د. أحمد عبد المنعمبسم الله والصلاة والسلام على رسول الله صلى الله عليه وسلم. المفروض إن شاء الله إن احنا كنا نبدأ مع بعض سورة الأنعام، لكن أنا قلنا الدرس اللي قبل سورة الأنعام هيبقى مقدمة هامة في التعامل مع القرآن عموماً وأهمية كتاب الله عز وجل في الهداية. وإن شاء الله النهاردة هناخد آيات من سورة النحل، الآيات اللي في سورة النحل بتكلم عن سنن كونية الله عز وجل سنها في الكون، لكن السنن الكونية ديت لها فوائد واسقاطات كسنن، وهنتكلم عن الدليل على إن احنا ينفع نسقط السنن الكونية على السنن المعنوية في القرآن.
كتاب ربنا سبحانه وتعالى أنزله الله عز وجل هدى للناس، فيجب على الناس إن هم يتعاملوا مع كتاب الله حتى نصل إلى الهدى. كل بعد عن القرآن هو بعد عن الهدى، وكل بعد عن القرآن هو بعد عن النور. إذاً المجتمع الخالي من تداول القرآن بينه مجتمع بيعيش في ظلام وبيعيش في ضلال وبيعيش في استخفاف، ممكن يستخف. احنا لسه من الآيات اللي قرأناها في صلاة العشاء في آخر سورة سبأ، ربنا سبحانه وتعالى بيقول للنبي صلى الله عليه وسلم على لسان النبي صلى الله عليه وسلم: ﴿قُلْ إِن ضَلَلْتُ فَإِنَّمَا أَضِلُّ عَلَىٰ نَفْسِي ۖ وَإِنِ اهْتَدَيْتُ فَبِمَا يُوحِي إِلَيَّ رَبِّي﴾ [سبأ: 50].
يبقى إذا الهداية النبي صلى الله عليه وسلم بيقول لو فيه هداية في حياتي فبسبب إيه؟ بسبب الوحي. ربنا بيقول للنبي صلى الله عليه وسلم في آخر سورة الشورى: ﴿مَا كُنتَ تَدْرِي مَا الْكِتَابُ وَلَا الْإِيمَانُ﴾ [الشورى: 52]. يبقى إذا من غير وحي احنا ما نعرفش إيه الكتاب وإ ايه التشريعات وإيه الإيمان، ما نعرفش هنضل. يبقى لو ابتعدنا عن القرآن، ده كلام مين؟ للنبي صلى الله عليه وسلم، فبالتالي لنا احنا من باب أولى.
إذاً يجب أن احنا نتعامل مع القرآن حتى نتفاعل مع القرآن ونخرج نور، ولا سيما الدعاء إلى الله عز وجل. المفروض لما ييجوا يدعوا إلى الله عز وجل يكون الكلام اللي بيخرج منه، النقطة دي مهمة جداً، الكلام اللي بيخرج من الدُّعاة لابد أن يكون نتيجة تفاعل مسبق بين الدَّاعي وبين القرآن، تفاعل مسبق بين الدَّاعي وبين القرآن ينتج نور، يوصل النور ده للناس.
النبي صلى الله عليه وسلم بيقول: «مثل ما بعثني الله به من الهدى والعلم كمثل غيث أصاب أرضاً»، فكان منها أرض نقيّة. الأرض نضيفة نقية فقبلت الماء الكثير وأنبتت العشب والكلأ الكثير. فكان منها أرض نقية قبلت الماء أنبتت العشب والكلأ الكثير. يبقى نقية، قبلت، أنبتت؛ دول التلات عناصر في المعادلة اللي احنا عايزينها عشان نخرج للناس العشب والكلأ الكثير أو نخرج للناس النور. لازم يبقى قلوبنا نقية، تقبل الوحي، تنبت التفاعل.
قصة تفاعل القلوب مع القرآن فيه نصوص كتير فيها، وكان فيه درس مسبق بيتكلم عن النصوص اللي بتتكلم عن تفاعل القلب مع القرآن، فمش عايزين نطول فيه. المهم لابد يحدث تفاعل بين القلب والقرآن. التفاعل ده ممكن يحدث في صورة فردية أو ممكن يحدث في صورة جماعية. أفضل سورة لتفاعل القلب مع القرآن كصورة فردية في قيام الليل.
ربنا سبحانه وتعالى بيقول: ﴿إِنَّ نَاشِئَةَ اللَّيْلِ هِيَ أَشَدُّ وَطْئًا وَأَقْوَمُ قِيلًا﴾ [المزمل: 6]. ناشئة الليل قيل الصلاة اللي بتنشأ بالليل، وقيل المعاني اللي بتنشأ بالليل نتيجة القيام بالقرآن. يبقى فيه نور، فيه تفاعل بينتج أو بتعبير الحديث ينبت العشب والكلأ، فيه تفاعل بينتج نور لما الإنسان بيقوم بالليل يصلي، قلبه بيتفاعل مع القرآن، يتفاعل مع القرآن فيطلع نور، بيحدث بالليل في الخلوة بعيد عن دوشة الناس وانشغال أسبابه.
هنا ناشئة الليل معاني بتنشأ بالليل، أشد وطئاً أي أشد تأثيراً على الإنسان. يبقى تفاعل القلب مع القرآن يأسر في حياة الإنسان. التفاعل ده لما بييجي في قيام الليل حياة الإنسان بتتغير، وأقوم قيلاً وأكثر فهماً وسداداً في الرأي.
من صور تفاعل الناس مع القرآن بصورة جماعية حديث النبي صلى الله عليه وسلم اللي هو: «ما اجتمع قوم في بيت من بيوت الله يتلون كتاب الله ويتدارسونه». مش بس تلاوة، مجموعة بتجمعوا في المسجد، مكان طاهر، قلوب مجتمعة مش مختلفة، مش متنافرة، مش جايين يتخانقوا. لذلك النبي صلى الله عليه وسلم بيقول: «اقرؤوا القرآن فإذا اختلفتم عليه فقوموا». لو هتقروه عشان تقعدوا تتخانقوا، ده يجيب دليل وده يجيب دليل وتقعدوا تضربوا القرآن بعضه ببعض، لأ، ما تقروش قرآن، قوموا دلوقتي، اعملوا أي عمل صالح تاني.
ما اجتمع قوم، يعني قلوب متألفة في بيته، في مكان طاهر، في بيت من بيوت الله، يعملوا إيه؟ يتلون كتاب الله ويتدارسونه. مدارسة درس إنك بتعيد حاجة، زي مَكَنَة اللي بتدرس الحبوب كده، تقعد تلف عليها، تلف عليها. فالمدارسة إنك تقعد تيجي على المعنى مرة واتنين وتلاتة عشان تطلع الخبايا في المعنى ده. ويتدارسونه، إلا غشيتهم السكينة، وأحفتهم الملائكة، ونزلت عليهم الرحمة، وذكرهم الله فيمن عنده.
احتفاء كوني بناس مجموعة صغيرة قاعدة في مسجد صغير، ليه؟ لأن المجموعة الصغيرة دي بتنتج أفضل شيء الكون كله محتاجه. بتنتج إيه؟ دي عملية إنتاج النور للناس، أخطر من إنتاج مفاعل نووي. يعني أي عملية صناعية كبرى بتتم في العالم هي مهمة جداً، لكن مهمة لدنيا الناس. تفاعل الطائفة المؤمنة البسيطة اللي قاعدة في مسجد بينتج نور. لذلك ربنا بيقول إيه؟ الملائكة بتحفهم، سواء بقى حباً لهم أو حفظاً لهم عشان الشياطين ما تخشش. الملائكة تقعد تحفهم، ورحمة تنزل عليهم عشان يوفقوا، والسكينة عشان ما يختلفوش، وربنا يذكرهم تشريف لهم. احتفاء، رحمة، وسكينة، وربنا بيذكرهم في الملأ الأعلى والملائكة. ليه بيعملوا إيه؟ بيتدارسوا القرآن.
يبقى عملية التفاعل لإنتاج النور هي أخطر عملية بتتم في هذا الكون. ونظراً لأن هذه العملية، عملية إن الإنسان يقرأ القرآن ويتدبر القرآن، عملية بهذه الخطورة لدرجة أن الملائكة، احنا قاعدين دلوقتي بنتدارس كتاب ربنا، العملية دي عملية خطيرة. الشياطين بتنتهز الفرصة، لذلك ربنا بيقول حتى في السورة اللي معانا في سورة النحل: ﴿فَإِذَا قَرَأْتَ الْقُرْآنَ فَاسْتَعِذْ بِاللَّهِ مِنَ الشَّيْطَانِ الرَّجِيمِ﴾ [النحْل: 98]. الصالح اللي لازم قبل ما تبدأه، تستعيذ بالله. التفاعل مع القرآن ليه؟ لأن عملية خطيرة. الشيطان أخطر عملية مش عايزة تحصل، اتفضل، هي دي إنك أنت تتفاعل مع القرآن، هيموت لو دي ما تحصلش.
فأول لما تيجي تبدأ المصحف، تفتح المصحف ولسه هتقرا، الشيطان يجيلك. فربنا بيقول لك خد بالك قبل ما تقرا القرآن عشان توفق للفهم وقلبك ما يبقاش منصرف وذهنك يبقى مركز: استعذ بالله من الشيطان الرجيم. إذاً هذه العملية الخطيرة تحتاج إلى سداد وتوفيق من ربنا سبحانه وتعالى، سواء كانت بصورة فردية في قيام الليل، أو بصورة جماعية تدارس القرآن في بيت من بيوت الله.
العملية دي بتنتج إيه؟ بتنتج ناشئة الليل، بتنتج تنبت العشب والكلأ الكثير، بتنتج السكينة والرحمة، يبقى بتنتج حاجات كتير. ربنا برضه قال في سورة النور: ﴿اللَّهُ نُورُ السَّمَاوَاتِ وَالْأَرْضِ ۚ مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْبَاحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيُّ يُوقَدُ مِنْ شَجَرَةٍ مُبَارَكَةٍ زَيْتُونَةٍ لَا شَرْقِيَّةٍ وَلَا غَرْبِيَّةٍ﴾ [النُّور: 35]. ربنا قال يوقد من شجرة، أياً كان، الآيات دي ممكن تبقى عايزة درس تاني، النتيجة النهائية أن ربنا بيقول تفاعل القلب مع القرآن بيعمل إيه؟ يعمل يوقد.
الله نور السماوات والأرض مثل نوره، يعني نور الإيمان في قلب المؤمن كمشكاة فيها مصباح. المشكاة دي السليمة، المصباح ده القلب السليم، المصباح في زجاجة، الزجاجة كأنها كوكب دري، صدر المؤمن. يوقد من شجرة مباركة زيتونة. صدر المؤمن وقلب المؤمن وفطرة المؤمن بتكتسب الوقود منين؟ هو أنت عايز تبقى قوي؟ لذلك الآيات اللي بعدها: ﴿فِي بُيُوتٍ أَذِنَ اللَّهُ أَنْ تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ * رِجَالٌ لَا تُلْهِيهِمْ تِجَارَةٌ وَلَا بَيْعٌ﴾ [النُّور: 36-37]. ازاي بقوا رجالة؟ وأزاي بقى عندهم قوة ضد فتن الدنيا؟ ضد فتن الدنيا، لا تلهيهم تجارة ولا بيع. جابوا الوقود ده منين؟ جابوه من شجرة مباركة زيتونة، ده قلب القرآن.
يبقى الإنسان عشان يكتسب وقود ويبقى إنسان متقيد، يقول لك قلب متقيد يعني قلب لا يخاف، قلب مشتعل، قلب متحمس، يقول لك ده إنسان متقيد. الوقود في اللغة يوقد، فيها معنى الإضاءة، فيها معنى الطاقة، فيها معنى القوة. يبقى الطاقة والقوة والإضاءة والنور ده بييجي منين في قلب المؤمن وفي صدر المؤمن؟ بيجي منين؟ في تفاعل القرآن.
وسبحان الله آية سورة النور شبه حديث ما اجتمع قوم. ربنا قال مشكاة فيها مصباح؟ ده صدر المؤمن والفطرة السليمة، زي القلوب الطيبة اللي اجتمعت في المسجد. يوقد دي عاملة زي أنبتت العشب والكلأ الكثير وعاملة زي السكينة والرحمة. فين؟ في بيوت أذن الله أن ترفع ويذكر فيها اسمه، زي حديث قوم في بيت من بيوت الله. تطلع لنا إيه؟ تطلع لنا رجال لا تلهيهم تجارة ولا بيع عن ذكر الله.
إذاً دي مقدمة خطورة وأهمية تفاعل القلب مع القرآن، وأن دي عملية مهمة جداً. لدرجة أن النبي صلى الله عليه وسلم في الحديث اللي هو الرائع بتاع: «مثل ما بعثني الله به من الهدى والعلم كمثل الغيث الكثير أصاب أرضاً فكان منها نقية، قبلت الماء فأنبتت العشب والكلأ الكثير». طب افرض، تخيل النبي صلى الله عليه وسلم، طب افرض في ناس مش قادرة تقوم بعملية التفاعل دي، قلوبها مش نقية قوي، وده مسلم ومؤمن نعمل لدين الله، تخيل إيه دوره؟
النبي صلى الله عليه وسلم بيقول إيه بقى؟ فكان منها نقية قبلت الماء وأنبتت العشب والكلأ الكثير. وكان منها أجادب، أجادب يعني أرض مسكيت الماية بس ما عرفتش تطلع نبات. فكان منها إيه؟ أجادب أمسكت الماء فنفع الله بها الناس فشربوا وسقوا وزرعوا. يعني إيه؟ النوع التالت من أرض أو أصابت منها طوائف أخرى إنما هي قيعان لا تمسك ماء ولا تنبت كلأ. يبقى القيعان لا مسكت مية ولا أنبتت.
يبقى الأراضي تلاتة والقلوب تلاتة مع الوحي: قلب يتفاعل وينبت، قلب لا يستطيع أن يتفاعل لكن يستطيع أن يمسك الماء، الأرض الأخرانية لا تمسك ولا تنبت. يبقى أنا مع الوحي حاجة من اتنين عشان أبقى من الناس اللي أصابهم المدح في الحديث، طائفتان ممدوحتان أو نوعين من الأراضي النبي صلى الله عليه وسلم مدحهم: يا أما تتفاعل مع القرآن، يا أما تحافظ على القرآن، تروح توَدِيه لناس جايز الناس دي هي اللي إيه؟ اللي تتفاعل مع القرآن.
لذلك النبي صلى الله عليه وسلم بيقول حتى في نفس القضية مع القرآن: «نضر الله وجه امرئ سمع مقالتي فوعاها، فحفظها كويس، آديها، تمسكها، فأداها كما سمعها، فرب مبلغ أوعى من سامع». يبقى الأرض الأجادب ممكن يكون كل دورها أنه يحافظ على القرآن ويحافظ على الوحي والسنة عشان يروح يوديها لناس تتفاعل، تطلع النور. يبقى الغرض الأساسي هو تفاعل القلب مع القرآن أو مع الوحي، ما هو القرآن والسنة.
إذاً إما أنك أنت تتفاعل أرض نقية، أو الرزق بقى ربنا أجادب يحافظ على الماية، يوديها لحد يتفاعل. أو واحد هيشوف واحد يتعامل مع القرآن، أرض نقية تفاعل مع القرآن وأنبت العشب والكلأ الكثير، يقوم ياخد العشب الكثير الناتج من تفاعل القلب ده مع القرآن ويوحي به للناس.
يعني إيه الكلام ده؟ يعني افرض أنا واحد عايز أشتغل في الدعوة وأنا لا قادر أبقى أرض نقية ولا قادر أبقى أرض أجادب، أقوم أشوف عالم تفاعل مع القرآن، ابن كثير مثلاً، وأجيب نصوصه أو غيره أو أي حد تفاعل مع القرآن. نصوصه الناتجة دي جابها منين، كلامه ده جابه منين؟ اللي هو تفاعل مع إيه؟ أخد العشب والكلأ بتاعه اللي أنبته وأوصله للناس.
فأنا كده بقيت برضه من الأرض الأجادب. لذلك النبي صلى الله عليه وسلم بيقول إيه: «بلغوا عني ولو آية». شوف خد بالك، يعني لو أنت مش أرض نقية خليك أرض أجادب، ولو أنت أرض أجادب امسك ولو آية، روح وصلها للناس. كلمة عني دي يعني في حمل ثقيل لازم تشيله مع النبي صلى الله عليه وسلم.
بلغوا عني، ولو آية. كان النبي صلى الله عليه وسلم وظيفته أن يبلغ آيات القرآن آية آية للعالم أجمع. فبيقول لك الداعية هو ده طريق النبي صلى الله عليه وسلم، أنه شيل مع النبي صلى الله عليه وسلم ولو آية يشيلها يوصلها للناس.
نيجي بقى للآيات، وآيات مهمة في كيفية آيات بقى فيها كيفية تحليلية للتعامل مع القرآن. لأن في نماذج خاطئة بتتعامل مع القرآن، وخطورة سورة وأئمة القرآن. تبدأ الآيات من قول الله عز وجل في آية أربعة وستين نوعاً من أول أربعة وستين سورة النحل: ﴿وَمَا أَنزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ وَهُدًى وَرَحْمَةً لِّقَوْمٍ يُؤْمِنُونَ﴾ [النحل: 64].
سورة النحل أربعة وستين، المصحف مئتان ثلاثة وسبعون صفحة، مئتان ثلاثة وسبعون. أنت من ساعة ما قلعت اليونيفورم أنت مش ماشي، مئتان ثلاثة وسبعون ينفع كده ماشي.
﴿وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا ۚ إِنَّ فِي ذَلِكَ لَآيَةً لِّقَوْمٍ يَسْمَعُونَ﴾ [النحل: 65]. خد بالك قوي من كلمة يسمعون دي. ﴿وَإِنَّ لَكُمْ فِي الْأَنْعَامِ لَعِبْرَةً ۖ نُسْقِيكُم مِّمَّا فِي بُطُونِهِ مِن بَيْنِ فَرْثٍ وَدَمٍ لَّبْنًا خَالِصًا سَائِغًا لِّلشَّارِبِينَ﴾ [النحل: 66].
حقيقة من باب يعني أن احنا بننسب الفضل لأهله، الآيات دي أول من واحد قرأت له فتح لي في الآيات دي وجزاه الله خيراً أبدع فيها الشيخ رفاعي سرور له مقالة اسمها من سورة النحل سياق في علم المناسبة، ورقتين اهيت لكن اه بصراحة مقالة مباركة ودسمة وغنية بالنصوص. هو أول واحد واحد لما قرأت له وقف مع الايات وقفة وربط الآيات ديت بالتعامل مع القرآن، أنت هتستغربه.
فين يعني احنا هناخد الايات من أول آية أربعة وستين لغاية آية تسعة وستين لغاية آية اللي بتتكلم عن النحل، وأوحى ربك إلى النحل. وبما أن السورة اسمها النحل يبقى أكيد الآية بتاعة النحل فيها دلالة لشيء معين. فين في الآيات هنا قضية القرآن؟ هو بيقول إيه؟
سياق هذه الآيات معالجة دقيقة وتامة لقضية الاختلاف، قضية الآيه؟ الاختلاف، وموانعه من العلم والهدى والرحمة خلاص؟ فين الاختلاف في الهدى والاختلاف في القرآن؟ الآيات بالرغم من أن هي بتتكلم عن سنن كونية، سنة ربنا ينزل مية لمية تطلع تحيي الارض تطلع نبات، سنة أن ربنا خلى اللبن يمشي من بين فرث ودم يوصله لنا سائغ، سنة النحل دي سنن كونية. القرآن بيعلمنا أن احنا نحاول دائماً أن نربط بين السنن الكونية وأسقاطها على سنن معنوية.
وأشهر مثال لده في القرآن: ﴿أَنزَلَ مِنَ السَّمَاءِ مَاءً فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَدًا رَّابِيًا﴾ [الرعد: 17]. مية تنزل تمشي في السيل السيول في الأودية على حسب كل وادي بالقدر بتاعه، التفاعل ما بين الماية اللي نازلة والاودية طلع زبد الزبد ده بيزيد زبداً ربياً. مش بس الزبد بينشأ في هذه الحالة، الزبد بينشأ ومما يوقدون عليه في النار ابتغاء حلية أو متاع زبد مثله.
تكملة الآية إيه؟ الله! ﴿كَذَلِكَ يَضْرِبُ اللَّهُ الْحَقَّ وَالْبَاطِلَ﴾ [الرعد: 17]. أكن ارجع بقى تاني، ده انت بتقرا المثل أنت معتقد أن ربنا اللي مش عارف بقية الآية كأنه بيقرأها لأول مرة، معتقد أن ربنا بيكلمه عن أشياء بتحدث، مية بتنزل والمية بتنزل في الأودية يقوم الوادي مية مع الأودية يخبطوا في بعض يقوم الزبد الحاجات اللي مش نضيفة تطلع تطفو. وبرضو لما تيجي تدخل الدهب في النار يفضل الحاجات اللي مش نضيفة في الدهب تطفو على، بعدين تتشال.
فأما الزبد فيذهب جفاءً، وأما ما ينفع الناس فيمكث في الأرض لتفاجأ أن ربنا بيقول لك لأ ارجع اقرا المثل على أنه صراع بين الحق والباطل، صراع الماء مع القاذورات التي في الأودية وصراع الذهب الصافي مع الذهب المغشوش داخل النار، ده طلع عبارة عن صراع بين الحق والباطل.
فإذاً السنن الكونية اللي احنا بنشوفها في الحياة ينفع نستنبط منها بتوفيق من الله عز وجل وفهم للنصوص سنن معنوية، سواء صراع الحق والباطل، سواء الوحي، سواء الهدى، النور، الولاء والبراء، سنن معنوية أيضاً. ودي نقطة مهمة جداً جداً في القرآن، وأغلب الأمثلة كده.
مثل الذين اتخذوا من دون الله أولياء، ربنا جاب مشهد عنكبوت بيتخذ بيت وبيحتمي به. المشهد ده أنت لازم لما تشوفه دي مشهد سنن مادية في الحياة، مشهد ده أخلص منه سنة معنوية لأن ده صراع أهل الباطل واحتماء أهل الباطل بباطلهم وظنوا أنهم منعتهم حصونهم من الله شبه العنكبوت بتاخده للبيت. يبقى عقل المؤمن يستفيد من سنن الكون فيه سنن معنوية في السير إلى الله، وفيه دلالات وإشارات في النصوص تساعدك على ده.
إيه الدلالة هنا؟ قول الله عز وجل في آية خمسة وستين: ﴿وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا﴾ [النحل: 65]. إيه علاقة السماع بنزول الماء على الأرض؟ إلا إذا كان من معاني نزول الماء على الأرض هنا تشبيه نزول الوحي على الأرض. ولن يستفيد من نزول الوحي على الأرض إلا القلب الآيه: ﴿إِنَّمَا يَسْتَجِيبُ الَّذِينَ يَسْمَعُونَ﴾ [الأنعام: 36].
فإذاً تشبيه القرآن بالماء ده أمر مضطرد في القرآن والسنة. ولسه الحديث اللي احنا قلنا: مثل ما بعثني الله به من الهدى والعلم كمثل الغيث الكثير أصاب أرضاً. النبي صلى الله عليه وسلم شبه الوحي بالماء.
﴿أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ * اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا﴾ [الحديد: 16-17]. إيه علاقة إحياء الأرض بعد موتها بآيه؟ بأن القلب الميت يستفيد من القرآن نفس العلاقة هنا. يبقى هذه الإشارات تساعدنا أن احنا ممكن نقول أن هذه الآيات فيها إشارة إلى التعامل مع كتاب الله.
سورة النحل بيسميها كتير من العلماء سورة النعم، لأن هي مليئة بالآيه؟ بالنعم. تفاجأ وأنت بتستفتح سورة النحل: ﴿أَتَى أَمْرُ اللَّهِ فَلَا تَسْتَعْجِلُوهُ ۚ سُبْحَانَهُ وَتَعَالَى عَمَّا يُشْرِكُونَ * يُنَزِّلُ الْمَلَائِكَةَ بِالرُّوحِ مِنْ أَمْرِهِ عَلَى مَن يَشَاءُ مِنْ عِبَادِهِ أَنْ أَنذِرُوا أَنَّهُ لَا إِلَهَ إِلَّا أَنَا فَاتَّقُونِ﴾ [النحل: 1-2].
أول نعمة نعمة انزال الوحي. بعد كده بقى خلق السماوات والأرض، نعمة خلق السماوات والأرض، خلق الإنسان نعمة خلق الإنسان، والأنعام خلقها خلق الأنعام تحمل أثقالكم، أنزل من السماء ماء ينبت لكم به الزرع الثمرات، الليل والنهار، الشمس والقمر ذرأ لكم في الأرض مختلفاً ألوانه، البحر، سيل من نعم. افتتح بنعمة الآيه؟ الوحي.
يبقى السورة اللي اسمها النحل ابتدأت بنعمة الوحي. نيجي عند آي النحل، إذاً هناك علاقة قطعية بين آية النحل وبين التعامل مع الآيه؟ مع الوحي. تاني وصلتم ولا معي؟ معي يا جماعة؟
يبقى إذاً هذه السورة اللي بتسمى سورة النعم أو مليئة بالنعم واسمها النحل أول نعمة نعمة الوحي، يبقى سياق آيات اللي فيه آية النحل أكيد بيتكلم عن التعامل مع نعمة الوحي. خلاص؟ وجبنا دلالات من الآية: ﴿إِنَّ فِي ذَلِكَ لَآيَةً لِّقَوْمٍ يَسْمَعُونَ﴾ [النحل: 65].
نبدأ بقى للسياق بتاعنا: ﴿وَمَا أَنزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ وَهُدًى وَرَحْمَةً لِّقَوْمٍ يُؤْمِنُونَ﴾ [النحل: 64]. الغريب هنا أن سياق الآية يجيب صيغة الحصر والقصر: وما أنزلنا عليك الكتاب إلا. عجيب أن دايماً نزول الكتاب أو الوحي في القرآن بيجي معه هدى، نور، بصائر، بينات، لكن أنه بصفة الحصر والقصر لفض الخلاف بين الناس دي حاجة نادرة في القرآن.
أنا ما أقدرش أقول أن هي ما جتش غير هنا، عايزة استقصاء في القرآن، ممكن جت اشارات بالمعنى ده في سورة الشورى أو غيرها، لكن من المعاني النادرة أن ربنا يقول أنا نزلت الوحي خصيصاً لأجل فض الخلافات بين الناس جت في سورة الآيه؟ النحل.
يبقى إذاً السياق اللي احنا بنتكلم فيه سياق التعامل مع الوحي لفض الآيه؟ خلاف. يبقى احنا بنتعامل هنا أن في اختلافات في التعامل مع الوحي. يبقى مش بس تعامل مع الوحي. طب ممكن واحد علماني يقول لك وأنا قلت لك حاجة؟ ما أنا موافق أن فيه وحي، والوحي ده من عند ربنا، لكن أنا مختلف معك في طريقة التعامل معه.
فربنا بيقول لك في خلافات بتحدث بين الناس في التعامل مع الوحي. في خلاف مقبول وفي خلاف مش مقبول، وده هيجي لنا في السياق معنى أن ربنا يقول قبل آية: ﴿وَاللَّهُ أَنزَلَ مِنَ السَّمَاءِ مَاءً﴾ [النحل: 65] وما أنزلنا عليك الكتاب، واضح أن السياق اهو بيتكلم في الآيه في القرآن. يبقى دي إشارة واضحة أقوى من إشارة أن في ذلك لآية لقوم يسمعون.
﴿وَمَا أَنزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ﴾ [النحل: 64]. يبقى إذاً التعامل مع القرآن بيوصلنا إلى مرحلة البيان الآيه؟ لتبين لهم. يبقى الظلام اللي احنا فيه، ذوي الخلافات الفكرية والكلام الكتير والجدل ده لغياب القرآن ما وصلناش لمرحلة، زي ما اتكلمنا في الصورة المرة اللي فاتت، ما وصلناش لمرحلة البينة إلا لما ابتعدنا عن كتاب الله. وما أنزلنا عليك الكتاب إلا لتبين لهم.
يبقى لما نجي نبين للناس من غير وحي، أنت إيه لما في مشكلة أو في ناس بتكذب أو في ناس منافقة أو في دجل وفي كذب زي ما النبي صلى الله عليه وسلم قال: «يكون من أمتي دجالون ثلاثون أو كذابون» وزي ما النبي صلى الله عليه وسلم قال: «سيسبق الدجال سنوات خداعات يصدق فيها الكاذب».
دي منطقة ظلام ومنطقة دجل، عايزين ندخل الدعاة يخشوا المنطقة دي ينوروا للناس. كيف تدخل إلى هذه المناطق المظلمة بدون الكتاب؟ وربنا أصلاً يقول لك من أهم أغراض نزول الكتاب هو فض خلاف الناس، زي نتيجة الدجل. وما أنزلنا عليك الكتاب إلا لتبين لهم الذي اختلافوا فيه.
وأيضاً هدى ورحمة لقوم يؤمنون. أن القرآن يتحول في حياتك إلى هدى رحمة يحتاج أولاً إلى أن توقن أنه كلام الله، أنه كلام الله عز وجل. اللي هيتعامل مع القرآن على أنه مجرد كلام مش هيصل إلى مرحلة الآيه؟ الهدى والنور.
وأنا مش فاكر فكرت لكم ولا لأ كلمة بديع الزمان النورسي لما كان قاعد مع نفسه عايش مع آيات القرآن، وبعدين بيقول فجأة جالي خاطر بيقول له يا سعيد، اسمه سعيد النورسي، أنت عايش مع القرآن ومبسوط لأنك لأنك أنت متخيل القرآن كلام ربنا. إيه رأيك شيل فكرة أن القرآن الكريم ربنا من ذهنك وحاول تتعامل مع القرآن على أنه كلام بشري، وشوف هو معجز ولا لأ؟
فبيقول فبدأت أستجيب للخاطرة وأنسى أن القرآن كلام ربنا وأحاكم القرآن كأنه كتاب كأي كتاب، وشوف هو معجز. بيقول أول ما حاولت اعمل كده حسيت أن الدنيا ظلمت وصدري ضاق وتحولت الدنيا من حولي إلى ظلام، بيقول فأيقنت أن هذه الخاطرة من ثم عدت إلى الشيطان.
حوار طويل ودار بينه يعني سجال وفي المعنى الكلام خلاصته أن هو بيقول لن نأخذ كده من القرآن إلا الموقن أنه كلام الله، أنه كلام الله. يبقى هدى ورحمة لمين؟ لقوم مش بس يسلمون، لأ ده وصلوا للإيمان، والإيمان زيادة عن الاستسلام في زيادة الأمن، الإيمان هو التصديق ولكن التصديق الأمن المطمئن.
عشان كده يؤمن جاية من الأمان، أن في يعني اللي مؤمن مش معناه بس مصدق، ده مصدق وهو مطمن، في واحد مصدق بس مقلق، في واحد مصدق في كمال الطمأنينة. معي؟
نيجي بقى دي آية مقدمة للآيات دي، تعال نشوف الآيات دي بقى عندنا واحد اتنين تلاتة وأربعة وخمسة مع بعض، عندنا تقريباً أربع سنن كونية. رقم واحد سنة نزول الماء على الأرض. رقم اتنين سنة خروج اللبن من بين فرث ودم. رقم تلاتة تعامل الناس مع ثمرات النخيل والأعناب واختلاف أنواع التعامل. رقم أربعة إزاي النحل ينتج العسل.
وكأن في إشارة كل واحدة من دول هتدينا إشارة معينة لقضية القرآن. رقم واحد: ﴿اللَّهُ أَنزَلَ مِنَ السَّمَاءِ مَاءً﴾ [النحل: 65] لإحياء الأرض. فإذاً الله عز وجل أنزل وحياً لإيه؟ لإحياء القلوب. أنتم نايمين ولا؟ نجيب شوية مية زي. الله، الله عز وجل أنزل وحياً لإحياء القلوب الميتة القلوب الغافلة، دي سنة.
خد بالك من أنزل من السماء ماء، العموم والشمول. الوحي عام وشامل للأرض كلها. فاحيا به الأرض، الماء فيه خصيصة إحياء الأرض، الله عز وجل وضع في الماء هذه القدرة أن الأرض الميتة يتحط عليها الماية تحيا. القرآن يحيي القلوب: ﴿أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ﴾ [الحديد: 16].
يعني لما تيجي القلب ميت وعايز تصحيه تعمل له الشوك اللي بيعملوها ديت الصدمة الكهربائية ديت مش هعملها له بالقرآن، وإلا هتبقى لو صحيته بحاجة تانية هتبقى حياة مؤقتة، خلاص؟
لكن مش أي قلب بيحيى، القلوب الآيه؟ جزاك الله خيراً ربنا يرفع قدرك، جزاك الله خيراً. أنا بمزح معك، خليها جنبي كده علشان اللي ألاقيه نايم، هي المية ساقعة وحلوة.
بنقول إيه؟ إيه القلوب اللي هتستفيد من الوحي؟ إنهي قلوب؟ القلوب الآيه؟ المنصطة، الباحثة عن الحق، المنصطة التي تريد الهداية. ﴿وَإِذَا قُرِئَ الْقُرْآنُ فَاسْتَمِعُوا لَهُ وَأَنصِتُوا لَعَلَّكُمْ تُرْحَمُونَ﴾ [الأعراف: 204]. عشان تصل للرحمة، و﴿هُدًى وَرَحْمَةً﴾ [النحل: 64]، مش هتصل إلى الرحمة بتاعة القرآن.
إلا بالاستماع والإنصات. مش المقصود إنك لما تشغل القرآن تقعد كده، لأ مش بس كده. لأ ده باحث عن الحق يتلمس الهدى، والكلمات المشهورة لشيخ الإسلام أن القرآن فيه هدى يعطاه الإنسان على قدر الصدق في طلبه. القرآن فيه الهدى يعطاه الإنسان على قدر الصدق في طلبه. أنت تعطى الهدى اللي في القرآن على قدر صدقك في طلب الهدى. إنما يستجيب الذين يسمعون. طب واللي مش هيسمعه؟ والموتى يبعثهم الله.
الموتى، أين موت القلوب اللي رفض نزول الماء؟ دي بقى اللي النبي صلى الله عليه وسلم سماها الأرض الآية؟ قيعان. والله أنزل من السماء ماء فأحيا الأرض بعد موتها. في أرض تحيا وفي أرض إيه؟ قيعان. لا تمسك ماء ولا تنبت كلأً، اللي عاوزه تتفاعل مع القرآن ولا عاوزه تحفظ القرآن وتبلغه للناس، لأ مش عايز. إن في ذلك لآيات لقوم يسمعون. يبقى من السنن أن الله عز وجل كما أن الله عز وجل أنزل الماء من السماء وبدون هذا الماء تموت الأرض، وبالتالي يموت الإنسان، كذلك أنزل الله وحياً، وبدون هذا الوحي تموت القلوب ويضل الناس. وكما أن الله تكفل أن الماء سينزل حتماً إلى الأرض مهما منعه المانعون، كذلك سينزل الوحي إلى الأرض مهما منعه المانعون، خلاص.
الآية اللي بعدها، وَإِنَّ لَكُمْ فِي الْأَنْعَامِ لَعِبْرَةً نُسْقِيكُمْ مِمَّا فِي بُطُونِهِ مِنْ بَيْنِ فَرْثٍ وَدَمٍ لَبَنًا خَالِصًا سَائِغًا لِلشَّارِبِينَ. كل كلمة في القرآن لها دلالة، مافيش كلمة كده بتيجي زيادة. خد بالك وَإِنَّ لَكُمْ فِي الْأَنْعَامِ لَعِبْرَةً نُسْقِيكُمْ، إن ربنا تعالى هو اللي تكفل بهذه العملية، عملية يعني مش ربنا قال لنا عندكم أنعام، الأنعام دي هتطلع لبن، اتصرفوا وطلعوا اللبن ده من بين فرث ودم، لا العملية ديت ربنا سبحانه وتعالى إيه؟ تكفل بها. كان ممكن ربنا يقول لنا اتصرفوا وحاولوا تخرجوا اللبن، اللبن هيبقى موجود داخل غدد معينة في الأنعام، اكتشفوا بقى أجهزة لأن لو اللبن خرج لوحده هيختلط بالفرث والدم اتصرفوا أنتم، لأ، ربنا سبحانه وتعالى تكفل بهذا. كما أن الله عز وجل تكفل بسقاية الناس اللبن وبإخراج اللبن بين فرث ودم، تكفل الله عز وجل بوصول الوحي إلينا صافياً خالصاً سائغاً لا يختلط بغيره، إنا نحن نزلنا الذكر وإنا له لحافظون.
ربنا اللي تكفل بهذا، غير على بعض الأقوال في قول الله عز وجل إِنَّا أَنْزَلْنَا التَّوْرَاةَ فِيهَا هُدًى وَنُورٌ يَحْكُمُ بِهَا النَّبِيُّونَ الَّذِينَ أَسْلَمُوا لِلَّذِينَ هَادُوا وَالرَّبَّانِيُّونَ وَالْأَحْبَارُ بِمَا اسْتُحْفِظُوا مِنْ كِتَابِ اللَّهِ وَكَانُوا عَلَيْهِ شُهَدَاءَ. قيل إن الربانيين والأحبار أي العلماء بما استحفظوا من كتاب الله هم مسؤولون عن حفظ الوحي، لذلك لما تكفل الأحبار والرهبان أو كلفهم الله بحفظ الوحي حُرفت الكتب، ولما تكفل الله عز وجل بحفظ القرآن لم يُحرف ولن يُحرف، فَإِنْ لَمْ تَفْعَلُوا وَلَنْ تَفْعَلُوا، مش هيحصل خلط أبداً بين آيات القرآن وآيات أخرى، ستظل آيات القرآن منفصلة واضحة مميزة، إلا بقا على وَمِنْهُمْ أُمِّيُّونَ لَا يَعْلَمُونَ الْكِتَامَ إِلَّا أَمَانِيَّ، هم بقا اللي عملوا نفسهم كده، لكن الوحي في ذاته محفوظ، ده رقم واحد.
ربنا نزل مية لناس تحييهم، عملية وصول الوحي من أول ما تكلم به الله، مروراً بسيدنا جبريل وهو نازل ومحاولة استراق الشياطين، مروراً بنزوله في صدر النبي صلى الله عليه وسلم ومحاولة الشيطان الوسوسة في صدر النبي صلى الله عليه وسلم، ومروراً بتلاوة القرآن على الناس ومحاولة الشيطان تقليد صوت النبي صلى الله عليه وسلم، ومروراً بنقل القرآن بين الناس وكاتبته وكتابة القرآن على الجلود والرقاع والعسب، مروراً بالقرون ومئات السنين بيصل إلينا الوحي، محاولات الفرث والدم اللي بتنقض على اللبن اللي هو على الوحي. على مدار مئات السنين الله عز وجل تكفل بوصول اللبن إلينا صافياً، تكفل الله بوصول القرآن إلى كل العالمين صافياً ما فيهوش، كده مصحف كده ما فيهوش كلمة برة الوحي، واحنا بعد كم سنة؟ أكتر من ألف وربعمية سنة، مين اللي عمل كده؟ الله، من بين فرث ودم، محاولات الفرث والدم، وكل ما سوى القرآن هو فرث ودم، كل ما سوى الوحي أو مش نابع من الوحي الدنيا ملعونة إلا ذكر الله وما والاه وعالم أو متعلم. اللي بيدور في القصة دي ده من القرآن، غير كده فرث ودم، نجس هي نجاسة، مش لبن طاهر، الأفكار النجس وأفكار الشياطين سواء استشراق شياطين الجن ومحاولات خبيثة لشياطين الإنس، كل ده ربنا تكفل بوصول الوحي إلينا صافياً، مش كده قال إيه؟ نسقيكم، مش تستخرجون.
غير اللي بعدها وَمِنْ ثَمَرَاتِ النَّخِيلِ وَالْأَعْنَابِ تَتَّخِذُونَ مِنْهُ سَكَرًا وَرِزْقًا حَسَنًا، أول بقى فعل هنا ينسب للإنسان، اقرأ خمسة وستين أَنْزَلَ مِنَ السَّمَاءِ مَاءً فَأَحْيَا، نَسْقِيكُمْ دي بقى أول فعل بدأ الإنسان يتدخل قال إيه؟ تتخذون، يبقى ده أول فعل في التعامل مع الوحي. اللي مش فاهم يا جماعة يوقفني ويسأل، معايا كلام تقيل صح؟ يا راجل! طيب، تاني، تاني يا عم إيه؟ معايا يا عم إسلام ولا؟ اللي عايز يسأل يسأل يا جماعة بنقول يضيع العلم بين الحياء والكبر، يا مكسوف يا متكبر، يعني اللي قاعد مش فاهم حاجة من اتنين، يا مكسوف يا إيه؟ يا متكبر، ماشي؟ أنت مكسوف ولا متكبر؟ أنت فاهم، فاهم، توكلنا على الله.
تاني، الله أنزل من السماء ماء، الله عز وجل نزل وحياً، الله عز وجل حفظ اللبن من الفرث والدم، الله عز وجل حفظ الوحي من التغيير، بس ده اللي أنا عايزه. الله عز وجل أنزل من السماء ماء يحيي الأرض، الله نزل وحياً يحيي القلوب، الله حفظ اللبن من الفرث والدم، الله عز وجل حفظ الوحي من إيه؟ التبديل والتغيير، دول أول آيتين والإسقاط بتاعهم على بعض. ليه اللبن؟ خلاص الماية وبتحيي الأرض، هنا بقى ليه اللبن؟ اللبن دايماً اللبن بينسب للعلم والفطرة. اللبن عندنا في السنة دايماً بقا السنة هنا بتساعد في فهم القرآن. النبي صلى الله عليه وسلم جه موضوع اللبن ده جه مرتين في السنة، أو جه طبعا في حاجات كتير جداً في السنة منها في موطنين، الموطن الأول في حديث الإسراء والمعراج لما جه له سيدنا جبريل وخيره بين اللبن وإيه والخمر، وده خد بالك ما بين اللبن آية ستة وستين والخمر اللي هي وَسَكَرًا وَرِزْقًا حَسَنًا، سكرًا هنا قيل الخمر إيه سبعة وستين خيره ما بين الاتنين فاختار النبي صلى الله عليه وسلم اللبن فقال له جبريل: اخترت إيه؟ اخترت الفطرة. إذا الوحي والشريعة مناسبة بإيه؟ بالفطرة. أنا عايز القواعد اللي بنقولها في يعني إزاي وصلنا لها إحنا بنحاول نشرحها؟ ما فهمناش بنحاول نشرحها على الأقل نخرج بالقواعد دي بقا العشب ده دي القواعد اللي إحنا عايزينها.
الله عز وجل أنزل الماء ليحيي الأرض، الله أنزل وحياً يحيي القلوب، الله عز وجل وصل لنا لبن وحافظ اللبن بين فرث ودم، الله عز وجل حفظ الوحي من التبديل والتغيير. اللبن ملازم للفطرة عشان كده ربنا قال إيه؟ لبناً إيه؟ خالصاً، صافي ما فيهوش خلط، القرآن صافي. خالصاً إيه؟ سائغاً، سائغ يعني وبنقول يتجرعه ولا يكاد يصيغه يعني بيحاول يبلعه بس ما بيتدحرجش واقف في الزور، الشريعة ما تقفش في زورك أبداً الشريعة إيه؟ سائغة مناسبة، الإنسان مفطور إنه يتناسب مع أحكام الله، مفطور إنه يتناسب مع أحكام الله. اللي بيحاول يفرض على الناس شريعة غير شريعة ربنا هو بيصادم فطرته، تصادم فطرته بالظبط زي الحديث اللي في البخاري لما الراجل ركب بقرة وقعد يضرب البقرة عشان يحمل عليها حاجات فالتفتت إليه البقرة وقالت: سبحان الله إنا لم نخلَق لهذا إنا خلقنا للحرث، دي مش وظيفتي أنا وظيفتي إيه؟ الحرث. هي مش رافضة إن هي تشتغل هي بتقول له شغلني في اللي أنا مخلوقة فيه، كل ميسر لما خُلق له، فتعجب فراح القصة بقا في البخاري فراح للنبي صلى الله عليه وسلم فقال له: أنا أؤمن أنا أنا بهذا أنا وأبو بكر وعمر، حتى أبو بكر وعمر ما كانوش حاضرين لكن النبي صلى الله عليه وسلم ممكن أن هم يصدقوا طالما النبي صلى الله عليه وسلم الشاهد.
اللي بيفرض على الناس شريعة عامل زي اللي كان بيحمل البقرة شغلانة مش شغلتها، فكما أن مفطور على شيء البشر مفطورين على شريعة معينة لو جيبت لهم غيرها يجدون عنتاً، لذلك ربنا بيقول إيه في سورة الحجرات؟ وَلَوْ يُطِيعُكُمْ فِي كَثِيرٍ مِنَ الْأَمْرِ لَعَنِتُّمْ، عنتاً، يعني لو النبي صلى الله عليه وسلم التشريع بيجي على هواكم العدد هيلف وييجي عليكم أنتم، لو أنت معتقد أن هواك هيصلح المشقة فاللي أنت شايفها في التشريع أنت واهم. معايا؟ لذلك قال لبناً خالصاً، لبن صافي مش لبن مخلط، لبن صافي الوحي صافي، سائغاً الوحي مستساغ، مش مصادم للفطرة ولا حاجة. سائغاً للشاربين، للباحثين، للناس اللي عطشانة وحي وباحث ربنا هيوفقه ويصل إليه.
نيجي بعد كده للخطوة آخر خطوة بيقوم بها البشر، ربنا جاب نموذج للتعامل الخاطئ مع الوحي آية سبعة وستين ونموذج للتعامل الرائع مع الوحي آية ثمانية وستين وتسعة وستين. إيه النموذج الغلط في التعامل مع الوحي؟ النموذج الغلط وَمِنْ ثَمَرَاتِ النَّخِيلِ وَالْأَعْنَابِ تَتَّخِذُونَ مِنْهُ سَكَرًا وَرِزْقًا حَسَنًا إِنَّ فِي ذَلِكَ لَآيَةً لِقَوْمٍ يَعْقِلُونَ، والنموذج الصح وَأَوْحَى رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ * ثُمَّ كُلِي مِنْ كُلِّ الثَّمَرَاتِ فَاسْلُكِي سُبُلَ رَبِّكِ ذُلُلاً يَخْرُجُ مِنْ بُطُونِهَا شَرَابٌ مُخْتَلِفٌ أَلْوَانُهُ فِيهِ شِفَاءُ لِلنَّاسِ إِنَّ فِي ذَلِكَ لَآيَةً لِقَوْمٍ يَتَفَكَّرُونَ. الخطأ بتاع النموذج آية سبعة وستين ثمرات النخيل والنحل والأعناب مش هنفهمه إلا لما تقارنه بنموذج النحلة، خلاص؟ كلمة تتخذون اللي في آية سبعة وستين وَمِنْ ثَمَرَاتِ النَّخِيلِ وَالْأَعْنَابِ إيه؟ تتخذون، موجودة في آية ثمانية وستين وَأَوْحَى رَبُّكَ إِلَى النَّحْلِ أَنْ.
هعمل مقارنة بين الاتنين عشان نعرف النموذج الغلط غلط ليه والنموذج اللي كان صح صح ليه؟ عشان أنا أما أجي أتعامل مع القرآن في مراحل معينة لازم يمشي فيها. مشكلة النموذج الخاطئ رقم واحد ومن ثمرات النخيل والعنب. رقم واحد ومن ثمرات، قارنها باللي بعدها، قارنها باية تسعة وستين كده اقرأ كده آية تسعة وستين، ثُمَّ كُلِي مِنْ كُلِّ إيه؟ الثمرات. يبقى أول خطأ وقع فيه المتعاملين مع القرآن هنا بالرغم أن هو بقا هنا إيه؟ هيتعامل مع وحي، ربنا بيقول لك إيه أسباب الخلاف في البشرية؟ أسباب الخلاف في البشرية رقم واحد اللي أعرض عن الماء، رقم اتنين اللي اتضحك عليه ولبست عليه آيات القرآن وهو شايف أن اللبن مش صافي، يعني أصلا بعد عن الوحي.
فيه ناس بتتعامل مع القرآن ويحصل خلاف، الله! إزاي ده القرآن واحد؟ إنه تعامل مع القرآن تعامل انتقائي، اللي هي ربنا سماها أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ. فيه فرق ما بين وَمِنْ ثَمَرَاتِ النَّخِيلِ وَالْأَعْنَابِ أنه بينقي الثمرات اللي هو وبيني ثُمَّ كُلِي من كل ثمرة. القرآن فيه أخلاق وجهاد ولاء وبراء وعبادة وطاعة وطلاق وأحكام نكاح قرآن على بعض وادخلوا في السلم كافة، اللي هتيجي في آيات الأخلاق بس في القرآن وتركز عليها وتطرحها للناس بس، ده بيقدم للناس بينتج سكرًا ورزقًا حسنًا، التعامل الانتقائي مع القرآن هيخليك تطلع منتج تاني معلش أنا عارف أن الكلام تقيل.
تاني، النبي صلى الله عليه وسلم قال في الحديث: القرآن والسنة عاملين زي المطر اللي جه على أرض، فكان منها أرض عملت إيه؟ كان منها أرضًا، أنا عايزني أحفظ التلات كلمات، كان منها أرضًا نقية قبلت أنبتت، كان منها أرضًا نقية قبلت أنبتت إيه؟ العشب والكلأ الكثير. في أحيانًا أرض مش نقية قوي مش هتقبل قوي بس برضو إيه هتنبت، هيبقى في أرض مش نقية قوي مش هتقبل قوي بس برضو هتعمل إيه هتنبت العشب والكلأ الكثير الناتج من القلب النقي اللي قبل اللي أنبت عشب وكلأ نافع للناس. العشب الكلأ الناتج من الأرض اللي مش نقية قوي اللي ما قبلتش قوي هتنبت سكرًا وإيه ورزقًا، سكرًا يعني حاجات بتسكر خمر ورزقًا حسنًا، بيطلع حاجات كويسة وحاجات وحشة، لذلك أنت هتستغرب أحياناً تسمع بعض الدعاة بيتكلم أحياناً من القرآن وبيقول كلام جميل جداً ومؤثر في الناس لكن في حاجات غلط زي ما النبي صلى الله عليه وسلم قال: تعرف منهم وتنكر، خير فيه دخل.
يا في دعاة بيجي يتعامل مع وعايز يسير على خطى النبي صلى الله عليه وسلم وعايز يمشي على الخطى لكن ما بيوفقش، ليه؟ رقم واحد لأنه تعامل مع القرآن تعامل إيه؟ انتقائي. ييجي مثلاً عند آيات سورة البقرة يقوم واخد آيات سورة الآيات اللي بتتكلم عن الحج وفاصلها من وسط آيات الجهاد والقتال ويشرح للناس آيات إيه الحج، طب ما في آيات القتال وراها على طول ييجي مثلاً آيات فيها أخلاق وبعدها ولاء وبراء عامل بالظبط زي اللي بيجي يشرح للناس لَتَجِدَنَّ أَشَدَّ النَّاسِ عَدَاوَةً لِلَّذِينَ آمَنُوا الْيَهُودَ وَالَّذِينَ أَشْرَكُوا وَلَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنا نَصَارَى، الله! ويسيب على طول لَقَدْ كَفَرَ الَّذِينَ قَالُوا كَفَرَ الَّذِينَ قَالُوا إِنَّ اللَّهَ هُوَ الْمَسِيحُ ابْنُ مَرْيَمَ، معروف! التعامل الانتقائي ده يعني النموذج افتح سورة المائدة يخلي واحد يكره اليهود والمشركين، ده رزق حسن ولا مش رزق حسن؟ بس يخلي واحد يحب مين؟ يحب ده السكر بقا ده الخبل، ده الخبل الفكري الموجود، جه إيه؟ إنه تعامل مع القرآن تعامل إيه؟ انتقائي.
فينتج رزق حسن. ليه أنت كرزق حسن؟ على حاجة معينة، ويعتبر حاجة؛ لأنه التعامل مع إيه؟ بس ما هو ليه جاب الرزق الحسن ده منين؟ لأنه من القرآن، الله يفتح! لأنه جاي من القرآن، يبقى القرآن أي تعامل معه يا جماعة خير وبركة.
بتنال حتى المنافق. النبي صلى الله عليه وسلم لما قال: «مثل المؤمن الذي يقرأ القرآن كمثل الأترجة؛ ريحها طيب وطعمها طيب. ومثل الذي لا يقرأ القرآن كمثل التمرة؛ طعمها طيب ولا ريح لها. ومثل المنافق الذي يقرأ القرآن -بس عشان ارتبط بالقرآن يقرأ القرآن- كمثل الريحانة؛ ريحها طيب ولا طعم لها. ومثل المنافق الذي لا يقرأ القرآن كمثل الحنظلة؛ لا ريح لها وطعمها مر». يبقى أي تعامل مع القرآن هينتج، لذلك الحسرة أن اللي بعاد عن السنة، بعاد عن الفهم الصحيح للدين، هو اللي يتعامل مع القرآن وأهل السنة هم اللي يبعدوا عن القرآن، دي المشكلة! فتجد المفكرين -الكلمة اللي طالعة جديد- المفكرين؛ المفكر بقت علامة دلوقتي على اللي مش مؤمن بالسنة وفكره طلق؛ لأن السنة بتدي ضوابط، إذا كان القرآن بيدي قواعد، السنة بتدي ضوابط.
معي؟ ما يعرفش يخرج بره. فيجي يتعامل مع السنة، يظن ظنه العقلي أنه متقيد محدود، فيقول لك: لا يا عم، كسر الحدود دي، أنا عايز أنطلق، فيسيب السنة، فيتعامل مع القرآن فيقول كلام مبهر، ليه؟ لأنه جاي من القرآن. ده اسمه إيه بقى؟ هنا في الآية الرزق الحسن، الكلام الخبلي اللي بيقوله ده اللي ربنا سماه إيه؟ سكر، سكر! يبقى لما النبي صلى الله عليه وسلم قال: في دعاة هيجوا، الدعاة دول يهدون بغير هدي، تعرف منهم وتنكر.
خير، فيه دخل؛ يبقى ناس بتتعامل مع القرآن تعامل انتقائي، فبما إنه بيتعامل مع القرآن ينتج رزق حسن، لأنه بيتعامل تعامل انتقائي بينتج، وجبنا النموذج بتاع إنه ممكن يشرح آيات سورة المائدة، يكره إنسان جداً عنده، أو يعني عنده براء، عنده عقيدة البراء من اليهود والمشركين، لكن فاقد هذه العقيدة مع النصارى! الخلل ده حصل؛ لأنه انتقى آيات وشرحها للناس. خلاص؟ طيب. يبقى رقم واحد الغلطة: ومن ثمرات النخيل، التعامل.
طيب، رقم اتنين الغلطة: ﴿تَتَّخِذُونَ مِنْهُ سَكَرًا وَرِزْقًا حَسَنًا﴾ [النحل: 67]. اقرأ الآية اللي بعد كده: ماذا فعل النحل قبل أن يتفاعل مع الثمرات؟ عمل إيه النحل؟ اتخذ بيوتًا، ﴿وَأَوْحَى رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ * ثُمَّ كُلِي مِنْ كُلِّ الثَّمَرَاتِ فَاسْلُكِي سُبُلَ رَبِّكِ ذُلُلًا﴾ [النحل: 68-69]. ثم، قبل ما النحل يتعامل مع كل الثمرات، مر بمرحلة سكون في بيوت معينة، مرحلة التهيؤ الإيماني للتعامل مع القرآن. يعني إيه؟ حديث جندب بن عبد الله، اللي بيقول: «كنا فتيانا حزاورة، أوتينا الإيمان قبل القرآن»، كنا تعلمنا الإيمان قبل... حتى نص الحديث: «كنا غلمانا حزاورة مع رسول الله صلى الله عليه وسلم، فيعلمنا الإيمان قبل القرآن، ثم يعلمنا القرآن فازددنا به إيماناً، وإنكم اليوم تعلمون القرآن قبل الإيمان».
يعني إيه الكلام ده؟ التعامل مع القرآن... هو أصلاً القرآن كتاب هدى، اللي مش هيتعامل -رقم واحد- تعامل إيماني مع كتاب الله، باحث عن الإيمان والهدى، ﴿وَمَا أَنْزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ وَهُدًى وَرَحْمَةً لِقَوْمٍ يُؤْمِنُونَ﴾ [النحل: 64]. اللي مش هيبحث عن الهدى ورحمة في القرآن أولاً، ويبحث عشان زيادة الإيمان، هيتعامل مع القرآن مجرد كتاب فكري، هيخليه يقول كلام حلو، لكن برضه يدخله في مرحلة الرزق والسكر! يبقى لازم مرحلة إيمان وبناء إيمان، عشان تعرف تتعامل مع القرآن التعامل المباشر؛ اهتمام بالفروض، بالنوافل، كثرة الدعاء. لذلك التهيئة دي ربنا ذكرها برضه في سورة النحل هنا، قال: ﴿فَإِذَا قَرَأْتَ الْقُرْآنَ فَاسْتَعِذْ بِاللَّهِ مِنَ الشَّيْطَانِ الرَّجِيمِ﴾ [النحل: 98]، يبقى لازم مرحلة استعاذة من الشيطان قبل الدخول في الكون.
لذلك أنا هأديك مثال على معنى الكلام ده، قصدي مش قصدي أنك تقعد سنتين الأول تتربية إيمان وبعدين تروح القرآن، لأ، ما هو القرآن هو اللي هيربيك إيمانيا، ممكن في نفس المرحلة، ازاي؟
فكرة الجو اللي بتتلقى فيه القرآن. أحياناً أنا أتعجب، لسه واحد بيحكي لي، أحد اللي بيقدموا البرامج الساخرة التافهة، أحد الناس بيقول له آية من كتاب الله عز وجل بينصحه، قام الراجل اللي بيقدم البرنامج الساخر التافه دوت رد عليه وقال له: لأ، الآية دي سبب نزولها كذا. أهكذا يتعامل مع القرآن؟! أو تجي مذيعة متبرجة مثلاً: أنتم هتعملوا إيه في الشريعة؟ يقول لها: والله ده ربنا بيقول كذا. ده مش جو تلقي قرآن! لذلك الجزء الأول كله في سورة البقرة بيتكلم عن إيه؟ أكثر الجزء الأول سورة البقرة عن بني إسرائيل. التشريعات؛ التشريع في سورة البقرة بدأ من الجزء التاني، وأول تشريع بدأ من أول تحويل القبلة: ﴿سَيَقُولُ السُّفَهَاءُ مِنَ النَّاسِ مَا وَلَّاهُمْ عَنْ قِبْلَتِهِمُ﴾ [البقرة: 142]. وبعدين بقى آيات القبلة وآيات ﴿إِنَّ الصَّفَا وَالْمَرْوَةَ﴾ [البقرة: 158]، وبعدين دخل في آيات في القصاص، وآيات في الصيام وفي الحج، والنص كان حاجات في الميراث والحلفان، ودخل في القتال والصدقة وأحكام المال، الجزء الرهيب التشريعي ده، طب ليه الصورة ما اتعكستش؟ ليه ما بدأش... مش الآية... مش سورة البقرة بادئة من الأول؟ ربنا بيقول لك: ﴿ذَلِكَ الْكِتَابُ لَا رَيْبَ فِيهِ هُدًى لِلْمُتَّقِينَ﴾ [البقرة: 2] فيه هدى. طب يا رب قل لنا الهدى على طول؟ لأ، قبل ما أقول لك الهدى، لازم تعرف أن الناس اللي يتعاونوا مع الهدى زي تعامل بني إسرائيل، عمرهم ما هيستفيدوا من الهدى. يعني اللي هيدخل سورة البقرة أو هيدخل القرآن بنفسية بني إسرائيل ما يكملش أصلاً، مش هيستفاد.
اللي هيدخل القرآن مراوغ، انتقائي، بيدور على مصالحه زي أفعال بني إسرائيل الطويلة في سورة البقرة، ده مش هينتج إنسان من... عشان كده أهم حاجة في التعامل مع القرآن: ﴿لَا رَيْبَ فِيهِ هُدًى﴾. قبل ما ربنا يقول لك فيه هدى، قال لك الأول: لا ريب فيه، لازم توصل لمرحلة لا ريب فيه الأول. فالتعامل مع القرآن تعامل فكري باهت ما بيجيبش هدى، ما بيجيبش أحمد؛ لأن ربنا قال: ﴿وَمَا أَنْزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ وَهُدًى وَرَحْمَةً﴾ [النحل: 64]. أن القرآن يفضي الخلاف، وما ينتجش وضعه رحمة.
رقم واحد: التعامل الانتقائي مع القرآن؛ يعني ممكن اتنين بيتعلموا القرآن ويحصل بينهم الخلافات؟ أه، لأن ده ممكن بيتعامل تعامل انتقائي، وده بيتعامل تعامل صحيح، أو الاتنين بيتعاملوا تعامل انتقائي.
رقم اتنين: الاتنين بيتعاملوا مع القرآن تعامل باهت جدلي فكري. النبي صلى الله عليه وسلم بيقول: «اقرؤوا القرآن، فاذا اختلفتم عليه فقوموا». التعامل مع القرآن مش عشان الخناق! النبي صلى الله عليه وسلم دخل على بعض الصحابة يضرب كل واحد منهم ينتزع آية من القرآن؛ قيل إنهم كانوا بيتكلموا في القدر، ده يجيب آية وده يجيب آية، مع أنهم بيتعاملوا بالآية! فغضب النبي صلى الله عليه وسلم، وكان كأن فقئ في وجهه حب الرمان، وقال: «أبهذا أمرت؟». يبقى لو هنتعامل مع القرآن التعامل ده، هنختلف، لو نتعامل عشان نتخانق، أنت بتجيب آية وأنا بتجيب آية، أنا عايز أكسب، يعني هنتسلح بنصوص القرآن ضد بعض عشان أنا أكسبك، احنا كده هنفضل مختلفين حتى لو بنتعامل مع القرآن.
ذلك تلقي القرآن في جو خاشع. نزول القرآن أصلاً مشهد مهيب: ﴿إِنَّا سَنُلْقِي عَلَيْكَ قَوْلًا ثَقِيلًا﴾ [المزمل: 5]. كانت الرجل الصحابي لما كانت على رجل النبي صلى الله عليه وسلم كانت هتتكسر، والنبي صلى الله عليه وسلم بيتفصد عرقاً... بيتفصد عرقاً من الفصد، الفصد لما تجي تقطع الوريد يقوم النزول بينزل دفعات في الليلة الشديدة البرودة، النبي صلى الله عليه وسلم العرق بينزل وما بيبطلش، من ثقل نزول القرآن. ده جو نزول القرآن.
صحابي بس كان جنب النبي، رجليه كانت اتكسروا، أومال إيه اللي بيحصل؟ الدابة، الراحل بتاعها بيكاد يمس الأرض لما ينزل الوحي على النبي صلى الله عليه وسلم وهو على الدابة. ده جو نزول القرآن، ملائكة كلها بتبقى خاضعة في السماء، بيسمعوا صوت كجر السلسلة على الصفوان، كأن سلسلة اتضربت، ده صوت كل الملائكة بتخر منه. صاعقة؛ مشهد نزول القرآن من أول السماء والأرض مشهد مهيب.
هكذا يتعامل مع القرآن، ده اللي يوفق لهداية القرآن. ربنا بيقول: ﴿لَوْ أَنْزَلْنَا هَذَا الْقُرْآنَ عَلَى جَبَلٍ لَرَأَيْتَهُ خَاشِعًا مُتَصَدِّعًا مِنْ خَشْيَةِ اللَّهِ﴾ [الحشر: 21]. الجبل هيتأثر من القرآن، ليه؟ من إيه؟ خشية الله. يبقى لو القرآن الآن ما بيزودناش خشية لله، مش هيأثر، مش هيزدنا هدى ورحمة. التعامل الجدلي الفكري الباهت البارد مع آيات القرآن لا يزدنا هدى ولا تزدنا رحمة، بل تزدنا إيه؟ خلافا، ﴿وَمَا أَنْزَلْنَا عَلَيْكَ الْكِتَابَ إِلَّا لِتُبَيِّنَ لَهُمُ الَّذِي اخْتَلَفُوا فِيهِ﴾ [النحل: 64]. التعامل الباهت، اللي ما فيهوش ﴿مِنَ الْجِبَالِ بُيُوتًا وَمِنَ الشَّجَرِ﴾ [النحل: 68]، واتخاذ البيئات الإيمانية الأول وفترات طويلة الإنسان يَمكث فيها في بيئات الإيمان، وبيحرص على إيمانه في الأول، زي الكتب الرائعة بتاعت الدكتور مجدي الهلالي: الإيمان أولاً، فعلاً أهم طريقة للتعامل مع القرآن: الإيمان أولاً، ده يوفق لفهم كتاب الله، حريص على الإيمان. خلاص؟
يبقى الفارق الأول ما بين النموذج. رقم واحد: ومن ثمرات النخيل ودي: ﴿كُلُوا مِنْ ثَمَرِهِ إِذَا أَثْمَرَ﴾ [الأنعام: 141]. رقم اتنين: ﴿تَتَّخِذُونَ مِنْهُ سَكَرًا وَرِزْقًا حَسَنًا﴾ [النحل: 67]، هنا: ﴿وَأَوْحَى رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا﴾ [النحل: 68]. طب بيئات الإيمان دي أنا اخترعها بنفسي؟ لأ، ربنا بيقول: وأوحى ربك إيه؟ الحاجات اللي ربنا قال لك اعملها اعملها. قال مثلاً: ما اجتمع قوم في بيت من بيوت الله... يبقى اجتمع مع ناس مؤمنة في بيت من بيوت الله. قال لك: إقامة الفرائض؛ أقيم الفرائض. قال لك: الحق بالصالحين؛ الحق بالصالحين. يبقى البيوت اللي أنا باتخذها برضه مش بمزاجي، ده بوحي، ﴿وَأَوْحَى رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ * ثُمَّ كُلِي مِنْ كُلِّ الثَّمَرَاتِ﴾ [النحل: 68-69] التعامل الكامل مع آيات القرآن.
رقم واحد، ننقل بقى إيه؟ التعامل الصحيح مع القرآن، إيه هو التعامل الصحيح؟ رقم واحد: التعامل الإيماني عن الهدى، واتخاذ بيئات الإيمان للتعامل مع القرآن. رقم اتنين: التعامل الكامل الكلي مع القرآن، مش التعامل الانتقائي؛ دي طرق التعامل لفهم كتاب الله.
الخطوة رقم تلاتة بعد ما: ﴿كُلِي مِنْ كُلِّ الثَّمَرَاتِ﴾، بعد ما تفاعلت مع كل آيات القرآن، تعمل إيه؟ ﴿فَاسْلُكِي سُبُلَ رَبِّكِ ذُلُلًا﴾ [النحل: 69]. خد بالك بالعطف هنا، أجيب الفاء؛ فاء السرعة. اسلُكي يعني إيه؟ هتتحرك بقى النحلة، النحلة هتبدأ تتحرك، إيه ده؟ التعامل مع القرآن بدون عمل لا ينتج فهم متكامل لكتاب الله. يعني لو احنا كل قضيتنا في التعامل مع القرآن القعدة دي، لا، ده تعامل ناقص. بعد القعدة دي في التعامل مع القرآن نبدأ نتحرك؛ ده ينزل يكلم الناس عن ربنا، ده يروح لأسرة فقيرة، ده يدعو ناس، ده يتعامل بالأخلاق، ده يصلح حاجة في دين ربنا، ده يعمل حاجة لدنيا الناس، سلوكي بتتحرك.
وخد بالك كلمة فاسلوكي، السلوك ده؛ الدخول، الإيلاج، تدخل جوه، وجه في السرعة، أن ما تفصلش بين العلم والعمل. المفروض القرآن -زي ما قلنا في أول الدرس- بيديك وقود، بيديك أنبتت، بيديك سكينة، بيديك رحمة، يبقى أنت بتقيم نفسك: اتعاملت مع القرآن صح ولا لا؟ هل أنت جا لك وقود ولا لأ؟ يعني واحد مثلاً قعد جلسة مدارسة قرآن من الفجر لغاية الساعة ستة ونص، وقام ما صلاش الضحى ودخل نام وراح عليه الظهر وكسل. الله! هو في إيه؟ كان في في حاجة خطأ، أنت قلبت القرآن هنا كلام فكري، لأ، المفروض: ﴿كُلِي مِنْ كُلِّ الثَّمَرَاتِ﴾ على طول، فايه؟ فاسلُكي.
طب اتحرك في إيه؟ في اللي ربنا قال لي عليه وفهمتو من القرآن، فاسلُكي سَبيلَ رَبِّك. اللي ربنا قال لي عليه امشي فيه. وكلمة سبيل في اللغة بيسموه إيه؟ بيقول لك السبيل في اللغة هو الذي سبلته السبلة، يعني اللي فيه، اللي مشي فيه ناس قبلك فبقى طريق ممهد، سواء مشي ناس قبلك ضلال أو الهداية بيسموه سبيل. لذلك سبيل تطلق على سبيل الحق وسبيل الباطل: ﴿وَلِتَسْتَبِينَ سَبِيلُ الْمُجْرِمِينَ﴾ [الأنعام: 55]. الطريق اللي اتمشي في ناس وسفلتوه قبلك، ده اسمه سبيل. فطرق أهل الباطل ممهدة؛ لأن في ناس مشيوا فيها، وطرق أهل الحق ممهدة، ﴿وَهَدَيْنَاهُ النَّجْدَيْنِ﴾ [البلد: 10]. فاسلُكي سبل، بتمشي مع الصالحين في الطريق، سبل ربك إيه؟ ذللاً.
المفروض تجد نفسك في الأعمال الصالحة بعد القرآن، الطريق بالنسبة لك سهل مَذلَّل، فاسلُكي سبل ربك إيه؟ ها؟ فاسلُكي سبل ربك إيه؟ فاسلُكي بيجي إيه؟ ذللاً. ذللاً يعني إيه؟ الطريق بقى مذلل. أمتى بقى مذلل؟ لما نتعامل مع القوات... يبقى أنا لما بتعامل مع القرآن وأكل من... بالرغم من أني كلت من كل الثمرات، إلا أني اكتشفت نفسي في أعمال الخير، واكتشفت نفسي في الدعوة إلى الله، اكتشفت نفسي في حاجة معينة -مش لازم كلنا نبقى نفس الحاجة- هأفاجئ أن القرآن بيوفقني للحاجة اللي أنا بالنسبة لها ميسر. النبي صلى الله عليه وسلم بيقول: «اعملوا فكل ميسر لما خلق له». كل واحد فينا متيسر لحاجة غير التاني؛ في واحد بيعرف يذاكر أكتر، في واحد بيعرف ينطلق أكتر في الحركة، في واحد بيعرف يشتغل في الأعمال الخيرية، احنا مختلفين.
فاسلُكي سبل ربك، وبعدين سبل ربك؛ أنت في العمل لدين الله بعد القرآن، أنت محفوف بالربوبية، فاسلُكي سبل ربكي ذللاً. لما النحل سمع الكلام ومشي، راح البيوت وكل من كل الثمرات.
وسلك السبل ربنا قال بعد كده إيه؟ يخرج. شف الفرق ما بين تتخذون منه سكرا، أنت اللي بتطلع النتيجة، وبين هنا إيه؟ بيخرج لوحده بدون ما تتكلف بقى النحلة وتحاول لأ، ربنا قال إيه؟ يخرج لوحده. يبقى النور اللي بيخرج من التعامل الحقيقي مع القرآن بيخرج بسلاسة، مش بتكلف ولا حاجة. بتعيش مع القرآن معايشة إيمانية، بيئات إيمان، تقرا القرآن على بعضه، كل الثمرات، تعمل أعمال صالحة، تفاجأ إنك بتقول كلام فيه نور.
الله! أنت جبت الكلام ده منين؟ إنك أنت بتتدبر قرآن، بتصلي قيام ليل، بتعمل أعمال صالحة، بتحاول ترضي ربنا، تفاجأ إنك بتقول كلام فيه نور. جبت الكلام ده منين؟ من القصة اللي فاتت دي: يخرج من بطونها شراب إيه؟ الله! يعني هيبقى فيه خلاف تاني! ده ربنا بيقول: وما أنزلنا عليك الكتاب إلا لتبين لهم الذي إيه؟ اختلفوا. خد بالك سورة النحل من المواضيع اللي أتكلمت فيها الاختلاف.
لذلك حتى موضوع السبت بتاع اليهود لما جه: إنما جعل السبت على الذين اختلفوا فيه، في آخر سورة النحل. يبقى من القضايا اللي بيترتب عليها سورة النحل قضية الخلاف. يعني القرآن هيخلي فيه خلاف ولا مش هيخلي في خلاف؟ فيه خلاف تنوع مقبول، وفي خلاف تضاد مرفوض. الخلاف بين الإسلام والعلمانية خلاف مرفوض، الخلاف بين الحنابلة والشافعية خلاف مقبول. ليه؟ لأن الخلاف بين الإسلام والعلمانية مش أصول واحدة، الأصول اللي خرج منها مش واحدة. الأصول اللي خرجت الحنابلة والشافعية والمالكية والأحناف أصول واحدة؛ القرآن والسنة.
لذلك قال: شراب مختلف إيه ألوانه؟ العسل اللي بيطلع حقيقة ألوانه مختلفة على حسب إيه؟ على حسب الغذاء بتاع النحلة. يبقى على حسب ما الإنسان انطلق أكتر وأكتر في القرآن والسنة، على حسب لون العسل بتاعه. فيه واحد ربنا فتح عليه في القرآن والسنة قوي، تلاقيه بينتج عسل صافي خالص. فيه واحد خد ما كملش قوي، تلاقيه بينتج عسل. لكن كل ألوان العسل فيها إيه؟ شرابه مختلف ألوانه فيه إيه؟ شفاء للناس.
العالم ينتظر تفاعل النحل مع الثمرات لتخرج العسل الذي فيه شفاء للناس، والعالم ينتظر تفاعل الدعاة مع القرآن لإخراج النور الذي فيه شفاء للناس. فيه درجات الشفاء مختلفة على حسب الألوان. لكن الكلمة للأسف أنا باسمع بعض الليبراليين، وخاصة الليبراليين الحقيقيين اللي هم بعيد كل البعد عن الإسلام أصلا، يقول لك إيه؟ يقول لك الليبرالية هي ملخص كلمة الإمام الشافعي: رأي صواب يحتمل الخطأ ورأي خطأ يحتمل الصواب. يقول لك هي دي الليبرالية. الليبرالية إن ما فيش حاجة اسمها حق مطلق، الليبرالية ما فيش حاجة اسمها إيه؟ حق مطلق. يعني ما فيش حاجة اسمها أنت صح على طول، لا، دايما قل أنا مؤمن بس جايز دين الإسلام يطلع غلط، وغيري كافر بس جايز يطلع هو اللي صح. يقول لك تعامل مع الحاجة كده، دي الليبرالية، دي أصل من أصول فهم الليبرالية.
ويستشهد بكلمة مين؟ الشافعي. الشافعي لما بيقول كده، بيقول كده لإنسان متفق معه في الأصول، لإنسان أكل معه من كل الثمرات وسلك شراب مختلف ألوانه، لأن ممكن يطلع فهم للشافعية غير فهم الحنابلة غير فهم الأحناف. وما كانش بيقول كده للي برة الإسلام أصلا، بدليل أن الشافعي يتكلم في أبواب الجهاد والقتال والجزية والكفار والمرتدين في كتاب الأم للشافعي، يعني سايب كتاب الأم للشافعي كله وعجبتك الكلمة دهي؟ يعني سايب تأصيلات الإمام الشافعي وفقهه وجاي عند الكلمة دي؟
فده طبعا كلمة حق أريد بها باطل. فاحنا بنقول الاختلاف الطبيعي، ربنا بيقول لك البشر هيظلوا مختلفين ده إلى يوم القيامة، في فهمهم، في فكرهم، وده إثراء. إن سبحان الله، أحيانا في دولة فقه الإمام أبو حنيفة ينفع، في دولة تانية فقه الإمام الشافعي ينفع، طالما مأصولهم واحدة مستمدة من القرآن والسنة أصول ثابتة، مش بيطلعها لك سكرا ورزقا، مش بيطلع سكر ورزق، لأ، دول بيطلعوا رزق حسن لكن مختلف ألوانه. وكل الألوان فيها شفاء للناس، والشفاء مختلف على حسب درجة نقاء العسل. ﴿إِنَّ فِي ذَلِكَ لَآيَةً لِّقَوْمٍ يَتَفَكَّرُونَ﴾ [النحل: 69].
كان نفسي نكمل بس بيتهيأ لي كده وجبة دسمة قوي، كفاية كده نكتفي بهذا القدر. نعيد تاني القواعد بسرعة. الله عز وجل نزل الوحي لفض الخلاف وهدى ورحمة، ولكن لأهل الإيمان، دي الآية الأولانية. الآية التانية: كما أن الله عز وجل أنزل ماء من السماء ليحيي الأرض الميتة، الله عز وجل أنزل واحدا من السماء ليحيي القلوب المنصطة. ﴿إِنَّ فِي ذَلِكَ لَذِكْرَى لِمَن كَانَ لَهُ قَلْبٌ أَوْ أَلْقَى السَّمْعَ وَهُوَ شَهِيدٌ﴾ [ق: 37].
كما أن الله عز وجل برحمته وفضله تكفل بحفظ اللبن حتى يصل إلينا من بين فرث ودم خالصا سائغا، تكفل الله عز وجل بوصول الوحي إلينا من بين استراق شياطين الجن وتدليس شياطين الإنس حتى يصل إلينا من بين فرث ودم سائغا خالصا لنا. الآية اللي بعد كده في التعامل مع الوحي: بعض الناس يتعامل مع الوحي بطريقتين خاطئتين؛ الطريقة الأولى: التعامل الانتقائي، الطريقة التانية: التعامل الفكري الباهت وعدم البحث عن الهدى، هي مجرد أفكار.
التعامل الصحيح مع القرآن: رقم واحد: التعامل الإيماني، اتخاذ بيئات الإيمان، تعلم الإيمان قبل القرآن. رقم اتنين: التعامل الكلي الشامل مع آيات القرآن، من كل الثمرات. رقم تلاتة: العمل بكتاب الله، وجاهدهم به، وليس فقط التعلم لأجل الاستئناس الفكري ويعني والاستمتاع الفكري، لأ، من خشية الله وتعمل بكتاب الله: فاسلكي سبل ربك.
رقم أربعة: ده هيتج شراب يخرج من بطونها، يبقى يخرج النور بدون تكلف من الإنسان. الشراب ده مختلف ألوانه؛ أفهم الناس في التعامل مع الوحي ستظل إلى يوم القيامة، ولكن ده خلاف مقبول. يبقى إذا يطرح علينا أحيانا مسألة نقول: هذا خلاف سائغ. هذا خلاف سائغ، يعني مثلا لما نقول زكاة الذهب الحلي للمرأة، هل بيجب عليها الزكاة ولا لا يجب عليها الزكاة؟ فتجد الأحناف قالوا: يجب عليها زكاة. والأئمة التلاتة؛ أبو حنيفة ومالك والشافعي قالوا: لا تجب على زكاة الحلي الزكاة.
ده خلاف اسمه خلاف إيه؟ سائغ. الخلاف اللي مش سائغ يقول لك إيه: ما فيش حاجة اسمها زكاة، الزكاة دي كانت مرحلة اقتصادية، كانت الدولة الإسلامية محتاجة فيها طريقة لجمع الفلوس، الناس يمكن استبدال الزكاة بالضرائب، فلو استطعنا جمع المال من الناس لإنشاء الدولة الإسلامية من غير الزكاة الناس، ده كلام هبل! سيبك من أن هو شكله حلو في الأول كده، ده سكر، ده خبل، ده مش ده مش خلاف سائغ أصلا. خلاص؟ ده مش قبول، ما ينفعش يتعامل معه بكلمة رأي صواب، لأن مش من أصولك أصلا، مش نابع من الأصول، ده فرث ودم، ده مش لبن، ده مش فطرة، ده مش علم.
زي ما النبي صلى الله عليه وسلم قال -نسيت أقول النص التاني اللي جاب اللبن العلمي-: النبي صلى الله عليه وسلم رأى رؤيا أنه يشرب لبن، كوب لبن، ثم يعطي فضله لعمر، حتى خرج من أظفاره، وأعطى بقية اللبن لسيدنا عمر، فسأله النبي صلى الله عليه وسلم، عمر سأل النبي صلى الله عليه وسلم: فما أولته؟ قال: العلم. والعلم هنا اللي بينفع في الخلاف، الهدى والعلم، مثل ما بعثني الله به من الهدى والعلم. الهدى ده الإيمان العام، العلم ده اللي بيجيء السيف يفض الخلاف، اللي بيفض المتشابهات. معي؟
يبقى دي الخطوات الأربعة للتعامل مع كتاب الله حتى نخرج من الخلاف. أسأل الله عز وجل أن يجعلنا من أهل القرآن الذين يتدبرونه ويعملون به ويجاهدون به. أقول قولي هذا وأستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك، وجزاكم الله خيرا.