحانه وتعالى؛ أوسع باب أن تدخل دخول المفلس. المفلس هو إيه؟ اللي هو أنا ما حلتش حاجة، لا حلت علم ولا حلت قدرة، ما حلتش حاجة يا رب، فانك تعلم ولا أعل،م وتقدر ولا أقدر.
فهذا دخول المفلس على الله عز وجل؛ فانك تعلم ولا أعلم، وتققدر ولا أقدر، وأنت علام الغيوب. أو العكس: تقدر ولا أقدر وتععلم ولا أعلم وأنت علام الغيوب، وده برضه فيها فكرة، ما هو أنت تعلم، ما هو ربنا يعلم، ومن علمه أنه يعلم الغيب، لكن النص هنا على علم الغيب عشان تريح، عشان أنت ترتاح وأنت بتقولها: أنت ما تعرفش الغيب.
ومشكلة سيدنا موسى عليه السلام في قصته مع الخضر هي مشكلته في كده يا جماعة. موسى والخضر هو لقاء بين علم الظاهر وقدر الله عز وجل. عشان نلخص القضية دي، أنتوا عارفين قصة موسى والخضر دي أصلاً قامت ليه كلها؟ عشان سيدنا موسى عليه السلام اتسأل: تعلم أحداً هو أعلم منك؟ قال: لا. فربنا قال له: ما فيش حد، طيب روح بقى الأرض الفلانية وشوف. وكان ممكن ربنا سبحانه وتعالى يرسل سيدنا موسى لواحد يعلم شيئاً من علم الظاهر، وكان ربنا بعث سيدنا موسى لإيه؟ قال له: ده في جزء كده من العلم يعني بحاله كده أنت ولا تعرف عنه حاجة. فهذه هي القضية باختصار قصة سيدنا موسى مع سيدنا الخضر.
وبعدين الغيب، أنا بقول الكلام ده كله في الاستخارة أنا مش بخرج بره، بس عشان تفهم وأنت بتستخير تبقى مرتاح، ما قلبك ما يوجعكش، أن الـ بعد ما استخرت لقيت البنت اتخطبت قلبك ما يوجعكش. عارفين الغيب أما غيب مكاني وأما غيب زماني؟
يعني إيه غيب مكاني يا جماعة؟ يعني احنا دلوقتي قاعدين في المكان ده، الحاجة اللي بتحصل دلوقتي اهو بره مين يعرفها هنا؟ هي بالنسبة لنا غيب لأنها لسه ما حصلت، أو حصلت في الماضي مثلا واحنا ما حضرناهاش، لا، هي بالنسبة لنا غيب لأنها مش في المكان بتاعنا، فده يبقى غيب مكاني. أنت هنا ما تعرفش اللي حاصل بره، واللي بره عارف اللي حاصل بره وما يعرفش اللي بيحصل جوه، غيب مكاني.
وفي غيب زماني؛ يعني إيه غيب زماني؟ يعني في المكان اللي احنا فيه دلوقتي ده، بكره زي النهارده هيكون بيحصل إيه؟ ولا حد يعرف، مش كده؟ طيب في المكان اللي احنا فيه ده من ١٠ أيام فاتت كان بيحصل فيه إيه؟ بافتراض أننا ما كناش هنا يعني من ١٠ أيام فاتت، مين يقول لي؟ ما حدش يعرف. طيب الأول ده غيب زماني عشان في المستقبل لسه، حاجة بكره ما نعرفش إيه اللي هيحصل، والثاني ده غيب زماني لأنه حصل في الماضي وما كناش حاضرين.
سبحان الله بقى، الثلاث قصص بتوع سيدنا موسى وسيدنا الخضر، الثلاث قصص لو تاملناها هنلاقيهم بيعالجوا الثلاثة دول. يعني يا جماعة القصص دي مش بس قصة كده حدوتة وتعدي، كل قصة بتنبهك على نوع من أنواع الغيب. القصة الأولى غيب مكاني: دلوقتي في ملك قدام، أي سفينة ما فيهاش عيب بياخدها، فأنا هخلق السفينة عشان تبقى معيبة فتعدي. سيدنا موسى اعترض، ليه؟ لأنه ما عندوش هذا العلم، اللي هو الغيب المكاني ده. النوع الثاني غيب زماني في المستقبل: الولد ده لما يكبر -هو لسه ما كبرش- هيبقى كافر ويحمل والديه على الكفر. طب ده حصل؟ ما حصلش لسه.
يبقى أول واحدة بتجالج جواك فكرة الغيب المكاني: أنا كنت المفروض دلوقتي أروح، نزلت بدور على العربية عطلت ما رحتش، فالله أعلم في إيه هناك دلوقتي، أنا ما أعرفش، ما أعرفش الخير فين. فالقضية الأولى أو القصة الأولى بين موسى والخضر بتعالج الحتة دي جواك.
القصة الثانية بتعالج مسألة بكرة وبعد والسنة الجاية: برتب لكذا وكذا وكذا، اتكعبلت، ما يا ابني أنت ما تعرفش لو كانت ما اتكعبلتش كان إيه اللي هيحصل، تستفيدها من القصة الثانية. القصة الثالثة: يبني الجدار سيدنا الخضر، سيدنا موسى اعترض برضه، قال له: لا، أصل زمان كان فيه أب صالح، وفي كنز شايله للعيال دي فدفنوه تحت الجدار ده، فلو الجدار وقع أهل القرية هيشوفوا الكنز وياخدوه. ده حاجة حصلت زمان في الماضي، فبالنسبة لسيدنا موسى غيب زماني ماضي فاعترض.
أهو اعتراض سيدنا موسى ده هو يمثل اعتراضنا احنا دلوقتي، حتى لو أنت من أهل الصلاح، سيدنا موسى من أولي العزم من الرسل، حتى لو أنت من أهل الصلاح قد يصيبك شيء من ذلك. فتجي سورة الكهف كل جمعة تفكرك، تطلع من سورة الكهف قلبك اللي كان واجعك ده مابقاش واجعك. واجعك بقى على البنت، واجعك على الولد اللي فاتك، واجعك على المنصب، واجعك على الفلوس، على العربية اللي اقلبت، على العربية اللي اتسرقت، على أي حاجة، على صحتك اللي اتاخدت والمرض اللي جالك. تخرج من سورة الكهف كده مغسول: قال فانك تقدر ولا أقدر، وتعلم ولا أعلم، وأنت علام الغيوب.
فهمتوا بقى علام الغيوب دي فادتنا إيه يا جماعة؟ علام الغيوب فأطمأن لقدره، وأطمئن والله يا عجيب عجيب جداً اللي يستخير. احنا أول ما دخلنا شوطنا في اللي ما بيستخيرش، تعالوا بقى نشوف في اللي بيستخير. يستخير وبعد ما يستخير الموضوع ما يمشيش يقعد زعلان، ده سوء أدب مع ربنا، سوء أدب مع ربنا. أو يبقى جواك كمان معنى أبشع من أنه بس يعني زعلان، دي نقول له اصبر مثلاً ولا حاجة، وفي مقام أعلى اللي هو الرضا، أنما بقى كمان إيه؟ لا، ده عاوز ومصر أن الحاجة تحصل. طب أنت جاي تستخير ليه؟ لا إله إلا الله.
تستخير كده؟ أنت لو بلاش لا تخيل لو حد عمل معاك أنت ده، حد بالنسبة لك ولا يساوي، أنت بالنسبة لك العقل الكبير اللي معاك دكتوراه في الذرة، وهو ولا سمع عن الذرة، وجاي يستشيرك في حاجة في الذرة؛ يعني عاوز أشتري ذرة أشتري... فالمهم أنت أشرت عليه: بلاش الراجل ده الذرات بتاعتة بايزة، روح اشتري من الراجل اللي هناك ده. قال لك: طب والله شكرا، وراح اشترى من الراجل اللي ذراته بايزة. هتبقى عاوز تعمل في إيه الواد ده؟ أبسط حاجة لو ما عملتش في حاجة أنت ممكن ترميه بقنبله ذرية بقى لو ما عملتش في حاجة، أبسط حاجة هيجي جواك: طب أنت جيت لي ليه طالما اللي هقول لك عليه مش هتعمله؟ جيت لي ليه؟ وهتحس أن فيها انتقاص ليك، مش كده؟
طب أنت جيت لربنا ليه؟ لما هتستخير وتفوض الأمر إليه، وبعدين لما الأمر يتكعبل هتفضل تقول: لا، أنا عاوزه، ده اللي مش... مش هتتنازل عنه. طب جيت لي ليه؟ قال: وأنت علام الغيوب. اللهم إن كنت تعلم أن هذا الأمر -ويسمي حاجته- خير لي في ديني ومعاشي وعاقبة أمري. الله أكبر! يبقى يا جماعة احنا قلنا الاستخارة بتكون غالباً في الأمور المباحة، فازاي لا تغفل أمر الدين؟ ما هو دلوقتي الشاب اللي راح يتجوز بنت، أو البنت اللي جالها شاب يتجوزها وهي موافقة أو شايفاه مناسب، ولا في الغالب... أو يعني بلاش في الغالب، يعني من الحيثيات أنها المناسبة ليا في الدنيا: شكلها عاجبني، مستواها مقارن لمستوايا، مناسب يعني، سواء في مستوى اجتماعي، مستوى تعليمي، أي المنطقة اللي ساكنة فيها، أي حاجة كده.
بس ممكن مع ده كله تبقى سبب في انتكاستك في الدين، أو أنت تبقى سبب في انتكاس... أو يعني بكلم بقى البنت دلوقتي، يبقى هو سبب انتكاستك في الدين. فازاي الاستخارة بتنبهك وتنبهك على الموضوع ده؟ موضوع أن في دين. اللهم ومش بس دين، الدين مقدم كمان: أن هذا الأمر -يسمي حاجته- خير لي في ديني أول حاجة، ودنياي وعاقبة أمري، فاقدره لي ويسره لي، ثم بارك لي فيه. فاقدره لي ويسره لي ثم بارك لي فيه.
احنا كده فات قد إيه؟ ماشي، يعني هنكروت بس مش هنقول أن احنا هنكروت، ماشي. فاقدره لي ويسره لي ثم بارك لي فيه. وإن كنت تعلم أن هذا الأمر شر لي في ديني ومعاشي وعاقبة أمري، فاصرفه عني واصرفني عنه. يبقى اصرفه: الدنيا تتكابل، ما تلاقي السفرية وقفت، تلاقي الشغلانة بعتت لك: معلش نعتذر عن المقابلة، تلاقي البنت ماتت، أي حاجة. واصرفني عنه؛ يعني ما تبقاش متعلق بيه، ما بقاش مرمي عليه، ما بقاش نفسي فيه، اصرفني عنها، واقدر لي الخير حيث كان ثم أرضني به. فاهمين طبعا مفهومة، مش عاوزين نطول عليكم، ما فيش أسئلة النهارده الحمد لله.
استخارة يا جماعة دلوقتي استخرنا، إيه اللي هيحصل بقى؟ في ناس تقول لك: أنا ما استخرت وما شفتش رؤيا. طب هو الاستخارة يعني أشوف رؤيا؟ ممكن ما نقولش لا برضه؛ يعني دي ممكن يحصل كده أن ربنا سبحانه وتعالى يرسل لك رؤية تبشرك أو رؤية تنفرك من الموضوع، فده ممكن يحصل كده، بس مش لازم يحصل كده. تستخير وتلاقي الموضوع اتكعبل اهو: اصرفه عني، تستخير وتلاقي قلبك انقبض بعد ما كنت مرتاح: قلبك ينقبض، اصرفني عنه، تستخير وتلاقي ربنا فتح عليك معاني تصل بها إلى أن الأمر ده ما فيهوش خير.
زي إيه؟ بعد الاستخارة تلاقي كده جالك تفكير منطقي اللي هو إيه؟ يعني هو أنت أجدع من اللي راحوا قبلك؟ ما هو فلان راح وخربت، وفلان راح وأدينا شايفينه دخل مستشفى المجاني، وكده. فتلاقي ربنا فتح عليك معاني اللي بها تعرف أن ده مش خير، أو العكس تعرف أنه خير. فمش شرط يبقى في رؤية، بس ممكن يبقى في رؤية برضه ما فيش مشكلة.
خلاص، طيب هستخير وأعمل إيه بعدها؟ العلماء لهم مذهبين في الحتة دي. بعض العلماء يقول لك: استخير وامضي، أو افعل ما اتفق؛ يعني استخير وامشي بقى أنت ونصيبك. وبعض العلماء يقول لك: لا، تستخير وتفعل ما ينشرح له صدرك. على المعنى الأول واضحة: استخير وافعل ما اتفق دي سهلة. المعنى الثاني ممكن يجي فيه إشكال، مش كده؟ اللي هو إيه؟ طب أنا صدري ما انشرحش لحاجة؛ يعني لا انشرح لا لده ولا لده، ولا نقعد ولا نمشي ولا...
المعنى الثاني ممكن يحصل فيه إشكال أنه تستخير وقلبك وصدرك ما ينشرحش. فالعلماء بعض العلماء قالوا: تعيد الاستخارة، ويبقى ده من باب الإلحاح على الله عز وجل في ما هو الاستخارة دعاء يا جماعة. الاستخارة في الآخر دعاء، وربنا يحب أن تلح عليه، وربنا ممكن يؤخر طلبك -هنا الطلب بقى خلي بالك الطلب هنا مش الحاجة نفسها، الطلب بس أن صدري ينشرح لحاجة؛ يعني سواء اعمل أو ينقبض منها أو أي حاجة- ما فيش، خلصت وما فيش.
يبقى ده استدعاء مزيد تضرع، واستدعاء مزيد دعاء، واستدعاء مزيد صلاة -ما هو في صلاة قبل الاستخارة- فيبقى تعيد الاستخارة تاني لغاية ما قلبك ينقبض أو ينشرح. خلاص. أقول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.