د. أحمد عبد المنعمبسم الله الرحمن الرحيم، والصلاة والسلام على رسول الله صلى الله عليه وسلم. نبدأ مجلس اليوم من سلسلة الأمسية التربوية.
فكرة درس النظر إلى السماء كان الدافع الرئيسي لها تقريبًا نفس الدافع لهذا المجلس، إلا أنني في ذلك الوقت كنت أعقد مجلسًا عابرًا لمجموعة من الإخوة، وسمعت منهم بعض المشاكل. أغلب المشاكل التي أسمعها أشعر أنني أريد إيصال رسالة واحدة لمن أمامي. بصراحة كنت أسمع مجموعة من الإخوة لديهم بعض المشاكل في الطريق إلى الله، وأشعر أن إجابة هذه المشاكل كلها هي أنني أريد أن أقول له شيئًا، لكنني لا أريد أن أقول لهم ذلك؛ فكأنني أكبر المشكلة لأنها كبيرة بالفعل. كل واحد يأتي ويحكي، مشكلته كبيرة، وأنا لا أدعي أبدًا أن المشكلة التي تقابل الإنسان في الطريق إلى الله سبحانه وتعالى صغيرة طالما أنه صادق ويريد التخلص منها، لكن أريد أن أقول له: تعال نرسم صورة كبيرة للواقع الذي نعيشه، ستتفاجأ أن مشكلتك تأخذ حجمًا معينًا داخل هذه الصورة، وليست الحجم الكلي الذي تتخيله.
ذلك أن الإنسان يضع على عينيه شيئًا يحجب عنه النور، وينخرط في تفاصيل الأمر، ويتصور أن هذا الأمر هو نهاية الحياة، ويبدأ يتعامل بناءً على ذلك أن هذه نهاية الحياة وأن الموضوع ضخم جدًا، وما من أحد حاسس بالمشكلة. والشيطان يقوده إلى تلك المنطقة؛ وقد تكلمت عنها في الدرس الماضي في سورة الحشر، التي أسميها المنطقة المظلمة. كانت أحد العناوين التي أردت التحدث فيها، لكن قلت إن الأمر لا ينقصه ظلمة، فلا داعي لأن نسمي الدرس بالمنطقة المظلمة. فبالتالي لا نريد أن يوصل الواحد نفسه لحالة من الهم والحزن والغم، ويكون هو السبب في ذلك.
قد يبتلى الإنسان بأشياء لا يد له فيها، ولا أتحدث عن هذا الوقت؛ فقد يبتلى الإنسان بهَم وغم يحاصره، ويكون هذا من البلاء الذي يستعين بالله سبحانه وتعالى ليخرج منه، وقد استعاذ النبي صلى الله عليه وسلم من الهم والغم والحزن. لكن أنا لا أتحدث عما هو خارج نطاق يدك، أحيانًا الإنسان هو الذي يقود نفسه إلى هذا الأمر، هو الذي يضخم الهم؛ يبتلى بهَم ثم يساهم في تضخيمه، يبتلى بغم ثم يساهم في تضخيمه حتى يغطيه. الغم والهم، من أصل معانيهما معنى التغطية؛ فالغمام هو الذي يحجب بصر الإنسان عن السماء، والغم هو الذي يحجب الإنسان عن الرؤية الحقيقية.
قرأت أثرًا جميلًا على تويتر لأحد الإخوة تحت عنوان أثر الاستقرار النفسي على طالب العلم، قال الإمام البخاري عن سهيل بن أبي صالح، يتكلم عمن لا يروي عنه، يتكلم عن ثقة أو لا؟ يقول: كان له أخ فمات، فوجد عليه فساء حفظه، وهذا نقل الكلام عنه ابن حجر. فبيتكلم عن أثر الحالة النفسية على طالب العلم؛ قد تؤثر عليه بأمور تصرفه عن إكمال المسير، طبعًا هو ابتلي بشيء خارج عن إرادته، أسأل الله سبحانه وتعالى أن يحفظ لنا أحبابنا، وأن يرزقنا جميعًا حسن الخاتمة. لكن قد يبتلى الإنسان بشيء، لكن تفاعل النفس مع الأمر قد يضخمه.
مثال عن التصور الخاطئ في التعامل مع الأمور التي تحدث من حول الإنسان، ربنا ذكر لنا التعاملات الجاهلية التي كان يتعاملها الرجل في الجاهلية حينما كان يرزق ببنت، مع أنه رزق، وقد أخبر النبي صلى الله عليه وسلم أن من يرزق بهذه البنات ويحسن تربيتهن يكنّ حجابًا له من النار، ثم تفاجأ بقول الله سبحانه وتعالى في ناس قال الله تعالى عنهم: ﴿وَإِذَا بُشِّرَ أَحَدُهُم بِالْأُنثَىٰ ظَلَّ وَجْهُهُ مُسْوَدًّا وَهُوَ كَظِيمٌ * يَتَوَارَىٰ مِنَ الْقَوْمِ مِن سُوءِ مَا بُشِّرَ بِهِ ۚ أَيُمْسِكُهُ عَلَىٰ هُونٍ أَمْ يَدُسُّهُ فِي التُّرَابِ﴾ [النحل: 58-59]. انظروا إلى التصور، تشخص الحالة النفسية التي يمر بها، يقول: أيمسكه على هون؟ أي سيعيش في ذلة وهَم. طيب لماذا؟ ما الذي يعيشك في ذلك؟ الذي يعيشه في ذلك تصور النفس عن البنت وتصور المجتمع، وركزوا معي في النقطتين هاتين، فهما مركز الدرس كله؛ تصوره هو، يعني ماذا جاء لي بنت؟ في واحد عندما تأتيه بنت يكون في قمة السعادة وفي قمة الشكر لله سبحانه وتعالى، وكان منتظرها ويدعو: يا رب يجي لي بنت، وفي واحد ربنا وصفه لنا في القرآن عندما جاءته بنت أصبح كارهًا لنفسه وعايشًا في غم وقرف وذلة ومهانة وقاعد يفكر: يا ترى أعيش في هم وغم وذلة وقرف ولا أدفنها وأخلص؟ أيمسكه على هون أو يدسه في التراب.
أنتم متخيلون الصورة بأنفسكم؟ ما الذي أوصله لهذه الحالة؟ مع أن ركزوا معي، نفس الشيء، نفس البنت؛ يرزق بها إنسان فيكون في فرح، ويرزق بها آخر فيكون في هم وغم. إذًا المشكلة ليست في البنت، المشكلة في التعامل النفسي من الشخص ومن المجتمع. إذًا التعامل النفسي من الشخص أو المجتمع قد يضغطون على إنسان ويقومون بعملية ضغط نفسي عليه تجعله يتخيل حياته في صورة معينة وفي الحقيقة ليست كذلك؛ الحقيقة أن الموضوع لا يستحق هذا الهم والغم. أنت الذي فعلت بنفسك هكذا، لا أحد قال لك أن تفكر بهذه الطريقة، أنت الذي فكرت بهذه الطريقة التي أدخلتك في هذه الحالة النفسية.
إذًا هذه أول نقطة؛ كيف طريقة التفكير النفسي الخاصة بي، أو ضغط المجتمع علي، قد تجعلني أفكر بطريقة مختلفة عن شخص وضع في نفس الظروف التي أمر بها تمامًا. اثنان ممكن أن يمروا بنفس الظروف بالظبط، لكن واحدًا لأن طريقة تفكيره وطريقة تعامله النفسي وضغط المجتمع عليه جعلته يفكر بطريقة، والآخر جعلته يفكر بطريقة مختلفة؛ فتجد اثنين يتعرضان لنفس الأثر، واحد يكون في حالة من الرضا والسكينة والطمأنينة، مثل الرجل الصالح الذي ابتلي بموت أخيه، فبعض الناس قد يبتلى بمثل ذلك لكن مَنَّ الله سبحانه وتعالى عليه واستعان بالله سبحانه وتعالى وأكمل.
الفكرة التي أريد أن أتكلم عنها اليوم وأوضحها أكثر؛ كنت أقرأ في كتاب اسمه أصول علم النفس، يقول: فيه حاجة اسمها في علم النفس المجال الذي يحيط بالإنسان، وقال إن المجال هو البيئة التي تحيط بالإنسان. البيئة هي المؤثرات؛ أنت حولك بيئة، حولك ضوضاء، حولك أنوار، ضوء خفي، ضوء شديد، أصوات مزعجة، مؤثرات صوتية، أيًا كان، حاجة تضغطك نفسيًا؛ كل ما يحيط بك هي البيئة، وكل واحد له بيئته الخاصة. في واحد يكون ماشي مثلاً، ضابط المرور مثلاً ماشي مركز على أشياء معينة في الشارع غير الشخص الذي نازل يشتري حاجة، كل واحد تلفت انتباهه أشياء معينة.
لذلك هنا انتقل لفكرة، قال: وعلى هذا يجب التمييز بين البيئة الواقعية والبيئة السيكولوجية. صلوا على النبي عليه الصلاة والسلام. لا يهم المصطلحات، يهمني الفكرة؛ فالبيئة الواقعية هي العوامل التي تحيط بك حقيقة، كل ما يحيط بك في الواقع. أما البيئة السيكولوجية فهي البيئة التي تحيط بك كما تشعر بها أنت وكما تستجيب لها أنت؛ يعني ممكن واحد يكون يعيش حوله أخطار، حوله ميكروبات معينة، حوله بعض العدوى التي ممكن أن يتعرض لها، وهو لا يفكر في هذا الأمر ولا يشعر به، فهو في قمة الطمأنينة وقمة السعادة؛ فالبيئة الواقعية بالنسبة له خطر، لكن البيئة السيكولوجية والراجل قاعد يضحك ويهزر، ليس في دماغه، عادي جدًا.
يمكن أن نرى اثنين في المستشفيات؛ تجد دكتورًا لابسًا أشياء واقية ويغطي رأسه ولابس عشر كمامات وداخل العناية، وتجد مثلاً مرافقًا للمريض داخل متعريًا في كل وسيلة، ولا يفهم هو الدكتور عامل في نفسه لماذا هكذا، هل الدكتور تعبان في دماغه؟ لماذا الدكتور عامل في نفسه هكذا؟ وهو الثاني عادي، لا يشعر بأي أزمة سيكولوجية، لا يشعر بأي أزمة، لكن بيئته الواقعية أن قد يتعرض لأمراض أو غيره. ويجيب أمثلة؛ مثل الرجل الذي يسبح في البحر وحوله أسماك القرش أو حوله أشياء خطر وهو لا يعرف بها، فبيئته الواقعية في الحقيقة هي مميتة، لكن بيئته السيكولوجية لذيذة وآمنة.
والباخرة التي ماشية في نصف البحر وحولها ناس تريد أن تميتها وتترصد لها وهي لا تشعر، هي تسير بطريقة آمنة لكن بيئتها الواقعية خفيفة. الأم النائمة في حقلها في جوار رضيعها، لا يؤثر فيها الرعد ولا المطر ولا هدير الرياح، ولكن حركة طفيفة من رضيعها كفيلة أن توقظها على الفور. فقال: الأشياء الخارجية قد تكون موجودة في بيئتنا الواقعية، لكنها غير موجودة في بيئتنا السيكولوجية، وأحيانًا العكس صحيح. يريد أن يقول إن مشاعر الإنسان وأفكار الإنسان وذهن الإنسان تصرفه للتفكير في قضايا معينة، هذه القضايا لا يشترط دائمًا أن تكون هي البيئة الواقعية الحقيقية التي أعيشها.
واحد مثلاً جاب مجموعًا في الثانوية العامة، وهذا حصل مع أحد الناس الذين أعرفهم، جاب مجموعًا في الثانوية العامة أيام ما كانت الثانوية العامة عندنا في مصر ممكن يدخل أي كلية، مجموع كلية هندسة وما جاب كلية طب، فكان في قمة الحزن والأسى والعيلة عاشت حالة من الكآبة، هذه بيئته السيكولوجية أنه حزين، في حين طلبة الطب الذين ابتلوا بهذا الأمر وفقدوه وانتكسوا وانتحروا وعملوا في أنفسهم كل حاجة، قاعدون ينظرون له أنه يحمد الله سبحانه وتعالى على هذه العافية وأن نجاه الله سبحانه وتعالى من هذا الهم والغم والكآبة والحزن؛ فهو ممكن واحد يرى أن يا ابني ربنا نجاك من الهم هذا، وممكن يكون هو حزين.
الإنسان بطريقة تفكيره أو ضغط المجتمع أحيانًا تجعله ينظر للأمور بصورة غير التي هي عليها؛ حلوة أو وحشة، ليس هذا وقت التكلم فيه، أنا أريد فقط أن أوضح لكم الفكرة؛ أن الإنسان قد يعيش في بيئة سيكولوجية معينة تجعله يرى الحياة حوله بصورة ما غير التي عليها في الحقيقة. أنت ممكن تلاقي اثنين الأسر في أزمة، وواحد فيهم في قمة الرضا والسكينة والطمأنينة، وواحد آخر في قمة الحزن والهم والغم والابتلاء.
مثل الرجل الذي ألف كتابًا اسمه البحث عن المعنى؛ دكتور علم النفس هذا من مدرسة النمسا للعلاج، وأظن أنه كان اعتقل في سجون النازيين في ألمانيا، وطبعًا الألمان لا يمزحون في أي شيء، لا في الشغل ولا في التعذيب، فالراجل كان متمرمط، فوجد أن أغلب الذين معه ناس ينتحرون؛ فقعد يفكر لماذا الناس تنتحر؟ فلقى أن السؤال هو نعيش لماذا؟ فسؤال نعيش لماذا هذا جعله يفكر أنني سأحاول أن أوجد لهم معنى، معنى يعيشوا عشانه؛ وهذه هي فكرة العلاج النفسي، أحد مدارس العلاج النفسي، العلاج بالمعنى، أنني أوجد له معنى.
والكتاب رائع، ومترجم؛ وطبعًا الآن الكتاب الرائع الذي نزل الآن، كتاب ضخم اسمه معنى الحياة في العالم الحديث لعبد الله الوهيبي، كان ورقة موجودة أصلاً على الإنترنت، ورقة بحثية جميلة لكنه ضخمها جدًا وأنزلها في كتاب. المهم، الراجل يحاول، تخيلوا واحد في سجون النازيين في ألمانيا يحاول أن يوصل للذين حوله أن ممكن أنت تكون أنا، وأنت في نفس الظروف، أنا وأنت ممكن نكون في نفس الظروف، بس هو عنده مشاعر نفسية ساعدته من التخلص من أسر الظروف هذه.
راح خلى بيئته السيكولوجية أكثر رضا وأماناً عن بيئته الواقعية؛ قدر إنه يتحكم في مشاعره. طبعاً هو هناك ده مش بيتكلم بالدين، هو بيتكلم حتى عن التحكم، ولذلك من الحاجات والمشاكل اللي قابلته قضية الموت، هيعمل فيها إيه؟ يعني هو اتكلم على وسع فكرة لعلاج السرطان، المصابين بالسرطان وغيره، عنده قضايا مش عارف يوجد لها معنى، زي فقد حبيب، زي قضية الموت، ودي مسألة خطيرة إن هو ما عندوش؛ هيتكلم عن الغيب هيقول له إيه؟
المؤمن يا جماعة، المؤمن ربنا سبحانه وتعالى أدّى له أفق واسع، مسألة الغيب دي بتوسع أفق المؤمن، بتساعده على الخروج من كتير من الأزمات، ودي حاجة سبحان الله من رحمة الله بالمؤمن إنه يعايش الغيب.
يعني من المعاني الجميلة قوي، وإن كان أنا بحب أخرج دايماً في الدروس بره كده وأرجع تاني، تخيلوا كده المسلم لما بينزل يصلي في المسجد وهو آكل ثوم أو بصل ويقول لك لأ أنا بلاش أنزل عشان ما أذيش الملائكة، أنت متخيل لو واحد ملحد بيسمع الكلام ده يعني بتصلي وكمان مش عايز تصلي عشان الملائكة أنا مش شايفها، يعني هو إيه بالنسبة للملحد هيحصله إيرور لما بيسمع الكلام ده. بالنسبة للمسلم هو يعايش هذه الأمور، هو يعايش عالم الشهادة وعالم الغيب؛ هو ما بينفصلش عن عالم الشهادة، هو بيعايش عالم الشهادة ويعايش عالم الغيب.
كنا بنقول إن مسألة إن البيئة السيكولوجية والبيئة الواقعية ديت لو انطلقنا من الفكرة ديت، أيًا كان مش لازم نقرها أو لأ، بس أنا يهمني زي ما قلت إن المعنى واضح. المعنى واضح إن الإنسان الظروف اللي حواليه -وجبت لكم استشهدت بآية سورة النحل أمسكها على هنا- إن إزاي إن الإنسان طريقة تفكيره أو طريقة تفكير المجتمع تضغطه نفسياً تخليه يفكر بطريقة، مين اللي قايل إنك لازم تفكر كده؟ يعني مين اللي قال إن أنت ينبغي أن تفكر بهذه الطريقة، ليه اتضغطت نفسياً؟ ليه ضغطوك تفكر بهذه الطريقة؟
لذلك أنا كنت من الكلمات أنا برضو كنت عايز اسمي الدرس ده إيه، كنت عايز أسميه -وده حتى العنوان الجانبي محررة- كنت عايز أسميه محررة، ليه كنت عايز أسميه محررة؟ فيه خطوة بس هي صوتها وحش على الإنترنت يعني بنفس العنوان فكرتها الأساسية إن كلمتين عكس بعض، يعني أو ده تقييمي، يبقى غلط يعني، مش كلمتين عكس بعض، أنا لقيتهم كلمة محررة، ولو حاولنا نجيب عكس لها في القرآن كلمة، وإن كان هي فعل، يهرعون.
كلمة يهرعون محررة جت فين في القرآن؟ لآل عمران. طيب كلمة يهرعون جت فين في القرآن؟ ما فيش، ماريا أنتم هتشككوني في حفظي، ريم فين في مريم مع السيدة مريم مش في سورة مريم. إحنا خلاص نقلنا على فرعون سورة إيه؟ أيوه أحسنتم، سورة هود وسورة الصافات، سورة هود كلمة يهرعون جت مع مين؟ جت مع قوم لوط، وفي سورة الصافات جت أصلاً قبل بداية الحديث عن قصة سيدنا نوح وبعد كده سيدنا إبراهيم، اللي هي مع الأقوام مع تفاصيل يعني بعد عذاب النار، واتكلمت على مسألة تقاليد الآباء، وإن ربنا سبحانه وتعالى قال ﴿فَهُمْ عَلَىٰ آثَارِهِمْ يُهْرَعُونَ﴾ [الصافات: 70]، فهم على آثار الآباء وتقاليد الآباء يهرعون.
طيب قبل ما نتكلم على محررة خلينا نعرف يعني إيه يهرعون، يبقى يهرعون جت مرة مع قوم لوط في موطن في كلام عن الشهوة ﴿وَجَاءَهُ قَوْمُهُ يُهْرَعُونَ إِلَيْهِ وَمِن قَبْلُ كَانُوا يَعْمَلُونَ السَّيِّئَاتِ﴾ [هود: 78]. أحد معاني الآيات إن كانوا لسه بيعملوا السيئات، لسه بيعملوا الشهوة لكن ولم يشبع من الشهوة، ﴿وَمِن قَبْلُ كَانُوا يَعْمَلُونَ السَّيِّئَاتِ﴾ ده أحد التفسيرات، وبالرغم من كده جاء قومه يهرعون إليه، فآية الصافات مسألة اتباع الآباء وتقاليد الآباء والخوف من تكسير الخروج عن سياق آثار السابقين والآباء فربنا قال ﴿فَهُمْ عَلَىٰ آثَارِهِمْ يُهْرَعُونَ﴾، فالكلمة جاءت مع موطن شهوة وموطن تقاليد السابقين.
طيب يعني إيه يهرعون الأول؟ يعني إيه يهرعون؟ أنا هقرأ لكم نص من الإمام ابن عاشور في يهرعون، وطبعاً لما أنا عايز أعرف تفسير يهرعون طالما جت مرتين في القرآن، غالباً المفسر -بقول غالباً- هيشرحها في أول موطن، يعني لو أنا عايز أعرف تفاصيل كلام المفسرين في يهرعون أرجع لسورة هود، غالباً قد يفتح له بعد ذلك، يعني ده بيحصل أحياناً وحصل نفسه مع ابن عاشور في أكتر من لفظ، لكن لما أنا عايز أفهم لفظة أرجع لأول موطن.
فجاء ابن عاشور في سورة هود قال -أنا هقرأ الكلام- قال: يهرعون بضم الياء وفتح الراء على صيغة المبني للمفعول، طب ما إحنا عارفين بس هو بيأكد المعنى ده ليه، يعني ليه بيأكد إنه مبني للمفعول؟ قال: فسروه بالمشي الشبيه بمشي المدفوع، واحد بيتزق يعني مش هو اللي بيمشي، واحد عمال بيتزق، فهو لا يكون الفعل يهرعون إلا مبنياً للمفعول، وده الاستعمال أنا طبعاً ما استقرأتش استعمال العرب -يعني ما عنديش خبرة في الباب ده- لكن ابن عاشور بيقول وده استعمال القرآن كمان، لا يأتي إلا مبنياً للمفعول؛ لأن أصله إيه، إيه أصل كلمة يهرع أصلاً يعني ماشي يهرع؟ قال لك واحد مشيته مشي وكأنه واحد بيتزق، كأن هو فاقد السيطرة على نفسه.
طب إيه هو أصل المعنى بتاعه جه منين؟ قال: لأن أصله مشي الأسير الذي يُسرع به، تخيل أسير بيتزق سواء بقى بيقاد إلى سجنه أو إلى حتفه، تتخيلوا مش عارف يتراجع، الماشية دي سموها يهرع، ثم استعيرت لكل إنسان بيسير في شيء لا يستطيع أن ينفك عنه، ده من عندي دي جدعنة من عندي الحتة الآخرانية دي جدعنة، لسه أنا هقرأ لكم كلام من ابن عاشور دلوقتي، ماشي؟
نرجع لابن عاشور قال: وهذا البناء -اللي هو لغير الفاعل- يقتضي أن الهرع المصدر دفع الماشي بيتزق حين مشيه، ثم تنوسي ذلك، قال: إلا أن ذلك تُنوسي وبقي أُهرع بمعنى سار سيراً كسير المدفوع، ولذلك قال جمع من أهل اللغة إنه من الأفعال التي التزموا فيها صيغة المفعول. طيب يبقى اللي أنا عايزه إن ابن عاشور جزاك الله خيراً كده اللي أنا عايزه منه عليه رحمة الله، وهو دائماً يبدع في مثل هذه الأمور، اللي أنا عايز آخد منه كلمة إن الإنسان بيدفع دفعة.
طيب كلمة يُدفع دفعاً جت يهرع عندنا موطنين؛ الشهوة قد تسيطر على الإنسان وتدفعه دفعاً، وده متفهم، يعني نسأل الله إنه يتوب علينا جميعاً، كلنا ممكن نبتلى بشهوات ونقع في معاصي، وبعد ما تقع في المعصية تقول: إيه ده! أنا ما كنتش حاسس بنفسي، أنا كنت حاسس إن أنا كأني أُدفع دفعاً للشهوة، لكن نفس اللفظ اللي استعمل مع الشهوة يستعمل مع التقاليد ﴿فَهُمْ عَلَىٰ آثَارِهِمْ يُهْرَعُونَ﴾، ده معناه إن تقاليد الآباء والمجتمع قد تسيطر على الإنسان وتدفعه دفعاً إنه يعمل حاجة هو ممكن يكون مش مقتنع بها، إنه يشتري النيش مثلاً عندنا في مصر -أنتم عارفين النيش ولا ربنا يجوزكم- المهم، إنه يُدفع دفعاً لأنه يعمل حاجة هو رافضها، أو مش مقتنع بها، أو حتى بلاش هو ما فكرش أصلاً فيه، يعني هو مش واخدها كقرار أو فهم، هو دُفع إليها دفعاً.
لذلك أنا كان تصوري إن مُحررة عكس الاتنين دول، عكس يُهرع، ﴿إِنِّي نَذَرْتُ لَكَ مَا فِي بَطْنِي مُحَرَّرًا﴾ [آل عمران: 35]، وإن كان المعنى الأصلي هناك محرراً من أعباء الدنيا، يعني كان عندهم إن ممكن الإنسان ينذر ابنه ليخدم أماكن العبادة ويظل فيها ويتحرر من انشغالاته الدنيوية، لكن لو وسعنا المفهوم إن إنسان يتحرر -وأنا اتكلمت عن المعنى ده أظن في درس افتكرت دلوقتي- أظن إشكالية البناء المعرفي، واتكلمت على نظرية اللي قالها حسام البخاري، نظرية قالب البسطرمة، مسألة صنع إزاي عقولنا بيتم تصنيعها في صورة قوالب من الإعلام والتعليم وكده.
طيب يبقى أنا دلوقتي بتكلم في مسألة إن البيئة اللي حواليا ممكن تأثر عليّ نفسياً، تدفعني دفعاً لاختيارات، وكأني فعل يُهرع إليه الإنسان، وتخليه كأنه أسير يُدفع دفعاً، تخليه كأنه بيمسك الشيء على غير وعي، يتعصب من حاجة هي ممكن تبقى خير، يغضب من شيء ممكن يكون هو خير أصلاً.
لذلك برضو من الدروس كويس إني اختبرته، الدروس الجميلة قوي اللي اتكلمت وكان وقتها جميل، كان وقتها نزل الدرس ده أيام نتيجة الثانوية العامة والناس بقى اللي أنا ما جبتش مجموع هولع في نفسي ومش عارف إيه وكده، فكان الشيخ كريم حلمي ربنا يحفظه ويبارك فيه، نزل درس جميل جداً اسمه السوق الرقيق الفسيح، يعني إحنا عايشين، تم استعبادنا بصورة كبيرة.
برضو من الحاجات اللي لقيتها اتكلمت بصورة جميلة في الموضوع ده -وإن كان الكتاب نفسه تقيل شوية تلاتة، وما أنصحش بالقراءة به لغير المتخصص- باب اسمه حياة تالفة، أزمة النفس الحديثة، ترجمة الشيخ عبدالله الشهري، الكتاب بيتكلم إزاي إن الحياة اللي إحنا عايشينها أثرت في تفكيرنا وأثرت في نفسيتنا ودمرتنا، لذلك استعمل مصطلح -من كانوا استعاروا من غيره- المهم استعمل مصطلح اسمه استعمار عالم الحياة، وبيستعمل إزاي عملوا في الحياة بتاعتنا حاجتين، إزاي حطوها في سيستم قالب وعقلنوه، وإزاي تم استعماره؟ طبعاً المتخصص وخصوصاً المصطلحات دي لأنها أصلاً، أنا هتكلم في الحل دلوقتي، الناس اللي بتتكلم في الحلول، أنا سايب الحلول للآخر إن شاء الله.
ليه جبت سيرة الكتاب؟ الكتاب مليان وعجبني إن منصة إدراك له تلخيص، الكتاب دسم شوية، نزلت له تلخيص، واحد الإخوة الأفاضل قال لي إنه هيعمل عنه شغل قريب يبسطه، أنا ليه عجبني مصطلح جميل جداً في الكتاب؟ عجبني بيقول إيه؟ جه في الآخر خالص في آخر الكتاب استعمل بعض المصطلحات كده، المصطلح التماهي مع الباغي، يعني إزاي واحد ظالم وباغٍ عليك وأنت تنبسط معه وتتعايش، مش معاك، لكن عجبني مصطلح بيقول إيه؟ بيقول العجز عن مقاومة التشكل الأيديولوجي، إيه الكلام الكبير ده يا عم الحاج؟ عايز يقول إن أنت ممكن دماغك، دماغك بتتغير وبيتلعب فيها وبتوجه وأنت عاجز عن المقاومة، عاجز، وده بيحصل معانا نفسياً، يتم توجيهك لشهوات معينة وتبني طموحات وآمال هي مش آمالك.
يعني تخيل لما مستقبلك يرسم لك طريق ثم تسير فيه ثم تحزن حينما تفشل في السير في الطريق المجبور عليه أصلاً، وبعدين تكتئب إنك ما حققت الطموح اللي هو ما كانش بتاعك، يعني أنتم متخيلين اللفة؟ هو مش آمالك ومش طموحك، رسمت لك غصباً عنك، ثم أُجبرت في السير فيها، ثم تفشل في تحقيقه فتكتئب فتنتحر، عشان إيه؟ عشان ما حققتش طموح مش بتاعك؟ يعني إيه اللخبطة اللي إحنا عايشين فيها دي؟ فلابد إن الإنسان يخرج شوية من النقطة دي يا جماعة، يخرج.
واحد أنا في مرة بناقش مع واحد الفكرة ديت قبل ما هي طبعاً هي برضو لسه ما اختبرتش، أنا بحاول معكم، في مرة وأنا بناقش مع واحد قال لي: طب معلش يعني هو مش ده طبيعي إني أعيش بيئتي ومشاكلي وهمومي، أمال كل همومي مش هعيشها؟ قلت فيه فارق هنا، وده ردي على السؤال، فيه فارق إنك طبعاً تعيش همومك، ما هو مش معقول كل ما يحصل لي هم أو مشكلة أو تيجي مثلاً مراتي تقول لي عندنا مشكلة كذا في البيت أقول لها لأ انظري إلى السماء، أنا ما عنديش ده، أنا هتفاعل، طبعاً هي ساعتها مش هينفع أقول لها انظري للسماء، أنا أتفاعل مع همومي ومشاكلي وأحلها، لكن لا أستغرق فيها، أعرف قيمتها وأعرف حجمها، ما تخليش مشاكلي توديني للمنطقة المظلمة، ما أوصلش لحالة من الإحباط واليأس، ليه أعمل في نفسي كده؟ عشان إيه؟ ما الذي يستحق؟
من اللطائف الجميلة برضو اللي قرأتها، فاكر مين كان الشيخ وجدان ربنا يبارك فيه أشار للنقل ده، مش فاكر مين من الإخوة الأفاضل بس هنسيب له ده، نقل جميل قوي بيقول إيه: من سماحة نفس النبي صلى الله عليه وسلم حتى إن الشيب لم يسرع إليه ويغزو شعره، إنه كان عنده طاقة نفسية، إزاي واحد مر بكل الابتلاءات دي والشيب لم يغزوه، يعني لم يبدُ، فأنت طبعاً قد الأمر قد يحدث قدرياً، لكن أقصد الإشارة اللطيفة هنا إزاي قدر المستطاع، قدر المستطاع -وده بمعنى أنا بحاول أحط مع إني اتكلمت الدرس اللي فات على مسألة كيفية تلقي المواعظ وعدم التطبيق الحرفي لها، فبحاول أحط احترازات- بتكلم قدر المستطاع إني لا أسمح لهذه المشاكل أن تأخذ حجماً أكبر من حجمها، بل نحن ندعو ونقول إن الله سبحانه وتعالى لا يكلفنا ما لا طاقة لنا به، أدعو الله سبحانه وتعالى ذلك.
لأن أحيانا الإنسان هو اللي يفعل ذلك بنفسه، لذلك من الأدعية العجيبة أن إحنا بنقولها صباحا ومساء، بل وجدت رواية وكمان قبل النوم، أن تستعيذ بالله من شر نفسك. اللهم عالم الغيب والشهادة، فاطر السماوات والأرض، رب كل شيء ومليكه، أعوذ بك من شر نفسي، ومن شر الشيطان وشركه. فاستعيذ بالله من شر نفسك، نفسي ممكن تقودك إلى حتفك، نفسي لو سيطرت عليك ﴿وَأَمَّا مَنْ خَافَ مَقَامَ رَبِّهِ وَنَهَى النَّهْصَ عَنِ الْهَوَى﴾ [النازعات: 40]. لازم يبقى عندي شوية قيادة على نفسي.
ما تتحكمش هي فيا، والمجتمع يتحكم فيا ويفرض علي أمور أعيش فيها منغصة. طب ليه؟ المجتمع بتعبير عجبني قوي برضه تعبير محمد مصطفى عبد المجيد ربنا يحفظه، كان بيقول: أنت بتسيب نفسيتك وعقلك ملطشة للحياة، قاعدين بيحطوا لك تعريف النجاح، وبيحطوا لك تعريف للصوت، وبيحطوا لك تعريف للفشل، وبيحطوا لك، وحضرتك تلقى هذه التعريفات وتنزل المجتمع. ومن ذا قال إن هذا هو النجاح؟ يعني ليه ما بنعيدش تعريف حاجة؟ برضه ده مش معناه الشك في كل شيء في الدنيا، لأ برضه نضع إيه كل حاجة في حجمها الطبيعي.
فالخلاصة، ما هو برضه يا جماعة أنا زي ما أنا قلت يعني هو صعب وده نقطة مهمة أنا بحاول أنظر للتعليقات سريعا كده، طبعا يستحيل آجي أجاوب عليها كلها، صعب أن في درس واحد أن إحنا نجاوب على كل الأسئلة. وأنا تكلمت في دي المرة اللي فاتت: أمتا القرآن نفسه عشان تفوت تقراه كله؟ بتجمع النصوص في المسألة الواحدة. فأنا أما بقول كده ده مش معناه أن أنا أعيش في شك وريبة، إيه ده هو طموحي ده المجتمع راسمه لي ولا هو طموحي؟ لا يعني ده له طريقة تانية بتحديد أهدافي بطريقة مشورة إخواني. يعني طبعا ده مش هنجحنا هنا في الدرس، كل غرض الأساسي للدرس أن أنا ما أسمحش لنفسي تقودني لمنطقة مظلمة من الهم والغم أنا اللي أتسبب في ده.
في فرق بين ابتلاء بيقع عليه غصب عنك، وأنك أنت تتسبب أنك بتضع غشاوة على عينيك، بل كنت بناشد أحد المتخصصين في علم النفس دي وقال لي، قال لي المثل ده أصلا بيضربوه بتوع علم النفس، أن الطبيب النفسي بيساعد المريض أنه ينزع الغشاوة اللي على عينه. وحتى ضرب لي مثل الحصان اللي بيكون بيحطوا له غشاوي على عينه في السباق عشان ما يركزش غير في السباق، لا، لما بيشيلوا عن عينه بيكتشف أن العالم كبير، هو أنت أحيانا كده ماشي في تراك جايب آخرك فيه ومش واخد بالك أن العالم كبير. فدور أن إحنا ننزع بس الرشاوة دي، هو أنا عايز كل اللي أقوله أن قد قد يكون العالم أكبر والحياة وهمومها أكبر مما تتخيل.
ولذلك أنا كنت زمان بناقش بعض إخواني أقول لهم: ليه أحيانا، والسؤال ده متكرر يعني توني ممكن قلته في أكتر من درس، ليه أحيانا ممكن الإنسان يكون مهموم ومغموم وعنده مشاكل، ثم يمن الله عليه بفضله وكرمه ورحمته، ويقوم يصلي قيام ليل يفتح له فيه، يطيل في قيام الليل، ثم يخرج من قيام الليل بصدر منشرح ونفس طيبة؟ فكنت بسأل: هو إيه اللي حصل؟ يعني الموضوع ده كان بيشغلني، أقعد مع بعض إخواني أقول لهم: المشكلة زي ما هي ما اتحلتش، يعني ليه يعني هل ليه إيه اللي بيشرح الصدر هنا؟ هل العلاقة بالله؟ هل القرآن كأنه كأن يعني عمل زوم أوت كده فخلاني أشوف مشكلتي ضمن مشاكل كبيرة؟
لما تيجي تقرأ القرآن: نبي أوذي وعذب وهذا قتل أشعر الدين وفي جنة ونار وآخرة. فكأن السورة اتسعت، هل حصل مزاحمة لهمي؟ دخل هموم تانية أكبر من همومي، دخل همومي الآخرة علاقتي بالله، هل اكتشفت أن في إله قادر على حل مشاكلي؟ يعني إيه اللي بيحصل يخليني مشكلتي زي ما هي (لسه ما فكرتش في تفاصيل حلها) وحتة بقى تفاصيل المشكلة وأزاي تفاصيل المشكلة بتأثر، ده في درس النظر إلى السماء واحد اللي عايز يرجعني. يعني إيه اللي عمله القرآن؟ ساعدني في ده، ساعدني في تصغير مش حجم المشكلة على الأقل، على الأقل همها، زاحمتها بهموم أخرى.
لأ، يعني أنا شفت بعض عجبني قوي بعض التعليقات الموجودة، أزاي أن الناس اللي عاشت في أماكن معينة سافرت برة أو عاشت في كوميونيتيز معينة أثرت أريد تفكيرها، اختارت نمط حياة مجبرة عليه أو مفروض عليها فعاشت في هموم وغموم أن هو مطالب أنه يسد هذا الكم. وعلى فكرة، وده من المعاني الرئيسية اللي الكتاب أصلا بيتكلم عنه: أزاي هو أنا كنت عملت بعض الإقتباسات في قناة التليجرام منه أزاي بتفرض علينا أشياء لنشتريها لا نريدها؟ يعني أنت بتحوش وبتشتري حاجة أنت مش عايزها أصلا أساسا بس هي فرضت عليك. أزاي أنك مضغوط نفسيا وبتبكي أنك مش قادر تحصل المنتج مع أن أنت مش محتاجه؟ بدليل أن هو هو ما كانش معك وأنت كنت ممكن بلاش مش محتاجه، مش مضطر إليه، لا يستحق هذا الحزن.
كل دي احترازات، فإحنا محتاجين يا جماعة نتدارك أنفسنا في الواقع، وخصوصا وخصوصا وبقولها عايز أقولها عشر مرات، وخصوصا وواقع السوشيال ميديا. أنت بتفتح السوشيال ميديا، افتح الفيسبوك أو تويتر أو أي موقع من المواقع المهببة دي، أنت سوق مفتوح معروض أمامك، جابت وفلان جاب، والممثل ده وإعلان ده وإعلان لمنتج، والحق الأبديت، سيل متواصل رهيب، أنت مش عارف تحقق إيه ولا إيه، وعلى كل المستويات، على المستويات النفسية والمعنوية والبدنية والصحية، وفلان راح الجيم وفلان جاب شهادة تقدير وفلان سافر خد شهادة من أمريكا وفلان مش عارف عمل إيه، حقق إيه، مجموعة رهيبة من الحياة لا تظهر لك إلا نتائجها النهائية، وأنت قاعد عمال تتفرج على كل ده وقاعد: أنا فاشل، أنا ما فيش مني أمل، كل دول عملوا كل حاجة، أنا أصلا ما عملتش أي حاجة في حياتي. وضعت تعريفي نجاح من ناس من فرض علي، وسم عملت تعريف للفشل واستنتجت أنك فاشل، ومن قال لك أنك فاشل؟
النبي صلى الله عليه وسلم لما يعني يغضب من أصحابه أنهم لم يخبروه بموت امرأة، امرأة ست غلبانة كانت بتقوم المسجد، بتكنس المسجد، فلما ماتت بالليل ما رضوش يقولوا له، فالنبي صلى الله عليه وسلم قال: «هلا آذنتموني؟» ليه ما قلتوليش؟ وذهب ليصلي على قبرها صلى الله عليه وسلم. امرأة بتقوم المسجد، النبي صلى الله عليه وسلم راح صلى عليها مخصوص. إحنا بنجيب التعريفات بتاعتنا منين؟ تفرض علينا. فأنا اللي أنا عايز أقوله: لا نضغط على أنفسنا، نرفق بأنفسنا يا جماعة، الرفق، نرفق بأولادنا، نرفق بأحبابنا، الرفق بأنفسنا.
أول حاجة تسأل عن نفسك، صدقة تتصدق عن نفسك الأول. لسه بقرأ حديث أمبارح في الأدب المفرد بيقول إيه لأحد مشايخي عليه بيقول النبي صلى الله عليه وسلم يقول: «ما أطمعت نفسك فهو صدقة». عجبني قوي تعليق الشيخ مسألة إطعام نفسك، إطعام لنفسك تاخد عليه صدقة، أيوه لأنك أنت بتروض نفسك، وإطعامك لنفسك بتعف نفسك عن النظر إلى الحرام، أنت قاعد بتقود نفسك فبترفق بنفسك. والنبي أحاديث مشهورة وجدت حبل مشدود في المسجد، امرأة بتصلي به ولما بتتعب بَصَت له قال: «لمن هذا؟ حُلوه». وغير ذلك الإنسان لا يتسلط على نفسه ويعذبها ثم نفسه تقوده إلى حتفه، إلى المنطقة المظلمة التي نسأل الله سبحانه وتعالى ألا نذهب به.
يبقَى دي كانت الفكرة الأساسية بتاعة درس: أن أنا محتاج أزاحم هذه الهموم التي بداخلي، محتاج ما أوصلش لمرحلة يهرع، محتاج أن أنا أكون محررا، وده محتاج وسائل. ده ما بيحصلش بين يوم وليلة، يعني مش مش هنطلع من الدرس النهارده هنكسر بقى إيه؟ أي حد يكلمني، أنا هنزل الشغل بكرة، مديري يقول لي: أنت ما عملتش اللي وراك ليه؟ أقول له: بقول لك إيه، خلاص أنا اكتشفت البيئة السيكولوجية، ما حدش يقول لي ما تعملش شغلك ليه؟ لا اعقل شوية كده. تيجي مثلا عندك امتحانات، والدتك تقول لك: ما بتذاكرش ليه؟ تقول لها: لأ لأ خلاص أنا هطلع من السوق الرقيق الفسيح، بيقول لك: الواد ده أتهبل ولا إ ايه؟ أنت يا ابني بتسمع إيه اللي حصل لك؟ أنا سايباك كويس، أنا مش داخل الامتحانات، أنا ما عادش ما حدش يقول لي، واحد يقول لك: إزيك؟ أنت ما تقوليش إزيك أنا مش عايز. إيه الاستجابة العجيبة اللي بتصل أحيانا لبعض الدروس؟ هي وضحت المشكلة عندي يعني بس عموما أنا بحاول اعمل احترازات اهو، ده ما حدش قال ده. يعني أنت أنت عندك التزامات، عندك واجبات في حياتك، لأن برضه يعني المصطلح يعني بقى مبتذل الفترة الأخيرانية، مصطلح الهشاشة دوت، ولذلك أحاول أعمل درس قريب إن شاء الله آه، لأن برضه الناس فعلا الجيل ده مظلوم، هو مش بس هو اللي عنده هشاشة، هو اللي صلحها لنفسه، هو مفعول به، هو صنعت، هو يعني يعني زي فكرة برضه الكتاب أن أنت الواقع ضغطك وعيشك حياة معينة بقى ده منتج، طبعا أنت بتساهم في ده المهم يعني.
فأنا عايز بس حالة من التوازن، هحاول أذكر دلوقتي حاجات تساعدنا، وأظن كريم شيخ كريم كان قال كريم حلمي في الدرس قال بعض الحاجات الجميلة برضه لو تسمعوا الدرس، اللوا سكر رقيق من الحاجات اللي بتفيدني بصراحة عموما قراءة السير الذاتية أو سماع للي ما لوش بل للقراءة بتكتشف أن الحي راجل مر بكام مرت بابتلاءات كتير أوي، وبعدين عايش حيينته. حتى كنت لسه بقول لبعض إخواني من الحاجات اللي قابلت مغادرة الشيخ فهد اللي كان اسمه إيه؟ شيخ اسمه إيه؟ نسيت اسمه، بتاع فايز الكندري الشيخ فايز الكندري آه، حتى إنزل أظن كان له حلقات موجودة على اليوتيوب ونزل تجربته في كتاب، وأزاي مر بازمات رهيبة؟ أنت قاعد بتسمع التفاصيل هو وغيره، يعني الحياة ما بتنتهيش، يعني أنت في حدث من الأحداث أنت ممكن لا قدر الله لو حصل لأي حد بتقول ده حياته انتهت. في ناس مرت بازمات وحياته ما انتهت.
واحد يقول لي: طب وافرض حياته انتهت؟ قال لك: يا اخي لا تقتل المتعة يا اخي. يا سيدي لو حياته انتهت زي ما ربنا سبحانه وتعالى قال في سورة يوسف عليه السلام بعد ما أخبر الله سبحانه وتعالى أن بعد ما كلمه الملك وقال: إنك اليوم لدينا مكين أمين، وإن يصيب رحمتنا من نشاء. ربنا قال بعدها على طول: ﴿وَلَأَجْرُ الْآخِرَةِ خَيْرٌ﴾ [يوسف: 57]. يعني مين برضه اللي قال أن نهاية الدنيا؟ طب ما قصة غلام الأخدود ونهاية الناس لما تلقى في النار وشقت لهم الأحاديد، من الذي قال أن هؤلاء الذين ألقوا في النار كده حياتهم انتهت؟ لا ده بالعكس ده كانت بداية النعيم، فقال لها الطفل: يا أمه اصبري فإنك على الحق.
فقراءة عموما السير الذاتية، ولا سيما لصصحابة النبي صلى الله عليه وسلم والتابعين وأتباع التابعين، السيرة كاملة، السيرة كاملة مش مقتطفات. وهنا يعني هاجي لكم نقطة خارج الدرس شوية، بس يعني بالنسبة لي أنا شايف أن هي مهمة، لأن أنا برضه الفترة دي مشغول بشوية بمسألة صناعة التوازن. في فرق بين قراءة مقتطفات من مثلا، أنا بقول ده ليه برضه؟ لأن أنا المرة اللي فاتت نصحت بقول لكم أن أنا دايما سايب على المكتب جنبي مختصر السير أعلام النبلاء. فبعض ناس ممكن لما بييجي يقرأه بيعملوا نوع من الإيه من نوع من اسمه إيه؟ يعني الصدمة والإحباط.
في فرق بين القراءة في الكتب، كتب السلوك مثلا، الكتب المخصصة للمواضيع، وبين قراءة النصوص كاملة في الباب. ودي يا جماعة أنا عشتها، وأسأل الله سبحانه وتعالى أن يمن علي قريبا إن شاء الله بشرح كتاب الأدب المفرد وغيره من الكتب زي شمائل النبي صلى الله عليه وسلم. ميزة القراءة في كتب النصوص على بعضها، أما بتيجي تقرأ كتاب السنة على بعضه أو القصة على بعضها، أنك بتشوف الحياة كاملة، يعني ختام الأدب المفرد وغيره أنك بتشوف الصحابة في لحظات الضعف ولحظات القوة، في لحظات الذنب وفي لحظات التوبة، بتشوف الحياة البشرية كاملة على بعض، غير الكتاب الذي ينتقي لحظة البطولة فقط، غير الكتاب الذي ينتقي لحظات النجاح فقط.
فأنت هنا مش شايف الحياة كاملة، فبيجي لك إحباط، غير لما بتشوف الصحابي أذنب وشاف امرأة وقبلها وقال فعلت فيها كل شيء إلا الجماع، وراح للنبي قدام الناس قال له: يا رسول الله أنا عملت كذا. النبي صلى الله عليه وسلم، فنزلت: ﴿إِنَّ الْحَسَنَاتِ يُذْهِبْنَ السَّيِّئَاتِ﴾ [هود: 114]. قال رسول الله صلى الله عليه وسلم: «هذه خاصة للناس عامة؟» قال: «للناس عامة». لما تشوف أبو ذر وهو من هو يقولوا: ما قدرتش أمسك نفسي وشتمت وعيرت، فالنبي بيقول له: أنت عيرته؟ يقول له: آه عيرته، دي أمي! بتشوفهم في لحظات الضعف ولحظات القوة، تشوف الحياة على بعضها، ده بيصنع عندي توازن.
فقراءة القصة كاملة وسماع السلسلة كاملة هي دي مش، بصوا يا جماعة، ما هي مشكلتنا في إيه؟ أن إحنا، وأنا كنت كاتب تغريدة قريب في المعنى ده، أن إحنا بنكون تصوراتنا الكلية من تويتة ومن بوست ومن كتاب أو من كتيب أو من درس، وبعدين نتهم الكاتب أو اللي ألقى ده.
إن هو ضللناه، وإن هو ما قلناهش الحقيقة. طب ما هو انت سيبك منه، سيبك من المتكلم، ما انت ادي لنفسك فرصة فانظر للصورة كاملة. دي من وسائل برضو النظر إلى السماء، ووسائل الخروج من الضيق.
الفكرة انك ادي لنفسك روح، وده برضو على فكرة للناس اللي بتقرأ في التاريخ كتير، تلاقيهم ما بيحصلهمش بلبلة؛ يعني مثلاً لا قدر الله لما بيحصل سقوط لدولة من دول الإسلام ما بيضطربش. قرأ قبل كده الكعبة هدمت، وقرأ قبل كده القرامطة أخدوا الحجر الأسود. لما بتيجي تقرأ في المغني وبيشرح المدن، فهو بيقول لك إيه؟ المتن بيقول: تقبل الحجر الأسود إن وجدته. انت متخيل الراجل بيتعامل عادي جداً يقول لك لو لقيته بقبله، هو ما هو كانوا واخدينه ساعتها! النظرة على التاريخ من فوق، وده برضو اللي القرآن بيعمله، نظرة للكلية بتخليك هادي شوية مش عند كل حدث.
في شخصيات هلوعة ما فيش فايدة، بني إسرائيل في كل أزمة: أوتـينا من قبل أن نأتي ومن بعد. البحر: مش قلت لك انت هتغرقنا؟! كل ما يحصل لهم أزمة اضطراب وهلع. فالإنسان قراءة التاريخ، السير الذاتية، الكتب الكلية، زي ما قلت لك بتمر كده على السنن كاملة فتجد توازن.
وده على فكرة عشان برضو أصرح لكم ميزة الدروس دي، إن هي فيها نوع من الدردشة، فتجدوا فيها بوح ببعض الأسرار. ده من الأسباب اللي مخلياني متردد جداً في درس إشكالية الجمع بين الدين والدنيا؛ لأن المسألة هي مش درس ولا معادلة هتقرأها هتجمع لك بين الدين والدنيا، لأ، هي أنماط كثيرة مختلفة من الدين. لما بتيجي تقرأ النصوص على بعضها: نص بيدوم الدنيا، ونص صحابي كان غني، أنا كنت لسه برضو بقرأ قريب في جامع بيان العلم وفضله، فتجد فصل في ذم الدنيا، الفصل اللي بعده التابعين والصحابة، والصحابة والتابعين وأتباع التابعين والعلماء اللي كانوا أغنياء جداً، اللي بعده اللي اختاروا التقلل من الدنيا. تحس إن هو قاعد دش سخن ودش ساقع، دش سخن لغاية لما انت تضبط بقى، توازن، يحصل لك حالة من التوازن، يفهمك إن الحياة مش اختيار واحد.
فده ميزة، غير لما واحد مثلاً يقرأ ينتقل فصل من أي كتاب، من كتاب مثلاً الزهد، من كتاب جامع بيان العلم، حاجة معينة فصل واحد فقط. وخدوا بالكم، ده مش مشكلة، المشكلة أن تقوم ببناء تصور كلي قطعي من ده! هي دي المشكلة، من هذا الأمر، هي ده الإشكال، ثم تنافح عنه، ثم تصدم في غيره، فايه؟ فتنتكس بقى وتولول واللي حصل ضحك علينا!
فالخلاصة إن الإنسان لما بينظر للعالم، وده اتكلمت بقى في درس النظر إلى السماء: أن تخرج خارج هذه الدائرة قليلاً ثم عد إليه. مش هقول لك سيب مشاكلك على طول، أين اوقات الخروج من الهموم؟ فين دي في حياتك؟ يعني فين الوقت اللي احنا ممكن نسميه اللي بتفصل فيه؟ افصل شوية، بتفصل أمتى؟ لما الزرار بيتضغط عليه على طول، على طول في ضغط، ضغط عليه بيعلق، أنت محتاج نفسك تفصل.
طبعا المفروض ده يكون في الصلاة، قيام الليل، في الأذكار. طب لو أنا مش عارف ده، اعملها أسبوعياً، درس فيه جنة والنار تراها رأي العين، جزاكم الله خيراً أرحنا بها يا بلال، قرة عيوني في الصلاة. لازم يكون فيه فصلات في حياتك، يعني خد يوم كده إجازة، اقفل موبايلك، لسه بقول لأحد إخواني: أنا عايز أجيب موبايل اللي هو القديم دوت اللي ما فيش فيه أي حاجة غير الزرار اللي بيرد واللي بيقفل، وأثبت يومين أو ثلاثة في الأسبوع يكون هو اللي معايا.
كم يا جماعة الإشعارات اللي بتجي لنا مهول، مهول! فانت لازم يجي لك وقت تريح فيه الضغط المتواصل المتتالي ده، وما أجمل أن الفصل ده يكون بطاعة الله سبحانه وتعالى مع إخوانك؛ ما اجتمع قوم في بيت من بيوت الله يتلون كتاب الله، تصلي قيام ليل، تخرج من هذه الحالة هتبقى إنسان عندك حالة من السواء النفسي شوية، ده احتياج. اللي أنا بقوله ده احتياج نفسي، الصلاة يا جماعة زي ما هي عبادة هي احتياج، انت لزلك، وأنا كنت قلت لكم قبل كده الشيخ سامي عملي في كتابه لماذا يطلب الله من البشر عبادته، وان كنت أنا العنوان شايف إن هو أيا كان يعني، الكتاب اتكلم عن احتياج الإنسان للعبادة وقال إن العبادة أصلاً فكرة الكتابة المركزية مع آثار رائعة نقلها وخصوصاً عن ابن رجب وغيره، ابن القيم، إن العبادة احتياج، وأنا اتكلمت في ده في درس أجوف.
فانت لما ما بتديش الاحتياج ده، أنت تقاد بصورة خاطئة بقى هنا، بتسير في المسار الخطأ؛ لأنك أنت أصبحت هنا جائع وبتتغذى غذاء خطأ فبتسير في الاتجاه الخطأ. فمن وسائل أيضا الخروج من، أو الهروب قبل الوصول للمنطقة المظلمة، أن انت زي ما قلنا انك أنت بناء أوسع شوية، يكون لك مصادر تلقي غير الإعلام، يعني وسع مصادر التلقي بتاعتك، اقرأ الفكرة كاملة، بلاش مصادر التلقي بتاعتك تبقى السوشيال ميديا بس، أنا أو أفضل أنا رأيي أنا الشخصي ده اللي أنا باحبه: انك تسمع أكتر من شيخ، ما أحبش انك تسمع لشيخ واحد، وأن يفضل كمان مجالات مختلفة لو أنت تستطيع.
أنا هنا مش بتكلم على البناء، مش بتكلم على التركيز مثلاً في بناء مذهب فقهي ولا بتدرس أصول ولا بتخلص باب فانت محتاج تركز مع شيخ، لأ، أنا بتكلم على السماع العام، توسع أفقك. توسيع الأفق ده بيدي رحابة في البتاع، وبيدي الأمور حجمها. فزي ما قلنا مسألة ده هيخرجك أيضاً من ضغط المجتمع، السير الذاتية والتاريخ تعرفك أحجام المشاكل اللي مروا بها الناس، وأنت لست بدعاً من البشر. واللعبة الشيطانية المشهورة: أصل مشكلتك مختلفة عن الباقيين! اللعبة الشيطانية المشهورة دايماً يحسسك انت مشكلتك مختلفة، أنت ابتلاءك أعظم ابتلاء في الدنيا.
وده اللي حصل لما النبي صلى الله عليه وسلم مر على امرأة تبكي على فقد ولد لها، وقال النبي صلى الله عليه وسلم: «اتقي الله واصبري». ويبدو هنا إن هي تعدت الحد المأذون به شرعاً، وقال: «اتقي الله واصبري». قالت له إيه؟ هنا الرد الدفاع النفسي على طول: أصل مشكلتي غير مشكلتك، إليك عني فإنك لم تصب بمصيبتي، أنا مشكلتي أكبر، أنتم بتقعدوا تدونا دروس تقولوا لنا اصبروا أصل أنتم مش حاسين بمشاكلكم، أنتم مش عارفين إيه المشاكل. انت أصلاً، يعني ما هو خلاص، ما تصبرش، وسابها ومشي النبي خلاص، يعني بلاش فتراك يعني بس.
وده أيضاً من فقه النبي صلى الله عليه وسلم وحكمته ورفقه صلى الله عليه وسلم، برضه لما يكون واحد رافض هنا ما تضغطش عليه نفسياً، فتركها النبي صلى الله عليه وسلم. فلما جت له بعد كده، وده زي ما قلت لكم، أنا مش فاكر قلت لكم أنا قلت من الآخر، الحديث ده كان يعني أنا تصورت قبل ما أسمع نهاية الحديث، لما جت له بقى بعد كده تعتذر، قالوا لها: أنت مش عارفة ده النبي، ساعتها ما كنتش أعرف، فراحت له وبتعتذر. فالنبي صلى الله عليه وسلم قال لها إيه؟ ما قالهاش: طب معلش بقى خدي بالك المرة الجاية وكده، لأ، قال: «إنما الصبر عند الصدمة الأولى».
فلابد إن في وقت للتعليم ماشي، خلاص وقت الأسى والحزن عدى، لازم نتعلم، يعني أحياناً التعليم مؤلم لكن لازم نتعلم المعنى ده، الصبر عند الصبر. فيه معاني يا جماعة ثقيلة، أنا قلت ده في الدرس الأخيراني بتاع سورة البقرة: واستعينوا بالصبر والصلاة. فيه ناس عراي بتقابله الدكتور أحمد سيف ما بيحبوش يسمعوا كلمة اصبر، مش عايز يسمع كلمة الصبر دي في حياته، وعايز حلول، كل حاجة يعمل لي حل، كل حاجة هي عبارة عن زرار بيتضغط عليه، يعني انك تقول ده الولد ابني لما باقول له يقول لي النت معلق، باقول له اصبر، يقول لي لأ مش هاصبر، شوف حل! طب أشوف لك حل أعمل إيه يعني؟ اطلع أشد النت من فوق؟! أعمل أنا إيه في النت؟ أصل النت بطيء، أنا هنزل أزقه؟ أنا هعمل أنا إيه؟ أصل أنا عملت الراوتر ريستارته، هو في حاجات هتعمل لها إيه يعني؟ عصر السوق كل حاجة عايز لها حل حالا.
أنا في يا جماعة حاجات هي حلها الصبر، لما راحوا لسيدنا موسى قال: استعينوا بالله واصبروا إن الأرض لله يورثها من يشاء من عباده والعاقبة للمتقين. في حاجات حلها الصبر، لابد أن نستعين بالصبر، فده برضه مهم. فالنبي صلى الله عليه وسلم قال لها: «إنما الصبر عند الصدمة الأولى». وهذه الابتلاءات المتتالية عاملة زي الأحمال الثقيلة في الجيم كده بتقوي عضلاتك، ودي برضه بتقوي نفسيتك لما بتحسن التعامل معها، عجبًا لأمر المؤمن إن أمره كله له خير.
يبقى المرة دي حاولنا ننظر إلى السماء من زاوية تانية، نخرج نشيل غشاوة من على عينينا بطريقة تانية شوية مع مع الدرس، أهمية سمع الدرس الأول، نظر الحياة المرة دي دي صورة أنا بسميها صورة أفقية شوية، مش بالصورة الرئيسية، توسع الدنيا شوية. التوازن من النظر للحاجة على بعضها، سواء الكتب اللي بنقرأها، الأفكار، أوسع دائرتي شوية، أوسع دائرة تلقي بتاعتي شوية، اه، ما خدش أمور بصورة قطعية حسمية وأنا واخدها من مصدر معين بسيط.
مزاحمة همومي، السفر إلى عالم الغيب، قيام الليل مهم جداً جداً سيهون علينا كثيراً كثيراً. النبي صلى الله عليه وسلم في أحلك المواقف كان يصلي، كان إذا كربه أمر صلى الله عليه وسلم، في غزوة بدر قام يصلي، في غزوة الأحزاب قام يصلي صلى الله عليه وسلم، في الاستخارة انك بتصلي، في الابتلاءات تصلي، فمهم جداً إنسان يتعود، يتعود الصلاة. الأثر المشهور ابن عباس لما نعي له أخوه وكان في الطريق أووقف الدابة وقام يصلي وقال، رضي الله عنه رضي الله عنهما ابن عباس قال: قال الله سبحانه وتعالى: ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: 45]، وقام يصلي. شف لما جالوس خبر على طول محتاج زاد في اللحظة دي، هذا من فقهه رضي الله عنه فقام يصلي، موجود بيذكروه كتير الآية: واستعينوا بالصبر والصلاة.
فده كان درس النهاردة، أسأل الله سبحانه وتعالى أن أنا أكون قدرت أوصل الفكرة اللي عايز أوصلها لكم، بدون ما أعمل لكم مشاكل، زي ما كل مرة بحس إن الدروس بتزود المشاكل مش بتحلها، بس كويس يعني ادينا بنعمل أي حاجة في الحياة.
ربنا يفتح عليكم ويسددكم ويتقبل منكم. وسواء في التعليقات هنا أو في أي حتة لو في مواضيع أنتم شايفين إن احنا حابين تناولها قدر المستطاع كده، أسأل الله سبحانه وتعالى التوفيق. حاول الأمسيات دي زي ما قلت، حافظ على فكرة الدردشة صورة مفتوحة شوية، هحاول إن شاء الله أتكلم على موضوع التدين، اه، دعواتكم بالتيسير كده، شرح الأدب المفرد، بصراحة استفدت جداً شرحه لطه ناجي، وبإذن الله أحاول حتى أستأذنوا كده ونستعين بالله ونبدأ في الطرح إن شاء الله قريباً، دعواتكم بالتيسير.
أسأل الله سبحانه وتعالى أن يفتح لكم وأن يسددكم وأن يصرف عنا الهم والحزن، وأن يوفقنا سبحانه وتعالى لفعل ما يحب ويرضى. أسأل الله سبحانه وتعالى العزيمة والرشاد، نسأل الله سبحانه وتعالى أن يعزم لنا على أرشد أمورنا. سبحانك اللهم وبحمدك، أشهد أن لا إله إلا أنت، أستغفرك وأتوب إليك، والسلام عليكم ورحمة الله وبركاته.