الحمد لله والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد. أما بعد.

ما زلنا مع دروس الموسم، وتكلمنا المرة اللي فاتت عن قصة بناء البيت والتي ذكرت في سورة البقرة. الله عز وجل أنزل سورة كاملة باسم الحج؛ سورة الحج. وفي أثناء هذه السورة بعض الآيات التي تتحدث عن الحج، والعجيبة أن هي عدد آيات قليل، يعني ما هياش معظم السورة مثلا عشان السورة تتسمى الحج.

والأعجب أن هي برضه ما تكلمتش عن المناسك، يعني ما هياش أكثر سورة أسهبت في ذكر المناسك، لا؛ ذكرت يعني كم موقف كده وخلاص أو كم مشهد. فكان السؤال الأول هو: لماذا أو ما هي السمة الغالبة على سورة الحج؟ وايه علاقة السمة دي بالحج عشان تتسمى سورة الحج؟

احنا يا جماعة لو تأملنا سورة الحج هنلاقي حاجة عجيبة شوية أو عدة حاجات عجيبة، ولما نربطها ببعض بقا هنفهم القضية. أول حاجة أن سورة الحج فيها مشاهد صعبة وألفاظ صعبة؛ يعني لا تكاد تجدها في القرآن كله، بدايه من أول آية في سورة الحج، مش كده؟ ﴿يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ * يَوْمَ تَرَوْنَهَا تَذْهَلُ كُلُّ مُرْضِعَةٍ عَمَّا أَرْضَعَتْ وَتَضَعُ كُلُّ ذَاتِ حَمْلٍ حَمْلَهَا وَتَرَى النَّاسَ سُكَارَىٰ وَمَا هُم بِسُكَارَىٰ﴾ [الحج: 1-2]. شايفين المشهد عامل ازاي؟ مشهد صعب.

ومش بس المشهد ده؛ يعني احنا عندنا المشهد بتاع... حد يقول: ﴿حُنَفَاءَ لِلَّهِ غَيْرَ مُشْرِكِينَ بِهِ ۚ وَمَن يُشْرِكْ بِاللَّه فكَأَنَّمَا خَرَّ مِنَ السَّمَاءِ فَتَخْطَفُهُ الطَّيْرُ أَوْ تَهْوِي بِهِ الرِّيحُ فِي مَكَانٍ سَحِيقٍ﴾ [الحج: 31]. مشهد برضه تخيله؛ مشهد صعب. فهي صورة فيها ألفاظ صعبة ومشاهد صعبة، دي أول حاجة، أول ملاحظة في الصورة.

الملاحظة الثانية -وهي بقا أساس الدرس النهارده- أن سورة الحج هنجد في أكثر من موطن في سورة الحج بتتكلم عن قضية العقل مع النقل. يعني ايه؟ يعني عندنا نقل، عندنا شرع، عندنا نصو؛ كيفية تعاطي العقل مع هذه النصوص. فهنجد أن سورة الحج في أكثر من موطن ومواطن كثيرة -مش موطن ولا اثنين- بتذكر معنى العقل الذي يصطدم مع النص، يرد النص، يجادل في النص.

يلا نبتدي السورة، هتلاقي مع بداية السورة كده يذكر الله صنفين من الناس، فقال سبحانه وتعالى في أول السورة خالص: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَيَتَّبِعُ كُلَّ شَيْطَانٍ مَّرِيدٍ﴾ [الحج: 3]، وتمر آيات وتيجي: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَلَا هُدًى وَلَا كِتَابٍ مُّنِيرٍ * ثَانِيَ عِطْفِهِ لِيُضِلَّ عَن سَبِيلِ اللَّه﴾ [الحج: 8-9]. شايفين هنا الكلام في ايه؟ جدال في الشرع في النصوص، وذكر صنفين من الناس: صنف يجادل وهو تابع، وصنف يجادل وهو متبوع.

الآية الأولى: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَيَتَّبِعُ﴾ يبقى ده صنف تابع مقلد. الصنف الثاني: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَلَا هُدًى وَلَا كِتَابٍ مُّنِيرٍ * ثَانِيَ عِطْفِهِ لِيُضِلَّ عَن سَبِيلِ اللَّه﴾ يبقى ده صنف يجادل وعنده كبر (ثاني عطفه) وهو متبوع ليضل عن سبيل الله.

وتمر طبعا تعاطي القرآن مع الصنفين مش واحد، خلي بالك يا جماعة قبل ما نشوف يعني دي طبعا برة احنا النهارده مش تدبر سورة الحج؛ فبرة درس النهارده اللي هقوله كمان شوية ده احنا بنتدبر آيات الحج وعلاقتها بسوره الحج فمش هنقف مع سوره الحج تدبرا، لكن عاوزين نفهم الجو العام للصورة ايه عشان نفهم ايه علاقة الحج بالجو العام للصورة عشان نفهم ليه الصورة تسمي سورة الحج مع أن آيات الحج ما هياش معظم الصورة ولا حاجة.

فهمتوا الترتيب بالعكس كده، لكن لو برة بقا شوية الدرس هتلاقوا يا جماعة القرآن لم يتعامل مع الصنفين نفس التعامل؛ عندنا صنف بيجادل لكنه تابع، وصنف بيجادل ليضل هذا الصنف المتبوع الرؤوس في الضلال، فهتلاقي القرآن حاجة عجيبة جدا. الصنف الأول: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَيَتَّبِعُ كُلَّ شَيْطَانٍ مَّرِيدٍ * كُتِبَ أَنَّهُ مَن تَوَلاهُ فَأَنَّهُ يُضِلُّهُ وَيَهْدِيهِ إِلَىٰ عَذَابِ السَّعِيرِ﴾ [الحج: 3-4]. الصنف ده القرآن تعامل معاه ازاي؟ أتاه بأدلة تثبت صحة صحة النص، أدلة عقلية.

احنا بنتكلم سورة الحج الجو العام ليها عقل مع نص، فهتلاقوا أن معظم أدلة سورة الحج اصلا لإثبات السمعيات الغيبيات، إثبات وجود الإاله، هتلاقوها أدلة عقلية. يبقى الصنف ده القرآن تعامل معاه ازاي؟ قال الله عز وجل بعدها: ﴿يَا أَيُّهَا النَّاسُ إِن كُنتُمْ فِي رَيْبٍ مِّنَ الْبَعْثِ فَإِنَّا خَلَقْنَاكُم مِّن تُرَابٍ﴾ [الحج: 5] إلى آيات بقى.

طيب الصنف الثاني الذي يجادل في الله أيضا لكنه ثاني عطفه ليضل: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَلَا هُدًى وَلَا كِتَابٍ مُّنِيرٍ * ثَانِيَ عِطْفِهِ لِيُضِلَّ عَن سَبِيلِ اللَّهِ ۖ لَهُ فِي الدُّنْيَا خِزْيٌ ۖ وَنُذِيقُهُ يَوْمَ الْقِيَامَةِ عَذَابَ الْحَرِيقِ﴾ [الحج: 8-9]. هنا القرآن تعامل معاه ازاي؟ مافيش مافيش جدال، مافيش مناقشة. قال الله عز وجل: ﴿ثَانِيَ عِطْفِهِ لِيُضِلَّ عَن سَبِيلِ اللَّهِ ۖ لَهُ فِي الدُّنْيَا خِزْيٌ ۖ وَنُذِيقُهُ يَوْمَ الْقِيَامَةِ عَذَابَ الْحَرِيقِ * ذَٰلِكَ بِمَا قَدَّمَتْ يَدَاكَ وَأَنَّ اللَّهَ لَيْسَ بِظَلَّامٍ لِّلْعَبِيدِ﴾ [الحج: 9-10]. وبعدين دخلنا على صنف ثالث: ﴿وَمِنَ النَّاسِ مَن يَعْبُدُ اللَّهَ عَلَىٰ حَرْفٍ﴾ [الحج: 11].

فالقران هنجد منهج القرآن شدة وحزم وتهديد ووعيد لهذا الصنف من الناس الذي يجادل وهو ثاني العطف ليضل، إنما الصنف الأول اللي هو جادل لانه مقلد ويتبع كل شيطان مريد، القرآن تعامل معاه معاملة أخرى، قال له لا؛ ده في أدلة عقلية اهو على إثبات البعث، خد عندك وسرد أدلة العقل على إثبات البعث؛ لأن هذا الصنف يحتاج إلى هذا التوجيه.

وكان الصنف الثاني لا؛ ده هو فاهم بيعمل إيه كويس، وفاهم أنه ضال، وفاهم أن اللي قدامه ده على حق، فكان منهج القرآن مع الوعيد هو؛ ده مش محتاج أدلة. فاهمين؟ احنا مش بنقول أن الصنف الثاني ده مش هيسلم أو لا؛ مش بنقول كده، بنقول المنهج القراني معاه مش أن يقول له تعال أقول لك أدلة البعث، هو اصلا عارف أدلة البعث وعارف أنه غلط، هو عاوز يضل، ده صنف متكبر لا يخضع لحق ولا يخضع لدليل وعارف أنه على خطأ، فما فيش معنى تقول له إيه: تعال أقول لك أدلة البعث، ما فيش معنى لكده؛ هذا يهدد. فقال الله عز وجل فيه: ﴿لَهُ فِي الدُّنْيَا خِزْيٌ وَنُذِيقُهُ يَوْمَ الْقِيَامَةِ عَذَابَ الْحَرِيقِ﴾ [الحج: 9].

يلا نكمل بقى اللي ابتديناه؛ أن سورة الحج سورة جاءت علشان تعمل إيه؟ علشان تضبط قضية العقل مع النقل، وأن العقل فيه عقل، العقل هو كده يصادم النقل، عاوز يبطل النقل، يبطل الشرع، يجادل. فدي اهو لفظين مجادله جم في آيتين. طب يلا نكمل؛ هتلاقوا بعديها: ﴿هَذَانِ خَصْمَانِ اخْتَصَمُوا فِي رَبِّهِمْ﴾ [الحج: 19]. شايفين لفظ الجدال، لفظ المخاصمة، اختصموا في ربهم.

طيب لفظ النزاع قال سبحانه وتعالى: ﴿لِكُلِّ أُمَّةٍ جَعَلْنَا مَنسَكًا هُمْ نَاسِكُوهُ ۖ فَلَا يُنَازِعُنَّكَ فِي الْأَمْرِ﴾ [الحج: 67]. يبقى عندنا لفظ جدال، لفظ مخاصمة، لفظ نزاع. وبعدين لما تعرف سبب نزول الآية برضه هذه الآية: ﴿لِكُلِّ أُمَّةٍ جَعَلْنَا مَنسَكًا هُمْ نَاسِكُوهُ ۖ فَلَا يُنَازِعُنَّكَ فِي أَمْرِ وَادْعُ إِلَىٰ رَبِّكَ﴾ [الحج: 67]. إيه سبب نزول الآية؟ قالوا إنه لما نزل التشريع على أمة الإسلام أن هم يذبحوا بهيمة الأنعام وياكلوا، وما مات حتف أنفه لا يؤكل، يعني اللي مات ما يتاكلش واللي ذبحناه يبقى ده مذكى شرعا ويؤكل؛ قال الكفار: مال المسلمين ياكلون ما قتلوه ولا ياكلون ما قتله الله!

واضح هنا واضحه جدا المساله هنا شرع نص؛ كلوا ده وما تاكلوش ده. فأعمل العقل لإبطال النص، وضربت الأمثال لإبطال النص؛ إيه المسلمين دول ياكلوا اللي قتلوه هم وما ياكلوش اللي قتله ربنا؟ شوفوا يا جماعة الكلام عامل ازاي، وخلي بالك هذا الكلام سيجد من يقتنع به ويروج له، ومش بس كده؛ سيجد من يقتنع أن هذا هو مقتضى مقتضى العقل، أن هذا أولى بالأكل من هذا ليه؟ هذا قتلناه نحن وهذا قتله الله. عقل ده ولا مش عقل يا متعلمين يا بتوع المدارس؟ هيجد من يروج له ومن يقتنع به.

فماذا قال الله عز وجل؟ قال: ﴿لِكُلِّ أُمَّةٍ جَعَلْنَا مَنسَكًا هُمْ نَاسِكُوهُ ۖ فَلَا يُنَازِعُنَّكَ فِي الْأَمْرِ﴾ [الحج: 67]. وأوعى اللي بيحصل ده يعطلك عن وظيفتك؛ تسيب الدعوة بقى وتقعد لدول؟ لا، فلا ينازعنك في الأمر وادعو إلى ربك. ما يشغلكش دول، ما تتعطلش، طريق الدعوة ما يقفش عشان نقعد بقى لدول نقنعهم بالعقل ازاي ومش ازاي، خلا هو نص نزل.

خلونا ده هنيجي له بعدين، احنا دلوقتي عمالين بنشوف المشاهد أو الألفاظ التي أتت بها الصورة في هذا السياق؛ سياق الجدال، سياق المخاصمة، سياق النزاع، وكل ده ليه؟ عشان عقل مع نص. وفي المقابل هنجد الصورة أثبتت أو أتت بألفاظ على العكس بقا (يعني دول بيجادلوا، دول بيخاصموا، دول بينازعوا) وأتت الصورة بألفاظ للفريق المضاد، فقال سبحانه وتعالى: ﴿ذَٰلِكَ وَمَن يُعَظِّمْ حُرُمَاتِ اللَّهِ فَهُوَ خَيْرٌ لَّهُ عِندَ رَبِّهِ﴾ [الحج: 30]. اللي هيعظم حرمات ربنا سبحانه وتعالى فلا يعارضها بعقل هو خير له عند ربه.

وهتجد هذا تكرر: ﴿وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ﴾ [الحج: 32]. يبقى من لا يعظم الشعائر فيذهب يعارض تلك الشعائر وتلك النصوص وذلك الوحي بعقله، ويعامله كنص -احفظوا بقى- لا قدسية له. مهم قوي اللفظ ده؛ لأن ده لفظ أو يعني هيكشف لكم فئة من الناس موجودة بينا دلوقتي، يهجمون على نصوص الشرع على أنها نصوص لا قدسية لها. أما باطلاق كده يقول لك إن الوحي أو النص الشرعي نص غير مؤمن لا قدسية له، نعمله زيه زي أي نص تاريخي، ويساوون في هذا بين القرآن والسنة أو بعضهم يفرق، وكل دول ضلال. والفرقة الثانية دي هي الأشد خطرا؛ لأن الأولى ينبذ الشرع جملة، يقول لك لا قرآن ولا سنة، ده نص تاريخي نحاكمه للقواعد.

الفئة الثانية هي الأشد خطر؛ لأنها تنطلي على كثير من المسلمين، اللي هم يدعون زورا وبهتانا أنهم يقدسون القرآن وأن ده نص مقدس، لكن يلعبون بالسنة لعبا، زي شحرور وأتباعه، يلعبون بالسنة لعبا ويعاملون نصوص السنة بهذه القاعدة: أن ده نص غير مقدس فنحاكمه لقوانين العقل. وهيجي بقى كلام على ده ان شاء الله. طيب ليه دول بيعملوا كده؟ ربنا قال: ﴿ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ﴾ [الحج: 32]. لو حصلوا التقوى ما فعلوا ذلك.

يا جماعة، احنا لسه قايلين لكم من شوية اللي قال: إيه المسلمين بياكلوا اللي قتلوه هم وما ياكلوش اللي قتله ربنا؟ ده احنا بنسميه ضرب الأمثال؛ ضرب الأمثال يعني هو النص جه: كل ده وما تاكلش ده، يقوم يقعدوا يضربوا لك الأمثال بقا (يعني ناكل اللي قتلنا احنا وما ناكلش اللي قتله ربنا). في نص قرآني آخر أثبت الله عز وجل هذه الحيلة ورد عليها. مين شاطر يقولها؟ هاه؛ الربا والبيع، مش كده؟ قالوا إيه هم؟ لا مش هو أحل الله، ده الرد؛ قالوا: ﴿إِنَّمَا الْبَعْثُ مِثْلُ الرِّبَا﴾ [البقرة: 275]. إيه الرد؟ ﴿وَأَحَلَّ اللَّهُ الْبَيْعَ وَحَرَّمَ الرِّبَا﴾ [البقرة: 275]. بسيطة؛ هم قالوا: إنما البيع مثل الربا، فجاء الرد: وأحل الله البيع وحرم الربا. ما ناقشناش في إيه مثل ولا هو مش مثل، طبعا هو مش مثل ولا حاجه، بس هبة كذلك، هبة كذلك، وأحل الله هذا وحرم هذا، ما انتهت خلاص.

ولذلك احنا بعض يعني العلماء لما تكلموا قالوا: احنا هنعمل العقل في إثبات الإله وإثبات النبوة وإثبات أن هذا النص من عند الرب سبحانه وتعالى، وشكرا على كده، بعد كده نسلم لكل حاجة جت في النص. وطبعا هذه المقدمات إنما نفعلها مع من لا يؤمن الواحد مش مؤمن، خلاص تعالى نثبت أن في إله، ما احنا مش هنقول له القرآن بيقول إن في إله، ما يقول لك القرآن بيقول لك اصلا ما فيش إله! وبعدين بعدين نثبت له بالعقل أن هذا النص من عند الإله، وبعد كده نسلم بقى لكل حاجة.

ولله المثل الأعلى، تخيلوا دلوقتي عندنا جبت لك ورقة وأنت راجل مثلا مهندس معماري مثلا واقف كده إيه عطلان على أحط قد إيه أسمنت في الآية في ال... وقد إيه زلط وقد إيه في الخلطة مثلا، فرحت جاب لك ورقة وقلت لك: اهو ده الكود بتاع الآية المرجع فلاني اللي كاتبه مجموعة العلماء الفلانيين في الهندسة المدنية، خلي بالك احنا ما بنهزرش، الخلطة غلط، عمارة وقعت وناس ماتت. طيب، فراح المهندس ده واخد الورقة واشتغل، إيه رايكم في فعله؟ الفعل ده غلط، ده فيه أرواح ناس، ماهياش لعبة.

إنما المهندس ده لازم يسأل سؤالين؛ أول حاجة: اثبت لي أن الورقة دي من المرجع الفلاني قبل ما يشتغل. يعني أنت جاب لي ورقة دلوقتي أو من على النت من على جوجل، والراجل ده ما بنهزرش احنا دي عمرها هتتبني وناس هتسكن. فأول أول حاجة هيقولها لك إيه؟ أولا تعال نثبت أن الورقة دي من المرجع ده فعلا، ما هو احنا مش أي حاجة جوجل هَيقول لنا دي من الكذا ولا الآي إي يقول لنا دي من كذا هنروح نلعب بأرواح بني آدمين. أثبت لك أن فيها الورقة دي من الكتاب الفلاني، بقي أن يقال: اثبت لي بس أن اللي كتبوا الكتاب ده فعلا ناس دكاترة في... أو بلاش، أن هذا المرجع معتمد.

خلاص أنا أثبتت الورقة فعلاً من الكتاب الفلاني فعلاً، إنما الكتاب ده هل ده فعلاً معتمد؟ ده الأستاندرد اللي ماشيين عليه بتوع مدني. أثبتنا الاثنين دول، ساعتها المهندس هيعمل إيه؟ هيحط الخلطة وهو مغمض عينه، مش هيناقش في الخلطة بقى خلاص، مش هيجي يقول لك إيه ده نسبة واحد لواحد، طب لا، ده شكل بالعقل كده ما تنفعش. المهندس مش هيعمل كده، هيحط اللي مكتوب وهو مغمض، مجرد أنه أثبت أن الكتاب ده فعلاً بتاع الفئة الفلانية اللي هم الدكاترة والناس الخبراء في المجال، وأنه أثبت أن الورقة من الكتاب أو أن هذا النص من الكتاب ده، بعد كده هيتبع النص وهو مغمض، مش هيعمل عقله مع النص. حد معترض على اللي بقوله؟

أهو ده اللي احنا ببساطة عاوزين الملحد وعاوزين الشحروريين بتوع منكر السنة، هو ده ببساطة شديدة اللي عاوزين منهم يعملوه؛ مجرد ما أثبتنا أن هذا النص من عند الله سبحانه وتعالى، خلاص هنتبع اللي في النص واحنا مغمضين، ومجرد ما أثبت أن هذا النص من عند النبي عليه الصلاة والسلام الذي لا ينطق عن الهوى إن هو إلا وحي يوحى، خلاص هنتبع النص واحنا مغمضين. طبعا هي مش بالبساطة دي، فيها نقاشات وكده يعني، عشان إنما ده خلاصة الموضوع.

فربنا سبحانه وتعالى في نص قراني أثبت هذه الآية المعضلة، والرد عجيب: قالوا إنما البيع مثل الربا، أحل الله البيع وحرم الربا، خلصت. وعندنا مثال في السنة، ويمكن قلناه هنا قبل كده حديث أبي هريرة لما قال: «توضؤوا مما مس النار».

وهذا الحديث الحكم بتاعه أن إيه منسوخ. إنما منسوخ يعني خلاص ما بقاش يعمل بيه. إنما تعالوا للحديث في وقت ما أبو هريرة بيروي الحديث بيقول: سمعت رسول الله صلى الله عليه وسلم يقول: «توضؤوا مما مس النار». فقام واحد قال له: يا أبا هريرة، أفلا نتوضأ من الحميم؟ يعني إيه؟ أبو هريرة بيقول: النبي قال عليه الصلاة والسلام صلوا على النبي: «توضؤوا مما مس النار»، يعني أي حاجة تمسها النار اتوضؤوا منها. راح واحد قام قال له: طيب جميل، في الشتاء الجو برد والمية ساقعة، هنبقى عاملين إيه؟ هنسخن المية عشان نتوضى مية دافية، هنسخنها بإيه؟ بنار. فالمية اللي دفييت دي اللي هي الحميم بقى ماشي، الحميم ده هو الماء الساخن، رحنا توضينا منه، وأنت بتقول لنا «توضؤوا مما مس النار»، يبقى بعد ما نتوضى المفروض نعمل إيه؟ نتوضى، لأن احنا توضينا بإيه؟ بمية مسها النار.

نرجع تاني بقى، أبو هريرة بيقول: سمعت رسول الله صلى الله عليه وسلم يقول: «توضؤوا مما مس النار». فقال رجل: أفلا نتوضأ من الحميم؟ فغضب أبو هريرة وأخذ قبضة من حصى وقال: يا ابن أخي، أشهد عدد هذا الحصى أني سمعت رسول الله صلى الله عليه وسلم يقول: «توضؤوا مما مس النار يا ابن أخي، إذا حدثتك عن رسول الله صلى الله عليه وسلم بحديث فلا تضرب له الأمثال».

هنا يا جماعة نهي أبي هريرة عن ضرب الأمثال إنما هو عن نوع من ضرب الأمثال، وهو أن نضرب الأمثال لنرد النص. ممكن واحد يضرب مثلاً ليفهم النص؛ مش أنا من شويه يا جماعة ضربت لكم مثل وقلت لكم بتاع مهندس مدني وصح؟ ما هو ده ضرب مثل، لكن احنا بنضرب الأمثال لافهام النص، ماشي الحال. طب نضرب الأمثال حتى لو كانت متعارضة مع النص علشان نفهم الإشكال منين، يعني ازاي نجمع بين هذا وذاك؟ برده ماشي، وهذا يفعله الفقهاء أصلاً في كتبهم. إنما أحدثك حديثاً، وهنا يا جماعة ما فيش بقى يعني ده أبو هريرة عن النبي عليه الصلاة والسلام، يعني لا تقول لي بقى حديث ضعيف ولا تقول لي أبو هريرة عن النبي عليه الصلاة والسلام فتروح جاي ضارب لي مثل تريد به هدم النص.

وهنلاقي سوره الحج بقى فيها ألفاظ الجدال، وبينت لنا صنفين من الناس يجدلون: صنف تابع، وصنف مدبوع، وازاي نعمل مع كل واحد والمخاصمة والمنازعة، وفي المقابل تعظيم الحرمات وتعظيم الشعائر. ولذلك هتجد سورة الحج أكدت على معنى إرادة الله ومشيئته، فهنلاقي سورة الحج قالت إيه؟ قال سبحانه وتعالى: ﴿إِنَّ اللَّهَ يَفْعَلُ مَا يُرِيدُ﴾ [الحج: 14]. شوفوا يا جماعة هنا اللي هو إيه؟ الله عز وجل يفعل ما يريد. الآية الثانية: ﴿وَمَن يُضْلِلِ اللَّهُ فَمَا لَهُ مِنْ هَادٍ﴾ [الحج: 16]. الآية الثالثة: ﴿إِنَّ اللَّهَ يَفْعَلُ مَا يَشَاءُ﴾ [الحج: 18]. وكأن المعنى: الله يفعل ما يريد، الله يفعل ما يشاء، وأنت عليك الإذعان.

شوفوا يا جماعة، سورة الحج كلها جو واحد ازاي؟ حتى قلنا لكم أمثله سورة الحج أمثله عقلية. يعني في الأول خالص: ﴿يَا أَيُّهَا النَّاسُ إِن كُنتُمْ فِي رَيْبٍ مِّنَ الْبَعْثِ فَإِنَّا خَلَقْنَاكُم مِّن تراب ثم من نطفة ثم من علقة ثم من مضغة مخلقة وغير مخلقة لنبين لكم ونقر في الأرحام﴾ [الحج: 5] إلى آخر المثال، وتمر الأمثال، أمثال السورة معظمها على فكرة عقلية، لياتي ختام السورة: ﴿يَا أَيُّهَا النَّاسُ ضُرِبَ مَثَلٌ فَاسْتَمَعُوا لَهُ ۚ إِنَّ الَّذِينَ تَدْعُونَ مِن دُونِ اللَّهِ لَن يَخْلُقُوا ذُبَابًا وَلَوِ اجْتَمَعُوا لَهُ وَإِن يَسْلُبْهُمُ الذُّبَابُ شَيْئًا لَّا يَسْتَنقِذُوهُ مِنهُ ۚ ضَعُفَ الطَّالِبُ وَالمَطْلُوبُ﴾ [الحج: 73].

ده مثال إيه؟ عقلي، مش كده؟ ومعظم بقى الأمثال يعني لو راجعتم السورة هتلاقوا معظم أمثال السورة أصلاً أمثال تخاطب العقل. ولذلك المفاجأة بقى: كان من خصائص سورة الحج أنها السورة الوحيدة اللي جه فيها آيتا سجدتين.

وما معنى السجود؟ الخضوع. خضوع لله سبحانه وتعالى. ولذلك السجدة الأولى أصلاً معنى السجود فيها الخضوع، مش السجود اللي احنا عارفينه اللي هو أن تضع الجبهة على الأرض. خلي بالكم، هو السجود الذي هو وضع الجبهة على الأرض هو غاية الخضوع والاستسلام لله، ده غاية الخضوع، إنما السجدة الأولى في سورة الحج مش هو السجود اللي هو وضع الجبهة على الأرض أصلاً، وإنما هو معنى الخضوع. قال الله عز وجل: الم ترى أن الله، وخلي بالكم قبل ما نقول، ودي آية السجود الوحيدة في القرآن كله اللي فيها هذا التفصيل، يعني في آية سجود آه ذكرت أن الله عز وجل يسجد له ما في السماوات وما في الأرض، بس إجمالاً كده. الآية الوحيدة اللي فصلت هي الآية دي في كل آيات السجود: ﴿أَلَمْ تَرَ أَنَّ اللَّهَ يَسْجُدُ لَهُ مَن في السَّمَاوَاتِ وَمَن في الأَرْضِ وَالشَّمْسُ وَالْقَمَرُ وَالنُّجُومُ وَالْجِبَالُ وَالشَّجَرُ وَالدَّوَابُّ وَكَثِيرٌ مِّنَ النَّاسِ وَكَثِيرٌ حَقَّ عَلَيْهِ الْعَذَابُ﴾ [الحج: 18].

هنا السجود اللي هو إيه؟ الخضوع، يخضع له من في السماوات ومن في الأرض، خاضعون له منقادون لأمره سبحانه وتعالى. وهنا لم يستثني إلا من مين؟ البعدة، مش كده؟ قال الله عز وجل: ﴿أَلَمْ تَرَ أَنَّ اللَّهَ يَسْجُدُ لَهُ مَن في السَّمَاوَاتِ وَمَن في الأَرْضِ وَالشَّمْسُ وَالْقَمَرُ وَالنُّجُومُ وَالْجِبَالُ وَالشَّجَرُ وَالدَّوَابُّ وَكَثِيرٌ مِّنَ النَّاسِ﴾ [الحج: 18]، والباقي: ﴿وَكَثِيرٌ حَقَّ عَلَيْهِ الْعَذَابُ﴾ [الحج: 18].

فجو السورة العام بتاع سورة الحج، هي سورة جاءت لضبط تلك العلاقة، لتوجيه تلك العلاقة بين العقل وبين النص، بين العقل وبين الشرع. فده الجو العام لسورة الحج.

طيب، إيه علاقة ده أصلاً بالحج؟ يعني ليه تسمي سورة الحج، ما احنا آيات سورة آيات الحج في سورة الحج هي نص صفحة تقريباً؟ فايه علاقة ده بالحج؟ لأن يا جماعة الحج هو الفريضة الفريضة الأشد إثباتاً لتلك القضية، قضية إيه؟ التسليم والاذعان والخضوع، هي الحج. مش عارف قلنا ده المره اللي فاتت ولا لا، احنا كنا أشرنا المره اللي فاتت بس مش فاكر قلنا إيه، يعني قلنا إيه ده المعنى الكبير في سورة الحج هنخليه المره الجاية.

دلوقتي في الحج يا جماعة، أنت بتروح علشان تطوف بحجر، وتستلم حجراً وتقبل حجراً: تطوف بحجر اللي هو الكعبة، حجارة، عبارة عن حجارة، مش كده؟ وتستلم حجراً: الركن اليماني والحجر الأسود. وتقبل حجراً: الحجر الأسود. وتصلي خلف حجر: مقام إبراهيم، حجر. وتسعى بين حجرين: الصفا والمروة. وترجم حجراً بحجر، مش كده؟ ودين الاسلام أصلاً جاء ليهدم عبادة الأحجار. هو الكفار بتوع مكة كانوا بيعبدوا إيه؟ شويه حجارة، مش كده؟ أصنام. فدين الإسلام جاء ليهدم عبادة الأحجار، وتروح أنت مناسك الحج كلها وتقف على حجر في الدعاء اللي هو عرفة، تلاقي العبادة عبارة عن كده، مناسك الحج كلها عبارة عن كده.

وده تحدي كبير جداً خلي بالكم، تحدي كبير للعرب يا جماعة. احنا عشان مش عايشين النفسيات دي خلي بالكم، فمش فاهمين قوي فين التحدي. لا، هو تحدي، هو تحدي أنك تيجي لواحد عربي معظم للأحجار، وأنت عاوز من جوه تسقط من داخله تعظيم الأحجار، وبعدين تقول له: طوف بالحجر ده، وبوس الحجر ده، واسعى بين الأحجار دي، وإياك أن تعظم الأحجار. ده سهل علينا دلوقتي، لأن احنا أصلاً ما عشناش حقبة تعظيم الأحجار. فاهمين دي؟

ولذلك سيدنا عمر كان ينطق بده بصوت عالي؛ ما هو سيدنا عمر معظم حياته قضاها كافر معظم للأحجار، وقل مثل ذلك على كل الصحابة، فيعلي صوته: والله إنِّي لأعلم أنك حجر لا تنفع ولا تضر. الكلام اللي بيعدي على أذهاننا ده وعلى آذاننا ده كده يا جماعة، ده نزاع داخلي عند البعض في وقتها، نزاع شديد، لأن هم قضوا معظم حياتهم يعتقدون في الأحجار أنها تنفع وتضر. فيعلي صوته: والله إنِّي لأعلم أنك حجر لا تنفع ولا تضر، ولولا أني رأيت رسول الله صلى الله عليه وسلم يقبلك ما قبلتك.

وهنا نلمح في فعل عمر رضي الله عنه هذا المعنى، معنى تعظيم النص، لأن ممكن العقل يقول هنا إيه: مش وقت نقول للناس بوسوا حجر! مش وقته، ليه؟ الناس دي حديثة عهد بإيه؟ بشرك وبتهظيم للأحجار، فالمصلحة دلوقتي تقتضي أن احنا ما نقول لهمش بوسوا الحجر. مش ممكن العقل يقول يقول هذا يا جماعة؟ ولو قلنا ده، هنوجد من يصدق ومن يروج لهذا. سيدنا عمر هنا يعلي تلك القاعدة: أنا هبوسك مع أني ممكن عقلي يكون بيقول مش وقته، طب ليه؟ عشان شفت النبي بيقبلك عليه الصلاة والسلام. فانا هعمل النص، هعمل النص ولن أقدم العقل عليه.

أنتم فاهمين بقى يا جماعة الحج جه ليه؟ الحج أصلاً جه بكل تلك العبادات، وخلي بالكم، طبعا العلماء تكلموا واجتهدوا في ذكر بعض الحكم والأسرار لتلك العبادة العظيمة الجليلة، لكن معنى أن احنا نبحث عن الحكمة والسر في تلك العبادات مش معناها أنها العلة التي من أجلها شرعت تلك العبادة، فتظل كثير من مناسك الحج هي عبادات أو أفعال تعبدية غير معقولة المعنى، يعني غير معقولة المعنى، يعني مالهاش علة، فإذا انتفت العلة انتفى الحكم، لا مش هتلاقوا كده، ماشي.

فالحج جاءت تلك الشعيرة، جاءت تلك العبادة ليه؟ علشان تروح وترجع وقد طاطأت رأسك لله عز وجل، وقد أضعت عقلك لنصوص الوحي، وإلا مش هعرف تحج، مش هعرف تحج. وقد سمعناها من بعض الناس ممن طمش الله على قلوبهم، أن هم ما راحوش يحجوا لأنهم مش فاهمين حاجة من اللي بيحصل هناك ده، ما هو احنا أصلاً الحجة عشان كده. بل لو دخلنا في تفاصيل تانية يا جماعة هتلاقوا حاجات عجيبة، يعني مثلاً: كل مناسك الحج في الحرم، أو كل مشاعر الحج في الحرم إلا عرفات في الحل، وهو أعظم الحج. طب ليه؟ ليه عرفات حل مش حرمي؟ وأشمعنى عرفات اللي حل، ما تبقى الجمرات اللي حل مش عرفات، ده الحج عرفة! فتلاقوا مالهاش برده، يعني أقصد أن العقل يقتضي تعظيم هذا الجبل تعظيماً زائداً وأنه يكون في حدود الحرم، تجد لا مش كده. طب ليه هنا أصلاً البقعة دي؟ أشمعنى البقعة دي؟ والبقعة دي في أولها ما كانتش.

احنا هندخل بقى إن شاء الله نقرا آيات الحج دلوقتي، ونشوف بقى المعنى ده أصلاً، معنى العقل أن العقل مثلاً لا يقتضي ذلك، ويؤمر إبراهيم بذلك. فأشمعنى البقعة دي؟ طب أنت هتسيب مراتك وابنك في حتة هنا ليه؟ ما فيش عقل يقتضي ده. طب هسيبهم في حتة، أسيبهم في حتة قريبين من قبيلة حتى لا ما يحصلش كده؟ طب حتة فيها بير مية؟ لا ما فيش كده. طب حتة فيها شجرة؟ ما فيش كده، بواد غير ذي زرع لا في مية ولا في شجرة ولا في أي حاجة، في صحرا كده، طب ليه هنا؟ هو كده.

والمرأة الصالحة فهمت ده لما ولى إبراهيم، وراحت له ثلاث مرات، عندنا درس اسمه اسمه «أني مهاجر»، ودرس اسمه «قصة الذبيح»، في واحد منهم هتلاقوا القصة دي مش فاكر بقى في أنهي فيهم. المهم تمشي وراه وتقول له إيه: إلى من تتركنا في هذا الواد الذي ليس فيه أنس ولا شيء وهي تحب الأنس؟ وهي تحب الأنس، روايتين. فما ما يردش عليها والحديث في صحيح البخاري: الله أمرك بهذا؟ قال: نعم.

كان يا جماعة مقتضى العقل: ما ينفعش تسيبنا هنا، ما ينفعش، بالعقل ما ينفعش سايبنا هنا لمين وفين؟ ده امرأة نفساء لسه والدة ضعيفة، هعمل إيه؟ ده العقل. وبعدين المرأة تفهم إبراهيم ما بيجاوبش كأنه بترجعه عشان يرجع ياخدهم فما رجعش ياخدهم ثلاث مرات، تقوم تفهم: هو في شرع؟ هو في نص؟ الله أمرك بهذا؟ في نص في المسألة دي؟ قال: نعم. خلاص، إذن لن يضيعنا. طب ازاي مش هيضيعك؟ ما أعرفش، ما أعرفش ازاي مش هيضيعني، مش شغلتي، بالعقل احنا هالكين ده.

إنما في نص خلاص: «سَمِعْنَا وَأَطَعْنَا» إذاً لن يضيعنا. خلصت.

فالحج كله من بدايته أصلاً؛ من بداية اختيار البقعة، ومن بداية اختيار المشاعر، وأن ده في الحل وده في الحرم، إلى أفعال الحج؛ تجد الموضوع أنه صراع مع العقل، إن صح التعبير، صراع مع العقل. طب ليه الحتة الحر، سيبكم بقى من زمان ومش عارف إيه وبتاع، ليه الحتة الحر، ما الطايف جنبنا أهي، وجو لطيف وحلو، يبقى اللي رايح يحج ولا رايح يعتمر يروح يقعد في جو حلو، ليه الحتة الحر دي اللي معظم السنة حر؟

احنا في صراع مع العقل في كل شيء في هذه العبادة. صراع مع العقل ليه؟ عشان تخضع، عشان عقلك يخضع، أنت جاي هنا عبد، والله يفعل ما يريد، يفعل ما يشاء، الآيتين وأنت مالكش دعوة، أنت حد.

فده الجو العام بتاع سورة الحج، وده المعنى العام اللي عاوزين نوصل له من سورة الحج، والذي في تضاعيفه جاءت آيات الحج لياتي الأمر العجيب لسيدنا إبراهيم: ﴿وَأَذِن في النَّاسِ بِالحَجِّ﴾ [الحج: 27]، وده لفظ الحج اللي جه في السورة.

إيه ده بقى يا جماعة، عيشوا عيشوا عيشوا ده، عشان تفهموا المعنى. سيدنا إبراهيم دلوقتي أمر ببناء البيت، واحنا اتكلمنا عن بناء البيت الدرس اللي فات، ماشي. طب إيه بناء البيت، فين قولين: تيجي ريح تيه، تعمل التراب، تسف التراب، فيظهر إيه أساسات البيت اللي هو أصلاً كان مبني، أو تيجي سحابة تقف ظلها على قدر البيت ثم يسمع صوتًا من السحابة: ابن البيت على قدري، يعني ابن إيه الحتة المتضللة دي؟ أياً كان المهم عرف: ﴿وَإِذ بَوَّأنا لِإِبراهيمَ مَكانَ البَيتِ﴾ [الحج: 26]، عشان الآية دي: ﴿وَإِذ بَوَّأنا لِإِبراهيمَ مَكانَ البَيتِ﴾.

وبعدين إبراهيم يؤمر بثلاث حاجات: ألا تشرك به شيئاً، وطهر بيتي. ألا تشرك به شيئاً وطهر بيتي قلناها المرة اللي فات. ﴿وَأَذِن في النَّاسِ بِالحَجِّ﴾ ويجي لفظ الحج بقى في الآية دي. إيه اللي حصل؟ خلص إبراهيم بناء البيت، جاء أمر عجيب من الرب اللي هو إيه؟ اقف قول للناس حجوا. فين؟ هنا، اقف هنا. هنا فين؟ في الصحرا. على قولين: إنه هيطلع يقف على المقام الحجر، أو هيطلع على أبي قبيس جبل. قبل ما يطلع يقول له إيه يا رب، أنا يبلغ أذن في الناس إيه، أن يبلغ صوتي؟ شوف يا جماعة، العقل يقول إيه: مالوش، أنا بعمل حاجة مالهاش معنى، بعمل حاجة بلا جدوى، ده العقل.

فإبراهيم يستشكل، لا يرد الأمر، هو بيستفسر: أنا يبلغ صوتي؟ يأتي الأمر: يا إبراهيم، عليك النداء وليس لك من الأمر شيء، عليك النداء وعلينا البلاغ، أن يبلغ صوتك مش بتاعتك. أتاك نص شرع: أذن في الناس، قم فأذن، انتهت. طب أن يبلغ صوتي يا إبراهيم؟ عليك النداء وعلينا البلاغ.

فوقف إبراهيم ونادى: أيها الناس، إن الله قد أمركم أن تحجوا بيته فحجوا، أو كما قال: إن الله قد بنى بيتاً وامركم أن تحجوا إليه فحجوا. تقول الرواية: فبلغ صوته كل كائن ممن يجب عليه الحج في أصلاب الآباد وارحام الأمهات، إلى آخر ما كان: يا إبراهيم عليك النداء وعلينا البلاغ.

وهو ده الدرس الأعظم أصلاً في سورة الحج: ﴿وَأَذِن في النَّاسِ بِالحَجِّ يَأتوكَ رِجالاً﴾ [الحج: 27]. رجالا يعني صح، أمال ماشيين رجالا، جمع راجل، برضو مش راجل، راجل يعني ماشي على رجله، يعني ماشي اه. ﴿وَعَلى كُلِّ ضامِرٍ يَأتيَنَ مِن كُلِّ فَجٍّ عَميقٍ﴾ [الحج: 27]. وعلى كل ضامر، يعني البعير الهزيل من كتر من طول السفر، يأتينا من كل فج عميق.

ونجد برضو حاجة عجيبة جداً في آيات الحج يعني: ﴿وَإِذ بَوَّأنا لِإِبراهيمَ مَكانَ البَيتِ أَن لا تُشرِك بي شَيئاً وَطَهِّر بَيتي لِلطَّائِفينَ وَالقائِمينَ وَالرُّكَّعِ السُّجودِ﴾ [الحج: 26]. وده احنا قلنا بقى المرة اللي فاتت في درس بناء البيت. ﴿وَأَذِن في النَّاسِ بِالحَجِّ يَأتوكَ رِجالاً وَعَلى كُلِّ ضامِرٍ يَأتيَنَ مِن كُلِّ فَجٍّ عَميقٍ * لِيَشهدوا منافع لهم ويذكروا اسم الله في أيام معلومات على ما رزقهم من بهيمة الأنعام﴾ [الحج: 27-28].

في حاجة عجيبة جداً يا جماعة هنا؛ أن الله عز وجل أعاد ذكر بهيمة الأنعام كثيراً في آيات الحج هنا أصلاً. يعني الأنعام دي اتذكرت مش مرة ولا اتنين، أكتر من كده في آيات الحج، في سورة الحج بس. برضو انتبهوا بقى هنا لمعنى آخر، ومعنى في أول آية قال: ﴿عَلى ما رَزَقَهُم مِن بَهيمَةِ الأَنعامِ﴾ [الحج: 28، 34].

خلي بالكم يا جماعة عشان تصير بهيمة الأنعام رزقاً، لازم كم حاجة؟ لازم ثلاث حاجات عقلاً كده عشان يبقى اسمها رزق. فلازم ثلاث حاجات: أول حاجة أنها تتخلق، تبقى موجودة أصلاً يعني، تبقى مخلوقة مش كده. تاني حاجة أنها تبقى مباحة لينا، ما هو لو مخلوقة وحرام تاكلها ما بقتش رزق لك، صح؟ فيبقى أول حاجة أنها تخلق أصلاً، وتاني حاجة أنها تكون مباحة لينا، ودول أساسيين.

وفي حاجة ثالثة ما هياش أساسية قوي، لكن تكمل بها النعمة، وهي أنها تكون مسخرة لك. يعني إيه مسخرة لك؟ تشدها تتشد، تنزلها لتحت، تقعد، تربطها، تستناك، دي معنى أنها إيه؟ مسخرة لك. والألفاظ الثلاثة دول ربنا ذكرهم في سورة الحج في الأنعام بس.

تعالوا الأول بس نفهم، يعني إيه الأولى واضحة، والثانية واضحة، أن هي تبقى مخلوقة، لازم تبقى رزق، مش مش موجودة في الدنيا لازم تبقى موجودة، ولازم تبقى مباحة يعني ما تبقاش حرام يعني، الأسد ما نقدرش نسميه رزق لك، ليه؟ ما هو حرام تاكله، يبقى ازاي رزق لك؟ وقلنا الثالثة ما هياش ضرورية قوي أنها تبقى مسخرة ليه، لأن احنا عندنا مثلاً بعض الوحوش حلال ليك انك تاكلها، الوحوش اللي هي تستوحش من الانسان يعني وتجري منه وكده تنفر منه، حلال انك تاكلها بس ما تتمش بها النعمة، ليه؟ لان صعب قوي انك تروضها وتجيبها وتمشي معاك لغايه ما تاخدها وتدبحها.

احنا يا جماعة الجمل بيبقى واقف، الجمل ده اللي هو أكبر بهيمة الأنعام خلقاً، الجزارين عارفين الكلام ده، هو أسهلهم في إظهار الروح، لأن هو هو مش بيذبح، عفوا هو مش بيذبح، هو بينحر، ماشي فما قلتش تذبح، عشان كده ممكن يذبح يعني عادي بس هو السنة في الجمال النحر مش الذبح. النحر ده الجزارين عارفين الكلام ده، الجمل، الذبح ده بيبقى مستعرض، يعني لما تيجي تذبح خروف بتذبحه كده، تيجي تذبح بقرة أو جاموسة بتذبحها كده، الجمل بينحر، بيتغذ كده بالطول، ماشي في حته بيسموها ثغرة النحر، ماشي لأن الوداجين ورا بعض عند الجمل مش بالعرض زي بهيمة الأنعام.

على كل حال فبعض الجزارين يعملوا كده، عارفين كده يبقى معاه حاجة كده إيه الجمل بقى بينحر قائم، يعني أنت عشان تذبح جاموسة ولا عجل بالخلقة لازم الأول تنايمها على جنبها عشان تذبحها، الجمل مش كده، الجمل وهو واقف كانوا يعملوا ايه؟ ينحروه قائماً معقول اليد اليسرى يعني الرجل اللي قدام الشمال يربطوها كده وبعدين بعدين ينحروه وهو قايم، عشان كده ربنا قال إيه: ﴿فَإِذا وَجَبَت جُنوبُها فَكُلوا مِنها﴾ [الحج: 36] وجبت يعني ايه؟ سقطت في الآية اللي معانا: ﴿فَإِذا وَجَبَت جُنوبُها﴾ يعني سقطت جنوبه لأن هو بينحر قائماً.

نرجع بقى تاني فكرة التسخير؛ أنه سخر لك بهيمة الأنعام سخرها لك، وأنت تقودها لحتفها، لذبحها، لنحرها. حد تامل المعنى ده قبل كده يا جماعة؟ أنت إيه في الجمل؟ أنت يعني لو الجمل ده ما كانش مسخر، فأنت إيه في الجمل؟ هي خبطة واحدة من راسه ولا من رجله انتهيت، ماشي. أنت إيه في البقرة ولا الجاموسة؟ ده بس البقرة والجاموسة لو بس إيه حرنت شوية كده ولا بتاع بتموت لها خمسة ستة بس بالأيه بال... أو لو جريت أبقى قابلني مين يجيبها لك؟ لكن ربنا خلقها مسخرة، يعني إيه مسخرة؟ يعني في كل وقت أنت بتجرها بتتجر، إلا بس لو عاينت الموت بقى أن يعني اختها بتموت قدامها ولا بتاع، ماشي ما طبيعة الحيوان أنه يهرب من الموضوع ده، أنما لغايه ما جبتها هي مسخرة لك. وبعض الجزارين الشطار يعرف ينايمها بالمسايسة يعني مش محتاج إيه معافرة.

حد عمره تامل فكرة التسخير دي؟ ربنا ذكرها، على فكرة أنا قلت لكم ربنا ذكر الخلق اللي هو الجعل، وذكر كونه مباحه لك، وكونها مسخرة، لكن لفظ التسخير أين جاء؟ قال سبحانه وتعالى: ﴿وَالبُدْنَ جَعَلناها لَكُم مِن شعائِرِ اللَّهِ لَكُم فيها خَيرٌ﴾ إلى آخر الآية قال: ﴿كَذَلِكَ سَخَّرناها لَكُم لَعَلَّكُم تَشكُرُونَ﴾ [الحج: 36]. فالكلام على الأنعام جه كتير، وجاء أنه خلقها، وجاء أنه اباحها، وجاء أنه سخرها لك.

نرجع تاني سخرها لك، يعني أن تخضع لك، أن تكون طوعاً لك، وأنت ساحبها لحدفها لقتلها. وكان المعنى، والله أعلم والله أعلم، أنه في تنبيه لمعنى أن أنت أيها الانسان نريد منك ذلك، ونحن نقودك إلى نجاتك. بهيمة الأنعام سخرناها لك تقودها وأنت رايح تدبحها، هي مسخرة لك، فكن كذلك مع ربك وهو يقودك سبحانه وتعالى أو يسوقك أو يرشدك إلى ما فيه نجاتك، ما فيه حياة حياتك.

ولذلك هتلاقوا برضو المعنى موجود في سورة العاديات، مش كده؟ المعنى بقى واضح في سورة العاديات: ﴿وَالعادياتِ ضَبحاً * فَالمورياتِ قَدحاً * فَالمغيراتِ صُبحاً * فَأَثَرنَ بِهِ نَقعاً * فَوَسَطنَ بِهِ جَمْعاً﴾ [العاديات: 1-5] كل الصفات دي صفات للإيه للخيل، عارفين كده ولا لا؟ كل دي صفات للخيل وقت الحرب. قل لي بالله عليك نتخيل كده، معلش نتخيل أن أنت راكب بني آدم زيك، تخيل كده والبني آدم ده يعني إيه مالوش فيها، ما الحرب دي ولا تعنيه في أصلاً، ما تعنهوش في شيء وعمال تقول له: أقدم خش بيا، مش هيخش بيك في حته هو الحرب لا تعني في شيء، يا عم أنا مال أنا أدخل فين؟ عمر ما يعمل كده بني آدم. الفرس عمل كل ده بيك: ﴿وَالعادياتِ ضَبحاً * فَالمورياتِ قَدحاً﴾ الحجارة اللي عليها نار تدوس عليها وأنت راكب عليها ما فيش مشكلة، وبعدين: ﴿فَوَسَطنَ بِهِ جَمْعاً﴾ في وسط الحرب تقتحم بيك. ده كله الخيل عملته معاك ليه؟ لمجرد انك بتحسن، تأكلها وتشربها ومش كده، الآية بعد على طول: ﴿إِنَّ الإِنسانَ لِرَبِّهِ لَكَنودٌ﴾ [العاديات: 6].

إيه علاقه ده بده؟ اللي احنا بنقوله بقى من شويه، الخيل لما أحسنت إليها، أكلتها وشربتها، اقتحمت بك المهالك. وأنت أيها الإنسان، نعم الله عز وجل نازلة لك ليل نهار، عملت إيه؟ كفرت لله. فقل مثل هذا هنا ذكر بهيمة الأنعام وذكر تسخير بهيمة الأنعام لك. يبقى واحنا بندبح كده يا جماعة في العيد، واللي هيسافر منا الحج، ويرى ما يذبح ويهل الله عز وجل هناك، يقف يتفكر في هذا المعنى، معنى التسخير.

وقل والله العظيم احنا لو فعلاً قل سبحان الله إيه الجمل ده اللي عايل صغير، يروحوا الهرم، روحوا الهرم، عيل سبع سنين يقود كتيبة من الجمال، وينزل ويطلع ويركب ويعمل عيل سبع سنين. سبحان الملك، إيه اللي يخلي الخلق ده بالحجم ده ينقاد للطفل ده؟ طب وايه المعنى يعني غير بقى ده، غير إيه المعنى؟ المعنى: كن كذلك. كن كذلك مع ربك عز وجل ولذلك ذكرت كثيراً بهيمة الأنعام هنا.

طيب، نشوف الأسئلة عشان إيه.

السلام عليكم. وعليكم السلام. اني احبك في. أحبك الله. حاولوا ما تكتبوش اسم ربنا في الورق.

بمحاول استخدم كل الوسائل عشان أصصحى لصلاه الفجر، لكن بيكون في ثقل أني أقوم من النوم. يعني صلاه الفجر أحسن في يومك وبعدين يعني يعني الاستيقاظ لصلاه الفجر مش بس بما تعده من أسباب للاستيقاظ، بل الاستيقاظ لصلاه الفجر يبدا من امتى؟ من بعد صلاه الفجر، مش من قبل صلاه الفجر. حد فاهم حاجة؟ يبدا من بعد صلاه الفجر لأنهي فجر؟ الفجر اللي بعده. أنت مقضي يومك ازاي؟ حينها عادي جداً بنشوف ناس ما بتظبطش منبهات أصلاً. أنا أنا ناس أعرفها كده، ما بتظبطش منبه وبتصحى في نفس يعني نام الساعة 12 هيصحى، نام 2 ونص بيصحى 3، وما بيظبطش مش منبه. فالاستيقاظ لصلاه الفجر، الاستعداد له يبدا من بعد صلاه الفجر السابقة، خلاص.

موضوع مهم جداً هو واضح إنه مهم بس أنا مش عارف أقرأ، خطك صعب. القريبة في الصلاة... الحاجة القريبة في الصلاة مش عارف إيه على الحاجة برضو مش عارف إيه كقوله حاجة يعني ماشي.

السلام عليكم يا شيخ، بحبك في الله وبموت فيك. وانا والله بموت فيك بموت فيك في الله يعني. طب بحرق. يا خبر إيه ده؟ دخلت بحرق بحرق عمان عشانك يا شيخ، إيه ده؟ ولا أنا يا جماعة مش كده، مش عارف مش عارف أقرأ.

كيف الواحد يبدأ في طلب العلم؟ إن شاء الله هعمل درس عن طلب العلم إن شاء الله عشان السؤال ده السؤال ده بتسأله كتير يعني. وديله تجوزها أنت عاوز إيه بالظبط؟ أنت تأكد بتموت فيا، يعني أسال الله أن يقدر لك الخير.

يسرني أن أطلب العلم على إيد حضرتك وأنا كمان بعد.

أنا بقسط شقة مع بنك، القسط لو قسط ربوي يبقى تحاول تخرج منه في أول وقت تعرف تخرج منه فيه، وما تكملش، يعني تعجل كله وتتقلل الربا كده يعني.

دقيقتين وهنخلص عشان الأذان، ماشي.

واحد بيسال عن جماعة التبليغ والدعوة. السؤال ده برضو بتسأله كتير. جماعة إخواننا طبعا وبنحبهم، ناس عندهم بذل شديد وحرص شديد، ونحسبهم عندهم إخلاص ونحسبهم انهم يعني هذا نراه في أحوالهم، يعني احنا مش بنتالى على الله، لكن من أحوالهم نحسبهم مخلصين، ونحسبهم عندهم هم، عندهم هم، يعني اللي يسيب بيته ليخرج يدعو إلى الله عز وجل، وبعدين ممكن يتعرض لمضايقات، ممكن يبقى راجل كبير في.

ممكن يبقى منصب كمان فنحسبه عنده هم، ونحسبه مخلص، فيتعلموا اللي هم رايحين يدعوا إليه، يتعلموه ويتعلموا أحكام، طبعا يتعلموا ما لا يسع المسلم جهله أولاً، ده مهم، وإن يتعلموا الأحكام اللي بيتعرضوا ليها، بس بعد كده يدعوا إلى الله، طبعا يبقى يتعلموا ما لا يسع المسلم جهله دي أول حاجة، تاني حاجة بيعملوا حاجة بيعرفوا أحكامها، مش بقول هم ما بيعرفوش، ده أنا يعني بقول اللي مش عارف يعرف ده ليه، علشان لما يجي يعمل حاجة يعملها بعلم، ما يعملهاش بجهل ماشي.

واحد بيقول نومي ثقيل وبنام كتير في اليوم وما بعرفش أصحى، طبعا السؤال عام قوي، يعني ممكن يبقى أنواع أكلُك بتقلك، أو أوقات أكلُك بتاكل قبل النوم على طول مثلاً أو بتسهر، ده كله في أمور الدنيا، أو عندك خلل مثلاً معين في جسمك محتاج علاج، وممكن يبقى الذنوب بتقيدك وتمنعك الخير، فالنصيحة الشرعية التوبة والاستغفار، زي ما قلنا إيه لأخوك من شوية من بداية اليوم يكون يومك لله عز وجل فربنا يعينك إنك تقوم.

واحد بيقول كنت بركب دش وبعدين سبته بقى يعمل تلفزيونات يعني يصلحها، الاتنين مش واحد، يعني يظهر الدش أسوأ والله أعلم.

هل اللي ذكرته في الدرس ده سؤال مهم؟ إنه احنا ما نخضع ونسلم وعدم معرفة الحكمة، ده يتنافى مع مقاصد الشريعة؟ لا ما يتنافيش مع مقاصد الشريعة، احنا قلنا العقل نعمله في معرفة الحكمة، أنا ما قلتش ما نعرفش الحكمة دي، ما قلتهاش، وقلت لكم حتى إن العلماء تكلموا في أسرار العبادات، أسرار الحج والحكم من تلك، لكن ما هياش علل، الفرق بين الحكمة والعِلة معروف بقى في أصول فقه، مش هنديكم أصول فقه دلوقتي، إنما عادي العلماء تكلموا في الأسرار والحكم.

إنما ما وصلناش للحكمة يعني قعدنا نبحث وما لقيناش حكمة، يبقى احنا من الأول موطنين أنفسنا إن كده الأمر هيمتثل، كده ما فيش نقاش، كده كده هنعمل ماشي، فبالضبط يا حاجة زي إيه؟ زي واحد بيقول لك إيه، قوم دلوقتي اطلع قدام المسجد، اطلع بره اقف قدام المسجد، فقلت له إيه من عيني الاتنين، لو انت معظم لهذا الشخص يعني هتعمل إيه حاضر من عيني الاتنين وتطلع تقف بره المسجد.

طيب انت مش معظم الشخص فيقول لك قوم دلوقتي اطلع بره المسجد فتقول له ليه إن شاء الله اطلع؟ يقول لك لا بد واحد بيوزع على اللي معديين كل واحد عشرة آلاف جنيه، هتعمل إيه؟ أنت هنا لم تمتثل إلا لما عرفت حكمة الأمر، فاهمين الفرق يا جماعة؟ إنما الأول مش فارق معه حكمة، هو الأول ده هو امتثل لتعظيمه للأمر، التاني امتثل لأنه معظم لعقله هو، فلما عقله اقتنع بالحكمة، لأن ممكن لو أنا نفس الشخص ده قلت له إيه لا أبدا في حد بيوزع عشرة جنيه على كل واحد ممكن يفضل قاعد عقله ما شافش إن مجهود المروح مناسب مع الآية المكافأة اللي هيحصل عليها عشرة جنيه قال لك لا هفضل قاعد، فده معظم لعقله مش معظم لأمر.

ها، فاحنا مش بنقول ما نعرفش حكم، لا نعرف حكم، والحكم دي بتحببنا في ربنا وبتخلينا نعرف يعني نعرف شيئاً من عظمته وحكمته سبحانه وتعالى، إنما لو ما عرفناهوش موطنين أنفسنا سمعاً وطاعاً، سمعنا وأطعنا غفرانك ربنا وإليك المصير.

قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.