د. أحمد عبد المنعمبسم الله الرحمن الرحيم، والصلاة والسلام على رسول الله صلى الله عليه وسلم. أرحب بكم، وأسأل الله سبحانه وتعالى أن يجعل هذا اللقاء أو الأمسية التربوية نافعة لي ولكم، وأن يتقبل الله سبحانه وتعالى أعمالنا جميعاً.
لقاء اليوم عايز أقسيمه إلى قسمين؛ القسم الأول أشبه بمقدمة بعض النصائح بخصوص الوضع الحالي، يعني كثرة النقاشات والأسئلة اللي بتجي، ولأسف قلة الدروس اللي الواحد بيديها، فقلت مجموعة من النصايح أقولها في الأول كده إن شاء الله. يعني نخلص من النصايح دي لمجلس اليوم ولقاء اليوم، اللي هو بيتكلم بعنوان بناء الأعمال من خلال سورة الحشر، وهو أصلاً النصف التاني من اللقاء هو أحد الحلول للقضايا اللي أنا هتكلم عنها في النصف الأول.
يبقى النصف الأول إن شاء الله –مش لازم يبقوا نصين قصاد بعض يعني– المهم الجزء الأول مقدمة فيها بعض النصائح، ثم بعد ذلك إن شاء الله نخلص موضوع الحق الأساسي للقاء، وهو شعبة بناء الأعمال أو مجموعات العمل، زي ما نتناقش مع بعض إن شاء الله بإذن الله سبحانه وتعالى.
طيب، بالنسبة لمجموعة النصايح اللي حابب أبدأ بها في الأول قبل اللقاء؛ اللي عاش وضع معين من التدين أو الالتزام، أو أياً كان الاسم، من فترة طويلة، ثم مع انتشار السوشيال ميديا بقى وسائل التواصل، حصل نوع من التغير في تصورات التدين وتصورات الالتزام والأعمال، وطبعاً تغيرات الظروف الكتيرة، سواء تغيرات الظروف الاقتصادية والاجتماعية والسياسية، كل التغيرات دي حصل لها انعكاس على طبيعة تدين الناس.
وإن شاء الله سبحانه وتعالى، أسأل الله سبحانه وتعالى السداد والتوفيق، أحاول –لو الموضوع اكتمل– هحاول إن اللقاء الجاي والأمسية التربوية القادمة تكون عن قضية التدين؛ معنى التدين وأركان التدين، يعني بتبقى جولة كده يعني قضية التدين. وكنت كتبت تغريدة قبل كده أن لو أنا عايز أعمل درس عن قضية وبصراحة استقبلت مجموعة من الإجابات كانت جيدة بفضل الله، فتحت الآفاق عن تصورات الناس، عارف إزاي؟ وده نقطة مهمة، بل أنا أصلاً كان غرضي من الدرس الأول اللي هو سورة المرسلات والدرس التاني بتاع النهاردة إن شاء الله، أن هي مقدمات تساعدنا في الكلام عن التدين، بحيث وأنا بتكلم أحيل إلى هذه الدروس أو دروس أخرى.
الوضع الحالي مختلف نوعاً ما عن الوضع القديم. الوضع القديم كان النشاطات أكثرها نشاطات حركية على الأرض، يعني ما كانش فيه أصلاً إنترنت منتشر بهذه الطريقة، وكان أغلب النشاطات الدينية بتكون نشاطات –أنا ممكن أسميها نشاطات أرضية– على الأرض مش في الفضاء، مش في الفضاء الإلكتروني، مش في الإنترنت، أغلبها نشاطات تحفيظ قرآن في مقرأة، دروس علم، مجالس وعظية، يعني كانت أغلب النشاطات، حتى الخلافات اللي ما بين التيارات الإسلامية كلها كانت خلافات على الأرض؛ خناقة على مسجد، تلاقي خلاف مش عارف على إيه، تلاقي نقاش في مسائل، فكان الشخص منهمك، وجزء كبير من طاقته بتخرج في الواقع الحقيقي على الأرض، أياً كان بقى تقييمنا أن ده كان ممكن فيه نوع من –طبعاً كانت فيه أخطاء، وكان فيه– وده مش نقاش النهاردة؛ استدراك هذه الأخطاء أو تصحيح هذه الأخطاء، لا أنا أقصد بأوصَف الحالة دلوقتي، أنا بتكلم بصورة توصيفية قبل ما أنتقل للصورة التقييمية.
فكان أغلب النقاشات وأغلب الخلافات كانت على الواقع الأرضي. بعد كده حصل توقف لأغلب النشاطات الدينية على الأرض، وانتقل ده أغلبه إلى الواقع الافتراضي، اللي هو وسائل التواصل أو الإنترنت عموماً، والخلافات اكتسبت أيضاً واقع كلامي أكثر منها إلى واقع الأفعال، مع انفتاح عموم المسلمين وعموم الإخوة والأخوات على مسائل كانت منغلقة شوية في الأروقة؛ قضايا كلامية، الخلافات الكلامية في المسائل العقائدية، خلافات مذهبية كانت بتكون موجودة طبعاً، ولا زالت هي موجودة في الماضي وفي الحاضر ولا تزال، لكن أقصد كانت منحصرة في أروقة معينة، وكان اللي بيطلع عليها واللي بيقتحم في تفاصيلها اللي قطع شوط معين من العلوم الشرعية.
بل كان ممكن الأخ يسمع عن مسألة من المسائل اللي فيها خلافات وتكون مسائل من اللي مولعة الدنيا بين التيارات الإسلامية، لأنه مش متفهم أو ما عندوش وسائل الوصول إليها، كان لا يلقي لها بالاً، هيعمل إيه يعني؟ دلوقتي أي مسألة تتفتح في أي باب من الأبواب، في أي فرع من فروع العلم العامة، عموم الناس بيشارك في هذا الأمر، فده بيضخم القضية، بتاخد حجم كبير، وتبقى عاملة زي النار لكل ما واحد يساهم فيها حتى لو بلايك، بتبقى أشبه بالحطب اللي بتزود القضية دي.
فأصبح للاسف عندنا نوع من الفراغ الديني العملي في الواقع، تاني، أصبح عندنا نوع من الفراغ الديني العملي على مستوى الأعمال. يعني تجد مجموعة من الناس ساكنين في مكان، وتجد المسجد اللي بيصلوا فيه ما عدش فيه حرص حتى على صلاة الجماعة، ما عدش فيه تعليم للناس قراءة الفاتحة حتى، ضبط قراءة كتاب الله سبحانه وتعالى، أي نشاط اجتماعي حتى أو خيري بقى في تكاسل عنه، أي نشاط تعليمي، أي نشاط حركي على الأرض، في أسباب كتير جعلت في زهد في هذه الأمور أو تكاسل، وده هحاول أتكلم عنه إن شاء الله في خلال سورة الحشر النهاردة في مسألة بناء الأعمال.
الفراغ ده اللي هو التوقف العملي –مش بتكلم على نقص معلوماتي، بتكلم على الفراغ العملي في حياتك– يعني لو كل واحد دلوقتي عايز يبحث عن مستوى الأعمال الواقعية في حياته على الأرض، مش إن هو –وده أنا لا أقلل منه أبداً– مش إن هو مشارك في برنامج تعليمي، أو في معهد، أو في مساق، أو في أياً كان؛ لأ، أنا بتكلم على مستوى أعمالي على الأرض. غياب الواقع العملي ده طبيعي جداً عند الإنسان أنه بيصنع حالة من الجوع النفسي للأعمال. النفس لما بتنشغلش بأعمال –وبرضو تاني هذا يعني أن الأمور اللي على الإنترنت ليست أعمال، نعم هي أعمال، العلم من الأعمال– لكن أقصد أن حركة الإنسان على الأرض بتفرغ جزء كبير من طاقتها، حتى القضية الدنيوية، يعني أنا الشخص اللي بيكون فارغ دنيوياً بيحصل له مشكلة، ليه غياب الواقع الحركي في حياة الإنسان الدنيا والدنيوية بيعمل نوع من طاقة محبوسة داخل الإنسان بتخلي الطاقة دي دماغه هنا تبدأ تتحرك في الأماكن عايزة تفرغ الطاقة؟
فممكن تتجه للفرجة على اليوتيوب على القضايا التافهة، الانشغال بخلافات هي مش أُولا في حياته، هو بداخله طاقة، لما الإنسان بيفرغ الطاقة دي في مسارها الصحيح، سواء الديني أو الدنيوي، بيشعر بنوع من التوازن النفسي، على المستوى حتى العملي بيحصل نوع من التوازن، بيحقق نوع من أن هو بيحقق ذاته بروح شغله، ويرجع، بينزل يعني حركته دي بتفرغ جزء من طاقته، بتدي له نوع من التوازن، فيه احتياجات نفسية سدت، تم تغذيتها من خلال الحركة.
لما ده غاب، فأصبح في نوع من –عايز أقول– أصبح كأن النفس بتتآكل، قاعدة بتأكل في تتآكل النفس، وبتبحث عن سد الفراغ العملي ده بأي أنشطة بقى؛ بخناقة على الفيسبوك، في حفلة بيحفلوا على واحد دي مسألة داخل يناقش فيها وما عندوش فيها أي معلومات، بخلافات، أياً كان، الفراغ ده هو بيبحث عن سده إزاي؟ بيطلع طاقته دي. طبعاً مش كل الناس كده، فيه ناس بفضل الله بتطلع طاقتها في الاتجاه السليم.
زي بالضبط الفراغ اللي عملته كورونا، لما جت كورونا، كتير ليه ليه ناس كتير دخلت في أزمات نفسية، بل أحد أنواع الاكتئاب، وإن كان ده مش توصيف دقيق يعني، اللي هو بيسموه اكتئاب بييجي في الشتاء؟ توقف الحركة في فصل الشتاء في بعض الدول، توقف الشلل التام، بيعمل نوع من الاكتئاب عند الناس، برضو مش لاكتئاب بالمعنى الحرفي يعني، لكن أقصد بمعنى الإحباط، وده حصل في كورونا، ناس كتير في أزمة كورونا في بداية الأزمة والفزع والهلع اللي كان موجود مع حالة الحجر الصحي اللي كانت موجودة في أغلب الدول، ده خلى الناس تدخل في حالة من التوقف والشلل الحياتي لحياتها الحركية، دخلهم برضو في نوع من الإحباط والاكتئاب.
وده واقع دلوقتي في حياتنا الدينية، لذلك احنا محتاجين نتفهم ده عشان نعرف إزاي نتغلب عليه أو على الأقل نتعامل معه، ما نخليهوش يسيطر علينا، ما نخليش حالة الفراغ العملي اللي في حياتنا دي تدخلنا في اكتئاب وفي إحباط وتدخلنا في انصراف بقى عن الدين أو أفكار خاطئة ممكن العقل يتجه إليها، لأن حالة التوقف الحركي دي خلّاتك بتمارس أغلب دينك من بيتك، حتى لو أنت بتتصل بمئات والوف من الناس من خلال التواصل الاجتماعي، لكن أحياناً ده بيشعرك بنوع من الوحدة، وأنك أنت بمفردك، لأن ما حدش مطلع على واقعك، ما حدش متصل بك اتصال مباشر، والثبات بمفردك صعب.
الإنسان بيمر بتقلبات، الواحد بيجيله أسئلة أحياناً، الشخص بيكون داخل يسمع شيء علمي، يروح يشوف حاجة إباحية، فمسألة الاعتماد الكلي على التواصل الاجتماعي ده برضو تاني باكرر، ودي من النقاط اللي هتكلم عنها في المقدمة؛ مش معنى أننا بنذكر سلبيات شيء أننا نتوقف منه أو نتركه، أنا بكلمكم من خلال وسائل التواصل، أنا بتواصل معكم دلوقتي من خلال قناة تلجرام اللي هي وسائل التواصل، لكن أقصد استحضارك، يعني مثلاً لما تسمع كان درس جميل –وإن كان طويل شوية، عايز تركيز، بس رائع– للشيخ عبد الله الوهيبي، وبيتكلم عن أثر –فكر اسم الدرس، القراءة باين في في زمن مواقع التواصل، حاجة زي كده– والكتب الكتير والدراسات اللي اتعملت في سلبيات مواقع التواصل، هل ده معناه انك تتركها؟ لأ، يعني لما القرآن ذكر الذم للدنيا، هل القرآن لما بيقدم الحل أنك تترك الدنيا؟ لأ، أنت تكون على حذر وتكون على وعي وأنت في هذه الدنيا.
كذلك أنا لما بكلمكم دلوقتي على شكل الدين اللي اتغير أو شكل التدين أو شكل الحياة كلها، مش بس الدين، يعني في وظائف ظهرت من بعد كورونا، يعني الوظائف اللي بقت أونلاين دي حاجات بقت زيادة جداً وزادت، وده حصل تغيرات كتير، موقع زي زوم الأرقام انتقلت فيه تضاعفت عشرات المرات بسبب أزمة كورونا، ففي تغيرات لشكل الحياة بيحصل، وأيضاً تغيرات شكل الحياة بتسمع بشكل أو بأخر في التدين بتاعنا والشخصيات، وركزوا في النقطة دي؛ الشخصيات اللي ما لهاش جهود علمية قوية فردية، أو عندها طاقة تعبدية لوحدها، اللي اللي ما عندوش الحاجتين دول بيتعب لوحده في زمن بقى الانفصال عن الحركة على الأرض، وزمن أن هو يكون لوحده، بيشعر بنوع من الفراغ في حياته التاني، وحتى مش كلهم بس، بس الشخصيات العلمية والشخصيات التعبدية –إن صحت التسمية– بيعرف يمارس جزء كبير من دينه بمفرده نوعاً ما، لكن غالب الناس ما بينطبقش عليهم الاتنين دول، مش مش جزء كبير من يومه، مش مثلاً بيقضي ستاشر ساعة في طلب العلم، ولا بيقضي بقى بيتنفل وبيصلي قيام ليل كتير ونوافل وأذكار، فبالتالي استطاعت أنه يسد جزء كبير من الجوع اللي بداخله، لأ، أغلبنا –اللي هو أنا زيي وزي أغلب الناس الواحد بيشوفهم في حياته بيقابلهم– لأ، هو في جزء كبير من حياتي بيأخذ طابع حركي، محتاج يحتك مع الناس.
الطاقة ديت اللي للاسف ما وجدتش تفريغ لها، بل أنا عايز أقول لكم والله يا جماعة، وهي دي فكرة أن هي اسمها أمسية تربوية أن هي نوع من الدردشة؛ كتير من الشباب كان بيحل بعض أزماته النفسية من خلال أنه بينخرط في الواقع، أنه بينزل يلتحق بجمعية خيرية، أنه بيلتحق بمسجد بيمارس فيه نشاطات، اللي بيقوم على عمل من أعمال الدين في الأرض، هو كان جزء كبير من الطاقة –لأن من وسائل معالجة النفس، أو مش بس معالجة النفس، إنقاذ النفس قبل أن تسقط فيما أسميه أنا المنطقة المظلمة، ودي برضو إن شاء الله هنتكلم عنها في درس لوحدي– أنشغال النفس بالشيء النافع، قعود النفس عن الانشغال بيدخل النفس في دايرة أن هو يلوم نفسه أنه فاشل، وبعد كده مش لاقي حاجة يعملها فيفشل أكثر، فمش لاقي نفسه أنه فاشل، هيفرغ طاقته دي في شيء تافه أو شيء حرام، فنفسه ترجع تلومه لوم أكثر، والشيطان بيبقى فاهم الدايرة دي كويس، بل بالعكس أحياناً الشيطان يلومه، يلومه على الوقوع في المعاصي، تخيلوا!
حينما يعظ الشيطان، الشيطان يعظ ليه؟ لأنه عايز يدخله لحالة الإحباط وأن أنت فاشل، هناك أمل، ويدخل في الدايرة دي، الدايرة دي كانت بتتكسر بلقاء إخوانك، بحضورك للدروس، بنشاطاتك الحركية على الأرض. لكن أنت أحياناً الدايرة دي لما تيجي تدخل السوشيال ميديا وتلاقي خناقة على مسألة أنت أصلاً ما تعرفش عليها حاجة، فتتخانق وتشتم وتقعد تحفل معهم، أنت بترجع بعد ده بترجع أكثر جوعاً، نفسك لم تتلق الغذاء، بالعكس، فأصبح إن ده الواحد –أنا بكلمكم من واقع سواء رسايل جاتلي أو بعض الشباب بعت لي– هو بيشعر بده، يعني أنا بكلمه ممكن سواء لو حد بيسمعنا في دول تانية أو ما عندوش الأزمات بيبقى كويس، يبقى خير، يعني، لكن أنا بتكلم أن غياب –تاني اللي أنا بتكلم فيه– غياب الواقع العملي على أرض الواقع ثم تحول الدين إلى الواقع الافتراضي.
وأن أغلب الدين بتاعنا ده مجرد نقاشات كلامية لا يترتب عليها الشعور بالمعنى التعبدي حتى للعلم ولا شعور بالمعاني التعبدية، يعني جلوسك على مواقع التواصل لم يثمر طاقة تعبدية أو طاقة إيمانية بداخلي.
بالعكس أحياناً بيزود حالة الجوع النفسي اللي جوايا مع ممكن يكون الإنسان بيمر بأزمات دنيوية أو عدم وجود فرصة وخصوصاً ده بيحصل مع كتير من الأخوات، فرصة دنيوية مثلاً تخرج فيها طاقتها يكون الأمر فيه مباح، يعني ده ممكن يدخل الإنسان في حالات من الضغط والإحباط؛ فالمطالب أن هو يتعامل مع الوضع ده ينتزع نفسه من هذا الوضع. أحد وسائل بقى انتزاع النفس من الوضع ده أنا فيما أسميه بناء مجموعات العمل.
أحد وسائل لانتشال النفس من الوضع الحالي ما أسميه بناء مجموعات العمل، وده اللي أنا كنت عايز أتكلم بقى عنه من خلال سورة الحشر. طيب قبل ما أتكلم على بناء مجموعات العمل اللي هي أحد الحلول المطروحة للخروج من الوضع ده عشان الإنسان ما يجدش نفسه محبط، مكتئب، بيمر بأزمات نفسية وضغط، مش عارف يخرج طاقته بصورة جيدة عشان ما يوصلش لما أسميه بمنطقة المظلمة اللي ممكن ترتد عليه بصورة عنيفة ولأسف تخليه يفقد توازنه.
لما الإنسان يفقد توازنه بياخد قرارات هوجاء؛ يترك بيت الإيمان، يسافر لأماكن، يهاجر لبيئة ما فيش لها أي علاقة بالدين، ممكن ينتحر والعياذ بالله، يعني ممكن ياخد قرارات عنيفة بصورة، مع كمان وضع الحالة الأزمات المجتمع بمر بيها وده برضه جه عايز درس لوحده. أنا ما أسمحش لنفسي من بدري زي ما بيقولوا الوقاية خير من العلاج، ما أسمحش لنفسي أن أنا أوصل للوضع ده.
قبل ما أبدأ برضه بالكلام عايز أقول نقطة مهمة، كنت مجمع شوية نصايح كده بحيث يبقوا في درس لوحدهم يعني نصايح عامة وكده، بس هاخد منهم نصيحة أقولها دلوقتي وأرجع أعيدها في درس النصايح إن شاء الله.
أن إحنا، وده برضه غالب اللي بكلمكم فيه يا جماعة، ده عبارة عن ردود أفعال اللي هي أسئلة جات لي أو لنقاشات أو تعليقات قلتها. من الحاجات الغريبة اللي أنا وجدتها، مش عاوز أسميها خطورة أو إشكالية مثلاً التطبيق الحرفي للمواعظ، خليني أسميها كده. التطبيق الحرفي للمواعظ ممكن بادية الرأي كده الإنسان لما يسمع الكلمة دي شايف أن هي حاجة كويسة، أمَال أنت عايز إيه؟ هو مش أنت بتوعظ عشان نطبق؟ ولكن أحياناً الإنسان لابد أن يكون عنده فكر لتطبيق هذه المواعظ التي يستمع إليها إلى واقعنا، لأن المتكلم لا يحيط بواقعك ويستحيل، وأرجو أن أنتم تركزوا جداً في النقطة ديت.
يستحيل أن إنسان في درس واحد يحيط بكل الأمور احترازات ولوازم الكلام، وده للأسف خلانا كتير واحنا بنتكلم، يعني لو تراقبوا لغة الدعاة في الفترة الأخيرة تلاقيهم بدأوا يكرروا من كلمة إيه، وده مش معناه، واصل أنا مش قصدي، قاعد بيحترز من كتر ما هو ما عدش عارف يطلق الكلام في حين أن العرب كان طبيعي تطلق الكلام ثم الكلام يقيد في موطن آخر.
لما حد كان باعت لي بيقول لي يعني إيه يعني أكتر من حد كمان، أن في بعض الدروس كل واحد في درس معين يعني ممكن يكون أذاه، حس بالدرس ده بيأذيه نفسياً أو الدرس ده مش بيأذيه نفسياً، الدرس ده عمل له مثلاً بلبلة في طريقة تفكيره، أو واحد يقول لي أنا كنت بسمع الشيخ فلان فقال معلومة، المعلومة دي بلبلتني جداً، وتلاقي واحد تاني باعت لي يقول لي كنت بسمع فلان أو فلان أو بسمعك أنت قلت كذا عملت لي نوع من البلبلة.
هو الصح هو أنا المفروض مجموع كلام الشخص يعني أنا عشان أقيم أو حتى أخد فكرة لو أنا يا جماعة عايز أخد مثلاً طريقة القرآن في التعامل مع الدنيا ما ينفعش أبقى حتى القرآن أهو ده أنا قلت لكم أشرف الكلام كلام الله، ما ينفعش أخذه بطريقة مجتزأة. كان دايماً الشيخ مصطفى العدوي أول نصيحة كان من النصايح اللي كان بيقولها لي بيقول لي: اجمع النصوص في المسألة الواحدة.
حتى له كتاب كده كتيب كان نزله زمان اسمه الفقه في الدين، كان عامل بحث في المسألة دي، أنك أنت قبل ما تتكلم في حاجة حاول تجمع النصوص في المسألة لوحدها، ما تجتزأش الكلام. يعني في فارق بين أننا نقول هذا الكلام خطأ وبين الكلام ده ناقص، الكلام ده ينقص ما يكمله. فكرة التطبيق الحرفي للمواعظ بتخلي إنسان يسمع كلمة، أنا كنت بقول أن يستحيل الداعية المتكلم يحيط ويستدرك ويحترز ويبين في درس واحد.
يعني أنا مثلاً انفعلت بقضية ما دنيوية قوي فتكلمت في درس إيه، يعني لما تسمع شيخ بيتكلم عن حقارة الدنيا هل معنى هذا الكلام أن دي دعوة عامة لكل طالب أن يتوقف عن المذاكرة، ولكل طبيب أن يتوقف عن العمل، ولكل لا طبعاً هو ده مش معناه كده. هو مين اللي قال أن ده يستلزم ده؟ خطورة بقى التطبيق الحرفي لده بيعمل نوع يا أما أنا باحبط أقول أنا فاشل وأن هذا الدين لا ينفعني وأن الدين ده أكبر مني، أو أتهم الدين وأقول الدين ده لا يناسب الحياة، هذا الدين نزل لواقع غير واقع، الدين ده نزل لواقع الصحابي.
مثال جميل قوي سمعته من أحد مشايخي الدكتور طه نجا ربنا يحفظه، كان بيشرح حديث راجل راح اشتكى للنبي صلى الله عليه وسلم بيقول أن جاره بيؤذيه، فالنبي صلى الله عليه وسلم قال له: آلق متاعك في الطريق، فالناس لما هتشوف متاعك ملقى في الطريق هتعدي عليك تقول لك أنت ليه عامل كده؟ فتقول لهم والله فلان جاري بيأذيني.
فلما عمل كده الناس عدت عليه بالفعل قالت له أنت ليه سايب متاعك في الطريق في نص الشارع كده؟ قال لهم والله جاري بيأذيني، فيلعنون جاره، معقول جارك بيأذيك؟ النبي صلى الله عليه وسلم وصى بالجار، وإزاي جارك بيأذيك؟ فيلعنون الجار. فجاره لما وجد نفسه يلعن من المارة على هذا الرجل خايف على نفسه فراح جري للنبي صلى الله عليه وسلم -أياً كانت بقى روايات كتير هنا لعنة الله تسبقهم أو قريب- المهم الراجل خاف وراح صالح الراجل خلاه يرجع.
حديث مشهور موجود يعني وفي الأدب المفرد وغيره، فالشاهد الشيخ كان بيعلق تعليق بيقول إيه يا إمير أن نفهم فقه تطبيقات مثل هذه الأحاديث، بين أن واقعة عامة دي نصيحة عامة للنبي صلى الله عليه وسلم، أن هل قال النبي صلى الله عليه وسلم كل من آذاه جاره فليلْقِ متاعه في الطريق؟ لا أنا ما قلتش كده، دي اللي حصل ده بيسموها واقعة عين، يعني إيه واقعة عين؟ يعني دي مناسبة للراجل ده للحالة دي، زي ما في بعض الوصايا كانت بتناسب الشخص ده، فمن اجتمعت فيه مثل هذه الظروف تنفع معه مثل هذه النصيحة.
فالشيخ بيقول لكن أنت ممكن دلوقتي جارك يأذيك فتطلع متاعك في نص الطريق يتسرق عادي جداً، ما تتصورش أن الناس (يعني عادي يسرقوه) أو عادي أن يا سيدي أنت ناس هتعدي هتقول لك لا حول ولا قوة إلا بالله، أنت مطلع في نص الشارع ليه كده؟ تلوم جارك بيأذيني يقولوا إيه؟ يلعن الله هذا الرجل الذي آذاك، عادي الرجل التاني اللي بيتلعن قاعد عادي جداً ولا في دماغه، بيقول لك سمعني أحلى لعنة أنا مش في دماغي جداً ولا.
فهنا ممكن الشخص يقول إيه ده؟ أنا أشك في السنة، السنة لم تأتي بحلول لواقعنا، يا ابني هو هو يعني ليه الطريقة دي في التفكير؟ هو إحنا اللي ما كناش مفهمين كيف نتعامل مع برضه لما واحد مثلاً آه يسمع عن مدح كتاب سير أعلام النبلاء، وده من أعظم كتب الإسلام حقيقة، ويا سلام لو تقرا له مختصر بقى وتهذيب، له تهذيبين كده، تهذيب بتاع الدكتور محمد موسى الشريف وتهذيب تاني سبحان الله نسيت اسمه هأفتكره دلوقتي، له أكتر من تهذيب يعني بس دول أكتر اتنين أنا بحبهم.
فلما نقول إيه يا جماعة خلوا الكتب اللي زي دي جنبكم كده، تهذيب سواء حلية الأولياء تهذيب أياً كان الكتب اللي فيها آثار عن السلف مع فممكن واحد يقرأ ترجمة مثلاً إبراهيم النخعي أو أي ترجمة من التراجم وابن أهدم أي واحد وكان زاهد وكان عايز يطبق الكلام بصورة حرفية لأ، بيقول لك زود إيمانك، عايش كلام السلف، في فرق بين السماع عن المقامات العالية في الدين ثم كيفية الوصول إليها.
السماع يا جماعة عن المقام ممكن ياخد منك خمس دقايق، يعني أنا ممكن أكلمك عن مقام، لو هنتكلم عن مدارج السالكين هأكلمك عن درجة من هذه المدارج عالية جداً تاخد مني خمس دقايق، تطبيقها ممكن ياخد منك عشر سنين، فإحنا عايزين واقعية في تصوراتنا للطريق الذي نسير فيه.
فالتطبيق الحرفي أحياناً أنك تسمع كلمة لشيخ تبلبلك وكده، تسمع واحد مثلاً يسمع كلمة في درس والكلمة مش خاطئة؛ أن الدعاء بيحل المشاكل، واحد تاني سمع أن الاستغفار بيحل المشاكل، واحد تالت سمع أن الصدقة، كل واحد من دول راح يطبق يقول لك أنا مشكلتي ما اتحلتش، فيا أما يحبط ويترك الطاعة أو يتهم الدين.
أيوه ما هو فيه قيود، فيما نشاء لمن نريد أو يعجل له في الدنيا أو تدخر له في الآخرة ويصرف عنه من السوء، تقول لي أصل الشيخ ما قالهاش، ما هيش ممكن يكون قالها في حتة تانية، لا لا يعني لا أتعجل، يا سيدي غلط لا أتعجل في مثل هذه الأمور.
نكمل بقى ندخل في الجزء التاني من الدرس اللي هو أصلاً المفروض كان الدرس معمول عنه، لكن زي ما قلت لكم يعني إيه أنا خدت جزء بس من النصيحة، أنا كنت عامل مجموعة من النصايح لأن طبعا هو يعني من نعم ربنا سبحانه وتعالى عليّ أن أنا سبت الفيسبوك، لكن لأسف يعني بتجيلي رسايل من بعض الأخوة وكده بتشوف فعلاً قد ايه الناس ممكن تنشغل، ممكن يتضحك عليها، ممكن يحصل نوع من ضرب في المحكمات، فالواحد بيبقى مستغرب ليه؟
لذلك أنا من من المنشورات الجميلة اللي قرأتها على التليجرام الشيخ خالد بهاء معلش هأجيبها لكم أقرأها لكم، عجبني قوي جداً فكرة المنشور بصراحة بيقول إيه: بئس الطويلبة الجدد، طلبة العلم يعني، لأنهم بلا محكمات يميلون مع أهون نسمة، يعني أي نسمة معدية كده أي رياح بسيطة يميل معها خناقات ومشاكل تلاقيه على طول.
فيقول: وبئس الإصبع إصبع الفيس يكون القول ظاهر الفساد لا يقره عقل ولم يقله أحد وليس عليه برهان والحجة أنه باطل فيعجل الولد بأصبعه ويعجب به -يعني يحط لايك- ثم يحامي يدافع عنه. بيقول إيه بقى في الآخر: خذ دائرتك وتعالى بعد أربعين أخرى باكياً.
اللي بيحصل فعلاً يا جماعة أن الناس الدين العلوم استقرت ومبنية واللي عايز يطلب العلم والعبادة يعني في في قضايا واضحة جداً في الدين وخصوصاً لعموم الناس اللي زيي يعني اللي هو مش طالب علم متقدم ولا حاجة وتلاقيه شاغل نفسه، وفلان طلع نظرية جديدة في التفسير واللي حق فلان بيذكر الخلافات، يا عم أنت مالك؟ وتلاقيه ضيع يعني بيس وراه مئات من الأخوة والأخوات يعيشوا باربعين سنة في التيه، ولغاية لما ييجي الجيل اللي وراه وهكذا وجيل وراء أجيال عمالة يعني ليه مش ليه ليه ليه نقفك يؤفك عنه ما نؤفك؟ ليه مش عايزين نستقيم؟
يعني ليه ليه الإنسان بيحب الغموض؟ بيحب الحاجات الخفية والدين واضح قدامك أهو، يعني ليه منشغل قوي بالقضايا الكلامية؟ يا عم ما تخليك مع ما تدخلش في أي خلافات، خليك مع كلام السلف، يا عم الزم جمل الكتاب والسنة وظواهر كلام السلف وأما تبقى خلاص تتقدم في طلب العلم وتدرس علوم الأدوات والفروع أنت مش هتسمعني خلاص، أنت مش محتاجني.
نرجع الجزء التاني من الدرس وهو أنا كنت بقول الوقتي أحد عوامل ركزوا بقى معي كده أحد عوامل الخروج من الإحباط دايرة الفراغ، مش بس الإحباط ودائرة الفراغ العملي الموجود في حياتنا يا جماعة أنك تكون ما تكونش لوحدك، ألا تكون بمفردك. أحد أنا بحاول احتجزه أهو أحد وسائل الخروج من الفراغ الحركي والفراغ العملي والفراغ النفسي اللي بمر به الناس ألا يكون بمفردك، وإن اضطر لذلك فالله يعصمه؛ لأن لا يكلف الله نفساً إلا وسعها.
ما حدش يقول لي أصل أنا ظروفي مختلفة ولا استطيع، خلاص الله سبحانه وتعالى يحفظك، لذلك أنا كنت عامل درس برضه زمان قوي بعنوان حتى لوحدك، يعني حتى لوحدك ربنا سبحانه وتعالى يحفظك، لكن أنا بتكلم على اللي يستطيع أن هو لا يكون في هذه الدائرة بمفرده.
طيب إيه الوسائل لده يا جماعة؟ زمان كان عشان برضه أكون أكثر وضوحاً معكم يعني خصوصاً في الواقع المصري يعني كان الخروج من أنك تكون لوحدك بيبقى بحاجة من اتنين غالباً يعني، أما أن في شيخ كبير مشهور فله درس كبير فانت بتحضر الدرس دوت فبتكون ضمن هؤلاء الحضور، تجد ممن يتقاربون معك فكرياً لما بيسمعوا نفس الشيخ اه تجد صحبة.
أو كان إنه بينتمي لجماعة أنا ما أعرفش أعيش لوحدي يا جماعة، ويعني حقيقة بدون خوضه بقى في التفاصيل ده، ممكن بس يعني لو ربنا أعاننا كده نتكلم عنه في درس التدين.
يعني النموذجين دول أنا لا أرى أنهم يعني كانوا بيقدموا حلول جيدة، بالعكس أنا شايف أن كان لهم بعض الآثار السلبية. طيب ازاي بقى ما أكونش لوحدي وفي نفس الوقت الجماعة أنا أنا متاخد منها موقف سلبي؛ لأن في فارق بين جماعة أنت بتعمل إيه؟ انتماء كلي وبين مجموعة عمل، مجموعة العمل ده أنت ضمن عموم المسلمين، لكن بتعمل عمل زي بالضبط مثلا لما بيكون جمعية خيرية أو ده.
لا تطالب الجمعية دي بانتماء كل المسلمين إليها ولا يفعلون العمل الخيري، لا دا هم مجموعة عملوا عمل، أيا كان بقى عمله مع معهد علمي عمله، لكن لا يعمم على عموم المسلمين.
طيب ندخل بقى في النقطة المهمة، أنا قلت المقدمة دي ليه؟ عشان لما باقول كلمة مجموعة عمل أنا لا أقصد بها لا النموذج ده ولا النموذج ده. أقصد أن أنت مع بعض إخوانك ممن تشعر معهم بنوع تقارب، ممكن تصنع ده؛ لأن للأسف وبرضو عشان أكون صريح معكم معلش هو درس النهارده فيه تخبيص كتير، غالب الناس دلوقتي لما بيمروا بالأزمة هو بيبعث بالسؤال يقول لي: نريد حلا.
أيوه من الذي سيصنع لك الحل؟ ليه يا جماعة دايما احنا منتظرين الحل يأتي من خارجنا؟ ليه مستني الدرس الكبير يرجع أو جماعة تتعمل تانية ليه؟ ليه ما تكونش أنت جزء من الحل؟ ليه ما فيش ذاتية؟ أنا قلت لكم إن إن بنسبة ما يعني بنسبة ما بحترس برضو اهو. بنسبة ما اللي بيجُو من القصة ديت اللي عندهم ذاتية في العلم وفي العبادة. فقدان الذاتية أن أنا أبحث أنا عن الحل، مش بس أبحت عن الحل ده، أنا أكون أكثر جرأة وأقول إن تصنع أنت الحل، وأن تكون أنت وأنت جزءا من الحل أصلا. أنت تكون جزء من الحل أكون جزء من الحل ازاي؟
من هذه الحلول أن تكون أن تصنع مجموعة عمل، أنت اللي تصنعها ما تنتظرش إن هي تحصل وبرضو هيبقى في بعض النصايح بعد كده جاي منها إنك ما تكونش مثالي في تصوراتك، والنصيحة اللي قلتها قبل كده وكانت الناس بتزعل منها أن تتحرك بسرعة شوية أفضل من أن تتوقف، يعني هيبقى فيه شوية نصايح بعد كده بس خلينا النهارده نتكلم على لما ربنا سبحانه وتعالى كلمنا عن نموذج عظيم بني نموذج الصحابة وفي سورة الحشر. وسورة الحشر اللي فيها إجلاء اليهود وبتتكلم على قضايا كتير في الإخوة بين المسلمين، وحتى الإخوة الزائفة بين المنافقين واليهود والإخوة الصادقة بين المهاجرين والأنصار، والبداية بقدرة الله والختام بعظمة إنزال القرآن. يعني سورة بصراحة عظيمة، يعني سورة الحشر لها في قلبي وقع خاص، وزي ما كنت قلت في خواطر رمضانية دي من الصور اللي الواحد بيتهيب أصلا.
لكن كنت قلت برضو بنعمة ربنا سبحانه وتعالى عايز يسمع تفسيرها، أن ربنا يعني يسر للدكتور محمد مصطفى عبد المجيد فسرها بصورة اللي حابب يسمع السورة بطريقة تفصيلية؛ لأن أنا مش أتكلم النهارده على تفسير، أنا أتكلم عن وقفة تربوية في آيتين بس أو تلاتة، مش أشرح تفسير التفسير بصورة تفصيلية ترجعوا ممكن تسمعوا اللي عايز يسمع، يمكن يسمع شرح الدكتور محمد مصطفى أو يقرأ لأي تفعيل تفسير من عايز أتكلم على آية ثمانية وآية تسعة وآية عشرة.
التقط بس التقاطات تربوية منهم فقط. آية ثمانية وآية تسعة وآية عشرة نموذج مبهر، نموذج اه يعني عظيم جدا في سورة الحشر بييجي من أجيال الصحابة، بصوا في سنن لإقامة أي بناء. سنن يعني لو أنا عايز أقيم بناء يقول لك بتوع المهندسين مش عارف تحفر إيه وتحط أساسات وتعمل مش عارف، إقامة أي بناء يحتاج إلى فهم وادراك لطبيعة حياة الناس.
يعني لما يجي مثلا واحد يقول: يا دكتور أحمد أنت بتقعد تقول الصحبة ومجموعات العمل ومش عارف إيه، الناس أصلا محبطة، أنا باجي أقول لهم يلا نعمل حاجة ما حدش بيرضى ييجي، أقول لهم يلا نعمل نقرأ كتاب نعمل مجموعة قراءة؛ يعني أنا أحيانا أنصح يا عم اتقابلوا، اتقابلوا مع بعض اقرأوا اقرأوا مجموعة رسايل ابن رجب اقرأوا تفسير اقرأوا مجالس القرآن لفريد الأنصاري، يقول لي: وبعدين يا عم؟ طب اقرأها الأول هم ثلاث خلاصم وبعدين أبقى قل لي بعدين، لا تشترط ودي من النصائح السلوكية المنشورة يعني، لا تشترط رؤية الطريق كاملا، اقرأوا اقرأوا كتاب اقرأوا رياض الصالحين، التقي مع إخوانك على شيء من أمور الدين، يبعث فيكم طاقة تعبدية.
إنما ربنا سبحانه وتعالى قال في الواقع المؤلم في خواتيم في صورة يونس قال إيه: ﴿وَاجْعَلُوا بُيُوتَكُمْ قِبْلَةً وَأَقِيمُوا الصَّلَاةَ﴾ [يونس: 87] وبشر المؤمنين، ما هو هتدخل في إحباط تعذيب تعذيب تعذيب وتضييق وتضيق وتضيق من فرعون، خلاص ارجع للبيت، وما قالش كل واحد يعمل كده قال: اجعلوا سورة الجمع بيوتكم قبلة واقيموا الصلاة وابشر، لا أظن في الواقع ده يكون الحديث عن البشريات والآمال وبشر المؤمنين.
آه لابد من فهم كيف تقام وأن الأمر يحتاج إلى مجهود، الأمر يعني يا جماعة مجرد أنك تصنع مجموعة مع إخوانك أو أنت اختي مع الأخوات اعملوا تساهموا في اه مثلا في عمل مقرأة على الانترنت أو في دعم اه موقع أو في صناعة اه حاجة للاخوات أو للبنات، أي حاجة هتتعمل صعب الإنسان يعملها مفرده، محتاج يشتغل مع المجموع.
ودايما العمل مع المجموع مؤلم، لذلك كان في درس اسمه الأخلاق الاجتماعية وتديه درس من واقع الخلافات التي تحدث أثناء العمل، شغلك مع أخيك لازم هيعمل مشاكل، احتكاك مع الذي قال النبي والدرس كله كان قائم على شرح الحديث: «الذي يخالط الناس ويصبر على أذاهم»، شف النبي ربط على طول بين الخلاطة والأذى، طبيعي هيحصل لك أذى، لكن هذا الأذى اللي من إخوانك أهون بكثير من أذى الوحدة ولا سيما أنا بتكلم على عمومنا كلنا، أغلبنا لا يتحمل هذا ويتحمل الوحدة يعني.
طيب ربنا سبحانه وتعالى ذكر ثلاث أصناف وبنسبة ما أي مجموعة قوية تنشأ مجموعة عمل بتبقى عبارة عن الثلاث أصناف دول، بل غالبا أي عمل يقام يعني أي عمل من الأعمال يقام اه يحتاج هذه الأركان الثلاثة ليقوم، يعني أي دعوة تصنع يعني دعوة النبي صلى الله عليه وسلم كان فيها ركن اسمه الركن البشري، يعني في أركان بشرية العنصر البشري، عارف حتى في في لبناء الدول الدول البناء الاقتصادي للدول في عامل مادي وفي عامل للزمن في عامل بشري، يقول لك مثلا الدولة الصين أو دولة حتى مصر أو كده عندها مثلا وفرة في العامل البشري، لكن ممكن يكون في نقص في كذا، فازاي أوفر العامل البشري يكون ركن من أركان تطور مثلا اقتصادي؟
أنا هنا دلوقتي بتكلم هنا القرآن، ودايما القرآن بيركز على العامل ده، بل بل وصية عمر بن الخطاب أو بلاش أمنية قصدي عمر بن الخطاب لما قال للناس: تمنوا، فواحد قال: أتمنى ملء هذه الحجرة ذهبا وأنفق في سبيل الله، والتاني قال: أتمنى ملء هذه الحجرة عدة وأعتادا، واحد فكر في المال واحد فكر صرف السلاح.
سيدنا عمر قال: أما أنا فأتممنى ملء هذه الحجرة رجالا من أمثال أبي عبيدة من الجراح، هو شايف أن وجود العنصر البشري الصح أهم لبناء الدعوات ثم يأتي بعد ذلك المال والواتي السلاح، فهنا وجود اه اه شف حتى الترتيب هنا قبل ما ربنا سبحانه وتعالى في الترتيب الآيات قبل ما تتكلم على الناس اللي أنفقت أتكلمت على الناس اللي ضحت.
يعني ربنا سبحانه وتعالى سورة الحشر في آية ثمانية وتسعة وعشرة بيتكلم على ثلث أصناف من الناس وجودهم بيصنع أي دعوة تقوم، ده النموذج الكامل على المستوى الواسع، يعني لو احنا بنتكلم على مستوى كبير زي دعوة النبي صلى الله عليه وسلم، طب لو أنا هتكلم على مستوى صغير؟ برضو فيه الأركان الثلاثة، بنسبة برضو ربنا سبحانه وتعالى بدأ بمين؟ بمن ضحى.
أول طائفة مين هم؟ ﴿لِلْفُقَرَاءِ الْمُهَاجِرِينَ﴾ [الحشر: 8] طبعا الآية لها سياق في توزيع الفيء وغير ذلك هتعرفوه اللي عايز يعني اللي عايز يسمع يعرف التفسير وسياقه بالتفصيل. أنا قلت لكم يسمع تفسير آية أو يقرأ، لكن أنا بتكلم على واحد عشان لو حد سأل: اللام دي متعلقة بإيه للفقراء دي؟ احنا قلنا دي خلاص دي هتسمعوها في في التفسير.
طيب: ﴿لِلْفُقَرَاءِ الْمُهَاجِرِينَ الَّذِينَ أُخْرِجُوا مِنْ دِيارِهِمْ وَأَمْوَالِهِمْ يَبْتَغُونَ فَضْلاً مِنَ اللَّهِ وَرِضْوَاناً وَيَنْصُرُونَ اللَّهَ وَرَسُولَهُ أُولَئِكَ هُمُ الصَّادِقُونَ﴾ [الحشر: 8]، التاني: ﴿وَالَّذِينَ تَبَوَّءُوا الدَّارَ وَالْإِيمَانَ مِنْ قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِمَّا أُوتُوا وَيُؤْثِرُونَ عَلَى أَنْفُسِهِمْ وَلَوْ كانَ بِهِمْ خَصَاصَةٌ وَمَنْ يُوقَ شُحَّ نَفْسِهِ فَأُولَئِكَ هُمُ الْمُفْلِحُونَ﴾ [الحشر: 9]، التالت: ﴿وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ﴾ [الحشر: 10].
يبق أنا عندي هنا ثلاث أصناف من الأصناف البشرية اللي لما بيوجدوا ربنا سبحانه وتعالى بيقدر ويعني وجودهم في مكان بتنشأ الأعمال وتنشأ الدعوات، إيه أهم طائفة موجودة؟ أول طائفة التي ضحت بكل شيء، للفقراء، يعني شف بدأت مش قبل ما يقول المهاجرين قال للفقراء، أصبحوا فقراء ضحوا بكل شيء للفقراء المهاجرين، بذل وضحى وترك وأوذي ﴿أُخْرِجُوا مِنْ دِيارِهِمْ وَأَمْوَالِهِمْ﴾ [الحشر: 8].
ليه ليه أصبح فقير؟ ليه هاجر؟ لإخراج الثلاث حاجات ليه؟ ﴿يَبْتَغُونَ فَضْلاً مِنَ اللَّهِ وَرِضْوَاناً وَيَنْصُرُونَ اللَّهَ وَرَسُولَهُ أُولَئِكَ هُمُ الصَّادِقُونَ﴾ [الحشر: 8]. أول طائفة لإقامة أي عمل أن تكون أو أن يكون من يكون صادقا، إن في واحد عنده رغبة صادقة.
والله يا جماعة أحيانا أسمع مثلا قصة في عمل مثلا حتى أبليكيشن تطبيق معين، تلاقي يقول لك: أنا كنت مؤمن جدا بالفكرة وقعدت اشتغل عليها وقعدت عرضتها على كذا حد وسافرت مش عارف فين عشان أتعلم ورحت لفلان أعرض عليه وفلان هزقني وقال لي دا فكرة أي كلام ورحت مش عارف فين، ويقعد يشرح يقول لك: وبعد مش عارف أربع سنين من البحث ولما الفكرة اكتملت لقيت واحد قال لي: أنا ممكن أبنى الفكرة وينفق عليها، واحد تاني دعمني وبعد ما عملنا كده لقيت بعد كده مجموعة من الناس قالوا لي: احنا ممكن نشتغل معك بصورة تطوعية، وبعد كده البرنامج.
وده بالضبط نفس الخطوات لحاجات كتير من المواقع الموجودة على فكرة والأعمال الموجودة نشأت كده، أن بدأت الأول بشخص صادق في الفكر عايز يطبق فكرة، عائد إيه نفسه يعمل حاجة؟ حاسس مجرد أن أن يحس مثلا حتى أن الناس حواليه مش عارفة تقرأ القرآن أو عندها في بعض معلومات الدين أساسية عندها وهو مش مش عارفينها، أن يكون صادق عنده صدق.
والصادق يبذل ولا ينتظر شيئا، الصادق يبذل ولا ينتظر شيئا، ما تتصوروش أنه لأن ما ما كانوش منتظرين شيء، يعني هو مش بيعمل سي في معين، لا لا ده الفكرة بداخله حرقة، لا يستطيع أن هو ينام دون أن تطبق هذه الفكرة أو أن تكون واقعا، قاعد مشغول كيف تصبح الفكرة التي بداخلها؟
على فكرة يا جماعة وده حتى في الأمور الدنيوية، إذا لم يمتلك الشخص مثلا الدعم الدنيوي أنه يقوم فكرته ممكن يبقى صاحب فكرة ويسعى لها لغاية لما ربنا سبحانه وتعالى يبعث له من يساعده. فأول طائفة طائفة الصادق الذي يبذل ويضحي ويبتغي فضلا من الله ورضوانه ويفعل ذلك نصرة لله ورسوله.
احنا عايزين مثل هذه الكوادر التي تبادر، أنا بسميه الكادر المبادر، كنت أتكلمت بس للأسف مش فكرت درس إيه عن ما يسمى أظن تقريبا اتحاوروا بعد الكون في ما يسمى بثواب الأوائل، أن في مجموعة من الأوائل اللي بتدأ اللي بتشق الظلام، اللي ربنا سبحانه وتعالى بيفتح بهم زي ما ربنا قال: ﴿فَرَقْنَا بِكُمُ الْبَحْرَ﴾ [البقرة: 50]، تعبير فريد الأنصاري هنا في الآية دي كان رائع.
أن هنا أنت ربنا بيشق بك الإحباط وبيشق بك الشلل والكسل الموجود، بتستعمل في ذلك أن تكون أنت النواة التي يلتف حولها الإلكترونات مرة أخرى وتنشط في الحياة، الإلكترونات لا تتحمل أن تتوقف، في كتير ناس حواليك لا تتحمل أن تتوقف، لكن تبحث عن نواة تدور حولها ومعها ودورها أن هي بتتقدم البشرى والأمل والطاقة والأفكار والأعمال وتبذل، طبعا يستحيل كل الناس تبقى كده، لكن منا من يستطيع أن يكون هذا الرجل وهذه المرأة اللي تكون هي النواة اللي اللي تبدأ تحرك الناس وتسعى ويكون صادقا وتكون صادقة في هذا الأمر.
وكم من أعمال حتى لو الناس تراها صغيرة ولكنها عند الله عظيمة، بدأت بنواة بدأت بصادق شخص يحمل فكرة يبذل ويضحي من أجلها، كتير من المجالس الموجودة العلمية والمواقع التعليمية هي بدأت أن شخص مؤمن بهذه القضية ويضحي من أجلها ويبذل ولا ينتظر شيئا، مش عاملها إيه مثلا يكسب من وراها؟
وده برضو هنا أنا مش حكم أنه يكسب من وراها، أنا بتكلم حتى مش عاملها ده هو المحرك الأساسي والدافع الأساسي له، ﴿وَيَنْصُرُونَ اللَّهَ وَرَسُولَهُ﴾ [الحشر: 8] يبقى دي أول طائفة التي حينما توجد الكبدة بقى ده زي ده الأساس اللي تحت الأساسات، عشان كده دول أول من يدخلون الجنة.
فقراء المهاجرين دول أول ما تدخلوا الجنة، قال عنهم النبي صلى الله عليه وسلم في حديث في في يعني في حتة كده بالنسبة لي دايما مؤلمة أول ما بقرأها بتكون مؤلمة قوي، النبي بيقول إيه؟
يموت أحدهم وحاجته في صدره؛ لا يستطيع لها، كان بداخله طموحات، زيه زي بقية الناس يا جماعة، ما هو بني آدم! كان بداخله آمال لكن ضحى بها. كان بداخله طموح دنيوي عادي جداً. مش لازم على فكرة، هو ممكن يكون بيضحي حتى بأوقات لعبه وأوقات فراغه وأوقات نومه، وعشان يجمع الناس هو لازم يبذل، لازم واحد يتحرك. ده الصنف الأول اللي ربنا سماهم الصادقون.
والصدق في شيء يسهل هذا الأمر، قلت لكم حتى لو في الدنيا، فلان كان صادقاً في أنه كان عايز يعمل مشروع كذا ونجح فيه، برضو لا يلزم أن كل مشروع ينجح سواء ديني أو دنيوي، ودي بيعمل الاحترازات، لا يلزم من ذلك في سنة ربنا سبحانه وتعالى وفي مشيئة الله وفي إرادة الله. بل ربنا سبحانه وتعالى قال وأخبرنا: ﴿وَرُسُلًا قَدْ قَصَصْنَاهُمْ عَلَيْكَ مِن قَبْلُ وَرُسُلًا لَّمْ نَقْصُصْهُمْ عَلَيْكَ﴾ [النساء: 164]، والنبي ﷺ قال: «والنبي وليس معه أحد». مش معنى أننا بنقول إن الدواء ده يساهم في العلاج أن كل اللي هياخده هيفيدك.
الطائفة الأولى الذين ضحوا وبذلوا هم الصادقون. أنا من كثر ما سمعت قصص أعمال ومعاهد علمية ومواقع، قصص كتير من ناس بفضل الله على مدار ما يقارب عشرين سنة، تحس أنها نفس الفكرة: شخص أو مجموعة ناس صادقة. وفي بداية الفكرة ما عندهمش لسة الأدوات، لذلك بعض الناس يسخر: هتعمل ده ازاي؟ مين اللي هيساعدك؟ أنت معكش دعم؟ ثم مع استمرار صدقهم وبذلهم وتضحياتهم يبعث الله لهم من يعينهم. يبعث الله لهم من يعينهم؛ تاني معلش، بقول مع استمرار بذلهم وتضحيتهم. يعني ربنا بعث الأنصار متى؟ بعد ثلاثة عشر سنة. يوم واحد يقول لي بقى من اللي عنده تطبيق حرفي: يعني أنا لازم أضحي ثلاثة عشر سنة عشان ربنا يبعث لي اللي يساعدني؟ أقول لك لا عادي يا أخي، أنت ممكن أقل وممكن أكثر، ممكن ما يبعثلكش حد، ممكن تموت في الطريق: ﴿وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ﴾ [النساء: 100].
الطائفة الأولى طائفة الصادقون، هؤلاء الصادقون الذين خرجوا من ديارهم وأموالهم يبتغون فضلاً من الله ورضواناً. بعد كده ربنا سبحانه وتعالى يبعث الأنصار؛ من يناصرك ويدعمك، دعم بكل شيء؛ ممكن أدعمك بالمال، ممكن أدعمك بالصحبة، ممكن أدعمك معنوياً، يدعمك بالتشجيع. تجد هنا ربنا يبعث لك الأنصار من يناصر فكرتك، الذي يناصرك، ربنا سبحانه وتعالى قال: ﴿وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ﴾ [الحشر: 9].
الطائفة دي يا جماعة مهمة جداً، وللأسف إحنا بنغفل عنها في الواقع. ليه بقى؟ عشان نكون واضحين وصرحاء مع بعض، مش كل الناس عندهم مواهب أن يكون عنده فكرة ويبذل لها، مش كلنا كده. لكن جزء كبير مننا ممكن يساعد؛ هقول لكم حاجة لسة قريب، جزاهم الله خيراً القائمون على المكتبة الشاملة فتحوا باب التبرع، أنا ممكن ما يكونش عندي القدرة أن أنا أعمل التطبيق بتاع المكتبة الشاملة، ما يكونش عندي القدرة أن أنا أضيف الكتب وأنتقي الكتب وأقوم بتشكيلها، ما عنديش القدرة لده، خلاص، طب ما في باب أنك تكون من الأنصار؛ باب النصرة بيكون أوسع من باب تطبيق الفكر.
لكن في مشكلة ما بين نصرة ده، إيه المشكلة؟ زي ما الصادق واجهته ابتلاءات أنه هيضحي وأنه سيترك كمالياته وأرضه وأوقاته، ممكن يترك أوقات نومه، الأنصار أيضاً بتواجههم ابتلاءات. إيه الابتلاءات دي؟ أنه ممكن يبذل من الخلف ولا يرى؛ يعني هو قاعد بيتعب وبيصرف وبيتحرك، عارف زي ما واحد مثلاً أحياناً يقول: أنا سخرت عربيتي إني أوصل الدعاية لفلان لخطب الجمعة أو للدروس، ممكن اللي بيسخر سيارته ده شخصية مرموقة أصلاً، ويضحي، فقد لا ينظر له، هو كمان بيضحي، لكن الناس لا تراه، يكون في الخلفية. لذلك أنا بحب المقطع الجميل لنعمان خان، أن العمل لله ليس فيه أدوار للبطولة؛ إن في أدوار كتير لنصرة الدين، مش لازم يكون الدور ده البطل. إحنا أحياناً بتغلبنا فكرة أني عايز أكون البطل، طب وليه؟ ده يا جماعة اللي بيبذل وما بيظهرش في الصورة ده، ربنا يتقبل، ده بياخد ثواباً صافياً، لا يقعد ينازع رياء ولا مشكلة، ده بالعكس.
ففي دور النصرة، قد يجد الإنسان في صدره تجاه من ينصره: أنا اللي صرفت، أنا اللي بذلت، أنا اللي عملت، لولا أني صرفت ما كانش المشروع ده قام، لولا أني دعمت، لولا الفريق، لولا المبرمج هو اللي عمل، لولا أياً كان كل مشروع واحتياجاته. إن في واحد ضحى وبذل وصاحب فكرة وعنده قدرة على تطبيقها وضحى من أجلها، لكن محتاج أنصار، محتاج أعوان. نيجي بعد كده الأعوان دول ممكن منهم من يمن، يبدأ يمن عليه بقى ويدخل في قوله سبحانه وتعالى: ﴿وَلَا يَجِدُونَ فِي صُدُورِهِمْ حَاجَةً مِّمَّا أُوتُوا﴾ [الحشر: 9]. أنا هشرح الآية سريعاً، يعني إيه حاجة؟ حاجة مش معناها حاجتنا بالعامية المصرية، يعني مش معنى الآية ما فيش في صدره أي حاجة، لأ، حاجة اللي هو من الحوج، من الاحتياج؛ يعني مش محتاج حاجة من اللي قدامه، بيبذل له بس. لذلك قال بعضهم: حسداً، وقال بعضهم: أذى، وقال بعضهم: حزازة، وقال بعضهم: مناً. أياً كان، ﴿لَا يَجِدُونَ فِي صُدُورِهِمْ حَاجَةً﴾؛ يعني بيبذل ولا يريد منه شيئاً ولا ينتظر منه شيئاً.
ركز بقى معي، حتى لو كان هذا الذي يبذل يحتاج بالفعل، ﴿وَلَوْ كَانَ بِهِمْ خَصَاصَةٌ﴾، ما هو جوا احتياج. يعني أنا واحد رايح أنصر واحداً بيعمل مشروع وأنا أصلاً عندي احتياج، تقول لواحد: ادعمه، يقول لك: طب ما أنا محتاج، إيه اللي يدعمني؟ ماشي يا سيدي، لعلك ترزق ببركة أخيك. حديث للأسف الناس عارفة الحديث الضعيف ومش عارفة الحديث الحسن، حسنه كثير من أهل العلم، إن رجلاً كان يتفرغ للعبادة ومجالس النبي ﷺ ورجلاً كان يحترف؛ أي يشتغل وينفق على أخيه، فذهب ذلك المحترف يشتكي أخاه للنبي ﷺ فقال له النبي ﷺ: «لعلك ترزق ببركة أخيك». لعلك ترزق بدعمك لأخيك، ففكرة الدعم دي فكرة غائبة، ليه ما تشوف حد تدعمه؟ عندك وقت؟ اعمل أي حاجة.
تنوع هذه الألوية بيعطي براحاً للاختيارات؛ ساعات شخصيات الناس.. فالطائفة الأخرى الذين الأنصار تبوأوا، والتبوأ فيه تمكن من هذه الدار التي هي المدينة، ﴿وَالْإِيمَانَ مِن قَبْلِهِمْ﴾. بيقول العلماء اتكلموا؛ يعني إيه تبوءوا الإيمان من قبلهم؟ هل سكنوا الإيمان؟ هل ده تعبير مجازي عن تمكنه من الإيمان؟ ولا كلمة من قبلهم أيضاً، هل من قبل المهاجرين؟ هل كان في إيمان خاص معين زي البذل والتضحية هم قدموه قبل الأنصار؟ ولا من قبل مجيئهم؛ آمنوا في المدينة من قبل؟ اختلاف.
خدوا بالكم من أول وصف، ركزوا في دقائق الكلام، عايزكم بعد ما أخلص تقرؤوا الثلاث آيات كلمة كلمة؛ أول وصف وصف به هؤلاء تجاه إخوانهم هو إيه؟ ﴿يُحِبُّونَ مَنْ هَاجَرَ إِلَيْهِمْ﴾ [الحشر: 9]. بتحب أخوك لأنك بتحب الخير، أنت بتحب الدين ينتشر، فلما تلاقي فلاناً بيساعد في نصرة الدين أنت بتحبه. ليس بينك وبينه نسب، ما كانوش يعرفوهم أصلاً. حب، يعني خليك دائماً بداخلك بمشاعر حب للي بيقدم للدين، للي بيبذل للدين، حتى لو أخطأ، اغفر لنا، وزي الطوائف اللي هتيجي بعد كده.
يحبون من هاجر إليهم، ومهما حتى حاول أن يبحث في صدره عن شيء تجاه إخوانه لا يستطيع، لا يجد، دي كأنها بـ ﴿لَا يَجِدُونَ فِي صُدُورِهِمْ حَاجَةً مِّمَّا أُوتُوا﴾، يعني أنا زي اللي هي: ﴿لَمْ تَكُونُوا بَالِغِيهِ إِلَّا بِشِقِّ الْأَنفُسِ﴾ [النحل: 7]، هذا معنى الحاجة؛ أنك تكون محتاجاً لشيء أو أن تصل إلى شيء، وفي أيضاً كلمة الحاج جاءت في سورة يوسف: ﴿إِلَّا حَاجَةً فِي نَفْسِ يَعْقُوبَ قَضَاهَا﴾ [يوسف: 68]. فهم لا يجدون، يعني يا جماعة يحب ويبذل ولا ينتظر شيئاً، لذلك هتجدوا اللي هيرجع لكتب التفاسير وخصوصاً الأثرية، هيجد آثاراً جميلة عن علاقة الأنصار بالمهاجرين، وأن النبي ﷺ يقسم، يتنازلون عن نصيبهم لإخوانهم ويرضون برجوعهم بالنبي ﷺ ويبكون شوقاً لنبيِّهم ﷺ، ويثني عليهم النبي ﷺ. المشاعر دي مشاعر جميلة، أن أنت مش بتدعم وأنت في نوع من المن والأذى والحسد والحقد والغيرة، لا لا، هو مش قصده حاجة، ما فيش حاجة، ﴿لَا يَجِدُونَ فِي صُدُورِهِمْ حَاجَةً مِّمَّا أُوتُوا﴾، بالرغم مما أوتوا؛ المهاجر اللي ضحى بدأ يظهر أو بدأ يحصل أشياء وأنت بتبذل، أنت مش منتظر حاجة، أنت منتظر الثواب الأخروي فقط.
مهم قوي أنك تستحضر قول عمر بن الخطاب: ولكن الله يعرفهم. في كتير وأنا أعني ما أقول، كتير من الأعمال الدينية الموجودة وراءها أناس لا يعلمهم إلا الله سبحانه وتعالى، ولعل الله يبارك في هذه الأعمال بإخلاص أحدهم الذين لا يعرفهم إلا الله سبحانه وتعالى. الإنسان لا يستنكف أبداً أن يكون من هذه الطائفة، وقفت الذين يبذلون، يعني إذا كانت طائفة الأولانية الصادقون، ربنا سمى الثانية المفلحون. وده تسمية جميلة قوي أنه نجح؛ كان اختباراً صعباً. ليه يا جماعة اختبار صعب؟ لأن نفسه تنازعه؛ طب وأنا أدّي لأخويا ليه؟ طب ما أدي لنفسي؟ طب ما أنا أقسّم زي الأنصار كده؟ تخيل بيقسم بيته وحياته مع أخوه ليه؟ ما يروح يشتغل. يقول لواحد مثلاً إن الموقع ده أو المكتبة الشاملة وغيرها محتاج دعم، راعي إخوانك، يقول لك: طب ما أنا محتاج أنا كمان، طب خلاص.
ذلك الذي يستطيع أن يتغلب على شح نفسه، لأن نفسه بتنازعه دائماً؛ اللي بيبذل لدعم الآخر نفسه تنازعه، اللي بيبذل لدعم الآخرين ولا يظهر في الصورة نفسه تنازعه. فمن استطاع أن يوق شح نفسه فهو المفلح: ﴿فَأُولَئِكَ هُمُ الْمُفْلِحُونَ﴾ [الحشر: 9]. يبقى دي الطائفة الثانية اللي بوجودها بتقوم الأعمال، يبقى أنا ممكن شخص بيضحي، ممكن شخص يدعم، ممكن شخص ربنا قال: ﴿وَاجْعَلُوا بُيُوتَكُمْ قِبْلَةً﴾ [يونس: 87]، ممكن واحد يفتح بيته، ممكن واحد يجيب كتب يديها للناس اللي عايزة تقرأ، عايز ناس عايزة تقرأ في الحديث، عايز تقرأ رياض الصالحين، يجيب هو كتب للناس في المسجد، نقدم دعم للآخرين. حد كان بيقول لي أنه يعرف واحداً صديقه كان يوزع كتاب رياض الصالحين، عايز فكرة أن الناس تقرأ سنة النبي ﷺ ولما سأله، قال له: أنا مش عارف، أنا مش لاقي باب أعمله في الدين، فقلت أجيب للناس كتب، جايز اللي يقرأه.. فـ ﴿فَأُولَئِكَ هُمُ الْمُفْلِحُونَ﴾.
الطائفة الثالثة اللي بعد ما العمل بيقوم بتيجي، تجد أن العمل قام بتستفيد منه، لذلك برضو عشان الناس ما تفهمش الكلام غلط، مش عايزين دائماً إحنا نتعود قضية النقد للسابقين دون أن ننسى فضلهم.
كثير من انتشار الدين الموجود بسبب السابقين؛ فنحن ندعو لهم. هتقول لي: طب ما في أخطاء؟ طب ما هو أصلاً الآية بتقول: ﴿رَبَّنَا اغْفِرْ لَنَا وَلِإِخْوَانِنَا﴾ [الحشر: 10]. عادي ممكن يبقى أخطأ وأنا بدعو له بالمغفرة.
﴿رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ﴾ [الحشر: 10]، يعني أنا جاي بعده فاستفدت من اللي هو قدمه، ﴿وَالَّذِينَ جَاؤُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ﴾ [الحشر: 10]. بلاش أجي أبقى عايز أهدم اللي قبلي وخلاص، لا اغفر لنا، حتى لو في خطأ أنت بتتجاوزه وبتصلحه وبتدعو ﴿رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ﴾. ولا تجعل في قلوبنا غلاً؛ لأن هو سبقك فأنت ممكن تشعر بنوع من الغل تجاهه، أو مش قادر تتحمل خطأه.
إسقاط ده على اللي أنا عايز أقوله بقى في الواقع، إن بتأتي أحياناً طائفة تنتفع من العمل الذي قام، أقل حاجة تعملها إن تنتفع وتدعو، مش قادر تضحي وتبذل، مش قادر تدعم وتنفق؟ انتفع دون أن تؤذيه، انتفع وادعوا لهم أن يوفقهم الله سبحانه وتعالى. واحد يقول لي: طب فيه أعمال كتير في الدين موجودة لا قادر أضحي وأعملها، ولا أستطيع أن أبذل معهم، ولا أن أدعم معهم، ولا أن أكون من المهاجرين ولا من الأنصار، لا من المضحين الصادقين ولا من الباذلين المفلحين، أنا فقط من المنتفعين. وماله؟ انتفع وادعو لهم.
طب ويعني معنى كده إني أسكت على الأخطاء؟ لأ طبعاً، أسكت على الأخطاء ولكن في أدب، لذلك والنصيحة دون أن تهدمهم، هنا بتبدأ خلاص الصورة بتكتمل. فأي عمل غالباً بيتكون من الثلاث أركان دول: ركن اللي ضحى وبذل وكان صادق في فكرته، اللي دعم وبذل ونصر وكان صدره طاهر فكان مفلح أنه وُقي شح نفسه، الطائفة الثالثة اللي جت واستفادت وانتفعت فكانت طائفة طيبة فلم تجد في صدرها غلاً، بل كانت تدعو الله سبحانه وتعالى أن يصرف أي شيء يأتي في صدورها، فانتفعت وكانت تدعو لهم أن يغفر الله لهم وأن يلحقهم على الخير.
يبقى أنا دلوقتي لو أنا عايز أستفيد بالكلام ده في واقعي، أنا مش لازم أنتظر يا جماعة حل أن أنا أكون من اللي عنده فكرة، ولو فكرة بسيطة اعملوا أي حاجة، إياكم والقعود، إياكم والكسل. النبي صلى الله عليه وسلم يستعيذ من الهم والحزن والعجز والكسل، كنت حتى فاكر كتبت قريب أو نشرت على قناة التليجرام المنشور بتاع الشيخ بدر السوعي على موضوع سرير المتعة، أو المتعة اللي بيمارس كل حياته من على السرير، قضية الكسل وخطورته، فعلاً هو بيدخل في كتاب، حد من الأخوات علق قال: ولعل في علاقة بين الهم والحزن والعجز والكسل، وكانت التقاطة لطيفة فعلاً الجمع بين الدعاء ده في دعاء واحد من الهم والحزن والعجز، والكسل، والجبن، والبخل.
دي أنا كنت باسميها المعوقات، في معوقات داخلية ومعوقات خارجية، والنبي صلى الله عليه وسلم بدأ بأكثر المعوقات الداخلية: الهم والحزن، وعجز وكسل، وجبن وبخل، وبعد كده بقى غلبة الدين، المعوقات الخارجية في الآخر. الإنسان يتحرك، اعمل أي حاجة، اجتمع مع إخوانك على أي عمل صالح، تجاوزوا الخلافات، ابذلوا أي شيء؛ لأن يا جماعة الكسل مؤلم، والعجز مؤلم، يصاحبه هموم، والهموم بتتزايد، وبيدخل زي ما قلت الإنسان في المنطقة المظلمة اللي تخليه بيفقد التوازن النفسي، وبعد كده أفكار سيئة بتتوارد إلى ذهنه، وإحباط وترك للطريق، أنا إيه اللي وصلني للمنطقة دي؟ ولو عمل بسيط لقاء كل أسبوعين، التقوا، اجعلوا بيوتكم قبلة، وأقيموا الصلاة، وبشر المؤمنين.
لكن أنا أكون قاعد متكاسل مهموم مغموم، أكتفي بمجموعة من اللايكات، أسمع الدرس وأنا على السرير، فده يعني ممارسة الحياة فعلاً، جزاه الله خيراً يا شيخ بدر، المنشور بتاعه رائع. ممارسة الحياة من على السرير دي بالرغم إن هي بتعطيك إيحاء أنك أنت على العالم أجمع، وأنت بمفردك أصلاً؛ تتكلم فلان وتراسل فلان، ولايك مع كذا، وتعلق على كذا، تشعر بنوع من الدوشة، أنت بمفردك أصلاً، يعني أنت في الآخر لو الكهرباء قطعت مثلاً كل ده بيختفي من حياتك.
لا أبحث عن واقع، يعني برضو عشان ما نوصلش لفكرة التطبيق الحرفي؛ اللي ظروفه اللي حياته اللي طبيعته اللي شخصيته، أياً كان الكلام لا يؤخذ بحرفيته، ده لازم يكون عندي فقه للتعامل مع المواعظ. أنا بحاول أجمع المادة دي إن شاء الله، فقه التعامل مع المواعظ، التطبيق الحرفي. أسأل الله سبحانه وتعالى أن يفتح لي ولكم، وأن يستعملنا جميعاً. نعوذ بالله من الهم والحزن والعجز والكسل والجبن والبخل. ولابد أن يكون الرجال، أسأل الله سبحانه وتعالى وإياكم من أهل القرآن. سبحانك الله وبحمدك، أشهد أن لا إله إلا أنت أستغفرك وأتوب إليك، والسلام عليكم ورحمة الله وبركاته.