الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم، إنك حميد مجيد. أما بعد.
قبل أن نبدأ في درس اليوم، احنا كنا طالبين بحث مهم جدا جدا المره اللي فاتت، وهو بحث متعلق بمسألة الرضاعة باللبن الصناعي. عندي ملاحظتين: الملاحظة الأولى، طبعا في ناس جزاهم الله خيرا أرسلوا البحث، لكن في ملاحظتين. الملاحظة الأولى أن أنا توقعت أن النساء هيكونوا يعني أنشط في هذا البحث لأنه متعلق بهن وإيه يهمهم يعني أنهم يحرروا هذه المسائل، وده اللي أنا ما لقيتهوش الحقيقه؛ فدي كانت أول ملاحظة، يعني الرجال اللي أرسلوا عددهم أكتر بكتير من النساء، يعني لو ما خنتنيش الذاكرة هي واحدة بس اللي بعتت يعني أو اهتمت بالبحث.
وده الحقيقه يعني علامة استفهام كبيرة؛ هل ده معناه أن احنا ما يعني فيما نفعله لا نرجع إلى حكم الله ورسوله صلى الله عليه وسلم؟ يعني اهو بنعمل أي حاجة وخلاص كيفما اتفق. لأن البحث مهم ليك، إذا انت مش في الموقف دلوقتي هتحتاجه بعد شوية، أو هتحتاجه واحدة قريبتك أو واحدة معرفة، فكنا ما نهتم بالابحاث دي أو الأسئله دي. فده الحقيقه إيه بالنسبة -سيبكم من البحث كبحث يعني، سيبكم من القصة دي- الخوف أن يكون له ما وراءه، يعني يكون عدم الاهتمام بهذه المسائل، خصوصا مع سهولة الوصول لأي كلام بس لو عملنا بحث على جوجل أو غيره. ففانا ده الخوف، الخوف يعني أنا مش إيه مش الخوف من أن أنتوا ما بعتوش بحث أو ما فيش زعل يعني إن شاء الله بينا، لكن الخوف أن نكون مش فارق معانا ربنا قال إيه، ولا النبي قال إيه عليه الصلاة والسلام، ولا العلماء رايهم إيه في المسألة؛ ادينا نعمل اللي نعمله، ونعجن اللي نعجنه.
وده لن يخيل على الله عز وجل يوم القيامة، يعني العجن اللي احنا بنعمله ده وهو أي حاجة تتعمل وخلاص، ربنا هيسألنا عن ده ليه؟ لتوافر العلماء وسهولة الوصول إلى أقوالهم، زمان ما كانش فيه الكلام ده، انت عشان تعرف قول عالم تسافر المسافات. فدي دلوقتي الدنيا سهلة بضغطة زرار وأنت قاعد في بيتك تجيب أقوال العلماء كلهم في المسألة. فيبقى ده أول مسألة يعني اللي كنت عاوز أنبه عليها -المفروض كده رجع تاني الصوت- دي أول مسألة عاوز أنبه عليها.
الحقيقة المسألة الثانية أن اللي بعتوا الابحاث بقى كان أنا يعني ما أعرفش ما وضحت كويس إيه المطلوب من البحث ده؛ البحث ده ما كانش المطلوب منه أن احنا نجيب نقولات عن العلماء اللي قالوها في الكتب، ما كانش ده المقصود من البحث ده قوي. احنا كنا عاوزين فتاوى لعلماء معاصرين حاضرين المسألة، مسألة الرضاعة الصناعية، فما أظنش حد يعني إيه لمس في الحته دي، غير يمكن أظن واحد بس ما قالش الكلام -يعني هو نقل نقولات عن الكتب وبعدين في الآخر آيل كلام له علاقة بالمسألة طالبينها، بس ما قالش ده كلام مين، فما بقيتش عارف دي فتوى مين-.
حد تاني نقل كلام مش شايف له وجه قوي في يعني، جاب موضع من كتاب الحدود حطه هنا، والحقيقة مش شايف له وجه لان هو يتحط هنا؛ إلا إلا أن يكون هو نقله في نوع من الاختصار لأن أنا مش عايز أدخل في المسألة يعني كمسألة، لكن فكرة أن احنا نجيب النقل أن هو حتى ترضعه اللبا، اللبا ده هو مدته أربع أيام ونخلص، إنما هو في كتاب الحدود بيكمل بعد كده. يعني اللبا أربع أيام ونخلص، يعني ده يبقى حجة أو دليل على أننا نرضع صناعي، ولا إيه مش فاهم؟ لكن هو على كل حال في كتاب الحدود بيكمل على الكلام ده أن هو بعد اللبا لو لقينا اللي تترضع نقيم الحد على الزانية عياذا بالله، لو ما لقيناهاش فنسها لغايه ما تفطمه، هو ده الموطن اللي ممكن يذكر هنا، مش موطن اللبا، وبعدين ذكره هنا بقى لا برضه فيه نظر شديد، يعني حتى الموطن التاني ده هيبقى فيه نظر لأنه ماهوش له قياس -يعني هو قياسه مع الفارق بشده-.
ويا جماعه عشان نلخص الموضوع، واللي أنا هقوله ده هيبين المطلوب إيه؛ أنا البحث ده أنا لسه محتاجه، هيبين إيه المطلوب وأيه الفرق بين الموطنين. المطلوب دلوقتي؛ واحدة بترضع هي مش هتمنع من الرضاعة الطبيعية، يعني وده الفارق الجوهري بين مسألته ومسألة الحدود؛ الست دي لو ماتت رجمت، انقطعت عنه الرضاعة الطبيعية تماما، إنما مسألتنا مش كده أصلا، احنا مسألتنا مش كده، احنا مسألتنا هنا أن هذه المرأة هتمتنع عن الرضاعة الطبيعية فترة الصوم، ومش كل فترة الصوم كمان، يعني احنا لو دخلنا في التفصيل شوية هتلاقي ممكن ترضع ساعة ولا اتنين كمان في فترة الصوم، وبعدين يحصل بقى إيه تخاف الضعف ولا بتاع فتمتنع، ويدخل ساعتها اللبن الصناعي، وبعدين لما تفطر هتفضل بترضع طول الليل.
فطب، العلماء ذكروا في الكتب -وده بعضكم نقلوه جزاكم الله خيرا- أن العبرة هنا بالضرر الواقع على الطفل، فهل عندنا بقى قول معتبر أن ده فعلا مضر، اللبن الصناعي ومش على الدوام يا جماعه، نركز في الكلام؛ احنا مش بنقول هنستبدل ده بده على الدوام، مش دي مسألتنا أصلا، خلي بالكم يا جماعه عشان المسألة دي مهمة جدا، دي مسألة هنقول للمراه تفطري أو يحرم عليك الفطر، مسألة كبيرة جدا، فما يجيش حد يقول لي أن اللبن الصناعي مضر مطلقا كده، لا. الكلام معلش الكلام محتاج مجهود؟ اه، محتاج مجهود، لكن له ثمره، هنبنيه عليه عمل نحتاج إليه كثيرا.
إيه بقى المسألة؟ المسألة: هل اللبن الصناعي لو استخدمناه فترة 30 يوم ولا 29 يوم، وفي اليوم ده تقريبا لثلث اليوم بالنسبة للبن الصناعي وثلثين اليوم اللبن الطبيعي، فهل ده مضر على الطفل؟ هي دي المسألة بتاعتنا، هل هذا فيه ضرر على الطفل؟ فننجيب بقى نقولات في دي أول حاجة بخصوصها كده خلاص.
طيب الصوت كده المفروض رجع تاني، هو ما أعرفش بيحصل ليه. طيب ف أنا ما أعرفش بقى انتوا سمعتوا لغاية فين، فخليني أعيد بسرعة في دقيقة واحدة مسألتنا باختصار: اللبن الصناعي لو استخدمناه مكان اللبن الطبيعي لمدة 30 يوم لثلث اليوم أو أكثر شوية، وبعدين في لبن طبيعي باقي اليوم، فهل ده فعلا في ضرر هيقع على الطفل من دي من من الصورة دي؟ احنا مش بنستبدل لبن الام باللبن الصناعي على الدوام، لا، احنا عارفين أن اللبن الصناعي هيضر بالطفل، ولبن الام فيه فوائد، ما احنا عارفين الكلام ده، مش دي مسألتنا يعني اللي بعت قال ده، مش دي مسألتنا أصلا. احنا مسألتنا هي الصورة دي؛ أن اللبن الصناعي شوية هيخش في أثناء اليوم شوية، فهل فعلا في ضرر شديد هيقع على الطفل ولا لا؟ هي دي المسألة خلاص.
آه محتاج طبيب طبعا، يبقى قوله يعني طبيب قوي في الحته دي، ولو نعرف نجيب أكتر من قول الأطباء يبقى في بحث في الحته دي يا ريت، خلاص. وبعدين يبقى ده بحث طبي، وبعدين بقى عاوزين فتاوى علماء، خلاص ده المطلوب، مش مطلوب نقول من الكتب ولا قياسات، وحتى القياس حتى اللي أرسل الحقيقة يعني قياس لا مع الفارق الشديد يعني، ما ينفعش أصلا يذكر في هذا الموطن والله أعلم، يعني نظري أنا في هذا القياس أنه ما ينفعش أصلا يذكر في هذا الموطن. النقل الذي يعني أتى به أحدكم من كتاب الحدود لا في فرق، في فرق شديد بين هنا وهنا، هو أصلا النقل خطأ أصلا، فلعل والله أعلم إيه الناقل وهم أو مش عارف، إنما إنما هو يعني النقل، إنما حتى لو جبنا النقل الصحيح فدي واحدة هتموت، مش واحدة بعد كام ساعة هترضع.
خلاص، نبتدي بقى لسه البحث قائم، خلونا بقى نتكلم في البحث الجاية، البحث قائم وعاوزين فيه كلام لناس، يعني بلاش نقعد نتكلم فيه دلوقتي خلاص بدماغنا، احنا عاوزين في كلام لناس سواء أطباء أو علماء، والمسألة كبيرة، المسألة كبيرة مش مسألة بسيطة خلاص. يلا نبدا بقى عشان ما نضيعش وقت.
بسم الله، الحمد لله، والصلاة والسلام على رسول الله، وعلى آله وصحبه ومن ولاه، وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم، إنك حميد مجيد. أما بعد.
قال: «ومن نوى صوما ثم جن أو أغمي عليه جميع نهاره لم يصح صومه، إلا إن أفاق جزءا منه أو نام جميعه». ده طبعا كلام البهوتي بيقول: من نوى صوما ثم جن أو أغمي عليه جميع النهار، سيبكم من جن دي ما بتحصلش يعني نادراً، إنما ممكن الولد يغمى عليه اليوم كله اه بحيث أنه ما يصحش منه ولو جزء؟ اه، لو وضح حصل لم يصح صومه. طب لو فاق ولو جزء يسير من النهار؟ يصح صومه، خلاص. أو واحد -ودي بقى الصورة الأشهر- أن واحد نام طول النهار، بافتراض -دعكم الآن من مسألة، خلي بالكم يا جماعه ودي مسألة مهمة وهتقابلنا النهارة كتير- مسألة إيه بقى؟ العلماء يا جماعه، ركزوا في دي، العلماء قد يذكرون بعض المسائل اللي يكون فيها حاجات حرام وما يقولوش حكم المساله، ما يقولكش أن ده حرام، ليه؟ لأنهم يبحثونها من وجه آخر، من وجه تعلقها بالباب الذي ذكرت فيه؛ هنا في باب الصوم مثلا، واحد يقولك: نام جميع نهاره. لا شك أن اللي نام جميع نهاره دي ده قد يكون مأزورا من وجه أن هو إيه؟ ما صلاش الفرض حتى، ما هو لو صح يصلى الفرض كده ما يبقاش اسمه نام جميع النهار، إنما واحد نام جميع النهار فلا صحيح يصلي ظهر ولا عصر، ولا شك من المغرب لا صحيح يصلي ظهر ولا عصر ازاي بل ولا فجر؟ لأن لو صلى الفجر لا يصدق عليه نام جميع النهار، لو صلى الفجر يبقى كان مستيقظا بعض النهار، لا ده ده واحد نام من قبل الفجر ما صحيش غير بعد المغرب، مفهومة كده؟
فالمسألة هنا بيبحث تعلق هذه المسألة بباب الصيام فقط، ما تجييش تقول: دول قالوا كذا كذا كذا يبقى يجوز، لا، ما يجوزش ولا حاجة، ده مش معناه الجواز، هو هنا بيبحث تعلق هذه المسألة بالباب فقط، احنا في باب الصيام، احنا في باب الصيام مش في باب الصلاة، ما احناش في كتاب الصلاة فنبحث مسألة اللي ينام عن الصلاة إيه حكمه؟ مش ده موضوعنا، مفهومة دي؟
طيب، واحد نام جميع النهار، واحد نوى من الليل الصيام ونام طول النهار ما صحش أي وقت غير بعد المغرب؛ يصح صومه؟ نعم يصح. هنا برضه ما بنتكلمش عن الثواب الذي حصلته، بنتكلم أنه يصح صومه فلا يقال له اقضي هذا اليوم، لا يقال له ذلك، خلاص.
قال: «ويجب تعيين النية بأن يعتقد أنه يصوم من رمضان أو قضاؤه أو نذرا أو كفارة لقوله صلى الله عليه وسلم: «وإنما لكل امرئ ما نوى»». يبقى يجب تعيين النية، واحنا قلنا قبل كده أن تجزئ نية واحدة للشهر كله، صح؟ فاكرين؟ لا بتعترضوا علي ولا لا؟ لا، صح. صحين كده؟ إيوه، احنا قلنا كل يوم له نيته، احسنتم، احسنتم، ماشي. احنا قلنا كل يوم له نيته، وهذا هو المذهب.
فالنية دي بقى يجب أن تعينها من الليل، تعينها يعني تبقى النية أنك هتصوم بكره من رمضان، أو بكره قضاء، أو بكره نذر، أو بكره كفارة. لا، نية الوجوب يعني مش لازم تقول إيه؛ مش عفوا مش تقول حتى -ولو بقلبك- أنه بكره صيام فرض، مش لازم فرض ما هو رمضان فرض معروفة يعني واضح. حافظ بيقول: «زي السحور اه، يعني الأكل والشرب بنيات الصوم». نية واحد قايم ياكل الساعة 3 والفجر الساعة 4 ليه؟ يعني هي ماهياش عادته أن ياكل 3، هو بياكل عشان بكره صايم، خلاص كفاية، ما توسوس في موضوع النية ده خلاص.
قال: «ويجب تعيين النية من الليل لحديث: «من لم يبيت الصيام قبل طلوع الفجر فلا صيام له»». خلاص لا ما فيش كل يوم له نيته يا عمرو، كل يوم بنيته مش نيه واحدة للشهر كله، خلاص.
قال: «لصوم كل يوم واجب»، اهو، لصوم كل يوم واجب يبقى كل يوم له نيته، لا نية الفرضية، ودي احنا قلناها، مش لازم أنه ينوي كون الصوم فرضا، مش لازم، لأنه لو نوى كونه من رمضان فهو يشمل الفرضية وزيادة، يشمل أنه فرض ويشمل أنه من رمضان كمان، واضح؟
وهو قالك إلا إيه بتاعة حافظ، الحته اللي حافظ بعتها: «ويكفي في النية الأكل والشرب بنية الصوم». اللي كان حافظ بعتها مين اللي قال؟ مش عاوز حد يكون بيحضر معانا دروس الفقه من الأول الطهاره، عاوز حد في الصوم بيحضر معانا الصوم بس. مين اللي قال؟ عثمان، عثمان إيه بقى اسمه عثمان إيه يا زياد يلا بسرعة؟ أو غير زياد -يعني مش لازم زياد- مين اللي بيقول: ويكفي في النيات الأكل والشرب بنيات الصوم؟ ده كلام مين؟
أحسنتم. طيب، قال: ويصح صوم نفل بنية من النهار ولو بعد الزوال. طيب، قبل ما نشوف المسألة، الزوال ده إيه؟ الزوال، حد يعرف إيه الزوال؟ حد يعرف إيه الزوال؟
الغروب، العصر. قولين لأهل... الغروب؟ الظهر، ثلاث أقوال لأهل... الجروب؟ الظهر، الظهر. زوال الشمس عن كبد السماء، ماشي. دخول الليل؟ الظهر، أول المغرب.
طيب، الزوال يا جماعة، جزاكم الله خيراً. طبعاً في ناس جاوبت صح وناس جاوبت هتجاوب صح بعد كده إن شاء الله. كلمة الزوال دي يعني زوال الشمس عن كبد السماء، وإيه زوال الشمس عن كبد السماء ده؟ اللي هو وقت الظهر، وقت الظهر خلاص، هو ده الزوال.
طيب، ليه اتسسمى زوال؟ مش وقته بقى ونشرح الشمس بتمشي إزاي والظل إزاي والكلام ده مش قضيتنا خالص دلوقتي، إنما احفظوها كده خلاص، اللي هيكمل معانا في الفقه هيعرف الكلام ده بالتفصيل. يبقي الزوال هو زوال الشمس عن كبد السماء وده وقت الظهر، وقت صلاة الظهر خلاص كده.
طيب، هنا بيقول: ويصح صوم ويصح نفل بنية... إحنا كده بنقرا كلام البهوتي بس: ويصح نفل بنية من النهار ولو بعد الزوال. صورة المسألة إيه؟ صورة المسألة إن واحد قام الصبح، وبعدين قال: أنا هنوي النهارده أصوم الصبح بقى مش بالليل، هنوي أصوم نفل، خلاص صيام نفل، يصح صوم ولا ما يصحش؟ إيه رايكم؟
تاني، واحد صحي الصبح وقال: أنا هنوي النهارده صيام نفل، يصح ولا ما يصحش؟ اللي قال يصح خطأ، واللي هيقول ما يصحش خطأ، والواجب التفصيل زي ما بعض الناس الشاطرة عملت. كلكم شطار طبعا، كل الناس شطار يعني، إنه لو لم يأت بمناف لصومه، لو لم يأت بمناف، بمناف أكل أو شرب أو جامع أو كده، ماشي؟
إنما لو أتى بمناف، قام أكل وشرب وهيص وعمل كل حاجة وبعدين قال: لما نصوم بقى النهارده، لا، ما ينفعش. فلو لم يأت بمنافي الصوم، قال لك: ولو بعد الزوال، يعني حتى لو كانت النية بعد الزوال ما فيش مشكلة، حتى لو كانت نيته الصوم بعد الزوال ما فيش مشكلة.
ماشي، يعني إيه؟ يعني واحد ما أكل ولا شرب ولا جامع ولا أتى بمناف أو مفسد من مفسدات الصوم، وهتيجي معانا إن شاء الله النهارده، واحد لم يأت بأي مناف أو مفسد من مفسدات الصوم وبعدين نوى صوم نفل الساعة 2 الظهر، 3 العصر، 4 العصر، إيه رايكم؟ يصح صومه ولا ما يصحش صومه؟
نعم يصح، هنا قال لك: ولو بعد الزوال. خلاص، هأسألك سؤال كده ومسموح بالهبد، هأسألك سؤال ومسموح بالهبد: هنا بيقول يصح نفل بنية من النهار ولو بعد الزوال، خلاص، أنا هقرأ جملة وهشاور على جملة، هقول يصح نفل بنية من النهار، إيه رايكم الجمله دي لو وقفت عليها كده مش تحمل نفس المعنى؟ مش ده السؤال، هي تحمل نفس المعنى، يعني ويصح نفل بنية من النهار، فأنت أول ما تقرأها تقول إيه؟ في أي وقت من النهار مش فارقة بقى، ليه يرجع يقول ولو بعد الزوال ومسموح بالهبد؟
أحسنت يا محمد، محمد ما بيسبش فرصة لحد. إيه، يبقى كلمة ولو دي احفظوها كده بقى، أحسنتم، ولو دي إشارة لوجود الخلاف. يعني لما قال لك ولو بعد الزوال، اعرف أن المسألة فيها خلاف خلاص، فكانه بيقول لك إيه؟ القول الذي أقول به إنه تصح النية ولو بعد الزوال، خلافا لمن قال لا تصح بعد الزوال. مفهومة دي؟ عشان كده أزود الجملة دي مع إنه لو شلها الكلام ماشي، لما يقول لك ويصح نفل بنية من النهار، لو قريت الجملة دي هتفهم إن النية في أي وقت من النهار يصح بها الصوم، مش محتاجين يعني أكتب ولو بعد الزوال، طب ليه كتبها ولو بعد الزوال؟ إشارة إلى وجود خلاف في هذه المسألة، فهمتوا؟
طيب، قال: ويصح نفل بنية من النهار ولو بعد الزوال لقول معاذ وابن مسعود وحذيفة، وحديث عائشة: دخل علي النبي صلى الله عليه وسلم ذات يوم فقال: «هل عندكم من شيء؟» فقلنا: لا. قال: «إني إذاً صائم».
وهذا الحديث من الأحاديث التي تؤثر في المرء جداً الحقيقة. النبي عليه الصلاة والسلام يا جماعة الآن، هم طبعاً باتوا بهذا الحديث علشان يستدلوا على المسألة إنه يصح الصوم، صوم النفل بنية من النهار، لكن الحديث ده فيه مسألة تانية أكبر بقى من مجرد الحكم، وهي حال النبي صلى الله عليه وسلم صلوات ربي وسلامه عليه، صلوا على النبي.
حاله المشرفة التي اختارها الله عز وجل له، إيه بقى حاله؟ إنه يدخل على بيوته صلى الله عليه وسلم ما يلاقيش حاجة ياكلها صلى الله عليه وسلم. لما نقول يا جماعة ما يلاقيش حاجة ياكلها، مش يعني ما يلاقيش لحمة وفراخ وسمك وجمبري والرز موجود والمكرونة والثلاجة مليانة جبن ولا... أنت كده واجد اللي تاكله، أنت مش واجد نوع معين، ده موضوعك أنت بقى، أنت غضبان النهارده علشان ما فيش لحمة على الغداء؟ ده موضوع تاني. لا، ده النبي يدخل يقول لعائشة صلى الله على نبي محمد صلى الله عليه وسلم، يدخل يقول لها: «هل عندكم من شيء؟» فتقول: لا، ما عندناش حاجة أصلاً تتاكل.
شوفوا أحوالنا بقى. طيب، لما عائشة تقول: لا، ما عندناش حاجة تتاكل، عارفين ده معناه إيه يا جماعة؟ يعني معناه إن حتى ما فيش كم تمرة ياكلها النبي عليه الصلاة والسلام. ليه بقى؟ اجمعوا بين الحديث ده والحديث التاني: إنه لا يمر الهلال تلو الهلال تلو الهلال (يعني شهرين أهم وراء بعض) لم يوقد في بيوت النبي صلى الله عليه وسلم نار. فقيل لها: وما كان طعامكم؟ قالت: الأسودان؛ التمر والماء.
يعني كون يبقى فيه تمر في البيت ده معناه إن فيه حاجة عندنا تتاكل، لأنه ده الطبيعي النبي صلى الله عليه وسلم يقعد الشهرين ما بياكلش غير تمر، ما بياكلش غير تمر، فكونه يدخل يسال عندنا حاجة تتاكل فتقول: لا، يعني ما فيش تمرتين تلاتة حتى النبي ياكلهم عليه الصلاة والسلام في البيت؟
أنت بقى حالك عاملة إزاي؟ اللي بتغضب، تخش تغضب وتقف وترزع وتقل أدبك وتتخطى على قدر الله عز وجل! محتاجين نهدى يا جماعة وتأسى بالنبي عليه الصلاة والسلام، إحنا لسه هنشوف النبي عمل إيه عليه الصلاة والسلام، لكن محتاجين نهدى شوية. خلاص، وده مش دعوة للنساء إن هي تبلطج وأنها ما تعملش أكل، لا، عشان بس إيه الكلام يبقى موضوع في نصابه يعني خلاص، لكن لو حصل هذا الكلام من غير بقى تقصير من المرأة، حتى لو بتقصير ما تدخلش تقل أدبك، يعني إيه معنى الكلام ده؟ ما تقلش أدبك وتزعق، يعني ما أنت مش واخدها من بيت أبوها عشان تقل أدبك عليها، وانت مش جاية البيت عشان تكفريه برضه، يعني الحاجات اللي بنشوفها في بيوت المسلمين الآن دي حاجات أنا والله ما فاهم يعني، وخصوصاً بيوت الناس المتدينة المفروض أنها متدينة يعني قبل أن التربية وقبل المروءة اللي بتقيم البيت، فأنت بتتقي الله فيها، تتقي الله عز وجل في الزوجه، وهي بتتقي الله فيك.
ده أمر كبير ومرعب، إن إيه، إن إحنا يعني إزاي تغضبيه وينام غضبان عليك في شيء قد يكون له حق فيه، فتبات والملايكة بتلعنك؟ إزاي ما تتعبيش من حاجة زي دي؟ وأنت إزاي تروح تمد إيدك وتقل أدبك وتقول ألفاظ البنت عمرها ما سمعتها في حياتها، وقد وصاك النبي عليها صلى الله عليه وسلم، وكان آخر كلامه صلى الله عليه وسلم: «الصلاة الصلاة وما ملكت أيمانكم، فاتقوا الله في النساء، فإنكم عوان عندكم». تعمل كدة في وصية نبيك صلى الله عليه وسلم؟! يعني أحوال تعبانة، بيوتنا أحوالها خربانة، بيوتنا دي اللي هي بيوت مين؟ بيوت الناس المتدينة، ها! ما ينفعش تبقى كدة البيوت.
نرجع تاني، النبي صلى الله عليه وسلم يدخل يقول: هل عند... عليه الصلاة والسلام، صلوا على النبي، هل عندكم من شيء؟ فتقول له: لا ما عندناش حاجة، وفهمنا يعني إيه لا ما عندناش حاجة دي، يعني ما عندناش حاجة، ما عندناش.
فالنبي عليه الصلاة والسلام يعمل إيه؟ مش بس يصبر يا جماعة، ولا بس يرضى، ولو صبر لاثيب، ولو رضي عن قدر على قدر الله عز وجل وما أقام الله عز وجل فيه من حال لاثيب، لكن ده النبي يروح لحته أبعد من ده كله، لا، ده يرضى بما أقام الله فيه، ويه... يحول المشهد لمشهد آخر فيه ثواب غير الثواب، الثواب القلبي، كانت ممكن تقول له: لا خلاص، لا وراضيين يا رب، وراضيين على قدرك ومبسوطين باللي أنت أقامرتنا فيه، فتاخد ثواب عالي جداً، وقطعاً النبي صلى الله عليه وسلم كان هذا حال قلبه، كان هذا حال قلبه.
لكن النبي يعمل إيه عليه الصلاة والسلام كمان؟ يقول لك: «إني إذاً صائم». يقوم يحول المسألة لإيه؟ لثواب! محتاجين برضه نتعامل مع ربنا سبحانه وتعالى بهذا النوع من الذكاء في تحصيل الثواب، نشوف كل حال أو كل قدر قدره الله عز وجل علينا إزاي نخرج منه بأكبر مصلحة، زي ما دماغك شغالة في الدنيا كده عاوزه تخرج بمصالح في الدنيا، شغل دماغك في الآخرة شوية، ماشي؟ شغل دماغك في الآخرة.
لا يا علي، هو كمان مش الأدم، الأدم ده اللي هو الغموس، زمان كان عادي إنهم ياكلوا العيش بس أصلاً، يعني مش لازم يقعدوا يبقى فيه عيش وغموس، لو العيش موجود يبقى كده عندهم أكل. والعيش ده اللي هو إيه؟ خبز الشعير، اللي هو كان... يعني نوع رديء من الخبز كمان، لو ده موجود في البيت كده اسمه عندهم أكل، مفهوم؟
وورد حتى مش عن النبي بس عليه الصلاة والسلام، عن بعض السلف، إنه كان كدة، كان أكله إنه يجيب خبز الشعير يبله في ميه لأنه ناشف ويأكله كده خلاص، إحنا أكلنا خلاص.
صلى الله على النبي محمد، عليه الصلاة والسلام. ماشي يا جماعة، قال: ويصح نفل بنية من النهار ولو بعد الزوال. وعرفنا ليه قال ولو بعد الزوال.
طيب، قال: وأمر بصوم عاشوراء في اثنائه، يعني في أثناء يوم عاشوراء أمر بصومه. فدل هذا على أن صوم النفل يصح بنية من النهار ما لم تأت بأيه؟ زي ما قلنا، بمناف أو بمفسد.
وإنما الافطار أفطره مسألة مهمة جداً، ركزوا معانا فيها يا جماعة، مسألة مهمة جداً جداً. يلا، ركزوا بقى معانا وصلوا على النبي كده عليه الصلاة والسلام عشان إيه يعني يفتح لنا أبواب الفهم. قال: وإنما الافطار أفطره، مسألة خطيرة، يعني إيه بقى؟
دلوقتي حضرتك صائم أو حضرتك صائمة، الشيطان لعب بدماغك ولا بدماغك، قلت: أنا هفطر واللي يحصل يحصل، عزمت على الفطر، وبعدين وأنت رايح للمطبخ حصل أي حاجة، الحاجة دي بقى ممكن إيه أبوك دخل؟ قلت: لا خلاص نكمل اليوم ده، باقي ساعة، أي حاجة، نقول لك: أنت أصلاً فطرت، أنت أصلاً فطرت.
خلاص، يعني لو مجرد نيتك الإفطار خلاص أنت كده فطرت، ليه؟ لان هذه النية قطعت نية الصوم، مفهومة دي؟ حتى لو ما أكلتش، حتى لو ما أكلتش خلاص يا جماعة.
طيب، فيبقى اليوم ده اليوم ده يقضى، تمسكه لحرمات الزمان لو لو يوم لو يوم من رمضان تمسك ما تاكلش ولا تشرب لحرمات الزمن وتقضي هذا اليوم. حديث النفس لا، حديث النفس حاجة، وأنك تعزم ده حاجة تانية.
طيب، العزم الأكيد ولا مجرد التردد في النية؟ حتى التردد في النية يبطلها، لا، ده في أي صوم، في النفل والفرض، ماشي؟ ده في النفل والفرض خلاص.
واحد نوى، وبعدين جه يأكل، ضميره صحي وقال: لا، أنا هصوم، يومه باطل، هذا الصوم باطل، إلا في حالة واحدة إنه كان صيام نفل، كان صيام نفل ونوى نية أخرى ولم يأت بمناف، ساعتها نقول له: تصح ننية النفل من النهار، فهمت دي يا حافظ؟
سؤال حافظ، هنفرّق فيه بين واحد صايم نفل ولا واحد صايم فرض، لو صايم نفل وبعدين جه يأكل ويشرب وقال: يعني نوى إنه خلاص هيفطر، وبعدين ما فطرش، وينفع ينوي الصوم تاني؟ أه، ينفع ينوي الصوم تاني لو صيام نفل، ليه؟ لأن إحنا لسه واخدين المسألة إنه له أن ينوي الصوم من النهار ولو بعد الزوال، فهمت؟
إنما لو صايم صيام فرض، يوم في رمضان مثلاً، نقول له: خلاص اليوم ده تمسكه وتقضي هذا اليوم، فركزوا في المسألة دي، مهمة جداً خلاص.
وإنما الإفطار أفطره، أي صار كمن لم ينوي لقطعه النية، ماشي، وليس كمن أكل أو شرب، فيصح أن ينويه نفلاً بغير رمضان، ودي اللي إحنا لسه قائلينها دلوقتي.
أطيب، في واحدة بتقول: أنا حنفية، أعتقد، يعني إي، أنت شكّة أنت حنفية ولا لا؟ مش عارف. يعني دراستي الفقهية كلها كده فأغلب تطبيقي على أساس ده، والحنفية في صيام النفل لو فطرت علي قضاء، فلازم التزم ده صح؟ وما أخدش بالايسر ليه؟ هو ده سؤال، أنا ما قرأتش السؤال ده علشان يعني اللي كاتباه على قد ما هو سؤال بيتكرر يا جماعة، وأنا هقول اللي يعنينا منه هنا عشان المسألة دي مسألة كبيرة جدا جدا ومش هينفع نفردها، يعني لو اتكلمنا فيها ممكن ناخد ساعة أو أكتر، فخلينا في دقيقة واحدة هقول حاجة.
هقول يا جماعة إن أكثر من 90% من الأحكام الفقهية التي نذكرها هنا مسائل خلافية، ومسائل الإجماع هي أقل الفقه، مسائل الإجماع.
الإجماع هي أقل الفقه؛ يعني إيه مسائل الإجماع؟ اللي كل العلماء فيها أجمعوا على قول واحد، زي كده أن الصلاة واجبة، دي مش هتلاقي فيها خلاف. ماشي؟ إن صوم رمضان واجب، مش هتلاقي فيه خلاف. الإجماعات دي قليلة جداً في الفقه، هي أقل مسائل الفقه، أقل مسائل الفقه هي مسائل الإجماع، وأكثر الفقه مسائله وقع فيها الخلاف.
طيب، احنا دلوقتي بدي أحكام، ما ينفعش في كل حكم أقف أقول لك: والله العلماء كلهم في الحكم ده، ما ينفعش، ولا هي مرحلتنا أن احنا نشوف فيها الخلاف العالي، ولا أنت هتطلع بحاجة لو قعدت أقول لك في كل مسألة: كل العلماء قالوا كذا، ده قال كذا وده قال كذا، هتطلع أنت تايه. طب أنا أعمل إيه دلوقتي؟ فاحنا اللي بنعمله إيه؟ احنا بناخد القول اللي بيقوله صاحب الكتاب اللي احنا بنقراه، خلاص، وهو المعتمد في أحد المذاهب.
طيب، أنا ودي بقى المسألة اللي تعنيني أنا، عشان كده ابتديت بالكلام ده: أنا كنت سألت شيخ تاني أثق في علمه ودينه، وأفتني بحاجة وأنا بعمل بها، لا باس. ده مش معناه أن الشيخ ده جاهل، ولا معناه أن اللي بيدي الدرس دلوقتي مش فاهم خالص؛ لأن المسائل فيها خلاف، فيكون واحد بياخد بقول، وتاني بياخد بقول، دي يعني ما زال ما زالت الأمة على هذا، خلاص؟
طيب، فدي مسألة تعني اللي هم بايه؟ الناس اللي هي مش بتدرس، يعني أنا بسال واللي بيتقال عليه عمله. الناس اللي بتدرس، فاحنا دايما بنقول إنه أفضل طريقة لدراسة الفقه هي الفقه المذهبي؛ أفضل طريقة تضبط لك المسائل، وتمنعك من الانحراف الفقهي -مش الانحراف يعني تبقى ضال، يعني انحراف فقهي- خلاص، وتمنع عنك التشويش، ففيها فوائد كثيرة جداً جداً، فده أفضل طريقة لدراسة الفقه، خلاص؟
طيب، يلا نكمل. قال: ومن قال إن كان غداً من رمضان ففرض لم يصح إلا ليلة الحادي عشر من رمضان. يعني مسألة مش عاوز أوقف عليها كتير عشان الوقت، وهي مسألة يعني إيه ما حدش ب يعني نادره الوقوع، ما حدش بيحتاجها قوي، خلاص.
عمرو فراج مصر يخليني أقول اللي أنا مش عاوز أقوله، يعني هو لو واحنا شايفين أن مثلاً عثمان النجدي والبهوتي ناس ضلال يعني هيقولوا كلام في الفقه ومهمش دليل، يبقى نقفل بقى الدرس ونشطب ونمشي؟ يعني يعني يا جماعة أنتم متخيلين كده؟ فقيه كبير، وقبل أن يكون فقيهاً فهو رجل ذو دين، عنده دين، هيجي يقول لك: هذا حلال وهذا حرام، ولا دليل عنده؟ عشان نقول عاوزين القول اللي معاه دليل؟ يعني يعني بالعقل كده، سيبكم دلوقتي من أي، بالعقل، هيجي البهوتي يتجرا على هذا المقام الذي هو فيه، موقع عن الله سبحانه وتعالى، ويقول لك: ده حلال وده حرام على ما كان عليه من ديانة وصلاح، فيقول كده؟ مستحيل تعتقد ده، أنا ما أعتقدش أن ممكن واحد فيكم يعتقد ده، خلاص.
هيقول: طب لا أنا بقول الدليل الراجح. دليل الراجح عند من؟ يعني البهوتي لما قال في المسألة دي: ده يجوز، فأكيد دليل الجواز هو الراجح عنده. طيب، واحد تاني جه قال: ده لا يجوز من العلماء برضو الفقهاء، فأكيد دليل عدم الجواز هو الراجح عنده. فكلمة، ركزوا في اللي أنا هقوله ده واحفظوا الجمله دي: كلمة «دليل راجح» كلمة خاطئة. لابد أن تقول: «راجح عند فلان». كلمة كلمة تاني، احفظوا: كلمة «دليل راجح» باطلاق هكذا كلمة خاطئة، كلمة خاطئة؛ لأن الراجح عند فقيه مرجوح عند آخر، ماشي، اتفهمت دي؟ تاني؛ لأن الراجح عند فقيه مرجوح عند آخر، فكلمة «الراجح» باطلاق كلمة غلط، غلط حتى في الأذهان؛ يعني أنا هنا دلوقتي مش يعني أنا بكلم أذهانكم يا جماعة، بكلم عقولكم، خلاص، لأني أكيد أكيد البهوتي لما كتب: «ده يجوز» فهو عنده دليل الجواز راجح، هتروح لحد تاني -مش هنخرج بره المذهب حتى، جوه المذهب الواحد- فهتلاقي غير البهوتي، أي حد ابن قدامه، أي حد، أي حد في المذهب، شيخ الإسلام تيمية، أي حد، يقول لك: لا ده لا يجوز، معنى كده أن دليل عدم الجواز عند الثاني ده إيه؟ هو الراجح، ودليل البهوتي عنده مرجوح، خلاص.
طيب، عبد العظيم بيقول: هو ليه لو نوى الفطار في رمضان وما فطرش، ليه ما ينويش الصيام ويكمل صيام؟ هو هل يصح يا عبد العظيم؟ هل تصح نية الفرض من النهار؟ ما هو دلوقتي هو نوى الافطار في رمضان، يبقى ده هو في النهار دلوقتي، صح؟ فنقول له كده: أنت فطرت، ومعنى فطرت -معنى قولنا أنت فطرت مش يعني كلت وشربت، لا- يعني قطعت النية. هيقول: طب خلاص، هنوي تاني. نقول له: لا، تعال بقى، هي مش سبهللة؛ النية بالنهار لا تكون إلا في صيام النفل، فهمتوا؟
طيب، هل يجوز قول لفظ «الراجح عند العلماء»؟ لا، لا يجوز؛ لأن مين العلماء؟ ما هو لو راجح عند كل العلماء يبقى دي مسألة إجماع، مش قول راجح بقى، ما هو معنى أن القول راجح يبقى في قول مرجوح، صح كده؟ ده معنى أن في أن ده قول راجح، يبقى في قدامه قول مرجوح، فازاي تقول «عند العلماء»؟ يعني الألف واللام دي بتفيد إيه اللي في العلماء دي؟ ما انت لو تقصد هو الراجح عند كل العلماء، عند كل العلماء، يبقى دي مسألة إجماع، مش مسألة خلاف، فازاي ده راجح وازاي في مرجوح؟ تقول: لا، أنا أقصد علماء بعينهم كده، يبقى سميهم، مش مش عند العلماء، مين العلماء؟ سمي شيوخك، أو سمي فقهاء الذين ترجح عندهم هذا القول، المسألة بسيطة يعني، مش إيه؟ مش عاوزين وجع دماغ.
هنا بقى قال: يلا يلا يلا يلا نرجع تاني، باب ما يفسد الصوم -أو باب ما يفسد صوم، تمشي كده وتمشي كده- وما يوجب الكفارة. قال: يفسد صوم من أكل أو شرب، أو استعطى، أو احتقن، أو اكتحل بما وصل إلى حلقه، أو أدخل جوفه شيئاً من أي محل كان، أو استقاء فقاء، أو استمنى، أو باشر فأمنى أو أمذى، أو كرر النظر، أو حجم أو احتجم وظهر دم.
ماشي، نرجع تاني بقى: يفسد صوم من أكل، أو شرب، أو استعطى. طبعا احنا هنا بنتكلم، هو لازم كنا نربط الكلام ببعضه، أنا رجعت تاني، بس هو هيقول لك إيه: أنه لابد أن يكون عامداً وذاكراً، بس خلونا نمشي واحد واحد.
أكل: يفسد صومه، دي مش محتاجين نتكلم فيها كتير. شرب: يفسد صومه. استعطى: يعني حط حاجة في مناخيره، خلاص، في الأنف، حط بقى نقط هي دي ده دلوقتي اللي الموجود أو مرهم في في مناخيره، فوجد الطعم بتاع النقط اللي حط دي ولا المرهم ده في الحلق أو في الدماغ، يفسد صومه، خلاص.
ليه؟ علشان يا جماعة الأنف منفذ للجوف، الأنف منفذ للجوف، النبي صلى الله عليه وسلم قال إيه؟ لقيط بن صبرة: «وبالغ في الاستنشاق إلا أن تكون صائماً» فالأنف منفذ للجوف، خلاص. يبقى استعطى، فهمنا يعني إيه؟
أو احتقن، يعني في دُبره، زي كده الحقنة الشرجية مثلاً. واحد احتقن يعني حقنة شرجية. طيب، دي بعيدة قوي، ما فيش حد بستخدم الحقن الشرجية نادراً، لكن الصورة المشهورة دلوقتي وتلحق بهذه المساله أن بعد قضاء الحاجة في ناس تروح مسلطة الشطاف على فتحة الدُبر بالضبط، فتدخل مية، فيدخل الماء في الدُبر، خلاص، فالصورة دي الصورة دي تفسد الصوم، الصورة دي تفسد الصوم، فانتبهوا لهذا المعنى وأنتم صايمين، خلاص.
يبقى ما فيش حد يسلط الشطاف لدرجة أن المية تخخش من فتحة الدُبر؛ لأن هذه الصورة تفسد الصوم، فدي مسألة مهمة، خلاص.
قال: يفسد صوم، قال: أو احتقن، أو اكتحل بما وصل إلى حلقه. ماشي، اكتحل بما وصل إلى حلقه يعني إيه؟ يعني واحد حط كحل، فالكحل ده يوصل يحس بيه في حلقه، ماشي. طيب، ليه قالوا؟ لأن العين أيضاً منفس، العين منفذ للجوف برضه، خلاص.
أصحاب الإمساك الشديد يعملوا إيه؟ يتعالجوا، يتعالجوا، ما يسيبوش نفسهم للايه؟ لغاية رمضان، ويقولوا: احنا ما نعرفش نعمل ده، الموضوع هيبقى فيه أذى وضرر وكذا. يفطروا؟ يفطروا، أو قبل ما يفطروا بقى يروحوا يسالوا حد غيري، ياخدوا بفتوة تانية، غ يعني لا، ما يفطروش، يروحوا يسالوا حد تاني غيري ويشوفوا هيقول لهم إيه، بس ما تسالوش حد حنبلي بقى عشان هيفطر، ماشي.
لا، يعني خدوا أدوية، ما تهملوش نفسكم وتقولوا: احنا إيه هنسلط الشطاف وهو إيه الموضوع بيتحل كده؟ ما في أدوية، خد الدواء، وأديك اهو معاك شهرين من دلوقتي، ادينا بنقول من بدري اهو، معاك شهرين ابتدي خد الدواء، الإمساك يروح، تدخل رمضان إن شاء الله الدنيا إيه، وبعدين تختار أنواع أكل اللي بتاكلها على السحور علشان ما يحصلكش إمساك بالنهار، وما تجيش تعك في الفطار، يعني يعني في حلول تانية غير انك تيجي بالنهار وتسلط الشطاف على فتحة الدُبر فيدخل الماء، تيجي تقول: طب أنا أعمل إيه؟ خلاص.
طيب، قال: أو أدخل جوفه شيئاً من أي محل كان. ماشي، سواء بقى الشيء ده مغذي ولا ماهوش مغذي، زي إيه يا جماعة؟ عشان بس إيه، ممكن واحد يقعد يلعب بفتلة في بقه كده، ويروح إيه بالع الفتلة، يفطر، اهو ده يفطر، خلاص. ممكن، أو بغيرها بقى، خرزة، أي حاجة، أي حاجة تخخش جوفك، خلاص، فطرت، طالما أنت أنت عامل ده بقصد، عن قصد، ماشي.
طيب، إيه تاني من الصور اللي قالوها؟ اللي هو من حتة أي محل كان: ده واحد يروح يقعد يشم في دخان الأكل، ده يفطر، ما تروحش تقعد، الأكل بيتعمل، تروح تقعد تشم في دخان الأكل، خلاص تفطر في المسالة دي، واضح يا جماعه؟ الصوت واضح؟
طيب، أو يولع بخور بالنهار ويقعد يشم في البخور، دخان البخور، ما تعملوش كده برده، ما حدش يولع بخور في نهار رمضان، هذا معنى كلامه: أنه أدخل جوفه شيئاً من أي محل كان، سواء من الأنف، سواء من الفم، خلاص.
طيب، واحد دخل قطنة في ودنه، لا، ما يفطرش؛ لأن الأذن من الظاهر وليست من الباطن، خلاص. إن النساء اللي هي أساساً بتطبخ تحترز عن هذا ما أمكنت، تشغل الشفاط، ولو في شفاط فوق البوتاجاز تشغله، ما فيش، تشغل الشفاط اللي في المطبخ، تغطي الحلل وهي بتطبخ؛ يعني تحترز عن هذا ما أمكنها، وما تروحش تشم حاجة بقصد بقى، خلاص.
طيب، ولو جه في ذهني دلوقتي برده صورة من الصور المنتشره اللي الناس بتعملها هقول لكم عليها إن شاء الله.
أو استقاء فقاء، يعني استدعى القيء، مش قاء، مش زرعة القيء، لا، مش غلبه عليه القيء فقاء، لا، ده استقاء، فقاء هو الذي استدعى القيء، زي حط صباعه في بقه فقاء، هذا يفسد صومه. قال: أو استمنى، أو باشر فأمنى أو أمذى.
واستمنى، يعني بيده فأمنى أو أمذى، يفسد صومه على المذهب، خلاص، فاكرين لما قلنا العلماء بيذكروا مسائل قد تكون في نفسها محرمة ولا يشير من قريب ولا من بعيد أن المسألة محرمة؟ ليه؟ مش بابها أصلاً، مش بابها، احنا هنا مش جايين نقول لك حكم الاستمناء إيه، مش مش جايين نقول لك كده، احنا هنا جايين نقول لك: هذا الاستمناء إذا فعل يؤثر على الصوم أو لا يؤثر؟ دي مسألتنا هنا. عاوز تشوف حكم الاستمناء؟ روح شوفه في بابه، فهمتوا دي يا جماعه؟
بعض الناس بتتلخبط في ده، يقول لك: لا، ده احنا خدنا في الفقه إنه إذا استمنى والشيخ ما قالش إن الاستمناء حرام! ما هو هو احنا هو احنا بنناقش مسألة الاستمناء دلوقتي؟ لا مش بناقش مسألة الاستمناء، فالفقهاء كانت دماغهم مترتبه، مش زينا، كله كده متلخبط على بعضه، دي ناس دماغها مترتبه، عارفة تقول إيه فين، ماشي.
قال: أو استمنى فأمنى أو أمذى، فسد صومه. معروف طبعا الفرق بين المني والمذي، خلاص. المني اللي هو هذا السائل الأبيض الثخين الذي يخرج بشهوة وبدفع المرء بخروجه المني. المذي ده سائل أصفر رقيق يخرج متسبباً عند الشهوة لا بها؛ يعني هو يخرج عند الشهوة لكن لا يخرج بشهوة، وقد لا يشعر بخروجه أصلاً، يعني ممكن المذي ينزل والواحد ما يحسش أنه أمذى، ده الفرق بين المني والمذي. المذهب، وطبعا المذهب قوله شديد في الحتة دي، أنه لو استمنى فأمنى أو أمذى -يعني حتى لو استمنى ثم لم يمني، لم يخرج منياً، لكنه أمذى، نزل مذي- برضه يفطر.
أو باشر، يعني إيه بشر يا جماعة؟ يعني دون الفرج، يعني لم يدخل في الفرج في امرأته، وإنما باشر دون الفرج، أو قبل، أو لمس فأمنى أو أمذى برضه كده، يعني واحد قبل امرأته أو لمس امرأته فأمنى، نزل مذي، المذهب برضه يفطر بده، خلاص. طب نعمل إيه؟ تلم نفسك، ماشي.
والنبي صلى الله عليه وسلم رخص في القبلة لشيخ ولم يرخص لشاب، ماشي، وكان النبي صلى الله عليه وسلم يقبل وهو صائم، تقول عائشة: لكن كان أملككم لإربه، كان أملككم لإربه، حد يعرف؟ ماشي، هي مش حاطة همزة، عاوزين الهمزة، الهمزة فوق ولا تحت؟ إيه رايكم؟ اكتبوا: تحت ولا فوق؟ ما تكتبش بقى الكلمة اللي انتم تكتبوها دي، تحت تحت تحت لأربه كده، طيب، لأربه أو لأرب به، الاثنين. كان أملككم لإربه، يعني لفرجه صلى الله عليه وسلم، أو كان أملككم لإربه، يعني لغرضه، قالوا: النبي ما يشتهي إلا إذا أراد أن.
يشتهي، فهو كان مالكاً لربه، وكان مالكاً لفرجه، خلاص تمشي كده وتمشي كده.
قال: أو استمنى، أو باشر. وعرفنا يعني إيه باشر؛ باشر يعني دون الفرج، يعني لم يدخل، أو قبل، أو لمس فأمنى أو أمذى فسد صومه، أو كرر النظر فأمنى. هنا ما قالش أو أمذى. واحد كرر النظر، نظر نظراً أثار شهوته، وهنا مش بنتكلم في حكم النظر، وكرر هذا النظر أو أطال النظرة الأولى فأمنى، خلي بالكم هنا له استمنى وله باشر، ده مجرد كرر النظر فأمنى، وهذه المسائل ربما يُسألون عنها الشباب، فسد صومه. وكذلك طب أمذى؟ لا، ما يفسد صوم، ليه ومش ليه والنقاشات دي مش مرحلتنا ولا غرض من درسدنا ده، لكن في المسائل دي يعني من الآخر يا جماعة اللي هيستمر دون الفرج، أو يقبل، أو يلمس، فسد صومه بالمني أو بالمذي بخروج المني أو المذي. واحد كرر النظر فأمنى، فسد صومه، طب أمذى؟ لا، لا يفسد صومه.
أو حجم أو احتجم، وظهر دم. واحد حجم أو احتجم، يعني هو الحجام هو اللي بيعمل الحجامة أو هو اللي بتتعمل له الحجامة، أنتم عارفين الحجامة ممكن تتعمل بدم وممكن تتعمل من غير ما نشرط فما يخرجش دم، لو ظهر دم فايه؟ أفطر الحاجم والمحجوم.
خلاص، نقرا بقى الكلام اللي جاي ده عائد على كل اللي فات: عامداً ذاكراً لصومه لا ناسياً أو مكرهاً. يبقى واحد أكل عامداً ذاكراً، ماشي، أكل عامداً ذاكراً. طب واحد أكل ماهوش عامد، لا ناسي، عفواً، ماهوش عامد، مكره. هنعرف ازاي دلوقتي ممكن تحصل المسألة دي ومسألة ممكن تقابلنا في المكره دي هنشوفها كمان شوية إن شاء الله. واحد أكل مكره، نقول له: خلاص ما أنت لسه صايم. طب واحد أكل بس كان ناسي إنه صام، نقوله برده: أنت لسه صايم، خلاص.
قال: عامداً ذاكراً لصومه لا ناسياً أو مكرهاً. راح قايل لك إيه بقى عثمان النجدي؟ قال: ولو ببوجور مغمى عليه معالجة. ولو ببوجور مغمى عليه معالجة، يعني إيه المسألة دي؟ إيه الوجور ده؟ الوجور ده هو الدواء الذي يوضع في الحلق. خلاص، يعني واحد أغمى عليه يا جماعة، صورة بقى المسألة دلوقتي، واحد أغمى عليه غيبوبة سكر، فغيبوبة السكر دي لما بيغمى عليه بيعملوا له إيه؟ بيحطوا له إيه؟ عسل، صح، في بقه، هو مغمى عليه، هو مش دريان باللي بيحصل فيه، فبيحطوا له شوية عسل، مش كده؟ علشان يفوق، طيب، هو مغمى عليه في نهار رمضان، وبعدين حطوا له شوية عسل ففاق، إيه رايكم؟ صيامه ده صحيح ولا باطل؟ الصوم صحيح، زياد ماشي يصح، صحيح، خلاص كله صحيح الحمد لله. في حد ليه قول تاني؟ باطل. مين اللي باطل فيهم؟ في ثلاثة قالوا صحيح، مين اللي باطل فيهم؟ ولا كلهم أبطال؟ ماشي.
طيب، هو من باب التدريب بس، من باب التدريب، فاحنا ممكن نعقد لكم المسألة ونقول لكم: إيه اللي يقول صحيح غلط، واللي يقول باطل غلط، والجواب والتفصيل إنه لو أغمى عليه طول النهار وافتكروه بعد المغرب وحطوا له عسل ففاق، فصيامه إيه؟ باطل، لأنه ما فاقش ولو جزءاً من النهار، وهو غالباً لو سابوه طول النهار وجوم يحطوله عسل بعد المغرب برده مش هيفوق، هيبقى مات يعني غالباً. لكن على كل حال، ده أنا ما كنتش بسال السؤال عشان الفخ ده، لا، هو واحد واحد، أغمى عليه في نهار رمضان حطوا له شوية عسل عشان يفوق مثلاً، وهذا العسل ده دلوقتي ده مش غذاء، ده علاج، هو حاطينه علاجاً عشان يفوق، فده مكره، يعني ده في حكم المكره، خلاص؛ لأن الاكراه نوعين: أن واحد يكره ليفعل، أو يكره بأن يفعل به. فهمت دي؟ وأنت كمان وحشت طلاب الأكاديمية كلهم، إن شاء الله نتقابل السبت الجاي بإذن الله.
طيب، مفهوم كده؟ الإكراه نوعين يا جماعة، الإكراه نوعين: واحد أُكره ليفعل، هو يعني هيتقال لو ما عملتش هقتلك، وفع المسدس عليه، ده واحد مكره هيتقتل خلاص، لكن هو اللي هيعمل في الآخر. واحد فُعل به، يعني إيه فعل به؟ أربعة كتفوه وواحد فتح بقه وواحد صب في بقه المية، ده هيعمل إيه ده؟ فده نوع إكراه تاني، أنا ما عملتش، مش أنا اللي رحت شربت، لا، لكن هما اتعمل فيا كده خلاص.
لحديث النبي صلى الله عليه وسلم: «عُفِي لأمَّتي عن الخطأ والنسيان وما استُكْرِهُوا عليه». وحديث أبي هريرة مرفوعاً: «من نسي وهو صائم فأكل أو شرب فليتم صومه، فإنما أطعمه الله وسقاه» متفق عليه.
ولا إن طار إلى حلقه ذباب أو غبار من طريق، واحد ماشي الدبان دخل في بقه ودخل في جوفه، خلاص الدبانة نزلت لتحت، هنقول له فطرت كمان؟ يعني مش كفاية العذاب اللي هو فيه؟ يعني الراجل متعذب الدبانة في بطنه دلوقتي، نقوله كمان فطرت؟ حرام، سيبوه بقى في حاله. أو غبار طريق، التراب عاصفة ترابية دخلت في بقه برده ما يعني خلاص، الراجل هيعمل إيه؟ أو دقيق أو دخان، فلا يفسد صومه لعدم إمكان التحرز من ذلك. ركزوا يا جماعة، ولا إن طار إلى حلقه ذباب أو غبار أو دقيق أو دخان، ده طار، هو اللي جاله، مش أنت اللي رايح تشم وتتبلع الدخان. ماشي يا جماعه؟ يبقى ده الفرق، الفرق إيه؟ إن ده لا يمكن التحرز منه، إنما التاني يمكن التحرز منه، ده أنت اللي رايح وداخل المطبخ وبتفتح الحلة عشان تشم الدخان، عشان بيشبع الدخان ده ولا بيعمل إيه؟ ماشي، أشبه النائم.
أو فكر فأنزل، واحد فكر فأنزل، يعني أمنى، واحد قعد يفكر في حاجه أثارت شهوته فأمنى، لا من غير نظر لشيء ومن غير أي حاجه، هو قعد يفكر بس فأمنى، قال لك: ده ما يفطرش، ليه؟ لقوله صلى الله عليه وسلم: «عُفِي لأُمَّتي ما حَدَّثَتْ به أنفسُها، ما لم تَعمَلْ به أو تتكلَّمْ». وهذه المسألة احترزوا منها، إحنا خلي بالكم يا جماعة، هذا الفكر إذا استرسلت معه محرم، عشان بس ما ماشي.
طيب، يلا يلا بطلوا كتابه بقى، بطلوا كتابه، خلاص خلاص ركزوا معايا، مش عاوزين هزار في، خليكم معايا، ركزوا معايا، خلاص.
قال: وقياسه على تكرار طب يعني مش عاوزين نقول ماشي.
أو احتلم، واحد احتلم وهو نايم، ما يفطرش. خلاص.
وكذا لو ذرعه، أي غلبه القيء، وكذا لو ذرعه، أي غلبه القيء، أو قُطّر في إحليله أو غُيِّب فيه شيء فوصل إلى المثانة لم يفطر. الإحليل اللي هو الذكر، العضو يعني، العضو الذكري عند الرجال، هو ده الإحليل. خلاص ركزوا معايا يا جماعة بقى، سيبكم من الكلام دلوقتي، خليكم معايا في الفقه ده، الإحليل العضو الذكري. خلاص، بيقول: لو قُطّر فيه شيئاً، اه، ولو ذرعه الغيب، أي غلبه القيء، ما يفطر. إحنا قلنا: إذا استقاء فقاء يفطر، يفسد الصوم. إنما لو ذرعه القيء، غلبه القيء، لا ما يفطر. قُطّر في إحليله شيئاً، دي مسألة نادرة ما بتتحصلش، يعني بتكون علاج لبعض الأمراض لكن نادرة، لكن حتى لو حصل كده ده ما يفطرش؛ لأنه لا يصل للجوف شيء، وما فيش منفذ من الإحليل إلى الجوف، ولا من المثانة إلى الجوف. خلاص، هو الإحليل آخره المثانة، والمثانة لا منفذ منها إلى الجوف، وإنما يترشح البول، يعني البول يترشح على المسألة، مش مهم دلوقتي، ما فيش منفذ، خلاص.
قال: أو أصبح وفي فمه طعام فلفظه. ركزوا يا جماعة في المسألة دي لأنها الحقيقه أنا بجد جرأة عجيبة، ركزوا كله بقى يركز، صلوا على النبي كده، عليه الصلاة والسلام، كله يركز معايا لو سمحتوا، إحنا خلاص قدامنا بالكتير 10 دقايق إن شاء الله، أقل كمان، ركزوا في المسألة دي لأن في جرأة عجيبة من المتدينين بعد إذنكم في المسألة دي، يعني إيه حضرتك تبقى متدين وبتتقي الله عز وجل وبتخاف من ربنا، والأقيك بعد الأذان ما يأذن تقعد تاكل وتشرب؟ ازاي يعني؟ تقول: لا، أصل هو الأذان بيأذن بدري. إيه الجرأة دي؟ إيه الجرأة دي؟ الأذان بيأذن بدري قاله البعض ماشي الحال، والتانيين قالوا لك لا، الأذان بيأذن في وقته، إيه الجرأة اللي أنت فيها دي؟ يعني يا جماعة بطلوا كتابة لو سمحتوا، ركزوا في اللي أنا بقوله، خلاص اسمعوا الكلام بقى، إيه الجرأة اللي إحنا فيها دي؟ حاجه هتدي لفساد صوم رمضان، في ناس بتعمل ده في الأيام كلها، في ناس بتعمل ده في الأيام كلها، تلاقيه الأذان أذن وده قاعد بياكل ويشرب، ما تعملش ده حتى إن اعتقدت أن الأذان بيأذن بدري، هو فين الدينا، فين الورع؟ هيظهر امتى لو مش هيظهر في المواطن دي؟ هيظهر امتى يعني؟ خلاص، في ناس أشد سفاهة بقى تعمل ايه؟ تتريق على اللي ما بيعملش كده، شوفوا أنا هادي إزاي في الفقه والخلاف وبقعد أقول لكم اعملوا يعني لو سمعتوا ده ماشي الحال، إنما في مسائل كده بتدل على يعني إيه خفة الدين، خفة الدين مهما أنت كنت بقى راجل خاتم المصحف، راجل دقنك واصلة لغايه نص بطنك، ولا أنت منتقبة حتى عينك مش باينة، لكن في مسائل كده يعني تدل على خفة الدين، فين دينك؟ وكمان بتَتَريق على اللي ما بيعملش كده، إنه مع الأذان مع قول الله أكبر خلاص يمسك أو حتى قبله بشويه احتياطاً، تتريق عليه وترميه بجهل، إيه ده؟ إيه ده؟
المسألة بقى بتاعتنا دي، مسألة على جنب كده كنت أنا حبيت أُشخط فيكم شوية، المسألة بقى: واحد أصبح وفي فمه طعام فلفظه. يعني إيه؟ يعني وهو بياكل الأذان أذن، قدامك حاجة من اثنين، المذهب بقى عندنا اهو: الأذان أذن، حضرتك كملت وكلت، أنت فطرت. لفظت الطعام من فمك، خلاص ما صيامك صحيح، خلاص.
طيب، بيبقى في حتة كده بقى اللي هو إيه يشق لفظها، اللي هو إيه؟ بتجري مع الريق ودخلت، خلاص دي ما فيهاش مشكلة، ده كانه نوع إكراه، ده غصب عنك، ده ما انت عامداً، ده هو جري مع الريق ودخل، خلاص.
طيب، الناس اللي بتحط كريمات في رجليها قوية شوية أو في، المهم، وتلاقي طعمها في الحلق. يعني أنتم عارفين لو دهنت باطن رجلك كده بحاجة قوية لها نفوذ شوية، بتحس بطعمها في بقك بعد شويه، هل ده يفطر؟ لا ما يفطر، ليه؟ لأنه ما فيش منفذ من باطن الرجل للجوف، ما فيش منفذ.
قال: ولا إن اغتسل. أيوه، أحسنت يا حافظ، هو بيقولوا إن اللي وصل عرض وليس العين، أحسنت، هم بيقولوا إن أنت حسيته في حلقك ده ده مش مش معناه وصول عين الدهن ده، لا، ده وصول عرض من أعراضه، ماشي.
البرفان حكم حكم البخور لعله أشد كمان، ده البخور بيكون أنا طبعا أنا في ذهني دلوقتي البرفان اللي هو اللي بيترش ها، مش اللي هو البيليا ده اللي هو بيتباع بجنيه قدام الجوامع ويقول لك مسك وعود، لا، اللي هو رش البرفان اللي بيترش. البخور ده بيكون في الآخر دخان، إنما البرفان اللي بيترش ده رزاز، يعني كمان ده سائل، يعني ما هوش دخان، ده سائل، فانت لما بترشي أو أنت لما بترش ويروح داخل منه في بقك وفي مناخيرك ويصل إلى الحلق، فده لعله أشد كمان من البخور، خلاص.
مش الريحة بقى، يعني لو واحد بيقول: لا ده أنا برش بعيد على الهدوم مثلاً وبعدين بلبسها مثلاً وما فيش حاجة بس بشم الريحة، لا، بتشم الريحة دي ما هوش، ده برده عرض ما هوش إيه.
قال: ولا إن اغتسل أو تمضمض أو استنشق فدخل الماء حلقه، فلا يفطر لعدم القصد، حتى ولو بالغ في مضمضة واستنشاق أو زاد على ثلاث فلا يفطر، لكن تكره مبالغة في مضمضة أو استنشاق لصائم.
قال: ولا يفسد صومه بما دخل حلقه بلا قصد. خلاص، واضح الكلام ده، وإحنا قلناه قبل كده، أنا بحاول يعني أركز برده في كلامكم عشان مهم.
واحد شم وهو مش قاصد، دخلت مكان في ريحة بخور، أعمل إيه؟ ريحة البخور مش قضية، ريحة البخور مش مشكلة، المشكلة في الدخان نفسه، الدخان ده تروح تقف قدامه وتشمه؟ لا ما تعملش كده، خلاص، والناس طبعا للأسف في ناس كتير متعودة تشغل بخور في نهار رمضان، الأولى إن احنا ما نعملش ده.
قال: وإن أكل المسائل دي مهمة وهنختم إن شاء الله، وإن أكل ونحوه شاك في طلوع الفجر، نحو الأكل إيه؟ أي حاجة من المفسدات زي شرب زي جامع، شاك في طلوع الفجر، شك في طلوع الفجر، يبقى إحنا بالليل ولا بالنهار يا جماعة؟ واحد شاكك الفجر طلع ولا لا، يبقى إحنا دلوقتي بالليل ولا بالنهار كنا يعني بالليل، صح كده؟ واضحه دي؟
طيب، واحد بالليل وشك الفجر طلع ولا ما طلعش ماشي، فأكل وشرب، خلي بالكم هنفرق بين مسالتين، ركزوا معايا، واحد شك الفجر طلع ولا ما طلعش، وواحد تاني اعتقد أن الفجر طلع، دي مسألة ودي مسألة، إنما خلينا في أول المسألة دي: واحد شاكك هو الفجر طلع ولا لا، ماهوش معاه ساعة أو معاه ساعة بس ما يعرفش إمتى الفجر بياذن، وهو في منطقة بعيدة ما فيهاش مسجد يسمعه، فالمهم هو
شاكّ هو الفجر طلع ولا ما طلعش؟ شاكّ، فهل صومه صحيح ولا مش صحيح؟ قال لك: الصوم صحيح، إلا في حالة واحدة؛ إنه بعد كده عرف إن الفجر كان طلع، فكده يبقى صومه إيه؟ باطل. يعني إيه؟ يعني إيه بيبص في الساعة لقاها الساعة خمسة، طب هو كده الفجر أذّن ولا ما أذنش؟ هو مش عارف، الفجر بيأذّن الساعة كام وإيه؟ شاكّ، الفجر طلع ولا ما طلعش؟ راح إيه قال؟ راح خطف له لقمتين تلاتة كده. وبعدين فدخل عليه أخوه بعد شوية أو تاني أو بالنهار عادي بقى تاني يوم، فبيسأله هو الفجر يا جماعة الساعة كام؟ ده الفجر بيأذن أربعة ونص، فهو كده عرف بالنهار إن هو كان بياكل ويشرب والفجر مأذّن ساعتها. نقول له: صيامك باطل. فهمتوا؟
إنما هو شاكّ الفجر طلع، ما طلعش، وفضل شكه كده ما تيقّن إن هو، أو لم يعلم بعدها إن الفجر إن النهار قد يعني طلع النهار، فنقول له: صيامك صحيح، مفهومة دي؟
قال: لا في غروب الشمس، يعني إيه لا في غروب الشمس؟ يعني واحد شك في غروب الشمس، يبقى إحنا بالنهار ولا بالليل؟ ردوا عشان هيبقى في سؤال كمان شوية، واحد شك في غروب الشمس، يبقى إحنا في النهار ولا في الليل؟ في النهار، صح كده؟ طب واحد شك في غروب الشمس خلاص ففرح وأكل وأكل وشرب، وبعدين فضل على الشك ده. ركزوا في الصورتين دول، الأولاني شك الفجر طلع ولا ما طلعش؟ أكل وفضل على الشك ده لم يتبين له شيء، ده صيامه صحيح ولا لا؟ ردوا، صحيح أحسنت يا مروان، أحسنت يا محمد سعيد، أحسنت يا أحمد السيد، أحسنت يا كريم، كلكم كلكم محسنون ماشي.
أحسنتم، إن اليقين لا يزول بالشك، اليقين لا يزول بالشك، في الليل أنت كنت بالليل ده اليقين إنك في الليل، شكيت الفجر جه ولا لا؟ فاليقين لا يزول بالشك، أنت لسه بالليل، بالنهار أنت في النهار وشكيت الشمس غربت ولا لا؟ فيبقى أنت لسه في النهار، فيبقى أنت كأنك كلت وشربت في النهار، إلا لو بعد كده بقى بان إن الشمس كانت قد غربت فنقول لك صيامك صحيح. لكن إحنا دلوقتي في الصورة بتاعتنا ما بانلكش حاجة بعد كده، لا بانلك إن الفجر طلع ولا ما طلعش، ولا بانلك وقت أكل وشربك يعني، ولا بانلك إن الشمس كانت غربت ولا ما غربت، فهمتوا دي؟
قال: «وإن أكل ونحوه في وقت اعتقده ليلاً فبان نهاراً، أي ظهر طلوع فجر أو عدم غروب شمس، قضى الواجب؛ لأنه لم يتم». دي مسألة الاعتقاد، إحنا قلنا فرقوا بين مسألتين، وتكلمنا عن مسألة واحدة، اللي هو واحد شاكّ، وواحد اعتقد كذا، وواحد اعتقد النهار ليلاً أو الليل نهاراً. يعني إيه اعتقد ده؟ يعني مثلاً، حضرتك نايم الساعة 7 بالليل، فطبيعي هتصحى 12 واحدة بالليل مثلاً، فحضرتك رحت صاحي من نومك على الثلاجة، عادتك، وقعدت تاكل وتشرب، خلاص؟ في عز ما أنت تاكل وتشرب لقيت حد أنت بتعمل إيه؟ ده إحنا إيه ده؟ إحنا الظهر، فكأن اليوم ده أنت نومك سحب شوية وصحيت الظهر. أنت هنا وأنت تاكل وتشرب كنت بتعتقد هذا القد، دي مسألة ثانية ها، مش مسألة أنك شاكّ، لا، أنت معتقده ليلاً أصلاً، أنت فاكر نفسك الساعة واحدة بالليل، مفهومة دي؟
طيب، دي مسألة إن أكل أو نحو الأكل بقى، شربت، جامعت كده، في وقت اعتقده ليلاً فبان نهاراً قضى الواجب. ما تجيش تقول إيه؟ طب أنا لا ده أنا كنت أنا غلطان، ده أنا مش نقول لك لا لا لا، ما فيش كده؛ لأنك هنا ما انتش ناسي، ركزوا، أنت هنا مش ناسي، لا، أنت هنا اعتقدت اعتقاداً خاطئاً. خلي بالكم بقى هنا فرقوا بين مسألتين برضو يا جماعة، إحنا هنا مش هنقول لك تأثم، فرقوا بمسألة الإثم ومسألة بطلان اليوم، يعني ممكن نقول فسد اليوم ولا إثم عليك لو أنت ما أنتش مقصر؟ سيبك مسألة الإثم دي، يعني الإثم ما فيش تلازم، قد تكون آثماً وقد لا تكون، دي مسألة تانية على جنب نبحثها بعدين، أنما اليوم فسد دي مسألة، هل المعنى اليوم فسد أن أنا آثم؟ مش شرط، ممكن تبقى آثم، وممكن ما تبقاش آثم، دي مسألة تانية تبحث، أنما اليوم فسد ليه؟ لأنك كلت أو شربت بالنهار، فهمتوا دي؟
هي دي المسألة الثانية بقى، أنه اعتقده ليلاً فبان نهاراً قضى الواجب؛ لأنه لم يتم. وكذا يقضي إن أكل ونحو الأكل يعني يعتقده نهاراً فبان ليلاً ولم يجدد نيته لواجب، لا من أكل ونحوه ظن غروب الشمس، طب مسائل يعني إيه مش؟ وبعدين يدخل بقى في الجماع وما يوجبه.
نقف هنا، وأقول قولي هذا وأستغفر الله العظيم لكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.