د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم. بإذن الله عز وجل نستكمل تفسير جزء عم، كنا بفضل الله عز وجل ومن كرمه سبحانه وتعالى خلصنا سورة النبأ. إن شاء الله نبدأ سورة النازعات. زي ما قلنا وبناكد دايماً إن الجزء الثلاثين مليء بالمعاني العظيمة المتنوعة، لكن بيككز أساساً على الدار الآخرة، وبيكز أساساً على لقاء الله عز وجل.
وهنجد واحنا ماشيين مع بعض كده في الجزء الثلاثين إن دايماً التركيز على انقسام الناس لفريقين: إما من خاف مقام ربه، أو أما من طغى. تجد من يعمل مثقال ذرة خيراً ومن يعمل مثقال ذرة شراً، تجد أن المسألة إن الأبرار لفي نعيم وإن الفجار لفي جحيم. تجد أن الموضوع دايماً متكرر طول الجزء الثلاثين، أيضاً ما ننساش الآيات القصيرة السريعة المتتالية اللي بتنفع للناس الغافلين أن هي تفوقهم، هزات عنيفة متتالية متنزلة تفوق الناس.
نبدأ مع بعض ونشوف سورة النازعات، عايزين دايماً نتخيل واحنا بنفتح السورة بنسمع إيه أو بنلاقي إيه. زي ما ربنا يكرمنا كده إن شاء الله لو وصلنا لسورة العاديات، أول أما تفتح سورة العاديات تسمع مشهد صوتي صوت الخيل وهي بتجري. أول ما فتحنا سورة النبأ سمعنا مشهد ناس قاعدين مع بعض عمالين يهمسوا ويتكلموا، قربنا منهم لقيناهم بيتساءلوا، قربنا أكثر لأنهم بيتساءلوا عن يوم القيامة.
أول لما بنفتح بقى مشهد سورة النازعات، ده مشهد عجيب جديد بقى، أول مشهد مشهد واحد بيموت. تخيل أنت بتفتح السورة سمعت صوت حشرجة نفس واحد بيموت، والعجيب أن البداية بداية صوت واحد بيموت، لكن موته صعبة جداً جداً، روحه بتنزع منه. أول مشهد في السورة: ﴿وَالنَّازِعَاتِ غَرْقًا﴾ [النازعات: 1]. قسم من الله عز وجل، وهو لا يحتاج إلى أن يقسم سبحانه وتعالى، ولا يقسم إلا بعظيم.
أول مشهد الله عز وجل يقسم بأصناف من الملائكة: النازعات، الناشطات، السابحات، السابقات، المدبرات. خمس أقسام متتاليات من الملائكة منها المعطوف، ومنها القسم سواء في السابقات أو في المدبرات بحرف الفاء. هنتكلم على الخلاف في أنواع الملائكة اللي ذكرت، الشاهد أن الراجح في الغالب أن دي ملائكة، وأن المفسرين اختلفوا إيه بالضبط. النازعات هل هي الخيل ولا هي القوس ولا هم المؤمنين ولا الغزاة؟ ده أياً كان، إنما الأشهر أن دي الملائكة. الملائكة تنزع روح الكافر، أول مشهد في السورة مشهد ملائكة بتنزع نفس النفس بتاع الكافر بتنزعه بقمة الشدة. والنازعات غرقاً، وهنسر معنى الكلمه بتاعة غرقاً دلوقتي.
يبقى إذا مشهد مرعب لاول لحظة، لما مشهد سورة النبأ كانوا لسه بيتكلموا ولسه بيتساءلوا، والآيات بتاعة سورة النبأ بقى هزتهم وكلمتهم وفكرتهم بدار الآخرة وما فيش فايدة، المشهد بقى بتاع سورة النازعات مشهد يخوف أكثر عشان يلينوا إلى كلام الله عز وجل. أقسام من الملائكة مختلفة، جنود الله عز وجل منتشرة في الكون. عشان نفتكر بكلمة جنود ديت لما تجيلنا في السورة: ﴿فَحَشَرَ فَنَادَى﴾ [النازعات: 23]، لما فرعون حب يبين سلطته جمع الجنود بتوعه، ربنا سبحانه وتعالى بيبين في أول لحظة قد إيه الملائكة بتطيع أمر الله عز وجل، قد إيه مشهد القدرة المطلقة سبحانه وتعالى، زي ما هنشوف برضوا في آيات خلق السماوات والأرض في السورة، تحديدا التركيز على مشهد معين من المشاهد.
نفتح السورة مشهد الملائكة، أول مشهد: ﴿وَالنَّازِعَاتِ غَرْقًا﴾ [النازعات: 1]. النزع يستعمل لما تبقى حاجة ماسكة وبتتشال بصعوبة، في مقاومة في الشد. يعني لما نقول رفعت، أنا رفعت القلم غير نزعت القلم، نزعت القلم يبقى في مقاومة وأنا بشد القلم. لذلك لما ربنا سبحانه وتعالى بيقول: ﴿تُؤْتِي الْمُلْكَ مَن تَشَاءُ﴾ [آل عمران: 26] قال: ﴿وَتَنْزِعُ الْمُلْكَ﴾ [آل عمران: 26]، دايماً اللي بيتخذ منه الملك دايماً مش عايز يسيبه لآخر لحظة وهو ماسك فيه، فالله عز وجل بقدرته المطلقة سبحانه وتعالى ينزع منه الملك.
كذلك الكافر والعياذ بالله من شدة تمسكه بالدنيا ومش قادر يتخيل أنه هيموت، زي ما ربنا سبحانه وتعالى بيقول في سورة القيامة عن الكافر: ﴿وَظَنَّ أَنَّهُ الْفِرَاقُ﴾ [القيامة: 28]. كان كل مشكلته في الدنيا أنه هيفارق الدنيا، كل مشكلته في الموت مش أنه هيروح فين أو الدار الآخرة فيها إيه، لا، هو خايف من فراق النعيم، وحيل بينهم وبين ما يشتهون، قيل دي لحظة الموت. بيمد إيده كده عشان ياخد الدنيا، ويجي ملك الموت يشيل كل اللي بيحبه منه ويموته. والنازعات، يبقى روح الكافر ونفس الكافر والفاجر والعياذ بالله ماسكة في الدنيا متغلغله في كل أطراف الجسد دي النفس بتاعته، فالملائكة تشد النفس من كل طرف حتى قالوا من تحت الضوافر. النفس بتتشعب وبتهرب بتروح في كل عضو وفي كل عصب وفي كل مكان في الجسد بتتفرق تماماً، فالملك من قوته اللي ربنا أعطاه للملك يشد نفس الكافر والكافر يقاوم، هو ده النزع.
في حاجة بقى اسمها غرقاً. الإغراق يعني بلوغ الغاية القصوى، أما واحد يقول لك إيه ده استغرق في العمل، استغرق في العمل يعني جاب آخره في العمل، فالملائكة بتجيب بكل قوتها بتشد قصاد التنازع بتاع الكافر، لكن بقدرة الله عز وجل الملائكة تطلع روح الكافر. مشهد مؤلم في أول السورة مشهد النزع ده، خد بالك عايزين ناخد بالنا احنا النهارده في السورة مشهد النفس، هنتكلم النهارده عن مسألة النفس في أكثر من موضع في السورة.
أول مشهد مشهد النفس التي لم تروض، النفس اللي يعني اللي مش عايزة تخرج، عايزه تمارس كل أهوائها وشهواتها، مش عايزه تطلع من الدنيا أبداً، التي تشعر أن الآخرة سجن وتشعر أن الدنيا جنة. دي النفس اللي هتشعر بهذا المعنى في الأول: والنازعات غرقاً. المشهد الثاني مشهد عجيب بقى عكس المشهد الأولاني تماماً: ﴿وَالنَّاشِطَاتِ نَشْطًا﴾ [النازعات: 2].
يعني ايه النشطات؟ حتى يقول لك ده واحد نشيط، نشيط يعني خفيف وبيتحرك بسرعة. الأنشوطة دي الرابطة اللي تتفك بحاجة بسيطة جداً، أما تبقى رابطة عارفين زي الفيونكة كده تشدها تتفك، هي دي الأنشوطة. لما كان واحد يبقى تعبان ويخف يقول لك: كأنما أنشط من عقال، يعني كأنه كان مربوط وقام. يبقى النشطات بتستعمل لما يبقى واحد مربوط، ويبقى مثلاً الحيوان لما يتربط والحيوان حاسس أن هو عايز يتحرك في المرعى وعايز ينطلق في المزرعة، فيجي واحد يفكه فيقول الحيوان ده أنشط من عقال، كأن مسجون واتفك. أو تيجي للواحد تعبان وخف يبقى المؤمن بالنسبة له زي ما يكون كان مخنوق كان مسجون وانطلق، ده بالموت. لذلك حديث النبي صلى الله عليه وسلم: «الدنْيا سجْنُ المؤْمِنِ».
يبقى النشطات تديني معنيين: معنى أن المؤمن كان حاسس أنه مسجون في الدنيا وانه كان تعبان في الدنيا كأنما أنشط من عقال، كأنه كان تعبان وخف. يبقى مشهد السجن اللي في الدنيا اللي حاسه ومشهد الخنقة هينطلق إلى نعيم الآخرة. يقول لك البئر لما الدلو ينشط من البئر، أن المية المية اللي في البئر شوية مية صغيرين بدلو واحد يطلع كل اللي فيها مع النشط. في اللغة جميلة جداً، لكن الشاهد أن خروج الروح المؤمن كخروج القطرة من في السقاء. يعني إيه؟ يعني لما بتيجي تقلب أزازة المية كده عايز تطلع المية اللي فيها، أول لما بتقلب المية بتطلع مش بتقعد تقول لها إيه أطلعي وتضرب في المية أبداً، المية أول لما بتقلب بتطلع.
كذلك روح المؤمن أول لما الملك يقول لها اخرجي إلى ربك، تجد نفس المؤمن خرجت لأن هي نفس مهذبة، لأن هي نفس تربت، لأن هي نفس مروضة. زي ما هنيجي معانا في السورة: ﴿وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى﴾ [النازعات: 40]. والناشطات نشطاً، الملائكة بتطلع روح المؤمن لكن بكل سهولة وبكل يسر، لأن المؤمن كان مرتبط بالآخرة، لأن المؤمن كان حاسس أنه في الدنيا سجن، لأن المؤمن كان يتمنى اللحظة اللي هيلقى فيها الله عز وجل، لأن المؤمن كان بيحلم باللحظة اللي هيرى فيها وجه الله عز وجل، فعايش تعبان في الدنيا حتى لو في نعيم، حتى لو مال، حتى لو معاه عربيات، لكن هو حاسس أن منتظر شيء عظيم في الآخرة، منتظر صحبة النبي صلى الله عليه وسلم.
فدايماً كل ما يتذكر أن رؤية وجه الله أو كل ما يتذكر نعيم الجنة يحس أنه مسجون ويحس أنه تعبان، فتجي النشط دي تخلي التعبان يخف، وكان اللي محبوس ينطلق، هي دي والناشطات نشطاً.
المشهد الثالث الملائكة بعد ما خرجت بروح المؤمن تسبح في السماء، تطلع بقى بروح المؤمن إلى الله عز وجل فتسبح. أو السابحات، ده نوع من الملائكة بقى، الملائكة التي تسبح تنفذ أمر الله. يبقى تاني مشهد السورة بدا مشهد الموت، هنلاحظ في سورة النبأ أتكلمنا عن الجحيم واتكلمنا عن الجنة الدار الآخرة. الموت أكثر تأثيراً في الإنسان من الدار الآخرة لأن ده اللي بيشوفه، فبدات سورة النازعات الخطاب يبقى أعلى، الخطاب يبقى أشد، الكلام عن الموت. لكن الكلام عن الموت في لحظة خروج الروح، لحظة خروج النفس في المرحلة ديت هنجد أن اتكلمت عن خمس أنواع من الملائكة: النازعات، الناشطات، السابحات، السابقات، المدبرات.
في خلاف ما بين المفسرين طويل جداً احنا مش عايزين ندخل فيه. الشاهد، في ناس قالت الاثنين الأولانيين دول الموت، النزع والنشط دي الملائكة اللي بتنزع أرواح الكفار ودي الملائكة اللي بتخرج أرواح المؤمنين بكل صورة وسر. وقالوا الثلاثة دول أنواع الملائكة المختلفة التي تنفذ أمر الله عز وجل في أي أمر، وأن الملائكة في أي أمر من ربنا بتمر بثلاث مراحل: تسبح، تنطلق، ثم تتسابق من ينفذ الأمر، ثم تدبر الأمر اللي ربنا طلبه منها.
يعني الله عز وجل يامر الملائكة بامر فتسبح الملائكة تنطلق ثم تتسابق ثم تدبر هذا الأمر، فعشان كده جت الثلاثة دول معطوفين على بعض بالفاء، دول بالواو (والنازعات والناشطات)، لكن من أول دي ربنا قال: ﴿وَالسَّابِحَاتِ سَبْحًا * فَالسَّابِقَاتِ سَبْقًا * فَالْمُدَبِّرَاتِ أَمْرًا﴾ [النازعات: 3-5]. فقالوا الثلاثة دول حاجة ودول حاجة. يبقى إذا في معنى أن دي الملائكة بتنزع أرواح الكفار النازعات غرقاً، الناشطات الملائكة تخرج أرواح المؤمنين بسهولة ويسر. رقم ثلاثة السابحات، الملائكة الله عز وجل أمرها بأمر فتسبح، أياً كان الأمر. عشان كده ربنا قال: ﴿فَالْمُدَبِّرَاتِ أَمْرًا﴾ [النازعات: 5]، نكرة، أي أمر: أمر المطر، أمر الإهلاك، أمر إنقاذ مظلوم، أمر إهلاك ظالم، أي أمر، يخفض ويرفع سبحانه وتعالى. فالملائكة تنفذ أمر الله عز وجل لا يعصون الله ما أمرهم ويفعلون ما يؤمرون.
الامر ده طريقة تنفيذه إيه؟ شوف ربنا سبحانه وتعالى بيقول لك إزاي الملائكة، أنتوا يا عصاة، يلي مش عايزين تطيعوا، يلي رافضين أنكم تخضعوا لله، يلي رافضين أنكم تخشعوا لله، ربنا بيقول لك في مخلوقات: ﴿وَلَهُ مَن في السَّمَاوَاتِ وَالْأَرْضِ ۚ وَمَنْ عِندَهُ لَا يَسْتَكْبِرُونَ عَنْ عِبَادَتِهِ وَلَا يَسْتَحْسِرُونَ﴾ [الأنبياء: 19]. يعني مش بس سورة الأنبياء، مش بس ما بيتعبش ولا يطلب التعب، ولا يستحسرون: ﴿يُسَبِّحُونَ اللَّيْلَ وَالنَّهَارَ لَا يَفْتُرُونَ﴾ [الأنبياء: 20]، وبتاعة سورة دي سورة الأنبياء وسورة فصلت يسبحون بالليل والنهار ولا يسامون، لا بيمل ولا بتعب ولا بيفطر ولا ويستحسر عبادات الملائكة. فالملائكة السبح ثم السبق ثم التنفيذ، لذلك المؤمن لازم كده لما يتطلب منه طلب يسبح، ثم يتسابق مع غيره من المؤمنين، ثم ينفذ الأمر بتدبير، مش أي تنفيذ وخلاص.
فالمَدبرات أمر، السبح هو السير بدون موانع وعرقله، السابح في الماء ده اللي بيمشي في المية بيحرك إيديه ورجليه بس من غير موانع، بيبقى في ثلاثة في الانطلاق، مرحلة السبح لما يستطيع أنه يبقى متمكن فيها، تيجي مرحلة السبق يستطيع أنه يسابق غيره، تيجي مرحلة تدبير الأمر. يبقى إذا لو استنبطنا من الآيات دي، ماذا يفعل المؤمن حينما يؤمر بأمر الله عز وجل؟
بعض المفسرين كان ده يعني إيه في بعض الإشارات كده في الآيات بعيداً عن التفسير اللي احنا ذكرناه قالوا: أن المؤمن بيمر مراحل، المرحلة الأولى أنه بينازع نفسه في تطبيق الأمر، دي أول النازعات. المرحلة الثانية أنه يبدا طالما نازع نفسه يبدا ينشط. المرحلة الثالثة أنه يبدا يسبح في تنفيذ أوامر الله. المرحلة الرابعة أنه يبدا يتسابق مع غيره من المؤمنين. المرحلة الخامسة تنفيذ أمر الله عز وجل، ثم يبحث عن أمر آخر يمر به بالمرحله دي. أو قالوا: لا، النشطات نشطاً، الملائكة بتاخد أرواح المؤمنين وتسبح بها في السماء، وتتسابق الملائكة بأرواح المؤمنين على قدر أعمالهم. الله أكبر، يبقى مشهد صعود الملائكة بأرواح المؤمنين، السبق في الوصول إلى الله على قدر الأعمال: ﴿وَالسَّابِقُونَ السَّابِقُونَ * أُولَئِكَ الْمُقَرَّبُونَ﴾ [الواقعة: 10-11]. وبعد ما يعملوا كده يسبحوا ويسابقوا يدبرون أمراً آخر، يشوفوا واحد تاني هيرروحوا يقبضوا روحه، ويا ترى هيطلع من بتاع النازعات ولا من بتاع الناشطات؟
نسال الله جميعاً أن نكون من إيه يعني أرواح المؤمنين اللي تخرج بسهولة ويسر، ونسال الله عز وجل حسن الخاتمة. يبقى الشاهد مشهد قدرة الله المطلقة على الكون، جنود ربنا سبحانه وتعالى له جنود السماوات والأرض منتشرين في كل مكان، ملائكة بتنزع أرواح كفار، ملائكة بتخرج أرواح المؤمنين بسهولة، ملائكة بتسبح في السماء، ملائكة تتسابق، ملائكة تدبر الأمر. مشهد هيمنة على الكون كله، مشهد طاعة مطلقة، مشهد خضوع مطلق من الملائكة.
تفتح السورة تفاجأ بالمشهد ده قصاده مشهد فرعون اللئيم المعاند المتكبر اللي بيقول: ﴿أَنَا رَبُّكُمُ الْأَعْلَى﴾ [النازعات: 24]، وفرحان بشويه جنود جامعهم حواليه: ﴿فَحَشَرَ فَنَادَى﴾ [النازعات: 23]، قاعد يجمع الجنود حواليه عشان يقول لهم أنا ربكم الأعلى. مشهد هزلي لما تيجي تشوف المشهد الأول قصاد المشهد ده، شوف قد إيه الإنسان حقير، قد إيه الإنسان ضعيف فعلاً، يعني أنه يخلق من نطفة فإذا هو.
إذا الفجائية: بعد ما كان نطفة فإذا هو خصيم مبين، يخصم ربنا سبحانه وتعالى ويبين في الخصومة ويحاول أنه يعني بيتفلسف في الخصومة والعياذ بالله، ده المشهد الأول اللي في السورة.
بعد كده فجأة بعد المشهد ده انتهاء مشهد الموت وتحرك الملائكة يوم ترجف الراجفة إيه اللي هيحصل؟ يوم ترجف الراجفة، هم وقفوا عند كلمة يوم دي فقالوا هو إيه اليوم ترجف رجف؟ فقالوا ده تبع يعني بعد الموت، والقسم الله عز وجل أقسم بالملائكة والنازعات والناشطات والسابحات لتبعثن في يوم ترجف فيه الرجفة أو يوم ترجف الرجفة، اذكر يا محمد للناس هذا اليوم يعني يوم ترجف الراجفة.
اليوم ده ما ينفعش يغيب عن حياتنا، في واحد دايمًا يقول لك أنا في يوم ما بنساهوش أبدا سواء حلو أو وحش؛ يوم رزق بولد بعد فترة طويلة من العقم مثلا، يوم نجح بعد فترة طويلة من التعب، يوم رزق بمال بعد فترة طويلة من الفقر مثلا، كعب بن مالك لما تخلف عن غزوة تبوك والنبي صلى الله عليه وسلم قال له: «أبشر بخير يوم مر عليك منذ ولدتك أمك»، خير يوم كان يوم توبة كعب بن مالك نزول القرآن فيه.
اليوم ده ما بيتنساش عند كعب، فربنا بيقولنا في يوم ما ينفعش تنسوه، إيه اليوم ده يا رب؟ يوم ترجف الراجفة تتبعها الرادفة، هنلاحظ حاجة عجيبة قوي في سورة النازعات الإبهام فيها، العلماء مختلفين: إيه النزعات؟ وإيه الناشطات؟ وإيه السابحات؟ وإيه الراجفة؟ وإيه هي الرادفة والطامة الكبرى؟ أسماء فيها نوع من الإبهام، الإبهام ده يخوف يعني جذب الأوصاف حاجة تخلي قلبك ترجف.
هي إيه؟ صاعقة عظيمة النفخة الأولى، العلماء اختلفوا: هل الراجفة دي النفخة الأولى ولا الراجفة دي الأرض هتتحرك من تحتي؟ أيا كان المشهد مرعب، في حاجة هترجف سواء الأرض هتتهز أو نفخة صاعقة تخلي الناس كلها تموت، يوم ترجف الراجفة تتبعها الرادفة.
اللي قال إن الراجفة الأرض قال إن الرادفة السماء، واللي قال إن الراجفة النفخة الأولى قال إن الرادفة النفخة الثانية، عايزين نبقى فاهمين معاني الكلمات، اللي قال، وده الأشهر، أن الرجفة هي النفخة الأولى، وده أشهر بعضه ومرو حديث، وإن كان يعني بعضهم ضاعفوه عن النبي صلى الله عليه وسلم.
اللي قال إن الرجفة النفخة الأولى قال إن الراجفة النفخة الثانية، واللي قال إن الرجفة ترجف الرجفة عشان إيه؟ يوم ترجف الأرض والجبال، فقالوا طالما الرجفة نسبت إلى الأرض في القرآن فمن تفسير القرآن بالقران أن الرجفة دي تبقى الأرض هتتهز من تحتهم.
أيا كان، الرجفة فيها اهتزاز وصاعقة عظيمة كل الناس تموت، تتبعها الرادفة كل الناس تصحى، إيه الهيمنة دي؟! قدرة مطلقة أرواح تنزع وملائكة تسبح وملائكة تتسابق وملائكة تدبر وأرض تهتز ونفخة تميت الناس ثم نفخة أخرى تحيي الناس مرة أخرى، يعني هيمنة وقدرة مطلقة من الله سبحانه وتعالى تتبعها الرادفة.
قلوب يومئذ في هذا اليوم الذي أنتم تعرضون عنه، قلوب يومئذ في هذا اليوم الذي تستهزئون به، في هذا اليوم الذي لا تفكرون فيه، قلوب يومئذ واجفة، الوجف ده شدة الخوف والرعب.
الوجف ده بيقولوا جت منين الكلية دي في اللغة؟ ربنا سبحانه وتعالى بيقول: ﴿فَمَا أَوْجَفْتُمْ عَلَيْهِ مِنْ خَيْرٍ وَلَا رِكَابٍ﴾ [الحشر: 6]، الفيء الغنيمة لما تيجي من غير ما نتعب فربنا قال في سورة الحشر فما أوجفتم عليه من خير وركاب، أوجف على الخيل لما واحد يركب على الخيل والابل وعايز الخيل تجري بسرعة يضربها جامد فالخيل قلبها يدق بسرعة وتضطرب من الضرب فتجري بسرعة والابل يحصل لها كده تضطرب من شدة الضرب فتجري بسرعة.
فكذلك كده ربنا بيقول قلوب يومئذ واجفة، فيها اضطراب وفيها إسراع ومش عارف يروح فين وقلبه مضطرب وجسده كله مضطرب، ده الوجف، فربنا بيقول القلب واجف خايف مضطرب مش عارف يروح فين، قلوب يومئذ واجفة أبصارها خاشعة.
العجيب هنا أن ربنا بيقول ما قالش أبصارهم، قال أبصارها؛ يعني أبصار القلوب يعني الجسد كله خاشع، لما القلب يبقى مضطرب الجسد كله يبقى مضطرب، فربنا بيقول لك أبصار القلوب خاشعة يعني الجسد كله خاشع مش عارف يفكر، أن تخشع ما ربنا هنا في السورة بيقول له: ﴿وَأَهْدِيَكَ إِلَى رَبِّكَ فَتَخْشَى﴾ [النازعات: 19]، فربنا بيقول لقريش أن في ذلك لعبرة لمن يخشى، فربنا بيقول له في الآخر: ﴿إِنَّمَا أَنتَ مُنذِرُ مَن يَخْشَاهَا﴾ [النازعات: 45].
فهنا ربنا بيقول ساعتها بقى اللي رفض كل الثلاث مراحل من الخشية ديات، عندنا ثلاث مرات الخشية: أهديك إلى ربك فتخشى، إن في ذلك لعبرة لمن يخشى، إنما أنت منذر من يخشاها، فربنا قال بقى اللي رفض كل دول أبصارها خاشعة.
خلص مشهد البعث، فجأة رجوع للدنيا، السورة مشاهد: مشهد الموت، مشهد الراجفة، مشهد الرادفة، وبعدين انتهت المشاهد ورجعنا تاني للدنيا.
الكفار قاعدين مع بعض في مجلس تاني شبه المجلس بتاع سورة النبأ اللي كانوا بيستهزئوا بيه مشهد تاني: ﴿يَقُولُونَ أَإِنَّ لَمَرْدُودُونَ فِي الْحَافِرَةِ﴾ [النازعات: 10]، يقولون مردود في الحافرة في الحافرة ده بيقولوه في الدنيا هم قاعدين مع بعض كده، ربنا بيجيب لك بقى مشهد بعد ما خوفهم رجعهم تاني.
دايمًا القرآن يجيب مشهد في الدنيا وبعدين ياخد اللي قاعدين في الدنيا هم هم ويوديهم الآخرة ويتكلم عن الآخرة بصيغة الماضي، وبعد ما يخوفهم يرجعهم تاني الدنيا ويقول لهم ها هتوب ولا لا؟ ففعلا يعني كلام معجز سبحان كلام ربنا سبحانه وتعالى.
فربنا بيقول الكفار قاعدين مع بعض في الدنيا بصيغة المضارع لأنهم كرروا الكلام ده، ودي دايمًا الهجمات الإعلامية الشرسة أن يجيبوا معنى واحد ويكرروه كتير، فالمعنى اللي كانوا بيكرروه بصيغة المضارع يقولون سؤال استنكاري: أإنا لمردودون في الحافرة؟!
الحافرة يعني هنعود مره أخرى إلى الأرض؟ هنعود مره أخرى بعد ما ننزل تحت الأرض؟ هنعود إلى الحالة الأولى التي كنا عليها؟ الحافرة يعني الحالة الأولى التي كنا عليها، يعني معقول زي ما هم قالوا في الاستفهام اللي بعده: ﴿أَإِذَا كُنَّا عِظَامًا نُّخِرَةً﴾ [النازعات: 11]؟
خد بالك هنا لما زودوا كلمة كانوا، دايمًا يقولوا إذا كنا عظامًا وترابا، هنا قالوا إذا كنا عظامًا نخرة، يعني كأن القرآن يصور لك هم بيعملوا إيه، كأنهم جابوا عظم وقعدوا ينفخوا فيه عشان الهواء النخرة يعني مجوفة أو مفتتة، يجيبوا عظمة وينفخوا فيها كده ويفتتوها ويقولوا للناس اتفضلوا الرسول المبعوث إليكم بيدعي أن أنتم بعد ما تبقوا كده هترجعوا أحياء تاني.
شوف الاستعمال الإعلامي لتضليل الناس ويكرروا المعنى ده يقولون يعني كل شوية يطلع برنامج ويجيب شوية عظام ويجيبها نخرة كده قدام الناس يقول اتفضلوا، هو عايزين يقولوا تخيلوا العقلاء دول اللي بيدعوا أنهم على عقل بيقولوا إن احنا هنرجع تاني أحياء بعد ما كنا عظاما ومش بس عظاما وعظاما ناخرة، ضغط على الناس عشان ينكروا البعث، دايمًا عندهم إشكالية مع قضية البعث.
أإنا إذا كنا عظامًا نخرة؟ وبعدين لما يقولوا كده ويقعدوا يهزروا مع بعض فيقوم واحد يقول إيه؟ قالوا تلك إذا كرة خاسرة، بالتالي بيقول ده لو طلع الكلام ده بجد ده احنا هنخسر، عارف أسلوب التريقة اللي يقول لك ده احنا مش عارف لو دخلنا النار لو دخلنا الجنة مش هنلاقي حد، بيتكلموا على دار الآخرة باستهزاء، فهم قاعدين مع بعض بيقولوا إيه: معقول نرجع تاني؟ معقول بعد ما كنا عظام نرجع تاني؟ آه ده ده الكلام ده لو حصل ده احنا نروح في داهية لأنهم ما بيعملوش أي طاعة.
ده الكلام ده لو حصل قالوا تلك إذا يعني لو الكلام ده حقيقي ده احنا هنخسر، وهو حقيقي لكن هم بيقولوه باستهزاء، وفي هنا لطيفة جميلة قوي لما جم يضغطوا على الناس جت بصيغة يقولون تكرار يقولون أانا لمردودون في الحافرة، لما قالوا إن في احتمال حتى لو بالتريقة والاستهزاء احتمال أن الكلام ده يطلع صح ولو الكلام ده طلع صح يبقى احنا هنخسر جت بصيغة الماضي: قالوا تلك إذا كرة خاسرة.
فالاعلام عارف هو بيكرر إيه كويس وهو ما بيكررش إيه، عارفين لما يحبوا يضحكوا على الناس ويوجهوا عقول الناس عارفين يكرروا إيه وما يكرروش إيه، لأن لو كرروا كلمة أن لو في بعث احنا هنخسر حتى لو في بعث احنا هنخسر حتى لو بتريقة، طب ممكن واحد يفكر طب ما أنا ليه ما أحطش الاحتمال ده احتمال أن أنا ممكن أبعث؟!
فإذا دايمًا الهجمات الإعلامية تبقى عارفة هي بتكرر إيه إيه اللي بيجي بصيغة يقولون وإيه اللي يجي بصيغة قالوا، أن يتقال مرة واحدة قالوا تلك إذا كرة خاسرة.
فربنا بيقول لهم الذي تستبعدونه اللي أنتم مستبعدين أن يبقى عظام ناخرة ويرجع هذا يحدث بزجرة واحدة! سبحان الله، هذا يحدث بنفخة واحدة، الزجرة كأنك بتزجر واحد بتزقه بتقومه، ده بيحصل هيحصل لكم بزقة واحدة بنفخة واحدة، فانما ليست ثانية ولا ثالثة فانما هي زجرة واحدة فإذا هي بالساهرة.
فإذا الفجائية هم يعني هم هم اللي كانوا نخرة فإذا هم هؤلاء المستنكرون بالساهرة، اسم غريب قوي أن يتقال على الأرض المحشر الساهرة، قالوا ليه الساهرة؟ قالوا لأن الأرض دي ليس عليها نوم.
مش بس ليس عنها وبعضهم قالوا ليس فيها ملجأ، فقالوا إيه علاقة أن ليس فيها ملجأ تستخبى فيه؟ ما فيش فيها لا ترى فيها عوجا ولا أمتا، إيه علاقة أن ليس فيها ملجأ حاجة بالنوم؟ قالوا ما الإنسان دايمًا ما يعرفش ينام في المكان المفتوح يخاف عايز حته ينام فيها، فبما أن هو مش ما فيش مكان يلجا له إذا مش هينام، ومن لحظة البعث ديت النوم هينتهي خلاص حتى اللي هيدخل الجنة وهيدخل النار ما فيش نوم من ساعة اللحظة دي خلاص بقى الساهرة كله ما عادش انتهى النوم أما نعيم دائم فمش محتاج أنه ينام فالنوم هينغص عليه نعيمه أو العياذ بالله عذاب دائم فالنوم بالنسبة له هيريحه.
فهما من نوع من النوم وقلنا في سورة النبأ: ﴿لَا يَذُوقُونَ فِيهَا بَرْدًا وَلَا شَرَابًا﴾ [النبأ: 24]، بعض العلماء قال البرد هو النوم لأنه بيبرد عنهم قليلا من العذاب فهم محرومون من النوم، فإذا هم بالساهرة.
وبعد كده مشهد تاني مشهد لممتكبر زي المتكبرين في قريش زي أبو جهل رفض الطاعة ورفض الخضوع، فربنا سبحانه وتعالى بيعرض بقريش وبيقول لهم في نموذج رفض زيكم حصل له إيه: ﴿هَلْ أَتَاكَ حَدِيثُ مُوسَى﴾ [النازعات: 15]؟
ربنا بيقول للنبي صلى الله عليه وسلم هل أتاك حديث موسى إذ ناداه ربه بالوادي المقدس طوى؟ الله عز وجل ينادي عبدا من عباده، يا ترى ليه؟ تخيلوا عشان يذهب إلى طاغية ينصحه، الله عز وجل من فوق سبع سماوات ينادي موسى عليه وعلى نبينا أفضل الصلاة وأتم التسليم إذ ناداه ربه بالوادي المقدس طوى قال له إيه؟ قال له: ﴿اذْهَبْ إِلَى فِرْعَوْنَ إِنَّهُ طَغَى﴾ [النازعات: 17].
الله أكبر! شوف رحمة رحمة ربنا حتى بالطغاه، الله عز وجل قبل أن يأخذ فرعون قبل أن ينتقم من فرعون بيقول لسيدنا موسى روح له كلمه جايز يرجع، لعله يتذكر أو يخشى، روح له وقول له صورة قول له قولا لينا.
الله أكبر! الله عز وجل ينادي بشرا من البشر موسى عليه السلام كليم الله عشان إيه؟ عشان يروح لطاغية: اذهب إلى فرعون، ليه يا رب أروح له؟ إنه طغى.
هنا في معنيين اذهب إلى فرعون إنه طغى، في معنيين: معنى الرحمة أن ربنا لا يريد أن يأخذ فرعون بغتة إلا ما يرسله رسول، ومعنى أنه طغى أن ده واجب الدعاة أن هم يوجهوا رسائل للطغاة.
أن أي طاغية لازم يواجه لازم يتبعت له رسائل لازم الرساله توصل له لازم، لذلك سيد الشهداء حمزة ورجل قام إلى سلطان جائر فنصحه فقتله، أن أنت لازم الكلمه توصل للظلمة أنه اذهب إلى فرعون إنه طغى، يبقى لازم يحدث أن يبلغوا هذه الكلمه كلمة الحق اذهب إلى فرعون إنه طغى، طغى تجاوز الحد شاف نفسه أكبر من حجمه مع أن أول لحظة في السورة مشهد واحد بيموت روحه روحه بتتشال منه ومش قادر يعمل حاجه روحه نفسه متفرقة في الجسد ومش قادر قادر يجمعها بتنزع منه غصب عنه لا يملك حتى نفسه لا يملك حتى روحه وبینازع في إيه ده؟ فده طغى رأى نفسه أكبر من حجمه طغى.
الماء يعني الماء تجاوز الحد وبدا يغطي الدنيا كلها، فربنا بيقول له اذهب إلى فرعون روح له لغايه عنده، الدعوة لازم توصل له لغايه عنده ما تبقاش من بعيد، اذهب إلى فرعون إن التعليلية أنه طغى كان ربنا بيقول له روح له قبل أن أخذه أخذ عزيز منتقم، روح له جايز وقول له كلمة بلين جايز يتوب، إنه طغى.
وقول له ربنا كمان قال لسيدنا موسى تقول له إيه يعني ما قالوش روح له فقل ربنا قال له تقول له بصيغة الاستفهام اللي تلين قلب قلبها قال له: ﴿هَل لَّكَ إِلَى أَن تَزَكَّى * وَأَهْدِيَكَ إِلَى رَبِّكَ فَتَخْشَى﴾ [النازعات: 18-19]؟
هل لك إلى أن تزكى؟ ما قالوش يا فرعون أنت لازم وفيك، قال له بصيغة الاستفهام كنه بيقول له أنا هعرض عليك عرض، إيه العرض ده؟ العرض ده هل لك إلى أن تزكى واهديك إلى ربك فتخشى؟ المؤمن لما يسمع العرض ده يذوب شوقا أن يلاقي حد يوصله ربنا، كل الناس اهل الايمان يعني نفسهم حد يوصلهم لربنا نفسه حد يقول له كلمتين يقربوه من ربنا، تخيل كليم الله رايح لواحد واحد بيقول له أنا جبت لك الفرصة دي لغايه عندك أنا جيت لك لغايه عندك وهكلمك عن ربنا وهساعدك أنك توصل لربنا، يا سلام كلمة الواحد لما يعني لذلك سيدنا موسى الكلام اللي قاله لفرعون.
سيدنا موسى عليه السلام طبقه بنفسه لما سئل: هل في الأرض من هو أعلم منك؟ فقال: لا. فعتب الله عز وجل عليه إذ لم يرد العلم إليه، وقال: بلى، عبدي فلان هو أعلم منك في جزئية معينة. فقال: أي رب، وكيف لي به؟ طالما واحد هيقربني منك أروح له يا رب، وكيف لي به؟ وهذا في قصة الخضر مع سيدنا موسى في سورة الكهف.
هنا بيقول له: ﴿هَل لَّكَ إِلَىٰ أَن تَزَكَّىٰ﴾. هنجد كلمة تزكى وتخشى، والكلمتان دول هيتكرروا معانا في سورة عبس؛ ففي سورة عبس ربنا بيقول له: ﴿وَأَمَّا مَن جَاءَكَ يَسْعَىٰ * وَهُوَ يَخْشَىٰ * فَأَنتَ عَنْهُ تَلَهَّىٰ﴾، وربنا بيقول: ﴿وَمَا عَلَيْكَ أَلَّا يَزَّكَّىٰ﴾. النبي صلى الله عليه وسلم في أول سورة عبس منشغل بناس عشان يتزكوا، وبعد ما يتزكى يخشى، فدايماً الخشية بتيجي بعد التزكية. فربنا بيقول للنبي صلى الله عليه وسلم: أنت منشغل بناس رافضين التزكية اللي هي المرحلة الأولى، وفي واحد جايلك هو أصلاً في المرحلة الثانية ﴿وَأَمَّا مَن جَاءَكَ يَسْعَىٰ * وَهُوَ يَخْشَىٰ﴾، يبقى ﴿وَمَا عَلَيْكَ أَلَّا يَزَّكَّىٰ﴾. في ناس رافضة المرحلة الأولى اللي هي التزكية، وفي واحد جايلك تجاوز المرحلة الأولى وفي مرحلة الخشية دلوقتي. فكان مرحلة التزكية هي المرحلة الأولى، ثم مرحلة الخشية هي المرحلة الثانية.
إيه العلاقة بين كلمة طغى وكلمة تزكى؟ شوف إعجاز القرآن، هنجد أن طغى فيها زيادة، وتزكى (الزكاة) في اللغة فيها زيادة أيضاً، لكن طغى زيادة تجاوز الحد، إنما الزكاة هي زيادة نماء مع طهارة. لذلك يقولوا الزكاة: الفلوس اللي أنت بتطلعها بتعمل حاجتين، بتخرج المال الخبيث فتطهر مالك، وفي نفس الوقت تبارك لك في مالك فيزيد. إزاي؟ ده ظاهر المال إنه قل، لكن البركة زادت. فالزكاة في اللغة ليها معنيين متلازمين: النماء، حاجة بتنمو والزيادة، والتنقية، أن حاجة تبقى طاهرة منقاة. فكأنه بيقول لفرعون: أنت بتبحث عن الزيادة، والزيادة بتاعتك دي زيادة الطغيان، أنت طغيت وتجاوزت الحد. أنا ممكن أخلي نفسك اللي جواك دي أشبعها، أشبع حب الزيادة ده، لكن بالحاجة اللي ربنا يحبها، وتبقى نفسك عمالة تزداد وتنمو لكن بالطريقة اللي ربنا بيحبها، هي دي ﴿هَل لَّكَ إِلَىٰ أَن تَزَكَّىٰ﴾. فالزكاة فيها زيادة والطغيان زيادة، لكن الطغيان زيادة تجاوزت الحد، والزكاة النفس هنا هتزداد لكن مع طهارة، هتتطهر من الخبائث. إذاً ﴿هَل لَّكَ إِلَىٰ أَن تَزَكَّىٰ﴾ بيقول له: أنا ربنا بعتني بآيات تستطيع هذه الآيات أنها تطهر النفس الخبيثة.
قلنا نركز على النفس في السورة: نزع النفس في أول السورة، وتزكية النفس في نص السورة، وفي آخر السورة نهى النفس عن الهوى. إذاً من المعاني التي تعالجها السورة قضية النفس، فبيقول له: ﴿هَل لَّكَ إِلَىٰ أَن تَزَكَّىٰ﴾. قلنا إن الزكاة فيها معنيين: الزيادة والطهارة، فبيقول له: أنت نفسك هتزداد وهتزداد قرباً من الله ﴿أُولَٰئِكَ الَّذِينَ يَدْعُونَ يَبْتَغُونَ إِلَىٰ رَبِّهِمُ الْوَسِيلَةَ أَيُّهُمْ أَقْرَبُ﴾. الملائكة تتسابق أيهم أقرب، الصالحون يتسابقون أيهم أقرب إلى الله، هو ده النماء الحقيقي، مش إنك تفضل تطغى لغاية لما تقول أنا ربكم، لا، أنت تفضل تزداد لغاية لما تبقى أقرب إلى الله، لما تبقى أكثر خشوعاً أنت كدة بقيت أعلى، كدة أنت بتقترب من الفردوس. ﴿هَل لَّكَ إِلَىٰ أَن تَزَكَّىٰ﴾، إذاً تزكى فيها جزء من معاني طغى لكن منضبطة إنها بتتطهر.
النفس كل نفس مشاكل، أي نفس بشرية: ﴿فَأَلْهَمَهَا فُجُورَهَا وَتَقْوَاهَا * قَدْ أَفْلَحَ مَن زَكَّاهَا * وَقَدْ خَابَ مَن دَسَّاهَا﴾. إذاً النبي صلى الله عليه وسلم يقول: «اللهم آت نفسي تقواها وزكها أنت خير من زكاها أنت وليها ومولاها». هذه النفس لن تتزكى إلا بآيات من الله، سيدنا موسى معاه آية رايح لفرعون يزكيه بهذه الآية، ﴿يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ﴾. إذاً النفس بتاعتنا لن تتزكى، يعني لن تتخلص من الخبائث وتنمو وتقترب من الله، المعنيين دول مش هيحصلوا إلا بالقرآن. فأنت بتبحث عن التزكية، لازم والتزكية معنيين، عايز تتخلص من المشاكل اللي في نفسك وعايز نفسك تترقى في الوصول إلى الله، لا يحدث إلا من عند الله؛ لأن الله هو اللي خلق النفس، وهيعلم كيف تترقى هذه النفس. ﴿هَل لَّكَ إِلَىٰ أَن تَزَكَّىٰ * وَأَهْدِيَكَ إِلَىٰ رَبِّكَ فَتَخْشَىٰ﴾، المعرفة الحقيقية لله تؤدي إلى الخشية.
لو أنزلنا هذا القرآن الذي يعرفكم ربنا: ﴿لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ﴾ [الحشر: 21]، خاشعاً متصدعاً من خشية الله. إذاً التأثير الحقيقي لآيات الله هو الخشية، فاللي يقرأ القرآن وما يزدادش خشية هو ما استفادش الاستفادة الحقيقية من القرآن. التقييم الحقيقي للاستفادة من آيات الله هي زيادة الخشية. فهو بيقول لفرعون: أنا رقم واحد هيحصل تزكية لنفسك الخبيثة المستبدة عليك اللي طاغية دي محتاجة تتهذب شوية، وبعد ما تتهذب أطرح عليك آيات ربنا، بعد ما نخلي وننقي النفس نحلي بقى النفس، نحط بقى فيها الحاجات الجميلة فتخشى الله عز وجل: ﴿وَأَهْدِيَكَ إِلَىٰ رَبِّكَ فَتَخْشَىٰ﴾.
وما سابوش كدة، ومباشرة ﴿فَأَرَاهُ الْآيَةَ الْكُبْرَىٰ﴾. هنا ربنا ما قالش الآية الكبرى كانت إيه، جمهور المفسرين على أنها العصا، أياً كان، ليه هنا كلمة الآية الكبرى؟ وخد بالك من الآية الكبرى وبين الطامة الكبرى اللي هتيجي معانا: ﴿فَإِذَا جَاءَتِ الطَّامَّةُ الْكُبْرَىٰ﴾. إيه العلاقة؟ الآية الكبرى هي الآية التي لا آية بعدها، بمعنى الآية الكبرى، الآية التي تغطي على عقل الإنسان وتضغط عليه تخليه لا محال يؤمن أو يجحد، مش ما يقتنعش. وإحنا دايماً نكرر المعنى ده، أن آيات القرآن تضغط نفسياً على الإنسان لو استمع ليها وأنصت ليها وتدبرها وحاول يفهمها، بتضغط عليه نفسياً، إما أن يؤمن وإما أن يجحد. يجحد يعني يبقى عارف أنه حق بس يرفض، وبما أن الإنسان في الدنيا مخير أنه يختار طريق الإيمان أو طريق الكفر، فالآية الكبرى هنا لما اتعرضت عليه كان هو مخير، يا يقبلها يا يجحدها، يعني يبقى عارف أن هي الحق فيجحدها. إنما الطامة الكبرى، يعني الطامة التي لا طامة فوقها، هتغطي على عقله كما غطت الآية على عقله، الآية الكبرى، الآية اللي هتغطي على عقله هتخليه يوقن أن الآية دي من عند الله، دي الآية الكبرى، والآية الكبرى بتاعتنا هي القرآن، أن لو الإنسان تدبرها يوقن أنها من عند الله ثم إما أن يؤمن وإما أن يجحد والعياذ بالله. الطامة الكبرى تغطي على عقله أيضاً لكن لن يستطيع أن يفر منها، لأن خلاص التخيير هنا رُفع، وهيقد والعياذ بالله أما إلى النار أو أنه برحمة الله عز وجل يذهب إلى الجنة.
﴿فَأَرَاهُ الْآيَةَ الْكُبْرَىٰ * فَكَذَّبَ وَعَصَىٰ﴾ رد فعل فرعون إيه؟ واحد بيقول له بأسلوب: ﴿هَل لَّكَ إِلَىٰ أَن تَزَكَّىٰ﴾ وفرصة الهداية إلى الله فرصة الخشية وشاف الآية الكبرى، عمل إيه؟ فخد بالك من الفاء: ﴿فَكَذَّبَ وَعَصَىٰ * ثُمَّ أَدْبَرَ يَسْعَىٰ﴾. يعني ما أدّاش لنفسه فرصة يفكر، ما عادش يقول: ده أنا بشر، ده أنا ما عنديش حاجة أملكها، أنا عارف حقيقة نفسي، لا، ما أدّاش لنفسه فرصة يفكر، ما أدّاش يتدبر، إزاي العصا دي انقلبت حية وهو عارف أن هو مش سحر، والسحرة قالوا له ده مش سحر، السحرة نفسهم قالوا له ده مش سحر، لكن هو ما أدّاش لنفسه فرصة يفكر، فكذب وعصى. ثم ما اكتفاش بالتكذيب، عصى، يعني بدأ يقاوم ويعارض، يعني مش مثلاً كذب بالآيات وخلاص وبقى كافر وخلاص، لا والعياذ بالله ده كمان بقى بيحارب دين الله عز وجل، ﴿فَكَذَّبَ وَعَصَىٰ﴾، ثم دي بيسموها الترقي الرتبي، يعني بدأ يزداد في المعصية والطغيان، يعني كذب دي مرحلة كفر، العصيان هنا يعني بدأ يقاوم كفر أعلى، أدبر يسعى بدأ كفر أعلى، بقى دي مراحل، دركات الكفر والعياذ بالله.
﴿أَدْبَرَ يَسْعَىٰ﴾ بدأ يفكر يعمل إيه؟ وكلمة أدبر دايماً اللي بيولي مدبراً في الحرب، أدبر يعني انطلق بدون تفكير، وكأنها عكس كلمة دبر، دبر يعني قاعد يفكر ويخطط، أدبر لا، بعض العلماء قال أن الألف دي كأنها اسمها ألف الإزالة، أي إزالة التفكير، يعني واحد قاعد يجري لا يعرف أين يذهب، بيجري وخلاص، أدبر. واللطيفة قوي كلمة يسعى دي، ما قالش أدبر يمشي ولا قال أدبر يجري، مع أن اللي بيهرب من معركة أدبر بيجري أو يمشي، كان فرعون ملهوف وخاف على ملكه يضيع لما جت رسالة سيدنا موسى وشاف الآية الكبرى والناس بدأت قربت تقتنع، خاف على الملك بتاعه، خاف على الملك اللي قاعد سنين يبنيه، فعايز يجري يلحق يتصرف، وفي نفس الوقت عايز يحافظ على شكله؛ لأنه لو جري هيبقى خايف، فجت كلمة يسعى اللي هي وسط ما بين المشي اللي فيه طمأنينة وهو مش مطمئن، وما بين الجري اللي بيدل أنه خايف، فهو عايز يحافظ على المنظر بتاعه ﴿ثُمَّ أَدْبَرَ يَسْعَىٰ﴾.
وبعدين عمل إيه؟ هو خاف أن الجنود يروحوا منه ﴿فَحَشَرَ فَنَادَىٰ﴾. الحشر ده الجمع مع ضغط، يعني كركب الناس، وكلمة حشر يعني كأنه جاب آخره، جاب كل الجنود وجاب كل الناس وكل اللي قدر عليه، ﴿فَحَشَرَ فَنَادَىٰ﴾ وعلا صوته بصوت عالي: ﴿فَقَالَ أَنَا رَبُّكُمُ الْأَعْلَىٰ﴾. طب هو عمل كدة ليه؟ يعني إيه علاقة أنه بيقول له ﴿هَل لَّكَ إِلَىٰ أَن تَزَكَّىٰ﴾ بأنه يجمع الناس يقول أنا ربكم الأعلى؟ البشر ضعفاء، أي ملك من البشر عشان يحافظ على ملكه، الملك بتاعه مش ملك ذاتي، يعني إيه مش ملك ذاتي؟ يعني فرعون ما عندوش قدرة خارقة أنه يخضع الناس، لا، فرعون بيخضع الناس بأدوات، إما أنه بيضحك عليهم بأدوات، بأسلوب خطاب مثلاً مشاعري يضحك عليهم، ﴿إِنِّي أَخَافُ أَن يُبَدِّلَ دِينَكُمْ أَوْ أَن يُظْهِرَ فِي الْأَرْضِ الْفَسَادَ﴾، بيكلمهم بأسلوب عاطفي يضحك عليهم، أو بالسحر، لذلك النبي صلى الله عليه وسلم يقول: «كان فيمن كان قبلكم ملك وكان له ملك ظالم وكان له ساحر».
دائماً الملوك اللي في البشر عشان يحافظ على ملكه لازم أدوات تحافظ على ملكه، هو ما عندوش قدرة خارقة ذاتية. لذلك بعض الإسرائيليات حاولت تستغرب هو ليه فرعون قال أنا ربكم الأعلى والناس صدقوه؟ فبعضهم قال كان فرعون لا يدخل الخلاء، ما كانش بيقضي حاجته، وكان فرعون لا يخرج منه ريح، أي حاجة، هم حاسين أن أكيد في حاجة مش طبيعية، لكن مش أبداً الكلام ده مش حقيقي، هو كان بيستعمل أدوات، كان بيستعمل إعلام، كان بيستعمل السحر، كان بيستعمل الاقتصاد، قارون، كان بيستعمل القوة العسكرية، هامان وزير عسكري بيستعمل حاجة، بيستعمل أدوات، لذلك الملك دايماً يخاف من الأدوات دي تروح يروح منه، يخاف من انشقاقات، يخاف من انقلابات تحصل عليه. فأول لما حصل أن الرسالة جت بتاعت سيدنا موسى جمع الناس بسرعة على حد يضيع منه، حشرهم كلهم، والحشر ده فيه كركبهم على بعض، جمعهم كلهم وأكد عليهم، قال لهم: خدوا بالكم أنا ربكم الأعلى، أوعوا تسمعوا، خاف أي حاجة تفلت منه.
لكن ملك الله عز وجل، الله عز وجل هو الملك سبحانه وتعالى لا يحتاج إلى أحد. لذلك فرعون لو ما معهوش جنود مش هيبقى ملك، يعني لو الجنود اللي حوالين فرعون سابوه ما عادش هيبقى ملك خلاص، لو انقلبوا عليه ما عادش هيبقى ملك، لذلك الله عز وجل الملك الحق سبحانه وتعالى هو الملك، لذلك إحنا نقول مالك يوم الدين، لأن هو الملك الحق، والملك بيظهر واضح يوم الدين عشان الفرق ده. شوف بقى قدرة ربنا، تأتي لحظة لازم تيجي اللحظة دي زي ما كانت موجودة قبل كدة على إحدى تفسيرات الحديث: «كان الله ولم يكن معه شيء»، تيجي لحظة الله عز وجل يميت كل الخلائق، كل الخلق يموت ولا يبقى أحد ثم يقول: ﴿لِّمَنِ الْمُلْكُ الْيَوْمَ ۖ لِلَّهِ الْوَاحِدِ الْقَهَّارِ﴾ [غافر: 16]. اللحظة دي تيجي أن ما فيش حد مع ربنا عشان الملك الحقيقي يظهر، أن الله لا يحتاج إلى أحد، الكل يحتاج إلى الله، هو الحي القيوم، هو يقيم الناس ويقيم الملائكة ويقيم السماوات والأرض، لا يحتاج إلى أحد سبحانه وتعالى.
فتيجي اللحظة دي الله عز وجل لا يحتاج إلى أحد، حتى الملائكة اللي بتدبر الأمر هي تحتاج إلى الله، هي تحتاج إلى الله: ﴿إِذْ يُوحِي رَبُّكَ إِلَى الْمَلَائِكَةِ أَنِّي مَعَكُمْ فَثَبِّتُوا الَّذِينَ آمَنُوا﴾ [الأنفال: 12]، قبل ما ربنا يقول للملائكة الأمر، يقول لهم أنا معاكم، كان الملائكة لا تستطيع أن تدبر ولا تتحرك إلا بتوفيق من الله عز وجل. إنما البشر محتاج، محتاج أدوات يتحرك بها لو راحت منه يضيع، ففرعون خاف على ملكه، فجمع فحشر الجنود بتوعه فحشرهم ونادى بأعلى صوته ﴿أَنَا رَبُّكُمُ الْأَعْلَىٰ﴾. هذه الكلمة الخبيثة اللي خرجت منه وكانت سبب أن ربنا يأخذه ﴿أَنَا رَبُّكُمُ الْأَعْلَىٰ﴾. المتكبرين والعياذ بالله استمتاعهم في الدنيا أن الناس تعبدهم، ينازع الله في ربوبيته، ينازع الله في حاكميته وألوهيته، وقال الله عز وجل: «العزة إزاري والكبرياء ردائي فمن نازعني في واحد منهما عذبته». استمتاع المتكبرين أنه يعبد، لذلك إبليس والعياذ بالله يضع عرشه على الماء والعياذ بالله عايز كأنه يضاهي عرش الله ويبعث سراياه، ولما تيجي الشمس تطلع يروح جري إبليس يحط القرنين بتوعه عند طلوع الشمس، أحد توجيهات حديث: «تشرق الشمس بين قرني شيطان وتغرب بين قرني شيطان»، ففي كراهة هنا في الصلاة في الوقت ده.
بعض الناس يسجد للشمس في هذا الوقت، فيقوم الشيطان ليشعر بنشوة الانتصار على أن الناس يسجدون له؛ فيروح يحط نفسه جنب الشمس عشان يشعر وكأن الناس بتسجد له. عنده نقص وكبر، اللي جواه ده دائمًا يعوضه بأن هو عايز يطغى على الناس. لذلك أحد معاني قول الله عز وجل لما الله عز وجل ينادي: ﴿يَا مَعْشَرَ الْجِنِّ قَدِ اسْتَكْثَرْتُم مِّنَ الْإِنسِ وَقَالَ أَوْلِيَاؤُهُم مِّنَ الْإِنسِ رَبَّنَا اسْتَمْتَعَ بَعْضُنَا بِبَعْضٍ﴾ [الأنعام: 128].
استمتاع الجن بالإنس، الجن بيستمتع إزاي؟ كنا ذكرنا ده في تفسير سورة الأنعام، الإنس بيستمتع إن الجن بيجيب له شهوات، والجن بيستمتع إنه متكبر والإنس يطيعوه.
﴿فَقَالَ أَنَا رَبُّكُمُ الْأَعْلَى * فَأَخَذَهُ اللَّهُ نَكَالَ الْآخِرَةِ وَالْأُولَى * إِنَّ فِي ذَٰلِكَ لَعِبْرَةً لِّمَن يَخْشَىٰ﴾ [النازعات: 24-26].
نكمل بإذن الله عز وجل تفسير هذه الآيات الحلقة القادمة، وجزاكم الله خيرًا. سبحانك اللهم وبحمدك، أشهد أن لا إله إلا أنت، أستغفرك وأتوب إليك. السلام عليكم ورحمة الله وبركاته.