د. أحمد عبد المنعمبسم الله والصلاة والسلام على رسول الله صلى الله عليه وسلم. نبدأ بإذن الله سبحانه وتعالى أول مجالس وقفات مع أحاديث كتاب الأدب المفرد للإمام البخاري عليه رحمة الله. الإمام محمد بن إسماعيل الجعفي البخاري هو أشهر من أن نتكلم عنه. سنحاول كل مرة قول بعض الواجبات لمن أراد المتابعة، مع علمي أننا في الإجازة ولا أحد يحب عمل واجبات، ولكن من باب استغلال الإجازة. الإمام محمد بن إسماعيل ترجمته موجودة في كتب كثيرة، ومنهم من خص هذا الإمام العظيم بترجمة في كتاب مستقل. لكن من أراد أشهر الكتب، فكتاب سير أعلام النبلاء للإمام الذهبي أفرد شوطاً طويلاً له ولغيره، فمن المهم أن يكون هناك ارتباط بين الإنسان وبين أئمة هذا الدين.
أحياناً تجد حتى الشباب والأطفال عندهم معلومات عن بعض الممثلين وبعض لاعبي الكرة، فمن باب أولى أن يتعلم الإنسان عن قادة هذا الدين الذين نقلوا وحفظوا إلينا هذا الدين. الإمام محمد بن إسماعيل البخاري ولد سنة مئة وأربعة وتسعين هجرية، وتوفي سنة مئتين وستة وخمسين هجرية. يعني عاش حوالي اثنتين وستين سنة. الإمام البخاري مر بظروف كثيرة، وسأتجاوز النقولات الكثيرة لأبدأ في الحديث عن فضل الكتاب وكيف كان يتحرى فيه. هذا هو الكتاب الصحيح، وقد قلت في المجلس السابق في مقدمة الكتاب إن هناك فارقاً بين الأدب المفرد وبين كتاب الأدب الموجود في صحيح البخاري؛ لأن الإمام البخاري كان له شرط عالٍ في الكتاب الصحيح، وترك بعض هذه الشروط في كتاب الأدب المفرد؛ لأن مثل هذه الآداب ممكن يحدث فيها نوع من التساهل.
هل معنى هذا أن عندنا في كتاب الأدب المفرد أحاديث ضعيفة؟ إجابة هذا السؤال تستلزم تحرير معنى كلمة ضعيفة. سنقابل في رحلة الأدب المفرد بعض المصطلحات والسند، وهو الرجال الذين نقلوا إلينا الحديث، ونص الحديث نفسه يسمى المتن. الحديث لكي يكون ضعيفاً إما أن يكون هناك مشكلة في السند، أو في المتن؛ كأن يكون غريباً أو فيه نكارة أو مخالفاً لما استقر عليه من أصول الإسلام، أو السند فيه رجل فيه ضعف أو انقطاع. فهل سيقابلنا في أحاديث كتاب الأدب المفرد سند فيه ضعف؟ نعم، قد يوجد ذلك.
بالتالي قد يحكم بعض العلماء على الحديث بأنه ضعيف على مستوى السند، لكن الإمام البخاري يرى أن المعاني المذكورة في الكتاب معاني صحيحة، حتى لو وردت إلينا بسند ضعيف. هو يرى أن معنى الحديث يوافق أصول الشريعة، فالمعنى صحيح وينبغي أن يصل إلى أمة الإسلام، وينبغي أن نلتزم به. لذلك عندما تلاقي بعض الكتب تشير إلى حديث في الأدب المفرد وتكتب بجانبه ضعيف، فيقصدون ضعيف السند، لكن الإمام البخاري ارتضى أن يكون هذا الحديث في كتابه، فالذي يقلد البخاري عادي جداً أن يتأدب بهذه الآداب التي وردت في الحديث.
سأجيب على سؤال ما معنى كلمة ترجمة؛ لأن العلم يضيع بين الحياء والكبر. الترجمة في اصطلاح المحدثين غير النقل من لغة إلى لغة؛ بل ترجمة العالم تعني معرفة شخصيته. كان العلماء قديماً يضعون كتب الجرح والتعديل، وهو علم كامل يسمى علم الرجال، يعتني بوصف رجل رجل؛ مولده، وفاته، ومن درس عليه، ومن تلامذته وأقرانه، وسفره. هذا العلم يفيدنا في الحكم على السند؛ فلو وجدنا في ترجمته أنه لم يخرج من اليمن، ثم وجدنا في السند أنه روى عن إمام بصري أو كوفي، عرفنا أن هنا مشكلة. في ناس ترجمتها سطران، لكن هناك أئمة ترجمتهم حافلة، فالمباركفوري مثلاً عمل كتاباً عن البخاري فقط، فكانت ترجمة تستحق أن تستخلص في كتاب لوحده.
الإمام البخاري توفي ليلة عيد الفطر، سبحان الله قضى صيام رمضان، وليلة عيد الفطر كان ابتلي بابتلاء معين، وتعرض للأذى والظلم واتهم بأشياء، فضاقت عليه الأرض ورحبت، ودعا أن يقبضه الله إليه فاستجاب الله دعاءه. نبدأ الآن في قراءة كتاب الأدب المفرد. أخبرنا أبو ناصر أحمد بن محمد بن الحسن بن حامد بن هارون بن عبد الجبار البخاري، المعروف بابن النيازكي، قراءة عليه فأقر به، قدم علينا حاجاً في سفر سنة سبعين وثلاثمئة، قال: أخبرنا أبو الخير أحمد بن محمد بن الجليل بن خالد بن حريث البخاري، عن قلبه، حدثنا أبو عبدالله محمد بن إسماعيل بن إبراهيم بن المغيرة بن الأحنف الجعفي البخاري.
بدأ الإمام البخاري أول شيء في الأدب ببر الوالدين، وهذا من فقهه أنه كان يراعي قضية الآداب والحقوق. قال باب ما جاء في قوله تعالى: ﴿وَوَصَّيْنَا الْإِنسَانَ بِوَالِدَيْهِ حُسْنًا﴾ [العنكبوت: 8]. إن شاء الله لو أتم الله علينا الكتاب، سنبين فقه الإمام البخاري في ترجمته للباب؛ فالبخاري كان فقيهاً ومحدثاً، وكان اختياره لعنوان الباب وترتيب الأبواب إعجازاً علمياً، فكان له فقه في ترتيب الكتب نفسها في صحيحه.
قال: حدثنا أبو الوليد، حدثنا شعبة، أخبرني أبو عمرو الشيباني، يقول: حدثنا صاحب هذه الدار، وأشار بيده إلى دار عبدالله. المقصود بعبدالله هو ابن مسعود؛ لأننا ننظر إلى تلامذته؛ فابن مسعود له تلامذة مشهورون، وهذا يؤكد أنه عبدالله بن مسعود. يقول ابن مسعود: سألت النبي صلى الله عليه وسلم: أي العمل أحب إلى الله؟ انظر حرص الصحابة على التعلم، وابن مسعود لا يتحرج أن يقول: سألت النبي صلى الله عليه وسلم؛ لأنه يبلغ هذا التابعين، لكي ينتقل هذا العلم إلينا بعد أكثر من ألف وأربعمئة سنة.
سأل النبي صلى الله عليه وسلم عن أحب العمل، فهو مستحضر أن الله يحب أعمالاً أكثر من غيرها، ويريد أن يتقرب إليه بأفضلها، ولم يعتمد على التفكير العقلي أو التقدير الشخصي، بل رجع إلى مصدر السنة، وهو النبي صلى الله عليه وسلم. قال النبي صلى الله عليه وسلم: «الصلاة على وقتها». العلماء قالوا إن إجابات النبي صلى الله عليه وسلم تختلف باختلاف السائل وحاله، فليس كل ترتيب للأعمال واحد للجميع، فالأفضلية قد تخص الشخص ذاته، وبدأ بالصلاة لأنها الركن العملي الأول بعد الشهادتين، وقيدها بكونها على وقتها.
الصلاة لوقتها. قالوا اللام دي بتفيد إيه بقى؟ الصلاة لوقتها. ﴿فَطَلِّقُوهُنَّ لِعِدَّتِهِنَّ﴾ [الطلاق: 1]، يلزم من معناها أنه لما يجي يطلقها يطلقها في طهر لم يجامعها فيه؛ لأنها لو فعلت ذلك ستبدأ العدة مباشرة، فلماذا ابتداء العدة لأول وقت العدة؟ وإلا سيطول عليها لو طلقها في حالة الطلاق البين. فقالوا إن اللام أي لأول وقتها؛ فهنا لوقتها يعني لأول وقتها.
فصلوا الصلاة. طيب، استُشكل على ده: لو قلنا إن وقت الصلاة الأفضل على وقتها، هل من وقتها ابتدائياً؟ نحن عندنا وقت ابتداء ووقت انتهاء. عندنا وقت ابتداء للظهر ووقت انتهاء، عندنا وقت ابتداء للعصر ووقت انتهاء، وإن كان العصر وده بيغلط فيه كثير من الناس، لا فيه وقت قبل غروب الشمس ده للضرورة، ما تأخرش العصر، قال صلى الله عليه وسلم على اللي بيأخر يصلي العصر قبيل الغروب: «تلك صلاة المنافق».
طيب بعض العلماء قال: لو قلنا إن الصلاة دائماً أفضل في الأول؛ الفجر في الأول والظهر في الأول والعصر في الأول. طب العشاء؟ إذا كان النبي صلى الله عليه وسلم كان في مرة أخر العشاء وقال ده الأفضل وقتها، لولا أن يشق على الأمة كان ده أبعد الصلاة، أن نصلي دائماً بعد ما يعدي نص الليل أو ثلثه، وده هيبقى فيه مشقة على الناس، هيبقى فيه مسافة طويلة بين المغرب والعشاء. فقالوا طب إزاي بقى؟ فقالوا يبقى إذاً على وقتها، وقتها المحدد لها أن كل صلاة لها وقت أفضلية، أنت بتسأل عليه وتعمله. يبقى ارتباط الصلاة أن فيه وقت أفضلية، فهنا أنت بتسأل على مرتبة أعلى من مجرد الصلاة بس، لأ، ده أنت عايز تصلي الصلاة في الوقت الذي يحبه الله.
قال: ثم أي؟ وهنا ابن مسعود عايز يستزيد من العمل الصالح، كان ممكن يقول الحمد لله وكده كفاية، قال: ثم أي؟ خد بالك هو بيسأل عشان يعمل، هو كده هيزود على نفسه الأعمال، وده الغرض من ترجمة الإمام البخاري للباب وده الشاهد من الحديث. قال: ثم بر الوالدين. بعد الصلاة مباشرة نعم، قال: ثم بر الوالدين. هعلق على موضوع البر بعد ما ناخد حديثين كده.
قلت: ثم أي؟ برضو هنا بيزود على نفسه في الأعمال، قلت: ثم أي؟ قال: ثم الجهاد في سبيل الله. الله أكبر، يعني بر الوالدين قبل الجهاد في سبيل الله! قالوا هنا الجهاد زي جهاد الطلب اللي هو مش فرض عين عليه غير جهاد الدفع، ولأن جهاد الطلب أصلاً يشترط فيه إذن الوالدين، وزي ما راح يجاهد مع النبي صلى الله عليه وسلم وكان أبكى والديه قال: «ارجع إليهما». فتشوف تقديم قضية البر.
كثير من العلماء قال: إزاي الصلاة والبر قبل الجهاد؟ الجهاد هو ممكن يكون خروجة واحدة ورجوع، الصلاة شيء متكرر، أنت ظروفك بتبقى متغيرة؛ مرة مقريف، مرة غضبان، مرة تعبان، مرة كذا، وإنك تحافظ على هدوئك في معاملتك مع والديك طوال فترة حياتك ده صعب، فلذلك كان جهاداً. طب يعني أنا ما أغلطش خالص؟ لا، حتى لو غلطت تتدارك، ﴿فَإِنَّهُ كَانَ لِلْأَوَّابِينَ غَفُورًا﴾ [الإسراء: 25]، إنك لما ترجع وتكون من الصالحين، يعني لو أنت فيك صلاح حتى لو أخطأت وبدر منك شيء وغلطت وتعصبت لأن ده صعب أنك على مدار حياتك لا تخطئ، ترجع تتدارك ده مرة تانية. فده أمر محتاج جهاد مستمر متواصل، كل يوم تضبط المنبه لخمس فروض والتعامل مع الوالدين مهما كانت ظروفك وتقلبات حياتك، فده أمر عظيم قدم حتى على الجهاد في سبيل الله.
ابن مسعود بيقول إيه؟ شوف بقى ختام الحديث، قال: حدثني بهن النبي صلى الله عليه وسلم ولو استزدته لزادني. طيب هنا الإمام البخاري اكتفى بكده، ما جابش في رواية تانية، في مسلم جاب سبب لابن مسعود ما طلبش منه، قال: وتركت ذلك إرعاءً عليه، اللي هو التأدب مع المعلم. محاولاتي أنا لو أنت عارف يقول لك: لو حبيبك عسل ما تلحسوش كله. ما هو أنت ما تجيبش آخره، لأنك أنت النهارده لو جبت آخره المرة الجاية هو ما عادش هيديك حاجة، خلاص أنت استنزفته. ففي فقه حتى التعلم، لما تيجي تسأل إزاي أستفيد من المعلم؟ استخرج منه والقط الأشياء الطيبة اللي عنده من غير ما استنزفه بحيث إنه لما يجي المرة الجاية يكون أيضاً نشيطاً للتعليم. فهنا أيضاً أدب، وإحنا في باب الأدب في كتاب الأدب، إزاي ابن مسعود كان حتى بيتأدب في تعلمه من النبي صلى الله عليه وسلم.
طبعاً هو بيعلم تلامذته؛ يعني خلاص يا جماعة مش لازم بقى في كل مرة تقعد، كفاية كده يبقى كفاية. طيب الحديث التاني سريعا: حدثنا آدم، قال حدثنا شعبة، قال حدثنا يعلى بن عطاء عن أبيه عن عبد الله بن عمرو، هو سمى هنا عبد الله، لما قال عبد الله بس كان ابن مسعود هنا، قال عبد الله بن عمرو بن العاص رضي الله عنهما، قال: هنا مين اللي قال؟ عبد الله، المرة اللي فاتت اللي قال النبي صلى الله عليه وسلم كان بيتعامل مع النبي فده كان حديث النبي صلى الله عليه وسلم، هنا ده بيسموه إيه بقى؟ لما يكون اللي بيكلمنا بالحديث الصحابي، راوي نفسه وبس، بيسموه موقوف. يعني إيه موقوف؟ يعني السند فضل يكمل يطلع يطلع وتوقف عند الصحابي ما رفعوش، لو قال يرفعه إلى النبي صلى الله عليه وسلم يقول ده حديث مرفوع، يعني من اللي قاله النبي صلى الله عليه وسلم، يعني الصحابي اللي قاله لنا بس سمعه من النبي، لما الصحابي يقوله من نفسه يقول ده موقوف.
أحياناً بقى يقولوا حاجة واتقالت برضو في الحديث ده، يقولوا حاجة كده أقولها لكم ونترجمها مع بعض، بيقولوا: هذا أثر موقوف زي ده، ولكن له حكم الرفع. يعني إيه بقى الكلام ده؟ ما هو ممكن يكون الصحابي قاله من نفسه، لكن احنا أحياناً -مش احنا يعني علماء الحديث- بيبصوا في الأثر ده، لكن الكلام ده لا يقال بالرأي، لما يكون فيه حكم شرعي حلال أو حرام، لما يكون في أمر غيبي أو شيء مستقبلي يقول لك ده يستحيل الصحابي يقوله من نفسه، فأكيد هذا له، طبعاً فيه اختلاف ما هي الأشياء التي إذا قالها الصحابي أخذت حكم الرفع، ده برضو في المصطلح. فبعض العلماء قال الحديث ده قد يكون له حكم الرفع، ليه؟ لأنه بيتكلم عن شيء غيبي في رضا الله. طيب عبد الله بن عمرو بن العاص بيقول إيه؟ قال: رضا الرب في رضا الوالد، وسخط الرب في سخط الوالد. قال بعض أهل العلم فيه هنا سببية، أي رضا الرب قد يكون بسبب رضا الوالدين، يعني يرضى الله عنك إذا رضي أبوك عنك، وسخط الرب في سخط الوالد، يعني قد يسخط الله عليه إذا غضب عليك أبوك. حديث عجيب وله بعض الأنواع زي ما قلت، قالوا له حكم الرفع لأن عبد الله بن عمرو بن العاص مش هيتكلم عن رضا الرب هكذا بدون ما يكون سمع المعنى ده حتى من النبي صلى الله عليه وسلم. ده أمر عظيم يا جماعة أن الله سبحانه وتعالى يرضى عن العبد إذا رضي أبوه عنه، ويغضب على العبد إذا غضب أبوه عنه، أمر عظيم.
أنا بستغل طبعاً وجود عيالي في إني محتاج أعيد الأحاديث دي كتير أوي، وعايزين نقول هكذا وعايزين نحفظ الأحاديث دي يا جماعة. يا ريت كل واحد ييجي المرة الجاية، لسه معانا بر الوالدين البخاري مكمل شوية، يعني يا ريت المرة الجاية إن شاء الله معانا باب بر الأم، ناخد بر الأم ولا كفاية للوالد وخلاص؟ كفاية طيب. لا نكتفي كده المرة الجاية ناخد بس، أتكلم في معنى وقضية اهتمام الشريعة ببر الوالدين لأن ده مكمل معنا إن شاء الله.
لماذا لم يبدأ في بر الأم قبل بر الأب رغم أن صدق حديث عن السؤال بدأ بالأم خيراً؟ هنا الوالد مش لازم يشترط به الأب، الوالد لا يشترط فيه الأب بدليل هو بدأ أصلاً ترجمة الباب قال ما جاء في قوله تعالى ﴿وَوَصَّيْنَا الْإِنسَانَ بِوَالِدَيْهِ﴾ [العنكبوت: 8] بوالديه، ده هو بالعكس بعد ما اتكلم على الوالدين هنا بدأ قال باب بر الأم، الباب اللي بعده قال باب بر الأم، باب بر والديه وإن ظلماها، هنيجي ما نستعجلش إن شاء الله بإذن الله، الإمام البخاري يطول، ييجي عند الصدق ويطول فيه، ييجي عند المزاح والأدب فيه ويطول، بيمسك حاجة ويخلصها، التعامل مع الدنيا ويقعد فيها، بيمسك كل حاجة.
طيب بقول هنا لماذا اهتمت الشريعة بقضية بر الوالدين وأدتها الاهتمام ده؟ العلماء تناولوا الأمر ده بأكتر من جهة، أول شيء مسألة أن ده الفطرة السوية، اللي لما بتنتكس لما إنسان بيعق الوالدين ويتعامل بجحود، هذا الإنسان لا خير فيه مطلقاً، وغالباً لن يطيع الله سبحانه وتعالى، هينقلب حتى على ربنا، لأن الذي لا يحفظ الفضل والإحسان لوالديه لن يحفظ الفضل والإحسان لأي أحد حتى لله سبحانه، لأن إذا كان فضل الوالدين ملموس ومشهاد وهو بيشاهده، يعني هو نفسه بيشاهد ابنه وبيشاهد الأطفال وبيشاهد العيال بتعامله مع أباهات التعب والولادة، فهو يرى ذلك ثم يعرض عن كل ما قدمه له أبوه وأمه، فده إنسان منتكس الفطرة.
لذلك في ختام سورة الأحقاف بعد شوط طويل من سبع سور من الحواميم، من أول ما بدأ غافر وفصلت والشورى والزخرف والدخان والجاثية، آخر سورة خالص الأحقاف، وكل السبع سور من المهمة اللي بتتكلم عنها المجادلة مع الكفار والجدال، فآخر حاجة ربنا بيجيب لك بقى أن دي ناس فطرتها انتكست ما عادش ينفع معها غير سورة محمد إلا سورة القتال، إمتى الناس دي ما عادش ينفع معها غير القتال لما فطرتهم تنتكس، إمتى فطرتهم تنتكس؟ فلما جت بقى سورة العقوق ﴿أُفٍّ لَّكُمَا وَأَتَعِدَانِنِي﴾ [الأحقاف: 17]، وقد خلت القرون، شوف لأ بينكر البعث وبيعق الوالدين في نفس الآية، لأن خلاص ده واحد فطرته انتكست. يبقى أول شيء أن اللي بيعق الوالدين ولا يذكر لهما أي فضل ده فطرته منتكسة، وأصلاً لن يحفظ الفضل لأحد ﴿لَا دِينَ لِمَنْ لَا أَمَانَةَ لَهُ﴾، اللي مش هيبقى له فضل زي بالضبط حتى المثل: اللي ملوش خير في أهله ملوش خير في حد، ودي حتى من وسائل معرفة الشخص، شوف علاقته بأهله، وناس في الأول بيبقى يستغرب بيعق والديه ملوش أي خير في أي أهله مطلقاً، ده أنا مش بتكلم على حالات الظلم والاستثناء، مش بتكلم، أنا بتكلم على الحالة العامة دلوقتي، في ناس تقول لك بس أصل هم عملوا في، مش بتكلم على ده، بتكلم عن الحالة الأصل العام وهنتكلم على مسألة حتى لو والده ظلم، الباب اللي جاي إن شاء الله.
أحياناً بتستغرب شخص بيتعامل مع الوالدين وأهله وملوش أي خير، تلاقيه بيتعامل مع ناس كويس جداً والناس تقول لك أنت ظن مؤدب، مع مرور الأيام تكتشف أنه كان بيدور على مصلحته، وأنه كان بيتعامل مع فلان عشانه، لأن هذا الذي أعرض عن والديه وعن بر أهله هو لا يفكر إلا في مصلحتي، لا يتعامل بسياسة الإحسان، أنه يكون مكسور، هيجيلنا أسئلة أنهم كانوا بيجوا يسألوا إزاي أرد حق والدي علي إن هو شغله، لأن ده حالة من حالات الإحسان، يا جماعة الحر كانوا بيعرفوا الإنسان الحر غير العبد، يعني لسه الحرية هنا مش الحرية اللي عكس أنه أعتق، لا، الحرية في الروح وفي النفس، قال: الحر الذي يحفظ لحزة، يعني واحد تودد لك لحظة أنت بتحفظها له وشايلها له وشايل له الخير ده، ربنا سبحانه وتعالى قال في الحقوق في سورة النساء ﴿وَالصَّاحِبِ بِالْجَنبِ﴾ [النساء: 36]، بعض العلماء قال للزوج، وقال حتى من صحبك ولو مرة في السفر له حق عليك مسافر معك مرة واحدة، شوف المسلم يحفظ الحقوق إزاي، وهنا لذلك الإمام عليه رحمة الله بدأ بقضية الحقوق اللي على الإنسان قبل ما يتكلم على واجباتك تجاه نفسك، الحقوق اللي عليك.
تاني حاجة في مسألة بر الوالدين قضية الأسرة، الإسلام بيهتم جداً أن يكون فيه نواة اسمها نواة الأسرة، دي نواة المجتمع، لما بتنشطر وبيحصل لها انفجار وبتنفك، المجتمع بينهار، وده الحاصل في الغرب دلوقتي، ما عادش فيه أسرة، ما عادش في حتى قضية بر الوالدين دي مش موجودة، وده يعمل، واحد شافه وفي كتاب وإن كان ضخم شوية صعب شوية اسمه: كيف المواثيق الدولية كيف تهدم الأسرة؟ إزاي اتفاقيات سيداو وإزاي الحركات النسوية وإزاي الكلام وكتر الكلام عن مش عارف تمكين المرأة، كل ده إزاي أدى إلى تفكيك الأسرة وإزاي أن الولد مش عارف مين لو أبوه ما عملوش كذا يهرب ويسيب البيت والحقوق وإزاي بره.
يؤخذ الطفل من الأسرة، أصبحت ما فيش أسرة أصلاً، ما فيش أي تماسك. اللي مش هيحفظ الأسرة ومش هيحفظ بر الوالدين، هو أصلاً هيرتبط ليه ولا هيتجوز ليه ولا يدي؟ فأصبح بقى فرد، انتقل من إنه أسرة لبقى فرد. النبي صلى الله عليه وسلم، لأن دي البداية، لا قضية إن في نواة في أسرة في تآخي بين المهاجرين والأنصار، إن لازم تكون هناك نوايا ينبني عليها المجتمع.
ما ينفعش إن كل واحد يفكر في نفسه فقط. لو كل واحد بيفكر في نفسه فقط زي ما الوقتي بيطلبوا ده والحرية المطلقة، وإن كل واحد يعمل اللي هو عايزه، هنا مش هيتكون أي أسرة. لذلك هم عندهم برة في الغرب دلوقتي بيشتكوا إن ما فيش ذرية، ما فيش مجتمع، فبيجيبوا ناس من برة يهاجروا ويعتمدوا إن أولادهم ياخدوا الجنسيات. وده كتير ويتقال لهم صراحة من اللي هاجروا مثلاً كندا أو أماكن في أوروبا معينة، يقول له: إحنا مش عايزينك أنت، إحنا عايزين أولادك.
يعني أنت بتيجي تهاجر ومعك أولادك وهم بيشتغلوا على أولادك، لأن أولادك خلاص بيتكلموا لغتهم، مطلق النيف عن اللغة الأساسية بتاعتهم بلهجتهم، وبياخد أدبهم وأخلاقهم، وهو عايزه كده، وبيتجنس بجنسيته. فهو ما عندوش أصلاً أسرة بتبنى. لذلك ده من القضايا التانية، قضية يبقى أول حاجة الحفاظ على الفطرة وحفاظ الحقوق؛ لأن الإنسان اللي بيؤدي حقوق الوالدين يؤدي حق الله سبحانه وتعالى وبيؤدي الحقوق للناس، إنه بيحفظ الفضل. الحاجة التانية حرص الإسلام على الأسرة.
طولت عليكم ونكتفي بهذا القدر. المرة الجاية إن شاء الله نبدأ بقول الإمام البخاري: باب بر الأم ثم بر الأب، بإذن الله سبحانه وتعالى. نكتفي بهذا القدر، سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله.