الشيخ أمجد سميرالسلام عليكم ورحمة الله وبركاته. الفيديو الثالث من فيديوهات تدبر سورة الكهف، وصلنا في الفيديو الثاني لقول الله عز وجل: ﴿قَيِّمًا﴾. أحب أن أذكركم بحاجة صغيرة قلناها قبل ذلك، أننا لن نتناول سورة الكهف بالتفصيل، لكن أنا أفعل ذلك في أول عشر آيات؛ وقلنا المعنيين، المعنى الأول أن هذه الآيات هي التي ستقرع آذان المؤمنين وتنزل على قلوبهم، وقبل ذلك أذن النبي صلى الله عليه وسلم وتنزل على قلبه، وكذلك أول ما يقرع آذان الكفار بعد انقطاع الوحي 15 يوماً، فمهم قوي نركز في الآيات دي ونحاول نشوف هذه الآيات تقول ماذا. دي أول حاجة، المعنى الثاني أن أول عشر آيات لهن خصيصة مع الدجال، المسيح الدجال، برضه مش هنتعرض لها في هذا الفيديو، لكن عشان كده نحن نفصل فيها شوية.
فوصلنا لقول الله عز وجل: ﴿قَيِّمًا﴾، قال سبحانه وتعالى: ﴿لِّيُنذِرَ بَأْسًا شَدِيدًا مِّن لَّدُنْهُ وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا حَسَنًا * مَاكِثِينَ فِيهِ أَبَدًا * وَيُنذِرَ الَّذِينَ قَالُوا اتَّخَذَ اللَّهُ وَلَدًا * مَّا لَهُم بِهِ مِنْ عِلْمٍ وَلَا لِآبَائِهِمْ كَبُرَتْ كَلِمَةً تَخْرُجُ مِنْ أَفْوَاهِهِمْ إِن يَقُولُونَ إِلَّا كَذِبًا * فَلَعَلَّكَ بَاخِعٌ نَّفْسَكَ عَلَىٰ آثَارِهِمْ إِن لَّمْ يُؤْمِنُوا بِهَٰذَا الْحَدِيثِ أَسَفًا * إِنَّا جَعَلْنَا مَا عَلَى الْأَرْضِ زِينَةً لَّهَا لِنَبْلُوَهُمْ أَيُّهُمْ أَحْسَنُ عَمَلًا * وَإِنَّا لَجَاعِلُونَ مَا عَلَيْهَا صَعِيدًا جُرُزًا﴾ [الكهف: 2-8]. سنحاول نخلص هذه الآيات في هذا الفيديو.
قال الله تعالى: ﴿قَيِّمًا لِّيُنذِرَ بَأْسًا شَدِيدًا مِّن لَّدُنْهُ * وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا حَسَنًا * مَاكِثِينَ فِيهِ أَبَدًا * وَيُنذِرَ الَّذِينَ قَالُوا اتَّخَذَ اللَّهُ وَلَدًا﴾، هنا ستجد ربنا سبحانه وتعالى ذكر الإنذار مرتين والبشارة مرة: ﴿لِّيُنذِرَ بَأْسًا شَدِيدًا مِّن لَّدُنْهُ﴾، هذه مرة، وبعدين ﴿وَيُبَشِّرَ الْمُؤْمِنِينَ﴾ هذه البشارة، وبعدين ﴿وَيُنذِرَ الَّذِينَ قَالُوا اتَّخَذَ اللَّهُ وَلَدًا﴾، إنذار ثاني، لماذا؟ لماذا الإنذار مرتين والبشارة مرة؟ أول معنى قاله أهل العلم: أن ربنا سبحانه وتعالى حذف في الآية الأولى أحد المفعولين لـ "الإنذار"، وفي الآية الثانية حذف المفعول الثاني، فيدل المفعول المذكور في الآية الأولى على المحذوف في الآية الثانية والعكس. ما معنى هذا الكلام؟ الآن يا جماعة الأصل أن ربنا سبحانه وتعالى بينذر فئة معينة عذابا معينا، يبقى في منذر ومنذر به ويبشر فئة معينة بجزاء معين، عشان الجملة تبقى كاملة وواضحة، هنلاقي في الآية الأولى قال: ﴿لِّيُنذِرَ بَأْسًا شَدِيدًا مِّن لَّدُنْهُ﴾، هذا العذاب، طب ينذر من؟ لا، مش موجود، مش معروف في هذه الآية من المنذر. الآية الثانية: ﴿وَيُنذِرَ الَّذِينَ قَالُوا اتَّخَذَ اللَّهُ وَلَدًا﴾، ينذرهم بماذا؟ مش عارفين من الآية دي لوحدها ما نعرفش، فإذا جمعنا الآيتين على بعض، يبقى ينذر الذين قالوا اتخذ الله ولدا عذابا شديدا من لدنه.
فهمتم هذه؟ يبقى الإنذار اتذكر مرتين لأن المرة الأولى ذكر أحد المفعولين، والمرة الثانية ذكر المفعول الثاني، نجمعهم مع بعض نفهم الصورة كاملة. ولذلك في البشارة ستجد الاثنين موجودين، قال: ﴿وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا حَسَنًا مَاكِثِينَ فِيهِ أَبَدًا﴾، يبقى في هذه الآية ذكر من الذين يبشرهم، وبماذا يبشرهم. هذا أول معنى. معنى ثانٍ أشار إليه الطبري، وأنا أميل إليه، أن الإنذار الأول غير الإنذار الثاني أصلاً، الإنذار الأول هو الإنذار العام لكل الناس، فالنبي صلى الله عليه وسلم نزل عليه الوحي أول مرة، ما كانش في حد مؤمن بعد، فهيبدأ ينذر الناس كلها، كما في قوله تعالى: ﴿تَبَارَكَ الَّذِي نَزَّلَ الْفُرْقَانَ عَلَىٰ عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]. فلما آمن بعض الناس يبشر الذين يعملون الصالحات، وفي شوية فضلوا على الكفر، ﴿وَيُنذِرَ الَّذِينَ قَالُوا اتَّخَذَ اللَّهُ وَلَدًا﴾، يبقى ده إنذار عام وده إنذار خاص.
﴿وَيُنذِرَ الَّذِينَ قَالُوا اتَّخَذَ اللَّهُ وَلَدًا﴾، اللي هم كفار العرب قالوا الملائكة بنات الله -تعالى الله عن ذلك-، واللي هم النصارى قالوا المسيح ابن الله، واللي هم اليهود قالوا عزير ابن الله، فالله عز وجل ينذر كل هؤلاء الذين قالوا اتخذ الله ولدا، ﴿مَّا لَهُم بِهِ مِنْ عِلْمٍ وَلَا لِآبَائِهِمْ كَبُرَتْ كَلِمَةً تَخْرُجُ مِنْ أَفْوَاهِهِمْ﴾. نحن مش بنقف مع الآيات كلها بالتفصيل، لكن هنا وقفة مهمة جداً في قول عز وجل: ﴿كَبُرَتْ كَلِمَةً تَخْرُجُ مِنْ أَفْوَاهِهِمْ إِن يَقُولُونَ إِلَّا كَذِبًا﴾. يا جماعة لما نيجي نوزن الذنوب والمعاصي نوزنها بميزان الشرع، نوزنها هي شكلها إيه عند ربنا مش عند حضرتك. لماذا؟ لأن هناك لوثة جاءت من الليبرالية، وهي أن طالما ما مديت إيدي عليك فأنا حر في تفكيري، وأفكر زي ما أنا عاوز وحرية الفكر، وهذا ابتدى ينتقل للمسلمين، أن الذي لا نسكت عليه هو لو حد مد إيده عليك أو شتمك، أما واحد بيعبر عن فكره فهو حر وهذا أقل جرما من أن حد يعتدي عليك، طب هذا عند ربنا إيه؟ هل هذا ميزان شرعي؟ أم ميزان دماغ حضرتك؟
الهوجة التي حصلت الفترة اللي فاتت في موضوع الإلحاد وبعديها الشذوذ، مش بنتكلم على اللي بيفعل الشذوذ لا، بنتكلم على اللي يشوفوا حرية، "أنا حر، آتي امرأة، آتي ذكرا"، هذه حرية وكل واحد يفكر زي ما هو عاوز. ده فين ده في ميزان الشرع؟ نرجع تاني للآية اللي معانا عشان نعرف نربط الكلام كله، واحد بيقول اتخذ الله ولدا، هو حر؟ ده في ناس بتقول مفيش إله أصلا، وأنت شايف أن العملية دي بسيطة، لكن ربنا شايفها إيه؟ ﴿كَبُرَتْ كَلِمَةً تَخْرُجُ مِنْ أَفْوَاهِهِمْ﴾، ربنا شايفها حاجة كبيرة جداً، شوف الآية الثانية ربنا سبحانه وتعالى بيقول إيه: ﴿أَصْطَفَى الْبَنَاتِ عَلَى الْبَنِينَ * مَا لَكُمْ كَيْفَ تَحْكُمُونَ﴾ [الصافات: 153-154]، وقال في آية أخرى: ﴿إِنَّكُمْ لَتَقُولُونَ قَوْلًا عَظِيمًا﴾ [مريم: 89]. الآية الثالثة توضح هذا: ﴿لَّقَدْ جِئْتُمْ شَيْئًا إِدًّا * تَكَادُ السَّمَاوَاتُ يَتَفَطَّرْنَ مِنْهُ وَتَنشَقُّ الْأَرْضُ وَتَخِرُّ الْجِبَالُ هَدًّا * أَن دَعَوْا لِلرَّحْمَٰنِ وَلَدًا﴾ [مريم: 89-91].
فاحنا عاوزين نوزن الكلام بميزان الشرع، هو شكله إيه عند ربنا الكلام ده؟ مش عند حضرتك، ولا مسألة أن الأفكار أقل جرما من الأفعال، هذا مش في ديننا، بل بالعكس هتلاقوا الكفر أعظم عند الله عز وجل من قتل النفس، فلو واحد مسلم قتل واحدا، هل هذا أعظم عند الله عز وجل، أم أن واحدا مسلم ينطق كلمات الكفر أو يعتقد الكفر؟ واضح؟ فيبقى نزن بميزان الشرع مش ميزان الهوى ولا الموازين المستحدثة زي الليبرالية والعلمانية وحرية الفكر وحرية الاعتقاد. النبي صلى الله عليه وسلم لما قال: «ألا أنبئكم بأكبر الكبائر؟» بدأ بالإشراك بالله، ثم عقوق الوالدين، فعقوق الوالدين فعل، أما الإشراك بالله فممكن يكون بالكلمة أو باعتقاد بالقلب، ومع ذلك كان أعظم عند ربنا.
﴿فَلَعَلَّكَ بَاخِعٌ نَّفْسَكَ عَلَىٰ آثَارِهِمْ إِن لَّمْ يُؤْمِنُوا بِهَٰذَا الْحَدِيثِ أَسَفًا * إِنَّا جَعَلْنَا مَا عَلَى الْأَرْضِ زِينَةً لَّهَا لِنَبْلُوَهُمْ أَيُّهُمْ أَحْسَنُ عَمَلًا * وَإِنَّا لَجَاعِلُونَ مَا عَلَيْهَا صَعِيدًا جُرُزًا﴾، باخع يعني قاتل نفسك أو مهلك نفسك، فلعلك يا محمد قاتل نفسك أسفا عليهم إن لم يؤمنوا بهذا الحديث، يعني لأنهم ما آمنوا فأنت هتقتل نفسك عليهم حسرة وحزنا عليهم وخوفا وإشفاقا. فربنا لام على ده، وهنا الآية فيها لوم للنبي عليه الصلاة والسلام، وده المعنى اللي عاوزين نركز فيه جدا. ﴿فَلَعَلَّكَ بَاخِعٌ نَّفْسَكَ عَلَىٰ آثَارِهِمْ﴾، في تقديم وتأخير، "على آثارهم" كأن ربنا بيشبههم بناس تولوا ومشوا والنبي واقف يدعوهم، أو على آثارهم بعد موتهم، يعني لما الكافر يموت فالنبي كان يحزن حزنا شديدا أنه مات على الكفر.
الدرس الأول يا جماعة، وهذا المعنى ربنا ذكره في القرآن 13 مرة بألفاظ متفاوتة، فمعنى ربنا يلح عليه في القرآن على النبي مرتين بلفظ البخع، وثلاث مرات بلفظ الحزن "لا تحزن"، وست مرات بلفظ "يحزن" سواء بالنهي أو بالإخبار: ﴿فَلَا يَحْزُنكَ قَوْلُهُمْ﴾، ﴿وَلَا يَحْزُنكَ الَّذِينَ يُسَارِعُونَ فِي الْكُفْرِ﴾، ومعنى مهم هو: خلاص أنت اعمل اللي عليك وما تفكرش غير في كده. ليه؟ لأن كثيرا من الدعاة والمحبين للدين يصلون لمرحلة نفسية خطيرة، مرحلة أن الحزن والخوف على الناس يؤثر في نفسياتهم هم، وقد يوصلهم أن يتوقفوا عن العمل والدعوة من كثرة خوفهم على الناس، ربنا نهى النبي نفسه عن ده وكان النبي يعمل ده. ربنا لام النبي بكلام قوي في سورة الأنعام: ﴿وَإِن كَانَ كَبُرَ عَلَيْكَ إِعْرَاضُهُمْ فَإِنِ اسْتَطَعْتَ أَن تَبْتَغِيَ نَفَقًا فِي الْأَرْضِ أَوْ سُلَّمًا فِي السَّمَاءِ فَتَأْتِيَهُم بِآيَةٍ وَلَوْ شَاءَ اللَّهُ لَجَمَعَهُمْ عَلَى الْهُدَىٰ فَلَا تَكُونَنَّ مِنَ الْجَاهِلِينَ﴾ [الأنعام: 35]. فيبقى أنت كداعية، كحد محب للدين، خاف على الناس لكن أوعى الخوف يوصل لهذه المرحلة ولا الحزن.
يوصل للمرحلة دي؟ طب إزاي؟ أنتم عارفين في حل المشكلات، فيه خطوة كدة في الأوائل حتى، دائمًا يقول لك إيه؟ قسم الأفعال التي ستخرجها عشان تحل المشكلة لأفعال داخلة في استطاعتك وأفعال خارج استطاعتك، لازم تقسم هذا التقسيم، وبعدين تركز على الأفعال التي في استطاعتك وتنسى خالص اللي بره استطاعتك. ده حتى في العلمي يقولوا ده.
سأعطيكم مثالًا ونرجع هنا تاني عشان نفهم ربنا سبحانه وتعالى عشان نلاقي ده في القرآن موجود، اللي أنا بقوله دلوقتي ده بقى هنشوفه في القرآن. إحنا دلوقتي كنا العالم كله كورونا والعالم اتقفل وبتاع، طيب واحد عنده مطعم، فتخيل بقى الحال خلاص بينهار ليه؟ الكورونا. هيبتدي يفكر في حل المشكلة، هيقعد يقول إيه بقى؟ والله المشكلة دلوقتي أن العالم كله في كورونا والدنيا مقفولة، التفكير ده هيموته. لو فضل يفكر كدة أنه بيدور على المشاكل اللي بره، يعني هعمل إيه أنا دلوقتي؟ ما العالم كله في، طب أنا أعمل إيه للعالم؟
لكن تخيل كده لو نفس الراجل ده بيفكر يقول إيه؟ أنا دلوقتي ممكن أعمل لمطعمي إيه؟ أنا والله ممكن أشتغل إيه؟ هو ابتدى يفكر في إيه بقى؟ في استطاعته أنه يعملها. مش إيه بقى؟ لا أصل هو لازم مطعمي يفتح، مش بتاعته ده قرار حكومة. لا أصل هو لازم الطيران يفتح علشان أسافر أجيب، مش بتاعته ده قرار دولي. لو فضلت تركز في المشاكل على الحلول اللي خارج إرادتك مش هتعمل حاجة، هتقعد. أركز فين بقى؟ اللي أقدر أعمله.
أهو ربنا حل القصة دي بده، قصة أن النبي صلى الله عليه وسلم ﴿بَاخِعٌ نَّفْسَكَ﴾ [الكهف: 6] على آثارهم بهذا الحديث أسفًا، ﴿بَاخِعٌ نَّفْسَكَ أَلَّا يَكُونُوا مُؤْمِنِينَ﴾ [الشعراء: 3]. حلها إزاي؟ شوف كدة في الآيات، ربنا سبحانه وتعالى بيقول إيه: ﴿لَعَلَّكَ بَاخِعٌ نَّفْسَكَ أَلَّا يَكُونُوا مُؤْمِنِينَ * إِن نَّشَأْ نُنَزِّلْ عَلَيْهِم مِّنَ السَّمَاءِ آيَةً فَظَلَّتْ أَعْنَاقُهُمْ لَهَا خَاضِعِينَ﴾ [الشعراء: 3-4]. بس دي مش بتاعتك. يبقى أن كلهم يؤمنوا دي مش بتاعتك، ﴿فَإِنَّمَا عَلَيْكَ الْبَلَاغُ وَعَلَيْنَا الْحِسَابُ﴾ [الرعد: 40]. أنت اللي في إيديك إيه؟ تبلغ وما تفكرش تاني، مين بقى يؤمن؟ مين ما يؤمنش؟ مش بتاعتك، انساها. وما تزعلش، طب ليه ما أزعلش؟ لأن أنت بدماغك عاوزهم يؤمنوا، لكن في حكمة ربنا مش كدة، في حكمة ربنا مش كدة.
يبقى دول معنيين أهو: أول معنى أنك تفكر في اللي في إيدك تعمله وما تفكرش في الجزء اللي براك اللي هو في الحالة دي جزء بتاع ربنا. أنت اللي في إيدك ادعو إلى الله عز وجل، الجزء اللي براك يؤمن ما يؤمنش في إيد ربنا مش في إيدي مش بتاعتي، خلاص. ثاني حاجة تثق في حكمة ربنا أكثر ما تثق في شفقتك ورحمتك وفي عقلك. إحنا تكلمنا كدة على مسألة أن في ناس عاوزة إله تفصيل عياذًا بالله، عاوزين إله رحمة ومحبة وبس، إنما ربنا سبحانه وتعالى مش كدة، ربنا سبحانه وتعالى زي ما في رحمة في عذاب، وزي ما في عدل في فضل، ففي عدل، هذا هو إلهنا إله كامل سبحانه وتعالى.
فأعمل اللي عليك وما تفكرش في الجزء اللي براك اللي مش تحت إيدك، ما تفكرش فيه أصلاً، يعني كل ما يجي على دماغك انساه لأنه مش في إيدك. زي ما بالضبط صاحبنا ده بيقول لك إيه؛ الطيران والمطعم يتفتح، لو فضل يفكر كدة هييأس، ما هو الطيران هيفتح إمتى مش بتاعته ولا في إيده، والمطعم هيفتح إمتى مش بتاعته ولا في إيده، ده قرار دولي وده قرار حكومة. ينسى ده خالص بقى، إحنا دائمًا بنقول ده للناس، انسى الحلول دي، فكر في الحلول التي تحت إيدك.
فأنت برضه فكر في اللي تحت إيدك، أنا أدعو إلى الله عز وجل، يؤمن ما يؤمنش دي بتاعت ربنا، ثاني حاجة تكون واثق من رحمة ربنا سبحانه وتعالى ومن حكمته، أنه لما هدى فلانًا وأضل فلانًا، هدى هذا بحكمة وأضل هذا بحكمة، فترتاح نفسيًا وتبدأ كدة مطمئن، وهتلاقي بعد كدة عشان كدة تلاقي الآيات دي يعني شوف هنعيد تاني سورة الأنعام إيه: ﴿وَلَوْ شَاءَ اللَّهُ لَجَمَعَهُمْ عَلَى الْهُدَىٰ﴾ [الأنعام: 35] هو ربنا مش قادر؟ قادر، مش بتاعتك، ﴿فَلَا تَكُونَنَّ مِنَ الْجَاهِلِينَ﴾ [الأنعام: 35].
إيه سورة يونس: ﴿وَلَوْ شَاءَ رَبُّكَ لَآمَنَ مَن فِي الْأَرْضِ كُلُّهُمْ جَمِيعًا﴾ [يونس: 99]، على فكرة كلهم غير جميعًا، كلهم جميعًا عارف يعني إيه؟ يعني كلهم يعني كل الناس جميعًا يعني في آن واحد، يعني كله في لحظة واحدة يقول لا إله إلا الله، ربنا قادر على ده. ﴿أَفَأَنتَ تُكْرِهُ النَّاسَ حَتَّىٰ يَكُونُوا مُؤْمِنِينَ﴾ [يونس: 99]، ربنا بيلوم النبي عليه الصلاة والسلام على أنه بيفكر في حتة مش بتاعته. أنت مش بتاعتك تكره الناس أن يكونوا مؤمنين، ولا بتاعتك مين يؤمن ومين ما يؤمنش أصلاً، فالكلام ده لينا إحنا يا جماعة درس للدعاة.
خلاص، في الآية التي في سورة المائدة: ﴿يَا أَيُّهَا الرَّسُولُ لَا يَحْزُنكَ الَّذِينَ يُسَارِعُونَ فِي الْكُفْرِ﴾ [المائدة: 41]، ربنا يقول إيه: ﴿وَمَن يُرِدِ اللَّهُ فِتْنَتَهُ فَلَن تَمْلِكَ لَهُ مِنَ اللَّهِ شَيْئًا * أُولَٰئِكَ الَّذِينَ لَمْ يُرِدِ اللَّهُ أَن يُطَهِّرَ قُلُوبَهُمْ﴾ [المائدة: 41]. يبقى ده حكمة ربنا، فاطمئن، وسيب اللي لربنا سيبه لربنا، واللي ليك اهتم بيه، وانسى النتائج. وده إحنا قلنا ربنا قاله للنبي صلى الله عليه وسلم بشكل مباشر: ﴿فَإِنَّمَا عَلَيْكَ الْبَلَاغُ وَعَلَيْنَا الْحِسَابُ﴾ [الرعد: 40]، ﴿إِنَّمَا أَنتَ مُنذِرٌ ۖ وَلِكُلِّ قَوْمٍ هَادٍ﴾ [الرعد: 7].
فآيات كتير التي عاوزين نخرج بيه فلعلّك باخع نفسك، أوعى توصل للحالة النفسية دي أيها الداعية، أيها المحب لدين الله عز وجل، أوعى توصل للحالة النفسية التي توقعك الوقعة دي، نكمل المرة الجاية، والسلام عليكم ورحمة الله.