الشيخ أمجد سميروصلنا لفصل في جماع الصائم وما يتعلق به. قال: ومن جامع في نهار رمضان ولو في يوم لزمه إمساكه أو دبر فعليه القضاء والكفارة.
من جامع في نهار رمضان؛ أول مسألة هتظهر معانا: ما هو الجماع؟ يعني هل المقصود بالجماع أنه ينزل؟ ولا المقصود بالجماع إيه بالضبط؟ فقال لك عثمان النجدي: فغيب حشفته، ذكره في فرج. خلاص، سيبكم كلمة أصل دي يعني إيه مش هنتكلم فيها. يبقى الجماع الذي تتعلق به الأحكام يا جماعة، ومش بس الأحكام هنا عموماً، الجماع الذي تتعلق به الأحكام هو تغييب الحشفة. الحشفة إيه هي؟ اللي هي مقدم الذكر، مقدم العضو الذكري. هو تغييب الحشفة في الفرج، هو ده الجماع الذي تتعلق به الأحكام؛ زي أحكام الزنا؛ إمتى نقول إنه وقع الزنا -عياذاً بالله- ويجب الحد؟ بتغييب الحشفة. زي الغسل؛ متى نقول يجب الغسل؟ بتغييب الحشفة. خلاص؟ وإن لم ينزل، وإن لم ينزل، ولذلك إذا أنزل بمباشرة دون الفرج -يعني واحد قبل امراته أو باشرها لكن من غير هذا الادخال الذي ذكرناه وأنزل منياً أو مذياً- هل تجب عليه الكفارة؟ لا، ما تجبش عليه الكفارة، هيجب عليه القضاء فقط خلاص. والمساله دي فاتت معانا لو تفتكروا خلاص، أنه من أنزل -سواء بقى منياً أو مذياً- بتقبيل أو مباشرة دون الفرج فعليه القضاء.
ما نقولش إن كده اسمه جامع. إمتى نقوله جامع؟ قلنا لكم بقى خلاص. قال: ومن جامع في نهار رمضان ولو في يوم لزمه إمساكه. قبل ما نخش، ولو في يوم لزمه إمساكه؛ إيه رايكم لو حد جامع في يوم قضاء؟ يعني صورة المساله أن واحد كان فطر يوم في رمضان بعذر؛ بدون عذر مش قضيتنا دلوقتي، المهم واحد وواحدة كانوا فاطرين في رمضان يوم ولا يومين ولا أي حاجة، ما هم بيقضوا اليوم ده، فجامع امراته في هذا اليوم؛ يوم القضاء مش في يوم الأداء، إيه رايكم؟ عليه كفاره ولا ما عليهوش؟ ومسموح بالهبد، إحنا بنتكلم في الكفارة مش في القضاء، القضاء ما هو هيقضي، إنما عليه كفارة ولا لا؟ ومسموح بالهبد ماشي؟ عبد العظيم يقول: لا، معليهوش. وماشي، اثنين واحد ناسيه وناس معليهوش وكده ماشي. طيب، هل سؤال تاني؟ المساله اللي أنا قلتها دي، المساله اللي أنا قلتها ركزوا كده ثواني، حكمها مذكور في الكتاب في الحته اللي احنا بنقراه ولا مش مذكور؟ السؤال اللي أنا سالته اللي هو في الكتاب، يعني في الحته ده في الجزء اللي باين قدامكم على الشاشة، اللي باين قدامكم على الشاشة دلوقتي؛ هل المساله اللي أنا قلتها دي مذكورة ولا غير مذكورة؟ ده السؤال تاني. واحد جامع في يوم القضاء؛ عليه كفارة ولا ما عليهوش؟ ناس قالت عليه وناس قالت معليهوش، فرجعت قلت لكم: طيب، هو مذكور الحكم ده عندنا دلوقتي في الكتاب في الحته اللي قدامنا دي؟ فالناس بتقول لا. اللي بيقول لا خلاص. اللي بيقول مذكور؛ مذكور فين بقى؟ فين مذكور في الكتاب؟ قولوا لي الكلمه الفلانية الكلمة. واضح السؤال بتاعي صح؟ عشان ماشي عمر شريف تونسي، أحسنت يا عمر، أحسنت! بيقول لك: هو بيقول هنا «من جامع في نهار رمضان». يبقى معنى كده أن الحكم خاص برمضان، مش ده اللي أنت عاوز تقوله يا عمر؟ طبعا لو حتى مش ده اللي أنت عاوز تقوله هتقول لي: آه، هو.
لأن أنا قلت أحسنت، فهيبقى هنا يا جماعة ركزوا في اللي هقوله ده بقى، أنا ليه طولت في الحته دي علشان أُفهمكم حته مهمة جداً، ركزوا فيها بقى يلا، ركزوا معايا، كله يركز معايا، هقول جملة كده، هقول جملة ركزوا فيها وبعدين أفهمها لكم: لو أنا دلوقتي عاوز أتكلم بقى بكلم طلاب علم زي زي حضراتكم كده، ناس فخمة وفاهمة في العلم والفقه؛ هقول الآتي: هقول وظاهره ألا قضاء على من جامع في يوم قضاء. هقول كده؛ ظاهره، مش هقول إن إن مسألة منصوص عليها لا، لكن ظاهر الكلام ظاهر الكلام يوحي بده. ماشي، بيقول ده ماهوش كلام علمي بقى اللي أنا بقوله ده بس عشان أُفهمكم يعني، الكلام العلمي اللي أنا قلته في الأول -يعني لو بنتكلم بلغة الفقهاء- هنقول كده: ظاهره أنه لا كفارة على من جامع في يوم قضاء، لكن هنا لم ينص على هذه المسألة، لم ينص خلاص. طب هي بقى هو كده فعلا ولا مش كده؟ لأن الظاهر ده يا جماعة قد يكون مراداً وقد يكون غير مراد، مفهومة؟ يعني هو هنا بيقول لي «ومن جامع في نهار رمضان» ممكن يكون هو كده ظاهر الكلام إيه؟ أنه من جامع في يوم في يوم قضاء لا كفارة عليه لأنه ماهوش في نهار رمضان، وممكن يكون الراجل هو بيكتب الكتاب لا يقصد لا يقصد هذا، هو يعني ايه هو مركز في رمضان بس يعني مش... هل هنا الظاهر مراد؟ مراد، خلاص ولذلك نص عليها في الإقناع بقى، طبعا في منتهى الإرادات برض ظاهر؛ يعني إيه لم يذكرها نصاً؟ لم ينص عليها، لكن ظاهر الكلام كهداية الراغب هنا، إنما المسألة دي منصوص عليها في الإقناع أنه من جامع في القضاء فلا كفارة عليه، ودي مسألة قد تحدث ونرجع نتسأل.
خلاص، اللي أنا بقوله ده لطلاب العلم والناس اللي عاوزه تفهم لغة الفقهاء بالبلدي بقى؛ بالبلدي كده: اللي هيجامع في نهار رمضان عليه قضاء وكفارة، اللي هيجامع في يوم القضاء -يعني فايته يوم من رمضان وبيقضي وبعدين جامع امراته- فعليه القضاء ولا كفارة عليه؟ ما لهوش كفارة، ده ملخص الحكم ماشي؟ بس أنا ما كنتش عايز أقول الحكم، بس أنا كنت عاوز أدربك على مسألة كده أو يعني لغة الفقهاء في مكان شبه كده علشان لما تقروه في حته أو تسمعوه من حد تبقوا فاهمين هو بيقول إيه. يبقى ساعتها أي فقيه هيتكلم هيقول لك ظاهره؛ إحنا بنحاول دلوقتي بندرس هاية الراغب، فهي كدا ظاهر هداية الراغب ألا كفارة على من جامع في في في يوم القضاء. تقوم تفهم على طول أن هداية الراغب لما لم ينص على هذه المسألة... فهمتوا؟ طيب، يبقى عرفنا إيه هو الجماع الذي تتعلق به الأحكام في الفقه عندنا، وعرفنا أن الجملة الأولى «ومن جامع في نهار رمضان» ظاهرها أن من جامع في يوم القضاء فلا كفارة عليه، وهو مراد نعم، هذا صحيح.
طيب، ولو في يوم لزمه إمساكه؛ إيه يعني؟ يعني واحد كان مسافر وقدم من السفر، فصار خلاص صار مقيماً، هنا المسافر اللي قادم ده هيقعد ياكل ويشرب ويهيص. إيه رأيكم؟ واحد مسافر وقدم، خلاص قدمه أثناء النهار وإحنا في رمضان. إيه، أحسنت! يبقى هنقول له: لا، لا تأكل ولا تشرب ولا تعمل أي حاجة. ليه؟ لحرمه الوقت. لحرمه الوقت هنا نقول إيه؟ يلزمه الإمساك، صح كده؟ يبقى يمسك وجوباً لحرمه الوقت. طيب، هل له أن يجامع في هذا اليوم؟ يحرم أنه يجامع لأن إحنا قلنا له إيه؟ هتمسك وجوباً، جامع بقى في هذا النهار؟ ده السؤال بتاعنا، يبقى واحد ومراته مسافرين وبعدين رجع في نهار رمضان فيقول إيه: إحنا أصلاً اليوم ده فاطرين فعادي، جامع. فجامع امراته، عليه الكفارة؟ هو كدا كدا هيقضي يا جماعة، هو كدا كدا ما هو فطران كدا كدا هيقضي، إحنا إحنا سؤالنا دلوقتي في الكفارة، ركزوا. يبقى من جامع في يوم لزمه إمساكه عليه الكفارة. صورة تانية، واحد مريض وبرئ، واحد مريض، فالمريض له إنه يفطر فبيقعد وياكل ويشرب، يجي في نص يوم كده بالنهار خف برئ من مرضه، نقوله: تمسك وجوباً، يلزمك الإمساك ليه؟ لحرمه الوقت. طب قال: خلاص، أنا كدا كدا طالما فطران اليوم ده، وجامع بقى، نقوله: عليك الكفارة. فهمتوا؟
طيب، قال: فعليه القضاء والكفارة، خلاص خلصنا دي. قال: وان كان دون الفرج فانزل أو عذرت المرأة فلقضاء فقط. ركزوا يا جماعة، هل هذا لحرمه... آه، لحرمه لأنه وقت محترم، وهو غير مشروع في حق الجماع؛ لأنه يلزمه الإمساك، يلزمه الإمساك، فهو يأثم إن أكل أو شرب، يأثم، حرام عليه يأكل ويشرب، صح؟ وحرام عليه كذلك إنه يجامع، فهو فهو غير مشروع في حق الايه؟ الجماع. وفعله في زمان محترم، فيبقى عليه الكفارة.
يلا نرجع تاني، طيب قال: وان كان دون الفرج فانزل أو عذرت المرأة فلقضاء فقط، كمسافر جامع في صومه. سؤال علشان نصحصح الناس شوية، الناس الجديدة اللي معانا في الصوم بس اللي هم ما بيحضروش الفقه من الأول معانا، أنا قريت دلوقتي كلام مين يا من يحض... يعني بدأوا معانا في الصوم، ما حدش يكتب من الناس القديمة، ما حدش يكتب، الناس الجديدة بس اللي هم بادئين معانا من الصوم. الكلام اللي أنا قريته ده، ده كلام مين دلوقتي معانا؟ حد جديد أصلاً ولا معناش؟ كل ده، ما فيش حد عارف طيب؟ اللي تاني مرة يحضر يقول برده، ما فيش حد جديد خالص، كله طفش الحمد لله!
ماشي، ماشي، إحنا بنقرا دلوقتي كلام الايه؟ صاحب المتن، اللي هو البهوتي. ماشي، طيب، الكلام اللي هو بالأسود التخين ده اللي بيسموه البولد ده اللي بين الاقواس، ده كلام صاحب المتن، اسمه إيه؟ الإمام البهوتي. الكلام اللي هو الرفيع بقى اللي بره الأقواس ده، كلام العالم اللي شارح المتن اللي هو اسمه عثمان النجدي، أحفظوا الأسمين من عشان شوية وهأسألكم تاني، الناس الجديدة طبعا الناس القديمة عارفة الكلام ده.
ماشي، طيب يلا نرجع تاني، يلا، قال: وان كان دون الفرج -يعني واحد باشر دون الفرج، يعني لم يحدث الجماع الذي ذكرناه، وهو إدخال الحشفة في الفرج- فانزل منياً أو مذياً، المسالة دي مرت معانا قبل كده يا جماعة لو تفتكروا اللي بيحضر معانا وفاكر، فالمسألة دي مرت: أنه سواء أنزل منياً أو مذياً بمباشرة دون الفرج أو بقبله أو بلمس، كل ده يفطر به ويقضي، خلاص؟ طيب، يبقى هنا ما لهوش كفارة بقى خلاص، لأنه ما حصلش جماع، ده حرام، اللي ده كله حرام في رمضان، عشان بس حدش يقول لي معلوش كفارة يبقى حلال، لا، هو حرام.
قال: أو عذرت المرأة. يعني إيه عذرت المرأة يا جماعة؟ عذرت المرأة، يعني لو أكرهها الرجل مثلاً، أكره الرجل امراته على الجماع، فدي معذوره هي خلاص، هو أكرهها، ولو أكرهها الرجل، لها أن تدافع -الصوت قطع؟ طيب لا، الصوت شغال- واحد جه... على فكرة يا جماعة اللي أنا بقوله ده كله دي أبسئلة بنتسألها: واحد جه أكره امراته على الجماع، لها أنها تدافع خلاص، وتزقه وتبعد وتجري وتضربه بحجارة، بس ما تموتوش! ليه؟ في حرمة وقت هنا، ماشي؟
المهم، أكرهت على الجماع، هل عليها هل عليها كفارة؟ لا، ما لهاش كفارة. نعرف من كده أنها لو لم تكره على الجماع، يبقى معنى كده أن في كفارة على الرجل وكفارة على المرأة، مفهومة دي؟ يعني رجل جامع امراته وهي مطاوعة وعالمة وذاكرة، فيبقى في كفارتين: كفارة على الرجل وكفارة على المرأة، خلاص؟ طيب، قال: أو عذرت المرأة. يبقى أول حاجة أنها تكون مكرهة، تاني حاجة أنها تكون ناسية، ناسية أن أنها صايمة في رمضان، ناسية زي ما واحد بينسى وياكل ويشرب في رمضان، فلو هي ناسية يبقى معذورة، يبقى ما لهاش كفارة خلاص، أو جاهلة، أو جاهلة! جاهلة بإيه بقى ركزوا يا جماعة في الحته دي، جاهلة بحرمة هذا. طيب، أفرضوا أنها عالمة، عارفة أنه ماينفعش أن أنا أجامع، لكن جاهلة بالحكم: أن أنا لو حصل الجماع فعلي الكفارة اللي هي هتشوفوها حاجة كبيرة، يعني حاجة ضخمة، نقول لها: لا، المقصود بالجهل هنا جهل الحكم، جهل الحرمة، أنما لو عالم بالحرمة وجهلت الكفارة لا، عليك الكفارة، ماشي؟
طيب، سؤال، سؤال: لو عذر الرجل، عليه كفارة ولا لا؟ عذر؛ يعني إيه؟ يعني هو بقى اللي ناسي أو جاهل أو أو مكره، هل عليه كفارة ولا ما لهوش كفارة؟ لا، معليهوش. أعتقد، أشك. حد ليه هبده؟ اهبده عادي، مسموح بالهبد. نعم، عليه. زوجته هتذلني. فكر الشيخ. نعم، عليه. نفس الكلام اللي قُلناه فوق هنا، قال: «أو عذرت المرأة، فظاهره أن الرجل إذا عذر عليه كفارة». مش ده ظاهر الكلام؟ وإلا ليه قال عذرت المرأة؟ ليه قال كده؟ فهمتوا يا جماعة نفس الكلام اللي قلناه فوق يتقال هنا، ماشي؟
يبقى ظاهر، عاوزين تقولوا ظاهر العمدة ماشي، ظاهر الهداية ماشي، سواء عمدة الطالب أو هداية الراغب كله ماشي. يبقى لو عذر الرجل عليه كفارة، ماشي؛ يعني لو جهل أو نسي عليه كفارة، أو أكره... هو مين يتصور الاكراه في حق الرجل؟ مش عاوزين بقى نقعد نسب في مسائل ماهيش بتحصل كتير يعني، عليه كفارة. المسألة اللي ممكن تحصل دلوقتي اللي ممكن نقابلها: واحد ناسي، أو واحد جاهل، ماشي، عليه كفارة، ماشي؟
طيب ليه؟ يعني الراجل عليه كفارة عشان الحديث اللي هو العمدة في الباب عندنا ده: الرجل الذي جاء النبي صلى الله عليه وسلم، هلكت قال: مالك؟ فقال: وقعت...
على امراتي وانا صائم. لم لم يستفصل منه النبي صلى الله عليه وسلم عن حاله؟ يعني ما قالوش: هو انت كنت ناسي؟ هو انت كنت جاهل؟ طب انت عارف؟ ما سالوش على كده. فكونه ما سالوش يبقى هذه الأوصاف لا تؤثر في الحكم. وإلا لو كانت تؤثر في الحكم لسال صلى الله عليه وسلم. فهمتوا دي يا جماعة؟ يعني الراجل جاي بيقوله: انا وقعت على امراتي وانا صائم. لو كان واقع على امراته وهو ناسي، لو كان وصف النسيان مؤثر في الحكم، يعني ايه مؤثر في الحكم؟ يعني لو كان وصف النسيان يخليه ما عليهوش كفّارة، كان زمان النبي سأله عليه الصلاة والسلام قالله: هو انت ناسي؟ كنت ناسي؟ هو انت كنت جاهل؟ كان زمانه سأله على كده. فهمتوا يا جماعه؟ كونه ما سألوش يبقى الحكم واحد في حال هؤلاء جميعًا.
طيب، نرجع تاني. قال: أو عذرت المرأة فالقضاء فقط، كمسافر جامع في صومه. الله! انت هتلخبطنا ليه دلوقتي؟ فوق قال لك إن عليه قضاء وكفّارة، لو كان حتى لو كان مجرد إنه يلزمُه الإمساك. وقلنا لكم ساعتها زي صاحبنا المسافر ده اللي رجع وأقام، فخلاص يلزمه الإمساك. خلي بالكم، ركزوا في اللي هقوله ده هو. هو يا جماعه، المسافر ده لما رجع وأقام اليوم ده، اليوم ده هو مفطر ولا صائم؟ ردوا عليّ، واحد مسافر، أحسنت، هو مفطر. واحد مسافر كان أصلا بياكل ويشرب عادي خالص طول ما هو في السفر وبعدين رجع، فنقول له هنا بقى: طالما رجعت بلدك يلزمك الإمساك ايها المسافر. صح كده؟ آه، صح كده. خلي بالكم، ده مفطر اهو في اليوم ده، ومع ذلك هنقول له: لو جامعت، عليك الكفّارة. كده كده القضاء عليه، مش قضيتنا القضاء.
طراحنا قائلين لك ايه بقى؟ المسافر لو جامع في صومه ما عليهوش كفّارة. نقرا كده الكلام تاني، قال: وإن كان دون الفرج فأنزل، أو عذرت المرأة فالقضاء فقط، كمسافر جامع في صومه. الله! يعني واحد مسافر يا جماعه؟ المسافر ده هو قال لك: انا أصوم، مش مفطر دلوقتي. لو مفطر ما فيهاش إشكال، طول ما هو مسافر مفطر عادي، ويجامع براحته، ما هو مفطر خلاص ومسافر، ما عليهوش يعني لا يلزمه الإمساك. إنما لا، ده مسافر صائم، هو مسافر وقال لك: انا أصوم، وانا مسافر أصوم الفرض. طبعا ما ينفعش تصوم نفل، لكن قال لك: انا أصوم رمضان. خلاص وفي وسط الصيام جامعه لكنه مسافر، هل عليه كفّارة؟ نقول: لا، ما عليهوش كفّارة، عليه قضاء فقط. تقول يعني يا راجل بقى هو هو صام يجامع ونقول ما عليهوش كفّارة، ولما يكون اليوم مفطر فيه ويجامع نقول عليه كفّارة؟ نقول: ما انت ما فهمتش بقى ايه السر في المسألة. ايه السر في المسألة؟ السر في المسألة أن هذا المسافر الصوم في الصوم في حقه يشبه النفل. هو مش نفل، لكن يشبه النفل. ليه يشبه النفل؟ لأنه غير واجب عليه أصلا، الصوم غير واجب عليه خلاص، فكالنفل كده في حقه ماشي في حق الصائم.
خلاص، طيب نرجع تاني. مش احنا بنحاول بس نفتح دماغات الناس اللي معانا بقى لها كتير لِمآخذ العلماء مآخذ الفقهاء يعني من أين يأخذون الأحكام؟ عشان الناس ممكن تتسرع، يقول لك: ادي يا عم كتب الفقه اللي بيقولوا عليها، وادي كتب المذاهب، شوفوا بيقولوا أحكام غريبة ازاي! لا، انت اللي مش فاهم، العلماء ليه قالوا في دي كده، وقالوا في دي كده؟ طبعا هو الكلام اللي بقوله ده كلام بسيط جدا ومختصر جدا، وإلا فالمسائل دي مناقشة بشكل أوسع من كده.
خلاص، كمسافر جامع في صومه يبقى عليه القضاء. ماشي، قال: وإن جامع في يومين فكفارته. وان أعاده في يومه، طب واحد جامع مرتين في يوم واحد عليه كفّارة واحدة ولا كفّارتين؟ قال لك: والله على حسب، ولذلك هيقول: عليه كفّارة واحدة. نقول له: غلط. قول: عليه كفّارتين؟ اقول له: غلط. والجواب التفصيل: قال فواحدة إن لم يكن كفر، يعني للاول للوطء الأول. هنا صورة المسألة: واحد جامع في نهار رمضان، وبعدين جه سأل: نعمل ايه؟ نقول له: عليك القضاء والكفّارة. قال لي: يا خبر، عليا كفّارة! طب ايه الكفّارة؟ قلنا له كذا أو كذا أو كذا. راح عامل الكفّارة في نفس اليوم وهو قاعد في القعدة معانا، طلع الكفّارة، راح مروح بيته جامع تاني بعد أن كفّر، نقول: عليه كفّارة أخرى.
خلاص، طيب، الصورة الثانية: أن واحد جامع في يوم في نهار رمضان. احفظوا يا جماعه المسائل دي، المسائل دي بتتحصل وبنتسأل فيها. واحد جامع في نهار رمضان، خلاص، وبعدين بعديها بساعتين تلاتة راح مجامع كمان مرة في نفس اليوم، لكن ما كانش طلع كفّارة، يبقى عليه كفّارة واحدة. خلاص، ليه بقى؟ مش وقته، خلاص. يعني احنا خدوا الأحكام كده دلوقتي، نقرا: وإن جامع في يومين فكفارته، وإن أعاده في يومه فواحدة إن لم يكن كفّارة للأول. خلاص، ومن جامع ثم مرض أو جن أو سافر ونحوه لم تسقط. يعني واحد كان في نهار رمضان جامع، وبعدين سافر بعد ما جامع، فيقول ايه؟ انا خلاص انا سافرت اليوم ده فلن افطر، نقوله: لا، لا. ليه؟ لأنها استقرت في حقك الكفّارة خلاص. استقرت، قال: ولا كفّارة بغير جماع في نهار رمضان. خلاص، اهو هنا بقى نص نص عليها في الحته دي، ولا كفّارة بغير جماع في نهار رمضان. ماشي.
طيب، ركزوا في اللي هقوله في المسألة دي يا جماعة. قال لك: والنزع جماع. هنا ده كلام مين؟ والنزع جماع، ده كلام مين؟ لو حد جديد مش قديم، عمالين نقول جديد جديد الناس الجديدة ماشي، عثمان النجدي. احفظوا الأسماء بقى، الناس الجديدة تحفظ معانا، والنزع جماع يا جماعه، صورة المسألة أن رجل يجامع بالليل، وهو يجامع أذان عليه الفجر فنزع. فنزع. هل عليه كفّارة؟ نعم، عليه كفّارة خلاص، لأن هذا النزع كان نهارًا.
طيب، يلا نكمل. طيب وهي كان بقى، واحد هيقول طب ايه بقى الكفّارة؟ وهي عتق رقبة، فإن لم يجد فصيام شهرين متتابعين، فإن لم يستطع فاطعام ستين مسكينا. هي دي الكفّارة يا جماعه، على الترتيب مش على التخيير، على الترتيب كده. يبقى أول حاجه أنه يعتق رقبة. يقول لك: طب ما فيش رقاب؟ يعني يعتق عبد. فان لم يجد طب مش لاقين؟ فصيام شهرين متتابعين. يصوم شهرين كاملين ورا بعض من غير ما يفطر. ماشي، ما يقدرش يصوم شهرين كاملين ورا بعض؟ يطعم ستين مسكينا. هي دي الكفّارة. طبعا كفّارة شديدة جدا. ماشي، طيب لازم بالترتيب؟ لازم بالترتيب، يعني لو واحد يقدر يصوم الشهرين متتابعين، ما ينفعش ينتقل من الشهرين لإطعام الستين مسكينا. ما ينفعش، نقول له: تصوم الشهرين متتابعين خلاص.
طيب، قال: فإن عجز، يعني إن عجز عن كل اللي فات ده، لا هو قادر يعتق رقبة ولا قادر يصوم ولا قادر يطعم، خلاص، سقطت الكفّارة. يعني هنموته؟ سقطت عنه الكفّارة. ماشي.
طيب، ثم بدأ فصلًا جديدًا، فصل فيما يكره وما يستحب في الصوم وحكم القضاء. الفصل بقى مهم، فنركز فيه يا جماعه. خلاص الفصل اللي فات ممكن الناس تحتاجه ناس ما تحتاجش، ناس تقابله في حياتها ناس ما تقابلوش. الفصل ده مش كده، الفصل ده بقى كلنا محتاجينه، كل اللي بيسمع دلوقتي محتاج الفصل ده، عاوزين نركز فيه.
قال: كره لصائم جمع ريقه فيبلعه. وعارفين انك تبلع الريق على العادة على يعني على جري العادة، واحنا بنبلع ريقنا عادي ما فيهاش مشكله دي، ما فيهاش حاجه. خلاص الشهرين المتبعين يا جماعه اللي صاموا دول ممكن يفطر في اثنائه للاعذار طبعا. خلاص، يعني مراه المراه اذا حاضت خلاص هتفطر، طيب ممكن واحد يمرض في النص يفطر أيام المرض، طيب ممكن واحد يدخل عليه العيد في الشهرين دول داخل عليه العيد، فه العيد حرام صومه خلاص، هيفطر العيد، والحاجات دي كلها لا تقطع التتابع، اللي انا بقوله ده لا يقطع التتابع. خلاص، ماشي، ماشي.
طيب، قال: كره لصائم جمع ريقه فيبلعه. يعني ايه؟ يعني قلنا إذا بتتبلع ريقك على جري العادة ما فيهاش مشكلة. لا، واحد جمع ريقه في بقه وبلعه مره واحدة مكروه. ليه مكروه؟ خروجا من الخلاف. فكأني هناك من العلماء من قال إنه إنه من يجمع ريقه ثم يبلع هذا الريق يفطر بذلك، فخروجا من الخلاف كرهناه. شوفوا يا جماعه بقى أدب العلماء! اعلموا الأدب ده بقى من العلماء، مش هنا يقول لك: احنا الادله بتقول عندنا إنه ما فيهاش مشكلة فهنعمل... لا، ما يتجروش بالقوة دي على الأحكام في عبادات شبه دي، كرهوه، اهو! مع أن هم كان الأدلة عندهم لا تقوى ولا تنهض على أن هم يقولوا إن هو يفطر، ومع ذلك قالوا مكروه ليه؟ خروجا من الخلاف.
خلاص، الناس اللي الأذان بياذن وهي بتاكل وتشرب، ليه؟ اصل الأذان بياذن بدري عندنا! ايه يا ابني الجرأة دي يا ابني؟ ايه الجرأة اللي انت فيها دي؟ انت عارف انت بتتجرأ على ايه؟ على ركن من أركان الدين، صوم رمضان ركن من أركان الدين. انت بقيت ايه كده؟ انت انت عارف يعني ايه؟ يعني أكني بالضبط دخلت على بيت، البيت ده في عمدان وحيطان. مش بتنقر في الحيطة دلوقتي، انت عمال تنقر في العمود، عمال عملت تنقر في العمود فيوشك البناء أن ينهدم عليك على دماغك! ماشي اصل الأذان بياذن بدري. قاعد ياكل ويشرب خلاص وتلاقيه إيه بقى، مش عايزين نتكلم يعني ما عرفونيش.
المهم كره صائم جمع ريقه فيبلعه، لا، ده مكروه. قال: وذوق طعام وعلك قوي تاني. وكره له هنقرا الكلام على بعض، كلام عثمان على كلام البهوتي: وكره له ذوق طعام ولو لحاجة، ومضغ علك قوي وهو الذي كلما مضغته صلب وقوي؛ لأنه يجلب البلغم ويجمع الريق ويورث العطش. ذوق الطعام يا جماعه، و المسألة دي بيحتاجها النساء وهي بتعمل الأكل. تعالوا نقرا كده كلام البهوتي من غير كلام عثمان، قال لك: وذوق طعام وعلك قوي. هنقول أن ظاهر كلام البهوتي هنا أن ذوق الطعام مكروه مطلقا، سواء لحاجة أو لغير حاجة، صح؟ لأنه قال ايه؟ وذوق طعام، ما قالش ايه؟ لغير حاجة. قال وذوق طعام مكروه، يبقى معنى كده إنه لو ذاق الطعام لغير حاجة مكروه، ولو ذاقه لحاجة، يعني ايه لحاجة؟ يعني المرأة وهي بتعمل الأكل بتدوق تحتاج تشوف الملح مظبوط ولا لا.
خلاص، سيبكم احنا في مسألة قبليها دلوقتي، خلونا في اللي احنا فيها، ما حدش ينقلني على مسألة تانية. ماشي، وذوق طعام. قلنا المرأة في المطبخ بتحتاج وهي بتحضر الأكل الفطار فعاوزه تدوق الملح كويس مش عارف البهارات مظبوطة فبتدوق هذه حاجة، يعني محتاجة تعمل ده عشان تعرف تظبط الأكل. خلاص، فهنا قال لك إنه مكروه، حتى لو للحاجة مكروه، خلاص وهذا أيضا ظاهر المنتهى. وهذه المسألة مما خالف فيها الاقناع والمنتهى. انا ليه بقول ده علشان ده الناس بتحتاجه، ففي الاقناع نص على أن الكراهة مخصوصة ما إذا كان لغير حاجة، فإن كان ثم حاجة فلا كراهة، ده في الاقناع، لكن المذهب اللي هو قايله هنا... ماشي.
وايه الاقناع وايه المنتهى؟ مش هنعيد بقى تاني، اللي لسه جديد يبقى يسمع الدروس القديمة، هيعرف ايه الاقناع وايه المنتهى. الناس عملت أبحاث في الكلام ده، قدمت لنا أبحاث ايه الاقناع وايه المنتهى، ولو خالف الاقناع المنتهى بنعمل ايه؟ قصة كده عندنا في المذهب، يعني الناس عملت فيها أبحاث، جزاهم الله خيرا.
ماشي، قال: وكره له ذوق طعام ولو لحاجة. يبقى بلاش أحسن، حتى لو انت في المطبخ بلاش ندوق الطعام، لا، بلاش. ومضغ علك قوي. هنا يا جماعه العلك القوي، العلك اللي هو زي اللبان اللي احنا مسمين لبان، مش صورة اللبان اللي احنا عارفينه خالص، ولذلك كمان شوية خلونا كده نقرا كلام البهوتي على بعضه عشان نفهم المسائل. بيقول: وذوق طعام وعلك قوي، فان وجد طعمهما بحلقه افطر. ايه ده ايه ده ايه ده؟ لا، واحدة واحدة بقى علينا كده. يعني ايه؟ يعني لو حضرتك أو حضرتك بتدوق الطعام، ولقيتي طعم الطعام في الحلق في حلقك أنت، فطرتي! أصلاً مش دي مسألتنا، مش دي المسألة اللي فيها الكراهة، امال ايه؟ يعني ده حرام، وأمال المسألة اللي فيها الكراهة؟ إنك هتدوق بطرف لسانك من غير ما تجد طعم هذا الطعام في الحلق. فهمتوا دي؟ يعني بتدوقه باللسان فقط، مش هاخد معلقتين رز أدوق، ما فيش كده ماشي. لا، إحنا بندوق باللسان فقط، إنما لو انا بدوق لقيت طعم الطعام في الحلق، أفطرت. دي مسألة تانية. ماشي.
الصوت الصوت رجع، طيب، طيب يا جماعه إحنا كنا بنقول ايه بقى؟ كنا بنقول أن ذوق الطعام ذوق الطعام المكروه ده، ما لم تجد طعمه في حلقك، وإلا فلو وجدت طعمه في حلقك أفطرت بذلك، يبقى أنت اللي بتدوق الطعام دي عشان بتحضر الأكل، يبقى بتدوق على طرف لسانها كده، خلاص، وأن المسألة دي مما خالف الاقناع فيه المنتهى، ده اللي كنت بقوله ما عرفش انتوا لحقتوا؟ طيب، الحمد لله، لحقتوا الكلام كله، الحمد لله. طيب يبقى مكروه ذوق الطعام، ومكروه مضغ
العلك القوي، العلك ده اللي هو اللبان، مش اللبان اللي هو بتاعنا دلوقتي ده يا جماعه، خلاص؟ لأن اللبان بتاعنا زي ما اخوكم قال من شوية، قال: ده فيه سكر، وفيه طعم، وفي أول ما بتحطه في بوقك أصلاً ببتدي يتحلل، وتلاقي طعمه في الحلق. إنما مش ده المقصود، مش ده المقصود.
المقصود العلك القوي؛ اللي هو إيه؟ كلما مضغته صلب وقوياً، ولا يتحلل منه شيء، هو ده العلك القوي. وده مش موجود دلوقتي، فالمهم ما حدش يمضغ لبان؛ لأن اللي هيمضغ اللبان هيفطر، هيفطر لأنه هيلاقي طعم اللبان في حلقه. فهيفطر. في حاجه اسمها حد يمضغ لبان دلوقتي؟ طيب، قال: فان وجد طعمه بحلقه أفطر.
قال: وحرم مضغ علك يتحلل مطلقاً، أهو حرام تمضغ اللبان بتاع اليومين دول، حرام. وبلع نخامة ويفطر بها، ودي خطيرة جداً بقى، يبقى واحد في نخامة جته، سواء بقى من صدره، سواء من الجوف، سواء من الدماغ، حصل نخامة، نخامة زي اللي هي زي البلغم كده، ماشي؟
هنقول: معجون السنان ده سؤال حلو ومهم. النخامة اللي هي زي البلغم، ماينفعش طالما وصلت إلى الفم ماينفعش تبلعها، لو بلعتها تفطر بها، فطرت. يبقى البلغم ده وصل للفم على طول، تتف، ما تبلع. طيب، معجون السنان؟ معجون السنان يا جماعه أولى شيء في معجون السنان أنك تستخدمه قبل الإمساك بشويه حلوين كده، بعضهم حتى يقول: قبليها بثلث ساعة، نص ساعة. ليه؟ بعض الأطباء بتاعة أطباء الأسنان على الثقات -يعني اللي نثق فيهم- بيقولوا: إن معجون السنان بنستخدمه ده بيففضل زي في منه حاجات في السنان وبتفضل تتحلل مدة، يعني ماشي؟ فلو واحد ناوي يستخدم معجون السنان، يستخدمه قبل الإمساك، قبل يعني قبل أذان الفجر اللي هو الثاني يعني أو الصادق، قبل أذان الفجر بشويه، بنصف ساعة، في الحدود دي. خلاص، الصوت المفروض كويس؟ الصوت كويس عندكم ولا لا؟
طيب، السواك بقى معاكم، السواك، القطرة بتاعة الأنف نحن اتكلمنا فيها، مش هنعيد الكلام تاني، اسمع الدروس اللي فاتت. طيب، أو النقط، يعني نقط الأنف نحن اتكلمنا فيها، خلاص. طيب، قال: السواك بقى عادي، السواك طالما في سواك بينزل برضه بالنعناع، لا، السواك العادي ده استخدمه، مافيش مشكلة. وبرضه جابت معانا قال: وتكره قبله ودواعي وطء لمن تحرك، لمن تحرك شهوته. تكره قبله ودواعي وطء، يعني القبلة في نهار رمضان والرجل يقبل امرأته.
الأول يا جماعه قبل ما في مسألة افتكرتها دلوقتي مهمة جداً: إذا بلع ريق غيره يفطر، ودي قد تحدث بين الأزواج أو الأم بقى وصبيها الصغير، واحد بلع ريق حد تاني، عارفين الأم أو الابن الصغير بقى طفل صغير سنه مش عارف كم شهر، إيه؟ عمال يبوسه في بوقه، مش عارف إيه، فريق الطفل إيه؟ ربما يدخل إلى إيه؟ إلى فم الأم أو فم الابد، أو فم الاب، ويجري مع الإيه؟ مع ريق الأم أو الاب، هذا يفطر به، ركزوا في الحته دي.
خلاص، مسألة ثانية وقد تحدث ونص عليها الفقهاء عندنا: ما لو أخرج ريقه إلى بين شفتيه، فإن أخرج ريقه إلى ما بين شفتيه ثم بلعه يفطر. يعني الريق طول ما أنت بتبلع وهو في بقك والله لو على جري العادة ما فيهوش مشكلة، لو جمعته هو داخل الفم وبلعته مرة واحدة، إيه حكمه حد يعرف؟ أحسنت عبد العظيم، مكروه، لسه قايلين. أحسنت يا محمد، مكروه، يعني برضه ما تفطر، مكروه، وإنما كرهناه خروجاً من الخلاف. واحد بقى خرج الريق ده لما بين شفتيه، عارفين زي ممكن واحد عارفين الحركة دي، واحد قاعد بيلعب كده يروح مخرج الريق ليه؟ لبين الشفتين ويرروح بلع. نص فقهاؤنا أن هذه يفطر بها، فض... ركزوا في دي، ما حدش يعملها في رمضان.
تعالوا نرجع تاني: تكره قبله ودواعي وطء لمين بقى؟ اللي هتتحرك شهوته بمثل هذه الأمور؛ لأن النبي صلى الله عليه وسلم نهى عن القبلة شاباً، ورخص فيها لشيخ، شيخ يعني راجل كبير في السن، مش شيخ يعني شيخ دين، لا، الشيخ ده اللي هو الراجل الكبير في السن، رخصة فيها لشيخ، ونهى عنها شاباً، ماشي. طيب، إن ظن أنزال تحرم؛ لو غلب على ظنه أن لو قبل امرأته أو داعبها أو كذا هينزل، هينزل إيه مين يقول؟ مش بس مني، مني أو مذي. أيوه ركزوا في دي، على المذهب لو أمذى بقبله أو بلمس أو ده كله يفطر بيه، مش لازم مني. فلو شاب وعارف من نفسه إنه لو قبل أو داعب أو كذا هيمذي، هيمذي مش هيمني، هيمذي، يبقى يحرم عليه إنه يقبل.
خلاص، طيب شيخ ساعات حد شفايفه بتنشف وبيتمضمض، ما فيش مشكلة في كده.
طيب، قال: ويجب اجتناب كذب وغيبة وشتم، ده كلام البهوتي، ندخل كلام عثمان: ويجب مطلقاً (يعني في رمضان وفي غير رمضان، وهو صائم وهو غير صائم) يجب اجتناب كذب وغيبة ونميمة وشتم. خلاص، الكذب معروف، أن تخبر بخلاف الإيه؟ الحقيقة. والغيبة معروفة ولا مش معروفة؟ أن تذكر أخاك بما يكره في غيبته، هي دي الغيبة خلاص، أن تذكر أخاك بما يكره في غيبته، حتى لو هي فيه أصلاً، لو هي فيه هي اللي اسمها غيبة، إنما لو مش فيه دي حاجة تانية بنسميها بهتان، خلاص. ونميمة: أن تبتدي توقع الناس في بعض، الكلام ده لده وده لده علشان الاتنين يوقعوا في بعض، دي النميمة. فكل ده حرام، ومنه ما هو من الكبائر، ولكنه أكد، أكد بقى في رمضان، ليه؟ لقوله صلى الله عليه وسلم: «من لم يدع قول الزور» مكتوب الحديث عندكم «والعمل به فليس لله حاجة في أن يدع طعامه وشرابه». وشتم برضه إيه؟ يجب أن تجتنب الشتم مطلقاً، ماشي.
طيب، شوفوا الأثر الجميل ده، قال أحمد: ينبغي للصائم أن يتعاهد صومه من لسانه، ولا يماري، ويصون صومه. كانوا يعني السلف إذا صاموا قعدوا في المساجد ما يخرجوش بقى ويخلطوا الناس، ليه؟ وقالوا: نحفظ صومنا، ولا نغتاب أحداً، ولا نعمل عملاً نجرح به صومنا. خلاص، يبقى تقلل الخلطة بالناس على قد ما تقدر وأنت صايم، ليه؟ علشان تحافظ على صومك، وسنة للصائم قراءة القرآن وذكر وصدقة وكف لسانه عما يكره، وسنة لمن شتم قول: إني صائم.
يقولها بصوت عالي ولا بصوت إيه رايكم؟ ها جهرا عالي، جهرا عالي، لحقتوا تقروها ولا أنت هتقول بصوت ليه؟ يعني هو بيكلم مين اللي هتقول بصوت ده؟ هيكلم مين يعني؟ رياء؟ ماشي، مروان دايماً يجيب لنا إيه؟ فكر خارج الصندوق، خارج الكوكب كله، ما شاء الله. ماشي، بصوا يا جماعه، طبعاً بيقولوا مروان ده له وجه أنا بهزر، الشيخ مروان شيخ فخم، ما تحضرش دروس الفجر ليه يا مروان؟ اتق الله يا ابني هتموت، ماشي.
يقولها بصوت عالي ولا صوت ولا يقولها بصوت؟ يبقى بيتكلم مين؟ إني قالوا الأول معناها إيه؟ إني صائم. بعض العلماء قال: إني صائم دي بيذكر بها أو يعني بينبه بها اللي هو عمال يشتمه ويجهل عليه ده: ﴿فَإِن سَابَّهُ أَحَدٌ أَوْ قَاتَلَفَلْيَقُلْ إِنِّي صَائِمٌ إِنِّي صَائِمٌ﴾ الحديث كده، إني صائم إني صائم، اثنين مرتين. بعض العلماء قال: يقولها جهراً، وهنا قال لك يقولها جهراً في الكتاب عندنا، أنا طبعاً حاولت أجري ألحق أنزل بس أنتم لحقتوا ما شاء الله، غشاشين. يبقى كأنه لو قالها جهراً بيقول للراجل الثاني: خلي بالك أنا صائم، يعني أو بيذكره بحرمة الصوم وكذا. بعض العلماء قالوا: لا، يقولها سرا، طب لو قالها سرا بيقولها لمين؟ بيقول لنفسه، بيفكر نفسه، إني صائم، يعني اهدأ اهدأ، إني صائم إني صائم، بيفكر نفسه. وبعض العلماء قال لك: يقولها مرة جهراً ومرة سراً، مش هم اتنين؟ هيقول مرة جهراً إني صائم ومرة سراً إني صائم. وبعض العلماء قال بقى زي ما الحاج مروان قال كده قال: والله لو في لو في فرض يقولها جهراً، لو في رمضان يعني، لأن لأن صوم رمضان لا يتصور فيه رياء، دي تبقى مصيبة بقى، يعني لو وصلنا لحال أن اللي يصوم رمضان هيرائي بيه، ده عايش وسط إيه ده؟ يعني هل ممكن نجي في يوم من الأيام اللي صايم رمضان يقول ها أنا صايم النهار ده؟ يعني ما أعتقدش الأعلم نحن لسه ما وصلناش للحالة دي، قد نصل طبعاً للحالة دي، إنما نحن مش كده، الناس بتصوم عادي، يعني فلو صايم في رمضان يقولها بصوت عالي، ولو صايم نفل يبقى يقولها بصوت عشان إيه؟ الرياء زي ما مروان قال كده، ماشي.
طيب، يلا نرجع تاني: يبقى سنة لمن شتم قوله: إني صائم. وسنة تأخير سحور إن لم يخش طلوع فجر ثان، يبقى السنة تأخير السحور، خلاص. وده لحديث: تسحرنا مع النبي صلى الله عليه وسلم، ثم قمنا إلى الصلاة، قلت: كم كان بينهما؟ يعني بين السحور وبين الصلاة؟ قال: قدر خمسين آية. متفق عليه. وتعجيل فطر، يبقى تأخير السحور سنة، وتعجيل الفطر سنة: «لا يزال الناس بخير ما عجلوا الفطر».
واحد دي أسئلة بتجيلنا من الشباب يقولك: أنا صراحة لما بفطر يا شيخ ما بركز في صلاة التراويح، فأنا باخر فطاري، أنا باخر فطاري لغاية ما أخلص التراويح علشان أبقى مركز في التراويح، نقول له: ده مافيش تعارض بين ده وأنك تعجل الفطر، الفطر ده مش لازم تاكل نصيبك في الفراخ والرز والملوخية، الفطر ده أنك تفطر على أي حاجة، افطر على تمر رطب، فإن لم تجد فتمراً، فإن لم تجد فلتستحسوات من ماء، ده الترتيب السنة، خلاص فطرت على الرطب خلاص خلصنا، أنت كفطرت، مش عاوز بقى تاكل حتى بعد التراويح أنت حر ما تاكلش، مفهوم يا جماعة؟ ماشي، علي بيقول تمر ولبن، ده في مساكن شيراتون، إنما الناس العادية الغلابه بتاكل تمر بس، ماشي.
طيب، قال: وسنن تعجيل فطر لقوله صلى الله عليه وسلم: «لا يزال الناس بخير ما عجلوا الفطر». قال: والمراد إذا تحقق غروب الشمس، ماشي مش مهم. قال: وسنن كونه على رطب، وسنن كونه على رطب، على رطب يعني الفطر يكون على الرطب، لو ما لقاش يبقى على التمر، ما لقاش يشرب مية لحديث أنس: كان رسول الله صلى الله عليه وسلم يفطر على رطبات قبل أن يصلي، فإن لم تكن فعمرات، فإن لم تكن حسى حسوات من ماء، خلاص. فان لم يكن الرطب فتمراً إن وجد، وإلا فيفطر على ماء لما تقدم الحديث اللي احنا ذكرناه.
مسألة بيتسال عنها ونص عليها في المنتهى: هل يعني الحاجات دي بس ولا ممكن أي حاجة تانية؟ في المنتهى قال: إنه في معنى التمر، كل حلو لم تمسه النار، كله حلو لم تمسه لم تمسه النار، هكذا. لا مش ما لم يمسه النار، لازم يكون حلو برضه يعني النار ما مستش حاجات كتير، ماشي.
وقوله عنده (يعني عند الفطر): اللهم لك صمت، وعلى رزقك أفطرت، سبحانك وبحمدك، اللهم تقبل مني، إنك أنت السميع العليم.
ومن فاته رمضان قضى عدد أيامه، وسنة فوراً متتابعاً، يبقى السنة أنك أول ما يخلص رمضان تفطر في العيد وبعدين تجيب بقى اللي عليك، يبقى النساء ياخدوا بالهم، دي السنة فوراً متتابعاً، عليك سبعة أيام، عليك ست أيام، خمس أيام، افطري يوم العيد وبعدين تجيبيهم، خلاص. خصوصاً إنه في قول بعض أهل العلم، وكذلك هو قول الحنابلة إنه ما ينفعش تصوم أو تصومي نفل قبل ما تأتي بالقضاء، أي نفل ولا يصح، ده قول موجود في الفقه، وده قول أصلاً للحنابلة، فيبقى الأحسن: هاتي اللي عليك أول ما تخلصي علشان عاوز أصحوم الست من شوال تصومي، ماشي. يبقى بعديه يعني، قال: وسنة فوراً متتابعاً، ويحرم تأخيره إلى رمضان آخر بلا عذر، واضح الكلام؟ يعني ما يأخرش الأيام اللي عليه لغاية ما يجي رمضان تاني، لا حرام، طب لو أخره يبقى عليه إنه يقضي وعليه إنه يطعم كمان، فان فعل: أطعم لكل يوم مسكيناً مع القضاء.
فواحدة كسلت وما صامت لغاية ما رمضان التاني دخل عليها، نقول: بعد ما رمضان يخلص إن شاء الله تقضي اللي عليك أولاً، أثمت طالما ما فيش عذر، أخرت بلا عذر، هو ممكن عذر؟ آه، ممكن مريضة والمرض استمر معاها شوية، مرضعة ولسه بترضع وما فيش أيام في النص كانت تقدر تيه ترضع فيها وتقوى على ده، المهم في أعذار ممكن. إنما لو بلا عذر نقول لها: أولاً أنت آثمة حرام عليك، ثانياً القضاء ما سقطش هتقضي برضه بعد رمضان ده، ثالثاً بقى: عليك إطعام لكل يوم مسكين، فهمتوا؟ قال: مع القضاء أطعم لكل يوم مسكيناً مع القضاء.
قال: وإن مات أطعم عنه أو أطعم عنه، ومن مات وعليه نذر صلاة أو صوم أو حج ونحوه، فعل من تركته، فإن لم تكن سنة لوليه، يعني لو مالوش تركة يبقى مسنون للولي، الولي هنا اللي هو الوارث اللي هو لو في فلوس كان هو اللي هيراث، مسنون إنه يطلع فلوس من عنده إنه يتعمل بيها الحاجات دي لمن مات.
فصل في صوم التطوع، هناخدوه النهارده ويبقى كده إيه إن شاء الله نكون خلصنا الإيه الصيام كله، ولا نخليه المره الجاية وناخده هو والاعتكاف؟ إيه رايكم؟ ماشي، خليه المره الجاية عشان ما نستعجلش يعني، نشوف أسئلتكم ولو كده نختم إن شاء الله الدرس. طيب يا شيخ، أنا عندي مشكلة في الحلق...
بصحى من النوم ساعات كتير بيكون لازم أتغرغر بماء دافئ لأنه بيكون في زي صديد، مش عارف بقى شوف طبيب، مش عارف المسألة دي.
ماشي، في رأي حد بيقول إن الحامل والمرضع مالهاش قضاء، احنا بندرس كتاب الآراء كتير في الفقه، اللي حاضر معانا من الأول هيبقى فاهم ده، احنا قلنا إن معظم مسائل الفقه فيها خلاف، لو كل مسألة قعدنا نشوف أقوال العلماء كلهم في المسألة مش هنخلص حاجة.
ماشي، طيب ما فيش أسئلة تاني؟
سمعت حضرتك أن من عدم القدرة عدم الصبر على النساء، آه يعني لو عنده شبق وشدة شهوة، بس ده يعني ما ده كان زمان، هو دلوقتي الناس ما ناس تعبانة.
عندي سؤال يا شيخ، طب وأنا ماشي، أنا كلنا عندنا أسئلة، أنت هتسال على طول، حضرتك قلت لو مسافر صائم عليه قضاء فقط، طب وحرمة الوقت وحرمة الوقت بقى؟ لا ما هو في حقه هو، في حق هذا المسافر أصلاً الصوم قالوا كنفل، هو مش نفل، هو مش نفل لكنه كنفل، خلاص، والا فلو حرمة الوقت نقول له يبقى تمسك، احنا بنقول للمسافر كده، ما بنقولوش كده، واضح يا جماعة؟
المسافر ده، ركزوا معايا، ركزوا في السؤال اللي هسأله ده، هذا مسافر اللي صايم، اللي صايم له أن يفطر ولا لا؟ آه ولا لا؟ لأنه يفطر، صح كده؟ عارفين بقى الفقهاء قالوا إيه؟ شوف بقى دي يا عبد العظيم بقى، يلا خد دي، المسافر ده اللي رايح يجامع متى يفطر؟ رد علي، امتى هنقول إنه فطر؟ حد شاطر يرد علي؟ أحسنت، مش حين جامع بقى، حين عزم، مش كده؟ الفقهاء قالوا كده، قالوا إنه لما عزم إنه يجامع أفطر أصلاً، خلاص هو أفطر، مش كده؟ يبقى خلاص هو مسافر أصلاً ما يجبش عليه الصوم وأفطر، وهو يجامع ليه هنقوله ما تجامعش؟ فهمت يا عبد العظيم؟ ماشي.
أقول قولي هذا واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.