دخولتسجيل الدخول

أمسية تربوية (39) | فقه الاسماء الحسنى | د. أحمد عبد المنعم

أحمد عبد المنعمد. أحمد عبد المنعم
  • مدة الدرس:
  • قراءة

لقاء اليوم بإذن الله سبحانه وتعالى بعنوان فقه الأسماء الحسنى، وحقيقة هذا اللقاء ممكن نقول إن هو من أحب اللقاءات إلى قلبي، ودائما أحب الحديث عن الله سبحانه وتعالى وإن كان الحديث عن الله سبحانه وتعالى على شيء عظيم، وإن شاء الله مثل هذه المعلومات أحاول أن أنا أكررها إن شاء الله بحيث إن هي في الآخر إن احنا ممكن نَسجل درس في شتات ما ذكر في مجموعة هذه الدروس.

والحديث عن الله سبحانه وتعالى؛ لأن القرآن أفرد حديثا عظيما عن الله سبحانه وتعالى، وأعظم آية في القرآن هي تتحدث عن الله: آية الكرسي، وسورة الإخلاص ثلث القرآن، والحديث عن الله سبحانه وتعالى في القرآن أيضا له طابع خاص.

طيب، درس اليوم بعنوان فقه الأسماء الحسنى، عايزين نتكلم عن هذا المعنى وعلاقة ده أصلا بالموسم اللي بنعيشه؛ فمبدئيا كل عام وأنتم بخير.

هذا الموسم العظيم موسم العشر، هذا الموسم هو موسم الذكر والقصد والحج، من معانيه القصد؛ أن الإنسان يتجه إلى الله سبحانه وتعالى، أن الإنسان يلبي نداء الله سبحانه وتعالى، إنه يستجيب لأمر الله سبحانه وتعالى.

هذه الاستجابة هي ده المعنى اللي احنا عايزين نتكلم عنه النهارده بإذن الله سبحانه وتعالى؛ هذه الاستجابة من أعظم الأمور اللي بتساعد الإنسان على معرفة الله سبحانه وتعالى.

بمعنى، الأول خلينا نبدأ الموضوع من الأول، العنوان: فقه الأسماء الحسنى، طيب كيف نتعرف على الله سبحانه وتعالى؟ يعني لو أنا سالتكم السؤال ده: كيف نتعرف على الله سبحانه وتعالى؟ أو خليني أقول السؤال بصيغة عكسية: كيف تعرف الله إلينا؟ ده معنى عظيم، كيف أخبرنا عن نفسه؟ يعني احنا دلوقتي مخلوقات بشرية ضعيفة، كيف نتعرف على الملك، وكيف تعرف الملك إلينا؟ ها، إيه رايكم؟ يعني لو أفتح التعليقات كده، كيف تعرف الله سبحانه وتعالى علينا، إلينا؟ نحن نتعرف على الله سبحانه وتعالى.

طيب كويس، في ناس قالت بالقران الكريم، ها إيه تاني؟ يعني احنا عايزين نعرف ربنا من خلال الوحي، طيب إيه تاني؟ ماشي خلصنا أسئلة القرآن والوحي.

الدعاء بكلامه، من الرسل كويس جدا، إيه كمان؟ الأسماء الصفات المذكورة في القرآن، بلطفه، بنعمه، خلقه، الكون جميل جدا، التفكر في المخلوقات، الله أكبر، كويس يعني الأشياء المذكورة عظيمة جدا.

لما نجي نبص من لحظة البداية الأول، الله سبحانه وتعالى خلق الإنسان أولا قابلا لأن يتعرف عليه دي أول نقطه، فالإنسان عنده قابلية سواء قالوا بالفطرة أو بالعقل والروح إنه عنده قابلية إنه يتعرف على الله سبحانه وتعالى، يبقى أول حاجة الإنسان خلق خلقا قابلا لأن يتعرف على الله سبحانه وتعالى، ما وضعه الله فيه، ما فطره فيه، ثم لم يتركه هكذا بل خلق له الخلق حوالي السماوات والارض والجبال والحيوان الحيوانات والنباتات وعقليتنا وفطرتنا لما تنظر للكون بتلتقط منه أشياء، بمعنى بنجد تناسق، بنجد تناغم، بيبقى عندنا تساؤلات، لذلك لما الإنسان بيجد مثلا شر منتشر في الكون ولا يجد له إجابة الإنسان بيحصل له نوع من التساؤلات ليه؟ لأن ربنا فطره على العدل، إنه يكون مطردا، ثم أرسل الينا الرسل وانزل الينا الكتب وهذا من رحمة الله سبحانه وتعالى تمام.

الله سبحانه وتعالى اصطفى لهذه الأمة خير الرسل محمدا صلى الله عليه وسلم، واصطفى لها خير الكتب القرآن الكريم؛ يبقى احنا عايزين نتعرف على الله، والله سبحانه وتعالى تعرف إلينا برسله وبكتابه وبخلقه وبتقديره الأقدار اللي بتمر حوالينا سواء اللي فيها نعم أو فيها آلام، الاقدار الكون من حولنا، الفطرة التي بداخلنا، العقل الذي وضعه الله فينا، كل هذه الأمور تساعدنا إلى التعرف على الله سبحانه وتعالى، ومن أول ما نزل قال الله سبحانه وتعالى: ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]، بدأ القرآن ليعرفنا على الله بأول وصف من صفاته أنه خلق: ﴿خَلَقَ الْإِنسَانَ مِنْ عَلَقٍ﴾ [العلق: 2]، ثاني آية على طول، يبقى القرآن بدأ يعرفنا بالله ويعرفنا بأنفسنا.

طيب، يبقى لو احنا عايزين نتعرف على الله سبحانه وتعالى، أول حاجة إن احنا نستعمل النظر، نستعمل العقل، نتأمل، نتأمل في إيه؟ نتأمل في.. ركزوا معايا، يعني دلوقتي أنا هقول وسيلتين، الوسيلتين دول هما اللي هنستعملهم في الأمور اللي هقولها بمعنى: أول وسيلة النظر، نظر بمعنى إيه؟ التامل، السماع، اللي هو التعامل العلمي الذهني.

ننظر في إيه؟ ننظر في الوحي، ننظر في الكون، ننظر في الأقدار، نتأمل في أحوالنا، وهنتكلم إن شاء الله مثلا كيف ننظر في القرآن لنتعرف على الله سبحانه وتعالى، لكن في شيء آخر، وهو العمل المعايشة، بمعنى إيه؟ لازم يكون في مستوى عملي من معرفة الله سبحانه وتعالى.

يعني لو احنا عرفنا أن جاءنا في الوحي اسم الله الرزاق مثلا، قرأنا أن الله هو الرزاق ذو القوة المتين في سورة الذاريات، وقرأنا أن الله سبحانه وتعالى خير الرازقين زي في سورة الجمعة وسورة المؤمنون، عرفنا أن الله سبحانه وتعالى على المستوى العلمي الذهني أن الله يرزق، تاملنا في الكون وجدنا أن هناك دواب ليس لها من المقدرة على تحصيل الطعام والله سبحانه وتعالى يقيتها ويرزقها ويبعث إليها الطعام.

تأملنا على المستوى العملي، طيب أنا عشان أوثق أن الله رزاق أنا محتاج أعيش هذا الاسم، أعمل، أنفق فيخلف عليّ، أدعو الله سبحانه وتعالى فيقدر الله إليه، فلما يصل إليّ أنا الرزاق بأقدار ومن حيث لا احتسب، ساعتها أقول يقينا أن الله هو الرزاق، هقول بكل يقين كده أن الله هو الرزاق، ما عادش الكلام عن ربنا سبحانه وتعالى على المستوى الذهني فقط أو على المستوى العلمي، لا أصبح على مستوى المعايشة، وده حالة من الارتقاء في علاقتنا بالله، لذلك علاقة درس اليوم بفكرة الحج أن من وسائل معرفة الله أنك تتحرك لربنا، أنك أنت تبذل، أنك تلبي نداء الله سبحانه وتعالى، فلما تتحرك لربنا سبحانه وتعالى تتعرف على الله أكثر.

قال الله في الحديث القدسي: «من تقرب إلي شبرا تقربت إليه ذراعا، ومن تقرب إلي ذراعا تقربت إليه باعا، ومن أتاني يمشي أتيته هرولة»، بصيغة المضارع بيففضل مستمر في علاقة مع الله سبحانه وتعالى، يعرج إلى الله ذي المعارج، حياة ارتقاء في علاقتك بربنا سبحانه وتعالى.

طيب، يبقى إذا عندنا مستويين؛ مستوى النظر والسماع والتامل، ومستوى المعايشة العملية، المستويات دي نوظفها في إيه؟ نوظفها في من حولنا في الكون الخلق الاقدار، ما جاء به الرسل الوحي، التامل في هذه الأمور وتطبيق ومعايشة هذه الأمور تجعل الإنسان يرتقي في علاقتته بالله سبحانه وتعالى، ده ملخص درس اليوم.

طيب، نبدأ نفصل أكثر، أولا الحياة من غير الأسماء الحسنى ظلام موات تيه وتخبط، لو احنا عايزين ننظر للكون وننزع.. وده يعني ده نوع من إفساد الفطرة، لو واحد عايز يقيم الحياة من غير ما ينظر إليها من الأسماء الحسنى يقينا يعني هيحصل له حالة شتات واضطراب وتيه قد يصل إلى الانتحار.

لو واحد عايز يفهم اللي بيحصل في الأرض من دماء تسيل ومعاصي تنتشر وضعف استضعاف لأهل الإيمان بدون ما يستحضر كل الأسماء الحسنى هيحصل له حالة ريبة وشك ويبدا يسأل طب ليه؟ طب فين الإله؟ ويبدا يضطرب، لكن الحياة تضاء لما تلبس نظارة الأسماء الحسنى، لما تنظر للحياة استحضار الأسماء الحسنى الحياة يدب فيها النور.

مثال، مثلا عايزين مثال من أعظم الأمور التي تؤرق المؤمن قضية انتشار المعاصي وانتشار الطغيان والظلم، بل أزيدكم أن المؤمن نفسه هو يقع في معصية، مؤمن بيحب ربنا يقول لك أنا بحب ربنا بس أنا أقع في معاصي، المؤمن خلق مفتنا توابا نسيا.

الناس اللي بتسأل في مسالة المعايشة والأعمال ده جيد، أنا بس شرحت ملخص الدرس في الأول والآن احنا في مرحلة التفصيل، أقول نرجع تاني مسألة انتشار المعاصي سواء في الكون، انتشار وقوع الناس في المعصية، وقوع من تعرف في المعصية، انتشار الظلم الطغيان، الإنسان نفسه يقع في معصية، تجد مثلا ابن القيم عمل بحث طويل: ما هي المشاهد التي ينظر بها الإنسان للمعصية إذا وقعت في الأرض؟ أو إذا وقع فيها؟ في مدارج السالكين في المجلد الثاني من طبعة عطاءات العلم من بداية المجلد الثاني ذكر اثنا عشر مشهدا ينظر بها عموم الناس لوقوع المعصية.

أول أربع مشاهد قال دول للبعيدين عن ربنا، وبعد كده ذكر مجموعة من المشاهد اللي المؤمن ينظرها إلى وقوع المعصية منها مشهد الأسماء الحسنى، وذكر -يعني إن شاء الله نرفعه لكم على القناة- ذكر كلام بديع إزاي استحضار الأسماء الحسنى مجتمعة، استحضار الأسماء الحسنى مجتمعة مع بعضها البعض يهون على الإنسان النظر لوقوع المعصية منه أو من غيره.

خليه يتعرف إلى اسم الله الغفار الغفور الرحيم الحليم الحكيم الملك سبحانه وتعالى، أنت ممكن شيء أنت كنت مستهجنه لما تفهم حكمة الله سبحانه وتعالى وتنظر إلى الحدث من منظور الأسماء الحسنى نظرتك تختلف، تزداد خشوعا، تعرف إيه ده؟ مدى حكمة الله وأن هناك حكم عظيمة ما كانت لتحدث لولا وجود هذه الدماء، وأن هناك عبوديات عظيمة ما كانت لتخرج لولا وجود هذه الدماء.

فابن القيم يرد على بعض برضو الشبهات بيقول إيه؟ طب ما كان ممكن واحد يقول طب ما مش لازم الدماء دي تسيل ولا لازم الذنوب دي تقع، كان ممكن ربنا يعمل ده، بعض الناس عنده تفكير تجريدي ذهني فقط، فبيقول: لا، ده تصور متخيل ما كانش هيطلع نفس العبودية دي، عبودية الشهادة في سبيل الله هتحصل ازاي من غير وجود أعداء؟ عبودية البكاء على ذنبك والندم هتحصل ازاي من غير ما تذنب؟ الله سبحانه وتعالى يقول في الحديث القدسي: «لو لم تذنبوا لذهب الله بكم، ولقوم يذنبون فيستغفرون».

طب ليه يا رب؟ عشان ما يحصلش تعطيل لاسم الله الغفار، الله يحب أسماءه وصفاته فيحب العفو: «اللهم إنك عفو تحب العفو»، الله يحب الحلم، فالله سبحانه وتعالى قدر أشياء قد تكون مكروهة في بادئها تنتهي إلى محبوبات، وهذا من الحكمة، فالنهاية والمآلات دائما العاقبة للمتقين ولاهل الإيمان ولما يحبه الله ويرضاه، لذلك ابن القيم بيقول كلام بديع قوي بيقول إيه؟ فله في كل ما قضى وقدره الحكمة البالغة والآيات الباهرة.

شوف الكلمة دي: والتعرف إلى عبيده بأسمائه وصفاته واستدعاء محبتهم له وذكرهم له وشكرهم له وتعبدهم له بأسمائه الحسنى، يبقى لما بتَتأمل في الوحي وتنظر في الكون وتنظر في الأقدار المحيطة بينا أنت هنا تتعرف على الله سبحانه وتعالى.

كَثْرَة النظر في الوحي، التأمل في الكون، الأقدار اللي بتحصل حوالينا تخليك تتعرف على الله سبحانه وتعالى، كل اسم من أسماء الله كل اسم من أسماء الله له عبودية خاصة.

ابن القيم بيقول: كل اسم من أسمائه له تعبد مختص به، شوف الكلام الجميل، له تعبد مختص به علما ومعرفة وحالا حال بتعيشها مع ربنا.

ثم يقول: وأكمل الناس عبودية المتعبد بجميع الأسماء والصفات التي يطلع عليها البشر، فلا تحجبه عبودية اسم عن عبودية آخر، كمن يحجبه التعبد باسمه القدير عن التعبد باسمه الحكيم، أو تحجبه عبودية اسمه المعطي عن عبودية اسمه المانع.

لما بنتعرف على أسماء الله وصفاته بنبدا نفهم اللي بيحصل حوالينا، يبقى أول نقطة بدأناها في التفصيل: الحياة بدون الأسماء الحسنى ظلام وتخبط وتيه، وذكرنا نموذج كلام ابن القيم في النظر الذنوب.

تاني نقطة: ينبغي أن نعلم أن كل ما في الكون -وركزوا معايا دي في القاعدة الثانية دي- كل ما في الكون من آثار أسمائه وصفاته، يعني الكون ما يحدث فيه هو من بعض آثار أسمائه وصفاته، وكل ما الإنسان يتعلم عن أسماء الله وصفاته كل ما يفهم اللي بيحصل في الكون.

بيكون عنده منطقة مظلمة في معرفة الأسماء والصفات، كل ما بيكون عنده مناطق مظلمة فيما يحدث، وسيظل -ركزوا معايا- وستظل هناك أشكال تحدث في الكون لا نعرف ما هي حكمتها إلا يوم القيامة؛ لأن التعرف التام على الله سبحانه وتعالى يكون إلى يوم القيامة.

شوفوا مثلا لما الإنسان يحصل له مشكلة يصيبه هم وحزن، ودي من الابتلاءات اللي ربنا سبحانه وتعالى يقدرها على الإنسان ليتعرف الإنسان على ربه؛ احنا قلنا التعرف على الله بالوحي الرسل التامل وأيضا بالاقدار اللي فيها نعم واللي فيها آلام، هنذكر ده إن شاء الله ساعة التطبيقات هنذكر سنذكر مجموعة من القواعد.

الأول احنا قلنا من القاعدة الثانية الآن أن كل ما في الكون من آثار أسمائه وصفاته، وكل ما الإنسان بيفهم في الأسماء والصفات ويتعلم وينظر في القران ويتامل يفقه ما يحدث في الكون، فما بيحصلوش أزمة لما بيشوف اليهود -عليهم لعنة الله- الآن يقتلون في المسلمين، لا يتعجب، هو يتألم لكن لا يتعجب، هو فاهم طبيعة الصراع، ربنا أخبره في سورة البقرة من أول لحظة نزول آدم، وبعد كده حسد إبليس، وأن اللي صار أكمل مسيرة إبليس في الأرض اليهود، فحسدوا النبي صلى الله عليه وسلم، فهم الواقع العملي لتطبيق الشيطان في الأرض إلى يوم القيامة.

هو فاهم لما قرأ سورة البقرة فهم، ومن أول لحظة ربنا عليم حكيم، من الأسماء التي ذكرت في أوائل سورة البقرة: عليم حكيم سبحانه وتعالى، كل شيء بعلم وبحكمة، ﴿وَإِنِّي أَعْلَمُ مَا لَا تَعْلَمُونَ﴾ [البقرة: 30]، فلا يصيبه حالة التعجب، هو يتألم، فكل ما الإنسان يفقه عن الأسماء والصفات وأفعال الله سبحانه وتعالى يفهم اللي بيحصل في الكون، طب هل ممكن يكون في

جزء شيء بيحصل في الكون مش فاهمينه فهم كامل؟ أيوه، ليه الفهم التام بيكون يوم القيامة؟

طيب، ركزوا معايا في الحديث ده؛ أي حد فينا بيصيبه نوع من الهم والحزن، والهم والحزن ده شيء -كما قلت- من الأمور الأقدار التي يتعرف الله بها إلى عباده. قال صلى الله عليه وسلم: «ما أصاب عبدا قط هم ولا حزن إلا قال: اللهم إني عبدك، ابن عبدك، ابن أمتك، ماض في حكمك، عدل في قضاؤك، أسألك».

هو دلوقتي واحد حصل له هم، مش فاهم الهم ده جه ليه؟ مش فاهم الابتلاء ده حصل له ليه؟ عنده تساؤلات، وده أحياناً من التساؤلات اللي بتبقى بداخل فطرة الإنسان؛ ربنا فطره أن يكون فيه عدل في اضطراد، لذلك ربنا جعل في الإنسان حاجة اسمها النفس اللوامة، لما بيعمل حاجة عكس مبادئه بيلوم نفسه، والنفس اللوامة من أدلة يوم القيامة: ﴿لَا أُقْسِمُ بِيَوْمِ الْقِيَامَةِ * وَلَا أُقْسِمُ بِالنَّفْسِ اللَّوَّامَةِ﴾ [القيامة: 1-2]. فلما بيقع فيه حزن، يريد أنه يصرفه عن نفسه أو يتعرف لماذا حدث هذا؟

فالنبي صلى الله عليه وسلم دلنا على هذا الدعاء؛ أول حاجة الاستسلام حتى لو مش فاهم: اللهم إني عبدك، ابن عبدك، ابن أمتك، ماض في حكمك، عدل في قضاؤك. قبل ما أطلب أن ربنا يصرف الهم، الأول أنا مسلم: ﴿لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87]. أنا مسلم، فهمت أو ما فهمتش، صرف أو لم يصرف، أنا مسلم، أمري إلى الله سبحانه وتعالى.

طيب، اللهم إني عبدك، ابن عبدك، ابن أمتك، ماض في حكمك، عدل في قضاؤك، أسألك بكل اسم هو لك، سميت به نفسك، أو أنزلته في كتابك، أو علمته أحداً من خلقك -بعض الناس ربنا يعلمهم بعض الأمور عنه- أو استأثرت به في علم الغيب عندك -في حاجات استأثر بها الله سبحانه وتعالى-.

بعد ما أديت المقدمة دي، أن تجعل القرآن -لأن أكبر وسيلة للتعرف على الله هي القرآن- أن تجعل القرآن ربيع قلبي، ونور صدري، وجلاء حزني، وذهاب همي. بس كده خلاص، يصرف عنك الله الهم والحزن. حتى الصحابة قالوا: أفلا نتعلمها يا رسول الله؟ قال: «ينبغي لمن سمعها أن يتعلمها». يبقى كل ما في الكون من آثار أسمائه وصفاته، لو الإنسان تعلم عن الله سبحانه وتعالى وفقه الأسماء الحسنى، وتعلّم عن الله سبحانه وتعالى، يصيبه حالة سكينة.

شوفوا سيدنا هود قومه بيهددوه، بيقول لهم إيه: ﴿إِنِّي تَوَكَّلْتُ عَلَى اللَّهِ رَبِّي وَرَبِّكُمْ مَّا مِنْ دَابَّةٍ إِلَّا هُوَ آخِذٌ بِنَاصِيَتِهَا إِنَّ رَبِّي عَلَى صِرَاطٍ مُسْتَقِيمٍ﴾ [هود: 56]. أنا مش خايف، يعني إيه إن ربي على صراط مستقيم؟ راجعوا دي، برضه من الواجبات راجعوا تفسيرها، يعني من معاني الله لا يغير معاملته؛ ربنا عدل له سننن له أسماء ثابتة من أسمائه المؤمن، يؤمن عباده، أنت مطمن وأنت بتعامل ربنا أن المعاملة مش كل شوية تتغير، ولله المثل الأعلى، في واحد وأنت بتعامله مهما كان كريم ممكن تغيره الظروف، مهما كان حليم ممكن يتغير، الله سبحانه وتعالى على صراط مستقيم، فأنا مطمن.

ربنا قال اللي هيعمل كذا وكذا وكذا العاقبة للتقوى؛ مت بقى، ما متّش، عذبوني، ما عذبونيش، أنا مسلم، أمري لله، كل شيء بقدر، وأنا مسلم، الحكمة له سبحانه وتعالى، الأمور عنده في قمة الهدوء. سيدنا إبراهيم يقول: وكيف أخاف؟ هو مطمن، هو مطمن، فأنا مش حاسس أن الكون كل شوية بقانون، لا، لا، في معاملة ثابتة، في سنن ثابتة، في معاملة الله سبحانه وتعالى.

طيب، من القاعدة الثالثة: أن الأسماء اسماء بتعمل مجتمعة، وده يفهمنا دلالات الاقتران ما بين الأسماء الحسنى في السور. بمعنى، في ناس زي ما ابن القيم بيقول: بيتعبد باسم واحد أو باسمين من أسماء الله وينسى بقيه الأسماء، فبيكون مطمن في اوقات وعنده اضطراب في اوقات. يتعبد لله باسم الله المعطي: يا رب أعطنا، أعطنا يا رب؛ طيب، لما يمنع عنه شيء؟ أيوه، ما هو زي لا معطي لما منعت، لا مانع لما أعطيت؛ وزي ما في حكمه في العطاء، في حكمه في المنع؛ وزي ما شكرت ربنا في العطاء، أنت بتحمد ربنا سبحانه وتعالى على المنع.

فالتعبد بالاسماء مجتمعه يطمئنك؛ هو عليم بس هو حكيم، هو قدير بس هو حليم، يحلم على الناس، هو سبحانه وتعالى قادر أن يأخذ الناس الظلمة في لحظة، لكن قدر لحكمة سبحانه وتعالى أن هو يؤخر الناس إلى أجل مسمى لحكمة الله سبحانه وتعالى: ﴿وَإِذَا الرُّسُلُ أُقِّتَتْ * لِأَيِّ يَوْمٍ أُجِلَتْ * لِيَوْمِ الْفَصْلِ﴾ [المرسلات: 11-13]. اللي مستعجل أن العذاب ينزل على فلان وفلان وفلان هو مش فاهم هذا الكون قام على إيه، ما هو الله سبحانه وتعالى: ﴿وَلَوْ اتَّبَعَ الْحَقُّ أَهْوَاءَهُمْ لَفَسَدَتِ السَّمَاوَاتُ وَالْأَرْضُ﴾ [المؤمنون: 71]. يبقى الأسماء بتعمل مجتمعة، آثار الكون الكون من آثار من بعض آثار أسمائه وصفاتي، وتعمل مجتمعة، كل ما تفقه أكتر في الاسماء الأسماء الحسنى كل ما تفهم اللي بيحصل حواليك.

القاعدة الرابعة: أن من وسائل الارتقاء أنك أنت تنظر في... تعالوا ناخد كده بقى نظرة في القرآن سريعا، لما بتنظر في القرآن؛ القرآن لما أراد أنه يحدثنا عن الله لم يستعمل وسيلة واحدة، يعني ما قعدش يكلمنا عن ذات الله مجردة، ما قعدش يقول لنا مثلاً: الله سبحانه وتعالى قدير، الله حكيم، الله رحيم، الأسماء موجودة ورا بعضها كده، لا، ذكر لنا الأسماء في سياقات مختلفة؛ تجد ذكر الأسماء في سياقات الخلق، سياقات الإبداع، في سياقات النصرة، في سياقات الإهلاك، في سياقات التدبير، في سياقات العظمة، في سياقات عبودية الملائكة له، في سياقات خضوع الكون له.

فالقران ذكر الأسماء الحسنى في سياقات متعددة. اللي بيدرس الأسماء الحسنى دراسة نظرية لأجل الردود، ده شيء، غير فقه الأسماء الحسنى ومعايشتها، شيء آخر. فتجد بعض من يقتصر على دراسة الأسماء الحسنى في النقاشات الكلامية والخلافات ويظن أنه يعرج إلى الله، لا، لا، كل ده لسه بتنظف الحديقة، أنت ما دخلتهاش، أنت كده لسه لم تعرج إلى الله سبحانه وتعالى.

شوف طريقة القرآن في العرض عن أرض الأسماء الحسنى؛ لما ربنا بيكلمك عن اسمه الواسع، لما بيكلمك سبحانه وتعالى -يعني شوف مثلاً الأول والآخر والظاهر والباطن، شوف سياق -إن شاء الله الحلقة بتاعت سورة الحديد تنزل بعد العيد- شوف تفسير سورة الحديد في مقدمة سورة الحديد قبل ما ربنا يقول آمنوا وأنفقوا كلمهم عن الأول والآخر والظاهر والباطن.

النبي صلى الله عليه وسلم قبل ما ينام وقبل ما يطلب بالغنى قال: «أنت الأول فليس قبلك شيء، وأنت الآخر فليس بعدك شيء، وأنت الظاهر فليس فوقك شيء، وأنت الباطن فليس دونك شيء، اقض عنا الدين وأغننا من الفقر». إيه العلاقة؟ مش القرآن قال: ﴿وَلِلَّهِ الْأَسْمَاءُ الْحُسْنَى فَادْعُوهُ بِهَا﴾ [الأعراف: 180]. إحنا عايزين دلوقتي كيف نتعامل مع الأسماء الحسنى؟ القرآن قال لنا: ذروا الذين يلحدون، نزه الأسماء: ﴿سَبِّحِ اسْمَ رَبِّكَ الْأَعْلَى﴾ [الأعلى: 1]. ادعوا بالأسماء، ولله الأسماء الحسنى فادعوه به، دي الطريقة الصح للتعامل مع الأسماء، مش أنك أنت تقعد تجادل فيها ثم تكتفي فقط تحرير المعاني الصحيحة الواردة عن السلف في الأسماء والصفات، ده شيء هام، شيء علم، لكن ليس هذا الذي يعرج به الانسان إلى الله سبحانه وتعالى.

يبقى أما تيجي نشوف طريقة القرآن، ذكر الحديث عن الله سبحانه وتعالى في سياقات مختلفة، كما قلنا في سياقات الكون، الإبداع، التدبير، النصرة، الإهلاك، عبودية الملائكة. لما بتقرا القرآن وتبحث بحث عن -مثلاً اقرا قصة سيدنا ابراهيم في علاقته بالله، ابحث عن منطوق إبراهيم عليه السلام وهو يتحدث عن الله أو الأنبياء كلهم-.

السؤال هنا، عشان نروح للي بعد كده في مسألة العمل والمعايشة، هسألكم سؤال: سيدنا يوسف في آخر القصة قال: ﴿إِنَّ رَبِّي لَطِيفٌ لِّمَا يَشَاءُ﴾ [يوسف: 100]. سيدنا يوسف هنا بيكلمنا عن اللطيف، والقران بيكلمنا عن... ازاي سيدنا يوسف بيقول الله لطيف؟ هل معرفة يوسف عليه السلام بسم الله اللطيف قبل قصته زي معرفته بسم الله اللطيف بعد قصته؟

تاني سؤال: لما ربنا يقول أن سيدنا يوسف يقول: ﴿إِنَّ رَبِّي لَطِيفٌ لِّمَا يَشَاءُ﴾ [يوسف: 100] هل سيدنا يوسف لما يحدثنا عن اسم الله اللطيف في أول حياته كما سيحدثنا في آخر حياته؟ لا، هو عاش الاسم، فبيكلمنا عن معايشة، عن حياة.

سيدنا إبراهيم لما قبل ما يدخل النار غير لما بعد ما خرج من النار ولم تمسه بشيء. سيدنا إبراهيم قبل ما يحط السكينة على رقبة ابنه حاجة، وبعد ما حط السكينة حاجة. سيدنا إبراهيم قبل ما يلبي نداء الله شيء، وبعد ما لبى نداء الله شيء آخر. ودي القاعدة الأساسية اللي أنا عايز أخرج بها النهارده: أن لن تفقه الأسماء الحسنى حق الفقه بدون عمل، بدون أشباره، بدون تلبية، بدون سعي إلى الله سبحانه وتعالى؛ مش هيحصل، هتظل معرفة ذهنية قد تزول عنك.

لازم ترتقي في علاقة عملية مع الله سبحانه وتعالى، دي معرفة مختلفة تماماً، معرفة اختلطت باللحم والدم. اللي يكلمك عن اللطيف، عن الواسع، عن الرزاق، عن الشافي، عن المجيب؛ سيدنا إبراهيم: ﴿الْحَمْدُ لِلَّهِ الَّذِي وَهَبَ لِي عَلَى الْكِبَرِ إِسْمَاعِيلَ وَإِسْحَاقَ إِنَّ رَبِّي لَسَمِيعُ الدُّعَاءِ﴾ [إبراهيم: 39]. سيدنا إبراهيم هنا بيقول بعد ما ربنا استجاب له: إن ربي لسميع الدعاء، اللي دعا دعوات ولجأ إلى الله سبحانه وتعالى فاستجاب له، لما يحدثك عن المجيب يكون حديثه مختلفاً عن الشخص الذي لم يجرب الدعاء.

يبقى من أهم القواعد: النظر في القرآن الكريم، ثم التطبيق ومعايشه هذا الكلام. لما إحنا قلنا القرآن تحدث عن اسماء الله بصفات في سياقات مختلفة، كذلك أنت لازم يكون لك معاملات مع ربنا سبحانه وتعالى.

الحج الإنسان بيخرج فيه من منطقة الاستقرار، من منطقة الأمان، ويرروح لمنطقة غير دي؛ زرع وبلد بعيد عنه، ويسافر ليلبي ليلبي نداء الله سبحانه وتعالى، فيجد من آياته: ﴿فَلَوْلَا نَفَرَ مِنْ كُلِّ فِرْقَةٍ مِنْهُمْ طَائِفَةٌ لِيَتَفَقَّهُوا فِي الدِّينِ وَلِيُنْذِرُوا قَوْمَهُمْ إِذَا رَجَعُوا إِلَيْهِمْ﴾ [التوبة: 122]. المفسرين اختلفوا من هذه الطائفة التي تخرج لتتفقه؛ فلولا نفر من كل فرقة منهم طائفة ليتفقهوا في الدين، مين الطائفة اللي خرجت تتفقه؟ هل اللي خرجت تتعلم من النبي صلى الله عليه وسلم؟ هذا وارد. في قول ثاني: هي التي خرجت في الجهاد.

طب إيه التفقه اللي هتشوفه؟ طب ما في ناس قاعدة مع النبي صلى الله عليه وسلم بيعلمهم علمي، بيعلمهم علوم، لكن في ناس اتعلمت شيء عملي لما خرجت؛ رأيت من آيات الله في نصرته للمستضعفين ما راينا على مدار أكثر من... يعني بقالنا سنتين اهو في حرب غزة، ما راينا من تضحيات وبذل ودماء وجهود بذلت لنصرة دين الله سبحانه وتعالى، ما كان ليخرج ما راينا من آيات لله سبحانه وتعالى -أسال الله سبحانه وتعالى أن ينصرهم- في أشياء تحدث بالعمل. هذه الطائفة تتفقه عن الله، تتفقه عن الله فقهاً ما كان ليصل إلى هذا الفقه وهو في منزله، مستحيل. في أشياء تتعلم بالعمل.

لذلك أنا هتوقف هنا -معلش، كتير من الأسئلة-: ازاي اختار صغري؟ ازاي اعرف نفسي؟ ازاي أقف في المكان اللي ربنا بيحبه؟ ازاي أوصل؟ مش عارف إيه. كتير من إجابات هذه الأسئلة لا تكون إلا بالعمل، إلا بالسير حتى لو في أخطاء، بل الشخص الذي ليس لديه أخطاء في الطريق إلى الله سبحانه وتعالى معناه أنه لم يسِر أصلاً، مش هتوصل غير لما تتحرك.

الصحابة لما اختلفوا في القدر قدام النبي صلى الله عليه وسلم، قال لهم: «اعملوا، فكل ميسر لما خلق له». القضية دي مش هتحل بالكلام، لازم تعمل، لما تتحرك وتعامل ربنا، أنت بتتعرف على الله سبحانه وتعالى. هناك علوم لا تحصل إلا بالعمل.

أنا عايزكم بس معلش أفرق تفريق دقيق ما بين اقتضاء العلم العمل؛ الرسالة دائماً بحيل عليها بتاعت الإمام الخطابي أن العلم يلتزم العمل، ده معنى معنى سلوكي مهم، لا، ومعنى آخر أن في أشياء لن تتعلم أصلاً إلا بالعمل. سياقات الحكمة في القرآن؛ الحكمة تقريباً جت 17 مرة في القرآن، من سياقات الحكمة: لن يصل الإنسان إلى الحكمة إلا بالبذل؛ الحكمة جت في سورة البقرة مع الجهاد والإنفاق، لن يصل الإنسان بالحكمة إلى الحكمة إلا ببذل، تضحية، جهاد، إنفاق.

في أشياء لن يفقهها الإنسان... بعض الناس يتحدث أن رحلات الدعوة إلى الله، الحج، الجهاد، يتحدث فيها كيف غيرت هذه الرحلات في علاقته بالله، كيف أبصر أشياء كانت غائبة عنه، فبالتالي أنت لو ما عملتش ربنا بالإنفاق، ما عملتش ربنا بالتضحية، في جزء سيظل مظلم عندك في علاقتك.

إحنا هنا بنتكلم عن مراتب الإحسان، مش بنقول أن هو يعني عاصي أو آثم، لا، زي مثلاً شيخ الإسلام ابن تيمية بيقول أن مرضى القلوب اللي ذكروا في القرآن منهم طائفة ليسوا منافقين، هم كانوا ناس عادية إيمانهم بسيط، لما تعرض لموقف معين أخرج نفاقه -نسأل الله العافية- في ناس لما تعرضت لمواضع معينة ومواقف ابتلاءات أخرجت إيمانها فإيمانه زاد.

ففي مفارق بتجيلك في الطريق، اللي بيتقرب بقى هو شِبراً لربنا سبحانه وتعالى، الله يتقرب إليه باعاً، فيبصر في الطريق أموراً لم يكن ليراها بدون هذا الشبر. يا جماعة في ناس عايشة في منطقة ضيقة قوي في علاقتها بربنا، عايش مع اسمين ثلاثة، عايش مع معنيين ثلاثة في الدين، ده خسران كتير؛ أنا مش بتكلم على الجنة والنار أو على الثواب والعقاب، ده خسران في علاقته بالله، عارفين الجنة درجات؟ العروج إلى الله لا ينتهي.

فبالتالي الحياة معايشة، هذه الحياة مع الله ده أعلى شيء في الوجود، قصة قصص الأنبياء عايزك تغير نظرتك.

في قصص الأنبياء، اقرأ قصص الأنبياء كأنها رحلة تعرّف على الله. عروج سيدنا إراهيم؛ يعرج، عروج دي مش قصة، ده عروج إلى الله، كل موقف كان ينقله نقلة أعلى، ويتكلم عن ربنا بصورة أكثر يقيناً: ربي الذي يحيي ويميت. خلاص، بيرى من آيات الله الكبرى. لسه كنت بسمع درس جميل اسمه إراهيم الأواه المنيب، لشيخ اسمه مصطفى الشيباني، في كلام جميل عن سيدنا إبراهيم.

طيب، عشان أنا هبدأ أختم دلوقتي؛ الكلام عبارة عن إيه؟ كيف نفقه الأسماء الحسنى؟ قلنا طيب كيف تعرف الله إلينا؟ أرسل لينا الرسل، أنزل الوحي، قدر أقدار الكون. التأمل في هذه الأمور ومعايشة هذه الأمور تجعل الإنسان يفقه الأسماء الحسنى، ثم لما يفقه الأسماء الحسنى يرجع ينظر إلى الحياة فيزداد بصيرة وهكذا، ويتقرب إلى الله شبراً فذراعاً وهكذا.

من أهم الأمور المعاشة قضية الأقدار؛ يعني ممكن ربنا يحطك في موقف عشان تتعرف على اسم من أسمائه. ممكن ربنا يقفل لك أبواب، يغلق عليك أسباب شغالة مع غيرك، وانت مستغرب يا رب السبب ده ما هو شغال مع غيري ليه؟ الدواء خلى غيرك يشفى وأنت لم تشف بنفس الدواء؛ عشان ربنا يقول لك تعلق بيه. بعض الناس بيتحط في أزمات والأزمة تتحل ولم يتفكر في ذلك، زي الحديث المروي عن النبي صلى الله عليه وسلم أن المنافق لما بيمرض عامل زي الدابة اللي بتربط، لا يدري فيما عقل ولا فيما ترك؛ لا عارف هو اتربط ليه ولا اتفك ليه، عارف دابة كانت ماشية فجي واحد قام ربطها، قامت الدابة واقفة، فك الرباط قامت الدابة ماشية. في واحد كده، وفي واحد لا؛ لما بيتعرض لما ربنا بيغلق عليه أبواب، هذا الغلق يتعرف فيه على الله، ولما ربنا بيفتح له أبواب، هذا الفتح يتعرف فيه على الله. خلاص، هي بقت الأحداث من حوله تعرفه على الله، بقى معلق بالسماء، ما عادش مشغول بالارض، هو لم يعد يرى إلا السماء؛ أعوذ برضاك من سخطك، ما عادش شايف سخط فلان، وبمعافاتك من عقوبتك، ما هو ما عادش شايف عقوبة فلان، هو لا يرى إلا الله. أعوذ برضاك من سخطك، وبمعافاتك من عقوبتك، وبك منك؛ ما عادش شايف غير ربنا. لا أحصي ثناء عليك، أنت كما أثنيت على نفسك. فبقت حياتك هي رحلة، رحلة تعرّف على الله سبحانه وتعالى.

طيب، الأقدار اللي بتتحصل حوالينا، سواء الفتح أو الغلق، الشفاء أو المرض، النصر أو الهزيمة، كلها فيها تعرّف على الله سبحانه وتعالى. احنا في غزوة أحد تعرّفنا على بعض أسماء الله وصفاته، ونزل من الوحي ما بصرنا بحكم من الله سبحانه وتعالى ما كنا لنعرفها لولا الهزيمة. طبعا الإنسان يطلب العافية، لا يطلب العذاب ولا يطلب البلاء، لكن لو حصل، يصبر الإنسان ويتعرف فيه على الله سبحانه وتعالى. ركزوا معايا في الحته دي زي ما قلت عشان هختم بيها بس حابب إن هي توصل: يبقى الأقدار اللي بتتحصل حوالينا بتساعدنا على معرفة الله.

طيب، ما هو ممكن ما يحصليش كل الأقدار اللي تساعدني على التعرف على الله سبحانه وتعالى؟ من هو أكثر البشرية معرفة بالله؟ من هو أكثر الخلق تعرّفاً على الله سبحانه وتعالى؟ من هو أخشى الناس لله سبحانه وتعالى؟ من هو سيدي صلى الله عليه وسلم؟ قراءة سير النبي صلى الله عليه وسلم من نظرة التعرّف على الله سبحانه وتعالى ستجد السيرة عجيبة. اسمع معايا الآيات دي كده، شوف ربنا عمل إيه: ﴿إِنَّا فَتَحْنَا لَكَ فَتْحًا مُّبِينًا * لِّيَغْفِرَ لَكَ اللَّهُ مَا تَقَدَّمَ ذَنبَكَ وَمَا تَأَخَّرَ وَيُتِمَّ نِعْمَتَهُ عَلَيْكَ وَيَهْدِيَكَ صِرَاطًا مُّسْتَقِيمًا﴾ [الفتح: 1-2]. النبي صلى الله عليه وسلم قدر الله له من الأقدار ما لم يقدر لنبي غيره، عليهم صلوات الله وسلامه. يعني سيدنا إبراهيم قطع شوط طويل لكن ما حصلوش التمكين اللي حصل للنبي صلى الله عليه وسلم، سيدنا موسى هدى الله به أمة عظيمة لكن أمة النبي صلى الله عليه وسلم أعظم، وهكذا. كل قدر حدث لنبي من الأنبياء كان هذا القدر وسيلة للتعرف إلى الله، فما حدث لنبينا صلى الله عليه وسلم أعظم، فتقدير الله لرسول الله صلى الله عليه وسلم أعظم، ففي معرفة لربنا أعظم، فكان عروج إلى الله إلى أعلى نقطة سواء في الإسراء والمعراج أو في سيره إلى الله، سير إلى الله سبحانه وتعالى واضح. فتجد أنه مر بأزمات، ضيق وابتلاء وسعة وفتح وغنائم وموت أقربه بقا واستضعاف وتمكين، وهكذا. فسيرة النبي صلى الله عليه وسلم أعظم وسيلة للتعرف على الله سبحانه وتعالى، لأن أنت مستحيل هيقدر لك كل الأقدار اللي تساعدك.

فبالتالي هنضيف من الوسائل وأنا أجلتها للاخر عشان كده، هنضيف من أهم وسائل فقه الأسماء الحسنى: قراءة سيرة النبي صلى الله عليه وسلم، سيد العباد صلى الله عليه وسلم. لكن فهمنا ليه أنت، احنا قلنا مثلا شوف سيدنا يوسف لما يكلمك عن اللطيف؛ ربنا أصلاً قص قصة سيدنا يوسف على النبي صلى الله عليه وسلم، وبعض العلماء قال أصلاً إن ربنا خلى النبي صلى الله عليه وسلم يقابل سيدنا يوسف في الإسراء والمعراج عشان سيحدث معه مثل ما حدث معه: غيره حسد ثم بعد ذلك يحبونه ويستقبلونه، فالجزء اللي مر به سيدنا يوسف ما مر بالنبي صلى الله عليه وسلم أعظم. وهكذا؛ قراءة القرآن، التامل في الكون، النظر في الأقدار من حولك، قراءة سيرة النبي صلى الله عليه وسلم، ثم أن يكون لك نموذج معيشة في حياتك أنت الآن تحاول أن تفقه عن الله سبحانه وتعالى.

الاكتفاء بالأمور النظرية؛ يعني أنت ما بترفعش إيدك للسما، طب هتعرف ربنا إزاي؟ الدعاء مش مركزي في حياتك. أنا لسه باقول للأخوة في الدرس اللي هو صوارف الدعاء، باقول لهم أنا لما بمسك كتاب الأذكار للإمام النووي أنا بتعجب؛ النبي صلى الله عليه وسلم وكان يعني هتدير حياتك إزاي من غير دعاء من غير أذكار؟ يعني مستحيل انسان يحيط بكل العوامل المحيطة في الكون في جزء غيبي ضخم، ده هتعمله إزاي؟ وقلت لهم حتى في الدرس بس نموذج أذكار النوم بس فقط قبل النوم شيء عجيب، أذكار الصباح والمساء تعلق النبي صلى الله عليه وسلم بالسماء عظيم، والصحابه رأوا ذلك؛ يعني الصحابة كانوا بيحدثون، مش النبي صلى الله عليه وسلم هو اللي بيقول لهم قولوا عني كذا، يعني النبي صلى الله عليه وسلم مثلاً ما قال لهمش كنت أقوم حتى تتورم قدمي، هما شافوا ورم قدم النبي صلى الله عليه وسلم، كانوا بيعدوا الاستغفار للنبي صلى الله عليه وسلم، هما وصفوه أنه كان كثير النظر إلى السماء صلى الله عليه وسلم. يبقى إذا رحلة الحج هي رحلة للتعرف، رحلة الدعوة، رحلة البذل، رحلة الإنفاق، رحلة الحفظ، كل عمل صالح بتعمله أنت تتعرف فيه على الله سبحانه وتعالى. الأعمال وسيلة للتعرف، ليس العلم فقط؛ الأعمال وسيلة للتعرف على الله سبحانه وتعالى.

أرجو أن تكون الفكرة اللي أنا كنت عايز أوضحها وضحت، وإن شاء الله مثل هذه الأمور لأن ده معنى مركزي في الوحي يعني أحاول أن أنا أكرره كل فترة. ذكرت بعضاً منه في درس أثر القرآن على الإنسان، لكن هنا ممكن يكون في نوع من السعة شوية، وكل ما ربنا سبحانه وتعالى يفتح بمعنًى نحاول نعيد صياغته: كيف نفقه الأسماء الحسنى؟ كيف نرتقي في علاقتنا بالله؟ درس اليوم ليس حديثاً عن الأسماء بصورة تفصيلية، هو حديث عن معنى عام، فبالتالي كل انسان عشان يذوق اسم الله الغفار هو لازم يحدث توبة وندم وألم ويتوب إلى الله سبحانه وتعالى؛ رزاق لازم ينفق ويدعو الله سبحانه وتعالى أن يخلف عليه، وهكذا؛ هو لازم يعايش الاسم، ياخد الدواء وهو يكون متعلق بالسماء باسم الله الشافي: اللهم لا شافي إلا أنت، وهكذا. الإنسان ليس خلوّاً من الأقدار، ما فيش حد يا جماعة عايش خارج الكون.

لذلك لما حتى يعني أما بتروح تدعو غير المسلمين معلش أنا ده استطراد يعني، بعض الناس بينشغل بإقامة الحجة عليهم؛ يا جماعة الموضوع مش بس إقامة حجة، اللي أنت الكافر اللي انت بتكلمه ده عايش في كون الله، ده مش واحد ريستر نفسه، مش عمل ريستارت وعايش خارج الكون! ده واحد اتولد وحس بضعفه ومر بآلام ومر بأمراض واتحط في مشاكل، حاول يدور لها على حلول ما لقاش حلول، وبداخله فطرة وبداخله حاجة اسمها النزوع للمثل الأعلى، ربنا فطرها جوانا أنك دايماً حاسس أن في أعلى وأنك عايز ترقى، ده شيء فطر فيه الإنسان. فلما بيسمع كلام الوحي بيطابق فطرته، بيذكره بالآلام اللي عدى بيها، فبلاش تعتقدوا -أنت تقرأ سيرة النبي صلى الله عليه وسلم تجد أن كثير آمنوا وكثير نافقوا وكثير كفروا- ليس بسبب نقص الحجة، بسبب ضغوط اجتماعية أخرى مختلفة. فالله سبحانه وتعالى يتعرف إلينا بطرق لا تحصى، لكن العدسة بس بتاعتنا لازم تتنظف عشان نشوف، لازم ننظف وسائل الاستقبال عشان نبصر. بعض الناس يستغرب: أنا ليه لما اديت مصحف مترجم لواحد كافر قراه فاسلم؟ لأن هو مش اللحظة الحالية، هو مش لسه مولود، مش لسه جاي لكوكب الأرض، هو ربنا اللي خلقه وربنا اللي فطره وربنا اللي حاطه في ابتلاءات وحاطه في أزمات، وربنا اللي خلى جوه بحث عن سؤال المعنى، وربنا خلاه يشعر بنوع من التناقض أنه يعيش حياة بدون معنى. ربنا اللي عمل له ده، ربنا اللي قدر له ده، فأول ما بيقرا آيات تتوافق مع ما فطرته ومع الأمور اللي مر بيها خلاص بيسجد تلقائياً زي ما السحرة شافوا الآية فسجدوا تلقائياً.

فأحياناً احنا بنضيع -باقول أحياناً عشان أحترز- بنضيع وقت في إقامة الحجة والموضوع مش كده خالص. وأكبر يعني سبيل لده: اقرأ سيرة النبي صلى الله عليه وسلم، أنت تتعجب، الناس كانت بتسلم بطريقة عجيبة، مش بيقعد يقول لهم دلائل نبوتي كذا ويكتب ورايا وهوريكم. لو مش مصدق أن الإنسان ده ربنا اللي خلقه وربنا حطه في أقدار وحطه في ابتلاءات وخلى جوه نزوع للمثل الأعلى وجوه فطرة، احنا كده. فاللي عايز يتعرف على ربنا صح يستغل هذه الأمور.

أسأل الله سبحانه وتعالى أن يفقهنا في الدين وأن يعلمنا وأن يرزقنا لذة النظر إلى وجهه الكريم والشوق إلى لقائه في غير ضراء مضرة ولا فتنة مضلة. أقول قولي هذا وأستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك. السلام عليكم ورحمة الله.