أمسية تربوية (38) | التسبيح | د. أحمد عبد المنعم

أرأيت كيف يعرض لنا القرآن الأذكار؟ الأذكار التي شرعت لنا في الشريعة، من التهليل؛ لا إله إلا الله، وأنك تقول: لا إله إلا الله وحده لا شريك له، له الملك وله الحمد وهو على كل شيء قدير، أو من الحمد، أو من التسبيح، أو من التكبير، أو من الحوقلة، وغيرها من الأذكار المطلقة، أو الواردة في مثل صرف الهموم وغير ذلك. تجد بعض علماء السلوك قالوا ينبغي أن تكون هذه الأذكار عبارة عما في القلب، يعني كأن أنت تصف حال القلب. فأنت لما تحمد الله سبحانه وتعالى، أنت تصف حال قلبك، أن قلبك يشهد نعم الله سبحانه وتعالى فتثني على الله سبحانه وتعالى. فحينما تكثر من الحمد، هذه دلالة على أن القلب الآن يرى الملكوت، يرى آلاء الله سبحانه وتعالى، ويرى النعم بأنواعها.

والقرآن له عادة في ذكر النعم، وده هنا المعنى الثاني، إن القرآن بيوسع معنى الذكر. مسألة إن الذكر هو عبارة عن التحدث بما يراه القلب، بس بعض الناس بيقول: أحيانًا ممكن أقول الذكر ولسة المعنى أنا مش عايشه. فهل أنا بقول الذكر وأكرره عشان القلب يشرب المعنى، ولا الذكر هو عبارة عن شهود هذا المعنى؟ بنقول الاثنين، علاقة جدلية؛ ده بيغذي ده، زي القرآن كده، بييجي يسأل: هل أطهر قلبي عشان أفهم القرآن، ولا أدخل للقرآن والقرآن يطهر قلبي؟ بنقول الاثنين. تفعل ما تستطيعه من تطهير القلب، تدخل للقرآن، فالقرآن يزيد القلب تطهيرًا، فتفهم في القرآن أكثر، فالقرآن يطهر قلبك أكثر، وهكذا.

فكذلك الأذكار، هل الأذكار لما أنت تقول: لا إله إلا الله وحده لا شريك له، له الملك وله الحمد وهو على كل شيء قدير، وتقعد تكررها مائة مرة، هل أنت الآن بتعبر عما يرى قلبك من التوحيد؟ أنت الآن قلبك يشهد توحيد الله سبحانه وتعالى في الكون، وأنه سبحانه وتعالى مالك الملك بيده الملك سبحانه وتعالى، فأنت بتتحدث عما تراه في قلبك، زي الشهادة كده؛ أشهد أن لا إله إلا الله، بالرغم من أن الشهادة فيها معنى قلبي، فكأنك تشهد على ما في قلبك من محبة لله سبحانه وتعالى. لذلك بعض العلماء، ومنهم الإمام فريد الأنصاري، له كتاب قال جميلة اسمها جمالية التوحيد، بيتكلم في معنى الألوهية ولا إله إلا الله، والتأله لله والتعبد لله سبحانه وتعالى، وإن من معاني هذا التأله أن الإنسان يجد في قلبه شوقًا لله سبحانه وتعالى، هذا الشوق يعبر الإنسان عنه فيقول: أشهد. يشهد على نفسه، يشهد على قلبه، ويقول: أشهد أن لا إله إلا الله.

فهل الأذكار تعبير عما يجد الإنسان في القلب، ولا تكرار الذكر ده بيغرس المعنى في القلب؟ يعني مثلاً كان في خطبة كنت عاملها عن الأدعية الواردة في السنة عن صرف الهم والغم، تجد أن تكرار هذه الأدعية بيسكب شيئًا شيئًا في القلب، الشيء اللي بيسكب في القلب ده بيساعدك على التخلص من الهموم. يبقى إذًا تكرار الأذكار بيساعد على زراعة المعنى، وفي نفس الوقت لما تقول الذكر كثيرًا يبدأ القلب يستشعر المعنى، فكأن الذكر عبارة عن نطق للحال القلبي لما تجده في قلبك، ده المعنى الأول.

المقدمة الثانية؛ إحنا قلنا إن القرآن بيوسع معاني الذكر. مثلاً لما نيجي نتكلم على معنى التوبة، وتيجي تستحضر ذكر التوبة في القرآن، فتجد سورة مثلاً كسورة التوبة وتختم بالتوبة، وتجد أيضًا أن علماء السلوك يضعون التوبة أحيانًا في آخر المنازل، فالتوبة منزلة يستصحبها الإنسان من أول منزلة إلى الله سبحانه وتعالى إلى آخر المنازل. في أواخر سورة التوبة: ﴿لَقَد تَّابَ اللَّهُ عَلَى النَّبِيِّ وَالْمُهَاجِرِينَ وَالْأَنصَارِ الَّذِينَ اتَّبَعُوهُ فِي سَاعَةِ الْعُسْرَةِ مِن بَعْدِ مَا كَادَ يَزِيغُ قُلُوبُ فَرِيقٍ مِّنْهُمْ ثُمَّ تَابَ عَلَيْهِم﴾ [التوبة: 117]، واللي بعدها: ﴿وَعَلَى الثَّلَاثَةِ الَّذِينَ خُلِّفُوا﴾ [التوبة: 118]. أبو الحسن الندوي له تعليق جميل على الآيات دي بيقول: كان ممكن ربنا يبدأ الآيات بتتكلم عن توبة الثلاثة الذين خلفوا الذين ضاقت عليهم الأرض بما رحبت، وبيقول: كان ممكن ربنا يبدأ الآيات يقول لقد تاب الله على الثلاثة الذين خلفوا، لكن ربنا بدأ بذكر التوبة على النبي صلى الله عليه وسلم والمهاجرين والأنصار لئلا يظن أحد أن التوبة دي مقام يعني شيء في الآخر كده، فالناس تحس بوصمة عار في المجتمع أن دول بقا اللي ربنا تاب عليهم، لا ده التوبة دي مقام عالي، مقام رفيع.

وتيجي تتفاجئ إن سورة التوبة بتوسع مفهوم التوبة؛ التوبة مش بس عن الذنوب. شيخ الإسلام ابن تيمية له رسالة هي فيها بعض الصعوبة بس جيدة يعني اسمها رسالة في التوبة، بيتكلم إن التوبة قد تكون عن ترك المستحبات، مش بس عن المعاصي؛ التوبة إنك وقعت في معاصي، أو وقعت في مكروهات، أو تركت واجبات، أو تركت مستحبات، وإن الناس أنواع في توبتهم. فبيوسع مفهوم التوبة، تيجي تقرأ بقا سورة التوبة تجد مفهومًا أوسع؛ التوبة عن العلائق الدنيوية والشواغل التي تمنع الإنسان من النفير في سبيل الله: ﴿قُلْ إِن كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا﴾ [التوبة: 24]. إن في عوائق بتمنع الإنسان، فالتوبة في القرآن مفهوم أوسع من مجرد إن واحد وقع في ذنب وقام يتوب منه.

فأما نيجي نتكلم عن مفهوم التوبة نجد إن القرآن وسع المفهوم. طيب، المفهوم اللي عايزين نتكلم عنه النهارده إيه، أو الذكر اللي عايزين نتكلم عنه النهارده إن شاء الله؟ قضية التسبيح. هذا ذكر عظيم، التسبيح تتبع مواطن التسبيح في القرآن والسنة شيء عظيم. قابلني كده كتيب في التليجرام وإن كان هو مختصر شوية اسمه جوامع التسبيح، أنا توقعت إنه هيجرد كل السنة، لكن هو جاب التسبيحات بالصيغ الجامعة؛ زي سبحان الله وبحمده عدد خلقه ورضا نفسه وزنة عرشه ومداد كلماته، مثل هذه الصيغ، الصيغ الجامعة في التسبيح وغيرها. كتب الأذكار ذكرت قضايا التسبيح.

التسبيح بعض الناس يطلقون عليه هذا الذكر الملائكي، ما اصطفاه الله لملائكته. الله اصطفى للملائكة التسبيح؛ الذين يطوفون حول العرش يسبحون، والملائكة تسبح، وما من موضع أربعة أصابع في السماء إلا وفيها ملك يسبح. فالتسبيح هو من أذكار الملائكة. والملائكة لما ربنا سبحانه وتعالى قال: ﴿إِنِّي جَاعِلٌ فِي الْأَرْضِ خَلِيفَةً﴾ [البقرة: 30]، قالوا: ﴿أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ﴾ [البقرة: 30]، فده ذكر ملائكي.

فعايزين النهارده نتكلم عن إحدى المفاهيم، طبعًا لا أدعي إن ده استقصاء، مفهوم معين خطر لي في التسبيح، وحتى أطرحه اليوم إن شاء الله كأنه من باب المناقشة والمُدارسة يعني، لا أدعي إنه شيء قطعي يعني. طيب، التسبيح، تعالوا نبص في اللغة كده؛ يعني بحب كالعادة أقرأ بس من بعض الكتب. مفردات الأصفهاني، الراغب الأصفهاني بيقول إيه؟ إيه السبح؟ إيه التسبيح؟ بيقول: السبح، أصل السبح هو المر السريع في الماء، ماشي بسرعة سباحة، وأيضًا في الهواء، واستعير لمر النجوم في الفلك: ﴿وَكُلٌّ فِي فَلَكٍ يَسْبَحُونَ﴾ [اليس: 40]، ولجري الفرس، نحو قوله: ﴿وَالسَّابِحَاتِ سَبْحًا﴾ [النازعات: 3]، ولسرعة الذهاب في العمل: ﴿إِنَّ لَكَ فِي النَّهَارِ سَبْحًا طَوِيلًا﴾ [المزمل: 7]. التقط إن في معنى في التسبيح هو الجري السريع، إنه ما فيش عوائق بتمنع هذا الشيء المنطلق، سواء المنطلق ده نجم أو فرس أو إنسان، إنسان منطلق في العمل، فالسبح فيه مرور سريع، ما فيش عوائق لهذا الشيء المنطلق، تمام؟

والمعنى المشهور إيه للتسبيح قبل ما نقرأ؟ إيه المعنى اللي أنتم عارفينه للتسبيح؟ تنزيه الله. تمام؟ هنتكلم في المعنى ده لأن ده معنى محوري. قال: والتسبيح تنزيه الله تعالى، أصله المر السريع في عبادة الله تعالى. تمام؟ خد بالك بقا الحتة دي مهمة قوي معانا النهارده. قال: وجعل التسبيح عامًا في العبادات قولًا كان أو فعلًا أو نية. التسبيح له دلالة أوسع من الذكر، ممكن يكون فعل أو قول أو حتى نية. ونزلوا هذا المعنى على قوله تعالى: ﴿فَلَوْلَا أَنَّهُ كَانَ مِنَ الْمُسَبِّحِينَ﴾ [الصافات: 143] قيل: من المصلين. الصلاة هنا قول ولا فعل؟ فعل، مش مجرد تسبيح قولي. فبعضهم قال: المصلين، بالرغم من أن التسبيح هنا فعل، الصلاة فعل، والأولى أن يحمل على ثلاثتها؛ اللي هو القول والفعل والنية. تمام؟ طيب.

يبقا إذًا التسبيح هو في معنى إزالة العوائق في شيء من السرعة، إزالة العوائق، وهو تنزيه الله سبحانه وتعالى، وقد يكون في أفعال تدل على التسبيح. دي المحاور اللي عايز أتكلم فيها النهارده إن شاء الله. طيب، تنزيه الله عن إيه؟ عن كل نقص. مين اللي نسب النقص إلى الله؟ اليهود، النصارى، المشركين، إيه ثاني؟ نفوسنا. نفوسنا قد تنسب شيئًا إلى الله ولو على سبيل الخواطر؛ يعني مش بس اليهود والنصارى والمشركين والمجوس طبعًا، هؤلاء ننزه الله سبحانه وتعالى، تعالى الله عما يقولون علوًا كبيرًا، سبحان الله عما يصفون، لكن الله سبحانه وتعالى استثنى إلا عباد الله المخلصين، عباد الله المخلصين يصفون الله سبحانه وتعالى بما هو أهل له سبحانه وتعالى آخر الصفات.

لكن نفوسنا قد تنسب الظن، سوء الظن إلى الله سبحانه وتعالى، والنبي صلى الله عليه وسلم لما نصح بعض الصحابة، ما طلب منه النصح، قال له: لا تتهم الله في شيء من قضائه، ما تتهمش ربنا في قضائه. والإنسان ممكن لما ربنا سبحانه وتعالى قال، بعض المفسرين كان بيقول: ﴿وَتَظُنُّونَ بِاللَّهِ الظُّنُونَا﴾ [الأحزاب: 10]، في قول الله سبحانه وتعالى الظنونا، المفسرين بيقولوا ليه جت جمع؟ قال بعضهم لتنوع الظنون في حالة تجمع الأحزاب، لما الأحزاب تتجمع، في واحد ظن إن ربنا ينصر الإسلام وفي واحد بدأ يخاف. وشيخ الإسلام دائمًا بيختار إن مرض القلب في القرآن لا يشترط أن يكون نفاقًا، لا، ده ممكن يكون إنسان مسلم عادي بس عنده مرض في الدين لم يصل إلى مرتبة اليقين، فتأتي، نسأل الله العافية، فتأتي ابتلاءات تنقل الإنسان من حالة الإسلام إلى حالة النفاق، قبل الحدث ده هو ما كانش منافق. لذلك بيجي عطف المنافق والذي في قلبه مرض، فبيقول هنا شيخ بعضهم بيقول هما شيء واحد، ده عطف صفات على نفس الذات؛ يعني هو نفس الشخص بس دي أوصاف مختلفة، وبعضهم يقول: لأ، ده عطف تغير في الذوات، ده غير ده أصلًا، ده شخص غير ده، إن ده شخص أصلًا منافق، لكن هذا كان عنده ضعف في الإيمان، ضعف الإيمان ده للأسف انتقل به إلى مرحلة النفاق في حالة تجمع الأحزاب.

يبقا إذًا التسبيح هو تنزيه الله سبحانه وتعالى عن كل نقص. هذا النقص قد نفعله نحن. طيب النقص اللي إحنا بنعمله ده، أو اللي إحنا بننسبه إلى الله سبحانه وتعالى، قد تكون هذه النسبة قولًا ونية وفعلًا؛ يعني ممكن نفعل فعل، الفعل ده دلالته إن فيه سوء ظن بالله، مش لازم كلام، يعني مش لازم كلام ليه يا رب عملت فيا كده؟ ليه يا رب سبت المسلمين يحصل فيهم كده؟ ليه يا رب؟ من باب الاتهام لله سبحانه وتعالى، ده قول يستوجب التسبيح، نزه الله عن ذلك. فيه أفعال إحنا بنعملها دلالة الأفعال دي إن أنت كنت محتاج تسبح، فيه خلل عندك في قضية التسبيح.

طيب عايزين شاهد قرآني، في قول الله سبحانه وتعالى: ﴿قَالَ أَوْسَطُهُمْ أَلَمْ أَقُل لَّكُمْ لَوْلَا تُسَبِّحُونَ﴾ [القلم: 28]. الآية دي في سورة إيه؟ سورة القلم، قصة أصحاب الجنة. فالجنة، أنا في مرة كنت منزل مقطع اسمه قصة أصحاب الجنة في سورة القلم، لقيت في التعليقات: ربنا يجعلنا من أهلها! يا ابني مش دي، مش دي يا حبيبي، دي جنة تانية خالص. فهو دلالة إنه هو قرأ العنوان فقط، فالمهم فأنا قلت أنبه بس، أصحاب الجنة هنا مش دول يعني: ﴿فَأَقْسَمُوا لَيَصْرِمُنَّهَا مُصْبِحِينَ * طَافَ عَلَيْهَا طَائِفٌ مِّن رَّبِّكَ﴾ [القلم: 19 - 20]. فيه واحد قال لهم إيه؟ أوسطهم، قيل أعدلهم وأفضلهم؛ ﴿وَكَذَلِكَ جَعَلْنَاكُمْ أُمَّةً وَسَطًا﴾ [البقرة: 143]. قال لهم: لَوْلَا إيه؟ العلماء وقفوا عند لَوْلَا تُسَبِّحُونَ، يعني إيه لَوْلَا تُسَبِّحُونَ؟ إيه دلالة إنه يقول لهم مش أنا قلت لكم نسبح ربنا؟

بعض العلماء اختار إن التسبيح هنا بمعنى الاستثناء؛ يعني مش كنتوا تقولوا إن شاء الله؟ ده قول مشهور عن السلف. لكن المفسرين برضه: أيوه، إيه علاقة كلمة التسبيح بالاستثناء؟ إنك تقول إن شاء الله. فبعضهم قال: هذا من تفويض الأمر إلى الله سبحانه وتعالى. بعض العلماء قال: لأ، التسبيح هنا بمعنى الاستغفار. طيب، هو إيه الذنب اللي عملوه إن هم نووا إن هم يمنعوا الفقراء؟ عزموا على ذلك، دي مش مجرد نية، ده عزم على المعصية. طيب، اللي قال إن هو استغفار، فيجي له سؤال: طب وليه ما قالش لولا تستغفرون؟ ليه قال تسبحون؟ بعض العلماء، ابن عاشور، قال لك: ما هو التسبيح بيجي مقدمة للاستغفار، ده من آداب الاستغفار. وجاب دليل في ختام سورة، في أواخر القرآن، في سورة النصر: ﴿فَسَبِّحْ بِحَمْدِ رَبِّكَ وَاسْتَغْفِرْهُ﴾ [النصر: 3].

قال: كأن فيه نوع من الثناء قبل الاستغفار، وإن الاستغفار نوع من أنواع الدعاء، فأنت بتقدم مقدمة بالثناء. بعض المفسرين لم يرتضي كل ذلك. وأنا أميل لإيه؟ للقول الأخير ده. قال إيه بقى؟

قال لا، التسبيح هنا مقصود به التسبيح. البقاعي له كلمة ملخصة للي أنا عايز أقوله، بيقول إيه؟ بيقول قال لولا تسبحون، أي هلا توقعون التنزيه لله تعالى عما أوهمه فعلكم. ثاني. فعلكم اللي أنتم عملتوه ده فيه سوء ظن بالله. الفعل اللي أنت عملته ده يستحق إن أنت كنت تسبح. سيدنا يونس لما التقمه الحوت قال لا إله إلا أنت، سبحانك لأن ده موطن قد يساء الظن فيه بالله سبحانه وتعالى.

بتقول لا، لا إله إلا أنت، لذلك بعدها إيه؟ سبحانك إيه؟ أنا اللي ظالم. كأن الشيطان كان عايز يقول له ربنا ظلمك. لذلك أكدها بأن لا إله إلا أنت سبحانك، أنا اللي غلطان. إني كنت من الظالمين. لما تكون بتعمل عمل ده من باب الاسترشاد بالآية، مش مش ذكر يتقال يعني. بتعمل عمل وظاهره طاعة، وبعدين يحصل لك بلاء، بيجي لك الشيطان يقول لك إيه ده؟ يعني ربنا أنت جاي تصلي ولا إيه؟ ويحصل لك كذا، هنا لابد أن تسارع بالتسبيح، تصرف نزغات الشيطان عنك. لا إله إلا أنت سبحانك أنا اللي إني كنت من الظالمين.

يبقى في أفعال إحنا بنعملها أو أفكار إحنا بنفكر فيها في علاقتنا بربنا سبحانه وتعالى، الأفعال دي والأفكار دي بتدل إن إحنا مش عارفين ربنا كويس. لابد أن ننزه الله سبحانه وتعالى. وإن إحنا لو نزهنا العكس بقى، العلاقة العكسية، إحنا لو سبحنا صح ونزهنا ربنا صح، هنشيل العوائق اللي منعانا من الانطلاق في إلى الله سبحانه وتعالى. في كثير من الناس يقول لك أصل أنا لو مشيت في طريق ربنا هيحصل لي كذا وكذا، هو يسيء الظن بالله سبحانه وتعالى. هو من الموانع ومن العوائق من السير والانطلاق في طريق الله سبحانه وتعالى سوء الظن.

وظننتم ظن السوء، وكنتم قومًا بورًا، أي نعم المعنى الأشهر بور هلكى، لكن أيضًا الأرض البور التي لا تثمر شيئًا. فسوء الظن لا يثمر شيئًا. اللي سيء الظن بالله تلاقيه مش عارف ينطلق في الطاعات. ليه؟ لأنه دائمًا يسيء الظن بالله سبحانه وتعالى، عكس اللي يحسن الظن بالله، وده من معاني المر السريع، التسبيح، كلما سبحت الله حقيقة، كلما انطلقت في الطاعة. كلما سبحت الله حقيقة، انطلقت في الطاعة مباشرة.

لأن التسبيح هو نوع من إزالة العوائق اللي كانت منعاه، أهم هذه العوائق هي إيه؟ إن إحنا مش عارفين ربنا صح. إحنا مش عارفين اسم الله الغني صح. مش عارفين اسم الله الواسع، مش عارفين اسم الله القدير، الحكيم. زي ما في سوء ظن، وركزوا معايا، زي ما في سوء ظن مجمل في الله، في سوء ظن في بعض الأسماء. تلاقي عنده سوء ظن في خير الرازقين، في إن الله هو الرزاق ذو القوة المتين، عنده إشكال في الاسم ده. في واحد عنده إشكال في بعض الأسماء والصفات.

مش قصدي إشكال عقدي، مش قصدي إنه بيؤول الصفة، لا أقصد إنه هو لا يتعامل مع الله سبحانه وتعالى حق التعامل لهذه الصفة. فبالتالي هو عنده نقص في السير إلى الله سبحانه وتعالى. فمفهوم التسبيح هو مفهوم أوسع. يا جماعة التسبيح ده عامل زي إيه؟ يعني حاولت أجيب مثال. عارف لما تكون سايق العربية وييجي حاجات عمالة تتراكم على الإزاز وأنت معكش مساحات. فالصورة بتكون ملغوشة. فمش عارف تمشي كويس.

هو ده اللي بيحصل في سيرنا إلى الله. الإزاز بتاعنا بيتراكم عليه الأسباب. والمناصب. والمواقف الغريبة اللي إحنا مش فاهمين حكمتها. والدماء اللي بتسيل. والبليات اللي بتحدث. كل ده بيلغوش الصورة. فبيخليك مش شايف المقاسات صح، مش شايف الصورة صح. مش شايف إن ده عبد لله وده خلق من خلقه لا يملك لنفسه شيئًا فضلًا على أن يملك لغيره. أنت مش شايف الصورة صح. التسبيح بيعمل إيه؟ التسبيح نوع من الجلاء. بيجلي لك هذه الصورة. بيرجعك للصورة الحقيقية.

فترى الأشياء على حقيقتها. ترى الأسباب عارية على حقيقتها. وترى الناس على حقيقتهم. سيدنا موسى عليه السلام قال لربه وهو رايح لفرعون: كي نسبحك كثيرًا ونذكرك كثيرًا. طب ما التسبيح من الذكر. هنا لحظة مهمة للتسبيح. لأني أخشى إنني أرى فرعون على حجم غير حجمه الحقيقي فأخاف. لا أنا عايز أقعد أنزه ربنا، أنزه ربنا، أنزه ربنا لغاية لما خلاص الصورة تتعدل. أنا عرفت مقام الله ومقام الخلق، مقام العبد.

كلا لا تطعه واسجد واقترب. خلاص أنا عرفت إنهم كلهم من علق. فمن أدوار التسبيح إنه جلاء الصورة، فترى الأشياء على حقيقتها، على حجمها الحقيقي، فلا تزخرف لك الأمور، فتسير في انطلاق إلى الله سبحانه وتعالى. من أكبر القرآن يذكر لك العوائق، من العوائق التعلق بالدنيا. نسيان الدار الآخرة، ومن أهم العوائق المذكورة، قضية إن إحنا نقدر الله حق قدره. ما قدرناه حق قدره سبحانه وتعالى.

لذلك بعد الصلاة على طول تبدأ التسبيح. من أكثر الأذكار الملازمة للتسبيح إيه؟ سبحان الله وبحمده، سبحان الله وبحمده. دائمًا الحمد بعد التسبيح. في الصلاة الأول سبحان الله وبعدين الحمد لله. قبل ما بتحمد الله سبحانه وتعالى في الصلاة الأول تركع، تسبح، ثم تقف لتحمد الله سبحانه وتعالى. التسبيح ما هو الحمد، أنت بدأت تشوف. بدأت تثني على الله. التسبيح أنت بدأت الأول بتنظف عشان تشوف.

التسبيح أنت قاعد تنزه الله. أنت لما بتيجي تنزل في السفر، لو نزلت في واد مكان منخفض، تنزه الله عن النزول. تطلع الله أكبر من أي مكان أنت بتوصل له. فالتكبير مع الصعود والتسبيح مع النزول. شوف حتى في خطواتك أنت تنزه الله سبحانه وتعالى. أنت بتيجي تننام تقول لا تأخذه سنة ولا نوم. تنزه الله سبحانه وتعالى من أي نقص. النقص بيعتري البشر. لكن سبحانه وتعالى لا تأخذه سنة ولا نوم، سبحانه وتعالى.

يبقى إذًا التسبيح المعنى ثاني عشان نبدأ نجيب الشواهد القرآنية. التسبيح من معانيه اللغوية المرور السريع وإزالة العوائق مع الانطلاق. والمعنى المشهور الشرعي تنزيه الله عن كل نقص. مين اللي بينسب النقص؟ المشركين، اليهود، النصارى، وأيضًا نفوسنا قد تنسب النقص إلى الله سبحانه وتعالى. هذه النسبة قد تكون بالأعمال. اللي مش عايزة تتحجب عشان أصل الحجاب هيمنعها من الرزق.

اللي مش عايز هو ده نوع من الأعمال التي فيها إساءة ظن فيقال لكل هؤلاء لولا تسبحون. العوائق اللي منعانا من الانطلاق بسبب سوء الظن بالله بنقولها لولا تسبحون زي ما هنا المعنى مما أوهمنه أفعالكم من نسبة النقص إلى الله سبحانه وتعالى بتعبير البقاعي. قد ننسب النقص إلى الله سبحانه وتعالى بهذه الطريقة. ده إشكال.

يبقى إذًا في أفعال في حياتنا هذه الأفعال لها دلالة إن إحنا مش عارفين ربنا صح. لما بتخلص صلاة بتقول هذه الصلاة لا تليق بك. تقول سبحان الله سبحان الله سبحان الله. كل عبادة بتعملها الملائكة تسبح تقول ما عبدناه حق عبادته ما قدرناه حق قدره سبحانه وتعالى الملائكة لذلك الملائكة ليه بتكثر من التسبيح؟ لأن الملائكة رأت من الملكوت كل ما تشوف من ملكوت ربنا أكثر كل ما هتلاقيك قاعد تنزه الله أكثر.

لأنك أنت بدأت خلاص تطلع فوق بدأت تشوف الأشياء على حقيقتها فبدأت تنبهر بقدرة ربنا سبحانه وتعالى. فلما تجلى ربه للجبل جعله دكًا وخر موسى صعقًا فلما أفاق قال سبحانك هو خلاص رأى من العظمة أول شيء بدأ بالتسبيح سبحانك دائمًا بعد التسبيح بيحصل إنطلاق سبحانك تبت إليك وأنا أول المؤمنين. التسبيح بيحدث إنطلاق في حياتك ليه؟ لأن التسبيح أنت بتزيل العوائق اللي كانت بينك وبين الانطلاق وإن من أكبر العوائق شوفوا إحنا قلنا العوائق في أشياء بتشدك لتحت.

ما لكم إذا قيل لكم انفروا في سبيل الله اثاقلتم. ومن العوائق إن أنت خايف تمشي في الطريق. أنت في حاجات شايفها في الطريق مانعاك أو مش شايف كويس. القرآن بيستعمل الطريقتين إنه يزهدك في الأثقال. اعلموا أنما الحياة الدنيا لعب ولهو. لكن طريقة القرآن الأكثر مش إنه هو بس يلتفتك لحقارة الدنيا. لا، القرآن يزيد من شوقك إلى الله.

الخوف من النار أو التزييد في الدنيا يخليك لا تسلك الطريق الخاطئة. إنما الشوق إلى الله وتنزيه الله يخليك تسير بسرعة في الطريق الصحيح. ده اللي يخليك يديك بنزين. أنت خلاص رأيت من آيات الله. يا جماعة معاملة ربنا إيه جميلة. واللي بيدوق معاملة ربنا بيبقى مشتاق إنه يكمل في المعاملة دي. يعني في أول علاقتك بالله بتبقى مهزوز. لسه التسبيح عندك مش عالي.

تيجي تطلع فلوس لله تلاقيك طب هترجع مش هترجع؟ طلع مبلغ طلع عشرين ألف جنيه لله وبعد ما طلعهم أنا استعجلت ولا إيه؟ فتلاقيه عامل زي الطفل اللي بيمشي ورجليه لسه مهزوزة كده. الاهتزاز ده معناه إن يا إما أنت لسه في أول الطريق يا إما أنت لسه عندك سوء الظن محتاج يقل شوية. فتلاقيه بعد ما عامل ربنا طلع فلوس لله بعد كده خسر. هو كان متصور إنه سيحصل إن ربنا يخلف عليه مباشرة.

فيبدأ يقول لك إيه اللي حصل؟ يجي بعدها بسنة يجيء له مبلغ من حيث لا يحتسب. يقول إيه ده؟ فيبدأ يدوق المعاملة فيبدأ يشتاق خلاص. فتلاقيه بيتعامل مع ربنا معاملة غريبة. الناس تنظر إليه أنت بقيت ليه بارد كده في الأزمات والابتلاءات؟ هو يقول لك خلاص بقى. ياما دقت على راس طبول. هو عاش. تلاقي واحد في كل أزمة يتوتر وعارف إن ربنا سبحانه وتعالى كل مرة بيدبرها. فبيعيش تفاصيل كل أزمة، طب ما ربنا سبحانه وتعالى بييسرها. فوض أمرك إلى الله سبحانه وتعالى.

فالمعاملة مع ربنا بتيجي بالفهم وإنك أنت تذوق التسبيح أو الأسماء الحسنى، دي لازم معاملة مش كلام. وده المعنى المضطرد عند السلف إن لما كانوا يتكلموا، يعني ليه السلف كانوا مصرين يربطوا العمل بالإيمان؟ لأن الإيمان مش معلومات ذهنية. فبالتالي التسبيح برضه مش مجرد معلومات ذهنية، أعمال بتولد ده. العقائد بتولد أعمال، سواء عقائد فاسدة أو عقائد نافعة. أرأيت الذي يكذب بالدين؟ ده عقيدة فاسدة، فذلك الذي يدع اليتيم بيولد عمل.

فبالتالي الذي يعتقد أن الله على كل شيء قدير بيولد أعمال. قال الراجل اللي جه للنبي صلى الله عليه وسلم والنبي صلى الله عليه وسلم أعطاه عطاءً عظيماً، قال: جئتكم من رجل يعطي عطاء من لا يخشى الفقر. ما هو الفعل ده لإنه بيثق في اسم الله الواسع. فخلاص ثقتك في الله بتولد أفعال معينة، بتولد تضحيات. ده كل ما يزيد تزيد معرفتك بالله سبحانه وتعالى، بالتالي هتظهر منك أعمال. من أهم العوائق إن إحنا مش عارفين ربنا صح. وهذا مما يكثر القرآن في الحديث عنه.

كل ما تعرف ربنا أكثر هتلاقيك بدأت تنزه، إيه ده؟ أنا ما كنتش عارف اسم الرزاق كده. في واحد لما بيبدأ يذوق المعاملة في الرزق، يعني تلاقيه يطلع فلوس بسيطة. فيشعر بالمعاملة. فبدأ جمال المعاملة نساه أصلاً موضوع الفلوس، فبدأ يطلع أكثر. فربنا يعامله معاملة أعلى، فيطلع أكثر، فربنا يعامله معاملة أعلى. خلاص هو دخل في علاقة مع ربنا سبحانه وتعالى بهذه العطاء. في واحد في العفو. في واحد في الحكمة إن هو رأى حكمة الله سبحانه وتعالى، فلا يضطرب أبدًا، وهكذا.

عيش بقى مع الأسماء الحسنى. ودور الشيطان الرئيسي إنه يلغوش عليك الصورة، إنه يخليك تسيء الظن بالله. قال: أول دخلة دخلها لسيدنا آدم قال له: ما نهاكما ربكما عن هذه الشجرة، هو عايزه يسيء الظن بربنا، عايزه يسيء الظن بأوامر ربنا. دور الشيطان إنه يخليك تسيء الظن بالأوامر الشرعية والأوامر والأوامر القدرية. لذلك النبي صلى الله عليه وسلم بيقول إن لو تفتح عمل الشيطان، ليه؟ لأنك لما تقول لو ده بداية الاعتراض على الأمر القدري.

ما إيش لو كان ده ما حصلش، لو ما كنتش كذا، دور الشيطان إنه عايزك تعترض على الشرع والقدر، عايزك تسيء الظن بالله. دي بداية عمل الشيطان. فبالتالي هذا من أعظم العوائق من السير إلى الله سبحانه وتعالى، التسبيح بيعمل إيه؟ التسبيح يجلو كل هذه الأمور. والتسبيح دائمًا معاه حمد، أنت لما تسبح هترى، هتبصر، لما تبصر تثني، بس بتثني بعد مشاهدة.

العلماء لما بيتكلموا: الحمد لله رب العالمين، الرحمن الرحيم، مالك يوم الدين، كل ده حديث عن الله. إياك نعبد، دي مخاطبة لله. فبيقولوا إن الثناء، كثر الثناء رفع الإنسان إلى منزلة المشاهدة، أن تعبد الله كأنك تراه، فبدأت تخاطب ربنا. التسبيح يرتقي بيك، فبتثني هنا عن معاينة. لما، لذلك زي ما قلنا يجيء الحمد بعد التسبيح. أو تدمج، أو تدمجهم، تقول: سبحان الله وبحمده، هذا ما اصطفاه الله لملائكته.

يبقى فهمنا المعنى العام اللي أنا عايز أتكلم تكلمنا التسبيح. طيب. لما نيجي بقى نبص، عايزين أمثلة من القرآن. لما نيجي نبص على المسبحات. المسبحات اللي هي السور التي بدأت بالتسبيح. سبحان. أسبح، دي في الأول ودي في الآخر. يعني لما نيجي نشوف ترتيب المسبحات في القرآن، عندنا سبحان الإسراء. تمام؟ عندنا في الآخر خالص فعل الأمر سبح اسم ربك الأعلى. وعندنا الخمسة الأفعال موجودين في شوط معين كده، سور مدنية من أول الحديد لغاية التحريم، الخمسة موجودين في المنطقة.

لأن ده شوط مدني، قبله شوط طويل مكي. من أول سورة ق لغاية الواقعة، دي سور مكية؛ ق، الذاريات، الطور، النجم، القمر، الرحمن، الواقعة، ده مكي. أول الحديد مدني، والجزء اللي بعده كله مدني لغاية سورة الملك تبارك.

هنجد إن المسبحات في المنطقة دي كلها ثلاثة بفعل الماضي سبح، والثلاثة جايين بنفس، مش ورا بعض، يعني ما فيش بينهم فواصل. أنا أقصد ورا بعض، يعني لا تفصلهم تسبيح بصيغة معينة أخرى؛ تجد سبح الأولى فين؟ الحديد، ثم الحشر، ثم الصف. تمام؟ يبقى الحديد، الحشر، وبينهم المجادلة. الحشر، وبعد كده بينهم الممتحنة، وبعد كده الصف، دول الثلاثة الماضي: سبح لله.

ويسبح برضه اثنين ورا بعض، وإن كان بينهم المنافقون اللي هي الجمعة والتغابن، الجمعة والتغابن. لما نيجي نبص على هذه المسبحات، إحدى الالتقاطات -أنا لا أدعي إن هذا هو هذه هي الحكمة من بداية السور بالتسبيح، لكن إحدى الحاجات اللي يعني لمستها في هذه المسبحات- أن فيها عتابات.

هذه المسبحات فيها عتابات، فيها إشارات لعوائق منعت المسلمين من الإنطلاق. إحنا بنتكلم على سور مدنية، غير سبحان وسبح دول مكية، هنتكلم على سور مدنية الخمسة اللي في النص. وهنا مهم زي ما قلنا إن في عموم القرآن إن آيات الكفار قد يستفيد منها المؤمن وينزلها على نفسه دون أن تنتقل به الآية إلى الكفر، فلا يكفر المسلم ولا يكفر نفسه، هو بيفهم.

وأظن في المحاضرة اللي قبل كده نقلت كلام لشيخ الإسلام إن قيمة إن مثلا لما يأتي ذم في القرآن للإنسان وتجد إن كثير من المفسرين يقولون الإنسان هنا بمعنى الكافر، هذا لا يعني أن المسلم لن يستفيد منها، بالعكس؛ لأن الوصف ده، ما هو المسلم لما بيتشبه بالوصف ده عند الكافر هو لم يكفر، هو عنده إشكال في الوصف ده، والوصف ده أحق أن يكون في الكافرين، لا ينبغي أن يكون في المسلمين. زي بالظبط لما النبي صلى الله عليه وسلم قال إن النفاق شعب، فبالتالي الإيمان شعب والكفر شعب؛ أجزاء صغيرة، فممكن الإنسان يتلبس ببعض هذه الشعب دون أن يخرج عن الإيمان، إيمانه بيقل.

فبالتالي التسبيح كده، زي ما بننزه الله عن أقوال وأفعال الكافرين، أيضا ننزه الله عن أشياء فعلناها نحن. فتجد إن الصور دي بتخاطب المسلمين، القرآن مدني بيخاطب المسلمين، يذكرهم ويعاتبهم إنهم متأخرين في أشياء أخرتهم، عطلتهم عن السير في طريق الله سبحانه وتعالى، وإن الموضوع ده محتاج تسبيح.

يعني مثلا لما تيجي تشوف قبل ما ندخل في المسبحات، القاسمي وهو بيشرح: ﴿فَسَبِّحْ بِحَمْدِ رَبِّكَ وَاسْتَغْفِرْهُ﴾ [النصر: 3]، احنا قلنا ابن عاشور قال إن هو ده كأنه مقدمة للاستغفار، وإن كتير مفسرين قال إن والأثر المروي عن عائشة إن النبي صلى الله عليه وسلم كان يتأول الآية في ركوعه يقول: سبحانك اللهم ربنا وبحمدك، اللهم اغفر لي. سبح بحمد ربك واستغفر، يبقى النبي صلى الله عليه وسلم كان بيسبح.

طب ليه تسبيح في ختام الدعوة؟ بعضهم قال تعجب، تسبيح بيجي مع التعجب من قدرة الله في انتقال الحال؛ الصورة اللي بعد النصر: ﴿تَبَّتْ يَدَا أَبِي لَهَبٍ وَتَبَّ﴾ [المسد: 1]. شوف الوضع أول الدعوة، الناس بتنفر عن النبي صلى الله عليه وسلم وعمه ماشي يمشي الناس بعيد عن النبي صلى الله عليه وسلم، وبعد كده دلوقتي الناس كلها جاية للنبي صلى الله عليه وسلم، جايين أفواجًا: ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ [النصر: 1-2]. كانوا في الأول أقصاهم أفراد، دلوقتي في الآخر أفواج، فالتسبيح تعجب من انتقال قدرة الله سبحانه وتعالى على تبديل الأحوال.

القاسمي بيقول: فنزه ربك عن أن يهمل الحق ويدعه للباطل يأكله. كأن القاسمي عايز يقول -أظن خدها من محمد عبده يعني دي- عايز يقول على الخواطر اللي مرت عليكوا أثناء كل الفترة الدعوية: مرة هزيمة، مرة تعذيب، مرة ابتلاءات، جاتلكوا خواطر في الفترة دي كلها، أنت بتستغفر عن الفترة اللي فاتت دي كلها. من الخواطر اللي جاتلكوا إيه؟ نزه ربك عن أن يهمل الحق ويدعه للباطل يأكله -بعض الناس جالها بعض الخواطر دي- وعن أن يخلف وعده في تأييده. وليكن هذا التنزيه بواسطة حمده والثناء عليه بأنه القادر الذي لا يغلبه غالب، والحكيم الذي إذا أمهل الكافرين ليمتحن قلوب المؤمنين فلن يضيع أجر العاملين ولا يصلح عمل المفسدين، البصير سبحانه وتعالى بما في قلوب المخلصين والمنافقين فلا يذهب عليه رياء المرائين، واستغفره: اسأله أن يغفر لك ولأصحابك ما كان أثناء الدعوة، ما كان من القلق والضجر والحزن لتأخر زمان النصر والفتح.

يبقى هو هنا التقط إن جاءت لكم مشاعر على مدار 23 سنة كان فيها بعض وتظنون بالله الظنون، أنت محتاج تستغفر من الذنوب دي وتسبح، محتاج تنزه ربنا. يبقى إذا التسبيح: نزه الله سبحانه وتعالى عن كل نقص ينسبه إليه أهل الكفر وأهل الفساد، وأيضا نفوسنا قد تنسب إلى الله سبحانه وتعالى ذلك، وقد يدل على أن نفوسنا نسبت إلى الله ذلك النقص عن طريق أعمالنا؛ أعمالك بتدل -اللي هو بيتعامل بالربا عشان الرزق، اللي بيعمل حاجات معينة يقول لك ما ينفعش أسيبها، لو سبتها هيحصل لي كذا- ما كل ده هو، طب ما أنت بتتهم الله سبحانه وتعالى! هو ينفع ملك يدي أمر لحد والحد يقوله بس أصلا لو سمعت الكلام ممكن يحصل لي، فملك يقوله يبقى أنت مش واثق فيا؟

ما أنت لو رحت للدكتور والدكتور كتب لك روشتة وبدأت تقلق له: يعني أنت متأكد يعني آخذ الدواء ده؟ فالدكتور يبصلك كده يقولك هو أنا بلعب معاك؟! وإلا ما أنت لو عملتها مع صنايعي وقالك روح هات القطعة دي، قاله أنت متأكد؟ يبصلك كده، أنت متخيل؟! يعني سبحانه وتعالى ولله المثل الأعلى، يعني ربنا أنت بنتعامل بتباطؤ مع الأوامر الربانية ليه كده؟ وأسرع حاجة عندنا على طول نتهم ربنا سبحانه وتعالى، ليه كذا؟ ليه حصل كذا؟ ولا نتهم أنفسنا. يعني أول حاجة تيجي في ذهننا هو ليه ربنا عمل كذا؟ مش ليه مثلا احنا قصرنا ولا إيه اللي ربنا اعفوا عن تقصيرنا؛ ﴿لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87].

طيب، ده المعنى المحوري العام. وإن الإنسان لو نجح -ودي ارتقاء درجات- إنه هو نظف الصورة والإزاز بتاعه كويس، هينطلق. وتجد أن كثيرا من المنطلقين في الطريق إلى الله سبحانه وتعالى انطلقوا لما عرفوا؛ كل ما بيعرف ربنا أكثر كل ما بينطلق أكثر، وإن الانطلاق الناتج عن المحبة ورؤية أسماء الله وصفاته أعظم بكثير من الانطلاق الناتج عن الخوف، وكلاهما مطلوب، لكن شعور المحبة الناتج عن الرؤية -إن أنت رأيت أفعال الله سبحانه وتعالى، عاملت ربنا- ده شعور لا يوصف، بيخليك كلما سمع هيعة أو فزعة طار إليها، هو خلاص، أن يكون الله ورسوله أحب إليه مما سواه.

ده بدأ يذوق طعم الإيمان، اللي بيدوق طعم الإيمان ده ناتج عن المحبة، والمحبة ناتجة عن الرؤية، إنه بدأ يرى أفعال الله سبحانه وتعالى، بدأ يبقى فيه بينه وبين ربنا معاملة. فبالتالي التسبيح هو هذا التنزيه الذي يجعلك ترتقي، وكل مرة بترتقي بتبدأ تكتشف: أنا ما كنتش عارف ربنا! إيه ده؟ أنا ضيعت عمري! أنا ما كنتش عارف الرزاق! أنا إزاي كنت بفكر كده مع ربنا؟! أنا كان تفكيري ضيق قوي! ﴿قُل لَّوْ أَنتُمْ تَمْلِكُونَ خَزَائِنَ رَحْمَةِ رَبِّي إِذًا لَّأَمْسَكْتُمْ خَشْيَةَ الإِنفَاقِ﴾ [الإسراء: 100]. الإنسان بطبعه كتور، مهما ربنا يدي ده بيقول له أنت لو معك الخزائن برده هتبقى كتور.

فكثير من الناس تفكيرها ضيق، عايز كل شبر يأخذه في علاقته بربنا: طب طمني يا رب، طب إيه اللي هيحصل؟ طب عرفني إيه اللي هيحصل؟ طب وبعدين؟ طب بعد سنة إيه اللي هيحصل؟ طب وبعد ثلاث سنين؟ وكثير من أسئلة الناس: أختار ده ولا ده؟ وده تكلمنا عليه فقه الاختيار، هو بسبب إنه مش سايبها لربنا. وتكلمنا عنه فقه الاختيار، وإن شاء الله بأحضر درس ثاني عن فقه الاختيار اثنين يعني، لعله إن شاء الله يبقى الدرس القادم.

كثير من الشلل اللي بيحصل عند المفارق في الحياة هو بسبب إنه هو مش راضي يسيبها لربنا. الأعمال المؤسسية في حياتنا خلت إن كأن ما فيش علاقة خاصة بينك وبين ربنا، إن كل حاجة ناتجة عن: هتخش الكلية دي ولا دي؟ هي أرقام، هي بظروفها المجموع. هتسافر ده ولا دي؟ حسب ما الباسبور ما يمشيش. أنت عايز حد يرتب لك اختياراتك.

لا، أنت لازم يكون لك مساحة أنت بتعامل فيها ربنا، بيجي لك مفرق، أنت بتدوس على الزرار ومش عارف النتيجة؛ دي من أكثر المواطن اللي تعرف فيها ربنا، إنك كأن -أنا بأجيب لك أمثلة حسية عشان تتخيل مشهد يعني- كأن حبل نازل من السماء وأنت ماسكه، وبيتقال لك: سيب، ورجليك مش طايلة الأرض ولازم تسيب. طول ما أنت مش هتسيب غير لما تلمس الأرض أنت لسه في علاقة مع ربنا ناقصة. لازم يبقى في جزء غيبي في علاقتك بالله، ده من علامات الارتقاء في علاقتك بربنا؛ إنه يظل في جزء غيبي في علاقتك بالله.

فكرة إنك تبقى شايف وعارف وكل الأرقام مكتوبة وأي لخبطة فيها بتعمل لك توتر، أنت لسه هنا في إشكال في علاقتك بالله سبحانه وتعالى، لسه ما فيش ارتقاء، أنت محتاج تنزه الله سبحانه وتعالى، الله أعظم مما نتخيل سبحانه وتعالى. أسماء ربنا وصفاته سبحانه وتعالى المذكورة في القرآن وطريقة عرض -وتكلمت عن ده في اللقاء اللي فات- طريقة القرآن في الكلام عن الله سبحانه وتعالى مبهرة، إحنا مش عايشين المعاني دي؛ لأن أفعالنا بتدل؟ لأ، في نقص، مش معقول أنت تظن في الله سبحانه وتعالى الكمال والقدرة والرزق والحكمة ويكون في تباطؤ كده.

طيب، عشان ما نطولش ندخل نبدأ بسرعة في الحديث. سورة الحديد بدأت في تسبيح، إيه العتبات اللي موجودة في سورة الحديد؟ أنتم بقى الباقي أنتم اللي هتقولوه بقى، إيه العتبات اللي موجودة في سورة الحديد؟ إحنا قلنا إن المسبحات غالباً -بقول غالباً، ودي زي ما قلت لكم التقاطة، يعني بحاول أصورها معكم- إن في إما سوء ظن، في تباطؤ، في عتاب، يبقى في ظنون أو أفكار أو أفعال حلها إنك تسبح، أو ربنا بيقول لك: الله غني عنكم؛ ﴿سَبَّحَ لِلَّهِ مَا فِي السَّمَاوَاتِ وَالْأَرْضِ﴾ [الحديد: 1]. أنت هتفضل متباطئ؟ لأ، خليك.

إيه العتبات اللي موجودة في سورة الحديد؟ ﴿وَمَا لَكُمْ أَلَّا تُنفِقُوا فِي سَبِيلِ اللَّهِ﴾ [الحديد: 10]. ﴿أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ﴾ [الحديد: 16]. عتاب على الإيمان، عتاب على الإنفاق، عتاب على الخخشوع، تمام؟ وممكن لما تقرأ السورة أكثر تجد معنى أعظم من ذلك.

يبقى إذًا أنت ليه متأخر في علاقتك بربنا؟ ليه مش عايز تنفق؟ مستني الفتح يحصل؟ ﴿لَا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِّنَ الَّذِينَ أَنفَقُوا مِن بَعْدُ وَقَاتَلُوا﴾ [الحديد: 10]. عايز لما تنفق تكون متأكد إن قضيتك منتصرة؟ مش عايز تنفق في وقت الاستضعاف؟ مع إن الإنفاق في وقت المسغبة، في وقت المجاعة، هو ده اقتحام العقبة، هو ده اللي هيخليك تقفز في علاقتك بالله سبحانه وتعالى، إنك تقدم لربنا في وقت الكل محبط، هو ده اللي يخليك ترتقي في علاقتك بربنا.

إنك أنت تظل مستمر، عندك أمل وبشرى وتفاؤل ونصرة للدين وانشغال بأعمال الدين في وقت الكل بينصرف، هو ده أصلاً اللي يخليك ترتقي في علاقتك بالله سبحانه وتعالى. إيه اللي معطلك؟ هذا من سوء الظن بالله، ده محتاج تسبيح، هذا فعل محتاج تسبيح، عدم الإنفاق للدين في أوقات الاستضعاف، هذا معناه إن فيه نقص في معرفة الله سبحانه وتعالى، محتاج تنزه ربنا أكتر عشان تعرف تبذل في الوقت ده. إيه اللي يخليك ما تنفقش؟ هو أنت ما تعرفش إن لله خزائن السماوات والأرض؟

فبالتالي تجد إن مقدمة الحديد -لذلك بعض العلماء قالوا إن مقدمة سورة الحديد مكية، كثرة الحديث المعاني الإيمانية اللي فيه، أو فيها بعض الآيات المكية زي ألم يأن، لأن فيه أثر عن ابن مسعود إن ربنا عاتبهم بعد أربع سنوات- أنا مش هدخل هنا في النقاش يعني مكي ولا مدني.

فإذاً تجد إن فيه عتاب على مستوى الإيمان الشخصي، إنك أنت متأخر في الارتقاء في قضية الخشوع، وعتاب على مستوى الإيمان المتعدي، إنك أنت ما ليه ما بتنفقش في سبيل الله؟ ليه ما بيحصلكش ارتقاء في الدين؟ ليه زي ما أنت من خمس سنين؟

الناس في الدنيا لما بتقابل بعض بعد خمس سنين ويلاقيه لسه زي ما هو، يقوله إيه ده أنت إيه اللي حصلك؟ ليه ما نقلتش شركة تانية أو وظيفة تانية أو ما غيرتش عربيتك، يـشوفه بعد مثلاً 10 سنين يلاقيه زي ما هو في مكانه الدنيوي، فتلاقي ينقم عليه، أهل الدنيا ينقمون عليه، يقوله أنت ازاي كده؟ تخيل أنت في الدين، هو الطبيعي كده إنك بتنقل، بترتقي، أياً كان الارتقاء ده، مش لازم يكون الارتقاء الديني مش مش بتعلق نجمة وبعدين بتعلق نسر وبعدين بتلبس شيخ، يعني مش مش كده يعني.

لأ مش أقصد كده، لأ هو في علاقتك بالله، ده في خاصة نفسك في علاقتك بالله سبحانه وتعالى. ممكن يظل إنسان أشعث أغبر مدفوع بالأبواب لا يعلم عنه الناس شيئًا.

لو بنتكلم في الارتقاء، المعاني؛ ليه ما بتدوقش أطعمة جديدة في الطاعات؟ في خطبة بعنوان لسه قريب شجرة الإيمان، جت من فكرة كنت بقرأ تعليق ابن القيم على شرح مثل سورة إبراهيم أن الكلمة الطيبة شجرة طيبة. ابن القيم له كلام بديع في مسألة إن يتنعم الإنسان في الجنة بحسب ألوان الطاعات التي كانت في الدنيا، كل ما يبقى عنده ألوان طاعات مختلفة في الدنيا كل ما هيتنعم بألوان من النعيم مختلفة.

ودي في مكان تاني مش في نفس السياق، وكلام برضه قاله شيخ الإسلام في تفسير وهو يطعم ولا يطعم، وإن كل عبادة أصلًا لها طعم مختلف. يعني زي ما ربنا اتكلم عن معاني الإيمان وطعم الإيمان، والنبي صلى الله عليه وسلم قال: «ذاق طعم الإيمان». زي ما في طعم مجمل للإيمان، في أطعمة تفصيلية. الخشوع له طعم، والبذل له طعم، والعطاء له طعم، والعفو له طعم، والحلم له طعم، وطول القيام له طعم، والسير في سبيل الله له طعم، ألوان مختلفة.

في ناس حارمة نفسها من ألوان الطاعات دي، فبالتالي أنت ليه ما بترتقيش في العلاقة؟ ليه مكتفي بثلاث أربع أطعمة إيمانية وعايش عليهم؟ ليه فقير؟ النبي صلى الله عليه وسلم لما استعاذ من الفقر، والإمام أحمد قال ده فقر النفس، والنبي صلى الله عليه وسلم قال: «الغنى غنى النفس». ففي نفس مستغنية، وفي نفس غنية مليانة بألوان الطاعات، مش عايزة حاجة تانية من الدنيا لإنها ذاقت أطعمة أخرى.

ما هو النفس لازم تطعم شيء مادي أو معنوي. النبي صلى الله عليه وسلم لما ترك الطعام في الصيام وكان يواصل قال: «لا، أنا عندي أطعمة ثانية، إنما أبيت عند ربي يطعمني ويسقين». كثير من العلماء اختلفوا طعام حسي ولا معنوي، كثير من العلماء قالوا طعام معنوي؛ النفس تزهد في الدنيا في الطعام الحسي المال وغيره لما يكون عندها أطعمة أخرى. فأنت لازم تطعم طاعات أخرى، ليه ما بتنقلش في علاقتك بالله؟ ليه ما بتذوقش ألوان ثانية من الطاعات؟ ألم يأنِ للذين آمنوا؟ ليه طالع عليك الأمد؟ ما فيش نقلة طال عليهم، ﴿أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مَّنْهُمْ فَاسِقُونَ﴾ [الحديد: 16].

ليه مش راضي تنفق؟ ليه في طاعة ربنا سبحانه وتعالى في نوع من الممانعة عشان ينفق؟ تلاقيه يقعد يتكلم لازم ننصر دين ربنا ولازم، تقول له طب يلا طلع حاجة لله، يقول لك لازم ننصر دين ربنا. أيوه أنا بتكلم أهو يا رب انصر الدين، أيوه ماشي ما هو أنا ما إحنا دلوقتي بنتكلم شيء عملي، اللهم أهلك الظالمين بالظالمين. أيوه يعني أنت مش ناوي تطلع حاجة لدين ربنا سبحانه وتعالى؟ ما هو أنت لازم تفعل شيء.

يا جماعة تعودوا العطاء، العطاء اللي بدون تفكير، يعني مش قصدي بدون تفكير مش لازم كل حاجة تكون عندك ترتيب معين إن دي هيتعمل بيها كذا وكذا وكذا بالضبط. لا، عود نفسك العطاء، عود نفسك إن مسجد محتاج حاجة، أنت كنت في اعتكاف، أنت مش عارف مع أصحابك، عود العطاء بييجي بالتعود وبييجي برؤية المعطين أكثر، أما بتخالط أصحاب العطاء بتعرف يعني إيه ناس بتعطي بجد، تعرف يعني إيه ناس كريمة، ده خلق بيكتسب وينمى. الإيد خلاص بتتعود البسط، تعود العطاء ويكره القبض، مش القبض اللي هو آخر الشهر، إيه الكلام ده؟ يعني يكره إن إيده تكون مقبوضة لأ، هو عايز يعطي، هو تعود هذا.

فبالتالي أنت ليه متأخر في علاقتك بربنا؟ أنت قد وممكن تكون مش واخد بالك إن ده نتيجة سوء ظنك في الله، أنت ممكن تكون مش واخد بالك إنك متأخر بسبب إن في عوائق أنت حاسبها مع ربنا غلط، أصل أنا لو عملت كذا أصل أنا لو سبت كذا، أنت مش واخد بالك. أنت محتاج من أوائل الخطوات اللي محتاجها في الارتقاء إنك تسبح، تكون مش واخد بالك، أنت عمال بتحسبها حسابات تانية، مش واخد بالك إن التسبيح جزء من حل مشكلتك، بس التسبيح بالمفهوم العام إنك محتاج تعرف ربنا أكتر، محتاج تشتاق أكتر، محتاج تعامل ربنا أكتر، هتلاقيك بقيت آليًا والعجل بيلف أسرع واتحركت بقيت بتسبح ﴿وَالسَّابِحَاتِ سَبْحًا﴾ [النازعات: 3].

خلاص بقيت نشيط، بتنشط ﴿وَالنَّاشِطَاتِ نَشْطًا * وَالسَّابِحَاتِ سَبْحًا﴾ [النازعات: 2-3]، خلاص بقيت بتسبح في العلاقة مع الله سبحانه وتعالى، أزلت العوائق اللي كانت معطلاك. يبقى جزء عشان خلاص أنا ما أطولش عليكم، جزء من الدرس إنك ترجع تقرأ المسبحات. تعالوا نروح للصورة اللي بعد كده بسرعة، سورة الحشر، إيه اللي موجود في الحشر؟ أيوة سوء ظن إيه؟ ما ظننتم، هم نفسهم ظنوا غلط وأنتوا ظنيتوا غلط، ﴿مَا ظَنَنتُم أَن يَخْرُجُوا﴾ [الحشر: 2] وهم اليهود، ﴿وَظَنُّوا أَنَّهُمْ مَانِعَتُهُمْ حُصُونُهُم من اللَّهِ فَأَتَاهُمُ اللَّهُ مِنْ حَيْثُ لَمْ يَحْتَسِبُوا وَقَذَفَ فِي قُلُوبِهِمُ الرُّعْبَ﴾ [الحشر: 2].

سورة الحشر سوء الظن إنك تحس إن ربنا إيه ده معقول ممكن ننتصر؟ الغريبة إن سورة الحشر ذكرت ثلاث أنواع من الناس، العاملين للدين، ناس طلعت كل حاجة سابت كل حاجة عشان ربنا اللي هم الفقراء المهاجرين، ناس ضحت بكل حاجة في وقت ما كانش يعرف إيه اللي هيحصل، يعني اللي بيهاجر ده تخيل بيسيب أرضه عشان قضية هو مش عارف ينصرها في أرضه. طب ولما أروح مكان تاني هننتصر يعني؟ إذا كان بلدي مع قبيلتي في مكة أحب البلاد مش عارف أنصر قضيتي، معقول لما هروح مكان تاني هيحصل نصر للقضية؟ بس خلاص أنا مهاجر في سبيل الله، ﴿وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً﴾ [النساء: 100]، سيبها لله.

دول الفقراء سابوا كل حاجة عشان ربنا، الأنصار ادوا كل حاجة عشان ربنا، ﴿وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِم خَصَاصَةٌ﴾ [الحشر: 9]. فربنا ذكر نموذجين اللي ترك كل شيء واللي أعطى كل شيء أو اللي التحق بهم وبيدعي لهم، يبقى أي عمل عشان يقوم لازم ناس تضحي ولازم ناس تنفق ولازم ناس تراعي الموجودين وتدعي لهم حتى لو أخطأوا، يقول: ﴿رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ﴾ [الحشر: 10]. دول اللي بيستفيدوا من وجود الأعمال الإيمانية دي. عدم وجودك في واحد من الثلاثة، طب ليه؟ ده سوء ظن في علاقتك بالله سبحانه وتعالى.

ربنا قال عن اليهود: ﴿لَأَنتُمْ أَشَدُّ رَهْبَةً فِي صُدُورِهِم مِّنَ اللَّهِ﴾ [الحشر: 13]، ما هو ده عدم فقه، يقوم إحنا يبقى تفكيرنا زي اليهود؟ يبقى اليهود أشد رهبة في صدورنا من الله؟ خد بالك لأنتم أشد، أنت عندك مواطن في القرآن تقريباً عندنا ثلاث مواطن في القرآن، آية النساء: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً﴾ [النساء: 77]. وعندنا آية العنكبوت جعل فتنة الناس كعذاب الله، وعندنا آية الشعراء: ﴿تَاللَّهِ إِن كُنَّا لَفِي ضَلَالٍ مُبِينٍ * إِذْ نُسَوِّيكُم بِرَبِّ الْعَالَمِينَ﴾ [الشعراء: 97-98].

في الثلاث آيات في خلل، إنه حصل مساواة، أنت بتعمل إيه؟ أنت بتساوي العذاب أو الفتنة أو الخشية بين ربنا وبين الناس، ده أنت كده لا تفقه. ده هنا أنت محتاج تسبيح، هنا في إشكال، أنت مش عارف مقام الرب ومقام العبد، أنت حصل عندك خلط في الأوراق، ده أنت محتاج تنزه ربنا سبحانه وتعالى. ده هيعطلك، ده مش هيخليك تهاجر زي في سورة العنكبوت، ده مش هيخليك تجاهد زي ما في سورة النساء. لا ما هو ده إن أنت عملت المساواة دي كخشية الله أو أشد خشية، هنا في مشكلة.

فبالتالي سورة الحشر أنتم ليه متعطلين عن جهاد اليهود؟ ﴿مَا ظَنَنتُم أَن يَخْرُجُوا وَظَنُّوا أَنَّهُمْ مَانِعَتُهُمْ حُصُونُهُم مِّنَ اللَّهِ﴾ [الحشر: 2]. وتجد أن الصورة دي من أكثر الصور اللي ذكر فيها الأسماء الحسنى في خواتيم السورة. ومن العجيب ودي لفتة ثانية، من العجيب في القرآن أن المواطن اللي فيها تضحية وعمل للدين تجد فيها حديث عن ربنا كتير، وكأن الله هكذا يعرف بالأعمال.

زي الحج، تجد سورة الحج فيها ذكر القتال، الآيات اللي فيها ذكر القتال في آخر الحج فيها خمسة عشر اسم من أسماء الله وراء بعض ولا اسم متكرر، وهنا خواتيم سورة الحشر. وهكذا يعرف الله سبحانه وتعالى بالمعاملة، بالمجاهدة، بالتضحية، بالبذل، ده من أعظم وسائل معرفة الله سبحانه وتعالى. فبالتالي في سورة الحشر أنت محتاج تنزه الله سبحانه وتعالى عن التفكير ده، ربنا أعظم من ذلك. أيوة بس الواقع بيقول، ما هو الواقع ده لإن إحنا مقصرين، ما تتهمش ربنا سبحانه وتعالى، ﴿ذَلِكَ وَلَوْ يَشَاءُ اللَّهُ لَانْتَصَرَ مِنْهُمْ وَلَكِنْ لِيَبْلُوَ بَعْضَكُمْ بِبَعْضٍ﴾ [محمد: 4]. احنا اللي مقصرين تسيء الظن بالله.

طيب بعد كده، يبقى احنا كده تكلمنا عن الحديد الحشر، بعد كده الصف، سورة الصف نفس الفكرة في تباطؤ مع نوع بقى من الإيه؟ نوع من الادعاء. هم قالوا إيه في من أسباب نزول سورة الصف أنهم قالوا إيه؟ لو نعلم أحب الأعمال إلى الله لعملناه، فنزلت الآيات تعاتبهم. أنت مش عارف إيه أحب الأعمال إلى الله؟ ده نوع، قد يكون أنا مش بتكلم هنا على الصحابة، بتكلم إسقاط ده علينا، قد يكون ده نوع من المراوغة النفسية اللي هو إيه؟ أنا مش عارف أنا بس لو أعرف حد يقول لي الطريق، أنا بدور بقى لي خمس سنين على مش عارف طريق في طلب العلم. خمس سنين بتدور في طلب العلم يا ابني أنت لو كنت قرأت أي حاجة كان زمانك وصلت، أي حاجة أنت لو كنت قرأت كتب غلط على الأقل تبقى عرفت الغلط يا سيدي، على الأقل معنا واحد عارف الغلط.

يا أخي مش معقول يعني تلاقي واحد فعلا كل ما تقابله أصل أنا مش عارف أصل هم بيقولوا أصل في خلاف، وحالة من الادعاء. لا أنت مش عايز تمشي، أنت واقف قدام المفارق ومش عايز تتحرك. فكرة لو نعلم أحب الأعمال إلى الله، وهم يريدون ليطفئوا نور الله، الناس قاعدة بتجاهد لإطفاء الدين وأنت مش عارف تعمل؟ اعمل أي حاجة، اعمل أي شيء. ﴿هَلْ أَدُلُّكُمْ عَلَىٰ تِجَارَةٍ تُنجِيكُم مِّنْ عَذَابٍ أَلِيمٍ﴾ [الصف: 10]، سورة الصف بتغير طريقة تفكيرك في مسألة العمل للدين، أنت بتنجي نفسك من النار، أنت مش بتتفضل. لا أنت ﴿هَلْ أَدُلُّكُمْ عَلَىٰ تِجَارَةٍ تُنجِيكُم مِّنْ عَذَابٍ أَلِيمٍ﴾ والسورة بتتكلم على الجهاد ذروة سنام الإسلام، وبتقول لهم أنت كده بتنجو من العذاب. ما أنت عشان تشكر نعمة، هو أنت عايز نعمة الإسلام والرسول صلى الله عليه وسلم والنعم اللي أنت فيها من نعم الإيمان دي وفي الآخر تعرض؟ لا، هتسأل عن هذه النعم، إيه دورك؟ إيه اللي أنت عملته؟

ثم سورتين بصيغة المضارع، الثلاثة دول كانوا بصيغة الماضي ﴿سَبَّحَ لِلَّهِ﴾ [الحشر: 1، الصف: 1، الجمعة: 1]. بعد كده عندنا ﴿يُسَبِّحُ لِلَّهِ﴾ جت مرتين في أول سورة الجمعة سورة التغابن، برضه عندنا نفس الفكرة. إيه العتابات أو الأخطاء اللي في سورة الجمعة؟ ﴿وَإِذَا رَأَوْا تِجَارَةً أَوْ لَهْوًا انفَضُّوا إِلَيْهَا وَتَرَكُوكَ قَائِمًا﴾ [الجمعة: 11]. لذلك شوف هنا واضحة جداً: ﴿قُل ما عِندَ اللَّهِ خَيرٌ مِنَ اللَّهوِ وَمِنَ التِّجارَةِ وَاللَّهُ﴾ [الجمعة: 11] إيه؟ إحنا محتاجين نكلمه عن ربنا عشان يرجع، لأنه قام مش عارف ربنا كويس. اللي يسيب مجالس العلم لتجارة أو لهو، هو عنده خلل هنا في خير الرازقين، خصوصاً هنا لو تعود على التجارة، هنا في خلل في فهم خير الرازقين.

لذلك في الأول بدأت أيضاً بالحديث عن الله سبحانه وتعالى: ﴿يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ الْمَلِكِ الْقُدُّوسِ الْعَزِيزِ الْحَكِيمِ﴾ [الجمعة: 1]. في خاتمة الحشر أنت هنا لما بتعرف الأسماء دي، أنت مش فاهم المملكة دي قائمة إزاي؟ يعني أنت مملكة لا يسبح لله ما في السماوات والملك القدوس العزيز الحكيم اللي في أول الجمعة أو في أواخر الحشر، أنت مش فاهم المملكة دي، مملكة الله سبحانه وتعالى كيف يدبر الله سبحانه وتعالى الأمر؟ أنت تفكيرك ضيق، فبالتالي التجارة لما عدت أنت قمت وسبت. أيوة، طب وأنت نسيت خير الرازقين؟ يعني ربنا سبحانه وتعالى أنت متصور إن ربنا هيضيعك؟

أو أن تتعلم أيضاً في الجمعة أن تتعلم ولا تعمل، فتجد عتاب لليهود: ﴿مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا﴾ [الجمعة: 5]. فتجد أيضا هناك عتابات عن التأخر في التعلم أو في التطبيق، وربنا بيقولك في أول السورة التسبيح مستمر من الخلق، لو أنت مشيت لو أنت سبت المجالس التسبيح إن العلم أيضا من التسبيح، لو أنت سبت مجالس التسبيح يسبح الله غني. يعني في سورة الجمعة وفي سورة التغابن في نوع من الترك، ناس قامت أو في التغابن ناس ما رضتش تهاجر، فربنا بيقولهم الله غني عنكم. هو أنت متصور إنك لما تقوم من بيئة الإيمان أو تمشي إن الدين بينهار؟ إحنا قلنا في سورة الصف قالتلك لا أنا بصلح فكرك هل أدلكم على تجارة تنجيكم من عذاب أليم، أنت بتنجي نفسك أصلا.

طيب ده في سورة الجمعة، زي ما قلنا إني النقاشات التفصيلية في الآية قد تختلف، حد يقولي لا بس ليها معنى آخر، أنا يهمني المعنى المحوري إني تركك لبعض الأعمال أو تأخرك في بعض الأعمال قد يكون السبب له قلة المعرفة بالله سبحانه وتعالى وده محتاج تسبيح، أن تنزه الله، محتاج تنزه. وزي ما بتنزه مجمل أسماء وصفات كلها، محتاج تنزه اسم اسم. يعني أنت محتاج أنت عندك خلل في خير الرازقين أو في اسم الله الحكيم أو اللطيف أو زي اللي يقولك.

مثلاً ربنا مش هيغفر لي، لا هو خلل؛ يسيء الظن باسم الله التواب، أو لما قالوا والله لا يغفر الله لك، أنت مالك؟ من ذا الذي يتألى عليّ؟ أنت مالك؟ هو أنت مش عارفك باسم الله التواب؟ أنت ليه أصلا بتحجر واسعاً؟ ففي خلل يؤدي إلى أعمال، هذه الأعمال لو أنت عايز تصلحها، محتاج تصلح الخلل الرئيسي في نظرتك إلى الأسماء والصفات في علاقتك بالله سبحانه وتعالى.

آخر سورة عندنا من الأفعال سورة يسبح لله ما في السماوات، اللي هي سورة التغابن، أيضًا بدأت بالتسبيح والعتاب المشهور في سورة التغابن، إيه اللي حصل؟ إيه اللي موجود في سورة التغابن؟ الآية بتاعت: ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَروهُمْ﴾ [التغابن: 14]، إيه اللي حصل للآية دي؟ سبب نزولها إيه؟ ما رضوش يهاجروا خوفًا على أزواجهم وأولادهم، كان المفروض يهاجروا مع النبي صلى الله عليه وسلم، مراته وعياله مسكوا فيه، ما تسيبناش ومش هينفع نسيب البلد ومش عارف إيه، ما رضوش يهاجروا، فبعد سنوات من الهجرة لما انتقلوا للنبي صلى الله عليه وسلم وجد بقى أن كثير من الصحابة سبقوا في الإيمان، هم أن يفتك بهم، لذلك الآية جاءت بعدها: ﴿وَإِنْ تَعْفُوا وَتَصْفَحُوا وَتَغْفِرُوا﴾ [التغابن: 14]، اعفوا عنه أنت اللي غلطان. فبالتالي التأخر في بذل الأوقات لدين الله سبحانه وتعالى أو الهجرة في سبيل الله سبحانه وتعالى هذا نوع من إساءة الظن بالله.

لذلك سيدنا إبراهيم لما ترك زوجته وابنه في الصحراء، والسيدة هاجر قالت: آلله أمرك؟ ده من عند ربنا ولا من عندك؟ لو من عند هو ده بقى التسبيح الصحيح، لو من عند ربنا إذن إيه؟ لن يضيعنا، هو ده أن تنزه الله سبحانه وتعالى إنك ما تتهمش ربنا، طالما أنت اللي بتعمله ده لله، حاولت تحرر نيتك خلاص، أنت بتسيب الأمر لربنا سبحانه وتعالى، أنا مش ملاك قد يصيبني خطأ، لكن أنا قدر المستطاع أُحاول أن أسير في طريق الله سبحانه وتعالى. آخر حاجة في سورة الأعلى: ﴿سَبِّحِ اسْمَ رَبِّكَ الْأَعْلَى﴾ [الأعلى: 1].

المعنى المشهور أن تنزه الله سبحانه وتعالى، ونسبح اسم ربك الأعلى لا يقصد به الاسم إنما الذات، وإن كان أيضًا ممكن يستفاد من الآية، إشمعنى اسم الله الأعلى هنا؟ اسم الله نزه، ﴿سَبِّحِ اسْمَ رَبِّكَ الْأَعْلَى﴾، تجد أن سورة الأعلى جاءت بعد سورة البروج وسورة الطارق، وفي سورة البروج تحريق المؤمنين، وفي سورة الطارق كيد الكافرين: ﴿إِنَّهُمْ يَكِيدُونَ كَيْدًا﴾ [الطارق: 15]، وبعد ما يرى الإنسان تحريق المؤمنين ويستعظم كيد الكافرين قد يصيبه سوء ظن بالله سبحانه وتعالى، فربنا يقول لا، ﴿وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ﴾ [آل عمران: 139]، فنزّه اسم الله الأعلى، بل الأصلًا ممكن يكون إنسان عنده خلل، بل تؤثرون الحياة الدنيا والآخرة خير وأبقى، فبدل ما تسئ الظن بالله، لا شوف المشكلة عندكم فين، وإن كان سبحان الإسراء دي عايزة قصة في مسألة التعامل مع وعود الله سبحانه وتعالى بالنصر.

يبقى الهدف الرئيسي من لقاء اليوم أن توسيع النظر لقضية التسبيح زي ما القرآن وسع النظر لقضية التوبة، أيضًا عايزين ننظر إلى قضية التسبيح بمعنى أوسع، وأن التسبيح هو إزالة العوائق التي بيننا وبين الله سبحانه وتعالى لأننا لم نعرف الله حق المعرفة، وأن كلما عرفنا الله سبحانه وتعالى ستتفاجأ أنك ستنطلق إلى الله سبحانه وتعالى، بل ستندم على الأيام التي مرت عليك وأنت لم تعامل الله سبحانه وتعالى هذه المعاملة، هتندم على إن أنت ما كنتش بتقرب من ربنا أكثر، لما تخطو خطوات في علاقتك بالله سبحانه وتعالى وتبدأ تذوق هذه العلاقة وتبدأ ترى الأسماء والصفات أن تعبد الله كأنك تراه أنت هتبدأ تندم على الأيام اللي فاتت.

وهتبدأ تكتشف إيه ده أنا كنت معطل نفسي ليه؟ أنا إزاي فما ظنكم برب العالمين؟ أنا إزاي؟ لذلك هو سيدنا إبراهيم بيعاتبهم، يعني أظننتم فيه النقص؟ حاشاه سبحانه وتعالى، يعني إيه اللي خلاك إيه الظن اللي عندك في ربنا خلاك تعبد غيره؟ فبالتالي السؤال: فما ظنكم برب العالمين؟ إيه الظن اللي عندنا في ربنا خلانا ما ننطلقش؟ إيه الظن اللي عندهم أصحاب الجنة في ربنا خلاهم ما يطلعوش النفقة؟ أنت متصور إيه؟ أنت متصور الصدقة هتقللك فلوسك؟ أنت متصور نصرة الدين أو الدعوة إلى الله هتمحو البركة من حياتك؟ أنت متصور ركعات قيام الليل بتضيعلك وقتك؟ أنت متصور متصور إن أنت لما تنام عن الصلاة جسمك هيستريح؟ أنت متصور إيه؟ ده سوء ظن بالله سبحانه وتعالى، أنت بتعكس، أنت بدأت تحسن الظن في الأسباب أكثر من الأوامر الشرعية.

أصبحنا خلاص عندنا إن الإزاز بتاعنا متراكم عليه الغبار، والأسباب والمناصب مخليانا مش شايفين علاقتنا بالله سبحانه وتعالى، لأ إحنا محتاجين ننزه الله سبحانه وتعالى، في زمن طغيان الأسباب، في زمن إن كل حاجة بقت لغة الأرقام وعدد المشاهدات وهكذا، أصبح الإنسان مش شايف مش شايف يعني مش عارف يشوف ربنا كويس، مش عارف يصل إلى مرتبة الإحسان، خلاص الأضواء مزغللة عينيه، لأ أنت محتاج تنزه، محتاج أوراد التسبيح، ويكون من المعاني اللي أنت بتستحضرها وأنت قاعد بتسبح: أنا ما كنتش عارفك يا رب حق المعرفة، سبحانك ما قدرناك حق قدرك، سبحانك، أنا متأخر في علاقتي بالله، أنا إزاي ما دعيتش ربنا في المشكلة دي؟

الله سبحانه وتعالى يغضب، ليه؟ ما أنت لما بتدعوش ربنا معناه إنك بتسيء الظن بالله، إزاي ما استخرتش ربنا في الأمر ده؟ يعني أنا واثق في تفكيري أكثر من الاستخارة؟ فهتبدأ تكتشف أفعال صغيرة في حياتك أنت ما كنتش واخد بالك، كل ما تنزه ربنا هتلاقيك بتقول إن شاء الله كثير أصلاً، وهذا من معنى ولا يستثنون، إنه برضه لولا تسبحون الاستثناء، هتلاقي كل حاجة بتفوض أمرك إلى الله سبحانه وتعالى، سيبها لله، ربنا ييسرها بإذن الله، هتجد نفسك بتكثر من هذه الألفاظ، لأن خلاص أنت بدأت تفهم إن كل الخيوط بيد ربنا سبحانه وتعالى، بيده مقاليد السماوات والأرض، يفعل ما يشاء سبحانه وتعالى.

يبقى إذن هذه المعاني تحتاج إلى تثوير، يبقى أنا التسبيح يغرس جوايا المعاني دي، أقوم لما أعيش المعاني أطلع تسبيح مختلف، يقوم التسبيح اللي فيه هذه المعايشة يغرس في قلبي معاني جديدة وهكذا، والملائكة لا تمل من التسبيح، يسبحون الليل والنهار لا يفترون، ليه؟ شايفين الملكوت، كل يوم هو في شأن سبحانه وتعالى، شؤون الربوبية عظيمة، كل يوم هو في شأن، ينصر هذا ويقسم هذا ويرفع هذا ويخفض هذا ويشفي هذا ويرزق هذا ويمنع هذا، كل يوم هو في شأن، شؤون الربوبية عظيمة.

إحنا من الوهم إن إحنا نحمل أعباء الربوبية، أنت متصور إنك أنت اللي هتدورها؟ تعمل أنت إيه؟ ولا أي حاجة، التسبيح بيخلي زوايا النظر بأحجامها الطبيعية، ترى المخلوق مخلوق حجمه الطبيعي، وترى نفسك على حجمك الطبيعي، وترى الطغاة في أحجامهم الطبيعية خلاص، وتبدأ هنا زي ما قلت لكم كده سيدنا موسى قال وهو رايح لفرعون: ﴿إِنَّهُ طَغَى﴾ [طه: 24]، فهو مش عايز إن الملكوت أو الملك المزور بتاع فرعون ده إنه يغطي عليه، لا أنا هسبح ربنا سبحانه وتعالى، فهكذا التسبيح هو تنزيه الله عن كل نقص قد ننسبه إلى الله بأقوالنا وبأفعالنا وبنوايانا وبخواطرنا.

أقول قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك، والسلام عليكم ورحمة الله وبركاته.