الشيخ أمجد سميرقال فصل في صوم التطوع، وفيه فضل عظيم في الصوم لحديث: «كل عمل ابن آدم له، الحسنات بعشر أمثالها إلى سبعمائة ضعف»، يقول الله تعالى: «إلا الصوم، فإنه لي وأنا أجزي به». وهذه الإضافَة للتشريف والتعظيم، خلاص.
قال: أفضل صوم التطوع صوم يوم وفطر يوم، هذا أفضل الصوم على الإطلاق، أن الإنسان يصوم يوم ويفطر يوم. ويحسن ويجمل بالشباب أن هم يكثروا من الصوم طبعا؛ لأنها نصيحة النبي صلى الله عليه وسلم لهم: «من استطاع منكم الباءة فليتزوج»، ثم قال: «ومن لم يستطع فعليه بالصوم، فانه له وجاء». وهنا بيجي أسئلة كتير: بنصوم وما فيش فايدة! نقول: إن الصوم الذي هو لك وجاء، الصوم الذي هو لك وجاء صوم مخصوص. دلوقتي لو واحد صام فأمسك عن طعام وشراب من الفجر إلى الغروب، فاذا غربت الشمس أطلق العنان لبطنه، خلاص، البطن رائد الفرج، فامال يعمل ايه؟ لا، احنا هنصوم الشباب يعني اللي بيشتكوا في الحته دي، فنقول له: تصوم ثم تفطر على لقيمات يقمن صلبك؛ يبقى تجمع بين نصائح النبي صلى الله عليه وسلم بالصوم، وبين قوله: «بحسب ابن آدم لقيمات يقمن صلبه»، فما تفطر ما تدب بقى على الفطار خلاص. وهذا، وطبعا تاتي برضه ما تصومش عن الحلال وسرحان في الحرام بقى ليل ونهار، يعني ده ماهواش مجاله الفقه دلوقتي، لكن على كل حال فهذا الصوم ينفعك إن شاء الله.
طيب، يعني نصوم؟ وده اللي أنا أصلا كنت بقول المسألة دي عشان كده، يعني نزوِّد عن يوم ويوم؟ اه زوِّد، شاب بيشتكي من فرط الشهوة وما عندوش إنه يتجوز وما عندوش الإمكانية المادية ولا النفسية أو كده، فنقول له: زوِّد في الصوم، اسرد الصوم ما فيش مشكلة، خلاص. يعني أصوم أكمل شهور؟ اه أكمل، ما فيهاش مشكلة، خلاص.
طيب، وأفضل صوم التطوع يوم ويوم، لأمره صلى الله عليه وسلم عبد الله بن عمرو بذلك، وقال: هو أفضل الصيام. طبعا عبد الله بن عمرو كان عابدا من العباد، وبعدين فكان يصوم كتير وكان يقوم كتير، وحصل مشكلة بينه وبين مراته في ليلة العرس. عمرو بن العاص عارف إن ابنه ممكن يسرح شوية في العبادة، فجه تاني يوم لمرأة ابنه يعني سألها عن ابنه، فبيقول لها: كيف عبد الله؟ فتقول: نعم العبد لربه، يعني طبعا هي المراه برضو مؤدبة مش عاوزة تشتكي جوزها، فقالت: ولكنه لم يعرف لنا فراشا ولم يفتش لنا كَنَفًا. قال عبد الله: فاتاني أبي فعضني بلسانه. شوفوا الشباب دلوقتي كل دماغه في ايه؛ هو عمرو بن العاص حتى، عبد الله بن عمرو حتى في الرواية أظن عارفين من تمام قوام الرجل أن يقول فلما دخلت بها، هو اللي بيحكي الحكاية اللي أنا بقولها دي، كان عبد الله نفسه، فهو قال: فلما أدخلوها علي -كأنه مش بيقول فلما دخلت بها، قال: فلما أدخلوها علي- قمت لربي، سرح في الصلاة، الليلة راحت كلها في الصلاة. ثم كان ما كان من القصة الجميلَة دي، قالت: نعم العبد لربه، ولكن لم يعرف لنا فراشا ولم يفتش لنا كنفًا. قال: فاتاني أبي فعضني بلسانه. وهنا بقى ظهر قول النبي صلى الله عليه وسلم لعبد الله بن عمرو الحديث المشهور ده.
وبعدين عبد الله بن عمرو قعد يزداد، يعني يقول له: صوم يومين؟ فيقول له: الأول صوم ثلاثة أيام. قال: أقدر أكثر من كده. طب صوم الاثنين والخميس. أقدر أكثر من كده. قال: صوم وفطر يوم. قال: أقدر أكثر من كده. النبي صلى الله عليه وسلم بقى قال له: ليس أفضل من ذلك. أو كما قال صلى الله عليه وسلم في الرواية اللي بيجيبها هنا، وهو أفضل الصيام. وده الشاهد بقى اللي معانا: أن تصوم يوم وتفطر يوم، وشرطه ألا يضعف البدن حتى يعجز عما هو افضل من القيام بحقوق الله تعالى وحقوق عباده اللازمة، وإلا فتركه أفضل. لو كان الصوم يضعف البدن لهذه الدرجة أنه هيترك الحقوق الواجبة عليه، نقول: تركه أفضل، ترك الصوم خلاص. وده ساعات بيحصل في حق بعض الناس، يقول لك: أنا لما أصوم أضعف عن... طبعا مش واحد يفرح بده ويجري ويقول: أنا خلاص ما بصومش، لا نقول له: اتسحر وزود في السحور شوية، اعمل كل اللي تقدر عليه بحيث إن الصوم ما يضعفك، واضح.
قال: ويسن صوم ثلاثة أيام من كل شهر، ودي أي ثلاثة تجزئ. ركزوا بقى، يعني تعالوا كده نقرا كلام البهوتي على بعضه، قال: ويسنه ثلاثة من كل شهر، وكونها البيض؛ يعني يسن كونها البيض، خلاص. يبقى واحد، أنا ليه بقول الكلام ده يا جماعة؟ ممكن واحد يجي في أيام البيض، عبد العظيم بعت الحكاية: عبد الله بن عمرو بيقول: انكحني أبي امرأة، بدايتها كده، بداية القصيدة ما بيقولش: نكحت امرأة، انكحني أبي امرأة ذات حسب، فكان يتعاهد كنته مثلا فيسالها عن بعلها، فتقول: نعم الرجل من رجل لم يطا لنا فراشا ولم يفتش لنا كنفًا، وفي رواية زي ما أنا قلت لكم كده: نعم العبد لربه منذ أتيناه. فلما طال ذلك عليه ذكر النبي صلى الله عليه وسلم فقال: وفي رواية تانية زي ما أنا قلت لكم كده ايه: فاتاني أبي فعضني بلساني، فقال: ألقني به، فلقيته بعد، فقال: كيف تصوم؟ قال: كل يوم. قال: وكيف تختم؟ قال: كل ليلة. شايفين الهمة؟ يبقى اهو الشباب بقى اللي مش عارفين، طب ده النبي عليه الصلاه والسلام هيرده علشان هو اتجوز، اللي مش عارف يتجوز بقى هو العلاج اهو: صوم كل يوم واختم كل ليلة، إن شاء الله وبقى تعال قابلني بقى لو عندك أي حيل لتفكر في شهر ولا غيره.
قال: صم في كل شهر ثلاثة، واقرأ القرآن في كل شهر. قلت: أطيق أكثر من ذلك. قال: صم ثلاثة أيام في الجمعة. قلت: أطيق أكثر من ذلك. قال: افطر يومين وصم يوما. قال قلت: أطيق أكثر من ذلك. قال: صم أفضل الصيام صيام داوود، صيام يوم وإفطار يوم، واقرا في كل سبع ليال مرة. فليتني قبلت رخصَة رسول الله صلى الله عليه وسلم، يتمنى عبد الله بن عمرو أنه كان قبل... وذلك أني كبرت ووضعت فكان يقرأ على بعض أهله السبع من القرآن بالنهار والذي يقرأه يعرضه من النهار؛ ليكون أخف عليه بالليل، وإذا أراد أن يتقوى أفطر أياما وأحصى علشان يصوم مثلهن وصام مثلهن، كراهة أن يترك شيئا فارق النبي صلى الله عليه وسلم عليه، يا سلام على الأدب. قال أبو عبد الله: وقال بعضهم في ثلاث وفي خمس، وأكثرهم على سبعة.
طيب، جزاكم الله خيرا، شوفوا الأدب يا جماعة، شوف احنا النهارده أسهل حاجة تسيبها العبادة ازاي، أسهل حاجة تسيبها، تسيب السنن وتسيب الذكر، وتسيب عبد الله بن عمرو يقول: يا ريتني كنت قبلت رخصة النبي عليه الصلاة والسلام. ليه؟ طب ما هو ما هي سنة سيبها؟ قال لك: لا، أنا ما سبش أبدا حاجة اعتدتها، خلاص. وكان صلى الله عليه وسلم ديمة، وكان إذا فعل شيئا أثبته صلى الله عليه وسلم؛ يعني لو عبد ربنا بعباده يثبتها، خلاص ما يسيبهاش بقى، دي الناس اللي عاوزة الآخرة، ماشي الحال، جزاكم الله خيرا.
قال: نرجع تاني بقى عندنا دول مسألتين مش مسألة، ويسن ثلاثة من كل شهر وكونها البيض، ماشي، يعني أفضل شيء انك لو هتصوم ثلاث أيام في الشهر تصوم إيام البيض، صح كده؟ والله غلط كده، طيب علشان ما حدش يعني... هي مش اسمها الإيام البيض يا جماعة زي ما الناس بتقول، يقول لك ايه: هنصوم الأيام البيض، لا هي هي اسمها أيام البيض، اسمها كده أيام البيض من غير ألف ولام في الأيام، ماشي، ما اسمهاش الإيام البيض، اسمها أيام البيض. ايه ده؟ طب ايه الفرق؟ ويه ما اسمهاش الإيام البيض؟ هي الأيام كلها بيضا صح؟ إنما الليالي في الأيام دي هي اللي بتبقى بيضا؛ لأنها دي الليالي القمرية دي الليالي القمرية، فبتبقى لياليها بيضا لأن القمر طالع، فهي اصلا اسمها أيام الليالي البيض، هي اسمها كده، فهنا في مضاف محذوف اللي هي كلمة الليالي. فلما نجي نقول: هنصوم... اللي بيكتبوا بقى المنشورات على الفيسبوك ولا بيذكروا الناس جزاهم الله خيرا، لكن يكتبوها صح بقى نقول ايه: غدا تبدا أيام البيض، مش تقولوا تبداوا الأيام البيض، لا، خلاص، تبدا أيام البيض هكذا، وتبقى أنت فاهم إن يعني أيام الليالي البيض، فهمتوا دي؟ يبقى هنا في مضاف محذوف اللي هي كلمة الليالي.
قال: ويسن ثلاثة من كل شهر، طيب يبقى أنت هتصوم ثلاثة من كل شهر، تصومها تصوم أيام البيض. ليه بقى بقول دول مسألتين؟ علشان واحد هيقول: طيب, يفوتني الأيام دي ساعات أو بتبقى البنت مثلا تقول إيه: مش وقت الصيام عندي ما ينفعش أصوم أو أي عذر يعني، فنقول: ما تفوتش الثلاث أيام، هات أي ثلاث أيام في الشهر، خلاص. أي ثلاث أيام في الشهر، طبعا ما تكونش أيام مكروهة، لا تفرد جمعة ولا تفرد سبت مثلا بالصوم، هيجي معانا الكلام ده، إنما هتقيد ثلاث أيام في الشهر فأدركت بعض الفضل، مش كل الفضل. ليه بعض الفضل؟ لأن فكرة إن ثلاث أيام من كل شهر دي فيها حديث لوحده، غير خالص أيام البيض، خلاص.
قال: وكونها... طيب، ليه فيها حديث لوحده؟ حديث إنك لو حسبتها كده تلاقي نفسك كأنك صمت الدهر، الحسنة بعشر أمثالها، هتصوم ثلاث أيام في الشهر، 3 في 10 بـ 30 فكأنك صمت الشهر، فلو صمت لو واظبت على صيام ثلاث أيام كل شهر كأنك صمت الدهر، ده حديث لوحده، ده ما لوش دعوة خالص بأيام البيض، خلاص. وكونها البيض لما روى أبو ذر أن النبي صلى الله عليه وسلم قال: «إذا صمت من كل شهر ثلاثة أيام فصم ثلاثة عشرة وأربع عشرة وخمس عشرة» رواه الترمذي وحسنه، وسميت بيضاء بابيضاض ليلها كله بالقمر، خلاص.
قال: والاثنين والخميس، يسن صوم الاثنين والخميس؛ لقوله صلى الله عليه وسلم: «هما يومان تعرض فيهما الأعمال على رب العالمين، وأحب أن يعرض عملي وانا صائم». يبقى وأنت بتصوم الأيام دي تستحضر هذا المعنى، خلاص، إن ربنا سبحانه وتعالى إذا اطلع عليك فرآك صائما عساه أن يغفر لك ما ينظر فيه من عملك السيء الرديء، وعساه أن يقبل منك أعمالك الصالحة على ما فيها من دخل وسهو وآفات وكده يعني، إذا نظر في صحيفتك فاطلع عليك فرآك صائما، صيام إخبات وصيام مسكنة وذل بين يديه؛ لأنه ينظر في صحيفتك، لأنه ينظر إلى عملك، فده معنى جميل جدا مفهوم يا جماعة. وكان أحد السلف، شاكر مين؟ لو تجيبوها لنا، كان في يوم الاثنين يبكي إلى امرأته وتبكي هي له، ويقول: اليوم يعرض عملي على الله.
قال: ويسن صوم ست من شوال؛ لحديث: «من صام رمضان وأتبعه ستا من شوال فكانما صام الدهر» لنفس المعنى اللي قلناه قبل كده: رمضان 30 يوم وشوال هتصوم منه 6 يبقى 36 يوم، 36 والحسنة بعشر أمثالها اضرب في 10 يبقى 360 يوم، 360، يعني فكانك صمت الدهر، كأنك صمت العام كله. فلو عملت ده كل عام يبقى كأنك صمت الدهر، يبقى هذا أيضا من جملة المستحبات أن تصوم ست من شوال، والافضل عقب العيد متوالية، فتبتدي من يوم 2 شوال ليوم 7 شوال، هذا الأفضل، لكن تحصل الثواب وتحصل السنية بصومه على أي صفة سواء متتابعة أو متوالية أو متفرقة، بديت من تاني يوم، بديت بعد كده، إنما الأفضل أنها تكون عقب العيد متوالية، خلاص، وهذا من باب التعجيل بالخير، وفيه معنى وعجلت إليك ربي لترضى، ماشي يا جماعة.
قال: وشهر الله المحرم، يعني ويسن صوم شهر الله المحرم؛ لحديث: «أفضل الصيام بعد رمضان شهر الله المحرم» وأكده عاشوراء ثم تاسوعاء؛ طبعا عاشوراء يكفروا سنة، فأكدوا شهر المحرم في الصوم ثم تاسوعاء، اللي هو يوم تسعة لقوله صلى الله عليه وسلم: «لئن بقيت إلى قابل لأصومن التاسعة والعاشر» احتج به أحمد، وقال: إن اشتبه أول الشهر صام ثلاثة أيام ليقين صومهما، ماشي الحال. قال: وصوم عاشوراء كفارة...
يسن فيه التوسعة على العيال. ورد فيه بعض الآثار: «من وسع على العيال في هذا اليوم وسع الله عليه سائر عامه». برضه هذا يعني مما يحرص عليه.
ويسن صوم تسع ذي الحجة. هنا نقول تسع ذي الحجة هم العشر، في ناس تقول لك يسن صوم العشر، حتى اللي هيقول كده فيقصد صوم التسع، خلاص؛ لأن اليوم العاشر حرام صومه مطلقاً هو يوم العيد. خلاص، ليه بقول مطلقاً؟ لأن في أيام تانية لا يشرع صومها لكن ماهياش مطلقاً، يعني يشرع صومها في بعض الأيام زي يوم عرفة نفسه، يوم عرفة يصام ولا ما يصام؟ هنقول لو أنت حاج بالموقف ما تصومش عرفة، مش كده؟ أيام التشريق اللي بعد يوم العيد تصام ولا ما تتصامش؟ نقول حرام صوم أيام التشريق اللي بعد العيد، لكن ماهوش مطلقاً برضه؛ لأن في حالة ممكن تصام أيام التشريق برضه بس ده في الحج يعني، خلاص. إنما يوم العيد يحرم صومه مطلقاً، فلذلك احنا بنقول إيه اللي هيقول لك نصوم العشرة يبقى أنت فاهم كده أن هو يقصد صوم التسعة.
قال: وتسع ذي الحجة لقوله صلى الله عليه وسلم: «ما من أيام العمل الصالح فيهن أحب إلى الله من هذه الأيام العشر»، قالوا: يا رسول الله ولا الجهاد في سبيل الله؟ قال: «ولا الجهاد في سبيل الله إلا رجل خرج بنفسه وماله فلم يرجع من ذلك بشيء» رواه البخاري. وأفضله يعني أفضل هذا الصوم يوم عرفة لغير حاج بها، يعني بعرفه. يوم عرفة لغير حاج بها ليه؟ لحديث: «صيام عرفة أحتسب على الله أن يكفر السنة التي قبله والسنة التي بعده»، وفي صيام عاشوراء قال: «إني أحتسب على الله أن يكفر السنة التي قبله». طيب، بعد يوم عرفة أنهي أفضل الأيام؟ يوم التروية. قال: ثم يوم التروية وهو الثامن.
وكره إفراد رجب بصوم. يعني ايه يا جماعة كره إفراد رجب؟ ركزوا بقى في الحته دي. كره إفراد رجب يعني كاملاً، يعني لو صام من رجب وأفطر زالت الكراهة، خلاص؛ إنما إفراد رجب يعني أن يُفرد رجب، أن يصام كاملاً، الشهر كامل. إنما لو صام منه وأفطر زالت الكراهة. طيب، لو صام رجب فاستوعب الشهر كله بالصوم وصام معه شهراً غيره من شهور السنة زالت الكراهة كذلك. يبقى المكروه إفراد رجب، يعني واحد صام رجب وصام معه شهراً آخر من الشهور الحرم ما فيش مشكلة، خلاص، يبقى ده مش مكروه. طيب لو صام رجب ومعها شعبان زالت الكراهة. مفهوم يا جماعة؟ أخوكم جابه، كان إبراهيم النخعي يبكي إلى امرأته يوم الخميس وتبكي إليه، ويقول: اليوم تعرض أعمالنا على الله. ماشي، يعني يا شيخ ما نصومش؟ لا، هنصوم تسع أيام. ما نصومش ليه؟ بيقول لك ده مستحب، من السنن أن تصام تسع أيام. تصام، طبعا إلا لو أنت يعني كنت في الحديد فتصوم ثمان أيام واليوم التاسع ما تصوموش اللي هو يوم عرفة، لما تصوم من واحد لثمانية ليوم التروية.
قال: وكره إفراد رجب وفهمنا دي خلاص. وكره إفراد يوم السبت -كلام البهوتي- والسبت يعني كره لحديث: «لا تصوموا السبت إلا فيما افترض عليكم»، والجمعة يعني إفراد الجمعة كذلك برضه مكروه أنك تصوم الجمعة لوحده تفرده، ماشي، لحديث: «لا تصوموا يوم الجمعة إلا وقبله يوم أو بعده يوم»، وعيد لكفار بصوم، يبقى الكلام على بعضه كلام البهوتي على بعضه: وكره إفراد رجب والسبت والجمعة وعيد لكفار بصوم، ماشي، هي تمشي والسبت والجمعة وعيد وتمشي والسبت والجمعة وعيد تمشي كده وكده، ماشي. يبقى والم والسبت والجمعة وعيد لكفار بصوم، يبقى لو في عيد للكفار ما تفردش بالصوم زي يوم النيروز والمهرجان أيام عيد يعني للكفار، خلاص.
قال: ويوم الشك إن كانت ليلته صحواً. لو تفتكروا بقى كده المسألة دي احنا اتكلمنا فيها قبل كده كتير، أن صيام يوم إيه هو يوم الشك عند الحنابلة؟ يوم الشك ده هنصوم هيجب صومه ده إذا إيه؟ يوم 30 شعبان لو في فيه غيمة أو قتر، صح كده يعني حاجة؟ أحسنتم جميل جداً، ده يصام لو في الحالة دي يصام وده من المفردات. لو كانت ليلته صحواً بقى يعني بصينا السما صحو بس ما شفناش الهلال فاحنا بكرة 30 شعبان هنا يكره الصوم، يكره الصوم خلاص.
طيب، ولا يكره الإفراد. تعالوا أقرأ تاني هنا بيقول: وكره إفراد رجب والسبت والجمعة وعيد لكفار بصوم ويوم الشك، هنا راح جاي ركزوا بس في كلام عثمان، احنا كده قرينا كلام البهوتي، طب تعالوا كده نقرا كلام عثمان قال لك: وكره إفراد رجب، نقرا بقى من أول هنا كده كلام عثمان، وكره إفراد يوم السبت، وبعدين وكره إفراد يوم الجمعة، وبعدين وكره إفراد يوم عيد لكفار بصوم، وبعدين وكره صوم يوم الشك. هنا المكروه الصوم ولا الإفراد؟ ظاهر كلامه كده إنه إيه أن الصوم. لكن لما نرجع للكتب الأكبر شوية نلاقي ده مش مقصود، ده مش المذهب مش المقصود. إنما في تركى كده في يوم الشك ده، ركزوا معايا بقى ركزوا معايا في الحته دي.
دلوقتي قال إيه بقى؟ أنا عارف أن الكلام في ناس بيجوا يكتبوا وعاوزين يبعتوا الكلام، الكلام بيتقطع لما حد تاني يبتدي يكتب، معلش بقى كلامه اتقطع يعيد يكتبه تاني. ركزوا معايا كده يا جماعة صلوا على النبي عليه الصلاة والسلام عشان المسألة دي مهمة. دلوقتي كره إفراد رجب فقلنا لو ضمت له شهر تاني زالت الكراهة، مش كده؟ كره إفراد السبت فلو ضمت للسبت يوم قبله أو يوم بعده زالت الكراهة، يعني لو صمت جمعة وسبت ما فيش مشكلة، سبت وحد ما فيش مشكلة. كره إفراد الجمعة فلو ضمت له يوم قبله أو يوم بعده ما فيش مشكلة، فلو صمت خميس وجمعة ما فيش مشكلة، جمعة وسبت ما فيش مشكلة، شوف مع أن السبت لوحده مكروه والجمعة لوحده مكروه لو صمتهم هم مع بعض ما فيش مشكلة، خلاص.
طيب، كره صيام يوم الشك، طب لو ضفت له يوم قبله برضه مكروه، طب ضفت لهم كمان يوم زالت الكراهة؟ هنا في يوم الشك لو ضفت له يوم قبله تظل الكراهة باقية، طب لو ضفت لليومين دول كمان يوم زالت الكراهة لحديث النبي عليه الصلاة والسلام: «لا تقدموا رمضان بصوم يوم أو يومين»، فلو صمت ثلاث أيام زالت الكراهة، ده المذهب خلاص كده. طيب، إن كانت ليلته صحواً خلاص فهمنا الكلام ده.
طب يا جماعة ناقص حاجة بس نقولها هنا أن هذه الكراهة تزول إذا وافق صوماً معتاداً. يعني واحد مثلاً بيصوم يوم ويفطر يوم، فأكيد اللي بيصوم ويفطر يوم ده هيجي الجمعة حظه أنه هيلاقي نفسه بيصوم الجمعة لوحده في أسبوع وهيلاقي أنه بيصوم السبت لوحده في أسبوع؛ لان احنا عندنا الأسبوع فردي عدد فردي، فالأيام اللي بتصوم بيحصل لها شفت، بتتشفط، فاهمين دي ولا لا؟ لما تصومي وتفطر يوم ده عدد زوجي اثنين، فمضاعفات الاثنين السته والاسبوع سبعة. حد فاهم اللي أنا بقوله ده؟
يعني طبعا بتوع هندسه وبتاع يبقوا لاقط الكلام، وممكن بتوع تجاره برض يعني شوية. فخلونا نشرحها، يعني أنت ابتديت تصوم يوم السبت مثلاً أو الأحد، خلينا الأحد عشان ما نطلع بره الجمعة والسبت دول خالص، وقلت بس أنا هصوم صيام داوود فهصوم يوم وأفطر يوم. فقلت ابتدي الأحد، هتلاقي نفسك صمت الأحد وفطرت الاثنين، صمت الثلاثاء وفطرت الأربعاء، صمت الخميس وفطرت الجمعة، صمت السبت، ادي السبت أهوه هتفرد بصوم لأنك فطران الجمعة وهتفطر حد، صح كده؟
هتيجي لو كملت الأسبوع ده هتلاقي نفسك صمت الجمعة. تعالوا نكمل: صمت السبت، فطرت الأحد، اثنين صيام، ثلاثاء هتفطر، أربعاء صيام، خميس هتفطر، جمعه هتصوم، هتقول، هتلاقيك ماشي كده أسبوع بتصوم جمعه وأسبوع بتصوم سبت، ومفرد للجمعات أو للسبت في هذا الأسبوع، يعني لم تصم معه يوماً قبله ولا يوماً بعده فاهمين؟ لكن ده صيام معتاد زالت الكراهة، فهمتوا دي؟ وكذلك يوم الشك إن صادف صوماً معتاداً زالت الكراهة خلاص.
قال: ويحرم صوم يوم عيد مطلقاً، وعرفنا أنا يمكن شرحت لكم من شوية للمطلق، يوم عيد الفطر أو يوم عيد الأضحى يحرم الصوم بالإجماع، خلاص. ولما نقول عيد الفطر وعيد الأضحى هو يا جماعة العيد هو يوم واحد، يعني عيد الفطر كام يوم؟ هو يوم. طيب، عيد الأضحى هو يوم، تقول إزاي يعني أنت هتعرف أكثر من الحكومة؟ الحكومة بتدي خمس أيام، يعني إيه مش عاوزين نخرب على نفسنا ونقول يوم فيدونا يوم.
لكن احنا بينا وبين بعض كده في درس الفقه معلش خلوها يوم ماشي، هو يوم عيد هو يوم واحد يلي ثلاث أيام تشريق، خلاص. طبعا احنا المشهور يقول لك إيه عيد الأضحى العيد الكبير نسميه العيد الكبير أربعة أيام، ده المشهور يعني. لا هو هو يوم واحد يوم العيد، لكن أيام التشريق اللي هم الثلاث أيام اللي بعد العيد دول بيلتقوا مع يوم العيد في بعض الأحكام، خلاص، لكن هم مش مش عيد هو يوم العيد يوم واحد، هم بيلتقوا معه في بعض الأحكام مش وقتها دلوقتي، إنما هو يوم واحد يوم عيد الأضحى وعيد الفطر كذلك يوم واحد بس. وده حرام تصوم مطلقاً.
قال: وأيام التشريق. ويحرم صوم يوم عيد وأيام التشريق، إنما يوم العيد يحرم مطلقاً، وأيام التشريق ما قالش مطلقاً، ما قالش يحرم مطلقاً ليه؟ لأننا هنقول إن أيام التشريق ممكن تصومها عن دم متعة أو قران، مش وقته يعني إيه الكلام ده؟ لكن ممكن تصومها، خلاص لو أنت في الحج في حالة معينه كده ممكن تصام أيام التشريق. خلاص، وليه يحرم صيام أيام التشريق؟ لقوله صلى الله عليه وسلم: «أيام التشريق أيام أكل وشرب وذكر لله تعالى».
قال: ومن دخل في فرض حرم قطعه، ماهوش لعبة. وهنا ما قالش ومن دخل في فرض يعني المقصود بالصوم، لا ومن دخل في فرض يعني صوم أو غير صوم، موسع أو مضيق. يعني ايه موسع أو مضيق؟ يعني لو وقته يسع فيه فعله وغير فعله معه أو وفعل غيره معه ده بيسمي واجب موسع. الواجب المضيق اللي هو ما ينفعش تعمل معاه حاجة غيره، يعني مثلاً وقت الصلاة ده وقت، عفوا، الصلاة صلاة الفرض، ده واجب موسع ولا مضيق؟ إيه رايكم؟ إيه رايكم؟
موسع، ليه موسع؟ لأنك ممكن صلاه الظهر تؤديها في كل الوقت اللي بين الظهر والعصر مش كده؟ فتحضر تعمل مع الصلاة غيرها، يعني هل ممكن يضيق؟ يعني ممكن الواجب الموسع ده فجأة يبقى مضيق؟ ممكن ده يحصل؟ أه، ممكن في آخر الوقت بقى خلاص أه في آخر الوقت. امتى بالضبط؟ مش وقته دلوقتي هناخده في الصلاة، امتى هنقول ضاق الوقت؟ هناخده في الصلاة إن شاء الله. إنما ممكن موسع يبقى مضيق.
طيب، صوم رمضان ده واجب موسع ولا مضيق؟ إيه رايكم؟ ده مضيق، أحسنتم، ليه؟ ما ينفعش ياخد معاه حاجة غيره، يعني ما ينفعش يجي تقول إيه أنا في شهر رمضان ده هصوم رمضان وكان على بالمره أصومه، ما فيش كده هو شهر رمضان مش هينفع تصوم فيه غير رمضان، فاهمين؟ طيب، ولذلك قلنا حتى لو لم يجب عليك صوم رمضان ما ينفعش تصوم فيه غيره لو تفتكروا المسألة دي، واحد مسافر، واحد مسافر فخلاص لا يجب عليه الصوم، قال لك طيب إيه؟ النهارده يوم الاثنين فهصوم سنة، نقول لك لا ما ينفعش، هتصوم يبقى تصوم رمضان فهمتوا؟
اللي يدخل في فرض بقى يحرم قطعه، سواء بقى ده موسع أو مضيق يحرم قطعه، طبعا ده بلا عذر، إنما لو في عذر ساعتها ممكن إيه يقطع هذا الفرض. قالوا مسألة يعني لعل بعض إخواننا يقابلها في رمضان ده ونتمنى أن ده ما يحصلش من إخواننا اللي في سوريا أو في تركيا، ونسال الله عز وجل أن يفرج عن إخواننا هناك، يعني من المسائل اللي نصوا عليها أن ممكن انسان يفطر لأنه محتاج يخرج أو أو أو ينقذ انسان تحت الردم أو تحت الهدم، فهذه المسألة نصوا عليها في كتب الفقه، خلاص فساعتها فرق الإنقاذ لو احتجت أنها تفطر علشان تنقذ إخواننا اللي تحت ونتمنى أن الموضوع يعني ما يستمرش وأن ربنا يعني يزيح الغمة عاجلاً، لكن حكم الله عز وجل كلها إيه يعني خير ومصلحة.
احنا بنتمنى ده بنظرنا القاصر، إنما لو استمر فهو الخير خلاص يا جماعة، وما حدش بيبقى عارف إيه الخير فين، واحنا الكلام ده اتكلمنا فيه كتير قبل كده، احنا كل اللي علينا أن احنا نعمل عقولنا في فهم حكم الله عز وجل ونذل لأفعاله سبحانه وتعالى وتقديره سبحانه وتعالى، سواء هذا التقدير في خاصة أنفسنا أو في عموم الأمة، أصابنا أو أصاب غيرنا نراه أجمل التقدير وأحكم التقدير ولو لم تبلغ عقولنا القاصرة الحكمة من ذلك التقدير، خلاص.
على كل حال من المسائل اللي نصوا عليها في كتب الفقه أنه يفطر لإنقاذ معصوم من نحو هدم أو كذا، يفطر، خلاص.
ماشي، قال: ولا يلزم إتمام نفل، طب واحد بدأ
النفل سواء صوم أو غير الصوم زي الصلاة، هل يلزمه إتمام؟ النفل لا ملوش يعني لا يلزمه، إلا طبعا لو حج أو عمرة؛ حج نافلة يعني هو صام، عفوا هو حج قبل كده وبح الحجة التانية فهي في حقه نافلة فلو أحرم يبقى على إنه إيه يتم الحج وكذلك العمرة، يعني دول ليه خصوصية شوية، إنما أي عبادة تانية نفلها لا يلزم إتمامه.
خلاص، وقد فعل ذلك النبي صلى الله عليه وسلم لما أهدي له يوما طعام فأخبرته عائشة رضي الله عنها فقال: «أرنيه فلقد أصبحت صائما» فأكل. ماشي. الحيس ده أهبه ما يكون يعني دلوقتي عارفين عارفين في أكله كده ما أعرفش يعني أنتو عارفينها ولا لأ، تجيبوا شوية مش التمر بقى مش مش التمر اللي هو التمر السعودي ده لأ، الرطب بتاعنا اللي هي المصري دي اللي هي عارفين التمر الأحمر ده أما يسود كده ويبقى طعمه يبقى حلو، ففي ناس تطبخه كده على النار بالسمنة، مش عارف عارفين الأكلة دي ولا لأ اللي مش عارفها فاته كتير. على كل حال أكلة طعمها حلو يعني جربوها، لأ مش بالبيض ولا حاجة أنا ما إحنا مش عاوزين نجود، هو إيه يعني هي أشبه ما يكون باللي أنا بقوله ده، الحيس ده اللي هو إيه بيجيبوا التمر كده وبعملوه بسمنة على النار يبقى طعمه حلو يعني، فأهدي للنبي صلى الله عليه وسلم حيث وكان صايم.
نرجع بقى للدرس، الناس الأكيلة خلاص انسوا الآية ركزوا معايا الله يكرمكم. الشيخ أسامة بيحكينا، الشيخ أسامة حامد حفظه الله بيحكينا عن الشيخ الشيخ نجيب المطيعي رحمه الله، كان من سادات الفقهاء، ما أعرفش تعرفوه ولا لأ. المهم فهو الشيخ أسامة بيقول لنا، الشيخ أسامة عاصر عاصر الشيخ نجيب المطيعي رحمه الله اللي هو مكمل كتاب المجموع بعد النووي، ومين اللي عمل بعد النووي؟ السبكي صح كده وبعدين جه الشيخ محمد نجيب المطيعي كمل بعدهم كتاب المجموع. ماشي.
المهم يعني فكان هو بيحب الأكل يعني ده كلام الشيخ أسامة، كان محب للطعام يعني. فبعدين هما في باب اللقطة، وهو الشيخ عاوز يوصلهم مسألة يعني إن اللقطة إذا كانت مما يفسد، يعني لو حاجة حد لقى حاجة وقعت في الشارع، لكن الحاجة دي لو سابها وقعد يعرفها سنة ولا بتاع وهي هتفسد، مصلحة في كده يعني، فهو بيشرح لهم يعني الفقه يعني، فبيقول لهم زي مثلا واحد ماشي لقى صينية بسبوسة واقعة في الشارع، وبعدين البسبوسة دي عليها من فوق اللوز والقشطة، هو الشيخ بقى سرح مع البسبوسة هو نسي، الشيخ عاوز يقوله أرجوك يا فضيلة الشيخ يعني خلينا في اللقطة. طبعا الطلاب برضه حالهم وقتها إيه؟ معظمهم فقراء وبتاع والشيخ عمال إيه بقى نسي الدرس وبيشرح في البسبوسة، صينية البسبوسة عليها اللوز وعليها القشطة وعليها كده يعني.
طيب نرجع تاني يلا. المسألة بقى بتاعتنا، لا يلزم إتمام نفل، ماشي الحال؟ يبقى واحد صام صيام النفل هو أمير نفسه عاوز يفطر يفطر خلاص، لكن ما يتجرأ على كده برضه خلاص بالذات إحنا النبي عليه الصلاة والسلام أهدي إليه شيء ففطر، ده النبي عليه الصلاة والسلام إحنا أحوج ما نكون لأي حاجة تنفعنا في الآخرة، فما نجيش على اليوم اللي هنصوم ونفطر، ماشي.
لكن المسألة دي بتنفعنا إمتى يا جماعة؟ لما نجي نقدر المصلحة والمفسدة بقا اللي هو إزاي أنا صايم أو أنا صايمة وماما بتقول لك تعالى كل، والله ما أنا صايم أنا هزعل منك لو ما أكلتنيش معايا مثلا. أنتو عارفين في ناس أنا مش من الناس بس في ناس كده، في ناس ما تعرفش تاكل لوحدها أبدا، يعني ما تعرفش تقعد تاكل لوحدها، ما تعرفش تعملها يعني، ليه؟ زمايلي في الشغل كده، عشان يروح ياكل لازم حد ياكل، لو مالقاش حد ياكل يأخر أكلته، يأخر أكلته لغايه ما يلاقي حد يقعد ياكل معاه، في ناس كده طبعا كده. فممكن تبقى أمك كده أو أبوك كده وأنت اللي معه في البيت أو أنت اللي معها في البيت عاوزه تاكل عاوز تتغدى وهي وبعدين تعال يا ابني اتغدى معي، لأ أنا صايم، فحسيت إن راحت هي ماكلتش مثلا من غير ما تقول لك، يعني ما تبقاش يعني الجحود اللي فيك ده ولا اللي في الناس ده، يعني مش لازم تقول لك لقيت في عينيها بقى الحزن أو الزعل أو هي جعانة وأنت عارف من أحوالها ما تعرفش تاكل غير مع حد، لأ روح افطر وكل مع أمك.
واضح؟ فساعتها هنقدر بقى المصلحة والمفسدة لما نعرف المسألة دي مسألة إن لو أنا في نفل إن إني أقطع صوم النفل ده. ماشي، واحد عزمك على حاجه عنده بقى وليمة ولا عنده عقيقة ولا بتاع وبعدين حسيت إنه هيزعل لو ماكلتش أو هيصيبه نوع هم مثلا بالذات لو هو فقير أو حاله على قد، هيفتكرك بقى إيه مترفع متكبر إنك ما تاكلش من أكله مثلا، فايه فنقول لك لأ افطر وكل.
طيب لو كلنا نقول لك أو اقض بقى اليوم ده خلاص، وجوبا لا مش وجوبا ولا حاجة، لكن اتعود إن الحاجة اللي تعملها دي أو الحاجة اللي تبطلها العبادة اللي تبطلها إنك تقضيها ولو كانت سنة ولو كانت نفلا، اتعود على كده ده مش فرض مش على الوجوب ماهواش واجب، خلاص.
طيب بتقول مسلم بيقول حاضر، حاضر إيه بقى هتعزم ولا حاضر هتعمل إيه بالضبط، يعني مش عارف حاضر إيه، حضر لك الخير على كل حال. قال: ولا يلزمه ولا يلزمه، أنا برضه استغربت يعني حضر هتعزمنا دي غريبه عليك شوية، قال: ولا يلزم إتمام نفل ولا ولا قضاء فاسده (طبعا مسلم لا أبو الكرم يا جماعة يعني أنا بس بهزر معاه). ولا قضاء فاسده، يعني لا يلزم القضاء الفاسد، اللي أنت هتفسده مش لازم قضاؤه زي ما قلنا لكم من شوية، لكن اتعود تعمل ده. قال: غير حج وعمرة فيجب إتمامه، لانعقاد الإحرام لازما، فمتى أفسده أو فسد لزمه قضاء، مش وقته دلوقتي نشرح الكلام ده.
قال: وترجى ليلة القدر في العشر الأخير من رمضان، لقوله صلى الله عليه وسلم: «تحروا ليلة القدر في العشر الأواخر من رمضان» متفق عليه. من دلوقتي رتبوا إجازاتكم، من دلوقتي العشرة الأخيرة دي حياتنا موقوفه على ليلة القدر. وكان صلى الله عليه وسلم يخلط العشر بنوم وصلاة، فاذا دخلت العشر خلاص بقى ما فيش نوم في الليل.
فمن دلوقتي لو أنت موظف ابتدي رتب إجازاتك من دلوقتي، لو أنت تاجر ابتدي حوش من دلوقتي علشان هتقفل تجارتك، بعض الناس بعض التجار بعض السلف كان يقفل من بدري من واحد شعبان يقفل، خلاص مغلق للتحسينات، تحسينات إيه؟ تحسينات القلب، تحسينات العمل، تحسينات النفس، مغلق للتحسينات، كان إذا دخل شعبان أغلق حانوته وتفرغ للقران من واحد شعبان. صعب عليا وكثير والحياة والغلا، من واحد رمضان برضه صعب، لأ، أقل من عشر الأواخر بقا تبقى تحوش اللي يكفيك أنت وعيالك علشان العشر الأواخر أنا هقفل، لو أنا تاجر، لو أنا طالب يبقي أنا هاذاكر من دلوقتي وهأشد في المذاكرة الحاجات اللي لسه ما أخدتهاش، ما فيش مشكلة خالص يعني من دلوقتي بذاكر ضعف مذاكرتي علشان اللي هاخده في رمضان أبقى أنا ذكرته ما فيش حاجة متكومة عليا، واضح؟
من دلوقتي عشان ما هو ده يا جماعة اللي بنشوفه، يدخل رمضان يقولوا لك إيه يا شيخ عن المذاكرة يا شيخ أنا مش لاحق أنا مش عارف، يا حبيبي طب ما أنت أنت من قبل رمضان فين؟ لأ ما أنا بذاكر اللي عليا، ما تذاكر اللي بعد اللي عليك، ما أنا لسه ماخدتهوش. اليوتيوب ما خلاكش، ادخل اكتب شرح منهج السنة اللي أنت فيها هتلاقي 100,000 واحد يشرح لك ده، اللي حريص على دينه من بدري أنا سابق مش هاخترع ويتكوم عليا، وتطلع من رمضان مكتئب ويبقى السبب رمضان بقى، شوف بقى شوف بقى الشيطان، تيجي بعد رمضان هو تلاقي إيه؟ الشيطان يربط في دماغك إن الحاجات اللي تراكمت بسبب رمضان، لأ هو بسبب سوء تنظيمك أنت للوقت أو سوء تنظيمك أنت للوقت، كان من قبل رمضان أنا ممكن أدخل رمضان وأنا سابق المذاكرة، ما أنا ما عنديش وقت، لأ عندك وقت، الفيسبوك اللي حضرتك بتقعد عليه بالثلاث أربع خمس ساعات ده أيها الطالب ده وقت، أقفل الفيسبوك شيله خالص واستغل الوقت ده في إنك تبقى سابق في دراستك.
خلاص، يبقى الدين ما بيدعوش للفشل والسقوط وعقوق الوالدين، ده كله عقوق للوالدين إنما تسقط، يعني أبوك هيفرح بيك ولا أمك هتفرح بيك؟ ولا هيبقى من أشد العقوق؟ من أشد العقوق ناهيك بقا عن اللي مقضينها في الشوارع وسرسجة، أشد العقوق أنك تسقط في مذاكرتك دي خلاص. كان واحد من إخواننا زمان بيالغوا كده، بيقول لك عارف أنت لو صبحت أبوك بعلقة ومسيته بعلقة -كلمة جديدة طبعا هو بس هو يقصد يبالغ يعني- بيقول لو صبحت أبوك بعلقة ومسيته بعلقة وجبت درجات حلوة في الامتحانات هيبقى فخور بيك، يقصد يقول إن ده بالنسبة لهم حياة أو موت يعني.
الأب والأم طبعا ده برضه من إيه الأولويات المتشقلبة في حياة الآباء والأمهات بصراحه يعني، أنا هنا بتكلم لو في حد من الحضور أب أو أم دي من الأولويات المتشقلبة في حياتنا كآباء وأمهات بالذات لو إحنا متدينين، إيه نسيبهم يفشلوا؟ لأ مش نسيبهم يفشلوا، لكن فكرة إن المهمة عندنا المذاكرة والبتاع والصلاة ممكن عادي خالص إيه، حرام تصحي الواد لصلاه الفجر ده هو شوية وهصحى للمدرسة، هو إيه اللي حرام؟ ده حرام إن ما أصحيهوش مش حرام إن أصحي، فاهمين يا جماعة؟ أو الواد جاي من المدرسة تعبان أو البنت جاية تعبانة فحرام تنام شوية وبعدين تبقى تصحى تصلي إيه لما تصحى؟ إيوة دي لما تصحى هتبقى دخلت في وقت اللي هو حرام نأخر العصر ليه؟ لأن المغرب ناقص له نص ساعة، فتستنى شوية لغايه ما تصلي العصر وبعدين تنام براحتها، دي من الأولويات المتشقلبة في حياة الآباء والأمهات بالذات ناهيك بقا الناس اللي هي المفروض منسوبة للتدين.
واضح؟ اللي جاب الكلام ده؟ كنا بنقول إيه؟ آه، فلو أنت طالب تبقى مسبق شوية علشان تدخل العشر الأواخر برضه أنا إيه أنا في حتة تانية دلوقتي أنا بعمل إيه بطلب ليلة القدر، بطلب العتق من النار، بطلب الثواب، بطلب، وهكذا خلاص. يبقى زي ما تكون طب أنت ست بيت؟ يبقى من دلوقتي خليكي ناصحة عشان ما يدخلش رمضان تقولي إيه رمضان مستهلكي كله في الأكل، لأ لو أنت ست بيت املي الفريزر من دلوقتي، خلاص، لو معاك سعة يعني، لو ما فيش يبقى نسال الله لك الآيه يعني يوسع عليك إن كان هو الخير برضه، واحد يقعد إيه يدعي ربنا بحاجات ممكن يبقى إيه التضييق والخير، لكن على كل حال عندك سعة من دلوقتي اشتري الحاجات واعملي خزني في الفريزر علشان يجي رمضان تبقى على التسوية مش مشغولة طول اليوم بالأكل والشرب وكده، لأ خلاص.
ماشي الحال قال: وترجى ليلة القدر في العشر الأخير من رمضان. وعارفين يا جماعة الحديث النبي صلى الله عليه وسلم: اعتكف العشرة الأول فاتاه جبريل فقال إن الذي تطلب أمامك، يبقى ليلة القدر تطلب، وهذا معنى من معاني الاعتكاف إن أنك انقطعت لادراك هذه الليلة، فأن الذي تطلبه أمامك فاعتكف العشر الأواسط، فقال إن الذي فاته جبريل فقال إن الذي تطلبه أمامك، فاعتكف العشر الأواخر.
خلاص، ومن قام ليلة القدر إيمانا واحتسابا غفر له ما تقدم من ذنبه (زاد أحمد: وما تأخر). ليه سميت ليلة ليلة القدر؟ قال: لأنه يقدر فيها ما يكون في تلك السنة فسميت ليلة القدر، أو لعظم قدرها عند الله يعني ليلة لها قدر ليلة القدر، أو لأن للطاعات فيها قدرا عظيما، وقيل غير ذلك وأنا لي فيديو في الموضوع ده ممكن تشوفوه، وهي أفضل الليالي وهي باقية لم ترفع، (يعني باقية ليلة القدر باققية ليوم القيامة للأخبار) وأوتارها آكد، يعني أوتار العشر آكد، اطلبوها في العشر الأواخر في ثلاث باقين أو سبع باقين أو تسع باقين.
هنا يا جماعة قال: أوتاره آكد، مش يعني نهمل الأشفاع، لأ، ليلة القدر تطلب في جميع العشر ما تهمل حاجة لأن الأشفاع برضه مما يرجى فيها ليلة القدر، وأبلغها ليلة سبع وعشرين. ويكون من دعائه فيها -يعني لازم يكون في دعائك في هذه العشر عشان تبحث في ليلة القدر-: اللهم إنك عفو تحب العفو فاعف عني، وله مناسبة لكن مش وقته برضه.
باب الاعتكاف وهو آخر الأبواب نختم به إن شاء الله: الاعتكاف لزوم مسلم لا غسل عليه عاقل ولو مميزا مسجدا ولو ساعة لطاعة الله تعالى. اللي عاوزين ناخدة من الحته دي بس، فكرة إنه لزومه مسجد، فالاعتكاف لا يصح إلا في مسجد، ولا يكون اعتكاف إلا في مسجد، فدي مسألة مهمة. ولا يسمى اعتكاف إلا أن يكون في المسجد، طيب والمسجد ده مش مهم هتجمع قال: مسنون كل وقت ودي مسألة تانية مهمة.
يبقى الاعتكاف مش مخصوص برمضان، واحد عاوز يعتكف أي وقت في السنة اعتكف، طب أقل إيه؟ ما فيش أقل ليه، ولذلك إحنا دايما نقول.
انو وأنت رايح المسجد انك هتعترف الشوية اللي انت داخلهم دول ماشي. هل ممكن اقتصر على الدعاء ده بس؟ يعني ممكن، لكن فوت خيرا؛ لأن ليلة القدر أخلطها بدعاء، وخصوصاً انك يعني هل هتقعد طول الليل تدعي بالدعاء ده؟ فهل هيبقى قلب مستحضر القلب يعني في الدعاء ده لو دعيت بيه هو لوحده طول الليل؟ أظن بعد شوية هيبقى لسان بيردد الدعاء وخلاص، قلبك هيروح في حته تانية. إنما لو فننت في الدعاء لكان أولى والله أعلم، لكن تكثر من الدعاء ده خلاص، وله مناسبة زي ما قلنا، وإن شاء الله في درس الاستعداد لرمضان من دروس الإعداد لرمضان هندي درس عن شعبان إن شاء الله.
فهنشير للحديث ده، مناسبة الحديث ده لرمضان، يعني هنتكلم في ده إن شاء الله بعدين. قال مسنون كل وقت يبقى فاضي شوية روح المسجد، اقعد ادخل المسجد، انوي الاعتكاف خلاص. وفي رمضان أكد، خصوصاً العشرة الأواخر، ويصح بلا صوم، يعني مش لازم تكون صائم عشان تعتكف، لا، اعتكف أي وقت ولا ويصح بلا صوم. لا بلا نية، يظهر أن حرف الواو ده بره القوسين والله أعلم، يعني ده مش من كلام البهوتي والله أعلم، لو حد عنده المتن لوحده كده يبقى يبصلنا عليه. يعني يظهر أن كلام البهوتي ويصح بلا صوم، لا، بلا نية، هكذا. ومن كلام عثمان الوادي، لو تقرا كلام عثمان: ولو كان الصوم شرطاً لما صح اعتكف الليل، و ده كلام عثمان، لا لا ده كلام البهوتي، يصح اعتكف، ده كلام عثمان هكذا يظهر والله أعلم.
المهم يعني المسألة بقى الفقهية دي مسألة كده يعني على جنب، يعني لا بلا نية يعني لازم عشان يصح الاعتكاف فتثبت كاف أن تنويه الاعتكاف، واضح، إنما الأعمال بالنيات معروف. قال: ويلزم بنذر، واحد نذر إنه لو حصل كذا هتكفى، يلزم إنه يعتكف. قال: ولا يصح إلا في مسجد أهو، لا يصح إلا في مسجد، ولا ممن تلزمه الجماعة إلا حيث تقام. يعني لو في مسجد ما فيهوش جماعة، أحمد بيقول لك الواو مش في المتن، فعلا يا شيخنا ده بصيت عليها يعني، ماشي جزاك الله خيرا، يعني ده الظاهر يعني.
طيب، يلا نرجع تاني، ركزوا في دي بقى: ولا يصح إلا في مسجد، خلاص خلصنا منها. ولا ممن تلزمه الجماعة إلا حيث تقام، يعني ايه الكلام ده؟ عارفين في مساجد ما بتقام فيها الجماعات، بتتقفل، زي مثلا مسجد مساجد النوادي مثلاً، بتلاقوا المساجد دي بتتقفل مثلاً في الفجر، بتتقفل في في، أو مسجد الكلية، مسجد الكلية ده ما بيفتحش غير ظهر وعصر مثلاً لو هي كلية نظرية وما فيش ناس بتسهر فمغرب وعشاء وفجر المسجد مقفول ما فيهوش جماعة أصلاً، فينفى اعتكف في المسجد ده؟ لو أنت تجب عليك الجماعة ما ينفعش، ما ينفعش تعتكف في مسجد ما فيهوش جماعة، حتى لو الجماعة دي هتقام بيك أنت وبمن معك من المعتكفين. ماشي الحال، خلاص صورة بعيدة يعني مش هتقابل دلوقتي، لكن هي مسألة موجودة بيقولوها. يبقى لازم لو أنت هتعتب تعتكف في مسجد في جماعة، حتى لو الجماعة دي أنت والمعتكفين اللي معاك، إنما لو واحدة امرأة مثلاً لا خلاص، لا تلزمها الجماعة أصلاً ماشي.
وأفضل المساجد الحرام، يعني المسجد الحرام، فمسجد المدينة، فالأقصى، نسأل الله الاعتكاف في الأقصى. الحمد لله اعتكف في المسجد الحرام، في المسجد النبوي، نجرب الاعتكاف فين في المسجد الأقصى؟ يعني أسأل الله أن يحرره من أيدي اليهود وأن يستعملنا في ذلك.
«من لم يغزو ولم يحدث نفسه بالغزو مات على شعبة من النفاق». قال: وقلنا لكم قبل كده أفضل التطوع الجهاد، أفضل التطوع ثم النفقه فيه، ثم النفقة في الجهاد، لا مش ثم العلم، لا الجهاد ثم النفقة فيه، العلم رقم 3 مش رقم 2. يعني الانسان يجاهد بنفسه هذا افضل التطوع، ثم مش قادر يجاهد بنفسه يجاهد بماله، ينفق في الجهاد، يلي الجهاد ثم العلم. خلاص، طيب، قال: وأفضل المساجد الحرام، فمسجد المدينة، الأقصى. فيبقى الاعتكاف على هذا الترتيب، فإن عين أحدها لم يجزئه فيما دونه، يعني واحد نذر إنه لو حصل كذا هتكفا الحرام نقول له ما ينفعش تعتكف في مسجد غير المسجد الحرام. طب واحد نذر إنه هيعترف لو حصل كذا هتكف في مسجد في المسجد النبوي، نقول له يجزئك أنك تعتكف في المسجد الحرام لأنه أفضل من المسجد النبوي، فهمتوا؟
قال: وإن عين مسجداً غير الثلاثة لم يتعين، واحد نذر إنه لو حصل كده اعتكف في مسجد ثناء الخير، نقول له اعتكف حيث شئت، مسجد ثناء الخير ما فيهوش فضل زائد. خلاص، قال: إلا طبعا في فضل بقى الشباب اللي بيجوا طبعا خطبة الجمعة شباب جميل، الفضل اللي في المسجد، مروان وعبد العظيم وعلي الشلة، مين تاني هنا بيجي في يعني كل اللي بييجوا عشان ما أنساش يعني، أنا شايف دلوقتي عبد العظيم ومروان وعلي، علي ولا علي مش هنا ما أخدتش بالي، يعني كل الناس اللي بتيجي وأحمد ومين تاني؟ ماشي.
قال: وإن عين مسجداً غير الثلاثة لم يتعين. ومن نذر زمناً معيناً دخل قبله بيسير وخرج بعد آخره، دي مسألة يعني احنا نادراً ما حد بينزل الاعتكاف، لكن دي تنفعنا في إيه؟ أن اللي عاوز يعتكف في العشر الأواخر كاملة، فنقول له انتبه انك تدخل قبل المغرب بتاع أول يوم من العشرة خلاص، أول لله يعني الليلة سابقة اليوم، وتخرج بعد الفجر بتاع يوم يوم 1 شوال خلاص، تخرج بعد بعد الفجر بتاع إيه يوم واحد شوال، وبعضهم قال لك ممكن بعد الآية بعد المغرب برضو، لأن كده يعني بعضهم قال كده ماشي الحلوة، وبعضهم يقول لك لا ده أنت تخرج على صلاة العيد، ده الأكمل طبعا، تخرج من الاعتكاف على صلاة العيد.
ماشي قال: ولا يخرج معتكف إلا لما لا بد له منه، واحد هيجيب أكل وشرب ومعندوش اللي يجيبله ماشي، إنما لو عنده اللي يجيبله خلاص. أنا هنا في مسألة يا جماعه، ودي هتبقى بحث، ركزوا معايا، وده بحث مهم جدا جدا جدا، بحث هبني عليه عمل دلوقتي. هو بيقول: لا يخرج من المعتكف إلا لما لا بد له منه، وذكر منه إيه؟ البول وال طبعا زمان ما كانش الحمامات ما كانش في حمامات في المساجد يعني فكانوا بيخرجوا يعملوا إيه يعني يقضوا حاجتهم خارج المسجد.
طيب حمام المسجد، هو ليه حكم المسجد؟ وأيه المقصود بالمسالك؟ عشان بس تفهموا، أنا عاوز عاوز فتاوى علماء، ها ما تهبدوش، لما أقول بحث هنا بنهب آه يعني أقول لكم أسالكم فنهب ونصلح لبعض، إنما لما أقول بحث بقى تجيبوا لي فتاوى علماء. إيه السؤال وإيه البحث؟ حمام المسجد لو هو مالوش حكم المسجد، فنبقى نقول الخروج للحمام لحمام المسجد لما لا بد له منه، وإلا يبطل الاعتكاف. فاللي عمال يدخل الحمام عمال على بطال ده ساعتها هنقول له ما ينفعش، واللي هيدخل الحمام ومعاه الموبايل بقى عمال يشات ويسكر على وطول في الحمام، نقول له برض ده أنت كده بتعرض الاعتكاف للبطلان. أنا مش بقول ده، أنا مش بقول ده، أنا ما أعرفش، أنا عاوز فتوى في ده، أنا عاوز فتوى في ده.
خلاص، هتقولوا لي يعني إيه البحث دلوقتي؟ قولوا لنا، مش عارف أقوله إزاي، يعني هو اللي أنا قلته ده اللي أنا فضفضت معاكم بيه ده تدوروا لي على فتوى وتجيبوا لنا في بحث ماشي، ومهم جدا جدا وبتقابلنا مسألة مهمة أم. طب واحد معتكف في مسجد ما فيهوش جمعة، ما فيهوش صلاة جمعة، فهيخرج عشان يصلي الجمعة، يجوز؟ آه يجوز. غير المسجد ما فيهوش جماعة، نقول له لا ما ينفعش، لأنها بتتكرر، هتخرج خمس مرات في اليوم؟ لا. طب ما فيش جمعة، دي مرة في الأسبوع، يجوز، لكن الأولى ألا يبكر للجمعة، ما تخرجش بدري، اخرج على الجمعة على طول، ولا يطيل الجلوس بعدها. خلصت الجمعة ترجع للمسجد تاني اللي أنت معتكف فيه خلاص.
طيب قال: ولا يعود ولا يعود مريداً، ولا يشهد جنازة، تروحش تزور حد عيان ولا تشهد جنازة، لا أنت معتكف إلا أن يشترطه وهو داخل الاعتكاف قال إيه؟ نوى إنه هيعطك بشرط إنه هيعود فلاناً يعني أو أو هيتبع الجنائز، لكن الأولى إنه لا ما يعملش كده. قال: يفسد اعتكاف بوطء في فرج وبسكر وخروج بلا حاجة. سيبكم من الوطء والسكر، ما بتحصلش، حد بيشرب خمرة في المسجد؟ والله يعني أنا دلوقتي أنا بقيت الناس المتدينة يعني بشوف منها حاجات، فما أعرفش هل دي كمان تعملوها ولا إيه؟ إيه حد بيخش الاعتكاف بخمرة هنا ولا إيه؟ يعني يعني مش عارف مش عارف الناس المتدينين دلوقتي يمكن يكونوا بيعملوا كده برضه، يقول لك عشان مثلا إيه بتخليني ما أحسش بالتعب بتاع القيام مثلاً، يعني مثلا ممكن، يقول لك أشرب بقين كده فايه أغيب عن الدنيا، أوقف بقى أصلي طول الليل، ممكن يبقى إيه برضه نيته كويسة يعني ما تظلموش إخوانكم يا جماعه اللي بيشربوا خمرة في الاعتكاف، أحسنوا الظن بيهم.
المهم المسألة اللي تعنينا الخروج بلا حاجة دي خلاص، دي يفسد بها الاعتكاف يفسد الاعتكاف بخروج بخروج بلا حاجة. وهنا بقى في الكتب الطويلة شوية ذكروا مسائل برضه بيحتاجها المعتكف، اللي هو لو خرج بجسمه ورجله جوه، خرج ب عارفين الحاجات الحركات النص كم اللي تعملوها دي، تقف على باب المسجد وتمد راسك وتمد إيدك وتمد رجلك؟ عارفين الحاجات دي؟ المسائل دي كلها يعني إيه صلي عليها في الكتب الكبيرة شوية، لكن مش هنقولها هنا.
طيب، وبقى معانا مسألة البحث اللي قلت لكم عليها دي تدوروا عليها وتجيبوا لنا أو عاوزين فتوى فيها. قال: ولو قل، يعني لو خرج بلا حاجة وإن قل الخروج. ويسن اشتغاله بالقرب، يبقى ما انتش قاعد في المعتكف يا عم ب عمال وعارف نفسه دلوقتي تتنطط مع ده ومع ده وتهرج مع ده ومع ده، وكل همك تروح تأذن وصوتك يبقى حلو في الأذان، لا، أنت إيه؟ تقعد تنشغل بالقرب، المصحف في إيديك، وسبحتك في إيديك، أو مش سبحة يعني صوابعك براحتك يعني أي حاجة، ومشغول بالقرب. ويسن اشتغاله بالقرب واجتناب ما لا يعنيه، ما لكش دعوة بغيرك لقوله: من حسن إسلام المرء تركه ما لا يعنيه.
شوفوا بقى الأدب ده! وينبغي لمن قصد المسجد أن ينوي الاعتكاف مده لبثه فيه، يعني أنت رايح المسجد دلوقتي هتصلي وأنت داخل المسجد انوي الاعتكاف الشوية اللي أنت داخلهم دول خلاص. ولا يجوز بيع ولا شراء فيه لمعتكفي وغيره، يعني لا يجوز بيع ولا شراء في المسجد، وده من أحكام المساجد، ما فيش بيع وشرا جوه المسجد خلاص، هذا حرام لا المعتكف ولا الغير معتكف ماشي. ولا يصح، يعني هذا البيع باطل. وبهذا نكون قد انتهينا من كتاب الصيام، والحمد لله رب العالمين، ومستني بقى البحث منكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.