د. أحمد عبد المنعمبسم الله الرحمن الرحيم، بسم الله والصلاة والسلام على رسول الله صلى الله عليه وسلم. نبدأ الأمسية التربوية اليوم بإذن الله سبحانه وتعالى، وهي بعنوان: رفقاً بالقلوب. توصية اليوم هنتحرك من شرح حديث من أحاديث النبي صلى الله عليه وسلم، والحديث حقيقة عظيم، فيه رفق النبي صلى الله عليه وسلم وحرص النبي صلى الله عليه وسلم على أمته، وكيف أن النبي صلى الله عليه وسلم بيستبق الأمور قبل أن تحدث.
فتعبيرنا زي ما احنا ببنقى عايز أقول النهارده كده إيه: الوقاية خير من العلاج، وده اللي احنا عايزين نعمله النهارده في قلوبنا. عايزين نحرص أن نحافظ على قلوبنا قبل أن تتلبس بأمور قد تصيب القلب بنوع من الإحباط أو اليأس أو التعلقات. درس النهارده هو أشبه بالجزء التاني من درس قلب سليم، احنا كنا بفضل الله الدرس اللي فات كان بعنوان المعارك الزائفة، قلت لكم درس المعارك الزائفة هو استكمال لبعض التساؤلات والنقاشات اللي حصلت من كونوا ربانيين. تمام؟ درس قلب سليم لما اتكلمت عن سيدنا إبراهيم وكان علاقة ده موسم الحج، فالنهارده عايز أكمل الجزء التاني منه، وهو بعنوان: رفقاً بالقلوب.
هنبدأ بشرح حديث النبي صلى الله عليه وسلم، حديث البخاري ومسلم. أقرأ لكم الحديث وأعلق بعض التعليقات عليه، أحاديث العلماء اختلفوا في شرحه، فاحنا هناخد أحد المعاني اللي العلماء اتكلموا فيها ونفرغ عليها الدرس. طيب، نتوكل على الله. النبي صلى الله عليه وسلم يقول: كان النبي صلى الله عليه وسلم في سفر ومعه بعض نسائه، وفي رواية أنها أم سليم؛ أم سليم كانت من النساء اللي مع النبي لأنها ليست من زوجات النبي صلى الله عليه وسلم، فالنبي صلى الله عليه وسلم كان في سفر، كان في مجموعة من النساء على الإبل.
فقال الراوي إن كان في حد بيحدو المسير، الحداء هو نوع من أن حد بيتغنى بصوت طيب، وده بيبعث حركة في الإبل. فهو كل ما يتكلم بصوت حسن وينشد بصوت حسن، الإبل تستحث على السير. وكان هذا اللي بيحدو المسير اسمه أنجشة، كان غلاماً للنبي صلى الله عليه وسلم حبشياً اسمه أنجشة. قال: وكان البراء بن مالك يحدو برجال، وكان أنجشة يحدو بالنساء، وكان أنجشة حسن الصوت، كان صوته طيباً تماماً.
فقال النبي صلى الله عليه وسلم، أنا عايزكم تتخيلوا المشهد دلوقتي؛ النبي صلى الله عليه وسلم -صلوا عليه- هيبدأ يقدم نصيحة لأنجشة، بس عايزكم تتخيلوا احنا في سفر والنساء محمولة على الجمال، وحد بينشد مع الرجال، وحد بينشد بصوت طيب حسن. وسبحان الله ده هنا بيقولوا إيه، حتى أثر الصوت -وأظن أنا مش فاكر أتكلمت في ده ولا لأ- كان في كلام طيب قراءته لشيخ الإسلام ابن تيمية وللإمام الشاطبي، فأثر الصوت حتى في الحيوانات وفي الجماد، يعني الصوت الحسن يحرك الدوافع داخل الإنسان، تمام؟ عشان حتى اللي بيقول لك لا أصل الأغاني ما لهاش تأثير، لأن حتى الصوت الحسن يحرك الإنسان، وهنا مهم تحسين الصوت بالقرآن.
طيب، يبقى عايزكم تتخيلوا المشهد؛ النبي صلى الله عليه وسلم دلوقتي هينادي على أنجشة ويقدم له نصيحة، والمشهد دلوقتي هو حسن الصوت وقاعد بينشد والإبل بتتحرك وعليها النساء. أنا بكرر تصور المشهد عشان نفهم الخلاف حصل ما بين العلماء في الحديث ده ليه. فقال النبي صلى الله عليه وسلم: يا أنجش رويداً، وفي رواية: رويدك سوقك بالقوارير. يا أنجشة تاني قال صلى الله عليه وسلم: يا أنجش رويداً أو رويدك سوقك بالقوارير. يعني بالراحة، أنت عارف لما واحد بقى يسخن في الصوت الطيب والنشيد، فده قد يجعل الإبل تتحرك بصورة أعنف وأسرع، فالنبي صلى الله عليه وسلم قال: سوقك بالقوارير. اللي كان بيحدو النساء، القوارير العلماء متفقين أن المقصود بها النساء، متفقين في معنى هذه اللفظة أن المراد بهذه اللفظة النساء.
وليه النبي صلى الله عليه وسلم شبه النساء بالقوارير؟ قيل للرقة والضعف وسهولة الكسر. طيب، الخلاف بقى: ليه النبي صلى الله عليه وسلم قال لأنجشة بالراحة، رويدك رويداً سوقك بالقوارير؟ ليه؟ قال له: عارف لما الواحد يسخن في.. ليه قال له بالراحة؟ ليه؟ في تكملة مهمة، خد بالتكملة دي وركز على التكملة دي وهو الاختيار اللي احنا هنقوله النهارده. فقال أبو قلابة: فتكلم النبي صلى الله عليه وسلم بكلمة. النبي بيقول إيه؟ النبي تكلم بكلمة لو تكلم بها بعضكم لعبتموه عليه، قوله، وبيحدد إيه الكلمة تحديداً: سوقك بالقوارير. والإمام البخاري في كتابه كتاب الأدب المفرد، الإمام البخاري حط الحديث ده في الصحيح في الأدب، والإمام مسلم أيضاً في صحيح مسلم من حديث.
الإمام البخاري لما حط الحديث ده في كتاب الأدب المفرد حطه تحت باب المزاح. طيب، تاني نركز، أبو قلابة بيقول: النبي صلى الله عليه وسلم قال كلمة -لو أبو قلابة يقول: تكلم بكلمة لو تكلم بها بعضكم لعبتموها عليه- يبقى إذن واضح أن النبي صلى الله عليه وسلم كان يقصد شيئاً غير المعنى اللي ممكن يتبادر للذهن أن يسوق الإبل بالراحة عشان النساء على الهودج على الإبل فما تسقطش، لأن كتير من الناس راح قال المعنى المتبادر أنه بيقول لأنجشة رفقاً بالنساء بحيث إن أنت لو اتكلمت هو النشيد كان فيه نوع من الحماسة والزيادة كاد أو غير ذلك، الإبل تحمست في المسير فقد تسقط النساء، والمرأة كالقارورة فيها ضعف فقد تسقط وتتأثر وتنكسر.
خلاص، ده معنى. وأنا حتى العلماء، الإمام النووي في شرح مسلم، هل ده أحد الاقوال؟ لكن ما رجحوش. وحتى دايماً لما بتشوف شرح حديث أو في التفسير المتأخرين بيجيب لك بقى كل اللي سبقه. يعني أنا كنت ببص في شرح الشيخ محمد آدم الأثيوبي اللي هو في تفسير في شرح حديث البحر المحيط السجاج في شرح صحيح مسلم بن حجاج جاب كل اللي فات قالوا إيه اختياراته؟ قال إن ابن بطال اختار القول اللي أنا بقوله الأولاني ده اللي أنا مش هتبناه دلوقتي، قال إن هذا كناية عن النساء وأن الإبل كانت تساق، فأمر الحادي بالرفق لأنه يحث الإبل أن تسرع، فاذا اسرعت لم يؤمن على النساء من.. وجاب مين اللي اختاره القول ده؟
القول التاني إيه بقى اللي أنا أصلاً باني الدرس على الفكرة في القول التاني؟ وهو قول معتبر، لأن الإمام النووي ذكره وقال إن ده أعزا به أبو عبيد الهروي، ومنقول عن القاضي عياض، ورجحه القاضي عياض وغيره، واستدلوا بكلمة الإمام أبي قلابة. وإن كان الشيخ الأثيوبي مش مرجحه، المرجح القوي الأول، بل الحافظ ابن حجر قال: القول اللي أنا هقوله التاني ده قال: وهو الراجح عند البخاري، قال: ولذلك أدخل هذا الحديث في باب المعاريض. ولو أريد المعنى الأول لم يكن في لفظ القوارير تعريض، لأن سقوط المرأة هنا هتتكسر زي المرأة زي الزجاج، فمش هيكون فيه تعريض.
أمال فين باب المعاريض هنا؟ شوفوا بقى، النبي صلى الله عليه وسلم -ركزوا معي- هنا خشي على قلوب النساء ما يحدث من تشبيب واستثارة المشاعر من هذا الصوت، عارف هو سخن بقى في السفر، وبيباح هنا التبسط في السفر ما لا يباح في غيره، وكان صوته طيباً. فالنبي صلى الله عليه وسلم -خد بالك- التقط هذا المشهد قبل أن تحدث الفتنة، وقبل أن تتعلق قلوب بعض النساء -ده بيتكلم عن مين؟ عن الصحابيات، عن أطهر النساء- أو يحدث حالة من التعلق، والتعلق بأيه؟ خد بالك، هنا التعلق مش بشخص، ما حدش هنا ما.. فكرة الفتنة بأنجشة هو شخص حبشي وقيل -يعني لما بتيجي تقرأ في ترجمة قيل- يعني كلام هو مش هيتعلق به، لأ، هذا الكلام يستثير المشاعر.
عارف لما واحد مثلاً قاعد بيسمع أغنية وأغنية مثلاً أن واحد ساب واحدة أو واحدة سابت واحد وتلاقيه قاعد بيعيط ومنهار، هو أصلاً مش مرتبط ولا حصل له التجربة دي قبل كده، لكن هو عاش المعنى وقعد يعيط وينهار، وبعدين بعد ما خلص القصة دي كلها هو ما لوش دعوة بالليلة دي كلها تماماً. أو زي اللي بيتفرج على أفلام ومسلسلات ويقعد يبكي ومتأسر بالموضوع، وهو الموضوع انتهى. هم الناس دي صورت الموضوع انتهى وكل حاجة انتهت. النبي صلى الله عليه وسلم قال: رويداً سوقك بالقوارير.
المعنى اللي أنا عايز أطلع بيه النهارده: لماذا نعبث بقلوبنا؟ ليه احنا بنساعد غمس القلوب في كثير من التعلقات؟ لذلك هنتكلم النهارده على تلات مستويات: رفقاً بالقلوب على التعلق بالأسباب والإنشغالات، رفقاً بالقلوب التعلق على مستوى الشهوات، رفقاً بالقلوب التعلق على مستوى العلاقات الاجتماعية. يبقى إن شاء الله بإذن الله أنا عايز أتكلم على أن احنا نرفق بالقلوب انطلاقاً من هذا الحديث.
لذلك حتى العلماء اللي قالوه وما المانع -أظن ده الإمام القرطبي في المفهم بيقول: وما المانع من الجمع بين الاتنين؟- حرص النبي صلى الله عليه وسلم على الحفاظ على الأجساد والقلوب حتى لا تسقط المرأة حقيقة ولا يتأثر القلب، والتشبيه بالقارورة أن القلوب أسرع للانكسار. والوضع الحالي الآن القضية ليست فقط في قلوب المرأة، نحن نعيش الآن -يعني عارفين أنا دايماً كنت بتكلم على قضية الهشاشة النفسية وحتى كنت أشرت لكتاب الهشاشة النفسية وغيره- يعني ممكن منذ زمن يعني كنت شايف أن ده نوع من هشاشة هذا الجيل، ثم بعد نوع من التأمل أنا لسة مقتنع برضو أن هو نوع من هشاشة، لكن ليس العيب مش في هذا الجيل فقط، لا، العيب ضمن الضعف اللي موجود في هذا الجيل كثرة المؤثرات، هذا الجيل والذي يليه والذي يليه -لا يأتي على زمان إلا والذي بعده شر منه كما قال صلى الله عليه وسلم- يتعرض لكم هائل من المؤثرات مع ضعف في البناء والتربية، مع ضعف في بناء القيم والأسرة، الأسرة كل هذه الأمور فيها ضعف.
كيف يواجه الإنسان بمفرده هذا الكم من الخيارات المهولة؟ وإن شاء الله من المعاني اللي نفسي أتكلم فيها قضية الاختيار في الدين، ودي إن شاء الله بإذن الله سبحانه وتعالى يبقى ضمن درس التدين، في درس بإذن الله عن قضية التدين وأن أصبح فيه ضعف في أن الإنسان يختار. شوفوا دلوقتي مثلاً قضية ثانوية عامة والكليات، يعني كم الاختيارات المطروح والتشوقات، يعني الإنسان فيه كم مهول من الخيارات أمامه، ده أحد الأسباب اللي بيعملوا نوع من الهشاشة والضعف. كيف سيواجه كل هذه الاختيارات؟
أقول لكم على حاجة، تخيلوا كم أنت قاعد على السوشيال ميديا قاعد بتقلب قاعد بتعمل سكرولينج كده، تم الأمور الإشعاع اللي بيتلتقى القلب في مجرد هذا التنقل السريع، فتن فتن فبتجعل الإنسان في حالة من الضعف. يبقى المعنى اللي أنا عايز أتكلم عنه النهارده: النبي صلى الله عليه وسلم حرص ألا تستثار هذه القلوب، بل حتى الإمام النووي بيقول اتكلم في مسألة حتى إيه؟ قال: الحزام وجواز السفر، قال في الحديث جواز السفر بالنساء واستعمال المجاز، وفيه مباعدة النساء من الرجال ومن سماع كلامهم حتى يعني فقه التعامل مع الفتنة.
احنا اصبحنا لما نقول قضية الفتنة والمرأة يقول لك لا لا إزاي ويا تشدد، طب خلاص أنت حر، يعني ما فيش جرب وترجع تندم إذا أردت الصلاح، يعني اللي خايف على قلبه هو اللي هيرجع يتعب في إصلاح قلبه، أما الآخر سيفاجأ يوم القيامة. المعنى اللي أنا عايز أتكلم عنه النهارده: لابد أن نحافظ على قلوبنا، ليه الإنسان يعبث بقلبه؟ ليه يعرض القلب لكم هائل من المشتتات والأسسباب والإنشغالات ثم يعاني حتى يحصل على صفاء القلب مرة أخرى؟
يبقى النبي صلى الله عليه وسلم قال: رويدك. اللي أنا عايز أقوله، لأ، عايز أقوله لي ولكم، رويدك، بالراحة، ليه الانفتاح الرهيب ده على الحياة؟ ليه ليه عامل لنفسك خمسين حساب في خمسين وسيلة من وسائل التواصل وقاعد بتتلقى فلان راح وفلانة، وتتابع الأخبار والخلافات والمشاكل؟ تيجي تقف في الصلاة أين قلبك؟ هتقف في الصلاة إزاي أصلاً؟ إن شاء الله ربنا يذكرني في آخر الدرس من الوسائل العملية التدريب على الخشوع، يعني الخشوع هو محاولة لجمع هذا الشتات اللي حصل على مدار الأسبوع، محاولة لابد أن احنا يبقى عندنا خطة لقضية الخشوع في الصلاة، وإن شاء الله أدلكم على بعض المصادر دي قضية الخشوع.
فالنبي صلى الله عليه وسلم كان حريصاً -ركزوا بقى معي- على حفظ القلوب من الكسر، قوانين القلوب بتكسر في حاجات، بلاش تكسر قلبك بتعلقات بالأسباب بشيء هو بعيد المنال عنك، هو نوع من الطمع، يعني خلينا سيبك من قضية دعوة له علوهم، هو طمع، أنت لا تملك هذه الاسباب، وقاعد عارف زي اللي قاعد يتفرج على حاجة وآه ونفسي فيها ويعيط أن هي مش معه، طب أنت بتعمل في نفسك ليه كده؟ غيرك اللي في نفس ظروفك ولم يتعرض إلى هذه المؤثرات ما عندوش الأزمة النفسية دي، أنت اللي اتعرضت.
انت اللي تسببت في أن تتعرض لهذه الأزمة، لذلك النبي صلى الله عليه وسلم يروى عنه كان إذا رأى شيئاً أعجبه قال: «اللهم لا عيش إلا عيش الآخرة». ربنا سبحانه وتعالى بيقول للنبي صلى الله عليه وسلم: لا تمدن عينيك إلى ما متعنا به أزواجاً منهم زهرة الحياة الدنيا لنفتنهم فيه.
أنت من الأول امنع الموضوع، أنت ليه تقعد تمد عينيك؟ وتقول: آه، ده لو الواحد عنده الموضوع ده! لو أن لي مثل فلان؟ وتقعد تعيش وتمني نفسك، وبعد كده ترجع تتصدم بصخرة الواقع وبأرض الواقع. ليه؟ يعني ليه تعمل في نفسك كده على الثلاث مستويات اللي احنا هنتكلم فيهم؟ على مستوى الأسباب والإنشغالات الدنيوية، على مستوى الشهوات، على مستوى العلاقات الاجتماعية، تمام كده؟
يعني الفكرة الأساسية اللي احنا خرجنا بها من الدرس، أن النبي صلى الله عليه وسلم على هذا القول أنه يخشى على هذه القلوب من الكسر، فشبهها بالقارورة، وكسر القلب أن يتعلق بأشياء. خد بالك زي ما قلت لكم، كنت قرأت كلمة حلوة قوي للأستاذ فريد كوزال كان بيتكلم على الأغاني، بيقول الأغاني إيه؟ آه، بيقول مشكلة الأغاني أنها تقدم ذكريات لم نعشها أصلاً.
يعني معنى الكلمة، الأغاني عمالة تعيشك في معاني وذكريات وتقعد تفتكر وهي ما حصلتش أصلاً. أنت بتعيش لغيرك، أنت قاعد تلاقي الشاب قاعد بيسمع ويعيط وبتاع، وهو ممكن يكون أصلاً ١٣ - ١٤ سنة. أنت يا ابني بتعمل إيه حبيبي؟ أنت لسه أما تتجوز هتعيط، أنت بتعيط بدري ليه؟ لسه إن شاء الله لما تتجوز وتخلف، لسه يا حبيبي مستعجل على العياط ليه؟ وتلاقي واحدة عايشة في وهم، وتتساهل في أمور تتسبب في كسر قلوبها، وهي التي تسببت في ذلك. ليه؟
طب النبي صلى الله عليه وسلم الأول التقط هذا المشهد وقال: «يا أنجشة، أوعى القوارير»، مع أن الأمر مباح. خدوا بالكم، ما حدش هنا يقول: أنا لسه... ده لسه هتكلم في قضية الشهوات على التعدي في وتجاوز الحدود والحرام، لأ، ده هنا أمر مباح؛ لأن هو أصلاً بإذن من النبي صلى الله عليه وسلم. يعني هذا الحداء أو الحذاء ده بأمر من النبي، يعني بإذن من النبي صلى الله عليه وسلم، سكت عنه النبي صلى الله عليه وسلم، وكان يحث الإبل، وهذا أمر من المباحات.
لكن النبي صلى الله عليه وسلم لما وجد هذا الأمر المباح قد يتسبب في استثارة قلوب النساء، فقال: «يا أنجشة، رويدك». هنا بقى على مستوى الرجال والنساء، أنا لما أجد أن أمر... يعني زي التعبير القرآني: ﴿رَجُلًا سَلَمًا لِّرَجُلٍ هَلْ يَسْتَوِيَانِ مَثَلًا﴾ [الزمر: 29] وفي مقابلها: ﴿رَجُلًا فِيهِ شُرَكَاءُ مُتَشَاكِسُونَ﴾ [الزمر: 29].
حتى التعبير القرآني لما ترجعوا تقرأوا تفسير الآية بيقول لك: المشاكسة تدل على سوء الخلق، وحرص كل شخص أن يتفرد بالقلب، فالقلب تحدث فيه منازعات، عشان كده قلت لكم: الدرس ده استكمال للقلب السليم، القلب السليم القلب الكامل المتماسك، لا فيه قلب متقطع، كل شوية هو حاطط حتة من قلبه عند مشكلة كذا، وحتة من قلبه في الدنيا، وحتة من قلبه كذا، فقلبه متقطع، هو متألم، فيه شركاء متشاكسون، الثاني رجلاً سلماً لرجل، هل يستويان مثلاً؟ واحد قلبه صافٍ خالص لله سبحانه وتعالى، تمام كده؟
ارجعوا لشرح الحديث اللي عايز يفصل أكثر والنقولات عن العلماء، الحديث في البخاري ومسلم. طيب، احنا قلنا هنتكلم على حفظ القلوب من الكسر، نرفق بقلوبنا نحن، لن نتحكم هنا في من يتكلم، يعني النبي صلى الله عليه وسلم قال: «يا أنجشة، رويدك». هنا احنا اللي بينشد أو اللي بيعمل الأصوات أو المثيرات، نحن لا نستطيع أن نتحكم، لا نستطيع أن أخاطبها الآن، يعني أنا مش هعرف أخاطب السوشيال ميديا، أنا أعرف أخاطبك أنت، أنت الذي تتحكم في هذه المؤثرات، خلاص؟ فالخطاب موجّه إليك أنت الآن.
حفظ القلوب من الكسر على مستوى الأسباب الدنيوية والإنشغالات والهموم، نبدأ به أولاً، قلب المؤمن قلب الإنسان أصلاً قلب ضعيف، خلق هذا القلب ليتعلق بالله سبحانه وتعالى، خلق هذا القلب ليتعلق بالله سبحانه وتعالى، هذا القلب بدون تعلق بقوة أكبر منه وباله، القلب يحتاج إلى أن يتأله، يعني إيه يتأله؟ يعني يمارس العبودية.
من الكتب الجميلة التي شرحت مفهوم التأله والألوهية فريد الأنصاري عليه رحمة الله، في كتاب اسمه جمالية الدين، في مقالة فيها اسمها جمالية التوحيد، وهي أصلاً كانت مقالة مفردة يعني أنتم هتلاقوها على النت بمفردها، مقالة اسمها جمالية التوحيد، تكلم عن معنى الإله، يعني أرجو أن أنتم تقرأوا هذه المقالة، مش لازم تقرأ الكتاب كله جمالية الدين، تقرأ بس مقالة جمالية التوحيد، ومعنى الإله واحتياج القلب إلى إله، وشبه ونقل عن العرب...
أن الفصيل ابن الناقة لما يعوزوا يفطموا ابن الناقة عن أمها، يأخذون هذا الفصيل اللي هو ابن الناقة فيفصل عنها، ويتحط في مكان بعيد عن أمه، يحبس بعيداً عنها حتى يتعود أن يأكل بعيداً عن ضرعها، بعيداً عن لبن الأم، زي ما بيحصل مع الطفل وهو يفطم عن أمه.
ويظل هذا الفصيل مشتاقاً إلى أمه ويرفض الطعام، وبعد كده يوصل لمرحلة من شوقه لأمي وشوقي للطعام وجوعه، أن يخرج أصواتاً، يرغي رغاءً، يطلع أصواتاً، فيقول في هذه اللحظة أنه أَلِهَ الفصيل إلى أمه، اشتاق إليها شوقاً في قمة الشوق والاحتياج، فهي إلهه بهذا المعنى اللغوي.
هذا الاحتياج وهذا الشوق الذي بداخل القلب ونحن فطرنا على ذلك، هذا هو معنى التأله، أحد معاني التأله التي تترجم بعد ذلك إلى عبوديات، السجود والدعاء ترجمة عملية من البدن لهذا الشعور القلبي، يعني العبادات أن تمتنع عن الطعام صوماً لله، هذا ترجمة عن الشوق إلى الله سبحانه وتعالى، الصبر على البلاءات هي عملية لهذا المعنى، لذلك هو كان أشار إلى معنى أن هذا معنى التأله هو معنى قلبي، لذلك أنت تشهد على ذلك، تقول: أشهد أن لا إله إلا الله، تشهد على ما في قلبك من هذه المعاني لله سبحانه وتعالى.
فالقلب يحتاج إلى هذه المعاني، حينما يحرم القلب من تعلق بالإله، القلب يبحث عن أي تعلق آخر، هو قلب، هو ضعيف، هو يتقلب، هو مفتقر، القلب هنا يكسر؛ لأنه يظل يبحث عن تعلق بالأسباب، عن تعلق بالمادة، عن تعلق بالناس، وفي كل مرة يكسر، لذلك قال الله سبحانه وتعالى: دلك الله سبحانه وتعالى على الحل، قال: ﴿وَتَوَكَّلْ عَلَى الْحَيِّ الَّذِي لَا يَمُوتُ﴾ [الفرقان: 58].
ما هو أنت لو توكلت على الذي يموت ستصدم في كل مرة، وتوكل على الحي الذي لا يموت سبحانه وتعالى، حينما تتعلق بالإله لا بد أن يكون هذا الإله حياً سبحانه وتعالى، الله لا إله إلا هو الحي القيوم لا تأخذه سنة ولا نوم، لذلك قال إبراهيم عليه السلام: ﴿لَا أُحِبُّ الْآفِلِينَ﴾ [الأنعام: 76]، كيف يكون إلهاً يغيب عني؟ كيف يكون هذا إلهاً يغيب عني؟ كيف أتعلق به؟
فمسألة تعلق القلب، لذلك آه كنت قرأت كلمة جميلة لأحد الإخوة بيقول: بل القلب أضعف من أن يتعلق بإلهين أصلاً، يعني قضية الشرك قضية ممنوعة عقلاً وفطرة، القلب لا يتحمل متعلقاً بإلهين، التعلق الكامل سيبك من التعلقات، التعلق الكامل لا يكون إلا بإله واحد، لا إله إلا هو سبحانه وتعالى، ﴿لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87].
لذلك أنا كنت كاتب قبل كده تغريدة بعنوان: أن القلب أضعف من تحمل كبد هذه الدنيا بدون قرآن، أقول أيضاً وبدون تضرع، كبد الدنيا لا يستطيع الإنسان أن يواجهه بدون تضرع لله وبدون قرآن يعيد ضبط هذا القلب، أنت طول اليوم القلب قاعد بيتلوث، القلب يكتسب الأدران من خلطته بالناس، طول اليوم مشاكل ونقاشات وتفاصيل وفلوس ومش عارف إيه وتعلقات والدنيا، والاقتصاد العالمي هيحصل له، والأزمات والفتن والابتلاءات.
طول اليوم القلب قاعد بيتعلق، يعني أنا حاجة والله سبحان الله، تخيل طول اليوم قاعد بتقرأ أخبار حرب روسيا وأوكرانيا، الجفاف العالمي، والأزمات الاقتصادية، قضية وما عادش فيه شغل، طول اليوم أنت قاعد بتابع وتقلبات سياسية، ثم تقرأ القرآن: ﴿مَقَادِيرُ السَّمَاوَاتِ وَالْأَرْضِ بِيَدِهِ الْخَيْرُ سُبْحَانَكَ﴾، يؤتي الملك من يشاء وينزع الملك ممن يشاء، إيه ده؟ أنا طول اليوم قلبي متشتت، أنا فوجئت أن القرآن يجمع علي قلبي مرة أخرى، وأن الخيوط كلها بيد الله سبحانه وتعالى.
أنت قاعد بتتابع الأخبار السياسية العالمية وبتقرأ سورة الروم: ﴿غُلِبَتِ الرُّومُ * فِي أَدْنَى الْأَرْضِ وَهُم مِّن بَعْدِ غَلَبِهِمْ سَيَغْلِبُونَ * فِي بِضْعِ سِنِينَ﴾ [الروم: 2-4]، شف التعقيب ده، تعقيب على أحداث عالمية سياسية تحدث في عهد النبي صلى الله عليه وسلم، الحرب بين أكبر قوتين في عهد النبي صلى الله عليه وسلم، فارس والروم.
إيه التعقيب؟ ﴿لِلَّهِ الْأَمْرُ مِن قَبْلُ وَمِن بَعْدُ﴾ [الروم: 4]، ده التعقيب اللي بتخرج به، التعقيب القرآني، مش التعقيب اللي هتسمعه في الأخبار، يعني هتطلع تقول لك الأخبار مش هتقول لك: لله الأمر من قبل ومن بعد.
فأنت بتيجي في آخر اليوم تقف في خلوة الله سبحانه وتعالى في قيام الليل، وتقرأ القرآن وتتضرع إلى الله سبحانه وتعالى، أنت هنا ترفق بقلبك، ده أحد أهم وسائل الرفق بالقلب قيام الليل، ده مطردة للداء كما أخبر صلى الله عليه وسلم مطردة للداء عن الجسد، وأيضاً مطردة للداء عن القلب المتمزق، كمطردة للداء عنه القلب.
قلب الإنسان لا يستطيع أن يكون إلهاً، يعني هو عبد، احنا يا جماعة أحياناً لما بنفكر في الدنيا... يعني أنا عايز أقول تعبير هو مش منضبط، يعني أرجو أن أنتم اللفظ لسه ما عنديش لفظ أن أنا أعبر رجعنا للمعنى اللي جوانا، لكن في واحد بحط نفسه مكان ربنا في ترتيب الحياة، طبعا بعض الناس بتصور أن انا بقول لك: لا ما تخططش لحياتك أو ما تدبرش لحياتك أو ما تحطش خطط، انا ما قلتش كده. هو عموماً يعني أنت جربت كتير وفشلت، فاسمع كلامي بقى المرة دي.
آه يعني عايز اجيب لكم مثال، آه كنت بقرأ في قول الله سبحانه وتعالى سورة هود: ﴿فَلَعَلَّكَ تَارِكٌ بَعْضَ مَا يُوحَىٰ إِلَيْكَ وَضَائِق به صَدْرِكَ أَن يَقُولُوا﴾ [هود: 12]، كلامهم بدأ يؤثر في صدر النبي صلى الله عليه وسلم وتأثير عابر مش مستمر، لذلك قالوا هنا جيء باسم الفاعل، ما قالش ضيق، لو جت اسم ضيق في مكان التأثير ده مستمر، لا، ده كان تأثير عابر: ﴿فَلَعَلَّكَ تَارِكٌ بَعْضَ مَا يُوحَىٰ إِلَيْكَ وَضَائِق به صَدْرِكَ أَن يَقُولُوا﴾.
فأنا بقرأ الآيات، أنا أصلاً كنت سبحان الله بقرأ الآيات وأنا أصلاً مضغوط من الواقع والخلافات وكلام الناس، مش عارف أعمل إيه، وتيجي لو جيت تدي دروس والناس مش هتسمعك، ولو جيت... فلقيت بعدها قول الله سبحانه وتعالى: ﴿إِنَّمَا أَنتَ نَذِيرٌ﴾ [هود: 12]، شوية كده في سورة الرعد: ﴿إِنَّمَا أَنتَ مُنذِرٌ وَلِكُلِّ قَوْمٍ هَادٍ﴾ [الرعد: 7].
لما استعدت وظيفتي خلاص الضيق بيروح، أنت فهمت وظيفتك زي آية الأنعام: ﴿فَإِنِ اسْتَطَعْتَ أَن تَبْتَغِي نَفَقًا فِي الْأَرْضِ أَوْ سُلَّمًا فِي السَّمَاءِ فَتَاتِيَهُم بِآيَةٍ﴾ [الأنعام: 35]، هتعمل إيه يعني؟ هتعمل نفق في الأرض وسلماً في السماء عشان تجيب آية؟ مش هتعرف. ومن أجمل الشروحات للآية دي بتاعة آية الأنعام كان كلام قرأته جميل لابن عطية، طبعا أنا كل ده من الذاكرة فالله أعلم الكلام هيبقى يطلع صح ولا غلط، الخلاصة: لما بتستعيد وظيفتك خلاص بتتهدى، أنا مش هحط نفسي مكان ربنا، أنا مش هدبر كل الأسباب وأحيط بكل الأمور وأمنع كل التبعات، هعمل ده إزاي؟ أنا بعمل اللي علي خلاص، أنا لي... وفيه دار آخرة، هعمل إيه؟
لذلك قال بعض أهل العلم: يجوز الاحتجاج بالقدر على المصائب مش على الذنوب، فرقوا بين الاحتجاج بالقدر على الذنب وعلى المصيبة، هعمل إيه؟ خلاص هعمل إيه؟ ما هو عشان تعرف تستمر في هذه الحياة، النبي صلى الله عليه وسلم بيقول، وهذا الحديث له روايات كتير.
بصوا يا جماعة، أنا بعتمد في مثل هذه الأمسيات والدروس بعتمد على جزء من أن أنتم بتُبحثوا وبتدوروا؛ لذلك بنحاول بعد انتهاء الدرس وخصوصاً على التليجرام نحط لكم روابط للحاجات اللي أنا بقولها، يعني أنا صعب أن أنا أنقل لكم الأحاديث بشروحها، راجعوا كده حديث: «من كانت الدنيا همه، ومن كانت الآخرة همه»، أنا قلت في درس أظن ده كان درس القلب السليم، قلت هناك صيغة أففضل، حديث النبي صلى الله عليه وسلم: «اللهم لا تجعل الدنيا أكبر همنا»؛ لأن طبيعي أن الدنيا تكون من همومك.
وخليني أقول نقطة مهمة قوي دي من القواعد كده في الدرس: إزاي أحافظ على كسر قلبك من خلال الأسباب والإنشغالات الدنيوية والشهوات والعلاقات الاجتماعية؟ دي من القواعد المهمة في الدرس. القاعدة الثانية: القلب أضعف من تحمل كبد هذه الدنيا بدون تضرع وقيام. القاعدة الثالثة المهمة قوي، أن أنا كنت دلوقتي عشان بس تشوف السياق، كنت بقول حديث: «من كانت الدنيا همه، ومن كانت الآخرة همه».
بعد كده قلت لكم: خدوا بالكوا، مش معنى الحديث دوت مش معنى الحديث أنك مالكش هموم دنيوية، أنت بشر، أنا لسه هقول لكم واحدة تالتة، بس أنا بجيب لكم سياقة، فقلت لكم بدليل حديث النبي صلى الله عليه وسلم وهو بيدعي: «اللهم لا تجعل الدنيا أكبر همنا»، يبقى القضية أفعل تفضيل: مين أكبر ومين أصغر؟ فطبيعي أن الدنيا من همومك. لذلك دي بقى القاعدة الثالثة: الاختبار.
حقيقي أن تعايش عالم الشهادة وتجاهد في تعلق قلبك بعالم الغيب. ده من الاختبارات في الدنيا أنك تكون، لذلك احنا بيحصل لنا تدريب، تكون في عز الظهر والانشغالات وفي شغلك ومشاكل والحياة، وتسمع: الله أكبر، حي على الصلاة، حي على الفلاح. فتتعلم هذه اللياقة الإيمانية أنك تنقطع عن هذا العالم وتذهب وتقول: الله أكبر، ده نوع من الإحرام. تكبيرة الإحرام اللي بتنقلك إلى هذا العالم.
ولما تيجي بقى تقرأ، إن شاء الله هقول لكم على رسالة كده في أحاسيس الخشوع ومليانة أحاديث جميلة، فكرة أن: «إذا وقف أحدكم فإنه يناجي ربه، حتى لا تبصق في قبلتك ولا تلتفت، لا ببدنك ولا بقلبك». إيه ده! ده معايشة لعالم آخر! إيه التدريب ده! وبعد كده السلام عليكم، تعود إلى هذا العالم وتدرب على هذا الانتقال. الإنسان يكابد، لست مطالبا بالعزلة عن هذا العالم؛ لأن العالم ده هو مناط الاختبار. يعني العالم ده هو دايرة اختبارك، وده مكان اختبارك، ده حصل الهبوط خلاص إلى هذه الأرض، ده مكان الاختبار بتاع الدنيا، فلن تستطيع أن تنعزل عنه تماما.
القضية أنك تعايش هذا العالم وقلبُك مرتبط بالدار الآخرة، ورجل قلبه معلق. يعني تخيل هو بيمارس حياته في الدنيا، قلبه معلق في المساجد، مشتبك مع الحياة وكده ومنتظر لحظة الرجوع إلى قلبه، يعني قلبه في المسجد مش العكس؛ إلا من رحم الله. وياما الواحد للاسف بيبتلى بالعمر ده، يبقى قاعد في المسجد وقلبه معلق في الدنيا وقلبه يعني إيه يقول لي: أنا جاي أهو، هخبط بس ركعتين وجاي. هل زي ما النبي صلى الله عليه وسلم يقول: «تلك صلاة المنافق»؟ ما هو المنافق بتاع مصلحته، الصلاة بالنسبة له تلك صلاة المنافق الذي ينقر أربع ركعات.
على مستوى التعلق، رفقا بالقلوب في التعلقات الدنيوية. يا جماعة يعني أحاسيس الناس، طيب أنا هقول لكم على حاجة، أنا كنت هتكلم عن القضايا الدينية، أنا هقول لكم على حاجة أبعد من كده عشان تفهموا أنا قصدي إيه. بل وأرجو أن برضه المعنى ده يوصل كويس، ما يوصلش غلط يعني، بل حتى كثرة –ركزوا بس في القيود اللي أنا بقولها- كثرة متابعة تفاصيل أخبار المسلمين.
تاني، كثرة متابعة تفاصيل العذاب اللي بيتعرض له المسلمين في الأرض، هذه الكثرة والمتابعة بالتفصيل قد تسبب لك ألما لا تستطيع أن تتجاوزه، ممكن تجيب لك إحباط، ممكن يعود عليك الأمر ده بالبطلان بالأثر العكسي. إيه تعمل في نفسك كده؟ ده ربنا بيقول في سورة الأنفال: ﴿وَلَوْ أَرَاكَهُمْ كَثِيرًا﴾ [الأنفال: 43] على حقيقتهم أن هم كانوا كتير وربنا وراهم لنا قليل الأعداء في غزوة بدر، ﴿وَلَوْ أَرَاكَهُمْ كَثِيرًا لَفَشِلْتُمْ وَلَتَنَازَعْتُمْ فِي الْأَمْرِ وَلَكِنَّ اللَّهَ سَلَّمَ إِنَّ اللَّهَ عَلِيمٌ بِذَاتِ الصُّدُورِ﴾ [الأنفال: 43]. في قلوب لا تتحمل أن ترى الأمر على حقيقته، مش دورك، مش ثغرك يعني، متابعة تفاصيل ده مش سعيك.
هل معنى كده أن أنا أدعو إلى التخلي عن متابعة أخبار المسلمين؟ بئس المسلم إذا، أنا ما قلتلكش كده، أنا بقول التفاصيل؛ يعني واحد بيطلع له فيديو تعذيب مش عارف إيه، ويطلع له حصل إيه للناس، تفاصيل تعذيب الناس في السجون في الصين، ومش عارف حصل إيه في سوريا، وقاعد مصمم هو لا يفعل شيئا في الدين، يعني مش هو أصلا شخص يتحرك ويدعو إلى الله وينصر الدين ويطلب العلم وباحتك بصحبة صالحة تثبته وبيقوم الليل، هو أصلا عنده الزاد الذي يستطيع أن يقاوم به هذه الأمور؟ لأ، هو ما عندوش كل ده.
امال هو بيعمل إيه؟ وهو يتابع ويحزن، ولذلك كان لشيخ الإسلام كلام معنى ما فات كلامه: إننا مش متعبدين بهذا الحزن، يعني مجرد الحزن ده فقط سمُّ ماذا؟ لأن الحزن يولد حالة من الإحباط، ﴿وَلَا تَهِنُوا وَلَا تَحْزَنُوا﴾ [آل عمران: 139]. يبقى الحزن هيولد حالة من الوهن، وربنا قال في نفس السورة: ﴿فَمَا وَهَنُوا لِمَا أَصَابَهُمْ فِي سَبِيلِ اللَّهِ﴾ [آل عمران: 146]. يبقى ما أصابنا في سبيل الله قد يؤدي إلى الوهن أهو، ﴿وَلَا تَهِنُوا وَلَا تَحْزَنُوا﴾، وربنا قال عن قوم: ﴿فَمَا وَهَنُوا لِمَا أَصَابَهُمْ فِي سَبِيلِ اللَّهِ وَمَا ضَعُفُوا وَمَا اسْتَكَانُوا﴾ [آل عمران: 146]. الحق نفسك قبل الوهن؛ لأن الوهن يؤدي إلى ضعف يؤدي إلى استكانة، ﴿فَمَا وَهَنُوا لِمَا أَصَابَهُمْ فِي سَبِيلِ اللَّهِ وَمَا ضَعُفُوا وَمَا اسْتَكَانُوا﴾.
بلاش تحط قلبك في حالة من الوهم، يبقى بلاش تعرض نفسك لطموحات أو يعني أعدُّ كل إعلان عن قضايا حاجة دنيوية قاعد بتشوفه، وقاعد تتفرج على الفلل اللي مش عارف كاتبة إيه، وقاعد بتتابع تفاصيل تفاصيل وهحفظ أنواع تفاصيل العربيات بفرق مش عارف إيه والموبايلات الجديدة، قاعد بتاكل كل ده ليه يعني يعني رفقا بقلبك! بتعمل كده ليه؟ أنت بتستفيد إيه لما بتعمل ده؟ هو المدخلات: ﴿فَجَعَلْنَاهُ سَمِيعًا بَصِيرًا﴾ [الإنسان: 2]. المدخلات السمع والبصر تؤثر في القلب، ويؤثر في الابتلاء: ﴿إِنَّا خَلَقْنَا الْإِنْسَانَ مِنْ نُطْفَةٍ أَمْشَاجٍ نَبْتَلِيهِ فَجَعَلْنَاهُ سَمِيعًا بَصِيرًا﴾ [الإنسان: 2]. فأنت مفروض تعرض السمع والبصر لما يساعدك على مقاومة هذا الابتلاء مش على ما يضعفك.
يبقى أول حاجة كده، الوقت سحب مننا ليه كده؟ آه، على مستوى الأسباب والانشغالات قلنا القلب أضعف، القلب لا يستطيع أن يكون إلها، هو عبد ورجعه مقال جمالية التوحيد: اعرف وظيفتك بلاش تنشغل بوظيفة أكبر منك. يعني أحيانا تلاقي واحد قاعد في البيت، أم مشغولة بأولادها وقاعدة هي لا تملك أن هي طب هتعمل إيه قاعدة؟ طب وبعدين طب والولاد طب والمستقبل؟ هي قاعدة الآن تكثير مشاعر سوداء في قلبه لن تستفيد منها شيئا على أرض الواقع. يعني في واحد قاعد يندب في حظه وبس ما بيعملش أي حاجة، يعني مش مثلا هيترتب عليه كلام عملي، لأ هو قاعد عارف إيه الأثر؟
بعد الصحابة لما كانوا يقولوا: هيا بنا نؤمن ساعة، تعالوا نفتكر الجنة. في ناس كده لما بتتقابل: هيا بنا نسودها ساعة، تقابل واحد يقول لك: إيه شفت الصين هتعمل إيه؟ الصين هتولع الدنيا، آه لأ لأ ده روسيا مجهزة النووي، النووي يومين تلاتة والدنيا دي كلها ما لوش لازمة اللي احنا بنعمله ده كله أصلا ناوي، شفت حاجة أنت موضوع الماية هنموت من العطش، انسى موضوع الماية ده اللي معاه إزازتين يعينهم. والتالت يقول: والله العظيم ده أنتم بلادة ماء إيه! ده أنتم مش هتلاقوا الهوا، مش هتلاقوا تتنفسوا، أنتم مش عارفين حاجة عن موضوع الكائنات الفضائية اللي هتغزونا، والله أنتم مساكين ده أنتم هتموتوا محروقين. يا جماعة، وبعدين أنا مش قادر أتخيل مثلا هزة زي زمان بالضبط أول ربنا يحفظنا جميعا يا رب موضوع كورونا. أنا كنت في بعض الجروبات في الواتس: يا جماعة مش معقول، ارحمونا! مش معقول كم الأخبار التفصيلية بالحالة بتموت، الحالة ماتت، شالوا الأكسجين. طب خلاص، ربنا يرحمنا جميعا، يعني أنت بتعيش لحظات ولذلك ناس كتير جالها آلام نفسية في قضية كورونا من كثرة متابعة كثرة ومتابعة وتفاصيل. ليه؟ أعمل في قلبي ليه كده؟ يعني لماذا؟ أنا مش متعبد بده، قلبي لا يتحمل، خلاص يبقى ده التاني.
نيجي على مستوى الشهوات وده أحد التعلقات بهذا الحديث النهارده، استثارة المشاعر. حافظوا على مشاعركم، مشاعركم لها حدود، لها مكان، ما تخرجهاش، ما تبقاش قاعد أنت قاعد بتتفرج، أنت داخل تتفرج على مقطع فيديو درس ديني، وطلع لك إعلان في الأول تجاوزه ما تتفرجش عليه، من أكثر ما يفسد قلب الإنسان هذا الفضول: بس هشوف المقطع ده إيه ده! إيه ده! ده الكوميكس المشهور! وتلاقي فيديو تحت: الحق مش عارف كريستيانو بقى إمام مسجد مش عارف إيه، أنت داخل تشوف كريستيانو، الحق ده مش عارف إيه، الذئب تحول إلى، وتبقى قاعد قاعد، وطبعا خد احنا مش هنروغ بقى، أنت مش في الاول كنت داخل تضحك بعد كده لقيت إيه مقطع مضحك بس في صورة امرأة متبرجة، آه أنا داخل أضحك مش داخل والله أنا، وتخرج بحالة من الشتات القلبي واستثارة الشهوات. طب ليه تعبث في قلبك؟
وتفاجأ بقى أن الأمر دخل من حاجة، وكل نسأل الله السلامة والعافية يعني على قد الرسايل اللي جات لي وعلى قد اللي أطلعت عليه –مش خبير قوي أنا في موضوع إدمان الإباحية- لكن من الرسايل اللي جات لي في قضية الإباحية الناس اللي مبتلى عندها ابتلاء في الأمر ده بيبدأ بهذا الفضول، يقول لك: أنا أنا حافظ للقرآن وكنت كذا وبسمع دروس، وفوجئت بنفسي أن أنا في هذا الوحل والعياذ بالله، أما رفقا بقلبه هو بيكلمني، اللي بيرسل الرسالة أيا كان هو أخ أو أخت ما بيبقاش عارف المرسل مين؛ لأنه بيبقى مستعمل يعني حساب أنا ما أعرفوش، اللي بيبعت بيقول لك: أنا متألم وحاسس أن حاسس أن قلبه أسير في الشهوة.
وأنا أتكلمت عن معنى يهرعون قبل كده –مش فاكر كان في درس قلب سليم ولا إيه- أن اللي يهرع اللي هو الأسير الذي يدفع إلى حتفه هو أسير، هو بيقول لك: أنا كرهت نفسي، أنا النهارده مش بتكلم في حل، ده بفضل الله في حلول، والذي يجاهد الله سبحانه وتعالى لن يتخلى عنه، لكن أنا بتكلم لماذا يصل الأمر ده؟ ده الشيطان بيقول لأحد -أحد معانيها- وضع اللجام في الحنك، قمة السيطرة، ليه تسمح أن الأمر ده يضع يصل بك إلى هذا الامر أن الشيطان يقودك، ليه يقودك الشيطان إلى حتفك؟ لماذا؟
يبقى أنا من الأول امتنع رفقا بقلبي، ما أعرضش قلبي لكل الشهوات دي، ولذلك تجد أن اللي بيعرض قلبه لكل هذه الشهوات ولا سيما من الشباب مش عارف يتجوز، هو ما عدش عارف يرضى، يعني هيتجوز ازاي؟ هو أي واحدة رايح يتجوزها قاعد بيقارنها بخيال من الشهوات في في عقلي، مش عارف مش عارف يتجوز أصلا، وحتى لو بيتجوز مش عارف يبقى راضي حالة من الفجور في الشهوات، الأمر أصبح يعني يعني الزمان اللي كان عايز يعمل معصية أو يشوف مشهد إباحي كان يعني الأمر دلوقتي في قمة السهولة، نسأل الله السلامة والعافية.
فلازم أكون حذر، طالما الأمر ده ممكن يطلع لك في درس ديني لازم تكون حذر، لازم تكون على حذر من ده، أنت تكون متيقظ أن أنا ما فتنش قلبي وأضع قلبي في في الطين ثم يعني أجاهد في تنظيفه، طب ما من الأول رفقا بقلبك يعني يعني لحظات مجاهدة نزع الشهوة من القلب مؤلمة، هي هي غالية عند الله، مش كل الناس بيصبر عليها، فأنا من الأول رفقا بقلبك.
الإخوة والأخوات اللي بيتساهلوا في الحديث مع بعض، مع كثرة وسائل التواصل والرسائل الخاصة وأحيانا تحت بند الدين، تحت بند أن هي بتراسل الأخ بتسأله عن الكتاب المهم والدرس العظيم، ومش فاهمة الحتة ديت بعد أذنك، والتفاصيل؛ لأن الشيطان وعموما النفس يعني ما بتحبش المعصية المباشرة، بتحب التدريج، سَوَّل مع أحد معاني التسويل، حالة الاسترخاء تجاه المعصية، ما يجيلكش يقول لك: إيه اعمل كذا، لأ واحدة واحدة خطوات، فالإنسان يكون متيقظ لقلبه، ليه ليه أخت تعبث بقلبها وتجعل قلبها عرضة لمن يعبث فيه من الرجال، حتى ولو كان شيخ وعالم العلماء؟ ليه؟ ليه حالة التساهل ليه؟ سيظل هو رجل وتظلي امرأة، هذا أمر النبي صلى الله عليه وسلم اهو، واللي علق الإمام النووي قال: الرجال قضية فيه رجال وفيه نساء، وده النبي من أيام النبي صلى الله عليه وسلم، النبي صلى الله عليه وسلم لما بيتكلم أن صفوف النساء في الصلاة شر صفوف النساء بالصلاة أوله ليه؟ عشان القرب من الرجال.
أنا بقى أجي أعبث بقلبي، وأجي أصل أنا كنت بسأل في الدين، وأصله هو اللي ضحك علي، ضحك علي! وأصل ليه أفتن نفسي؟ ليه ليه الأخ يدخل للأخت ويتكلم ويتساير ليه؟ ليه الاخت هي اللي تدخل السؤال؟ وبعدين يحصل صدمة وعايز يتوب فيتألم، طب رفقا بقلوبكم! رفقا بقلوبكن! ليه لأعبث في قلبي في قضية الشهوات ثم تزرع الشهوة في قلبي ثم أجاهد لنزعها؟ ماشي المجاهدة في نزع الشهوة لها ثواب، هذا الرجل الذي قال: كانت لي امرأة -يحبها أشد ما يحب رجال النساء- كانت ابنة عم له، وأراد أن يراودها عن نفسها وجلس بين رجليها، فقمت عنها وهي أحب الناس إلي، فتحركت الصخرة. لكن لن نستطيع الكل، مش هيستطيع أن هو الشهوة في هذه اللحظة، بل الأغلب يسقط في الفتنة، نسأل الله السلامة والعافية.
كان من الأول رفقا بقلوبكم في قضية الشهوات، بلاش تعرضوا إشعاع الشهوات اللي بيحيط بنا في كل شيء، فعلا غض البصر أصبح صعب، يعني عشان أكون واقعي غض البصر في صعوبة الآن ويا سلام لو أنت مبتلى أنك بتسوق هتغض بصرك هتخبط فانت يعني فالواحد مش ناقص يعني هو الوضع الحالي مش ناقص أنك تزود على نفسك ده.
هنكون متيقظ للاماكن اللي القلب فيها ممكن يحصل له نوع من الإيه من الاسترخاء في التعامل، في زملاء العمل، التعامل مع الداعية وأنا متصور بقى أن هو ملاك، الطبيب النفسي أي حد بتستشيره في شيء، أي علاقة بيحدث فيها حالة من الاسترخاء وعدم الحذر، لأ أنا محتاج أكون متيقظ، بدليل ربنا قال في القرآن: ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَكُمْ فَاحْذَروهُمْ﴾ [التغابن: 14]. الحذر؛ لأن الفتنة قريبة.
في البيت فأنَا محتاج أكون على حذر. شرطة التغابن هنا محتاج أكون على وعي. النبي نبّه الولد: «مجبنة المبخلة»، فنكون متيقظين لده. هل أنا جبنت عن الدين أو بخلت حالة من البخل عن نصرة الدين بسبب الأولاد؟ أنا أكون متيقظاً بس، هذا لا يعني اتهامهم، أنا مش هقعد برضو أقول لابني أنت السبب.
أنا مش غرضي أنك تتهم الدعاة ولا الأطباء ولا المستشارين، الناس اللي بتستشيرهم في حياتك، ده مش غرضي، الغرض أنا بخاطب الشخص نفسه؛ أنت أنفق بقلبك ولا تفتي لنفسك ثم تندم بعد ذلك.
آخر حاجة على مستوى العلاقات الاجتماعية؛ كتير من الناس دلوقتي أصبح بيشتكي والصداقة وما عادش ما فيش صاحب بيتصاحب والخاين ومش عارف ايه، برضو بلاش تعبث بقلبك على مستوى كثرة العلاقات. كل ده لأننا أصلاً في زمن فيه انفتاح، وفي نفس الوقت ده ليس معناه زي ما الناس بقى بتكتب ايه؛ ابتعد عن العلاقات السامة، أي حد مش عارف يعمل فيك ايه يولع فيه، البلوك علّق زرار البلوك على أي حد يزعلك، أنا ده نوع من أيضاً التطرف الناحية الأخرى. أكيد لازم يكون متوازن؛ أحبب حبيبك، حديث يعني روي موقوفاً ومرفوعاً: «أحبب حبيبك هوناً ما»؛ يعني ده اللي عايز أقوله، خلي علاقاتك هوناً ما، عسى أن يكون بغيضك هوناً ما.
مش الحب الجارف اللي لما بيحصل فيه مشكلة ينقلب لخناقات على السوشيال ميديا وفضايح ومحاكم، خلي حياتك في العلاقات هذه الكلمة فقط. اختصار كل اللي عايز أقوله في العلاقات الاجتماعية؛ يعني بلاش العلاقات الجارفة التي تعصف بالقلب، بتخليه بعد كده أنا مش عايز أقابل حد، أنا ما عادش عايز أصاحب حد، كل الناس... لا هو مش كده، خير أنت اللي كارت؛ يعني فيه عاطفة جارفة في اتجاه وأصبحت عاطفة عكسية في اتجاه آخر من الأول.
قدر المستطاع دي عايزة تدريب على التلات مستويات اللي أنا قلتها: على مستوى الأسباب والإنشغالات الدنيوية، على مستوى الشهوات؛ قضية الفضول في الشهوات دي يعني أخطر حاجة في الشهوات مسألة الفضول تتبع. وكلنا يعني قد نقع في الأمر ده، أنت داخل عشان تقرأ تغريدة أو تقرأ منشور على الفيسبوك أو تشوف حاجة أو تشوف مقطع على اليوتيوب، طب ما تشوف اللي بعدها، ما تشوف اللي بعدها، ما تشوف اللي بعدها، تفاجأ رحت بعيد ساعتين من الزمن أو تلاتة في أماكن ايه اللي جابك هنا؟ ما تعرفش، تيجي تشوف التاريخ بتاعك ما هو محفوظ: ﴿أَحْصَاهُ اللَّهُ وَنَسُوهُ﴾ [المجادلة: 6]؛ يعني مش معنى انك مسحت التاريخ إنه إتمسح، لا، أحصاه الله ونسوه. نسأل الله السلامة والعافية، فتفاجأ يعني ايه الترتيب العجيب ده؟ يعني ازاي أنت داخل تشوف دي دي وصلتك لدي، بعد كده ده وصلك لده. قطع الفضول مهم جداً في زمن منتشر فيه الاختيارات المتعددة في لحظات بتظهر أمامك.
على مستوى العلاقات؛ عشان أنا طولت بس، كلمة هوناً ما، خلي علاقاتك أرفق بقلبك. آخر حاجة أنا قلت أدي نصايح عملية؛ أحب لكم أن كل فترة من فترات حياتكم تقفلوا وسائل التواصل، أياً كان، فترة أسبوع، يومين، تلاتة. كل واحد يعني بلاش، قلل وسائل التواصل شوية، أنا مش قاعد باقول لك اقرا الأبحاث واتفرج على مش عارف محاضرة مين واقرا كتاب ايه وإزاي السوشيال ميديا بتلعب في الدماغ، وإزاي فيه آليات معينة والكلام ده كله، وأسر وسائل التواصل استحوذت على العقول وعلى القلوب. ده فيه كتير اللي عايز يبحث يدور، لكن اللي عايز أقوله لك بس كنصيحة عامة: كل فترة اقفل وسائل التواصل شوية، اجمع شتات عقلك وقلبك كل فترة، ده رقم واحد.
رقم اتنين من وسائل جامع القلب: التدريب على الخشوع في الصلاة ولا سيما في قيام الليل، لذلك كل فترة اقرأ حاجة عن الخشوع. كان فيه مقالة لسه افتكرتها بداية إبراهيم السكران كان اسمها صفاء الأنبجانية... صفاء الأنبجانية، أنا كنت عايز أقول لكم على رسالة تانية هقولها لكم دلوقتي، لكن رسالة الشيخ إبراهيم السكران مقالة طويلة شوية، حتى المقدمة ممكن يعني هو يتكلم في بعض وبعد كده يتكلم عشان تفهم ايه الأنبجانية دي، وايه علاقتها مسألة الصفاء والخشوع. فيه رسالة عن الخشوع في الصلاة مش فاكر اسمها بس هي أظن هنحطها لكم على بتاعة عبد الهادي حسن وهبي؛ عبد الهادي حسن وهبي له رسالتين كتيب، رسالة صغيرة واحدة في الخشوع وواحدة في قيام الليل، يعني ميزة الرسالة دي إنها كلها أحاديث، يعني الكلام اللي فيها قليل يغلب عليها حديث النبي صلى الله عليه وسلم، وده من جمال هذه الرسالة؛ رسالة عن الخشوع ورسالة عن قيام الليل. اللي مش قادر يقرأ بتاعة الخشوع خلاص؛ التدريب جمع القلب، طبعاً فيه في الخشوع رسايل وكتب وسلاسل ودروس، أنا عاجبني بس في الرسالة إنك تخرج بمجموعة من الأحاديث، حتى لو تكتب أنت الأحاديث اللي أثرت فيك معاك في ورقة وتخليها جنبك أو على الموبايل في نوتس كده وتبقى معك، كل شوية تسترجع هذه المعاني. نص بركة كلام الله وكلام النبي عليه الصلاة والسلام كلام مبارك، بتطلع بالشعارات دي القرآنية والنبوية بتفضل تعرف تستثمرها في حياتك. خلاص، النبي صلى الله عليه وسلم بيقول: «إن قصر الخطبة وطول الصلاة مئنة من فقه الرجل»؛ يعني من فقه الخطيب إنه يقول الكلام قليل وآيات كتير، ليه؟ لأن الناس بترتبط بالآية، الكلام بينسى.
إذن النصيحة العملية التانية: التدريب على قضية الخشوع؛ لأن الخشوع بيساعدني على جمع الشتات، جمع شتات القلب.
ثالث حاجة وأخير حاجة؛ اسمعوا كتير عن الأسماء الحسنى، يعني اسمع عن ربنا، لأننا غالب حياتنا دلوقتي احتكاك بالخلق، غالب حياتنا احتكاك بالمخلوقات؛ السوشيال ميديا، فلان فلانة حصل نتيجة، كم دال ولا جاب كم؟ ودي جابت ودي اتجوزت، وده حصل له وده سافر وده اتفسح، وده منزل صورته في المطعم، وده نزل مش عارف جديد، وده جاب عربية جديدة، وده نقل بيت جديد، وده حاطط خلفية... الحياة مليانة أحداث للناس، فانت العقل ده متوزع يعني حصل له أن الإيمان ليبلى، عقولنا وقلوبنا حصل لها يعني بتبلى من هذا التتبع الشنيع لهذه الحياة. ما نصلي بربنا شوية؛ اسم الله السميع، القريب، المجيب، المقيت سبحانه وتعالى؛ عش مع ربنا شوية، ابعد قدر المستطاع، أنت كده كده في وسط الخلق، قلنا لن تنعزل عن عالم الشهادة، ده محط الاختبار بتاعك، القلب عشان يعايش علام الغيب، ما هو أنت محتاج ترتبط بربنا سبحانه وتعالى، وأنا قلت إن ده الدرس ده جزء من درس القلب السليم.
فمن الحلول العملية للقلب السليم: تقليل قدر المستطاع الاحتكاك بوسائل التواصل، التدريب على الخشوع، القراءة عن الخشوع –أنا رشحت رسالة أو رسالة ومقال–، السماع عن الأسماء الحسنى.
آخر حاجة –دي ما تعتبرش يعني أنا دول أنا كنت كاتب بس التلاتة دول القضايا العملية– آخر حاجة مسألة الحذر؛ يحذر قبل أن تقع الفتنة. أسأل الله سبحانه وتعالى أن يرزقني وإياكم قلوباً سليمةً، قلوباً معلقة به سبحانه وتعالى، نعوذ بالله من الفتن ما ظهر منها وما بطن، نعوذ بالله من الفتن ما ظهر منها وما بطن. اللهم إنا نسألك لذة النظر إلى وجهك والشوق إلى لقائك في غير ضراء ولا فتنة مضلة. والسلام عليكم ورحمة الله وبركاته.