دخولتسجيل الدخول

٢. الكاملة | سلسلة إلا خديجة للشيخ محمد خيري

محمد خيريالشيخ محمد خيري
  • مدة الدرس:
  • قراءة

السلام عليكم ورحمة الله وبركاته. الحمد لله رب العالمين، له الحمد الحسن والثناء الجميل، وأشهد أن لا إله إلا الله وحده لا شريك له، وأشهد أن محمداً عبده ورسوله. وبعد؛ فأسأل الله سبحانه وتعالى أن يزيننا وإياكم بزينة الإيمان، وأن يجعلني وإياكم ممن رضي بالله رباً، وبالإسلام ديناً، وبمحمد صلى الله عليه وسلم نبياً ورسولاً.

ما زال حديثنا عن أمنا خديجة رضي الله عنها يتجدد في صباح كل اثنين إن شاء الله. الكلام عنها في سلسلة أم خديجة. ابن إسحاق يقول: «كانت خديجة امرأة حازمة، شريفة، لبيبة، وكانت أوسط نساء قريش نسباً، وأعظمهن شرفاً، وأكثرهن مالاً». ويقول الإمام الذهبي: «كانت عاقلة، جليلة، دينة، مصونة، كريمة، خديجة رضي الله عنها».

الإمام النووي بيقول لما ثبت النبي صلى الله عليه وسلم في حديث: «كلا فوالله لا يخزيك الله أبداً»، قال: «أعظم دليل وأبلغ حجة على كمال خديجة، وجزالة رأيها، وقوة نفسها، وثبات قلبها، وعظم فقهها». يا سلام، عشان كده بزعل أن الستمائة دول بس اللي جايين يسمعوا النهارده! ستمائة بس جايين يسمعوا عن أمهم؟ ربنا يرزقنا الوفاء. هل تعلمون ما أعظم سرقة حدثت للمرأة في العصر الحديث؟ ليس سرقة المال ولا سرقة الحقوق، بل أرى سرقة صورتها عن نفسها، حتى إن كثيراً من النساء أصبحت لا تعرف من هي المرأة التي يريدها الله.

كل عصر يحاول أن يصنع امرأة على مقاسه؛ الجاهلية ترى المرأة متاعاً، وجاهلية اليوم تردها مشروعاً وخلاص، وسلعة يعني تستعمل لأغراض أرضية. مرة يقولون لها: لا تكوني إلا زوجة، ومرة يقولون لها: لا تحتاجي إلى زوج، ومرة يقولون لها: إن الأولاد سيقيدونك، ومرة يقولون لها: إن الأنوثة ضعف، ومرة يقولون لها: إن نجاحك الحقيقي أن تكوني نسخة من الرجل. حتى ضاعت المرأة بين أصوات كثيرة، وتناست نساء كثيرات في هذا العصر أن هناك امرأة كانت كأنها جواب الوحي على كل هذا الضجيج، اسمها خديجة رضي الله عنها.

فالنهارده مش جايين نتحدث عن مجرد سرد للسيرة وبس، لا، زي ما اتفقنا معكم في اللقاء الأول، نحتاج أن نفتح وندخل إلى بيت خديجة رضي الله عنها، ونجلس فيه قليلاً لنرى المرأة التي تزوجت قبل النبي صلى الله عليه وسلم ولم تكن ترى أن الزواج نقص وعيب. امرأة كانت ذا مال، لكنها لم تجعل الدنيا تبتلع أنوثتها وحياءها. امرأة عرفت كيف تشعر الرجل برغبتها في الحلال دون أن تهدم جدار الحياء. امرأة رزقت بأولاد كثر، لم تكن ترى أن الأمومة قيد بل رسالة. العجيب أن سبحان الله كل قضية من هذه القضايا تناقش اليوم على منصات العالم وكأنها ده اكتشاف جديد يعني! بينما سبحان الله هنجد اليوم إن شاء الله، أرجو من الله أن ربنا يوفقنا أن نعيش مع امرأة عاشت من أكثر من أربعة عشر قرناً وقدمت الإجابة كلها على هذه الأسئلة، لا بخطبة ولا بكتاب، بل بحياة عملية.

لذلك مش محتاجين ندرس خديجة لنبكي على الماضي، بل لنسترد بها الفطرة التي سرقت من كثير من نساء هذا الزمان وبيوت هذا الزمان. عاوزين نسترد الأنوثة كما أرادها الله، بعيداً عن تشويه الجاهلية قديماً وحديثاً؛ لأن العالم كلما يبتعد عن الفطرة يحتاج أن يعود إلى بيت خديجة. ففي ذلك البيت لم تكن هناك شعارات، بل كانت امرأة حقيقية كما أرادها الله: عاقلة، أنثى، زوجة، أم، صاحبة رسالة، لا تلغي جانباً مقابل جانب. خديجة رضي الله عنها هنشوف أنها مش مجرد شخصية تاريخية، ده نموذج الفطرة الأنثوية حين تبقى على ميزان الوحي والفطرة، لا على ميزان الثقافة المتقلبة أو الغالبه.

السيدة خديجة رضي الله عنها هي أم المؤمنين، بنت خويلد بن أسد بن عبد العزى. وفي أمومة وعاء فصلنا محاضرة صاحبة القصر، اللي منكم دخل أمومة عارفها، واللي منكم ما دخلش إن شاء الله أمومة كلها شهرين بإذن الله والدفعة القادمة يعلن عنها بإذن الله. فخديجة رضي الله عنها أم المؤمنين هي بنت خويلد، أمها اسمها فاطمة بنت زائدة.

رِضي الله عن خديجة. السيدة خديجة رضي الله عنها تزوجت مرتين قبل النبي، فالنبي صلى الله عليه وسلم كان الزوج الثالث. تزوجت قبل النبي صلى الله عليه وسلم رجلاً اسمه أبو هالة، وخلفت ليه هند، وهذا هند رجل وليس امرأة، هند بن أبي هالة، ربيب رسول الله صلى الله عليه وسلم، أمه خديجة. ولذلك روي عنه أنه كان يقول كلمة جميلة جداً، كان يقول: «أنا أكرم الناس أبا وأماً وأخاً وأختاً». شوفوا الجمال! ليه قال لك: أكرم الناس أبا؟ لأنه منتسب لرسول الله صلى الله عليه وسلم، وأما فأمي خديجة، وأختي فاطمة، وأخي القاسم. وكان فصيحاً بليغاً وصافاً، وصف النبي صلى الله عليه وسلم فأحسن وأتقن، سبحان الله. قيل إنه شهد بدراً، وقيل إنه لم يشهدها بل شهد أحداً وقتل يوم الجمل. وعلي كان دايماً يقول: سألت خالي هند بن أبي هالة وكان وصافاً. فده كان ابن هالة برده ولد، وقيل إن الثالث اسمه الحارث أو الطاهر على خلاف في اسمه. فده الثلاثة اللي كانوا من الزوج الثالث.

بعد كده مات، فتزوجت واحداً ثاني، مين ده؟ وهو عتيق، وخلف هند بس دي بنت بقى، وولدت له محمداً، البنت ديت اتجوزت عفواً يعني اتجوزت وولدت لصهيب اللي هو زوجها محمد. ليه قلت المعلومة ديت؟ عشان كان ليه اسم كده، محمد ده كانوا بيقولوا عليه إيه؟ ابن الطاهرة، كان يتقال عليه ابن الطاهرة، سبحان الله. بعد كده تزوجت النبي صلى الله عليه وسلم في قصة هنحكيها دلوقتي وقتي إن شاء الله.

إذن خديجة رضي الله عنها تزوجت مرتين؛ خديجة تزوجت مرتين قبل النبي صلى الله عليه وسلم، الأولاني يموت، والثاني يموت، ويبدأ أن تتزوج النبي صلى الله عليه وسلم. وهنشوف بقى الخلاف بين العلماء لما تزوجت النبي صلى الله عليه وسلم، يا ترى كان سنها كام؟ خلاف بين العلماء، وتكلمنا في الموضوع ده، قيل أربعين، وقيل خمس وأربعين، وقيل ثلاثين، وقيل ثمانية وعشرين. وأنا قلت لكم المشهور أربعين، والراجح إن شاء الله يكون ثمانية وعشرين.

السؤال: هذه امرأة دلوقتي، احنا عاوزين احنا زي ما قلنا كده أن خديجة هنتعامل معاها أن هي محطات رضي الله عنها، هذه المحطات تربينا خديجة الآن على قول أربعين سنة. تزوجت النبي على قول أربعين سنة، لو في امرأة دلوقتي تزوجت وزوجها مات أو طلقت وليها رغبة في الزواج، هل انتم حاسين وأنتم عايشين في المجتمع اللي احنا عايشين فيه دلوقتي، هل الموضوع سهل وسط عيلتها ووسط المجتمع بتاعها وكده، خاصة لو عندها أولاد، ولا بينظر ليها من نظرة مختلفة؟ شوفوا معظمكم بتقولوا إيه: أبداً بالعكس، بيبقى صعب، بيبقى يبهدلوها، أولادها مش بيوافقوا، صعب جداً، هيتكلموا عليها وحش صح، هتنتقص جداً وتنتقد.

شفتوا أنتم؟ طيب معلش يا جماعه، هو الكلام ده جه منين؟ الكلام ده ما كانش في الفطره ولا كان في العرف. وايه اللي حصل؟ هتعرفوا إن شاء الله في المقبل الميثاق على الفطرة بإذن الله، واحنا بنتكلم فيه أن أحشانا الله ييسر لنا اليوم بإذن الله، هتفهموا إيه اللي حصل. لكن أديكم أنتم متفقين أن في مشكلة، ما تقدرش. طب فما بالكم أن هي تزوجت الثاني والراجل مات، وعندها تطلع أنها تتزوج مرة أخرى.

الله، خلي بالكم بس قبل ما تجاوبوا استحضروا الآتي: استحضروا الآتي أن سيدة نساء العالمين خديجة رضي الله عنها استحضروا أنها كاملة، وأنجبت كاملة، ماشي! كاملة في الخلق والخلق، ماشي يعني على أصل فطرتها كاملة، أخلاقها كاملة، نقاؤها كامل، واختارها الله للكامل. فاهمين؟ فهذه المرأة الكامله عندها شوق للزواج، إذاً ليست جريمة أن تحتاج، صح؟

نحن نحيش في زمن أصبحت فيه بعض النساء تشعر أن الاعتراف بحاجتها إلى الزوج نقص في الكرامة، أو ضعف في الشخصية، أو أنها أقل من غيرها. العجيب يا جماعه أن الذي خلق هذا الاحتياج هو الله، فلم اللوم إذاً؟ خلق الرجال الرجل محتاجاً إلى المرأة، وخلق المرأة محتاجة إلى الرجل، كما أن الرجل يحتاج إلى طعام وشراب والمراه تحتاج إلى ذلك. فإذا بلغ الرجل وبلغت المرأة احتجنا إلى ذلك، ولم يجعل الرب جل وعلا هذا الاحتياج عيباً بل جعله الله آية من آياته: ﴿وَمِنْ آيَاتِهِ أَنْ خَلَقَ لَكُم مِّنْ أَنْفُسِكُمْ أَزْوَاجاً لِتَسْكُنُوا إِلَيْهَا﴾ [الروم: 21]، دي آية، فصارت الآية عيباً!

فصارت البنت النهارده لما والدها يقول لها: أنا مش عارف أنت هتموتي على الجواز ليه كده؟ معلش يا حاج، آية من آيات الله. كون أن حضرتك حصل لك تشويه يعني دي مش مشكلتها، دي مش مشكلة البنت؛ سواء كانت مطلقة أو أرملة أو متأخرة في الزواج أو بلغت ومتشوفة. أما تقعدوا مع البنات أربع عشرة وخمس عشرة سنة وتتكلموا في أمور يعني الإقبال على الزواج وتلاقي عندهم تشوف، ليه؟ الفطرة يا سادة! الفطرة خلاص.

طبعا الرزاز بتاع التشويش اللي حاصل ده، أوعى تكون فاكر أن هو حاصل في بيوت غير الملتزمين بس، لا ده عادي جداً، ممكن يبقى أطول لحية، وأطول نقاب، وقراءات، وإجازات، وعلوم شرعية، ومعاهد شرعية. اه، بس خلاص تلوث العقل، لا، مش معنى اللي أنت بتدعي أن أنت فاهم في العلم الشرعي أنك على الفطرة، لا، عادي جداً ممكن يكون.

الشاهد أن الاحتياج ليس ضعفا، وإنما هو فطرة. فخديجة أمنا رضي الله عنها كسرت هذا الوهم، أمنا لم تعش زوجة واحدة طوال حياتها، يعني ما كانتش الوحيدة، تزوجت قبل النبي مرتين، لم يمنعها الحياء، ولم يمنعها كلام الناس، ولم يمنعها أنها امرأة ذات مكانة وشرف ومال، عارفين ليه؟ لأنها كانت تعلم بفطرتها أن هذا يكملها ويسعدها وتكتمل به. فلما مات زوجها الثاني ما قالتش: أنا لن أتزوج مرة أخرى عشان الناس ما يتكلموش، واخدين بالكم؟ بل بقي باب الزواج عندها مفتوحاً، حتى اختارت رسول الله صلى الله عليه وسلم. وكانت سيرتها بتقول لكل امرأة: ليس عيباً أن تحتاجي، العيب أن تحاربي فطرتك.

والاسلام ما بيطلبش من المرأة أنها تميت قلبها، بعض المجتمعات تريد من الفتاة أن تصبح حجرة، لا تشتاق، لا ترغب، لا تبحث عن زوج، لا تظهر أي احتياج. ولما تغلط في الطريق بعد سنوات من الكبت يتعجبون! بينما الإسلام جاء بطريق شريف كريم: إن احتجت تطلب الحلال، وإن رغبت فترغب فيما أحل الله. ولهذا والد المرأة في قص شعيب في قصة زواج موسى قالت إحدى البنات: ﴿يَا أَبَتِ اسْتَأْجِرْهُ﴾ [القصص: 26]. لم يعاتبها القرآن على أنها رأت الرجل المناسب.

ففي رسالة للأولياء في بداية القصة بنقول: أيها الآباء، ليست البطولة أن تغلقوا كل الأبواب، وليست الغيرة أن تؤخروا الزواج سنوات بلا سبب، وليست الحكمة أنكم تقولوا: لسه صغيرة خليها تكمل لسه بدري. القلب بيكبر، والاحتياج بيكبر، وصدقني والفتنة بيكبر، فمن أعظم صور الرحمة ببناتكم أن تعينوا فطرتها على الطريق الحلال. ورسالة للبنات: أوعي تخجلي من فطرتك، لا تعتذري عن احتياج خلقه الله فيك، لا تجعلي الثقافة الغالبه الحديثة تقنعك أن الاستغناء عن الزواج هو قمة القوة. الأنبياء تزوجوا، الصالحات تزوجن، أمهات المؤمنين تزوجن، ولم يكن الزواج أبداً تنازلاً عن كرامة، بل كان طريقاً إلى الاستقامة والسكينة.

فلو كانت الحاجة للزواج نقصاً لما خلق الله حواء لادم وهو في الجنة. سيدنا آدم في الجنة وفي النعيم، ومع ذلك قال: ﴿لِيَسْكُنَ إِلَيْهَا﴾ [الأعراف: 189]. فإذا كان سيدنا آدم احتاج إلى زوجة وهو في الجنة، فكيف نستكثر على فتاة في الأرض أن تحتاج إلى زوج؟ ليس العيب في الاحتياج، العيب أن نجعل الناس يخجلون من فطرة شرفها الله ونلومهم. تبحث الفطرة دي عن منقذ خارج إطار الضابط الشرعي.

طبعا الباب ده عشان أنا عارف أن في بعض الناس يقول: يا شيخ بس بالضوابط، ويا شيخ مش عارف إيه، وعلى أساس أن أنا قاعد أمال أقول بما أحل الله وفي الإطار الحلال أن دي مش اسمها الضوابط! فهيجي معانا أكثر بوضوح إن شاء الله. هنا تتجلى عظمه أمنا خديجة رضي الله عنها أن هي ما زالت على الفطرة، هي بتعلم الأمة كلها أن الفطرة إذا وجهت إلى الحلال كانت نوراً، وإذا كبتت أو حوربت تحولت إلى باب من أبواب المعاناة والفتنة، نسال الله العفو والعافية.

نرجع لسيرة السيدة خديجة. السيدة خديجة ورثت مالاً، ولما ورثت المال لم تجد من يتاجر لها في هذا المال إلا حكيم بن حزم. وحكيم ده يقرب لها إيه؟ أو هي تقرب له إيه؟ حكيم بن حزام السيدة خديجة تقرب له إيه؟ عمته، أحسنتم! ماشي، فهو ابن أخيها. فكان بيتاجر في المال بتاعها، فكانت بتتاجر معها. وده ملمح مهم جداً، عشان اللي بيستعملوا قصة السيدة خديجة في اتجاه ثاني ويقولوا كذا: سيدة خديجة في الجاهلية، مش في الإسلام، في الجاهلية كانت بتعمل إيه؟ مالها مع مين؟ مع ابن أخيها، خلاص، مع ابن أخيها، وأحياناً كانت مع أحد يعني من أعمامها.

فإذن في الدائرة دائرة المحرمية، ومع ذلك خديجة رضي الله عنها يقول ابن إسحاق: «كانت امرأة تاجرة، ذات شرف ومال، تستأجر الرجال في مالها تضاربهم إياه بشيء تجعله». المضاربة اللي هي أن مثلاً في واحد معه فلوس فيقول لك: إيه بعد أذنك ممكن تدر أنت تتاجر في الفلوس، وأنا إن شاء الله هديك أنت بالمجهود وأنا بالمال، دي صورة من الصور أو ممكن تبقى.

مشاركة، قد يدخل أحدهم بجزء لكن عمومًا هذا يتاجر بماله، وهذا يتاجر بمجهوده، ويبقى له قدر معين من الربح. كانت قريش مليئة بقوم التجار، فهي كانت تتاجر، فطبيعة أي تاجر يحافظ على ماله، ومن المحافظة أن يسلم هذا المال لناس معينين. في ذلك الوقت كان النبي صلى الله عليه وسلم قد بدأ يُعرف بصدق حديثه، وعظم أمانته، وكرم أخلاقه، فبعثت إليه وعرضت عليه أن يخرج في مالها إلى الشام تاجرًا، وقالت له: أنا عندي استعداد أن أتاجر برضى، وأن تأخذ مالاً وأئتمنك عليه. فأعطته أفضل ما كانت تعطي غيره من التجار، وأرسلت غلامًا لها اسمه ميسرة، فالنبي صلى الله عليه وسلم قبل وخرج في مالها، وخرج معها الغلام ميسرة حتى قدم الشام، ونزل النبي صلى الله عليه وسلم معه في التجارة.

في يوم من الأيام قعد النبي صلى الله عليه وسلم في ظل شجرة، ابن إسحاق وغيره في السيرة يقول إن الرجل هذا كان بجانبها صومعة راهب، فالراهب هذا طلع يتكلم مع ميسرة، قال له: من هذا؟ قال له: فلان، هذا رجل من قريش من أهل الحرم، قال له الراهب: ما نزل تحت هذه الشجرة قط إلا نبي. فبدأ ميسرة يكون رؤية عن هذه الشخصية، ويشوف تجارته، ويشوف قد إيه هو ربح مرابحة غير عادية. المهم، قيل إن النبي صلى الله عليه وسلم خرج ما يقرب من أربع مرات في التجارة، مرة إلى الشام، ومرة إلى سوق اسمه حباشا، ومرة إلى مدينة جرش. وهنا سنبدأ نقف وقفة، ما هي هذه الوقفة؟

هل السيدة خديجة كانت تاجرة فقط؟ عشان ده السؤال اللي دائمًا بنُسأل له، وقلنا سنتطرق إليه، هل السؤال الصح هل كانت تاجرة أم كيف كانت تتاجر؟ أيهما السؤال الأوفق؟ السؤال الأوفق: كيف كانت تتاجر؟ خديجة تاجرت تجارة لم تسقط أنوثتها. لما بيسمع بعض الناس أن خديجة رضي الله عنها كانت تاجرة، الصحيح أنها كانت تتاجر بمالها؛ لأن بعض الناس أول ما نقول أو يسمع الموضوع ده، يتخيل على طول امرأة تجوب الأسواق.

زي ما نقول مثلاً رفيدة رضي الله عنها، رفيدة هذه كانت أحيانًا تعالج الجرحى في المعارك، فيجي واحد يقول لك رفيدة هذه أول طبيبة في الإسلام، فبنت في أولى ثانوي تسمع أول طبيبة في الإسلام، تفتكري مين؟ تفتكري عمتك ندى، ولا بنت خالة فلانة، بتعمل إيه فلانة دي؟ مطحونة طول حياتها، وتذاكر، وطالعة الأولى في المدارس وفي الحضانة طالعة الأولى، وفي المدرسة طالعة الأولى، ودخلت مدارس مش عارف إنتر إيه عشان تطلع في الآخر خالص بطريقة معينة، وبعدين دخلت إعدادي وطلعت الأولى، وبعد كده الثانوية دخلت الأولى، وكانت في الثانوية حتى ما بتعملش لنفسها كوباية مية، ليه؟ عشان تصنيف العلم يا شيخ، لا، الموضوع ده.

فما الذي حصل؟ فدخلت الطب، ولما دخلت الطب خلاص طبعًا والدها مش هيدخلها الطب الشعبي، فدخلها جامعة خاصة تليق بها، ولما دخلت الجامعة الخاصة هذه في وسط الكوكبة المختلطة هذه، ما الذي حصل؟ بدأت تنهش في هذه الحياة سبع ثمان سنين، ولما كانت بترتب على الدفعة، الدكتورة قد الدنيا اللي هي مش جايبة جناح بعوضة، فلما كبرت قوي وبتاع، وطبعًا كانت عشان تخدم المسلمين طبعًا ما ننساش أن هو ده كان في ذهنها، وبدأت بقى حياتها كلها فين؟ مكفية على الكتاب ومكفية على القصة هذه كلها، وممكن نغير مكاننا من مكان لمكان عشان بنتنا تجيد الصرح اللي هي بتعمله ده، عشان ده هيشرفها في قبرها وهيشرفها بين يدي الله سبحانه وتعالى، فهي قاعدة مشغولة بالموضوع ده.

فأنت قاعدة تتخيلي بنت خالك ومش عارف يقول الكلام ده كله، وتبصي أنت على ندى ورحاب ونهلة، وتشوفي الناس دول كلهم هم دول النموذج اللي أنت منبهرة به، هو ده الطين. فلما دخلت الكلية وبدأت تدخل كذا، وبدأ يبقى فيه نبطشيات، وطبعًا النبطشيات عاوزه تعمل إيه؟ ومأخرة الإنجاب ومأخرة الجواز، وبعد ما اتجوزت بدأت تأخر الإنجاب عشان ما يعطلهاش عن رحلة الماجستير وبعدين الدكتوراه، وكل ده وتروح وعادي جدًا، ويبقى عندها نبطشية 24 ساعة، وبعد كده تفتح مش عارف إيه وتعمل إيه والزمالة إيه والقصة هذه كلها.

فأنت تكوني فاكرة أن رفيدة كانت برضه زمان كده، دخلت حضانة خيبر، وبعد كده لما دخلت المدارس دخلت مدارس الطائف، وبعد كده لما طلعت من مدارس الطائف بدأت تحضر حاجة كذا عند وراء جبل أحد ومش عارف إيه مستشفاك، فبدأت أنت تستحضري، استحضار أنها قاعدة تتعلم مع عتبة بن أبي شيبة والقصة هذه كلها، فلما كبرت خلاص وخدت الدكتوراه من عند حي بن أخطب، افتكرت أنها بقت رفيدة، وكانت بتسيب بيتها كل الفترات هذه كلها يوميًا بال 12 ساعة رايحة جاية، وتركب الإبل بدل ما تركب الأوبل. فتتخيلي الاخت لما تسمع ده أن هي دي اسمها رفيدة الطبيبة، لا، المفهوم ده له دلالات عصرية غير الدلالات القديمة.

فلما تيجي تقول تجارة، أحيانًا بيشوفوا السيدة خديجة عبارة عن امرأة قاعدة تجوب في الأسواق، وبتفاوض التجار، وبتسافر مع القوافل، وقاعدة تختلط بالرجال صباح مساء، ده تصور وهمي في ذهن حضرتك. هي كانت تملك المال لكنها لم تجعل المال يملكها، كانت تدير تجارة لكنها لم تجعل التجارة تعيد تشكيل فطرتها، كانت بتستثمر المال لكن لا تباشر الرجال، كانت بتمول التجارة لكن لا تجوب الأسواق، كانت بتختار الأمناء وتوكل إليهم البيع والشراء، واخدين بالكم؟ ونحن نتكلم في امرأة في الجاهلية، يعني حتى أي ملمح أنت عاوز كمان تستمسك فيه، ده في الجاهلية، فحتى إن النبي صلى الله عليه وسلم قبل البعثة خرج في تجارتها ولم تكن هي التي خرجت معه. فهي أدركت أن فيه فرقًا بين امتلاك المشروع وبين مباشرة كل تفاصيله، فيه فرق كبير جدًا.

إذا خديجة رضي الله عنها لم تكن سيدة أعمال بالمفهوم المعاصر، اليوم بيقدم النجاح للمرأة أحيانًا بصورة قاصرة ومغلقة، أنها تكون في كل اجتماع، في كل رحلة، في كل مؤتمر، في كل تفاوض، في كل سوق، واخدين بالكم، وكان النجاح لا يتحقق إلا إذا عاشت حياة الرجال نفسها. أما السيدة خديجة رضي الله عنها قدمت نموذجًا مختلفًا، طبعًا في ناس دلوقتي قاعدين يقولوا الشيخ بيحرم العمل، وأخوات ثانيات تقول إن الشيخ حرم الطب، وأخوات ثالثات يقلن حسبي الله ونعم الوكيل، يعني احنا كدة كلنا غلط، آه كل الثلاث أخوات دول أنا ماليش دعوة بيهم، أنا مش في الحتة دي وما قلتش كدة.

خلاص، كون أنك مش قائلة أذكار الصباح والمساء ومش مصالية الفجر وأنت مركزة، ده موضوع خاص بك أنت، ماشي، الكلام ده برضه اللي دخل أمومة فاهم كويس قوي الكلام ده، يعني اتكلمنا فيه بوضوح في يمكن ثمان لقاءات بالتفصيل، فاحنا مش هنا، فخليك معانا هنا. فخديجة رضي الله عنها قدمت نموذجًا مختلفًا، امرأة ناجحة، لكن نجاح لم ينتزع منها السكينة، امرأة ثرية، لكن ثراءها لم يخرجها من وقارها. الإسلام في المجمل لا يحارب عمل المرأة في المطلق، لكن بيحفظ أولوياتها. الإسلام ما بيقولش للمرأة لا تملكي، ولا بيقول لها لا تستثمري، ولا بيقول لها لا تنجحي، إنما سؤال الإسلام: بأي طريق؟ هل الطريق ده يحفظ دينك وحياءك ورسالتك، أم يجعلها تدفع ثمن النجاح ده من أنوثتها وسكينتها وأسرتها؟ فليست القضية في أصل العمل، بل في الصورة التي يمارس بها العمل.

سيدة خديجة رضي الله عنها هنا اختارت الطريق الحكيم الأوسط، الطريق الموفق، ما عملتش أحد الطرفين، ما جمدتش مالها لغاية ما يضيع وتركته كدة يترك لغاية ما يروح، واخدين بالكم، ولم تجعل نفسها هي التي تخوض كل الأسواق، بل اختارت الطريق الأوسط، أنها تحرك المال ويبقى الوقار، تستثمر ويبقى الحياء، تنجح وتظل امرأة. فمن أجمل ما نتعلمه من الموقف ده من خديجة، أن فطرة المرأة، وأن الإسلام جاء وأكد الفكرة دي، لا يريد من المرأة أن تكون نسخة من الرجل، كما لا يريد للرجل أن يكون نسخة من المرأة، كل واحد منهم عنده مساحة تتناسب مع فطرته.

قوة خديجة رضي الله عنها من ساعة ما هتعرفوا بداية القصة إلى نهايتها، هتاخدوا بالكم من الملمح ده، أنها لم تحاول أن تثبت أنها تستطيع أن تفعل ما يفعله الرجال، أثبتت أنها تستطيع أن توفق وتنجح وهي باقية على طبيعتها، والكلام ده تعرفوه إن شاء الله، هتعرفوا ملمحًا منه كبيرًا في هذا اللقاء إن شاء الله. فالأصل أن المرأة تختار من صور العمل ما ينسجم مع فطرتها ويصون حياءها ويحقق مصلحتها، لأن يجعل الخروج الدائم ومخالطة الرجال هو معيار النجاح.

بعد كده السيدة خديجة رضي الله عنها لما شافت المواصفات دي، كان فيه واحدة اسمها نفيسة صديقة لها، وقبل نفيسة السيدة خديجة لها أخت، حد عارف أختها اسمها إيه؟ السيدة خديجة رضي الله عنها لها أخت اسمها هالة، ماشي، اللهم هالة، سنعلق على حديث اللهم هالة ده قريبًا إن شاء الله، عمار بيحكي لينا، بيقول إيه في يوم من الأيام قالت هالة لعمار: أما لصاحبك هذا من حاجة في تزويج خديجة؟ شايفين الموضوع ماشي إزاي؟ بتقول له إيه هو صاحبك مش عنده استعداد يتزوج خديجة؟ فقال عمار: فرجعت إليه فأخبرته فقال: بلى لعمري، آه عندي استعداد، فذكرت لها ذلك. فده كان ملمح.

الملمح الثاني أن السيدة خديجة لها صديقة اسمها نفيسة، قالت: نفيسة هذه بتقول كانت خديجة رضي الله عنها حازمة، جلدة، شريفة، مع ما أراد الله بها من الكرامة والخير، وهي يومئذ أوسط قريش نسبًا، وأعظمهم شرفًا، وأكثرهم مالاً، وكل قومها كان حريصًا على نكاحها لو قدر على ذلك، سبحان الله، وقد طلبوا وبذلوا لها الأموال، تقول: فأرسلتني دسيسًا، الدسيس من يُرسل سرًا ليأتي بالأخبار، فأرسلتني دسيسًا إلى محمد بعد أن رجع في عيرها من الشام، فقلت: يا محمد، ما يمنعك أن تتزوج؟ فقال: ما بيدي ما أتزوج به. فقلت: فإن كفيت ذلك، ودعيت إلى الجمال والمال والشرف والكفاءة، ألا تجيب؟ نفيسة هذه إيه نفيسة فعلاً في كلامها هي بخت، فإن كفيت ذلك ودعيت إلى الجمال والمال والشرف والكفاءة ألا تجيب؟ فقال: فمن هي؟ قلت: خديجة، قال: وكيف لي بذلك؟ قالت: عليَّ، لا، الموضوع ده بقى عليَّ أنا بقى، ده يخصني أنا، فقال: فأنا أفعل. فذهبت فأخبرته، فأرسلت إليه، أرسلت إليه أن ائتِ لساعة كذا وكذا، وأرسلت إلى عمها عمرو بن أسد ليزوجها، فحضر، ودخل النبي في عمومته فزوجه أحدهم، وفي رواية أن السيدة خديجة رضي الله عنها لما حدث ما حدث، في رواية ابن سعد في الطبقات، لما تأكدت من نفسها، عرضت ما في نفسها من رغبة في الزواج من النبي صلى الله عليه وسلم، أن هي تكلمت مع النبي صلى الله عليه وسلم وعرضت بالزواج، ولمحت من النبي صلى الله عليه وسلم، وقالت له كلمة جميلة جدًا، قالت: يا ابن عم، إني قد رغبت فيك لقرابتك، ووسطتك في قومك. يعني رزانتك في قومك، وأمانتك، وحسن خلقك، وصدق حديثك. شوفوا يا جماعة معايير الاختيار، معايير الاختيار هي إيه؟ مش والله أنا شفتك في الجامعة فارتحت لك قوي، أصل أنا سمعت صوت حضرتك في درس فانشرح صدري، لا يا جماعة ركزوا، هي بتقول إيه: وأمانتك، وحسن خلقك، وصدق حديثك، ثم عرضت عليه نفسها، ده بيحكيه ابن إسحاق.

طبعًا أنا عارف أن فيه 662000 سؤال في عقول البعض دلوقتي، قبل ما نخش في ونُجيب على أسئلتهم، تعالوا نروح كده نفتح كتاب الإمام البخاري عشان نقرأ فيه باب، سماه: «باب عرض المرأة نفسها على الرجل الصالح». يا ربي، هي فيه واحدة تعمل كده؟ يا عم اسمع، مش أنت بتتحرك طبقًا لدين ولا لدنيا؟ نسمع نشوف المسألة هذه إيه، هل صح ولا غلط، وهل بشروط ولا لا، وهل لها ضوابط ولا لا؟ خلونا نسمع.

أورد الإمام البخاري من حديث ثابت البناني قال: كنت عند أنس، شوفوا يا جماعة لن تجدوا شيئًا يحترم وينسجم مع فطرتكم مثل وحي ربكم، أجمل ما في الإسلام أنه منسجم ويمتزج مع الفطرة امتزاجًا، ماشي، بس نفهم الفطرة صح. ثابت البناني بيقول: كنت عند أنس رضي الله عنه وعنده ابنة له، طبعًا ثابت ده كان كل شوية يحب يبوس ما بين عيني أنس، يقوم يبوس كذا، يقبل ما بين جبينه ويقول: أقبل عينًا رأت رسول الله صلى الله عليه وسلم، فثابت ده ثابت في المحبة، واخدين بالكم، وكان يقول: اللهم إن كنت جعلت لأحد أن يصلي في قبره، فاجعلني أنا أصلي في قبره. فثابت رضي الله عنه يقول: كنت عند أنس رضي الله عنه وعنده ابنة له، فقال أنس: جاءت امرأة إلى رسول الله صلى الله عليه وسلم تعرض عليه نفسها، قالت: يا رسول الله، ألك بي حاجة؟ فقالت بنت أنس، بنت أنس هذه متربية بقى تربية عالية قوي: ما أقل حياءها! وا سوأتاه! يا على الإحراج، إيه السوء اللي عملته ده؟ فقال أنس، المتربي من خير مربٍ: ...

هي خير منك. يا سلام على الجمال، ناس فاهمة الدنيا، سالكة معاهم. كان أنس يقول لها: مش أنا اللي مربيك يا بنتي؟ ده أنا اللي مربيكي، يعني مفترض كده أقوم أقول إيه، يا سلام على بنتي وأسقف لك، صح أنا اللي مربيكي، وأنا عارف إني فاتني حتة في التربية إني كنت أربيك إن المعنى ده ما فيهوش مشكلة.

قال: هي خير منك. رغبت في رسول الله صلى الله عليه وسلم. الحافظ ابن حجر في فتح الباري يقول: وفي الحديث جواز عرض المرأة نفسها على الرجل، وتعريف رغبته فيها، ولا غضاضة عليها في ذلك. والإمام العيني، وهذا شارح صحيح البخاري، يقول في حديث أنس لما قال: هي خير منك؛ قال فيه دليل على جواز عرض المرأة نفسها على الرجل الصالح، وتعريف رغبتها فيه لصلاحه وفضله، أو لعلمه وشرفه، أو لخصال من خصال الدين، وأنه لا عار عليها في ذلك، بل يدل على فضلها. وبنت أنس نظرت إلى ظاهر الصورة ولم تدرك هذا المعنى حتى قال أنس: هي خير منك. وأما التي تعرض نفسها على الرجل لأجل غرض من الأغراض الدنيوية، فأقبح ما يكون من الأمر وأفضحه.

والأفضل في هذا الزمان أن المرأة تلمح لوليها برغبتها بالزواج من الرجل الصالح الموثوق بدينه وخلقه، دون التصريح للزوج بذلك للزواج. وهل هذا عيب في الوقت ده؟ المجتمع هو اللي المفروض المجتمع يتهذب بالإسلام، مش المجتمع هو اللي يهذب الإسلام. دي نقطة مهمة جداً؛ الإسلام لما جه عشان يهذب المجتمع، مش عشان المجتمع اللي يقول للإسلام أعرض عليا وأقول لك نختار إيه وما نختارش إيه. الجملة دي خطيرة. فما فيش حاجة زي كده إن الإسلام سمح للمرأة الأرملة تتزوج، ما يجيش واحد يقول لك: أصل ده عيب؛ آه ده عيب عرفي لا يهذب الإسلام. واخدين بالكم؟ فخلي بالكم.

المرأة قالت عن سيدنا موسى لأبيها: ﴿يَا أَبَتِ اسْتَأْجِرْهُ﴾ [القصص: 26]. القرطبي يعلق على هذا الأمر ويقول: وفيه عرض الولي ابنته على الرجل، وهذه سنة قائمة؛ عرض صالح مدين ابنته على صالح بني إسرائيل، وعرض عمر رضي الله عنه ابنته حفصة على أبي بكر وعثمان، وعرضت الموهوبة نفسها على النبي صلى الله عليه وسلم. يقول: فمن الحسن عرض الرجل وليته والمرأة نفسها على الرجل الصالح اقتداءً بالسلف الصالح. قال ابن عمر: لما تأيمت حفصة قال عمر لعثمان: إن شئت أنكحتك حفصة بنت عمر.

لكن مهم التنبيه أن أكثر ما يقع الآن من ميل المرأة إلى رجل معين يكون بأسباب محرمة، كالتساهل في الكلام والجلوس معه والحاجات دي كلها. فخلي بالكم من الباب ده، عشان الباب ده ممكن كتير يأخذوه في اتجاه معين. طيب لو في حد كده لازم يعمل إيه؟ بنقول: تجنبوا المراسلة المباشرة معه قدر الإمكان، ممكن من خلال هاتف غير معروف، وتبعث رسالة واضحة جداً كأنها من شخص يعرف الطرفين؛ ده أفضل من المواجهة المباشرة.

الأمر الثاني، لماذا تقول الكلام ده؟ ما تقول أبوها أو أحد محارمها؟ هو ده الأصل وأنا قلته من شوية، ده الأفضل. لكن يا جماعة الخير كثير من المحارم لا يستوعبوا هذا الكلام ويرفضوه وممكن يصلبوها في ميدان عام عكس اتجاه القبلة، وأنتم عارفين كده كويس. ماشي، فخلونا نكون واقعيين ونقول الدين، ونفتح الأبواب للجميع. اللي عندها أخ زي عمر رضي الله عنه، أو أب زي عمر، أو عندها أخ زي عبد الله بن عمر، أو عندها كذا؛ يطلب هو اللي، ليه تروح هي تتكلم؟ فده معنى مهم جداً.

الأمر الثاني: لا ينبغي لك في حال القيام بالمراسلة أن تطلقي العنان للكلمات والمراسلات؛ أجيزت المراسلة لأمر معين. فالمراسلات الكثيرة تودي للفتنة سواء ليكي أو لي. يفضل أن لو ده تم ما تروحوش تقولوا لحد وسيط: أنا بعثت رسالة وكده؛ ليه؟ ربما أن هذا الوسيط يفسد أكثر مما يصلح. قد لا يكون ظرف الرجل مناسباً للزواج أو يكون خاطباً ولا يريد تعدد، فلو علمت الأخت ذلك لا تكرر ولا تبعث؛ ليه؟ لأن مقصود المراسلة قد حصل خلاص، إن عرضت وعرفت الإيجابية. وإن لم يقدر الله سبحانه وتعالى ممنوع التعلق؛ لأن خطورة التعلق ده تشغل عن طاعة الله وحفظ القرآن، وطبعاً الاستخارة قبل الإقدام على هذا الأمر.

ليه بقول الكلام ده؟ لأن أنا اتفقت معاكم أن السلسلة تكون واقعية بقدر الإمكان، وبدون ما نضحك على أنفسنا وندفن رأسنا في الرمال، خاصة مع عجز الوصول لكثير من الشباب اللي ممكن يكون فيه خير ويروح للبنات دول. عندنا النهارده ملايين ما يعرفوش ناس صالحين، ويقول لك: أنا بنتي دلوقتي عندها 30، أنا لسه شايف دلوقتي إن في حد كاتب عنده ثلاث بنات وما فيش حد بيجي والكلام ده كله. فالأم دي أو الأب اللي كتب ده، لو شاف واحد صالح، وشاف واحد صالح بيصلي معاه في المسجد وسأل عنه؛ إن هو يروح يعرض، أين الخطأ هنا؟ أين الإشكال الشرعي هنا؟ المهم.

فالسيدة خديجة رضي الله عنها ماذا حدث؟ احنا شفنا طلبت إزاي، هنا الملمح ده مهم جداً بقى إن إحنا نتكلم فيه. أنا مش عاوز أتكلم عن مجرد إن ده جائز ولا مش جائز، عاوز أتكلم على ملمح ثاني هو موضوع الفطرة يا جماعة، بين الإفراط والتفريط، بين الباب المغلق وباب الجدار. من أعجب ما يفعله الكثير لا يقف في المنتصف؛ فإذا جاء الحديث عن رغبة المرأة في الزواج تلاقي الناس انقسموا لقسمين: فريق يقول لا يجوز أنها تبدي رغبة ولا أنها تلمح ولا أنها تشعر أحداً، ولو بعض الآباء عرف أن بنته دخلت جروب -جروب اللي هو التطبيقات ديت التي تكتب عشان تيسير الزواج، تكتب صفاتها ومواصفات اللي هي تتمنى ترتبط بيه- ياه ده ممكن يعلقها يشنقها. سبحان الله! ففي فريق مذهبه كده النفسي: ممنوع البنت تبدي رغبة، ممنوع تلمح، ممنوع تشعر أحداً، ولو بقيت سنوات تنتظر؛ حتى جعلوا الحياء سجناً.

فريق بقى على الناحية الثانية عمل إيه؟ فتح الباب على مصراعيه؛ زمالات ورسائل خاصة واختلاطات وعلاقات طويلة وحديث يومي وتعارُف، ويقول لك صح نبحث عن الزواج؛ فصار البحث عن الحلال يمر من أبواب لا ترضي الله سبحانه وتعالى. أما الإسلام فجماله لم يغلق الباب ولم يكسر الجدار. خديجة رضي الله عنها فتحت الباب لكنها لم تكسر الحياء. قيل إنها حدثت، زي ما قلت لكم كده، نفيسة كلمت، وفين لما هي اتكلمت؛ فالفكرة أن كان عندها رغبة واضحة لكن طريقها كان نقياً تقياً.

الإسلام بيعترف بالفطرة، آه طبعاً، لكن إيه؟ وضع ليها إطار تهذيبي. الإسلام لا يقول للمرأة إذا رغبت في الزواج فاكتمي ذلك حتى تموتي، ماشي الإسلام ما بيقولش كده، لكن بيقول ولا بيقول لها برده روحي ابني علاقتك بنفسك لغاية ما تلاقي الزوج المناسب؛ بل يقول: اجعلي دائماً الطريق شريفا كما أن الغاية شريفة. قد يكون عبر ولي، قد يكون عبر امرأة صالحة، قد يكون عبر أهل الخير، قد يكون خلال تطبيقات. طيب فقدت كل هذه الوسائل؟ قد يكون بتصريح كريم إذا وجدت الظروف المناسبة وانتفت الريبة، وليس ثم أي تعدي شرعي في أي حاجة؛ بدون خلوة، بدون تعلق عاطفي، بدون استرسال في حديث، بدون قصة التعارف والكلام ده.

الحياء: في فرق بين الحياء وبين العجز يا جماعة، بين العفة وبين الكبت. خديجة رضي الله عنها كانت شديدة الحياء، لكن حياءها لم يمنعها من اتخاذ قرار غير تاريخ البشرية؛ لو بقيت تقول أصل ممكن حد يقول، أصل ممكن كده، النفيسة تسيء الظن، ممكن؛ لما قامت تلك الأسرة خرج منها كل هذا النور. فالحياء لا يمنع الإنسان من طلب الخير، إنما يمنعه من طلبه بطريق لا يليق.

السؤال: هل هدفي من هذا التعليق أن أفتح الباب أن كله يعمل كده؟ الإجابة: لا، ولا، وألف لا. أمال بتقول الكلام ده ليه؟ لأمرين: الأمر الأولاني أن في بعض الناس ظروفه مش قدامه إلا الخط ده. والحاجة الثانية، نقول للأولياء ونقول للأمهات أن ممكن تكوني أنتِ الوسيطة، أن تساعدي بنتك أو أختك لهذا الأمر، وده ليس فيه أي شوب ولا مشكلة، ولا فيه أي سوء. المهم أن ربنا يرزقك واحد صالح تقي عاقل يفهم الموضوع ده في سياقه، ما لقيتوش يبقى ما تستعملوش الوسيلة دي.

ليس في ديننا شيء نخفيه، ما فيش حاجة يا جماعة تستخبى، مش عاوزين ديننا دين للعالمين نذيراً، فمش هنخبي إحنا حاجة. يعني هم يتكلموا في الحرام ويتكلموا في كذا وكذا، ونسيبها وهي تبقى في ذهنها بتقول أنا بعمل عادي، ما هو ده موجود في الإسلام، لا هو موجود بالضوابط ديت. واخدين بالكم؟ فعاوزين يا جماعة الخير نرحم المكلومين، وفي نفس الوقت نفتح ليهم الأبواب التي فتحها أرحم الراحمين، ولن نجد أحداً أغير أبداً.

يعني خلوني بقى إيه أقرأ لكم رسالة كده جت لي دلوقتي: أخي عرضني على صديقه وتزوجنا منذ 42 سنة، وقد أكرمني وهو خير لأهله. شوفوا الجمال بقى، قولوا اللهم بارك يا جماعة، قولوا اللهم بارك. ما إحنا شوفوا الجمال ده، ما هو ده جمال تطبيق، سبحان الله. تخيلوا بقى لو ده استجاب لـ "لا، وديت أنا كده بكسر أختي ومش عارف إيه" والكلام ده كله. طبعاً أنا لو عملت استمارة دلوقتي وقلت اللي عرضوا قبل كده وعملوا الوسيلة دي وبيوتهم قد إيه مستقرة وعدى عليهم خمس سنين، أنا بقول لكم هنلاقي عالم كتير يعني.

فرسالة للآباء والأمهات: أغلقوا أبواب الفتنة لكن لا تغلقوا أبواب الحلال، كونوا أنتم الجسر. إذا علم الأب وعلمت الأم وعلمت الأسرة أن بنتهم وجدت رجلاً صالحاً، فليكن البيت هو الذي يتحرك؛ وجدت يا جماعة، مش راحت اتكلمت معاه والكلام ده، لا، ده أخو صاحبتها في الجامعة، عرفت أن في واحد مش عارف إيه، كده يعني؛ عشان بس كلمة "وجدت" دي ما حدش ياخدها ويوديها في حتة تانية. فليكن البيت هو الذي يتحرك حتى لا تضطر الفطرة أن تبحث وحدها.

احفظوا الكلام اللي هقوله ده وأرجو من الله أن يكون له صدى خير عندكم إلى الآباء والأمهات والإخوة والأخوات، اللي هم ممكن يساعدوا في حاجة زي كده: البيوت التي تسهل الحلال هي أكثر البيوت إغلاقاً للحرام، البيوت التي تسهل الحلال هي أكثر البيوت إغلاقاً للحرام. السيدة خديجة رضي الله عنها لم تكن فتاة بتلاحق الرجال حاشاها، كما أنها لم تكن امرأة تستحي من فطرتها؛ كانت تعرف ماذا تريد.

آدي حد اهو بيقول: أنا فعلت هذا الأمر على ابنتي وبفضل الله تزوجوا ومعهم ثلاثة من الأولاد وبقى لهم 14 سنة. اللهم بارك، اللهم بارك، ربنا يزيدهم مودة ورحمة وسكينة. السيدة خديجة رضي الله عنها لم تكن فتاة تلاحق الرجال ومع ذلك هي برضه كانت امرأة لا تستحي من فطرتها، كانت تعرف ماذا تريد ولكن تعرف كيف تطلبه بالضوابط التي تنسجم مع فطرتها وما تبقى من آثار ملة الخليل.

ليست البطولة أن نغلق كل باب حتى تختنق الفطرة، وليست الحرية أننا نهدم كل باب حتى تدخل الفتنة. البطولة والتوفيق أن إحنا نبني أبواباً للحلال يدخل منها المحتاج، ويظل الحياء واقفاً على العتبة يحرص الطريق. سامحونا بقى هنكمل كمان 10 دقائق ماشي؟ ولو طولت عن 10 دقائق هديكم إجازة اللقاء القادم إن شاء الله.

من الحاجات الجميلة أن السيدة خديجة علمتنا في القصة دي مشهداً جميلاً في معايير الاختيار؛ لأن إحنا بنعاني أزمة في حسن الاختيار، وده هتلاقوه إن شاء الله في الدفعة القادمة، وباذن الله في تفاصيل أكثر وأكثر في الدفعة اللي بعدها، لكن عشان أنا فعلاً عاوز أعملها في صورة كتيب كده فمش هألحق في الدفعة ديت، لكن إن شاء الله أرجو من الله أن يوفقني للدفعة القادمة إن شاء الله. كم من فتاة اختارت لأنها أعجبت بصورة، وشاب اختار لأنه أعجب بشكل وكلام وخلاص، وبعدين اكتشف كل واحد منهم أنه ما يعرفش يختار. خديجة رضي الله عنها لم تكن تبحث عن زوج فقط، كانت تبحث عن أب لأولادها وشريك لرسالتها وصاحب خلق إذا اشتدت الأيام؛ لذلك ما اختارتش بعينها، اختارت بعقلها، والأجمل أنها لم تكتفِ بالاختيار.

بل أحسنتِ، متابعة هذا الاختيار من خلال ميسرة فكأنها اختبرت اختياراتها، عرفت عنه الصادق الأمين؛ هل هو أمين إذا غاب الرقيب؟ هل بيحسن التعامل مع المال؟ هل بيبقى صادق في البيع والشراء؟ هل بيشهد له من يصاحبه؟ فلما رجع وحدثها بما رأت، خلاص اكتملت الصورة. واخدين بالكم يا جماعة هو مين اللي علم خديجة؟ السيدة خديجة ديت هي اتعلمت في جامعة إيه؟ خلاص في جامعة الشعب. سبحان الله فلم يكن القرار عند السيدة خديجة قفزة عاطفية ولا مغامرة مجهولة ولا اندفاع لحظة إعجاب كده وخلاص أعجبت بتجارته، لا قرار سبقته معرفة، ومعرفة سبق أشبه بالاختبار.

عشان كده مهم، مش سألتِ أنتِ ارتحتِ ليه؟ ما فيش حاجة اسمها ارتحتِ ليه، عرفتِ خلقه وأمانته والمسؤولية والكلام ده؛ موضوع ارتحتِ ليه ده هيبقى موجود بس مش دلوقتي، فيه شق إن شاء الله نتكلم فيه في الدورة بإذن الله، بس الارتياح ده مش هو ده اللي احنا هنختاره. وبعد كده النبي صلى الله عليه وسلم راح مع عمه، وقيل بقى إن الولي كان عمها ولا أخوها ولا أبوها، خلاف بين العلماء في هذا الأمر. والصداق بتاعها اختلفوا العلماء في الصداق بتاعها، ما هو الصداق اللي هو قيل اللي هو المهر، المهر بتاع السيدة خديجة رضي الله عنها، البعض قال إن النبي صلى الله عليه وسلم كان المهر عشرين فتي من الإبل، وكان ده في أيامهم شيء كان موجود، والبعض قال لا أقل من كده، ده كانت دراهم معدودة، وإن شاء الله برضه اتكلمت في الحتة ديت في سلسلة فاطمة رضي الله عنها، وأظن في محاضرة صاحبة القصر اتكلمت في الموضوع ده وتفاصيل مهرها رضي الله عنها.

طب تزوجت متى؟ اتكلمت في الموضوع ده، والنبي صلى الله عليه وسلم تزوجها وهو في أواخر الـ 25 من عمره صلى الله عليه وسلم، كان عندها أولاد، وبعد كده ولدت لرسول الله كل أولاده ما عدا إبراهيم؛ عنده القاسم، وكان به يُكنى، والطاهر، والطيب. ودول هي ولدت القاسم وعبد الله، أمال مين الطيب والطاهر؟ هو عبد الله اسمه الطاهر والطيب، طب سمي ليه بالطاهر والطيب؟ قالوا لأنه ولد بعد النبوة، فلما سماه عبد الله سموه الطاهر الطيب، واخدين بالكم لأنه اتولد بعد النبوة. وعندنا زينب ورقية رضي الله عنهم وأم كلثوم وفاطمة؛ أكبرهم زينب بلا خلاف، واختلفوا مين الأصغر فاطمة أم رقية، ورقية كانت مشهورة جداً بوصف، كانت جميلة ذات جمال بارع رضي الله عنها. إذاً النبي صلى الله عليه وسلم رزق منها أربع بنات، ورزق منها أولاد.

سبحان الله في آية في القرآن تقرأها تحضر معك خديجة، حد عارفها؟ أول ما تقرأها كده تحس إن خديجة حضرت على طول وأنت بتقرأ كده، حد عارف الآية؟ ﴿وَوَجَدَكَ عَائِلاً فَأَغْنَىٰ﴾ [الضحى: 8]. قال القرطبي: فقيراً لا مال لك فأغناك بخديجة. يا الله على الكلمة! أغناك بخديجة، بغض النظر ماله أغناه، أغناه كفاه؛ الغنى ده يعني كفاية يا جماعة، عارف يعني إن رب العالمين بيقول له إيه: يكفيني إني لما أردت أن أغنيك جعلت الغنى مع هذه خديجة رضي الله عنها.

ملمحان هقولهما سريعاً ونختم بهم؛ قلنا 10 دقائق حد خمس دقائق، فآخذ الملمحين دول، بصوا هانكروتهم كده بسرعة. خديجة دلوقتي عندها أولاد كتير، صح؟ مش أنا اتفقت معاكم إننا هنحط خديجة ديت زي ما أنت بتيجي تخرج كده من البيت بتبص في المرايا تعدل لبسك وكده وأنتِ بتعدلي الإيشارب وتعدلي نقابك وتعدلي لبسك، واخدين بالكم؟ فالمرايا مين هم دول المرايا؟ فالسؤال اللي احنا عاوزين نتعلمه من قصة خديجة في الملمح ده: هل الأولاد عبء ولا ثروة؟ هل الأولاد بيقيدوا الحياة ولا بيصنعوا معناها؟ خديجة الأم التي رأت في أولادها امتداداً لا قيداً.

دي الفائدة الرابعة ولا الخامسة؟ اليوم من أكثر الشعارات انتشاراً: أريد أن أعيش لنفسي، الأطفال بياخدوا شبابي، الإنجاب هيوقف طموحي، كل طفل يعني جزء من حريتي انتهى. تسمعوا أخوات في بلاد ما وراء النهر بيعملوا كده، تعرفوا أخوات كده في الجنوب الأفريقي الهادئ بيقولوا الكلام ده، حتى أصبحت الأمومة عند البعض مشروع خسارة. خديجة رضي الله عنها حياتها ترى الأمور بطريقة أخرى، خلاص خديجة أم قبل أن تكون زوجة، أنجبت من النبي صلى الله عليه وسلم أبناء وبنات، عاشت الحمل، عاشت الولادة، عاشت الرضاعة. يا جماعة مين خديجة الكاملة؟ ماشي أي واحدة بقى ناقصة معذورة لأنها ناقصة، إحنا بنتكلم كل اللي بيقرب من الكمال بيبقى زي خديجة، واللي بيقرب من النقص الله يعينه.

فأنجبت من النبي الأبناء والبنات وعاشت الحمل والولادة والرضاعة والتربية في زمن ما كانش فيه مستشفيات ولا وسائل راحة ولا إجازة أمومة ولا خدي المنوم ده ولا مش عارف إيه، وكله طبيعي، خلاص لا فيه قيصري ولا ما قيصري، ومع ذلك لم يذكرها التاريخ كتاجرة وامرأة ناجحة، ذكرها أماً وزوجة وصاحبة السكن. كانت أعظم إنجازاتها لم يكن ما جمعته من مال بل ما خرج من بيتها؛ خرجت فاطمة بنت محمد صلى الله عليه وسلم، وخرجت بنات حملهن أخلاق النبوة. وبالمناسبة للبنات، بصوا احنا قلنا باقي خمس دقائق، هيبقى ستة عشان ما خلاص بقى طالما جبنا سيرة أخواتها يعني ما هيبقى من قلة التوفيق إننا ما نقولش الحتة ديت لأنها حتة مهمة جداً ليكم؛ بناتها. أما نيجي نشوف زينب تزوجت مين؟ أبو العاص بن الربيع، اللي هو ابن خالتها هالة، فاكرين هالة؟ ابن خالتها، كان عمرها 14. خلاص سامعة يا اللي عندك 14 سنة وبتسمعيني، اه قولي لماما إيه أخبار زينب، إيه يا ماما؟ المهم تزوجت وهي عندها 14 سنة، وتوفيت بعمر 31 سنة. إن شاء الله ممكن أعمل محاضرة اسمها "زوجيني"، خلاص أخاطب بها البنات السن 13 سنة لغاية 18 سنة، بس نقول لهم دول يروحوا يقولوا لمين لأمهاتهم: زوجيني يا أمي، زوجني يا أبي، زوجوني، عشان ما تروحش تقول لأمها بس. هتعرفوا إن هي بدري ولا مش بدري، إن شاء الله بعد الدورة بتاعة الميثاق على الفطرة هنعرف. وأهم حاجة أهم حاجة أدخل دايماً المسائل دي بدون تصور مسبق وحكم مسبق، اسمع لعلك توصل لشيء. عموماً في الغرب عادي جداً السن ده لو بره، لو مشي لوحده بعيد عادي بيبقى جميل، مش بيتقال عليهم بدري، هو بس احنا دايماً عندنا بيتقال عليها بدري، أما بتبقى في الحلال بيبقى بدري.

تزوجت رقية من عثمان بن عفان، وهو قريب للنبي صلى الله عليه وسلم، صح؟ بيشترك معاه في الجد في أحد الأجداد، كان عمرها 13 سنة، عرفتوا بقى هنقول ليه زوجوني؟ وأم كلثوم تزوجت من عثمان بس دي عمرها كان 22 سنة، وتوفيت وهي عندها 28، ورقية توفيت وهي عندها 23. ملاحظين حاجة؟ طبعاً رقية وأم كلثوم كانوا متجوزين من العم قبل كده اللي هو عتبة وعتيبة ابني أبي لهب وبعدين اطلقوا قبل الدخول لإسلامهن. وفاطمة تزوجت من ابن عم أبيها علي رضي الله عنه، كان عمرها إيه برضه إتكلمنا في العمر بتاعها ممكن تراجع بقى. سؤالي ملاحظين حاجة في الأربعة دول؟ إن زواج الأقارب والزواج المبكر ليس بالشناعة اللي بتصورها منظومات الدعاية العلمانية والدعايات الأرضية. النبي زوج غالب بناته زواجاً مبكراً وزوجهن لأقاربهن، فلو ده أمر مذموم أو حرام أو مكروه أو خلاف الأولى أو ضرره محقق أو غالب أو خلاف العقل أو مصادم للفطرة أو منافي للتفكير السليم لما فعله المعصوم. ماشي عدوا بقى معلش اعتبروا دي كده حقنة في العضل عدوها بسرعة كده، اعملوا كأنكم مش واخدين بالكم منها. المهم نرجع للسيدة خديجة رضي الله عنها.

إيه اللي حصل؟ بنقول إن أعظم إنجازها لم يكن ما جمعته من المال بل ما خرج من بيتها؛ إيه اللي خرج؟ هذه الكوكبة، بيت كان مهبط السكينة يا جماعة. الحضارة الحديثة كثير منها بيقيس النجاح بما تملك، الإسلام يقيسه بما تترك من أثر. قد تموت امرأة وعندها حسابات مصرفية وعندها وعندها وعندها ولم تترك شيئاً، وتموت أخرى وتركت أبناء صالحين يحملوا الإيمان والأخلاق. الطفل في المنظور الإيماني والمنظور الفطري السليم ليس استهلاكاً للوقت بل استثماراً في العمر، ليس خصماً من العمر بل امتداداً لعمرك. واللي بتقول بيمنعوا حريتي بيقيدوا حريتي، الإنجاب بيقيد حريتك، السؤال حرية في ماذا؟ إذا كانت الحرية إنك تتحركي بلا مسؤولية فالأمومة هتقيد فعلاً حريتك، أما إذا كانت الحرية إن تعيشي حياة ذات معنى فالأمومة من أعظم صور الحرية. الإنسان لا يكبر حين يخفف المسؤوليات بل حين يحملها، اللي بيحمل المسؤولية هو ده اللي بيكبر. خديجة رضي الله عنها بتعلمنا في حياتها إن أبناءها ما كانوش عائقاً عن رسالتها، كانت زوجة النبي وكانت صاحبة بيت وكانت أماً وكانت السند الأول للدعوة، ولم يمنعها أن تكون أعظم امرأة في تاريخ الكمل. لم يكن أولادها حجاباً بينها وبين رسالتها، بل كانوا جزءاً من رسالتها.

طبعاً مش عاوزين نحمل السيرة ما لا تحتمل، المقصود مش إننا بنقول يلا كله كثرة إنجاب ويلا واجب على كل أسرة، لا لا الأحوال بتختلف والدنيا بتختلف، لكن المقصود هو تصحيح الفكرة؛ إن كلما قل الأولاد أو تأخروا، تأخر الإنجاب، زاد انطلاقي في الحياة، دي مش حقيقة، ده تصور وهمي أنتِ قيدتِ نفسك فيه. المشكلة ليست أن بعض الأسر تكتفي بعدد معين من الأولاد لنظر ما ومسؤولية ما، إنما في تحويل الأمومة نفسها لعائق، والولد إلى خصم، والأسرة إلى سجن. لو سألنا السيدة خديجة إيه أعظم صفقة ربحت فيها؟ هتقول تجارة الشام؟ أم ستقول بيت خرج منه رسول يجد السكينة، وبنت كفاطمة، وأبناء وبنات عاشوا في ظلال النبوة والفطرة؟ الحضارة اللي بتعظم عالم الأشياء هترى الطفل تكلفة، أما الرسالة اللي بتبني الإنسان قبل البنيان ترى الطفل أمانة ورسالة وامتداداً للأثر. ولذلك خديجة رضي الله عنها بتعلمنا إن الأمومة ليست توقفاً عن صناعة التاريخ، بل قد تكون إحدى أعظم الطرق لصناعة التاريخ.

من بيتها خرجت الأسرة اللي احتضنت أول الوحي، ومن قلبها خرج أول السند، ومن الهدوء اللي جوه بيتها كانت أول لبنات هذا البناء المبارك. آخر ملمح هختم به، الحاجات العجيبة جداً أنتم عارفين في واحدة دخلت على النبي صلى الله عليه وسلم اسمها جسامة المزنية، فقال لها: بل أنتِ حسانة، فاكرينها؟ هتيجي معانا في يوم من الأيام. الجسامة دي كانت شغالة إيه؟ الماشطة لخديجة رضي الله عنها، بتسرح للسيدة خديجة. سبحان الله السيدة خديجة مش عاوزة تسيبنا، مش عاوزة تسيب ملمحاً إلا وتربينا؛ فهنا ملمح رهيب إن المرأة الكاملة العابدة العاقلة الأم صاحبة الرسالة في الوقت نفسه أنثى تعتني بأنوثتها. ما هو هي كاملة يا جماعة هي كاملة، فكاملة برضه في الأنوثة؛ كاملة خَلقاً وخُلقاً. الأنوثة يا جماعة ليست نقيض التقوى؛ من بعض الأخطاء اللي متسربة لبعض البيئات المحافظة إن المرأة كلما ازدادت صلاحاً قل اهتمامها بنفسها. موافقين على الكلام ده ولا حاسين إن أنا جاي أتكلم على ناس ساكنة في آخر البرازيل؟ في ناس كده صح، تحس كده كلما زاد الصلاح قل الاهتمام بالنفس، كان الزهد يعني الإهمال، كان الحياء يعني أن تنسى المرأة أنها امرأة، ليس هذا هو هدي الإسلام.

طبعاً أنا بقول بعض الناس اللي موجودين في أمريكا اللاتينية فاهمين كده. ماشي، خديجة امرأة اكتملت رضي الله عنها، كمالها مش في العبادة بس ولا في العقل بس ولا في التضحية بس، بل كمال موزون: عقل راجح، قلب حنون، أمومة، زوجية، أنوثة. سبحان الله الجمال ده من الكمال. ومن شوفوا بتقول إيه، وكانت فاطمة لا تخطئ مشية أبيها، بتمشي زي أبيها كده، توصف المشية بتاع زي مشية أبيها. ورقية رضي الله عنها كانت ذات جمال بارع، فواخدين من أمها وأبيها. الإسلام لم يطلب من المرأة يا جماعة أن تذوب في الأدوار؛ بعض النساء إذا أصبحت أماً شعرها انتهى زمن الاهتمام بنفسي، ولما تكثر مسؤوليات البيت لم يعد لزوجي حق أن يراني جميلة. طب تهدي مين ده؟ المرأة لا تترك أنوثتها لأنها أصبحت أماً، ولا تهمل تزيينها لأنها انشغلت بالأولاد، بل من حسن العشرة أن يبقى كل من الزوجين حريصاً على إدخال السرور على الآخر.

مجتمع النبوة ما حاربش التجمل، واللي يقرأ السيرة يجد إن أم سليم مثلاً لما النبي صلى الله عليه وسلم جه تزوج صفية على طول قال: يا أم سليم زينيها ومشطيها. فإني نفسي الأخوات كلهم ياخدوا دورة كده اسمها دورة أم سليم، دورة أم سليم كده اتعلموا البنات إزاي أبجديات الحاجات دي. ده السيدة عائشة كان عندها درع بتلبسه، بتقول ما امرأة كانت في المدينة تريد أن تتزين لعرسها إلا أتت تستعير ده، السيدة عائشة. السيدة عائشة! عاوزين نطلع شهادات كده زي ما نطلع شهادات للرجالة كده رجولة وبتاع، نطلع شهادات كده للأخوات، ممنوع أخت إلا لما تاخد شهادة أم سليم، مختومة ومضروبة ومختومة بختم ورسمي وعليها طبيعية وبتاع وما فيش واسطة فيها.

فكثير من النساء، أنتم عارفين أخت حسان أخت عثمان بن عفان رضي الله عنها، كانت برضو ماشطة، مهنة الماشطات دي مهنة مشهورة جدا كانت موجودة جدا في المدينة، وكثير من العلماء اتكلموا في الباب دوت، بل العلماء اللي ذكروا المهن اللي كانت موجودة في عصر المدينة تلاقيهم يذكروا المهنة ديت من المهن اللي كانت منتشرة جدا.

فبعض الناس سبحان الله ممكن يغيب عنه الأبجديات ديت، فالسيدة خديجة رضي الله عنها لا بتقول لنا لا، الإسلام لا يعرف فكرة أن الصالحة تكون مهملة. طبعاً الأخوات دلوقتي تقول لزوجها: شفت الشيخ قال إيه على الكوافيرة اللي أنت مش عاجبك؟ كأني أنا دلوقتي بقول إن السيدة خديجة كانت بتروح الكوافير، فشوفوا ياخدونا على الناحية التانية، خلاص يستاهلوا بقى أن الأزواج يمنعوهم! افهموا الكلام، افهموا الكلام بحروفه ومراداته، بلاش تاخدوها في التأليفات اللي عندكم بقى، وشد ومشد وتغيير خلق الله والقصص دي كلها.

المهم الرسالة إلى الزوجات اللاتي انشغلن بالأولاد: لا تسمحي أن يسرق منك لقب الزوجة، أن يسرق منك الأولاد والتربية لقب الزوجة، يا من حملت هم الدعوة، لا تسمحي أن يطغى لقب الداعية على لقب الأنثى. يا حاجة بالله عليك يا معلمة، أنت اسمك أنثى قبل ما تكوني اسمك الداعية، فالله يعزك. خلاص مش عاوزين زوجك يجي يقول: والله من يوم ما بدأت الحلقات والكلام ده كله بقت اسمها الست الطيبة. الزوج لا يحتاج إلى أم الأولاد وفقط، يحتاج إلى امرأة يجد عندها السكن والبهجة، وهذه الأمور ليس هذا نقصاً في الدين، بل قد يكون من تمام حسن العشرة.

هيجي واحد يقول: يا شيخ هو أنت بتفتح الباب ده كده يروحوا يعملوا حاجات غلط؟ يا أخوات ما تعملوش الحاجة دي بالطريقة الغلط عشان ما حدش يفهمني غلط، اعملوا الحاجة دي بالطريق المنضبط، ربنا يهدينا. خديجة رضي الله عنها كانت تحمل أثقال البيت، وتربي الأولاد، وتؤازر رسول الله، وتحتضن الدعوة في أصعب أيامها، ومع ذلك لم تطفئ هذه الأدوار نور أنوثتها، ودي كانت رسالة الفطرة ورسالة الإسلام أكدها.

ليس المطلوب من المرأة أنها تختار بين أن تكون صالحة أو مهتمة بشأنها، ولا بين أن تكون أماً وزوجة، ولا بين رسالتها وتربيتها وبين أنوثتها. الكمال الذي شهد به النبي صلى الله عليه وسلم لخديجة أن تجتمع هذه المعاني في قلب امرأة، فتظل المرأة أماً حنونة، وزوجة مؤنثة، وصاحبة رسالة، دون أن يطغى جانب على جانب، دون أن تفقد فطرتها التي خلقها الله عليها، وده النموذج اللي إحنا نتمنى أن نساء كثير تعيش وتتربى عليه وتربي أولادها عليه.

طولت عليكم وعذراً، إن شاء الله ممكن نعوض الأسبوع الجاي إن شاء الله، فنخفف أو نلغي، فأسأل الله سبحانه وتعالى أن يحفظنا وإياكم، وربنا يسددنا وإياكم، مش شرط الصورة الكاملة نحققها بس على الأقل نعرف أن ده النموذج الأفضل ونسعى كلنا ليه، ربنا يحفظكم ويحفظ بكم ويسترنا وإياكم ويتقبل مني ومنكم صالح الأعمال، أقول قولي هذا وأستغفر الله لي ولكم، والسلام عليكم ورحمة الله.