د. أحمد عبد المنعمالسلام عليكم ورحمة الله وبركاته.
إن شاء الله بإذن الله سبحانه وتعالى درس اليوم هيكون بنحوم حوالين الكلام عن ممكن نسميه مميزات الخطاب القرآني ومفارقة هذا الخطاب القرآني عن الخطاب البشري. بمعنى أن الله سبحانه وتعالى أنزل هذا الكتاب رسالة للعالمين، هذا الكلام بما أن هذا الكلام اللي هو الوحي القرآن كلام الله سبحانه وتعالى، وبما أن الله سبحانه وتعالى ليس كمثله شيء، وبما أن الكلام صفة من صفاته سبحانه وتعالى؛ فليس هناك كلام ككلام الله سبحانه وتعالى. دي الخلاصة الفكرة المجملة دي اللي احنا هنحاول ندندن حواليها النهارده، إزاي أن الخطاب القرآني مختلف؟ وادي معنى كلمة مفارقة، في فرق رهيب. مفارقة الخطاب القرآني للخطاب البشري.
أنا عايز أتكلم عن النقطة دي النهارده؛ بسبب أننا أصبحنا في واقع للأسف في انتشار للشبهات وانتشار للشهوات بصورة عجيبة، وبتزداد كما قال النبي صلى الله عليه وسلم: «لا يأتي على زمان إلا والذي بعده شر منه». في كيفية معالجة الشبهات عند الناس وكيفية معالجة الشهوات، بيسلك الإنسان طرق عدة، بل بالعكس الواحد يرى ما شاء الله لا قوة إلا بالله كم الجهود المبذولة للردود على الشبهات، كم جميل ومبذول فيه جهد طيب، وسواء كما وكيفا، والتنوع المبذول سواء في البرامج النقاشية والفيديوهات اللي بتترفع على اليوتيوب أو المساقات التعليمية والبرامج اللي زي صناعة المحاور وغيرها، البرامج المبذولة للردود على الشبهات سواء تعليما أو ردا مباشرا، فيها شيء بصراحة بيبهج الإنسان، يدخل السرور على الإنسان أن الخير باق في هذه الأمة.
لكن اللي أنا عايز أتكلم عنه النهارده مش الطريقة الجدالية أو الكلامية اللي احنا ممكن بنستعملها لإقناع إنسان أو لتقرير العقل. لأ، القرآن له أسلوب مختلف تماما في حاجتين: في تقرير العقائد وفي تفنيد الشبهات، القرآن مختلف تماما عن الخطاب البشري، وده اللي احنا هنحاول النهارده هنتكلم عنه. الدرس النهارده هيكون عبارة عن مقدمة، وبعدين هنتكلم عن أو ممكن نسميها مواصفات أو وصف للخطاب القرآني، وبعد كده محتوى الخطاب القرآني، وبعدين طريقة توصيل هذا المحتوى في الخطاب القرآني ده رقم أربعة، وبعد كده خمسة أمثلة تطبيقية. ده المفروض عناصر الدرس اللي هنتكلم عنه النهارده إن شاء الله. مقدمة سريعة، رقم اتنين هنتكلم نبدأ بقى نتكلم عن الخطاب القرآني، هنتكلم عن المواصفات وعن المحتوى وعن الطريقة، ورقم خمسة آخر حاجة بعد المقدمة والتلات حاجات دول نجيب أمثلة تطبيقية للكلام ده.
المقدمة اللي أنا عايز أقولها شيء بدهي جدا، أن الله سبحانه وتعالى خالق هذا الإنسان. هذا الإنسان اللي هو الكائن المعقد المكون من روح وجسد ومليء بالمشاعر المختلفة، بل حتى الإنسان كجسد بعيدا عن سر الروح وأغوار النفس البشرية، حتى الإنسان كجسد في قمة التعقيد. بل أنت كل ما العلم بتطور وينظر في جسد الإنسان في العظام، في العضلات، في الأعصاب، في الأوعية الدموية، في المخ، في تفاصيل جسد الإنسان، يجد الإنسان في قمة التعقيد. وكل ما بيتطور العلم أكثر وبيصل إلى يعني رؤية أعمق، يعني بدل ما كان ينظر مثلا بميكروسكوب معين بدأ يبقى فيه نظرة أعمق وداخل الخلية أكثر والتفاصيل اللي داخل الخلية ومداخل الخلية، كل ما بندخل أعمق أكثر كل ما بننبهر أكثر، وكأن الإعجاز في خلق الإنسان لا يتناهى، كل ما بندخل أكثر ينبهر الإنسان أكثر. لذلك الكتب الجميلة المشهورة اللي بتتكلم في النقطة دي؛ التوقيع في الخلية، بيتكلم على قد ايه الخلية فيها إتقان عجيب جدا، يعني بصمة عجيبة جدا.
هذا الإنسان أنزل الله له سبحانه وتعالى وحيا. تخيل لو أنت اللي مطالب أنك تقدم خطاب مناسب للانسان ده، هتخاطبه إزاي وأنت أصلا مش قادر تفهم تفاصيله؟ أنت مش قادر تفهم أسرار النفس، مش قادر تفهم تفاصيل التفكير ولا طريقة التفكير ولا طريقة المشاعر. إنسان معقد جدا، وكل شوية الطب النفسي علم النفس بيطور من نفسه، وبعدين يا يقول نظرية وبعدين ينقضها أو يحاول يجمع بينها وبين النظرية السابقة وتطلع نظريات مختلفة ومدارس العلم المختلفة، كل ده من محاولة دراسة النفس البشرية. تخيل هذا الكائن المعقد سواء على مستوى الجسد أو على مستوى النفس، أنت عايز تقدم له خطاب، هذا الخطاب يهديه سواء السبيل، يهديه للتي هي أقوم في كل شيء، فانت هنا مطالب بشيء محال فوق الطاقة البشرية أصلا. فمن رحمة الله سبحانه وتعالى أنه أنزل لهذا الإنسان خطابا مناسبا له، موافقا لطبيعته البشرية، خصيصا لهذا الإنسان. يعني أنت متخيل أن القرآن ده مخصوص خاص للانسان؟ طبعا معه الجن بيدخل لأنه مكلف، لكن أقصد للإنسان؛ ليس لحيوانات، ليس لنباتات، ليس للسموات، ليس للأرض، خطاب مخصص للإنسان بهذا الكائن المعقد.
الفكرة عشان توضح أكثر، عندنا في علم الأدوية في الطب لما نيجي يقول لك إزاي الدواء يكون ناجح؟ إزاي نصل إلى اكتشاف دواء ناجح؟ فمن الطرق أن يقول لك إن الجسم فيه بداخله مستقبلات حسية. الدواء، احنا عايزين نجيب دواء، الدواء يدخل جوة جسم الإنسان بعد ما ياخد دورة معينة يمسك في المستقبل، يمسك في المستقبل الحسي بتاعه. لو الدواء ركب على المستقبل الحسي بصورة ملائمة تماما، شكل الدواء كان مصنوع كيميائيا بصورة تتناسب في الشكل مع المستقبل الحسي وركبوا مع بعض بصورة مطابقة، بيحدث التأثير. ده حتى احنا بنسميه إيه؟ إزاي الدواء لما يمسك في المستقبل الحسي لو مسك صح واتعمل صح يعطي التأثير؟
اللي أنا عايز أقوله لك أن أنت كإنسان القرآن تكلم الله به خصيصا لك، فالكلام ده متناسب تماما مع نفسك ومع روحك، يلتئم معه يعطي التأثير. فحينما لا تجد تأثير القرآن المشكلة عندك، أنت اللي فيه تغيير هنا في المستقبل الحسي عندك، في مشكلة في المستقبل الحسي. يعني لما الدواء ما بيجبش ما فيش نتيجة بنقول ممكن الدواء حصل منه مقاومة، حصل معارضة، حصل ما مسكش في المستقبل الحسي كويس. نحن في هذه الحالة في التعاون مع القرآن لا نتهم مش هنسميه بقى الدواء، احنا قلنا ربنا سمى القرآن شفاء مش بس دواء، ده باعتبار المآل الذي إن شاء الله لو الإنسان تعامل معه بما سيكون، مش سماه الدواء، ده سماه شفاء. يبقى المشكلة مش في هذا الدواء ومش المشكلة في هذا الشفاء، المشكلة فيك أنت، أنت اللي مش عارف تستقبل آيات القرآن. فتلقى من ربه كلمات، آدم تلقى الكلمات صح، فحينما تلقى الكلمات بطريقة صحيحة أي أثمرت هذه الكلمات وأنتجت التوبة. يبقى المشكلة معنا في كيفية تلقي معاني القرآن.
يبقى المقدمة اللي أنا عايز أقولها، أنت لابد أن توقن أن القرآن مناسب لك تماما، وأن لو أنت حاسس بغربة وبعدم تأثر وبعدم انتفاع من القرآن المشكلة ليست في القرآن. الإنسان يتهم نفسه أن المستقبل اللي هو الإنسان هو اللي فيه موانع منعته من استقبال القرآن بطريقة صحيحة، وهو مطالب بالبحث عن ذلك. يبقى القرآن أنزله الله سبحانه وتعالى شفاء لما في الصدور، رحمة للعالمين، هدى وبيانا للناس، وتبيانا لكل شيء، روحا وفرقانا، أنزله الله سبحانه وتعالى للناس. ودايما من الحاجات اللي الواحد بيحب يقولها للناس: حاولوا وأنتم بتقرأوا القرآن تتبعوا أوصاف القرآن عن القرآن، كيف تكلم القرآن عن نفسه؟
إذن دي كانت مقدمة في تقرير أن القرآن متناسب للنفس البشرية، مناسب معها؛ لأن خالق هذه النفس بل خالق هذا الإنسان بنفسي وروحي وجسده هو الذي تكلم بهذا الكلام مناسبا له. ﴿أَلَا يَعْلَمُ مَنْ خَلَقَ وَهُوَ اللَّطِيفُ الْخَبِيرُ﴾ [الملك: 14] سبحانه وتعالى.