تفسير سورة المدثر | د. أحمد عبد المنعم

الحمد لله نحمده ونستعينه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدا عبده ورسوله صلى الله عليه وسلم.

تكلمنا في المرة الماضية منذ أسابيع في يعني شرح يسير لسورة العلق، وبإذن الله عز وجل اليوم نتكلم عن سورة المدثر. هذا المجلس أسأل الله عز وجل أن يبارك فيه وأن يتقبله منا، هذا المجلس هو يعني يعتبر زي عبارة عن بدايات تعريف بالسور، بحيث إن الإنسان لما يصلي بهذه السورة أو يريد أن هو يعيش مع هذه السورة فكأن احنا بس بنقدم له يعني مجرد تمرات، تمرة كده يعني إيه يتذوق بس المعاني العامة في السورة؟ لأن معاني كتاب ربنا سبحانه وتعالى لا تنفذ.

يعني وعلى مدار الأزمنة ومع تجدد الأحداث، معاني كتاب الله عز وجل فياضة لا تنضب أبدا، فهو يعني مورد معين كلما الناس تنهل منه، كل ما بيقدموا على كتاب ربنا أكثر كل ما كتاب ربنا سبحانه وتعالى بيعطيهم أكثر، لحل كل المشاكل اللي بيقابلها الناس في دينهم أو في دنياهم، على مستوى الفرد أو على مستوى الجماعات أو حتى على مستوى الأمم.

فكتاب الله عز وجل يعني هو السبب، يعني بمعنى السبب معنى الحب طرفه بيد الله عز وجل بأيدينا، فهو العلاقة الوحيدة التي يعني ممكن ننجو بها في هذه الدنيا بيننا وبين الله عز وجل، يعني أن الإنسان يرتبط بالله عز وجل عن طريق صفة من صفاته وهي الكلام كلام ربنا سبحانه وتعالى. فلابد أن نجدد في كل مرة ونذكر أنفسنا أن هذا الكتاب هو هو النور مش هو نور وفيه غيره نور، لا، هو النور المبين الذي أنزله الله عز وجل ليخرجنا من الظلمات إلى النور.

فسريعا اليوم بنمر على معاني عامة في سورة المدثر، وقيل آه يعني أشمغنى المدثر؟ قيل إنها إيه؟ ثاني سور أنزلت بعد سورة أو مقدمة هذه السورة نزلت بعد سورة العلق. نبدأ سويا يعني بإذن الله عز وجل نسأل الله عز وجل أن يعيننا وأن يفتح علينا.

يقول ربنا سبحانه وتعالى في بداية السورة: ﴿يَا أَيُّهَا الْمُدَّثِّرُ * قُمْ فَأَنْذِرْ * وَرَبَّكَ فَكَبِّرْ * وَثِيَابَكَ فَطَهِّرْ * وَالرُّجْزَ فَاهْجُرْ * وَلَا تَمْنُنْ تَسْتَكْثِرُ * وَلَبِرَبِّكَ فَاصْبِرْ﴾ [المدثر: 1-7]. هذه السبع آيات المتتاليات بخطاب متتالي للنبي صلى الله عليه وسلم معطوفا بعضها على بعض، خطاب للنبي صلى الله عليه وسلم: ﴿يا أيها المدثر قم فأنذر﴾. المدثر قالوا في معناها أي المتدثر، أدغمت يعني المتدثر يعني المتغطي، المدثر أي المتغطي بثيابه. لما رجع النبي صلى الله عليه وسلم رجع بالآايات التي أنزلت، رجع يرجف فؤاده فقال: زملوني زملوني، أو دثروني دثروني، فنزلت الآيات: ﴿يا أيها المدثر﴾.

وقيل في نزولها أقوال كثيرة، منها: النبي صلى الله عليه وسلم بلغه أن الوليد بن المغيرة اجتمع صنع طعاما لقريش واجتمعوا على أن يصفوا القرآن بوصف يصرف الناس عن سماع كتاب الله عز وجل، فاغتم النبي صلى الله عليه وسلم لذلك وتدثر فنزلت: ﴿يا أيها المدثر﴾. أيا كان، قيل بتكرار نزولها، وقيل نزلت الأول سبع آيات لوحدها أول المرحلة السرية يعني في أوائل البعثة، وبعد ثلاث سنوات في بداية المرحلة الجهرية نزلت أيضا بس نزل قسط كبير من السورة وكررت السبع آيات مرة أخرى. أيا كان تعالوا معا نعيش في جو الآيات. ربنا بيقول للنبي صلى الله عليه وسلم: ﴿يا أيها المدثر﴾.

إيه الفرق من الفروق التي قيلت بين المزمل والمدثر؟ ربنا ييسر يعني ولو ربنا قدر وشرحنا مع بعض سورة المزمل، قيل المزمل اللي بيتزمل لاجل النوم، يعني المزمل لابد أن يكون نائما، إنما المتدثر يعني ممكن واحد قاعد في البيت متدفي لابس عباية كده وقاعد بالليل ومدفي بس مش نايم بس هو إيه قاعد، ففيها نوع من الحالة من الخمول، إنما المزمل لواحد نايم. فقيل قال بعض المفسرين نزلت المزمل فقام النبي صلى الله عليه وسلم من الليل ولكن كان بيقوم من الليل ويجلس في بيته، فنزلت المدثر ألا يكتفي بالقيام بل لابد أن يخرج إلى الناس، فالمزمل نزع عنه النبي صلى الله عليه وسلم غطاء النوم، لما نزلت المدثر نزع عنه غطاء القعود وقام ليدعو، كأنها كانت مراحل.

وأول وقفة بنقفها مع السورة كلمة المزمل والمدثر والكلام فيها كتير بس عشان الوقت بتاعنا ما يتسرقش مننا. قيل إن لما قال الله عز وجل لنبيه صلى الله عليه وسلم: اقرأ، فقال: ما أنا بقارئ، قال: اقرأ، فضمه حتى بلغ منه الجهد، قال: ما أنا بقارئ، قال: اقرأ باسم ربك الذي خلق، فقرأ النبي صلى الله عليه وسلم. يبقى النبي صلى الله عليه وسلم -صلوا على النبي- النبي صلى الله عليه وسلم قرأ القرآن فعاد إلى بيته فنام، فانزل الله عز وجل: ﴿يا أيها المزمل﴾ و﴿يا أيها المدثر﴾ لأن مش القضية أنك قريت وبعدين تنام، لابد أن تقوم بهذه الآيات عبادة ودعوة، لابد أن يقوم النبي صلى الله عليه وسلم بهذه الآيات عبادة ودعوة.

يعني مثلا كواقعنا أن واحد يذاكر سورة أو يتعلم معاني سورة، زي مثلا مجلس زي ده، أو يروح يقرأ تفسير السورة، أو يطلب العلم، خاصة في الأوساط مثلا الوسط السلفي أن هو إيه بيتعلم وبيطلب علم، ثم ماذا بعد العلم؟ مش القضية أنك اتعلمت ونمت، أو فهمت آيتين ونمت، بعد أن تقرأ وبعد أن تتعلم وبعد أن تفهم لابد أن تقوم. عشان كده: ﴿يا أيها المزمل قم﴾ و﴿يا أيها المدثر قم﴾، يبقى مش القضية أنت اتعلمت، ودي مرحلة هامة، لكن ماذا بعد أن قرأت؟ لابد أن تقوم بآيات الله عز وجل عبادة في نفسك ودعوة إلى غيرك. ده منهج حياة، وده اللي بينقصنا، احنا عارفين وبنتعلم، لكن لا نقوم بهذه الآيات لنتحقق ونتخلق بها في أنفسنا، كان النبي صلى الله عليه وسلم خلقه القرآن، فليجاهد نفسه كي يتخلق بهذه الآيات وبهذه المعاني، ويقوم بهذه الآيات عبادة ثم يجاهد في سبيل الله لنشرها، ويبلغ عن الله عز وجل وعن رسله ولو آية، ثم يقوم فينذر.

يبقى المدثر أو المزمل بعد اقرأ ليه؟ لأن مش القضية أنك تقرأ وتنام، أو تتعلم وتروح تنام، أو تفهم سورة وتروح تنام، المفروض كل آية أو سورة بتتعلمها بتذهب عنك قسطا من النوم: ﴿وَمِنَ اللَّيْلِ فَتَهَجَّدْ بِهِ نَافِلَةً لَّكَ﴾ [الإسراء: 79]. ألق عن نفسك الهجود النوم بالقرآن، فكل معنى إيماني بتتعلمه وبتقرأه في القرآن إن استقر في قلبك أذهب عنك جزءا وقسطا من متاع الدنيا، من من التزمل أو التدثر. احنا قلنا التزمل ده النوم، والتدثر ده خمول والرخاء، إدثار لما النبي قال: الأنصار شعار والناس دثار، شعار ما يلي الجسد ودثار اللبس الخارجي، وكان أيام الصحابة يعني قلما يجد الإنسان اللي يلبس الدثار بالخارج الأعمال الخارجية، فده كان غني، فالتدثر فيه نوع من الرخاء. فكل معنى إيماني بيستقر في قلبك يصرف عنك جزءا من نومك وجزءا من متاعك، فقام النبي صلى الله عليه وسلم ولم يقعد.

يا أيها المدثر قم فأنذر. كان ممكن ربنا سبحانه وتعالى يقول: يا أيها المدثر أنذر. لماذا قال الله عز وجل: ﴿قم فأنذر﴾؟ هل المقصود ألا تدعو إلى الله إلا واقفا؟ ده المقصود؟ لأ طبعا، مش ده المقصود انك تدعو إلى الله واقفا؟ أمال إيه كلمة قم؟ مش المقصود أن القوم يعني انك تقوم، هذه قومة لله عز وجل، عزيمة وإصرار، وأن ما بعد هذه الآيات لابد أن يكون قبل نزولها غير الذي كان قبل نزولها، خلاص مانعك حياة جديد إعلام، مفاصلة، إعلان منهج حياة جديد، أنه أصبح ينذر الناس وعنصر فعال مغير مؤثر في أوساط الناس.

دي قومة، يعني الانسان لما واحد مثلا يكون طالب وبعدين حياته تتحول فجأة أنه تزوج وشغال في وظيفة، فيقول لأ، الحياة حياة وأولاد وشغل غير وانا طالب، دي حياة محتاجة بذل أكبر، إنه ينزل الشغل ويرجع وللأولاد فبذل أكثر، فكذلك ما بعد قم فانذر غير ما قبلها، حياة مختلفة وتفكير مختلف، حياة مختلفة، هذه هي القومة التي أرادها الله عز وجل صلى الله عليه وسلم وللدعاة إلى الله من بعده.

قم فأنذر، البداية كانت بالإنذار وليست بالتبشير، وهكذا دائما وأبدا المجتمعات اللي بتطول عليها النومة وبتطول في الغي والضلال بيطول عليها الظلام، حينما يأتي نور لابد أن يبدأ بالإنذار حتى يفيق الناس من سكرتهم، لازم، لما يقعد فترة طويلة ضلال والناس مش ما بتفكرش في آخرتها ولا في مستقبلها الأخروي، لابد أن نبدأ بالإنذار، فيستيقظ الناس ويفكرون إيه اللي هيحصل؟ طب وهيحصل لنا إيه؟ طب فيبدأ بعد كده الكلام بقى بالتبشير، لكن لابد من الاستيقاظ أولا قبل الكلام لازم يفوق، ما ينفعش يروح لواحد نايم وأتكلموا عن أي شيء إلا بعد أن يفيق. فالإنذار هو بمثابة يعني جلسات اللي إيه يعني بتفوقه.

ده الانذار، فكان البداية مع مجتمع مكة اللي ظل في ضلاله سنوات، سنوات يصنعون صنما ويعبدونه ثم يأكلونه ثم يصنعون غيره، يؤدون البنات ويشربون الخمر، يتقاتلون من أجل ناقة، هذا المجتمع كان لابد له من إنذار حتى يفيق. قم فأنذر، لابد أن تتخيل حيوية الآيات، هذه الآيات لا تحكي قصة، هذه الآيات وكل القرآن في واقع حي ينبض، يعني الواقع فيه حياة، في نبي ينزل عليه الآيات تطلب منه مطالب، يواجه الأعداء، معه مؤمنين، صراع، كرة مرة هكذا ومرة هكذا تداول بين يداول الله عز وجل الأيام، تعذيب، وقوف في وجه الباطل نصرة للحق استشهاد، هذه حيوية الواقع كانت بتنزل عليه الآيات، فكانت تنزل لتعالج هذا الواقع الحي النابض، ليست تنزل لتكتب لتنظر لمستقبل يبنى بعد خمسين سنة، يعني ما كانش القرآن نازل ليضع خطة خمسينية بواقع لم يكن موجودا، بل نزلت لتعالج واقعا حيا وترسم له مستقبله أيضا.

فاول ما تنزل كلمة قم فانذر على شخص النبي صلى الله عليه وسلم وهو واحد من قريش يسمى بالصادق الأمين، تخيل واقع الآيات، أنا مطالب مني أقوم وسط قبيلتي وبلدي والعالم أجمع لأنذرهم عذاب الله، طب مش هيصدقوني، طب معي مين؟ طب هينزل معي ملائكة؟ طب هينزل معي كنز؟ يعني ماذا أقول لهم؟ ماذا لو كذبوني؟ ماذا لو قتلوني؟ كل هذا دار في صدر النبي صلى الله عليه وسلم. صحيح مسلم لما قال الله علمه الله عز وجل أن يقوم ويدعو للناس، قال النبي صلى الله عليه وسلم: إذا يجعلوا رأسي خبزا، يقتلوني، يثلغ رأسي، قال وسلم: أوذيت في الله ولم يؤذ أحد وأخفت في الله. مر النبي صلى الله عليه وسلم بهذه المراحل، فتنزل الآيات لتعالج هذا، فهذه الآيات لما بتنزل أو هذه الكلمة اللي تخلص في آية ﴿قم فأنذر﴾ دي معناها تغيير وجهة حياة، ده معناه منهج حياة مختلف.

فكثير من التساؤلات تقع في صدرك، لو أنت طالبت لو أنا قلت لك أنت مطالب بتغيير الجامعة، كمية تساؤلات تجول في صدرك، طب والأمن طب والدنيا طب والناس طب والمشاكل طب وحياتي طب وزوجتي طب أولادي طب المستقبل طب المضارع طب الماضي، كمية تساؤلات تجول في صدرك. فهل قطع لهذه الوساوس أو لكل ما يدور في صدرك: ﴿وربك فكبر﴾؟ أن توحد وجهتك، ألا يكون في صدرك غير الله، ما فيش غير ربنا، لاني لما تكبر ربك في صدرك وفي عبادتك وفي حياتك في كل مكان، خلاص يصغر في عينك كل شيء، يصغر في عينك كل شيء، كل شيء يكون صغيرا، فتتعامل مع الأشياء على قدر قيمتها.

زي سيدنا موسى قال ربي إني أخاف، قال لا تخافا إنني معكما، فما خافش، كبر الله عز وجل، الله عز وجل في صدره، خلاص سبح الله كي نسبحك كثيرا ونذكرك كثيرا، وقال له ربه: ولا تنيا، أي لا تضعفا، ولا تنيا في ذكري فذكر الله كثيرا. فعظم الله عز وجل في صدره فذهب إلى فرعون يستحقره ويستصغره، رآه على حقيقته لا يملك لنفسه نفعا ولا ضرا فضلا على أن يملك لغيره.

فلابد للداعية أول زاد للداعية أن يعظم الله، أن يكثر من ذكر الله، مش هيقدر، المصاعب اللي هتقابل الداعية لن يستطيع أن يتغلب عليها دون ذكر لله، دون تعظيم لله. الانتفاشات اللي بينتفشها الباطل أكثر تأثيرا على الصدور وعلى العيون، وتؤثر تأثيرا عظيما إذا لم يذكر الإنسان عز وجل، فإذا ذكر الله اضمحلت هذه الانتفاشات ويخنس الشيطان ويولي مدبرا، كما يعظم الله عز وجل.

قم فانذر وربك فكبر، أول شيء مش وكبر ربك لأ، العناية، ومش والله كبر كبر الله وربك، الذي طالما غذاك بنعمه، تجد أن البدايات المكية تكثر من ذكر ربك: اقرأ باسم ربك، كثير تكثر من ذكر الربوبية مضافة إلى ضمير المخاطب، وربك فكبر.

وثيابك فطهر، قيل ثيابك فطهر، أي لا تلبسها على غدر لا تغدر، وقيل أن تكون عارفين زي ما بنقول سمعته بيضاء، وده لابد أن يكون الداعية سمعته بيضاء وخاصة في الأموال وفي النساء، أكثر المطاعم تأتي في الأشياء دي، في الأموال وفي النساء، فلابد أن يكون نظيفا ظاهرا وباطنا، ثياب طاهرة نظيفة والباطن نظيف، لا يحمل حقدا لأحد ولا حسدا لأحد ولا يفكر في دنيا غيره ولا يفكر في الدنيا ولا يغدر بالناس ولا ينطوي باطنه على أي شيء لا يرضي الله عز وجل. وثيابك فطهر، لازم الداعية سمعته تبقى نضيفة، عشان لما ينتشر بين الناس لا يجدوا فيه مطعنا. وقيل وثيابك فطهر وكأن إشارة إلى الثياب اللي كانت قبل النبوة.

تنزع ويأتي بثياب جديدة أمر مجازي، نوع من تغيير الحياة. عارفين لما واحد بيلبس لبس الشغل، خلاص بقى ده الموضوع بقى مختلف. الشغل ده محتاج لبس، ما ينفعش واحد لابس كده ومتشيك، ده مش لبس شغل. يبدأ بقى يغير ويلبس لبس الشغل. قيل ده إشارة أن تغيير الحياة وأسلوب الحياة، ﴿وَثِيَابَكَ فَطَهِّرْ﴾ [المدثر: 4]. قيل الأمر الظاهر والأمر بالباطن، الأخلاق والأعمال.

﴿وَالرُّجْزَ فَاهْجُرْ﴾ [المدثر: 5]. أي موطن لا يرضي الله عز وجل لا يقترب منه. لم يقل والرجز فاترك، ولكن قال ﴿وَالرُّجْزَ فَاهْجُرْ﴾. من البداية توطين النفس على الهجران؛ أنه سيهجر أشياء. من البداية لا بد من عبادة تسمى الهجر، الترك لله. سيحصل أنك ستترك أماكن كنت ترتادها، لن ترتادها بعد ليالي. قيل الرجز النجاسة أو الشرك أو التعلق بالأوثان أو التعلق بغير الله أو أي شيء يجلب العذاب. جامع الأقوال أي موطن أو شيء يجلب العذاب. لم يقل اتركه ولكن قال اهجره.

ولا كل ده قبل ما ربنا سبحانه وتعالى زي ما هنتكلم دلوقتي عن المعاني العامة في السورة، قبل ما يتكلموا بماذا ينذر أو أنواع الناس اللي هيقابلوه. أنت هتقابل أنواع من الناس، ما هو القرآن بيعلمنا. هنجد مين ونتصرف معه إزاي؟ وإيه طريقة تفكيري المقابل العدو بيفكر إزاي أو إيه مشكلته أو إزاي تطرق، أنك أنت مداخل قلبي فين؟ قبل كل هذا الكلام النصائح العامة التي قيل إنها نزلت أولاً، وكأن مطالب أن النبي صلى الله عليه وسلم قبل ما يطلع للدعوة الجهرية، قبل ما يخرج للناس، يعيش مع المعاني دي الأول بينه وبين إخوانه وأصحابه وعائلته. يعيش الأول هذه المعاني. كأن أنت قبل ما تطلع تجهر النادي أو تروح أي مكان تجهر، لا بد من فترة تمكثها تأصل هذه المعاني في نفسك ومع إخوانك، ثم تخرج.

فقال له ربه في هذه الوصايا ﴿وَلَا تَمْنُن تَسْتَكْثِرُ﴾ [المدثر: 6]. قيل يعني إيه لا تمنن؟ إحنا برضو عايزين بنتكلم عن المعاني، مش عايزين نبقى مش فاهمين حتى معاني الكلمات. ما ينفعش يعني أي حد يبقى عمره تعدى خمسة عشر، اثنا عشر سنة، عشرين سنة، أقل وأكثر ويجي سور حتى من الأجزاء ثمانية وعشرين أو تسعة وعشرين ثلاثين ومش عارف معنى الكلمة؛ ما ينفعش. تخيل كده دلوقتي بتصلي وبعدين تأثرت في الصلاة، فبعد الصلاة الطفل جنبك بيقول لك يا عمو هو الكلمة دي معناها إيه؟ وأنت متأثر، قلت له والله مش عارف. يقول لك أمال أنت متأثر آه؟ تقول له يعني أما تكبر يا ابني، أما تكبر هتبقى زي. لا، فإحنا لازم معاني الكلمات نبقى عارفينها، الخطوة الأولى للفهم معنى الكلمة. وحبذا لو فيه مصحف فيه حتى معاني الكلمات بالحاشية، فأي كلمة تقف عليك تسأل. أي كلمة وأنت بتقرأ مش عارف معناها تكتبها، مش لازم لو لم تستطع حالا حل هذه المشكلة، خلاص؛ تبقى دي من القضايا اللي في ذهنك.

يعني إيه ولا تمنن وأنت ساكت؟ قيل: لا تمنن على ربك بكثرة ما تعطيه من بذل وتضحية. وكأن ده إشارة من البداية خالص، ستقابل في هذا الطريق كمية غير عادية من التضحيات والبذل، فلا تنظر أبدا وراءك، لا تنظر أبدا إلى أي شيء قدمته، قدمته لله عز وجل؛ ما ينفعش. لو نظرت لرجعت. لو واحد بص وراه على اللي قدمه للدين، هيستكثر هذا. فمن البداية ستقدم الكثير، فلا تستكثره ولا تمن به على ربك. فهو يمن عليك أن هداك للإيمان.

يعني تخيل أنت بتسمع من البداية، أقول لك مثلا تعال اتبرع وما تستكترش اللي هتقدمه. يبقى أنت أكيد ما فيش حد بيستكتر الخمسة جنيه، فهو أكيد هيبذل شيء كثير. فدي معالم على الطريق من البداية. ألا تستكثر ما تقدمه في هذه السنين. يعني أنا عايز أقول لك الصحابي مش كان بيبص على الفلوس اللي بيقدمها، لو جزء من أجزاء جسده سقط كان لا ينظر إليه. يعني لما كان يمسك أحدهم الراية بيمينه فتقطع يمينه، ما كانش يبص على إيده اللي وقعت، كان يبص على الراية، فيمسكها بإيده الشمال، فتتقطع إيده الشمال، ما كانش يبص على إيده اللي وقعت، فيمسك الراية بعضديه. فكانوا منطلقين ﴿لَا يَلْتَفِتْ مِنكُمْ أَحَدٌ وَامْضُوا﴾ [الحجر: 65]، مضوا، وامضوا حيث تؤمرون. إنك هتلتفت للي قدمته، هي دي أحد معاني أن الشيطان بيأتيه من خلفهم، بين أيديهم ومن خلفهم، من خلفهم يعظم عليهم ما تركوه وما قدموه. هتهاجر وتذر أرضك وسماءك، أتقاتل فتقتل وتنكح الزوجة وييتم، يعظم ما تقدمه. فلا بد أن يكون قاعدة عندك ﴿وَلَا تَمْنُن تَسْتَكْثِرُ﴾.

وقيل لا تمنن تستكثر ليس مع ربك فقط، ولكن حتى مع الناس؛ لا تعطي الناس عطية بها أن تستكثر ما عنده من المال. يعني ما تديش لحد حاجة وعايش من الحاجة اللي بتديها له دي عايز منه فلوس أو عايز منه أي شيء. وبالنسبة للداعية، ما تهديش الناس بأي وسيلة كانت وتنتظر شيئا من عندهم. أنت نور للناس عام، زي إيه؟ الماء اللي بينزل من السماء ونور الشمس. فيه نهي أن أحد يمنع الماء عن الناس، منهي أن الإنسان يمنع فضل الماء عن الناس، ممنوع. والظل عامة الناس، مش كده؟ اللي بيؤذي ناس في ظلهم، اللي بيقضي حاجته في الظل لعنه النبي صلى الله عليه وسلم. فيه حاجات موارد عامة لا يستأثر بها، ما ينفعش حد يستأثر بها. فما ينفعش حد يمن على حد بنور الشمس ولا بالمطر. فأنت هداية عامة، رحمة عامة للناس، وكذلك الداعية لا يمنون ويستكثرون ويطلبون ما عندهم. وأكثر شيء يضايق المدعو أن يحس أنك بتمن عليه، أنك أعلى منه. لأ، ﴿إِنَّمَا أَنَا بَشَرٌ مِّثْلُكُمْ﴾ [الكهف: 110] هي الفرق في الوحي ﴿يُوحَىٰ إِلَيَّ﴾. يعني قبل ما يقول أنا يوحى إليه قال أنا بشر مثلكم. فلازم أن تراعي الناس وأنت بتدعوهم، ما يشعرش منك بأي منّ، فهذا الخلق يترك ويهجر عند الداعية سواء مع ربه أو مع الناس، ﴿وَلَا تَمْنُن تَسْتَكْثِرُ﴾.

وجامع هذه الصفات وهذه الوصايا ﴿وَلِرَبِّكَ فَاصْبِرْ﴾ [المدثر: 7]. ولما أقول لك تعال إحنا هنسافر، بس قبل ما نسافر لا بد أن توطن نفسك على الصبر؛ يبقى هذا السفر ليس سفرا عاديا. السفر ده مش عادي. فلما في البداية تخيل أنا بقول لكم النبي صلى الله عليه وسلم، فرض عادي، عش في قريش يأنف من عبادتهم للأوثان لكن لا يعلم ماذا يفعل، فكانوا بيعتزلوهم، ويمكث حبب إليه الخلاء. فلما نزلت اقرأ كانت مفاجأة، فقرأ، اقرأ وعاد بالآيات. هل يتوقف الأمر عند هذا الحد؟ لا، ولكن ﴿قُمْ فَأَنذِرْ﴾ [المدثر: 2]. بما علمك الله، فتخيل أنا عايزك تتخيل أنت كده، يعني بالنسبة لنا الصدمات اللي أنت ممكن تأخذها، أنا مطالب بكذا وكذا، حياتك بتتغير، وجهة حياتك بتتغير، القرآن نزل ليغير المجتمع. فتنزل الآيات أنا مطالب بكذا وكذا وكذا وكذا وصايا عامة. في ختام ﴿وَلِرَبِّكَ﴾ لا لغيره، العنصر ده الإخلاص التام، مش عايز مجرد حتى أن هم يتبعوك، أو اسمك يكتب، أو تكون مقدم، كل أي نية أخرى بتدخل اعرف أن هي بتضعف من عزيمتك. ﴿وَلِرَبِّكَ فَاصْبِرْ﴾.

فعلا كمال الصبر مع كمال الإخلاص. يعني لما تبقى أنت مش عايز من الناس حاجة، تلاقيك صابر معهم للآخر. إنما لو مستني حاجة تحصل، فلو الحاجة دي ما حصلتش مش هتكمل، أن هم يقدموك، وأن هم يبجلوك، أن هم يرفعوك، أن هم يرفعوا قدرك، أن هم أيا كان ما أن هم يدوك مال، أيا كان ما تنتظره، حتى الهداية. يأتي النبي وليس معه أحد، أنت بتتعامل مع الله، ﴿وَلِرَبِّكَ فَاصْبِرْ﴾. فمعاني عالية، فعلا محتاجة يعني فترة طويلة للإنسان يجاهد نفسه حتى يتخلق بهذه الأخلاق. ألا يصرف بصره إلى الناس، ﴿وَلِرَبِّكَ فَاصْبِرْ﴾، بتتعامل ربنا ما بتتعاملش الناس. يعني وأنت بتعامل الناس ﴿لَّا أَسْأَلُكُمْ عَلَيْهِ أَجْرًا﴾ [الفرقان: 57]. مش عايز حاجة، مش عايز أي شيء إلا أن أطلب رضا مولاي. ففعلا الداعية لما ييجي يكلم ناس يهينوه، يؤذوه، يضربوه، هو مش مستني حاجة، هو مستني أجره يوم القيامة. فما عندوش مشكلة، أي يعني أي سيناريو هيحصل، يعني بالنسبة لنا أنت مش هيبقى يفارق معك، لأن أنت راسم على هناك، أنت مركز.

مش كده لما عبد الله بن جحش قال: أسألك رجلا كافرا صديقا يثبتني ويجدع أنفي ويقطع أذني، فألقاك. فتسألني، هو راسم الموضوع على هناك مش على هنا. هو على هناك، فألقاك فتقول لِمَ؟ فأقول فيك، فأخذ الأجر لله فيك. ﴿وَلِرَبِّكَ فَاصْبِرْ﴾. وكأن هذه الوصايا للداعية اللي بيتلقاها بنوع من الهدوء والمعايشة، يقطع كأن إذا الفجائية دي ﴿فَإِذَا نُقِرَ فِي النَّاقُورِ﴾ [المدثر: 8]. وكأن يعني تربية على أن الوقت يداهم، ﴿اقْتَرَبَتِ السَّاعَةُ وَانشَقَّ الْقَمَرُ﴾ [القمر: 1]. قد ترى للناس حسابهم، ﴿فَإِذَا نُقِرَ فِي النَّاقُورِ﴾، كأن النقر في الناقور ده زي جرس التنبيه، كأن أنت لازم تسبق هذا النقر، وأن يكون نقرك في آذان الناس أسبق من هذا النقر، قبل أن يقعوا في جهنم، زي ما النبي يقول: «وأنتم تفلتون مني، مثلي ومثلكم كمثل رجل أوقد نارا، فجعل الفراش والجنادب يقعون فيها ويقتحمون فيها، وأنا آخذ بحجزكم عن النار وأنتم تفلتون مني».

فأنت لازم تسابقهم، نفس تفلتت مني إلى النار ما بكى، نفس تفلتت مني. فكأن ﴿فَإِذَا نُقِرَ فِي النَّاقُورِ﴾ تهييج للداعية أن يسبق هذا الصوت. وكأن أيضا هذا هو في الدعوة بماذا ينذر؟ ينذر بهذا اليوم. وأي مجتمع كما قلنا مر بمراحل طويلة من الموت، يعني الموت لنفس الضلال والظلام، بتبدأ معه بالإنذار والكلام عن الدار الآخرة بس، حتى قيل يعني قبل أن تتكلم معه عن صفات الله والكلام عن عظمة الله، كلمه عن الدار الآخرة الأول، هو يخاف أن فيه امتحان، بعد كده أذاكر إيه؟ هنشوف. يعني قبل ما تكلم واحد عن المنهج يذاكر إيه؟ قل له فيه امتحان الأول. يعني قبل ما تيجي تقول لي أنت مطالب أنك تذاكر كذا وكذا وكذا، قل لي فيه أصدق أن فيه امتحان فأنا اللي هسألك بقى بلهفة، طب أذاكر إيه عشان ما أسقطش. فلا بد أن نصدق أولا، الوزعة دي لو مش موجودة مش هينفع أي كلام بتقوله. مش كده آخر السورة قمة الإعراض، وربنا بيقول إن سبب الإعراض ده ﴿كَلَّا بَل لَّا يَخَافُونَ الْآخِرَةَ﴾ [المدثر: 53]. السبب اللي هم فيه ده أن هو مش مصدق أن في آخرة، لأن لو كان صدق كان بقية الخطوات مشيت منطقية.

فكثير أن هم يقعدوا زي سورة الفرقان، يقعدوا يقولوا شبهات، ﴿وَقَالَ الَّذِينَ كَفَرُوا إِنْ هَٰذَا إِلَّا إِفْكٌ افْتَرَاهُ وَأَعَانَهُ عَلَيْهِ قَوْمٌ آخَرُونَ﴾ [الفرقان: 4]، وقالوا ما لهذا الرسول، شبهات. فربنا بيقول هو القضية مش للشبهات، بل كذبوا بالساعة. هو مشكلته أنه مش مصدق أن في يوم القيامة، ﴿وَأَعْتَدْنَا لِمَن كَذَّبَ بِالسَّاعَةِ سَعِيرًا﴾ [الفرقان: 11]. فتلاقي كثير في القرآن يمشي ويقول لك أنه بيفتن بسبب أنه مش مصدق، ﴿وَكَذَٰلِكَ جَعَلْنَا لِكُلِّ نَبِيٍّ عَدُوًّا شَيَاطِينَ الْإِنسِ وَالْجِنِّ يُوحِي بَعْضُهُمْ إِلَىٰ بَعْضٍ زُخْرُفَ الْقَوْلِ غُرُورًا * وَلِتَصْغَىٰ إِلَيْهِ أَفْئِدَةُ الَّذِينَ لَا يُؤْمِنُونَ بِالْآخِرَةِ﴾ [الأنعام: 112-113]. مين اللي بيفتن بالشبهات والشهوات؟ اللي مش مصدق أن في آخرة. وإذا قرأت القرآن -طب القرآن ما بيأثرش بسورة الإسراء ما بيأثرش فيهم ليه؟- ﴿وَإِذَا قَرَأْتَ الْقُرْآنَ جَعَلْنَا بَيْنَكَ وَبَيْنَ الَّذِينَ لَا يُؤْمِنُونَ بِالْآخِرَةِ حِجَابًا مَّسْتُورًا﴾ [الإسراء: 45]. فتلاقي كثير في القرآن أن السبب الرئيسي لفتنتهم، استمرارهم في الشهوات، الفجور، الشبهات، الإعراض، كل ده أنه مش مصدق أن في آخرة، فالبداية أنك تركز على الدار الآخرة.

﴿كَلَّا بَل لَّا يَخَافُونَ الْآخِرَةَ﴾، ده سبب الإعراض اللي إحنا هنشوفه في السورة. ﴿فَإِذَا نُقِرَ فِي النَّاقُورِ * فَذَٰلِكَ يَوْمَئِذٍ يَوْمٌ عَسِيرٌ﴾ [المدثر: 8-9]. جمال القرآن وإظهار القرآن في طريقة عرضه، أن ما يقولوش خد بالك في يوم آخر، يقولوا لأ ما فيش، يقولوا لأ فيه، يقولوا لأ ما فيش، يقولوا لأ فيه. هو بيتكلم أن الموضوع منتهي، يعني ﴿بَل كَذَّبُوا بِالسَّاعَةِ﴾، مش مثلا إيه مش مثلا بل كذبوا بالساعة والساعة حق، بل كذبوا ﴿وَأَعْتَدْنَا لِمَن كَذَّبَ بِالسَّاعَةِ سَعِيرًا﴾ [الفرقان: 11]. ﴿إِذَا أُلْقُوا مِنْهَا مَكَانًا ضَيِّقًا﴾، بيشرح هيحصل إيه؟ الموضوع منتهي، يعني بيتكلم عن الحقائق، مش بيقول له الساعة حق. يقول له مين؟ يقول له لأ لسه وهو بيتكلم. ﴿فَذَٰلِكَ يَوْمَئِذٍ يَوْمٌ عَسِيرٌ﴾، الموضوع منتهي، هو بيوصفه مش بيقنعه أنه موجود، هو بيقول له اللي هيحصل. يعني يقول له في امتحان، يقولوا لأ ما فيش امتحان وأنت هتسقط، يقول له بس ما فيش امتحان، ده أنت هتضرب ضوابط. يعني هو يعني هو مش في، مش مركز أن هو هو بيتكلم عن فده تأثير نفسي، ده ضغط نفسي، أنك بتتكلم عن وقائع.

يعني مثلا هو يقول لك إيه؟ ما فيش آخرة. اللهم نجنا يا رب من العذاب. وهو أنت أنت عايش أن في آخرة! وهو مش هو، أنت بتكمل. فلما يلاقي كلامك وجهك مصدق أن في آخرة، هو بيتكلم عن شيء، يعني أنت لما تحب تضحك على واحد تقول له حاسب اللي وراك، فطريقة وشك وأنت بتهزر بيبان عليها، إنما لو فيه عربية هتخبطه بجد مش هتقول له حاسب، حاسب العربية مش هتبقى كده، هتتكلم وشكل بنوع من الإنذار، تنذر. عشان كده من اللطائف بيقولوا ازاي يعني سيدنا يعقوب عرف أن هم في المرة الأولى كانوا بيكذبوا، والتانية قارب أن يصدقه، إشمعنى؟ في المرة الأولى لما جم، يعني تخيل واحد...

أخوات جايين على أبوهم بيقولوا له، عايزين يقولوا له إن ابنك أديه بكله. أول ما يجوا هيقولوا إيه؟ أول كلمة؟ يعني هيبدأ بإيه؟ مش يقول له: ﴿ذَهَبْنَا نَسْتَبِقُ وَتَرَكْنَا يُوسُفَ عِندَ مَتَاعِنَا﴾ [يوسف: 17]، يا سلام! مش ممكن. في التانية أول ما دخلوا عليه إن ابنك سرق، لأن كان بجد. أول ما دخلوا، ما قالوش إحنا لما رحنا وبعدين ما حكوش القصة. ﴿إِنَّ ابْنَكَ سَرَقَ وَمَا شَهِدْنَا إِلَّا بِمَا عَلِمْنَا وَمَا كُنَّا لِلْغَيْبِ حَافِظِينَ﴾ [يوسف: 81]. فإنت دايماً بتبدأ تتكلم عن الوقائع فبيظهر عليك، وهو ده دور الداعية؛ إنه يحدث الناس عما يرى. يحدثنا رسول الله صلى الله عليه وسلم الصحابة بيقولوا عن الجنة والنار فكان رأي عين، فإنت بتكلمه على اللي إنت شايفه. ﴿أَلَمْ تَرَ كَيْفَ فَعَلَ رَبُّكَ﴾ [الفيل: 1]، ألم تر؟ فإنت لازم تبصر الأول وتوقن، فإما تيجي تكلمهم يصدقوك.

﴿فَذَٰلِكَ يَوْمَئِذٍ يَوْمٌ عَسِيرٌ * عَلَى الْكَافِرِينَ غَيْرُ يَسِيرٍ﴾ [المدثر: 9-10]. لو عايز تكمل، شوف اللي هيحصل لك، غير يسير. وده كان إيه؟ إشارة كده خاطفة إلى يوم القيامة. وبعدين نبدأ بقى أعداء الدين. أول صنف بينصرف عن الدين، له وصف وله طريقة. يعني صفته إيه؟ وإزاي بينصرف عن الدين؟ القرآن في سورة المدثر ذكر تلات أنواع انصرفوا عن دعوة النبي صلى الله عليه وسلم، كل نوع غير الآخر.

النوع الأول وده أخطرهم، النوع اللي منعم عليه، منصب كبير، وزير مثلاً، ومنصبه ده مستفيد من الوضع القائم. فالناس ديت ربنا بيقول: ﴿ذَرْنِي وَمَنْ خَلَقْتُ وَحِيدًا * وَجَعَلْتُ لَهُ مَالًا مَّمْدُودًا * وَبَنِينَ شُهُودًا﴾ [المدثر: 11-13]. تجد إن كلمة ذرني أو ما يشابهها من معاني جت في بدايات السور كتير، أنا ذكرت المعنى ده سورة آخر العلق لأن ربنا قال: ﴿كَلَّا لَا تُطِعْهُ﴾ [العلق: 19]، نفس الفكرة، ما تشغلش بالك بيه. ﴿ذَرْنِي وَمَنْ يُكَذِّبُ بِهَذَا الْحَدِيثِ﴾ [القلم: 44]، ذرني هنا ائذن لي ومن خلقت وحيداً، لا تطعه واسجد واقترب. وفي سورة القلم تجد كتير، ما تنشغلش بهم؛ لأنك إنت لسه بادئ تنطلق، هم هيحاولوا يشغلوك، هيحاولوا يشغلوك، أصوات مرعبة، أشياء مرعبة، تهديدات تعرض عليك، أياً كانت الوسائل ما تنشغلش بهم، لك رب يدافع عن دينه، إن الله ناصر دينه، ما تنشغلش به.

فالبداية قبل ما القرآن يعلمك تسايسه وتدعوه إزاي، لازم اعتقاداتك تثبت الأول إن ده لن يضرني شيء ولن يضر الدين شيء. لازم الأول قلبك يؤسس على هذه المعاني. ﴿ذَرْنِي وَمَنْ خَلَقْتُ وَحِيدًا * وَجَعَلْتُ لَهُ مَالًا مَّمْدُودًا﴾. قيل خلقت وحيداً؛ يعني خلقته وحدي، ما حدش خلقه معي، ربنا بيقول فأنا أهلكه وحدي، كما إني قادر على أن خلقته وحدي فأنا أهلكه وحدي مش محتاج حد. ربنا سبحانه وتعالى خلقه وحده سبحانه وتعالى، وما كنت متخذاً المضلين عضداً، ويهلكه وحده سبحانه وتعالى. أو ذرني ومن خلقت وحيداً؛ يعني ذرني ومن خلقته ونزل من بطن أمه وحيداً لا مال معه ولا ولد، يعني إما وحيداً عائدة إلى الله أو وحيداً عايدة إلى الوليد بن المغيرة هنا اللي في الآيات.

واضحة ولا حد عنده؟ يبقى إحنا قلنا أهم حاجة نفك بس المعنى. فتوقفنا عند قوله ﴿ذَرْنِي وَمَنْ خَلَقْتُ وَحِيدًا﴾، إحنا قلنا وحيداً إما يعني بتعود على الله عز وجل أو الوليد بن المغيرة، فذرني ومن خلقته وحدي فأنا أهلكه وحدي ده معنى، أو ذرني ومن خلقته ونزل من بطن أمه وحيداً لا مال معه ولا ولد. ﴿أَفَيَسْتَكْبِرُ الْآنَ بَعْدَ أَنْ أَنْعَمْتُ عَلَيْهِ؟﴾ [المدثر: 14]، ذرني ومن خلقت وحيداً، ربنا يعدد نعم الله عز وجل نعمه سبحانه وتعالى عليه. ﴿وَجَعَلْتُ لَهُ مَالًا مَّمْدُودًا﴾؛ يعني ربنا مش أدّى له بس أموال، ده مال تجارة قابلة للنماء، كان هناك من أقوى وأذكى من الوليد، فالقضية ليست ذكاءً أو قوة، لكن ده كان فضل من الله عز وجل، فربنا بيذكره بالنعم.

﴿وَجَعَلْتُ لَهُ مَالًا مَّمْدُودًا * وَبَنِينَ شُهُودًا﴾، يعني إيه شهوداً؟ يعني إيه بنين؟ خلاص هو عنده أولاد. يعني إيه شهوداً؟ قيل بنين شهوداً أي يشهدون معه مجالسه. طب وإيه يعني يشهدون معه مجالسه؟ قيل يعني إن هم مش مشغولين إن هم يمسكوا التجارة ده ربنا خلى معه عمال يشيلوا عنه أعباء التجارة والأموال، وقاعد فرحان بعياله، عياله قاعدين جنبه، يا ده من النعيم اللي قاعد عياله جنبه، مش ده سافر عقد عمل وده مطحون نبطشية اتناشر ساعة، وده لأ، ده قاعد مش محتاجين إن هم يتفرقوا عنه، أو قيل لم يصبهم ببلاء فيموتوا يعني، وبنين شهوداً، كل ده نعم. كم توقع يقابلها بالشكر، ومهدت له تمهيداً، مهد زي مهد الطفل كده، فلأنفسهم سورة الروم المؤمنين لأنفسهم يمهدون، بيسهل طريقه للجنة، مهدته لو كان طريقه متيسر في المال، ﴿وَمَهَّدْتُ لَهُ تَمْهِيدًا * ثُمَّ يَطْمَعُ أَنْ أَزِيدَ﴾ [المدثر: 14-15]، لم يشكر النعمة بل كان طماعاً.

﴿كَلَّا﴾، كل النعم دي هتصرف عنه ويعاقب في الدنيا قبل الآخرة. ليه؟ ده الصنف بقى العنيد، الصنف الأول العنيد، إنه كان لآياتنا؛ يعني هي واضحة، هي كلمة آية كفاية، يعني الآية دي الحاجة المبهرة الواضحة، دي آيات، ﴿إِنَّهُ كَانَ لِآيَاتِنَا عَنِيدًا﴾ [المدثر: 16]. كان عنيد جاحد، يعلم الحق ويعرض عنه، معاند، ﴿سَأُرْهِقُهُ صَعُودًا﴾ [المدثر: 17]. الإرهاق تكليف بما لا يطاق، ﴿لَا تُرْهِقْنِي مِنْ أَمْرِي عُسْرًا﴾ [الكهف: 73] سيدنا موسى بيقول للخضر ما تكلفنيش حاجة ما أقدرش عليها، رهق يصيبه رهق. سأرهقه، الراهق ده هيجي عن إيه؟ صعوداً يكلف أن يصعد في الجنة أياً بقى كان، روي إن هي صخرة أو جبل، في الجنة جبل عظيم ولا يستطيع أن يصعده إلا بالكاد، ويضع إيده إيده تذوب فيضع رجله تذوب حتى يصل إلى قرب أعلاه فيضرب فينزل مرة أخرى، يكلف عذاب شاق أن يصعده يوم القيامة.

طب ليه؟ يعني ليه الوصف ده؟ يعني من القواعد القرآنية إن في يعني الواحد محتاج فتح من ربنا إنه يفهم، كل نعيم وكل عذاب مقابل للطاعة وللمعصية، يعني النعيم بيذكر فيه تسلية للطاعة اللي إنت بذلتها، العذاب كذلك حسب المعصية. هنا ليه بقى هذا الوصف من العذاب؟ سأرهقه صعوداً، ربنا يقول لك ليه؟ إنه فكر وقدر، إنه دي لما بتيجي بعد جملة بيسموها زي فيها نوع من التعليل، يعني السبب التعليلية بتوضح لك ليه، يعني ﴿يَا أَيُّهَا النَّاسُ اتَّقُوا رَبَّكُمْ﴾ [الحج: 1]، طب ليه التقوى؟ إن بقى التعليل ﴿إِنَّ زَلْزَلَةَ السَّاعَةِ شَيْءٌ عَظِيمٌ﴾ [الحج: 1]، عشان الموضوع كبير، ﴿إِنَّهُ فَكَّرَ وَقَدَّرَ﴾ [المدثر: 18].

فكر وقدر يعني إيه؟ يعني هو دلوقتي لما سمع القرآن سمع الآيات الواضحات هو عرف إن ده مش طبيعي، يعني زي ما تمشي كده فتلاقي مثلاً الأسفلت اتشَق نصين كبار وبعدين رجع تاني أو البحر شاق، دي حاجة مش طبيعية، دي آية، أو يبرئ الأكمه والأبرص، آيات، فهو سمع القرآن عرف إنه مش كلام عادي. فقعد يفكر، قعد يفكر، طب ده من عند ربنا؟ يعني أنا هؤمن؟ يعني أنا هاتخلى عن منصبي؟ طب قريش هتقول عليَّ إيه؟ قعد يحسب ويدرب الموضوع في دماغه كتير، طب لو أنا آمنت وضعي هيبقى إيه؟ هبقى أدخل مع المستضعفين دول؟ هدخل مع بلال وعمار؟ أنا هدخل مع دول؟ طب ولو ما آمنتش هقول إيه؟ اللي بيتقال ده هقول عليه إيه؟ شعر بقى، ما هو الشعر، كلام الكهان، لأ مش كلام الكهان، فقعد يحسبها أمشي فين وأمشي إزاي وكل خطوة، طب هقول إيه لو مشيت كده، هقول إيه لقريش، ولو مشيت كده لو عاندت، طب أنا هقول إيه لو سألوني، طب ده بيقولوه، والكلام ده اللي بيقوله إيه ما هو سيد في قومه. فقعد يفكر ويقدر الأمور مش أي كلام بقى، ده الصنف الأول الخبيث.

وكأن ربنا بيعرض للنبي صلى الله عليه وسلم إن في مجالس بتحصل هو ما يعرفهاش، فيه ناس بتفكر وتخطط لمنع الدين، وربنا بيقول له قبلها ما لكش دعوة بهم أنا أكفيك، ﴿ذَرْنِي وَمَنْ خَلَقْتُ وَحِيدًا﴾. يعني إحنا قاعدين فيه ناس تخطط لمنع دين الله عز وجل، وبيفكروا ويقدروا الأمور، طب مش أي كلام، فيه كلام اعتباط، الشخصية التانية عشان الوقت. الشخصية التانية شخصية أبو جهل، لما يسمع عليها تسعة عشر الملايكة تسعة عشر يقول إيه يعني تسعتاشر؟ أنا هجيب تسعتاشر راجل اللي هو إيه؟ بتستهزأ وسخرية متكبرة يعني بيقول أي كلام، يعني أي كل ما يسمع مثلاً حديث آه في لعق الأصابع يتريق هو مش هو أي حاجة بيسمعها بيقعد يتريق، النبي صلى الله عليه وسلم يتجوز تسعة يتريق وخلاص، إنما في واحد لأ ما بيقولش أي كلام، ودي الشخصية الأخطر اللي قبلها، زي المستشرقين كده لأ، ده يدرس اللي عندك الأول ويسمع اللي عندك، وبعدين يجيب لك بقى وصف، واحد سمع المشكلة إيه سمع الكلام اللي عندك، فقعد يفكر ويقدر ويزن الأمور يقول إيه؟

هي كان أصل الكلام إنه فكر وقدر، ثم نظر ثم عبس وبسر، جملة اعتراضية جت دعاء عليه، ﴿فَقُتِلَ كَيْفَ قَدَّرَ * ثُمَّ قُتِلَ كَيْفَ قَدَّرَ﴾ [المدثر: 19-20]، ده اعتراض ما بين الأفعال اللي عملها. تاني معي كده ركزوا معي، الأفعال اللي عملها الوليد عطفت كلها بـ ثم، ﴿فَكَّرَ وَقَدَّرَ * ثُمَّ نَظَرَ * ثُمَّ عَبَسَ وَبَسَرَ * ثُمَّ أَدْبَرَ وَاسْتَكْبَرَ﴾ [المدثر: 18-23]. يعني هو مر بمراحل أثناء التفكير. شوف الآيات إعجاز بتحكي تفاصيل وشه ونفسيته واللي بيحصل في دماغه عمال يفكر. اعترضت الآيات بدعاء عليه؛ لأن اللي بيوصل لمرحلة إنه يسمع الحق ويعرف إنه حق، ويفكر إزاي يخرج منها هذا يستحق اللعن. فقتل على طول اعتراضي الأول اللي يعمل كده قتل أي لعن، قتل كيف قدر ثم قتل كيف قدر، وبعدين رجع الكلام تاني، طب عمل إيه؟ قعد يفكر، ﴿ثُمَّ نَظَرَ﴾ [المدثر: 21]، قيل نظر يعني بعد ما جمع مجموعة أفكار قعد يبص فيها كده، أو نظر يبص على وجوه قومه مستنينه، قعد يرسم الجدية كأنه بيمثل يعني؛ لأنواع الآية، كأنه هيوصل لحل بجد يعني كان اللي هيقوله ده رأيه هو مقتنع به فعلاً.

ثم نظر قعد يبص طب أقول إيه؟ بعدين بدأ مش عارف يقول إيه، ﴿ثُمَّ عَبَسَ وَبَسَرَ﴾ [المدثر: 22] بدأ بقى وشه يعبس كده وجايبينه بيخطب كده ووشه بقى كالح بيسود مش عارف يطلع مش عارف يقول إيه، وبعد طول تفكير قرر الإعراض مش هينفع، مش هينفع أمشي في السكة دي. ﴿ثُمَّ أَدْبَرَ وَاسْتَكْبَرَ﴾ [المدثر: 23] وكان أهم أسباب الإدبار الاستكبار. وقيل إن اللي وقع الوليد، الوليد لما سمع القرآن جاي بيقول عليه كلمات بتكتب في كتب علوم القرآن دلوقتي، قال لا حلاوة، وأعلاه مثمر، وأسفله... قال كلام عن القرآن. فابو جهل جه قعد جنب الوليد، شوف شوف دخلة أبو جهل بقى، يقول له أنا زعلان أوي، زعلان أوي. فالوليد يقول له ليه زعلان ليه؟ يقول له زعلان عشانك صعبان علي جداً. يقول له ليه؟ بيقول له بس عامة ما تقلقش ما تقلقش، قومك بيجمعوا لك فلوس، تقول له أنا! يقول له آه. مش إنت رحت عند محمد وقررت إنك تسلم وخلاص عشان محتاج فلوس، وما له يا سيدي هنشوف لك فلوس. قال له أنا لقد علموا أني أكثرهم مالاً. قعد ينكش جواه الحتة الوازع الحتة اللي عنده ديت قعد يضغط عليها، ففرقعت. ثم أدبر واستكبر.

شوف خد بالك من الخطوات اللي مر بها الوليد إحنا قلنا كلها جت بحرف العطف ثم، ثم ده بيفيد إن في كل خطوة كان بيتأنى، ﴿فَكَّرَ وَقَدَّرَ * ثُمَّ نَظَرَ * ثُمَّ عَبَسَ وَبَسَرَ * ثُمَّ أَدْبَرَ وَاسْتَكْبَرَ﴾. أول لما لقى حل لم يتمالك نفسه فقال لقى كلمة يقولها، فقال: ﴿إِنْ هَٰذَا إِلَّا سِحْرٌ يُؤْثَرُ﴾ [المدثر: 24]، كأنه أخيراً لقى مخرج يخرج به، ﴿إِنْ هَٰذَا إِلَّا قَوْلُ الْبَشَرِ﴾ [المدثر: 25]. طب ما كان كفاية سحر، كأنه بيرد على نفسه، هو عارف إن ده مش قول بشر، فهو بيقول للناس لأ ده قول بشر، يعني هو ما فيش أصلاً تناسق بين إن هو سحر، يعني عايز يقول إيه؟ ما يقول إنه يا إما يقول إنه قول بشر عادي، أو إنه يقول إنه سحر؟ لأ، هو عايز يقول يأكد على الناس اللي هيقع في صدوركم لما تسمعوا الكلام إن ده مش قول بشر لأ هو قول بشر، وبصيغة الحصر إن هذا إلا قول البشر. فأول لما وصل لمخرج لم يتمالك نفسه.

نرجع بقى لعذاب ﴿سَأُرْهِقُهُ صَعُودًا﴾ [المدثر: 17]. ليه ﴿سَأُصْلِيهِ سَقَرَ﴾ [المدثر: 26]؟ سأرهقه صعوداً. الوليد بن المغيرة عرض أمامه الدين وكان قدامه عقبة لازم يقتحمها، فكر فتردد، كسل يقتحم العقبة، فربنا بيقول له إنت لم تقتحم العقبة في الدنيا سيجعل لك عقبة كؤوداً لن تعبرها أبداً يوم القيامة. ودي رسالة لنا، اللي خايف ياخد قرار في الدين، عذاب الله عز وجل أعظم. ومن الناس من يقول آمنا بالله، فإذا أوذي في الله، المصيبة إن يساوي بين الابتلاءات الدنيوية وبين عذاب الله، جعل فتنة الناس كعذاب الله، دي مصيبة خلل في التفكير. الأمر هناك أعظم من ذلك، كل اللي في الدنيا لا يساوي شيء، كل اللي فما ينفعش تساوي، ﴿تَاللَّهِ إِن كُنَّا لَفِي ضَلَالٍ مُّبِينٍ * إِذْ نُسَوِّيكُم بِرَبِّ الْعَالَمِينَ﴾ [الشعراء: 97-98]. خاف من الظالم زي ما يخاف من ربنا ما ينفعش. ﴿سَأُرْهِقُهُ صَعُودًا﴾ [المدثر: 17].

والسقر التي لا تبقي ولا تذر وتلفح، كل اللي معه هيروح، يعني هو بقى فرحان باللي معه المال والبنون، ﴿سَأُصْلِيهِ سَقَرَ * وَمَا أَدْرَاكَ مَا سَقَرُ * لَا تُبْقِي وَلَا تَذَرُ * لَوَّاحَةٌ لِّلْبَشَرِ * عَلَيْهَا تِسْعَةَ عَشَرَ﴾ [المدثر: 26-30]. لوّاحة للبشر، قيل في معناها، يعني جمهور المفسرين بيقولوا إن لوّاحة يعني بتلفح البشر، جمع بشرة، مش البشر اللي هم الناس بشر يعني جلد، يعني بتلفح الجلد، بتسود الجلد بيسود.

وروي عن الحسن البصري أنه قال: لو أن البشر -يعني بتلفح الجلد- تسوده فيسود، كأن هو لما بصر وجهه اسود، فعوقب بأنه تلفحه النار.

فأول صنف العنيد، اللي بيعرف الحق وبيدخل جوانا، وبيقرأ لِمستشرق وبيسمع ويبدأ يفكر يرد على الكلام ده إزاي. فيه ناس مستشرقين جُم وجابوا كتب دين عشان يطلعوا شبهات وقرأ فأسلم؛ فده اقتحم العقبة. وفيه واحد في ديننا رأى الآيات، وأنه كان لآياتنا عنيدًا واستمر على الإعراض، فده اللي ينطبق عليه: ﴿سَأُرْهِقُهُ صَعُودًا﴾. أبصر الحق، ثم أعرض عنه.

الصنف التاني هو الصنف المتكبر، اللي بيلقي أي كلمة، زي ما قلت لكم يسمعها، يسمع حديث: «إذا ولغ الكلب في إناء» يقعد يتريق، استهزاء بأي حاجة بتعرض له، بدون تفكير وتقدير مش زي الأولاني. الأولاني فيه جلسات خاصة أنت ما تعرفهاش، ربنا بيقول للنبي صلى الله عليه وسلم: الأول فيه جلسات بتحصل أنت ما تعرفش هم بيقولوها، وأنت ما تشغلش بالك بهم، أنت استمر.

وفيه واحد بيسمع، اللي هو بقى زي ما فيه دعاة للباطل فيه علماء تأصيليون للباطل؛ بيطلع كده في البرنامج يسمع أي كلمة وأي نقاش مع المدعي يقوم يرد عليه باستهزاء وخلاص. وفيه ناس قاعدة خلف الأسوار، خلف الكاميرات، قاعدة تخطط وتفكر، مش أي كلام، تقدير الكلام، تدبير، مش أي كلمة تتقال؛ لأن ما ينفعش بعد ما الوليد قارَب يرجع يقول: ده شاعر! هيقولوا له شاعر إزاي؟ ما ينفعش. وفيه ناس قالوا: ده شاعر، قيل عن النبي صلى الله عليه وسلم شاعر، الوليد ما رضاش يقول كلمة شاعر دي؛ لأن عارف زي مثلاً عالم في مكانته، هيقولوا لأ، بس ده مش شعر، فلازم يقدّر الكلام.

الصنف التالت عشان ما نطولش عليكم، ربنا سبحانه وتعالى بعد كده ذكر أن فيه أحياناً الآية تهدي ناس وتضل ناس، فتبقى فتنة للكفار، وتبقى زيادة يقين للمؤمنين، زي: ﴿عَلَيْهَا تِسْعَةَ عَشَرَ﴾. ثم بعد ذلك يقول ربنا سبحانه وتعالى: ﴿وَاللَّيْلِ إِذْ أَدْبَرَ * وَالصُّبْحِ إِذَا أَسْفَرَ﴾، إِذ أدبر: ده زمن الماضي، وكأن خلاص بشرى هيبدأ الظلام يروح والليل هيبدأ يسفر، ويأتي عن خير كثير، ﴿إِنَّهَا لَإِحْدَى الْكُبَرِ﴾، أي النار أعظم من العظائم، إحنا عايزين نقول عجائب الدنيا السبعة، طب النار إحدى الكبر، قيل البلايا الكبرى، أو أعلاهم، ﴿نَذِيرًا لِّلْبَشَرِ * لِمَن شَاءَ مِنكُمْ أَن يَتَقَدَّمَ أَوْ يَتَأَخَّرَ﴾؛ يتقدم في الجنة، أو يتأخر في النار، ﴿كُلُّ نَفْسٍ بِمَا كَسَبَتْ رَهِينَةٌ﴾، كل نفس مرهونة بأعمالها في النار، ولازم تفك نفسك، ﴿إِلَّا أَصْحَابَ الْيَمِينِ * فِي جَنَّاتٍ يَتَسَاءَلُونَ﴾.

عشان ما أطولش عليكم، ممكن المرة الجاية بإذن الله نكمل الجزء اللي باقي من سورة المدثر، وندخل برضو في سورة القيامة. أسأل الله عز وجل أن يعلمنا، وأن ينفعنا بما علمنا، وأن يزيدنا علماً، وأن يستعملنا في طاعته. أقول قولي هذا وأستغفر الله لي ولكم. سبحانك اللهم وبحمدك، أشهد أن لا إله إلا أنت أستغفرك وأتوب إليك، وجزاكم الله خيراً.