بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم إنك حميد مجيد. أما بعد؛ النهاردا المجلس أظن السادس من مجالس تدبر سورة الحجرات، ووصلنا إلى قول الله عز وجل: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ﴾ [الحجرات: 12].
الحقيقة هذه الآية آية عظيمة جدا، وفيها عدة أوامر لأهل الإيمان. فبدا الله عز وجل بقوله: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾. قبل يا جماعة ما نخش في الآية، الحقيقة أنا توقفت أمام قول الله عز وجل: اجتنبوا؛ يعني لماذا أتى هذا اللفظ في هذه الآية الكريمة: اجتنبوا كثيرا من الظن؟ يعني ليه ما جاتش الآية: يا أيها الذين آمنوا لا تظنوا ظن السوء، يا أيها الذين آمنوا ابتعدوا، يا أيها الذين آمنوا دعكم من سوء الظن، أو أي لفظ آخر؟
فتأملت المواطن الذي جاء فيه هذا اللفظ، لفظ في القرآن -وأنا شوفوا النتيجة اللي هنخرج بها- لفظ اجتنبوا، أو هذا الجذر اللغوي بمشتقاته جه في القرآن مع إيه؟ أنا ليه بقول الكلام ده علشان نشوف يا جماعة سوء الظن ده فين من الشريعه، اللي هو معظم الناس بتعمله؟
فقبل ما نتكلم بقى عن سوء الظن، تعالوا نشوف هو فين من الشريعة؟ فلفظ اجتنب ده أو مشتقات هذا اللفظ جه في القرآن مع إيه كده؟ قال سبحانه وتعالى: ﴿وَالَّذِينَ اجْتَنَبُوا الطَّاغُوتَ أَن يَعْبُدُوهَا وَأَنَابُوا إِلَى اللَّهِ﴾ [الزمر: 17]. الطاغوت كل ما عبد من دون الله مع الشرك؛ والذين اجتنبوا الطاغوت أن يعبدوها. وقال سبحانه وتعالى: ﴿إِن تَجْتَنِبُوا كَبَائِرَ مَا تُنْهَوْنَ عَنْهُ﴾ [النساء: 31] مع الكبيرة. وقال سبحانه وتعالى: ﴿وَالَّذِينَ يَجْتَنِبُونَ كَبَائِرَ الإِثْمِ وَالْفَوَاحِشَ﴾ [الشورى: 37] نفس المعنى؛ يبقى كبائر الذنوب.
وقال سبحانه وتعالى: ﴿وَلَقَدْ بَعَثْنَا فِي كُلِّ أُمَّةٍ رَّسُولًا أَنِ اعْبُدُوا اللَّهَ وَاجْتَنِبُوا الطَّاغُوتَ﴾ [النحل: 36] الطاغوت برضو. وقال سبحانه وتعالى: ﴿فَاجْتَنَبُوا الرِّجْسَ مِنَ الأَوْثَانِ وَاجْتَنِبُوا قَوْلَ الزُّورِ﴾ [الحج: 30] قول الزور هنا اللي هو الشرك. وقال سبحانه وتعالى: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ بس.
يعني لم يأت الأمر في القرآن باجتناب شيء إلا الحاجات اللي احنا قلناها دي: اجتناب الطاغوت وأن يعبد الطاغوت من دون الله، اجتناب الكبائر، اجتناب الفواحش، اجتناب قول الزور، واجتناب الظن. طبعا الشرك ما هو الشرك، قول الزور اللي هو الشرك ماشي. طبعا بعض الكبائر بقى ذكرت مفصلة في آية تانية برضو فيها الاجتناب، قال سبحانه وتعالى: ﴿إِنَّمَا الْخَمْرُ وَالْمَيْسِرُ وَالأَنْصَابُ وَالأَزْلامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ﴾ [المائدة: 90].
فقبل ما نخش بقى في الآية، أنتم شايفين الظن محطوط فين في الإسلام في الشريعة؟ يبقى المسالة مش بسيطة، لما يجي ربنا سبحانه وتعالى يقول: اجتنبوا كثيرا من الظن، فانت تمشي تظن في مخاليق ربنا. لأن يا جماعه الذي يسيء الظن في من حوله -قبل ما يكون مذموما في شرع الله عز وجل، لأن سوء الظن بمن ظاهره العدالة حرام، يعني تاثم إن فعلت ذلك، خلي بالكم احنا لسه ما اتكلمناش بقى عن آفات قلب أوّرث ذلك الظن السيء، ولا اتكلمنا عن أفعال هتبتدي تفعلها مبنية على سوء الظن ده- مجرد أن تسيء الظن بمن ظاهره العدالة تاثم، وهذا منصوص عليه في كتب اهل العلم.
خلاص، زائد بقى ده في الشرع، زائد أنه انسان مرهق، الذي دائما ما يسيء الظن بمن حوله ده انسان مرهق متعب، متعب لمين؟ أولا لنفسه هو، متعب لنفسه، ما هو هو اللي ماشي عمال يسيء الظن في الناس ده، يعني ماشي أصلا شاغل دماغه باللي حواليه أصلا، مش كده؟ ما هو اصل ممكن يا جماعة واحد يعمل حاجة، والتنين ماشيين، واحد يشوف اللي عمله وما يحطش، ما يقفش يحلل الموقف، هو خلاص يعني الشخص ده ما يعنينيش في حاجة، عمل حاجة يعني ربنا يسهل له وخلاص، خلص الموقف على كده انتهى.
واحد تاني لا، يبتدي يبتدي يحلل الموقف، وبعد ما يحلل الموقف يطلع مثلا خمس ست سيناريوهات للموقف، يقوم هو بعقله يختار أسوأ سيناريو؛ عشان يحط الراجل اللي عامل الموقف ده في هذا القالب. انسان متعب مرهق، مرهق لنفسه أولا، ثم هو مرهق لمن حوله. يعني تخيلوا الشخص اللي احنا بنتكلم عليه ده لو كان مثلا زوجا أو كان أباط، وعلى طول سيء الظن، على طول الوسواس على طول شغال في دماغه: زوجته تعمل إيه، هي بتكلم مين، هي بتكتب لمين على الواتساب، هي بتعمل مش عارف إيه على الفيسبوك، هي نزلت ليه دلوقتي، هي ما رجعتش؟ وعمال دماغه شغاله في مائة ألف حاجة.
طيب ده لأنه بدا منها شيء يعني بدا منها شيء يوهم ذلك، أو لا خالص هو سيء الظن؟ أو العكس، تبقى امرأة مرهقة: هو فين، هو مع مين، هو ليه لما يتكلم في التليفون بيضحك، هو ليه لما إيه يا حاجة فين؟ طيب هو بدا منه شيء عشان كده أنت تشك؟ لا، هي سيئة الظن. طب لو كان الرجل ظاهر العدالة، أو المرأة ظاهرة العدالة، ما فيش أي ريبة طرأت على الرجل أو المرأة، ثم هو يسيء الظن بها، وهي تسيء الظن به، فاعل ذلك آثم حرام عليه. يبقى: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾.
ده على مستوى الأفراد بقى، اللي هو عادي، أب في مثلا حتى الاب -حتى الاب مع الأولاد- فكرة أنك دايما حاطط ابنك أو حاطط بنتك في خانة سوء الظن، هذا يدفع الولد أو يدفع البنت أن يرتكب الخطا. أوعى تفتكر أن أنت كده بتحوط عليه، أبدا؛ لان الولد أولا بيكبر على نفسية أن هو بيسيب عشانك مش عشان ربنا، عشان خايف منك، فمجرد ما يزول سلطانك من على الولد خلاص هيقع هيقع في الخطا.
المسالة الثانية أن الولد من كتر ما بيسمع اللوم، وهو ممكن ما يكونش بيعمل حاجة أصلا، خلاص يساهل عليه اللوم والتبكيت، فهيقع في المعاصي، فهيقع في المخالفات بسوء ظنك فيه. بسوء ظنك فيه، ده احنا بنقول لك لا، ده احنا ممكن نعمل العكس كمان، اللي هو إيه؟ نبقى عارفين أن الولد غلطان، وممكن في وقت نتغافل وما نبينلوش أننا عرفنا، وهذا من التربية. هذا من التربية، ممكن نبقى عارفين أن في وقت ابنه غلطان ونفتح له المخرج.
حتى يا جماعة صيغة السؤال مع الولد أو مع البنت، حتى صيغة السؤال مع الولد والبنت تفرق في التربية. يعني مثلا ابنك أنت عارف أنه ما صلاش، أنت عارف أنه ما صلاش، تفرق كتير جدا تيجي تقول له إيه: صليت؟ أنت كده بتدفعه دفعا للكذب، دفعا. أو تقول له: يا فلان، لو ما صليتش الحق صلي، قبل ما خلاص العصر فالحق صلي الظهر وسيبه وامشي؛ كده بتفتح له مخرج أنه يقوم يصلي. لكن ما بيصليش برضه، يعني ماشي، يعني واحدة واحدة تدعو بقى له، تذكره بالله عز وجل، تخوفه النار وترغبه في الجنة، يمتثل إن شاء الله، إنماك تدفعه دفعا للكذب وأنت عارف أنه ما صلاش، وعارف أن الكذب سهل عليه، وبعدين تمسكها عليه بقى: صليت امتى، وصليت فين، وأنت ما فيش فايدة فيك، وأنت... سوء الظن يا جماعة حرام.
سوء الظن بمن ظاهره العدالة حرام، فضلا أن يكون عالما، أو طالب علم، أو داعية، أو قارئا للقران، أو منفقا في سبيل الله، أو باذلا لدين الله عز وجل. يبقى فلان شفناه بينفق: مرائي. فلان شفناه بيدعو إلى الله: بيحب الظهور. فلانة قاعدة بتحفظ الناس القرآن: ما هي بتحب الرئاسة وتحب تبقى الناس حواليها! ما هذا الخبث؟
إنما يترشح -احفظوا الجمله دي- إنما يترشح سوء الظن من خبث الظان. كل إناء بما فيه ينضح، هتحط في الكوباية مية هتاخد منها مية، هتحط فيها عصير هتاخد منها عصير، هتحط فيها طين مش هتاخد منها غير طين. فأول ما انت... فتش في نفسك بقى: اه، الصراحة أنا كده، أنا فيا الآفة دي، على طول سيء الظن بأي حد، بأي حاجة، بأي... على طول نظرتي للأمور نظرة سيئة. في مشكلة جوه، في مشكلة في القلب.
في مشكلة في القلب؛ لأن القلب لو كان مخموما -مخموما ده إيه؟ لفظ نبوي، مش كده؟ مخموم القلب انسان طيب على فطرته كده- لو كان القلب مخموما مش هيسيء الظن بالناس. يا جماعة، احنا عندنا مدارس وتربى عليها أجيال هي قائمة على سوء الظن. أنا بتكلم عن مدارس إيه؟ مدارس دينية قائمة على سوء الظن بمن بقى؟ مش بالناس العادية كده، بالعلماء والمش عارف إيه، حدث ولا حرج. يبدعون مثلا عالما لمجرد أنه مثلا إيه ما بدعش واحد تاني، فخلاص: من لم يبدع المبتدع فهو مبتدع! مسخرة، مسخرة، وتربى على ذلك أجيال، وأثر في نفوس ناس كتيرا هذا المنهج للاسف.
والعكس كمان، يعني أنا... هو قدرا سبحان الله، وقدرا أن... يعني ده مالوش علاقه بالدرس، اللي تابع منكم الصفحة بتاعتي بتاعة الفيسبوك من يومين أو امبارح مش فاكر، خلاص تمام، ذكرني الفيسبوك بإيه؟ بمنشور، والمنشور كان فيه كلام عن حسن الظن بالمسلمين وكده يعني، فبعد الساعة اتناشر شفت المنشور رحت واخد حاطه إيه زي ما هو على الصفحة ونشرته، صحيت تاني يوم الدنيا مقلوبة، وأنت وأنت في إيه، في التعليقات، أنا مش... أنا مش دريان في إيه، هو في إيه، يعني إيه اللي حصل، يعني أنا بقول يا جماعة حسن الظن بالمسلمين، فانا والناس عمالة تغلط، أتاري واحد مات، والواحد ده فيه مشاكل، شوية مشاكل كده، فهم فاكريني بدافع عنه؛ يعني حسنوا الظن بالمسلمين.
فأنا مش فاهم في إيه، لغايه بقى ما جمعت أن في حد مات أصلا، وهو سبحان الله مات يعني مع كتابة المنشور تقريبا يعني، أو قبلها بدقائق ما أعرفش، يعني أنا كتبت البتاع ونمت. فقعدت أضحك، قلت: يعني أنا بقول لكم أحسنوا الظن رحتوا أسأتم الظن فيا أنا شخصيا يعني، وسبحان الله من مات هذا هو كبير تلك الفئه، كبير تلك الفئة التي نتحدث عنها، التي تسيء الظن بالمسلمين بعلمائهم وبدعاتهم وبقرائهم وبكل... أي حد بأقل شيء.
بالآية بقى، تعالوا نرجع للآية تاني عشان مش عاوزين نفتح بالظن. ولذلك الشيخ بكر أبو زيد رحمه الله أحسن في تصنيفه كتابا في الرد عليهم، فقال -حد يعرف اسم الكتاب؟-: تصنيف الناس بين الظن واليقين. تصنيف الناس بين الظن واليقين. احنا مش بنصنف الناس بظنون، واحنا... احنا بقى مالناش أننا نصنف حد، ولا نحكم على حد أصلا. انشغل بنفسك، مالكش دعوة بغيرك، مالكش دعوة بغيرك. فهذه آفة منتشرة، ومنهج مضر، وقد فتح باب شر على هذه الأمة، وزهد الشباب في كثير من أهل الخير والصلاح.
وإذا دخلنا في تفاصيل ذلك المنهج هلاقي منهجا لا يستقيم. بل وأنا... هذا والله من عجائب القدر ومن جميل رحمه الله عز وجل بهذه الأمة، وهذا ما أحكيه أنا رايته بعيني، أنا ما حدش حكى لي عليه، وكتبت ده في منشور بعد كده: أرباب هذا المنهج وكبارهم انقلبوا على أنفسهم. خلاص، هما اتربوا على كده، اتربوا على أنهم بيجرؤوا على الأكابر، اتربوا على كده عادي جدا، يطعنوا في أي حد، في أي حد بإيه؟ بظن، بظن. يعني فلان قال كلمة، طب هو معروف عنه أن منهجه سليم عندهم، وتمام؛ يعملوا إيه تاني يوم؟ طعن شديد جدا. طب رجعت له، سألته؟ لا رجع له ولا سال. طب الراجل حي يرزق، ما ترجع أسأله، أنت ليه قلت كدة؟ لعله يرجع، لعله قالها وهو ذاهل عن مآلاتها أو عن لوازمها، لعله لعله، هو ده يا جماعة إحسان الظن بالمسلمين.
إنما لاقي ازاي عندنا شهوة التبديع، وشهوة التكفير، وشهوة... فعلى طول يطلقوا تلك الأحكام، فكبارهم انقلبوا على أنفسهم. يعني بعد وقت تلاقي إيه؟ اللي كانوا في خندق واحد وببدعوا اللي بره، ابتدوا يعملوا إيه؟ ياكلوا نفسهم جوة الخندق ده. وأنا مما رايته أن كان إثنين -يعني سمنة على عسل من الناس الكبيرة بتاعتهم، وكان منهم واحد شاب صغير الكلام ده من حوالي اثنين وعشرين سنة، وكان واحد كبير، ويعني اسمه مشهور، وكان بيدرس في المسجد اللي هو شبه الطبق الطاير ده، عارفينه، اللي في... فين؟ في مصطفى النحاس ولا فين؟ في مسجد كده شبه الطبق الطاير كده، عارفين؟- المهم، كان إيه، كان بيدرس هناك يعني، وواحد تاني كان في حمامات القبة من الفئة دي، وكانوا بقى الإثنين: ده يشعر في ده، وده يشعر في ده، وبعدين انقلبوا على بعض. حمامات القبة ده بقى ليه حكاية معايا أنا شخصيا بقى، وكان يعني إيه يحذر مني بالاسم كده، فيا جماعة والله أنا شفت ده. حمامات القبة ده كان معه كم واحد حواليه؟ حوالي ست سبعة في المسجد، كان مسجد كده صغير كده، فكان يقول لهم إيه؟ احنا أهل السنة في مصر.
بره الجامع ده ما فيش حد أهل سنة هو والستة سبعة اللي معاه. إحنا أهل السنة في مصر، الشيخ أسامة محمد دماغ كبيرة، يعني سيبكم بقى من العلم هو دماغ تقيلة، وبعدين ده كان شاب صغير كده ومش يعني ما بلاش بقى نقول اسمه يعني، وهو قريب الشيخ. يعني طبعا الشيخ أكبر منه بكتير يعني في فرق، فهو يجي بقى متعصب كان بعديه كده في درس خاص أنا وإحنا وشيخ خمسة ستة مع شيخ، ويجي هو إيه متعصب طريقته كده جديدة هم فيهم عنف يعني.
فشيقول له طب أهدى يا حماده، هو طبعا هو إيه هو شاف أنه شيخ الإسلام في مصر يعني هو شيخ شيخ أهل السنة ما فيش أهل سنة غيره، وطبعا الشيخ يعني الشيخ مش عارف أقول المهم يعني قريبه يعني قريب يعني من قريب يقول له إيه ده بس يا حماده بس وهو الشيخ يقصدي إيه يشعلنه زياده فإني إيه ما يقدرش يقوله ما تقوليش يا حماده يعني ما يقدرش، بس يتنرفز زيادة ويعلي صوته يقول له يا حماده وبعد أهدى يا بابا والتاني إيه، فأي حد يشوف حد يقول له إيه أهدى يا حماده.
فـ يا أيها الذين آمنوا اجتنبوا كثيرا من الظن، أنا ما أعرفش حد هنا يعني ما ولا نعدي نعدي نعدي. ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ طبعا يا جماعة الظن أكذب الحديث كما أخبر بذلك النبي صلى الله عليه وسلم، وبئس مطية الرجل إيه زعموا بيقولوا بئس مطية زعموا. أه بيقولوا كذا فإنا بنقول زيهم وبنعتقد ويبقى فلان ده فاسق وفلان ده مبتدع.
هو ما فيش سماعات عند السيدات؟ فعلا دي مفاجأة جميلة جدا، قعدنا نظبط التكييفات والمراوح ونسينا السماعات، ما فيش السماعات، ماشي خلاص المره الجاية إن شاء الله نبقى نقفل بقى التكييفات طالما ما فيش سماعات ما يبقاش مالهاش لازمة بقى وجود السيدات. هحاول أعلي صوتي طيب والمره الجاية نظبط بقى سماعات فوق إن شاء الله.
﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ فيا جماعة دعكم من هذا المنهج الضال، المنهج المضل، المنهج الذي يعني يصيب قلوبكم في أخطر قضية من قضايا هذا الدين. أوتقوا عرى الإيمان الحب في الله والبغض في الله، هذا المنهج رأيناه بأعيننا إحنا تعاملنا مع الناس دي اللي برده بنحبهم لأصل التوحيد الذي معهم يعني مش يعني إحنا مش هنعمل زيهم. فكنا نرى عنفا شديدا من من نظرة عينيه كده نعرفه يعني، يبقى جاي شاف مجرد ما شافك مثلا عليك سمت السنة ولا بتاع وهو كذلك هو عليه السمت يقلب عينه ويقلب حواجبه وما يسلمش عليك. حاجة في يعني حاجة صعبة جدا من واحنا في الجامعة واحنا شباب صغيرين كنا نعرفهم، كنا نعرفهم وبعدين يا هلا ويبش لأي حد يجيلاقي واحد يعمل نفس الحركات دي، حاجة صعبة جدا.
فطب أنت بتحب في الله وتبغض في الله؟ ما أنت بتحب في الله وتبغض في الله مش هيبقى الموضوع كده، وبعدين أنت عاوز واحد يعني ملاك ما هو أنت عاوز ايه واحد لا يخطئ ولا عاوز ايه؟ من ذا الذي ما ساء قط ومن له الحسنى فقط؟ مين اللي موجود في الدنيا ما بيغلطش؟ مين ده؟ واديهم أهو إتقلبتوا على بعض في الآخر ليه ما أنتوا هتغلطوا برده يعني ما فيش حد ما بيغلطش، مش كده؟
يبقى لا نسيء الظن بالمسلمين، ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ عاوزين نقف هنا شوية مع كلمة كثيرا وبعدين رجع قال ربنا سبحانه وتعالى إن بعض الظن إثم. يبقى ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ يبقى في ظن لن نجتنبه، لأن ربنا ما قالش اجتنبوا الظن ما قالش كده، ربنا قال ﴿اجْتَنِبُوا كَثِيرًا مِّنَ الظَّنِّ﴾ يبقى في شوية ظن لن نجتنبه، مش كده؟
طب هو ده المعنى المقصود؟ أه ده مقصود فعلا، لأن في ظن لن يجتنب لن يجتنب بل بنبني عليه أحكاما، يبقى من الظن الذي لا يجتنب أن إحنا في شرعنا بنبني أحكام على غلبه الظن مش لازم يبقى فيه يقين يعني يا جماعة أحكام القاضي في الإسلام، واحد قاضي قاعد بيحكم بين الناس فده بيقول حجته وده بيقول حجته وده بيجي بالبيينة وده مش عارف بيدعي وده كذا وكذا وكذا، في الآخر هذا القاضي يحكم بيقين ولا بغلبه ظن؟ بغلبه ظن، مش كده، مش بيقين. يعني لو قلت للقاضي أحلف بالله كده إن فلان ده بريء؟ هيقول لك لا ما أقدرش أحلف، أنا بحكم ببينات قدامي، بينات فالبيينات والله الأداة بتقول إنه بريء. الأدلة دي بقى كان الشاهد مثلا الشاهد اللي جابه طلع إن هو ما عدالته ماهياش قد كده مع تحري إن إحنا عاوزين حد عدل وكذا وكذا، لكن في الآخر ممكن احتمالات عقلية واردة، الورقة اللي مش عارف جابها دي لا كانت مضروبة فمش عارف كل دي احتمالات، فما هواش يقين فده ظن وهنبني عليه أحكاما، خلاص.
وكذلك سوء الظن بمن ظاهره الفسق، هذا لا يجتنب، يعني واحد ظاهره الفسق فنقول لا نحسن الظن به، ما هو أنت ممكن إحسانك الظن ده يؤدي كارثة، مش كده، يعني إيه يعني مثلا مثلا واحد حرامي شقق وأنت عارف إنه حرامي شقق، وواقف أنت في الشارع الساعة 2 بالليل لقيته بيتلفت يمين وشمال وإيه طالع كده بأيه بيتسحب، فتقول إحنا خدنا في الدرس النهارده إحسان الظن بالمسلمين، الراجل ده طالع يقيم الليل على السطح فوق ضيعت الناس. فهنا لا، ده راجل ظاهره الفسق وأنت عارف إن هو كده وأحواله تنبئ بده، بيتلفت ليه؟ والساعة 2 الفجر طالع مش عمارته بيعمل إيه ده؟ فنبقى ضيعنا الناس خلاص، خصوصا إن كان بقى حاكما أو ذا منصب أو كده.
عمر رضي الله عنه يقول إيه: لست بالخب ولا الخب يخدعني، يعني أنا مانيش إنسان وحش سيء، ولكن مانيش برده أخدع من هؤلاء لأن لو خدع عمر ضاعت الأمة، مش كده أهو يجي له يقول له إيه شفت عثمان عمل إيه؟ عمل كذا وكذا وكذا وكذا يروح مصدقه النهار وهو إيه ابن لذينة الثاني عثمان رضي الله عنه هيعمل إيه يعني؟ وبعدين تاني يوم خلاص بقى بغوص بينه وبين سيد سيدنا عثمان يقوم ييجي شفت بقى علي عمل إيه؟ أه يبقى لست بالخب ولا الخب يخدعني. خلاص فمحتاجين هذه الفطنة.
يبقى ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ مش كل الظن في ظن لا تأثم ولا تحرج إن ظننته، خلاص وفي الحته دي لازم نقول وده قلناه كتير وكررناه: أنك لا تضع نفسك موضع الريبة. يعني ما جيش إيه نلاقيك في شهر سبعة على البلاج في فين، بتروحوا فين أنتوا بتروحوا بتروح فين عشان نقول فين بتروحوا معايا، أه وبعدين إيه واحد يقول لي يعني أنت ازاي فلان ده هنا فتقول له يا أخي أحسن الظن، أحسن الظن، طب أنت إيه اللي أنت ازاي هنا فعلا يعني هو أنت هنا بتعمل إيه؟ أه بتعمل إيه في الحته دي.
يبقى لا تضع نفسك موضع الريب موضع التهم، سيدنا النبي عليه الصلاة والسلام وهو من هو في حد ما فيش خالص، وبعدين تجي له ستنا صفية يقوم يقلبها إلى البيت بالليل تجي له المسجد وبعدين قايم يوصلها ويشوفوا اثنين من الصحابه يقول لهم إيه فمضوا فقال: «على رسلكما، إنها صفية»، بالراحة أنها إيه دي أمكم صفية. فقال: سبحان الله يا رسول الله يعني يعني إحنا هنشك فيك؟ قال: «إنها خشيت أن يقذف الشيطان في قلبيكما شيئا فتهلكا». الشيطان مش هيسيبكم.
يبقى الإنسان لا يقف مواقف التهم، خلاص، وإحنا نحسن الظن بمن ظاهره العدالة من المسلمين ولا باس أن تسيء الظن بمن ظاهره الفسق والفجور، ما فيهاش المشكلة دي، يبقى اجتنبوا كثيرا من الظن. العجيب بقى في الآية أن الله عز وجل لم يقل يا أيها الذين آمنوا اجتنبوا كثيرا من الظن إن كثيرا من الظن إثم، ما قالش كده ربنا، ولا قال يا أيها الذين آمنوا اجتنبوا بعض الظن فإن بعض الظن إثم، ما قالش كده.
هو قال سبحانه وتعالى: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ﴾ مشكلة دي! طيب لما هو بعض الظن إثم ليه نجتنب كثيرا من الظن؟ علشان ما تقعش في ذلك البعض، فيبقى هتجتنب كثيرا من الظن يعني ممكن من الكثير ده ظن يكون في محله وهتجتنبه ليه؟ علشان ما توقعش في البعض ده، حد فاهم حاجة؟
هديكم مثال، والمثال ده ذكره المفسرون قالوا زي إيه؟ طريق مثلا في قطاع طريق أو واحد بيثبت الناس في طريق مقطوع معروف بس هو ايه ليه ليه ورادي يعني مش على طول بيثبت الناس، لا يعني بيثبت الناس مثلا إيه سبت وثلاث وخميس، ماشي مثلا يعني، فتقوم تيجي أنت تقول لابنك يوم الاثنين إيه: أوعى تمشي من الطريق ده، صح، الله! طب ما هو النهارده مش السبت ولا الثلاث ولا يعني يمكن، فتقول له إيه أوعى تقرب من الطريق ده خالص، ليه؟ أصله ساعات في واحد بيثبت الناس في الطريق ده. يبقى إحنا عشان نجتنب اللي هو الوقت القليل ده اللي بيثبت فيه الناس بنمنع أنك تمشي منه خالص، إلا لو إيه بقى في ضرورة، يعني في ضرورة أنك تمشي من الطريق ده فبتاخد احترازاتك وتمشي، وعشان كده ربنا ما منعش الظن مطلقا، وإلا كان زمان القاضي مش عارف يحكم، مش كده؟ كان زمان مؤذن العصر ما أذنش وقت العصر، عارفين ليه؟ لأن هذه المواقيت مبناها على اليقين ولا على الظن؟ على الظن.
يعني إحنا قلنا لك إيه وقت العصر فهتقول أنه يصير ظل كل شيء مثله سوى ظل الزوال، مش مهم نفهم دلوقتي الكلام ده، فتقول خلاص ده هنيجي بقى نشوف هنقيس بالملي أن ظل كل شيء مثله يعني نجيب شاخص ونشوف ظله قد إيه ونقيس بالملي، لا مش بيبقى كده خالص، ولا كان زمان كده، أمَال بإيه؟ بغلبه الظن.
دخول الشهر إحنا بنصوم رمضان يا جماعة بيقين ولا بغلبه ظن؟ بغلبه ظن. الواحد اللي في المرصد بني آدم بني آدم في المرصد يطلع يقول لك إيه شَفْنا الهلال، مش القول ده يحتمل عقلا أنه يكون شاف حاجة تانية؟ أن يكون عينه خانته أن مش كده ولا لا؟ ومع ذلك هنعمل ايه؟ هنقول له نصوم ليه؟ بغلبه الظن. دي كلها ظنون، دي كلها ظنون في دين الإسلام وظنون يبنى عليها أحكام، فربنا ما قالش اجتنبوا كل ظن، لا غلط، غلط ﴿اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ﴾.
فيبقى دي أول مسألة مسألة الظن ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا﴾. طبعا الآية دي جميلة جدا، ربنا سبحانه وتعالى نهى عن أمور ثلاثة: الظن، التجسس، الغيبة، خلاص.
معنى الظن إيه؟ الظن أنك ما أنتَش عارف لسه، ما أنتَش متيقن من الحاجة الفلانية، صح كده ولا لا؟ يبقى الظن نقدر نسميه عدم العلم، خلاص. طيب عدم العلم ده يدفعك أنك تعمل إيه؟ أنك تتجسس، مش كده؟ يعني إيه فلان ده أنا شفته يا ترى هو كذا ولا كذا، طب أما إيه بقى نراقه، نتابعه، مش عارف نعمل إيه؟ يبقى الظن ظن يدفعك اللي هو عدم العلم يدفعك إلى تحصيل العلم. كيف تحصل العلم بالايه؟ بالتجسس. فإذا حصلت العلم خلاص تيَقَّنْتَ أن فلان فيه الحاجة الفلانية هي فيه فعلا، يوقعك هذا في الآية بعد كده في الغيبة لأن الغيبة ذكرك أخاك بما فيه، خلاص هو فعلا كده، مش تيجي تلاقي الناس يقول لك إيه فلان ده كذا تقول له يا أخي اتق الله ما تخوض، يقول لك لا ده هو كده ما هو ما هو كده، أنت كذا اغتبته وهنيجي للغيبة كمان شوية.
فالترتيب اللي في الآية ده ترتيب مقصود، ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ اوعوا تظنوا، طيب وقع الظن خلي بالكم يا جماعة اوعى تظنوا دي دي مسألة صعبة لأن إحنا بنقول لك إيه خاطب قلبك أنت أنت ما تكلمتش، أنتوا فاهمين أنا بقول إيه يعني أنت ما تكلمتش، لا ده هو خاطر خاطر لك فاسترسل الخاطر أنت غير مؤاخذ غير مؤاخذ عليه خلاص ده مش بإيدك الاسترسال مع الخاطر لا أنت مؤاخذ عليه، مفهومة دي؟ يعني جالك خاطر كده أن فلان ده مرائي فاستغفرت الله ودفعت ذلك الخاطر عنك خلاص غير مؤاخذة ابتديت تسترسل مع ذلك أه ده مرائي وشوف بيعمل إيه وده مش عارف إيه ومضيع الدين ومضيع الناس واسترسلت مع ذلك الخاطر فأنت في هذه الحالة قد تؤاخذ ﴿اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ﴾ والعلماء نصوا على ده يحرم سوء الظن، سوء الظن ده ما فيهوش فعل، ما فيهوش يعني ما فيهوش ما بنى عليه الشخص من أعمال أو من أقوال بس أساء الظن فهي مشكلة.
طيب ظننت يبقى أنت ما عندكش علم لسه، دَفَعَكَ الظن إلى التجسس وده حرام برده تجسست فتيقنت فعلمت فبعد كده هتطلق لسانك بقى فلان كذا ده أنا شفته بعيني وقعت في الغيبة ولذلك جاء الترتيب ﴿اجْتَنِبُوا كَثِيرًا مِّنَ الظَّنِّ وَلَا تَجَسَّسُوا وَلَا يَغْتَب بَّعْضُكُم بَعْضًا﴾ جاء الترتيب على ذلك، فكان المعنى
جاء النهي عما يكون قبل العلم، وجاء النهي عما به نحصل العلم، وجاء النهي عما يحصل بعد حصول العلم. فقبل العلم الذي هو الظن، وما نحصل به العلم الذي هو التجسس، وما يكون منا بعد تحصيل العلم الذي هو الغيبة. جاء ترتيب الآية على ذلك، يقول الله تعالى: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ﴾ [الحجرات: 12].
علاج الظن: واحد لقى في نفسه أنه يسيء الظن بالمسلمين، فماذا نفعل؟ أول حاجة العلاج النبوي، ماذا قال النبي صلى الله عليه وسلم؟ «إذا ظننت فلا تحقق». قف هنا، ظننت فلا تحاول أن تتحقق من شيء، والنبي عليه الصلاة والسلام ذكر أن الظن واحد من ثلاثة أمور تكون في هذه الأمة، فالظن واقع في الأمة. وأيضاً مما يمنع سوء الظن أن تعرف الحكم الذي قلناه، أنك بذلك آثم وحرام عليك، لأن بعض الناس ليست عنده هذه المعلومة أصلاً، لا هو حرام، حرام قد إيه؟ يكفي أن تنظروا إلى كلمة ﴿اجْتَنِبُوا﴾ في القرآن، لقد رأيتم مع ماذا جاءت.
فسوء الظن ليس شيئاً سهلاً ولا بسيطاً، ومآلاته كارثية، غير أنه في نفسه ليس بسيطاً، مآلاته كارثية، يعني لما الرجل يشك في امرأته، والمرأة تشك في زوجها، والأب يشك في ابنه، والأم تشك في بنتها، والمجتمع يبتدي كله يتفشى فيه سوء الظن، هذا مآل كارثي، البيوت تهدم، وربما اقتتل الناس بالظن، وقد تكلمنا عن فكرة اقتتال المسلمين في الآيات التي قبل هذه. لا يجوز أن تسيء الظن بمن ظاهره السوء، فليس فيها مشكلة.
ولا تجسسوا، أي إياكم والتجسس، وهذا أيضاً واقع للأسف، يقع بين الأزواج ويقع بين الآباء وأبنائهم، وهذا حرام. أأتجسس على ابني؟ نعم حرام أن تتجسس على ابنك. حاجة عجيبة جداً، وتلاقي الأب مثلاً، الولد في الغرفة، يدخل عليه يروح فاتح الباب، يا عم خبط الباب، كأنه كبسة على الولد! ليه كذا؟ ما تخبط، ظبط الباب، أشوفه بيعمل حاجة غلط، أنت ليه تشوفه بيعمل حاجة غلط ولا لا؟ سبحان الله، وليس هذا طريق التربية أصلاً، والولد له حق على فكرة أنه لا يفتح عليه هكذا فجأة. بدل ما تدخل تشوفه بيعمل حاجة غلط ولا لا، ما تربيه بحيث تبقى مطمئناً عليه، وأنت الآن دخلت واطمأننت، هل لو ابنك لا يعمل شيئاً غلطاً في اللحظة التي دخلت فيها فهو الولد كويس؟ من قال ذلك؟ والأبناء الذين يضربون بهذه الطريقة هم أكثر الناس عرضة لأن يعملوا الخطأ أصلاً، خوفوا ربنا يا أخي، وأن ربنا هو المطلع عليه ليل نهار، إنما فكرة أنه دائماً خائف من سلطانك أنت، طب فين ربنا في دماغه؟ ما فيش ربنا.
أنا أعرف أبنائي، يلاقي الأب داخلاً، يصلي، لا متوضئ ولا هو يصلي أصلاً. مرة كان ابن أخي عندنا، وابن أخي في مثل ابني الكبير، أقران، وطبعاً ابن أخي عارف أنني أول ما أدخل البيت لازم أسأل: الصلاة صليت؟ وأول حاجة أعملها، وكنت يومها متنفزاً، فجئت أزعق لابني، راح هو واقف وعامل يصلي عكس القبلة، لأن ابن أخي قال له: هيقلب علينا، هو يحب الصلاة، نصلي له، فربي ابنك أنه يخاف من ربنا، أنه يراقب ربنا سبحانه وتعالى، أنه لا يعمل كذا عشان ربنا، طب أنت عرفت أن ابنك لم يصلِّ وجاء يكذب، خففه من ربنا، قل له: ربنا شاهد ومطلع وربنا الذي سيحاسبك يا بني، وعلى كل حال لو شاكك في الصلاة أو الوضوء توضأ وصلي تاني. حاجة من اثنين: لقيته يصلي اعرف أن الوازع قوي، لقيته ما صلى وأنت متأكد، الحل ليس أنه دائماً يُهزأ، الحل أن تخوفه من ربنا.
ولا تجسسوا، والنبي صلى الله عليه وسلم نهى عن التجسس، التجسس يستعمل غالباً في الشيء السيئ، والتحسس في الشيء الحسن، التحسس جاء في القران، ماذا قال الله عز وجل: ﴿يَا بَنِيَّ اذْهَبُوا فَتَحَسَّسُوا مِن يُوسُفَ وَأَخِيهِ﴾ [يوسف: 87]، فالتحسس يكون في الشيء الجيد الجميل، والتجسس يكون في الشيء القبيح، وقد يستعمل أحدهما مكان الآخر فلا مشكلة، لكن هذا هو الأصل.
يا أيها الذين آمنوا اجتنبوا كثيراً من الظن إن بعض الظن إثم ولا تجسسوا ولا يغتب بعضكم بعضاً. الغيبة من كبائر الذنوب، ما هي الغيبة؟ ذكرك أخاك بما يكره، إن كان ذلك الشيء فيه، فهي هذه الغيبة، طب لو لم يكن فيه؟ ليست غيبة، هل حلال؟ لا مش حلال، هذا شيء أنك ليس فقط اغتبت، بل اغتبت وتكذب أيضاً، هذا يسمونه البهتان، إن كان فيه ما تقول فقد اغتبته، وإن لم يكن فيه ما تقول فقد بهته.
قبل الغيبة، هناك حديث مرعب في مسألة أنك تتجسس وتتبع عورات المسلمين، قال صلى الله عليه وسلم: «يا معشر من آمن بلسانه ولم يدخل الإيمان قلبه، لا تغتابوا المسلمين ولا تتبعوا عوراتهم، فإنه من تتبع عورة أخيه تتبع الله عورته، ومن تتبع الله عورته يفضحه ولو في جوف بيته». فلا تتجسس على أحد، لا تتجسس على زوجة، ولا زوجة تتجسس على زوج، ولا يتجسس على ابن، ولا أم تتجسس على بنت، ولا جار يتجسس على جار، حرام، كل هذا حرام، ومن فعل ذلك أبشر بفضيحة الله لك، يفضحه ولو في جوف بيته.
ولا يغتب بعضكم بعضاً. الغيبة من الكبائر، وهي ذكرك أخاك بما يكره، أنا أعيد لماذا؟ لأننا سنتفاجأ الآن، ما هو ذكرك أخاك بما يكره؟ يعني أن تقول عليه مثلاً: هذا فلان حرامي، وهو حرامي، وهذا فلان نصاب، وهو نصاب، لا، ليس هذا المقصود، تعالوا نشوف السلف فهموها كيف، معاوية بن قرة قال لشعبة: لو مر بك رجل أقطع، فقلت: هذا أقطع، كان غيبة. عارفين يعني إيه؟ مر بك واحد يده مقطوعة، فقلت: فلان يده مقطوعة، هذه غيبة، لماذا؟ ببساطة تعالوا نطبق التعريف، هل هذا الرجل يكره أن يقال عنه هذا؟ كلما مشى: أبو يد مقطوعة، يكره ذلك ولا لا؟ يكره، غالب الظن أنه يكره، طب ما تعريف الغيبة؟ ذكرك أخاك بما يكره، فيقول له: إن قلت له هذا أقطع، هذه غيبة. قال: فذكرت ذلك لأبي إسحاق فقال: صدق. أي أن معاوية بن قرة صح، هذه غيبة، ما رأيكم؟
طب خذوا التي أكثر من هذه، تأتي وتقول لك: أ شفت فلان الفلاني؟ يقول لك: لا والله، ليس القصير هذا؟ كلمة القصير هذه، غالب الظن أنه يكره أن يقال عنه القصير، لو قلتها غيبة. عائشة رضي الله عنها فعلت هكذا بيديها إشارة على السيدة صفية رضي الله عنهما، ماذا قال النبي صلى الله عليه وسلم؟ عائشة لم تتكلم، شاورت بيديها، قال: «لقد قلتِ كلمة لو مزجت بماء البحر لمزجته»، وفي رواية: لأنته. ما رأيكم؟ نحن ليل نهار نفعل هذا.
يقال إن واحداً رأى رؤية، أن واحداً من القراء في الحرم كان عنده أرض يزرعها، ويأتي القارئ، السوديس مثلاً، يلم المحصول ويمشي، والراجل يصحو يزرع، والقارئ يلم المحصول ويمشي. فحكى الرؤية لواحد من المعبرين، قال له: أنت اغتبت السوديس، قال له: أنا لا أجيب سيرته، أين اغتبته؟ قال له: هذه حسناتك، أنت عمال تزرع وتعمل حسنات، ويأتي في آخر اليوم يلم حسناتك ويمشي، أنت اغتبته، قال له: والله أنا ما قلت شيئاً، وقعد يفكر، قال له: أنا قلت فقط الشريم صوته أحلى من السوديس. ما رأيكم؟ طبعاً نحن لا نأخذ أحكاماً من المنامات، لكن نستأنس بها ونخوف بها، ضع لسانك في فمك ولا تتكلم، فلان أحسن من فلان، أنت ما لك بفلان وعلان، أنت حاكم على فلان وعلان؟ خليك في نفسك، انشغل بنفسك، لا تنشغل بأحد.
الشيخ أسامة حفظه الله، منذ حوالي 22 سنة حكى لي حكاية، وأنا أذكرها إلى الآن والله كأنها بالأمس، كان هو مهندس مدني، وكان ساعتها يشتغل في الهندسة، فكان عنده مكتب، وكان عنده محاسب اسمه أحمد، استغفر الله، لا ينفع أن أقول عليه أحمد، تعرفوا لماذا الآن؟ كان هو شاباً صغيراً والشيخ كان أكبر منه سناً، لكن هذا الشخص، الشيخ كان يترحم عليه، كان يقول له: يا أستاذ أحمد، قال له: لازم أستاذ أحمد، لا يوجد شيء اسمه يتنرفز ويزعل ويغضب، فالشيخ يحكي لنا يقول: كنت عندما أدعو له أقول: اللهم اغفر لأستاذ أحمد، اللهم ارحم أستاذ أحمد، قال الشيخ: أخشى أن تكون غيبة. ما رأيكم؟ ونحن أين؟ هذا يدعو له، ومع ذلك لا يرضى أن يقول اللهم اغفر لأحمد، أبداً.
أنا لماذا حكيت هذه الحكايات الحلوة التي تحبونها؟ لنقيس أنفسنا على هؤلاء، لأن الغيبة معظم مجالس المسلمين الآن فيها غيبة، حتى المتدينين للأسف، ونخرجها مخرج النصيحة، وأي كلام، وأنت في الآخر تريد أن تتشفى من الناس وعاوز تظهر فضلك على غيرك، يقول لك: شايف، أو يقول لك: لا، هذا يأخذ مكملات وهرمونات، لماذا؟ لأنه لا يريده أن يظهر طبيعياً فيكسب عند الناس، ولو مش مصدقيني تعالوا، هذا تحدي الأوزان سيضرب بعد الدرس اليوم.
هل كل غيبة حرام؟ هذه مسألة مهمة، ذكرك أخاك بما يكره وهو فيه، هل كل شيء كهذا حرام؟ مثلاً، هتروح المحكمة ولك مظلمة عند واحد، فتقول للقاضي: فلان ظلمني، فيقول لك: احكِ لي، تقول له: والله مش هعرف، أغتابه، هو سيزعل لو حكيت لك، فدي غيبة وحرام؟ لا، هذا مش حرام. ففي أمور، لو في مصلحة في الغيبة ممكن نعملها ولا حرج، بعضهم عدها وقال: ست حاجات، القدح ليس بغيبة في ستة: متظلم، ومعرف، ومحذر، ومجاهر بفسق، ومستفت، ومن طلب الإعانة في إزالة منكر. هذه ست حاجات أهم، القدح ليس بغيبة في ستة: متظلم، واحد عنده مظلمة راح المحكمة فسيتكلم، هذه مش غيبة، عادي، ومعرف، عارفين لما نقول سليمان بن مهران؟ حد سمع هذا الاسم؟ لما نقول الأعمش، حد سمع هذا الاسم؟ هو ده سليمان بن مهران، وكان أعمشاً فعلاً.
فلما تقول سليمان بن مهران، تلاقي ما حدش عارف مين سليمان. لما نقول لك الأعمش تقول: آه، أنا عارف الأعمش. مش عارفين الأعمش ولا عارفين سليمان بن مهران. الأعمش كان محدثاً من كبار المحدثين.
كان الأعمش شديداً جداً على الطلاب، وكان أعمى، وعشان كدة سموه الأعمش. مثلاً من شدته، لما يقعد يحدث ما يحبش حد يقعد جنبه، يعني الناس كلها قاعدة قدامه، واللي يجي يقعد ما يحبش حد يقعد جنبه. وهو طبعاً أعمى، فواحد من طلاب العلم، يعني ما يعرفش وجاي جديد على البلد وجاي يسمع من الأعمش، فلقى المسجد كله مليان إلا فين؟ جنب الأعمش. فما فكرش يعني هم كل دول ما بيفهموش؟ سايبين الحتة دي ليه؟ لا، تخطى الناس وقعد جنب الأعمش. فالأعمش حس بيه، فقال: حدثنا فلان، ويتف. قال: حدثنا فلان، ويتف، والناس يسكتون. عمال اسكت ليه؟ لو اتحرك الأعمش هيقوم يسيب المجلس، والنهاردة ما فيش مجلس تحديث، خلاص انتهى المجلس. فيا عيني الطالب، فكان شديد مع الطلاب.
لدرجة أنه جاب كلب وحطه في بيته، وأما يجوا، يا جماعة أنتم عارفين مين الطبقة اللي أخذت عن الأعمش؟ مين طلاب الأعمش؟ لأن فيها أسماء كبيرة. لما نقول لكم شوية أسماء كده هتترعبوا. يروحوا له بيته علشان ياخدوا، ما هو كان ضنين جداً بالحديث، يعني ما يطلعش الحديث كده لأي حد. يقوم يعمل إيه؟ أما يحس بيهم يسيب عليهم الكلب. فتخيلوا بقى المحدثون الكبار دول بيجروا قدام كلب. يرجعوا تاني يوم، أول ما يحس بيهم يعمل إيه؟ يسيب الكلب. جم في يوم قعدوا يقربوا يقربوا ما فيش كلب، راحوا كاسرين الباب أو زقوه جامد ودخلوا عليه، لقوه بيبكي. فقالوا: ما يبكيك؟ قال: مات الذي كان يامر بالمعروف وينهى عن المنكر، يقصد الكلب، الكلب مات!
الأعمش كان شديداً مع الطلاب، مرة واحد من طلابه حب يعمل معاه مقلب، والأعمش بنقول لكم قليل التحديث ما يحدثش كده بسهولة. فكان ماشي في جنازة، فراح جاي قال له: أقودك؟ فقال له: تعال امسك إيدي هوصلك. وبعدين وهو ماشي بيه كده راح انحرف بيه وفضل ماشي طالع بيه في الصحراء، والأعمش مش دريان عشان أعمى. فقال له: إحنا فين؟ قال له: إحنا في الصحراء، هتحدثني أو أسيبك وأرجع. فالتاني طبعاً راح محدثه، ده قعد يكتب ورا الأعمش ملى الكراسة بتاعته. وبعدين وهو راجع الراجل عارف إن الأعمش مش هيسيبه، وهو راجع راح مادي الكراسة لواحد في السكة كده قال له: اختفِ أنت بقى. وصل الأعمش لبيته قال له: أنت قدام البيت، راح الأعمش ماسك فيه والحقوني الحقوني، الناس اتجمعت. قالوا له: خد، فقال لهم: خذوا الكراسة اللي في إيده، فقال: دفعتها لغيري، خلاص ما فيش كراسة. قال: كل ما حدثتك كذب، كل اللي قلتهولك ما فيش، هوكس بقى، روح أنت بقى يلا. حدث طبعاً هو اللي عمل عشان ما يعملش كده، فقال هذا الطالب: أنت أعرف بالله من ذلك.
يعني هو كان شديد والطلاب كانوا برضه فيهم ظرف وشوية فهلوة، وكانت الدنيا ماشية، المهم الحمد لله وصل لنا علم الأعمش، ما هو لو ما كانوش عملوا الحركات دي معاه ما كناش أخذنا علمه. المهم، يبقى دي برضه ما هياش غيبة، فالقدح ليس بغيبة في ستة: متظلم، ومعرّف، ومحذّر. يعني إيه محذّر؟ بتحذر ناس من شخص، فلازم تذكره، يعني ما ينفعش ما تقولش خلي بالكم يا جماعة فلان نصاب، شايف فلان بيجمع فلوس من الناس وأنت عارف إنه نصاب ونصب قبل كده على ناس، فقول لهم يا جماعة فلان نصاب، يبقى أنت كده بتغتاب؟ لا ما بتغتابش.
واحد بيحكي لي ده حصل معاه هو برضه، واحد من النصابين الثقال، وبعدين ده برضه باع اللي وراه واللي قدامه واللي جنبه، راح بيدي له الفلوس اللي جمعها، رقم يعني. الراجل ده كان ابتدت حكايته تتعرف بس لسه ما انتشرتش، فكان محضر نفسه بيهرب، فالراجل راح قال له: خد يا عم شغل لي الفلوس، قال له: عم وراجل كبير في السن، قال له: يا عم الحاج أنا بهرب دلوقتي خد فلوسك وامشي، قال له: والله ما سايبه غير أما تاخد فلوسي تشغلها لي، هو فاكر إنه... قال له: والله العظيم أنا بهرب، خد فلوسك وامشي يا ابني أبوس إيدك. الراجل هو اللي بيتحايل على الراجل ده، أبوس إيدك شغل لي فلوسي ده أنا بعت اللي ورايا، فالتاني آخر ما زهق قال له: كام دول؟ كانوا مئة ألف جنيه، قال له: هاتهم، وراح مطلع له منهم مئتي ألف جنيه، قال له: ده أول مكسب ليك، وراح حاطط ثمانين ألف جنيه في العربية مع بقية الفلوس. فهو نفسه بيقول له أنا نصاب أنا بهرب، فيبقى ومحذّر، يبقى المحذّر يذكر ما فيش غيبة.
ومجاهر فسقاً، اللي بيجاهر بالفسق هذا لا غيبة له ولا كرامة له، يبقى يذكر لكن لمصلحة، انتبهوا يا شباب؛ يعني مش المجاهر بالفسق مش عمالين على بطال، فأهل الإيمان صفتهم إيه اللي النبي قالها عليه الصلاة والسلام: «ليس المسلم بالطعان ولا اللعان ولا الفاحش ولا البذيء». يعني مش مجرد أن فلان ده فاسق مجاهر بالفسق عمال ماشي تقدح فيه وتشتم فيه وتذكره، لا، مش كده، إذا كان في مصلحة.
ومستفتٍ، يبقى يا رسول الله إن أبا سفيان رجل شحيح، هند بتقول للنبي كده عليه الصلاة والسلام إن أبا سفيان رجل شحيح، يعني ما بيديهاش اللي يكفيها، فنقول دي غيبة؟ لا مش غيبة، دي بتستفتي، عايزة تعرف الحكم إيه. ولمجاهر فسقاً، ومستفتٍ، ومن طلب الإعانة في إزالة منكر. يعني واحد بيثبّت حد، واحد بينصب على حد، فتجي تقول لواحد إيه؟ تعال الحقني، تعال معايا عشان فلان بيضحك على فلان عاوزين نلحقه، فأنت كده بتطلب أن حد يعينك على إزالة هذا المنكر. على كل حال يا جماعة الغيبة مش كلها محرمة، إذا كان في مصلحة شرعية للغيبة فممكن أن احنا نغتاب، آه لكن ليس اتباعاً للهوى، ليس اتباعاً للهوى.
طيب، قال الله عز وجل: ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَب بَّعْضُكُم بَعْضًا ۚ أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ﴾ [الحجرات: 12]. هنا ربنا سبحانه وتعالى شبّه من يغتاب بمن يأكل لحم أخيه ميتاً. هسألكم سؤال: أكل لحم الإنسان حياً أبشع وأشد، ولا أكل لحم الإنسان ميتاً؟ تفكروا في إيه؟ حياً مش كده، واحد بني آدم صاحي ورحت أكلت منه حتة، ولا ميت، أيهما أبشع؟ هما الاتنين فيهم بشاعة طبعاً.
طيب لما هو أبشع أن يؤكل لحمه حياً، ليه هنا ربنا سبحانه وتعالى وصف المغتاب بمن يأكل لحم أخيه ميتاً؟ ما كان لو احنا عاوزين نبشّع الغيبة عند الناس كنا نقول إيه: أيحب أحدكم أن يأكل لحم أخيه حياً فكرهتموه؟ كده نبشّعها أكثر، ربنا ما قالش كده، قال: ﴿أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ﴾ [الحجرات: 12]، لمعنيين ركزوا بقى.
المعنى الأول: أن بعض الناس أما يجي يغتاب حد فتقول له يا عم اتق الله ده حرام، يقول لك: ما هو مش هيعرف، كأنه لا شعور له، أو ده يخفف عنك شيئاً ما من أنك تطلق لسانك فيه، بدليل أنه لو موجود مش هتتكلم. فالله عز وجل شبّه هذا بذكر، ليه؟ لأن الميت لا يشعر بأكلك منه، ومن اغتبته لا يشعر بغيبتك له، فيبقى وجه الشبه هنا إيه؟ أن كلا الرجلين لا يشعر بما يفعل به، فكان التشبيه به بأكل لحم الميت أشبه في مسألة الغيبة منه لو كان الأكل أكل لحم الحي.
المسألة الثانية: أنه هل ممكن عند الاضطرار أن تأكل إنساناً حياً؟ لو اضطررت لذلك تروح تاكل بني آدم يعني، يبقى عشرة نقول نذبح واحد عشان إحنا التسعة نعيش، ينفع نعمل ده؟ ما ينفعش حرام. طيب عند الاضطرار ممكن تاكل من إنسان ميت؟ آه، عند الاضطرار ممكن تاكل من جيفة ميت، وكذلك الغيبة. فلو قلنا أيحب أحدكم أن يأكل لحم أخيه حياً، فكأننا بنقول الغيبة لا تجوز في حال من الأحوال، حتى لو اضطررت إلى الغيبة، لا حرام. إنما لما قال الله عز وجل أيحب أحدكم أن يأكل لحم أخيه ميتاً، فدل ذلك على أن حكم الغيبة كحكم أكل الإنسان الميت، طب إيه حكم أكل الميت؟ حرام إلا عند الضرورة. طب إذا كانت الضرورة أكلنا بقدر الضرورة، مش تروح تشبع بقى من جثة، لا تاكل بقدر الضرورة ما يبقي عليك حياتك، فكذلك الغيبة تجوز عند الضرورة بقدر الضرورة، فهمتوا دي؟ ﴿أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَّحِيمٌ﴾ [الحجرات: 12]. طيب نقف هنا طالما أنتم نمتم خلاص، كان المفروض ناخد الآية اللي بعديها بس كفاية كده، قولوا قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت نستغفرك ونتوب إليك.
الشيخ أمجد سمير