الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته كما صليت على آل إبراهيم، إنك حميد مجيد. أما بعد:
إن شاء الله سيكون في درسين؛ درس بعنوان «رمضان الجوع»، وهو هذا الدرس، وفي درس ثاني سيكون اسمه «رمضان التعافي» إن شاء الله، وهنتكلم فيه عن الإباحية وكيفية التعافي من إدمانها في رمضان إن شاء الله. فاليوم «رمضان الجوع»، وإن شاء الله هنحيل على هذا الدرس في درس «رمضان التعافي» إن شاء الله. درس اليوم درس مهم جدا جدا يا جماعة.
وبدايته أن احنا عندنا حاجة اسمها صوم، وعندنا حاجة اسمها جوع، تمام الأمر أن نجمع بين الأمرین جميعا. احنا ممكن نصوم وما نجوعش؟ اه، ممكن. وممكن نجوع وما نصومش؟ اه، برده ممكن عادي، بتجوع في الأيام العادية وما تكونش صائم. ففي رمضان عاوزين نجمع بين الأمرين؛ أن نصوم ونجوع، أن نصوم ونجوع، وبعدين في سائر الأيام برده يبقى عندنا إيه؟ لنا قدر من الجوع حتى لو لم نصوم. لكن خلينا النهارده إن شاء الله الكلام ده هنتكلم عنه في الدرس الثاني «رمضان التعافي» إن شاء الله، إنما النهارده عاوزين نركز في معنى الجوع، ولنرفع ذلك شعارا في رمضان اللي جاي ده، أن يكون «رمضان الجوع»، أن نشعر بالجوع في هذا الشهر.
عاوز أنبه على مسألة قبل ما ننطلق إن شاء الله. المسألة هي أن لما نجي نقول: عاوزين نجوع، فاحنا عندنا جوع استعاذ منه النبي صلى الله عليه وسلم، فقد استعاذ من الجوع وقال: «إنه بئس الضجيع». فازاي النهارده جاي تقول: عاوزين نجوع، والنبي صلى الله عليه وسلم -صلوا على النبي- استعاذ من الجوع؟ هذا الجوع المستعاذ منه هو الجوع الذي يقعد بصاحبه، ولذلك قال: «إنه بئس الضجيع». فهو الجوع الذي معه لا يستطيع المرء أن يقوم بوظائفه، سواء الوظائف الشرعية أو الوظائف الحياتية، فهذا الجوع لا يؤمر به، لا يؤمر به، وإن كان يفعله ويأمر به بعض الغلاة من الصوفية، والإمام ابن الجوزي نبه على ذلك في كذا مكان. فهذا لا أمر به، وليس هو الجوع المراد من قولنا إن احنا عاوزين نجوع في رمضان اللي جاي.
المسألة الثانية اللي عاوز أنبه عليها أن احنا النهارده معظم الدرس؛ الدرس هنقرا من كتاب «إحياء علوم الدين» للغزالي رحمه الله. وكتاب «الإحياء»؛ كتاب «إحياء علوم الدين» كتاب عظيم الشان، ولم يصنف في الإسلام مثله. طيب نقراه؟ لا ما نقراهوش؟ أنا بنبه قبل ما أقرأ من الكتاب، الكتاب عظيم جدا وهذا باتفاق؛ باتفاق الموافق والمخالف للغزالي. ولذلك يا جماعة هتجدوا كتاب «الإحياء» يعني خدم خدمة عظيمة، سواء مختصرات، سواء تخريج أحاديث، سواء شروح، كتاب «الإحياء» ليه مخدوم؟ لأنه كتاب ما فيش زيه، ما فيش زيه.
طيب ليه ما نقراش بقى؟ ما نقراش ليه في «الإحياء»؟ لأن «الإحياء» في أشياء كثيرة لا ينبغي أن تقرا، وممكن الناس ما تنتبهش ليها، ولذلك من الأمور التي خدم بها أهل العلم هذا الكتاب أن اختصروه ونقوه من تلك الأمور اللي هي مش مناسب أنها تقرا أو فيها مخالفات. فابن الجوزي اختصر «الإحياء» في كتاب «منهاج القاصدين» ونبه على تلك المخالفات، وابن الجوزي عقل الحقيقة، يعني ابن الجوزي أولا اعتذر للغزالي يعني في بعض المخالفات، اعتذر للغزالي أن مثلا إنه إيه حاشا الكتاب بأحاديث موضوعة وشديدة الضعف وكذا. اعتذر له في مقدمة كتابه وقال: نقلها كما افتراها، يعني قال إيه؟ الغزالي كانت بضاعته من الحديث مزجاة. هذا كلام الغزالي عن نفسه بقى ماشي، يعني الكلمة دي كلمة الغزالي عن نفسه، أن بضاعته من الحديث مسجاة، يعني مخلطه كده.
فابن الجوزي لما اختصر للمنهاج وشال الأحاديث دي شديده الضعف والأحاديث الموضوعة اعتذر للغزالي عن هذا، وبعض المسائل لا؛ شد على الغزالي جامد، ومخالف في منهجه في بعض المسائل وكذا وكذا. ومن عقل ابن الجوزي من اختصر «المنهاج» ما حطش المسائل اللي إيه الغزالي مخالف فيها وابتدى يناقشها؛ لا ما عملش كده، شالها. طيب شالها وعمل إيه؟ عمل كتاب تاني خالص بمخالفات «الإحياء»، ماشي، علشان ينبه عليها في مكان تاني، ليه؟ علشان اللي داخل يقرا «المنهاج»، ابن الجوزي مش فاضي للخناقات، مش فاضي للخناقات، هو داخل عاوز يطهر قلبه، عاوز يتعلم شيئا من دين الله عز وجل، فقال لك: اهو كتاب «المنهاج» اهو اتعلمه. طيب المسائل الثانية اللي فيها مشاكل؟ راح أفردها بكتاب تاني خالص غير «منهاج القاصدين»، وبعد كده اختصر «منهاج القاصدين» إلى «مختصر منهاج القاصدين».
على كل حال، ليه بقول الكلام ده؟ احنا النهارده هنقرا من «الإحياء» ليه؟ لأن في الموطن اللي هقرأ منه، «الإحياء» أوسع من «المنهاج»، وده طبيعي، «المنهاج» مختصر لـ«الإحياء»، واحنا محتاجين الكلام اللي في أصل «الإحياء»، لكن هو ما فيهوش مخالفات إن شاء الله الكلام اللي هنقراه ده. فبنبه بس عشان إيه، في بعض الناس أول ما يسمعوا مثلا كتاب في كلام حلو يقول لك: إيه أنا هشتري الكتاب ده وأقراه أو هنزله بي دي إف وأقراه. فما حدش يعمل ده مع «الإحياء».
اليوم عاوزين نتكلم عن معنى الجوع الذي نريد أن نستصحبه في رمضان. طيب احنا ليه بنقول كده يا جماعة؟ كي يؤتي الصوم ثمرته فلابد أن نجوع في هذا الصوم. ليه؟ هنعرف بقى دلوقتي. شوفوا يا جماعة، الغزالي في كتاب «أسرار الصوم» -اتكلم طبعا مشهور جدا عند الناس أن الصوم ثلاث درجات، درجة إيه صوم إيه؟ في قبل الخصوص، العموم وخصوص وخصوص الخصوص معروفة- فلما جي اتكلم عن صوم الخصوص بقى، قال ايه: واما صوم الخصوص، وهو صوم الصالحين، فهو كف الجوارح عن الآثام، وتمامه بستة أمور. احنا عاوزين حاجة واحدة بس من السته (يعني صوم الخصوص لا يتم إلا بست حاجات، فمن هذه الأمور الستة قال الخامس): ألا يستكثر من الطعام الحلال وقت الإفطار بحيث يمتلئ جوفه، فما من وعاء أبغض إلى الله عز وجل من بطن ملئ من حلال، مش من حرام، يعني الوعاء بطنك إذا ملأتها من حلال فهو وعاء فهو وعاء مبغض لله عز وجل.
ماشي، وهيجي بقى كلام كتير فمش عايزين نقف مع كل كلمة، يعني قال: وكيف يستفاد من الصوم قهر عدو الله وكسر الشهوة إذا تدارك الصائم عند فطره ما فاته ضحوة نهاره، وربما يزيد عليه في ألوان الطعام؟ بيقول إزاي -عمالة تخبط في الترابيزة فتعمل صوت، بس كده خلاص- بيقول: إزاي هتستفيد من الصوم؟ إزاي هتستفيد من صومك إذا كنت بتيجي بعد الفطار؛ بعد المغرب، تقوم تفترى في الأكل، فتعوض الأكل اللي فاتك فين في النهار كله؟ فبيقول: من يفعل ذلك لا يستفيد من صومه شيئا. احنا ان شاء الله في درس «رمضان التعافي» هنقول إن شاء الله إزاي النبي عليه الصلاة والسلام يقول على الصوم: «فإنه له جُنّة»، وتيجي أنت أيها الشاب تقول: بصوم وما بيحصلش حاجة! صدق رسول الله صلى الله عليه وسلم وكذب فرجك.
فالمشكله فين هنا؟ المشكلة أن احنا مش بنصوم الصوم المراد، خلاص، فده إن شاء الله هنقول عليه في اللي هو إزاي؟ اللي هو زي ما هنقول كده: أنت ما بتحسش بالجوع خالص، تجي تتسحر تملى بطنك وبعدين فيفضل بطنك مليانة، مش حاسس بالجوع خالص طول النهار. ومنا اللي بينام طبعا طول النهار عشان يجي المغرب يأذن، تقوم تفترى، تاكل أكل يومين ثلاثة، فتلاقي طول الليل برده التخمة موجودة وما فيش جوع. فما تجيش بعد كده تقول: إيه لم أحرز التقوى، أنا مش عارف أركز في صلاة التراويح! منا اللي بيعاين ده، بيقرا إيه ولا الراجل بيقرا ولا هو فين أصلا، ولا احنا احنا مين؟ احنا جينا نعمل إيه؟ فده كله ليه؟ ده من آفات الشبع زي ما هنشوف كمان شوية إن شاء الله.
هنا بيقول: وكيف يستفاد من الصوم قهر عدو الله وكسر الشهوة إذا تدارك الصائم عند فطره ما فاته ضحوة نهاره، وربما يزيد عليه في ألوان الطعام حتى استمرت العادات بأن تدخر جميع الأطعمة لرمضان، فيؤكل من الأطعمة فيه ما لا يؤكل في عدة أشهور! وده على أبى الغزالي، وإلى الآن هذه العادة مستمرة، نسأل الله ألا يديمها وأن يقطعها. قولوا آمين، ولا خايفين؟ قولوا آمين أن احنا نجي في رمضان أكلنا يقل، فاحتياجاتنا من السوق ومن البقالة تقل، حياتنا تكون أبسط. فالغزالي بيقول من أيامه، ودي دي عادة مستمرة أن الناس بتاكل في شهر رمضان الأكل اللي بياكلوه في ثلاث أربع شهور في الأيام العادية، ولا حول ولا قوة إلا بالله. قال: ومعلوم أن مقصود الصوم الخواء وكسر الهوى لتُقوى النفس على التقوى، ده المقصود من الصوم؛ أن احنا نكسر أنفسنا علشان نقوى على التقوى. وإذا دفعت المعدة من ضحوة نهاره إلى العشاء حتى هاجت شهوتها وقويت رغبتها، ثم أطعمت من اللذات وأشبعت، زادت لذتها وتضاعفت قوتها، وانبعث من الشهوات ما عساها كانت راكدة لو تركت على عادتها.
يعني بيقول: لو فضلنا يا جماعة مستمرين على الحالة دي، دبيناها في السحور ودبيناها في الفطر، هنخرج من رمضان بحالة أسوأ من الحالة التي دخلنا بيها! ما تجيش بقى تقول: إيه أنا صايم طول الشهر، وليه أخرج كده والعادة السرية زي ما هي، والإباحية زي ما هي، والشهوة زي ما هي؟! يا ابني، هو أنت صمت يا ابني؟ أنت تعرف حاجة اسمها صوم؟ أنت ما صمتش أصلا، أنت ما صمتش، أنت طالع تخنان من رمضان، فجاي بتشتكي؟ بتشتكي إيه دلوقتي؟ صوم لما تبقى تصوم، يبقى تعال بقى نتكلم عن الشهوة، ونتكلم عن الإباحية والعادة السرية والحاجات دي لما تبقى تصوم.
طبعا أنا بقول: ما صومتش مش يعني الصوم باطل، عشان بس إيه يقطعوها وينزلوا مانشيت يقول لك: فلان الصوم عنده باطل! لا، الصوم مالش البطلان والصحة، دي مسألة؛ أنا بقول لك يعني ثمره الصوم، ثمرات الصوم لم تحققها ليه؟ لأنك ما جعتش. قال: فروح الصوم وسره تضعيف القوى التي هي وسائل الشيطان في العود إلى الشرور، ولن يحصل ذلك إلا بالتقليل، وهو أن يأكل أكل... آه، من مزايا الغزالي يا جماعة في كتاب «الإحياء» أن كتاب «الإحياء» ما هواش كتاب نظري فحسب، يعني مش كلام إيه تقعد تقرا كلام إنشائي لا؛ تلاقي الغزالي في الأبواب المحتاجة إلى تطبيق عملي يديك خطوات عملية: أيوه، أنا اعمل إيه دلوقتي؟ فالغزالي ما يسيبكش ويمشي كده خلاص.
فبيقول إيه بقى؟ بيقول: ولن يحصل ذلك إلا بالتقليل، وهو أن يأكل أكلته التي كان يأكلها كل ليلة لو لم يصم. دي يعني إيه؟ أنت بتصبح تفطر، مش كده؟ تيجي على الظهر العصر كده بتتغدى، تيجي بالليل بتتعشى، هو بيقول لك: سقط الغداء ده، طبعا كله في... أنا هروح أتعشى جبنة وبتاع، هو الغزالي بيقول بيقول لك إيه؟ كل أكلتك اللي بتاكلها بالليل، انسى أن أنت كنت بتتغدى وخلاص. يعني أنا يا جماعة الكلام ده يعني أخص به الشباب الحقيقه، وأنا مش عاوز أتطرق لرمضان التعافي خالص دلوقتي، لكن ليه بخص به الشباب؟ علشان مش هتموت والله لو قعدت 30 يوم كده، مش هتموت. يا عم اعتبرها كأنك أنت لو مرضت ولا جالك حاجة في بطنك ولا مش عارف إيه، الدكتور هيقول لك: ما تكلش غير مسلوق، مش هتاكل غير مسلوق. بيحصل ولا ما بيحصلش؟ بيحصل، مش كده؟ فانت عاوز تنجو من النار؟ اعمل التجربة دي؛ قول: رمضان ده أنا والله متعود أتعشى العشاء شكله إيه؟ حاجات خفيفة، أنا ده اللي هعمله.
ما رضناش نقول لك إيه؟ خليها أكلة واحدة في اليوم، يعني ممكن نعمل كده برضه في ناس، في شباب بتعمل كده، هي بتاكل أكلة السحر دي وخلاص، يجي المغرب يأذن يفطر كده على تمرة أو بتاع وخلصنا، أكلة أمتى؟ يقول لك: لا، بتسحر بقى، هي أكلة السحور. ماشي.
قال: أنا برضه أنا مركز، مش عايز أسهب في الحته دي خالص بالنسبة للشباب، بس ده علاج قوي لمساله الشهوة، وهي أن يأكل أكلته التي كان يأكلها كل ليلة لو لم يصم، فأما إذا جمع ما كان يأكل ضحوة إلى ما كان يأكل ليلا، فلن ينتفع بصومه. مش تجي لي بقى وقت المغرب كنت بتتغدى إيه وبتتعشى إيه، تقوم مجمع الغداء في العشاء كله في الإيه في وقت المغرب؟! لن تنتفع بصومك.
قال: بل من الآداب ألا يكثر النوم بالنهار حتى يحس بالجوع والعطش. ده من الآداب اللي برضه تلاقي احنا معظم النهار نايمين، قوم وحس بالجوع، قوم وحس بالعطش. فهذا يعمل فيك إن شاء الله اللي عاوز يربي نفسه، واللي عاوز يجاهد. بصوا يا جماعة، عشان برضه يعني عاوزين نفهم اللعبة هنا، احنا الكلام ده قلناه في درس أو في البودكاست بتاع «فلسفة الصوم»، وده مهم يتسمع قبل رمضان جدا جدا. دلوقتي عشان نفهم بس القصة دايرة إزاي؛ أنت دلوقتي في معركة، وبقى عندك كذا عدو: عندك الشيطان، وعندك الدنيا بملذاتها وشهواتها، وعندك النفس، فالنفس دي اللي أنت في معركة معها يجي رمضان يقويك على نفسك -ركزوا في اللي هقوله ده الله يكرمكم، كلام خطير جدا- يقويك على نفسك.
المهم أنت بتقع على نفسك واحدة واحدة من الحاجات دي انك بتقهرها بالايه؟ بمنع الشهوة. اللي هو أنت بتحبي الأكل مش واكل، بتحب الشرب مش شاربه، بتحب الشبع مش هتشوفي الشبع الثلاثين يوم. احنا كده بنعمل ايه دلوقتي؟ احنا بنقهر العدو. بنقهر العدو ليه؟ بنقهر العدو علشان لما تيجي تقعد بقى مع النفس بعد رمضان على طاوله المفاوضات أنت الكسبان، فأنت اللي هتمْلِي شروطك.
تخيل كده جيشين؛ جيش مهزوم وجيش كسبان، فجي الجيش المهزوم قال لك ايه: ما احنا محتاجين نعمل مفاوضات. الجيش الكسبان يقول له ايه: روح العب بعيد. مفاوضات ايه؟ روح العب بعيد. ايه اللي يكبر الجيش الكسبان يقعد على طاوله المفاوضات؟ ما فيش حاجة تكبره، مش كده؟ فإيه اللي يكبر نفسك أنها تسمع كلامك بعد رمضان؟ هي تقول لها: ايتها النفس، عاوزين بقى ايه نتقي الله وعاوزين ما نبصش للحرام. وتقول لك ايه: امشي العب بعيد. هي راكبة ومدلدلة، تسمع لك ليه إن شاء الله؟
طيب، احنا عاوزين نطلع ايه من رمضان ده عاملين ايه؟ عاوزين نطلع قد كسرنا تلك النفس، وزاد انبساطنا عليها، انبساط يعني مش الزقططة، أنت يعني بقيت أنت المنبسط، أنت اللي مديت سلطانك على تلك النفس. طيب، ده هيحصل إزاي؟ زي ما قلنا بحاجات منها أن تمنعها الشهوة، يبقى بتربيها؛ بتربيها أنها تصبر عن الشهوة.
طيب، تخيل كده حضرتك لما يجي بالنهار تقوم نايم طول النهار؛ صحيح أنت مش واكل أهو وممكن تبقى مش متسحر كويس، ولو قمت هتجوع فتقوم نايم. في المدة دي مين اللي كسبان، مين أنت ولا نفسك؟ نفسك، اللي هو ايه؟ جعت. طب اتخمد. هتخمد حاضر. هنا الاثنين تقوم داخل نايم. طب ليه النفس بتاعتك تدعوك لذلك؟ عشان مش عاوزة تحس بالجوع، مش عاوزة تشعر، أنت بقى: سأشعرك بذلك، اصحي، ما فيش نوم.
هو ده سهل ولا صعب؟ لا صعب، مجاهدة النفس مش حاجة سهلة، وعشان كده اتسمت ايه؟ مجاهدة. هي شيء صعب؟ آه صعب، ما قلناش أنه سهل، بس مهم جدا، ضروري جدا، لأنها لو هي اللي بقت الزمام في إيديها هتوديك نار؛ طول ما هي اللي سايقة، راكبة وسايقة، اعرف أن هي بتوجهك سكة النار. ليه بتوجهك سكة النار؟ يعني هي عاوزة تأذيك؟ لا، هي مش عاوزة تأذيك، بس هو في حاجة كده ربنا خلقها أن حفت النار بالشهوات، والنفس عاوزة شهوات، فهي مش مودياك النار عشان هي يعني مزاجها في النار، هي مودياك النار لأن النار حفت بالشهوات ونفسك تحب الشهوات، فهي مودياك للشهوة، هي مودياك للشهوة.
عارفين زي إيه كده مثال بسيط عشان تفهموه؟ يعني لما تيجي تروح للدكتور وأنت راجل بقى تحب الضاني وتحب السمين وتحب الحاجات دي، تروح للدكتور يقول لك: أنت عندك تصلب، وخلاص، يعني أنت على تكة، وخلاص مش هنلحقك، ماشي. طيب، فتعد لمم نفسك يوم اثنين ثلاثة شهر، ويتحط قدامك الطبق تلاقي نفسك ايه؟ ما قدرتس، تضعف وتروح دابب الأكل ده. هو أنت يعني عاوز تموت، رايح للموت يعني؟ أنت عاوز تموت؟ أنت مش عاوز تموت، بس أنت عاوز الشهوة؛ شوف الشهوة عامياك إزاي. اللفظ القراني: ﴿لَعَمْرُكَ إِنَّهُمْ لَفِي سَكْرَتِهِمْ يَعْمَهُونَ﴾ [الحجر: 72]. فأنت رايح تمد إيدك على الحاجة اللي أنت متيقن ضررها، ما فيش هزار، ويمكن تروح تمد إيدك وتقع من طولك، ويرروح يركبوا لك دعامات ومش هقول لك الحمد لله لحقناك المرة دي، ما فيش إسبوعين ثلاثة وتلاقي إيه؟ طب ليه؟ الشهوة؛ شايفين خطورة الشهوة دي؟
أهو نفس الكلام في الآخرة؛ حفت النار بالشهوات، فنفسك عاوزة الشهوة، والعقل يمنع منها، هي دي المعركه بقى دايرة دي معركة داخلية كده ها: نفس تريد الشهوة ولا تنظر في العاقبة، وعقل ينظر في العواقب، فده جند، وهذا جند، الجند الأقوى يغلب. يعني حضرتك قاعد في المسجد أهو وزحمة، وأنت جاي عارف أنه هيبقى زحمة، وعارف إن الطريق مش عارف عامل إزاي، ويمكن جاي من بعيد، ويمكن سايب عزومة، ويمكن سايب تجمع عائلي، ويمكن سايب مش عارف إيه، ما الذي أتي بك؟ جند العقل، ليه؟ لانك لما أتيت كنت ناظرا في العاقبة، لا ده أنا هسيب كل ده وهاجي المسجد، طب ده زحمة، طب ده مش هاجي؟ ليه؟ لأن العاقبة محمودة؛ هقعد أسمع كلام ربنا يمكن قلبي يرق، يمكن أتوب لربنا، يمكن، وفي الآخر أدخل جنة، ده جند العقل، من نفسك طبعا هو في التوفيق من الرب سبحانه وتعالى، لكن أنا بتكلم فيك أنت جواك داخليا هذا جند العقل ينظر في العاقبة. النفس مش كده، النفس مش كده، النفس: أحييني النهارده ووديني في داهية بكره. هذه النفس.
طيب، الحل فين؟ ما سيبهاش راكبة ومدلدلة، ما سيبش الزمام في إيديها، ما سيبش الديركسيون في إيديها. طب تاخده إزاي إذا كانت هي مستأسدة وأقوى؟ أنك تضعف تلك النفس وبعدين تزقها بقى تقول لها: أنا اللي هسوق. فده خلاصه ما نريده منك في رمضان، يوم لما رمضان يخلص عاوز بقى تقعد على طاوله لأنك مش تعرف تعيش حياتك كلها باللي كنتوا في رمضان، يعني مش هينفع، لو جيت قلت لك وده بيحصل يا شباب الناس بتعمله، لو جيت قلت لك كل طقة واحدة في رمضان طقة السحر بس، ماشي؟ اللي هي ايه بقى براحتك يعني لو عاوز تخلي طاقة السحر هو الأكل بتأكله على الفطار براحتك ما فيش مشكلة، بالذات الشباب يعني الكلام ده ما نندسش عليه قوي للناس الكبيرة بس الشباب اللي هو يجي يقول لك: الشهوة مش عارف إيه المغرب يأذن بق متمرة شكرا على كده، طالما ما هواش الجوع المقعد اللي أتكلمنا عليه في أول الدرس.
يعني لو لقيت إيه: لا ده أنا جعان جوع لدرجة أني مش هعرف أصلّي، أنا دايخ نايم اللي يجي يصحيني مش عارف أصحى مش عارف أقوم، لا مش ده الجوع اللي احنا عاوزينه، احنا عاوزين تبقى مستشعر الجوع بس وظائفك ماشية، ماشي؟ وكل أكله السحر. طب هتعرف تعيش حياتك كلها كده؟ مش هتعرف تعيش حياتك، مستحيل مستحيل، لآحاد الناس ممكن الناس تستمر كده، ممكن نستمر أقل من كده، لكن بتكلم كل الناس، يعني البني آدم الطبيعي ما يعرفش يستحمل كده، ما يعرفش يستمر كده، فواضح جداً أنك بعد رمضان هتقعد تعمل إيه مع نفسك؟ مفاوضات بقى؛ هنمشيها إزاي؟ أنت النهارده بقى طالع من رمضان إيه؟ أنت المنتصر، ساعتها نفس أي شيء هترميه لها هتقبله، إنما أنت في رمضان طالع زايد 10 كيلو وجاي بعدته، لا يا عم النفس بقى ما ينفعش الكلام ده، احنا من بعد رمضان مش هتقول لك اقعد يا ابني أنت بعد رمضان إيه، ما فيش، تسمعك ليه أصلا النفس؟ يعني تسمعك ليه أو تتخدع؟ عقلك بقى: ماشي يا حبيبي بعد رمضان خلينا نخلص رمضان بس يا حبيبي وبعدين نتكلم فيما بعد رمضان، تاخدك على قد عقلك، واضح؟
قال واضح ولا مش ولا واكلين أنتم مش فيش خالص؟
طيب، وصلنا فين؟ قال: بل من الآداب ألا يُكثر النوم بالنهار حتى يحس بالجوع والعطش، ويستشعر ضعف القوى فيصفو عند ذلك قلبه، ويستديم في كل ليلة قدراً من الضعف حتى يخف عليه تهجده وأوراده. كل ليلة أنا في قدر من الجوع مستشعره ليه؟ علشان تخف عليّ العبادة. ودي واحدة من فوائد الجوع ومن آفات الشبع اللي هتيجي إن شاء الله، أن من فوائد الجوع مش هقعد بقى أعيد في كل مرة الجوع، ما هواش الجوع المقعد اللي هو إيه بأقصى الضعف ده، خلاص، أنك بس تبقى مستشعر الجوع مش على طول شبعان، من فوائده أنه يعين على العبادة، بيخليك أنشط للعبادة. جربوها يا جماعه جربوها يعني مش هتخسروا حاجة، جربوا في رمضان ده أن أنا فطاري حاجة بسيطة هي التمرة ولا الثلاث تمرات بتوعي وبق مية وشكرا على كده، حد عاوز يشرب شوربة بتاعته وخلصنا، طب الأكل اللي مش هيقدر يبقى أكلة واحدة يقول: لما أبقى أصلي التراويح وارجع أبقى أكل مثلاً، جربوا.
قال: احنا مش عاوزين بقى نطول في الكلام بقى كتير، قال: وسيأتي له مزيد بيان في كتاب الأطعمة إن شاء الله تعالى. احنا هنا في كتاب إيه؟ في الأحياء. طبعا الأحياء مقسم أربعة أرباع عشان تعرفوا الكلام ده، اللي حب الأحياء وعاوز يقرا نقول له: روح اقرا مختصر منهاج القاصدين إن شاء الله، أو منهاج القاصدين لابن الجوزي؛ اللي عنده نفس أطول شوية وعنده همة، فاللي عنده همة عاوز يقرا يقرا منهاج القاصدين لابن الجوزي بلاش الأحياء، هيلاقي إن شاء الله الكلام أي كلام مفيد إن شاء الله هيلاقيه، اللي عاوز حاجة أصغر يروح لمختصر منهاج القاصدين.
خلاص، فهو مقسم أربع أرباع، الكتاب ربع في العبادات، وربع في العادات، وربع في المنجيات، وربع في المهلكات. دي خريطة الأحياء ومختصراته برده كلها مقسمة الأربع أرباع دول؛ فربع العبادات بيتكلم عن الفقه شوية وده موجود في أي حتة، وبعدين بيتكلم عن أسرار العبادة، اللي عمالين نقرا فيه دلوقتي ده مش الصوم، الصوم اللي هو يقول لك إيه: الإمساك من طلوع الفجر لغروب الشمس، ده الفقه، وإيه مبطلات الصوم وإيه مستحبات الصوم، ده كله في كتب الفقه عادي موجود في الأحياء ومختصرات الأحياء، لكن بعد كده يتكلم في أسرار العبادة، اللي عمالين نقرا فيه دلوقتي ده من أسرار الصوم، واضح؟
ثم يتكلم في العادات ثم المنجيات ثم المهلكات. طيب، فاحنا عاوزين بقى نروح دلوقتي للأطعمة، ليه بقول لكم كده؟ لأن ده بنتكلم في الصوم اللي هو في العبادات، قال لك: هيجي مزيد كلام عنه في الأكل أو في الأطعمة ده في العادات، فنروح له ونشوفها إن شاء الله.
طيب، لما راح بقى بيتكلم عن في آداب الأكل، اتكلم في الآداب التي تتقدم على الأكل، قال سبع آداب تتقدم على الأكل. الرابع، طبعا مش عاوزينها كلها برضه، الرابع: أن يحسن الجلسة على السفرة. إيه السفرة؟ احنا جايبين الفائدة دي عشان الكلمة دي بس على فكرة، إيه السفرة؟ عارفين السفرة؟ السفرة الفرشة اللي على الأرض، مش السفرة اللي احنا بنقعد عليها اللي هي الترابيزة السفرة لا، السفرة في اللغة هو ما يفرش على الأرض، أمال الترابيزة الكبيرة دي بيسموها إيه؟ بيسموها الخوان.
سيدنا النبي عليه الصلاة والسلام ما أكل على خوان قط. عمره في حياته ما أكل على ترابيزة. إيه رايكم؟ طب كان بياكل على إيه؟ على السفرة. على السفرة ليه معنيين؟ المعنى الأول: تواواضعا، ده معنى أول، يعني حرام ناكل... لا لا مش حرام ناكل على الترابيزة، مش حرام ناكل اللي احنا بنسميها سفرة دي، مش حرام ناكل عليها ولا... المعنى الأول: تواضعا. المعنى الثاني، وده اللي احنا عاوزينه، لما هتعد على الأرض الجلسة النبوية هتلاقي معدتك قافلة، الجلسة اللي النبي عليه الصلاة والسلام كان يجي يقعد لما يقعد زي القعدة كده اللي هي الناس الأطفال بيقعدوها في السجود عادي دي، ولا اللي هو الناس العادية بتعد يعني عشان ما يبقاش إيه تورك ها، اللي هو عادي قاعد على رجلك، ركبتك تاني رجلك وقاعد عليها عادي كده، أو يقعد على رجله الشمال نفس القعدة ويوقف رجله اليمين كده، خلاص، أظن كلنا عارفين القعدة.
طب القعدتين دول بيعملوا إيه في المعدة؟ بيخلي المعدة تاكل قليل، عشان كده تلاقوا إخواننا المواظبين على السنة يعملوا إيه؟ يقعدوا القعدة دي شوية، تلاقيهم روحوا مربعين، اعرف على طول إن إيه مين بيعمل كده؟ خلاص، ما القعدة قافلة المعدة، فهو شوية تلاقيه راح مربع، يعرف على طول أنه إيه، طب ليه طيب؟ ما هو ده مطلوب، المطلوب أن احنا نقلل أكلنا.
طيب، أنا ليه جاب الفائدة الرابعة دي بس؟ عشان كلمة السفرة دي، يعني حاولوا يبقى ده تدريب عملي، أن في رمضان اللي منا بيقعد على ترابيزات، إيه رايكم نبتدي في رمضان نحاول نقعد على الأرض ويبقى ثقافة في البيت؟ طبعا لو أنت الراجل في بيت مش أنت يعني أقصد أنت رب البيت، فسهلة أنك تمشي كلمتك وتقول: هنقعد على الأرض ولا إيه؟
واحد كنت في... مش هم، كنت فين يعني؟ فولد صغير كده يعني كان في ثانوي كده، فبيقول لي إيه: أنا مامي عمري ما أخليها أبدا تشرب سجائر وأنا في البيت، والله يا مامي بعد إذنك لو تشربي سجائر، قولى ليه؟ أخرج بره البيت.
فما أعرفش بقى يعني هنا احنا بس احنا هنا مجذر، ولا ما أعتقدش هنعرف نقعد على الأرض. ليه يا شباب الصوت قل ليه كده؟ طيب فقال كنت في السعودية زمان وبعدين المفرش ده عندهم اسمه سفرة، اللي سافر يعني الخليج المفرش ده عنده سفرة، فكنا طالبين أكل، وبعدين الراجل جه اللي هو بالأكل يعني فبيديني الأكل، كان هندي ولا باكستاني، يقول لي إيه بيديني الأكل ويقول لي: السفرة جوة، فأنا طبعا ما مش فاهم إيه السفرة يعني هلاقي بقى حاجة بتتنفخ، أنا جه في دماغي أن إيه هلاقي حاجة بتتنفخ وتكبر وتبقى ترابيزة ونقعد عليها بقى كلنا وناكل ونتبسط، مش فاهم أنا.
ايه السفري اللي جوه دي يعني حطيتها إزاي في الشنطة السفري؟
فبعدين بقى فهمت إن السفري هو المفرش ده، قال: أن يجلس الجلسة على السفري في أول جلوسه ويستديمها. شوف الغزالي والله يعني جميل، يعني عارف الحركات اللي إيه يعني كان ممكن يقول لك إيه: أن يجلس على السفري في أوله أو يسكت، لا قال لك: في أول جلوسه، عارف حركات النص كم بتاعة الآية ويستديمها، تفضل قاعد القعدة ما حدش يربع.
كذلك كان رسول الله صلى الله عليه وسلم ربما جثى للأكل على ركبتيه وجلس على ظهر قدميه، وربما نصب رجله اليمنى وجلس على اليسرى، القعدتين اللي إحنا قلنا عليهم، وكان يقول صلى الله عليه وسلم: «لا آكل متكئاً، إنما أنا عبد آكل كما يأكل العبد وأجلس كما يجلس العبد» صلى الله عليه وسلم.
طيب، يبقى دي فايدة عاوزين نطلع إحنا كالعادة دروسنا بتبقى فيها وعظ وفيها مسائل، نعمل إيه من الآخر عاوزنا نطلع نعمل إيه؟ أدينا أخدنا حاجتين نعملهم، صح؟ أول حاجة أنك تاكل على الفطار الأكل كنت بالليل، ما تجمعش الغدا مع العشاء مع كومبو في لا، دي أول حاجة أهي نعملها.
تاني حاجة، نحاول نقعد على الأرض، يبقى بنحاول نقعد وإحنا بناكل نقعد على الأرض، ده أول حاجة هيؤثر في توا موضوعك، دي أول حاجة، تاني حاجة بقى هيقفل معدتك شوية، قعدتنا على الكراسي مخلية بص أهو ما شاء الله، لا، نقعد على الأرض ونقعد قعدة النبي عليه الصلاة والسلام السنة صلى الله عليه وسلم، تلاقي معدتك قفلت شوية فتاكل قليل.
الخامس من الآداب؛ آداب الأكل: أن ينوي بأكله أن يتقوى به على طاعة الله تعالى ليكون مطيعاً بالأكل ولا يقصد التلذذ والتنعم بالأكل. قال إبراهيم بن شيبَة: إن منذ 80 سنة منذ 80 سنة ما أكلت شيئاً لشهوتي، مش يعني إيه أنا حابب أكل مش عارفة فروح أكل، لا، 80 سنة ما أكلت شيئاً لشهوتي مش عشان بحب كذا فأكله.
طب ليه هو حرام؟ مش حرام يا عم روح، بس أنت بتعمل إيه كده؟ مش حرام فعلاً يعني، يعني عشان بس إحنا مش جايين نشدد على الناس، بس هما يا جماعة كانوا مراقبين جداً لأنفسهم، عارفين كلمة سيدنا عمر: كلما اشتهيت اشتريت؟ اللي هو أنت طب هتجاهد نفسك إمتى؟ ما هو نفسك دي علشان ما تجركش للحرام أو المكروه، لازم تعمل إيه؟ تجاهدها شوية في المباح، تقوم ما تتجراش تقول لك خش دائرة المكروه أو دائرة الحرام، فهم كانوا بيعملوا كده: إيه عاوزة تأكلي إيه النهارده إيه المنيو في أيتها النفس؟ تقول لك والله نفسي في كذا، من عين الاتنين كله، فتقوم ما تبقاش أنت مساق تبقاش أنت اللي سايق. سهلة؟ لا مش صعبة ولذلك مجاهدة: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾ [العنكبوت: 69].
طب لو ما عملش كده يا شيخ؟ مش حرام، مش حرام، لكن إحنا جايين نكلم ناس عاوزة ترتقي في الدرجات، فبذلك نرتقي، خلاص.
قال: ويعزم مع ذلك على تقليل الأكل، فإنه إذا أكل لأجل قوة العبادة لم تصدق نيته إلا بأكل ما دون الشبع. ما تضحكش على نفسك تقول إيوه يا جماعة في حاجة، دائماً أما أجي أدرس النية لازم أقف عليها، أقول لكم دائماً بقول الكلام ده، بقول: إن النية خلي بالكم عشان دي مسألة في غاية الأهمية، إحنا نجي نقول لك إيه: أن المباح لو دخلت فيه النية تحوله لطاعة، ليه حسنة مش كده؟ وأن حياتنا معظمها مباحات أصلاً، يعني لو إحنا في الـ 24 ساعة الطاعة اللي هي عبادة كم في الـ 24 ساعة؟ هتلاقي أقل القليل مش كده؟ فهتلاقي معظم الـ 24 ساعة أنت في إيه؟ في مباحات، معظم اليوم كده يعني النوم، الأكل، واقف مع أصحابك قاعد، مباحات معظم اليوم كده، شغلك أصله مباح أصلاً.
إمتى يتحول بقى لطاعة أو لمعصية؟ بالنية، مش كده؟ وأخص ما يباح باستواء الفعل والترك على السواء، لكن إذا نوى بأكله القوى لطاعة الله، له ما قد نوى، يعني المباح مستوي الطرفين لا تثاب ولا تعاقب عليه، لكن لو نويت -خلينا على النظم يعني- بأكلك القوى لطاعة الله، له ما قد نوى، يعني واحد بكل وينوي بأكله أن يتقوى على العبادة، كده هيثاب على إيه؟ مش على العبادة بقى، يثاب على إيه كده؟ يثاب على العبادة إن شاء الله، يعني يثاب على الطعام نفسه، يبقى أنت حولت المباح لإيه؟
طيب، دائماً بقى أقول إيه بقى في درس النية؟ النية هي انبعاث القلب في اللغة، لأن إخواننا بيعملوا إيه بقى؟ يقول لك إيه، أقول له: أنت نيتك إيه؟ يقول لك: استنى، ده أنا مسجلها على الموبايل، والله عندي 10 نوايا، هو أن معنى النية أن المحرك لك على فعل هذا الشيء هو كذا، مش معنى النية هو اللي مكتوب في الموبايل، مش دي النية، يعني إيه؟ يعني أنا لما جيت أكل، أنا جيت أكل عشان كذا، هي دي النية اللي تثاب عليها، انبعاث القلب، مفهومة دي يا شباب؟
ليه بقول الكلام ده؟ عشان يجي يقول لك إيه: أنا باكل أنوي بأكلي التقوي على العبادة، يا راجل! ده ده اللي مكتوب في، إنما أنت باكل ليه؟ طب والله يا شيخ لا أنا، طب أقول لك طيب، هنا الغزالي برده ما سبكش، وعلى فكرة يا جماعة دي برده من مزايا الإحياء ومختصرات الإحياء، يعني ما حدش يتشوق يقول لك إيه: شيخنا في الإحياء، لا هتلاقوا ده موجود في المختصرات برده، إنه بيديك -إن جاز التعبير- صفة كاشفة، يعني يقول لك إيه: يعني أنت ناوي تقوى على العبادة بالأكل؟ تقول: أه، أقول لك: طب إيه رأيك بقى أنك لو شبعت هتضعف عن العبادة يا حدق؟ وهتنام في السجود وهتشوف الرؤيا، إيه رأيك لو أنت بقى نيتك صادقة أنت واكل عشان تتقوى على العبادة، مش هتشبع، ساعتها هتروح باصص في الأرض تقول: سيبني بقى في حالي وماشي، فهنا بيقول إيه بقى؟ الغزالي بيقول لك: فإنه إذا أكل لأجل قوة العبادة لم تصدق نيته إلا بأكل ما دون الشبع.
مش أنت عرفت أن الشبع هيثقل؟ الصراحة أه، وجربته وفعلاً بابقا واقف موخم في الصلاه مع إني نايم أصلاً طول النهار، برضو أنظر الصلاة موخم في الصلاة، أقول لك: طب خلاص لو أنت بقى عاوز فعلاً تكون بتاكل لتقوى على العبادة دي، قلل أكل وما تشبعش، تقوم تلاقي ذهن صافي وحاضر في الصلاة، فإن الشبع يمنع من العبادة ولا يقوي عليها، فمن ضرورة هذه النية كسر الشهوة وإيثار القناعة على الاتساع، يبقى تؤثر القناعة، تؤثر أنك تأكل أي حاجة دي مسألة تانية، يبقى في الكم هنقلل وما نشبعش.
طب في الكيف بقى هناكل إيه؟ أي موجود يتاكل، وبرده ما بنجراش الستات عشان الست قاعدة، يقول لك إيه: فاكر الشيخ قال إيه بقى في الدرس أنا أعمل؟ لا، مش كده، أنت وأنت واقفة في المطبخ وبتعملي تنوي بذلك إدخال السرور على أهل بيتك وإدخال السرور على جوزك، وإدخال السرور على نفسك، برده هيجي يزعق لك ويعكنن عليك فوالله يا جماعة والله إحنا في نعم، يعني تقعدوا كده تشوفوا حال النبي عليه الصلاة والسلام وحال الصحابة.
ما كان يشبع من الدقل، فين إيه الدقل؟ رديء التمر. الكلمة دي لو تاملناها سيدنا النبي عليه الصلاة والسلام ما كان يشبع ثلاثة أيام من الدقل وما أشبع أهل بيته كل بيوته، وبعدين تعرف أن الدقل ده رديء التمر، وبعدين تكتشف إحنا طبعا إحنا ما بنعرفش نربط قوي الدنيا ببعض، المدينة أصلاً كانت قايمة على إيه؟ على التجارة بتاعة التمر، اللي هو لو أنت ماشي كده تلاقي التمر واقع في الأرض كده يعني ما نخل، وكان المعنى يا جماعة أن سيدنا النبي عليه الصلاة والسلام وهو بقى رئيس المدينة يعني هو الملك بتاع الحته دي كلها، سيدنا النبي عليه الصلاة والسلام كان أسهل شيء أسهل شيء يبقى عنده تمر كويس لأن هي دي أصلاً المدينة، يعني كأنه صلى الله عليه وسلم يفعل ذلك اختياراً لا، هو أنا أه أنا ممكن أجيب التمر الكويس، وده ما يبقاش مستغرب أصلاً ودي حياتهم، لكنه صلى الله عليه وسلم يؤثر أمرا آخر ينزل عن كده كمان الدقل.
أنا أنا إيه اللي جاب الحته دي؟ ما كانش المفروض في الدرس أن هو حياتهم كده وبعدين المناخل دي ما كانتش موجودة في المدينة، ما كانش عندهم المنخل ده، ما كانوش يعرفوه، فيقولوا لهم: طب دي من يعني البدعة التي أحدثت بدعة، مش يعني بدعة بالمفهوم الشرعي، يعني بدعة ما كانش موجودة، ما كانش ما كانوش يعرفوا في المدينة كلها المنخل اللي إحنا بنسميه المنخل، فقالوا لهم: طب إزاي كنتم يعني تأكلون إزاي الدقيق والطحين؟ قال لك والله كنا نطحنه وبعدين ننفخ فيه، اللي يطير يطير واللي اتبقى يتبقى، ونعمل العيش كده وناكل بقى، تجي لك بقى زلطة، تجي لك قشرة، تجي لك اللي يجي يجي في بقك. المدينة كلها ما تعرفش المناخل، فدي كانت حياتهم.
ولذلك برده في حديث آخر في في باب صغير، طبعا هو في كتاب اسمه كتاب الجوع لابن أبي الدنيا، اللي عاوز يقرا فيه عشان يعني يستعد للموسم، واللي عاوز يقرا حاجة بسيطة ففي كتاب الجوع في رياض الصالحين، ده حاجة صغيرة يعني كم حديث كده، تحاول تعيش الحياة اللي كانوا عايشينها النبي عليه الصلاة والسلام والصحابة، كانت شكلها إيه؟ اقرا الأحاديث دي كده: ما كان يشبع من الدقل، ما كان يشبع من خبز الشعير، خبز الشعير، العيش اللي إحنا بنأكله ده يا جماعة ده عيش ش الحنطه القمح، في خبز تاني اسمه خبز الشعير وهو أردأ من حيث الايه الجوده، يعني هو أردأ من خبز الحنطه اللي هو القمح ده، وعشان كده الناس يعني ثقافتنا ما نعرفش حتى اللي يجيبه يقول لك عشان بعمل دايت ولا عشان بعمل مش عارف عشان هو صحي، ما يعرفش يكمل عليه يقوم راجع تاني الخبز العيش اللي إحنا بنأكله عادي اللي هو عيش القمح.
فسيدنا النبي عليه الصلاة والسلام ما كانش يشبع من خبز الشعير، مش خبز الحنطة أصلاً، خبز الشعير، وبعدين ثقافة أنهم يقعدوا ياكلوا العيش دي ثقافة سائدة، يعني أقول لك ما كانش يشبع من خبز الشعير، مش خبز الشعير بقى ومعاه إيه وجنبيه مش عارف إيه والحلو إيه واللا، كانوا عادي ممكن يقعدوا ياكلوا عيش، يعني جه في إحدى الروايات أن فاطمة جابت له إيه كسرة كسرة خبز، قال لها إيه ده؟ قالت له: والله خبزت النهارده رغيف فجبت لك حته. يا جماعة أنتوا فاهمين إحنا الحياة عاملة إزاي؟ فدي كانت حياتهم، دي كانت حياتهم.
أنا بس اللي استوقفني لما قلت إيه كانت بهزار ومش متحضر، لما قلت يعني كل أي حاجة، يعني أدي الكم والكيف كمان، يعني نحاول يا جماعة نحاول نحاول، أنا عارف طبعا مع الاعتياد بيبقى صعب التحول بس نحاول، يعني قول يا سيدي لو أنت متعود أنك كل يوم في رمضان بتأكل أكل يعني بجودة معينة، قول: لا، رمضان اللي جاي ده مثلاً للته هنزل عن اللي أنا كنت متعود عليه، خد خطوة، أه، يعني هعمل إيه يعني ما هاكل، أنزل بقى يعني مش راضي أقول عشان إيه ممكن أقول فيطلع ده أحلام حد أصلاً قاعد، فإيا كان يعني عشان المستويات طبعا بتبقى مختلفة، خلاص.
أه، لكن اللي دائماً بتحدى فيه دائماً في كل درس أتكلم في الحاجات، يقول إحنا مستوياتنا مختلفة، لكن أقل واحد فينا مستواه أعلى من الحياة اللي كانوا عايشينها في المدينة، ده تحدي، أقل واحد فينا مستواه أعلى من الحياة اللي كان النبي عليه الصلاة والسلام والصحابة عايشينها في المدينة، ليه بقول الكلام ده؟ عشان كل واحد فينا يقدر ينزل شوية، يقدر، ما جيش واحد يقول لك: يا شيخ أنا أصلاً ما فيش مش عارف إيه، اللي بيقول ما فيش ده لو جينا نقول له: طب تعال كده أنت عندك إيه، ونروح نشوف سيدنا النبي عليه الصلاة والسلام كان بيقضي حياته إزاي؟ هتلاقي أنه إيه؟ لا، هو في حياة فيها رفاهية.
قال: فإن الشبع يمنع من العبادة ولا يقوي عليها، فمن ضرورة هذه النية -نية أنك بتاكل عشان تعبد- كسر الشهوة وإيثار القناعة على الاتساع، قال صلى الله عليه وسلم وهذا الحديث عمدة وأصل: «ما ملأ آدمي وعاءً شرا من بطنه، بحسب ابن آدم لقيمات يقمن صلبه، فإن لم يفعل -دي الرواية اللي قدامي يعني- فثلث لطعامه وثلث لشرابه وثلث لنفسه». وكالعاده دائماً نقول إيه؟ يبقى إذن السنة قد ايه؟ مش الثلث، سيدنا النبي بيقول لك عليه الصلاة والسلام دي النصيحة النبوية، أنه أولاً قبل ما نقول بيقول لك إيه، بيقول لك: شر وعاء تملاه بطنك، فأنت حر، يدخل رمضان بقى تملى بطنك أنت حر، سيدنا النبي يقول لك كده عليه الصلاة والسلام.
تيجي تقول لي: أنا أنا سني، طب أنا سني، السنة أهي، اعمل السنة بقى يا سني ما تملاش بطنك. طيب، اعمل إيه يعني؟ أقول لك هو دي مش النصيحة، ده النبي عليه الصلاة الصلاة والسلام بيقول لك: لو ما فيش فايده في البعيد، كل تلت، إنما هي النصيحة إيه؟ مش هو اللي بيقول طبعا في البعيد يعني كلمة كده، النصيحة إيه النبوية؟
حسب ابن آدم، يكفيك لقيمات يقمن صلبك. يعني إيه؟ يعني الأكل اللي تاكله، اللي يدوبك تعرف تؤدي بيه وظائفك، وظائف حياتك ووظائف الشرع، ما تزودش عن كده. طب عاوز أزود؟ قال لك آخرك بقى الثلث. عمري ما أشبع؟ والله شبعت مرة في حياتك، ما فيش مشكلة، إحنا مش متشددين، يعني مش جايين نصعب عليكم الحياة يا جماعة. عاوزين تشبعوا كام مرة؟
سيدنا أبو هريرة، الحديث اللي كله يقعد يقول عليه ده، ويقول لك إيه؟ قال لك: الذي بعثك بالحق لا أجد له مسلكا. كله حافظ، مش كده؟ بداية الحديث أصلا، أنه كان يسرع إلى جوار منبر رسول الله صلى الله عليه وسلم، يظن الظن أن به جنون، وما به جنون، ما به إلا الجوع. يعني شوفوا اللي أنا عمال أقوله، أقل واحد فينا هو أعلن من مش عارف إيه، مش هقول لك أنت عمرك أغمى عليك من الجوع، عمرك شفت بعينيك حد أغمى عليه من الجوع في حياتك يا افقر واحد قاعد؟ مش أنت بقى كمان، عمرك شفتها بعينيك؟ أبو هريرة كان يسرع إلى جوار منبر رسول الله صلى الله عليه وسلم من الجوع.
فإحنا جايين نبص له في المره اللي شبع فيها. وسيدنا أبو هريرة شبع، طب شبع من إيه يا جماعة؟ والله العظيم إحنا، والله إحنا، يعني في نعم، شبع من لبن. لبن! ودي كانت بالنسبة له يعني مرة يعني شبع فرحان الراجل. لبن! فآهي مرة. أبو هريرة بعد كده طبعا بقى أمير، وبعدين معدي على الناس لقوهم حاطين زي شاليه، بشوية كده، تعال كل، ما رضييش.
وبعدين قال لهم: أنا مش ما رديتش عشان حرام، بس أنا فارقت رسول الله صلى الله عليه وسلم وهو حاله واحد اثنين ثلاثة، قاعد يحكي لهم بقى أن هو ما كانش بيشبع، ولا كانت بيوته تشبع، ولا كذا ولا كذا، ما رضييش يقعد ياكل. طب لو قعدت أكلت مش حرام برده؟ مش حرام، إحنا ما نقولش حرام، وبدليل الناس دي كانت قاعدة بتاكل، يعني ما هو اللي قالوا: تعال يا أبو هريرة دول مش كفار قريش، دول يا صحابة يا تابعين برده، يعني واضح.
لكن هي مقامات، أو إن شئت فقل أحوال تعتري النفس، يعني ممكن أبو هريرة في الموقف ده يقول لك: لا مش قاعد، لأنه تذكر شيئا أثر فيه، وممكن وقتاني عادي يقعد ياكل بالطبيعة البشرية، يعني واضح. فناخد بالنا بقى من المواضيع دي. قال: «ما ملأ آدمي وعاء شرا من بطنه». حسب ابن آدم لقيمات يقمن صلبه. دي النصيحة النبوية. طب ما فيش فايده؟ يبقى ثلث فثلث فثلث.
قال: ومن ضرورة هذه النية، نية إيه يا جماعة؟ أنك بتاكل عشان تعبد. هو عمال يقول لك إيه؟ بيفضحنا قدام أنفسنا، يقول لك: أنت بتاكل عشان تعبد، عشان تتقوى، أول حاجة ما تشبعش يا ناصح، هتشبع مش هتعبد، وهتفوتك التراويح، يا إما مش هتنزل كسلا، يا إما هتنزل وهتبقى مش عارف الراجل بيقرا فين أصلا، فما تشبعش. تاني حاجة من ضرورة هذه النية: ألا يمد اليد إلى الطعام إلا وهو جائع، فيكون الجوع أحد ما لابد من تقديمه على الأكل.
يبقى لو أنت فعلا بتاكل عشان تعبد، يبقى مش إيه، أنا مش باكل عشان المغرب، هو إيه المغرب؟ ما فيش مشكلة، المغرب بنصلي المغرب مش لازم ناكل، يعني مش لازم خالص. أنت تاكل أمتى؟ لما تجوع.
طبعا أنا عاوز أقول حاجة هنا عشان بيبقى قدامي في آباء، هيسمعوا بعد كده الدرس، آباء وأمهات عينوا ولادكم، لأن بيجي لنا برده شكاوى، أنا والله مش فاهم يعني، يقول لك: أنا نفسي اعمل كده، أمي أنا غضبانه عليك لو ما قعدتش، مش عارف، يا ستي سيبي ابنك، ابنك مدمن إباحية ومش عارف، يقول لك: هو الواد عاوز ينجو في الآخرة، ومش هيروح يقول بقى: أنا ممنحيه وبعمل عادة سرية، فيجي يقلل أكل, الولد يقول مثلا، تلاقي أمه إيه غضبانه عليك ومش عارف إيه، يقوم يبعت: طب أنا اعمل إيه دلوقتي؟ فالأب والأم عادي لا، ابنه ابنك مش هيموت، ما تخافش، سيب الواد، ما بياكلش خالص غير، سيبه ما ياكلش، عادي جدا. أو البنت طبعا، الإباحية في هنا وهنا طبعا للأسف.
قال: يبقى لا يمد يده إلى الطعام إلا وهو جائع، فيكون الجوع خلاص خلصنا ده، قال: ثم ينبغي أن يرفع اليد قبل الشبع، ومن فعل ذلك استغنى عن الطبيب. بيقول يا جماعة: إن الأكل بينزل وبعدين بعد شوية بيفرش كده يعني، وبرده بعض الأطباء قالوا: إن فينا زي إيه، سنسور كده للشبع، يعني إيه حساس كده، اللي هو طبعا الحساس ده بايز عندنا بس الطبيعي، ما بينزلش في الفيرجن المصري، الطبيعي أن البني آدم عنده يعني سنسور، يعني بيحس أنه شبعان.
فبعض الأطباء بيقولوا، الله أعلم يعني الكلام ده كلام أطباء، أن هو السنسور ده يعني فيه زي إيه، بياخد شوية وقت عشان يحس، يعني في ديلاي كده، يعني إيه؟ يعني هو مثلا تشبعت دلوقتي، هو يبتدي يحس بعد شوية، تكون أنت عمال تعبي برده. ولذلك نصيحة الأطباء: أنك تاكل وتسيب نفسك شوية كده، تلاقي بعض الناس عندها بعض الشعوب كده عندها ثقافة كده أن هي الأكل ما بيتاكلش على مرة واحدة، اللي هي الوجبة الواحدة، يعني إيه؟ مثلا يتحط حاجة تتاكل ويقعدوا شوية كده عشر دقائق ولا بتاع، عبال ما ياكلوا حاجة تانية.
ليه؟ ده بيدي فرصة، أول حاجة أن الأكل اللي نزل ده ياخد حجمه في المعدة، تاني حاجة أن الحساس بتاع الشبع ده يلقط. خلاص، إنا بناكل قبل ما نلحق، قبل ما نحس أن، دلوقتي أحس أن شبعت، مش الحق أكل كتير. مرة واحد من إخواننا، اه يعني اللي هي كلمة أبو هريرة بس هو قالها بشكل، قال لك: أنا لو حطيت حاجة هي تفضل في بقي خلاص، يعني هو خلاص أكله لغاية هنا، لغاية الزور كمان، قال: لو حطيت لقمة زيادة هتفضل جوه بقي، مش هتروح فين. كان أحد مشايخنا بيحك لنا عليه، يعني إحنا الحمد لله لحقناه وخدنا عليه وهو عايش ربنا يديله الصحة، بس بيحكوا لنا إيه بقى؟ كان زمان يعمل إيه؟ زي رحلات وبتاع للشباب، فكان يجي وقت الأكل فيديهم مربى وطماطم بس، ما فيش عيش، يعني هو يعني شوية مربى وطماطم.
فاللي بيحكيه برده شيخ، بيقول لي: آه، نقعد نقوله: طب إحنا نحط إه على إه ولا إه؟ طب نعمل إه يعني؟ هي طماطم يعني، مثلا طماطم وشوية مربى، يعني إه يتحط على إه ولا إه؟ في إه ولا يعني؟ هو كده بقى تصرفه. عاوزين نعمل الحاجات دي هنا، نجي في رمضان إن شاء الله ندي الدرس، الحلل طلعت بقى وتعلم أنت براحتك.
طيب قال: وسيأتي فائدة قلة الأكل وكيفية التدريج في التقليل منه في كتاب كسر شهوات الطعام من ربع المهلكات، فيلا نروح على ربع المهلكات. فات قد إيه كده؟ خمسة وخمسين دقيقة. ها، خمسة وخمسين؟ طب نروح نقعد في المهلكات خمس دقائق ولا بلاش؟ ربع المهلكات يعني.
طيب، كده شوفوا يا جماعة، شوفوا الكلام، الكلام هنا، إحنا خدنا شوية في ربع العبادات، وشوية في ربع العادات، وإحنا داخلين على ربع المهلكات أهو. طب يلا نروح بقى نشوف ربع المهلكات؛ لأنه أتكلم على شهوة البطن في ربع المهلكات، لأنها واحدة من المهلكات، بل دي أول حاجة أتكلم عليها أصلا في ربع المهلكات الغزالي، شهوة البطن والفرج، أول حاجة من المهلكات أتكلم عليها هي دي، خلاص؟
فتحت باب كسر شهوتي البطن والفرج، يقول الغزالي، طبعا ذكر أحاديث، أهم الأحاديث: «ما ملأ ابن آدم»، وده خلصناه. قال: وقال عيسى عليه السلام: «يا معشر الحواريين، أجيعوا أكبادكم وأعروا أجسادكم، لعل قلوبكم ترى الله عز وجل». يعني ازهدوا في الدنيا، ازهدوا في الدنيا، البسوا لبس متواضع، كلوا أكل متواضع، فبذلك تصفو النفس وتزهدون في تلك الدنيا، فتكون التجليات وتكون النفحات، ده المعنى يعني.
وفي الخبر: «أن الشيطان ليجري من ابن آدم مجرى الدم، فضيقوا مجاريه»، بالايه؟ سيدنا النبي ما قالش بالصوم صلى الله عليه وسلم، ركزوا يا شباب، قال: «فضيقوا مجاريه بالجوع والعطش». مش كده؟ يبقى أنت دائما شاعر بالجوع، سواء بقى صايم أو مش صايم. أيها الشباب أنا بكلم الشباب خصوصا، دائما أنت جعان. طب أنا مش صايم النهارده؟ عادي، في أيامنا العادية خليك جعان، يعني مستشعر جوعا، شيئا من الجوع، ما تبقاش على طول شبعان. تعرف إيه يا جماعة؟ السيدة عائشة روي عنها أنه: أول بدعة أحدثت في هذه الأمة الشبعة. ما كانوش يا جماعة، سيدنا النبي عليه الصلاه والسلام والصحابه مجتمع المدينة، ما كانش يعرف حاجه اسمها شبع دائم، ما كانوا يعرفوها دي أصلا، اللي هي الثقافة العادية في بيوتنا دلوقتي. يعني يعني ما بيشبعوش؟ لا، ممكن يشبع، بس شبع دائم، اللي هو كل يوم أنا شبعان، وكل ما أجوع أروح أكل، ما كانوش يعرفوه، يعني دي مش نمط، مش اللايف ستايل بتاعهم، ما كانوا يعرفوا ده.
فأول بدعة أحدثت، اللي هي الشبعة دي، على طول شبعانين، ما روح بقى ما تسألش بقى عن عبادة شكلها إيه، وما تسألش عن شهوة شكلها إيه، خلاص كله ضاع. قال: وقال صلى الله عليه وسلم: «المؤمن يأكل في معاء واحد، والمنافق يأكل في سبعة أمعاء». أن يأكل سبعة أضعاف ما يأكل المؤمن، أو تكون شهوته سبعة أضعاف، سبعة أضعاف شهوته.
وروي أن أبا جحيفة تجشأ في مجلس رسول الله صلى الله عليه وسلم، يعني إيه تجشأ بلغتنا العامية؟ اتكرع! اللي بيتكرع ده بيبقى إيه؟ واكل كتير، فتجشا في مجلس رسول الله صلى الله عليه وسلم، فقال له: «أقصر من جشائك، فإن أطول الناس جوعا يوم القيامة أكثرهم شبعا في الدنيا». اللهم سلم سلم.
قال: وأما الآثار، فقد قال عمر رضي الله عنه: إياكم والبطنة، فإنها ثقل في الحياة، نتن في الممات. بلاش على طول تبقى بطننا مليانة، إياكم وهذا. وقال شقيق البلخي: العبادة حرفة. الشباب أو الرجال بقى، ده الكله اللي بيسال يقول لك: أنا مش عارف أعبد ربنا، مش عارف أقيم الليل، مش عارف أقرأ، مش عارف أجيب ختمة، مش عارف أذكاري وأورادي، نقول له: طيب، الحل أهو، شقيق البلخي هيقوله لك، قال لك: العبادة حرفة، حرفة يعني صنعه يا جماعة، صنعه، العبادة دي صنعه، الصنعة محتاجه حاجتين، غير طبعا الصانع غير اللي هو المحترف، غير الراجل الصنايع يعني، محتاجه حاجتين: أول حاجة دكانة، مش كده؟ النجار عاوز دكانة، السباك عاوز مكان يحط فيه أدواته، السمكري، أي صنعة محتاجة دكان، ومحتاجة آلة بيها، فقال لك: آلة النجار غير آلة السباك، غير آلة الحداد، غير آلة السمكري، غير الميكانيكي، غير الكهربائي.
العبادة حرفة، أول ما نعرف العبادة حرفة محتاجين حاجتين: دكان وآلة. قال شقيق البلخي: العبادة حرفة، حانوتها الخلوة. العبادة صنعة، الدكانة بتاعتها الخلوة، مش مهم مش هنتكلم عن الخلوة دلوقتي، وعندنا شارحين كتاب إيه؟ العزله للخطابي، اللي عاوز بقى مش عارف كم درس؟ ستة عشر درس، فالمهم يعني مش هنتكلم عن الخلوة، حانوتها الخلوة، وآلتها المجاعة. قالت الآلة اللي هتشتغل بها عشان الحرفه دي تطلع، اللي هي العبادة: لابد الجوع، آلتها المجاعة.
وقال لقمان لابنه: يا بني، إذا امتلات المعدة نامت الفكرة وخرست الحكمة وقعدت الأعضاء عن العبادة. ده اللي بيحصل لنا. وكان الفضيل بن عياض يقول لنفسه: أي شيء تخافين؟ الأصل ده يا جماعة مؤثر جدا والله. الفضيل بيقول لنفسه يحدثه نفسه: أي شيء تخافين؟ أتخافين أن تجوعي؟ لا تخافي ذلك، أنت أهون على الله من ذلك. الفضيل شايف أن الجوع ده ربنا ما يديهوش لأي حد.
إحنا دلوقتي يا جماعة اتكلمنا عن الجوع أهو خلاص، المجلس فيه زي ما فيه وهيسمع زي ما يتسمع، الدرس نسبة قد إيه اللي هتطبق؟ هذه منحة إلهية، لا هي بحولك ولا بقوتك. الفضيل، إحنا دلوقتي بنيجي يقول لك: قل لي كدة، كلمني عن نعم ربنا، وأديك المايك كدة وأقول لك: يلا كلمني شوية عن نعم ربنا، هتلاقي كله رايح لعكس ده، يعني يقول لك إيه: الحمد لله مستوره، الحمد لله مش عارف. الفضيل بن عياض شايف أن من النعم التي تكون للأولياء الأولياء أن يجوع، فبيكلم نفسه يقول لها إيه: أي شيء تخافين؟ أتخافين أن تجوعي؟ لا تخافي ذلك، أنت أهون على الله من ذلك، إنما يجوع محمد صلى الله عليه وسلم وأصحابه. إنما أنت تجوعي، ما تخافيش أنت أهون على الله من أن تجوعي، إنما يجوع محمد صلى الله عليه وسلم وأصحابه.
وكان كهمس يقول: إلهي، أجعتني وأعريتني، وفي ظلم الليالي بلا مصباح أجلستني، فبأي وسيلة بلغتني ما بلغتني؟ الله أكبر! ده مش معترض يا جماعة، مش أجعتني وأعريتني ليه كدة يا رب؟ بيقو له: أنا يا رب، أنا أستاهل، أنا أستاهل أجوع يا رب، بأي يا رب؟ هو أنا، أنا لا ولي ولا صالح ولا تقي ولا أنا؟ جوع الكهمس شايفها نعمة، منحة من ربنا سبحانه وتعالى منة. إلهي، أجعتني وأعريتني، فبأي وسيلة بلغتني؟
ده بايه ده يا رب؟ يعني أنا ماستاهلش ده يا رب؟ ماستاهلش جوع يا رب؟
وكان فتح الموصلي إذا اشتد مرضه وجوعه يقول: إلهي، ابتليتني بالمرض والجوع، وكذلك تفعل بأوليائك، فبأي عمل أؤدي شكر ما أنعمت به عليّ؟ شايفين يا جماعة الناس دي كانت شايفه الجوع إيه؟ نعمة من الله عز وجل. وقال أبو سليمان الداراني: لأن أترك لقمة من عشائي أحب إليّ من قيام ليلة إلى الصباح. يعني لو جاهدت نفسي مجاهدة نفسي أن أترك شيئا من طعام، ده عندي أحسن من أن أقيم الليلة. وقال أيضا: الجوع عند الله في خزائنه لا يعطيه إلا من أحبه.
وكان سهل بن عبد الله التستري يعظم الجوع ويبلغ فيه، حتى قال: لا يوافي القيامة عمل برّ كترك فضول الطعام اقتداء بالنبي صلى الله عليه وسلم. شوف أنا يا جماعة ليه بقول الكلام ده أو ليه وقفت هنا؟ علشان بعض الناس بتفتكر يقولك إيه: يا عم ده دروشة، يا عم دول... لا، هذا اقتداء بالنبي، هي دي حياته صلى الله عليه وسلم. وما أعرفش قلنا الكلام ده هنا قبل كده ولا لا، سيدنا النبي عليه الصلاة والسلام مرة يخرج من بيته، خارج مش لاقي حاجة ياكلها، فخارج عاوز ياكل لا اله الا الله. ويلاقي مين كمان؟ أبا بكر. ويلاقي مين؟ الثلاثة خارجين مش لاقيين ياكلوا.
أنتم فاهمين يا جماعة احنا بنتكلم في إيه دلوقتي؟ الثلاثة الكبار بتوع المدينة ما فيش حاجة تتاكل في بيوتهم. وخلي بالكوا ما فيش حاجة تتاكل دي أنتم عارفين احنا دلوقتي بنقول لك إيه: ما فيش حاجة في البيت تتاكل، ده روح بس افتح الثلاجة هتلاقي إيه، لا في حتة جبنة هنا مش عارف إيه، وفي بيضاية وفي... ده اللي هو بيشوف نفسه ما فيش حاجة تتاكل. لا، هم دول لما بيبقى ما فيش حاجة تتاكل يبقى ما فيش حاجة تتاكل، ما فيش، ما فيش حاجة، عارفين ما فيش حاجة؟ ما فيش تمراية، ما فيش حتة عيش ناشفة.
يدخل سيدنا النبي مرة على عائشة صلى الله عليه وسلم كان يسأل هل في حاجة تتاكل؟ السيدة عائشة بتقول فلو قلنا لا يقول لك إني إذن صائم، خلاص يكمل اليوم إيه؟ صيام، ما فيش، يعني تقول له ما فيش أكل. فيجي في دماغك، آه، أصل لسه ما خلصتش الغداء... لا، لأن تكملة الحديث ده إيه؟ أنه دخل مرة فسألها في حاجة تتاكل، قالت لا، في لبن أهداه إلينا فلان أو فلان، شوية لبن... في شوية لبن عندنا. فمسك القدح وشرب. يبقى معنى كده لما كان قبل كده تقول له لا ما فيش حاجة، ما فيش شوية اللبن مش موجودين في بيته صلى الله عليه وسلم.
قال حتى قال: لا يوافي القيامة عمل برّ من ترك فضول الطعام اقتداء بالنبي صلى الله عليه وسلم في أكله. وقال: لم يرَ الأكياس شيئاً أنفع من الجوع للدين والدنيا، ولا أعلم شيئاً أضر على طلاب الآخرة من الأكل. فيا طلاب الآخرة، لا شيء أضر على آخرتكم من الأكل، انك تملى بطنك، «ما ملأ ابن آدم وعاءً شرا من بطنه».
طيب، فوائد الجوع بقى وآفات الشبع، الفائدة الأولى: صفاء القلب وإيقاد القريحة وإنفاذ البصيرة، فإن الشبع يورث البلادة، زي ما إحنا قاعدين كده دلوقتي، النهارده الجمعة بقى الفول والبصل... ده مش أي شبع يعني، ده شبع محرم دولياً. فان الشبع يورث البلادة ويعمي القلب.
الفائدة الثالثة -عدّوا الثانية إحنا...-: الانكسار والذل وزوال البطر والفرح والأشر، الذي هو مبدأ الطغيان والغفلة عن الله تعالى. يبقى الجوع، تلاقي دايما اللي جعan ده إيه، منكسر، عنده انكسار وعنده ذل بين يدي الله، يعني مش ذل يعني مسكنة في الدنيا، فده مطلوب برضو عشان ما تبقاش عندك البطر والأشر والطغيان.
الفائدة الخامسة، وهي أكبر الفوائد، هنقراها بسرعة لأن دي بتاعت درس رمضان التعافي إن شاء الله، وهي أكبر الفوائد: كسر شهوات المعاصي كلها والاستيلاء على النفس الأمارة بالسوء.
الفائدة السادسة: دفع النوم ودواء السهر. طب أنا أسهّر ليه يا شيخ؟ عشان تعبد. بسيطة، النوم موت، النوم موت، فالنوم تقليل للحياة، فانا مش فاهم أنت مبسوط بالنوم ليه يعني؟ أنت لو هتعيش 60 سنة فنومك لو زودته، لو أنت مثلاً بعد بقى ما تطلع كل حاجة فكنت هتعيش 40، فانت عمال تقلل الحياة اللي بتعيشها أصلاً. فإحنا لا نأمر أحداً بالنوم إلا واحد نومه أحسن من صحيانه، نقول له: يا ابني النوم عبادة بقى، نوم الظالم عبادة، روح نام! آه، ده نقول له كده، واللي أنا بقوله ده مش هزار، ده الغزالي قاله، قال لك اللي هنقوله روح نام ده اللي هو مين؟ اللي هو لما بيصحى بيعمل بلاوي، هو طول ما هو صاحي نقول له لا نام، روح نام، هو موت أحسن من حياة كلها عصيان.
يبقى دفع النوم ودوام السهر ده من فوائد الجوع، فإن من شبع شرب كثيراً ومن كثر شربه كثر نومه، ولأجل ذلك كان بعض الشيوخ يقول: لا تأكلوا كثيراً فتشربوا كثيراً فترقدوا كثيراً فتخسروا كثيراً. وأجمع رأي 70 صديقاً على أن كثرة النوم من كثرة الشرب، وطبعاً كثرة الشرب من كثرة الأكل. طب إحنا عاوزين نأكل قليل، ونشرب... عاوزين نشرب قليل؟ يبقى نأكل قليل، فلما يحصل كده هننام قليل.
وفي كثرة النوم ضياع العمر وفوت التهجد وبلاده الطبع وقساوة القلب، والعمر أنفس الجواهر وهو رأس مال العبد فيه يتجر، والنوم موت فتكثيره ينقص العمر، ثم فضيلة التهجد لا تخفى وفي النوم فواتها. كل... شوف المصائب اللي إحنا فيها كلها طلعت منين؟ من الأكل، كلها من الأكل. ومهما غلب النوم فإن لم يجد حلاوة العبا... ومهما غلب النوم فإن التهجد لم يجد حلاوة العبادة.
الفائدة السابعة: تيسير المواظبة على العبادة، فإن الأكل يمنع من كثره العبادات لأنه يحتاج... أنا هقرا الكلام ده يا جماعة، الكلام ده مهم جداً والله، الكلام ده مهم بس مش هُشرح، فركزوا بقى معايا، هم سطرين ثلاثة. بيقول: تيسير المواظبة على العبادة، فإن الأكل يمنع من كثره العبادات لأنه يحتاج إلى زمان يشتغل فيه بالأكل، وربما يحتاج إلى زمان في شراء الطعام وطبخه، ثم يحتاج إلى غسل اليد والخلال -يستخدم الخلة- ثم يكثر ترداده إلى بيت الماء -الحمام- لكثرة شربه، والأوقات المصروفة إلى هذا لو صرفها إلى الذكر والمناجاه وسائر العبادات لكثر ربحها. طبعاً دي الأوقات اللي إحنا أصلاً يعني بنرجوها عند الله، ده الوقت... الحاجة العدلة اللي بنعملها في حياتنا إن إحنا بنأكل ونشرب؟ بقية يومنا كله معاصي! هو بيقول لك الوقت ده أنت ازاي بتفرط فيه ده؟ يعني إيه بقى وقت هروح سوق، ووقت هروح سوبر ماركت، ووقت هقعد أكل، ووقت أشتغل عشان أجب الأكل... أكل إيه يا عم، كل أي حاجة وخلاص، كل أي حاجة وتفرغ لعبادة ربنا بقى.
قال: والأوقات المصروفة إلى هذا لو صرفها إلى الذكر والمناجاه وسائر العبادات لكثر ربحه. مشكلة والله يا جماعة، إحنا المشكلة إن إحنا في يوم القيامة هنبقى مع الناس دي، إحنا مش حاسين بالمشكلة الضخمة لأن إحنا كلنا شبه بعض في الآخر يعني، في الأول وفي الآخر كلنا قريبين من بعض يعني في حياتنا في نمط الحياة، وتيجي تقرا الكلام ده الناس دي كانت عايشة إزاي؟ هنبعث بقى يوم القيامة نلاقي الناس دي كانت معانا اللي هي إيه، اللي بتوفر وقت السوق ووقت السوبر ماركت ووقت عمل الأكل ووقت كذا... في ناس هتيجي معانا وقت أكل الخبز كان... عشان أكل الخبز بياخد وقت، كان يعمل إيه؟ أخته تسف له الكعك ويجي إيه يروح سافه كده وماشي.
طب ليه؟ إيه؟ قال لك: والله أنا لاحظت إن إيه ما بين السف وما بين أعد أكل وأمضغ قراءة 70 آية ولا حاجة، أنا فاضي بقى أعد أكل عيش؟ مش هاكل عيش، أنا أسف في أي حاجة كده وخلاص خلصت تسد المساله ونعرف نعبد ربنا.
طب هو الناس كلها مش مطلوب ده؟ ومن رحمة ربنا بينا إنه ما خلاش ده واجب علينا، لكن بقول لكم هي الجنة درجات، ودي برضو من رحمة ربنا، كان ممكن يبقى الجنة درجة واحدة واللي يلحق... طبعاً لو كانت كده مين هيلحق هنا؟ ما فيش حد، مع اللي بنسمعه ده مين هيلحق؟ درجات، فلا، درجة فيها النبيين والصديقين والشهداء والصالحين وحسن أولئك رفيقاً. وفي درجات تانية.
قال السري: رايت مع علي الجرجاني سويقاً يستف منه، فقلت ما حملك على هذا؟ قال: إني حسبت ما بين المضغ إلى الاستفاف 70 تسبيحة، فما مضغت الخبز منذ 40 سنة. حسبت في إيه؟ 70 تسبيحة بيروحوا، فبقى لي 40 سنة ما أكلتش خبز بقى خلاص، بسف أي حاجة كده وخلاص خلصت. فانظر كيف أشفق على وقته ولم يضيعه في المضغ، وكل نفس من العمر جوهرة نفيسة لا قيمة لها -لا قيمة لها يعني ما فيش حاجة تساويها، مش لا قيمة يعني مالهاش قيمة- فينبغي أن يستوفي منه خزانة باقية في الآخرة لا آخر لها، وذلك بصرفه إلى ذكر الله وطاعته.
نقف هنا عشان الوقت، أقول قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.