تفسير سورة التغابن | د. أحمد عبد المنعم

السلام عليكم ورحمة الله وبركاته، الحمد لله وحده، والصلاة والسلام على من لا نبي بعده، محمد صلى الله عليه وسلم.

بإذن الله عز وجل اليوم سنتحدث عن سورة التغابن، هذه السورة العظيمة. إذا كنا ماشيين في السياق، ولو تذكرون أننا خدنا سورة الصف، وسورة الجمعة، وسورة المنافقون؛ فكان أغلب الكلام في السور السابقة كلاماً فكرياً ومشاكل في المجتمع. فبتيجي السورة دي تخرج الإنسان شوية من الدائرة الفكرية دي، وتخليه يبدأ يركز، ويبدأ ينقل بصره من على المشاكل التي في المجتمع والأخطار التي تحيط بالمجتمع وكيفية توحيد المجتمع، إلى الدار الآخرة.

وأن كل خطوة بيخطوها في الدنيا أو كل كلمة بيقولها في الدنيا لها رد فعل فوري في الآخرة. يعني مثلاً: سبحان الله وبحمده، سبحان الله العظيم، دي لها رد فعل نخلة في الجنة. فاللي عايش في الدنيا وعينه في الآخرة ما بيغبنش، ده مفاد السورة. اللي عايش في الدنيا ومتصل بالدار الآخرة لا يغبن في أي شيء من أفعاله. تعالوا نشوف سورة التغابن، سورة جميلة جداً، سورة رائعة، وأرجو أن أي سورة نحاول ناخدها نلزم أنفسنا بها، نحفظها ونصلِّ بها، ونصلِّ بها النوافل، ونصلِّ بها قيام الليل؛ بحيث إن المعاني تتقلب جواك وكل شوية تأكد على المعاني التي تعلمناها مع بعض.

تبدأ سورة التغابن: ﴿يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ ۖ لَهُ الْمُلْكُ وَلَهُ الْحَمْدُ وَهُوَ عَلَىٰ كُلِّ شَيْءٍ قَدِيرٌ * هُوَ الَّذِي خَلَقَكُمْ فَمِنكُمْ كَافِرٌ وَمِنكُم مُّؤْمِنٌ ۚ وَاللَّهُ بِمَا تَعْمَلُونَ بَصِيرٌ * خَلَقَ السَّمَاوَاتِ وَالْأَرْضَ بِالْحَقِّ وَصَوَّرَكُمْ فَأَحْسَنَ صُوَرَكُمْ ۖ وَإِلَيْهِ الْمَصِيرُ * يَعْلَمُ مَا فِي السَّمَاوَاتِ وَالْأَرْضِ وَيَعْلَمُ مَا تُسِرُّونَ وَمَا تُعْلِنُونَ ۚ وَاللَّهُ عَلِيمٌ بِذَاتِ الصُّدُورِ﴾ [التغابن: 1-4]. القرآن جميل قوي، القرآن فعلاً لو الإنسان ساب قلبه يعيش مع القرآن، القرآن هياخد قلبك ويطوف به في أماكن لا يمكن تجمع في أسطر زي ما في القرآن. يعني ثلاث أربع سطور دول لفوا بك الدنيا كلها، الدنيا وكل حاجة، ما علمت وما لم تعلم. اتكلمت عن صفات ربنا بصورة موسعة لا يمكن إدراكها ولا يمكن الإحاطة بها زي ما جت في القرآن.

بتبدأ السورة بصيغة المضارع التي ما فيهاش أي توقف: ﴿يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ﴾. بتدخل السورة وأنت سامع تسبيح لا يتوقف، أنت داخل سورة التغابن وما فيش لحظة بيتوقف فيها التسبيح في الكون كله. تخيل أنت بادئ سورة والمشهد الصوتي رقم واحد في أول آية سبحان الله وبحمده. تخيل أنت دخلت مسجد لقيت سبحان الله وبحمده سبحان الله العظيم أربعة وعشرين ساعة. اللي يدخل مكان أو يدخل سورة زي دي بيبدأ من أول لما بيسمع كلمة يسبح لله بيحصل جواه أكتر من حاجة -ده الإنسان المتفاعل مع القرآن-: رقم واحد إنه مش عايز يضيع لحظة؛ لأن الكون كله ما بيبطلش تسبيح. رقم اتنين: من زجر الكافر أو العاصي وهو شاذ بعيداً عن هذا التسبيح؛ بيبقى نشاز. ﴿يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ﴾. هاتان الكلمتان جمعت كل شيء ما في السماوات وما في الأرض.

﴿لَهُ الْمُلْكُ وَلَهُ الْحَمْدُ﴾، هذا الإله العظيم اللي بيسبح له، له الملك سبحانه وتعالى، يملك كل شيء. جملة ﴿لَهُ الْمُلْكُ وَلَهُ الْحَمْدُ وَهُوَ عَلَىٰ كُلِّ شَيْءٍ قَدِيرٌ﴾ جملة مهمة في العقيدة الإسلامية، جملة لازم الإنسان يتربى عليها من وهو صغير: «يا غلام، إني أعلمك كلمات: احفظ الله يحفظك، احفظ الله تجده تجاهك، واعلم أن الأمة لو اجتمعت على أن يضروك بشيء لن يضروك إلا بشيء قد كتبه الله عليك». دي معاني في العقيدة، هي دي العقيدة. أنت محتاج يومياً صبح وبالليل تكرر كلمة له الملك وله الحمد وهو على كل شيء قدير، مائة مرة الصبح ومائة مرة بالليل. يعني شوف احتياجك، تخيل لما رحت لدكتور فكتب لك دواء شرب مثلاً، كل ربع ساعة تاخده. خلاص اتصرف خده مائتين مرة في اليوم. تخيل دواء أنت محتاج تاخده مائتين مرة في اليوم، يبقى أنت محتاج له قد إيه؟ وهو يأثر فيك قد إيه؟ وقد إيه انشغال ذهنك عن المعنى ده خطر، يخليك تضل. أغلب أفعال الناس اللي تاهت، أغلب أفعال عبيد الدينار والدرهم، أغلب أفعال عبيد الخميصة والقطيفة؛ لأنهم ما عرفوا أن له الملك وله الحمد وهو على كل شيء قدير. لأنه لو عرف أن له الملك وله الحمد وهو على كل شيء قدير ما كانش عمل كده، ما كانش خاف من فلان، ما كانش تذلل لفلان، ما كانش عصى الله عز وجل من أجل إرضاء فلان، ما كانش طلب الرزق بالمعصية فإن ما عند الله لا ينال إلا بطاعته.

يبقى عقيدة يا جماعة، هي المشكلة أن المعاني بسيطة لكن ترسخها في قلوبنا هي دي المشكلة. عارفين كان الشيخ يعقوب يقول لك إيه؟ ﴿قَالَتِ الْأَعْرَابُ آمَنَّا ۖ قُل لَّمْ تُؤْمِنُوا وَلَٰكِن قُولُوا أَسْلَمْنَا وَلَمَّا يَدْخُلِ الْإِيمَانُ فِي قُلُوبِكُمْ﴾ [الحجرات: 14]. فكان بيقول إيه؟ أنا عايز كلمة يدخل الإيمان دي، بتخش إزاي؟ يعني إزاي أدخل الإيمان في قلبي؟ ولما يدخل الإيمان في، أنا عايز أعملها دي، أنا عايز أعمل دي، يتعمل إزاي دي؟ ففعلاً الجملتين دول أجيبهم وأحطهم في قلبي إزاي؟ يعني له الملك يعني يملك كل شيء نواصي الخلق بيده، وكل أفعاله يحمد عليها سبحانه وتعالى، شيء تتخيله أو ما تتخيلوش عليه قدير سبحانه وتعالى. المعنى ده لما ترسخ في قلب إبراهيم بقى طاير في الهواء، مش في الملاهي، في الهواء ده رايح النار، يعني النار اللي ولعوها عشان يحرقوا بها سيدنا إبراهيم، هو في الهواء وهيلقى في النار وبيقول: حسبنا الله ونعم الوكيل. لما الكلمة دي دخلت قلبه، سيدنا هود لما الكلمة دي دخلت قلبه وقف قدام قومه وبيقول لهم: ﴿فَكِيدُونِي جَمِيعًا ثُمَّ لَا تُنظِرُونِ * إِنِّي تَوَكَّلْتُ عَلَى اللَّهِ رَبِّي وَرَبِّكُم﴾ [هود: 55-56]. الإيمان بيديك قوة عجيبة، فالمعنى ده أنت محتاج يومياً تحاول تحشر المعنى ده في قلبك، له الملك وله الحمد، افتكر، افتكر يا أحمد أن اللي بيملك الرزق والملك وكل شيء في الدنيا ربنا، وأفعال الله كلها تستحق الحمد وصفات الله، هداية الله وهو على كل شيء قدير كيف تصرف عنه؟ كيف تؤفك عنه؟ كيف تنشغل عنه؟ ففعلاً تحقيق معاني الإيمان على بساطتها لكن عايزة مجاهدة.

يعني أنا مش متخيل النبي صلى الله عليه وسلم يبقى نايم في ظل شجرة، وبعدين يفتح عينه يلاقي واحد ماسك السيف وبيقول له: من يمنعك مني؟ فنفسه تقول له: الله. يعني إيه الرد الفعلي ده؟ قال له: الله. فقال له: من يمنعك مني؟ هو الثاني اتخض اللي ماسك السيف هو اللي اتخض مش النبي اللي اتخض، اللي ماسك السيف هو اللي اتخض: من يمنعك مني؟ قال له: الله، قالها ثلاثاً، فسقط السيف من يده. كلمة الله ديت اللي وقعت السيف من إيده، غير كلمة لما تصحى تلاقيه واقف تقول له: الله! قال لها دي إيه؟ غير الله اللي وقعت، يعني إيه؟ الله ديت دي خارجة من قلب يعلم الله عز وجل، معرفة الله عز وجل. فكلمة المعاني الجميلة اللي في أول السور دي، واللي في أغلب السور المكية وإن كانت السورة دي مدنية: ﴿هُوَ الَّذِي خَلَقَكُمْ﴾، والذي يعلم هذه المعاني حتى تستقر في قلوب الصحابة جاهدوا أنفسهم سنوات، وقاموا بها وكابدوها وكرروها. فالقرآن يا جماعة نزل ليتخلق به، يعني مش نقعد نقول له الملك ويبقى اللام والهاء والميم ده الكلام عشان تبدأ تفهم، لكن مش ده الأصل، الأصل أنك تعرف أنك ماشي في الشارع وعارف أن يملك نواصي الله. أنك وأنت بتسمع زي ما قلنا في سورة المنافقون المرة اللي فاتت تسمع أخبار، هيعملوا أزمة اقتصادية عشان يضيقوا على الإسلاميين ويمنعوا المسلمين، تقول إيه؟ ﴿وَلِلَّهِ خَزَائِنُ السَّمَاوَاتِ وَالْأَرْضِ﴾ [المنافقون: 7]. ده هيعملوا مش عارف إيه تقوم أنت تقول إيه؟ ولله، كل ما يقولوا لك حاجة أنت متصل قلب متصل بالله، كل ما يسمع خبر فيه أراجيف قلب متصل بالله.

كتير نماذج، يعني نماذج مثلاً زي سيدنا إبراهيم وسيدنا هود والنبي صلى الله عليه وسلم أو جريج، لما قالوا له: دعوني أصلي ركعتين، القلوب اللي متصلة بالله دخلت فيها هذه المعاني: له الملك وله الحمد وهو على كل شيء قدير. فالشاهد أن فعلاً على قدر استقرار المعنى ده في قلبك على قدر عدم توقفك عن التسبيح، هي جت بصيغة المضارع ﴿يُسَبِّحُ لِلَّهِ﴾، على قدر استقرار معنى ﴿لَهُ الْمُلْكُ وَلَهُ الْحَمْدُ وَهُوَ عَلَىٰ كُلِّ شَيْءٍ قَدِيرٌ﴾. ليه اللي يستقر في قلبه ﴿لَهُ الْمُلْكُ وَلَهُ الْحَمْدُ وَهُوَ عَلَىٰ كُلِّ شَيْءٍ قَدِيرٌ﴾ مش هيبطل تسبيح؟ ليه؟ لأن طول ما هو ماشي عمال يشاهد أفعال الله، هو خرج من المسجد لقى واحد بيركب تاكسي، شوف تقدير ربنا اللي جاب ده لده، سبحان الله. أحوال سقوط ورقة، حياة واحد، نجاة واحد، مرض واحد، إنقاذ واحد، هلاك إنسان، ﴿هُوَ يَعْلَمُ كُلَّ يَوْمٍ هُوَ فِي شَأْنٍ﴾ [الرحمن: 29]، فما بيبطلش تسبيح، هو سبحانه وتعالى الذي له الملك وله الحمد وهو على كل شيء قدير.

هو سبحانه وتعالى الذي ﴿خَلَقَكُمْ﴾، اسم الموصول يفيد التعريف، تعريف بالله سبحانه وتعالى في صفة لا يشارك فيها، ولا يجترئ مجترئ على أنه يقول إنه يشارك الله فيها. ولو ادعى مدع أنه يشارك الله فليخلق ذباباً، بل فليجتمعوا حتى يخلقوا ذبابة ولن يستطيعوا، ضعف الطالب والمطلوب، ما قدروا الله حق قدره. ﴿هُوَ الَّذِي خَلَقَكُمْ﴾، فعلاً ودي بدأ القرآن بها، دي البداية أن تعلم. العجيب يا جماعة أن السورة دي سورة مدنية وبتتكلم في البدايات، فمن المعاني أن هذه البداية واخدة الطابع المكي، بتعلمك أوعى تنسى البدايات، أوعى تنسى المعاني الجميلة بتاعة أول الالتزام، أوعى تقول ياه الكلام ده أنا كبرت عليه. كان الصحابة، وسيدنا أبو بكر كان من تواضعه لما رأى أهل اليمن ورقة قلوبهم قال إيه؟ قال: هكذا كنا حتى قست قلوبنا. سيدنا أبو بكر بيقول هكذا، يا ريت الواحد قلبه يقسوا زي سيدنا أبو بكر، يا ريت يبقى قاسي، فبيقول هكذا كنا، ففيك دايما تذكر البدايات.

فالبداية دايما في علاقتك بالله، يعني أول علاقة لك مع ربنا أن هو خلقك، دي أول علاقة، وأول علاقة للكون كله مع ربنا أن ربنا أوجده، فدي البداية، أول علاقة بين الكون وبين ربنا أن ربنا خلقه. عشان كان الأب والأم سبب في الإيجاد مش في الخلق، سبب في الإيجاد، شوف كمية التوصية بهم قد إيه وأنك ما تقولش أف ولا أوه. طيب اللي خلقك بقى اللي جابك من لا شيء، اللي جاب الكون من لا شيء، يبقى شعورك تجاهه إيه؟ ده أنت لو واحد وداك السعودية وشغلك شغلانة بمرتب عالي بعشرين ألف ريال، فتفضل دايما تقول إيه أنا يعني اللي جابني المكان ده أنا لا يمكن أنسى فضله، اللي جابني المكان ده. طب اللي جابك في الدنيا اللي جابك أصلاً، اللي خرجك من الموت إلى الحياة، شعورك تجاهه إيه؟ دي نقطة ﴿هُوَ الَّذِي خَلَقَكُمْ﴾، افتكر شعورك بالله سبحانه وتعالى. النقطة التانية زي ما بنقول دي البداية ﴿اقْرَأْ بِاسْمِ رَبِّكَ الَّذِي﴾، أول حاجة خالص، أول حاجة في القرآن ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]، إشمعنى صفة الخلق هي البداية؟ زي ما نقول دي التي لا يجادل فيها أحد، لما تبدأ تتكلم مع حد عن ربنا، اتكلم عن صفة الخالقية، ﴿هُوَ الَّذِي خَلَقَكُمْ﴾.

العجيب أن ﴿فَمِنكُمْ كَافِرٌ وَمِنكُم مُّؤْمِنٌ﴾، وتقديم الكافر على المؤمن لكثرة الكفار، ﴿وَقَلِيلٌ مِّنْ عِبَادِيَ الشَّكُورُ﴾ [سبأ: 13]. فمنكم كافر، بعد أن خلقهم كفروا به، كفروا بخالقهم، يعني حاجة فيها تشنيع على الفعلة دي. يعني الواحد لما بيقعد طيب إزاي أكفرت بالذي خلقك؟ إزاي؟ ﴿قَالَ لَهُ صَاحِبُهُ وَهُوَ يُحَاوِرُهُ أَكَفَرْتَ بِالَّذِي خَلَقَكَ مِن تُرَابٍ ثُمَّ مِن نُّطْفَةٍ ثُمَّ سَوَّاكَ رَجُلًا﴾ [الكهف: 37]، إزاي؟ إزاي ده يبقى رد! ده أنت مجرم! يعني أنا عايز أقول كلمة تانية غير مجرم، يعني خلينا قمة الإجرام، أن أنت اللي خلقك تعمل معه كده تكفر به. ﴿هُوَ الَّذِي خَلَقَكُمْ﴾، لكن للأسف ﴿فَمِنكُمْ كَافِرٌ وَمِنكُم مُّؤْمِنٌ﴾.

لكن لا يخرج فعل من أفعالك عن علم الله، ﴿وَاللَّهُ بِمَا تَعْمَلُونَ بَصِيرٌ﴾، الإبهام اللي فيها ده كل أعمالك صغيرها وكبيرها، ظاهرها وخفيها ﴿بِمَا تَعْمَلُونَ بَصِيرٌ﴾، صيغة المضارع، ما فيش لحظة بتخرج عن رقابة الله، لحظة، سواء منكم من أسر القول، يعني إحنا عند ربنا الوقتي كلنا زي بعض. يعني الوساوس اللي جواك دلوقتي، يعني التفكير اللي شغال جواك يا محمد يا شريف، اللي شغال جواك الوقتي ده عند ربنا علانية زيه زي كلامي، مش معنى أن أنا بتكلم في الميكروفون أن ده يغطي على لا، ﴿سَوَاءٌ مِّنكُم مَّنْ أَسَرَّ الْقَوْلَ وَمَنْ جَهَرَ بِهِ وَمَنْ هُوَ مُسْتَخْفٍ بِاللَّيْلِ وَسَارِبٌ بِالنَّهَارِ﴾ [الرعد: 10].

خلق السماوات والأرض بالحق. بدأ الأول بخلق الإنسان، وبعدين جاء خلق السماوات والأرض. طبعاً خلق السماوات والأرض، الواحد نفسه يقابل ملحداً بس يكون صادقاً، ويحكي لي إيه اللي في دماغه؟ يعني كيف وصل العفن إلى دماغه؟ يشرح لي إزاي قدر يقول كده؟ ما بصش للسماء؟ ﴿أَوَلَمْ يَنظُرُوا فِي مَلَكُوتِ السَّمَاوَاتِ وَالْأَرْضِ﴾ [الأعراف: 185]؟ ما بصش مرة للسماء فوقهم كيف بنيناها وزيناها؟ ما فيش مرة، طب جت إزاي؟ خلق السماوات والأرض بالحق.

وصوركم فأحسن صوركم. لما جه الكلام عن الإنسان، حط ما بينه خلق السماوات والأرض؛ يعني قال خلقكم، وبعدين خلق السماوات، وبعدين رجع للإنسان تاني، وكأن الإنسان له كمال عناية وكمال اهتمام، لأن هو عليه التكليف؛ لأن ﴿إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَن يَحْمِلْنَهَا وَأَشْفَقْنَ مِنْهَا وَحَمَلَهَا الْإِنسَانُ﴾ [الأحزاب: 72]. فالإنسان مكرم من الله عز وجل لأنه هو اللي مكلف، ودائماً بنقول التكريم معه تكليف دائماً، التكريم والرفعة دائماً معها زيادة تكليف؛ يعني زي ما النبي صلى الله عليه وسلم يكرم، التكليف عليه أشد صلى الله عليه وسلم.

وصوركم فأحسن صوركم، يعني فعلاً العلاقة الجميلة ربنا اللي صورك. يا جماعة أنا عايزك تحس كده، تخيل كده ده الطفل الصغير أو الطفلة لما تجيب الصلصال وتقعد تشكل شكل أي شكل مثلاً؛ شكل لعبة، شكل حيوان من الحيوانات، أو شكل إنسان آلي، أو أي شكل يعني، تحس بالألفة بينه وبينها، يعني تحس هي اللي شكلته وإيه اللي عملته وحطت له إيدين، فلأن الواحد ربنا اللي صورني كده، حط لي عيني ومناخيري، هو اللي صورني هذه الصورة سبحانه وتعالى، وأحسن صوركم. أنت في أحسن صورة، واللي مش مصدق ينظر إلى البهائم، شوف إزاي ربنا صور الإنسان في أحسن صورة، وصوركم فأحسن صوركم.

طيب بعد فأحسن صوركم دي، وهل جزاء الإحسان إلا الإحسان؟ يعني هل جزاء الإحسان اللي ربنا هيقوله لك إلا أن أنت تحسن في معاملة ربنا؟ وإليه المصير، هتلف هتلف وهترجع له وهتُسأل عن النقير والقطمير، يعلم سبحانه وتعالى. يبقى رقم واحد خلقنا، وخلق السماوات والأرض، وبعدين صورنا في أحسن صورنا. كل ده مش الموضوع هنا؛ يعني في ناس كتير بتعترف لغاية الجزء ده، جزء أن هو خلقنا وخلق السماوات والأرض، لكن المترتب على ده إيه؟ ما بيفكرش بقى إيه اللي بعد كده، لأ احنا مش مخلوقين عبثاً.

التفكر الطبيعي في خلق السماوات والأرض أنك تقول ربنا ﴿مَا خَلَقْتَ هَذَا بَاطِلًا﴾ [آل عمران: 191]، يعني مش معقول أن ده معمول كده؛ يعني تخيل مثلاً أن واحد اشترى أرض خمسمئة متر وبناها، يقول لك دي عشان التعليم، وبنى مدارس ومعاهد وجامعات وجاب أحسن أساتذة في الدنيا، فتقول له أنت عملت كده ليه؟ يقول لك لأ من غير سبب، يعني اللي عايز يدخل يدخل، واللي يجيب مجموع يجيب واللي ما يجيبش مش مهم، واللي عايز يخرج في النص يمشي، أنت هتقول له إيه؟ إيه العبث اللي أنت بتعمله ده! ده عبث، اللي بيدخل ويخرج ده في الملاهي، وعوض الله مش فيه، مش في ده عبث، ده حتى الملاهي ما ينفعش لو قطعت لازم بتكمل اللعب. يعني ده عبث فعلاً، ده الناس بتحترم ماتش الكورة عن كده شوية.

يعني أنت لو فعلاً رحت لفريقين بيلعبوا كورة وشلت الأجوان بتاعتهم، وبقى الملعب مربع وهم عمالين يجروا وخلاص؛ طب إحنا بنجري ليه؟ طب هنشوط فين؟ طب أنا أروح فين يعني؟ طب أنا عشان أجي أبقى كويس إزاي؟ طب أنا عايز أبقى كويس أعمل إيه؟ طب مين مع مين؟ طب مين فين؟ هو ده بالضبط اللي عايش من غير آخرة، طب أنت عايز إيه مش فاهم يعني، أنت عايز إيه يعني هي كده؟ يضرب اللي عايز يموت حد يمسكه يضربه وخلاص كده الموضوع خلص، ما فيش معقول ما فيش إزاي ما فيش آخرة إزاي ما فيش حساب، إزاي الأعمال دي ما بتتسجلش؟ ده عبث، حاشاه سبحانه وتعالى. يعني لو الحياة أن كل كلمة أنت قلتها ما اتكتبتش، ده يبقى عبث، وأن كل نظرة ما اتكتبتش، ده يبقى عبث. إحنا رحنا لبتوع كورة ولما شلنا الأجوان كان منظر عبث مضحك.

﴿أَفَحَسِبْتُمْ أَنَّمَا خَلَقْنَاكُمْ عَبَثًا﴾ [المؤمنون: 115]، ما هو لو أنت أفعالك عشان كده هنا قبل الكلام على البعث الكلام على العلم، شوف الترتيب، شوف إزاي لما تيجي تتكلم مع واحد توصل معه أنك تزنقه في البعث. ابدأ الأول أن ربنا غني، كده كده في إله ﴿وَيُسَبِّحُ لَهُ وَلَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ﴾ [التغابن: 1]، ده أمر مفروغ منه. اتنين له صفة لا يشارك فيها ولا يجادل فيها الخلق: ﴿أَرُونِي مَاذَا خَلَقُوا مِنَ الْأَرْضِ﴾ [فاطر: 40]، وريني أنت عملت إيه؟ يعني عملت إيه؟ شوفي دايماً اللي يدعي الألوهية الحق يقول له إيه دور ده في الخلق؟ يعني اللي يتكلم عن سيدنا عيسى ويرفعه فوق منزلته فوق العبودية، والمسيح لا يستنكف عن العبودية سبحانه وتعالى عن عبوديته للملك سبحانه وتعالى، هو عبد، ونبينا محمد صلى الله عليه وسلم عبد وقال: «إنما أنا عبد»، وهذا شرفهم.

فالشاهد إيه دور من تدعون له الألوهية في الخلق؟ يعني المسيح عليه وعلى نبينا أفضل الصلاة وأتم التسليم إيه دوره في الخلق؟ عمل إيه؟ يعني النجوم هو اللي خلق النجوم وحد تاني خلق الأشجار؟ عمل إيه؟ إيه دوره في الخلق؟ يبقى البداية الله عز وجل هو الإله سبحانه وتعالى، رقم اتنين صفة الخلق، العلاقة الخاصة بين ربنا والإنسان، تلاتة بعدها على طول العلم. أن عشان كده تلاقي اللي عايز يهرب من بعض الحاجات ممكن ينكر أن ربنا يعلم الجزئيات، يقول لك لا ما هو مش معقول أن ربنا بيعلم الجزئيات.

عشان كده زي ما فصولك فصلت، قال لهم إيه؟ أن اللي معتقد أن ربنا ما بيعرفش أفعالكم ﴿ذَٰلِكُمْ ظَنُّكُمُ الَّذِي ظَنَنتُم بِرَبِّكُمْ أَرْدَاكُمْ﴾ [فصلت: 23]، عمل فيكم إيه؟ أرداكم، إحساسك أن كل أفعالك مش مراقبة ده يرميك في جهنم، ليه؟ لأن ده هيخليك أنك تعمل اللي أنت عايزه. ﴿يَعْلَمُ مَا فِي السَّمَاوَاتِ وَالْأَرْضِ﴾ [التغابن: 4] سبحانه وتعالى، دخل بقى إيه خطاب مباشر جوة نفسية الإنسان: ﴿وَيَعْلَمُ مَا تُسِرُّونَ وَمَا تُعْلِنُونَ وَاللَّهُ عَلِيمٌ بِذَاتِ الصُّدُورِ﴾ [التغابن: 4]. يعني قل أن يجتمع في آية واحدة في القرآن سطر وربع كده العلم تلات مرات، يعلم ما في السماوات والأرض، ويعلم ما تسرون، والله عليم، يمكن خبير، لأ العلم يتكرر تلات مرات لأن ده اللي هيترتب عليه الحساب، ده اللي هيترتب عليه الحساب.

ما هو لو اللي أنت عملته ضاع يعني حاشاه سبحانه وتعالى ما فيش حاجة اسمها الأوراق اتسرقت والصحف ضاعت، ما فيش الكلام ده، أو حد طلع على عربية وهي بتنقل الأوراق الخطرة ما فيش الكلام ده، اتحرقت طعمها، ما فيش فهندي للطلبة كلهم بقى الدرجة النهائية وخلاص عشان ما حدش يرفع قضية، ما فيش الكلام ده عند ربنا حاشاه، لا يضل ربي ولا ينسى سبحانه وتعالى. قال: ﴿فَمَا بَالُ الْقُرُونِ الْأُولَىٰ﴾ [طه: 51]؟ أنت عايز تقنعني أن كل ده موجود ومكتوب هيتحاسبوا، قال له في كتاب عند ربي، ومش الكتاب عشان لا يضل ربي ولا ينسى سبحانه وتعالى. فالشاهد يعلم ما في السماوات والأرض ويعلم ما تسرون والله عليم بذات الصدور.

شف آية التنقل في الخطاب، يا ريت نرجع للخطاب الدعوي ده، يا ريت كلامنا مع الناس يرجع للخطاب ده كلام عن الله، المبادئ العامة للدين؛ الله الذي خلق، الله الذي يعلم أفعالنا، الله الذي يكتب أفعالنا علينا، الله الذي إليه المصير سوف يحاسبنا عليه بس. يعني يا ريت في أي برنامج توك شو قبل الحلقة نقول له بس أنا عايز أقول لك عايز أقرأ عليك أربع آيات من سورة التغابن، اسمح لي بس أقرأ عليك عشان بس الحلقة ديت هتتسجل وهنتسأل عليها كل كلمة عند ربنا سبحانه وتعالى، الخطاب ده ربنا يعلم كل كلمة ويعلم ما تسرون وما تعلنون والله عليم بذات الصدور.

بعد الإقرار هذه البداية اللي المفروض زي ما قلنا حتى تستقر في القلوب، الإنسان بيجاهد نفسه أن المعاني دي يعني الآيات دي تعيدها، عيدها عشرات المرات وأنت بتصلي. تخيل لو أنت ماشي وبقى عندك عقيدة أن الله عليم بذات الصدور، هتيجي تنام أحلام اليقظة بقى، هتنتفض وتقوم وتتفل عن يسارك ثلاثاً وتتوضأ، ليه؟ عليم بذات الصدور، وتقول له يا عليماً بذات الصدور اعف عني، ويعلم أنت فكرت في إيه وخواطرك راحت فين؟ يعني حتى شوف علو الهمة في الصورة، يعني حتى خواطرك لا تغبن فيها، ما هو اللي بيجيله وسوسة من الشيطان لمعصية، ثم يدافعها ويدفعها بتوفيق من الله، ده بياخد عليها ثواب.

﴿إِنَّ الَّذِينَ اتَّقَوْا﴾ [الأعراف: 201] من سمات أهل التقوى إذا مسهم طائف، لسه بيحاول يلف عشان يرمي المعصية جوة قلبه، لسه الشيطان بيلف عشان يقنعه بيلف طايف لسه بيطوف حوالين دماغه عشان يقنعه بالمعصية، ﴿إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا فَإِذَا هُم مُّبْصِرُونَ﴾ [الأعراف: 201]. مدافعة الخواطر، الإنسان لا يغبن في خواطره، خواطرك تجاه الشهوات، خواطرك تجاه إخوانك، أحياناً الشيطان يبات مع واحد ليلة كاملة، ينفع اللي فلان عمله فيك ده؟ طب ودي أخلاق؟ طب وده دين؟ ويقعد بقى إيه يصور لك منظره في الحلم وأنت نازل فيه ضرب وبتفرغ غلك فيه في البتاع، وبعدين تقوم وتضربه طول الليل تقعد تضرب فيه وتشتم وتقابله تبقى يعني الشيطان ضخم الموضوع جواك، دافع والشهوات الشيطان يسرح بالإنسان فمدافعة الخواطر عن طريق عقيدة والله عليم بذات الصدور.

﴿أَلَمْ يَأْتِكُمْ نَبَأُ الَّذِينَ كَفَرُوا مِن قَبْلُ فَذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ﴾ [التغابن: 5]، ربنا قال في أول السورة الناس فريقين لا ثالث لهما، فمنكم كافر ومنكم مؤمن، يعني يوم القيامة فيه جنة وفيه نار بس، ما فيش حاجة تانية، يعني يوم القيامة فيه جنة وفي نار، ما فيش مثلاً أماكن استراحة مش عارف إيه، هي جنة يا نار. حتى اللي على الأعراف ما قالهم أغلب العلماء إلى الجنة يعني ما فيش حاجة اسمها أنك تفضل في النص، يا جنة يا نار، الصحائف يا حسنات يا سيئات.

طيب الكلام عن الكفار لأن هو بدأ بالكلام عن الكفار قال فمنكم كافر، فبدأ بالكلام على الكفار، يعني الصورة قالتها منكم كافر ومنكم مؤمن، طب الكلام على الكفار ليه وصلوا للكفر؟ وأهل الإيمان عملوا إيه وإزاي أن هم يحافظوا على الإيمان؟ فبدأ بالكلام على الكفار، وبعض المفسرين قال بدأ بالكلام على الكفار في الأول فمنكم كافر وفي الخطاب عنهم زي ما قلنا لأنهم أكثر الخلق، ﴿وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ﴾ [الأنعام: 116].

ألم يأتيكم نبأ الذين كفروا من قبل؟ أنت مختار الطريق ده ليه؟ أنت ماشي في السكة دي ليه؟ أنت ما شفتش اللي قبلك حصل لهم إيه؟ أنت ما شفتش اللي عنده ربنا واللي حاربه ربنا حصل لهم إيه؟ ﴿فَذَاقُوا وَبَالَ أَمْرِهِمْ﴾ [التغابن: 5]، الوبال العذاب الثقيل، العاقبة الثقيلة، ده شايل شلة إيه واقف فين! يحارب الله، يعني الواحد لما بيسمع اللي بيروي عن ابن عباس اللي هو يقال المرابي يوم القيامة: خذ سلاحك واستعد للحرب، فيقول مع من؟ فيقال له مع الله، وقعها إيه على قلبه؟ يعني واقعها إيه؟ يعني تتخيل ولله المثل الأعلى ده أنت لو في مكان ودخل عليك مخلوق من مخلوقات الله، دخل عليك أسود مثلاً تلات أسود، يقول لك يلا استعد عشان تحارب الأسود دي، هتستعد إزاي؟ أنك هتنام على الأرض.

يا جماعة لو سمحت بسرعة، ومن غير تخويف، آه عشان بس إيه الموضوع ما يبقاش فيه، هتعمل إيه يا تخيل اللي بيقول له خذ سلاحك للحرب مع الله، ده ينهار يعني فعلاً أنت لو اتقال لك هيدخل عليك أسود أنت بتنهار، قوتك بتنهار، ﴿فَذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ﴾ [التغابن: 5]. ذلك قيل أي كفرهم مش عذابهم، يعني إزاي وصلوا، إزاي واحد وصل أنه للمرحلة دي؟ ﴿ذَٰلِكَ بِأَنَّهُ كَانَت تَّأْتِيهِمْ رُسُلُهُم بِالْبَيِّنَاتِ فَقَالُوا أَبَشَرٌ يَهْدُونَنَا فَكَفَرُوا وَتَوَلَّوا﴾ [التغابن: 6]. يبقى إيه سلسلة؟ أغلب البشر صعب على البشر أن يحس أن فيه بشر أحسن منه، ودي دايماً عذر متكرر على لسان أقوام الرسل، ﴿أَنُؤْمِنُ لِبَشَرَيْنِ مِثْلِنَا وَقَوْمُهُمَا لَنَا عَابِدُونَ﴾ [المؤمنون: 47]، ﴿أَبَشَرًا مِّنَّا وَاحِدًا نَّتَّبِعُهُ﴾ [القمر: 24]، ده إحنا كده لقينا إيه ده إلا في ضلال وسعر، بيقولوا يعني، يعني أنت واحد زيي زيه يبقى نبي؟ يعني هو بيقيسها كده فقالوا ﴿أَبَشَرٌ يَهْدُونَنَا﴾ [التغابن: 6] أنت عايز تهديني؟ أنت اللي معي امبارح وأول امبارح ومن بني قومي عايز أبشر أن يهدوننا، يعني شوف كلمة إيه؟ أنت عايز تهديني أنا؟

شوف الكبر، يا ريت الواحد يسمع اللي يقول له كلمة ﴿وَاهْدِيَكَ إِلَىٰ رَبِّكَ﴾ [النازعات: 19]. يا ريت واحد يقابل، يا ريت أنك تقابل واحد يقول لك: ﴿هَل لَّكَ إِلَىٰ أَن تَزَكَّىٰ * وَأَهْدِيَكَ إِلَىٰ رَبِّكَ فَتَخْشَىٰ﴾ [النازعات: 18-19]، يا ريت هو فين ده وإحنا نسافر له؟ هو فين؟ ده الإنسان المؤمن يعني لما يسمع كلمة واحد يقول له وأهديك إلى ربك تقول له أنا معك. يا جماعة سيدنا موسى نبي كليم الله، يعلم الناس لما سمع أن فيه واحد هيوصله حتة زيادة عند ربنا ساب كل حاجة وسافر لمجمع البحرين وقال له أنا تابع.

أنا خدام، أنا معك. قال له: تمشي معي؟ ما تسألش. قال له: مش هسأل. طالما هعرف عن ربنا ساب كل حاجة. ما فيش المشاكل زي ما اتكلمنا في مسألة التربية النفسية، ما فيش المشاكل النفسية. كليم الله الخضر يعلمني؟ ما قالش كده عليه وعلى نبينا أفضل الصلاة وأتم التسليم. راح لا فكر، قال له: أين هو يا رب؟ دلني عليه.

لما سئل موسى: هل في الأرض أعلم منك؟ قال: لا. فعاتب الله عليه؛ ألم يرد العلم إليه؟ وقال: بلى، عبدي فلان أعلم منك في مسألة من المسائل. فما قالوش: دلني عليه هو فين يا رب وأنا أروح له؟ ده السؤال الطبيعي.

أبشر يهدوننا فكفروا وتولوا. دي المراحل؛ إنه لما أعرض عن الآيات، ولما كفر بعد قوي بعيد، وتولوا. واللي ربنا يبعث له آية وراء آية ويعرض عنها، ربنا بيستغني عنه، واستغنى الله والله غني حميد. زعم الذين كفروا أن لن يبعثوا. إيه علاقة ده بالأذان؟ محمد صلى الله عليه وسلم. إيه علاقة إنه قال: أبشر يهدوننا بأنه ينكر البعث؟ يبقى هو كان بيحتال. كلمة ﴿زَعَمَ الَّذِينَ كَفَرُوا أَن لَّن يُبْعَثُوا﴾ [التغابن: 7] فجأة دي، بعد ما قالوا أبشر، يعني هو لما جه ينكر الرسالة حاول يجيب لها عذر. إيه الأصل؟ ده بشر، وما ينفعش إنه يبقى بشر. وبعدين فجأة لقى ما فيش بعث. طيب ليه ما فيش بعث؟ يعني لو جه رسول تاني هتؤمن بالبعث؟

يا جماعة، المشكلة الحقيقية للكفار هي مع يوم القيامة، مش مع النبي صلى الله عليه وسلم ولا مع أي حاجة. هي مشكلتهم مع يوم القيامة، مش مع أي حد تاني، مشكلتهم على اليوم الآخر. لكن هو بيحطها في أي حاجة ويحاول يخرج منها بأي حاجة، هي مشكلته. والكافر هنا يعني الصورة اللي قبلها اللي قبل المنافقون سورة الجمعة؛ اليهود بيلفوا ويدوروا. هو عايز يعصي براحته، مش عايز يبقى ملزم وإن حد يحاسبه على شهواته. فحفظ التوراة صم في بيت العبادة، وخرج عمل اللي هو عايزه. قالوا له: إيه ده؟ قال لهم: لا لا لا، دي حاجة اسمها العلمانية، يعني دي حاجة حلوة، أه دي حاجة جميلة جدا، إن أنت يعني الدين في دور العبادة وبرة تعمل اللي أنت عايزه.

الكفار كانوا صريحين، قالوا ما فيش بعث. ليه ما فيش بعث يا ابني؟ عشان أعمل اللي أنا عايزه؛ ما هو لو فيه بعث يبقى أنا هتسأل، ولو هتسأل يبقى هتتحاسب، ولو هتتحاسب يبقى أنا لازم آخد بالي من أفعالي، خدت بالي من أفعالي يبقى أنا مش هعمل اللي أنا عايزه. السلسلة دي قطعها منين؟ ما فيش بعث. خلاص ما فيش بعث. أغلب الناس دلوقتي في عصرنا ظاهرياً بيقولوا إن فيه بعث. أغلب العالم يعني مش قصدي المسلمين، أغلب العالم حتى لو ظاهرياً بيقول على نفسه يهودي أو نصراني، لكن هو ما بيفكرش في البعث. بالعكس، اللي بيتكلم على الموت دلوقتي مجرم، وإنسان كئيب، وإنسان ممل ومش عايز الحياة تتقدم، وإنسان متخلف، ده الإنسان اللي بيتكلم عن الموت، الإنسان اللي بيتكلم عن البعث، الإنسان اللي بيتكلم عن الحساب، الإنسان اللي بيتكلم عن الغيب. دلوقتي فيه صراع بين التقدم العلمي الغربي وبين البعث، صراع رهيب، وبيستعملوا كل ما أوتوا من قوة لصرف الناس عن البعث، عن التفكير في البعث. فكلمة لن يبعثوا، هذا الزعم بيحاول يمرر للناس حقنة التخدير دي اللي تخليه يعمل اللي هو عايزه.

لما قالوا أبشر يهدوننا ما كانش فيه رد، ربنا قال إيه؟ واستغنى الله. لما قالوا لن يبعثوا كان الرد صارم: ﴿قُلْ بَلَىٰ وَرَبِّي لَتُبْعَثُنَّ ثُمَّ لَتُنَبَّؤُنَّ بِمَا عَمِلْتُمْ﴾ [التغابن: 7]. هم قالوا إيه؟ أنكروا البعث. لما جه الرد جه بالقسم: ﴿لَتُبْعَثُنَّ ثُمَّ لَتُنَبَّؤُنَّ بِمَا عَمِلْتُمْ﴾ [التغابن: 7]. طب هو كان بيتكلم على البعث بس، ما اتكلمش على مسألة إنه ينبأ بما عمل، ليه ربنا قال له كده؟ لأنه أنكر البعث عشان مش عايز يتحاسب على اللي عمله. عارف أنت لما واحد خايف يسقط، فيقول لك ما فيش امتحان، فتقول له: والله فيه امتحان وهتسقط، هو ما اتكلمش عن السقوط، هو خايف يسقط فبيقول: ما فيش امتحان، الامتحانات اتلغت ما عادش فيه امتحانات. فتقول له: والله فيه امتحانات وهتسقط، أنت جبت له الحتة اللي هو عايز يهرب منها. ﴿وَرَبِّي لَتُبْعَثُنَّ﴾ [التغابن: 7] وهات كل حاجة عملتها، ﴿وَاللَّهُ بِمَا تَعْمَلُونَ بَصِيرٌ﴾ [التغابن: 7] كل حاجة عملتها هتنبأ بها، وهتتسأل عليه، وهتتفضح. وخد بالك، حاجة بسيطة جداً ﴿وَذَٰلِكَ عَلَى اللَّهِ يَسِيرٌ﴾ [التغابن: 7]. ده زيادة في الضغط النفسي، يعني الموضوع أسهل مما تتخيل؛ ﴿إِنَّمَا بَعْثُكُمْ كَنَفْسٍ وَاحِدَةٍ﴾ [لقمان: 28]، أنت فاكر إيه؟ ﴿وَذَٰلِكَ عَلَى اللَّهِ يَسِيرٌ﴾ [التغابن: 7].

فطالما عرفت ذلك فآمنوا بالله ورسوله والنور الذي أنزلنا، والله بما تعملون خبير. تكرار إن والعلم مليان في السورة، كل أفعالك ربنا يعلمها وتتسأل عنها عشان تعيش، ما تخسرش لحظة في حياتك في طاعة ربنا. ﴿يَوْمَ يَجْمَعُكُمْ لِيَوْمِ الْجَمْعِ﴾ [التغابن: 9]. يا رب استر يا رب. ﴿ذَٰلِكَ يَوْمُ التَّغَابُنِ﴾ [التغابن: 9]. يوم القيامة له أسماء كتير في القرآن، هنا سمى ﴿ذَٰلِكَ يَوْمُ التَّغَابُنِ﴾ [التغابن: 9] أي ذلك اليوم يغبن الناس فيه. وكأن معنى الآية بصورة الحصر والقصر دي: ده اليوم الوحيد اللي فيه خسارة. قال لها: إزاي؟ ده أنا يوم كذا خسرت مليون جنيه، ولا يسووا حاجة بالنسبة لخسارة يوم القيامة، ده فلان خسر ثلاثة مليار جنيه ولا يساوي حاجة يوم القيامة، ده فلان خسر عشرة مليار دولار ولا يسوى حاجة بالنسبة ليوم القيامة، ده فلان سقط وترفد، وليس هو حاجة في خسارة يوم القيامة. ﴿انظُرْ كَيْفَ فَضَّلْنَا بَعْضَهُمْ عَلَىٰ بَعْضٍ وَلَلْآخِرَةُ أَكْبَرُ دَرَجَاتٍ﴾ [الإسراء: 21]، الفوارق بالنسبة للآخرة مبهرة.

ذلك يوم يعني إيه تغابن بقى؟ يعني إيه تغابن؟ التغابن، عشان أديك مثال له كده تبقى فاهم يعني إيه واحد غبن في حاجة. واحد مثلاً معه عربية بي إم، وراح لواحد صاحبه لقى معه عربية 127 صغيرة كده، لقاها عمالة تدخل ما بين العربيات وصغيرة كده وتطلع على الرصيف وتركن عربية زرقاء كده. فجه قال له: بقول لك إيه، إيه رأيك تديني العربية بتاعتك؟ افتح البي إم، راح للـ 127 قال له: إيه رأيك نبدل؟ بتاع الـ 127 لقى قدامه هبال، قال له: لا لا لا لا، لا يمكن، ما فرطش فيها أبداً. قال له: طب عشان خاطري. قال له: طالما حلفت ماشي. بتاع الـ 127 إيه! طبعاً بيفاجأ بقى يعني آه، دي مش عربية هو يفاجأ إن اللي كان سايقها ما لهاش علاقة يعني، إن ده اسمه وده إن ده كائن وده كائن يعني. فيجي يمشي فلقى حاجات غريبة وأصوات عجيبة وطريقة عجيبة يا فندم. في ناس تقول له: أنت عملت إيه؟ يحس بالحسرة يا جماعة، بيحس. والله أنا هقول لك على حاجة، انسى الأمثلة الضاحكة دي وهات أي مثال بيحصل في حياتك؛ أنت لو معك موبايل بألف جنيه وبعته بتسعمئة بتتحسر، يا رب تتحسر بقهر، يا إحساس إن يتضحك عليك إحساس بايخ أوي.

الغبن في اللغة بيسموها الخسارة الفاحشة، عشان كده في الفقه يقولوا فيه حاجة اسمها أنواع الخيار. خيار يعني إيه في الفقه؟ يعني لو أنا وأنت اشتريت منك حاجة يقول لك العقد ده أنا مخير إن أنا أفسخه لو حصل بعض الحاجات. فيه حاجة اسمها خيار العيب مثلاً، إن لو طلعت سلعة معيوبة أنا مخير إن أنا أفسخ، قالوا لا أنا من حقي أرجع، النبي بيقول: «البيّعان بالخيار ما لم يتفرقا». فيقول لك النبي صلى الله عليه وسلم أعطاك فرصة، لو أنا قلت لك هات هشتري منك القلم ده، خد الفلوس بكام؟ بألف، أنا موافق، بس إحنا لسه قاعدين، أقول لك: لا لا، أنا ممكن أرجع في كلامي؟ من حقي أنا، أنا لي الخيار إن أنا أرجع، ده بيسموه خيار المجلس، لأن إحنا طالما لسه في المجلس. في حاجة اسمها خيار الغبن، أنا مخير إن أنا أفسخ البيع لو أنا اكتشفت إن أنا غبنت، لو السلعة بألف وأنت اشتريتها مني بتسعمئة وجيت قلت لك أنا غبنت، تقول لي: لا لا، أنت هنا ما لكش الخيار إنك تفسخ. إنما لو السلعة بألف وأنا غصب عني ما أعرفش اشتريتها مني بأربعمئة، أنا الشرع يديني الحق إن أنا أفسخ، ده بيسموه خيار الغبن، ما لكش الخيار ده إنك تفسخ العقد بتاع البيع إلا لو غبنت، مش لو خسرت، إلا لو غبنت، الغبن ده الخسارة الفاحشة.

عشان كده كان أحد الصحابة اسمه منقذ بن حبان كان أصيب في غزوة أحد على دماغه فجاله زي لوثة كده في الفكر، يعني ما كانش بيركز، فكان بيحب التجارة جداً، فما كان يروح يتاجر فكان يتضحك عليه. فيرجع للنبي صلى الله عليه وسلم، فأهله راحوا للنبي، قالوا له: عملوا حجر على منقذ، قالوا له: لا، ده ما عادش يبيع ولا يشتري لأن هو بيتضحك عليه، الحاجة بألف بيبيعها بمئة وهو مش مركز. فراح للنبي صلى الله عليه وسلم فقال له: «إذا جئت تبيع فقل: لا خلابة، ولي الخيار ثلاثة». لا خلابة يعني لا خداع، أي حد ييجي يشتري منك قبل ما يشتري قل له: لا خلابة ولي الخيار ثلاثة. يعني أنا بحذرك، ما تضحكش عليّ عشان أنا مش مركز وهرجع للنبي صلى الله عليه وسلم، لا خلابة ما تضحكش عليّ، ولو ضحكت عليّ أنا ثلاثة أيام من حقي أفكر وأستشير أهلي وأرجع، أنا اشترطت عليه.

الشاهد يعني المهم؛ الغبن ما يتسماش غبن غير لما تبقى خسارة فاحشة، إن زي ما بقول لك كده إن بي إم تبقى 127 خسارة كبيرة، إنما الألف جنيه! فيوم القيامة الخسارات مش بعد ما كان مثلاً هيقعد على رقم 44 هيقعد بقى على 45، لا، هناك الدرجات في الجنة مش مثلاً الدور الأول، الدور الثاني، الدور الثالث زي العمارة كده، لا، ما بين الدرجة والدرجة كما بين السماء والأرض، يعني الفروقات تقول يا نهار أبيض! يا ربي! يوم القيامة طول ما أنت قاعد تسمع كده، طول ما أنت قاعد يااه طول ما أنت قاعد، فيه إيه؟ شوف شوف يوم التغابن؛ لما ضيعت شوف شوف الفرق بقى إيه؟ كله ماشي بقى قاعد كله ماشي المسلم والكافر، الطائع والعاصي، كله ماشي يا نهار أبيض! يا كله ماشي إيه؟ عمال يتحسر. كله ماشي عمال يقول: ده أنا ضيعت! ده شوف الفرق في إيه؟ ده أنت عارف لو كانت الليلة دي قمت يا نهار، كله ماشي بقى بيعمل كده. عم يشوف بقى الثوابات، كله ماشي كده، ﴿ذَٰلِكَ يَوْمُ التَّغَابُنِ﴾ [التغابن: 9].

يبقى الغبن رقم واحد يبقى خسارة فاحشة، رقم اتنين: أن يكون عن خفاء وجهل. قالوا الغبن إن أنت تكون مش واخد بالك، إن اللي كان معه مش عارف قيمة البي إم، أو اللي معه حاجة قيمة هو مش عارف قيمتها فضيعها من غير ما يعرف. عشان كده النبي صلى الله عليه وسلم بيقول إيه: «نعمتان مغبون فيهما كثير من الناس». يعني كأن النبي عليه الصلاة والسلام بيقول: عارف أنت لما تنزل على أهل بلد كلهم معهم مرسيدس، عربيات مرسيدس، فكلهم زهقوا من مرسيدس، فنزلوا على ناس بقى معهم 127، 28، 29، 30، واحد معهم الأرقام دي، عايز إيه؟ حن زهق من الثاني، زهق من المرسيدس، فكل دول الناس اللي مش حاسة بقيمة اللي معها، يغبن بسهولة في اللي معه، مش عارف قيمته، هو مش فاهم قيمته، هي عشان كثيرة عنده مش فاهم، فواحد عنده أوقات كتير، مش فارق النهاردة الثلاث من الأربع، الصبح من بالليل، العصر من المغرب.

الشهر ده من اللي بعده مش فارق معه، الدنيا ماشية معه زي بعضها، الأيام عنده زي بعضها، وتلاقيه يقول لك: أنا زهقان أوي، مش عارف النهاردة أعمل إيه؟ يا ترى النهاردة أقضيه إزاي؟ أروح فين؟ تقول له إيه رأيك تعمل كذا؟ لأ، جربت إيه؟

يوم القيامة هيكتشف إنه كان معه زي اللي كان معه مليارات. عارف مثلًا بالظبط، واحد لو تخيل إن فيه ورقة، بلاش دم، يعني مليار دولار مثلًا، ورقة عملوا زي ما فيه ورقة مئة جنيه عملوا ورقة بمليار دولار. في واحد واخدها حاططها في جيبه، في واحد قال له: أنا عايز بس تكتب لي رقم فلان، قام مطلع الورقة أم مليار وكاتب له عليها رقم وقام ماديها له. شوف إحساسه لما يتقال له لما ييجي يروح يلاقي الورقة اللي كتب عليها الورقة أم إيه؟ اللي بيعمل كده يا جماعة، اللي بيضيع اللي عنده وقت فاضي وصحة ويضيعهم منه من غير ما يعمل طاعات، ده هيندم يوم القيامة، ده مش هيندم، ده مغبون، ما قالش خسران، النبي صلى الله عليه وسلم هنا ما قالش خسران، قال: مغبون؛ يعني كان معه مليارات، يعني خسارة فادحة، خسارة غير متصورة عن جهل.

اللي كل يوم بيقضيه في حتة عشان مش عارف الأيام يضيعها فين، اللي الصيف بيعدي عليه زهقان، عمال يدور يضيع الصيف فين، ده مغبون، والنبي صلى الله عليه وسلم يقول: «نعمتان مغبون فيهما كثير من الناس: الصحة والفراغ». عشان كده تجد الكلمة المشهورة عند العلماء يقول لك: أنا نفسي لو اللي قاعدين دول بيبيعوا أوقاتهم أشتريها منهم. والله لو بيبيع وقته مليون جنيه لأشتريها منه، لو كانت الأوقات تباع والله لو كنت اشتريتها. ففي واحد قاعد لو ما يعمل بها إيه؟ يا عم خدها بعشرة جنيه لو ينفع تتباع مش بمليون جنيه، هتعمل بها إيه يعني؟ مش قادر أفهم يعني، خد يا عم. هو التاني فاتح الأسبوع على بعضه أصلاً، يعني هو ما عندوش إيه، اللي عنده صحة وفراغ ويضيع من ده، الواحد لما سمع في صلاة المغرب قول الله عز وجل: ﴿لَّا خَيْرَ فِي كَثِيرٍ مِّن نَّجْوَاهُمْ﴾ [النساء: 114]. معظم قعداتنا هلس، معظم كلامنا في الفاضي، معظم أحاديثنا ما بتأكلش عيش. ربنا بيقول للنبي صلى الله عليه وسلم: معظم قعدات الناس ما تدخلهمش الجنة، وهيتحسروا عليهم القيامة. وأي مجلس بنقعد فيه ما بنذكرش فيه ربنا ولا بنصلي فيه على النبي صلى الله عليه وسلم إلا كان على صاحبه تِرة؛ حسرة، لمجلس كان ممكن يدخله الجنة وما دخلوش، هيندم يوم القيامة، حتى المؤمن، خد بالك، فيوم القيامة ده مليان حسرة ومليان ناس خسرانة، واكتشافات بقى؛ ياه!

يعني أنا المجلس ده لو كنت رحت قعدت مثلًا من المغرب للعشاء في المسجد أو قرأت أو قعدت -ودي طبعاً الواحد بيفوق نفسه يعني- ياه! يعني تلات أرباع ساعة اللي بعد الفجر كانت بحجة وعمرة؟ ياه! ده أنا غُبِنت غَبنًا، عشان كده ابن عمر لما جا له أحد الناس بينقله عن أبي هريرة حديث النبي صلى الله عليه وسلم، ونختم بالحديث ده نكمل بعد الصلاة، لما قال له حديث النبي صلى الله عليه وسلم: «من صلى على جنازة كُتب له قيراط، ثم من تبعها حتى تدفن كُتب له قيراطان»، يعني اللي يصلي عليها ويشيعها له قيراطان، القيراط مثل جبل أحد. ابن عمر لما سمع الحديث ده انزعج، تضايق، ورجع إلى أبي هريرة: ارجع له تاني، قُل له أنت متأكد؟ وقعد طول ما اللي بعته يروح يسأل أي أحد، متضايق، ماسك حصى وعمال يخبطه في الأرض، قاعد متضايق، فلما رجع قال له آه، بيأكد إنه، فغضب ابن عمر وقال: كم فرطنا من قراريط!

حاسة أنا عايزك بقى تتخيل، تخيل كده كل جنازة معدية جبل ماشي، جبل حسنات ماشي، جبل، كل حاجة اتعامل معه كده، شوفها بمشهدها الحقيقي، هتحس قد إيه إحنا بنُغبَن. كل فقير كان فرصة، كل مجلس طاعة كان فرصة، كل ليلة كانت فرصة، كل فرض كان فرصة، كل مريض تزوره كان فرصة، كل حاجة كانت بتعدي عليك تاخد منها ثواب كانت فرصة، بس إحنا اللي بنضيعها وبنُغبَن فيها. أسأل الله عز وجل أن يستعملنا في طاعته، أقول قولي هذا وأستغفر الله لي ولكم، وأقم الصلاة، نكمل بعد الصلاة بإذن الله عز وجل.

الحمد لله وحده، والصلاة والسلام على من لا نبي بعده محمد صلى الله عليه وسلم. توقفنا عند قول الله عز وجل: ﴿يَوْمَ يَجْمَعُكُمْ لِيَوْمِ الْجَمْعِ ذَٰلِكَ يَوْمُ التَّغَابُنِ﴾ [التغابن: 9]. كلمني عن الغبن، ومن معاني الغبن قلنا إن الغبن ده الخسارة الفاحشة اللي بتبقى نتيجة خفاء على الإنسان وجهله بقيمة اللي معه. فالإنسان بيقبل في الحاجة لما يبقى مش في دماغه، مش فاهم قيمتها، مش عارف قيمتها، ﴿ذَٰلِكَ يَوْمُ التَّغَابُنِ﴾. طب أعمل إيه عشان ما أُغبَنش؟ ﴿وَمَن يُؤْمِن بِاللَّهِ وَيَعْمَلْ صَالِحًا يُكَفِّرْ عَنْهُ سَيِّئَاتِهِ وَيُدْخِلْهُ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا أَبَدًا ۚ ذَٰلِكَ الْفَوْزُ الْعَظِيمُ﴾ [التغابن: 9]. أي ذلك فقط هو الذي يستحق تسمية الفوز العظيم، وما سواه لا يستحق هذا الاسم، وما سواه الفوز يوم القيامة ما يستحقش اسم الفوز العظيم.

والسورة مليانة عمل، وكأن بعد سورة سورة التغابن مليانة عمل، وكأن بعد سورة الصف والجمعة أكتر سببين يفرقوا تجمعنا وصفنا، الصف والجمعة، أكتر سببين، رقم واحد المنافقين اللي في الصف، رقم اتنين قلة العمل والجلسات اللي كلها مغبونة. هذه الجلسات كفيلة يا تهد الصف، قلة العمل الصالح تهد أي صف وتفرق أي تجمع. عشان كده يقول نبيه صلى الله عليه وسلم: «ما غضب الله على قوم إلا أعطاهم الجدل ومنعهم العمل». فعلاً التغابن، إن أنت أي مجالس فيها غبن مع إخوانك، اعرف إن المجلس ده هيقلب بمشكلة، لازم هيفرق، ﴿الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ﴾ [الزخرف: 67]. كلما قلت التقوى في تجمع دخل فيه المشاكل. طيب ﴿وَالَّذِينَ كَفَرُوا وَكَذَّبُوا بِآيَاتِنَا أُولَٰئِكَ أَصْحَابُ النَّارِ خَالِدِينَ فِيهَا﴾ [التغابن: 10]. ربنا جاب أعلى غبن هنا وأعلى كسب هنا، أعلى كسب هنا اللي هو إيه ﴿يُدْخِلْهُ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا أَبَدًا ۚ ذَٰلِكَ الْفَوْزُ الْعَظِيمُ﴾، في النار ﴿وَالَّذِينَ كَفَرُوا وَكَذَّبُوا بِآيَاتِنَا أُولَٰئِكَ أَصْحَابُ النَّارِ خَالِدِينَ فِيهَا﴾، أعلى غبن هنا وأعلى غبن هنا.

طيب، يبقى إحنا قلنا في الغبن حاجتين: خسارة فاحشة وفيها خفاء. النقطة التالتة في الغبن صيغة التغابن، ما قالش ذلك يوم الغبن، قال ذلك يوم التغابن. ليه اتسمى اليوم يوم التغابن؟ ما تسماش يوم الغبن؟ مع إن الكلمة في اللغة المصدر أصلها كلمة الغبن، إحنا قلنا الإخوان بيسموا كلمة الخيار الغبن، ليه ما قالش يوم الغبن؟ قالوا صيغة التغابن دي صيغة تفاعل يعني تشارك بين اتنين، يعني تقول لك تقاسم فلان وفلان، يعني فيه حاجة اشتركوا فيها، تشارك فلان وفلان، تسارع فلان وفلان، زي التشارك بين اتنين. فالتغابن إن مش فيه واحد هو اللي خسر وخلاص لأ، ده فيه واحد هو اللي كسبه، زي اللي دخل الراجل بتاع البي إم والسبعة وعشرين، حصل بينهم تغابن، واحد خد حاجة كبيرة قوي وواحد خد حاجة صغيرة قوي. فاللي بيحصل إن لكل إنسان منزل في الجنة وفي النار، كل واحد فينا له منزل، له مكان في الجنة وله مكان فين؟ في النار. لو أطاع الله عز وجل يدخل منزله اللي في الجنة، وواحد تاني من العصاة يدخل مكانه اللي في النار، فأنت دخلت الجنة، أهل الجنة كده أخدوا أماكنهم اللي في الجنة، وهيلاقوا أماكن فاضية، الأماكن دي كانت بتاعة مين؟

بتاعة اللي كانوا في النار، والناس اللي في النار دخلوا النار هيلاقوا فيها أماكن فاضية، الأماكن الفاضية دي بتاعة مين؟ يدخلوا اللي في الجنة، فيقوم أهل الجنة يرثوا أماكن بتوع النار. أي خسارة هذه؟ عشان كده في أكتر من أثر وحديث للمعنى اللي قاله بعض السلف قدام أحد المعاني في يوم التغابن، عشان كده بيقولوا في القبر بيفتح للطائع النار ويقول له: هذا منزلك من النار، ده منزلك ده بتاعك، ده باسمك، هذا منزلك من النار كنت لو كنت عصيت الله. والعاصي اللي يخش النار يتفتح له باب في الجنة ويقول له: هذا منزلك، بيحسره بقى، هذا منزلك من الجنة لو كنت أطعت الله. فلما ييجي واحد في الجنة يقول له الحتة اللي جنبك، الأرض اللي جنبك دي، مالها؟ خُد! بجد؟ آه، ليه دي بتاعة فلان اللي في النار بقت بتاعتك أنت. فشف بقى إيه، ففعلاً أهل النار فما ربحت تجارتهم. يعني مش كده تلاقي الفوز والبيع والشراء كتيرة مع أهل الجنة ومع أهل النار، ﴿وَمِنَ النَّاسِ مَن يَشْرِي نَفْسَهُ ابْتِغَاءَ مَرْضَاتِ اللَّهِ﴾ [البقرة: 207]، هل أدلكم على تجارة تنجيكم؟ التانيين برضه اشتروا الضلالة بالهدى والعذاب بالمغفرة، ﴿فَمَا أَصْبَرَهُمْ عَلَى النَّارِ﴾ [البقرة: 175].

﴿مَا أَصَابَ مِن مُّصِيبَةٍ إِلَّا بِإِذْنِ اللَّهِ ۗ وَمَن يُؤْمِن بِاللَّهِ يَهْدِ قَلْبَهُ ۚ وَاللَّهُ بِكُلِّ شَيْءٍ عَلِيمٌ﴾ [التغابن: 11]، تاني العلم معانا. ﴿وَأَطِيعُوا اللَّهَ وَأَطِيعُوا الرَّسُولَ ۚ فَإِن تَوَلَّيْتُمْ فَإِنَّمَا عَلَىٰ رَسُولِنَا الْبَلَاغُ الْمُبِينُ﴾ [التغابن: 12]. الآية دي بتاعة المصيبة ﴿مَا أَصَابَ مِن مُّصِيبَةٍ﴾، إيه سبب مجيئها في سورة التغابن؟ من المعاني إن القرآن دلوقتي بيعلمك في السورة دي إنك ما ينفعش تُغبَن في أي مجلس وفي أي قعدة، وفي خواطرك ما ينفعش تُغبَن، يعني كل حاجة من الحاجات دي تطلع بها بحسنات، كل مريض ده فرصة للحسنات، كل جنازة فرصة للحسنات، كل واحد صديقك ده فرصة للحسنات.

افرض واحد جت له مصيبة، المصيبة فرصة للحسنات، اللي يطلع من سورة التغابن المصيبة بتتحول عنده إن هي فرصة إنه يقول ﴿إِنَّا لِلَّهِ وَإِنَّا إِلَيْهِ رَاجِعُونَ﴾، فيأخد بقى رحمة من ربنا سبحانه وتعالى وهداية من ربنا سبحانه وتعالى. يعني لا تتمنوا لقاء العدو، ما حدش يتمنى البلاء، ربنا يشفي مثلًا الأطفال، لو واحد ابتلي وابنه مات، بتبقى صعب جداً، المفروض ما يعديش البلاء ده من غير بيت الحمد، زي ما النبي صلى الله عليه وسلم يقول: يقول الله عز وجل إذا قبضت الملائكة ولد فلان ابنه، فيقول الله عز وجل لملائكتي: يا ملائكتي هل قبضت ولد فلان؟ فيقولون: نعم يا رب. فيقول الله عز وجل: هل قبضت ثمرة فؤاده؟ اللي بيحبه أوي، فيقولون: نعم يا رب. فيقول الله عز وجل لملائكته وهو أعلم: ماذا قال عبدي؟ قال إيه لما أنتم عملتم كده؟ فيقولون: يا رب حمدك واسترجع، أي الحمد لله وإنا لله وإنا إليه راجعون. فيقول: يا ملائكتي ابنوا لعبدي بيتاً في الجنة وسموه بيت الحمد. اللي يحمد ربنا عند أعلى مصيبة ياخد بيت الحمد لأنه قدر ينظر إلى ما وراء المصيبة ويحمد الله، ما هو أفعال ربنا كلها محمودة، فاللي يقدر ينفذ بقلبه وبصيرته إلى ما وراء المصيبة ويقول الحمد لله على المصيبة، ده يستحق بيت الحمد. فكل مصيبة ممكن الإنسان يخرج منها ولا يُغبَن. أم سلمة لما كانت بتحب زوجها أبو سلمة، لما توفي أبو سلمة قالوا لها: قولي إنا لله وإنا إليه راجعون، اللهم أجرني في مصيبتي وأجرني خيرًا منها، فقالت: وهل في الدنيا خير من أبي سلمة؟ هو في زي أبو سلمة؟ خلاص أبو سلمة مات، فقالتها برضه، فرزقها الله عز وجل خيرًا من أبي سلمة، رسول الله صلى الله عليه وسلم، أصبحت من أمهات المؤمنين. دي نقطة بالنسبة للمصيبة في التغابن.

نقطة تانية: إن أحيانا الإنسان هيبتلى في الطاعات، فما ينفعش يترك الطاعة لأجل المصائب، كده إنسان مغبون. قالوا: ﴿فَرَأَيْتَ الَّذِي تَوَلَّىٰ وَأَعْطَىٰ قَلِيلًا وَأَكْدَىٰ﴾ [النجم: 33-34]. أكدى يعني إيه؟ قالوا أكدى: يعني واحد كان بيحفر، عايز يحفر نهر مثلًا، وعايز يحفر حاجة في الأرض، فهو بيحفر لقى كدية، يعني لقى صخرة، فساب الحفر ومشي، فكلمة أكدى يعني لقى صعوبة في الطريق فقام سايبه وقام ماشي، فده إنسان مغبون. عشان كده السورة هنا جابت في الجزء التاني نموذجين، نموذج الذي أصاب بمصيبة، وبعض المفسرين قال المصيبة هنا هي الهجرة والجهاد، أشق شيء على الإنسان ترك الوطن وترك الولد وترك المال، أصعب شيء على النفس البشرية، لذلك يقول النبي صلى الله عليه وسلم: إن الشيطان قعد لابن آدم بطرقه كلها، أراد أن يسلم فقال: أتسلم؟ والشيطان بيقول له يا مجنون رايح فين، أتسلم وتذر دينك ودين آبائك وأجدادك؟ فعصاه فأسلم. فأراد أن يهاجر، فقال: أتهاجر وتذر أرضك وسمائك؟ فعصاه فهاجر. فأراد أن يجاهد، فقال: أتجاهد وتموت وتنكح الزوجة ويُنفَق المال ويُيتَّم الأطفال؟ فعصاه فجاهد. فأصعب حاجة الجهاد والهجرة، فدي المصيبة اللي ابتلي بها المسلمين، فمن يؤمن بالله، أي ومن يتبع رضوان الله عز وجل في الهجرة والجهاد يهدِ قلبه ويوفقه ويجعله هادئًا مطمئنًا راضيًا، لكن هؤلاء الذين قعدوا مع أزواجهم وأولادهم، اللي هي الآية اللي بعدها ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَرُوهُمْ﴾ [التغابن: 14]، لأن سبب نزول الآية من أزواجكم وأولادكم.

دول لكم فاحذروهم، إن في ناس مسلمين هاجروا. فجاء بعض المسلمين عايز يهاجر، فمراته وعياله مسكوا: حرام عليك، هتسيبنا لمين؟ هاجروا معنا ونسيب بيتنا لمين؟ هاتوا اللي تقدروا عليه معنا... هأعمل إيه؟

ده هجرة، ده واجب. لازم نفهم إن الدين لازم تضحية، مش كل أوامر الدين هتعملها والجلابية هتفضل مكوية. لازم يكون فيه بذل وفيه تضحية. عايزين نجاهد، أيوه بس لو جاهدت احتمال تتعور، ما أنا عارف.

وافرض مت؟ ما هو طبيعي، ما هو ربنا قال: ﴿وَمَن يُقَاتِلْ فِي سَبِيلِ اللَّهِ يُقْتَلْ أَوْ يُغْلَبْ﴾ [النساء: 74]. أنت ممكن احتمال إنك تموت الأول قبل إنك تنتصر، وده الأصل. واللي مش عارف إيه؟ ما ده الطبيعي، أمال أنت معتقد البذل في الدين؟