الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أم المؤمنين وذريته وأهل بيته، كما صليت على آل إبراهيم إنك حميد مجيد.
أما بعد؛ مراجعة سريعة كده على اللي فاتت كالعاده، أنا هسأل واللي عاوز يجاوب يجاوب على طول. اللي يصوم يوم ثلاثين شعبان ده لغير مستند شرعي، إيه رأيكم؟ لا يجزئه. طيب، واحنا قلنا زي إيه؟ زي إيه كده؟ إيه اللي لغير مستند شرعي ومشهور؟ مشهور عندنا اليومين دول؟ الحساب الفلكي، أحسنتم.
طيب، إيه تاني؟ واحد أنت عارف أنه عدل، وبعدين جه قال لك: أنا شفت الهلال، هلال رمضان، تصوم ولا ما تصومش؟ تصوم. طيب، واحد عدل وجا لك في آخر رمضان، أنا شفت هلال شوال، تصوم تفطر ولا ما تفطرش؟ لا، ما تفطر. لا، ما تفطر خلاص؛ لأن احنا قلنا في كل الشهور لا تثبت إلا باثنين عدول، وبلفظ الشهادة، وكمان بقى خروج الشهر ده في خلاف في مسألة أنه لو الناس ما فطرتش، نفطر ولا ما نفطر؟ يعني لازم يبقوا عند حاكم، حاكم يقول الناس خلاص أفطروا، ولا يعني في قصة هنا.
احنا ما قلناهاش صحيح، لكن على الأقل أنتم عارفين في المعلومات اللي قلناها في أول درس أن شهر رمضان مش هيخرج غير برؤية اثنين، يعني على الأقل المعلومة دي أنتم عارفينها، يعني شهر شوال لا يدخل لا يثبت إلا برؤية اثنين وبشهادة كمان، مش بلفظ الأخبار، بلفظ الشهادة كمان. طيب، دي برضو مسألة خدناها المره اللي فاتت، مسألة خدنا إيه تاني؟
هل تجزئ نية واحدة للشهر كله؟ يعني واحد ينوي في أول رمضان كده أنه هيصوم رمضان كله، تجزئ ولا لازم لكل يوم نية؟ نعم ولا؟ وإيه؟ لكل يوم نية، أحسنتم، كل يوم ليه نيته خلاص. طيب، إيه تاني خدناه وكان مهم؟ ماشي الحال، نكتفي كده ونبدأ بقى النهارده.
قال: ومن راه وحده، فرد، أو راى هلال شوال وحده صام. ومن راه وحده فرد صام، أو راى هلال شوال وحده صام، يبقى دول مسألتين. ومن ده كلام مين اللي بنقراه ده؟ الكلام اللي بنقراه ده كلام مين؟ كلام البهوتي، أحسنت، اللي هو صاحب المتن. بالمناسبه يا جماعة، أنا قريت الأبحاث اللي اتبعتت كلها بدقة شديدة، ما عدا البحث اللي اتبعت النهارده الوحيد اللي يعني مررت عليه سريعا، وباقي الأبحاث كلها قريتها بدقة، وجزاكم الله خيراً، يعني حاجة تثلج الصدر الحقيقة، لو الناس موجودة دلوقتي اللي بعتت الأبحاث فجزاكم الله خيراً، أبحاث جميلة جداً جداً ونافعة، وأنا استفدت منها، واظن اللي بحث استفاد جامد جداً جداً، بالذات في البحث بتاع مرة دي، أظن بحث مفيد.
المرة اللي فاتت يعني عرفوا كتابين مهمين جداً في المذهب، بل هما المذهب إن اتفقا؛ يعني احنا قلنا كتابين هما لو اتفقوا هما المذهب أصلاً، خلاص، ولذلك المسألة أصلاً جت ازاي؟ أن قلت لكم دي مما خالف فيها المنتهى الاقناع، وبعدين قلت لكم بقى في قصة هنا إذا خالف المنتهى الاقناع؛ لأنه لو وافق الاقناع هو المذهب ده خلاص، طب لو خالفه؟ فأظن بقى العمل البحث طلع بإفادات.
طيب، احنا بنقرا كلام البهوتي: ومن راه، يعني من رأى هلال رمضان وحده فأخبر به فرد خبره. المسألة دي جت معانا قبل كده يا جماعة، واحد شاف هلال رمضان لوحده كده ما فيش حد شافه غيره، خلاص، التلسكوبات محطوطه ومش عارف إيه، أنا بدي الصور الواقعية الآن، محدش شاف، راح جاي واحد.
احنا وقفنا هنا يتهيأ لي؟ امال وقفنا فين؟ لا، واقفين هنا. وإن صاموا، ماشي ماشي ماشي يا عمر، عمر الوحيد اللي مصحصح، يعني قال: وإن صاموا برؤية واحد ثلاثين يوما ولم ير الهلال لم يفطروا. صورة المساله يلا ركزوا معايا، خلاص اهو يلا يلا، صورة المسألة بقى: وإن صاموا برؤية واحد ثلاثين يوما ولم ير الهلال لم يفطروا. يعني إيه؟ يعني رمضان في أول الشهر كنا صمنا برؤية فرد واحد، دي مسألة بعيدة دلوقتي؛ لأن كل الدول بتطلع ناس تشوفه، يعني قصة كبيرة، لكن صورة المسألة أن كلنا طلعنا نشوف الهلال، تراءى الناس الهلال، رآه واحد، قمنا برؤية واحد في أول الشهر، في آخر الشهر كملنا رمضان ثلاثين يوم، خلاص؛ لكن ما شفناش هلال، يعني حتى بعد ما كمل رمضان ثلاثين يوم كده بنبص على هلال ما لقيناش هلال شوال طلع، نفطر بكره ولا ما نفطر؟ فهمتوا؟ فقال: لم يفطروا. لا، ما تفطر، ليه؟ لأنك في أول الشهر صمت برؤية واحد فقط.
طيب، مفهوم الكلام ده يا جماعة؟ أن لو كنا صمنا في أول الشهر برؤية اثنين، يعني كان اثنين عدول راوه وأخبروا برؤيتهم له، وصمنا رمضان ثلاثين يوم وبقي ما شفناش هلال شوال، نفطر عادي بقى، خلاص، ده العيد، انما لو كان برؤية واحد بس، فيتهم في رؤيته، قد يكون أخطأ في أول الشهر. مفهومة دي؟ فيتهم في رؤيته، واحتياطاً هنقرا بقى كلام البهوتي على بعضه. بصوا يا جماعة، عشان الدرس ده برضو احنا عاملينه يعني دورة، معلش الناس القديمة تستحمل شوية، الكلام اللي بين أقواس ده يا جماعة، ده المتن، ده كلام الإام البهوتي، والكلام اللي بره الأقواس ده الشرح، كلام واحد اسمه عثمان النجدي، خلاص، فالبوتي بيقول إيه؟ لو هنقرا الكلام على بعضه بقى: وإن صاموا برؤية واحد، أو لغيم، صاموا ثلاثين يوما ولم ير الهلال لم يفطروا، صاموا لغيم.
دي مسألتين: صاموا برؤية واحد ثلاثين يوما ولم ير الهلال لم يفطروا، خلصناها. صاموا لغيم ثلاثين يوما ولم ير الهلال، ده نعمل فيه إيه؟ هنصوم وجوباً بنية رمضان احتياطاً، صح؟ وقلنا المسألة دي من إيه؟ المسألة دي من إيه يلا يا شباب؟ من المفردات، أحسنتم، وبرضه المسلة دي من المسائل اللي طلعت لنا، البحث قلنا دي المسألة من المفردات، ومن المسائل اللي خالف فيها الإقناع والمنتهى.
ماشي، أحسنتم، ودي اللي طلعت لنا البحث اللي طلبناه، والشباب اللي عمله يعني إن شاء الله يكون استفاد، يعني طيب يلا نرجع تاني. يعني إيه من المفردات عشان برضه الناس الجديدة؟ من المفردات يعني يا جماعة، القول ده ما قالوش غير الحنابلة في الأئمة الأربعة؛ يعني الأحناف والمالكية والشافعية ما بيقولوش كده. يلا نرجع تاني، اللي مش فاهم المسائل دي من الناس الجديدة ما يزعلش، يسمع الدرس الأول، كل شيء احنا كنا بنقف عليها وما بنعديهاش، يسمع الدرس الأول بس.
لو صاموا بقى غيم؛ يعني جوم يبصوا على الهلال لاقوا غيم ومطر، واختلفوا في الأخبار، في يا جماعة معلش سحب وبتاع، مش شايفين حاجة، خلاص، الحنبلي هيصوم، أي حد غير حنبلي مش هيصوم بكره؛ يعني لو جوم في الإذاعة قالوا: قالوا إيه يا جماعة؟ احنا جينا نبص لقينا غيم ومطر وسحب ورعد وبرق، ومش عارفين نشوف الهلال، اللي واخد بمذهب الحنابلة هيصوم بكره، بقية الناس مش هتصوم، صح؟ فيش تشدد في المسائل دي وما فيش، ما حدش يعني إيه ما فيهاش لخبطة، بس اللي هيصوم ما يطلعش يقول: أنا صايم ويلخبط الناس.
صمنا، المهم صام الناس، احنا نمنا وصحينا لقينا مصر كلها حنابلة، لقينا مصر كلها حنابلة فصمنا كلنا، لما لقينا غيم كل الناس صامت، صمنا ثلاثين يوم، جينا بنبص ما شفناش هلال شوال، ما نفطر، ما نقولش العيد، ما نقولش ده العيد ونفطر، لا، نصوم تاني، خلاص، نزود كمان يوم، نقول إيه ده؟ احنا هنصوم زيادة، هو في شهر واحد وثلاثين يوم؟ هنقول: ما احنا مش بنقول إن الشهر واحد وثلاثين يوم، بنقول احنا صمنا في الأول أصلاً لغيم مش لرؤية، فهمتوا؟ فلأننا صمنا لغيمة، هنصوم اليوم اللي هو اللي هو واحد وثلاثين، يعني في صيامنا، هنقول احتياطاً لرمضان، ولأننا يحتمل أننا كنا أخطأنا في صيام أول الشهر.
وعشان كده شوفوا بقى عثمان بيقول إيه: وعلم منه أنهم لو صاموا بشهادة اثنين ثلاثين يوماً ولم يروه أفطروا، صحوا كان أو غيماً لما تقدم. لما تقدم، بيقول لك يعني: علم منه اللي قلناه من شوية، لو كنا صمنا بشهادة اثنين، بعد ثلاثين يوم رمضان صيام، هنفطر، سواء بقى السماء صحو، السماء غيم، شفنا هلال، ما شفناش، هنفطر.
قال: ومن راه وحده، فرد، أو راى هلال شوال وحده صام. يلا مسالتين تانيين أهم: ومن راه وحده فرد، يعني واحد شاف الهلال لوحده كده، راح رايح للحاكم أو من أنابه الحاكم، سواء محاكم شرعية، سواء دار الإفتاء، سواء أي حد قاعد بيقول يا جماعة اللي يشوف هلال الهلال يجي يقول لنا، راح رايح لهم، قال لهم: أنا شفت الهلال، ردوا قوله. ردوا قوله ليه؟ مش وقته مش قضيتنا، ردوه لأي حاجة، خلاص، شافوه فاسق مثلاً، مستور الحال بالنسبة لهم، مش قادرين يثبتوا عدالته، أي، ردوا، المهم ردوا قوله، خلاص.
إيه رأيكم؟ شاف الهلال ده، يصوم ولا ما يصومش؟ هو يصوم، أحسنتم، واللي يخبره أنه شاف الهلال ويثبت عنده عدالته، يصوم ولا ما يصومش؟ يصوم برضه، أحسنتم. طيب، اللي رد قوله ده، حتى لو كان فاسق، يصوم هو ولا ما يصومش؟ يصوم، أحسنتم، أحسنتم، يبقى حتى لو هو فاسق يصوم.
نقول: الله، إزاي يصوم ده احنا قلنا لازم عدل؟ نقول: لا، احنا قلنا اشترطنا العدالة في قبول خبره في رمضان، وقبول شهادته في غير رمضان، ماشي، في قبول خبره، يعني احنا اللي ما نصومش على قوله لو هو فاسق، انما هو شب عينه، يبقى هو يصوم ويلزمه جميع أحكام الشهر، فهمتوا دي يا جماعة؟
طيب، وعشان كده قال لك: ومن راه وحده فرد، عثمان بيقول: فرد خبره لنحو فسق، لزمه الصوم، ولزمه كذلك جميع أحكام الشهر من طلاق وغيره معلق به؛ لعلمه أنه من رمضان. آه، يعني لو كان مثلاً علق الطلاق على يوم واحد رمضان، قال لامرأته: يوم واحد رمضان تبقي طالق، خلاص، تطلق في هذه في هذا اليوم، ماشي الحال.
أو راى هلال شوال وحده، طيب، آخر الشهر بقى شهر خلص، ورحنا لآخر الشهر، واحد بس شاف هلال شوال، إيه رأيكم؟ يفطر ولا يصوم؟ لا يصوم، ما يفطر، هو احنا يا جماعة تاني، هو احنا الشهر، أي شهر غير رمضان، بيثبت برؤية واحد؟ ما فيش شهر غير رمضان بيثبت برؤية واحد، هو رمضان بس، خلاص.
يقول لك: الله، أنا شايف الهلال بعيني، هو ده الاشكال دلوقتي، اللي هو عبد العظيم بيقول اهو، يقول لك: أنا شايف الهلال بعيني، نقول له: وإن كان، حتى لو شفته بعينيك، لا يثبت الشهر إلا برؤية اثنين، فهمتوا كده؟ يبقى حتى لو شافه بعينه، يبقى لا يثبت الشهر إلا برؤية اثنين، ده حكم، خلاص.
خلي بالكوا بقى، ده في نقاش تاني بقى هنقوله دلوقتي احنا كنا أشرنا إليه في أول الدرس النهارده، هنقوله دلوقتي اللي هو إيه بقى؟ افترضوا مسألة قالوا: طب اثنين عدول شافوه في آخر الشهر ورد قولهم، ورد قولهم، يصوموا ولا يفطروا؟ دي فيها خلاف في المذهب، ما حدش يرد، ما حدش يرد، فيها خلاف في المذهب، يصوموا ولا يفطروا؟ فيها خلاف في المذهب أصلاً؛ منهم اللي هيقول: إن خلاص طالما هم اثنين عدول وراوا الهلال يبقى يفطروا على القاعدة اللي احنا ماشيين عليها، ومنهم قال: لا، احنا عندنا إن الفطر يوم يفطر الناس، فلو رد قولهم ما يفطروش، يصوموا ويفطروا مع الناس. القولين موجودين في المذهب، مش هندخل فيها؛ لأن مسائل بعيدة مش بتحصل، يا جماعة المسائل دي مش بتحصل، فبلاش مش عاوزين نسهب فيها، احنا بنقف ونفصل ونعمل ونشرح ونعيد ونزيد في المسائل اللي بتواجهنا بتقابلنا.
طيب يا سيدي، قال: وإن ثبتت رؤية الهلال نهاراً، بان قامت البينة في أثناء النهار برؤية الهلال تلك الليلة، أمسكوا وجوباً بقية اليوم وقضوا، أي وجب قضاء ذلك اليوم على من لم يبيت النية لمستند شرعي، كمن بلغ نهاراً مفطراً أو أسلم نهاراً أو طهرت امرأة من حيض أو نفاس بان انقطع دمها نهاراً أو قدم مسافر من سفر حال كونه مفطراً، فيلزم كل هؤلاء الإمساك والقضاء. مسألة مهمة جداً دي يا جماعة.
إيه هي المسألة؟ بيقول لك: لو ثبتت رؤية الهلال نهاراً، هنا ثبتت رؤية الهلال نهاراً، مش الرؤية هي اللي ثبتت (يعني مش الرؤية كانت في النهار، انتبهوا، مش الرؤية هي اللي كانت في النهار، لا، ثبتت رؤية الهلال ليلاً نهاراً). ازاي؟ دلوقتي صعب شوية، انما يعني عشان نتخيلها دلوقتي هيبقى؛ لأننا دلوقتي مع وسائل الاتصال الحديثة كل حاجة بتتعرف في وقتها، انما زمان كان ده متصور آه، الناس قاعدة في المدينة المدينة المشرفه وبعدين اه، كانت ممكن تحصل زمان شوية، يعني قبل عشرين ثلاثين سنة من دلوقتي كنا ممكن نشوفها، انما دلوقتي مع الواتساب، يعني دلوقتي غير متصور إلا لو النت قطع بقى في العالم كله الليلة دي، انما خلونا بس نقول المسألة الأول عشان نفهم، عشان الناس تفهمها، وبعدين نشوف.
دلوقتي ناس قاعدة في المدينة ولا في مكة ولا في أي مكان، طلعوا تراءوا الهلال، ما شافوش الهلال، ما حدش شاف خالص الهلال، والسماء صحو، بلاش نقول السماء غايمة عشان ما نخش في المسألة اللي فيها الخلاف دي اللي هي من المفردات، لا، السماء صحو يا
سيدي، يبقى بكره الناس تفطر ولا تصوم؟ يلا، ردوا عليا. الناس كلها هتفطر، أحسنت عبد العظيم.
الناس فطروا تاني يوم، فناس جايين مسافرين كانوا مسافرين وصلوا، فقالوا لهم: ده احنا شفنا الهلال! اللي هم جايين من على سفر دول وصلوا الظهر ووصلوا العصر، المهم وصلوا بالنهار، قالوا لهم: ده احنا وجايين شفنا الهلال بالليل. خلاص كده فهمتوا؟ يبقى هنا ثبتت رؤية الهلال نهاراً، لكن الرؤية ما كانتش نهاراً. فاهمين يا جماعة؟ فاهمين الجملة دي؟ يعني الرؤية رؤية الليل كانت ليلا،ً لكن ثبتت لنا نهاراً، فهمتوا؟ طيب، ازاي ثبتت؟ عثمان بيشرح بأن قامت البينة في أثناء النهار برؤية الهلال تلك الليلة زي الصورة اللي احنا قلناها دي. خلاص كده نعمل إيه بقى؟ هو ده السؤال. طيب، صورة حديثة بقى، صورة حديثة أن يعني أنا مش متخيل يعني زي ما بقول لكم كده مع وسائل التواصل دي اللي موجودة أن ده يحصل دلوقتي إلا بانقطاع النت، هو دي الحاجة الوحيدة اللي متصورة يعني.
جينا ليلة ٣٠ شعبان دي اتقطع النت عن البلاد مثلاً أو عن بلد بعينها يعني، اتقطع النت والبلد دي قعدت تشوف بوسائل بقية الاتصال بتاعتها؛ هي تلفزيون القناة الأولى والثانية وبتاع إيه ده اللي في حيلتنا دلوقتي لأن إحنا مقطوعين عن العالم؟ صورة بعيدة جداً يعني، لكن عشان نفهمها يعني، فطلعوا قالوا لنا أن إيه: مش شايفين الهلال في مصر، خلاص؟ طيب، وانت راجل حنبلي وعشان أنت حنبلي لو رؤية في أي مكان في العالم هتصوم. المساله دي برضه فيها خلاف، خلاص؟ المساله دي فيها خلاف بلدي، من المفردات عندنا برضه إحنا عندنا يرى الهلال في أي مكان كل الناس تصوم، ماشي؟
طيب، فالنت تاني يوم رجع، بتبص في الرسائل بقى وعالفيسبوك وبتاع، لقيت إيه؟ الهلال رؤية في بلاد تانية حوالينا، خلاص، فكده ثبتت الرؤية نهاراً، لكن الرؤية ما كانتش نهاراً، هي الرؤية كانت ليلاًَ، خلاص بلاش نسهب فيها، صورة بعيدة جداً، يلا نرجع تاني نعمل إيه بقى؟ الصورة خلاص فهمناها، نعمل إيه؟ تمسك وتقضي هذا اليوم. يعني إيه تمسك؟ يعني أول ما تعرف أن النهارده من رمضان تمتنع عن المفطرات، مش عن الطعام، اللي يقول عن الطعام لا مخطئ، تمتنع عن المفطرات، تمسك كأنك صايم؛ يعني عن الطعام وعن الشراب وعن الجماع، تمسك، خلاص.
طيب، تمسك يعني كده اليوم ده يتحسب لي؟ لا، هنقول لك: تمسك وتقضي ذلك اليوم. طيب، تقول: طب أنا طالما هقضي ذلك أمسك ليه؟ هنقول لحرمة الوقت، أحفظوها بقى ماشي؟ لحرمة الوقت، يبقى إحنا أمسكنا لحرمة رمضان، إحنا عرفنا أن من رمضان ما نقعدش ناكل ونشرب ونهيص وهنشوف صور تانية الناس مش عارفاها برضه، خلاص.
طيب، نقرا تاني، نقرا بقى كلام مروان، ما بيلحق يكتب يا عيني، مروان بيشتكي أصلي بيقول لي: أجي اكتب وأبقى محضر كلام كتير، أول ما واحد تاني يكتب يمسح كل الكلام، أنا مش عارف ده بيحصل للناس كلها ولا إيه مش عارف؟ كان بيشتكي وعاوز نقلب على على الزوم بدل التليجرام، فبيقول لي: كل ما أجي اكتب حاجة أبقى محضر كلام قد كده، ويجي واحد بس يبتدي كتابة من من أي من الناس التانية كل الكلام اللي كتبته ويتمسح. الكلام ده بيحصل لحد تاني يا جماعة؟ لا، سيبكم من بيوصل متاخر، مش مش مهم يوصل متاخر، الفكرة أن أن ممكن واحد يبقى قاعد بكتب كلام كتير، ومجرد ما واحد تاني يبتدي كتابة يتمسح كلامه.
طيب يعني بيحصل مع اتنين تلاتة؟ والنادر لا حكم له، دي قاعدة فقهية عندنا ماشي، النادر لا حكم له، فأنتم كده نادر اهو، مروان دلوقتي بيحاول يكتب وبرضه بيتمسح. طيب ماشي، يلا نكمل، طيب خلونا بقى على التليجرام، هو التليجرام -طبعاً- ميزته الوحيدة، هو الزوم أحسن في التواصل الحقيقة، لكن التليجرام الميزة الوحيدة أنه بينبهك ولا بتاع أن في درس شغال، الزوم لو فاتتك الرسالة بتاعة الزوم بيفوتك الدرس، فكان ناس كتير اشتكت -إحنا كنا زوم الأول- وناس كتير اشتكت قالوا: خلونا تليجرام أحسن، علشان إيه هو اللي بينبهك يعني، بيجيب لنا رسالة أن إيه أن الدرس شغال.
يلا طب نكمل، يلا قال: «وإن ثبتت نهاراً»، هنقرا كلام البهوتي لوحده بقى: «وإن ثبتت نهاراً أمسكوا وقضوا»، فهمناه. قال لك: «كمن بلغ، أو أسلم، أو طهرت من حيض أو نفاس، أو قدم من سفر مفطراً».
فهمنا جداً، يلا بقى نشوف الصور دي عشان هنعمل ده، بيقول لك: «كمن بلغ»، يبقى واحد لم يبلغ، خلاص، اللي لم يبلغ ده يا جماعة له صورتان، ماشي، وهنا الترتيب الحقيقة كان ممكن يكون أفضل من كده، لكن مش وقت مش وقت أن نناقش الكلام ده، خلونا نقرا الكلام ونفهمه وخلاص. قال: «كمن بلغ»، يبقى واحد ما كانش بلغ، إحنا عندنا الإنسان يبلغ بكم حاجة؟ حد يعرف؟ تلاتة لو راجل ولو ست، لو بنت؟ خمسة، أحسنت، الناس بتوع الأكاديمية طبعاً شاطرين، وأيه طيب؟ تلاتة لو راجل، لو راجل يبلغ بواحدة من تلات، يعني مش تلاتة يتحققوا والتلاتة مع بعض، لا، واحدة من تلاتة يبلغ بها الرجل اللي هم إيه؟ طبعاً هما قاعدين بيكتبوا دلوقتي، أنا رأيي أبعث على طول اللي كتبته يا مروان، يعني ما تستنى.
أما الإنزال مش لازم احتلام، انزال سواء في يقظة أو مناماً يعني، أما الإنزال وأما بالإنبات، قولُوها كده بالإنبات، عشان الإنبات ده في نقاش ونقول إنه لازم شعر خشن ينبت حول العانة، المهم الإنبات يعني احفظوها كده، يبقى انزال أو إنبات أو بلوغ ١٥ سنة، خلاص، دول التلاتة اللي يتفق فيهم الرجال والنساء، يعني الرجل أنزل أو أنبت أو بلغ ١٥ سنة، يبقى بلغ.
تاني، الكلام ده مهم يا جماعة، واحد بلغ ١٥ سنة ولم ينزل، هو بالغ ولا مش بالغ؟ ردوا عليا. واحد اه، واحد وصل ١٥ سنة ولو لم ينزل هو بالغ، خلاص. واحد أنبت؛ يعني طلعله شعر خشن حول العانة، وهو لا بلغ ١٥ سنة ولا أنزل، لكن طلعله الشعر الخشن اللي حول العانة ده، يبقى بلغ ولا ما بلغش؟ ردوا عليا، أنا سيبكم من خلاص إحنا أنا عارف أن أنتوا شطار واللي كانوا معايا في الأكاديمية خلاص، فرودة، يبقى بلغ أحسنت، خلاص.
طيب، المرأة تزيد بحاجة من اتنين، ماشي، اللي أنا قلته كل اللي قلته ده يا جماعة يستوي فيه الرجل والمرأة، المرأة أنزلت، المرأة أنبتت، المرأة بلغت ١٥ سنة، كل ده تبلغ به المرأة برض، خلاص. طيب المرأة بقى تزيد حاجتين معانا: الحمل والحيض، يعني امرأة حاضت يبقى بلغت، امرأة حملت تبقى بلغت، فهمتوا دي؟
طيب ١٥ سنة، سؤال هيجاوب بتوع الأكاديمية إن شاء الله، ١٥ سنة اللي سهل، طبعاً السؤال الأول ده سهل، هجرياً ولا ميلادياً؟ هجري أحسنت، تقريباً ولا تحديداً يعني؟ ١٥ سنة إلا يوم، ١٥ سنة إلا إلا ساعتين تلاتة مثلاً، تحديداً، ماشي. طب مين الشاطر -بس ده يعني ده غالباً الأكاديمية بس اللي هيجاوب يعني ده- مين الشاطر اللي يقول عرفنا من أنه تحديداً من كلام فقهاء فين؟ قالوا إيه؟ حد يعرف؟
الصلاة، أحسنت يا مروان، أحسنت، أهي الكلية دي يا مروان تخليني مش هروحلك للزوم، أجيب أديك الدرس في البيت كمان. في الصلاة قالوا، قالوا إيه بقى الفقهاء؟ قالوا إيه في؟ قالوا: لو بلغ أثناء الصلاة الفقهاء نص في الكتب عندنا، قال: لو بلغ أثناء الصلاة بأن بلغ ١٥ سنة، يعمل إيه في الصلاة؟ مش وقته دلوقتي يعمل إيه في الصلاة، لكن ده ينبهنا، ده ينبهنا على أن مسألة ١٥ سنة دي يبلغها تحديداً.
طب ده يخلينا نعمل إيه بقى؟ الاباء والامهات اللي معانا دلوقتي ركزوا، ده يخلينا نعمل إيه؟ لما تخلف حضرتك تسجل اليوم هجري والوقت اللي اتولد فيه ابنك أو بنتك، خلاص، وإن كان في مصر الحمد لله يعني ما بنحتاجش المساله دي لأن غالباً الولاد والبنات عندنا بيبلغوا بدري عن ١٥ سنة، يعني يعني نادر قوي تلاقي في مصر واحد وصل ١٥ سنة ولم ينزل، أو بنت وصلت ١٥ سنة ول ولم تحض، ده مش يعني نادرا لما تلاقي ده، فالحمد لله طبعا ده بيختلف من بلاد لبلاد على حسب بقى إيه جينات الناس وعلى حسب البروده درجة حرارة البلاد يعني، قالوا في تفاصيل كده بيختلف بها البلوغ من بلد لبلد يعني.
خلاص، لكن على كل حال خلوا دي معاكوا كده على جنب، الشباب اللي اتجوز أو اللي لسه ماتتجوزش لما تبقى تخلف، سجل تاريخ ولاده ابنك أو بنتك بالهجري والساعة اللي اتولد فيها الوقت بالضبط اللي اتولد فيه علشان لو حصل في المستقبل وانه بلغ ١٥ سنة وما كانش لا أنزل ولا أنبت، تبقى عارف بالضبط إمتى بلغ، طب وأنا أعرف بالضبط ليه؟ في أحكام هتنبني عليها مش وقته نخش فيها دلوقتي.
خلاص يا جماعة، نرجع تاني، واحد بقى بلغ نهاراً، يعني إيه بلغ نهاراً حضرتك؟ يعني حضرتك ابنك أو لو واحد معانا لسه صغير دلوقتي بيسمع الدرس، أنت أو أنت أو أو بنتك أو أي كان، قام -أهو إحنا في رمضان اهو- قامت ظهر العصر من النوم، لقى نفسه احتلم، دي الصورة المشهورة المنتشره عندنا في مصر، بلاش نخش بقى في الصورة التانية، أو البنت قامت لقت نفسها نزل عليها دم الحيض، فنقول إنه بلغ أثناء الايه؟ أثناء النهار، صح كده؟
هذا الذي بلغ أثناء النهار -سيبكم من الحيض دلوقتي- هو قام لقى نفسه محتلم أو هي قامت لقت نفسها محتلماً، ده لا يخلو من حالتين، ركزوا بقى معايا، لا يخلو من حالتين: أما أنه أصلاً صايم، واما أنه مش صايم، صح كده ولا لا؟ يبقى لو عملنا تفريعه كده، واحد بلغ فاما هتعمل سهم يمين وسهم شمال، أما أنه كان ناوي الصيام من بالليل، واما أنه إيه؟ لا، ده مفطر، ماهوش ناوي الصيام، خلاص.
طيب، لو ماهوش ناوي الصيام من الليل ومفطر، يعمل إيه؟ اللي هو السهم اللي ناحية الشمال، إحنا أخرنا السهم الأولاني لأن أصلاً الصورة اللي معانا السهم التاني: يمسك، أحسنت، يمسك ويقضي، أحسنت، ودي المسألة اللي معانا أصلاً، يبقى واحد بلغ أثناء النهار وما كانش صايم، أو واحدة بلغت أثناء النهار وما كانتش صايمة، ده أو دي هيمسك باقي اليوم، لا ياكل ولا يشرب ولا يجامع، ويقضي، ماشي.
لو كان صايم، السؤال هنا طبعاً: لو كان صايم هيكمل صيامه؟ ما فيهاش مشكلة، يجزئ هذا اليوم عن رمضان؟ هذا هو السؤال، يجزئ ولا لا يجزئ؟ ومسموح بالهبد، مروان بيقول: ده صومه نفل، هو لما كان صايم كان صايم نفل، لأنه ما... صح كده؟ في المذهب: يجزئه.
يبقى لو لو هو إحنا بنقول إيه؟ لو كان صايم و وبلغ أثناء النهار وبلغ أثناء النهار يجزئه؟ آه، يجزئه، خلاص، يكمل يومه ده ويجزئه.
ناخد المسألة اللي بعديها، يبقى دي فهمناها خلاص اللي بلغ دي، ودي مسألة بتحصل؟ آه، بتحصل، عشان كده إحنا طولنا فيها، «أو أسلم نهاراً»، واحد كان كافر، حد كافر هنا ولا نعدي المسالة يمكن حد كافر و... طيب، واحد أسلم نهاراً، دي ما فيهاش بقى كان صايم، يعني هيصوم ليه ده يعني ما... واحد أسلم نهاراً يمسك، خلاص، يبقى واحد جى قال يا جماعة أنا عاوز أسلم وبعدين أسلم وهو بالنهار، أسلم في نهار رمضان، نقول له: امسك بقى سائر اليوم وبعدين إيه؟ تبقى تقضي اليوم ده، واضحة دي؟
«أو طهرت من حيض أو نفاس»، يبقى امرأة كانت حائض أو امرأة كانت نفساء، خلاص، في أثناء النهار طهرت من الحيض. المراه اللي تطهر من الحيض دي أثناء النهار لا تخلو من حالتين، أما أنها كانت صايمة أو لا، صح كده؟ غلط في وشي كده، أيوه، لا فعلاً، أيوه، أنتوا صاحيين كده، المرأة الحائض مش هتكون صايمة، ماشي، مش زي الطفل اللي بلغ، ركزوا كده كويس أن أنتوا صاحيين، يبقى هنا في الحالة دي ما عندناش غير مسألة واحدة، اللي هي امرأة طهرت من حيض أو نفاس، يبقى دي هتمسك؛ لأن دي ما ينفعش تكون صايمة أصلاً، دي هتمسك باقي اليوم وتقضي، مفهومة دي؟ سهلة دي برضه.
يبقى برضه النساء تنتبه للمعنى ده، المرأة اللي هتطهر في أثناء النهار ما تقعدش تاكل وتشرب وتهيص، تمسك لحرمة الوقت، تمسك سائر اليوم وتقضي هذا اليوم، فهمتوا؟
قال: «أو قدم من سفر مفطراً»، وعشان كده قلنا لكم هنا الترتيب كان ممكن يأتي على وجه أحسن من كده شوية؛ لأن في مسائل هنا هيبقى فيها صورتين، وفي مسائل فيها صورة واحدة، فلو جمعنا المسائل اللي كان فيها صورتين مع بعض، وجمعنا المسائل اللي فيها صورة واحدة مع بعض كان أولى.
تعالوا نشوف الصورة دي بقى: «أو قدم من سفر مفطراً»، دلوقتي واحد على سفر، واحد من القاهرة خلاص كده، وهو في طريقه للقاهرة هو مفطر، وصل القاهرة، دخل القاهرة بقى الساعة ١٢ الظهر، الساعة... المهم يعني وصل زي ما وصل الصبح، خلي بالكم، المسافر ده كان مفطر الأول، المسافر ده قبل ما كان مفطر دي، المسافر ده اللي وصل القاهرة لا يخلو من حالتين، صح كده يا جماعة؟ أما أنه كان صايم، يعني وهو هو صحيح مسافر، لكنه لم...
يفطر ماشي، فهو صائم. طيب، لو كان صائماً ووصل؟ نقول له: أنت لسه بمزاجك، ممكن تفطر ولا إيه رأيكم؟ لا، خلاص هيكمل اليوم، وهذا اليوم طبعا يجزئه، خلاص هو صار مقيماً، خلاص خلاص.
طيب، لا لا لا، مش يلزم عليه الإمساك ده، دا راجل صايم أصلاً. المسافر ده صام يعني هو مفطرش أصلاً، يعني هو صحيح مسافر، لكن هو بيقول: أنا في رمضان أنا هصوم. فهو جاي وصل بلده لو هو من القاهرة، وصل القاهرة صحيح اتناشر الظهر، لكن هو كان صايم ناوي صيام رمضان عادي خالص. فنقول له: كمل يومك ويجزئ، خلاص كده.
طيب، الصورة الثانية: أن المسافر ده قال لك: لا، أنا مسافر واخد برخصه السفر. خلي بالك، احنا هننقل المسألة دي أصلاً، مسألة رخصة السفر، وهنتكلم فيها؛ لأن فيها قصة شوية. فهو كان مفطر وهو في الطريق، بياكل ويشرب عادي، وصل بلده اللي هي القاهرة في الصورة بتاعتنا دي، لو أنت قاهري، وصلت القاهرة وأنت كنت وأنت مسافر كنت بتاكل وتشرب عادي.
طيب، نقول إيه؟ وصلت القاهرة دلوقتي؟ اه وصلت القاهرة وأنت مفطر، تفضل تاكل وتشرب ولا نقول لك تمسك؟ هنقول لك تمسك وتقضي ذلك اليوم، خلاص.
طيب، هنا أخوكم بيقول: البهوتي بيقول غير كده؛ لأن هو ما فصلش. طيب، تعالوا نقرا كلام عثمان بيقول: وكذا لو برئ مريض مفطراً. وكذا لو برئ مريض مفطراً، دي صورة تانية، طيب وبعدين، هنشوف اللي هيرد على كلام أخيه. كذا لو برئ مريض مفطراً؛ واحد مريض فكان يجوز له أنه يفطر، فهو مريض كان بياكل ويشرب، خف بالنهار، خف بالنهار من المرض اللي فيه ده، يقول: خلاص أنا بقيت أنا مفطر، فهل اليوم أكل وأشرب وهيص؟ نقول له: لا، تمسك، تمسك وتقضي ذلك اليوم، خلاص.
نكمل كلام بقى عثمان، قال: فإن كان صغير ومسافر ومريض صائمين، صائمين عفوًا، فإن كان صغير ومسافر ومريض صائمين أجزأهم. صورة المسألة اللي عاوز يقولها عثمان: إن كان الصغير صائماً فبلغ، يجزئ ولا لا يجزئ؟ يجزئ. وإن كان المسافر صائماً فأقام أو فقدم، هم يقولوا أقام أو قدم، الاتنين يجزئ ولا لا يجزئ؟ يجزئ. وإن كان المريض صائماً فبرئ، يجزئ ولا لا يجزئ؟ يجزئ. فهمتم كده الإمساك وجوباً؟ اه اه، يمسك وجوباً.
طيب، فهمتوا يا جماعة الصور دي كلها؟ صور بتقابلنا وبنعيشها بقى، فلو سمحتوا نبقى ضابطين المسألة دي.
طيب، بصوا بقى يا جماعة، عاوزين نتكلم شوية في مسألة السفر دي الله يكرمكم؛ علشان ما تبقاش لنا إشكال. أولاً، قبل ما أتكلم في مسألة السفر، فأنا هقول لكم على حاجة كده على جنب؛ عشان اللي مش عاوز يطول في المسائل: ما تفطرش وأنت مسافر. تقول: الله، دا أنت بتخالف مذهب الحنابلة! أقول لك: أنا ما بخالفش مذهب الحنابلة، وهفهمكم في ده دلوقت، بس عشان اللي مش عاوز تفصيل يعني. ماشي، لو أنت مسافر وتقوى على الصوم، صم، في رمضان طبعا خلاص، وهذا مذهب الأئمة الثلاثة.
وهذه المسألة عندنا من المفردات؛ مسألة أن المسافر يفطر ويكره له الصوم، ده ده المذهب، خلاص، هذه المسألة من المفردات، خلافا للأئمة الثلاثة. فاحنا والشافعية والمالكية يقولوا لك: لو أنت مسافر تقدر على الصوم، صم. خلاص، مين بقى يقول قاعدة هنا حلوة كده تخلينا نصوم لما بعد ما اللي عرفتوه ده؟ يلا، مروان بيكتب اهو، حد يدخل يقطع على مروان! ها، في انتظار الجهابذة. الناس بتسابق الخروج من الخلاف أحسن من الوقوع فيها.
أحسنت، فأنت اخرج من الخلاف. الخروج من الخلاف أحمد من الوقوع فيه، فدي أول مسألة. تقول: الله، أمعنى يعني دي يا شيخ؟ أنت عمال تقول لنا المفردات وعمال تدافع عن المفردات! أنا ما بدافع عن المفردات، لكن يا جماعة لابد أن تخطط لدينك، بنتكلم في صوم وفطر وقصة كبيرة، فلما نجي نقول المسألة فيها خلاف والجمهور أكثر أهل العلم على خلاف ذلك القول، فتخاف، ما تتجرأ على دين ربنا سبحانه وتعالی، دي أول مسألة.
طيب، نرجع تاني، قلنا إن مذهب الحنابلة ده صحيح، لكن شوفوا كده الحنابلة قالوا إيه بقى، ركزوا في اللي هقوله ده يا جماعة. الحنابلة قال لك: إن علم مسافر، أصلاً إيه اللي جاب الكلام ده؟ إيه اللي بنقوله دلوقت الأول يا جماعة؟ عشان احنا نقول مسالتين عشان نفهمهم، لابد نفهم السفر زمان كان شكله إيه، والسفر دلوقت شكله إيه؟ دعكم الآن من المشقه وعدم المشقة؛ لأن الحنابلة ينص على أن ده المذهب، وإن لم تكن مشقة، مش بتكلم في المشقة وعدم المشقة، لكن بتكلم في المدة، في المدة. حضرتك النهارده بتسافر في ساعة وساعتين وثلاثة وتكون وصلت، زمان ما كانش فيه كده، زمان كانت أيام وليالي، استحضرو المشهد ده في دماغكم.
طيب، تعالوا كده نقرا المسألة دي، قال: إن علم مسافر أنه يقدم غداً لزمه الصوم. يعني إيه؟ يعني إيه المسألة دي يا جماعة؟ يعني واحد مسافر وعارف، عارف أنه هيوصل بكره الصبح، قال لك: لازمه الصوم. تقول: إيه ده؟ إيه ده؟ لا استنى بقى، خلي بالكم، لو بتسقط على سفر اليومين دول، الكلام هنا على صيام اليوم الذي سيصل فيه لبلده. إيه، أحسنت، أو أو يصل فيه لبلد آخر، لكن هيبقى فيها لا، يقصر. إزاي؟ أنه عارف أنه هيقيم في البلد دي، لفظ الإقامة عندنا اللي هو هيفضل إيه، أكتر من عشرين صلاة.
ماشي كده؟ يعني تاني، يعني الصورة دي واحد، أحسنت، إيه، يبقى واحد مسافر، واحد قاهري، صاحبنا القاهري ده تعبينه معانا، عارف أنه هيوصل القاهرة بكره الصبح. الصبح في أي وقت يعني، هيوصل بعد الفجر، هيوصل بعد الظهر، المهم هو عارف أنه هيوصل القاهرة بكره الصبح. المذهب يقول لك: يلزمه الصوم.
يلزمه الصوم؟ إيه ده؟ إيه ده؟ إيه ده؟ لا، ثانية كده يا شيخ معلش، دا معنى كده أنه هيكون في وقت من الأوقات مسافر ونقول له تصوم وجوباً؟ اه، اللي هو أمتى؟ اللي هو من الفجر لغاية ما يوصل. صلوا على النبي، صلوا على النبي عشان تفهموا الصورة. ماشي، طيب، كله صلى على النبي خلاص، عليه الصلاة والسلام.
واحد السفر بتاعه واخد ست ساعات مثلاً يعني، طيب، الست ساعات دول هيبدأ مثلاً الساعة ثلاثة الفجر، والفجر بيدن خمسة، فهو أنشا السفر... الصوت قطع عند كل الناس. طيب، يا جماعة، الصوت كده رجع،ها؟ طيب، والشير معاكم وكله زي الفل؟ طيب، نرجع تاني يا جماعة، واحد مسافر سفر هياخد ست ساعات في سفر، خلاص، وراجع، راجع بلده بقى خلاص، راجع بلده اللي هو القاهري ده، راجع القاهرة تاني، أو مسافر بلد تانية بس قاعد فيها أسبوع، أسبوعين، والسفر ياخد ست ساعات، هينشئ السفر الساعة ثلاثة الفجر، الفجر بيأذن خمسة الفجر، خلاص كده.
فلما تيجي عليه خمسة الفجر دي، هيكون هو في الطريق ولا هيكون وصل؟ أنا بسال أسئلة يعني سهلة علشان بس الناس يعني إيه تبقى معانا بس في الطريق، خلاص كده. يعني هو لسه اسمه مسافر اهو، صح ولا لا؟ يعني هو في الطريق هيقعد أربع ساعات اسمه مسافر، اسم مع إن اسمه مسافر، لكن نقول له: طالما أنت تعلم أنك تقدم غداً، يعني أنت عارف انك هتوصل تاني يوم الصبح. طيب، دي العلماء بيُبنونها على قاعدة عندنا يا جماعة، ركزوا بقى معايا كده، أظن الصورة واضحة، بيُبنونها على قاعدة إيه؟ أنه لو في عبادة عندنا، ركزوا معايا في القاعدة دي، قاعدة مهمة؛ لأن برضو بتقابلنا في الصلاة وفي غير الصلاة كمان، زي مده المسح على الخفين، زي... يعني بتتقابلنا في كذا مسألة أو كذا عبادة، وهي أنه لو عندنا عبادة، والعبادة دي يختلف حكمها في الحضر والسفر، تاني، عندنا عبادة يختلف حكمها في الحضر والسفر، واجتمع فيها حضر وسفر، غلب جانب الحضر. إيه ده؟ إيه ده؟ إيه الكلام اللي أنت بتقوله ده؟ هفهمكم بقى.
عندنا عبادة، هقولها تاني، يختلف حكمها في الحضر والسفر، واجتمع فيها حضر وسفر، يغلب جانب الحضر. خلاص، القاعدة كده، كتبتم القاعدة؟ مش فهمتم القاعدة؟ أنا فهمكم القاعدة دلوقت، لكن اللي عاوز يكتب كتب. يلا نفهم بقى القاعدة، يعني إيه الكلام ده؟ هقول لكم يعني إيه.
حضرتك الصلاة، الصلاة حكمها بيختلف من الحضر للسفر ولا حكمها واحد؟ اه، حكمها بيختلف، لو في الحضر هتتم، لو في السفر هتقصر الصلاة. طيب، أنشأت صلاة، يعني إيه أنشأت صلاة؟ يعني حضرتك كبرت كده تكبيرة الإحرام، واقف بتصلي فين؟ على الدابة اللي أنت مسافر عليها، لو في سفينة مثلاً، سفينة أو طائرة... الصوت قاطع، أنا عندي صوت، المفروض الصوت يكون شغال تمام.
طيب، اللي عنده صوت فيه مشكله يراجع بقى، يلا يا جماعة بس ركزوا معايا، نرجع تاني، نرجع تاني. عبادة يختلف فيها الحكم من الحضر للسفر زي، زي الصلاة قلنا خلاص. طيب، إيه الحكم بتاع الصلاة لو حضرتك في الحضر؟ هتتم الصلاة، لو في السفر؟ هتقصر الصلاة.
طيب، حضرتك في سفينة دلوقت أو في طائرة، وقمت افتتحت الصلاة، افتتحتها وانت لسه في بلدك، فمشيت السفينة أو اقلعت الطائرة. خلي بالك، بغض النظر يا جماعة، احنا هنعتبر أن المطار أو الميناء جوه البلد؛ عشان نخرج من قصة أن المطار أصلاً بيكون خارج البلد؛ لأنك فارقت عامر البنيان، لكن عشان ما نتخبطش، هنخيل كده أن المطار زي مثلاً مثلاً المطار اللي عندنا في إسكندرية اسمه مطار إيه اللي جوه البلد ده؟ اسمه مطار إيه؟ نعتبره، شغال لسه مش فاكر اسمه مطار إيه اللي في إسكندرية ده؟ مش برج العرب، أو مطار إمبابه، ماشي، أو مطار عندنا مطار في إسكندرية كده اللي هو اسمه مطار النزهة، ايوه، مطار النزهة مثلاً ده جوه البلد، خلاص، أو مطار إمبابه زي ما أخوكم بيقول كده، أو مطار ألماظة مثلاً برضو اهو جوه البلد.
فواحد مسافر من المطارات دي كده، المهم مطار جوه البلد يعني، فابتتدى الصلاة وهو جوه بلده اهو خلاص، وهو بيبتدي الصلاة كده وهو عارف أن الطيارة هتطلع وهتقع في الجو، وهو أثناء الصلاة هيبقى مسافر؛ لأن الطيارة دي هتطلع بره بلده خالص. إيه رأيكم الصلاة دي دلوقت يصليها، يتم هذه الصلاة ولا يقصر الصلاة؟ يتم، ليه؟ لأنها عبادة، عبادة يختلف حكمها حضراً وسفراً، واجتمع فيها الحضر والسفر، فنغلب جانب الحضر. فهمتوا دي؟
طيب، صورة تانية، واحد بدأ نفس الصورة بقى لو العكس كمان، هو بدأ الصلاة في السفينة وهو مسافر، وعارف أن السفينة هتوصل بلده وهو أثناء الصلاة، يبدا الصلاة دي أربعة ولا اتنين؟ يتم برضو.
طيب، ناخد صورة تانية بقى، ودي اللي ممكن تقابلنا، الصورة اللي بنقولها دي صورة بعيدة جداً أنها تقابلنا، لكن الصورة اللي هنقولها دلوقتي دي صورة اه ممكن تقابلنا، اللي هي إيه؟ حضرتك هتبدا مسح على الخف بتاعك أو على الجورب على قول الحنابلة؛ لأن برضو يا جماعة خدوا المسألة دي على جنب كده، ما أعرفش احنا ما جتش معانا لكنها هتيجي: نصيحة، ما حدش يمسح على الشراب بأي صفة كان، أيضاً خروجاً من الخلاف، ده نصيحة يعني، ماشي؛ لأن ما حدش قال بجواز المسح على الجورب إلا الحنابلة، ولما قالوا كده قالوا بشروط برضو في الجورب ده، لكن مش هنخش فيها دلوقت، ماهيش مسألة خلافاً للأئمة الثلاثة، الأئمة الثلاثة أصلاً لا يجيز... الأئمة الثلاثة لا يجيزون المسح على الجورب أصلاً، ماشي، من بابه كده.
أمال مين اللي أجاز؟ الحنابلة بشروط لهذا الجورب، طيب، إذا تحققت الشروط في الجورب، لو ما فيش، ما أنتش محتاج للمسح، أنصحك ما تمسحش، أنصحك يا جماعة، احنا بنتكلم في عبادات كبيرة، يعني احنا بنتكلم في عبادة اللي هي الصلاة، جمهور الأئمة هيقول لك: صلاتك باطلة، والحنابلة هيقولوا لك: حتى لو أنت حنبلي، أنا دلوقتي بتكلم بقى إيه؟ واحد بقى حنبلي صرف، ماشي، لا مش وقته، مش هنتكلم، مش مسألتنا هنا، لكن واحد حنبلي صرف ولا يخرج عن المذهب، إيه رأيكم هو واخد بالمذهب من أوله لآخره كده ولا يخرج على المذهب في أي مسألة؟ برضو أقول له في هذه المسائل: احتاط لدينك، احتاط لدينك.
خلاص، طب عمل ده؟ مش هقول له صلاتك باطلة، ما ينفعش أقول له كده، دا راجل خلاص واخد بالمذهب، واخد بفتاوى أهل المذهب، فما ينفعش أقول له صلاتك باطلة، ما ينفعش، لكن عندنا دين بقى يعني لازم يكون عندك نوع من الديانة، نوع من الورع، نوع من كذا، لكن أنا لا ألتزمك بهذا، ما أقولكش وجوباً تاخد بقول خلاف المذهب، لا ما ينفعش أقول لك كده برضو، واضح يا جماعة؟
طيب، نرجع تاني، واحد بيمسح على الجورب أو على الخف، فبدأ وهو مقيم، فبدأ هو مقيم، المفروض لو أنت مقيم تمسح عليه مده قد إيه؟ ها، يوم لليلة، خلاص، لو أنت مقيم هتمسح يوم وليلة. ثلاثة أيام؟ إزاي بس؟ لا، ه يوم وليلة. طيب، فبدأت المسح وأنت مقيم، يبقى مسحت على الجورب وبعدين سافرت، لو أنت مسافر المفروض تمسح قد إيه؟ ثلاثة أيام بالليالي، طيب، بدأت المسح وأنت مقيم وسافرت، هنقول لك: هتتم مسح مقيم ولا مسح مسافر؟ يعني هتمسح يوم وليلة ولا ثلاثة أيام؟ أنت الآن مسافر اهو، هنقول لك: يوم وليلة وتقلع الشراب، ليه؟ عبادة اجتمع فيها حضر وسفر، واختلف حكمها حضراً وسفراً، فيغلب جانب الحضر. مش هنتكلم أكثر من كده في المسح، ندخل على الصوم بقى، نقرا مسألتنا هنا كده، بيقول لك: إن علم مسافر أنه يقدم غداً لزمه الصوم، تقول
الله، أنت هتلخبط ليه؟ ما هو اسمه في الثلاث أربع ساعات دول، ليه يلزمه الصوم؟ عبادة اجتمع فيها حضر وسفر، واختلف حكمها حضراً وسفراً، فيغلب جانب الحضر. وضحت المسألة دي يا جماعة؟ وضحت المسألة دي؟
طيب، قال: «لا صغير علم أنه يبلغ غداً» لعدم تكليفه. طيب، خلوا بالكم بقى هنا، خلوا بالكم هنا عشان ننشط الأذهان. ماشي، هو بيقول لك إيه؟ «لا صغير علم أنه يبلغ غداً» لعدم تكليفه، يعني إيه؟ يعني واحد صغير وعارف إنه بكرة هيبلغ، نقول له: لازم تصوم؟ أنا بقى سؤالي مش هنا، هي واضحة نقول له: لا، مش لازم. سؤالي مش هنا، السؤال بقى: إزاي يعرف إنه هيبلغ غداً؟ أحسنتم، غير متصورة غير في الصورة دي، لأن ما فيش حد هيعرف إنه هيبلغ غير إنه بكرة هيتم ١٥ سنة هجرية، فهمتوا دي؟ فمش متصورة غير كده.
طيب، نكمل. لا لا، المسائل دي في كل الشهر، كل الشهر. طيب، نكمل تاني، قال: تعبتوا؟ احنا كده بقالنا ساعة، نقف هنا ولا إيه؟ نقرا المسألة دي ونقف عليها. هناخد آخر مسألة: «ويلزم الصوم كل مسلم مكلف قادر». ماشي، يعني لو تكتبوهم كده بين قوسين (غير حائض ونفساء) يبقى ماشي الحال برضُه، ماشي. ويلزم الصوم كل مسلم مكلف قادر، ويؤمر به (للمفعول به، أي الصوم) صغير يطيقه. وهذا الأمر على الوجوب، انتبهوا، انتبهوا، الأمر واجب. صوم الطفل مستحب، وامر وليه له واجب، فاهمين دي يا جماعة؟
وهذه المسألة تماماً كالصلاة، ركزوا في اللي هقوله ده؛ لأن كلام مهم جداً جداً جداً. حضرتك عندك ابنك سبع سنين أو بنتك عندها سبع سنين، يجب عليك أو عليك أن توقظ ابنك ده للفجر، يجب. وأما أنت إن لم توقظه ففي حق ولدك مستحبة، يعني هو صلاته مستحبة، أمرك له بالصلاة واجب، واجب عليك أنت مش عليه، هو ما هو كدة كدة الصلاه مستحبة خلاص، لكن أمرك له بالصلاة واجب. فركزوا في دي أيها الاباء وايتها الامهات، يبقى ابنك أو بنتك وصل سبع سنين، من ساعتها يجب عليك، يجب عليك أن تامره بالصلاة. خلاص؟ طيب، الواد لسه نايم والمغرب هيفوته؟ لا، نقومه قبل العشاء بخمس دقايق، عشر دقايق يلحق صلاة المغرب قبل العشاء، طب صلاة المغرب دي في حق الولد نافلة، وأمرك له بصلاة المغرب واجب، فهمتوا دي؟
طيب، هنا بيقول: «ويلزم الصوم كل مسلم مكلف قادر»، قلت لكم اكتبوا بين قوسين كده (غير حائض ونفساء)، قال: «ويؤمر به صغير يطيقه». ماشي، يؤمر به صغير يطيقه، يعني يطيق الصوم، يعني الصغير أول ما يطيق الصوم يبقى لابد أن تامره بالصوم، خلاص؟ وتشجعه حتى لو هيصوم شوية في اليوم، ماشي الحال، وواحدة واحدة يتدرب عليه. ما تجيش بعد كده بقى تشتكي، ولا أنت تيجي تشتكي: أنا ابني أو بنتي مش عارف، ما بيصحوش الفجر بعد ما بلغوا. ما هو حضرتك ولا حضرتك كنتوا فين وهم لسه صغيرين؟ لو عودتهم على أنهم يصحوا للفجر من وهم صغيرين هيصحوا. ما تجيش تشتكي، ولا أنت تيجي تشتكي: إن ابني أو بنتي بلغ أو بلغت وما بتصومش. ما هو حضرتك وحضرتك كنتوا فين وهم صغيرين؟ لو عودتهم الصوم وهم صغيرين كانوا صاموا لما بلغوا.
طيب، قال: «ويؤمر به صغير يطيقه»، أي يقدر عليه، أي يجب... أهو بقى شفتوا عثمان بيقول إيه؟ يجب على ولي الصغير المطيق للصوم أمره به وضروبه عليه ليعتاد، أي الصوم، يعني ليعتاد الصوم خلاص. ومن عجز عنه، نقف هنا نشوف إذا كانت في أسئلة فاتتنا أو حاجة.
واحد بيقول: عمر شريف، يعني لو في أي ساعة كنت فيها في وقت الصيام في القاهره، يبقى أصوم؟ الحقيقة أنه على المذهب، لا؛ لأن المذهب هيجي في مسألة تانية هيخف، والمسألة دي هتعمل إشكال مع مسألتنا اللي قلناها من شوية. خليني أقولها لكم ونشوف الاشكال، ونشوف... أنا كنت ناوي أزوغ الحقيقة من المسألة دي، لكن هي سئلت، بقى اللي هي إيه المسألة دي؟ اللي هو العكس بقى، عكس المسألة. احنا دلوقتي عشان نفهم يا جماعة، صلوا على النبي، صلوا على النبي كده معانا ثلاث أربع دقايق وهنختار... صلوا على النبي وفوقوا، عليه الصلاة والسلام. عشان نفهم بس يعني ببركات الصلاة على النبي، نحاول نفهم إيه الحاجات الصعبة دي؟
احنا المسألة اللي قلناها من شوية، هي إيه يا جماعة؟ إنه المسافر لو علم أنه يقدم غداً لازمه الصوم، صح كده؟ ودي فهمناها ومش هنشرح تاني. طب إيه رايكم بقى في عكس المسألة دي؟ عكس المسألة اللي هي أن مسافر أو عفواً مقيم، مقيم وهينشئ سفراً في أثناء النهار، مقيم وهينشئ سفراً في أثناء النهار، خلاص كده؟ المذهب هيقول له: تفطر، أن له الفطر، المذهب هيقول له إن له الفطر، لكن إمتى؟ لما يبقى اسمه مسافر؛ يعني لما يفارق البنيان، مش مسألتنا إمتى دلوقتي، لكن المذهب هيقول له: تفطر هنا.
في مسألتين بقى: أول مسألة أن دي أيضاً من مفردات المذهب، خلافاً للأئمة الثلاثة، فدي أول حاجة خلوها على جنب كده، وعشان كده ما تتجراش أنك تعملها، خلاص؟ بالذات في مسألة كبيرة زي مسألة صوم رمضان دي. المسألة الثانية: أنها هتعمل لنا إشكال، سيبكوا دلوقتي أنها من المفردات، هتعمل لنا إشكال. إيه هو الإشكال؟ أن لو القاعدة اللي بنينا عليها الحكم في المسألة الأولى هي قاعدة أنها عبادة... هعيدها تاني: اجتمع فيها حضر وسفر، واختلف حكمها حضراً وسفراً فغلب جانب الحضر، هتقول: وإيه الفرق بين دي ودي؟ صح ولا لا؟ ما هي التانية برضُه عبادة اجتمع فيها حضر وسفر، واختلف حكمها حضراً وسفراً، فلا بد أننا نغلب جانب الحضر. فهتبتلنا إشكال في المذهب، مش هنقول بقى رد الإشكال ولا مش وقته، يعني خلاص، لكن عشان تفهموا القصة، ماشي، مش هنقول إيه رد الإشكال ده.
فأنا بس كنت برد على عمر شريف تونسي بيقول: يعني لو في أي وقت كنت في القاه... طيب، يعني أنا أعمل إيه دلوقتي يا شيخ عشان بس يعني إيه ما أنا راجل بتاع مذهب، ولا أنا راجل إيه عرفت معدي بالصدفة في التليجرام شفت إن في دورة فقه صيام؟ فما تدخلنيش في كعبلة. هقول لحضرتك: إن ما دمت قادراً على الصوم فصم، وما تدخلش نفسك بقى في كل اللي أنا بقوله ده، حضرتك قادر تصوم؟ صوم، خلصنا. عشان إيه، لو أنت أو أي حد بيسمعني يعني، سواء السائل أو غير السائل، يعني ما يدخلش نفسه في كعبلة. أنت راجل قادر تصوم؟ صم، خلاص.
سؤلان في مسألة صوم المسافر: واحد من سيقيم في بلد ثلاث أيام مثلاً، يعني أقل من... يعني هو هيقصر الصلاة، هذا المقصود، فسيبحث الفطر في الثلاث أيام؟ بل يستحب على المذهب، أليس كذلك؟ على المذهب يكره الصوم. طب دي أول مسألة، على الصورة اللي أنت قايلها، لو الفجر هيأذن عليه في بلد السفر، دي مسألة تانية خالص بقى، واحد هيأذن عليه الفجر في بلد السفر وهو يعلم أنه سيسافر بعد الظهر وهيوصل بلده العصر مثلاً، يلزمه صوم أيضاً، أليس كذلك؟ هذا ما أفهمه من كلامه.
حد قال أي سؤال تاني؟ هنوقف المنهاج يا شيخ؟ منهاج إيه؟ إيه منهاج دي؟ منهاج القاصدين تقصد؟ لا، مش هنوقف، شوية وهبتدي فيه إن شاء الله، يعني أنا كنت ناوي أن أبتدي فيه من النهارده، لكن المسائل خدتنا، فلا مش هنوقف.
ما عمر الطفل الذي يضرب للصوم؟ من يطيق الصوم، هنا المسألة دي فيها ثلاث أقوال في المذهب. القول المقدم في المذهب هو أنه يعني حتى هنا احنا كنا بنقول لما نيجي نشرح يعني المذهب بصوره أعمق شوية، فبنبني نقول عند قوله: «ويؤمر به صغير يطيقه» بنقول ظاهره ولو دون العشر. ظاهر الكلام كده، حتى لو كان دون العشر، خلاص؟ فهو ما دام يطيق الصوم نبتدي نشجعه على الصوم، والضرب هنا يعني يعني يا جماعة برضُه عشان ما ندخلش في التفاصيل، لكن إيه يعني نشجع الطفل ونعينه عنه شوية، المهم يعني إيه، وقالوا إن... طب هو مين اللي يطيق؟ قالوا: لو يطيق أنه يصوم ثلاث أيام متواصلة، هو ده اللي إيه؟ اللي يصوم رمضان.
هل يجوز إمامة ال... مش وقت إمامة. ممكن شرح للشخص العدل تاني؟ مين الشخص العدل ده؟ هو عاوز يقول العدل، طبعا اسمعها في الدرس الأول.
وجوب أمر الصغير بالصلاة والصيام، هل هي من المفردات؟ مش عارف يا شيخ. ما فيش تكليف النهارده، ما جاش تكليف، رزقكم بقى!
نقف هنا، قولوا: سبحانك اللهم وبحمدك، أستغفرك وأتوب إليك، سبحانك وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.