الشيخ أمجد سميرالله، بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم إنك حميد مجيد.
أما بعد، وصلنا لقوله: ومن عجز عنه لكبر أو مرض لا يرجى برؤه، أطعم لكل يوم مسكيناً. كلام البهوتي. ومن عجز عنه لكبر أو مرض لا يرجى برؤه، أطعم لكل يوم مسكيناً. ندخل كلام عثمان النجدي، معانا: ومن عجز عنه أي عن الصوم لكبر أو مرض لا يرجى برؤه، أطعم لكل يوم مسكيناً.
طيب، خلونا نفهم المسألة دي. دلوقتي واحد كبر في السن؛ هل اللي كبر في السن ده متخيل كده أنه ممكن في يوم من الأيام يرجع يصغر تاني؟ لا خلاص، اللي كبر كبر. فهو إذا ما كانش قادر يصوم، فمش متخيلين أنه في يوم من الأيام هيقدر يصوم؛ لأنه خلاص سنه كبر وكل يوم بكبر زيادة، فاذا كانت العلة في عدم قدرته على الصوم الكبر، فمش متصور أن العلة دي هتزول في يوم من الأيام.
طيب، يعمل ايه ده بقى لو هو كبير ومش قادر يصوم؟ هيطعم عن كل يوم مسكيناً. طيب اللي بعده، المريض الذي لا يرجى برؤه؛ عاوزين نعمل شجرة كده، شجرة، فنكتب كده مرض أو مريض وينزل منها سهمين، السهم اللي على اليمين لا يرجى برؤه، يعني ايه لا يرجى برؤه؟ يعني مريض مرض مزمن، واحد عافاكم الله عنده سرطان وخلاص، هم الأطباء قالوا مش هيروح مثلاً، أو غيره من الأمراض المزمنة، سكر شديد أو أي حاجة زي كده، فدي حاجات ما بتروحش خلاص، مرض مزمن.
ماشي، يبقى ده مريض مرض مزمن. وبعدين السهم الثاني اكتبوا: مرض يرجى برؤه. السهم الثاني: مرض يرجى برؤه. طيب، يبقى احنا لسه في السهم اللي ناحية اليمين دلوقتي؛ يبقى المريض مرض لا يرجى برؤه زيه زي الكبير؛ ما هو الكبير في السن ده، الطاعن في السن، الشيخ أو العجوز. بالمناسبة، الشيخ دي بتقال للرجل، مش الشيخ يعني اللي هو الشيخ بتاع الجامع يعني، لا، الشيخ دي لما يكون واحد كبير في السن، رجل كبير في السن، وعجوز بتقال للمرأة كده من غير تاء مربوطة، فيقال: فلانة عجوز، مش عجوزة، وفلان شيخ.
ماشي، جت الشيخ دي في القرآن ولا ما جتش؟ جت. أين الحفاظ؟ ماشي، ﴿وَأَبُونَا شَيْخٌ كَبِيرٌ﴾ [يوسف: 78]. كده شيخ كبير يا حاج مروان ماشي. يبقى دي جت. ماشي، طب جت عجوز ولا ما جتش؟ جت في القرآن؟ عجوز. ماشي، ﴿قَالَتْ عَجُوزٌ عَقِيمٌ﴾ [الذاريات: 29]. أمم، ما قالتش عجوزة، مش كده؟ أم.
طيب، يلا نرجع تاني، نرجع تاني ماشي، يبقى جميل هو واحد بقى جاب لكم إيه فيها الاتنين مع بعض أهو: ﴿قَالَتْ يَا وَيْلَتَىٰ أَلِأَلِدُ وَأَنَا عَجُوزٌ وَهَذَا بَعْلِي شَيْخًا﴾ [هود: 72]. يبعد! يلا بينا نرجع تاني؛ يبقى من عجز عنه لكبر أو مرض لا يرجى برؤه. آه، احنا كده عملنا الشجرة ونزلنا لسهم اليمين: مرض لا يرجى برؤه، مرض مزمن. هيبقى يطعم عن كل يوم مسكيناً؛ لأنه خلاص لا يرجى برؤه، فيعني مهما عاش مش متخيل أنه هيخف ويقدر يصوم.
هو احنا ليه يا جماعه بنقول هيطعم عن كل يوم مسكيناً الكبير والمريض مرض لا يرجى برؤه؟ لأنه مش متخيلين أن الكبير هيصغر ولا المريض هيخف؛ ما هو لو هيصغر هنقول له إيه: لما تصغر ابقى صوم اللي فاتك، أو لما تخف أيها المريض ابقى صوم. الكبير هيقول لك: أنا مش أصغر، والمريض مرض مزمن هيقول لك: أنا مش أخف، فنقول له: خلاص، عليك أن تطعم عن كل يوم مسكيناً.
طيب، يطعم إيه؟ قال: ما يجزئ في كفارة؛ مد بر أو نصف صاع من غيره. يطعم مد بر أو نصف صاع من غيره. سهلة أهي؛ مد بر، مفهومة أو مش مفهومة؟ مين عارف يعني إيه مد بر؟ ماشي، البر ده اللي هو القمح، والمد ده تقريبا نص كيلو. ماشي؟ يبقى مد البر تقريبا نصف كيلو من القمح، أو نصف صاع من غيره. الصاع أربع امداد، يبقى نص الصاع قد ايه كم كيلو تقريباً؟ بسرعة بسرعة، اللي هيجاوب غلط هنطلعه بره وندخله تاني عشان يحضر الدرس. كيلو، تمام، أحسنتم، يبقى نص الصاع كيلو؛ أن الصاع تقريباً أربع أمداد، المد تقريباً نصف كيلو من البر، يبقى نصف الصاع تقريباً كيلو.
وأنا كده بضحك عليكم يعني، بس يعني مشوها كده؛ لأن المد والصاع ده كيل ولا وزن؟ اه، المد والصاع دي كيل ولا وزن؟ كيل، ماشي، دي ماهيش وحدة أوزان، ما هي والكيلو ده كيلو ولا وزن؟ وزن، فمش دقيق قوي اللي احنا بنقوله ده، يعني ماهوش دقيق دقيق قوي اللي احنا بنقوله، لكن علشان دلوقتي احنا الحاجات دي ما بنكيلهاش، احنا بنوزنها، يعني لو جيت قلت لك مد بر، اللي هو القمح، القمح احنا دلوقتي بنشتريه بالكيلو ولا بالوزن؟ لا بالوزن، أنت بتروح للراجل تقول له إيه: أديني كيلو قمح، صح؟ ما تقولوش هات مثلاً إيه لتر قمح مثلاً. اللتر ده وزن، عفواً، كيل. احنا شغالين بالوزن في الحاجات دي، فيعني تقريباً احنا دلوقتي ماشيين بالأيه بالتقريب، أن المد تقريباً نصف كيلو، والصاع تقريباً الصاع تقريباً ٢ كيلو.
ماشي، بعضهم وصلها ٢ كيلو و٦٠٠ تقريباً، هيئة كبار العلماء الفتوى بتاعتهم على كده، أن تقريباً ٢ كيلو و٦٠٠ الصاع. فالكفارة بقى إيه اللي بيجزئ في الكفارة؟ وده اللي هنطعمه للمسكين؛ هنطعم مسكيناً عن كل يوم، يعني نصف كيلو من القمح وبحبح إيدك شوية، أو كيلو من غير القمح وبحبح شوية برضه. لقول ابن عباس: ﴿وَعَلَى الَّذِينَ يُطِيقُونَهُ فِدْيَةٌ﴾ [البقرة: 184] ليست بمنسوخة، هي للكبير الذي لا يستطيع الصوم.
قال: والمريض الذي لا يرجى برؤه في حكم الكبير. مين اللي قال؟ الناس القديمة ما تجاوبش. مين اللي بيقول ده؟ مين اللي بيتكلم دلوقتي؟ والمريض الذي لا يرجى برؤه في حكم الكبير. مين اللي بيقول الكلام ده؟ البهوتي. حد ليه رأي تاني؟ الناس القديمة ما تجاوبش، الناس اللي معانا في الطهاره من أيام الطهارة ما تجاوبش. عثمان. عثمان مين؟ اسمه عثمان إيه؟ عثمان النجدي.
قلنا الناس القديمة ما تجاوبش. شانس. محمد حسن ده من يعني استاذنا كلنا فما يجاوب. طيب، الناس الجديدة بقى اللي لسه معانا النهارده أول يوم. الكتاب ده شرح متن، المتن اللي هو بين الأقواس ده كاتبه واحد اسمه الإمام البهوتي، واللي شارح، اللي هو الكلام اللي بره الأقواس ده، اسمه عثمان النجدي. فلما نجي دلوقتي بنتكلم نقول: والمريض الذي لا يرجى برؤه، ده كلام عثمان النجدي خلاص، في حكم الكبير زي ما قلنا لكم.
خلاص، لكن إن كان الكبير أو المريض الذي لا يرجى برؤه مسافراً، فلا فدية لفطره بعذر معتاد، ولا قضاء العجزية عنه، ودي مسألة تبقى فزورة. تبقى فزورة، نقول: واحد مكلف فطر في رمضان ولا قضاء عليه ولا كفاره ولا فدية؛ يعني مين هو؟ دي فزورة تقال. واحد مكلف فطر في رمضان ولا قضاء عليه ولا فدية؟ فنقول: لا مش بس الكبير، غلط. واحد كبير في السن لا يستطيع الصوم أو مريض مرض مزمن، وكان مسافراً. طيب ليه؟ تعالوا بقى نفهم المسألة دي.
ليه لا؟ اللي يفطر عمداً عليه القضاء طبعا، ويأثم. اللي يفطر عمداً لغير عذر، يعني عشان بس يبقى الكلام واضح، أما لو واحد كبير، الحمد لله على السلامة يا علي، واحد كبير وواحد مريض وفطر عمداً؛ ما هو لازم يفطر عمداً ده مالهوش، لا يأثم. خلونا بس نشرح لكم المسألة دي يا جماعه؛ واحد كبير، عشان المسائل دي بتقابلنا، هتقابل في حياتك، أبوك، أمك، أو لو حد معانا كبير بقى في السن، أو واحد مريض مرض مزمن، طيب، وبعدين سافر في رمضان، سافر سفراً تقصر فيه الصلاة، فنقول له: افطر لأنك مسافر، أنت هو كده كده بيقصر، هو كده كده بيقطر أصلاً، فنقول له: أنت مسافر، فلا فدية لو لم يكن كبيراً، لا يستحب له على المذهب يعني الفطر وكره له الصوم، فهو كده كده بيقطر، يقول: طيب وأنا مسافر فطرت، علي إيه؟ نقول له: ما فيكش حاجة خالص.
خلي بالك، الأيام اللي فطرها وهو مسافر سفراً تقصر فيه الصلاة، لا شيء عليه فيها. إيه ده؟ يعني مش هتقول.. ما فيش فدية، مش هيطعم؟ نقول له: لا، مش هتطعم عن الأيام دي لا المريض مرض مزمن ولا الكبير هيطعم عن الأيام دي. ليه؟ ليه هنقول له إن أنت لما سافرت فالاستحباب في حقيقتك الفطر، يعني ما لكش صيام خلاص. يقول لي: طب ماشي، كويس ولا قضاء عليك؛ لأنك لا تستطيعه، لا تستطيع القضاء. يقول: ماشي، كويس. نقول له: ولا إطعام. يقول: ليه بقى لا إطعام؟ نقول له: لأن الواجب في حق المسافر القضاء مش الأداء. يقول: أه. نقول له: القضاء دون الأداء، في أحكام كثيرة مش وقته دلوقتي، لكن مثلاً منها حكم مثلاً أن القضاء، وأنت بتقضي، ممكن.. بص، بلاش ندخل في القصة دي دلوقتي علشان إيه؟ دي أكبر من.. ماهوش موضوع الدرس، هناخد فيها وقت.
المهم يا جماعه، الكبير والمريض مرض مزمن لو مسافرين، الأيام اللي مسافرين دي، سفر طبعا تقصر فيه الصلاة، لا عليهم قضاء ولا عليهم إطعام، ودي يعيا بها، يقولوا كده: يعيا بها، يعني تقال في الفزورة ماشي. اللي بتقول.. السفر دلوقتي ما فيش فيه مشقة، تسمع الدروس اللي فاتت، عشان احنا قلنا تسمعوا الدروس فسمعوا الدروس اللي فاتت، كل الكلام ده هتلاقوه فيها إن شاء الله ماشي.
طيب، نلخص. قال: وسن لمريض يضره ومسافر يقصر، فطر. الناس الجديدة بس اللي هي حاضرة معانا، الصيام، ده كلام مين؟ ما حدش من اللي قدام يكتب. وسن اللي أنا بقراه ده كلام مين؟ وسن لمريض يضره ومسافر يقصر، فطر. هنفهمه بعدين، بس ده كلام مين؟ الناس الجديدة اللي هي داخت معانا في الصيام، بتحضر من الأول. البهوتي. أحسنتم، هذا كلام الإمام البهوتي. عاوز يقول إيه بقى البهوتي؟ يلا نقراها تاني: وسن لمريض يضره ومسافر يقصر، فطر.
طيب يا جماعه، المريض ليه أحوال: إما أن يكون المرض يضره، أو.. المرض يضر إزاي؟ مش الصوم يضره؟ ماشي. الصوم يضره في مرضي أو ما يضروه؟ ركزوا في اللي هقوله ده، ركزوا في اللي هقوله. معلش يا جماعه، خلونا نشجرها دي، ماشي، خلونا نشجر المسألة دي. لو قلنا: مريض، نزلوا ثلاث أسهم منه كده، ثلاث أسهم منه. السهم الأول، اكتبوا: الصوم يضره. ماشي؟ يعني إيه يضره الأول قبل ما نكمل الأسهم يا جماعة؟ لما نجي نقول: الصوم يضره، يعني هيعمل حاجة من الاتنين: لو كان الصوم هيطول مدة المرض، أو هيزود المرض، كده يبقى يضر.
تاني: لو كان الصوم هيزود مدة المرض، أو هيزود المرض نفسه، حدة المرض، حتى لو مش هيزود المدة، يبقى كده الصوم هنسميه صوم يضر المريض ده. فهمتوا الكلمة دي يا جماعة؟ يعني واحد مريض، أي مرض، احنا مش بنكلم بقى في مريض مرض مزمن دلوقتي، لا، نتكلم في مريض عريض، فهيجيب يقول إيه؟ الطبيب هيقوله: لو صمت، الامتناع عن الأكل والشرب، الامتناع.. الصوم نفسه، الصوم نفسه، لو أنت.. كنت هتخف كمان شهر، لا، هتخف كمان شهرين، كده نقول الصوم يضر.
طيب، الدكتور قال له: لا، لا، لا، أنت كده كده إن شاء الله هتخف كمان شهر، لكن الصوم هيزود شدة المرض عندك، يبقى كده برضه الصوم يضر هذا المريض. يبقى حاجة من الاتنين دول. خلاص؟ نرجع تاني للاسهم بتاعتنا، يبقى أول سهم: المريض ده الصوم يضره. السهم التاني: الصوم لا يضره، ولكن ترك التداوي يضر، هنفهم الفرق بينهم دلوقتي. يبقى الصوم.. نفس الصوم لا يضره، لكن ترك التداوي يضر. ويعني إيه يضره؟ نفس الكلام اللي قلناه، أنه يا إما المدة تزيد يا إما حدة المرض تزيد.
السهم الثالث: أنه لا ضرر عليه. يعني إيه لا ضرر عليه؟ تعالوا بقى نشرح الأول: يعني الصوم يضره، شرحناه. يعني إيه الصوم لا يضره، لكن ترك التداوي هو اللي يضره؟ يعني الدكتور يقول له: بص يا ابني، أنت امتناعك عن الأكل والشرب.. ما..
يضرك الأكل والشرب؟ ما يضرك في حاجة، لكن عدم أخذ الدواء في مواعيده هي دي اللي هتضرك. فهمتم دي؟ فاهمين الفرق يا جماعة؟
يعني ممكن واحد الأكل والشرب، نفس الامتناع عن الأكل والشرب، يضَعِفْه ويضره. خلاص، طبعا ما اقدرش أقول إيه، زي إيه؟ لو في أطباء هنا يقولوا بقى. وفي واحد تاني الدكتور يقول له: لا، هو أنت الامتناع عن الأكل والشرب ما يضرك ولا حاجة، لكن مديك أدویه، الأدوية دي لازم تتاخد في المواعيد بتاعتها بالضبط وإلا هتضر.
ويعني إيه هتضر؟ عشان يا جماعة الكلام ده مهم جداً. يعني ما يجيش دكتور هو اللي يمشيك في الفقه، الدكتور بس يقول إنه لما يجي يقول لك إيه: الدكتور لازم تاخد الأدوية في معادها، ما تاخدش الكلمتين دول تروح تفطر في رمضان. قول له: يعني إيه؟ يعني لو ما أخدش الأدوية إيه اللي هيحصل؟ فلو كان مدة الشفاء، مدة المرض هتزيد أو شدة المرض هتزيد، هي دي المسألة اللي بنتكلم فيها دلوقتي.
خلاص، طيب، أو المسألة الثالثة بقى اللي هو لا ضرر عليه، واحد صباعه وجعه مثلاً أو ضِرْسُه وجعه، فبقى مش فارقة بقى يعني إيه الصيام بيزود ولا ترك التداوي بيزود، هو صباعه وجع خلاص، يعني إيه؟ يعني هو دهن صباعه مثلاً، فهو الدهان ده ما تدهنه وأنت صايم؟ ودا خلاص.
طيب، إيه الحكم بقى في دول؟ ثلاث مسائل يا جماعة مختلفين، إحنا بنجمع الدنيا أهو، دول ثلاث مسائل مختلفين. أول مسألة: إذا كان الصوم، نفس الصوم، نفس الأكل والشرب يضر، يستحب له الفطر.
خلاص، طيب، المسألة التانية، اكتبوا كده بقى، يستحب له الفطر في الحالة دي. المسألة التانية: إذا كان الصوم لا يضره، لكن ترك التداوي يضر، يباح له الفطر، لا يستحب لكن يباح. المسألة الثالثة: أنه لا ضرر عليه خالص في القصة، يبقى يحرم عليه الفطر. فهمتم؟
عمر بيقول: هم يفطروا على قدر الحاجة علشان حرمة الوقت ولا يفطروا عادي؟ السؤال حلو، سؤالك حلو يا عمر، زيك كده حلو، زيك.
يعني محتاجة تفكير، أنا ما أحبش أتكلم في حاجة لم أقرأها لأحد، ظاهر كلامهم إن هو لا، يعني خلاص أباحوا له الفطر أو استحب له الفطر يبقى خلاص يفطر. لكن هو السؤال حلو الحقيقة وقد يتنازعه الأمران لو جينا نناقشه فقهاً ممكن تحتمل ده وده، على كل حال السؤال كويس.
جاز أم فرض مثلاً الفطر في حالة الضرر؟ إحنا قلناها بقى خلاص يا عبد العظيم، الحالة الأولى يستحب، الحالة الثانية يباح، الحالة الثالثة يحرم.
يعني إيه حرمة الوقت؟ اسمعي الدروس اللي فاتتي، كل ده فيها. واجب مش عارف، يعني إيه واجب؟ مش عارف إيه؟ عاوزه تقولي إيه؟ ولازم قضاء رمضان بعد الشفاء؟ أه، المريض الذي يرجى برؤه يا جماعة، المريض الذي يرجى برؤه اللي هو شوية وهتخف، ده لما يخف يقضي، خلاص يجيب الأيام اللي فاتته ماشي.
طيب، أظن كده الدنيا نورت بالشجرة اللي عملناها دي، يبقى الحالة الأولى يستحب الفطر اللي هي نفس الصوم يضر، الحالة التانية يباح الفطر ما هواش مستحب، مباح يعني لو فطر ماشي الحال اللي هو يضر ترك التداوي لكن لا يضر الصوم، الحالة الثالثة يحرم الفطر اللي هو حالة المريض الذي لا ضرر عليه. فهمتم يا جماعة؟
يبقى مريض لا ضرر عليه، يعني إيه لا ضرر عليه؟ تعالوا بقى نقول مثال بقى لا ضرر عليه ده اللي بتقابلنا، سيبك من وجع القلب وجع الصباع وكده، خلونا نقول مسألة، مسألة إيه بقى؟ أن مريض راح للدكتور، الدكتور أداله دوا قال له: يا دكتور، هو أنا لو ماكلتش وشربت يحصل حاجة؟ هيقول له: لا يا عم، ما يحصلك حاجة. يقول له: طيب، الدوا ده لو غيرت المواعيد بتاعتها أن أنا أخدها قبل الفجر وبعد المغرب يحصل حاجة كبيرة يعني؟ يقول له: لا، مش هيحصل حاجة. دي بقى مسائل بتقابلنا، هتقابل أو هتقابل حد تعرفه، واحد الصوم يضره ولا تغيير مواعيد الدوا تضره؟ أو يقدر الدكتور يظبط له المواعيد على أن تبقى قبل الفجر وبعد المغرب، هذا في حقه يحرم عليه الفطر، نقول له هتصوم وتاخد الادويه قبل الفجر وبعد المغرب. فهمتم؟
طيب، إيه تاني الشجرة اللي فاتت ماكملناهاش؟ هتموت، إيه الشجرة؟ كان أول واحدة اللي هو المريض مرضاً لا يرجى برؤه، يبقى ده هيطعم، والناحية التانية المريض مرضاً يرجى برؤه، يبقى ده يقضي ولا يطعم، وخلاص، وعملنا لكم شجيرة تانية تحت بقى خلاص، اللي هي التلاتة دول.
طيب، يلا نرجع تاني. في حالة يحرم فيها الصوم، يعني الناس الكبيرة اللي ربنا يديها الصحة كتير مش بترضى تفطر، لا، ما يحرم الصوم ولا حاجة، ماشي.
قال: وسن لمريض يضره، يعني الصوم، وسن لمسافر يقصر، فطر ولو بلا مشقة. المشقة دي كنا كلمنا فيها خلاص، ماشي، يعني المشقة غير معتبرة عندنا، حتى لو سفر في طيارة خاصة ونايم طول الطريق وده كله ما لا اعتبار له لقوله تعالى: ﴿وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّن أَيَّامٍ أُخَرَ﴾ [البقرة: 185].
قال: وكره صومهما، يعني المريض الذي يضر الصوم ده مكروه إنه يصوم، وكذلك المسافر الذي يقصر، مكروه دي، واتكلمنا في ماحدش ياخد الكلام في المسافر من الدرس ده، خدوا الكلام في المسافر من الدرس اللي فات لو سمحتوا، خلاص عشان بيناه وشرحناه وقلنا الأحوال بتاعتة، وخلاصه الأمر زي ما أحمد قال هنا كده لو تقدر تصوم وأنت مسافر صوم، خلاصه الأمر خلاص.
قال: وإن سافر ليفطر حرم، مسألة يعني ما بتناش في مصر قوي، ممكن شوية الخلايا جايات يعملوها، يعني معروف عنهم كده يجي رمضان يقوم مسافر، يقول لك: ليه؟ عشان أفطر، مش عاوز يصوم، لو سافر بالنية السودا دي، نية أنه أنا مسافر عشان أفطر، حُرِم.
هُمَا إيه اللي حُرِم؟ حُرِم يعني في حاجتين حرام دلوقتي، إيه هما؟ إيه والسفر وإيه تاني؟ السفر والصيام؟ يا سلام! الصيام حرام؟ السفر والفطر، ماشي، السفر والفطر خلاص، طيب يبقى الفطر حرام، يعني هو لو سافر بنية الفطر نقول له: حرام عليك تفطر، هتصوم والسفر ده حرام.
طيب إيه يعني السفر حرام دي؟ ينبني عليها حاجة؟ يعني ينبني عليها حكم أن السفر حرام؟ عارفين إيه اللي هنبنيه عليه؟ هينبني، مش هينفع تقصر الصلاة؛ لأن القصر لا يجوز في سفر المعصية، رخص السفر لا يؤخذ بها في سفر المعصية، واحد مسافر يعصي ربنا، نقول له: مالكش رخص.
ماشي، واحد مسافر المعصية، هو مسافر بنية سودا، هو مسافر عشان يقعد يبص على المتبرجات وعشان هي دي نيته، هو مش مسافر عشان أي حاجة تانية، نقول له: هذا سفر معصية، لا تقصر لا تقصر الصلاة.
خلاص، إحنا دلوقتي مش باب الصلاة، خلينا في الصوم. قال: وإن نوى حاضر صوم يوم ثم سافر فيه، فله الفطر. إحنا الكلام ده شرحناه المره اللي فاتت. وإن نوى حاضر صوم يوم ثم سافر فيه، فله الفطر، فله يعني مباح له الفطر هنا، مش مستحب بقى.
وإن نوى حاضر، واحد قاعد في بلده وصايم بالنهار أهو وراح نوى أنه يسافر، فله الفطر. شوفوا كده في آخر الجملة دي عثمان بيقول إيه: والفضل عدمه. المسألة دي يا جماعة قلنا المسألة دي من إيه؟ حد فاكر؟ من المفردات، أحسنت يا عبد العظيم، أحسنت يا أحمد، أحسنت يا محمد.
المسألة دي من المفردات، يعني إيه المفردات؟ اللي لسه جديد يراجع الدروس اللي فاتت، ماشي، كلكم شطار. وليه الأفضل عدمه؟ الأفضل عدمه؛ لأن معظم الفقهاء قالوا بخلاف ده، معظم الفقهاء قالوا بخلاف المساله، بخلاف ما قال به الحنابله، فيبقى ما تفطرش، هو عايز يقول لك ماتفطرش، فعشان كده إحنا شرحنا المسالة دي المره اللي فاتت، وقلنا اللي يقدر يصوم في السفر يصوم.
قال: وإن أفطرت حامل أو مرضع خوفاً على ولديهما، قضت وأطعم. وليە الناس اللي أول مرة تحضر النهارده يعني اللي بيحضر الصيام من أوله ما يردش، اللي أول مرة يحضروا النهارده معانا الفقه، أنا بقرا كلام مين دلوقتي؟ وإن أفطرت حامل أو مرضع خوفاً على ولديهما قضت وأطعم، وليە، أنا بقرا كلام مين؟ يلا، حد بيقول عثمان؟ حد ليه رأي تاني؟ صاحب المتن؟
حد ليه رأي تاني؟ اسمه إيه صاحب المتن ده؟ تهربوا من الأسماء! البهوتي، ماشي، أحسنت، هو فعلاً بقرا كلام البهوتي. خلاص، أنا دلوقتي زياد، أنت أول مرة تحضر النهارده؟ أول مرة؟ قول أه، مش أول مرة؟ امسح الكلام، ماشي، ماشي، مش شاطر يعني، ما تزعلش.
وإن أفطرت حامل أو مرضع، هعيد تاني عشان اللي أول مرة يحضرو، الكلام اللي أنا بقراه ده كلام المتن، المتن ده بتاع الإمام البهوتي اللي هو هتلاقوه بالخط التخين وبين الأقواس، بيشرحه عثمان النجدي اللي هو كلامه بخط مش تخين وبره الأقواس، خلاص.
ركزوا بقى عشان هسألكم كمان شوية ماشي، يبقى صاحب المتن هو البهوتي والشارح هو عثمان النجدي، خلاص.
قالت، قال: وإن أفطرت حامل أو مرضع، طيب، تعالوا يا جماعة برضو عاوزين نشقر المسالة دي، عاوزين نشقر المسألة دي، اكتبوا كده في نص السطر: حامل أو مرضع. هي هي مرضع ولا مرضعة في اللغة؟ وحامل ولا حاملة؟
طيب ليه حد يعرف؟ مكتوبة برضو الذكاء حلو، يعني هو يقول لك، يعني أقول لك، يعني هو البهوتي هيغلط مثلاً ما هو هو كاتب مرضع فأكيد يبقى هو اسم فاعل. ما هو مرضعة برضو اسم فاعل، إحنا بنتكلم في التذكير والتأنيث مش في الاشتقاق. مفهوم يا جماعة؟
يعني إيه مثلاً: آكل وآكلة، الاتنين اسم فاعل، الاتنين اسم فاعل، لكن ده مذكر وده مؤنث، بنتكلم في التذكير والتأنيث مش في الاشتقاق، خلاص، فاهمين دي؟
فهنا ليه قال: حامل ومرضع؟ ماهو، يعني هي ست ولا راجل دلوقتي؟ ليه يقول حامل ومرضع؟ ليه ما يقولش حاملة ومرضعة؟ ما هي ست اللي بتحمل وترضع مش كده؟ أحسنت يا حافظ، وأحسنت يا محمد مصطفى، برافو، فتح الله لكم.
العرب ما يلفوش كتير، ما يزودوش حاجة مالهاش لازمة. إيه بقى الحاجة اللي مالهاش لازمة؟ قال لك: والله لو فعل يلا بالتوفيق، اتفضلي اسمعي بقية الدرس.
بعدين قال لك بقى إيه؟ العرب قال لك: لو هو فعل ما بيعملوش الراجل، مالوش لازمة نحط التاء المربوطة؛ لأنه لابسة فيه، يعني لو قلت إيه الآن: مرضع، هل هيجي في دماغك أن الراجل قاعد بيرضع؟ مافيش راجل بيرضع، فهمتوا؟ هو الفعل خاص بالمراه، فهو مافيهوش لبس، يعني مافيش حد هيفتكر أن في راجل بيرضع، لا، مافيهوش لبس، فيبقى التاء المربوطة دي مالهاش لازمة دلوقتي، فهمتوا يا جماعة؟
الأفعال الخاصة بالمراة بالأنثى ما يحطلهاش التاء المربوطة دي؛ لأن مافيش لبس فيها، ماشي.
يلا نكمل تاني، أه، يلا نجور عشان نفهم المسألة. هتكتبوا في نص السطر: حامل ومرضع. انزلوا بسهم، هننزل بسهم، سهم يمين تقول إيه، أو خلوها سهمين، خلوها سهم عشانكو، سهم يمين وتفعل خائفة على نفسها، ماشي، وسهم شمال خائفة على ولدها، ماشي.
طيب، خلوها سهمين، خائفة على نفسها فقط وفقط دي حطوها بين قوسين لو سمحتوا، اللي بيكتب، يعني اللي ما بيكتبش بقى يتصور الشجرة اللي بنقولها دي. يبقى في النص: حامل ومرضع، سهم يمين، وبالذات النساء يركزوا يا جماعة عشان دي أحكام بتحتاجوها، سهم يمين: خائفة على نفسها فقط بين قوسين، سهم شمال: خائفة على الولد.
ماشي، طيب، الحكم بقى هنا وهنا، لو خايفه على نفسها بس، يعني واحدة حامل وبعدين دخل رمضان وهي حامل، فتقول: والله أنا ضعيفة جداً، بنيتي ضعيفة، لو صمت هتعب تعب شديد.
فدلوقتي هي مش في دماغها الولد، ما هي مش خايفة على الولد في حاجة، الجنين يعني، أو واحدة مرضع، واحدة بترضع ودخل رمضان فبتطول: أنا بنيتي ضعيفة جداً وهزيلة، ولو صمت هدوخ وأقع، هي دلوقتي خايفة على نفسها مش خايفة على الجنين، بالذات لو الجنين ليه صرفة بقى، عفوا، الرضيع ليه صرفة تانية، ممكن ندي له أي حاجة ولا بتاع، نخلص، ماشي، وهنيجي للحته دي كمان شوية اللي هي ممكن ندي له حاجة تانية دي. ففي ساعتها هنعامله كمعاملة المريض عشان ما تهوش مني بقى.
طيب، المريض يا جماعة، المريض دلوقتي طبعا ماهياش مريض مرض مزمن، دي مريض زي كأنها مريض وهتخف كمان شوية، عليه إيه؟ عليه إيه؟ عليه اطعام ولا عليه قضاء؟ إيه رايكم؟ يقضي، أحسنت يا عبد العظيم. فيبقى لو هي خايفة على نفسها فقط، عليها القضاء. يبقى السهم اليمين ده اللي هي خايفة على نفسها فقط، اكتبوا: عليها القضاء.
طيب لو خايفه على الولد؟ سواء بقى مع خوفها على الولد خايفة على نفسها أو مش خايفة على نفسها، خلاص. يعني أنا معلش، أنا زهلت عن حاجة معلش، إحنا عاوزين نصلح. أنا يعني أنا كنت الصراحة عاوز اعملها ثلاث أسهم، عشان كده يعني، يعني اكتبها ازاي؟ أنا هقول، يعني الأحكام المسألة، وبعدين نشوف بقى هكتبها ازاي في السهمين، يعني عشان بس أنا غلطت دلوقتي وأنا بمليهم، أنا يعني إن شاء الله مش هغلط في الحكم، لكن وأنا بملي أنا كنت عايز اعمل لها ثلاث أسهم عشان اللخبطة دي.
بصوا يا جماعة، هي لو خايفة على نفسها، كده كده هتقضي فقط، سواء معاها الولد أو ما
لو هي خايفة على نفسها هنعملها معاملة المريض؛ سواء خايفة على نفسها بس، أو خايفة على نفسها والولد كمان. يعني إيه خايفة على نفسها بس ويعني إيه خايفة على نفسها والولد؟ خايفة على نفسها بس قلنا لكم الصورة بتاعتها، خايفة على نفسها والولد إزاي؟ تقول: والله أنا وأنا حامل فإنا تعبانة وخايفة على نفسي وبرده خايفة على الجنين. سواء كده أو كده، الحالتين دول هتقضي بس. خلاص، ليه؟ لأن هنعملها معاملة المريض.
طيب، جينا نسالها: أيتها الحامل أو أيتها المرضع، أنت ليه عاوزه تفطري؟ تقول: والله أنا لا، أنا قوية وأقدر أصوم ومش هتضر قوي من الصوم، لكن خايفة أن الجنين هو اللي يتضرر، خايفة أن الرضيع هو اللي يتضرر. مفهومة دي يا جماعة؟ لو كده، يبقى في حاجتين هيحصلوا: أول حاجة، هتقضي الأيام اللي هتفطر دي، وتاني حاجة، يطعم الولي. يطعم الولي ولي الولد ده اللي هو مثلا في معظم الحد بيكون الأب، اللي هو مين الولي؟ اللي هو تجب عليه مؤنته؛ تجب عليه مؤنته، مؤنة الصغير ده يطعم.
يبقى هيحصل حاجتين، خلاص، لو هي خايفة على الولد بس مش خايفة على نفسها خالص، خلاص هتقضي ويطعم الولي. يطعم إيه؟ زي اللي قلناه فوق، يا مد بر يا نصف صاع من غير البر، خلاص كده وعارفنا المسألة دي يعني مد بر يعني نصف صاع من غيره. طيب، نكتبها إزاي بقى في السهمين؟ تعالوا نفكر كده، يعني مثلا نخلي سهم اللي على اليمين خفت على نفسها مطلقة كده ماشي، والسهم اللي على الشمال خفت على الولد فقط كده تتظبط ماشي.
ماشي، يبقى لو خافت على نفسها، لا لا مش عاوزين ننزل بفرعين لا لا، أنا مش حابب ننزل بفرعين تاني. لو خافت على نفسها مطلقة كده يبقى هتقضي، عاوز تكتب بقوسين سواء خافت على الولد أو لا ماشي الحال. السهم اللي على الشمال اكتبه بقى لو خافت على الولد فقط، وفقط دي بين قوسين ماشي. اللي بتخاف على نفسها فقط في حكم المريض الذي يرجى بُؤهُ، وليس المريض المزمن، ده سؤال ولا إي... سؤال؟ اه، اللي خايفة على نفسها فقط ده المريض الذي يرجى برؤه، يعني إيه؟ يعني بعد ما تبطل رضاعة أو تخلص حمل أو تبقى في وقت حامل فيه أو مرضع فيه، لكن زال عنها هذا الخوف؛ اتغذت بقى كويس وبتاع وابتدت صحتها ترد، نقول لها: صومي. يعني مش لازم لما تبقي تولدي أو تبطلي رضاع. فهمتوا دي؟ طيب، كده خلصنا التشجير اللي معانا ده. ولو حد مش فاهم يسأل عشان الحته دي ممكن أنا اللي لخبطتها، يعني التشجير حتى في الأول كنت عاوز أعملها ثلاثة عشان نخرج بره اللخبطة دي، بس خلصناها أهو.
قال: وإن أفطرت حامل أو مرضع خوفا على أنفسهما فقط أو مع الولد؛ قضت عدد الأيام فقط أي بلا فدية، لأنهما بمنزلة المريض الخائف على نفسه. ماشي، تعالوا نقرا كلام ممدوح كده نشوف بيقول: لو خايفة على نفسها تقضي فقط، لو خايفة على الولد فقط تقضي ويطعم ولي الولد، صح كده؟ طيب، أشرحها بسرعة: واحدة خايفة على نفسها فقط هتقضي، خايفة على نفسها وعلى الولد برده تقضي فقط طالما خايفة على نفسها؛ خلاص. خايفة على الولد فقط فقط ومش خايفة على نفسها، نقول تقضي ويطعم ولي الولد زي ما ممدوح كاتب كده. أحسنت، ماشي كده احنا عدنا التشجير أهو تاني يا عمر ماشي.
طيب، إزاي مرضع خائفة على الولد؟ مرضع خائفة على الولد أن هي لو الولد مرضَش هيتأذى وهيؤذى وهيسوء، فهي خايفة على الولد هي مش خايفة على نفسها في حاجة ماشي، يعني لو هي صامت اللبن ممكن يجف. هي مرضع فهي لو صامت اللبن هيجف في الثدي، طبعا المراه وهي بترضع بيقولوا لها إيه: لازم تشربي سوايل كتير، ولازم تاكلي زبداني، ولازم حاجات كده يعني إيه الستات عارفاها ماشي. فلو هي صامت مش هتعرف لا تاكل ولا تشرب، فاللبن هيجف، فالولد مش هيرضع، فهي خايفة على الولد. لو خايفة على نفسها والولد، حد يجاوب يلا واحدة بتسال لو خايفة على نفسها وعلى الولد مين يجاوب؟ أحسنت يا احمد تقضي فقط.
بصوا يا جماعة عشان ما تتلخبطوش، طالما خايفة على نفسها هنعملها معاملة المريض؛ سهلة كده؟ طالما خايفة على نفسها يبقى زيها زي المريض، مش المريض بيبقى خايف على نفسه ولا خايف على الجيران؟ خايف على نفسه صح، فطالما خايفة على نفسها نعاملها معاملة المريض سواء بقى خايفة على الولد ولا مش خايفة على الولد. قلتلكش بلوك ولا حاجة، أنا أقدر يا مروان ده أنا أخرج من المجموعة كلها وما أعملكش بلوك! خبر أنا ممكن أضربك ما أشوفك لكن أعملك بلوك لا مستحيل ماشي.
طيب، أنا عارف أنا ده اللي مقعدني في التليجرام أن الكلام بيتمسح عند مروان، ده اللي مخليني ماروحش الزوم، يعني أنا مرتاح منه في التليجرام كفاية يوم الجمعة علي. ماشي يا سيدي يلا نرجع تاني، عندنا مسألة هنا يذكرها الفقهاء يقول: ومتى قَبِلَ رضيع ثدي غيرها وقدر أن يستأجر له، لم تفطر، وظِئْرٌ كام. إيه المسألة دي؟ سهلة مش محتاجه تفصيل، مفهومة؟
طيب، هنا مسألة ويتفرع منها مسألة، وأنا مش هجاوب عليها ما عنديش بيها فتوى، يعني لو أنتوا اللي تشوفوا بقى وتبعتوا يبقى ده البحث بتاع النهارده، أنا ما عنديش بيها فتوى ومحتاجه فتوى الحقيقة. دي مسألة بتقابلنا، المسألة دي مهمة جدا جدا وبتقابلنا. الفقهاء نصوا على أنه متى قبل رضيع ثدي غيرها، يعني إيه؟ زمان يا جماعة كان في حاجة مشهورة كده أن ممكن يستأجر مرضع؛ يستأجر مرضع دي كانت مسألة مشهورة عند العرب، ومش بس عشان الأم ضعيفة، لا العرب زمان، العرب زمان كان ممكن يروح يستأجر مرضع من الصحراء ومن البدو وكده ليه؟ لينجب الولد! كان عندهم اعتقاد كده، ما أعرفش بقى الاعتقاد ده يعني العلم أثبته ولا لا ما أعرفش، لما يكون هم من أهل المدن، يقوم لما يخلف ما يخليش مراته هي اللي ترضع يقوم يجيب واحدة من العرب البدو ترضعه ليه؟ يقول إن ده أنجب للولد أنه يرضع لبن هؤلاء ماشي، الولد يطلع نجيب يعني نجيب ماشي.
هل ده بقى ليه سند علمي ولا لا؟ مش قضيتي دلوقتي ولا دي مسألة اللي عاوز أقوله إن هو كان مشهور عند العرب أن الولد اللي بيتولد ده واحدة تانية غير أمه ترضعه خلاص باجرة. طيب، فده هو بقى بيقول لك إيه؟ المسألة بتاعتنا أن الأم دي ضعيفة ومش قادرة هتبقى خايفة وبتاع فهتفطر؛ يعني اللي احنا حكينا اللي فوق ده كله. فبيقول لك والله لو الولد ده يقبل ثدي غيرها وولي... وقدر، هنا اكتبوا اللي معاه الكتاب يكتب عليها: قدر، يعني ولي الولد، هقول دلوقتي حالا التكليف لسه ما قلتش، وقدر يعني ولي هذا الصبي أنه يستأجر له، مرضع مرضع بقى عفوًا، أن يستأجر له مرضع، نقول يحرم على الأم أنها تفطر حينها. لم تفطر؛ ليه؟ لأن في مخرج هنا، إيه هو المخرج؟ أنه يستأجر مرضع أخرى ترضع هذا الولد والأم تصوم. فهمتوا المسألة دي؟
طبعا دلوقتي ممكن يعني ده بالنسبة لنا مست... هتجيب منين واحدة ترضع بأجرة؟ ما أعرفش إذا كان في بعض بقى ممكن في الريف موجود في بعض البلدان مش عارف، ماشي، لكن هي خلاص لها مخرج أن امرأة تانية ترضع الولد وأنا أكمل صيامي. فهمتوا دي؟ طيب، إيه بقى السؤال اللي محتاجين له فتوى وأنا ما عنديش فتوى فيه؟ الببرونات بتاعة اليومين دول هل تاخذ نفس الحكم؟ يعني لو قلنا إن الولد في وقت الصيام الأم هترضع لغاية ما تحس هي بأنها ممكن تتعب أو اللبن يجف، فنكمل بالبيبرونة دي لغاية الإفطار، فهل حينها نقول إن الأم ساعتها لم تفطر ولا لا؟
أنا ما عنديش فتوى، تفتوا دلوقتي إيه الأجرام ده؟ تفتوا دلوقتي؟ ما تخش النار أنت كده هتهبب! مش هتفتي، يعني إيه تفتي دلوقتي دي؟ لا، أنت تدور على فتوى للعلماء، أنت هتفتي أنت؟ ولا أنت عالم؟ فضلتك عالم مثلاً هتفتي؟ هتفتي هنا لو عالم ماشي يلا ادخل افتي. عبد العظيم بيقول: بقالنا خمس دروس أهو يعني بقينا علما كبار دلوقتي ماشي.
فده ده البحث بتاع النهارده بقى ماشي، اللي جديد ولسه أول مرة يدخل؛ احنا كل مرة بندي بحث تدوروا عليه وتجيبوا لنا تبعثوا لنا هنا على المنشور التفاعلي. بحث النهارده إيه هو باختصار؟ الببرونات بتاعة اليومين دول هل تخلينا نقول للام يا يا مرضع ما تفطري أديله بيبرونة ولا لا؟ ماشي.
طيب، الاثنين ثلاثة اللي سالوا قالوا: طب ما هي المرضع زي نعاها زي الأم ولا إيه مش عارف؟ قال لك: وظِئْرٌ كام. يعني إيه ظئر كام؟ مين الظئر؟ حد يعرف؟ مسموح بالهبد، يعني اللي مش عارف عاوز يهبد يهبد، أو اللي شاكك يعني. وظِئْرٌ كام؟ أحسنت نجوى، الظئر دي اللي هي المرضع بقى اللي احنا هنجيبها ترضع دي ماشي، ظِئْرٌ كام يعني إيه ظِئْرٌ كام؟ يعني لو خافت على نفسها لو خافت على نفسها تقضي فقط، ولو خافت على الولد تقضي ويطعم ولي الولد، ماشي هي دي القصة.
طيب، أه فاطمة بتقول: اللبن الصناعي فيه ضرر. ما هو أنا عشان كده أنا ما عنديش فتوى، ماهو عشان كده عشان كده أنا ما عنديش فتوى، أنا مش بقول أنا مش بقول ينفع وما ينفعش، خلاص دي بحث؛ ابحثوا عنه. ابحثوا يعني إيه؟ يعني تشوفوا علماء اتكلموا في المسألة وعلماء طبعا معاصرين، لأن الببرونات دي ما كانتش موجودة بقى زمان ماشي.
طيب، نقف هنا وناخذ عشر دقائق كده في منهاج القاصدين في أسرار الصوم، بقالنا كتير ما بناخذ أسرار. ماشي، يلا ناخذ أسرار بقى يقول الإمام ابن الجوزي: الحمد لله الذي فتح للمؤمنين باب القرب إلى الجنة فجعل الصلاة لهم صلة، والصوم جنة.
يعني إيه جنة؟ حد يعرف يعني إيه جنة؟ بصوا يا جماعة هقول لكم، يعني طب نسمع الأول وقاية أحسنت. الجيم والنون هتلاقوا دايما احنا عندنا كده في اللغة يعني حاجة كده تسهل عليكم الدنيا شوية، حتى لو أنت مش عارف حاجة ممكن تهبد وتطلع صح لو عرفت الحاجة دي ماشي. الجذر بتاع أي كلمة هتلاقوا دايما الجذور دي بيبقى ليها معاني تحوم حولها أو تطوف حولها. تعالوا ندي مثال عشان نبقى فاهمين به الجيم والنون، هذا الجذر اللي هو جذر الجيم والنون ده هتلاقوه دايما في معنى الستر والخفاء الحاجات دي ماشي.
فأي بقى كلمة هتلاقها مشتقة من الجيم والنون هتلاقي لها أصل يرجع له يدل على معنى الستر، الخفاء كده يعني. فجنة، خلاص وقاية؛ حاجة تحتمي فيها يعني تستخبى فيها، هو ده معنى الوقاية. وجنة، عارفين الجنة؟ قالوا: الجنة ما تسمى جنة إلا إذا كانت أشجارها عالية تستر ما تحتها. فهمتوا يا جماعة؟ يعني أنت لو دخلت هو جنة دي مش لازم جنة الآخرة، يعني كلمة جنة ممكن تبقى في الدنيا يعني، صح صاحب الجنتين في سورة الكهف مثلاً.
امتى نسمي البستان أو الحديقة جنة؟ مش أي حديقة تبقى اسمها جنة، قالوا: لما أشجارها هتبقى عالية تستر ما تحتها تتسمى جنة. والليل يجن مش كده، فلما جن عليه الليل ستره الليل فهمتوا. والجنون، الجنون قالوا: الجنون غياب العقل، فالمجنون اتسمى مجنون لغياب العقل. والجن، الجن اسمه جن عشان ما بنشوفوش مداري عنا. فهمتوا؟
طيب يلا هي معلومة في اللغة، قال: والصوم نقرا بقى كلام ابن الجوزي: الحمد لله الذي فتح للمؤمنين باب القرب إلى الجنة فجعل الصلاة لهم صلة، والصوم جنة، وأعاد بالرياضة النفسَ الأمارة مطمئنة. بالرياضة يعني المجاهدة، تعود النفس الأمارة مطمئنة، فقويت بالمنة عليهم في المجاهدة المنة، وأبعد الكافرين فسلط عليهم الجن الجن يعني فمنعهم الهدى، فقالوا: قلوبنا في أكنة. أحمده على التوفيق لسنن السنة، وأصلي على رسوله محمد؛ صلوا على النبي عليه الصلاة والسلام، أشرف راكب جاذب الأعنة، وعلى آله وأصحابه أولي الفهوم المرجحة -هكذا مش عارف معناها- وأسلم تسليماً كثيراً.
أما بعد، فإن للصوم خصيصة ليست لغيره، وهو إضافته إلى الله عز وجل من بين العبادات حين قال: الصوم لي. والمقصود من هذا الكتاب ينحصر في أربعة فصول: الفصل الأول في بيان فضل الصوم، والثاني في الواجبات والسنن الظاهرة واللوازم بافساد، والثالث في أسرار الصوم وشروطه الباطنة، والرابع في التطوع بالصيام وترتيب الأوراد فيه. طبعا احنا هناخد الفصل الأول والثالث فقط ماشي، لأن ده اللي يعنينا من الكتاب ده، انما احنا بناخد الفقه من الكتاب التاني خلاص.
قال الفصل الأول في بيان فضل الصوم، فذكر بسنده أن النبي صلى الله عليه وسلم قال: «كل عمل ابن آدم يضاعف الحسنة بعشر أمثالها إلى سبعمائة ضعف».
إلى ما شاء الله. يقول الله عز وجل: «إلا الصوم فإنه لي وأنا أجزي به، يدع طعامه وشهوته من أجلي، وللصائم فرحتان: فرحة عند فطره، وفرحة عند لقاء ربه، ولخلوف فم الصائم أطيب عند الله من ريح المسك». والصوم جنة، الصوم جنة خلاص.
الحديث فيه شرف الصوم وفضل الصوم، واختصه الله عز وجل بالإضافة: «والصوم لي وأنا أجزي به». طب هو ربنا الحديث ده بيقول إيه؟ كل عمل ابن آدم له الحسنة عشر أمثالها إلى 700 ضعف. طب إيه ثواب الصوم؟ لم يذكر. ليه؟ لما كان الصوم عبادة خفية، أخفى الله ثوابه. ولما ربنا سبحانه وتعالى يخفي ثواب عبادة، يبقى ثوابها كبير ولا قليل؟ يعني لما يجي ملك من ملوك الدنيا كده يقول إيه اللي هيعمل كذا هدي له 100 دينار واللي هيعمل كذا هدي له 1000 دينار، أما بقى اللي هيعمل كذا فده ليه عندي حاجة ما حدش يعرفها، فاهمين يا جماعة؟ فيبقى معنى كده أن الثواب إيه؟ كبير.
الصوم ليه عبادة خفية؟ لأنها عبادة ترك مش عبادة فعل. يعني إيه عبادة ترك؟ لو إحنا قاعدين مع بعض، اللي عاوز يتصدق واحنا قاعدين مع بعض هيتشاف، عبادة فعل، هيحط إيده في جيبه ويطلع فلوس ويديها لواحد، عبادة فعل صح؟ واحد قال لا أنا عاوز أصلي ركعتين واحنا قاعدين مع بعض، هيتشاف ولا مش هيتشاف؟ هيتشاف، عبادة فعل مش كده؟ طيب واحد واحنا قاعدين مع بعض صايم، يتعرف ولا ما يتعرفش؟ ما يتعرفش؛ لأن الصوم عبادة ترك، هو سايب الأكل والشرب فما يتعرف، فهمتوا؟
فالصوم عبادة خفية، عشان كده والله عز وجل -هذه عادة الله عز وجل- أن العبادة الخفية يخفي ثوابها. فلما كان الصوم عبادة سر، أخفى الله ثوابه هنا أهو خلاص في هذا الحديث، ده يدل على طبعا ذكر بعض ثوابه، لكن ده مش كل الثواب، أن مثلا الجنة في باب الريان يدخل منه الصائمون، إلى غير ذلك ماشي.
هتلاقوا برض المعنى ده فين؟ في قيام الليل، قيام الليل الناس كلها نايمة، أنت قمت لوحدك تصلي ما حدش يعرف عنك حاجة، الصبح رحت الشغل عادي خالص ولا حد يعرف عنك حاجة صح؟ فربنا قال إيه بقى عن قيام الليل: ﴿تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنفِقُونَ * فَلَا تَعْلَمُ نَفْسٌ مَّا أُخْفِي لَهُم مِّن قُرَّةِ أَعْيُنٍ﴾ [السجدة: 16-17].
لما كان برض قيام الليل عبادة خفية، ربنا قال: ﴿فَلَا تَعْلَمُ نَفْسٌ مَّا أُخْفِي لَهُم مِّن قُرَّةِ أَعْيُنٍ﴾، فأخفى الله ثواب عملهم فهمتوا؟
لو قلت صايم، هل كده ده رياء يا شيخنا؟ يعني مجرد القول ماهوش رياء، لكن الأحسن بلاش. حطوا الأكل قولي لا أكلكم وحش مش عاجبني؟ لا طبعا ما حدش يقول كده ها. يعني مش هنقول صايم يبقى إيه نغلط في الناس ونكسر بخاطرهم؟ لا، يعني والله أنا واكلة وأنت واكلة يعني ما فيش حد ما بياكلش، أنت واكلة في السحور. لا والله ده أنا إيه ده أنا اصل أنا في أكل مخصوص ليا بعد شوية، وهو الأكل اللي بعد شوية ده اللي هو على المغرب مثلا كده. يعني نزو يعني من الكلام.
لو صيام سنة، صيام نفل، والناس هتزعل زعل شديد لو ماكلتوش، لا كلوا بقى وتنووا أن أنتوا إيه بجبر الخواطر وادخال السرور على الناس، يبقى تفطروا، تقطعوا الصوم النفل ده وتفطروا ما فيش مشكله خلاص. وأقضي، أقضي ماشي، يعني اليوم اللي أنت فطرته ده تقضيه لو أنت ده يوم في صيامك المعتاد أه تقضيه.
الحديث الثاني: «إن للجنة باباً يقال له الريان، يقال يوم القيامة: أين الصائمون؟ هلم إلى الريان، فاذا دخل آخرهم أغلق ذلك الباب». يا لا شرف الصائمين! عاوزين نصوم يا جماعة، تقوا الله بقى أنا وأنتم ماشي. يعني تخيلوا الشرف كده يلا يا جماعة، إحنا في إيه؟ خلاص بقى كله في يوم القيامة والناس متوترة، وبعدين ينادى أين الصائمون، فقال شرفك لو كنت منهم فتقوم كده لباب في الجنة هتدخلوا منه ويتقفل ما فيش حد تاني يدخل منه، يلا الشرف!
وفي الحديث: «إذا دخل رمضان فتحت أبواب الرحمه وغلقت أبواب جهنم وسلسلت الشياطين». وفي رواية: «فتحت أبواب الجنة»، وفي وفي رواية: «أبواب السماء». متفق على هذه الأحاديث.
شوفوا يا جماعة، بيحصل حاجات في الكون، الكون في حاجات بتغير، يدخل رمضان تتفتح أبواب وتتقفل أبواب وتصفد شياطين، وفي رواية لهذا الحديث: «وينادي منادٍ: يا باغي الخير أقبل ويا باغي الشر أقصر». حاجات بتحصل كده في الكون، استشعروا المعاني دي، يعني استشعر كده توهم هذه المشاهد أن أبواب الجنة تفتح وأبواب النار تغلق والشياطين مردة الجن تصفد، وأن ذلك المنادي ينادي. تخيل هذا المشهد أن ذلك المنادي ينادي: يا باغي الخير أقبل ويا باغي الشر أقصر!
يلي جاي مستني رمضان عشان تتفرج على المسلسلات ولا تتفرج على الفوازير ولا تتفرج على المقالب، أقصر! يلي مستني رمضان علشان الدورة الرمضانية وتروح تلعب كورة في الليل الذي هو أشرف الزمان، أقصر! هو أنت كده باغي خير ولا شر؟ أنت باغي شر، أنت راجل في غفلة ولا اللي مستنيه رمضان عشان تقضي طول النهار في المطبخ؟ ليه بتعمل أصناف أكل ما تعملهاش طول السنة؟ هو رمضان لكده؟ أقصر!
خلاص، وبعدين الحلو خمس ست أصناف كل يوم والعصير خمس ست أصناف كل يوم، وإيه ده؟ في إيه في إيه؟ هو ده رمضان؟ طبعا الرجاله دلوقتي هتضحك، يا شيخ ما تسيبهم يطبخوا لنا احنا؟ لا، الستات تطبخ زيها زي الأيام العادية، وحبذا لو كمان إيه الموضوع خف شوية عن الأيام العادية، خلاص؟
أو أقول لكم حاجة فكرة ذكية للنساء: حاولوا تجتهدوا قبل رمضان في الحاجات اللي ممكن تتعمل، تتبل بتاع وتتشال في الفريزر مثلاً، فكرة أهو ابتدي من دلوقتي، تحطوا كده ليستة بأن أنا إيه يبقى مثلاً أول يوم رمضان هنطبخ كذا، تاني يوم رمضان هنطبخ كذا، وهكذا. لو متعودين تطبخو كل يوم، في ناس مش متعودة على كده هتقول لا أنا بطبخ مرة في كل أسبوعين يعني كل واحد اللي متعود عليه، تقوم تكتب ليستة كده خلاص. يعني في ناس بتطبخ يعني تقول لك إيه بقى الطبخ على يومين، بطبخ ليومين أو لثلاثة، يعني أنت واللي متعودين عليه.
اكتبي ليستة من دلوقتي وانزلي هاتي الطلبات بتاعتها من دلوقتي وتبليها، يعني جهزي ما يمكن تجهيزه خلاص. لو الخضار ممكن يتقطع ويتعمل ويتفرزن ويشال في أكياس في الفريزر وهكذا، بحيث يجي رمضان يبقى سهل أن أنت تطلعي، طب ليه؟ عشان بقيت الوقت عامله إيه؟ قاعدة على المصحف، مش مش بفرغان. علشان تيجي في رمضان تقعدي على الفيسبوك وتقعدي على لا، عشان تقعدي على المصحف ماشي ماشي.
سؤال مهم عمرو: ازاي الواحد يتكتب من الصايمين؟ بصيام الإثنين والخميس والثلاث أيام البيض مثلاً من كل شهر، ضيفوا السؤال ده للبحث ما عنديش جواب، ضيفوا السؤال ده للبحث! يبقى عندنا سؤالين في البحث بتاعنا، عشان أنال هذا الثواب، كأنك بتسأل عن باب الريان، يعني أنا عاوز أكون من هؤلاء يوم القيامة، شوفوا كلام العلما فيه وتناقلوه لنا في البحث خلاص. يا ريت يا جماعه الناس تنشط للأبحاث دي، ده دينك يعني إحنا النهارده دينا بحثين مهمين: بحث في الفقه وبحث أهو في الآداب. سؤال مهم جدا جدا، جزاكم الله خيراً يا عمرو ماشي.
البحث الأول: أه العلماء المعاصرين قالوا إيه في حته الرضاعة الصناعية دي؟ يكونوا من المذهب؟ لا مش شرط، عاوزين فتوى، عاوزين فتاوى، صعب انك تحصل ده من المذهب ماشي ماشي. يعني ما هو ده ضمن البحث برضه، يعني ده ضمن البحث.
يعني كأني هو المقصود الصيام الكتير مع الغفلة عن تجويد الصوم، ولا نصوم قليل ونجود الصوم عشان نخش من باب الريان؟ أولاً أشكر لكم حرصكم أن أنا أه أنا عاوز أكون من دول، إحنا يعني أشكر لكم ذلك، وكل اللي أنتون بتقولوه ده بقى نجوده بمعنى أن أهي هيجي معانا يبقى صومنا ماهوش صوم العموم، لا يبقى صوم الخصوص أو صوم خصوص الخصوص. الصوم ليه ثلاث مراتب هتيجي معانا إن شاء الله ماشي.
يعني أبقى صايمة عن الأكل والشرب وخلاص ولا أجتهد مع ده أن أنا أكف عن المعاصي والخطرات ولا أصوم عما سوى الله؟ ماشي بحث يا جماعه بحث، ما حدش كل واحد يجي له بقى خاطرة يكتبها لي هنا، بحث خلاص. أنت خفيت بقيت هتيجي تطلعه علينا هنا يا علي؟ بحث بحث ماشي.
يلا ماشي آخر حديث عشان ما نطولش عليكم، حديث بأمامة، قلت يا رسول الله -صلوا على النبي عليه الصلاة والسلام-: مرني بعمل آخذه عنك ينفعني الله به. قال: «عليك بالصوم فإنه لا مثل له». نصيحة النبي أهي عليه الصلاة والسلام. فكان أبو أمامة وامرأته وخادمه لا يلقون إلا صياماً، وإذا رأوا ناراً أو دخاناً بالنهار في منزلهم عرفوا أنهم اعتراهم ضيف، أه يعني على طول صايمين.
ماشي نقف هنا عشان ما نسهركوش. ماشي حد عنده أي حاجة؟ الحمد لله ما فيش. سبحانك اللهم وبحمدك، نشهد أن لا إله إلا أنت، نستغفرك ونتوب إليك، السلام عليكم ورحمة الله وبركاته.