دخولتسجيل الدخول

ألهاكم التكاثر | تدبر سورة التكاثر

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله.

اللهم صلِ على سيدنا محمد النبي، وأزواجه أمهات المؤمنين، وذرياته وأل بيته، كما صليت على آل إبراهيم، إنك حميد مجيد. أما بعد، فلو في وقت في آخر الدرس إن شاء الله نجاوب على بعض الأسئلة بس تبقى مكتوبة.

سورة التكاثر سورة مهمة جداً، وبتناقش قضية مركزية في الدين، وهي قضية التكاثر، وهنعرف يعني إيه تكاثر كمان شوية. لكن عاوزين الأول ننتبه لمعنى سورة التكاثر: مكية ولا مدنية؟ الجمهور على أن سورة التكاثر مكية، لكن ثم قول إن سورة التكاثر سورة مدنية. الجمهور صحيح على أنها مكية، لكن في قول إنها مدنية، وهذا القول له وجاهة؛ ليه؟ لأن عندنا أثرين، كل أثر فيهم يوحي أنها مدنية. الأثر الأول: أنها نزلت في فريقين أو طائفتين أو حيين من الأنصار، فده يوحي على أنها مدنية. وحديث آخر وده في الصحيح عن أبي بن كعب -وأبي بن كعب أنصاري فما كانش موجود في مكة، أبي بن كعب أنصاري- أنه ذكر حديثاً للنبي صلى الله عليه وسلم: «لو أن لابن آدم وادياً من ذهب لتمنى له ثانٍ، أو وادين من ذهب لتمنى لهما ثالثاً، ولا يملأ فاه إلا التراب»، أو كما قال صلى الله عليه وسلم، وبعدين قال أبي: إننا كنا بنعد هذا الحديث من القرآن حتى نزل قول الله عز وجل: ﴿أَلْهَاكُمُ التَّكَاثُرُ﴾ [التكاثر: 1]. فده يوحي أن السورة قد تكون مدنية.

فعاوزين نقف هنا شوية ونتأمل شيئاً يا شباب. الأول أنتم عارفين القرآن المكي أو الفترة المكية، قبل ما نتكلم عن القرآن المكي، فترة استضعاف وفترة خوف وفترة مطاردة وفترة اضطهاد، دي الفترة المكية، دي نفسية الصحابة في مكة. وبعدين هاجروا إلى المدينة فكانت فترة إقامة دولة، وفترة تمكين، وفترة أن الدنيا تفتح على الصحابة رضوان الله عليهم، فدي نفسية الصحابة في المدينة. القرآن المكي له سمات، والقرآن المدني له سمات، فمن أعظم سمات القرآن المكي أن آياته قصيرة، وأن السور كذلك سور صغيرة، ده من أعظم سمات القرآن المكي، عكس القرآن المدني يتسم بآيات طويلة بعض الشيء وسور طويلة.

فلو إحنا بنبص من بعيد كده ومش عارفين السورة دي مكية ولا مدنية هنقول أنها سورة مكية، مش كده؟ سورة من قصار السور وآياتها صغيرة، فدي سورة مكية، ونفاجأ أنه لا، ده ممكن تبقى مدنية. السؤال دلوقتي يا شباب، السؤال الذي يطرح نفسه: طب لو هي مدنية ليه ما أخدتش سمات القرآن المدني؟ يعني المعاني التي في سورة التكاثر، ألم يكن يمكن أن تُصاغ في آية طويلة وتكون ضمن سورة طويلة؟ ممكن ولا لا؟ ممكن، وتبقى ساعتها واخدة سمات القرآن المدني، لكن لا، هذه سورة لم تأتِ على هذا النسق، وإنما نزلت على نسق القرآن المكي، سورة من قصار السور وآياتها صغيرة. ليه؟ لأن القضية التي تتناولها تلك السورة قضية مركزية في الدين. فكان المعنى أنها صارت وحدة بمفردها، سورة بمفردها، وكمان هتبقى من قصار السور فيحفظها كل المسلمين. يعني ممكن أقول لك دلوقتي: تقدر تسمع لي ثلاث أربع آيات من سورة البقرة؟ مش كل الناس تعرف تعمل ده، طب من سورة النساء؟ مش كل الناس تعرف تعمل ذلك، لو قلت لك: سمع لي سورة التكاثر، لا تكاد تجد مسلماً مش حافظ سورة التكاثر، صح؟ فجاءت على ذلك علشان كلنا نحفظ تلك السورة ونتدبر تلك السورة ونحرز تلك المعاني التي هي قضايا مركزية، طبعاً إحنا هنكتشف أنها ما هياش قضية واحدة، سورة التكاثر هي كذا قضية مهمة أصلاً، فنحرز تلك القضايا المركزية، ولذلك جاءت على هذا النحو.

المعنى الثاني بقى: لو كانت سورة مكية، إحنا لسه ما دخلناش في التكاثر بس عاوزين نفهم، يعني لو كانت سورة مكية ده يفيدنا إيه؟ دلوقتي إحنا قلنا الصحابة يا جماعة في مكة فئة مستضعفة، فئة تخشى القتل، فئة سُلبت أدنى الحقوق في العيش، فئة تتخفى بدينها، هي دي نفسية الصحابة في مكة. يوم ينزل عليهم قول الله عز وجل: ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ * كَلَّا سَوْفَ تَعْلَمُونَ * ثُمَّ كَلَّا سَوْفَ تَعْلَمُونَ * كَلَّا لَوْ تَعْلَمُونَ عِلْمَ الْيَقِينِ * لَتَرَوُنَّ الْجَحِيمَ * ثُمَّ لَتَرَوُنَّهَا عَيْنَ الْيَقِينِ * ثُمَّ لَتُسْأَلُنَّ يَوْمَئِذٍ عَنِ النَّعِيمِ﴾، ينزل عليهم وهم في الحقبة دي ﴿أَلْهَاكُمُ التَّكَاثُرُ﴾. طبعاً هنا العلماء يا جماعة بعض العلماء قالوا أنها نزلت في الكفار، وده هنجي له كمان شوية إن شاء الله، وبعض العلماء قالوا: لا، السورة تخاطب الجميع؛ مسلم وكافر، حتى أن بعض العلماء قال: ﴿كَلَّا سَوْفَ تَعْلَمُونَ﴾ للكفار، ﴿ثُمَّ كَلَّا سَوْفَ تَعْلَمُونَ﴾ للمؤمنين، فقالوا لا السورة بتخاطب الجميع. فعلى هذا القول، تنزل سورة تكلم المسلمين في الفترة دي تقول لهم ﴿أَلْهَاكُمُ التَّكَاثُرُ﴾؛ ليه؟ عشان خطورة هذا الأمر، خطورة التكاثر اللي هنعرفه كمان شوية اللي بيلهي عن الآخرة. فتجيء السورة تصدم، السورة دي -يعني هذه الآية- صادمة لو عشنا نفسية المسلمين في الحقبة المكية، أن ربنا بيقول لهم ﴿أَلْهَاكُمُ التَّكَاثُرُ﴾، روحوا بقى راجعوا نفسكم، واطردوا الدنيا عن قلوبكم لأنها ألهتكم في الحقبة المكية.

العجيب يا جماعة أن التكاثر بنفس اللفظ جه في القرآن مرتين، هنيجي للمرة الثانية إن شاء الله كمان شوية، وهذا الجذر اللغوي جاء بمشتقات أخرى، منها ﴿وَلَا تَمْنُن تَسْتَكْثِرُ﴾، دي في سورة المدثر، مش كده؟ اللي هي السورة رقم كام أصلاً في القرآن على حسب ترتيب النزول؟ الثالثة أو الرابعة؟ السورة دي يا الثالثة يا الرابعة، على خلاف أن ﴿ن * وَالْقَلَمِ﴾ ترتيبها كام في المصحف؟ هي السورة دي في بدايات القرآن أصلاً، بدليل أن سورة المدثر أو صدر سورة المدثر اللي منها الآية دي، دي الآيات التي النبي عليه الصلاة والسلام أرسل بها، يعني قبل الآيات دي النبي عليه الصلاة والسلام لم يكن أُمر بعد بالتبليغ لسه، فنزلت المدثر فيها ﴿وَلَا تَمْنُن تَسْتَكْثِرُ﴾. ومما قيل في تأويل هذه الآية: يعني لا تمنن بما منَّ الله عز وجل عليك به من الرسالة، ﴿تَسْتَكْثِرُ﴾ يعني تريد الكثير من الدنيا.

خلي بالكم عيشوا يا جماعة نفسية النبي عليه الصلاة والسلام وعيشوا نفسية الصحابة، النبي عليه الصلاة والسلام في هذه الحقبة خايف يُقتل، يعني هو أقرب إلى الموت منه إلى الاستكثار من الدنيا، دنيا إيه دي؟ ده لما وقف قال لهم بعد ما أُمر بالإنذار وقف نداهم وجمعهم عادي جداً، اتقال له إيه: تباً لك سائر اليوم، ما هو ما لوش لا شوكة ولا منعة ولا حد يمنعه من شيء، ومع ذلك القضية حاضرة من اليوم الأول، قضية إيه؟ القضية الكبرى؛ أنه الانغماس في الدنيا مهلك، الانشغال بالدنيا مهلك، الاستكثار من الدنيا مهلك. من اليوم الأول اللي هو أصلاً المعاني دي ما هياش المعاني الطاغية، المعاني دي ما هياش المعاني اللي نخاف منها على المؤمنين في هذه الحقبة أصلاً، ولا نخاف منها على النبي عليه الصلاة والسلام وحاشاه في هذه الحقبة، لكن هي تربية الله عز وجل له من أول يوم ﴿وَلَا تَمْنُن تَسْتَكْثِرُ﴾، وأنتم ﴿أَلْهَاكُمُ التَّكَاثُرُ حَتَّىٰ زُرْتُمُ الْمَقَابِرَ﴾. فقضية الدنيا والتعاطي مع الدنيا، وإحنا في درس اسمه "قليلها يكفي" ده درس مهم جداً، يتسمع مع الدرس بتاع النهاردة، لازم تتحط في قدرها يا شباب لازم، ولا نجاة إلا بذلك، ما فيش، لا نجاة إلا بأن نضع الدنيا في قدرها الذي وضعها الله عز وجل فيه، إنما عاوز تلعب على الوجهين هتروح.

فتعالوا ندخل قبل ما ندخل في السورة بقى، لسه أه إحنا قلنا إما نزلت في المدينة أو مكة، ولو نزلت في مكة إما نزلت في الكفار خاصة أو نزلت لجميع الناس اللي منهم المؤمنين، وفهمنا هذا الوجه لو المؤمنون مخاطبون بها. طب لو نزلت في الكفار بقى فهي نزلت ليه؟ قالوا: إحنا قلنا من شوية أن في أثر أن آية نزلت في حيين من الأنصار، في قول تاني لا أنها نزلت في حيين من كفار قريش، حيين وقفوا يتكاثروا، يعني إيه يتكاثروا بقى على القول ده؟ أنهم وقفوا يتفاخروا بالأحساب، إحنا منا فلان، تاني يقولوا: طب ما إحنا منا فلان، طب إحنا منا فلان، وإحنا منا فلان، ويقعدوا، ودي من عادات الجاهلية التي أخبر عنها النبي عليه الصلاة والسلام وأنها ستظل في أمته، التفاخر بالأحساب، فوقفوا عملوا كده لدرجة أن إيه اللي حصل؟ منا فلان، ومنا فلان، ومنا فلان، لغاية ما راحوا للمقابر، خدوا بعض كده وراحوا المقابر، وابتدروا يتفاخروا بالأموات، أهو ده قبر فلان اللي كان وكذا وكذا وده منا، مشاورين على قبر تاني، وده قبر فلان اللي كان وكذا وكذا وده منا، ﴿حَتَّىٰ زُرْتُمُ الْمَقَابِرَ﴾.

طيب تعالوا نتأمل حاجة عشان دي هنطلع بفايدة منها مهمة جداً. دلوقتي الموقف اللي حصل ده، الموقف ده كان بدعاً من المواقف في الكفار في الجاهلية؟ لا، إحنا قلنا ده كان بيحصل كتير في الجاهلية، والنبي أخبر بده عليه الصلاة والسلام أن في خصلتين من خصال الجاهلية هتفضل فينا، واحدة منهم التفاخر بالأحساب، فهو كان الجاهليون متعودين على كده، والشيخ، الشعر الجاهلي فيه ده، يعني لا تكاد تجد قصيدة طويلة شوية من الشعر الجاهلي إلا وفيها لازم يتفاخر بقبيلته، فده كان في الجاهلية معروف؛ أن القبيلة تقف تتفاخر، فالثانية تقف تتفاخر، فدي تتكاثر بالناس بالأحساب، فدي تتكاثر قدامها، كان موجوداً. وجاء الإسلام، وحدث ذلك الموقف مرة ثانية، يبقى دلوقتي قبيلتنا أهم من الكفار قاموا، وقريش كلها أوضة وصالة يعني، قريش ما كانش مساحة كبيرة، أوضة وصالة. طيب لما هيقف القبيلتان دول يتفاخروا، الحدث ده هيسمع في قريش، ولا هم واقفين كده على الناصية؟ والذي يظهر أنه هيسمع، يعني "الحقوا ده قبيلة فلان تتكاثر هي وقبيلة فلان"، فالناس تروح تتفرج بقى إيه اللي بيحصل، وطبعاً الإنسان ابن بيئته، يعني أنت لو تخيلت البيئة زمان، عشان إحنا ممكن تقول: لا أنا هنزل ليه؟ لا ما أنت هتنزل ليه عشان أنت في إيديك تليفون وعندك تلفزيون ونت، زمان ما فيش، يعني لما يحصل حدث زي ده ننزل نتفرج. يعني اللي سني وأكبر مني كان زمان يعدي كده في الشارع بتاعنا عربية فيها أراجوز، حد يعرف؟ حد لحق؟ ده ما لحقتوش، الكلام ده كان يعدي كده عربية راجل معاه أراجوز ومسرح عرايس، فيعدي في الشوارع كده، كان بشلن ولا ببريزة مش فاكر، فننزل نجري، أول ما هو البيت ما فيهوش حاجة تلهي، ما فيهوش حاجة تسلي الأطفال، فننزل نتفرج على مسرح العرايس ده. فالظاهر كده أنه هيبقى "تريند"، الظاهر أنه كان هيبقى تريند، يعني القبيلة الفلانية بتكاثر القبيلة الفلانية، فهو تريند يعني دلوقتي في قريش الناس واقفة.

كيف تعامل الشرع مع ذلك التريند بقى؟ ودي قضية مهمة جداً جداً لازم نفهمها، أنه الشرع مع هذا الموقف اللي هو هينتشر والناس هتقف تتفرج عليه استغله في إرساء قضية كبيرة جداً من قضايا الدين، اللي إحنا لسه مش عارفين، أنت لغاية دلوقتي مش فاهمين هي السورة بتتكلم عن إيه، هنشوف بقى القضايا الكبيرة كمان شوية. ودي المسألة التي دائماً بنشير إليها، الحدث الذي يحصل ويكون له زخم، بالذات الآن مع مواقع التواصل وكده، الحدث الذي يحصل وله زخم كيف نتعاطى معه؟ هنا الشباب وكذلك أبناؤنا من الدعاة الصغيرين وإخواننا من الدعاة، كل يعني إحنا في طرفان ووسط في هذه القضية: طرف يتماهى مع التريند، ويبقى هو اللي بيلهث خلف التريند، هو اللي بيحركه، يعني مستني التريند بيقول إيه النهاردة، الكلام على إيه عشان يبقى له كلام على التريند، وترى في الناحية التانية مهما يحصل في الكون هو مش داخل في القصة دي، مهما يحصل، والذي يظهر والله أعلم أنه الوسط هو المحمود؛ اللي هو إيه؟

أن يكون لك قضايا كبيرة تحيا من أجلها، يبقى أنت فاعل ما أنتش منفعل، أنا لي قضايا أدعو إلى الله عز وجل، وعندي كذا قضية كبار عارف أن دي قضايا مركزية في دين الله عز وجل، دي القضايا التي شغلاني في دعوتي، وحصل مسألة كبيرة لها زخم، فلو تكلمت فيها الآن، الكلمة تُسمع بإذن الله، ولها تعلق بتلك القضايا، يعني هتخدم القضايا الكلية الكبيرة المركزية في دين الله عز وجل، فحينها أستغل ذلك الزخم لتلك القضية، مش العكس، مش النهاردة الكلام على إيه؟ الكلام على كذا، أقوم أحاول بقى أشوف لها تلفيقة كده عشان أعرف أتكلم فيها، لا. فلو كان سبب النزول لهذه السورة هذا الحدث الضخم، أصلي خلي بالك هو الحدث ده للكفار، قبيلتين من الكفار، فينزل الكلام ﴿أَلْهَاكُمُ التَّكَاثُرُ حَتَّىٰ زُرْتُمُ الْمَقَابِرَ﴾، ثم يجيء بقى الكلام ﴿كَلَّا سَوْفَ تَعْلَمُونَ﴾، اللي هندخل بقى في السورة إن شاء الله ونفهم إيه القضايا الكبيرة التي في السورة.

طيب قال الله عز وجل: ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ﴾، إحنا هنا يا جماعة قدامنا قضيتان كبيرتان مركزيتان من قضايا هذا.

القضية الأولى هي مسألة الإلهاء أو الغفلة، والقضية الثانية هي مسألة التكاثر، وهما أول كلمتين في السورة: ﴿أَلْهَاكُمُ التَّكَاثُرُ﴾ [التكاثر: 1]. فإحنا عندنا قضية اسمها إن الناس عايشة ملهية، دي قضية لوحدها، وفي قضية ثانية اسمها التكاثر، وعاوزين نفهم كل قضية من دول. فكان فيه ناس ملهية، وحاجة من اللي بتلهي الناس هي التكاثر، وما هو ﴿أَلْهَاكُمُ التَّكَاثُرُ﴾ مش معنى كده إن الحاجة الوحيدة اللي بتلهي هي التكاثر، ممكن يبقى فيه حاجات ثانية بتلهي، لكن عندنا قضية كبيرة اسمها إنك تتلهي.

والإلهاء هذا الجذر اللغوي جاء في القرآن في كذا موطن، وهنجي لهم كمان شوية، لأن إحنا عندنا برضه مسألة هنا غريبة شوية؛ إن هنا قال ﴿أَلْهَاكُمُ التَّكَاثُرُ﴾، طيب التكاثر بإيه؟ ما جاش في السورة الشيء اللي بيتكاثروا به، طب ألهاكم عن إيه؟ ما جاش في السورة الشيء الملهي عنه، واخدين بالكم؟ يعني ﴿أَلْهَاكُمُ التَّكَاثُرُ﴾ فأول سؤال واحد يسأله يقول لك: إيه هو أولاً ألهاني عن إيه؟ فما تلاقيش في السورة الشيء الملهي عنه. طيب ﴿أَلْهَاكُمُ التَّكَاثُرُ﴾ التكاثر بإيه؟ فبرضه ما تلاقيش في السورة الشيء المستكثر به. فكأننا عاوزين نفهم دلوقتي إيه هو الشيء الملهي عنه وإيه هو الشيء المستكثر به.

فده هنلاقيه في مواطن أخرى، إحنا قلنا هذا الجذر اللغوي جاء في عدة مواطن في القرآن، منها ﴿أَلْهَاكُمُ التَّكَاثُرُ﴾ الذي معنا، ومنها قال سبحانه وتعالى: ﴿لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ﴾ [المنافقون: 9]، هنا جاب الحاجة اللي بتلهي وجاب الحاجة اللي بيتلهي عنها، اللي هم ما كانوش موجودين في سورة التكاثر، يبقى الأموال تلهي والأولاد تلهي عن إيه؟ عن ذكر الله. الآية الثانية قال سبحانه وتعالى: ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ﴾ [النور: 37]، يبقى التجارة بتلهي والبيع بيلهي عن إيه؟ عن ذكر الله وإقام الصلاة وإيتاء الزكاة. كأن الدنيا ابتدت تنور دلوقتي، يبقى إيه الشيء اللي إحنا بنستكثر به؟ هتقول الأموال والأولاد والتجارات والبيع، القرآن بيجاوبك، يبقى ده الشيء اللي بنستكثر به. طيب بيلهينا عن إيه؟ عن ذكر الله وإقام الصلاة وإيتاء الزكاة، ودي أنواع كل ما يكون زاداً لك في طريقك في سيرك إلى الله عز وجل.

لفظ التكاثر؛ تفاعل، وهذا الوزن في اللغة أصل معناه أن يكون بين طرفين. لما نقول: تقاتل، تعرف على طول إني مش هتكلم عن واحد، نقول: قتل فلان فلاناً، ممكن وهو قاعد قتله، لكن لما أقول لك: تقاتل زيد وعمرو، تقول لي عمرو كان بيقاتل، لأن لفظ تفاعل معناه إن أنا هعمل حاجة وأنت بتعمل نفس الحاجة. جادل فلان وفلان، يبقى أنا بجادل وأنت بتجادل. تقاتل فلان وفلان، يبقى أنا بقاتل وأنت بتقاتل، يبقى تفاعل تدل في أصل وضع اللغة أن الفعل من الطرفين. فهنا قال ﴿أَلْهَاكُمُ التَّكَاثُرُ﴾، لو على أصل الوضع اللغوي يبقى فيه كذا طرف بيعمل حاجة، مش واحد عمال يلم في فلوس، لا، فيه حاجة تانية بتحصل والحاجة دي بتحصل من كذا طرف. من المعاني الجميلة اللي اتقالت في هذا الموطن، طبعاً فيه معنى إن أنا أتكاثر أنا وأنت، زي ما الكفار عملوا: منا فلان، طب أنت تقل منا فلان، لكن فيه معنى ثاني خطير جداً يتقال في الآية دي، وده اللي عاوزين نقف معاه؛ ﴿أَلْهَاكُمُ التَّكَاثُرُ﴾، يعني أنت شفت واحد بيستكثر من المال أو نوع معين من المال، مثلاً جاب التليفون الفلاني، تقوم أنت ممكن لو ما كنتش شفت فلان ده ما كانش يجي في دماغك إنك تعلي عليه، مش في دماغك أو تجيب زيه، لكن لما شفته رحت رايح جري اشتريت التليفون ده، فشافكم واحد ثالث راح رايح جري اشترى التليفون ده، فشافكم الرابع، فشافكم السادس، فشافكم العاشر، فإحنا كده بنعمل إيه بقى؟ بنتكاثر، كل واحد عمال يكثر من اللي عنده لأن اللي قدامه بيكثر من اللي عنده، فبقى الفعل مشترك بينا كلنا.

أزمة، والأزمة دي تفشت مع ظهور وسائل الإعلام ومع ظهور مواقع التواصل. مع وجود وسائل التواصل، السورة دي يا جماعة بقت خطيرة جداً جداً وبقت مؤذية للقلوب. خلي بالكم مما قيل، إن ﴿أَلْهَاكُمُ﴾ من اللهو، وقالوا إن الفرق بين اللهو واللعب، إن اللهو يصيب القلب واللعب يصيب الجوارح. مفهومة يعني إيه لهو يصيب القلب؟ يعني من كتر التشويش اللي أنت شايفه على وسائل أو مواقع التواصل، تدخل هنا تلاقي اللي سافر، وتدخل هنا تلاقي اللي مصور نفسه في المطعم، وتدخل هنا تلاقي اللي مصور التليفون الجديد، وتدخل هنا تلاقي اللي جاب العربية، وهنا اللي بيصور شقته، وهنا اللي بيصور فيلته، وهنا اللي في قصره، وقلبك هتلاقيه إزاي؟ وتفضل أنت في الدوامة دي خصوصاً إذا كان اللي عمل ده من أقرانك، يعني صاحبي؛ فصاحبي سافر المكان الفلاني، تفضل أنت مشغول إنك تسافر زيه أو مكان شبهه أو أعلى منه، جاب التليفون الفلاني فتفضل مشغول إنك تجيب التليفون اللي زيه أو اللي أعلى منه، السيارة، البيت، وهكذا، فقلبك يتلهي. ﴿أَلْهَاكُمُ التَّكَاثُرُ﴾ دي مشكلة العصر، ومش العصر بس دي مشكلة كل عصر، ولذلك إحنا قلنا قضية مركزية في دين الله عز وجل الحديث عن الدنيا وتحقير الدنيا في أعين الناس، والقرآن لو ما قريتش غير القرآن، يعني اقفل كده أسبوع على نفسك بتقرأ القرآن بهذه النفسية، كيف تكلم الله عن الدنيا في القرآن؟ وشوف هتطلع من الختمة دي قلبك عامل إزاي؛ لسه مايل للدنيا ولا كارهها؟ لسه مشغول بيها ولا خلاص انشغلت عنها بما هو أهم؟

﴿أَلْهَاكُمُ التَّكَاثُرُ﴾؛ التكاثر بإيه بقى؟ أموال، أولاد، تجارة، بيع، دي الألفاظ القرآنية، كل شيء من أمور الدنيا ألهاتنا عن إيه؟ عن ذكر الله، عن إقام الصلاة، عن إيتاء الزكاة، ألهتنا عن عمل الآخرة. تقول يا شيخ بس لا، أنا مين قال كده؟ ما إحنا في الجامع أهو، أقول لك اللهو بيصيب القلب؛ يعني إيه لهو بيصيب القلب؟ يعني قلبك فين وأنت في صلاة؟ بتفكر في إيه؟ دنيا، صح؟ يبقى ﴿أَلْهَاكُمُ التَّكَاثُرُ﴾ ولا لا؟ أه ﴿أَلْهَاكُمُ التَّكَاثُرُ﴾، طيب ألهاكم عن إيه؟ عن إقام الصلاة. ﴿أَلْهَاكُمُ﴾، وأنت قاعد تقول أورادك وأذكارك بعد الصلاة، قلبك فين؟ واطا لسانك في كم ﴿اللَّهُ أَكْبَرُ﴾ بعد الصلاة؟ وفي كم سبحان الله؟ وفي كم الحمد لله؟ كم واحدة أنت قلتها؟ 33 و33 مرة بتقول الله أكبر و33 مرة الحمد لله و33 مرة سبحان الله، كم مرة واطا قلبك لسانك؟ ﴿أَلْهَاكُمُ التَّكَاثُرُ﴾ عن إيه؟ عن ذكر الله، طب مشغول بإيه؟ دنيا، ﴿أَلْهَاكُمُ التَّكَاثُرُ﴾.

فيبقى مما قيل في التكاثر إنه أنا أكثر من مالي فتراني فتستفز فتكثر من مالك، فيراك غيرك فيستفز فيكثر من ماله، وهكذا. إحنا جايين هنا النهارده عشان نقول سورة التكاثر بتقول لنا المشكلة، بتوصف وبتقول المشكلة أولاً، وبعدين بتقول لنا سبب المشكلة، ونحل المشكلة إزاي على صغر هذه السورة. يبقى إحنا عندنا مشكلة كبيرة وهي إننا ملهيين، إحنا ملهيين، إحنا في غفلة، ودي السمة الغالبة، يعني لو فقت في لحظة فإنت نايم بقية اليوم، غافل بقية اليوم، فبقت سمة غالبة. طيب دي المشكلة، طب والمشكلة دي لو استمرت هنروح في داهية، السورة اللي قبل ﴿أَلْهَاكُمُ التَّكَاثُرُ﴾ سورة إيه؟ القارعة، آخر آية في القارعة إيه؟ ﴿نَارٌ حَامِيَةٌ﴾ [القارعة: 11]، إيه اللي يدخل النار؟ ﴿أَلْهَاكُمُ التَّكَاثُرُ﴾، فلو فضلتوا ملهيين في ذلك التكاثر ضيعتوا العمر اللي فيه المفروض تستكثروا من أعمال الخير اللي بتدخل الجنة، فدخول النار الحامية بذلك اللهو ﴿أَلْهَاكُمُ التَّكَاثُرُ﴾، ودي مناسبة سورة التكاثر مع سورة القارعة.

فيبقى دي المشكلة، دي الآفة اللي فينا، الغفلة، طيب إيه سببها؟ أعظم سبب التكاثر، الدنيا، المال، التجارة، البيع، الشهرة، المنصب، قول زي ما تقول بقى، دنيا. طيب العلاج؛ إدي الآفة الغفلة، وإدي السبب التكاثر، العلاج في العلم، ولذلك من القضايا الكبرى في تلك السورة؛ سورة التكاثر بتكلمنا في ثلاث معاني مهمة: معنى التلهي ومعنى التكاثر وده الآفة أو المرض وده السبب، ومعنى العلم الذي هو العلاج، ولذلك بقى من أول هنا لآخر السورة شوف العلم جه كم مرة: ﴿كَلَّا سَوْفَ تَعْلَمُونَ * ثُمَّ كَلَّا سَوْفَ تَعْلَمُونَ * كَلَّا لَوْ تَعْلَمُونَ عِلْمَ الْيَقِينِ * لَتَرَوُنَّ الْجَحِيمَ * ثُمَّ لَتَرَوُنَّهَا عَيْنَ الْيَقِينِ﴾ [التكاثر: 3-7]، وده درجة من العلم أعلى، خمس مرات السورة تذكر العلم وهي كلها ثمان آيات، فأعظم العلاج في العلم.

لكن أي نوع من العلم؟ إيه العلم اللي يخلينا ما نتلهيش؟ إيه العلم اللي يصرفنا عن التكاثر؟ ذلك العلم بالله سبحانه وتعالى بأسمائه وصفاته، ذلك العلم بالدار الآخرة وما يكون فيها، وأنا هنا لما بقول العلم بالله بأسمائه وصفاته والدار الآخرة وما يكون فيها، لا أقصد على طريقة الأكاديميين، أو إن شئت فقل على طريقة طلاب العلم اللي هم بيحرروا المسائل، مواطن النزاع ومواطن الخلاف ونرد على دول إزاي ونعمل، مش ده العلم اللي هيوصلك لده، العلم ده مطلوب قطعا، لكن هو ده اللي إحنا جايين نتكلم عنه النهارده؟ لا، مش نوع العلم اللي هو إيه هنتخانق في كيفية إثبات الصفة ولا مش ده، إحنا خلاص تجاوزنا ذلك وبنتكلم في آثار الصفة، لما تعرف إن ربنا سبحانه وتعالى سميع، أنت بقى استفدت إيه؟ لما تعرف إنه بصير، لما تعرف إنه جبار، لما تعرف إنه رحيم رحمن، استفدت إيه؟ وقل مثل ذلك في الدار الآخرة برضه، مش جايين نتخانق في هل يُرى ولا لا يُرى؟ خلاص ده تجاوزناها، أنت عرفت إن ربنا يُرى في الجنة وإن ده أعلى نعيم الجنة، استفدت إيه؟ استفدت إيه؟ يبقى آثار هذا العلم.

ولذلك إيه هو العلم الذي ينجيك؟ أول السورة اللي قبليها القارعة، ﴿مَا الْقَارِعَةُ * وَمَا أَدْرَاكَ مَا الْقَارِعَةُ﴾ [القارعة: 1-2]، يوم القيامة جاء في القرآن بألفاظه هنا جاء القارعة، ومن خواص القارعة إنها تنبه عن ذلك الملهي، الشيء الذي يقرع سمعك، ده لو أنت تخيل كده قَطر معدي وراح ضارب الزمارة بتاعته لو أنت ملهي في أي حاجة تتفزع على طول، مش كده؟ شيء قرع سمعك، فالقارعة تفزع والقارعة تردك عن ذلك الملهي اللي لاهيك ده، يعني أنت تبقى في الدنيا وعمال تجري يمين وشمال عشان تجيب فلوس، وعشان تكسب في التجارة، وعشان تعمل مش عارف إيه، وعشان تسوي إيه، والبيت والعربية وال.. وفجأة وأنت في عز ده ومعاك حد عزيز عليك جداً نزل يعدي طريق عربية خبطته مات، تلاقي في لحظة الدنيا اللي كانت كبيرة قوي دي وبلعاك تحس بس إنها بقت قد كده، لو أراد الله بك خيراً، إيه ده؟ ده فيه إيه ده؟ ده اللي كان بيجري معايا، ده اللي كنا بنحلم سوا نعمل ونسوي، فجأة كده كل ده راح، قارعة، قارعة من القوارع، يبقى يا جماعة النجاة من ذلك اللهو والنجاة من ذلك التكاثر بالعلم، عشان كده يا جماعة قالوا: ما ذكر الموت في شيء إلا قل. تخيل أنت عمال تقول وبتاع والصفقة وجريت وعملت وكسبت وربحت وبتاع وهو بيحكي، أنت تقطع وتقول إيه على فكرة أنت هتموت، لو هو وقف للحظة وتفكر في الكلمة كلنا هنموت، يعني أنت هتموت، يعني كلنا هنموت، عندي ابني صغير أنس أقول له عاوز أقول لك حاجة بس ما تقولش لحد، أقول له والله العظيم أنا هموت، أقول له كده، فيقول لي ليه يا بابا؟ هو طبعاً كلنا هنموت يعني، فكلنا هنموت، فإنت وقف أي واحد كده وقول له وهو بيتكلم وقول له هتموت، لو أراد الله به خيراً وفتح قلبه لتلك الكلمة هيحس إنه بيتكلم في تفاهات مهما كان بيتكلم في إيه.

﴿أَفَرَأَيْتَ إِن مَّتَّعْنَاهُمْ سِنِينَ * ثُمَّ جَاءَهُم مَّا كَانُوا يُوعَدُونَ * مَا أَغْنَىٰ عَنْهُم مَّا كَانُوا يُمَتَّعُونَ﴾ [الشعراء: 205-207]، فالدنيا اللي بتجري وراها يا ابني وتكاثر إيه اللي لاهيك عن الآخرة ده؟ بلاش، أنا بديكم يا جماعة نماذج من نوع العلم اللي النهارده تخلص الدرس وتروح تدور عليه وتروح تشغل نفسك بيه، بلاش حديث النبي عليه الصلاة والسلام إنه يُؤتى بأنعم أهل الأرض من أهل النار ثم يُغمس فيها غمسة في النار، ثم يقال له هل رأيت نعيماً قط؟ هل مر بك قط؟ فيقول: لا يا رب وعزتك وجلالك ما رأيت نعيماً قط، ما مر بها.

خير قط، هنقف وقفتين مع الحديث ده؛ عشان يا جماعة إحنا ما عندناش رفاهية إن إحنا نقعد نتفكر. أنا النهارده كنت متردد، هل دي منزلة من منازل السائرين ولا أدي درس؟ فكانت المنزلة منزلة التفكر، يعني ده الدور عليها. إحنا ما عندناش رفاهية إن إحنا نقعد نتفكر من ريتم حياتنا السريع.

تعالوا بقى نتفكر أو نتأمل حاجتين في الحديث ده: «يؤتى بأنعم أهل الأرض من أهل النار». عيش بدماغك كده، مين هو أنعم أهل الأرض من أهل النار؟ وشاف إيه في الدنيا؟ وعاش إيه عيش؟ يعني أنعم أهل الأرض من أهل النار ده لا تكاد يمر على ذهنك لذة إلا وهو بلغ السقف فيها. عندك قارون، ده مفاتيح الخزائن بس يجوا يسلوها تميل بيهم، أمال اللي جوه الخزائن إيه؟ فانعم أهل الأرض من أهل النار، ده نعيمه كان عامل إزاي في الدنيا؟ ده أول موطن.

ثاني موطن لما قال: «ما رأيت نعيماً قط، ما مر بها خير قط». تتخيلوا إن واحد قال لي: لا يا رب، وعزتك وجلالك، أقسم بالله! واحد في موقف زي ده يكذب ويحلف؟ فبالله كذب! طب هو يا جماعة مش شاف نعيم في الدنيا ولا ما شافش؟ شافه، ده شاف النعيم اللي ما حدش شافه. أمال بيقول كده؟ هو فعلاً نسي بغمسة واحدة في النار؟ نسي!

فأنت بتجري ورا إيه وضيعت صلاتك؟ يا شيخ لا أنا بصلي الخمس فروض؛ ما إحنا قلنا لك بقى، قلبك فين؟ بتجري ورا إيه؟ إحنا كلنا سامع المتكلم، تلاقي بدنك في أمور الدنيا لغاية ما الأذان يأذن، وعاوز تدخل تلاقي قلب، هتجيبه منين؟ ده هتجيبه منين؟ أنت عشان تلاقي قلبك في الصلاة، فلازم تبص على قلبك شكله إيه في يومك كله. زي ما أنت مشغول بالدنيا وتحصيل الدنيا، عمرك انشغلت بأن أنا بقالي شهر مش عارف أخشع في الصلاة؟ أنا لازم أوقف وأقفل، أجيب قلبي إزاي؟

هتلاقي أول العلاج إنك ما تتلهيش بالتكاثر. يا جماعة والله في ناس بتقعد، أنا غريب جداً، من الأذان والإقامة وتلاقيه برضه ماسك التليفون مش سايبه، يا ابني طب وبعدين؟ ده أنت بعد لحظة هيتقال الله أكبر وهتخش الصلاة، هتجيب قلبي منين؟ لا هو مش مشغول بكده أصلاً، مش ده يمكن وهو في الصلاة هو مكمل الشات؟ أصلاً هو في الصلاة مش بإيديه صحيح، لكن إيه، بيحضر يعني، أخلص بقى وأبعت لفلان كذا وعلان كذا، وبيحضر في الصلاة تكملة اليوم.

﴿أَلْهَاكُمُ التَّكَاثُرُ﴾. أول العلاج العلم، العلم بإيه؟ إنك ميت. يا ابني أنت شوية وهتزور المقابر؛ ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ * حَتَّىٰ مُتُّمْ﴾، ودخلتم القبور. فضلت كده، تخلص حاجة وهي دي الدنيا يا جماعة. شباب، أوعى تفتكر إنك هتوصل لحاجة في الدنيا تقول بس الحمد لله بقى نبص على آخرتنا، ما بيحصلش؛ اللي هيجري ورا الدنيا مالهاش نهاية.

طيب ده كلام يعني وعظ عشان أدغدغ عواطفه؟ ده مش كلامي، ده كلام النبي ﷺ، ده مش كلامي، النبي قال كده عليه الصلاة والسلام. لو ليك واديين من ذهب، ووادي بين جبلين كده والثاني كله ذهب، قل لي أنت لو عشت حياتك كلها هتنفق الذهب ده؟ مستحيل. ربنا جاب لنا كده، وده نوع مجاهد، ده جبلنا كده ليه طيب؟ عشان نجاهد: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾. لو ليك واديين من ذهب هتقول الحمد لله وكفاية خالص، لتمنى لهما ثالثاً، يجي الثالث عاوز الثالث.

وفي حديث عيب جداً إن الإنسان يكبر وبيكبر معاه حاجتين، منهم حب المال، وربنا ذكر ده في القرآن: ﴿وَإِنَّهُ لِحُبِّ الْخَيْرِ لَشَدِيدٌ﴾. بتحب الفلوس؟ فما تفتكرش أيها الشاب وأيها الكهل وأيها الشيخ -وكلنا- إنك هتيجي في لحظة تقول إيه كفاية كده، كان غيرك أشطر، هي الدنيا بتسحل. طيب أوقف ده إزاي؟ افتكر القبر، نغص على نفسك حياتك. قال ﷺ: «أكثروا من ذكر هادم اللذات».

وأول العلاج إن تذكر المقابر، إن تذكر زيارتك المقابر؛ «أكثروا من ذكر هادم اللذات». فالموت لو ذكرناه لرحل عنا التشبث بالدنيا، وذلك التكاثر منها، فإذا رحل عنا رحلت عنا تلك الغفلة، ذلك اللهو، وأقبلنا على ما ينفعنا من ذكر الله وإقام الصلاة وإيتاء الزكاة. يبقى ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ﴾.

والله يا جماعة هذه اللفظة لو تأملناها حق التأمل لعملت في قلوبنا. ﴿أَلْهَاكُمُ التَّكَاثُرُ﴾ وكأني اللفظ ده لما تسمعه تحس إن في واحد في صعود، كل ما معاه فلوس يجي عاوز أكتر فيجيب، فيطلع أكتر فيجيب، وكأنه في صعود. وبعدين ﴿حَتَّىٰ زُرْتُمُ الْمَقَابِرَ﴾؛ هبدة! هبدة من واحد أحرز ما أحرز في الدنيا من مال وألقاب وشهرة وكل حاجة، لأيه؟ لحفرة تراب، مترين في متر. ما هو ده، عيشوا اللفظة؛ ﴿أَلْهَاكُمُ التَّكَاثُرُ﴾ واحد عمال يجيب ويجيب ويجيب، وفجأة ﴿حَتَّىٰ زُرْتُمُ الْمَقَابِرَ﴾، هبدة مش نازلة مش زي ما طلعت بالتدريج، بتنزل بالتدريج دلوقتي لا، ده أنت وصلت للقمة، قمتك، كل واحد ليه قمته بقى اللي هيموت عليها، وفجأة اتهبدت، أنت ملفوف في قماشة بيضا ومرمي في حفرة من تراب. ده مشهد لو فكرتوا فيه، دنيا إيه اللي بنجري وراها؟

وبعدين الآية دي فيها إثبات البعث، فين؟ لفظ «زرتم». ربنا ما قالش ﴿أَلْهَاكُمُ التَّكَاثُرُ حَتَّىٰ كُنْتُمْ فِي الْمَقَابِرِ﴾ مثلاً، أو حتى وريتم في التراب، ربنا قال ﴿حَتَّىٰ زُرْتُمُ الْمَقَابِرَ﴾، والزيارة لا تدوم. أنت بتزور واحد بتبيت عنده؟ لا ما فيش، أنت بتقعد ساعتين وتمشي، فالزيارة لا تدوم. ولذلك شوفوا يا جماعة، إحنا بس لو فهمنا، والله لو فهمنا لغة أبو حيان، ذكر أن أعرابياً سمع تلك الآية ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ﴾ فقال الأعرابي: بعثوا والله للقيامة! إيه ده؟ فين القيامة؟ قال لك أصل الزاير ما بيدومش.

فكانت الآية برضه فيها معنى بأول العلم، بداية الآخرة خلاص، إنك ميت ورايح قبر، والقبر ده شوية تراب، دي آخرتك، وده تأويل أو أحد التأويلات في قول النبي ﷺ: «ولا يملأ فاه إلا التراب». لو ليك واديين من ذهب عاوز الثالث، وبعدين في الآخر إيه؟ في الآخر هتتحط في التراب، لا لن يملأ فاك إلا التراب. ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ * كَلَّا سَوْفَ تَعْلَمُونَ﴾. لفظ «كلا» ده يا جماعة لفظ قوي جداً جداً جداً وفيه زجر قوي، بس لأننا مش عرب فمش مدركين هذا اللفظ، ولذلك أنا مش عايز أطول فيه بس هقرأ كلام.

البقاعي في لفظ كلا. قال فقل سبحانه معبراً بأم الروادع التي هي كلا وجامعة الزواجر والصوادع: ﴿كَلا﴾ [التكاثر: 3]. أي ارتدعوا، ارتدعوا أتم ردع، وانزجروا أعظم زجر عن الاشتغال بما لا يجدي، فإنه ليس الأمر كما تظنون من أن الفخر في المكاثرة بالأعراض الدنيوية، ولم تخلقوا لذلك، إنما خلقتم لأمر عظيم فهو هو الذي يهمكم، فكنتم لاهين كمن كان يكفيه -ركزوا في الكلمتين اللي جايين دول- كمن كان يكفيه كل يوم درهم فاشتغل بتحصيل أكثر.

يعني يا ابني لو عايش عيشة مكفية الحمد لله اعمل لآخرتك بقا، كمن كان يكفيه في كل يوم درهم فاشتغل بتحصيل أكثر. وكذا من ترك المهمة من التفسير وابتدى إيه يقول شوية كلام اللي أنا عايز أقوله، اللي هو معبراً بأم الروادع وجامعة الزواجر والصوادع، كلا الله الذي يقول ذلك، كلا سوف تعلمون في القبر، ثم كلا سوف تعلمون في القيامة على قول بعض المفسرين. يبقى دي مش من باب التوكيد، أكيد لا، ده ده علم وده علم تاني خالص.

كلا سوف تعلمون إذا وضعتم في قبوركم، ثم كلا سوف تعلمون إذا بعثتم يوم القيامة، كلا لو تعلمون في الدنيا علم اليقين. وده اللي احنا بنقوله، عايزين نعلم علم اليقين في الدنيا. فين جواب لو؟ ما فيش جواب، جواب للاول؟ ثاني! كلا لو تعلمون علم اليقين، آه إيه كان اللي هيحصل؟ ما فيش جواب هنا.

مش المعنى: كلا لو تعلمون علم اليقين لترون الجحيم، لا، احنا كده كده هنرى، كده كده الجحيم مرئي، مش علمنا، ما علمناش احنا، الجحيم مرئي. أمال فين الجواب؟ الجواب محذوف: كلا لو تعلمون علم اليقين لما ألهاكم التكاثر. يبقى كلا سوف تعلمون ثم كلا في القبر، ثم كلا سوف تعلمون في الآخرة، كلا لو تعلمون في الدنيا علم اليقين لما ألهاكم التكاثر.

يبقى احنا مشكلتنا فين يا جماعة؟ إن احنا ما عندناش علم اليقين ده أو لا نستمر عليه طويلاً، ولذلك قال صلى الله عليه وسلم: «لو تعلمون ما أعلم لضحكتم قليلاً ولبكيتم كثيراً». طيب إيه أشد شهوة يضعف أمامها الرجل؟ المرأة مش كده؟ «ولما تمتعتم بالنساء على الفرش». لو عرفتوا اللي أنا عارفه مش هتعرفوا تعيشوا أصلاً.

كلا لو تعلمون علم اليقين لما ألهاكم التكاثر، يبقى العلاج فين يا جماعة؟ أن نتعلم، نتعلم إيه؟ العلم الذي يخرج الدنيا من قلوبنا، نعرف أن الدنيا مهما عظمت حقيرة، حقيرة لا تساوي شيئاً. ولا ينبئك مثل خبير، الله سبحانه وتعالى اللي بيقول ده مش أنا. أنت عارف لما تيجي تحس كده بأيه؟ ألم شديد في جسمك ويمكن يكون غير محتمل مش مش مستحمله، وبعدين تروح لدكتور، أشهر دكتور بقا اللي هو إيه الكلمة بتاعتة ما فيش حد يعدل عليه، عمل الفحوصات اللازمة والبتاع وبعدين قال لك إيه: بقول لك إيه يا بطل ولا يهمك دي حاجة بسيطة جداً، دي حاجة كذا كذا يومين وهتروح لوحدها خلاص.

هتصديق وجعك ولا هتصدق الطبيب؟ هتصدق الطبيب، هتقول إيه؟ خلاص ما هو الطبيب عارف الأعراض ليه؟ أصل هو الخبير في الحتة دي. مهما كان وجعك قد ايه وأنت حاسس بيه، هيقول لك لا دي حاجة بسيطة خالص، ده مش عارف إيه في القولون فمش عارف فبيضغط على إيه فبس هو اللي مسمع في الحتة الفلانية، تقوم تمشي وأنت مطمن، صحيح وجعك برده أنت مش ماشي وجع راح لا بس اطمنت، ما صدقتش وجعك، صدقت الطبيب، ليه؟ لأنه خبير.

والعكس، حاجة بسيطة كده فروحت أكشف، الطبيب وشُّه أغير وجاب ألوان، في ورم خبيث كبير في الحتة الفلانية، تروح وأنت مش عارف تجر رجلك مع أن كوجع ما فيش وجع، صدقت الخبير. فأنا بقول لك يا ابني الدنيا اللي لهاياك دي وشايفها حاجة كبيرة قوي، الخبير بها بيقول لك دي ولا حاجة، ولا ينبئك مثل خبير. بيقول لك ولا حاجة، لا تعدل جناح بعوضة.

شايف الدنيا دي اللي أنت مهما جريت ما هتحصل منها شيء، يعني أنت وأنت لوحدك كده بطولك مهما حصلت من الدنيا يعني يعني هب أن أنت كنت أغنى واحد في مصر، خلاص بلاش أغنى واحد في العالم هتعرف تعمل أكتر من دي؟ ما حدش يعرف يعمل. أنت أغنى واحد في العالم في الجيل اللي أنت عايش فيه ده وبعدين قلت لك قيس، قيس مالك ده وملكك ده للدنيا في عصرك بس، يعني مش هقول لك من دنيا آدم لي خالص لا لا، أنت أغنى واحد في العالم، قيس بقى ملكك ده بالدنيا يساوي إيه فيها؟

يساوي حاجة ولا حاجة؟ مش بالدنيا من لدن آدم، لا لا بالدنيا اللي احنا فيها بس عصرك تجيلك تلاقي ولا حاجة، ما يساويش حاجة، يعني لو قسمنا ده على الدنيا اللي احنا عايشين فيها ولا حاجة. طب أقول لك قيسه بقى على سكيل أوسع شوية، من لدن آدم لقيام الساعة، لا ده صفر، صفر فعلاً. طيب شايف بقى ملكك ده اللي هو صفر، صفر اللي أنت عشانه ضيعت دينك وضيعت بفرض أن واحد مننا هيطلع هيبقى أغنى واحد في العالم يعني، وضيعت صلاتك وضيعت قربك من ربنا وضيعت طريقك وضيعت كل حاجة، وده يساوي صفر في الدنيا!

أقل واحد منزلة في الجنة يوم القيامة عارفين عنده قد إيه؟ قد الدنيا عشر أو إحدى عشر مرة. بعض العلماء قال إحدى عشر مرة مش عشرة، لأنه قيل له: اذهب فلك مثلها وعشر أمثالها. فأ أنت شايف أنت دلوقتي بتضيع إيه بايه؟ هو ده نوع العلم، يبقى تعرف حقيقة الدنيا دي، الدنيا دي كقيمة ما هياش قيمة، طب كمُدة ما هياش مُدة جداً، عجيبة والله ومع ذلك مسحولين فيها! كمُدة برده ولا حاجة، أنت عمرك يطلع قد إيه يعني؟ ولا حاجة خالص ولا حاجة. قلنا لكم قبل كده الحسبة الرياضية: أي رقم على ما لا نهاية بصفر، فالآخرة ما لا نهاية، فانت عيش زي ما تعيش، أنا ما بهزرش، حط الرقم اللي أنت عاوزه اللي نفسك فيه وعيشه، لو قلت مليار سنة ماشي روح عيش مليار سنة، ده قد إيه في الآخرة؟ صفر. أي واحد فاهم رياضة عارف أن ده صفر، حط المليار اقسمه على ما لا نهاية صفر.

فالدنيا حتى كمُدة ما هياش مُدة، كقيمة ما هياش قيمة تتلهي فيها، ألهاكم التكاثر. هو ده نوع العلم يا جماعة، العلم بحقيقة الدنيا ثم العلم بحقيقة الآخرة، يبقى تقرا في أوصاف الجنة وما أعد الله فيها للمتقين، زي الحديث اللي قلناه لكم من شوية ده، اللي هو أقل واحد، أقل واحد ده اللي هو آخر واحد خروج من النار، ده كان في النار، هيبقى ليه قد الدنيا إحدى عشر مرة، تضيع أنت ده بايه؟ وتقرا في أوصاف النار وما أعد الله فيها للفجار، وإزاي بغمسَة واحدة أنعم أهل الأرض نسي النعيم، فتروح لده برجلك.

وبعدين تقرا عن الله وتعرف أوصاف ربنا، تعرف أن ربنا مما يفعله سبحانه وتعالى أو مما فعله أن قال: ﴿هَؤُلَاءِ فِي النَّارِ وَلَا أُبَالِي﴾. ولا أبالي! أصل أصل يا يا جماعة الشباب دلوقتي يبص يمين وشمال يلاقي كله إيه؟ يقول لك ما كله ضايع يا عم ما كله ضايع، فإيه يعني إيه كله ضايع؟ يعني أنت متخيل مثلاً لو كله يستحق النار، افترضنا كده أن كل الشباب اللي حواليك يستحقوا النار، أنت فاكر يعني هتيجي يوم القيامة فربنا هيلاقيهم كتير فهيجول لا ما النار مش هتكفي مثلاً؟ لا ما أقدرش أعمل ده حاشاه، ﴿هَؤُلَاءِ فِي النَّارِ وَلَا أُبَالِي﴾.

طب النار تكفي؟ أه تكفي، ﴿يَوْمَ نَقُولُ لِجَهَنَّمَ هَلِ امْتَلَأْتِ وَتَقُولُ هَلْ مِنْ مَزِيدٍ﴾ [ق: 30]. ارمي! فهذا هو الرب الذي نعبده، رحمن رحيم نعم، لكن في نفس الآية: ﴿نَبِّئْ عِبَادِي أَنِّي أَنَا الْغَفُورُ الرَّحِيمُ * وَأَنَّ عَذَابِي هُوَ الْعَذَابُ الْأَلِيمُ﴾ [الحجر: 49-50] بعديها على طول.

فتقرا في الجنة والنار، تقرا في حقارة الدنيا، تعرف ربك سبحانه وتعالى بأسمائه وصفاته. قلت لكم من أصعب الآيات التي تزلزل بتخوفني فعلاً، قول الله عز وجل: ﴿يَا نِسَاءَ النَّبِيِّ مَنْ يَأْتِ مِنْكُنَّ بِفَاحِشَةٍ مُبَيِّنَةٍ يُضَاعَفْ لَهَا الْعَذَابُ ضِعْفَيْنِ﴾ [الأحزاب: 30]. اللي بيخوفني ختام الآية: ﴿وَكَانَ ذَلِكَ عَلَى اللَّهِ يَسِيرًا﴾ [الأحزاب: 30]. الخطاب لأمهات المؤمنين: نضاعف لها العذاب ضعف العذاب ضعفين، وكان ذلك على الله يسيراً. فأنت مين؟ أنت تطلع إيه؟

كلا سوف تعلمون، ثم كلا سوف في القبر، ثم كلا سوف تعلمون في الآخرة، كلا لو تعلمون في الدنيا علم اليقين لما ألهاكم التكاثر. والله لترون الجحيم، هنا في قسم محذوف: لترون الجحيم يعني والله لترون الجحيم، ثم لترونها عين اليقين، ثم لتسألن يومئذ عن النعيم. وده آخر يعني معلش ثلاث دقائق وخلاص نخلص، وده آخر العلاج في السورة وهو أن تعرف أن هذا الذي تتكاثر به ما هواش أسلم لك، هتسأل عنه.

يعني إيه؟ يعني مت ومعاك أو أحرزت في دنياك ألف جنيه، هتسأل عن ألف جنيه. أحرزت مليون، هتسأل عن المليار، ما ما هواش سلم كده ما فيش سؤال، فده برده يشغلك. ثم لتسألن يومئذ عن النعيم، وفي الحديث: «لن تزول قدم عبد يوم القيامة حتى يسأل عن أربع»، منها عن ماله في سؤالين في المال: جبته منين وصرفته فين؟ كيف تعاطيت مع ذلك المال؟ كيف تعاملت مع المال؟ فهتسال عن النعيم.

إيه النعيم اللي هتسأل عنه بقا؟ كل حاجة، كل حاجة، عارف يعني إيه كل حاجة؟ هديكم حديث نختم بيه مفاجأة، سيدنا النبي عليه الصلاة والسلام وأبو بكر وعمر راحوا عند أبي الهيثم بن التيهان، قعدهم في ظلة، شربهم ماية، أكلهم تمر، ماء بارد كان. قال صلى الله عليه وسلم: «إن هذا لمن النعيم الذي تسألون عنه يوم القيامة»، ظل بارد وماء بارد ورطب، فده من النعيم اللي هنساْل عنه. يعني إيه هنساْل عنه؟ يعني ده حرام؟ يعني ما هو النبي كل أهوه وشرب، ما كانش حرام، هتسأل من أين وفيما جبت الفلوس منين صرفتها فين؟ الأكل، كلت عشان تعمل إيه؟ لما جسمك قويت رحت عملت إيه؟ صرفت الطاقة دي فين؟ هتسأل. ﴿ثُمَّ لَتُسَأَلُنَّ يَوْمَئِذٍ عَنِ النَّعِيمِ﴾ [التكاثر: 8].

أقول قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.