دخولتسجيل الدخول

تفسير سورة العصر | خطبة | د. أحمد عبد المنعم

أحمد عبد المنعمد. أحمد عبد المنعم
  • مدة الدرس:
  • قراءة

الحمد لله، نحمده ونستعينه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له، ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمداً عبده ورسوله صلى الله عليه وسلم. بلغ الرسالة، وأدى الأمانة، ونصح للأمة، فما ترك خيراً إلا ودلنا عليه، وما ترك شراً إلا وحذر منه، فصلاة وسلاماً دائمين من رب العالمين على أشرف المرسلين محمد صلى الله عليه وسلم. ﴿يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ﴾ [آل عمران: 102].

أما بعد، أحبتي في الله، من رحمة الله عز وجل بالخلق، كما نكرر دائماً وأبداً، أن الله عز وجل لم يتركهم سدى، بل أرسل إليهم الرسل وأنزل إليهم الكتب. هذا من رحمته ولطفه وكرمه ومنته سبحانه وتعالى أنه لم يتركنا سدى، ولم يتركنا هملاً، ولكن عرفنا الطريق حتى لا يكون لأحد بعد الرسل وبعد الكتب حجة على الله عز وجل. الله عز وجل بين لنا الطريق ووضح لنا وهدانا النجدين، فالإنسان يرى ويختار على بينة، كما قال ربنا سبحانه وتعالى: ﴿وَمَا كَانَ اللَّهُ لِيُضِلَّ قَوْمًا بَعْدَ إِذْ هَدَاهُمْ حَتَّىٰ يُبَيِّنَ لَهُم مَّا يَتَّقُونَ﴾ [التوبة: 115]. أي هو يهديهم أولاً، ثم يبين لهم طريق الضلال ثانياً، ويحذرهم ويعلمهم طريق الضلال، ثم هم يختارون طريق الضلال والعياذ بالله.

فمن رحمة الله عز وجل لابد أن يفرح الإنسان بالقرآن؛ أن هذا القرآن محفوظ، وأن الله عز وجل حفظ هذا القرآن من التغيير، وأن الله عز وجل قيد رجالاً لحفظ سنة النبي صلى الله عليه وسلم. نكرر دائماً هذا المعنى حتى يكون المؤمن على فرح دائماً من هذه النعمة العظيمة. معنا اليوم سورة من كتاب الله عز وجل هي سورة قصيرة آياتها ثلاث آيات، لكن احتوت على المعاني العظيمة. هذه السورة، كما قال الإمام الشافعي: لو تدبر فيها المسلمون لكفتهم؛ سورة العصر. يقول الله عز وجل: ﴿بِسْمِ اللَّهِ الرَّحْمَٰنِ الرَّحِيمِ * وَالْعَصْرِ * إِنَّ الْإِنسَانَ لَفِي خُسْرٍ * إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 1-3].

هذه السورة، أول ما تفتتح أول آية في السورة تفاجأ أن الله عز وجل يقسم، والملك سبحانه وتعالى لا يحتاج إلى قسم، فإذا أقسم فإنه يقسم بعظيم أو يقسم بشيء يغفل عنه الناس، فحتى ينبهنا الله، أول ما تفتح السورة تفاجأ بقسم من الملك سبحانه وتعالى ويقول: ﴿وَالْعَصْرِ﴾. ما معنى كلمة العصر؟ العلماء وقفوا عند هذه الكلمة وقفات طويلة؛ أن عشان نفهم كلمة العصر نفهم إيه سبب خسارة الإنسان؟ وكيف ينجو الإنسان؟ ثم النظر في السورة التي قبلها والسورة التي بعدها يتضح كان أهم أسباب الخسارة وكيف ينجو الإنسان من هذه الخسارة.

العصر قيل: اللي هو توقيت العصر، آخر وقت اليوم بيخلص المغرب والليل يبدأ، آخر وقت اليوم اللي هو العصر. وقيل العصر كل الأزمنة، من يوم خلق الله عز وجل الزمان إلى أن تقوم الساعة كل ده عصر، وخاصة آخر التوقيت. تخيل كأن ربنا سبحانه وتعالى، أنت بتفتح كده السورة لقيت اليوم بيخلص، لقيت الشمس خلاص بتغرب، لقيت الزمان خلاص بينتهي، خلاص قاربنا على النهاية. كأنك داخل صالة الامتحان في آخر عشر دقائق وكل الطلبة قاعدين منهمكين وكله قاعد بيحل، فتفاجأ أن ربنا سبحانه وتعالى يقسم أن في آخر التوقيت ولم يبق إلا لحظات وينتهي الابتلاء وينتهي الامتحان، ثم يخبرنا الله عز وجل بنتيجة حتمية لهذا الامتحان أن أغلب الناس خسروا، أغلب الناس رسبوا، ﴿إِنَّ الْإِنسَانَ لَفِي خُسْرٍ﴾، أو جنس الإنسان أغلب الناس خسرت في الامتحان.

وقيل إن العصر من معانيه أنك بتعصر حاجة، العصير اتسمى عصير لأنك بتعصر الفاكهة فتنزل اللي فيها، عصر في الثياب أنك تضغط على الثياب فتنزل ما فيها، فكأن الزمان لابد أن تعصر أنت الزمان أو يعصرك الزمان. إما أن تعصر أنت الزمان فتستخرج كل طاعة في كل لحظة، أو يقطعك الزمان ويعصرك الزمان ويمر بك وأنت لا تشعر. لذلك تفهم حديث النبي صلى الله عليه وسلم: «من حلف على يمين كاذبة بعد العصر ليقتطع بها مال امرئ مسلم لقي الله وهو عليه غضبان». فالعلماء بيقولوا: طب ما أي يمين كاذبة سواء بعد العصر أو أي وقت هي جريمة وذنب عظيم، لكن بعد العصر المفروض ده التوقيت اللي في آخر اليوم اللي بتنشغل فيه، ده آخر وقت الامتحان، أنت مشغول بالطاعات، مشغول بالذكر، أنت قاعد المفروض الآن مشغول بنهاية الامتحان بنهاية اليوم، أنت هتسلم ورقة اليوم خلاص ورقة اليوم هتترفع، تقوم تحلف كذب؟ لذلك ابن حجر بيقول: لأن الأعمال بالخواتيم، وانشغل في الخواتيم بالكذب الدنيا، بدل ما ينشغل، تخيل أنت داخل واحد في صالة الامتحان وفاضل عشر دقائق وما حلش في الورقة وقاعد بيلعب! ده مستهزئ، ده بدل ما في آخر اللحظات يبكي ويتضرع إلى الله عز وجل أن يعفو عنه.

لذلك ساعة الإجابة يوم الجمعة آخر ساعة قبل المغرب، آخر ساعة في اليوم، ليه؟ المفروض المؤمن في اللحظة دي بيصل إلى قمة التضرع، خلاص هيسلم يوم الجمعة، هيسلم الأسبوع كله هيترفع خلاص ويبدأ الأسبوع الجديد، فيدعو ويتضرع، فربنا يستجيب له هنا عشان يغفر له بقية الأسبوع. يبقى العصر أنك لازم تعصر الزمان، الزمان بيعدي؛ لأن كان بعض السلف يقول: لم أفهم هذه السورة إلا حينما رأيت بائع ثلج، واحد معه ثلج بيبيعه يسير ويقول: أيها الناس ارحموا من يذوب رأس ماله، اشتروا مني بسرعة، الثلج لو ساح خلاص، ارحموا من يذوب رأس ماله. فلما سمعتها تذكرت العصر؛ خلاص العصر بيخلص، الوقت بيخلص، الزمان بينتهي، فيقول: فتحسرت على نفسي، عرفت أن الزمان بيخلص، الوقت بيمر.

تخيل أول لما اتولدت واتحطت جنبك ساعة بتعد عليك اللحظات، أنا أتعجب كيف يحتفل الناس بمرور سنة على عمرهم! ده المفروض يقعد بعد السنة دي يبحس، اقتربت من القبر، الوقت بيمر. العجيب أن ربنا بيقول: ﴿وَالْعَصْرِ﴾، أي بعد مرور كل هذه الأزمنة، أول عصر على مر الدهور، أول عصر بعد أن قارب وقت انتهاء الامتحان يقول الله: لم ينجح أحد، ﴿إِنَّ الْإِنسَانَ لَفِي خُسْرٍ﴾. والعجيب أن هو بيفرح عادي أنها مرت عليه السنين لا يحاسب نفسه، يقسم الله أن على مدار الأزمنة على مدار الدهور والوقت بينتهي أن أغلب الناس في خسارة، ﴿إِنَّ الْإِنسَانَ لَفِي خُسْرٍ﴾.

خطورة الزمان، لذلك كان شعار بعض السلف لما يجي حد يقول له: أريد أن أسألك، عايز أتكلم معك، يقول له: أوقف الشمس، ما هو الزمان بيمر، أوقف الشمس عشان أعرف أتكلم معك، إن لم توقفها انطلقت. كانوا يحرصون على الوقت، ورؤي أن كان الصحابة كانوا يتواصون بعد ما يخلصوا مجلسهم وهم ماشيين يوصوا بعض بسورة العصر، بيذكروا بعض قيمة الزمان، هتعمل إيه بعد ما هتمشي من المجلس؟ هتعصر وقتك عصراً؟ هتستخرج ما فيه من أعمال؟ لذلك اللي بينجو في السورة اللي ﴿الَّذِينَ آمَنُوا وَعَمِلُوا الصَّالِحَاتِ﴾، مش وعملوا صالحاً، عملوا كل الصالحات اللي يقدر عليها. لذلك ابن عباس بيقول في تفسير قول الله عز وجل: ﴿إِنَّمَا نَعُدُّ لَهُمْ عَدًّا﴾ [مريم: 84]، عمرك بيتعد بإيه؟ قال: بالنفس، عمرك محسوب بعدد الأنفاس، فتاخد شهيق يبقى أنت خلصت وما تعرفش تطلع الزفير تموت، العمر مش محسوب حتى بالسنين ولا بالأيام لأ بمجرد النفس يعود، ﴿إِنَّمَا نَعُدُّ لَهُمْ عَدًّا﴾، كل واحد معدود له عدد الأنفاس اللي هياخدها من الهواء إلى أن يموت، أمر محسوب.

﴿إِنَّ الْإِنسَانَ لَفِي خُسْرٍ﴾، يؤكد الله عز وجل بالتأكيد أن ﴿إِنَّ﴾، ﴿إِنَّ الْإِنسَانَ لَفِي خُسْرٍ﴾، وما قلش إن الإنسان خسران، قال: ﴿لَفِي خُسْرٍ﴾، الخسارة بتحيط بك من جميع الجوانب، كأن إنساناً وقع في برميل خسر كده، ﴿إِنَّ الْإِنسَانَ لَفِي خُسْرٍ﴾، خسارة بتحيط بك بمعنى كل اللي حواليك بيساعدك أنك تخسر، أغلب اللي حواليك بل أقرب الناس لك، للأسف قد يكون له دور في خسارتك، ﴿إِنَّ الْإِنسَانَ لَفِي﴾ محاط بالخسارة.

لذلك لما تشوف السورة اللي قبل سورة العصر: ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ﴾ [التكاثر: 1-2]، والسورة اللي بعد سورة العصر: ﴿وَيْلٌ لِّكُلِّ هُمَزَةٍ لُّمَزَةٍ * الَّذِي جَمَعَ مَالًا وَعَدَّدَهُ * يَحْسَبُ أَنَّ مَالَهُ أَخْلَدَهُ﴾ [الهمزة: 1-3]. تجد خاصيتين في السورتين؛ فهي السورة بين سورتين، السورتين اللي قبل سورة العصر وبعد سورة العصر تعرفك أهم أسباب الخسارة. وذكرت سببين: السبب الأول الانشغال بالناس، بقولها لكم ﴿التَّكَاثُرُ﴾، التكاثر يعني عايز يكاثر الناس، يعني عايز يقول للذي قدامه: أنا أكثر منك مالاً وأعز نفراً، ده كل هدفه في الحياة، هو كل اللي شاغله مشغول عايز يبقى أحسن من ده، وأفضل من ده، ومعه عربية أحسن من ده، وتليفون أفضل من ده، هو عايز يبقى أكثر من الناس مالاً وولداً. كثير من الناس يبقى راضي، أول لما جاره أو لصديقه أو قريبه يبقى معه أكثر منه يتضايق، طب ما أنت كنت راضي! فيكاثره، ﴿أَلْهَاكُمُ التَّكَاثُرُ﴾. وسورة الهمزة مشغول بناس بيستهزأ بهم، قاعد بيتريق على ناس ويستهزأ بالناس، فانشغل الأول مكاثراً، شغل الثاني مستهزئاً، انشغل الأول مكاثراً عايز يبقى أكثر منهم، وانشغل الثاني مستهزئاً، ده أول سبب للخسارة، أنك قاعد مشغول بالناس.

ثاني سبب جمع الدنيا، ﴿أَلْهَاكُمُ التَّكَاثُرُ﴾، قاعد بيجمع، والثاني ﴿الَّذِي جَمَعَ مَالًا وَعَدَّدَهُ﴾، أهم سببين للخسارة: مشغول بالناس وجمع الدنيا، ولا يشبع لدرجة أنه وصل في مرحلة في سورة الهمزة ﴿يَحْسَبُ أَنَّ مَالَهُ أَخْلَدَهُ﴾، معتقد أن الفلوس هتخليه يخلد، معتقد أن الدنيا هتخليه مش هيموت، فيجمع أكثر عشان يعيش أكثر، وكل ما يجمع مالاً أكثر يظن أنه يعيش أكثر. سورة التكاثر قالت له: هتتسأل عن كل حاجة جمعتها ﴿ثُمَّ لَتُسْأَلُنَّ يَوْمَئِذٍ عَنِ النَّعِيمِ﴾ [التكاثر: 8]. سورة الهمزة قالت له: بعد ما هتتسأل عن النعيم هتترمى في الحطمة ﴿لَيُنبَذَنَّ فِي الْحُطَمَةِ﴾ [الهمزة: 4]، الحطمة اللي هتكسره هتحطمه. لذلك ﴿وَيْلٌ لِّكُلِّ هُمَزَةٍ لُّمَزَةٍ﴾، يعني اللي بيستهزأ على الناس وبالطبع عليهم كان بيكسر نفسيتهم، كان بيكسر مشاعرهم، كان بيجرحهم فيتكسر في جهنم والعياذ بالله، زي ما كان بيحطم الناس ويستهزئ بهم يلقى في الحطمة والعياذ بالله.

ما بين السورتين ربنا بيقول لك فيه نموذج مشغول بالناس أيضاً، ولكن ينجو. طب إزاي؟ إزاي وأنا كده كده مرتبط بالناس؟ قال لك: انشغل بالناس أن تنصح لهم، ﴿وَتَوَاصَوْا بِالْحَقِّ وَتَوَاصَوْا بِالصَّبْرِ﴾. أنت كده كده عايش وسط الناس، مش هينفع هتتركهم وتمشي، ده ربنا بيقول لك: ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ﴾ [التغابن: 14]، يعني قد يكون سبب خسارتك زوجتك وأولادك، إن لم تبدأ لهم بالنصيحة بدأوا هم معك بالخسارة. كذلك الناس، لو أنت ما كنتش المغير هم اللي هيغيروك.

و﴿وَالْعَصْرِ﴾، لا بد أن تعصر الزمان، الوقت بينتهي، أصلاً وقت العصر يقال إنه تسمى العصر لأن خلاص اليوم بيتعاصر، ما عادش فيه غير آخر شوية، آخر وقت موجود في اليوم ده خلاص، ده عصارة اليوم بعد ما اليوم خلاص بيخلص آخر ما فيه، فاستشعار قرب النهاية، استشعار خلاص انتهاء وقت الامتحان. ﴿إِنَّ الْإِنسَانَ لَفِي خُسْرٍ﴾، لم ينج أحد، ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾. دايماً لما يجي الاستثناء ده تعرف أن العدد قليل، يعني لو الفصل فيه مائة طالب مدرسة فيها مائة طالب فكله مستني النتيجة، فيطلع المدير يقول النتيجة: لم ينجح أحد، فالكل يبكي، فيقول: إلا... المدير يقول إلا، متوقع مش هينفع يقول إن لم ينجح أحد إلا تسعين واحد، لأ كان هيقول كله نجح إلا عشرة، فدائماً المستثنى قليل، ينجو من كل ألف واحد، ويسقط تسعمائة وتسعة وتسعون في جهنم، نسبة مرعبة. تخيل لما ربنا يقول ﴿إِنَّ الْإِنسَانَ لَفِي خُسْرٍ﴾، الكل يبكي، إلا... إلا مين يا رب؟ عشان أنجو، ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾.

تعال نشوف أسباب النجاة في السورة: أسباب النجاة من السور اللي قبلها ألا تنشغل بالناس مستكثراً ولا مستهزئاً، لا تنشغل أنك تكاثر الناس ولا تنشغل أنك تستهزئ بالناس، ودايماً السبب الأولاني بيؤدي للثاني، اللي بينشغل بالناس عايز يبقى أكثر منه، بعد ما أكثر منه يروح يستهزأ به، خلاص ما هو بقى معه قوة عليه فيستهزأ به. من أول المعاصي اللي وقعت في بني آدم: ﴿وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ﴾ [المائدة: 27]، كان مشغول بأخيه، في بعض الروايات زي ما ذكر الإمام الطبري قال: تسير بين الناس يقولون تقبل منك ولم يتقبل مني! والله لأقتلنك، أنت عايز الناس تقول علي إيه؟ أنا أقتلك عشان ما يبقاش فيه حد كويس، زي ﴿أَخْرِجُوا آلَ لُوطٍ مِّن قَرْيَتِكُمْ إِنَّهُمْ أُنَاسٌ يَتَطَهَّرُونَ﴾ [النمل: 56]، عشان ما يبقاش الناس بتعايرنا أن في ناس نظيفة موجودة، فأنا هاقتلك. بيقتلوا يوسف ﴿أَوِ اطْرَحُوهُ أَرْضًا﴾ [يوسف: 9]، مش قادرين يعملوا اللي بيعمله يوسف من البر، خلاص ﴿اقْتُلُوا يُوسُفَ أَوِ اطْرَحُوهُ أَرْضًا يَخْلُ لَكُمْ وَجْهُ أَبِيكُمْ﴾ [يوسف: 9]، الانشغال بالناس قد يؤدي إلى قتله، عايز تكاثر الناس، الغل والحسد لما بيسيطر على إنسان لا يرى شيئاً في الدنيا إلا يكاثر هذا الشخص، عايز يبقى أكثر منه، وبعد ما يبقى أكثر منه يهمز به ويلمز به، اللي همزة لمزة، خلاص ويجمع المال ويظن أن هذا المال يخلده في الدنيا.

دي الأسباب الانشغال بالناس مكاثراً أو مستهزئاً، سورة التكاثر وسورة الهمزة أو جمع الدنيا، إيه أسباب الخسارة؟ طب أسباب النجاة داخل السورة، طبعاً من أول لحظة ﴿وَالْعَصْرِ﴾، استغلال كل لحظة في حياتك. قال النبي صلى الله عليه وسلم، صلوا عليه صلى الله عليه وسلم:

نعمتان مغبون فيهما كثير من الناس. يعني إيه مغبون الأول؟ الغبن غير الخسارة، الغبن أفحش من الخسارة. لو واحد معه عربية بمئتي ألف وباعها بمئة وسبعين ألف، نقول خسر فيها، إنما لما يبقى معه عربية بمئتي ألف ويبيعها بعشرة آلاف نقول هذا غبن في العربية. الغبن هو الخسارة الفاحشة. لذلك فيه حاجة في الفقه اسمها خيار الغبن، أن البائع لو يبيع وما عندهوش خبرة واتضحك عليه وخسر خسارة فاحشة نرجع له السلعة بتاعته لأنه يبقى سفيهاً، والمفروض يحجر عليه أصلاً؛ اللي يبيع حاجة بغبن ده المفروض يكون سفيهاً لا يبيع.

لما بعض الصحابة أُصيب في غزوة من الغزوات في رأسه، وهو منقذ بن حبان، أصابته لوثة، يعني أصابه شيء في عقله، وكان يحب البيع فكان يروح يبيع فالناس تضحك عليه، فأهله حجروا عليه ومنعوه من البيع. فراح اشتكى للنبي صلى الله عليه وسلم، هو يحب البيع لكن ما بيعرفش يبيع. فقال له النبي صلى الله عليه وسلم: اشترط أثناء البيع، قل: لا خلابة ولي الخيار ثلاثة. لا خلابة يعني ما حدش يضحك علي، أنا واخد إذن من النبي صلى الله عليه وسلم، واللي هيضحك عليّ قدامي ثلاث أيام أراجع أهلي عشان نرجع البيع. الشاهد أن اللي يبيع بغبن ده سفيه يحجر عليه.

النبي صلى الله عليه وسلم يقول: «نعمتان مغبون فيهما كثير من الناس»؛ كثير من الناس معها نِعَم بتبيعها بالغبن. ما هي يا رسول الله؟ قال: الصحة والفراغ. الوقت والاستطاعة، الليل جاء الساعة الحادية عشرة أو الثانية عشرة أو العاشرة ليلاً لغاية الفجر أنت عندك وقت وتقدر تقوم تصلي قيام ليل وما تصليش، أنت كده غبنت، والمفروض يحجر عليك. الإنسان الأوقات اللي بتضيع بدون ذكر، وقت واستطاعة ممكن يذكر ربنا، ممكن يخدم الناس، ممكن يعمل أعمال صالحة، ممكن يصلي، ممكن ينفع العالمين، أي شيء. لذلك عمر بن الخطاب يقول: لا أحب أن يجلس الرجل سبهللاً، لا في أمر دين ولا في أمر دنيا. وكان عمر بن الخطاب يعجبه الرجل، يشوف واحد كده يحس أنه رجل فيتتبعه، فإذا علم أنه لا في أمر دين ولا في أمر دنيا وقع من عينه، خلاص ده ما عادش ينفع مش هستعمله، لازم الإنسان؛ لذلك يقول الله عز وجل حتى للنبي صلى الله عليه وسلم: ﴿فَإِذَا فَرَغْتَ فَانصَبْ﴾ [الشرح: 7].

أول لما توصل لمرحلة الفراغ، أيّاً كان الفراغ بعد جهاد، بعد صلاة، بعد طاعة، بعد عمل دنيوي، بعد دعوة إلى الله، ما ينفعش المسلم يمكث في الفترة دي طويلاً، فترة الفراغ دي. لذلك قال له: ﴿فَإِذَا فَرَغْتَ فَانصَبْ﴾، مباشرة، ومش فكرة فرغت فاسترح، لا، ابدأ فكر في عمل جديد. انصب، اجتهد على طول، اخرج من عمل إلى عمل، ما تنتظرش هتعمل إيه. لذلك أحد التلامذة اللي كان بيطلع الأوائل في الكليات، كان بيطلع الأول على الدفعة، فقام دكتور في الجامعة عايز يعرف الناس إيه السبب أن ده بيطلع الأول، وما كانش متفق معه ولا حاجة، لكن هو فاهم لأن الدكتور ده كابد وعرف إيه سبب أنه يطلع الأول. فوقف الطالب قدام الناس، قال له: قل لي يا ابني أنت يوم الثلاثاء بعد العصر عندك إيه؟ قال له: عندي كذا وكذا. قال له: ويوم الخميس بعد المغرب؟ قال له: عندي كذا. قال له: والجمعة بعد العشاء؟ قال له: عندي كذا. قال لهم: هو عشان كده بيطلع الأول، عشان ما فيش حاجة اسمها وقت فراغ، كل وقت عارف هو بيعمل إيه، هو بيحدد هيعمل إيه. كذلك الأوائل يوم القيامة عارفين هم بيعملوا إيه، ما عندهمش وقت ضائع، ما عندهمش وقت فراغ. ﴿فَإِذَا فَرَغْتَ فَانصَبْ﴾، وخلِّ هذا النصب طلباً لرضى الله، حتى لو عمل دنيوي أحسن فيه وأتقن فيه وتقرب به إلى الله. ﴿فَإِذَا فَرَغْتَ فَانصَبْ * وَإِلَىٰ رَبِّكَ فَارْغَب﴾ [الشرح: 7-8]، خلي كل رغبتك الداخلية إلى الله عز وجل، كل مشاعرك بتتجه لرضى الله. المؤمن لا يمكث في هذه الفترة طويلاً، لو أُصيب بها على طول يفزع، إزاي قاعد ما وراوش حاجة! نعمتان، أنا عايزك تتخيل المشهد، اللي معه عربية بمئتي ألف وبيبيعها بخمسة آلاف هو ده الناس اللي معها وقت وصحة وما بتعملش بها حاجة، نازل يضيع وقت، ده بالضبط هو المغبون، ده اللي المفروض يحجر عليه أنه بينفق هذه الأثمان الغالية التي يوم القيامة هيتحسر، هيتحسر على اللحظة دي.

من عجيب فقه الأئمة قرأت أن الإمام ابن المبارك سُئل سؤالاً فقهياً، مسألة في خلاف، لو المأموم دخل على الإمام والإمام في السجود هل ينتظر ولا ما ينتظرش؟ المسألة فيها حديث ضعيف أن اللي يدخل يدرك الإمام أياً كان وده الراجح أنه يدرك الإمام. الشاهد ابن المبارك بيسألوه بيقولوا لو واحد دخل على الإمام ولقاه ساجد، يستنى لما يرفع من السجود ويقوم للركعة ولا ينزل يسجد؟ ما هو كده كده الإمام هيطلع فاستناه وخلاص وكده كده الركعة راحت عليّ، ولا أنزل أسجد؟ قال: فليسجد، وما يدريه لعلها أن يُغفر له بسبب هذه السجدة، وما يدريه دي ممكن تبقى آخر سجدة، وممكن يُغفر له بسببها. قال: فليسجد، نلحق بسرعة السجدة. كل طاعة بتعدي، لما كانت الجنازة تعدي كان يبكي ابن عمر ويقول: كم فرطنا من قراريط؟ قعد يضرب الحصى في الأرض ندمان، كل جنازة عدت يحس أنه ضيعها، كان عايز يسير وراءها. ده كان شعور الصحابة وشعور السلف، مرور الأوقات هو بيعتصر أن الوقت بيعدي. ابن الجوزي يقول: تمنيت أن كل نَفَس لي خزانة أضع فيها الحسنات، مش عايز يعمل حسنات في الساعة، عايز يعمل حسنات بعدد الأنفاس، كل نَفَس يبقى خزانة يضع فيها الحسنات.

بعض العلماء المعاصرين مقسم اليوم بتاعه، كل ثلث ساعة بيعمل حاجة، وأنا رأيت ذلك بعيني، تروح له ثلث ساعة تلاقيه بيجلس مجلس علمي، الثلث ساعة اللي بعدها مجلس آخر، الثلث ساعة اللي بعدها؛ أنت ممكن تقعد ثلاث ساعات وتلاقي إيه اللي حصل؟ إحنا صلينا العصر وبعدين لقينا المغرب أذن، مغرب إيه؟ ده إحنا النهاردة الجمعة، بنحس أن بكرة الخميس، أن الأسبوع بيمر ولا نشعر. لكن اللي بيعصر الوقت عصراً يعرف قيمة كل لحظة، يراقب الشمس قاربت على الغروب، ده ميعاد الأذكار، ده ميعاد القيام، ده ميعاد الصلاة، ده ميعاد الذكر، ده ميعاد صلة الرحم، ده ميعاد خدمة الناس وإطعام المساكين، ده ميعاد العمل أنه يعمل ويأكل من عمل يده. ده المؤمن ما عندوش حاجة اسمها وقت فراغ، ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 3]، نفصل فيهم بعد جلسة الاستراحة. أقول قولي هذا وأستغفر الله لي ولكم.

الحمد لله وحده، والصلاة والسلام على من لا نبي بعده، محمد صلى الله عليه وسلم. ﴿وَالْعَصْرِ * إِنَّ الْإِنسَانَ لَفِي خُسْرٍ﴾ [العصر: 1-2]، أقسم الله عز وجل حتى لا يشك أحد ولا يرتاب أحد ولا يجادل أحد على قيمة الزمان الذي بيمر وينتهي الوقت، أن أغلب الناس خسران. إلا مين يا رب؟ ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾. العجيب أن ربنا ما قالش أن الإنسان لفي خسر، إلا الذي آمن وعمل صالحاً وأوصى بالحق وأوصى بالصبر. ربنا ما قالش كده، مع أن كان السياق يحتمل كده، أن الإنسان لفي خسر إلا الذي آمن، قال: ﴿إِلَّا الَّذِينَ﴾، أول سبب النجاة اجتماع البيئة الصالحة، أهل المساجد، أهل الدين، صحبة صالحة. أول سبب للنجاة وكأن ربنا بيقول لنا الأصل أن الإنسان مش هينجو لوحده، أنت في طلب الهداية بتقول ﴿اهْدِنَا الصِّرَاطَ الْمُسْتَقِيمَ﴾، يبقى أهم أسباب الخسارة البعد عن بيئة الإيمان، البعد عن الصحبة الصالحة. النصيحة الوحيدة التي أعطاها العالم إلى القاتل، العالم إلى قاتل المئة قال له: اترك أرضك، فإنها أرض سوء، وانطلق إلى الأرض كذا وكذا فإن بها أناساً يعبدون الله فاعبد الله معهم. عايز ينقله من الخسارة للنجاة، قبل ما يقول له آمنوا وعملوا الصالحات وتواصوا بالحق وتواصوا بالصبر، هو لسه في الأول قال له: اترك الأرض، قال له: خليك مع الزين دول وأنت بعد كده هتمشي لوحدك.

قاتل المئة فرقت معه شبر، يعني لو كان اتأخر -شوف بقى قيمة العصر قيمة الوقت- لو كان اتأخر وهو ماشي، ده الشبر ده تقريباً الخطوة بتاعة الرجل تقريباً ثلث أشبار، يعني لو كان اتأخر ثلث خطوة كان داخل النار، شبر واحد فارق معه وهو ماشي، في نص الطريق مات، فربنا نزل الملائكة تقيس ما بين مكان الموت ومكان الأرض الصالحة، ومكان الموت ومكان الأرض الفاسدة، وجدوه أقرب إلى الصالحة بشبر. زي ما بيقول لك ابن المبارك بيقول لك: الحق ولو بسجدة، أدرك ولو بتسبيحة، ما فيش حاجة اسمها الموضوع خلص. عندنا قضاء الحاجة التي تفوتك، كان النبي صلى الله عليه وسلم إذا فاته حزب أو نام عنه حزبه من الليل قضاه بالنهار، قيام الليل، شوف ولو بشبر. إياك أنك تتأخر، إياك أنك تتأخر، اللي سمع الأذان ينزل حتى لو بعد كده الإقامة، ينزل، ولو بعد الصلاة يصلي في المسجد، يعود نفسه على ذلك.

كثير من الناس مقاييسها مختلفة، اللي هيمشي مع تقييمات الناس هيضيع. يقول أحد السلف: فاتتني تكبيرة الإحرام فعزاني واحد، ولو مات لي ولد لعزاني مئة ألف. بيقول هو بيستنكر، إزاي تفوتني تكبيرة الإحرام واللي يعزيني واحد بس؟ إزاي مع أن أنا مشهور؟ أنا لو ابني مات مئة ألف واحد هيعزوني، شوف أن الناس ممكن تغير طريقة تفكيرك في الحياة. فأنت لازم تروح لبيئة صالحة تساعدك أنك تبحث عما ينفعك، ما تضيعش وقتك. يبقى رقم واحد عشان ما تخسرش في الصورة استغلال كل لحظة في حياتك. رقم اثنين اللحاق بالبيئة الصالحة، وبالتالي البعد عن البيئة الفاسدة. طول ما أنت بتحاول وأنت في البيئة الفاسدة أنت عامل زي اللي بيغتسل وهو في تنقُّع، كل ما يتطهر كل ما ثيابه يصيبها النجس. لازم تترك، أول كلمة قال له اترك، الكلمة اللي إحنا مش عايزين نسمعها، الكلمة اللي ثقيلة على قلوبنا كلمة اترك، لكن دي سبب النجاة الأول. اترك أرضك فإنها أرض سوء، فإنها أرض سوء.

﴿إِلَّا الَّذِينَ آمَنُوا وَعَمِلُوا الصَّالِحَاتِ﴾، الإيمان حتى لا أطيل، الإيمان اللي هيغير نظرتك عن الوقت، الإيمان هو اللي يخليك تعرف قيمة الجنازة اللي معدية. هتتخيل، الإيمان هيخليك تتخيل منظر الجنازة ماشية، جبل أحد حسنات ماشي. الإيمان هيخليك تتخيل مشهد المريض أنه جنة بتمشي فيها وأنت رايح تزوره. الإيمان هيخليك تتخيل الأذى اللي بتشيله من الطريق أنك بتترقى في سلم الإيمان. الإيمان هيغير نظرتك عن أفعالك، عن أوقاتك، الإيمان هيخليك تغير جدول مواعيدك، ما عدتش بتقول للناس الساعة ثلاثة وأربعة وخمسة وخمسة إلا ربع، لا، هتقول للناس المغرب بعد العصر بعد الفجر، كلامك ومواعيدك ومصطلحاتك ومفاهيمك هتتغير. ده الإيمان، أنك ترجع تاني تتعامل بما يريد الله عز وجل، كأنك أنت خلاص بتمسح طريقة التفكير القديمة وبتنزل طريقة تفكير جديدة تماماً، ﴿الَّذِينَ آمَنُوا﴾. أول لما الإيمان جه انطلق في الأعمال ﴿وَعَمِلُوا الصَّالِحَاتِ﴾، كأن مشهد واحد كان نايم في البيت والبيت بيولع، أول حاجة عملها أنه صحي، هي دي آمنوا، عملوا الصالحات، الصالحات من الإصلاح، أنه أصلح الإفساد، أنه قعد يجري يحاول انطلق في كل الأعمال الصالحات.

رقم ثلاثة لازم تصحي الناس، كما أن الله عز وجل مَنَّ عليك باليقظة فأيقظ الناس، أوعى تسيب الناس، من أهم أسباب النجاة أنك تصحي الناس، أوعى تنشغل بالناس أنك تكاثرهم في الدنيا زي سورة التكاثر، أوعى تنشغل بالناس أنك تستهزئ بهم زي سورة الهمزة، خلي انشغالك بالناس أنك تنقذهم. سئل ابن سيرين ما القلب السليم؟ قال: أنصح الناس للخلق، ده اللي قلبه سليم، اللي بيحب الناس جداً ونفسه ينصحهم ونفسه الناس كلها تبقى كويسة، ده اللي قلبه، أنصح الناس للخلق هو ده اللي قلبه سليم، ﴿وَتَوَاصَوْا بِالْحَقِّ﴾. تصحي الناس اعرف أن دي مهمة صعبة، فربنا بيقول لك اصبر، اصبر، النجاة من الخسارة مش سهلة، اللي حواليك عايزينك تخسر حتى لو غصب عنهم، ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ﴾ [التغابن: 14]. التكاثر اللي في الدنيا اللي حواليك هيفتنك، أنت ممكن تبقى من الذين آمنوا، وممكن تبقى من الذين عملوا الصالحات، ومن الذين تواصوا بالحق، لكن ما تعرفش تصبر، فالثلاثة يقعوا.

أنك دايماً خط البداية زحمة، لكن خط النهاية اللي بيوصل في آخر السباق قليل. لو إحنا اتكلمنا عن أهمية حفظ القرآن، وقلنا خطبة وجبنا أحد المشايخ قال لنا خطبة، كلنا نبكي عن أهمية حفظ القرآن، وقلنا مين هيحفظ القرآن؟ استمارة حفظ القرآن، هتلاقي المسجد كله بيقدم طلبات حفظ القرآن. لكن السنة اللي بعدها مين كمل القرآن؟ تجد بعد ما كان عندنا خمسة آلاف طلب مثلاً اللي يكمل ثلاثة أربعة. هو ده الصبر، مين اللي بيكمل للآخر؟ سهل جداً أنك تاخد قرار النهاردة أنا هحافظ على الصلوات في المسجد، تستعين بالله، لكن مين اللي هيصبر؟ لذلك ربنا قال ﴿وَتَوَاصَوْا﴾ ما قالش وأوصى، يعني إيه وتواصوا؟ يعني أنت النهاردة بتوصي، بكرة في واحد بيوصيك، وتواصوا يعني ناس بتوصي بعض، لا أحد، لذلك يقولون: لا أحد أكبر من أن يوصى، ولا أحد أقل من أن يوصي. ده معنى ﴿وَتَوَاصَوْا﴾، لا أحد أكبر من أن يوصى، ما فيش حد كبير على النصيحة، ولا أحد أقل من أن يوصي، أوعى قال لنفسك تقول هو أنا مين عشان أنصح؟ لا انصح، ده من أسباب النجاة، الأمر بالمعروف والنهي عن المنكر، يعني اللي هيصلي ويقيم الليل.

ويذكر ربنا وما يأمرش بالمعروف وينهى عن المنكر خسران برضه، اللي مش هيصلح أحوال الناس أيضًا خسران، اللي مش هينشغل بإصلاح بيته وزوجه وأولاده وأقاربه أيضًا في خسارة، ﴿وَتَوَاصَوْا بِالْحَقِّ وَتَوَاصَوْا بِالصَّبْرِ﴾. أنت النهارده نشيط، بكرة أنت ضعيف، تقول لك أنت محتاج بقية الإيمان، أنا النهارده بوعظ بكرة محتاج حد يوعظني.

أنت النهارده بتقول النصيحة بكرة محتاج حد يقولها لك، أنت النهارده شفت واحد غضبان قلت له: اذكر الله واستعذ بالله من الشيطان الرجيم، بكرة أنت هتبقى غضبان وهو يقول لك: استعذ بالله من الشيطان الرجيم. هو ده الناس، الإنسان دائمًا متقلب؛ لذلك محتاج إنه لما يسقط يبقى في بيئة إيمانية تلحقه، مش لما يسقط ناس تبقى فرحانة إنه وقع وخلاص رجع تاني زيه زينا ورجع خلاص ما عادش حد هينصحنا ولا يوجع دماغنا. لأ، لازم تكون في بيئة إيمان.

إذاً أحبتي في الله، حتى لا أطيل عليكم، هذه السورة الثلاث آيات أول لما تفتحها تحس إن الوقت بيخلص، إن اليوم بيخلص، إن الزمن بيخلص، وإن القيامة اقتربت، ويقسم الله بآخر لحظات الامتحان ﴿وَالْعَصْرِ﴾، إيه النتيجة يا رب؟ لم ينجح أحد؟ ﴿إِنَّ الْإِنسَانَ لَفِي خُسْرٍ﴾. أبداً يا رب؟ لأ، عدد قليل نجح، مين هم؟ اللي حافظوا على أربع حاجات: ﴿الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾. السورة اللي قبلها والصورة اللي بعدها كذلك ينجو الإنسان.

أسأل الله عز وجل أن ينجينا من الفتن، اللهم بارك لنا في أوقاتنا واملأها بطاعتك يا رب العالمين، اللهم بارك لنا في أعمارنا واملأها بطاعتك يا رب العالمين، اللهم هب لنا من أزواجنا وذرياتنا قرة أعين واجعلنا للمتقين إماماً، اللهم اجعلنا لك ذكارين شكارين قوامين، عليك متوكلين، إليك منيبين أوّاهين مخبتين يا رب العالمين.

اللهم أعنا على ذكرك وشكرك وحسن عبادتك، وبارك لنا في أعمالنا يا رب العالمين، اللهم استعملنا ولا تستبدلنا، اللهم اهدنا واهْدِنا واجعلنا سبباً لمن اهتدى، اللهم قيّض لهذا البلد أمر رشد يعز فيه أهل طاعتك، ويؤمر فيه بالمعروف، وينهى فيه عن المنكر.

اللهم حكّم فينا كتابك، اللهم ولِّ علينا خيارنا ولا تولِّ علينا شرارنا، اللهم اصرف عن مصر الفتن وعن سائر بلاد المسلمين يا رب العالمين، اللهم ربنا آتنا في الدنيا حسنة وفي الآخرة حسنة وقنا عذاب النار. أقول قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك، وأقم الصلاة.